ကိုယ်ခန္ဓာပေးဆပ်ခြင်း၊ ဝိညာဉ်သန္ဓေသား နှောင်းပိုင်းအဆင့်သို့ တက်လှမ်းခြင်း(၃)။

"ဒါကတော့..."

"သဘာဝအတိုင်း မိစ္ဆာမျိုးနွယ်စုရဲ့ ကျူးကျော်မှုကြောင့်ပဲပေါ့..."

"ဒီတစ်ခါ ကျွန်မတို့က ရှေးဟောင်းမိစ္ဆာအသွင်ပြောင်းအစီအရင်ကို ဖျက်ဆီးလိုက်နိုင်ပြီး... မိစ္ဆာမျိုးနွယ်စုရဲ့ အစီအစဉ်ကို ဖျက်ဆီးနိုင်ခဲ့တယ် ဆိုပေမယ့်..."

"မိစ္ဆာမျိုးနွယ်စုက အင်အားကြီးမားလွန်းတော့... ကျွန်မတို့ လူသားမျိုးနွယ်စုရဲ့ အခြေအနေက တကယ်တမ်း ဘာမှ ပြောင်းလဲသွားတာ မရှိဘူး..."

"ကမ္ဘာ့တံခါးပေါက်ကနေ မိစ္ဆာသားရဲတွေ အဆက်မပြတ် ဝင်ရောက်လာဦးမှာပဲ..."

"အရင်က ကျွန်မတို့ သတ်ခဲ့တဲ့ စတုတ္ထအဆင့် မိစ္ဆာသားရဲတွေက... ရှေးဟောင်းမိစ္ဆာကမ္ဘာတစ်ခုလုံးအတွက် ပြောရရင် တကယ်တမ်း အထိနာစရာ မဟုတ်ဘူး..."

"အဆိုးဆုံးကတော့... ကျွန်မတို့ မြူနှင်းနန်းတော် ပင်လယ်ပြင်က မိစ္ဆာသားရဲကပ်ဘေး အများဆုံး ဖြစ်ပွားတဲ့နေရာ ဖြစ်နေတာပဲ..."

"ဒီအတိုင်း ဆက်သွားလို့... စတုတ္ထအဆင့် မိစ္ဆာသားရဲတွေ ထပ်ရောက်လာရင်... ကျွန်မတို့ မြူနှင်းနန်းတော် သေချာပေါက် ပျက်စီးသွားလိမ့်မယ်..."

"ဒါကြောင့် မြူနှင်းနန်းတော်ကို ပြောင်းရွှေ့ဖို့ ကျွန်မ စောစောကတည်းက စဉ်းစားထားတာပါ..."

"နှမြောစရာက… အရင်တုန်းက ပြောင်းရွှေ့ဖို့ သင့်လျော်တဲ့နေရာ ရှာမတွေ့ခဲ့ဘူး..."

"ဒါပေမဲ့ အခု မတူတော့ဘူး..."

"တာအိုရောင်းရင်းကျိုးက ကုယုံဂိုဏ်းအပျက်အစီးကို ရရှိထားတယ်... အဲ့ဒါက ပဉ္စမအဆင့် ကျွန်းတစ်ကျွန်း ဖြစ်ပြီး... အပေါ်မှာ ပဉ္စမအဆင့် ဝိညာဉ်သွေးကြော ရှိတယ်..."

"မြူနှင်းနန်းတော်တစ်ခုလုံးကို လုံးဝ လက်ခံနိုင်တယ်..."

"တကယ်လို့ ရွှမ်ဟွမ်ဂိုဏ်းကို ဝင်ရောက်ပူးပေါင်းနိုင်မယ်ဆိုရင်... ကျွန်မတို့ မြူနှင်းနန်းတော် အသက်ရှင်ကျန်ရစ်နိုင်လိမ့်မယ်..."

ယဲ့ဖေးရိုက လေးနက်စွာ ပြောလိုက်သည်။

သူမ စဉ်းစားသော ကိစ္စများမှာ လက်တွေ့ကျသည်။ ၎င်းမှာ မြူနှင်းနန်းတော်၏အနာဂတ် သေရေးရှင်ရေး ဖြစ်သည်။

ဤတိုက်ပွဲကို အနိုင်ရလျှင်ပင် စစ်ပွဲပြီးဆုံးသွားပြီဟု မဆိုလိုပေ။

လူသားမျိုးနွယ်စုနှင့် မိစ္ဆာမျိုးနွယ်စုစစ်ပွဲ၏ နိဒါန်းပျိုးခြင်းသာ ဖြစ်လေသည်။

အနာဂတ် နှစ်ရာချီ၊ ထောင်ချီအတွင်း ကျင့်ကြံခြင်းလောကတစ်ခုလုံးသည် စစ်မီးလျှံထဲသို့ ကျရောက်သွားနိုင်သည်။

ဤအခြေအနေမျိုးတွင် မြူနှင်းနန်းတော်သည် ရှင်သန်ရပ်တည်နိုင်မည့် နေရာကို ရှာဖွေရမည် ဖြစ်သည်။ သို့မဟုတ်ပါက သေချာပေါက် မိစ္ဆာမျိုးနွယ်စု၏ ဖျက်ဆီးခြင်းကို ခံရပေလိမ့်မည်။

ဤအချိန်တွင် ရွှမ်ဟွမ်ဂိုဏ်းသို့ ဝင်ရောက်ခြင်းသည် အကောင်းဆုံး ရွေးချယ်မှုပင် ဖြစ်၏။

ကျိုးစွေ့၏ ကာကွယ်ပေးမှုကို ရရှိရုံသာမက၊ တစ်ချိန်တည်းမှာပင် ပဉ္စမအဆင့်ကျွန်းပေါ်တွင် ဝင်ရောက်နေထိုင်နိုင်သည်။

ခဲတစ်လုံးတည်းဖြင့် ငှက်နှစ်ကောင် ပစ်လိုက်သကဲ့သို့ပင်။

မှန်ပေသည်၊ ဂုဏ်သိက္ခာပိုင်းအရကြည့်လျှင် အနည်းငယ် နားထောင်ရဆိုးသည်။ မြူနှင်းနန်းတော်သည် ရွှမ်ဟွမ်ဂိုဏ်း၏ ဝါးမြိုခြင်းကို ခံလိုက်ရသကဲ့သို့ ဖြစ်နေချေသည်။

သို့သော် သူမ လုံးဝ ဂရုမစိုက်ပေ။ မည်သို့ပင်ဖြစ်စေ မြူနှင်းနန်းတော်မှ ကျင့်ကြံသူများ အသက်ရှင်ကျန်ရစ်နိုင်ခြင်းသည်သာ သူမအတွက် အဓိကဦးစားပေး ကိစ္စဖြစ်သည်။

"နန်းတော်သခင်ယဲ့က... တကယ်ကို အမြော်အမြင် ကြီးမားတာပဲ..."

"ဒါပေမဲ့ ခင်ဗျားတို့ ရွှမ်ဟွမ်ဂိုဏ်းထဲ ဝင်ရောက်ပူးပေါင်းတာကို ကျုပ်က ဘာလို့ သဘောတူရမှာလဲ..."

"ခင်ဗျားတို့ မြူနှင်းနန်းတော်က အင်အားကြီးတယ်... လူအင်အား များပြားတယ်... ရွှမ်ဟွမ်ဂိုဏ်းထဲ ဝင်ရောက်လာပြီးရင်... ပြန်ပြီး နေရာလုတာမျိုး ဖြစ်လာနိုင်တယ်..."

"ကျွန်တော့် ရွှမ်ဟွမ်ဂိုဏ်းကို ရှုပ်ထွေးသွားအောင် လုပ်လိုက်သလို ဖြစ်သွားမယ်..."

"ခင်ဗျားတို့က ကျွန်တော့် ရွှမ်ဟွမ်ဂိုဏ်းကို အမြတ်ထုတ်ချင်ရုံသက်သက်ပဲ..."

ကျိုးစွေ့က လေးနက်စွာ ပြောလိုက်သည်။

သူသည် ယဲ့ဖေးရို၏ ဤကိစ္စကို အလွယ်တကူ သဘောတူမည် မဟုတ်ပေ။ အကယ်၍ အမှန်တကယ် ဝင်ရောက်ပူးပေါင်းလျှင်ပင် ရွှမ်ဟွမ်ဂိုဏ်းကသာ အကြွင်းမဲ့ ဦးဆောင်ခွင့် ရှိရမည်ဖြစ်သည်။ မည်သို့ပင်ဖြစ်စေ လက်ရှိအခြေအနေ တိုးတက်မှုအရ ရွှမ်ဟွမ်ဂိုဏ်းသည် အနှေးနှင့်အမြန် နတ်ဘုရားအသွင်ပြောင်းဂိုဏ်း ဖြစ်လာပေလိမ့်မည်။

ပြောရလျှင် မြူနှင်းနန်းတော် ဝင်ရောက်ပူးပေါင်းခြင်း၊ မပူးပေါင်းခြင်းသည် တကယ်တမ်း ထူးထူးခြားခြား ပြောင်းလဲမှုမရှိချေ။

ဆန့်ကျင်ဘက်အနေဖြင့် သူတို့သည်သာ ရွှမ်ဟွမ်ဂိုဏ်းသို့ ဝင်ရောက်လာပါက၊ ရွှမ်ဟွမ်ဂိုဏ်း၏ အရင်းအမြစ်များကို ရယူသွားမည်ဖြစ်ပြီး၊ ရွှမ်ဟွမ်ကျွန်း၏ နေရာအသီးသီးကို သိမ်းပိုက်သွားကြမည် ဖြစ်၏။

မှန်ပေသည်၊ ရွှမ်ဟွမ်ကျွန်းပေါ်တွင် နေထိုင်ရန် ကျင့်ကြံသူအချို့ အမှန်တကယ် လိုအပ်နေသည်။

မည်သို့ပင်ဖြစ်စေ ရွှမ်ဟွမ်ကျွန်းသည် ကီလိုမီတာတစ်သန်းကျော် ကျယ်ဝန်းသည်ဖြစ်ရာ၊ လူဦးရေ ဘီလီယံထောင်ချီ နေထိုင်လျှင်ပင် လုံးဝ ပြဿနာ မရှိပေ။

"ဒီလိုတောင်းဆိုမှုက တာအိုရောင်းရင်းကျိုးကို အခက်တွေ့စေမယ်ဆိုတာ ကျွန်မ သိပါတယ်..."

"ဒါကြောင့် ကျွန်မ တာအိုရောင်းရင်းကို တစ်ဖက်တစ်လမ်းကနေ ကူညီပေးချင်ပါတယ်..."

"တကယ်လို့ ကျွန်မ ထင်တာ မမှားဘူးဆိုရင်... တာအိုရောင်းရင်းကျိုးရဲ့ ကျင့်ကြံမှုက ဝိညာဉ်သန္ဓေသား အလယ်အလတ် ပြီးပြည့်စုံခြင်းအဆင့်ကို ရောက်လုနီးပါး ဖြစ်နေပြီမလား..."

"ဝိညာဉ်သန္ဓေသား နှောင်းပိုင်းအဆင့်နဲ့ ခြေတစ်လှမ်းပဲ ကွာတော့တယ်..."

ယဲ့ဖေးရို၏ မျက်ဝန်းလှလှလေးများက ကျိုးစွေ့ကို ကြည့်နေလေသည်။

"ဟုတ်တယ်... ကျွန်တော့် ကျင့်ကြံမှုက တကယ်ပဲ ဝိညာဉ်သန္ဓေသား အလယ်အလတ် ပြီးပြည့်စုံခြင်းအဆင့်ကို ရောက်နေပြီ..."

ကျိုးစွေ့ ခေါင်းညိတ်လိုက်သည်။

"ချန်လန်ပင်လယ်ဒေသရဲ့ နှစ်တစ်သောင်းမှာတစ်ယောက် ပေါ်ထွန်းတဲ့ ပါရမီရှင်ဆိုတဲ့အတိုင်းပါပဲ... တကယ်ကို ပါရမီ ထူးကဲလွန်းပါပေတယ်..."

"အသက်တစ်ရာကျော်ပဲ ရှိသေးတာကို... ဒီလိုအဆင့်ထိ ကျင့်ကြံနိုင်ခဲ့တာ..."

"တခြား ဝိညာဉ်သန္ဓေသား ကျင့်ကြံသူတွေက တာအိုရောင်းရင်းနဲ့ ယှဉ်လိုက်ရင်... တကယ့် အမှိုက်ထက်တောင် နိမ့်ကျနေသေးတယ်..."

ယဲ့ဖေးရို စိတ်ထဲတွင် အလွန် ဝမ်းနည်းကြေကွဲမိသည်။

သူမ ကျိုးစွေ့၏ အသက်အရွယ်ကို ပြန်တွေးမိပြီး တစ်ဖက်လူ၏ လက်ရှိကျင့်ကြံမှုနှင့် ယခင်တိုက်ပွဲမှတ်တမ်းများကို ကြည့်လိုက်သောအခါ၊ ကောင်းကင်ဘုံက ချီးမြှောက်သော ပါရမီရှင်၊ ကမ္ဘာမြေသို့ ဆင်းသက်လာသော အင်မော်တယ်တစ်ပါးကဲ့သို့သော ပုဂ္ဂိုလ်ဟုသာ ဆိုရပေမည်။

ကောင်းကင်ကံတရား၏ သားတော်ပင် ဖြစ်ကောင်းဖြစ်နိုင်သည်။

သို့မဟုတ်ပါက အချိန်တိုအတွင်း ထူးခြားသော အခွင့်အလမ်းများကို အဆက်မပြတ်ရရှိပြီး၊ ကျင့်ကြံမှုသည် အရှိန်အဟုန်ဖြင့် တိုးတက်လာနိုင်မည် မဟုတ်ပေ။

ပုံမှန်အားဖြင့် ကောင်းကင်အဆင့် စိတ်ဝိညာဉ်အမြစ် ကျင့်ကြံသူပင်လျှင်၊ ဤအရွယ်၌ ရွှေအမြုတေ ဖွဲ့စည်းနိုင်ခြင်းသည် အလွန်အမင်း လျင်မြန်သည်ဟု ဆိုရပေမည်။

ယခုကဲ့သို့ ဝိညာဉ်သန္ဓေသား အလယ်အလတ်အဆင့် မဟာပုဂ္ဂိုလ်ကြီး ဖြစ်နေခြင်းသည် အလွန်တရာ ကြောက်မက်ဖွယ် ကောင်းလွန်းလှသည်။

သို့သော် ကပ်ဘေးကာလတွင် မကောင်းဆိုးဝါးဆန်သော သူရဲကောင်းများ ပေါ်ထွက်လာစမြဲ ဖြစ်၏။

ဤကျိုးစွေ့သည် လူသားမျိုးနွယ်စု ကြုံတွေ့ရသော ကြီးမားသောကပ်ဘေးထဲမှ မွေးဖွားလာသည့် ကံတရား၏သားတော် ဖြစ်ကောင်းဖြစ်နိုင်သည်။

အကယ်၍ မြူနှင်းနန်းတော်သာ ဤအမျိုးသားနှင့် ပူးပေါင်းလိုက်နိုင်ပါက ကြီးမားသော အနာဂတ်ကပ်ဘေးတွင် အသက်ရှင်ကျန်ရစ်နိုင်ပေလိမ့်မည်။

ဤအကြောင်းကို တွေးမိပြီးနောက် သူမတစ်ယောက် စိတ်ထဲတွင် အပြည့်အဝ ဆုံးဖြတ်ချက် ချလိုက်တော့သည်။

"ဒါပေမဲ့ ဒီလိုဆိုရင်တောင်... တာအိုရောင်းရင်းရဲ့ ကျင့်ကြံမှုနဲ့ဆိုရင် အနာဂတ်ကပ်ဘေးကို ရင်ဆိုင်ဖို့ အဝေးကြီး လိုနေပါသေးတယ်..."

"အထူးသဖြင့် ဒီတစ်ခါ တာအိုရောင်းရင်းက စတုတ္ထအဆင့် မိစ္ဆာသားရဲအများကြီးကို သတ်ဖြတ်လိုက်တယ်... အဲ့ဒီအထဲမှာ နဂါးမျိုးနွယ်စုနဲ့ မိစ္ဆာဖီးနစ်မျိုးနွယ်စုရဲ့ ပါရမီရှင်တွေ မနည်းမနော ပါဝင်နေတယ်..."

"ပြောရရင် တာအိုရောင်းရင်းက မိစ္ဆာမျိုးနွယ်စုရဲ့ ရန်သူကြီး... နှလုံးသားထဲက ဆူးတစ်ချောင်း ဖြစ်နေပြီ..."

"တကယ်လို့ ကမ္ဘာ့တံခါးပေါက်က အတိုင်းအတာတစ်ခုအထိ ကြီးထွားလာပြီး... နတ်ဘုရားအသွင်ပြောင်းအဆင့် မိစ္ဆာကျင့်ကြံသူတွေကို လက်ခံနိုင်ပြီဆိုရင်... သူတို့က ပထမဆုံးအကြိမ် တာအိုရောင်းရင်းကို လာရောက် လုပ်ကြံကြလိမ့်မယ်..."

"မှန်ပါတယ်... ကမ္ဘာ့တံခါးပေါက် ကြီးထွားဖို့ဆိုတာ အချိန်အတိုင်းအတာတစ်ခု လိုအပ်ပါသေးတယ်... ဒါပေမဲ့ နှစ် ရာဂဏန်းလောက်ပါပဲ..."

"ကျွန်မတို့လို ဝိညာဉ်သန္ဓေသား ကျင့်ကြံသူတွေအတွက် နှစ်ရာချီဆိုတာ မျက်စိတစ်မှိတ်အတွင်းပါပဲ..."

ယဲ့ဖေးရိုက လေးနက်စွာပြောလိုက်ပြီး၊ ကျိုးစွေ့ အနာဂတ်တွင် ကြုံတွေ့ရမည့် အန္တရာယ်များကို ထောက်ပြလိုက်သည်။

"အနာဂတ်မှာ ကပ်ဘေးတွေ အများကြီးရှိလာမှာ မှန်ပါတယ်... ဒါပေမဲ့ တာအိုရောင်းရင်းယဲ့က ဒီလောက်အများကြီး ပြောနေတာ... တကယ်တမ်း ဘာကိစ္စ ရှိလို့လဲ..."

ကျိုးစွေ့က လေးနက်စွာဖြင့် ပြန်မေးလိုက်သည်။

"ကျွန်မက တာအိုရောင်းရင်းကို စေတနာအမှန် ပြသချင်လို့ပါ..."

"ကျွန်မက အသက်ခုနစ်ရာကျော်နေပြီ... အိုမင်းပြီး အလှအပပျက်စီးနေပြီ... ရိုးရိုးသာမန်ရုပ်ရည်လေးပဲ ရှိတော့ပေမယ့်..."

"တာအိုရောင်းရင်း စိတ်ဝင်စားမယ့် တစ်ခုတည်းသောအရာကတော့... ဒီ နှစ်ပေါင်းခုနစ်ရာကျော် ကျင့်ကြံထားတဲ့ ယင်စွမ်းအင်ပါပဲ..."

"တကယ်လို့ ဒီယင်စွမ်းအင်ကို အသုံးပြုမယ်ဆိုရင်... တာအိုရောင်းရင်း ချက်ချင်း ဝိညာဉ်သန္ဓေသား နှောင်းပိုင်းအဆင့်ကို တက်လှမ်းနိုင်လိမ့်မယ်..."

"တာအိုရောင်းရင်းရဲ့ ပါရမီအရ ဝိညာဉ်သန္ဓေသား နှောင်းပိုင်းအဆင့်ကို တက်လှမ်းဖို့က... မကြာခင် ဖြစ်လာမယ့် ကိစ္စပါပဲ..."

"ဒါပေမဲ့ ကျွန်မရဲ့ အကူအညီသာပါရင်... တာအိုရောင်းရင်းရဲ့ ကျင့်ကြံချိန်အများကြီးကို သက်သာစေလိမ့်မယ်..."

"ဒီလိုဆိုရင် တာအိုရောင်းရင်းက နှစ်ရာချီအတွင်း နတ်ဘုရားအသွင်ပြောင်းအဆင့်ကို တက်လှမ်းနိုင်လောက်တယ်..."

"အဲ့ဒီအချိန်ကျရင် နတ်ဘုရားအသွင်ပြောင်းအဆင့် မိစ္ဆာကျင့်ကြံသူတွေနဲ့ ရင်ဆိုင်ရရင်တောင် ယှဉ်ပြိုင်နိုင်စွမ်း ရှိလာမှာ..."

"ဒါက ကျွန်မရဲ့ စေတနာပါ... တာအိုရောင်းရင်း လက်ခံပေးဖို့ မျှော်လင့်ပါတယ်..."

ယဲ့ဖေးရို၏ မျက်နှာလေးမှာ နီရဲနေပြီး မျက်လုံးများတွင် ညှို့ဓာတ်များ ပါဝင်နေချေသည်။ သူမသည်လည်း ပထမဆုံးအကြိမ်အဖြစ် အမျိုးသားတစ်ဦးကို ဤကဲ့သို့ တက်ကြွစွာ ကိုယ်ခန္ဓာပေးဆပ်လိုခြင်း ဖြစ်ပေ၏။

သို့သော် ဤသည်မှာလည်း မတတ်နိုင်သောကိစ္စသာ ဖြစ်ပေသည်။

ဤအရာအားလုံးသည် မြူနှင်းနန်းတော်ရဲ့ အနာဂတ်အတွက်၊ ချန်လန်ပင်လယ်ဒေသ လူသားမျိုးနွယ်စုရဲ့ အနာဂတ်အတွက် ဖြစ်သည် မဟုတ်ပါလော။

ဤလူသားမျိုးနွယ်စု၏ ကံတရားသားတော်ကို ကိုယ်ခန္ဓာပေးဆပ်ပြီး တစ်ဖက်လူ၏ကျင့်ကြံမှုကို ကူညီပေးမှသာ အနာဂတ် လူသားမျိုးနွယ်စုအတွက် မျှော်လင့်ချက် ရှိလာမည် ဖြစ်သည်။

သူမ ဤကဲ့သို့လုပ်ဆောင်ရခြင်းသည် လူသားမျိုးနွယ်စု၏ အကျိုးအတွက်သာ ဖြစ်ပေသည်။

ဤအခိုက်အတန့်တွင် သူမ၏ခန္ဓာကိုယ်တွင် အပူလှိုင်းများ ဖြစ်ပေါ်လာပြီး၊ ထိန်းချုပ်၍ မရနိုင်လောက်အောင် ဖြစ်နေသည်ကို ခံစားလိုက်ရတော့သည်။

"ဒါက..."

ကျိုးစွေ့ မျက်တောင်ခတ်လိုက်မိသည်။

ယဲ့ဖေးရို၏ သူ့အပေါ် ကောင်းမွန်သော သဘောထားသည် မသိလိုက်မသိဘာသာ ပြည့်ဝသွားပုံရပြီး၊ ထို့ကြောင့် ဤကဲ့သို့ ကိုယ်ခန္ဓာပေးဆပ်မည့် အပြုအမူမျိုး လုပ်ဆောင်လာခြင်းဖြစ်ကြောင်း သူ အာရုံခံမိလိုက်သည်။

သူသည် ဤချန်လန်ပင်လယ်ဒေသ နံပါတ်တစ်အလှမယ်၏ လှပသောမျက်နှာလေးနှင့် ဆွဲဆောင်မှုရှိသော ကိုယ်လုံးကိုယ်ပေါက်ကို ကြည့်လိုက်မိပြီး အနည်းငယ် ယစ်မူးသွားမိတော့သည်။

ဤအမျိုးသမီးသည် မည်သည့် ဆွဲဆောင်မှုအတတ်ပညာကိုမျှ မတတ်သော်လည်း သက်ရှိများကို ဆွဲဆောင်နိုင်သည်မှာ အထွတ်အထိပ်များထဲမှ အထွတ်အထိပ်ပင် ဖြစ်လေ၏။

မကြာမီအချိန်အတွင်း လျှို့ဝှက်အခန်းထဲတွင် တက်ကြွသော တာအိုတေးသံများက စည်းချက်တကျ ထွက်ပေါ်လာတော့သည်။