အခန်း (၅၄၄-၅၄၆)

အခန်း (၅၄၄) လောကကို တုန်လှုပ်စေပြီး လူထုကို ထိတ်လန့်စေသော ဧရာမဝေလငါးကျင့်စဉ်နှင့် ဧရာမဝေလငါး နတ်ဘုရားသွေး။ (၆)

ချင်းဝမ်ယွီသည် စူးချန်ခုန်းနှင့် ပထမဆုံးအကြိမ် တွေ့ဆုံခြင်း ဖြစ်သော်လည်း စူးချန်ခုန်းသည် သူတို့၏ ချင်းယွမ် အဆောင်နှင့် အကြိမ်ပေါင်းများစွာ အရောင်းအဝယ် ပြုလုပ်ခဲ့ဖူးသူ ဖြစ်ကြောင်း သူသိသည်။ မူလချီစွမ်းအင်များစွာကို ပေးဆောင်နိုင်စွမ်း ရှိသူဖြစ်ရာ ထိုသူက သာမန်မဟုတ်တာ သေချာပါသည်။ ထို့ကြောင့် အဆင့်မြင့် ဝိညာဉ်ဆေးလုံး ဆေးဖော်နည်းကို ကြိုတင်ပေးချေရန်အတွက် သူ စိတ်ထဲမထားပါပေ။

ထို့နောက် ချင်းဝမ်ယွီက ပြောလိုက်သည်။ “ကောင်းပါပြီ... အစ်ကို့မိတ်ဆွေကိုယ်စား ကတိပေးပါတယ်။ ညီလေးတာ့သာ ဒီတာဝန်မှာ ပါဝင်ဖို့ သဘောတူပြီး အစ်ကိုတို့နဲ့ လာဆုံမယ်ဆိုရင် အဆင့်မြင့် ဝိညာဉ်ဆေးလုံး ဆေးဖော်နည်းကို ချက်ချင်း လက်ဝယ်အပ်နှံပါ့မယ်”

“ကောင်းပြီ...” စူးချန်ခုန်း ကျေနပ်စွာ ခေါင်းငြိမ့်လိုက်သည်။

စူးချန်ခုန်းက အခကြေးငွေကို ကြိုတင်တောင်းဆိုခြင်းမှာ တစ်ဖက်လူက ကတိဖျက်မည်ကို စိုးရိမ်၍ မဟုတ်ဘဲ မမျှော်လင့်ထားသော ကိစ္စရပ်များ ဖြစ်လာမည်ကို စိုးရိမ်၍ ဖြစ်သည်။ အကယ်၍ အသက်ခြွေအဖွဲ့အစည်းအား နှိမ်နင်းရာတွင် အဆင်မပြေမှုများ ရှိခဲ့ပါက စူးချန်ခုန်းသည် သူ၏ ပင်ကိုယ်စရိုက်အရ မိမိကိုယ်ကိုယ် ဘေးကင်းရေးကိုသာ ဦးစားပေးမည် ဖြစ်သည်။ ဆေးဖော်နည်းကို ကြိုတင်ရယူထားခြင်းဖြင့် တာဝန်မအောင်မြင်ခဲ့လျှင်ပင် သူ၏ ကြိုးစားမှုများ အလဟဿ ဖြစ်မှာမဟုတ်တော့ပါ။

“ဒါဆိုရင် ဒီနေ့ကစပြီး ငါးရက်အကြာမှာ 'လေနက်တောင်ကြား' မှာ ဆုံကြတာပေါ့။ ညီလေးတာ့အနေနဲ့လည်း အပြည့်အဝ ပြင်ဆင်ထားလိုက်ပါ။”

စူးချန်ခုန်းနှင့် ကိစ္စရပ်များကို ဆွေးနွေးပြီးနောက် ချင်းဝမ်ယွီက ဆုံမည့်နေရာကို အသိပေးလိုက်သည်။

“နားလည်ပါပြီ” စူးချန်ခုန်း ခေါင်းငြိမ့်ကာ ချင်းဝမ်ယွီကို နှုတ်ဆက်ပြီး ထွက်လာခဲ့သည်။

“အသက်ခြွေအဖွဲ့ချုပ်ရဲ့ အရေးပါတဲ့ ဂိုဏ်းခွဲတစ်ခုကို ချေမှုန်းတော့မှာလား”

စူးချန်ခုန်းသည် ဖေးယွမ်မြို့မှ ခေတ္တထွက်ခွာကာ ပြင်ဆင်မှုများ ပြုလုပ်ခဲ့သည်။ မိစ္ဆာနှိမ်နင်းရေး ဌာနမှ မူလဓာတ်ငါးပါး သိုင်းပညာရှင်ကြီး တစ်ဦးသည် ခိုင်လုံသော သတင်းအချက်အလက်နှင့် သေချာသော အစီအစဉ် မရှိဘဲ အသက်ခြွေအဖွဲ့အစည်းကို တိုက်ခိုက်လိမ့်မည် မဟုတ်ပေ။ သူတို့သည် အလကားနေရင်း အသေခံမည့်သူများ မဟုတ်ကြချေ။ စူးချန်ခုန်း၏ လက်ရှိ စွမ်းအားဖြင့်ဆိုလျှင် သိုင်းဝိဇ္ဇာသူတော်စင်နှင့် မရင်ဆိုင်ရသရွေ့ ဘေးအန္တရာယ်မှ လွယ်ကူစွာ လွတ်မြောက်နိုင်မည်ဟု သူ ယုံကြည်ချက် ရှိသည်။

ငါးရက်တာ အချိန်မှာ ခဏချင်းပင် ကုန်ဆုံးသွားခဲ့ပြီး ပဉ္စမမြောက်နေ့၏ နံနက်စောစောတွင် စူးချန်ခုန်းသည် ပြင်ဆင်မှုများ ပြုလုပ်ပြီးနောက် ဝိညာဉ်လမ်းစဉ်ဂိုဏ်းမှ ထွက်ခွာကာ လေနက်တောင်ကြားသို့ ဦးတည်လိုက်သည်။

လေနက်တောင်ကြားသည် ယခင်က ရက်စက်ကြမ်းကြုတ်သော ဓားပြအဖွဲ့တစ်ဖွဲ့ ကြီးစိုးခဲ့ဖူးသော နေရာဖြစ်သော်လည်း ယခုအခါ ၎င်းတို့ နှိမ်နင်းခြင်း ခံလိုက်ရပြီးနောက် လူသူကင်းမဲ့သော နေရာတစ်ခု ဖြစ်နေခဲ့သည်မှာ ကြာပြီဖြစ်သည်။

နေဝင်ရီတရော အချိန်တွင် လေနက်တောင်ကြား၌ ချင်းဝမ်ယွီ အပါအဝင် လူအယောက် နှစ်ဆယ်နီးပါး စုဝေးနေကြသည်။ လူအယောက် နှစ်ဆယ်သာ ရှိသော်လည်း တစ်ယောက်ချင်းစီမှာ မိမိတို့၏ အရှိန်အဝါများကို ဖုံးကွယ်ထားကြပြီး မျက်လုံးများမှာမူ စူးရှထက်မြက်လှသည်။ သူတို့အားလုံးက ထိပ်တန်း သိုင်းသပညာရှင်များ ဖြစ်ကြသည်။

ထိုလူတစ်စု၏ အကြည့်များမှာ အမျိုးသား တစ်ဦးထံတွင် စုပြုံကျနေပြီး ရိုသေလေးစားမှုများဖြင့် ပြည့်နှက်နေ၏။ ထိုအမျိုးသားမှာ အသက် ၃၀ ကျော် လူတစ်ဦး၏ အသွင်အပြင် ရှိသည်။ သာမန် မိသားစုတစ်ခုမှ ဆင်းသက်လာပုံရသော ရိုးရှင်းသည့် ရုပ်ရည်ရှိသော်လည်း သူ၏ မျက်လုံးများမှာမူ နက်နဲပြီး အတွေ့အကြုံများလှရာ သတ္တိအကောင်းဆုံး လူသားများကိုပင် တုန်လှုပ်စေနိုင်သည်။ ထိုမျက်လုံးများကို ကြည့်လိုက်ရုံဖြင့် တစ်ဖက်လူအား အလိုလို အညံ့ခံလိုစိတ် ပေါ်ပေါက်လာစေသည်။

“တာ့ဝူဖုန်း တစ်ယောက်ပဲ ရောက်ဖို့ ကျန်တော့တယ်”

တစ်စုံတစ်ယောက်က တိုးတိုးလေး ပြောလိုက်သည်။ လူတိုင်း ရောက်လာကြပြီဖြစ်သော်လည်း တစ်ယောက်သာ လိုတော့သည်။ တာ့ဝူဖုန်းဟူသော အမည်ကို ထိုနေရာရှိ မည်သူမျှ မကြားဖူးကြသော်လည်း ချင်းဝမ်ယွီ ကိုယ်တိုင် ဖိတ်ခေါ်ထားခြင်း ဖြစ်သဖြင့် သူ၏ အမြင်ကို မည်သူမျှ သံသယမဝင်ကြပေ။ အားလုံးက စိတ်ရှည်စွာ စောင့်ဆိုင်းနေကြပြီး ထိုတောက်ဝူဖုန်း ဆိုသူမှာ မည်သူနည်းဟု သိလိုနေကြသည်။

“သူ ရောက်လာပြီ”

မှောင်ရီပျိုးစ အချိန်တွင် လူရိပ်တစ်ခု လေနက်တောင်ကြားအတွင်းသို့ ဝင်လာခဲ့သည်။ တည်ကြည်သော မျက်နှာထားနှင့် အသက် ၃၀ ထက် မပိုသော ထိုလူသည် အနက်ရောင် ဝတ်စုံကို ဝတ်ဆင်ထားပြီး ခါးတွင် ဓားတစ်လက်၊ ကျောတွင် ဓားတစ်လက်နှင့် ပုခုံးတွင် အဝတ်ဖြင့် ပတ်ထားသော လေးကြီးတစ်လက်ကို လွယ်ထားသည်။ ထိုသူမှာ အားလုံး စောင့်ဆိုင်းနေကြသော 'တာ့ဝူဖုန်း' ပင် ဖြစ်သည်။

သာမန် ရုပ်ရည်ရှိသော ထိုလူငယ်လေး၏ မျက်လုံးများတွင်လည်း ထူးခြားသော အရိပ်အယောင်များ အထင်းသားနှင့်။ သိုင်းပညာရှင်ကြီး တစ်ဦးအနေဖြင့် တောက်ဝူဖုန်းမှာ အရှိန်အဝါ ဖုံးကွယ်ထားသော်လည်း ထိုသူ၏ အရှိန်အဝါမှာ နက်နဲပြီး ထိန်းချုပ်ထားကြောင်း သာမန် ပညာရှင်တစ်ဦး မဟုတ်ကြောင်း သူ၏ အာရုံဖြင့် ခံစားသိရှိနိုင်သည်။

“အစ်ကို့နာမည်က ချီကန်းပါ”

တင်ပလ္လင်ခွေ ထိုင်နေသော အနှီလူမှာ ထရပ်လိုက်ပြီး ရောက်လာသော စူးချန်ခုန်းကို ဖော်ရွေသော အပြုံးဖြင့် မိတ်ဆက်လိုက်သည်။

ချီကန်းဟူသော အမည်ကြောင့် စူးချန်ခုန်းမှာ အနည်းငယ် ခေါင်းငြိမ့်ပြလိုက်သည်။ ထိုအမည်ကို သူ ကြားဖူးသည်။ အထူးသဖြင့် ဝိညာဉ်လမ်းစဉ်ဂိုဏ်းရှိ ရှေးဟောင်း မှတ်တမ်းများတွင် အင်အားစုအမျိုးမျိုးနှင့် ပညာရှင်များအကြောင်းကို မှတ်တမ်းတင်ထားလေ့ ရှိသည်။

ချီကန်းသည် သာမန် မိသားစုမှ မွေးဖွားလာသူ ဖြစ်သော်လည်း ဓားသိုင်းပညာတွင် ထူးခြားသော ပါရမီရှိသူ ဖြစ်သည်။ လူငယ်ဘဝတွင်ပင် မဟာမီးလျှံဘုရင်မျိုးနွယ်စု၏ သတိထားခြင်းကို ခံခဲ့ရပြီး မိစ္ဆာနှိမ်နင်းရေးဌာနသို့ ခေါ်ယူခြင်း ခံခဲ့ရသည်။ ငယ်ရွယ်စဉ်မှာပင် မူလနယ်ပယ်သို့ ရောက်ရှိခဲ့ပြီး ဌာနအတွင်း ရာထူးများ အလျင်အမြန် တက်လှမ်းနိုင်ခဲ့သည်။ ကောင်းကင် သွေးကြော ဆယ့်နှစ်ခုကို ဖွင့်နိုင်ပြီးနောက် မဟာမီးလျှံဘုရင်မျိုးနွယ်စုက သူ့အား လျှို့ဝှက်သော 'ဝိညာဉ်တစ်သောင်း သိုင်းသမား ဂူသင်္ချိုင်း' သို့ ဝင်ရောက်ခွင့်ပြုခဲ့သည်။ သူသည် စိတ်ပျက်စရာ မဖြစ်စေဘဲ ထိုခရီးစဉ်အတွင်း ဓားဝိညာဉ်နယ်ပယ်ကို နားလည်ခဲ့ကာ စိတ်ဝိညာဉ်ပင်လယ်အတွင်း စွမ်းအင်ငါးမျိုးကို ပေါင်းစပ်နိုင်ခဲ့ပြီး မူလဓာတ်ငါးပါး သိုင်းပညာရှင်အဆင့်သို့ တက်လှမ်းကာ မဟာမီးလျှံအင်ပါယာ တစ်ဝန်းလုံးတွင် ကျော်ကြားလာခဲ့သည်။

မူလဓာတ်ငါးပါး သိုင်းပညာရှင်အဆင့်သို့ ရောက်ရှိချိန်တွင် ချီကန်းမှာ အသက် ၃၀ ကျော်သာ ရှိသေးသည်။ မိစ္ဆာနှိမ်နင်းရေး ဌာနတွင် အဆင့်မြင့် အရာရှိကြီးများမှလွဲ၍ ချီကန်းသည် တတိယမြောက် အာဏာအရှိဆုံး ပုဂ္ဂိုလ်ဖြစ်ပြီး နောင်တွင် ဌာနတစ်ခုလုံးကို အုပ်ချုပ်ရမည့်သူ ဖြစ်လာဖို့ကလည်း မခဲယဉ်းပေ။

“ဒီချီကန်းဆိုတဲ့သူက... တကယ်ကို အံ့ဩစရာကောင်းတာပဲ”

ချီကန်းကို မြင်လိုက်ရသောအခါ စူးချန်ခုန်း၏ စိတ်ဝိညာဉ်ပင်လယ်အတွင်းရှိ ဓားဝိညာဉ်မှာ အနည်းငယ် တုန်ခါသွားပြီး ထိုသူနှင့် ယှဉ်ပြိုင်လိုစိတ်များ ပေါ်ပေါက်လာသော်လည်း စူးချန်ခုန်းက ထိုစိတ်ကို ပြန်လည် ထိန်းချုပ်လိုက်သည်။

“တောက်ဝူဖုန်း” စူးချန်ခုန်းက အေးစက်သော လေသံဖြင့် သူ့အမည်ကို ပြောလိုက်သည်။

“အင်း... ညီလေးတာ့၊ အစ်ကို့ကို ကူညီဖို့ သဘောတူပေးတဲ့အတွက် ကျေးဇူးတင်ပါတယ်။ ဒါကတော့ အစ်ကို လူငယ်ဘဝတုန်းက ရရှိခဲ့တဲ့ ဝိညာဉ်ဆေးဖော်နည်းပါ။ အဲဒီထဲမှာပါတဲ့ 'ကောင်းကင်ဝိညာဉ်ဆေးလုံး' ကို ဖော်စပ်ပြီးတော့ အစ်ကိုက ကောင်းကင်ပန်းပွင့်ကို တက်လှမ်းနိုင်ခဲ့တာပဲ”

ချီကန်းသည် မူလဓာတ်ငါးပါး သိုင်းပညာရှင်ကြီး တစ်ဦး၏ မာန်မာနများ မရှိဘဲ ကြင်နာစွာ ပြောဆိုကာ သူ၏ ဝတ်ရုံအတွင်းမှ လိပ်ထားသော စာလိပ်တစ်ခုကို ထုတ်ပြီး စူးချန်ခုန်းထံသို့ ကမ်းပေးလိုက်သည်။

ချင်းဝမ်ယွီက ချီကန်းကိုယ်စား အခကြေးငွေ ကြိုပေးရန် ကတိပေးထားခြင်း ဖြစ်ပြီး ချီကန်းကလည်း သူ၏ မိတ်ဆွေကောင်း၏ မျက်နှာကို မပျက်စေဘဲ ချင်းဝမ်ယွီ၏ အမြင်ကို ယုံကြည်သဖြင့် ယခုကဲ့သို့ ဆေးဖော်နည်းကို တိုက်ရိုက် ပေးအပ်လိုက်ခြင်း ဖြစ်သည်။

စူးချန်ခုန်းသည် ထိုစာလိပ်ကို လက်ခံယူကာ အကြမ်းဖျင်း ဖတ်ကြည့်ပြီးနောက် “ကျေးဇူးတင်ပါတယ်” ဟု ခေါင်းငြိမ့်ကာ ပြောလိုက်သည်။

ချီကန်းသည် မိစ္ဆာနှိမ်နင်းရေးဌာနမှ ထင်ရှားသော ပုဂ္ဂိုလ်တစ်ဦးဖြစ်ပြီး မူလဓာတ်ငါးပါး သိုင်းပညာရှင်ကြီး တစ်ဦးလည်း ဖြစ်သည့်အတွက် ဆေးဖော်နည်းကို အတုလုပ်မှာ မဟုတ်ကြောင်း စူးချန်ခုန်း ယုံကြည်ပါသည်။

အခန်း (၅၄၅) လောကကို တုန်လှုပ်စေပြီး လူထုကို ထိတ်လန့်စေသော ဧရာမဝေလငါးကျင့်စဉ်နှင့် ဧရာမဝေလငါး နတ်ဘုရားသွေး။ (၇)

ဆေးဖော်နည်းကို သိမ်းဆည်းပြီးနောက် ချီကန်းက လေးနက်စွာ ပြောလိုက်သည်။ “လူစုံပြီဆိုတော့ စထွက်ကြစို့။ ကျေးဇူးတင်စကားတွေ အများကြီး မပြောတော့ပါဘူး။ ဒါပေမဲ့ ငါ မင်းတို့ အားလုံးကို အကြွေးတင်သွားပြီ”

ဤနေရာတွင် စုဝေးနေသော ပညာရှင်များသည် ချီကန်းက သူ၏ ကိုယ်ပိုင်အဆက်အသွယ်များကို အသုံးပြုကာ ဖိတ်ခေါ်ထားသူများ ဖြစ်ကြသည်။ ချီကန်းမှာ မူလဓာတ်ငါးပါး သိုင်းပညာရှင်ကြီး တစ်ဦးဖြစ်ရုံသာမက မဟာမီးလျှံအင်ပါယာကြီး၏ အဆင့်မြင့် အရာရှိတစ်ဦးလည်း ဖြစ်သည့်အတွက် ဤသိုင်းပညာရှင်များမှာ သူ့အား ကူညီရန် အလွန်ပင် လိုလားကြသည်။

“အသက်ခြွေအဖွဲ့အစည်းလား။ ကျွန်တော့်ဆရာက အသက်ခြွေအဖွဲ့အစည်းက မိစ္ဆာလူသားတစ်ယောက်ရဲ့ လက်ချက်နဲ့ သေဆုံးခဲ့ရတာ။”

အသက်ခြွေအဖွဲ့အစည်းအပေါ် ရန်ငြိုးရှိနေကြသော သိုင်းပညာရှင်များလည်း ပါဝင်ကြရာ ချီကန်းသည် ထိုအချက်ကို သိသဖြင့် အသက်ခြွေအဖွဲ့အစည်းကို ရင်ဆိုင်ရန် သိုင်းပညာရှင်များစွာကို အလွယ်တကူ စုစည်းနိုင်ခဲ့ခြင်း ဖြစ်သည်။

“စီနီယာချီ... ကျွန်တော်တို့ သွားရမယ့် နေရာက ဘယ်မှာလဲ”

လူတစ်စုမှာ လေနက်တောင်ကြားမှ ထွက်ခွာလာကြစဉ် တစ်ယောက်က ချီကန်းအား ခရီးစဉ်၏ ဦးတည်ရာကို မေးမြန်းလိုက်သည်။ ယခင်က လျှို့ဝှက်ချက် လုံခြုံစေရန်အတွက် ချီကန်းသည် အသက်ခြွေအဖွဲ့ချုပ် ဂိုဏ်းခွဲ၏ တည်နေရာအတိအကျကို မပြောနိုင်ခဲ့သော်လည်း ယခုမူ ဖုံးကွယ်ထားရန် မလိုတော့ပေ။

“ကျောက်နက်တောင်တန်း ထဲမှာပဲ”

မိုင်ပေါင်း ထောင်ချီ ရှည်လျားသော ကျောက်နက်တောင်တန်းသည် ဂိုဏ်းခွဲ ဌာနချုပ်တစ်ခုအတွက် သင့်တော်သော ပုန်းအောင်းရာနေရာ တစ်ခုပင် ဖြစ်သည်။ တည်နေရာ အတိအကျကို မသိဘဲ ထိုတောင်တန်းထဲသို့ ဝင်ရောက်ခြင်းမှာ မြက်ပုံထဲတွင် အပ်ရှာသကဲ့သို့ ခက်ခဲပေလိမ့်မည်။

ထိုလူစုမှာ ကျောက်နက်တောင်တန်းဆီသို့ ဦးတည်သွားနေ၏။ လမ်းခုလတ်တွင် တစ်ဦးနှင့်တစ်ဦး မိတ်ဆက်ကြရာ စူးချန်ခုန်းသည် ထိုလူများအကြောင်း အကြမ်းဖျင်း သိခဲ့ရသည်။ အများစုမှာ ချင်းဝမ်ယွီကဲ့သို့ပင် ဗဟိုပြည်နယ်တွင် အတော်အတန် ကျော်ကြားသော သိုင်းပညာရှင်များ ဖြစ်ကြသည်။

အားနည်းသူ တစ်ယောက်မှ မပါချေ။ မိစ္ဆာသိုင်းပညာရှင်များ အဓိက စုဝေးရာ အသက်ခြွေအဖွဲ့အစည်းကို ရင်ဆိုင်ရန်အတွက် သာမန် မူလနယ်ပယ် သိုင်းပညာရှင်များသည် များစွာ အကူအညီ ဖြစ်လိမ့်မည် မဟုတ်ပေ။

သုံးရက် ကုန်လွန်ပြီးနောက် စူးချန်ခုန်းနှင့် အခြားသူများသည် ကျောက်နက်တောင်တန်းသို့ ရောက်လာခဲ့ကြသည်။ အမြင့်မှ ကြည့်လိုက်လျှင် ကျောက်နက်တောင်တန်းကြီးမှာ ဝပ်နေသော နဂါးနက်ကြီးတစ်ကောင်နှင့် တူပြီး နေရာအနှံ့တွင် မြင့်မားသော သစ်ပင်များ၊ အန္တရာယ်ရှိသော မြေမျက်နှာသွင်ပြင်များနှင့် ရေတွက်၍မရနိုင်သော အဆိပ်ရှိ အင်းဆက်များ၊ ကြမ်းတမ်းသော သားရဲများ ရှိနေသည်။

“ဒီကျောက်နက်တောင်တန်းရဲ့ အနက်ရှိုင်းဆုံးနေရာမှာ တောင်ကြားတစ်ခု ရှိတယ်။ အဲဒါက အသက်ခြွေအဖွဲ့ချုပ်ရဲ့ ဂိုဏ်းခွဲဌာနချုပ် တည်ရှိရာနေရာပဲ။ ငါ ကိုယ်တိုင် အဲဒီနေရာကို ထောက်လှမ်းစုံစမ်းခဲ့ပြီးပြီ။ အထဲမှာ မိစ္ဆာသိုင်းပညာရှင် အနည်းဆုံး ငါးဆယ်လောက် ရှိနေတယ်။ သူတို့ အားလုံးကို သတ်ပစ်ဖို့ဆိုတာ သိပ်ပြီး မဖြစ်နိုင်ပေမဲ့ အဲဒီထဲက ခေါင်းဆောင်ကတော့ ငါတို့ရဲ့ ပစ်မှတ်ပဲ။ အားလုံးပဲ... နောက်ပိုင်းမှာ အသက်ခြွေအဖွဲ့ချုပ်ရဲ့ လက်စားချေတာကို ရှောင်ရှားနိုင်ဖို့ ကိုယ့်ရဲ့ အထောက်အထားတွေကို ဖုံးကွယ်ထားကြပါ” ချီကန်းက တောင်တန်းထဲ မဝင်မီ အားလုံးကို ညွှန်ကြားလိုက်သည်။

သူနှင့်အတူ ပါလာသော လူအယောက် နှစ်ဆယ်ကျော်မှာ သိုင်းပညာရှင်များ ဖြစ်ကြသော်လည်း အသက်ခြွေအဖွဲ့ချုပ် ဂိုဏ်းခွဲအတွင်းရှိ မိစ္ဆာသိုင်းပညာရှင် အရေအတွက်မှာ ထိုထက်ပင် ပိုများသည်။ ထို့အပြင် သူတို့သည် မိစ္ဆာအတတ်များကို သုံးနိုင်ရုံသာမက မသေမျိုးခန္ဓာကိုယ်များကိုလည်း ပိုင်ဆိုင်ထားကြသဖြင့် သူတို့အားလုံးကို အမြစ်ပြတ်ခြေမှုန်းရန်မှာ မဖြစ်နိုင်သလောက်ပင်။ ထို့ကြောင့် နောင်တွင် အသက်ခြွေအဖွဲ့ချုပ်၏ လက်စားချေခြင်းကို မခံရစေရန်အတွက် အထောက်အထားများကို ဖုံးကွယ်ထားရန် လိုအပ်ခြင်း ဖြစ်သည်။

“အင်း...”

အားလုံးက ခေါင်းငြိမ့်ကြပြီး လမ်းခုလတ်တွင် ပြင်ဆင်လာသော မျက်နှာဖုံးများကို တစ်ယောက်ချင်းစီ တပ်ဆင်လိုက်ကြသည်။ မိစ္ဆာနတ်ဆိုးများသည် လူတစ်ဦး၏ အရှိန်အဝါကို ကြည့်ကာ မည်သူမည်ဝါဖြစ်ကြောင်း ခွဲခြားနိုင်သော်လည်း ယင်းမှာ ဒုတိယအကြိမ် ပြန်လည် ဆုံတွေ့မှသာ ဖြစ်နိုင်သည်။

စူးချန်ခုန်းသည်လည်း အစိမ်းရောင် မျက်နှာရှိပြီး အစွယ်များ ထွက်နေသော သရဲမျက်နှာဖုံးတစ်ခုကို တပ်ဆင်လိုက်သည်။ ချီကန်း ကိုယ်တိုင်ကတော့ မျက်နှာဖုံး မတပ်ဆင်သလို သူ၏ အထောက်အထားကိုလည်း ဖုံးကွယ်ရန် ရည်ရွယ်ချက် မရှိပေ။ သူ၏ နောက်ခံအင်အားနှင့်ဆိုလျှင် အသက်ခြွေအဖွဲ့အစည်း လက်စားချေလာမှာကို သူ မကြောက်ပေ။ ထို့အပြင် သူသည် မိစ္ဆာနှိမ်နင်းရေးဌာနမှ သိုင်းပညာရှင်တစ်ဦး ဖြစ်သည့်အတွက် အသက်ခြွေအဖွဲ့ချုပ်တွင် သူ့အကြောင်း သတင်းအချက်အလက်များ ရှိနှင့်ပြီးသား ဖြစ်ရာ သူ စတင်လှုပ်ရှားလိုက်သည်နှင့် သူ၏ အထောက်အထားမှာ ပေါ်သွားမည်မှာ ဧကန်မလွဲပင်။

ကျောက်နက်တောင်တန်း၏ အနက်ရှိုင်းဆုံးနေရာတွင် မြူနှင်းများ ဖုံးလွှမ်းနေသဖြင့် အပြင်လောကမှ လုံးဝ မမြင်နိုင်သော နန်းတော်တစ်ခုမှာ တောင်ကြားအတွင်း တည်ရှိနေသည်။ တောင်ကြား၏ အဝင်ဝတွင် ကျောက်နက်တောင်တန်း တစ်လျှောက်လုံးတွင် တွေ့ရလေ့ရှိသော သာမန်သစ်ပင်များ ရှိနေသော်လည်း တစ်ခါတစ်ရံတွင် ထိုသစ်ပင်များပေါ်၌ လူမျက်နှာများ ပေါ်လာတတ်သည်။

သူတို့မှာ တောင်ကြားကို စောင့်ကြပ်ရန် တာဝန်ပေးထားသော မိစ္ဆာသိုင်းပညာရှင်များ ဖြစ်ကြသည်။ ထိုသူတို့မှာ မူလနယ်ပယ်သို့ပင် မရောက်သေးသော်လည်း သစ်ပင်များနှင့် တစ်သားတည်း ဖြစ်သွားစေနိုင်သော မိစ္ဆာအတတ်ပညာများကို ပိုင်ဆိုင်ထားကြသဖြင့် အလွန်ပင် ပုန်းလျှိုးနေနိုင်ကြပြီး တောင်ကြားအဝင်ဝကို စောင့်ကြပ်နေကြခြင်း ဖြစ်သည်။

“ဟင်...”

သစ်ပင်တစ်ပင်ပေါ်တွင် ပေါ်လာသော မျက်နှာတစ်ခုမှာ ရုတ်တရက် တစ်ခုခုကို အာရုံခံမိသွားပြီး အဝေးမှ လျင်မြန်စွာ ချဉ်းကပ်လာသော လူရိပ်တစ်ခုကို တွေ့လိုက်ရသည်။ သူ၏ မျက်ဆန်များ ကျုံ့သွားပြီး အန္တရာယ်ရှိကြောင်း သတိပြုမိလိုက်သော်လည်း ထိုလူသည် မြေပြင်ကို ကျုံ့ပစ်နိုင်သော စွမ်းအားရှိသကဲ့သို့ ချက်ချင်းပင် အနားသို့ ရောက်ရှိလာကာ သူ၏ နဖူးအလယ်ကို လက်ညှိုးဖြင့် ထိလိုက်သည်။

“ဗျစ်...”

သစ်ပင်အတွင်းမှ သွေးများ ပန်းထွက်လာပြီး ထိုမျက်နှာမှာ တွန့်လိမ်သွားကာ တိတ်ဆိတ်သွားတော့သည်။ တိုက်ခိုက်လိုက်သူမှာ ချီကန်းပင် ဖြစ်သည်။

မိစ္ဆာသတ္တဝါများသည် မသေမျိုး ခန္ဓာကိုယ်များကို ပိုင်ဆိုင်ထားကြသော်လည်း စိတ်ဝိညာဉ်နယ်ပယ်ရှိ သိုင်းပညာများကို အသုံးပြုခြင်းဖြင့် သူတို့ကို ထိန်းချုပ်နိုင်သည်။ ချီကန်းသည် သူ၏ လက်ညှိုးထိပ်တွင် ဓားဝိညာဉ်ကို စုစည်းကာ တောင်ကြားဝကို စောင့်ကြပ်နေသော မူလနယ်ပယ်သို့ပင် မရောက်သေးသည့် မိစ္ဆာသိုင်းပညာရှင်ကို အလွယ်တကူ သတ်ဖြတ်လိုက်ခြင်း ဖြစ်သည်။ တစ်ဖက်လူ၏ စိတ်ဝိညာဉ်ပင်လယ်မှာ ရစရာမရှိအောင် ပျက်စီးသွားခဲ့ပြီ ဖြစ်သည်။

“ဒါက ဓားဝိညာဉ်နယ်ပယ်လား။ မိစ္ဆာတွေရဲ့ မသေမျိုးခန္ဓာကိုယ်ကတောင် မခုခံနိုင်ပါလား...”

ဤမြင်ကွင်းကို မြင်လိုက်ရသောအခါ ချင်းဝမ်ယွီနှင့် အခြားသူများမှာ မနာလိုအားကျစိတ်များ ဖြစ်ပေါ်လာခဲ့သည်။ သာမန် သိုင်းပညာရှင်များသည် မသေမျိုးခန္ဓာကိုယ်ရှိသည့် မိစ္ဆာသတ္တဝါများနှင့် မိစ္ဆာပညာရှင်များကို ရင်ဆိုင်ရာတွင် ခန္ဓာကိုယ်ကို အထပ်ထပ်အခါခါ ပြင်းထန်စွာ ဒဏ်ရာရအောင် ပြုလုပ်ခြင်းဖြင့်သာ သတ်ဖြတ်နိုင်ကြသည်။

သို့သော် စိတ်ဝိညာဉ်နယ်ပယ်ရှိ သိုင်းပညာကို တတ်မြောက်ထားသူများသည် စိတ်ဝိညာဉ်ကို တိုက်ရိုက် ဖျက်ဆီးနိုင်သဖြင့် တစ်ဖက်လူကို ဝိညာဉ်အဆင့်တွင် သတ်ဖြတ်နိုင်ကာ မိစ္ဆာသိုင်းပညာရှင်များ၏ မသေမျိုး ခန္ဓာကိုယ်ကို အသုံးမဝင်အောင် ပြုလုပ်နိုင်ခြင်း ဖြစ်သည်။

ကံမကောင်းစွာဖြင့် စိတ်ဝိညာဉ်နယ်ပယ်ရှိ သိုင်းပညာကို ကျွမ်းကျင်သူမှာ အလွန်ရှားပါးလှပြီး ထိုသူအားလုံးနီးပါးမှာလည်း မူလဓာတ်ငါးပါးသိုင်းပညာရှင် တစ်ဦးစီ ဖြစ်နေကြခြင်းပင်။

အခန်း (၅၄၆) ပြိုင်ဘက်ကင်း ဧရာမခန္ဓာကိုယ်ကြီး။ ခိုထော့နှင့် ချီကန်း။ (၁)

“အားလုံးပဲ... အဲဒီ မိစ္ဆာလူသားတွေ ငါတို့ ရောက်လာတာကို သိသွားကြပြီ။ အောင်ပွဲရပြီးရင် ငါတို့အားလုံး အတူတူ သောက်စားပျော်ပါးကြတာပေါ့”

ချီကန်း၏ အသံမှာ ဟိန်းထွက်သွားပြီး တောင်ကြားအဝင်ဝကို စောင့်ကြပ်နေသော မိစ္ဆာသိုင်းပညာရှင်ကို လက်ညှိုးဖြင့် ထိုးကာ ချက်ချင်း သတ်လိုက်သည်။ သူ၏ မျက်လုံးများမှာ တိုက်ခိုက်လိုစိတ်များ တလက်လက်နှင့်။

“ဒီနေ့တော့ ဒီ မိစ္ဆာသိုင်းပညာရှင်တွေဆိုတာ တကယ်ပဲ မသေနိုင်တာလားဆိုတာ ကြည့်ရသေးတာပေါ့”

ကျားမျက်နှာဖုံး တပ်ဆင်ထားသော မူလနယ်ပယ်အဆင့် ပညာရှင်တစ်ဦးမှာ စိတ်လှုပ်ရှားမှုများ အပြည့်နှင့်။ ဤစစ်ဆင်ရေးတွင် ပါဝင်ရန် ဖိတ်ခေါ်ခံရသူများသည် မူလနယ်ပယ်အဆင့် အတွင်းရှိ ထိပ်တန်း တိုက်ခိုက်ရေးသမားများချည်း ဖြစ်ကြသည်။ အချို့မှာ ယခင်က မိစ္ဆာနတ်ဆိုးများ၊ မိစ္ဆာသိုင်းပညာရှင်များနှင့် ရင်ဆိုင်ခဲ့ဖူးသော်လည်း အများစုမှာမူ ယခုမှ ပထမဆုံးအကြိမ် တွေ့ကြုံဖူးခြင်း ဖြစ်သည်။ သိုင်းပညာရှင်များ ဖြစ်ကြသည့်အတိုင်း သူတို့သည် ထိုကဲ့သို့ ကျော်ကြားလှသော ပြိုင်ဘက်ကောင်းများနှင့် ယှဉ်ပြိုင်တိုက်ခိုက်ရန် အလွန်ပင် စိတ်အားထက်သန်နေကြသည်။

“ဒေါင်... ဒေါင်... ဒေါင်...”

ချီကန်းက တောင်ကြားဝမှ မိစ္ဆာပညာရှင်ကို သတ်ဖြတ်ပြီး မကြာမီမှာပင် တောင်ကြားအတွင်းမှ ခေါင်းလောင်းသံများ ဆက်တိုက် ထွက်ပေါ်လာသည်။ အသက်ခြွေအဖွဲ့အစည်း၏ မိစ္ဆာသိုင်းပညာရှင်များသည်လည်း ရန်သူများ ကျူးကျော်ဝင်ရောက်လာကြောင်း သိသွားကြပြီ ဖြစ်သည်။

“ဝှစ်...”

ချီကန်း၏ ကိုယ်ရည်ကိုယ်သွေးမှာ လျှပ်စီးကဲ့သို့ တောင်ကြားအတွင်းသို့ ပြေးဝင်သွားပြီး အခြားသူများကလည်း အနောက်မှ အလျင်အမြန် လိုက်ပါသွားကြသည်။ အင်အားနည်းသော လူစုဖြင့် အသက်ခြွေအဖွဲ့ချုပ်၏ ဂိုဏ်းခွဲကို တိုက်ခိုက်ရာတွင် နည်းဗျူဟာများ သိပ်မလိုတော့ပေ။ စွမ်းရည်အစစ်အမှန်ဖြင့် တိုက်ခိုက်ရန်သာ လိုတော့သည်။

တောင်ကြား၏ အနက်ရှိုင်းဆုံးနေရာ၊ အနက်ရောင် မြူခိုးများ ဖုံးလွှမ်းနေသော နန်းတော်ဝင်း အပြင်ဘက်တွင် လူရိပ်များ စုဝေးနေကြပြီ ဖြစ်သည်။ သူတို့မှာ အမျိုးမျိုးသော ဝတ်စုံများကို ဝတ်ဆင်ထားကြသော်လည်း သူတို့၏ မျက်လုံးများတွင်မူ ကြမ်းတမ်းသော အရိပ်အယောင်များ ရှိနေကြသည်။ မှောင်ရီပျိုးစ တောင်ကြားအတွင်း၌ ထိုမျက်လုံးများသည် တောရိုင်းတိရစ္ဆာန်များ၏ မျက်လုံးများနှင့်ပင် တူနေတော့သည်။

“ရန်သူတွေ တိုက်ခိုက်လာတာလား။ မိစ္ဆာသစ်ပင်ရဲ့ အရှိန်အဝါတွေ ပျောက်ကွယ်သွားပြီ... သူ အသတ်ခံလိုက်ရတာပဲ”

“ဘယ်သူက ငါတို့ အသက်ခြွေအဖွဲ့အစည်းကို ရန်စရဲတာလဲကွ။”

ထိုမိစ္ဆာသိုင်းပညာရှင်များသည် ထိတ်လန့်မှုနှင့် ဒေါသများ ရောပြွမ်းနေကြသည်။ တောင်ကြားဝကို စောင့်ကြပ်နေသော မိစ္ဆာသိုင်းပညာရှင် သေဆုံးသွားခြင်းမှာ အထဲရှိ အာရုံထက်မြက်သော မိစ္ဆာသိုင်းပညာရှင်များအတွက် သတိပေးချက် ဖြစ်သွားခဲ့သည်။ မိစ္ဆာသိုင်းပညာရှင် အယောက်ငါးဆယ်ခန့်မှာ နိုးကြားလာပြီး ချက်ချင်းပင် အမြင့်ဆုံး သတိအနေအထားသို့ ရောက်သွားကြသည်။

“သိုင်းပညာရှင်တွေ ဒီလောက်တောင် များတာလား... တစ်ယောက်ချင်းစီရဲ့ အရှိန်အဝါကလည်း အရမ်း အစွမ်းထက်တယ်။ သူတို့အားလုံးက မူလနယ်ပယ် သိုင်းပညာရှင်တွေပဲ”

ထို မိစ္ဆာပညာရှင်များသည် အဝေးမှ လျင်မြန်စွာ ချဉ်းကပ်လာသော လူတစ်စုကို တွေ့လိုက်ရပြီး အံ့အားသင့်သွားကြသည်။ မိစ္ဆာသိုင်းပညာရှင်များ၏ ထူးခြားသော အာရုံခံစားမှုအရ ချဉ်းကပ်လာသူ အားလုံးမှာ မူလနယ်ပယ် သိုင်းပညာရှင်ရှိသူများ ဖြစ်ကြောင်း သူတို့ သတိပြုမိလိုက်ကြသည်။

“မူလနယ်ပယ် သိုင်းပညာရှင်တင်မကဘူး။ အားလုံးက မူလနယ်ပယ် သိုင်းပညာရှင်အတွင်းမှာတောင် ထိပ်တန်း ပညာရှင်တွေပဲ...”

ဦးခေါင်းတွင် မီးလောင်ရာ အမှတ်အသားများ ရှိပြီး ဘုန်းကြီးတစ်ပါးကဲ့သို့ သင်္ကန်းဝတ်ထားသော ဗလတောင့်တောင့်နှင့် မိစ္ဆာသိုင်းပညာရှင် တစ်ဦးက မျက်မှောင်ကြုတ်လိုက်သည်။ သူ ဝတ်ဆင်ထားသော သင်္ကန်းမှတစ်ဆင့် သူသည် မူလနယ်ပယ် သိုင်းပညာရှင်တစ်ဦးစီ၏ ခန္ဓာကိုယ်အတွင်းရှိ ကြည်လင်သော ကောင်းကင်သွေးကြောများနှင့် သွေးကြောများအတွင်း စီးဆင်းနေသော ကြီးမားသည့် စွမ်းအင်များကို မြင်တွေ့နိုင်စွမ်း ရှိသည်။

ဤနေရာသို့ ရောက်လာသူ အယောက် နှစ်ဆယ်ကျော်မှာ မူလနယ်ပယ် အဆင့်ရှိရုံသာမက လူသားပန်းပွင့် အဆင့်တွင် ရှိသူ တစ်ယောက်မျှ မပါဝင်ချေ။ အထူးသဖြင့် ချင်းဝမ်ယွီကဲ့သို့သော လူအချို့မှာ မျက်နှာဖုံး တပ်ထားသော်လည်း ထိုသင်္ကန်းဝတ် မိစ္ဆာသိုင်းပညာရှင်မှာ သူတို့ထံမှ ခြိမ်းခြောက်မှု အငွေ့အသက်များကို ခံစားနေရရာ သူတို့သည် ထိပ်သီးပန်းသုံးပွင့် အဆင့်ရှိသူများ ဖြစ်မည်ဟု ခန့်မှန်းလိုက်သည်။

မိစ္ဆာသိုင်းပညာရှင်များက ရောက်ရှိလာသူများကို အကဲခတ်နေသလို ရောက်ရှိလာသူများကလည်း မိစ္ဆာသိုင်းပညာရှင်များကို ပြန်လည် အကဲခတ်နေကြသည်။

“ထူးဆန်းတဲ့ အရှိန်အဝါတွေပဲ... မကောင်းတဲ့ အရှိန်အဝါတွေ ပရမ်းပတာဖြစ်နေတဲ့ အရှိန်အဝါတွေ အပြည့်ပါလား။ မိစ္ဆာသိုင်းပညာရှင်တွေဆိုတာ ဒါမျိုးလား”

“ဟိုဘုန်းကြီးကို ကြည့်ရတာ ရင်းနှီးနေသလိုပဲ... သူက ဝိဇ္ဇာဗိမာန်က ဆရာကြီး ခိုထော့ မလား”

မူလနယ်ပယ် သိုင်းပညာရှင်တစ်ဦးစီမှာ သတိကြီးစွာ ထားနေကြပြီး ရှေ့တွင်ရှိနေသော မိစ္ဆာသိုင်းပညာရှင် ငါးဆယ်ခန့်၏ ပြင်းထန်ပြီး နက်နဲသော အရှိန်အဝါများကို အံ့အားသင့်နေကြသည်။ ထို့အပြင် မိစ္ဆာသိုင်းပညာရှင်များထဲတွင် ရင်းနှီးသော ပုဂ္ဂိုလ်များကိုလည်း မှတ်မိနေကြသည်။

အသက်ခြွေအဖွဲ့ချုပ်၏ မိစ္ဆာသိုင်းပညာရှင် အများအပြားမှာ သိုင်းပညာဂိုဏ်းများမှ ဆင်းသက်လာကြသူများ ဖြစ်သည်။ အသက်ခြွေအဖွဲ့ချုပ်သည် ထိပ်တန်း ပညာရှင်များကိုသာ စုဆောင်းလေ့ရှိသည်။ အဖွဲ့ဝင်ဖြစ်လိုသူများသည် စစ်ဆေးမှုများကို အောင်မြင်ပါက အဖွဲ့ချုပ်ထံမှ နတ်ဆိုးအမြုတေတစ်ခုကို ရရှိမည်ဖြစ်ပြီး အဖွဲ့ချုပ်က ထိုသူအား နတ်ဆိုးအမြုတေနှင့် ပေါင်းစပ်နိုင်ရန် ကူညီပေးသည်။ ပေါင်းစပ်မှု ကျရှုံးပါက သေဆုံးမည်ဖြစ်သော်လည်း အောင်မြင်ပါက အသစ်တစ်ဖန် မွေးဖွားလာကာ အသက်ခြွေအဖွဲ့ချုပ်၏ တရားဝင် အဖွဲ့ဝင်တစ်ဦး ဖြစ်လာသည်။ ဤအချက်မှာ ပိုမိုမြင့်မားသော အဆင့်သို့ တက်လှမ်းလိုသည့် သိုင်းပညာရှင် အများအပြားကို ဆွဲဆောင်နိုင်ခဲ့ရာ သူတို့မှာ အသက်ခြွေအဖွဲ့ချုပ်၏ အဖွဲ့ဝင်များ ဖြစ်လာကြခြင်း ဖြစ်သည်။

“လူကြီးမင်းတို့... ညဉ့်နက်သန်းခေါင်ကြီး ငါတို့ ရောက်လာတာကြောင့် အနှောင့်အယှက် ဖြစ်သွားမှာပဲ။”

ချီကန်းက လူအုပ်ကို ကြည့်ကာ တစ်စုံတစ်ယောက်ကို ရှာဖွေနေပုံရပြီးနောက် ပြုံးရင်း ပြောလိုက်သည်။

“ချီကန်း... ဒီလူက မိစ္ဆာနှိမ်နင်းရေးဌာနက 'ဟင်းလင်းပြင်ဓား' ချီကန်း ပဲ”

ဤနေရာတွင် ရှိနေသော သိုင်းပညာရှင်များထဲ၌ ချီကန်း တစ်ယောက်သာ မျက်နှာဖုံး မတပ်ဆင်ထားသဖြင့် ချက်ချင်း မှတ်မိသွားခြင်း ဖြစ်သည်။ မိစ္ဆာသိုင်းပညာရှင် တစ်ယောက်က တုန်လှုပ်သွားပြီး ချီကန်း၏ အထောက်အထားကို ဟစ်ပြောလိုက်သည်။

ချီကန်းသည် မိစ္ဆာနှိမ်နင်းရေးဌာန၏ တတိယမြောက် အရာရှိကြီး ဖြစ်သည်။ သူသည် ငယ်စဉ်ကတည်းက ထိုအဖွဲ့သို့ ဝင်ရောက်ခဲ့ပြီး မဟာမီးလျှံဘုရင်မျိုးနွယ်စု၏ ပျိုးထောင်ပေးမှုအောက်တွင် အလျင်အမြန် တိုးတက်လာကာ အသက် ၃၀ ကျော်တွင် မူလဓာတ်ငါးပါး သိုင်းပညာရှင်ကြီး တစ်ဦး ဖြစ်လာခဲ့သည်။ သူ၏ လက်ချက်ဖြင့် သေဆုံးခဲ့ရသော မိစ္ဆာနတ်ဆိုးများနှင့် မိစ္ဆာသိုင်းပညာရှင်များမှာ မနည်းလှရာ မိစ္ဆာသိုင်းပညာရှင် အများအပြားမှာ သူ၏ အကြောင်းကို ကောင်းကောင်း သိထားကြသည်။

“ချီကန်း... သူကိုယ်တိုင် ဒီကို လာတာလား။ မိစ္ဆာနှိမ်နင်းရေး ဌာနက တကယ်ပဲ ငါတို့ အသက်ခြွေအဖွဲ့အစည်းကို စစ်ကြေညာချင်နေတာလား”

မိစ္ဆာသိုင်းပညာရှင် အများအပြားမှာ ထိတ်လန့်နေသလို ဒေါသလည်း ထွက်နေကြသည်။ အသက်ခြွေအဖွဲ့အစည်းသည် အဖွဲ့ဝင်များစွာဖြင့် အင်ပါယာ တစ်ဝန်းလုံးတွင် ပျံ့နှံ့နေသည်။ အကယ်၍ စစ်ပွဲဖြစ်ပွားပါက သွေးချောင်းစီးပြီး ကြီးမားသော မတည်ငြိမ်မှုများ ဖြစ်လာမည်မှာ သေချာသည်။ ထို့ကြောင့် အသက်ခြွေအဖွဲ့အစည်းနှင့် မိစ္ဆာနှိမ်နင်းရေးဌာနတို့က ဟန်ချက်ညီအောင် ထိန်းသိမ်းထားကြခြင်း ဖြစ်သည်။ သို့သော် ယနေ့တွင် ချီကန်းက ပညာရှင်များစွာကို ခေါ်ဆောင်ကာ ဂိုဏ်းခွဲတစ်ခုသို့ လာရောက်ခြင်းမှာ သူတို့ကို အလွန်ပင် တုန်လှုပ်စေခဲ့သည်။

“ဒါဆို မင်းက ချီကန်းပေါ့။ မိစ္ဆာနှိမ်နင်းရေးဌာနက အသက်ခြွေအဖွဲ့အစည်းကို ဒီလောက်တောင် ရဲရဲတင်းတင်း စစ်ကြေညာရဲတာလား”

ဩဇာညောင်းသော အသံတစ်ခု ထွက်ပေါ်လာသည်။ မိစ္ဆာသိုင်းပညာရှင်များထဲမှ သင်္ကန်းဝတ်ထားသော၊ အရှိန်အဝါ ကြီးမားသော ထိုဘုန်းကြီးက ချီကန်းကို သတိကြီးစွာဖြင့် စိုက်ကြည့်နေ၏။

“ဆရာကြီး ခိုထော့ ပါလား”

ချီကန်းက ထိုဘုန်းကြီးကို ကြည့်ကာ မှတ်မိသွားသည်။ ဤဘုန်းကြီး ခိုထော့မှာ အလွန်ပင် ထူးခြားသူ ဖြစ်သည်။ သူသည် တစ်ခါက မဟာမီးလျှံအင်ပါယာ၏ ထိပ်တန်းဂိုဏ်းတစ်ခုဖြစ်သော ဝိဇ္ဇာဗိမာန်မှ အကြီးအကဲ တစ်ဦးဖြစ်ခဲ့ပြီး သိုင်းပညာတွင် ကြီးမားသော ပါရမီ ရှိသူဖြစ်သည်။ သို့သော် ခိုထော့သည် ခရီးထွက်ရန် ဝိဇ္ဇာဗိမာန်မှ ထွက်ခွာသွားပြီးနောက် ဘယ်တော့မှ ပြန်မလာတော့ပေ။ မိစ္ဆာနှိမ်နင်းရေး ဌာန၏ သတင်းအချက်အလက်များအရ သူသည် အသက်ခြွေအဖွဲ့အစည်း၏ အဖွဲ့ဝင်တစ်ဦး ဖြစ်လာခဲ့ကြောင်း သိရသည်။