ငါက မုဆိုး မင်းက သားကောင် ၂

သို့သော် ၎င်းသည် မည်သည့် အထင်သေးလှောင်ပြောင်မှုမျိုးကိုမျှ မပြသဘဲ နေရာတွင် ငြိမ်သက်စွာ ရပ်နေခဲ့သည်။

နယ်မြေတစ်ခုကို တပ်စွဲစောင့်ကြပ်ရန် တာဝန်ပေးအပ်ခံထားရသော နတ်ဆိုးမဟာစစ်သူကြီး တစ်ဦးအနေဖြင့် နှစ်ပေါင်းများစွာ မည်သည့်ပြဿနာမျှ မရှိခဲ့ဘဲ ယနေ့တိုင် ၎င်း၏ ရာထူးကို ထိန်းသိမ်းထားနိုင်ခဲ့သည်။

ကြီးလေးသော ကိစ္စရပ်များကို ကိုင်တွယ်ဖြေရှင်းရာတွင် ၎င်း၏ တည်ငြိမ်မှုမှာ အပြစ်ဆိုဖွယ်ရာ မရှိပေ။

လှောင်ပြောင်သရော်ရန် ပြိုင်ဘက်၏ ဦးခေါင်းခွံကို ချေမှုန်းပြီးသည့်အချိန်အထိ စောင့်ဆိုင်းထားနိုင်သည်။

"မင်းကိုယ်မင်း ရှင်းပြဖို့ အခွင့်အရေး တစ်ခုပေးမယ်"

အသံသြသြဖြင့် ပြောဆိုပြီးနောက် ဂဏန်းနတ်ဆိုးစစ်သူကြီး၏ ညာဘက်လက်မောင်းသည် အလင်းရောင်များ တောက်ပလာကာ အထစ်အထစ်များပါသော နီမောင်းသည့်လက်မကြီးတစ်ခုအဖြစ်သို့ ပြောင်းလဲသွား၏။

ထိုအချိန်တွင် ၎င်း၏ မျက်လုံးများအတွင်း နတ်ဆိုးစွမ်းအင်များ ပြည့်လျှံလာပြီး ပြိုင်ဘက်၏ အသက်ရှူဖုံးကွယ်ခြင်းနည်းစနစ် ကို ထိုးဖောက်မြင်ပြီးနောက် အမှန်တကယ် အခြေအနေကို ပိုမိုနက်ရှိုင်းစွာ စူးစမ်းနိုင်ရန် အာရုံစိုက်လိုက်သည်။

သို့သော် ၎င်းမည်မျှပင် အကဲခတ်စေကာမူ ထိုလူငယ်လေးမှာ သေလမ်းရှာကာ ကစားနေပုံသာ ပေါ်သည်။

၎င်း၏ အစွမ်းဖြင့်ဆိုလျှင် ပြိုင်ဘက်ကို သတ်ဖြတ်ရန်မှာ လွယ်ကူလှပေ၏။

ထိုလူမိုက်အား ၎င်းကို ကျောခိုင်းရဲလောက်အောင် မည်သူက သတ္တိတွေ ပေးထားသနည်း ဆိုသည်ကို ဂဏန်းနတ်ဆိုးကြီး အမှန်တကယ် နားမလည်နိုင်အောင် ဖြစ်နေသည်။

“…”

နောက်ဆုံးတွင် ရှန်းယီ သည် လှည့်ကြည့်လာပြီး သူ၏ ဖြူဖျော့သော မျက်နှာပေါ်တွင် မည်သည့် ခံစားချက်မျှ မရှိပေ။

သူသည် ဂဏန်းနတ်ဆိုးစစ်သူကြီးကို တိတ်ဆိတ်စွာကြည့်နေပြီးနောက် တစ်စုံတစ်ရာကို အချက်ပြသည့်အလား မေးစေ့ကို ညင်သာစွာ ဆတ်ပြလိုက်၏။

ချက်ချင်းပင် ခိုင်မာတောင့်တင်းသော လက်တစ်စုံသည် ဂဏန်းနတ်ဆိုး၏ဂျိုင်းအောက်မှ တိတ်တဆိတ် ထွက်ပေါ်လာပြီးနောက် ၎င်း၏ ပခုံးများကို ရုတ်တရက်ဖမ်းဆုပ်လိုက်၏။ တစ်ချိန်တည်းမှာပင် အခြားလူတစ်ဦး၏ လက်ဝါးက ၎င်း၏နောက်စေ့ကို ပြင်းထန်စွာ ဖုံးအုပ်လိုက်ပြီး သိပ်သည်းသော ရွှေရောင်ချည်မျှင်များက ၎င်းကို ချက်ချင်း ရစ်ပတ်သွားလေသည်။

"ဘယ်သူလဲ"

ဂဏန်းနတ်ဆိုးစစ်သူကြီးသည် မသိစိတ်မှပင် ၎င်း၏ အနီရင့်ရောင်လက်မကြီးကို မြှောက်ရန် ကြိုးစားလိုက်သော်လည်း တတိယမြောက် လက်တစ်စုံက ၎င်းကို အတင်းအကျပ် ဖိချလိုက်၏။

"ချုံခိုတိုက်ခိုက်တာပဲ" အလျင်အမြန် တုံ့ပြန်တတ်သော ဒုတိယစစ်သူကြီးက အော်ဟစ်လိုက်သော်လည်း သူ၏ နှုတ်မှ စကားလုံးများ အဆုံးမသတ်မီမှာပင် စတုတ္ထမြောက် ပုံရိပ်တစ်ခုက သူ၏ ဦးခေါင်းခွံကိုလက်သီးဖြင့် ထိုးခွဲလိုက်သည်။

မသေဆုံးမီလေးတွင် အကာအကွယ်အစီအရင်ကို ဖောက်ထွက်လာသော သွေးနံ့သင်းသင်းလေးကို ၎င်း နောက်ဆုံးအနေဖြင့် ရှူရှိုက်လိုက်ရ၏။

ဘုန်း

ဒုတိယစစ်သူကြီးများ၏ ဦးခေါင်းခွံများ ပေါက်ကွဲထွက်သွားသော်လည်း ဂဏန်းနတ်ဆိုးစစ်သူကြီးကိုမူ တည်ငြိမ်မှု မပျက်စေခဲ့ပေ။ ၎င်းသည် မဆိုင်းမတွပင် ၎င်း၏ အနှစ်သာရသွေးစွမ်းအင်ကို စတေးလိုက်ရာ ၎င်း၏ အရေပြားပေါ်တွင် မာကျောသော အခွံတစ်ခုထွက်ပေါ်လာပြီး ခန္ဓာကိုယ်မှာလည်း ချက်ချင်း ဖောင်းပွလာတော့သည်။

ထင်ရှားသည်မှာ ဤကျင့်ကြံသူများသည် ကြိုတင်ပြင်ဆင်ပြီးမှ လာခဲ့ကြခြင်းဖြစ်သည်။

၎င်းသည် မဆင်မခြင် မလုပ်ဆောင်ဘဲ ရန်သူကို ဟန့်တားရန် လုံလောက်သော အုတ်အော်သောင်းနင်း ဖြစ်မှုတစ်ခုကို ဖန်တီးကာ အခြား အခွင့်အရေးတစ်ခုကို ရှာဖွေရန် စဉ်းစားလိုက်၏။

"ငါက ကြီးမြတ်တဲ့နတ်ဆိုးကြီး တစ်ကောင်ဆိုတာ မင်းတို့ မေ့နေကြပြီလား" ဟိန်းဟောက်လိုက်သည်နှင့် ဂဏန်းနတ်ဆိုးစစ်သူကြီး၏ နတ်ဆိုးအငွေ့အသက်များ တစ်ဖန် သိသိသာသာ ထူထပ်လာ၏။

ကျင့်ကြံသူတစ်စုက ကျောက်စိမ်းဖြူမြို့တော် နှင့် နှိုင်းယှဉ်နိုင်သော နတ်ဆိုးကြီးတစ်ကောင်ကို ချဉ်းကပ်ဝံ့ခဲ့ကြ၏။

ဤမှားယွင်းသော တွက်ချက်မှုက သူတို့ကို ထာဝရ နောင်တရစေလိမ့်မည်။

သို့သော် ဂဏန်းနတ်ဆိုးစစ်သူကြီးကို ထိတ်လန့်သွားစေသည်မှာ ၎င်း၏ နတ်ဆိုးခန္ဓာကိုယ် စွမ်းအားအပြည့်အဝကို ထုတ်သုံးထားသော်လည်း၊ မူလပုံစံသို့ပြန်ပြောင်းရန် ကြိုးစားသည်ဖြစ်စေ၊ တာအိုစစ်သည်တော် လက်နက်နှင့် နှိုင်းယှဉ်နိုင်သည့် ဂဏန်းလက်မမှသန့်စင်ထားသော ထိုအနီရင့်ရောင်လက်မကြီးကို ထိန်းချုပ်ရန်ကြိုးစားသည်ဖြစ်စေအားလုံးမှာ အတင်းအကျပ် ချုပ်နှောင်ခံလိုက်ရခြင်း ပင်ဖြစ်သည်။

ကျော်ကြားသော နတ်ဆိုးစစ်သူကြီး တစ်ဦးအနေဖြင့်၊၎င်းသည် နေရာတွင် အမှန်တကယ် ရွေ့လျား၍မရအောင် ချုပ်နှောင်ခံလိုက်ရသည်ကို တွေ့ရှိရသဖြင့် ထိတ်လန့်တုန်လှုပ်သွားခဲ့၏။

"မင်းတို့အားလုံး" ဂဏန်းနတ်ဆိုးကြီးသည် မသိစိတ်မှ နောက်သို့လှည့်ကြည့်လိုက်ရာ ရက်စက်ကြမ်းကြုတ်သော လှောင်ပြုံးကိုယ်စီဖြင့် ရင်းနှီးနေသောမျက်နှာလေးခုကို တွေ့လိုက်ရသည်။

"တိုက်ဆိုင်လိုက်တာ၊ ဟုတ်တယ်ငါဘဲလေ"

ဝူကျွင်းက သူ၏ ကြောက်မက်ဖွယ်ကောင်းသော သွားဖြူဖြူများကို ပေါ်အောင်ပြုံးလိုက်ပြီး ရွှေရောင်အစင်းများကို ရုတ်တရက် တင်းကြပ်လိုက်ရာဂဏန်းနတ်ဆိုးကြီး၏ အခွံမှာ ကြေမွလုမတတ် ဖြစ်သွားသည်။

"ငါတို့ တွေဘဲလေ" ကျန်ရှိနေသော ပုံရိပ်သုံးခုသည် သူတို့၏နှုတ်ခမ်းများကို မယုံနိုင်လောက်အောင် ကွေးညွှတ်ကာ ပြုံးလိုက်ကြပြီး နတ်မိစ္ဆာများ တီးတိုးပြောနေသကဲ့သို့တိုးညှင်းပြီး ကြောက်မက်ဖွယ်ကောင်းသော လေမှုတ်သံများကို ထုတ်လွှင့်လိုက်ကြ၏။

ဂဏန်းနတ်ဆိုးကို လှိုင်းလုံးများထဲတွင် နှစ်မြှုပ်ပစ်တော့မည့်အလား လှိုင်းလုံးများက ၎င်းတို့ကို ရစ်ပတ်ထားသည်။

သူတို့သည် နတ်ဆိုးများသာမက ရေနေမျိုးနွယ်စု ဝင်များလည်း ဖြစ်ကြ၏။

ပို၍ အရေးကြီးသည်မှာ ၎င်းတို့တစ်ဦးချင်းစီ၏ ကျင့်ကြံခြင်းမှာ ဂဏန်းနတ်ဆိုးထက် မနိမ့်ကျသကဲ့သို့ သူတို့၏ အသက်ရှုဖုံးကွယ်ခြင်းနည်းစနစ်မှာလည်း ထူးခြားဆန်းပြားလှကာ အသက်မဲ့နေသောကျောက်တုံးများကဲ့သို့ အနောက်ဘက်မှနေ၍ တိတ်ဆိတ်စွာပြိုင်ဘက်ကို ချဉ်းကပ်လာခဲ့ကြခြင်း ဖြစ်သည်။

"မင်းတို့က သစ္စာဖောက်ရဲတယ်ပေါ့..." ဂဏန်းနတ်ဆိုးကြီး၏ အသံမှာ မယုံကြည်နိုင်စရာ တစ်စုံတစ်ရာကို မြင်လိုက်ရသကဲ့သို့ တုန်ယင်လာခဲ့၏။

သို့သော် အကြောင်းရင်းများစွာ ပေါင်းစပ်သွားသောအခါ ၎င်းအတွက် ရလဒ်တစ်ခုတည်းသာ ကျန်တော့သည်။

ခွပ် ခွပ်

ရေနေမျိုးနွယ်စုဝင် တစ်ဦးက ၎င်း၏ ရင်ဘတ်ပေါ်သို့ အားပါပါဖြင့် နင်းချလိုက်ပြီး၊ ဝူကျွင်းက လက်သီးများကို ဝှေ့ယမ်းကာ ဂဏန်းနတ်ဆိုး၏ ကျောပြင်ကို ထုနှက်လိုက်သည်။ ထိုစဉ် ငါးနတ်ဆိုးနှင့် အသားတောင်ပံပိုးကောင် တို့က ၎င်းကို မြေကြီးပေါ်သို့ ဖိချထားပြီး သူတို့၏ နတ်ဆိုးခန္ဓာကိုယ်များအတွင်းရှိ စွမ်းအားများကို ဂဏန်းနတ်ဆိုး၏ အခွံပေါ်သို့ မချန်မချန် သွန်းလောင်းချလိုက်ကြသည်။

ရွှေရောင်အစင်းများမှာ ပို၍ပို၍ တင်းကျပ်လာပြီး၊ ဂဏန်းနတ်ဆိုးကြီးသည် အသက်ရှူကျပ်လာကာ မျက်လုံးများ ပြူးကျယ်လာပြီး ကူကယ်ရာမဲ့ ညည်းတွားသံတစ်ခု ထွက်ပေါ်လာ၏။

"..."

သို့သော် ထိုသို့ ညည်းတွားခွင့်ကိုပင် ဝူကျွင်းက ၎င်း၏ လည်ပင်းကို လက်သီးဖြင့် ထိုးချလိုက်ခြင်းဖြင့် ဖယ်ရှားပစ်လိုက်သည်။

တောက်ပသော သွေးနီရည်များ ပန်းထွက်လာပြီး ဂဏန်းနတ်ဆိုးကို အတင်းအကျပ်ပင်နှုတ်ပိတ်သွားစေ၏။

လေးယောက် တစ်ယောက်၊ ထို့အပြင် ချုံခိုတိုက်ခိုက်ခြင်း ဖြစ်သည်။

ဂဏန်းနတ်ဆိုးကြီး အနေဖြင့် အသက်ရှင်ရန် မည်သည့်အခွင့်အရေးမျှ မတွေးနိုင်တော့ပေ။

၎င်းကို ပို၍ ဇဝေဇဝါ ဖြစ်စေသည်မှာ သူ၏ နယ်မြေသို့ ပြန်ရာလမ်းတွင် သူ့ကို ချုံခိုတိုက်ခိုက်ရန် ဤမျှသေချာစွာ အစီအစဉ်ဆွဲထားသော ရက်စက်သည့် လူများကို သူ ဘယ်တုန်းက စော်ကားမိခဲ့သနည်း ဆိုသည်ပင်။

သို့သော် မည်သူကမျှ သူ့ကို ရှင်းပြလိုပုံ မရပေ။

သို့ဖြစ်၍ ဂဏန်းနတ်ဆိုးကြီးသည် တစ်ယောက်တည်း ရပ်နေသော လူငယ်လေးကို ကြည့်ကာ ကျိန်ဆဲချင်သော်လည်း၊ အသက်ချမ်းသာပေးရန် တောင်းပန်ချင်သော်လည်း အသံထွက်၍ မရနိုင်တော့ပေ။

တစ်ဖက်လူမှာလည်း သူ့ကို တစ်ချက်ထက်ပို၍ ကြည့်ရန်ပင် စိတ်မဝင်စားလောက်အောင် လျစ်လျူရှုထားပုံရပြီး သူ၏ အေးစက်တည်ငြိမ်သော အမူအရာမှာ အရိုးထိအောင် စိမ့်သွားစေ၏။

ဘုန်း ဘုန်း

၎င်း၏ အခွံဖုံးလွှမ်းထားသော ခန္ဓာကိုယ်တစ်ခုလုံး တစ်ဖက်သတ်ထုနှက်ခံရပြီး ပျက်စီးသွားသည့်တိုင်အောင်၊ ၎င်းသည် ကျေနပ်မှုမရှိခြင်းနှင့် နာကြည်းမှုများပြည့်နှက်နေကာ မျက်လုံးအိမ်ထဲမှ ပြုတ်ထွက်မတတ်ပြူးကျယ်စွာ စိုက်ကြည့်နေဆဲပင်။

ရေပြင်ကို တပ်စွဲစောင့်ကြပ်ရန် တာဝန်ပေးအပ်ခံရသော နတ်ဆိုးမဟာစစ်သူကြီး တစ်ဦးသည် ဤမျှ မွန်းကျပ်ဖွယ်ကောင်းသော နည်းလမ်းဖြင့် သေဆုံးသွားရ၏။

ယခုအချိန်အထိပင် ၎င်း၏ ပြိုင်ဘက်က မည်သူမည်ဝါဖြစ်ကြောင်း ၎င်း မသိခဲ့ပေ။

“…”

အစမှအဆုံးတိုင် ရှန်းယီသည် ချောက်ကမ်းပါးအစွန်းတွင်တိတ်ဆိတ်စွာ ရပ်နေပြီး သူ၏ လက်ချောင်းထိပ်လေးများမှ ရွှေရောင်ချည်မျှင်များ ကခုန်နေကာ တိတ်ဆိတ်သော ဇာတ်လမ်းကို အေးစက်စွာ စောင့်ကြည့်နေခဲ့သည်။

နောက်ကျိနေသော သွေးမြူခိုးများသည် ရေထဲတွင်လွင့်မျောနေပြီး မင်ရောင်ဝတ်ရုံနှင့် မထိတွေ့မီ အခိုက်အတန့်တွင် လက်စွပ်အတွင်းသို့ သိမ်းဆည်းခံလိုက်ရ၏။

သူ၏ လက်ချောင်းထိပ်များမှ ရွှေရောင်ချည်မျှင်များအားလုံး ပြန်လည်ရုပ်သိမ်းသွားပြီး ဖုံးကွယ်ခြင်း အစီအရင်ကို ဖယ်ရှားလိုက်မှသာ၊ ရေအောက်ကြမ်းပြင်သည် ၎င်း၏ သားကောင်ကို ရွေးချယ်ရန် ပါးစပ်ဟထားသော အနီရင့်ရောင်သေဆုံးခြင်း နယ်မြေတစ်ခုအဖြစ် ပြောင်းလဲနေပြီး ပြင်းထန်သောအပုပ်နံ့များ ထွက်ပေါ်နေသည်ကို ထင်ရှားစွာ တွေ့မြင်ရတော့သည်။

နိုင်သည်ဖြစ်စေ၊ ရှုံးသည်ဖြစ်စေ ရှန်းယီသည် ကျောက်စိမ်းဖြူမြို့တော် နတ်ဆိုးကြီးတစ်ကောင်နှင့် ထိပ်တိုက်ရင်ဆိုင်ရန် အရည်အချင်း အမှန်တကယ် ရှိပေသည်။

သို့သော် သူ အမဲလိုက်သည့် အခြေအနေသို့ ရောက်သွားတိုင်း...

နတ်ဆိုးကျောက်တိုင်များ ပျက်စီးသွားမည်ကို ဂရုမစိုက်တော့သကဲ့သို့၊ သူ့ကိုယ်သူ အနည်းငယ်မျှသောအန္တရာယ်နှင့် ကြုံတွေ့ခွင့်ပြုမည် မဟုတ်သည့် အခြားလူတစ်ယောက်အဖြစ်သို့ ပြောင်းလဲသွားပုံရသည်။

သူ၏ စိတ်ထဲတွင် အမြတ်အရှုံး တွက်ချက်မှုများသာ ကျန်ရှိတော့သည်။

စစ်မှန်သော မုဆိုးတစ်ယောက်ကဲ့သို့ပင်။

နဂါးနန်းတော်မှာမူ သားကောင်မျှသာ ဖြစ်ပေ၏။

[ဟင်းလင်းပြင်လျှောက်လှမ်းခြင်းအဆင့် အစိမ်းရောင်ဆူးတောင်ငါးကြင်းနတ်ဆိုး တစ်ကောင်ကို သတ်ဖြတ်ပြီး။ စုစုပေါင်း သက်တမ်း ၁၇၀၀၀၀၊ လက်ကျန်သက်တမ်း ၃၈၀၀၀ ၊ စုပ်ယူပြီး]

ဤအဆင့်မြင့် စစ်သည်များကို နဂါးနန်းတော်က အလွန်တန်ဖိုးထားကြပြီး၊ သူတို့၏ ကြွယ်ဝသော အတွေ့အကြုံများကြောင့် ကျန်ရှိနေသော သက်တမ်းမှာပိုမိုတိုတောင်းလာလေ၏။

အစပိုင်းတွင် အရေးမပါဟု ထင်ရသော်လည်း ဤကဲ့သို့သော အသိပေးချက်များသည် ရာဂဏန်းထက်ကျော်လွန်သွားသောအခါ မယုံနိုင်လောက်အောင် ကြောက်မက်ဖွယ်ကောင်းလာသည်။

[လက်ကျန် နတ်ဆိုးသက်တမ်း: ၃၂၃၀၀၀၀]

ရှန်းယီသည် ရေပေါ်ပေါ်နေသော မရေမတွက်နိုင်သည့်အလောင်းများအားလုံးကို လက်စွပ်အတွင်းသို့ သိမ်းဆည်းလိုက်ပြီးနောက်၊ နတ်ဆိုးကျောက်တိုင် လေးတိုင်ကို အလင်းတန်းအဖြစ်သို့ ပြောင်းလဲကာ သူ၏ မျက်ခုံးနှစ်ခုကြားသို့ ပြန်လည်ရုပ်သိမ်းလိုက်သည်။

ဖုံးကွယ်ခြင်းနည်းစနစ်ကို တစ်ဖန် အသုံးပြုပြီးနောက်၊ သူ၏ ဝတ်ရုံရှည်မှာ မင်ရောင်ကဲ့သို့ တလွင့်လွင့်ဖြစ်သွားပြီး တစ္ဆေတစ်ကောင်ကဲ့သို့ ထိုနေရာမှ ပျောက်ကွယ်သွားလေသည်။

ကြည်လင်နေသော ရေပြင်ကိုသာ ချန်ရစ်ထားခဲ့၏။

…

မှိုင်းညို့နေသော ရေအောက်ကြမ်းပြင်တွင်၊

ရှန်းယီသည် တင်ပျဉ်ခွေထိုင်လိုက်ပြီး အချိန်မဖြုန်းတော့ဘဲ နတ်ဆိုးမူလကို စုစည်းရန်နှင့် ဂဏန်းနတ်ဆိုး၏ ဝိညာဉ်ကို ပုံဖော်ရန် အာရုံစိုက်လိုက်၏။ တစ်ချိန်တည်းမှာပင် သူ၏ နတ်ဝိညာဉ်ကို လက်စွပ်အတွင်းသို့ ထည့်သွင်းကာ ရာနှင့်ချီသော ရေနေမျိုးနွယ်စု စစ်သည်များ၏ အလောင်းများကို စတင် ခွဲခြားလေ၏။

ခယ်ရှစ်စန်း ပေးထားသော သတင်းအချက်အလက်များဖြင့် သူသည် နဂါးနန်းတော်၏ အင်အားစုများကို အကြမ်းဖျင်း နားလည်ထားသည်။

နတ်ဆိုးမဟာစစ်သူကြီးတစ်ဦး ဦးဆောင်သော ဤကဲ့သို့သော အင်အားစုကို၊အမှန်တကယ်တွင် ရေပြင်အတွင်း အဆင့်အတန်းယှဉ်ပြိုင်နိုင်ရန် ရေနေမျိုးနွယ်စု အများအပြားက ပေါင်းစပ် ထောက်ပံ့ပေးထားခြင်း ဖြစ်သည်။

ဤအခြေအနေက ရှန်းယီအတွက် အကျိုးကျေးဇူးများကို အကောင်းဆုံးပေးစွမ်းနေ၏။

အဘယ်ကြောင့်ဆိုသော်... သူသည် ခန္ဓာကိုယ်တစ်ခုတည်းမှ မျိုးနွယ်စုတစ်ခုလုံး၏ အင်အားကို စုစည်းထားခြင်းအား အမှန်တကယ်ရရှိနိုင်သောကြောင့် ဖြစ်သည်။

ဤနတ်ဆိုးစစ်သည် ရာဂဏန်းခန့်မှာ အဓိက ရေနေမျိုးနွယ်စုကြီးသုံးခုမှ စစ်သည်များဖြင့် အကြမ်းဖျင်းဖွဲ့စည်းထားခြင်း ဖြစ်သည်။

ရိုးရှင်းစွာ ခွဲခြားပြီးနောက်၊အရေအတွက် အတော်လေးနည်းပါးပြီးနှိုင်းယှဉ်ချက်အရ အားနည်းသော ငါးနတ်ဆိုးတစ်အုပ်မှာ အရေအတွက်ဖြည့်ရန်သာ ပါဝင်ပြီး၊ ထူးခြားသော တာအိုမဏ္ဍိုင်အဆင့်သို့ မြှင့်တင်ရန် အခွင့်အလမ်း အနည်းငယ်သာ ရှိသည်။

ရှန်းယီသည် နတ်ဆိုးကျောက်တိုင် သုံးတိုင်ကို လျင်မြန်စွာ ဖန်တီးလိုက်၏။

တကယ်တမ်းစဉ်းစားကြည့်လျှင် ဟင်းလင်းပြင်လျှောက်လှမ်းခြင်းအဆင့် မှ ကျောက်စိမ်းဖြူမြို့တော်အဆင့်အထိ မြှင့်တင်ထားသော ဝူကျွင်းကဲ့သို့ နတ်ဆိုးကျောက်တိုင်များကို ဖန်တီးခြင်းမှာ အတော်လေး ဆုံးရှုံးမှုများပေ၏။

နတ်ဆိုးတစ်ကောင်၏ ဝိညာဉ်အဆင့်ကို အတင်းအကျပ်မြှင့်တင်ခြင်းက နတ်ဆိုးမူလကို ပိုမို သုံးစွဲရမည်မှာ သေချာသည်။

သို့သော် အမှန်တကယ်တော့ ထိုသို့မဟုတ်ပေ။

ယခု ရှန်းယီ အလိုအပ်ဆုံးအရာမှာ အချိန်နှင့် လူအင်အားပင်။ နဂါးနန်းတော်မှ တုံ့ပြန်မှု မလုပ်မီ နတ်ဆိုးသက်တမ်းများကို တတ်နိုင်သမျှ များများ ရှာဖွေရမည်ဖြစ်လေသည်။

စုစုပေါင်း နတ်ဆိုးမူလ တစ်ရာ့ဆယ့်ခုနစ်ခု ကုန်ဆုံးသွား၏။

[ လက်ကျန် နတ်ဆိုးသက်တမ်း: ၂၀၆၀၀၀၀]

ဤမျှကြီးမားသော ကုန်ကျစရိတ်က သိသာထင်ရှားသောအကျိုးအမြတ်ကို ဆောင်ကြဉ်းပေးခဲ့သည်။

ဂဏန်းနတ်ဆိုးစစ်သူကြီး အပါအဝင် နတ်ဆိုးကျောက်တိုင် သုံးတိုင်လုံးသည် သူ၏ အနောက်တွင် တိတ်ဆိတ်စွာ ရပ်နေကြ၏။

အတင်းအကျပ်စုစည်းထားသော နတ်ဆိုးကြီး နှစ်ကောင်သည် ကျောက်စိမ်းဖြူမြို့တော် ကျင့်ကြံခြင်းအဆင့်တွင် ရှိသော်လည်း၊ ၎င်းတို့၏ အငွေ့အသက်မှာ အနည်းငယ်အားနည်းနေပြီး မြို့တစ်မြို့၏ အဆင့်သို့သာ ရောက်ရှိသည်မှာ ထင်ရှားသည်။

သို့သော် ၎င်းမှာ ပုံမှန်ပင်။ ရွှေရောင်အစင်းပါ လိပ်နတ်ဆိုးကဲ့သို့သော နဂါးမျိုးဆက်တစ်ကောင်ကို လွတ်လပ်စွာထောက်ပံ့နိုင်စွမ်းမှာ ရေနေမျိုးနွယ်စုတိုင်းတွင် ရှိသည်မဟုတ်ပေ။

သို့သော် အရေးမကြီးပေ။

ဤတစ်ကြိမ်အတွက်သာ ဖြစ်ပြီး ထွက်ခွာသွားပြီးနောက်တွင် ၎င်းတို့သည် နန်းတော် အလှဆင်ပစ္စည်းသက်သက်သာဖြစ်သွားမည်ဖြစ်သည်။

၎င်းကို စိတ်ထဲထားလျက် ရှန်းယီသည် ၎င်းတို့အားလုံးကို သူ၏ မျက်ခုံးနှစ်ခုကြားသို့ သိမ်းဆည်းလိုက်၏။

သူသည် ယခင်က ယန်ရှန်းချင်း ပေးထားသော ကျောက်စိမ်းပြား ကို ထုတ်ယူလိုက်သည်။

အမြည်းစားရုံသက်သက်ဖြင့် သူ၏ အစာစားချင်စိတ်ကို မပြေပျောက်စေနိုင်ပေ။

ဤနေရာသို့ လာရခြင်းအတွက် ရှန်းယီတွင် အလွန် ရိုးရှင်းသော ရည်ရွယ်ချက်တစ်ခု ရှိလေ၏။

သူသည် ဤရခဲလှသော အခွင့်အရေးကို အသုံးချကာ... ဟင်းလင်းပြင်လျှောက်လှမ်းခြင်းအဆင့်တစ်ခုလုံးကို တစ်ဟုန်ထိုး လျှောက်လှမ်းချင်ခဲ့ခြင်း ဖြစ်သည်။