အခန်း (၅၅၀-၅၅၂)

အခန်း (၅၅၀) မူလဓာတ်ငါးပါး သိုင်းပညာရှင်ကြီး တာ့ဝူဖုန်း။ (၂)

“ချီကန်း... မင်း... မင်း တကယ်ပဲ ရူးသွားပြီလား။ ဘာဖြစ်လို့လဲ”

ချင်းဝမ်ယွီသည် သွားများ တကောက်ကောက် တုန်နေပြီး မျက်လုံးများ နီမြန်းလျက် ချီကန်းကို စိုက်ကြည့်နေသည်။ သူသည် ချီကန်းနှင့် သိကျွမ်းခဲ့သည်မှာ နှစ်ပေါင်းများစွာ ရှိပြီဖြစ်ပြီး သူ့ကို မိတ်ဆွေစစ်ဟု မှတ်ယူထားခဲ့သော်လည်း ယခုမူ ချီကန်းမှာ သူစိမ်းတစ်ယောက်ကဲ့သို့ ဖြစ်နေသည်။ ချီကန်းက ဘာကြောင့် ဒီလောက် လုပ်ရသလဲဆိုတာကို သူ လုံးဝ နားမလည်နိုင်တော့။

ချီကန်း ကိုယ်တိုင်မှာလည်း သိုင်းပညာရှင်ကြီး တစ်ဦးဖြစ်သလို မိစ္ဆာနှိမ်နင်းရေး ဌာန၏ အဆင့်မြင့် အရာရှိတစ်ဦးလည်း ဖြစ်သည်။ သူ၏ အဆင့်အတန်းနှင့် စွမ်းအားမှာ အထွတ်အထိပ်သို့ ရောက်နေပြီဟု ပြောနိုင်သော်လည်း သူသည် အသက်ခြွေအဖွဲ့ချုပ်သို့ ဝင်ရောက်ရန် သစ္စာခံသည့်အနေဖြင့် သူ၏ မိတ်ဆွေများကို သတ်ဖြတ်ရန် တကယ်ပဲ လိုလားသည်တဲ့လား။ ဒါက နားလည်ရ ခက်လွန်းပါသည်။

ချီကန်းက ချင်းဝမ်ယွီကို ကြည့်ကာ သက်ပြင်းချလိုက်သည်။ “ညီလေးချင်းဝမ်... ဘာကြောင့်လဲ ဆိုတာတွေ မရှိပါဘူး။ ငါက ပိုပြီး မြင့်မားတဲ့ နေရာကို တက်လှမ်းချင်ရုံပါ။ လူသားတစ်ယောက်ရဲ့ ကြိုးပမ်းအားထုတ်မှုမှာ အကန့်အသတ် ရှိတယ်။ ငါက ထိပ်ဆုံးနေရာမှာ နေရာတစ်နေရာ ရဖို့အတွက် ယှဉ်ပြိုင်ချင်တယ်။ တခြားသူတွေ ပေးသမျှ စားရတဲ့ ခွေးတစ်ကောင်လို အဖြစ်မခံနိုင်ဘူး။”

သူ၏ ပွင့်လင်းသော စကားများက ချီကန်း၏ မကျေနပ်မှုနှင့် ခါးသီးမှုများကို ဖော်ပြနေသည်။

အခြားသူများ၏ အမြင်တွင် ချီကန်းမှာ လူတို့ထက် သာလွန်သော နဂါးတစ်ကောင်ကဲ့သို့ ဖြစ်ပြီး အလွန်ပင် ငယ်ရွယ်သော အသက်အရွယ်ဖြင့် မူလဓာတ်ငါးပါး သိုင်းပညာရှင်အဆင့်သို့ ရောက်ခဲ့သူ ဖြစ်သည်။ မိစ္ဆာနှိမ်နင်းရေး ဌာနတွင်လည်း တတိယမြောက် အမြင့်ဆုံး ရာထူးကို ရယူထားနိုင်ပြီး သာမန်လူများ မမှီနိုင်သော အာဏာနှင့် အဆင့်အတန်းကို ပိုင်ဆိုင်ထားသည်။ သို့သော် မိမိအိမ်တွင်းရေးကို မိမိသာ သိသကဲ့သို့ ချီကန်းတွင်လည်း အခက်အခဲများ ရှိနေသည်။

ချီကန်းမှာ ပါရမီရှိတာ မှန်ပါသည်။ မဟုတ်ပါက သူသည် လက်ရှိအဆင့်သို့ ရောက်လာမည် မဟုတ်ချေ။ သို့သော် သူသည် သူ၏ အကန့်အသတ်ကို ရောက်သွားပြီဟု ခံစားနေရသည်။ ချီကန်းသည် ဝိညာဉ်တစ်သောင်း ဂူသင်္ချိုင်း၏ ဖိအားအောက်တွင် ဓားဝိညာဉ်ကို နားလည်ကာ သန်းပေါင်းများစွာသော လူတို့ထက် သာလွန်သည့် မူလဓာတ်ငါးပါး သိုင်းပညာရှင်ကြီး တစ်ဦး ဖြစ်လာခဲ့သည်။ သို့သော် သူ၏ ပါရမီဖြင့် ထပ်မံ တိုးတက်ရန်မှာ လုံးဝ မဖြစ်နိုင်သလောက်ပင်။

နတ်ဘုရားမျိုးစေ့ တစ်ခုကို မရရှိပါက သူ ဆက်လက် တိုးတက်နိုင်မည် မဟုတ်ချေ။ ကံမကောင်းစွာဖြင့် နတ်ဘုရားမျိုးစေ့များမှာ အလွန်ပင် ရှားပါးလှသည်။ မဟာမီးလျှံဘုရင်မျိုးနွယ်စုတွင် ဘိုးဘေးများထံမှ ဆင်းသက်လာသော အချို့ ရှိသော်လည်း ပြင်ပလူဖြစ်သော ချီကန်းအတွက် ရယူနိုင်ရန် နေရာမရှိချေ။ အကယ်၍ နတ်ဘုရားမျိုးစေ့ တစ်ခုကို ရခဲ့လျှင်ပင် ၎င်းကို ကျွမ်းကျင်ပိုင်နိုင်စွာ ပေါင်းစပ်နိုင်ရန်မှာ ကောင်းကင်သို့ တက်လှမ်းရသကဲ့သို့ ခက်ခဲလှရာ မူလဓာတ်ငါးပါး သိုင်းပညာရှင် တစ်ဦးအတွက် ထိုတံခါးကို ဖြတ်ကျော်ရန် အခွင့်အရေး အနည်းငယ်သာ ရှိသည်။

တစ်နေ့ထက်တစ်နေ့ အသက်ကြီးလာသော်လည်း သူ၏ စွမ်းအားမှာ တစ်နေရာတည်းတွင် ရပ်တန့်နေပြီး အနည်းငယ်မျှပင် တိုးတက်ရန် ရုန်းကန်နေရခြင်းမှာ အသက် ၃၀ ကျော်ဖြင့် မူလဓာတ်ငါးပါး သိုင်းပညာရှင် အဆင့်သို့ ရောက်ရှိခဲ့သော ချီကန်းအတွက် သည်းခံရန် ခက်ခဲလှသည်။ ယခင်က အတားအဆီးများကို ကျော်ဖြတ်ရန်မှာ ရေသောက်ရသကဲ့သို့ လွယ်ကူခဲ့သော်လည်း ယခုမူ ဆယ်စုနှစ်များစွာ ကြာသည်အထိ သိသာသော တိုးတက်မှု မရှိခဲ့ချေ။ မိစ္ဆာနှိမ်နင်းရေး ဌာန၏ အကြီးအကဲ ကိုယ်တိုင်ကပင် ချီကန်းအား ကံကောင်းမှု တစ်ခုခု မရှိပါက ဤသည်မှာ သူ၏ အကန့်အသတ်ပင် ဖြစ်ကြောင်း ပြောခဲ့သည်။

နေ့စဉ်နေ့တိုင်း စိတ်ဆင်းရဲမှုများ၊ မိစ္ဆာနတ်ဆိုးများနှင့် အမြဲတစေ ရင်ဆိုင်နေရမှုများက ချီကန်း၏ စိတ်ထဲတွင် မရပ်တန့်နိုင်သော အတွေးများကို အမြစ်တွယ်စေခဲ့ပြီး ၎င်းမှာ မထိန်းချုပ်နိုင်သော တွန်းအားတစ်ခု ဖြစ်လာကာ လက်တွေ့ အကောင်အထည် ဖော်ခဲ့ခြင်း ဖြစ်သည်။

ထို့ကြောင့် ယနေ့ ဖြစ်ရပ်များ ဖြစ်ပေါ်လာရခြင်း ဖြစ်သည်။ ချီကန်းသည် အသက်ခြွေအဖွဲ့ချုပ်၏ အဆင့်မြင့် ပုဂ္ဂိုလ်များနှင့် ဆက်သွယ်ကာ သူ၏ ရက်စက်သော ဆုံးဖြတ်ချက်ကို သစ္စာခံအဖြစ် ပေးအပ်ခဲ့ပြီး သူ၏ အတိတ်ဘဝကို နှုတ်ဆက်လိုက်ခြင်းပင် ဖြစ်သည်။

“ချီကန်း”

“ငါနဲ့ ငါ့အစ်ကိုက မင်းကို ကူညီပြီး အသက်ခြွေအဖွဲ့ချုပ်ကို တိုက်ဖို့ အသက်နဲ့ရင်းပြီး လာခဲ့တာ။ ဒါကို မင်းက ငါတို့ကို သစ္စာဖောက်တယ်ပေါ့။ ငါတို့ရဲ့ အသက်တွေကို အမှိုက်လို သဘောထားတဲ့အတွက် ငါ့အစ်ကို သေဆုံးမှုအတွက် မင်းကို ငါ ဘယ်တော့မှ ခွင့်မလွှတ်ဘူး။”

ဝက်ဝံမျက်နှာဖုံး တပ်ထားသော လူမှာ ဒေါသတကြီး တုန်ယင်နေပြီး သွားများကို တင်းတင်းကြိတ်ကာ အော်ပြောလိုက်သည်။ ဤသည်မှာ ရောက်ရှိနေသူ အားလုံး၏ ရင်ထဲမှ ခံစားချက်ပင် ဖြစ်သည်။ သူတို့ တစ်ဦးစီမှာ ချီကန်းနှင့် ဆက်ဆံရေး ရှိကြသူများ သို့မဟုတ် သူ၏ စရိုက်ကို ယုံကြည်သဖြင့် ကူညီရန် လာခဲ့ကြသူများ ဖြစ်သည်။ သို့သော် မိစ္ဆာနှိမ်နင်းရေးဌာနမှ ကျော်ကြားသော ဤပုဂ္ဂိုလ်ကြီးမှာ မိစ္ဆာသိုင်းပညာရှင် တစ်ယောက် ဖြစ်လာရန်အထိ အောက်တန်းကျသွားလိမ့်မည်ဟု မည်သူမျှ မထင်မှတ်ထားခဲ့ကြချေ။

“ချီကန်း... မင်း ငါတို့ဆီ ဝင်ချင်တာ တကယ်ပဲ ဆိုတော့... အရမ်းကောင်းတာပေါ့။ ငါ မင်းကို အဖွဲ့ချုပ် ခေါင်းဆောင်နဲ့ တွေ့ဖို့ ခေါ်သွားပေးမယ်။ မင်းရဲ့ နောက်ခံနဲ့ အရှင့်ရဲ့ ကူညီမှုသာ ရှိရင် အကယ်၍ မင်းသာ အဆင့်မြင့် နတ်ဆိုးအမြုတေနဲ့ အောင်မြင်အောင် ပေါင်းစပ်နိုင်ရင် အသက်ခြွေအဖွဲ့ချုပ်ရဲ့ အကြီးအကဲ နေရာတစ်ခုကိုတောင် လှမ်းယူနိုင်လိမ့်မယ်။”

ချီးကျူးဂုဏ်ပြုသံ တစ်ခု ထွက်ပေါ်လာပြီး အရိပ်တစ်ခု တွန့်လိမ်သွားကာ ဝတ်စုံနက် ဝတ်ဆင်ထားသော အဖိုးအို တစ်ဦးအဖြစ် ပြောင်းလဲသွားပြီး ချီကန်းကို ကြည့်လိုက်သည်။ ဤဝတ်စုံနက် အကြီးအကဲမှာ အိုမင်းခြင်း အရိပ်အယောင်များ မရှိဘဲ သူဝတ်ထားသော ဝတ်စုံနက်မှာ အသက်ရှိသကဲ့သို့ လှုပ်ရှားနေသည်။ သူ၏ မျက်လုံးများမှာ ဝါဖျော့ဖျော့ ရှိနေပြီး လူတို့၏ ဝိညာဉ်ကို ဆွဲယူနိုင်စွမ်း ရှိပုံရသည်။

“ကျေးဇူးတင်ပါတယ် တမန်တော် ချီကျင်း” ချီကန်းက ဝတ်စုံနက် အကြီးအကဲကို ရိုသေစွာ ပြောလိုက်သည်။

ဤဝတ်စုံနက် အကြီးအကဲ ချီကျင်းမှာ အသက်ခြွေအဖွဲ့ချုပ် ဌာနချုပ်မှ တမန်တော်တစ်ဦး ဖြစ်ပြီး ခန့်မှန်းရခက်သော စွမ်းအားများ ရှိသူ ဖြစ်သည်။ သူ၏ စစ်ဆေးမှုကို အောင်မြင်မှသာ အဖွဲ့ချုပ်သို့ ဝင်ရောက်နိုင်မည် ဖြစ်သည်။ ချီကန်း၏ အဆင့်အတန်းနှင့် သူ၏ ဝင်ရောက်လိုသော ဆန္ဒကို အဖွဲ့ချုပ်က နွေးထွေးစွာ ကြိုဆိုမည် ဖြစ်သည်။ ချီကျင်းသည် ယခင်ကပင် ချီကန်းအား ကတိပေးထားခဲ့သည်မှာ သူ၏ စစ်မှန်သော စိတ်ဆန္ဒနှင့် ဆုံးဖြတ်ချက်ကို ပြသနိုင်ပါက အဖွဲ့ချုပ်က ထိုက်တန်သော တုံ့ပြန်မှုကို ပေးမည်ဟူ၍ ဖြစ်သည်။

အဆင့်မြင့် နတ်ဆိုးအမြုတေ တစ်ခုကို အဖွဲ့ချုပ် ခေါင်းဆောင် ကိုယ်တိုင် ပေါင်းစပ်နိုင်ရန် ကူညီပေးမည် ဖြစ်သည်။ ပညာရှင်ကြီး တစ်ဦးဖြစ်ပြီးသား ချီကန်းအနေဖြင့် နတ်ဆိုးအမြုတေနှင့် ပေါင်းစပ်ကာ မသေမျိုး ခန္ဓာကိုယ်နှင့် မိစ္ဆာအတတ်ကို ရရှိလိုက်ပါက သူသည် အသစ်တစ်ဖန် မွေးဖွားလာမည် ဖြစ်သည်။ ထိုအခါ မူလဓာတ်ငါးပါး သိုင်းပညာရှင် ဟူသော ဘွဲ့မှာ မလုံလောက်တော့ဘဲ သူ့အား 'မဟာသိုင်းပညာရှင်ကြီး' ဟုပင် ခေါ်ဆိုနိုင်မည် ဖြစ်သည်။

ထို့နောက် ချီကျင်းသည် ကျန်ရှိနေသော သူများဘက်သို့ လှည့်ကာ သူ၏ ဩဇာညောင်းသော အသံဖြင့် ပြောလိုက်သည်။ “လူကြီးမင်းတို့... ချီကန်းရဲ့ တိုက်ခိုက်မှုကနေ အသက်ရှင်ကျန်ရစ်တာဟာ မင်းတို့ရဲ့ အစွမ်းကို သက်သေပြနေတာပဲ။ အခု မင်းတို့မှာ ရွေးချယ်စရာ နှစ်ခုပဲ ရှိတယ်... သေမလား ဒါမှမဟုတ် လက်နက်ချပြီး အသက်ခြွေအဖွဲ့အစည်းထဲကို ဝင်မလား”

ဝတ်စုံနက် အဖိုးအို တမန်တော် ချီကျင်းက တည်ငြိမ်စွာ ပြောဆိုလိုက်သော်လည်း သူ၏ စကားများမှာ ငြင်းဆန်၍ မရနိုင်ချေ။ သေခြင်း သို့မဟုတ် လက်နက်ချခြင်း။

တောင်ကြားအတွင်း၌ အနက်ရောင် မြူခိုးများ လှည့်ပတ်နေပြီး မိစ္ဆာပညာရှင်များက ဝိုင်းရံထားကာ ထွက်ပြေးမည့် လမ်းကြောင်းကို ပိတ်ဆို့ထားကြသည်။ မူလဓာတ်ငါးပါး သိုင်းပညာရှင် တစ်ဦး၏ ခြိမ်းခြောက်မှု မရှိလျှင်ပင် သူတို့ထဲမှ မည်သူ့ကိုမဆို သတ်ဖြတ်ရန်မှာ လွယ်ကူလှသည်။

“ချီကန်း.. ငါ မင်းကို သတ်မယ်။”

ထိုအချိန်တွင် လူတစ်ယောက်မှာ သူ၏ ဒေါသကို မထိန်းနိုင်တော့ချေ။ အနှီလူမှာ သူ၏ အစ်ကိုဖြစ်သူက ချီကန်း၏ လက်ချက်ဖြင့် သေဆုံးသွားခဲ့ရသော ဝက်ဝံမျက်နှာဖုံးနှင့် သိုင်းပညာရှင် ဖြစ်သည်။ သူသည် ချီကန်းထံသို့ အရူးအမူး ပြေးဝင်သွားပြီး ကောင်းကင်သွေးကြော ခြောက်သွယ် ထွက်ပေါ်လာကာ မြေကမ္ဘာပန်းပွင့်နှင့် လူသားပန်းပွင့်များကို စုစည်းပြီး ပြင်းထန်စွာ တိုက်ခိုက်လိုက်သည်။

ချီကန်းမှာမူ မည်သည့် ခံစားချက်မျှ မရှိဘဲ ရပ်နေပြီး ခိုထော့ကမူ သနားစဖွယ် အမူအရာဖြင့် လက်နှစ်ဖက်ကို ပူးကပ်လိုက်သည်။ “အာမိတော်ဖော်...”

အခန်း (၅၅၁) မူလဓာတ်ငါးပါး သိုင်းပညာရှင်ကြီး တာ့ဝူဖုန်း။ (၃)

ဝက်ဝံမျက်နှာဖုံးနှင့်လူသည် ချီကန်းအနားသို့ မချဉ်းကပ်နိုင်မီမှာပင် ကောင်းကင်နှင့် မြေပြင်တစ်ခုလုံးကို လွှမ်းခြုံသွားသည့် ကြီးမားလှသော အမှောင်ထုကြီးက အရာအားလုံးကို ဖုံးလွှမ်းသွားခဲ့သည်။ ၎င်းမှာ ဝတ်စုံနက် အဖိုးအို တမန်တော် ချီကျင်းပင် ဖြစ်သည်။ သူ၏ ဝတ်စုံနက်ကြီးမှာ လေထဲတွင် အသက်ရှိသကဲ့သို့ တဖျတ်ဖျတ် လှုပ်ခတ်နေပြီး ဝက်ဝံမျက်နှာဖုံးနှင့်လူကို လျှပ်စီးလက်သကဲ့သို့ မြန်ဆန်သော အရှိန်ဖြင့် ဝါးမြိုလိုက်သည့် ပါးစပ်ကြီးတစ်ခုအသွင် ပြောင်းလဲသွားသည်။

“အားးးးး”

ဝါးမြိုသံနှင့် ကိုက်ဖြတ်သံများနှင့်အတူ ဝက်ဝံမျက်နှာဖုံးနှင့်လူ၏ သွေးပျက်ဖွယ် အော်ဟစ်သံကြီး ထွက်ပေါ်လာသည်။ သူသည် အရူးအမူး ရုန်းကန်နေသော်လည်း ရွှံ့နွံထဲတွင် နစ်နေသကဲ့သို့ မည်သို့မျှ ရုန်းမထွက်နိုင်ချေ။ အသက်ရှူရုံမျှ အချိန်အတွင်းမှာပင် ဝတ်စုံနက် အဖိုးအိုသည် သူ၏ အင်္ကျီလက်ကို ဝှေ့ယမ်းလိုက်ရာ ဝက်ဝံမျက်နှာဖုံးနှင့်လူမှာ အပြင်သို့ လွင့်ထွက်သွားပြီး မြေပြင်ပေါ်သို့ ပြုတ်ကျသွားသည်။ သို့သော် ထိုအချိန်တွင် ထိုသူ၌ အသားအရေဟူ၍ မရှိတော့ဘဲ ဖြူဖွေးနေသော အရိုးစုကြီးသာ ကျန်ခဲ့တော့သည်။

“ဂေ့”

ဝတ်စုံနက် အဖိုးအို ဝတ်ဆင်ထားသော ဝတ်စုံကြီးထံမှ ကျေနပ်အားရသည့် လေတက်သံကြီး ထွက်ပေါ်လာသည်။ ဤမြင်ကွင်းကြောင့် လူတိုင်းမှာ တုန်လှုပ်ချောက်ချားသွားကြသည်။ အသက်ခြွေအဖွဲ့ချုပ်၏ တမန်တော်တစ်ဦးအနေဖြင့် ချီကျင်း၏ စွမ်းအားမှာ ခန့်မှန်းရခက်လှပြီး ချီကန်း သို့မဟုတ် ခိုထော့ထက်ပင် နိမ့်ကျမည် မဟုတ်ပေ။ သူ့အတွက်မူ မြေကမ္ဘာပန်းပွင့် အဆင့်ရှိ သိုင်းပညာရှင် တစ်ဦးမှာ အရိုးစုသာ ကျန်သည်အထိ စားသောက်ရန် အစာတစ်ခုမျှသာ ဖြစ်သည်။

ဝတ်စုံနက် အဖိုးအိုက အေးစက်စွာ နှာခေါင်းရှုံ့လိုက်ပြီး ပြောလိုက်သည်။ “ငါ အမုန်းဆုံးက ငါ့စကားကို နားမထောင်တဲ့သူတွေပဲ။”

“ဆုံးဖြတ်ချက်ချကြ။ သေမလား ဒါမှမဟုတ် လက်နက်ချမလား။ တကယ်လို့ မင်းတို့က စစ်ဆေးမှုကို အောင်မြင်ရင် အသက်ခြွေအဖွဲ့ချုပ်ရဲ့ အဖွဲ့ဝင်တွေ ဖြစ်လာပြီး အသစ်တစ်ဖန် မွေးဖွားလာနိုင်လိမ့်မယ်။” ဝတ်စုံနက် အဖိုးအိုသည် ကြင်နာတတ်သောအသွင်ဖြင့် ပြုံးလျက် လူတိုင်းကို ကြည့်နေသော်လည်း မြင်ရသူတိုင်းမှာ ကျောချမ်းသွားကြသည်။

“ဘာ... ငါတို့ ဘာလုပ်သင့်သလဲ...”

သိုင်းပညာရှင် အားလုံးမှာ စိတ်လေးနေကြသည်။ သူတို့ တစ်ဦးစီမှာ မူလနယ်ပယ် သိုင်းပညာရှင်များထဲမှ ထိပ်တန်းများ ဖြစ်ကြသော်လည်း ယခုမူ ချီကန်း၏ သစ္စာဖောက်မှုနှင့် ကြီးမားသော အသေအပျောက်များကြောင့် မသေမျိုး မိစ္ဆာသိုင်းပညာရှင် အုပ်စုကို ရင်ဆိုင်ရန်မှာပင် အစွမ်းကုန် ရုန်းကန်ရတော့မည် ဖြစ်သည်။ ချီကန်း၊ ခိုထော့နှင့် ဝတ်စုံနက် အဖိုးအို ချီကျင်းတို့မှာလည်း သူတို့ ယှဉ်ပြိုင်ရန် အလွန်ခက်ခဲသော ပုဂ္ဂိုလ်များ ဖြစ်ကြရာ တိုက်ခိုက်ခြင်းမှာ သေခြင်းတရားကို ဖိတ်ခေါ်ခြင်းပင် ဖြစ်သည်။

ထွက်ပြေးဖို့လား။ ကျောက်နက်တောင်တန်းနှင့် မိစ္ဆာသိုင်းပညာရှင်အုပ်စု၏ ဝိုင်းရံမှုမှ လွတ်မြောက်နိုင်ရန် အခွင့်အရေးမှာ အလွန်ပင် နည်းပါးလှသည်။ လက်နက်ချရန်မှာလည်း သူတို့၏ အသက်ကို ရန်သူ့လက်ထဲ အပ်နှံလိုက်ခြင်းပင် ဖြစ်သည်။ အကောင်းဆုံး ဖြစ်လာလျှင်ပင် လူလည်းမဟုတ်၊ သရဲလည်းမဟုတ်သော မိစ္ဆာနတ်ဆိုးများ ဖြစ်သွားကြမည်ဖြစ်ရာ ဤသည်မှာ သိုင်းပညာရှင် အများစု လက်မခံနိုင်သော ကံကြမ္မာပင် ဖြစ်သည်။

“ကျွန်တော် အသက်ခြွေအဖွဲ့အစည်းထဲကို ဝင်ချင်ပါတယ်။”

ထိုအချိန်တွင် တိတ်ဆိတ်မှုကို ဖြိုခွဲလိုက်သော အသံတစ်ခု ထွက်ပေါ်လာရာ မိစ္ဆာသိုင်းပညာရှင်များနှင့် သိုင်းပညာရှင် အားလုံး၏ အကြည့်မှာ ထိုစကားပြောသူထံသို့ ရောက်သွားကြသည်။ စကားပြောသူမှာ သွားစွယ်ငေါငေါနှင့် အစိမ်းရောင် သရဲမျက်နှာဖုံးကို တပ်ထားပြီး အနက်ရောင် သိုင်းဝတ်စုံကို ဝတ်ဆင်ထားသည်။

“တာ့ဝူဖုန်း...” မျက်နှာဖုံး တပ်ထားသော်လည်း လူအုပ်ကြီးမှာ ထိုသူမှာ 'တာ့ဝူဖုန်း' ဖြစ်ကြောင်း သိကြသည်။

ချင်းဝမ်ယွီသည် သူ၏ လည်ပင်းဒဏ်ရာကို အုပ်ထားရင်း စိတ်ထဲမှ သက်ပြင်းချလိုက်သည်။ “ငါ ချင်းဝမ်ယွီ... တကယ်ပဲ လူကြည့် မတတ်ခဲ့ဘူးပဲ။”

သူက ညီအစ်ကိုအရင်းကဲ့သို့ မှတ်ယူထားသော ချီကန်းက သူ့ကို သစ္စာဖောက်ခဲ့သလို၊ သူကိုယ်တိုင် ခေါ်ဆောင်လာခဲ့သော လျှို့ဝှက်သိုင်းပညာရှင် တာ့ဝူဖုန်းမှာလည်း ရန်သူနှင့် ပူးပေါင်းရန် ရွေးချယ်ခဲ့သည်။ ဤကဲ့သို့သော အခြေအနေမျိုးတွင် ထိုသို့ ရွေးချယ်ခြင်းမှာ ပုံမှန်ပင် ဖြစ်သော်လည်း ပထမဆုံး လက်နက်ချသူ ဖြစ်နေခြင်းမှာ အမှန်တကယ်ပင် စက်ဆုပ်ဖွယ် ကောင်းလှသည်။

“ကောင်းတယ်၊ မင်းရဲ့ မျက်နှာဖုံးကို ချွတ်လိုက်။”

ဝတ်စုံနက် အဖိုးအိုက ပြုံးလျက် ပြောလိုက်သည်။ တစ်စုံတစ်ယောက်က စတင် လက်နက်ချလိုက်သည်နှင့် ဒုတိယ၊ တတိယမြောက် လူများ မကြာမီ ပေါ်လာတော့မည်ကို သူ ကောင်းကောင်း သိသည်။ စူးချန်ခုန်းသည် ပြောသည့်အတိုင်း လုပ်ဆောင်ကာ သူ၏ မျက်နှာဖုံးကို ချွတ်လိုက်ရာ တည်ကြည်သော မျက်နှာတစ်ခု ပေါ်ထွက်လာသည်။

“ဒီကိုလာပြီး ဒီ 'မိစ္ဆာချီပိုးကောင်' ကို မြိုချလိုက်။ စိတ်မပူနဲ့။ ဒါက မင်းရဲ့ ချီစွမ်းအင်၊ သွေးနဲ့ သွေးကြောတွေကိုပဲ ပိတ်ဆို့ထားမှာပါ။ မင်းရဲ့ အသက်ကို အန္တရာယ်မပြုပါဘူး။ အခုနက ချီကန်းရဲ့ တိုက်ခိုက်မှုကနေ မင်းက ဘာဒဏ်ရာမှမရဘဲ ရှောင်နိုင်ခဲ့တာကို ကြည့်ရင် ငါတို့ အသက်ခြွေအဖွဲ့ချုပ်က မင်းလို အရည်အချင်းရှိသူတွေကို ကြိုဆိုပါတယ်။”

ဝတ်စုံနက် အဖိုးအိုက ဆက်ပြောရင်း သူ၏ လက်ဝါးကို ဖြန့်လိုက်ရာ မိစ္ဆာစွမ်းအားများဖြင့် ဖွဲ့စည်းထားသော အနက်ရောင် ပိုးကောင်တစ်ကောင် ပေါ်ထွက်လာသည်။ ဤမိစ္ဆာချီပိုးကောင်ကို မြိုချလိုက်ပါက သိုင်းပညာရှင်၏ စွမ်းအားများ ပိတ်ဆို့ခံရမည်ဖြစ်ပြီး အခြားသူ၏ ကြိုးကိုင်မှုကို ခံရတော့မည် ဖြစ်သည်။

ဝတ်စုံနက် အဖိုးအိုက အလွန် ကျေနပ်နေ၏။ ချီကန်းက ရုတ်တရက် တိုက်ခိုက်စဉ်က လူငါးဦး သေဆုံးပြီး ငါးဦး ဒဏ်ရာရခဲ့သော်လည်း အချို့မှာ အလွန်လျင်မြန်စွာ တုံ့ပြန်နိုင်ခဲ့သည်ကို သူ တိတ်တဆိတ် စောင့်ကြည့်နေခဲ့သည်။ 'တာ့ဝူဖုန်း' မှာ ထိုသို့ ရှောင်တိမ်းနိုင်ခဲ့သူများထဲတွင် ပါဝင်သဖြင့် သူ၏ စွမ်းအားမှာ သာမန်မဟုတ်ကြောင်း သိသာလှပြီး နတ်ဆိုးအမြုတေနှင့် အောင်မြင်စွာ ပေါင်းစပ်နိုင်ကာ အသက်ခြွေအဖွဲ့အစည်း၏ အဖွဲ့ဝင်ကောင်း တစ်ဦး ဖြစ်လာနိုင်သည်ဟု သူ ထင်မြင်နေခြင်း ဖြစ်သည်။

“ကောင်းပြီ..ပြဿနာမရှိပါဘူး၊ ကျွန်တော်လည်း အသစ်တစ်ဖန် မွေးဖွားပြီး မသေမျိုးခန္ဓာကိုယ်ကို ရချင်နေတာ ကြာပြီ” တာ့ဝူဖုန်းက စိတ်လှုပ်ရှားနေသော အပြုံးဖြင့် ပြောလိုက်ကာ ဝတ်စုံနက် အဖိုးအိုထံသို့ ပူးပေါင်းဆောင်ရွက်လိုသော အမူအရာဖြင့် လျှောက်သွားလိုက်သည်။

ချင်းဝမ်ယွီနှင့် အခြားသူများ၏ မျက်လုံးများတွင်မူ စက်ဆုပ်ရွံရှာမှုများ ပြည့်နှက်နေလျက်။

“ငါက တာ့ဝူဖုန်းကို ထူးခြားတဲ့သူတစ်ယောက်လို့ ထင်ထားခဲ့တာ... သူက သေရမှာကြောက်တဲ့ လူညံ့တစ်ယောက် ဖြစ်လိမ့်မယ်လို့ မထင်ထားခဲ့ဘူး။”

ချင်းဝမ်ယွီ တိတ်တဆိတ် သက်ပြင်းချလိုက်သည်။ စူးချန်ခုန်းသည် ချင်းယွမ်ဂိုဏ်းနှင့် အဆက်အသွယ် ရှိခဲ့ဖူးပြီး ပစ္စည်းများစွာကိုလည်း လဲလှယ်ခဲ့ဖူးရာ နှစ်ဦးနှစ်ဖက် ဆက်ဆံရေး ကောင်းမွန်ခဲ့သည်။ ချင်းဝမ်ယွီသည် စူးချန်ခုန်းအား သာမန်လူမဟုတ်သော ပညာရှင်တစ်ဦးဟု ထင်မှတ်ခဲ့သည်။ ယခုမူ အသက်ရှင်ရန်အတွက် ဖားနေသော စူးချန်ခုန်း၏ အမူအရာမှာ အလွန်ပင် အောက်တန်းကျလှသည်ဟု သူ ထင်မြင်သွားခဲ့သည်။

“ဟူး... ငါက ဆေးညွှန်းတစ်ခု လိုချင်လို့ လာတာကို အခုတော့ ဒီအရှုပ်တွေထဲ ပါကုန်ပြီ...” စူးချန်ခုန်းသည် မျက်နှာတွင် နှိမ့်ချသော အပြုံးကို ဆင်မြန်းထားသော်လည်း စိတ်ထဲတွင်မူ စကားပင် မဆိုနိုင်တော့ပေ။ အဆင့်မြင့် ဆေးညွှန်းတစ်ခုကို အလွယ်တကူ ရနိုင်မည်ဟု သူ ထင်ထားခဲ့သော်လည်း နောက်ဆုံးတွင် ချီကန်း၏ သစ္စာခံရန်အတွက် အသုံးချခံရမည့် ထောင်ချောက်ကြီး ဖြစ်နေခဲ့သည်။

စူးချန်ခုန်းသည် စိတ်ဝိညာဉ် မရှိသော မိစ္ဆာနတ်ဆိုး တစ်ကောင်လည်း မဖြစ်ချင်သလို သေလည်း မသေချင်ပေ။ ထို့ကြောင့် သူ၏ တစ်ခုတည်းသော ရွေးချယ်စရာမှာ... သူတို့ကို သေအောင် လုပ်ဖို့ပင်။

ဆယ်လံ၊ ငါးလံ၊ တစ်လံ...

စူးချန်ခုန်းသည် တစ်လံအကွာအဝေးသို့ ရောက်ရှိလာသောအခါ ပြုံးနေသော ဝတ်စုံနက် အဖိုးအိုမှာ ရုတ်တရက် ထိတ်လန့်သွားလေ၏။ သူသည် အလွန်ပင် သိမ်မွေ့လှသော သတ်ဖြတ်လိုစိတ် တစ်ခုကို အာရုံခံမိလိုက်ခြင်း ဖြစ်သည်။ ထိုစိတ်ဝိညာဉ်မှာ... သူ့ရှေ့တွင် ရှိနေသော လူထံမှ ထွက်ပေါ်နေခြင်းပင်။

“ကလောက်”

စူးချန်ခုန်း၏ မျက်နှာမှ နှိမ့်ချသော အပြုံးများ ပျောက်ကွယ်သွားပြီး အေးစက်သော သတ်ဖြတ်လိုစိတ်များဖြင့် အစားထိုးလိုက်သည်။ သူ၏ လက်ဝါးမှာ ခါးတွင် ချိတ်ထားသော ဓားရိုးပေါ်သို့ ရောက်ရှိနေပြီဖြစ်ပြီး သံဖြတ်ဓားမှာ ဓားအိမ်အတွင်းမှ ထွက်လာကာ အေးစက်သော ဓားစွမ်းအင်များမှာ ဓားသွားပေါ်တွင် စုစည်းသွားသည်။ ဓားဝိညာဉ်မှာ သူ၏ စိတ်ဝိညာဉ်ပင်လယ်အတွင်းမှ သဘာဝအတိုင်း ထွက်ပေါ်လာပြီး တစ်လံအတွင်းရှိ ဟင်းလင်းပြင်ကို စူးချန်ခုန်း၏ နယ်ပယ်အဖြစ် ပြောင်းလဲလိုက်သည်။ ဓားတစ်ချက် ဆွဲထုတ်လိုက်သည်နှင့် သွေးစွန်းရတော့မည် ဖြစ်သည်။

“ချွမ်း”

သံဖြတ်ဓားမှာ ဓားအိမ်အတွင်းမှ လွတ်ထွက်လာပြီး ၎င်း၏ စွမ်းအင်များမှာ ဝတ်စုံနက်ဝတ် အဖိုးအိုထံသို့ စိုက်ဝင်သွားသည်။ နှေးကွေးသယောင်နှင့် မြန်ဆန်လှသော ခုတ်ချက်တစ်ခု ကျဆင်းလာရာ လေထုထဲတွင် မပျောက်ကွယ်နိုင်သော လမ်းကြောင်းတစ်ခု ကျန်ရစ်ခဲ့သည်။

ဝတ်စုံနက် အဖိုးအိုသည် အလွန် လျင်မြန်စွာ တုံ့ပြန်လိုက်သည်။ သူသည် နောက်သို့ ဆုတ်လိုက်ရင်း မိစ္ဆာစွမ်းအားများကို စုစည်းကာ စူးချန်ခုန်း၏ သံဖြတ်ဓားကို ကာကွယ်ရန် လက်မောင်းကို မြှောက်လိုက်သည်။

“ဗြိ”

အသားစများ ပြတ်တောက်သွားသည့် အသံနှင့်အတူ မိစ္ဆာစွမ်းအားများ စုစည်းထားသဖြင့် သံမဏိထက် မာကျောသော အဖိုးအို၏ လက်မောင်းမှာ နွားသားရေကဲ့သို့ အလွယ်တကူ ပြတ်ထွက်သွားခဲ့သည်။ ဓားမှာ အရိုးကို ဖြတ်ကာ တားဆီး၍မရသော အရှိန်အဟုန်ဖြင့် အဖိုးအို၏ လက်မောင်းကို တံတောင်ဆစ်အောက်မှ ဖြတ်တောက်လိုက်သည်။ လက်မောင်း၏ တားဆီးမှုကြောင့် ဝတ်စုံနက် အဖိုးအိုမှာ အကွာအဝေးတစ်ခုအထိ နောက်သို့ ဆုတ်နိုင်ခဲ့သဖြင့် ခေါင်းမှစ၍ နှစ်ခြမ်း ကွဲရမည့်ဘေးမှ လွတ်မြောက်ခဲ့ခြင်း ဖြစ်သည်။ ဓားသွားမှာ သူ၏ မျက်ခုံးပေါ်မှ ဖြတ်သွားခဲ့ပြီး နာကျင်လှသော သွေးစွန်းသည့် လမ်းကြောင်းတစ်ခု ကျန်ရစ်ခဲ့သည်။

သံဖြတ်ဓားသိုင်း... ကန့်လန့်ဖြတ်ခုတ်ချက်။

လက်တစ်ဖက် ပြတ်သွားသော်လည်း စူးချန်ခုန်းမှာ ဝတ်စုံနက်ဝတ် အဖိုးအိုအား အသက်ရှူရန် အခွင့်အရေး မပေးချေ။ သူသည် နောက်သို့ ဆုတ်နေသော အဖိုးအိုထံသို့ ခြေလှမ်းလှမ်းကာ လိုက်လံပြီး ကန့်လန့်ဖြတ်ခုတ်ချက်ကို ထပ်မံ ထုတ်ဖော်လိုက်သည်။ ဓားဝိညာဉ်မှာ ဓားသွားပေါ်တွင် စုစည်းနေသဖြင့် ဤတိုက်ခိုက်မှုကို မည်သူမျှ မတားဆီးနိုင်ချေ။ စူးချန်ခုန်းသည် ပထမဆုံး လက်နက်ချခဲ့ခြင်းမှာ ရန်သူ၏ သတိကို လျှော့ချရန်နှင့် အနီးကပ်မှ လုပ်ကြံရန် ရည်ရွယ်ထားခြင်း ဖြစ်သည်။

အဖိုးအို၏ ကိုယ်ပေါ်ရှိ ဝတ်ရုံနက်ကြီးမှာ အသက်ရှိသကဲ့သို့ တွန့်လိမ်ကာ ဖောင်းကြွလာပြီး စူးချန်ခုန်း၏ တိုက်ခိုက်မှုကို ကာကွယ်ရန် ဒိုင်းတစ်ခုအသွင် ပြောင်းလဲသွားသည်။

“ဂျွတ်”

ဝတ်စုံနက်ကြီးမှာ အပိုင်းပိုင်းပြတ်သွားသည့် အသံနှင့်အတူ ပြင်းထန်သော အော်ဟစ်သံကြီး ထွက်ပေါ်လာပြီး အနက်ရောင် သွေးများ ပန်းထွက်လာသည်။ ဝတ်စုံနက်၏ တားဆီးမှုကြောင့် ဝတ်စုံနက် အဖိုးအိုမှာ နောက်ဆုံး၌ နောက်သို့ ဆုတ်နိုင်ခဲ့ပြီး စူးချန်ခုန်း၏ သံဖြတ်ဓား အကွာအဝေးမှ လွတ်မြောက်သွားခဲ့သည်။ တည်ငြိမ်စွာ ရပ်လိုက်သောအခါ အဖိုးအို၏ ပြတ်တောက်သွားသော လက်မောင်းမှ သွေးများ ပန်းထွက်နေပြီး နာကျင်မှုမှာ အရိုးထဲအထိ ခံစားရသည်။ မိစ္ဆာတို့၏ မသေနိုင်သော ခန္ဓာကိုယ်ကို သူ အသုံးမပြုနိုင်တော့ဘဲ သူ၏ ဝါဖျော့ဖျော့ မျက်လုံးများမှာ ကျဉ်းမြောင်းသွားကာ ထိတ်လန့်မှုနှင့် ဒေါသတို့ ပေါင်းစပ်လျက် ဟိန်းဟောက်လိုက်သည်။

“မင်းက... မူလဓာတ်ငါးပါး သိုင်းပညာရှင်လား။”

အခန်း (၅၅၂) ပုံရိပ်ယောင် ဓားသွေးကျမ်း။ ဓားဟိန်းသံနှင့် ဓားရှည်တို့၏ ငိုကြွေးသံ။ (၁)

“နှမြောစရာပဲ”

စူးချန်ခုန်းသည် စိတ်ထဲမှ မှတ်ချက်ပြုလိုက်သည်။ သူ၏ လက်နက်ချဟန်ဆောင်မှုမှာ ရုတ်တရက် တိုက်ခိုက်ရန် ပြင်ဆင်ခြင်းဖြစ်ပြီး ရန်သူတစ်ဦးကို အရင်ဆုံး သတ်ဖြတ်ရန် ရည်ရွယ်ခဲ့ခြင်း ဖြစ်သည်။

သို့သော် ဤဝတ်ရုံခြုံ အဖိုးအိုသည် အသက်ခြွေအဖွဲ့ချုပ်၏ တမန်တော်တစ်ဦးဖြစ်သည့်အတိုင်း သာမန် မိစ္ဆာပညာရှင်များနှင့် မနှိုင်းယှဉ်နိုင်ချေ။ တိုက်ခိုက်ခံရသည့် အချိန်တွင်ပင် သူသည် တုံ့ပြန်နိုင်စွမ်း ရှိနေသေးသည်။ သို့သော်လည်း စူးချန်ခုန်း၏ ကြိုးပမ်းမှုမှာ အလဟဿ မဖြစ်ခဲ့ပေ။ သူသည် ဓားတစ်ချက်တည်းဖြင့် ဝတ်စုံခြုံ အဖိုးအို၏ လက်မောင်းတစ်ဖက်ကို ဖြတ်တောက်နိုင်ခဲ့သည်။ မိစ္ဆာတို့၏ မသေမျိုး ခန္ဓာကိုယ် ရှိနေသည့်တိုင် ထိုလက်မောင်းမှာ ပြန်လည် ကုသရန် ခက်ခဲလိမ့်မည် ဖြစ်သည်။

ဝတ်စုံခြုံ အဖိုးအို၏ လက်မောင်း ပြတ်တောက်သွားခြင်းမှာ သူ၏ မိစ္ဆာမသေကိုယ်ထည်ကို အပြည့်အဝ အသုံးမပြုနိုင်တော့ခြင်းကို ဆိုလိုသည်။ ထိုလက်မောင်းမှာ ပြန်ဆက်သွားခြင်း သို့မဟုတ် အသစ်ပြန်ပေါက်လာခြင်း မရှိတော့သည့်အပြင် ဝိညာဉ်ထဲအထိ ထိုးဖောက်သွားသော နာကျင်မှုကိုလည်း သူ ခံစားနေရသည်။ ရန်သူ၏ ဓားသွားတွင် ဝိညာဉ်ကို ထိခိုက်စေနိုင်သော ဓားဝိညာဉ်ပါဝင်နေကြောင်း သူ ကောင်းကောင်း သဘောပေါက်သွားခဲ့သည်။

“မူလဓာတ်ငါးပါး သိုင်းပညာရှင်လား။”

လျှပ်စီးလက်သကဲ့သို့ မြန်ဆန်လှသော အပြောင်းအလဲများကြောင့် ရောက်လာသူ အားလုံး ထိတ်လန့်ကုန်ကြသည်။ ချင်းဝမ်ယွီနှင့် အခြားသူများမှာ တာ့ဝူဖုန်းသည် ရန်သူထံသို့ အလွယ်တကူ လက်နက်ချသွားသည်ဟု ထင်မြင်ကာ အထင်အမြင်သေးခဲ့ကြသော်လည်း သူသည် တမန်တော်အနားသို့ ရောက်သည်နှင့် မတွန့်မဆုတ်ဘဲ တိုက်ခိုက်ကာ အဖိုးအိုကို ပြင်းထန်စွာ ဒဏ်ရာရစေခဲ့သည်ကို မြင်လိုက်ရသည်။

မြေပြင်ပေါ်တွင် လဲကျနေသော လက်မောင်းပြတ်ကို ကြည့်ကာ အဖိုးအိုက ပြောလိုက်သော စကားများကလည်း လူတိုင်းကို အံ့အားသင့်စေခဲ့သည်။

“မူလဓာတ်ငါးပါး သိုင်းပညာရှင်လား။ ဒီတာ့ဝူဖုန်းက မူလဓာတ်ငါးပါး သိုင်းပညာရှင် တစ်ယောက်လား။”

ချင်းဝမ်ယွီမှာ ဆွံ့အသွားခဲ့သည်။ စူးချန်ခုန်းသည် ခန့်မှန်းရခက်သော သိုင်းပညာရှင်တစ်ဦးဖြစ်ကြောင်း မူလချီစွမ်းအင်များစွာကို လှဲလှယ်ရန် ယူဆောင်လာနိုင်သူ ဖြစ်ကြောင်း၊ တည်ငြိမ်သော်လည်း အန္တရာယ်ရှိသော အငွေ့အသက်များ ပေးစွမ်းနိုင်သူ ဖြစ်ကြောင်း သူ သိထားသော်လည်း တာ့ဝူဖုန်းမှာ ဓားဝိညာဉ်ကို နားလည်ထားသော မူလဓာတ်ငါးပါး သိုင်းပညာရှင်ကြီး တစ်ဦး ဖြစ်လိမ့်မည်ဟု သူ ဘယ်တုန်းကမှ မတွေးမိခဲ့ချေ။

သို့မဟုတ်ပါက မိစ္ဆာသိုင်းပညာရှင်ဖြစ်သော ထိုဝတ်ရုံခြုံ အဖိုးအိုသည် လက်တစ်ဖက် ဆုံးရှုံးရုံမျှဖြင့် ယခုကဲ့သို့ ထိတ်လန့်တကြားနှင့် အမူအရာ ပျက်သွားမည် မဟုတ်ချေ။

ငြိမ်သက်စွာ ရပ်နေသော ခိုထော့မှာလည်း မျက်မှောင်ကြုတ်လိုက်သည်။ “မူလဓာတ်ငါးပါး သိုင်းပညာရှင်လား။ တာ့ဝူဖုန်းတဲ့လား။ မဟာမီးလျှံအင်ပါယာမှာ တာ့ဝူဖုန်း ဆိုတဲ့ နာမည်နဲ့ မူလဓာတ်ငါးပါး သိုင်းပညာရှင်ရှိလို့လား။”

မူလဓာတ်ငါးပါး သိုင်းပညာရှင်များမှာ မူလနယ်ပယ် နယ်ပယ်ရှိ အထက်တန်းလွှာ အင်အားစုများ ဖြစ်ကြပြီး များသောအားဖြင့် ထိပ်တန်း ဂိုဏ်းကြီးများ၊ နှစ်ပေါင်းထောင်ချီ သက်တမ်းရှိသော မျိုးနွယ်စုကြီးများနှင့် ဘုရင်မျိုးနွယ်စုများတွင်သာ တွေ့ရတတ်သည်။ သူတို့ တစ်ဦးစီမှာ ကျော်ကြားလှသော နာမည်များ ရှိကြသည်။ သို့သော် ခိုထော့၏ မှတ်ဉာဏ်ထဲတွင် တာ့ဝူဖုန်း ဟူသော အမည်ဖြင့် မူလဓာတ်ငါးပါး သိုင်းပညာရှင် တစ်ဦးမျှ မရှိချေ။

ထို့နောက် ဝတ်ရုံခြုံ အဖိုးအိုသည် ဒေါသတကြီးဖြင့် ကြောင်တောင်တောင် ဖြစ်နေသော ချီကန်းဘက်သို့ လှည့်ကာ ဟောက်လိုက်သည်။ “ချီကန်း..ဒါ ဘာအဓိပ္ပာယ်လဲ။”

ထိုအဖိုးအိုက ချီကန်းကို သံသယ ဝင်သွားသည်မှာ သေချာပါသည်။ သူတို့ အဖွဲ့ထဲတွင် ကြိုတင် သတင်းမရထားသော မူလဓာတ်ငါးပါး သိုင်းပညာရှင် တစ်ဦး ပါဝင်နေသည်မှာ ထူးဆန်းလှသည်။ ချီကန်းတွင် အခြား ရည်ရွယ်ချက်များ ရှိနေပြီး သူတို့ကို အလစ်အငိုက် တိုက်ခိုက်ရန် မူလဓာတ်ငါးပါး သိုင်းပညာရှင် တစ်ဦးကို အဖွဲ့ထဲတွင် ကြိုတင် ထည့်သွင်းထားသလား သူ ထင်နေတာ ဖြစ်သည်။

ချီကန်း၏ မျက်ခွံများ လှုပ်သွားခဲ့ပြီး အလျင်အမြန် ပြောလိုက်သည်။ “တမန်တော် ချီကျင်း၊ ကျွန်တော့်ကို အထင်လွဲနေပါပြီ။ ကျွန်တော် သူ့ကို လုံးဝ မသိပါဘူး။ သူ့ကို တခြားလူ ခေါ်လာတာပါ။”

ချီကန်းသည်လည်း သူ၏ စိတ်ထဲတွင် ဒေါသထွက်နေသည်။ သူသည် တာ့ဝူဖုန်းကို အမှန်တကယ်ပင် မသိချေ။ ချင်းဝမ်ယွီက အဆင့်မြင့် ဆေးညွှန်းတစ်ခုအတွက် တာ့ဝူဖုန်းကို ခေါ်လာခဲ့တာဖြစ်ပြီး ချီကန်းမှာလည်း ထိုသူကို အရေးတယူ ဂရုမစိုက်ခဲ့ပေ။ သို့သော် သူ တစ်ခါမှ မကြားဖူးသော ဤတာ့ဝူဖုန်း ဆိုသူမှာ ဓားဝိညာဉ်ကို နားလည်ထားသည့် မူလဓာတ်ငါးပါး သိုင်းပညာရှင် တစ်ဦး ဖြစ်နေလိမ့်မည်ဟု သူ မထင်ထားခဲ့ရိုးအမှန်ပါ။

“အရှင်ချီ၊ ကျွန်တော်တို့ နှစ်ယောက် ပေါင်းတိုက်ရင် ဒီမိစ္ဆာအုပ်စုကို အမြစ်ပြတ် သုတ်သင်နိုင်မှာပါ။ အဲဒီအခါကျရင် အရှင်က မိစ္ဆာနှိမ်နင်းရေး ဌာနမှာ ထိပ်တန်း နေရာတစ်ခုကို သေချာပေါက် ရလိမ့်မယ်။”

အခြေအနေကို ကြည့်ကာ စူးချန်ခုန်း၏ မျက်လုံးများမှာ ပါးနပ်စွာဖြင့် တဖျတ်ဖျတ် လက်သွားခဲ့ပြီး ချီကန်းကို လှမ်းအော်ပြောလိုက်သည်။ စူးချန်ခုန်း၏ ရုတ်တရက် တိုက်ခိုက်မှုကြောင့် ဝတ်ရုံခြုံ အဖိုးအိုမှာ ချီကန်းကို သံသယ ဝင်နေပြီ ဖြစ်သည်။ ထို့ကြောင့် စူးချန်ခုန်းသည် မီးလောင်ရာ လေပင့်သည့်အနေဖြင့် ဤသို့ ပြောလိုက်ခြင်း ဖြစ်ပြီး ရန်သူများအကြား သံသယများ၊ စိုးရိမ်မှုများနှင့် အတွင်းစည်း ပျက်ပြားသွားစေရန် ရည်ရွယ်ခြင်းပင် ဖြစ်သည်။

“သူတို့က ပူးပေါင်းနေကြတာလား။ ဒီမိစ္ဆာနှိမ်နင်းရေး ဌာနက လူတွေကို တကယ်ပဲ ယုံလို့မရဘူး။”

မျှော်လင့်ထားသည့်အတိုင်း စူးချန်ခုန်း၏ စကားများကြောင့် ခိုထော့နှင့် ဝတ်ရုံနက် အဖိုးအိုတို့သည် ချီကန်းကို အေးစက်စွာ ကြည့်လိုက်ကြသည်။ ကျန်ရှိသော မိစ္ဆာသိုင်းပညာရှင်များမှာလည်း အံကြိတ်ကာ ချီကန်းသည် ဟန်ဆောင်နေပြီး အရိပ်ထဲတွင် ပုန်းကွယ်နေသော 'မူလဓာတ်ငါးပါး သိုင်းပညာရှင်' တစ်ဦးနှင့် ပူးပေါင်းကာ သူတို့ကို အငိုက်ဖမ်း တိုက်ခိုက်နေသည်ဟု ထင်သွားကြသည်။

ချီကန်းသည် စူးချန်ခုန်းက သူ့အား ရန်တိုက်ပေးနေကြောင်း သိသဖြင့် စိတ်ထဲမှ ကျိန်ဆဲလိုက်သည်။ သူသည် သူ၏ အပြစ်ကင်းစင်မှုကို သက်သေပြရန် လိုသည်။ မဟုတ်ပါက သူသည် အသက်ခြွေအဖွဲ့ချုပ်သို့ ဝင်နိုင်မှာ မဟုတ်သည့်အပြင် ဘုရင်မျိုးနွယ်စုကို သစ္စာဖောက်ခဲ့သဖြင့် နေရာတိုင်းတွင် လိုက်ဖမ်းခံရပေလိမ့်မည်။

တွန့်ဆုတ်မနေဘဲ ချီကန်းက ခပ်မာမာ ပြောလိုက်သည်။ “သူ့ရဲ့ အဓိပ္ပာယ်မရှိတဲ့ စကားတွေကို နားမယောင်ကြနဲ့။ တကယ်လို့ ငါသာ သူနဲ့ ပူးပေါင်းနေတာဆိုရင် ငါ့ရဲ့ မိတ်ဆွေတွေကို ငါကိုယ်တိုင် သတ်မှာ မဟုတ်ဘူး။”

ချီကန်း၏ ပြောကြားချက်မှာ ယုတ္တိရှိလှသည်။ သူသည် သူ၏ အဖော်များကို ရုတ်တရက် တိုက်ခိုက်ခဲ့ပြီး ထိပ်တန်း မူလနယ်ပယ် သိုင်းပညာရှင် ငါးဦးကို နေရာမှာပင် သတ်ဖြတ်ခဲ့သည်။ ဟန်ပြ သက်သက်အတွက် ဤမျှလောက်သော သိုင်းပညာရှင်များကို သတ်ဖြတ်လိမ့်မည် မဟုတ်ဟု ထင်ရသည်။

ထို့နောက် ချီကန်းက ဆက်ပြောလိုက်သည်။ “အကြီးအကဲတို့၊ ဒီကောင်လေးကို ကျွန်တော့်လက်ထဲ အပ်လိုက်ပါ။ သူ့ခေါင်းကို ကျွန်တော်ကိုယ်တိုင် ဖြတ်ပြမယ်။”

ချီကန်းက ပြင်းပြင်းထန်ထန် ပြောလိုက်သည်။ အခြေအနေမှာ ဤအဆင့်သို့ ရောက်လာပြီ ဖြစ်ရာ သူ့တွင် နောက်ဆုတ်ရန် လမ်းမရှိတော့ပေ။ သူသည် ဘုရင်မျိုးနွယ်စုကို သစ္စာဖောက်ခဲ့ပြီးပြီ ဖြစ်သလို ယခုအခါ အသက်ခြွေအဖွဲ့ချုပ်၏ သံသယကိုလည်း ခံနေရရာ သူ၏ အနာဂတ်မှာ မှောင်မိုက်နေသည်။ ချီကန်း လုပ်နိုင်သည့် တစ်ခုတည်းသော အရာမှာ စူးချန်ခုန်းကို သတ်ကာ သူ၏ အပြစ်ကင်းစင်မှုကို သက်သေပြပြီး မှားယွင်းသော စွပ်စွဲချက်များကို ဖယ်ရှားရန်ပင် ဖြစ်သည်။

“ကောင်းပြီ”

ဝတ်ရုံခြုံ အဖိုးအိုက ဖြည်းညှင်းစွာ ခေါင်းညိတ်လိုက်ပြီး ခိုထော့ကတော့ တိတ်ဆိတ်နေဆဲ ဖြစ်သည်။ ဤသည်မှာ သူတို့၏ သံသယများကို ဖယ်ရှားရန် အကောင်းဆုံး နည်းလမ်းပင် ဖြစ်သည်။

ချီကန်းသည် အသက်ပြင်းပြင်း ရှူလိုက်ကာ သူ၏ အမူအရာမှာ တည်ငြိမ်သွားပြီး စူးချန်ခုန်းကို အာရုံစိုက်လိုက်သည်။ “မင်းနာမည်က တာ့ဝူဖုန်းလား။ မင်းဘာလို့ ငါ ချီကန်းကို ဆန့်ကျင်ရတာလဲ။”

ချီကန်း၏ အမြင်တွင် စူးချန်ခုန်းကဲ့သို့ အစွမ်းထက်သော သိုင်းပညာရှင်တစ်ဦးသည် ဆေးညွှန်းတစ်ခုတည်းအတွက် ဤစစ်ဆင်ရေးတွင် ပါဝင်လာမည် မဟုတ်ချေ။ တစ်စုံတစ်ရာသော သတင်းကို ရရှိထားသဖြင့် ဤအဖွဲ့အတွင်းသို့ တမင်တကာ စိမ့်ဝင်လာခြင်း ဖြစ်နိုင်သည်ဟု သူ ထင်နေသည်။

“မင်းက... လျှို့ဝှက်နဂါးစောင့်တပ်ဖွဲ့ထဲက တစ်ယောက်လား။”

ချီကန်းသည် စူးချန်ခုန်း၏ သရုပ်မှတ်နှင့် ပတ်သက်ပြီး ထပ်မံ ခန့်မှန်းလိုက်သည်။ မဟာမီးလျှံအင်ပါယာတွင် အထူးအဖွဲ့အစည်းများစွာ ရှိကြပြီး တစ်ဖွဲ့ချင်းစီတွင် တာဝန်ကိုယ်စီ ရှိကြသည်။ မိစ္ဆာနှိမ်နင်းရေး ဌာနမှာ မိစ္ဆာနတ်ဆိုးများနှင့် မိစ္ဆာပညာရှင်များကို ကိုင်တွယ်ရန်ဖြစ်ပြီး၊ နတ်ဘုရား စုံထောက်ဌာနမှာ ရက်စက်သော ရာဇဝတ်သားများကို ဖမ်းဆီးရန် ဖြစ်ကာ၊ မီးလျှံနဂါးစောင့်တပ်ဖွဲ့မှာ ဘုရင်မျိုးနွယ်စုဝင်များကို ကာကွယ်ရန် ဖြစ်သည်။ ထိုအဖွဲ့များထက် ပိုမို လျှို့ဝှက်လှသော 'လျှို့ဝှက်နဂါးစောင့်တပ်ဖွဲ့' ဟုခေါ်သည့် အဖွဲ့တစ်ခု ရှိကြောင်းလည်း ကောလာဟလများ ထွက်ပေါ်နေသည်။