အခန်း (၂၈၃-၂၈၄)

အခန်း ၂၈၃ - ယဇ်ပုရောဟိတ်ကြီး၏ တောင်းဆိုချက်

သဲကန္တာရထဲတွင် စိမ်းလန်းသော အပင်ဟူသည်မှာ ရှားပါးလှ​၏။

ကြည်လင်သော စမ်းရေတစ်ငုံ သောက်ခွင့်ရဖို့ပင် ခက်ခဲလှသော နေရာမျိုးဖြစ်သည်။

သို့သော် ယနေ့တွင်မူ ဆာလက်ဒ်မျိုးနွယ်စုဝင်များအကြား ရောက်ရှိနေသော လင်ချွမ်သည် ချိုမြိန်သော ရေကိုသောက်ရရုံသာမက ဒေသထွက် ထူးခြားသော သစ်သီးဝလံများကိုပါ မြည်းစမ်းနေရသည်။

ရာမာလ်သည် သစ်ခေါက်များဖြင့် ဖုံးအုပ်ထားသော ခွက်နှစ်ခွက်ပါသည့် သစ်သားလင်ဗန်းတစ်ခုကို ယူဆောင်လာခဲ့သည်။

၎င်းမှာ ဒေသထွက် အထူးအဖျော်ယမကာဖြစ်ပြီး အလွန်အဖိုးတန်လှ​၏။

သဲကန္တာရထဲတွင် နေထိုင်ကြသော မျိုးနွယ်စုများအတွက်မူ ဤသည်မှာ အမြင့်ဆုံးအဆင့် ဧည့်ဝတ်ပြုမှုဟု သတ်မှတ်နိုင်သည်။

ငှက်ပျောရွက်ကြီးများဖြင့် ဆောက်လုပ်ထားသော အိမ်အတွင်း၌ ထိုင်နေရင်း လင်ချွမ်နှင့် ဓားနတ်ဘုရားတို့သည် အခန်းတွင်း ပြင်ဆင်မွမ်းမံမှုများကို စိတ်ဝင်တစား ကြည့်ရှုနေကြသည်။

"မြက်နံ့သင်းသင်းလေးက လေထဲမှာ အမြဲပျံ့လွင့်နေတာပဲ"

ဟု ၎င်းတို့က ခံစားမိကြသည်။

ဧည့်သည်နှင့် အိမ်ရှင်တို့သည် ငှက်ပျောရွက်များပေါ်တွင် ထိုင်ရင်း အလွန်ပင် ပျော်ရွှင်နေကြသည်။

အခန်း၏ ထောင့်လေးထောင့်တွင် ချထားသော ထူးခြားသည့် ပန်းနှင့် အပင်များကို ကြည့်ရင်း လင်ချွမ်က စပ်စုလိုစိတ်ဖြင့် မေးလိုက်​၏။

"ဒါက..."

"ဒီအပင်ကို 'နတ်ဘုရားကြိုးကြာ' လို့ ခေါ်ပါတယ်"

"ကျွန်တော်တို့ မျိုးနွယ်စု မှတ်တမ်းတွေထဲက မသေဆေးပင် တစ်မျိုးပေါ့"

ဟု ပုရောဟိတ်မင်းကြီးက ရှင်းပြသည်။

"မှော်ဝင်ဆေးပင်လား"

၎င်းကို ကြားလိုက်ရသည့်အခါ လင်ချွမ်အနည်းငယ် အံ့အားသင့်သွားသည်။

ဤနေရာသို့ ရောက်ကတည်းက နတ်ဘုရားများနှင့် သက်ဆိုင်သော အကြောင်းအရာများကို အကြိမ်ကြိမ် ကြားနေရသည်။

ရာမာလ်က 'မှော်ရတနာ' ဟု ခေါ်ဆိုခဲ့သော အဝါရောင်ပိုးထည်လိပ်မှာလည်း တစ်ခုအပါအဝင်။

မင်မင်းဆက် နယ်မြေအတွင်း၌ နတ်ဘုရားအဆင့် ရတနာများကို ထားပါဦး၊ ရှေးဟောင်း မှော်လက်နက်များကိုပင် ရှာဖွေရန် ခက်ခဲလှသည်။

အပေါ်ယံကြည့်လျှင် အနောက်တိုင်း စစ်သူရဲများသည် မင်မင်းဆက်ထက် ကျင့်စဉ်ပိုင်းတွင် ပိုမိုတိုးတက်နေသယောင် ထင်ရ​၏။

အကယ်၍ ယခင်ကဆိုလျှင် လင်ချွမ်လည်း ထိုသို့ပင် ထင်ကောင်းထင်မိပေလိမ့်မည်။

သူတို့သည် နတ်ဆိုးဝိညာဉ်နည်းဗျူဟာ (၇၂) မျိုးကို သုံး၍ မိုးလေဝသကို တောင်းခံနိုင်ကြပြီး နတ်ဘုရားနှင့် တူသော ပုဂ္ဂိုလ်ကြီးများနှင့်လည်း တွေ့ဆုံခဲ့ဖူးသည် မဟုတ်ပါလား။

သို့သော် မင်မင်းဆက်ဘက်မှ တိုးတက်မှုသည် အခြားဒေသများထက် များစွာ သာလွန်နေကြောင်း သူ အသေအချာ သိထားသည်။

သို့သော်လည်း ကျွမ်းကျင်ပညာရှင် ရှားပါးခြင်း၊ မှော်ရတနာ နည်းပါးခြင်းနှင့် စွမ်းအားပြိုင်ကွက်များ အလွန်ရှားပါးခြင်းတို့မှာ လင်ချွမ် သိထားသည်နှင့် လုံးဝဆန့်ကျင်ဘက် ဖြစ်နေခြင်း။

၎င်းက သူ့ကို တွေးတောစရာ ဖြစ်စေသည်။

"မင်မင်းဆက် နယ်မြေအတွင်း တစ်စုံတစ်ရာသော အဖြစ်အပျက်ကြီး ဖြစ်ပွားခဲ့လို့ ပညာရှင်တွေ ရှားပါးသွားပြီး အမွေအနှစ်တွေ ပျောက်ကွယ်သွားတာလား"

ဤသို့ တွေးမိသောအခါ လင်ချွမ်တစ်ချက် သက်ပြင်းချလိုက်မိသည်။

ဤအရာများမှာ လောလောဆယ် သူ နားလည်

နိုင်ဦးမည့် အရာများမဟုတ်ပေ။

"ငါ 'သိုင်းအရှင်သခင်' အဆင့်ကို ရောက်တဲ့အခါကျမှ သိခွင့်ရမှာ ဖြစ်နိုင်တယ်" ဟု သူတွေးလိုက်သည်။

သူ၏ သံသယများကို ခေတ္တဘေးဖယ်ထားကာ သဲကန္တာရ အိုအေစစ်၏ အထူးလက်ဖက်ရည်ကို တစ်ငုံသောက်လိုက်ရာ လင်ချွမ်​၏ မျက်လုံးများ ချက်ချင်း တောက်ပသွားပြီး "တကယ့်ကို ကောင်းတဲ့ လက်ဖက်ရည်ပဲ"ဟု ချီးကျူးလိုက်သည်။

"လက်ဖက်ရည်လား"

ပုရောဟိတ်မင်းကြီးက ထိုစကားကို ထပ်ခါတလဲလဲ ပြောရင်း ခေါင်းခါလိုက်သည်။

"မင်းတို့ အရှေ့တိုင်းမှာ ဒီအပင်နဲ့ ဆင်တူတဲ့ 'လက်ဖက်ရည်' ဆိုတာ ရှိနိုင်ပေမဲ့ ဒါကတော့ မတူဘူးလို့ ငါထင်တယ်"

"ဒါကို 'သဲရွက်' လို့ ခေါ်တယ်၊ ဒီအိုအေစစ်ရဲ့ သီးသန့်ထွက်ကုန်ပေါ့"

လင်ချွမ် ခေါင်းညိတ်လိုက်သည်။

ယခုမူ သူလည်း ကွာခြားချက်ကို မြည်းစမ်းမိပြီ။

ဤသဲရွက်များတွင် ဝိညာဉ်စွမ်းအင်များ ပြည့်လျှံနေပြီး သိုင်းပညာရှင်များအတွက် ရှားပါးသော အားဆေးတစ်မျိုးပင်။

ကျင့်စဉ်လမ်းပေါ် လျှောက်လှမ်းနေသူများအတွက် ဝိညာဉ်နှင့် သွေးကြောများကို အားဖြည့်ပေးနိုင်သော အကောင်းစား ပစ္စည်းတစ်ခုဖြစ်သည်။

ဤမျှ အဖိုးတန်သော အရာသည် ဆာလက်ဒ် မျိုးနွယ်စုအတွင်းမှာပင် အတွေ့ရနည်းပေလိမ့်မည်။

"ငါသာ သူတို့ကို မကယ်ခဲ့ရင် ဒီလို ရတနာမျိုးကို မြည်းစမ်းခွင့် ရမှာမဟုတ်ဘူး"

လင်ချွမ်သည် သဲရွက်ကို စိတ်ဝင်တစား ရှိနေသည်ကို မြင်သောအခါ ပုရောဟိတ်မင်းကြီးက ဆက်လက်ရှင်းပြသည်။

"မျိုးနွယ်စုရဲ့ ရှေးဟောင်းမှတ်တမ်းတွေအရ လွန်ခဲ့တဲ့ နှစ်ပေါင်းထောင်ချီက ရှေးဟောင်း သားရဲကြီးတစ်ကောင် ဒီနေရာမှာ သေဆုံးခဲ့တယ်လို့ ဆိုတယ်"

"သူ့ရဲ့ ခန္ဓာကိုယ်ဟာ ဒီနေရာမှာ တည်ရှိနေပြီး ဒီသဲကန္တာရထဲမှာ အိုအေစစ် ဖြစ်လာအောင်နဲ့ ဒီလို ထူးခြားတဲ့ ဆေးဖက်ဝင်အပင်တွေ ဖြစ်ထွန်းအောင် အားဖြည့်ပေးခဲ့တာပေါ့"

"မင်းကြိုက်တယ်ဆိုရင် မပြန်ခင် အချို့ယူသွားပြီး အခါအားလျော်စွာ သောက်လို့ရပါတယ်"

"ကောင်းပါပြီ"

လင်ချွမ်သည် အားမနာတော့ဘဲ ချက်ချင်း သဘောတူလိုက်သည်။

ရာမာလ်မှလွဲ၍ အခြား ဆာလက်ဒ် မျိုးနွယ်စုဝင်များသည် သူ့အပေါ်တွင် ကြောက်ရွံ့မှုကို ဖုံးကွယ်ထားကြသည်ကို သူ သတိထားမိသည်။

သူက ဤလက်ဆောင်များကို လက်ခံလိုက်မှသာ သူတို့ စိတ်အေးသွားကြပေလိမ့်မည်။

လင်ချွမ် သဘောတူသည်ကို မြင်သောအခါ ပုရောဟိတ်မင်းကြီးလည်း တိတ်တဆိတ် သက်ပြင်းချနိုင်သွားသည်။

စွမ်းအားကြီးသော သိုင်းဘုရင်တစ်ဦးသည် ရတနာလေး နှစ်ခုတည်းအတွက်နှင့် အင်အားကြီးအဖွဲ့အစည်းတစ်ခုကို ရန်သူအဖြစ် သတ်မှတ်ရန် သဘောတူလိမ့်မည်ဟု ဆိုပါက လူအများက လှောင်ရယ်ကြပေလိမ့်မည်။

ထို့ကြောင့် သူသည် လင်ချွမ်ကို ကျေးဇူးတင်သော်လည်း ရင်ထဲ၌ စိုးရိမ်ပူပန်မှု အချို့ရှိနေလျက်။

အမှန်စင်စစ် သူတို့က ထိုသို့တွေးနေကြခြင်းမှာ မင်မင်းဆက်နယ်မြေတွင် ရတနာများ မည်မျှရှားပါးသည်ကို မသိသောကြောင့်။

အကယ်၍ အနက်ရောင် သံပြားနှင့် တိုးလာနေသော ဖိအားများသာ မရှိပါက လင်ချွမ်လည်း ဤမျှ အလွယ်တကူ သဘောတူခဲ့မည် မဟုတ်ပေ။

ပုရောဟိတ်မင်းကြီးသည် ခေတ္တမျှ တိတ်ဆိတ်နေပြီးမှ အရေးကြီးသော ကိစ္စကို စတင်ပြောဆိုလိုက်သည်။

"အရှင်...အကြီးအကဲလင်၊ ကျွန်တော့်မှာ တောင်းဆိုစရာတစ်ခု ရှိပါတယ်"

လင်ချွမ်က သူ့ကို အံ့အားသင့်စွာ ကြည့်လိုက်သည်။

အဘိုးအို၏ ယခင်ဟန်ပန်အရဆိုလျှင် သူ့ကို အသာအယာ နှင်ထုတ်လိမ့်မည်ဟု ထင်ထားခဲ့ခြင်းဖြစ်သည်။

တိုက်ရိုက် အကူအညီတောင်းခံလာခြင်းမှာ အနည်းငယ် ထူးဆန်းနေ​၏။

သို့သော် သူသည် ဤနေရာသို့ မလာခင်ကတည်းက ကြိုတင်ပြင်ဆင်မှုများ ပြုလုပ်ထားပြီး ဖြစ်ရာ သူတို့ကို အဆုံးထိ ကူညီရန် အသင့်ရှိနေသည်။

ထို့ကြောင့် ပန့်ခ်ဂိုဏ်းနှင့် ရင်ဆိုင်ရမည် ဆိုလျှင်ပင် ပြဿနာမရှိပေ။

အမှန်စင်စစ် သူကိုယ်တိုင်လည်း အနောက်ဘက်ဒေသကို အချိန်အတန်ကြာ လေ့လာရန် စီစဉ်ထားပြီးဖြစ်​၏။

ပထမအချက်မှာ အနောက်ဘက်ဒေသရှိ နိုင်ငံအသီးသီး၏ အင်အားကို အကဲဖြတ်ရန်နှင့် နောင်ဖြစ်လာမည့် စစ်ပွဲများအတွက် ပြင်ဆင်ရန်။

ဒုတိယအချက်မှာ ဟယ်လန်သို့ သွားရောက်ကာ ထိုလူများကို ဒုက္ခပေးရန် အခွင့်အရေး ရှာဖွေရန်ဖြစ်သည်။

လင်ယန်ရွှယ်၏ ဒဏ်ရာများသည် ဆေးလုံးများကြောင့် သက်သာသွားပြီ ဖြစ်သော်လည်း အလစ်အငိုက် တိုက်ခိုက်ခံရသည့် အကြွေးကိုမူ မဆပ်ရသေးပေ။

သူ မပြောသော်လည်း ရင်ထဲ၌ အမြဲမှတ်ထားသည်။

ဤသည်မှာ ဆာလက်ဒ် မျိုးနွယ်စုကို ကူညီရန် ရွေးချယ်ခဲ့သည့် အကြောင်းရင်း တစ်စိတ်တစ်ပိုင်းလည်း ဖြစ်​၏။

အတွေးများကို စုစည်းပြီးနောက် လင်ချွမ်က မေးလိုက်သည်။

"ခင်ဗျားတို့က အဲ့ဒီ ပန့်ခ် မျိုးနွယ်စုကို နှိမ်နင်းပေးဖို့ တောင်းဆိုချင်တာလား"

ပုရောဟိတ်ကြီးက ခေါင်းခါလိုက်သည်။

"မင်းက ကျွန်တော်တို့ကို တစ်ကြိမ် ကူညီပေးခဲ့ပြီးပြီ၊ ဆာလက်ဒ် မျိုးနွယ်စုကို အန္တရာယ်အရှိဆုံး အခြေအနေကနေ လွတ်မြောက်အောင် လုပ်ပေးခဲ့ပြီးပြီ"

"ကျန်တဲ့ကိစ္စတွေကိုတော့ ကျွန်တော်တို့ဘာသာ ဖြေရှင်းနိုင်ပါတယ်၊ မင်းကို ဒုက္ခမပေးလိုတော့ပါဘူး"

"ဒါပေမဲ့ မင်းကို ကျွန်တော်တို့ မျိုးနွယ်စုရဲ့ ကန့်သတ်နယ်မြေကို သွားပြီး ကျွန်တော်တို့ရဲ့ ဘိုးဘေးကြီး အသက်ရှင်နေသေးလား ဆိုတာကို ကြည့်ပေးစေချင်ပါတယ်"

"ကန့်သတ်နယ်မြေ ဟုတ်လား"

၎င်းကို ကြားလိုက်ရသည့်အခါ လင်ချွမ် အလိုလို ပြုံးမိသွားသည်။

"မင်းတို့ရဲ့ အိုအေစစ်က ၁၀ မိနစ်လောက် လမ်းလျှောက်ရင် ပတ်လို့ပြီးနေတာကို၊ ဘယ်မှာ ကန့်သတ်နယ်မြေ ရှိဦးမှာလဲ"

လင်ချွမ်​၏ အတွေးကို ရိပ်မိပုံရသော ပုရောဟိတ်မင်းကြီးမှာ အနည်းငယ် အနေရခက်သွား​၏။

သူက နှာခေါင်းကို ပွတ်ရင်း ရှင်းပြသည်။

"အဲ့ဒီ အလယ်မှာ ရေကန်တစ်ခု ရှိတယ်၊ အောက်မှာတော့ မြေအောက်စမ်းရေ ရှိတယ်"

"အဲ့ဒီနေရာက ကန့်သတ်နယ်မြေပဲ"

ထိုသို့ပြောရင်း ပုရောဟိတ်မင်းကြီး၏ မျက်နှာမှာ ဝမ်းနည်းရိပ် သန်းလာသည်။

"ရေကန်ရဲ့ အောက်ခြေမှာ နောက်ထပ် ကမ္ဘာတစ်ခု ရှိနေပုံရတယ်"

"အရင်က ကျွန်တော်တို့ ပညာရှင်တွေကို လွှတ်ခဲ့ဖူးပေမဲ့ ဘယ်သူမှ အသက်ရှင်လျက် ပြန်မလာခဲ့ဘူး"

"ဘိုးဘေးကြီးက သူ့ရဲ့ သက်တမ်းကုန်ခါနီးပြီလို့ ခံစားရလို့ အဲ့ဒီကို သွားပြီး စူးစမ်းခဲ့တယ်"

"ရလဒ်အနေနဲ့ လွန်ခဲ့တဲ့ လအနည်းငယ်က အောက်ကနေ ထူးဆန်းတဲ့ အသံတွေ ကြားရပေမဲ့ ဘိုးဘေးကြီး ပြန်ထွက်မလာခဲ့ဘူး"

"မျိုးနွယ်စုခေါင်းဆောင်ကလည်း စူးစမ်းဖို့ ကြိုးစားခဲ့ပေမဲ့ အန္တရာယ်နဲ့ တွေ့လို့ ပြန်ပြေးခဲ့ရတယ်"

ထိုစကားကို ကြားသောအခါ လင်ချွမ်အကြောင်းစုံကို နားလည်သွားပြီး အိုအေစစ်အောက်ခြေရှိ ထူးဆန်းသော ဖြစ်ရပ်များကို စိတ်ဝင်စားသွား​၏။

အိုအေစစ်၊ သဲကန္တာရနှင့် ထိုနေရာတွင် မွေးဖွားခဲ့သော ရာမာလ်​၏ ထူးခြားသော အခြေအနေများကို ပေါင်းစပ်ကြည့်လျှင် အောက်ခြေ၌ လျှို့ဝှက်ချက်တစ်ခု ရှိနေရမည်ဟု သူကောက်ချက်ချလိုက်သည်။

ထို့ကြောင့် သူက ခေါင်းညိတ်ကာ သဘောတူလိုက်သည်။

"ဒါဆိုရင် ဒီတစ်ခေါက်တော့ ခင်ဗျားတို့ ကိုယ်စား ကျွန်တော် သွားပေးပါ့မယ်"

"ဒါပေမဲ့ ဘယ်လောက်ပဲ စွမ်းအားကြီးပါစေ၊ သတိထားဖို့ကတော့ လိုအပ်ပါတယ်"

"ကျွန်တော် ရက်အနည်းငယ်လောက် အချိန်ယူပါရစေ"

"ဒါပေါ့၊ ဒါက သဘာဝပါပဲ"

ပုရောဟိတ်မင်းကြီးသည် သက်ပြင်းချလိုက်ပြီး ပြုံးပြလိုက်လေသည်။

အခန်း ၂၈၄ - ရေကန်ထဲမှ ထူးဆန်းသောငါး

ပူပြင်းလှသော နေရောင်ခြည်သည် ပြင်းထန်သော အပူရှိန်ကို ထုတ်လွှတ်နေပြီး ပတ်ဝန်းကျင် လေထုမှာလည်း အပူရှိန်ကြောင့် ဝေဝါးနေသည်။

ရေကန်မျက်နှာပြင်သည် နေရောင်ကို ရဟတ်ပြန်ဟပ်နေကာ တည်ငြိမ်အေးချမ်းသော အသွင်ကို ဆောင်နေ၏။

လင်ချွမ်သည် ရေကန်အစွန်းတွင် ရပ်ကာ အောက်ဘက်ရှိ နက်မှောင်သော ရေပြင်ကို ကြည့်ရင်း မျက်မှောင်ကြုတ်လိုက်သည်။

သူ၏ အာရုံခံစားမှုအရ ဤရေကန်ထဲတွင် တစ်ခုခု ထူးခြားနေသည်မှာ အမှန်ပင်။

ရေထဲမဆင်းမီကပင် အန္တရာယ်အငွေ့အသက်ကို သူ အနည်းငယ် ခံစားမိနေပြီ။

သိုင်းဘုရင်အဆင့်၏ အဆုံးသတ်သို့ ရောက်လုနီးပါးဖြစ်နေသော သူကိုယ်တိုင်ပင် အန္တရာယ်ဟု ခံစားရလျှင် ထိုအဆင့်သို့ပင် မရောက်သေးသော ရှာလာမျိုးနွယ်စု ဘိုးဘေးအတွက်မူ ပြောနေစရာပင် မလိုတော့ပေ။

ဤသို့တွေးမိသည်နှင့် လင်ချွမ်သည် ထိုသူ၏ ကံကြမ္မာကို ခန့်မှန်းမိသွားသည်။

သူသည် ထိုစကားများကို အပြင်ထုတ်မပြောဘဲ သက်ပြင်းသာဖွဖွချကာ သူတို့အတွက် ခဏတာ ဝမ်းနည်းပေးလိုက်မိ​၏။

ပုရောဟိတ်မင်းကြီး၏ တောင်းဆိုမှုအပြီးတွင် လင်ချွမ်သည် လိုအပ်သော ပြင်ဆင်မှုများကို စတင်ခဲ့သည်။

ရာမာလ်နှင့် ပုရောဟိတ်မင်းကြီးတို့၏ ပြောပြချက်များမှတစ်ဆင့် မျိုးနွယ်စုခေါင်းဆောင် ကြုံတွေ့ခဲ့ရသော အောက်ခြေအခြေအနေကို သူ သိရှိခဲ့ရသည်။

ယခုအခါ အားလုံးအဆင်သင့်ဖြစ်ပြီဖြစ်၍ တရားဝင် စူးစမ်းရှာဖွေမှုကို စတင်နိုင်ပြီ။

လင်ချွမ်သည် နောက်လှည့်ကာ ဓားနတ်ဘုရားကို ခေါင်းငြိမ့်ပြလိုက်ပြီးနောက် ရေကန်ထဲသို့ ခုန်ဆင်းလိုက်သည်။

သူ၏ အတွင်းအားများသည် တိတ်တဆိတ် ပျံ့နှံ့သွားပြီး လေထုအချို့ကို ထိန်းသိမ်းကာ ရေဝင်မလာအောင် ကာကွယ်ပေးထားသည့် မမြင်ရသော အလွှာပါးတစ်ခုအဖြစ် ပြောင်းလဲသွား​၏။

ထိုအလွှာကို ထိန်းသိမ်းရင်း လင်ချွမ်သည် ဖြည်းညှင်းစွာ ဆင်းသွားသည်။

တစ်ချိန်တည်းမှာပင် သူ၏ ဝိညာဉ်အင်အားကို အသုံးပြု၍ ပတ်ဝန်းကျင်ကို ကင်းထောက်လိုက်သည်။

မျိုးနွယ်စုခေါင်းဆောင်၏ ပြောပြချက်အရ သူမသည် ရေအောက်ဆင်းစဉ်တွင် ထူးဆန်းသော ငါးနှစ်ကောင်နှင့် တွေ့ခဲ့သည်ဟု ဆိုသည်။

၎င်းတို့သည် ဒဏ္ဍာရီလာ ရှေးဟောင်းသားရဲများကဲ့သို့ပင် ရေပူဖောင်းများကို သူ့အလိုလို ဖန်တီးကာ တိုက်ခိုက်မှုအမျိုးမျိုးကို ပြုလုပ်နိုင်​၏။

ဤဖော်ပြချက်သည် လင်ချွမ် အရှေ့တရုတ်ပင်လယ် ရေဝဲအောက်တွင် တွေ့ခဲ့ရသော ဖျံကြီးနှင့် ဆင်တူနေသည်။

ထို့ကြောင့် ၎င်းတို့ကို ကိုင်တွယ်ရန်မှာ သိပ်မခက်ခဲနိုင်ပေ။

မီတာလေးဆယ်ခန့် ဆင်းပြီးနောက် လင်ချွမ်သည် ကန်အောက်ခြေသို့ ရောက်ရှိသွားသည်။

အပြင်လောကနှင့်မတူဘဲ ဤနေရာတွင် စိမ်းလန်းစိုပြည်သော ရေအောက်အပင်များဖြင့် ပြည့်နှက်နေပြီး အချို့နေရာများတွင် ငါးများပင် ကူးခတ်နေကြ​၏။

သို့သော် သူသည် မည်သည့် သားရဲကိုမျှ မတွေ့ရသလို၊ တိုက်ခိုက်မှု သို့မဟုတ် စုံစမ်းထောက်လှမ်းမှုများကိုလည်း မကြုံတွေ့ရသေးပေ။

လင်ချွမ်သည် မျက်မှောင်အနည်းငယ်ကြုတ်ကာ သူ၏ ဝိညာဉ်အင်အားကို ထပ်မံဖြန့်ကြက်လိုက်ရာ ထူးခြားသော လမ်းကြောင်းတစ်ခုကို လျင်မြန်စွာ တွေ့ရှိသွား​၏။

ထိုလမ်းကို ရေမှော်ပင်များနှင့် အပင်များဖြင့် ဖုံးအုပ်ထားသဖြင့် ဝိညာဉ်အာရုံဖြင့် မကြည့်ပါက သာမန်မျက်စိဖြင့် မြင်နိုင်မည်မဟုတ်ပေ။

လင်ချွမ်သည် လက်ကိုမြှောက်ကာ အတွင်းအားအချို့ကို ထုတ်လွှတ်ပြီး လမ်းကြောင်းပေါ်ရှိ အပင်များကို ဖယ်ရှားလိုက်သည်။

သို့သော် သူ အတွင်းသို့ မဝင်ရသေးမီမှာပင် ရေမျှားတစ်စင်းက သူ့ကို ထိုးဖောက်လာသည်။

ကံကောင်းထောက်မစွာဖြင့် လင်ချွမ်၏ ဝိညာဉ်အာရုံမှာ အမြဲနိုးကြားနေသဖြင့် ရေစီးကြောင်း အပြောင်းအလဲနှင့် ရေပူဖောင်းအမြောက်အမြား ထွက်ပေါ်လာသည်ကို ခံစားမိသည်နှင့် ချက်ချင်း တုံ့ပြန်လိုက်သည်။

သူ၏ လက်ဝါးကို လေထဲတွင် အနည်းငယ် လိမ်ချလိုက်ရာ အားတစ်ခု ဖြစ်ပေါ်လာပြီး ရှေ့ရှိ ရေအချို့ကို ရေဝဲအဖြစ် ပြောင်းလဲလိုက်​၏။

ရေမျှားသည် ထိုရေဝဲထဲသို့ ဝင်သွားကာ ရေစီးကြောင်းနှင့် ရောနှော ပျောက်ကွယ်သွားသည်။

ပထမအကြိမ် တိုက်ခိုက်မှု လွဲချော်သွားပြီးနောက် ရေမျှားအများအပြား ထပ်မံထွက်ပေါ်လာ​၏။

ယခုတစ်ကြိမ်တွင်မူ အရှိန်နှင့် အားမှာ ယခင်ကထက် သိသိသာသာ ပိုမိုပြင်းထန်လာသည်။

"ဟက်... သူတို့က တိုက်ခိုက်ဖို့ ရည်ရွယ်တာမဟုတ်ဘဲ ငါ့ကို အထဲပေးမဝင်ချင်တာပဲ"

ဟု လင်ချွမ်က ခဏတာ စဉ်းစားပြီးနောက် ခေါင်းခါလိုက်သည်။

သူ၏ လက်ဝါးထဲတွင် အတွင်းအားများ တိုးလာပြီး ရေစီးကြောင်းကို လက်ဝါးပုံရိပ်များအဖြစ် ပြောင်းလဲလိုက်သည်။

ထို့နောက် 'သမုဒ္ဒရာတုန်ဟိန်း လက်ဝါး' ၏ ရိုးရှင်းသောပုံစံကို အသုံးပြုကာ ရှေ့သို့ တွန်းထုတ်လိုက်ရာ ပင်လယ်ဒီရေလှိုင်းများကဲ့သို့ အဟုန်ဖြင့် လူတစ်ရပ်စာသာရှိသော ထိုဂူထဲသို့ စီးဝင်သွား​၏။

ချက်ချင်းပင် ကန်အောက်ခြေရှိ ရေပြင်မှာ ပြင်းထန်သော ရိုက်ခတ်မှုကြောင့် တုန်ခါသွားသည်။

လင်ချွမ်သည် အခြေအနေကို စောင့်ကြည့်ရန် နောက်သို့ ခြေလှမ်းအနည်းငယ် ဆုတ်လိုက်သည်။

မျှော်လင့်ထားသည့်အတိုင်းပင် ဂူထဲရှိ အမည်မသိသတ္တဝါမှာ ထိုတိုက်ခိုက်မှုကြောင့် ဒေါသထွက်သွားပုံရသည်။

အတွင်းပိုင်းမှ ပြင်းထန်သော တုန်ခါမှုတစ်ခုနှင့်အတူ ဝေးကွာသော ဟိန်းသံတစ်ခု ထွက်ပေါ်လာ​၏။

ရေအောက်ဖြစ်နေသဖြင့် ထိုအသံမှာ လူဟိန်းသံလား သားရဲဟိန်းသံလား ခွဲခြားရခက်သော်လည်း ထွက်ပေါ်လာသော ရေပန်းများနှင့် အသံလှိုင်းများအရ တစ်ဖက်လူမှာ ဒေါသပေါက်ကွဲနေသော သားရဲသာ ဖြစ်နိုင်ပေသည်။

ဖျံများနှင့် တိုက်ခိုက်ခဲ့သည့် အတွေ့အကြုံအရ လင်ချွမ်သည် တည်ငြိမ်စွာပင် ရှိနေသည်။

သူသည် ခုန်တက်မည့်အစား အတွင်းအားကို အောက်ခြေ ရွှံ့နွံထဲသို့ ဖြည်းဖြည်းချင်း ထုတ်လွှတ်ကာ မိမိကိုယ်ကိုယ် နောက်သို့ တွန်းထုတ်လိုက်​၏။

ခဏအကြာတွင် အပြာရောင် အလင်းတန်းတစ်ခု ဂူထဲမှ ရုတ်တရက် ပစ်ထွက်လာသည်။

၎င်း၏ အားနှင့် အရှိန်မှာ ယခင်ရေမျှားများထက် များစွာ သာလွန်သည်။

အကယ်၍ လင်ချွမ်သာ အချိန်မီ နောက်မဆုတ်ခဲ့ပါက သိုင်းဘုရင်အဆင့် ရှိသော်လည်း ထိခိုက်မှုကြီးမားနိုင်ပေသည်။

ထိုတိုက်ခိုက်မှု ထပ်မံလွဲချော်သွားသောအခါ အမည်မသိသတ္တဝါမှာ လမ်းကြောင်းထဲမှ နောက်ဆုံးတွင် ထွက်လာခဲ့သည်။

ကြီးမားသော ရေစီးကြောင်းမှာ မမြင်ရသော အင်အားအဖြစ် ပြောင်းလဲသွားပြီး ဤကန်ငယ်လေးကို ရေဝဲကြီးတစ်ခုအဖြစ် ချက်ချင်း ပြောင်းလဲပစ်လိုက်​၏။

သို့သော် ၎င်း၏ ပစ်မှတ်မှာ လင်ချွမ် ဖြစ်နေသည်။

လင်ချွမ်သည် ယခင်ကတည်းက ရေဝဲ၏ သဘောသဘာဝကို နားလည်ထားပြီးသားဖြစ်၍ အတွင်းအားကို အနည်းငယ်အသုံးပြုရုံဖြင့် ရေထဲတွင် ငါးတစ်ကောင်ကဲ့သို့ ကူးခတ်ကာ ထိုရေဝဲကိုပင် အသုံးချ၍ လည်ပတ်နိုင်ခဲ့သည်။

သူ၏ ကိုယ်ပေါ်မှ အတွင်းအား အလွှာပါးမှာလည်း ပျက်စီးမည့် လက္ခဏာ မရှိပေ။

ရေစီးကြောင်းများ ငြိမ်သက်သွားသောအခါ တိုက်ခိုက်သူကို လင်ချွမ် ရှင်းရှင်းလင်းလင်း မြင်လိုက်ရသည်။

မျိုးနွယ်စုခေါင်းဆောင် ပြောခဲ့သလိုပင် ထိုသတ္တဝါမှာ ငါးကြီးတစ်ကောင် ဖြစ်သည်။

၎င်း၏ ခန္ဓာကိုယ်မှာ ငါးမန်းနှင့် တူသော်လည်း ကျောပြင်နှင့် တစ်ကိုယ်လုံးတွင် ထက်မြက်သော ဆူးချွန်များဖြင့် ဖုံးအုပ်ထားသည်။

အမြီးမှာလည်း ထက်မြက်သော အစွန်းများ ရှိနေပြီး ရေအောက်တွင် ထူးဆန်းသော အလင်းများ တောက်ပနေ​၏။

ထိုငါးကြီးသည် လင်ချွမ်ကို မြင်သည်နှင့် တစ်ပြိုင်နက် ပစ်မှတ်ထားလိုက်သည်။

၎င်း၏ ပါးစပ်မှ အပြာရောင် ရေအမြောက်ဆန်များတဆက်တည်း ပစ်ထုတ်လိုက်သည်။

အမြောက်ဆန်တစ်ခုချင်းစီသည် ရေစီးကြောင်းကြီးများကို ဖန်တီးကာ ကန်အောက်ခြေရှိ ရွှံ့နွံများနှင့် သဲများကို လွင့်စင်သွားစေ​၏။

လင်ချွမ်၏ လက်ဝါးမှ အဖြူရောင်နှင့် အမည်းရောင် စွမ်းအင်နှစ်ခု ထွက်ပေါ်လာသည်။

၎င်းတို့သည် ယင်နှင့်ယန် ငါးနှစ်ကောင်ကဲ့သို့ တစ်ခုနှင့်တစ်ခု ပဲ့တင်ထပ်ရင်း လေထဲတွင် ကြီးမားသော 'ထိုက်ချိ' စက်ဝိုင်းတစ်ခုကို ဖန်တီးလိုက်သည်။

ရေအမြောက်ဆန်များစွာသည် ထိုစက်ဝိုင်းကို လာရောက်ထိမှန်သော်လည်း ချက်ချင်းပင် ပျက်စီးသွားကြ​၏။

အခြေအနေမှာ အသာစီးရနေသည်ကို မြင်

သောအခါ လင်ချွမ်သည် ကိုယ်ကို လှုပ်ရှားလိုက်စဉ်တွင် သူ၏ မျက်လုံးများ ရုတ်တရက် ကျဉ်းမြောင်းသွားသည်။

စောစောက လွင့်ထွက်သွားသော ရေကျည်ဆန်တစ်ခုသည် ထိုငါးကြီးကို မထိသော်လည်း ရေကန်နံရံကို သွားထိမှန်ခဲ့သည်။

ထိုနေရာမှ စိမ်းဖန့်ဖန့် မီးခိုးများ ထွက်ပေါ်လာပြီး မူလကျောက်နံရံမှာ အရည်ပျော်ကာ အပေါက်ဖြစ်သွားသည်ကို သူတွေ့လိုက်ရသည်။

"တိုက်စားမှုလား၊ အဆိပ်လား"

လင်ချွမ်၏ နှုတ်ခမ်းများ အနည်းငယ် တုန်ခါသွားပြီး ပတ်ဝန်းကျင်ကို ချက်ချင်း ဝေ့ကြည့်လိုက်​၏။

ထိုက်ချိစက်ဝိုင်းကြောင့် ပျက်စီးသွားသော ရေလုံးများမှလွဲ၍ ပတ်ဝန်းကျင်တစ်ခုလုံးတွင် အစိမ်းရောင် အစက်အပြောက်များ ပျံ့နှံ့နေပြီဖြစ်သည်။

အနီးဆုံးနေရာမှာ သူနှင့် မီတာအနည်းငယ်သာ ကွာဝေးတော့သည်။