အခန်း (၃၇၁)

ယခုအချိန်တွင် ဇွန်ဘီအဖွဲ့များသည် အတွင်းမြို့တစ်ခုလုံးကို နှံ့နှံ့စပ်စပ် ရှာဖွေစူးစမ်းနေကြသည်။

အသုံးချ၍ရသမျှသော အရင်းအမြစ်အမျိုးမျိုးကို လမ်းမပေါ်တွင် ရပ်နားထားသော ယာဉ်တန်းဆီသို့ သယ်ယူပို့ဆောင်နေကြပြီး ဇွန်ဘီတိုင်းမှာ အလုပ်ကိုယ်စီဖြင့် အားသွန်ခွန်စိုက် လှုပ်ရှားနေကြသည်။

ရှာဖွေစုဆောင်းရရှိလာသော အမြုတေများကို သုံးမီတာခန့်ရှိသော သံသေတ္တာများအတွင်းသို့ အပြည့်ထည့်ထားကြသည်။

ဖောင်းကားနေသော အိတ်ကြီးများထဲတွင်မူ ဟင်းသီးဟင်းရွက်မျိုးစုံနှင့် နေ့စဉ်သုံး လူသုံးကုန်ပစ္စည်းများကို ဖြည့်တင်းထားသည်။

ထို့အပြင် သေနတ်မျိုးစုံနှင့် မရှိမဖြစ်လိုအပ်သော ခဲယမ်းမီးကျောက်များလည်း ပါဝင်သည်။

အမြုတေများမှာ သေတ္တာပေါင်း တစ်ဒါဇင်ကျော်ကို ပြည့်လျှံသွားစေရန် လုံလောက်သည်။ သေတ္တာတစ်လုံးမှာ အဆင့် ၃ အမြုတေများနှင့် ပြည့်နေပြီး သေတ္တာသုံးလုံးမှာ အဆင့် ၂ အမြုတေများဖြင့် ပြည့်နှက်နေသည်။ ကျန်ရှိသော သေတ္တာများမှာမူ အဆင့် ၁ အမြုတေများဖြစ်ပြီး လုချွမ်းအနေဖြင့် ၎င်းတို့ကို သိပ်ပြီး အရေးတယူ မရှိပေ။

ရိုင်ဖယ်သေနတ်များနှင့် ပတ်သက်၍မူ မြို့တော်စခန်း၏ သိုလှောင်ရုံများတွင် အမြောက်အမြား ရှိနေသည့်အပြင် တိုက်ပွဲတွင် ကျဆုံးသွားသော လူသားစစ်သည်များထံမှ သိမ်းဆည်းရရှိသည်မှာ စုစုပေါင်း အလက်တစ်ထောင်ကျော် ရှိနေပြီဖြစ်သည်။

၎င်းအပြင် ရိုင်ဖယ်များထက် အဆပေါင်းများစွာ စွမ်းအားသာလွန်သော စက်သေနတ်ကြီး အလက်ပေါင်း ဒါဇင်နှင့်ချီ၍ သိမ်းဆည်းရမိခဲ့ပြီး ကျည်ဆန်သေတ္တာများနှင့် လက်ပစ်ဗုံးများမှာမူ ရေတွက်၍မရနိုင်အောင်ပင် များပြားလှသည်။

ထို့နောက်တွင် လုချွမ်းသည် စုဆောင်းရရှိထားသော ရိက္ခာနှင့် ပစ္စည်းများကို ယာဉ်များပေါ်သို့ တင်ဆောင်ရန် ဇွန်ဘီများကို အမိန့်ပေး၍ ထိန်းချုပ်လိုက်သည်။

စစ်သုံးယာဉ်များကိုပါ ထည့်သွင်းအသုံးပြုလိုက်သဖြင့် ယာဉ်တန်းတစ်ခုလုံး၏ ပစ္စည်းတင်ဆောင်နိုင်မှုစွမ်းရည်မှာ သိသိသာသာ မြင့်တက်လာခဲ့ပြီး မြို့တော်စခန်းမှ သိမ်းဆည်းရမိသော ပစ္စည်းအမြောက်အမြားကို တင်ဆောင်ရန် လုံလောက်ရုံသာမက နေရာလွတ်အချို့ပင် ကျန်ရှိနေပါသေးသည်။

"ဖေဖေ... သမီးတို့ ဒီကနေ ထွက်သွားကြတော့မှာလားဟင်"

ကားနောက်ခန်းတွင် ထိုင်နေသော ကျိရုရွှယ်သည် အပြင်ဘက်မှ မြင်ကွင်းကို ကြည့်ကာ ရှေ့ခန်းတွင် ထိုင်နေသော လုချွမ်းကို မေးမြန်းလိုက်သည်။

"ဟူး... သမီးတို့ ရောက်တာမှ မကြာသေးဘူး အခု ပြန်ထွက်ရတော့မှာလား"

လူသားတွေနဲ့ မတွေ့အောင် တစ်နေရာပြီးတစ်နေရာ ထပ်ခါတလဲလဲ ရွှေ့ပြောင်းနေရတာတွေကို ပြန်တွေးမိရင်း ကျိရုရွှယ်၏ မျက်လုံးများထဲတွင် တစ်စုံတစ်ခုကို ဆုံးဖြတ်ချက်ချလိုက်သကဲ့သို့ တောက်ပသွားပြီး စိတ်ကူးသစ်တစ်ခု ရုတ်တရက် ပေါ်လာခဲ့သည်။

ထိုစကားကို ကြားသောအခါ ဇွန်ဘီရုပ်သေးများကို ထိန်းချုပ်နေသော လုချွမ်းသည် နောက်သို့ လှည့်ကြည့်လိုက်ပြီး ပြုံးလျက် စက္ကူပေါ်တွင် စိတ်ရှည်လက်ရှည် ရေးသားကာ ရှင်းပြလိုက်သည်။

"ချီချီလေး... ဒီနေရာက ဘယ်လိုပဲဖြစ်ဖြစ် လူသားတွေရဲ့ နယ်မြေလေ။ ဒီမှာ အကြာကြီးနေရင် နောက်ဆုံးတော့ လူသားတွေရဲ့ ပစ်မှတ်ထားတာကို ထပ်ခံရမှာပဲ"

လူသားမြို့တော်စခန်းများဆိုသည်မှာ တစ်နိုင်ငံလုံးအတိုင်းအတာဖြင့် လူသားအာဏာပိုင်များ၏ အုပ်ချုပ်မှု ယန္တရားများ ဖြန့်ကျက်ထားခြင်းဖြစ်ပြီး အခြေအနေအရပ်ရပ်ကို သတင်းပို့ရန် နေရာအနှံ့တွင် မျက်စိများ ရှိနေသကဲ့သို့ပင်။ တစ်စုံတစ်ရာ ထူးခြားမှုကို တွေ့သည်နှင့် ချက်ချင်း သတင်းပို့ကြမည်သာ ဖြစ်သည်။

အစောပိုင်းကလည်း ဇွန်ဘီဘုရင်ကို တွေ့ရှိပြီးနောက် လီမြစ်မြို့တော်စခန်းသည် လုပ်ထုံးလုပ်နည်းအတိုင်း မြို့တော်ထံ သတင်းပို့ခဲ့ပြီးဖြစ်သည်။

ယခုအခါတွင်မူ သူက လီမြစ်မြို့တော်စခန်းကို ဖျက်ဆီးလိုက်ပြီဖြစ်ရာ လူသားအာဏာပိုင်များဘက်မှ မကြာမီ တုံ့ပြန်မှုများ ရှိလာပေလိမ့်မည်။

လီမြစ်မြို့တော်စခန်းကို တိုက်ခိုက်ခဲ့သည့် တရားခံကို သုတ်သင်ရန်အတွက် လူသားများသည် ပိုမိုကြီးမားသော စစ်အင်အားများနှင့် ဆင့်ကဲပြောင်းလဲသူအမြောက်အမြားကို လီမြစ်မြို့တော်စခန်းဆီသို့ စေလွှတ်လာကြမည်မှာ အသေအချာပင်။

ထို့ကြောင့် အကယ်၍ သူတို့သာ လီမြစ်မြို့တော်စခန်းတွင် အချိန်ဆွဲနေမည်ဆိုပါက လူသားအာဏာပိုင်များ၏ အင်အားနှင့် တိုက်ရိုက်ရင်ဆိုင်ရမည်ဖြစ်ပြီး တိုက်ပွဲကြီးဖြစ်ပွားရန်မှာ ရှောင်လွှဲ၍ရမည် မဟုတ်ပေ။

လုချွမ်းအနေဖြင့် လူသားများကို ကြောက်ရွံ့နေ၍တော့ မဟုတ်ပေ။ လီမြစ်မြို့တော်စခန်းကို ဖျက်ဆီးပြီး အဆင့်မြင့်အရာရှိကြီးများကို ဝန်လေးခြင်းမရှိဘဲ သုတ်သင်ခဲ့သူဖြစ်ရာ သူ ဘာကို ကြောက်နေစရာ လိုမှာလဲ။

သူ စိုးရိမ်သည်မှာ အကယ်၍ သူသာ အချိန်နှေးကွေးနေပါက လူသားအာဏာပိုင်များ၏ ပစ်မှတ်ထားခြင်းကို ခံရမည်ကိုပင်။

အကယ်၍ ယာဉ်တန်းသည် လူသားအာဏာပိုင်များနှင့် ရင်ဆိုင်ပိတ်မိနေပါက သူတို့သည် သူ့ကို နှိမ်နင်းရန်အတွက် ပိုမိုကြီးမားသော အင်အားစုများကို စုစည်းလာကြပေလိမ့်မည်။

လူသားများသည် တစ်ဦးချင်းအနေဖြင့် အားနည်းပြီး ဆင့်ကဲပြောင်းလဲထားသော ဇွန်ဘီရုပ်သေးများကို မယှဉ်နိုင်သော်လည်း လုချွမ်းနှင့် နှိုင်းယှဉ်ပါက အလုံးစုံသော အင်အားစုအရမူ လူသားများက သာလွန်နေဆဲပင်။

အကယ်၍ လုချွမ်းအနေဖြင့် ဇွန်ဘီရုပ်သေးများကို အလုံးအရင်းနှင့် စုဆောင်းကာ ကြောက်မက်ဖွယ်ကောင်းသော ဇွန်ဘီပင်လယ်ကြီးဖြစ်လာသည်အထိ အဆက်မပြတ် အဆင့်

မြှင့်တင်ပြီး ဇွန်ဘီရေလှိုင်းကို အကြီးအကျယ် မဖန်တီးနိုင်သရွေ့ လူသားတို့ဘက်မှ အပြင်းအထန် ဗုံးကြဲတိုက်ခိုက်မှုများနှင့် ကျည်ဆန်မိုးများအောက်တွင် မည်သို့ ရင်ဆိုင်ရမည်ကို လုချွမ်း အဖြေရှာမရသေးပေ။

ဤသည်ကို ကြားသောအခါ ကျိရုရွှယ်က ခေါင်းကိုခါယမ်းလိုက်ပြီး ခါးသီးစွာ ပြောလိုက်သည်။

"ဖေဖေ... သမီးတို့ ပုန်းနေရင်တောင် လူသားတွေက သမီးတို့ကို ပစ်မှတ်ထားနေဦးမှာပဲ။

ပိုင်ချန်မြို့မှာ ကြုံခဲ့ရသလိုမျိုးပဲ လူသားဆင့်ကဲပြောင်းလဲသူတွေ သမီးတို့ကို ရှာတွေ့ပြီး နောက်တစ်ကြိမ် တိုက်ခိုက်လာဖို့ဆိုတာ အချိန်ပိုင်းပဲ လိုတော့တာပါ"

လုချွမ်းကဲ့သို့ပင် ကျိရုရွှယ်သည်လည်း လူသားအာဏာပိုင်များ၏ အဆက်မပြတ် နှောင့်ယှက်မှုများအပေါ် စိတ်ပျက်အားမလိုအားမရဖြစ်ကာ နာကျည်းချက်များ နက်ရှိုင်းနေခဲ့ပြီ ဖြစ်သည်။

လူသားအာဏာပိုင်များ၏ လုပ်ရပ်များက သူတို့အတွက် အသက်အန္တရာယ်အထိ မစိုးရိမ်ရသော်လည်း ၎င်းမှာ အလွန်စိတ်အနှောင့်အယှက်ဖြစ်စရာကောင်းလှပြီး သူတို့၏ ခရီးစဉ်များကိုလည်း မကြာခဏ အနှောင့်အယှက်ဖြစ်စေသည်။

ယခုအချိန်တွင် ကျိရုရွှယ်သည် ဆက်လက်ပုန်းအောင်းမနေလိုတော့ပေ။

ချီချီလေး၏ စကားများကို ကြားရသောအခါ လုချွမ်းသည် စိတ်မကောင်းဖြစ်သွားပြီး ဤကလေးငယ်မှာ ယခုကဲ့သို့သော ဘဝမျိုးကို ငြီးငွေ့နေပြီဖြစ်ကြောင်း သူ နားလည်လိုက်သည်။

ထို့နောက် လုချွမ်း၏ မျက်နှာမှာ တည်ကြည်လေးနက်သွားပြီး စက္ကူပေါ်တွင် ရေးသားလိုက်

သည်။

"ချီချီလေး ပြောတာ မှန်တယ်။ ဖေဖေ အခု နားလည်သွားပြီ။ တခြား စိတ်ကူးရှိရင်လည်း ဖေဖေ့ကို ပြောပြနိုင်တယ်နော်"

"ဖေဖေ... သမီးအထင်တော့ ဒီဇွန်ဘီစစ်တပ်ကို လီမြစ်မြို့တော်စခန်းမှာပဲ ထားခဲ့သင့်တယ်လို့ ထင်တယ်။

ပုန်းနေမယ့်အစား ဒီနယ်မြေကို သိမ်းပိုက်ပြီး ကိုယ့်မင်းကိုယ့်ချင်းလို မင်းမူနေလိုက်တာက ပိုကောင်းမယ်။

သမီးတို့ ဒီမှာပဲ အခြေချရအောင်။ ဖေဖေလည်း ဒီဇွန်ဘီတွေကို သုံးပြီး ကိုယ်ပိုင်အင်အားစု ကိုယ်ပိုင် ဇွန်ဘီနိုင်ငံတော်တစ်ခုကို တည်ထောင်လိုက်ပါလား"

"အဲဒီအချိန်ကျရင် အဲဒီလူသားတွေ လာတိုက်ရင်တောင် သမီးတို့မှာ သူတို့ကို ထိပ်တိုက်ရင်ဆိုင်ဖို့ ဆင့်ကဲပြောင်းလဲထားတဲ့ ဇွန်ဘီတွေ အများကြီး ရှိနေမှာပဲ"

ကျိရုရွှယ်၏ စကားများထဲတွင် ဆွဲဆောင်မှုရှိသော လေသံတစ်ခု ပါဝင်နေသည်။

အကယ်၍သာ သူမ၏ဖခင်ကို ဤနေရာတွင် နေထိုင်ရန် ဖျောင်းဖျနိုင်ပါက သူတို့သည် ဒြပ်စင်အမျိုးမျိုး၏ ဒဏ်ကိုခံရင်း ပင်ပန်းနွမ်းနယ်စွာဖြင့် တစ်နေရာပြီးတစ်နေရာ အမြဲတမ်း ထွက်ပြေးနေစရာ လိုတော့မည်မဟုတ်ပေ။

လူသားမြို့တော်တစ်ခုတွင် သက်သောင့်သက်သာ နေထိုင်ရခြင်းနှင့် နှိုင်းယှဉ်ပါက တောရိုင်းထဲတွင် နေထိုင်ရသည့် အခြေအနေမှာ အလွန်ပင် သည်းမခံနိုင်စရာ ကောင်းလှသည်။

အထူးသဖြင့် ပုံမှန် ရေမချိုးနိုင်ခြင်းမှာ ကျိရုရွှယ်ကို ရူးသွပ်သွားစေရန် လုံလောက်သည်။ သူမသည် ယခင်ဘဝမှာဖြစ်စေ ယခုဘဝမှာဖြစ်စေ သန့်ရှင်းမှုကို အလွန်မြတ်နိုးသူဖြစ်သည်။

သုံးလေးရက်နေမှ တစ်ကြိမ်မျှပင် ရေမချိုးရသော ထိုကဲ့သို့ ကြမ်းတမ်းလှသည့် လူနေမှုပုံစံကို သူမ မည်မျှပင် အောင့်အည်းသည်းခံနေပါစေ စိတ်ထဲတွင်မူ ပြင်းပြင်းထန်ထန် ငြင်းဆန်နေမိသည်။

အကယ်၍ သူတို့သာ ဤမှာ ဆက်နေနိုင်မည်ဆိုပါက အမှန်တကယ်ပင် အကောင်းဆုံး ရွေးချယ်မှု ဖြစ်ပေလိမ့်မည်။

"ဒီမှာပဲနေပြီး ဇွန်ဘီနိုင်ငံတော် တစ်ခု တည်ထောင်မယ်..."

ချီချီလေး၏ အကြံပြုချက်ကို ကြားလိုက်ရသောအခါ လုချွမ်း၏ မျက်မှောင်များမှာ ချက်ချင်းပင် ကြုတ်သွားပြီး ဝေခွဲမရဖြစ်ကာ ဗျာများသွားတော့သည်။

အကယ်၍ သူသာ ဤနေရာတွင် ဆက်နေမည်ဆိုပါက လူသားများနှင့် ထိပ်တိုက်ရင်ဆိုင်ရရန်မှာ ရှောင်လွှဲ၍မရပေ။ အောင်ပွဲခံနိုင်ရန်အတွက်မူ ချီချီလေး အကြံပေးသကဲ့သို့ ဧရာမ ဇွန်ဘီအုပ်ကြီးကို စုစည်းပြီး သူ့ကိုယ်ပိုင်ဖြစ်သော ခိုင်မာတောင့်တင်းသော အင်အားစုတစ်ခုဖြစ်သည့် ဇွန်ဘီနိုင်ငံတော်ကို တည်ဆောက်ရမည်။

အမြဲတမ်း ရွှေ့ပြောင်းနေရတာ ငါလည်း တကယ်ပဲ ငြီးငွေ့နေပြီ... လူသားအာဏာပိုင်တွေက ငါ့နောက်ကို အမဲလိုက်ခွေးတွေလို မဆုတ်မနစ် လိုက်နေကြတာ။ ငါက အမြဲတမ်း ထွက်ပြေးနေလို့လည်း ဖြစ်နိုင်တာပဲ။

ခဏအကြာတွင် လုချွမ်းသည် သူ၏ရင်ထဲ၌ ဆုံးဖြတ်ချက်တစ်ခု ချလိုက်သည်။

ဆက်ပြီး ထွက်ပြေးမနေတော့ဘူး။ ငါတို့တွေ လီမြစ်မြို့တော်စခန်းမှာပဲ ဆက်နေကြမယ်။

ချီချီလေး ပြောတာ မှန်တယ်။ အခု ငါတို့ အစွမ်းကုန်သုံးပြီး ထွက်ပြေးသွားရင်တောင် လူသားအာဏာပိုင်တွေရဲ့ မျက်စိအောက်မှာ ကြာကြာ ပုန်းနေနိုင်မှာ မဟုတ်ဘူး။ ဘယ်မြို့ပြဆီပဲ ရောက်ရောက်... အဲဒီမြို့က မြို့တော်စခန်းက ငါတို့ကို ချက်ချင်း ရှာတွေ့သွားမှာပဲ။ အဲဒီအချိန်ကျရင်တော့... ရှောင်လွှဲလို့မရတဲ့ သေရေးရှင်ရေး တိုက်ပွဲကြီးက နောက်တစ်ခါ ထပ်ဖြစ်လာဦးမှာပဲ။

သေချာ စဉ်းစားပြီးသွားသောအခါ လုချွမ်းသည် စိတ်ပေါ့ပါးသွားခဲ့သည်။

ယခုအခါ သူ၏ လက်အောက်တွင် အဆင့်မြင့် ဇွန်ဘီရုပ်သေးများနှင့် ဧရာမ ဇွန်ဘီရေလှိုင်းရှိနေပြီဖြစ်ရာ လူသားအာဏာပိုင်များကို ထိပ်တိုက်ရင်ဆိုင်နိုင်သည့် အရင်းအနှီး ရှိနေပြီဖြစ်သည်။ ဆက်လက် ပုန်းအောင်းနေစရာ မလိုတော့ပေ။

အကယ်၍ လူသားအာဏာပိုင်များက သူ့ကို တိုက်ခိုက်ချင်သည်ဆိုပါက လုချွမ်းသည်လည်း နောက်ဆုံးအထိ အသေအလဲ တိုက်ပွဲဝင်သွားမည်မှာ မလွဲဧကန်ပင်။