အခန်း (၅၄၉-၅၅၀)

အခန်း ၅၄၉ - စကြဝဠာ ဖန်ဆင်းခြင်း ကိစ္စရပ်

"မြင့်မြတ်သောနှလုံးသား ဓားတာအို..."

လုံကျွင်းက ထိုဓားသိုင်းအမည်ကို တွေးတောလိုက်မိပြီး တစ်စုံတစ်ခုကို သတိရသွားသကဲ့သို့ သူ၏ မျက်လုံးများ အရောင်လက်သွား၏။

သတ်ဖြတ်ခြင်းဓားဘိုးဘေးက လီယကို သူ၏ နောက်ကျောဘက်သို့ ဆွဲပို့လိုက်ပြီးနောက် လုံကျွင်းကို ရင်ဆိုင်လိုက်သည်။ သူ၏ ခန္ဓာကိုယ်မှ ဓားစိတ်ဆန္ဒများ ထွက်ပေါ်လာပြီး ကောင်းကင်ယံ တစ်ခွင်လုံး၏ အရောင်ကိုပင် ပြောင်းလဲသွားစေ၏။ ထူထဲသော တိမ်တိုက်များက အလျင်အမြန် လိမ့်တက်လာကြပြီး ကောင်းကင်ကြီးကို လျင်မြန်စွာ မည်းမှောင်သွားစေသည်။

လုံကျွင်းက သတိပြန်ဝင်လာပြီး သတ်ဖြတ်ခြင်းဓားဘိုးဘေးကို ကြည့်ကာ ပြောလိုက်၏။ "မင်းရဲ့ ဓားတာအိုက သန်မာပါတယ်။ ဒါပေမဲ့ မင်းက မူလခန္ဓာကိုယ်နဲ့ ရောက်နေတာ မဟုတ်ဘူးပဲ"

ထိုစကားကို ကြားသောအခါ သတ်ဖြတ်ခြင်းဓားဘိုးဘေး၏ မျက်နှာထားက အနည်းငယ် ပြောင်းလဲသွားသည်။

ချွင်

လုံကျွင်းက ဓားကို ဆွဲထုတ်လိုက်ရာ ဓားသွားက သတ်ဖြတ်ခြင်းဓားဘိုးဘေး၏ လည်ပင်းနားသို့ ရောက်ရှိသွား၏။ သူ၏ ဓားဆွဲထုတ်မှု မြန်ဆန်လွန်းလှသဖြင့် သတ်ဖြတ်ခြင်းဓားဘိုးဘေးမှာ တုံ့ပြန်ချိန်ပင် မရလိုက်ချေ။

လီယလည်း လန့်ဖျပ်သွားပြီး ထာဝရကိုးပါး မြင့်မြတ်နှလုံးသားဓားကို ချက်ချင်း မြှောက်ကာ အသင့်အနေအထား ပြင်လိုက်သည်။

"ခေတ်ကာလတွေ ဒီလောက် ကြာသွားတာတောင်မှ အထွတ်အထိပ်မိစ္ဆာနယ်မြေက အသက်ရှင်ဖို့ ကြိုးစားနေတုန်းပဲလို့ ဘယ်သူ ထင်မှာလဲ။ ငါ့ရဲ့ ဓားစိတ်ဆန္ဒက မင်းရဲ့ မူလခန္ဓာကိုယ်ဆီ ရောက်အောင် သွားနိုင်တယ်ဆိုတာ မင်း ယုံမလား"

လုံကျွင်းက လျစ်လျူရှုထားသည့် ပုံစံဖြင့် ပြောလိုက်ရာ သတ်ဖြတ်ခြင်းဓားဘိုးဘေး၏ မျက်နှာမှာ ပို၍ အရုပ်ဆိုးသွား၏။

လီယက အံကို ကြိတ်၍ မေးလိုက်သည်။ "ခင်ဗျားက ဘယ်သူလဲ။ ဘာလိုချင်တာလဲ။ ကျွန်တော့်ရဲ့ ဓားတာအိုကို လိုချင်နေတာလား"

လုံကျွင်းက သူ့ကို တစ်ချက်ကြည့်၍ ပြောလိုက်၏။ "ငါကလည်း ဓားကျင့်ကြံသူ တစ်ယောက်ပါပဲ... မင်းရဲ့ ဓားတာအိုကို စိတ်ဝင်စားမိရုံပါ... ဒါပေမဲ့ မင်းတို့က တာအိုသူခိုးတွေ ဖြစ်နေပုံရတယ်... မင်းတို့ ဘာပဲ ကြံစည်နေနေ မှတ်ထားလိုက်ပါ... ကမ္ဘာကြီးကို သတ်ဖြတ်ပြီး ဖျက်ဆီးတဲ့ အလုပ်မျိုး မလုပ်မိစေနဲ့... မဟုတ်ရင် မင်းတို့ ဘယ်တော့မှ ပြန်နာလန်ထူနိုင်မှာ မဟုတ်ဘူး"

ထိုသို့ ပြောပြီးနောက် လုံကျွင်းက ဓားကို ပြန်သိမ်း၍ ထွက်ခွာရန် ပြင်လိုက်သည်။

လီယက ထပ်မေးချင်သော်လည်း သတ်ဖြတ်ခြင်းဓားဘိုးဘေးက တားဆီးလိုက်၏။

"ဟမ် ကောင်းကင်တက်လှမ်းခြင်းနှောင်ဖွဲ့ကင်းအမတက ဒီလောက်ထိ ဖိနှိပ်ရဲလိမ့်မယ်လို့ ထင်မထားဘူး"

သရော်သံ တစ်ခု ထွက်ပေါ်လာပြီး ကောင်းကင်နှင့် မြေကြီးကြားရှိ အပူချိန်မှာ ချက်ချင်း ကျဆင်းသွားသည်။ လုံကျွင်းက မျက်လုံးများကို ကျဉ်းမြောင်းကာ မော့ကြည့်လိုက်ရာ သူ၏ အကြည့်များတွင် သတ်ဖြတ်လိုသော အငွေ့အသက်များ ပြည့်နှက်သွား၏။

ပင်လယ်နက်၏ နက်ရှိုင်းသော နေရာ၊ ပုန်းကွယ်စိတ်ဝိညာဉ်နန်းတော်။

ကုအန်သည် စာအုပ်တစ်အုပ်ကို ကိုင်ရင်း လှုပ်ကုလားထိုင်ပေါ်တွင် လှဲနေသည်။ ပင်လယ်နက်နဂါးငါးကြင်း၊ ချန်လော့နှင့် ရွှီလင်တို့သည် သူ၏ ဘေးတွင် တရားထိုင်နေကြပြီး ဆန်းကြယ်စွမ်းရည်များကို လေ့ကျင့်နေကြ၏။

"ဒီကောင်လေးကတော့..."

လုံကျွင်းသည် သတ်ဖြတ်ခြင်းနတ်ဘုရားဧကရာဇ်၏ လက်အောက်ငယ်သား တစ်ဦးနှင့် တိုက်ခိုက်နေသည်ကို ကုအန် မြင်လိုက်ရ၏။ သူ၏ လုပ်ရပ်များက အနည်းငယ် လွန်ကဲနေသည်ဟု ခံစားလိုက်ရသည်။

သတ်ဖြတ်ခြင်းနတ်ဘုရားဧကရာဇ်က စစ်ခုံရုံးနှင့် ပတ်သက်နေသည်ကို သိလျက်နှင့် လုံကျွင်းက ဘာကြောင့် သူ့ကိုယ်သူ ဖော်ပြရဲနေရသနည်း။

လုံကျွင်းက လုံချင်း လေ့ကျင့်ပြီးသည်အထိ ဆန်းကြယ်စွမ်းရည်များ လက်ဆင့်ကမ်းပေးရန်သာ လာရောက်ခြင်း ဖြစ်သည်ဟု ကုအန်က အစောပိုင်းတွင် ထင်မှတ်ထားခဲ့သည်။ လုံကျွင်းက ဤမျှ စိတ်လိုက်မာန်ပါ လုပ်လိမ့်မည်ဟု ထင်မှတ်မထားခဲ့ချေ။

နေပါဦး…ဒီကောင်လေးမှာ တခြား အကြံအစည်များ ရှိနေမလား။

ကုအန်သည် ဤတိုက်ပွဲကို စိတ်ဝင်စားသွား၏။ လုံကျွင်း မည်သို့ အဆုံးသတ်မည်ကို သူ ကြည့်ချင်သွားသည်။ သတ်ဖြတ်ခြင်းနတ်ဘုရားဧကရာဇ်၏ လက်အောက်ငယ်သားသည်လည်း ကောင်းကင်တက်လှမ်းခြင်းနှောင်ဖွဲ့ကင်းအမတ အဆင့် ရှိပြီး သတ်ဖြတ်ခြင်းနတ်ဘုရားဧကရာဇ်၏ နောက်လိုက်များထဲတွင် အစွမ်းအထက်ဆုံးဟု သတ်မှတ်ခံထားရသူ ဖြစ်သည်။ သူနှင့် လုံကျွင်းတို့သည် သူတို့၏ နယ်ပယ်အစွမ်းများဖြင့် တိုက်ခိုက်ကြပြီး ကောင်းကင်စိတ်ဝိညာဉ်နယ်မြေကို ထိခိုက်မှု မရှိစေခဲ့ပေ။

လီယ၏ မြင်ကွင်းထဲတွင်မူ ထိုနှစ်ယောက်သည် လှုပ်ရှားခြင်း မရှိဘဲ အဝေးမှနေ၍ တစ်ယောက်နှင့် တစ်ယောက် ရင်ဆိုင်နေကြခြင်းသာ ဖြစ်သည်။ လက်တွေ့တွင်မူ သူတို့သည် တစ်ခဏအတွင်း အကြိမ်ပေါင်း မရေမတွက်နိုင်အောင် တိုက်ခိုက်ခဲ့ကြပြီး သူတို့၏ စွမ်းအားများက သူတို့၏ နယ်ပယ်များအတွင်း၌သာ ဖြစ်ပေါ်နေ၏။

သတ်ဖြတ်ခြင်းနတ်ဘုရားဧကရာဇ်၏ လက်အောက်ငယ်သား ဖြစ်စေ၊ လုံကျွင်း ဖြစ်စေ နှစ်ယောက်စလုံးက သူတို့၏ လှုပ်ရှားမှုများကို သတိထားနေကြသည်။ သူတို့က တစ်ယောက်ကို တစ်ယောက် သတိထားနေကြခြင်း မဟုတ်ဘဲ ကောင်းကင်စိတ်ဝိညာဉ်နယ်မြေကို ဖိနှိပ်ထားသည့် အစွမ်းအထက်ဆုံး ဖြစ်တည်မှုကို သတိထားနေကြခြင်း ဖြစ်သည်။

နောက်ဆုံးတွင် သတ်ဖြတ်ခြင်းနတ်ဘုရားဧကရာဇ်၏ လက်အောက်ငယ်သားမှာ အမြီးကုပ်၍ ထွက်ပြေးသွားရပြီး လုံကျွင်းလည်း ပျောက်ကွယ်သွားတော့သည်။

ဤတိုက်ပွဲသတင်းက သတ်ဖြတ်ခြင်းနတ်ဘုရားဧကရာဇ်၏ နားထဲသို့ မုချ ရောက်သွားမည် ဖြစ်ရာ သူ မည်သို့ တုံ့ပြန်မည်ကို ကုအန် စောင့်ကြည့်ချင်နေ၏။

သက်တမ်း ၁၀၀ ဘီလီယံ ပြည့်ပြီးနောက် အဆင့်တက်လှမ်းရန်နှင့် ထို့နောက်တွင် သတ်ဖြတ်ခြင်းနတ်ဘုရားဧကရာဇ်ကို ရှင်းလင်းရန် ကုအန် စီစဉ်ထားသည်။ ထိုအချိန် မရောက်ခင်အထိ သတ်ဖြတ်ခြင်းနတ်ဘုရားဧကရာဇ်ကို စိတ်လိုက်မာန်ပါ မလှုပ်ရှားစေလိုပေ။

သတ်ဖြတ်ခြင်းနတ်ဘုရားဧကရာဇ်ကလည်း သူ့ကို သတိထားနေပြီး လုံချင်းကို အရေးယူခြင်း မရှိသေးသည်မှာ ထင်ရှား၏။ ထို့ကြောင့် ကုအန်သည် စောင့်ကြည့်သည့် သဘောထားကိုသာ ဆက်လက် ထိန်းသိမ်းထားလိုက်သည်။

လအနည်းငယ် ကြာပြီးနောက် သတ်ဖြတ်ခြင်းနတ်ဘုရားဧကရာဇ် စတင် လှုပ်ရှားလာသည်။ သူသည် တာအိုဆရာ တစ်ပါးအသွင် ပြောင်းလဲ၍ သတ်ဖြတ်ခြင်းဓားဘိုးဘေးနှင့် လီယတို့ကို သွားရောက် ဆက်သွယ်လိုက်၏။

သူကလည်း မြင့်မြတ်သောနှလုံးသား ဓားတာအိုကို စိတ်ဝင်စားနေခြင်း ဖြစ်သည်။

လုံကျွင်းက ရည်ရွယ်ချက်ရှိရှိ လုပ်ဆောင်ခဲ့ပြီး သတ်ဖြတ်ခြင်းနတ်ဘုရားဧကရာဇ်၏ အာရုံကို လီယထံသို့ ပြောင်းသွားစေချင်သည်များ ဖြစ်နေမလား။

လုံကျွင်း၏ တာအိုကျင့်ကြံမှုဖြင့် ကုအန်ကို အကဲမခတ်နိုင်လျှင်ပင် လီယ၏ အတိတ်ကို သေချာပေါက် ဟောကိန်းထုတ်နိုင်မည် ဖြစ်ပြီး အခြားသူများ ပြောစကားမှ တစ်ဆင့် လီယ၏ အတွေ့အကြုံများကို သိရှိနိုင်မည် ဖြစ်သည်။ လီယက ကုအန်၏ အမွေအနှစ်ကို ရရှိထားကြောင်း သိရှိရန်မှာ မခက်ခဲပေ။

"ဒါဆို မင်းက သတ်ဖြတ်ခြင်းနတ်ဘုရားဧကရာဇ်ကို ဆန့်ကျင်ဖို့ ငါ့ကို အသုံးချချင်နေတာပေါ့" ကုအန်က ဆေးဖက်ဝင်အပင်များကို တိတ်တဆိတ် ခူးယူရင်း တွေးလိုက်မိသည်။ သူ ဒေါသမထွက်ပေ၊ မည်သို့ပင် ဆိုစေကာမူ လုံကျွင်းက သူ၏ မြေး ဖြစ်ပြီး လုံကျွင်း၏ ကြံစည်မှုကလည်း လုံချင်းကို ကာကွယ်ရန်အတွက်သာ ဖြစ်၏။

သို့သော်လည်း လုံကျွင်းက လီယ၏ ဘဝ အကြောင်းရင်းနှင့် အကျိုးဆက်ကို မြင်နိုင်သည် ဆိုပါက သတ်ဖြတ်ခြင်းနတ်ဘုရားဧကရာဇ်လည်း ထိုနည်းတူ လုပ်ဆောင်နိုင်ပေလိမ့်မည်။ သတ်ဖြတ်ခြင်းနတ်ဘုရားဧကရာဇ်က လီယကို အတင်းအကျပ် မဖိအားပေးခဲ့ပေ။ ထိုအစား သူက ဆန်းကြယ်စွမ်းရည်များဖြင့် လဲလှယ်ရန် ကမ်းလှမ်းခဲ့သည်။ သူ ထုတ်ပေးလိုက်သော ဆန်းကြယ်စွမ်းရည်များက သတ်ဖြတ်ခြင်းဓားဘိုးဘေးကိုပင် ဆွဲဆောင်နိုင်ခဲ့ပြီး နောက်ဆုံးတွင် သတ်ဖြတ်ခြင်းနတ်ဘုရားဧကရာဇ်သည် လီယနှင့် ပူးပေါင်း၍ မြင့်မြတ်သောနှလုံးသား ဓားတာအိုကို လေ့လာခွင့် ရရှိသွားတော့သည်။

ကုအန်ကမူ အခြေအနေများ ရှုပ်ထွေးကုန်ပြီဟု ခံစားလိုက်ရ၏။

သူသည် သတ်ဖြတ်ခြင်းနတ်ဘုရားဧကရာဇ်နှင့် ပြန်လည်သင့်မြတ်ရန် မဖြစ်နိုင်သော်လည်း ထိုနတ်ဘုရားဧကရာဇ်က အန်ဟောင်နှင့်ရော လီယနှင့်ပါ ဆက်ဆံရေး ကောင်းမွန်နေခဲ့၏။

ဤကမ္ဘာ၏ အကြောင်းရင်းနှင့် အကျိုးဆက်မှာ အမှန်တကယ်ပင် ရှုပ်ထွေးလှသည်။ တစ်စုံတစ်ယောက်၏ နယ်ပယ် မည်မျှပင် မြင့်မားပါစေ၊ ကံတရားနှင့် အမြဲတစေ ငြိတွယ်နေရစမြဲပင်။

...

စကြဝဠာ ကြယ်တာရာ ကောင်းကင်အောက်တွင် ကောင်းကင်တာအိုရွှေအမြုတေက ဆက်လက် တောက်လောင်နေပြီး ၎င်း၏ ရောင်ခြည်များက ထာဝရ တည်တံ့နေမည့်ပုံ ပေါက်နေ၏။

ကောင်းကင်တာအိုရွှေအမြုတေ၏ ရှေ့တွင်ဧကရာဇ်ယန်ရှင်းက ဖြည်းညင်းစွာ မတ်တတ်ရပ်လိုက်ပြီး ဘေးတွင် တရားထိုင်နေသော အန်ဟောင်ကလည်း မျက်လုံးဖွင့်၍ သူ့ကို မော့ကြည့်လိုက်သည်။

"ငါတို့ ဆက်စောင့်လို့ မရတော့ဘူး... မဟာကောင်းကင်နှင့် မြေပြင် ရဲ့ ကံကြမ္မာက အပိုင်းပိုင်း ကွဲနေပြီ... ဒီအတိုင်းသာ ဆက်သွားရင် အမတမင်းဆက်ရဲ့ ကံကြမ္မာက နောက်ဆုံးမှာ တိုက်စားခံရလိမ့်မယ်"

ဧကရာဇ်ယန်ရှင်းက ရေရွတ်လိုက်သည်။ အမတမင်းဆက်နှင့် မြင့်မြတ်ခုံရုံးကြား ပဋိပက္ခက ယနေ့အထိ ဆက်လက် တည်ရှိနေပြီး နှစ်ဖက်စလုံး၏ ကံကြမ္မာများ ကြီးထွားလာခဲ့သည်။ သို့သော်လည်း လက်တွေ့တွင်မူ ဧကရာဇ်ယန်ရှင်းသည် ပြင်ပကောင်းကင်မှ ဖြစ်တည်မှု တစ်ခုက အမတမင်းဆက်နှင့် မြင့်မြတ်ခုံရုံး နှစ်ခုစလုံးအတွင်းသို့ စိမ့်ဝင်နေသည်ကို ခံစားနေရ၏။ အံ့ဖွယ်တစ်ခုတည်းဖြင့် အင်အားကြီး နှစ်ခုစလုံး၏ ကံကြမ္မာများ အလွယ်တကူ လုယူခံလိုက်ရနိုင်သည်။

အမှန်တကယ်လည်း ထိုအတိုင်း ဖြစ်ပျက်နေခြင်း ဖြစ်သည်။ သူ၏ နှစ်ပေါင်းတစ်ထောင်ကြာ တံခါးပိတ် ကျင့်ကြံမှု ပြီးနောက် အမတမင်းဆက်တွင် တာဝန်ယူမည့်သူ လိုအပ်လာခဲ့ရာ ပြင်ပကောင်းကင်မှ အင်အားစုများအတွက် အခွင့်အရေးများစွာ ပေါ်ပေါက်လာခဲ့သည်။

အမတမင်းဆက်အတွင်း၌ သူ့ထက် သန်မာသော ဖြစ်တည်မှု တစ်ခု ရှိနေသည်ကို သူ အာရုံခံမိသည်။ ထို့ကြောင့် ကောင်းကင်တာအိုရွှေအမြုတေ၏ တည်နေရာ ပေါက်ကြားသွားမည်ကို စိုးရိမ်သဖြင့် ကိုယ့်ကိုကိုယ် ထုတ်ဖော်ရန် တွန့်ဆုတ်နေခဲ့ခြင်း ဖြစ်၏။

အန်ဟောင်က ဧကရာဇ်ယန်ရှင်းကို မျက်မှောင်ကြုတ် ကြည့်လိုက်ပြီး ပြောလိုက်သည်။ "ခင်ဗျားရဲ့ လက်ရှိ ကျင့်ကြံမှု အဆင့်နဲ့ အဲဒီကိစ္စကို ပြီးမြောက်အောင် လုပ်ဖို့ဆိုတာ ကျွန်တော် ထင်တာတော့..."

ဧကရာဇ်ယန်ရှင်းက ကောင်းကင်တာအိုရွှေအမြုတေကို ကြည့်လိုက်ပြီး ပြောလိုက်၏။ "မဟာကပ်ဘေးကြီး မရောက်လာခင်တုန်းက မဟာကောင်းကင်နှင့် မြေပြင် ရဲ့ အမြင့်ဆုံး နယ်ပယ်က လွတ်ငြိမ်းရာ အမတနယ်ပယ် ပဲ ရှိခဲ့တယ်... အဲဒါက မဟာကောင်းကင်နှင့် မြေပြင်က လွတ်ငြိမ်းရာအမတ တစ်ပါးကိုပဲ ဖန်ဆင်းနိုင်တယ် ဆိုတာ ပြသနေတာပဲ... အခု ငါက လွတ်ငြိမ်းရာအမတအဆင့်ကို ကျော်လွန်သွားပြီ ဆိုတော့ ငါ့အနေနဲ့ အောင်မြင်အောင် လုပ်ဖို့ မဖြစ်နိုင်တာ မဟုတ်တော့ဘူး"

အန်ဟောင်က မေးလိုက်သည်။ "တကယ်လို့ ခင်ဗျား ကျရှုံးသွားရင်ရော..."

ဧကရာဇ်ယန်ရှင်းက သူ့ကို တစ်ချက်ကြည့်၍ ပြောလိုက်၏။ "အဲဒါဆိုရင်တော့ မင်း ဆက်လုပ်ရမှာပေါ့..."

အန်ဟောင်၏ မျက်နှာထားက တည်ငြိမ်နေပြီး ပြန်ပြောလိုက်သည်။ "တကယ်လို့ ကျွန်တော် လုပ်ရမယ်ဆိုရင် ကျွန်တော် အောင်မြင်ပြီးသွားတဲ့အခါ အမတမင်းဆက်က ကောင်းကင်နှင့် မြေကြီးရဲ့ အဓိပတိ အင်အားစု ဖြစ်လာတော့မှာ မဟုတ်ဘူး..."

"ငါ ကောင်းကောင်း သိပါတယ်... ဒါပေမဲ့ ငါ ကျရှုံးသွားတာက အမတမင်းဆက်ရဲ့ ကံကြမ္မာ အဆုံးသတ်သွားပြီ ဆိုတာကို ပြသနေတာပဲ... မင်း လုပ်ရမှာက မဟာကောင်းကင်နှင့် မြေကြီးက သက်ရှိတွေကို ကာကွယ်ပေးဖို့ပဲ" ထိုသို့ ပြောပြီးနောက် ဧကရာဇ်ယန်ရှင်းက ကောင်းကင်တာအိုရွှေအမြုတေဆီသို့ လှမ်းသွားလိုက်သည်။

အန်ဟောင်က မတ်တတ်ရပ်လိုက်ပြီး ဧကရာဇ်ယန်ရှင်း ကောင်းကင်တာအိုရွှေအမြုတေအတွင်းသို့ ဝင်ရောက်သွားသည်ကို ကြည့်နေလိုက်သည်။ ပြင်းထန်သော မီးတောက်များက သူ့ကို လျင်မြန်စွာ ဝါးမြိုသွား၏။

ဤမြင်ကွင်းက အန်ဟောင်၏ စိတ်ထဲတွင် မျှော်လင့်ချက်များ ပြည့်နှက်သွားစေသည်။ ဧကရာဇ်ယန်ရှင်း၏ နယ်ပယ်အဆင့်ဖြင့် ကောင်းကင်နှင့် မြေကြီးကို ဖန်ဆင်းခြင်း ကိစ္စရပ်အား ပြီးမြောက်အောင် လုပ်ဆောင်နိုင်မည်လော ဆိုသည်ကို သူလည်း သိချင်မိသည်။

ဧကရာဇ်ယန်ရှင်း၏ ပုံရိပ်သည် ကောင်းကင်တာအိုရွှေအမြုတေထဲသို့ လုံးဝ ပျောက်ကွယ်သွားသည်နှင့် ကောင်းကင်တာအိုရွှေအမြုတေ၏ ရွှေရောင်မီးတောက်များက ရုတ်တရက် ရပ်တန့်သွား၏။

အခြားတစ်နေရာတွင်..

သက်တမ်းတာအိုနယ်မြေ အတွင်း၌ ဖြစ်သည်။

ရေတံခွန်တစ်ခု၏ ရှေ့တွင် ကုအန်သည် ရှန်ကျန်းနှင့်အတူ ပန်းချီဆွဲနေစဉ် ရုတ်တရက် တစ်စုံတစ်ခုကို ခံစားလိုက်မိသဖြင့် မော့ကြည့်ကာ မျက်မှောင်ကြုတ်လိုက်သည်။

ရှန်ကျန်းက သူ့ကို ကြည့်လိုက်ပြီး သူ မော့ကြည့်နေသည်ကို မြင်သောအခါ လိုက်ကြည့်လိုက်၏။ ဘာဖြစ်တာလဲဟု သူမ မေးတော့မည့်ဆဲဆဲတွင် သူမ၏ မျက်ဝန်းအိမ်များ ကျယ်သွားသည်။

ပြာလဲ့သော ကောင်းကင်ထက်၌ နေမင်းတစ်စင်း ရုတ်တရက် ပေါ်ပေါက်လာပြီး အလျင်အမြန် ကြီးထွားလာသည်။

သူတို့တင် မကဘဲ မဟာကောင်းကင်နှင့် မြေပြင် တစ်ခုလုံးရှိ သက်ရှိများအားလုံး ဤမြင်ကွင်းကို မြင်လိုက်ရသဖြင့် အားလုံးအကြား ဆွေးနွေးငြင်းခုံမှုများ ဖြစ်ပေါ်လာကြ၏။

ကြီးမားသော ဖိအားတစ်ခုက ကောင်းကင်နှင့် မြေကြီးကို လွှမ်းခြုံသွားပြီး တိတ်ဆိတ်ငြိမ်သက်သွားစေသည်။

ရှန်ကျန်းက မမေးဘဲ မနေနိုင်တော့ချေ။ "အဲဒါ ဘာကြီးလဲ..."

ကုအန်က တိုးတိုးလေး ပြန်ဖြေလိုက်၏။ "အမတမင်းဆက်ရဲ့ အရှင်သခင်... ဧကရာဇ်ယန်ရှင်းပဲ"

ပြီးတော့ ကောင်းကင်တာအိုရွှေအမြုတေ

ရှန်ကျန်းက အံ့အားသင့်စွာဖြင့် မေးလိုက်သည်။ "ဧကရာဇ်ယန်ရှင်း... သူက ဘာလုပ်ဖို့ ရည်ရွယ်နေတာလဲ"

ကုအန်က ဖုံးကွယ်မထားဘဲ ဖြေလိုက်၏။ "သူက မဟာကောင်းကင်နှင့် မြေပြင် ကို မူလ အခြေအနေအတိုင်း ပြန်ဖြစ်အောင် လုပ်ချင်နေတာ..."

အခန်း ၅၅၀ ကောင်းကင်တာအို၏ ဆန္ဒကို ကိုယ်စားပြုသော ဖြစ်တည်မှု

ဧကရာဇ်ယန်ရှင်းသည် ကောင်းကင်တာအို အလင်းလွှာထက်၌ ပေါ်ထွက်လာပြီး တောက်ပသော နေမင်းတစ်စင်းအသွင် ပြောင်းလဲသွားရာ သက်ရှိအားလုံး သူ၏ တောက်ပမှုကို မြင်တွေ့လိုက်ရသည်။

သူ၏ ကြီးမားသောစွမ်းအားသည် မဟာကောင်းကင်နှင့် မြေပြင် တစ်ခုလုံးကို လွှမ်းခြုံထားပြီး စကြဝဠာ၏ နက်ရှိုင်းသော နေရာများအထိပင် ပျံ့နှံ့ရောက်ရှိသွား၏။ သူ၏ နောက်ကျောတွင် ပြင်းထန်သော မီးတောက်များက ကောင်းကင်တာအိုရွှေအမြုတေ ပုံသဏ္ဌာန်အဖြစ် စုစည်းသွားကြသည်။ ဤရွှေအမြုတေသည် ကောင်းကင်စိတ်ဝိညာဉ် မဟာကောင်းကင်နှင့် မြေပြင် အထက်ရှိ နေမင်း ခုနစ်စင်းထက်ပင် ပိုမို ကြီးမားနေသေးသည်။

ကောင်းကင်နှင့် မြေကြီးမှ ပုံရိပ်များ ပျံသန်းထွက်ခွာလာကြပြီး ဧကရာဇ်ယန်ရှင်းကို ကြောက်ရွံ့စွာ ကြည့်လိုက်ကြ၏။

သို့သော်လည်း ဧကရာဇ်ယန်ရှင်း၏ ကြီးမားသော အရှိန်အဝါနှင့် ရင်ဆိုင်ရသောအခါ မည်သူကမှ သူ့အနားသို့ မကပ်ရဲကြချေ။

"သူက ဘယ်သူလဲ..."

"အမတမင်းဆက်ရဲ့ အရှင်သခင်... ဧကရာဇ်ယန်ရှင်းပဲ... သူက ဘာလုပ်ဖို့ ကြိုးစားနေတာလဲ"

"သိပ်ကို အားကောင်းတဲ့ အရှိန်အဝါပဲ... သူ့ရဲ့ တာအိုကျင့်ကြံမှုက တကယ်တမ်း ဘယ်လောက် မြင့်မားနေတာလဲ"

"သူ မိစ္ဆာလမ်းစဉ် လျှောက်လမ်းသွားတာတော့ မဟုတ်ဘူးမလား... ကြည့်ရတာ အခြေအနေ မကောင်းဘူး"

"သူက မြင့်မြတ်ခုံရုံးကို တိုက်ခိုက်တော့မလို့များလား”

အမတတာအို ကျင့်ကြံသူများက သူတို့အချင်းချင်း ဆွေးနွေးနေကြပြီး စိတ်မသက်မသာ ဖြစ်မှုများက သူတို့၏ နှလုံးသားထဲတွင် ဖောင်းပွလာသည်။ ဧကရာဇ်ယန်ရှင်း၏ တိုးပွားလာသော အရှိန်အဝါကို ရင်ဆိုင်ရသောအခါ မည်သူကမှ အသံမထွက်ရဲကြပေ။

အဝေးတစ်နေရာရှိ အဓိပတိဂိုဏ်းတွင် လုံချင်းသည်လည်း ဤမြင်ကွင်းကို မော့ကြည့်နေသည်။ ကျူးရှင်းက သူ၏ ဘေးတွင် ပေါ်လာသောအခါ ဤအရာက မည်သည့် ဖြစ်စဉ်လဲ ဆိုသည်ကို သူ မမေးဘဲ မနေနိုင်တော့ချေ။

"အမတမင်းဆက်ရဲ့ အရှင်သခင်က ကွဲအက်နေတဲ့ မဟာကောင်းကင်နှင့် မြေပြင် ကို မူလအခြေအနေအတိုင်း ပြန်ရောက်ဖို့အတွက် ကောင်းကင်တာအိုရဲ့ စွမ်းအားကို အသုံးပြုချင်နေတာ... အဲဒါက ကွဲပြားနေတဲ့ မဟာကောင်းကင်နှင့် မြေကြီး အသီးသီးကို တစ်စုတစ်စည်းတည်း ဖြစ်အောင် ပေါင်းစည်းလိုက်တာပဲ" ကျူးရှင်း က တည်ကြည်သော မျက်နှာထားဖြင့် ပြောလိုက်၏။ ယခုအခါ အာကာပြင်တာအိုအမတ အဆင့်၌သာ ရှိသော ဧကရာဇ်ယန်ရှင်းသည် မူလဘူတနှောင်ဖွဲ့ကင်းအမတ ဖြစ်သော သူ့ကိုပင် ကြောက်ရွံ့တုန်လှုပ်သွားစေသည့် အရှိန်အဝါမျိုး ထုတ်လွှတ်နေခဲ့သည်။

ထိုစကားကို ကြားသောအခါ လုံချင်း လန့်ဖျပ်သွားပြီး တစ်ချိန်တည်းမှာပင် ကြီးမားသော ဝေခွဲမရဖြစ်မှုက သူ၏ နှလုံးသားထဲတွင် ပေါ်ပေါက်လာသည်။ သူက ထပ်မံ မေးမြန်းလိုက်၏။ "မဟာကောင်းကင်နှင့် မြေပြင် ကို အတူတကွ ပေါင်းစည်းလိုက်တာက ဘာအကျိုးထူးမှာ မို့လို့လဲ..."

အဝေးတစ်နေရာရှိ သက်တမ်းတာအိုနယ်မြေ အတွင်းတွင်လည်း ရှန်ကျန်းက ကုအန်ကို ဤမေးခွန်း မေးလိုက်သည်။

ကုအန်က ပြန်ဖြေလိုက်၏။ "ကောင်းကင်နဲ့ မြေကြီး ပေါင်းစည်းသွားတဲ့အခါ ကံကြမ္မာတွေလည်း ပေါင်းစည်းသွားလိမ့်မယ်... အဲဒါက ကောင်းကင်နှင့် မြေကြီးရဲ့ ကံကြမ္မာကို လုယူနေကြတဲ့သူတွေကို ကံကြမ္မာ ပိုရလာစေလိမ့်မယ်... ပြီးတော့ ကောင်းကင်တာအိုရဲ့ ရှုထောင့်ကနေ ကြည့်ရင် ဒါက တကယ့်ကို ကောင်းမွန်တဲ့ နည်းလမ်းပဲ... လက်ရှိ မကြာခဏ ဖြစ်ပေါ်နေတဲ့ ကပ်ဘေးတွေက ကောင်းကင်စိတ်ဝိညာဉ် မဟာကောင်းကင်နှင့် မြေပြင်ရဲ့ ခံနိုင်ရည် အကန့်အသတ်ကို ရောက်နေလို့ ဖြစ်တာ... ကောင်းကင်တာအိုက ကောင်းကင်နှင့် မြေကြီးအပေါ် ကျရောက်နေတဲ့ ဖိအားကို လျော့ပါးသွားစေချင်နေတာ... ဒါ့အပြင် စကြဝဠာထဲက တခြား ကောင်းကင်နှင့် မြေကြီးတွေလည်း အစုလိုက်အပြုံလိုက် သတ်ဖြတ်မှုတွေနဲ့ ဆက်တိုက် ကြုံတွေ့နေရပြီး အများစုက သက်ရှိတွေတောင် မရှိကြတော့ဘူး... ဒီအချိန်မှာ ကောင်းကင်နှင့် မြေကြီး အားလုံး ပေါင်းစည်းလိုက်မယ်ဆိုရင် ကောင်းကင်နှင့် မြေကြီး အသစ်က ခံနိုင်ရည် ပိုအားကောင်းလာလိမ့်မယ်... ကောင်းကင်စိတ်ဝိညာဉ်နယ်မြေ က သက်ရှိတွေလည်း ကပ်ဘေးကို ရှောင်ရှားနိုင်ပြီး ခေတ်သစ်တစ်ခုကို ကြိုဆိုနိုင်လောက်တယ်"

ရှန်ကျန်းသည် ကုအန်နှင့်အတူ ကောင်းကင်တာအို၏ ဆန္ဒအကြောင်း ယခင်က ဆွေးနွေးဖူးသဖြင့် ဤစကားကို ကြားသောအခါ ဧကရာဇ်ယန်ရှင်းကို မလေးစားဘဲ မနေနိုင်တော့ချေ။

"ဒါဆို သူက သက်ရှိအားလုံးအတွက် လုပ်ဆောင်ပေးနေတာပေါ့..." ရှန်ကျန်းက မှတ်ချက်ချလိုက်သည်။

ကောင်းကင်နှင့် မြေကြီး၏ ခံနိုင်ရည်က မလုံလောက်သဖြင့် လူအများစုက ကပ်ဘေးကို ကျော်ဖြတ်ရန် သက်ရှိအရေအတွက် လျှော့ချဖို့သာ တွေးနေကြချိန်တွင် ဧကရာဇ်ယန်ရှင်းက ကောင်းကင်နှင့် မြေကြီးကို ချဲ့ထွင်ပြီး ခံနိုင်ရည် မြှင့်တင်ရန် တွေးတောခဲ့သည်။

သူက တွေးရဲရုံသာ မကဘဲ လက်တွေ့လည်း လုပ်ရဲသူ ဖြစ်၏။

ကုအန်က ကောင်းကင်ယံရှိ တောက်ပသော နေမင်းကြီးကို ကြည့်ကာ တိုးတိုးလေး ပြောလိုက်သည်။ "သူက သက်ရှိအားလုံးကို ကာကွယ်ပေးချင်တဲ့ စိတ်နှလုံး ရှိတာတော့ အမှန်ပဲ... ဒါပေမဲ့ ဒါက သူ လုပ်ကိုလုပ်မှ ရမယ့် အခြေအနေ ဖြစ်နေလို့ပဲ"

အမတမင်းဆက်သည် ပြင်ပလူများ၏ ထိန်းချုပ်မှုကို ခံထားရပြီ ဖြစ်ကြောင်း သူ မြင်နိုင်သည်။ မြင့်မြတ်ခုံရုံးကရော အတူတူပဲ မဟုတ်ပါလော။

အပေါ်ယံတွင် မြင့်မြတ်အရှင်သခင်က အာဏာကို ချုပ်ကိုင်ထားသော်လည်း လက်တွေ့တွင်မူ ပြင်ပလူများ စိမ့်ဝင်နေကြပြီး မြင့်မြတ်အရှင်သခင်၏ အာဏာကို အချိန်မရွေး ဖြုတ်ချနိုင်သည့် သတ်ဖြတ်ခြင်းနတ်ဘုရားဧကရာဇ် ကဲ့သို့သော လူများအကြောင်း ထည့်ပြောရန်ပင် မလိုပေ။

"လုပ်ကိုလုပ်မှ ရမယ့် အခြေအနေ ဟုတ်လား"

ရှန်ကျန်း ပို၍ စိတ်ဝင်စားသွားသော်လည်း သူမ မစိုးရိမ်မိချေ။ ကုအန်၏ ဘေးနားတွင် နေထိုင်ရင်း သူမသည် သေမျိုးကမ္ဘာကို ပေါ့ပေါ့ပါးပါး စောင့်ကြည့်သည့် သဘောထားကို တဖြည်းဖြည်း မွေးမြူလာခဲ့သည်။

ကုအန် ရှိနေသရွေ့ သူမအနေဖြင့် လူသား ပဋိပက္ခများကြားထဲ မျောပါသွားမည် မဟုတ်ကြောင်း သူမ သိနေ၏။ အရာအားလုံးတွင် မဟာတာအို၏ သက်ရောက်မှုများ ရှိနေသည်ဟု ကုအန်က ပြောဖူးသဖြင့် သူမသည် ကောင်းကင်တာအိုနှင့် ကမ္ဘာကြီး၏ အကြောင်းရင်းနှင့် အကျိုးဆက်များကို ပို၍ စိတ်ဝင်စားလာမိသည်။

ကုအန် ဘာမှ ဆက်မပြောတော့ပေ။ သူလည်း ဧကရာဇ်ယန်ရှင်းအတွက် ရလဒ်ကို စောင့်ဆိုင်းနေခြင်း ဖြစ်သည်။

အချိန် ကုန်ဆုံးလာသည်နှင့်အမျှ စကြဝဠာအတွင်းရှိ အခြား မဟာကောင်းကင်နှင့် မြေပြင် များသည်လည်း ဧကရာဇ်ယန်ရှင်း၏ ဖိနှိပ်သော အင်အားအောက်တွင် လွှမ်းခြုံခံလိုက်ရပြီး မဟာကောင်းကင်နှင့် မြေပြင် အများအပြား စတင် တုန်ခါလာကြသည်။ ကောင်းကင်စိတ်ဝိညာဉ်နယ်မြေ မဟာကောင်းကင်နှင့်နီးကပ်သော ကမ္ဘာများက ဦးစွာ စတင် ရွေ့လျားလာကြ၏။

ကောင်းကင်နှင့် မြေကြီး ရွေ့လျားခြင်းသည် အတွင်းရှိ သက်ရှိများအတွက် ကပ်ဘေးတစ်ခုပင် ဖြစ်သည်။ တောင်များ တုန်ခါ၍ မြစ်များ ဆူပွက်ကာ ထိုမဟာကောင်းကင်နှင့် မြေကြီးများ အတွင်းရှိ သေမျိုးဝိညာဉ် အများအပြား သေဆုံးကုန်ကြသည်။

အဓိက ဗဟိုချက်ဖြစ်သော ကောင်းကင်စိတ်ဝိညာဉ် မဟာကောင်းကင်နှင့် မြေကြီးတွင် ကပ်ဘေးနှင့် မကြုံရသော်လည်း ကောင်းကင်တာအို၏ ဖိအားအောက်တွင် ရှိနေသဖြင့် သက်ရှိများမှာ ဖိနှိပ်ခံထားရသလို ခံစားနေကြရသည်။

ကောင်းကင်စိတ်ဝိညာဉ်နယ်မြေ အတွင်းရှိ တာအိုသစ်အသီးအဆင့် ဖြစ်တည်မှုများက မလှုပ်ရှားကြသည်ကို မြင်သောအခါ ကုအန်က စိတ်ထဲတွင် သုံးသပ်လိုက်မိ၏။

သို့သော် အခြား မဟာကောင်းကင်နှင့် မြေပြင် များမှ ဒေသခံ အင်အားကြီးများကမူ လက်ပိုက်ကြည့်မနေနိုင်ကြပေ။ လွတ်ငြိမ်းရာအမတများ တစ်ပါးပြီး တစ်ပါး ရောက်ရှိလာကြပြီး ဧကရာဇ်ယန်ရှင်းကို တားဆီးရန် ကြိုးစားကြ၏။

ကံဆိုးစွာပင် ကောင်းကင်တာအိုရွှေအမြုတေ၏ ရှေ့မှောက်တွင် လွတ်ငြိမ်းရာ အမတများ၏ စွမ်းအားမှာ အလွန်တရာ သေးနုပ်နေပုံ ပေါက်နေ၏။

အချိန်များ လျင်မြန်စွာ ကုန်ဆုံးသွားသည်။

နောက်ဆုံးတွင် အာကာပြင်တာအိုအမတများ ပင်လျှင် ဧကရာဇ်ယန်ရှင်းကို တိုက်ခိုက်လာသော်လည်း ဧကရာဇ်ယန်ရှင်း၏ လုပ်ဆောင်ချက်များကို မလှုပ်ခါနိုင်ခဲ့ပေ။ ထိုအချိန်မှစ၍ မဟာကောင်းကင်နှင့် မြေပြင် အသီးသီးမှ အင်အားကြီး ပုဂ္ဂိုလ်များသည် ထိတ်လန့်တကြား ထွက်ပြေးကုန်ကြပြီး ဧကရာဇ်ယန်ရှင်းကို ဆက်လက် ဟန့်တားရဲခြင်း မရှိကြတော့ချေ။

တစ်နေ့တွင် ကောင်းကင်စိတ်ဝိညာဉ်နယ်မြေ သည် ညအချိန် ပျောက်ဆုံးသွား၏။

အချိန်ကျရောက်လာသောအခါ ကောင်းကင်နှင့် မြေကြီးသည် နေ့အလင်းရောင် အောက်၌သာ ရှိနေသည်။

သက်တမ်းတာအိုနယ်မြေ အတွင်းတွင် လူတိုင်း စုဝေးကာ ဧကရာဇ်ယန်ရှင်း၏ လုပ်ရပ်များကို ဆွေးနွေးနေကြသည်။

ကုအန်က ကုလားထိုင်ပေါ်တွင် လှဲ၍ စာအုပ်ကိုင်ကာ ဂရုမစိုက်သည့်ပုံ ပေါက်နေ၏။ သူ စိတ်မဝင်စားတာ မဟုတ်ဘဲ အချိန်မတန်သေးကြောင်း သိနေ၍ ဖြစ်သည်။

နောက်ထပ် ခုနစ်နာရီ ထပ်မံ ကုန်ဆုံးသွားသည်။

ရုတ်တရက် စကြဝဠာကြီး စတင် တုန်ခါလာပြီး မဟာကောင်းကင်နှင့် မြေပြင် အစိတ်အပိုင်း တစ်ခုက ကောင်းကင်စိတ်ဝိညာဉ်နယ်မြေ လာရောက် တိုက်မိ၏။ ကမ္ဘာများ စတင် ပေါင်းစည်းလာကြပြီး ကောင်းကင်တာအို ကံကြမ္မာက သူတို့၏ ပေါင်းစည်းမှုကို ကူညီပေးနေ၏။

ကောင်းကင်တာအို အလင်းလွှာပေါ်တွင် ရပ်နေသော ဧကရာဇ်ယန်ရှင်းက အပြုံးတစ်ခု ထုတ်ဖော်လိုက်သည်။

"ပထမအဆင့် အောင်မြင်သွားပြီ"

ကောင်းကင်စိတ်ဝိညာဉ်နယ်မြေ အတွင်း၌ ပုန်းအောင်းနေကြသော တာအိုအသီးအဆင့် ကျွမ်းကျင်သူများက သူ့ကို တားဆီးလိမ့်မည်ဟု သူ ထင်မှတ်ထားခဲ့သော်လည်း ထိုလူများ ပေါ်မလာခဲ့ပေ။

ကမ္ဘာတစ်ခု ပေါင်းစည်းနိုင်ပြီ ဆိုလျှင် ကျန်ရှိသော ကမ္ဘာများကို ပေါင်းစည်းရန်မှာ အချိန်ကိစ္စသာ ဖြစ်တော့သည်။ သူ၏ စိုးရိမ်ပူပန်မှုများ စတင် ပျောက်ကွယ်သွား၏။ အခြေအနေက အန္တရာယ်များသော်လည်း အမှားအယွင်း မရှိခဲ့ပေ။ သို့သော်လည်း သူ၏ ခေါင်းအထက်ရှိ စကြဝဠာ အမှောင်ထုထဲတွင် မျက်လုံးကြီးတစ်စုံ ပွင့်လာသည်ကို သူ သတိမပြုမိခဲ့ချေ။

ထိုမျက်လုံးများကို စကြဝဠာရှိ သက်ရှိအားလုံး မြင်တွေ့လိုက်ရပြီး မြင်လိုက်ရသူတိုင်း ထိတ်လန့်တုန်လှုပ်သွားကြသည်။

"အဲဒါ ဘာကြီးလဲ"

"ဘုရားရေ... ငါ မျက်စိမှားနေတာလား"

"နောက်ထပ် ကောင်းကင်မိစ္ဆာ တိုက်ခိုက်မှုများလား"

"အဲဒီ မျက်လုံးကြီးက နေမင်းထက်တောင် ကြီးနေသေးတယ်... သူတို့ရဲ့ ကျင့်ကြံမှုအဆင့်က ဘယ်လောက်တောင် မြင့်မားလိုက်မလဲ"

"သွားပြီ... စကြဝဠာ ကူးပြောင်းတဲ့ ခေတ်မှာ ငါတို့ မွေးဖွားလာခဲ့ကြတယ်လို့ ကြားဖူးတယ်... အဲဒါ တကယ်ဖြစ်လာလိမ့်မယ်လို့ ထင်မထားမိဘူး"

သက်ရှိများ ကြောက်လန့်နေကြပြီး သက်တမ်းတာအိုနယ်မြေ အတွင်းရှိ လူများပင်လျှင် ထိုမျက်လုံးများ အကြောင်း ဆွေးနွေးနေကြသည်။

ဧကရာဇ်ယန်ရှင်းသည် စကြဝဠာရှိ သက်ရှိများ၏ ဆွေးနွေးသံများကို ရှင်းလင်းစွာ ကြားလိုက်ရသည်။ သူ မော့ကြည့်လိုက်ရာ ထိုမျက်လုံးများကြောင့် အကြီးအကျယ် လန့်ဖျပ်သွား၏။

ထို ဂရုမစိုက်သော စကြဝဠာ မျက်လုံးများနှင့် ရင်ဆိုင်လိုက်ရသောအခါ ဧကရာဇ်ယန်ရှင်းသည် ရေခဲရိုက်လိုက်သလို ခံစားလိုက်ရပြီး သူ၏ ဝိညာဉ် တုန်လှုပ်သွားသည်။

ဆန်းကြယ် ကမ္ဘာငယ်လေး အတွင်း၌ နေထိုင်နေသော အန်ဟောင်သည်လည်း ကောင်းကင်တာအိုရွှေအမြုတေမှ တစ်ဆင့် ထိုမျက်လုံးများကို မြင်တွေ့လိုက်ရသည်။ သူလည်း ကြောက်လန့်သွားပြီး မကောင်းသော အတွေးများ ဝင်လာ၏။

ဧကရာဇ်ယန်ရှင်း စကားပြောတော့မည့်ဆဲဆဲတွင် ပုဆိန်ကြီး တစ်လက် ကိုင်ဆောင်ထားသော ကြောက်မက်ဖွယ်ရာ ပုံရိပ်တစ်ခုက သူ့အနောက်မှနေ၍ ပြင်းထန်သော အလင်းရောင်များ တောက်ပလျက် ဝင်ရောက် ခုတ်ပိုင်းလိုက်သည်။

ဧကရာဇ်ယန်ရှင်းက ထောင့်တစ်နေရာမှနေ၍ ထိုအရာကို ရိပ်ခနဲ မြင်လိုက်ရပြီး သူ၏ မျက်ဝန်းအိမ်များ ကျယ်သွား၏။

ဘုန်း

ပုဆိန်ချက် တစ်ချက်တည်းဖြင့် ဧကရာဇ်ယန်ရှင်းသည် တစ်ခဏအတွင်း ပျက်စီးသွားပြီး ကောင်းကင်တာအိုရွှေအမြုတေဖြင့် ပုံဖော်ထားသော နေမင်းသည်လည်း အငွေ့ပျံသွားတော့သည်။

ဧကရာဇ်ယန်ရှင်းကို ဆုံးသတ်ပြီးနောက် ကောင်းကင်စိတ်ဝိညာဉ်နတ်ဘုရားသည်လည်း ပျောက်ကွယ်သွားသည်။

စကြဝဠာကို စောင့်ကြည့်နေသော မျက်လုံးကြီးများမှာ ဖြည်းညင်းစွာ မှိတ်သွားပြီး ဘယ်တုန်းကမှ မပေါ်လာခဲ့ဖူးသကဲ့သို့ ဖြစ်သွား၏။

စကြဝဠာ တစ်ခုလုံး ရုတ်တရက် တိတ်ဆိတ်သွားသည်။

ဘာဖြစ်သွားမှန်း သက်ရှိများ မသိကြပေ။ သို့သော် ထိုမျက်လုံးများ ပေါ်လာခြင်းနှင့် ဆန်းကြယ်သော နေမင်းကြီး ပျောက်ကွယ်သွားခြင်းတို့ကို မြင်လိုက်ရသဖြင့် အမျိုးမျိုး ထင်ကြေးပေးနေကြသော်လည်း သူတို့၏ စိုးရိမ်ပူပန်မှုများမှာ အချိန်ကြာမြင့်စွာ ကျန်ရစ်နေခဲ့သည်။

ကျူးရှင်းက လုံချင်း၏ ဘေးတွင် ရပ်ရင်း သက်ပြင်းချလိုက်၏။

​ပြင်ပကောင်းကင်မှ အဖြစ်အပျက်များကို မသိရှိသော လုံချင်းက ကျူးရှင်း ဘက်သို့ လှည့်ကြည့်၍ မေးလိုက်သည်။ "ခင်ဗျား ဘာမြင်လိုက်လို့လဲ"

"ငါ ကောင်းကင်တာအိုရဲ့ ဆန္ဒကို မြင်လိုက်ရတယ်..."

ကျူးရှင်းက လေးနက်စွာ ပြောလိုက်ပြီးနောက် လှည့်ထွက်သွားသည်။

ကောင်းကင်စိတ်ဝိညာဉ်နတ်ဘုရား ဝင်ရောက်စွက်ဖက်မှုက ကမ္ဘာပေါ်ရှိ မဟာကျင့်ကြံသူများကို တုန်လှုပ်သွားစေ၏။ အစွမ်းထက်သော ဧကရာဇ်ယန်ရှင်းက ဒီအတိုင်း ကျဆုံးသွားပြီလား။

ကုအန်လည်း ကောင်းကင်စိတ်ဝိညာဉ်နတ်ဘုရား၏ စွမ်းအားကို အံ့သြမိသွား၏။ သူ့တာအိုကျင့်ကြံမှုက အမှန်တကယ်ပင် နက်ရှိုင်းပြီး ခန့်မှန်းရခက်လှသည်။ သူ၏ လုပ်ဆောင်ချက်များက အလွန်တရာ လွှမ်းမိုးချုပ်ကိုင်နိုင်ပြီး မည်သူ့ကိုမျှ ရှင်းပြခွင့် မပေးပေ။

ပြင်ပကောင်းကင်မှ တာအိုအသီးအဆင့် ဖြစ်တည်မှုများက ဧကရာဇ်ယန်ရှင်းကို ဘာကြောင့် မတားဆီးခဲ့သလဲ ဆိုသည်မှာ အံ့သြစရာ မဟုတ်တော့ချေ။ သူတို့က ကောင်းကင်စိတ်ဝိညာဉ်နတ်ဘုရား၏ သဘောတရားများကို ကြိုတင် သိရှိထားကြပုံ ရသည်။

ဤ မဟာကောင်းကင်နှင့် မြေကြီး ၏ အပိုင်းပိုင်း ကွဲအက်မှုက ကောင်းကင်စိတ်ဝိညာဉ်နတ်ဘုရားနှင့် တိုက်ရိုက် ပတ်သက်နေပုံရ၏။

ယခုအခါ ကုအန်က အခြားအရာ တစ်ခုကို စိတ်ဝင်စားနေသည်။

ဧကရာဇ်ယန်ရှင်း သေဆုံးသွားသည်ကို မြင်တွေ့လိုက်ရပြီးနောက် အန်ဟောင် ဘာဆက်လုပ်မည်နည်း။