အခန်း (၃၇၅)

ယွီဟွာမြို့တော်…

ယွီဟွာဂိုဏ်း၏ အခြေစိုက်စခန်းအတွင်း၌ ဘိလပ်မြေနှင့် အုတ်များဖြင့် ပြုလုပ်ထားသော ခိုင်ခံ့သည့် စင်မြင့်တစ်ခု ရှိနေသည်။

ထိုစင်မြင့်မှာ အမြင့် တစ်မီတာခန့်ရှိပြီး စတုရန်းပုံသဏ္ဌာန်ဖြစ်ကာ အကျယ် ကိုးပေခန့် ရှိသဖြင့် အတော်ပင် ကျယ်ဝန်းလှသည်။

ဝုန်း... ဝုန်း...

ထိုစဉ်မှာပင် ပေါက်ကွဲသံ ဆက်တိုက် ထွက်ပေါ်လာတော့သည်။

စင်မြင့်ထက်တွင် ဒုတိယအဆင့် ဆင့်ကဲပြောင်းလဲသူနှစ်ဦးသည် အံ့ဩဖွယ်ကောင်းသော အရှိန်နှုန်းဖြင့် တစ်ဦးနှင့်တစ်ဦး အပြင်းအထန် ရိုက်နှက်နေကြသည်။ လေထဲတွင် ဝှေ့ယမ်းနေသော သူတို့၏ လက်သီးချက်များမှာ အရှိန်ပြင်းလွန်းလှပြီး တစ်ချက်ချင်းစီမှာလည်း ပစ်မှတ်ကို ထိထိမိမိ ရှိလှသည်။ အပြန်အလှန် ထိုးနှက်ချက်များကြောင့် ကျယ်လောင်သော ရိုက်ခတ်သံများမှာလည်း ဆက်တိုက် ထွက်ပေါ်နေသည်။

တစ်ခါတစ်ရံတွင် နှစ်ဦးစလုံးသည် သူတို့၏ ထူးခြားစွမ်းရည်များကို တိုက်ပွဲတွင် အသုံးပြုကြသည်။ တစ်ဦးက မီးလုံးများဖြင့် ပစ်ခတ်တိုက်ခိုက်နေချိန်တွင် အခြားတစ်ဦးမှာမူ လျှပ်စီးကဲ့သို့ မြန်ဆန်သော အရှိန်ကို အသုံးပြု၍ စဉ်ဆက်မပြတ် ရှောင်တိမ်းရင်း တန်ပြန်တိုက်စစ်ဆင်ရန် အခွင့်အရေးကို ရှာဖွေနေသည်။

စင်မြင့်၏ အစွန်းတွင်မူ တတိယအဆင့် ဆင့်ကဲပြောင်းလဲသူ တစ်ဦးက နှစ်ဖက်စလုံး၏ လှုပ်ရှားမှုများကို စောင့်ကြည့်နေပြီး လိုအပ်ပါက အချိန်မရွေး ဝင်ရောက်ထိန်းသိမ်းရန် အသင့်ရှိနေသည်။

စင်မြင့်အောက်ခြေတွင်မူ ကြည့်ရှုသူများက ဝန်းရံလျက်ရှိပြီး တိုက်ပွဲ အရှိန်တက်လာသည့်အခါတိုင်း စိတ်လှုပ်ရှားစွာဖြင့် အားပေးကြွေးကြော်နေကြသည်။

စင်မြင့်နှင့် မီတာရာဂဏန်းခန့် အကွာအဝေးရှိ တိတ်ဆိတ်ငြိမ်သက်သော ကုန်းမြင့်တစ်ခုပေါ်

တွင် ကျောက်လင်းသည် ကုလားထိုင်တစ်လုံး၌ ထိုင်နေသည်။ သူမ၏ မျက်နှာမှာ တည်ကြည်လေးနက်နေပြီး အောက်ခြေမှ တိုက်ပွဲကို စူးစိုက်ကြည့်နေသည်။

ကျောက်လင်း၏ ဘေးတစ်ဖက်တစ်ချက်တွင် ယွီဟွာဂိုဏ်းမှ အစွမ်းထက်သော ဆင့်ကဲပြောင်းလဲသူ အများအပြား ရပ်နေကြသည်။

ဤဂိုဏ်းသားအားလုံးသည် ကျောက်လင်းကို ကြည့်လိုက်တိုင်း အလွန်ပင် ရိုသေလေးစားသော အမူအရာများ ပြသကြသည်။

ယွီဟွာဂိုဏ်း၏ ဂိုဏ်းချုပ်အဖြစ် အောင်မြင်စွာ တက်လှမ်းနိုင်ခဲ့ပြီးနောက် ကျောက်လင်းသည် နောင်တစ်ချိန် လူသားအာဏာပိုင်များ၏ မြို့တော်စခန်းသို့ ဝင်ရောက်ပူးပေါင်းသည့်အခါ ပိုမိုမြင့်မားသော အခြေအနေမှ စတင်နိုင်ရန်အတွက် ယွီဟွာဂိုဏ်း တိုးတက်လာစေရန် အစွမ်းကုန် ကြိုးပမ်းအားထုတ်နေခဲ့သည်။

မည်သို့ပင်ဆိုစေကာမူ လက်ရှိအချိန်၌ ယွီဟွာဂိုဏ်းသည် အင်အားစုအငယ်စားမျှသာ ဖြစ်သဖြင့် အာဏာပိုင်တို့၏ အထူးတလည် အာရုံစိုက်ခြင်းကို ခံရလောက်သည့်အထိ အရေးပါခြင်း မရှိသေးချေ။ ထို့ကြောင့် ကျောက်လင်း၏ ပထမဆုံးသော ရည်မှန်းချက်မှာ ယွီဟွာဂိုဏ်းကို ယွီဟွာမြို့တော်၏ အကြီးမားဆုံးသော ဆင့်ကဲပြောင်းလဲသူများအဖွဲ့အစည်း ဖြစ်လာစေရန်ပင်။

မကြာမီအချိန်အတွင်းမှာပင် ကျောက်လင်းသည် သူမ၏ ညီအစ်ကိုများကို ဦးဆောင်၍ အခြားသောအဖွဲ့အစည်းများကို တိုက်ခိုက်သိမ်းပိုက်ခြင်း၊ ဆင့်ကဲပြောင်းလဲသူများကို စည်းရုံးသိမ်းသွင်းခြင်းတို့ကို အင်တိုက်အားတိုက် ဆောင်ရွက်ခဲ့သည်။ စတုတ္ထအဆင့် ဆင့်ကဲပြောင်းလဲသူတစ်ဦး ဖြစ်လာပြီးနောက် သေဘေးကိုမမှုဘဲ ရူးသွပ်သူတစ်ဦးကဲ့သို့ တိုက်ခိုက်တတ်သော ကျောက်လင်း၏ အမည်နာမသည် ယွီဟွာဂိုဏ်းနှင့်အတူ မြို့တစ်ခွင်၌ လျင်မြန်စွာ ကျော်ကြားလာခဲ့သည်။

နောင်ပိုင်းတွင်မူ ယွီဟွာဂိုဏ်းကို ဆန့်ကျင်လိုသည့် မည်သည့်အဖွဲ့အစည်းမဆို ကျောက်လင်း၏ အမည်ကို ကြားလိုက်ရုံမျှဖြင့် တိုက်ခိုက်လိုစိတ်များ လျော့ပါးသွားရသည့်အထိ သြဇာကြီးမားလာခဲ့သည်။ ကျောက်လင်း၏ ဦးဆောင်မှုဖြင့် ရရှိခဲ့သော အောင်ပွဲများကြောင့် ဂိုဏ်းသားအားလုံးက သူမကို သူတို့၏ ခေါင်းဆောင်အဖြစ် အလွန်အမင်း ရိုသေကိုးကွယ်ပြီး ကြည်ညိုကြသည်။

ယခုအချိန်၌ ယွီဟွာဂိုဏ်းသည် အဖွဲ့ဝင်သစ်များကို စုဆောင်းလျက်ရှိသည်။ စင်မြင့်ထက်တွင် ဂိုဏ်းသားများနှင့် ယှဉ်ပြိုင်ထိုးသတ်စဉ် ကျောက်လင်း သဘောကျလောက်သည့် အရည်အချင်းကို ပြသနိုင်ပါက ယွီဟွာဂိုဏ်းသို့ ဝင်ရောက်ခွင့် ရရှိမည်ဖြစ်သည်။ ငါးမိနစ်တိတိ ကြာမြင့်သွားသည့်တိုင် စင်မြင့်ထက်မှ ဆင့်ကဲပြောင်းလဲသူ နှစ်ဦးမှာ အပြန်အလှန် ထိုးနှက်နေကြပြီး အနိုင်အရှုံး မပေါ်နိုင်သေးပေ။

သတ်မှတ်ထားသော ယှဉ်ပြိုင်ချိန် ကုန်ဆုံးသွားပြီဖြစ်၍ နှစ်ဦးစလုံးက တစ်ပြိုင်နက်တည်း ရပ်တန့်လိုက်ကြပြီး စင်မြင့်၏ တစ်ဖက်တစ်ချက်စီတွင် နေရာယူလိုက်ကြသည်။ ဤအချိန်၌ စင်ပေါ်ရှိလူများရော ပရိသတ်များပါ အားလုံး၏ အကြည့်တို့သည် ကျောက်လင်းထံသို့သာ ရောက်ရှိနေကြပြီး သူမ၏ ဆုံးဖြတ်ချက်ကို စောင့်ဆိုင်းနေကြသည်။

"ဂိုဏ်းချုပ်... ဘယ်လိုသဘောရပါသလဲ..."

ကျောက်လင်း၏ ဘေးရှိ ဆင့်ကဲပြောင်းလဲသူတစ်ဦးက တိုးတိုးလေး မေးမြန်းလိုက်သည်။ ကျောက်လင်းက ဘာမှ ပြန်လည်ပြောဆိုခြင်း မပြုဘဲ ခေါင်းကိုသာ အနည်းငယ် ညိတ်ပြလိုက်သည်။ ယွီဟွာဂိုဏ်းသို့ ဝင်ရောက်လိုသော ဒုတိယအဆင့် ဆင့်ကဲပြောင်းလဲသူသည် လက်တွေ့တိုက်ခိုက်နိုင်စွမ်းကို လုံလုံလောက်လောက် ပြသနိုင်ခဲ့သဖြင့် ဂိုဏ်းဝင်ဖြစ်ရန် သတ်မှတ်ချက်များနှင့် အပြည့်အဝ ကိုက်ညီနေသောကြောင့်ပင်။

အဖြေကို ရရှိသွားသော ဂိုဏ်းသားသည် ချက်ချင်းပင် မတ်မတ်ရပ် ခေါင်းမော့လိုက်ပြီး အသံကျယ်ကျယ်ဖြင့် ကြေညာလိုက်တော့သည်။

“ဆင့်ကဲပြောင်းလဲသူ ကျိုးယွီက စမ်းသပ်မှုကို အောင်မြင်စွာ ဖြတ်ကျော်နိုင်ခဲ့ပြီး ဒီနေ့ကစလို့ ငါတို့ရဲ့ ညီအစ်ကိုတစ်ယောက် ဖြစ်လာပြီလို့ ငါ ကြေညာလိုက်တယ်”

ချက်ချင်းပင် အောက်ခြေရှိ ဂိုဏ်းသားများထံမှ အောင်ပွဲခံကြွေးကြော်သံများ ထွက်ပေါ်လာပြီး စင်မြင့်ထက်တွင်မူ ယွီဟွာဂိုဏ်းသို့ ဝင်ရောက်ရန် ကြိုးပမ်းခဲ့သည့် ဆင့်ကဲပြောင်းလဲသူ ကျိုးယွီမှာ ရင်ခုန်စိတ်လှုပ်ရှားမှုကြောင့် မျက်နှာတစ်ခုလုံး နီရဲနေကာ ဘေးသို့ ခေါ်ဆောင်သွားခြင်း ခံလိုက်ရသည်။

"ကဲ... နောက်တစ်ယောက်"

ထို့နောက် နောက်ထပ် ဆင့်ကဲပြောင်းလဲသူတစ်ဦးသည် စမ်းသပ်မှုခံယူရန် စင်မြင့်ထက်သို့ တက်လှမ်းလာခဲ့သည်။

ကျောက်လင်းကမူ ကုန်းမြင့်ပေါ်တွင် တိတ်ဆိတ်စွာ ထိုင်နေရင်း စောင့်ကြည့်နေဆဲပင်။

ယွီဟွာဂိုဏ်းကို ပိုမိုဖွံ့ဖြိုးတိုးတက်ပြီး အင်အားတောင့်တင်းလာစေရန်အတွက် အရည်အချင်းရှိသော ဆင့်ကဲပြောင်းလဲသူများမှာ မရှိမဖြစ် လိုအပ်သည်။

လက်ရှိတွင် သူမ၏ အရေးကြီးဆုံး တာဝန်မှာ ယွီဟွာမြို့တော် ဧရိယာအတွင်းရှိ အလားအလာရှိသော ဆင့်ကဲပြောင်းလဲသူ အားလုံးကို ယွီဟွာဂိုဏ်းအတွင်းသို့ စည်းရုံးသိမ်းသွင်းရန်ပင်။

၎င်းကို အောင်မြင်စွာ လုပ်ဆောင်ပြီးသည်နှင့် သူမသည် ယွီဟွာမြို့ ပတ်ဝန်းကျင်ရှိ အိမ်နီးချင်းမြို့များသို့ အာရုံစိုက်ကာ ထိုနေရာရှိ အလားအလာရှိသော ဆင့်ကဲပြောင်းလဲသူများကိုလည်း ထပ်မံခေါ်ယူမည်ဖြစ်သည်။

အချိန်တစ်ခုပေးလိုက်မည်ဆိုပါက ယွီဟွာဂိုဏ်းသည် ပိုမိုတောင့်တင်းခိုင်မာလာပြီး နောက်ဆုံးတွင် ကျင်းပြည်နယ်၌ အင်အားအကြီးဆုံး ဆင့်ကဲပြောင်းလဲသူများအဖွဲ့အစည်း ဖြစ်လာမည်ဟု ကျောက်လင်း ယုံကြည်နေသည်။ ထိုသို့ဖြစ်လာပါက လူသားအာဏာပိုင်များ၏ အမြင်တွင် သူမ၏ တန်ဖိုးမှာ သိသိသာသာ မြင့်တက်လာမည်ဖြစ်ပြီး အစိုးရအဆင့်အတန်းအတွင်းသို့ ဝင်ရောက်ရန် လမ်းစရရှိပေလိမ့်မည်...

ကျောက်လင်းတစ်ယောက် အတွေးနယ်ချဲ့နေစဉ်မှာပင် ဂိုဏ်းသားတစ်ဦးသည် ကုန်းမြင့်ပေါ်သို့ အလောတကြီး ပြေးတက်လာခဲ့သည်။

"ဂိုဏ်းချုပ်... အရေးကြီးတဲ့ အဖြစ်အပျက်တစ်ခု ဖြစ်ပွားနေပါပြီ"

ထိုဆင့်ကဲပြောင်းလဲသူ ဂိုဏ်းသားမှာ အမောတကောဖြင့် ကျောက်လင်းအနားသို့ ပြေးလာပြီး အရေးတကြီး ပြောဆိုလိုက်သည်။

"ဘာတွေ ဒီလောက်တောင် ပျာယာခတ်နေရတာလဲ။ တခြားအင်အားစုတစ်ခုခုက ငါတို့ ယွီဟွာဂိုဏ်းကို တိုက်ခိုက်ရဲလို့လား"

"စိတ်ကို အရင်အေးအေးထားပြီးမှ ရှင်းရှင်းလင်းလင်း ပြောစမ်း"

ကျောက်လင်းသည် အတွေးကမ္ဘာထဲမှ သတိပြန်ဝင်လာပြီး မျက်မှောင်ကြုတ်လျက် ခပ်တိုတိုပင် ငေါက်လိုက်သည်။

"ဟုတ်ကဲ့... ဟုတ်ကဲ့ပါ ဂိုဏ်းချုပ်..."

ထိုဂိုဏ်းသားသည် ထိတ်လန့်သွားပြီးနောက် စိတ်ကို အမြန်ပြန်စုစည်းကာ အစီအစဉ်တကျ ရှင်းပြလိုက်သည်။

"ဂိုဏ်းချုပ်... အခုလေးတင် ကျွန်တော် တာဝန်ထမ်းဆောင်နေရင်းနဲ့ အဆင့်

၂ မျိုးရိုးဗီဇပြောင်း သားရဲတစ်ကောင်ရဲ့ ပါးစပ်ထဲကနေ အသက်ရှင်ကျန်ရစ်သူ အချို့ကို ကယ်တင်ခဲ့ပါတယ်"

"အဲဒီလူတွေက လီမြစ်မြို့တော်စခန်းကနေ ထွက်ပြေးလာကြတာပါ။

သူတို့ပြောပြချက်အရ လီမြစ်မြို့တော်စခန်းက ဇွန်ဘီဘုရင်ရဲ့ သိမ်းပိုက်ဖျက်ဆီးခြင်းကို ခံလိုက်ရပြီလို့ ပြောပါတယ်"

ဇွန်ဘီဘုရင်….လီမြစ်မြို့တော်စခန်း ကျဆုံးသွားပြီ…

ဤသတင်းကို ကြားလိုက်ရသည်နှင့် ကျောက်လင်း၏ တည်ငြိမ်လှသော မျက်နှာထက်တွင် အံ့ဩတုန်လှုပ်မှုများ ပြည့်နှက်သွားတော့သည်။

သူမ၏ တုံ့ပြန်မှုကို မြင်သောအခါ ထိုဂိုဏ်းသားက ဆက်လက်ပြောပြသည်။

"အသေးစိတ်ကိုတော့ အဲဒီလူတွေလည်း သိပ်မသိကြဘူး။ ဒါပေမဲ့ လီမြစ်မြို့တော်စခန်းက တစ်ခုခုနဲ့ ဇွန်ဘီဘုရင်ကို သွားရန်စမိပုံပဲ။ အဲဒါကြောင့် ဇွန်ဘီဘုရင်က ဇွန်ဘီရေလှိုင်းကို ဖန်တီးပြီး မြို့ကို တိုက်ခိုက်သိမ်းပိုက်လိုက်တာပဲ။

ဒါပေမဲ့ ထူးဆန်းတာတစ်ခုက အဲဒီဇွန်ဘီဘုရင်ရဲ့ လက်အောက်ခံ ဇွန်ဘီတွေက အသက်ရှင်ကျန်ရစ်သူတွေကို စိတ်မဝင်စားကြဘူးတဲ့။ လမ်းမှာ ပုခုံးချင်းတိုက်မိရင်တောင် ဂရုမစိုက်ဘဲ ဒီအတိုင်း လွှတ်ပေးလိုက်တယ်လို့ ပြောကြပါတယ်"

၎င်းကို ကြားလိုက်ရသောအခါ ကျောက်လင်းသည် မျက်မှောင်ကြုတ်လိုက်မိသည်။ ဤလုပ်ရပ်မှာ လုချွမ်းဖြစ်ရမည်ဟု သူမ သိလိုက်ပြီဖြစ်ပြီး သူမ ထွက်ခွာလာပြီးနောက်ပိုင်း ဤမျှအထိ အဖြစ်အပျက်များစွာ ဖြစ်ပျက်ခဲ့သည်ကို အံ့သြနေမိသည်။

လုချွမ်းအနေဖြင့် တစ်စုံတစ်ခုသော ဆုံးရှုံးမှု သို့မဟုတ် နာကျင်မှုမျိုး ကြုံတွေ့ခဲ့ရပုံပင်။ သို့မဟုတ်လျှင် သူ၏ စရိုက်အရ လူသားမြို့တော်စခန်းတစ်ခုကို ဖျက်ဆီးပစ်ရလောက်အောင်အထိ ဒေါသထွက်မည်မဟုတ်ပေ။

ကံကောင်းထောက်မစွာဖြင့် လုချွမ်းသည် ယခုတစ်ကြိမ်တွင် အစုလိုက်အပြုံလိုက် သတ်ဖြတ်

ခြင်းမျိုး မလုပ်ခဲ့ပေ။

သို့မဟုတ်ပါက သူမသည် ချီချီလေးတစ်ယောက် ထိခိုက်ဒဏ်ရာများ ရသွားသလားဟု စိုးရိမ်မိသွားသည်။

ရုတ်တရက် ကျောက်လင်းသည် ချစ်စရာကောင်းသော ချီချီလေးကို သတိရသွားပြီး စိုးရိမ်ပူပန်သော အမူအရာ ပေါ်လာခဲ့သည်။

သို့သော် ပြန်လည်စဉ်းစားကြည့်သောအခါ ချီချီလေး၏ စွမ်းရည်မှာ သူမထက်ပင် သာလွန်နေသေးရာ တစ်စုံတစ်ရာ ထိခိုက်ရန်မှာ အလွန်ခဲယဉ်းကြောင်း သိလိုက်သဖြင့် စိတ်အေးသွားခဲ့သည်။

"ဟူး..."

နောက်ဆုံးတွင် ကျောက်လင်းသည် ခါးသီးစွာ ပြုံးလျက် သက်ပြင်းချကာ ခေါင်းခါယမ်းလိုက်မိသည်။

ဘာဖြစ်လို့များ လုချွမ်းကို သွားပြီး ရန်စမိကြတာလဲ။

သို့သော်လည်း လုချွမ်း၏ ယခုတစ်ကြိမ် မြို့ဖျက်သိမ်းပိုက်မှုက ကျောက်လင်းကို အရေးတကြီး လိုအပ်ချက်တစ်ခုအား ခံစားလိုက်ရစေသည်။

သူမ၏ စီမံကိန်းများကို အရှိန်မြှင့်တင်ရန် လိုအပ်နေပြီဖြစ်သည်။ မဟုတ်ပါက လုချွမ်းနှင့် လူသားမျိုးနွယ်တို့ကြားရှိ ပဋိပက္ခမှာ ပြေလည်အောင် ဖြေရှင်း၍မရနိုင်သော အခြေအနေသို့ ရောက်ရှိသွားပြီး နှစ်ဦးနှစ်ဖက်စလုံး နောက်ဆုတ်ရန် လမ်းစမရှိတော့ဘဲ ဖြစ်သွားပေလိမ့်မည်။

ထိုအချိန်ကျမှ သူမသည် လူသားမျိုးနွယ်၏ ခေါင်းဆောင်တစ်ဦး ဖြစ်လာခဲ့လျှင်ပင် ဤအခြေအနေကို ကြားဝင်စေ့စပ်ပေးရန်မှာ မဖြစ်နိုင်လောက်အောင် ခက်ခဲသွားပေလိမ့်မည်။