အခန်း (၃၁၅-၃၁၆)

အခန်း (၃၁၅) အမွေအနှစ်ကို သိမ်းပိုက်ခြင်း

မုန့်ဝမ်သည် စစ်မှန်သော မိစ္ဆာနတ်ဘုရားတစ်ပါးကဲ့သို့ပင် သူမ၏ တစ်ကိုယ်လုံးမှ ကြောက်မက်ဖွယ် မိစ္ဆာမီးလျှံများ ဖြာထွက်နေပြီး၊ သူ၏ရှေ့မှ မိစ္ဆာဝိညာဉ် ခုနစ်ခုကို လျစ်လျူရှုထားလိုက်သည်။

ခွေးခေါင်းနှင့် မိစ္ဆာဝိညာဉ်သည် ရူးသွပ်စွာ ဟောင်လိုက်ပြီးနောက် ရှေ့သို့ ခုန်အုပ်လာကာ၊ ၎င်း၏ ထက်မြက်သော သွားများဖြင့် မုန့်ဝမ်၏ ချပ်ဝတ်ဆင်ထားသော ပုခုံးကို ကိုက်ခဲလိုက်ရာ မီးပွင့်များ လွင့်စင်သွားသည်။

မုန့်ဝမ်သည် အခြားတစ်ဖက်သော လက်ဖြင့် ၎င်း၏ ဦးခေါင်းခွံကို ဖမ်းဆုပ်လိုက်သည်။ အရိုးသံကြိုးသည် ခွေးသွားများကြားရှိ အက်ကြောင်းများမှတစ်ဆင့် မိစ္ဆာဝိညာဉ်၏ ခန္ဓာကိုယ်အတွင်းသို့ တိုးဝင်သွားပြီး၊ ခွေးခေါင်းမိစ္ဆာဝိညာဉ်အတွင်း၌ ရစ်ပတ်မွှေနှောက်နေသည့် သွေးနီရောင် ချည်မျှင်တန်းများအဖြစ် ပြောင်းလဲသွားသည်။

သူမသည် လက်ချောင်းများကို ကျစ်ကျစ်ပါအောင် ဆုပ်လိုက်ရာ၊ ခွေးခေါင်းမိစ္ဆာဝိညာဉ်မှာ နာကျင်စွာ အော်ဟစ်ရင်း အလင်းစက်များအဖြစ် ပေါက်ကွဲသွားတော့သည်။

“မင်းတို့က ခေတ်နောက်ကျနေတဲ့ စည်းမျဉ်းတွေကိုပဲ ဖက်တွယ်နေကြတာ၊ ငါကတော့ ငါပိုင်ဆိုင်တဲ့ စွမ်းအားကိုပဲ ယုံကြည်တယ်........”

ခွေးခေါင်းမိစ္ဆာဝိညာဉ် ပိုင်ဆိုင်သော ကြေးဝါဆီမီးခွက်မှာ “ဘုန်း” ဟူသော အသံနှင့်အတူ အပိုင်းပိုင်း ပြတ်တောက်သွားပြီး၊ ‘ခွေး’ ၏ အမွေအနှစ်သည် မုန့်ဝမ်၏ မျက်ခုံးအလယ်သို့ ပျံဝင်သွားသည်။

မုန့်ဝမ်သည် နက်မှောင်လှသော ချပ်ဝတ်တန်ဆာအတွင်း၌ ဖုံးကွယ်နေပြီး၊ သူမ၏ မျက်လုံးများမှာ အေးစက်ရက်စက်နေသော်လည်း နှုတ်ခမ်းထောင့်တွင်မူ သွေးဆာနေသော အပြုံးတစ်ခု ချိတ်ဆွဲထားသည်။

“လာစမ်းပါ၊ မင်းတို့လို ရှေးဟောင်းမိစ္ဆာဝိညာဉ်တွေ ဘာတွေ တတ်နိုင်သေးလဲဆိုတာ ငါကြည့်ချင်သေးတယ်........”

သူမသည် ခပ်တိုးတိုး အော်ဟစ်လိုက်ပြီး သူမ၏ ပုံရိပ်မှာ ရုတ်တရက် မြင့်တက်သွားကာ ကျန်ရှိနေသော မိစ္ဆာဝိညာဉ်များဆီသို့ တိုးဝင်သွားသည်။

မြွေခေါင်းမိစ္ဆာဝိညာဉ် မှုတ်ထုတ်လိုက်သော အဆိပ်မြူများမှာ သူမ၏ ပတ်ပတ်လည်၌ ဝဲလည်နေသော်လည်း၊ သူမ၏ ချပ်ဝတ်တန်ဆာကို အနည်းငယ်မျှပင် ထိုးဖောက်နိုင်ခြင်း မရှိပေ။

မုန့်ဝမ်သည် နှာခေါင်းရှုံ့လိုက်ပြီး အရိုးသံကြိုးကို ရုတ်တရက် ဝေ့ယမ်းလိုက်ရာ၊ ထက်မြက်သော ဓားချက်တစ်ခုကဲ့သို့ မြွေခေါင်းမိစ္ဆာဝိညာဉ်၏ အရေးပါသော ‘ခုနစ်လက်မ’ နေရာကို ထိုးစိုက်လိုက်သည်။(မြွေမှာဆို ဦးခေါင်းနောက်က ၇ လက်မမြောက်နေရာက အဓိက အားနည်းချက်လို့ ပြောချင်တာပါ)

မြွေခေါင်းမိစ္ဆာဝိညာဉ်သည် စူးရှစွာ အော်ဟစ်လိုက်ပြီး ၎င်း၏ ဝိညာဉ်မှာ ချက်ချင်းပင် အလင်းစက်များအဖြစ် ပေါက်ကွဲပျက်စီးသွားကာ မုန့်ဝမ်၏ ခန္ဓာကိုယ်အတွင်းသို့ စီးဝင်သွားသည်။

ဆဋ္ဌမမြောက် ကြေးဝါဆီမီးခွက်မှာလည်း ပေါက်ကွဲသွားပြီး၊ ၎င်း၏ မီးစာမှာ အလင်းတန်းတစ်ခုအဖြစ် ပြောင်းလဲကာ မုန့်ဝမ်၏ မျက်ခုံးအတွင်းသို့ ပျံဝင်သွားသည်။

သူမ၏ စိတ်ထဲတွင် နောက်ထပ် တာအိုတစ်ခုဖြစ်သည့် ‘မြွေ’ ၏ အမွေအနှစ် ပေါ်လာပြန်ပြီ ဖြစ်သည်။

မြင်းခေါင်းမိစ္ဆာဝိညာဉ်၏ သံခွာချက်များမှာ လေထုကို ထုရိုက်နေပြီး ပုံရိပ်ယောင် ကိုးခုမှာ တစ်ခုနှင့်တစ်ခု ထပ်နေကာ ၎င်း၏ စွမ်းအားမှာ အံ့ဩဖွယ်ကောင်းလှသည်။

မုန့်ဝမ်သည် ရှောင်တိမ်းခြင်း မပြုဘဲ လက်နှစ်ဖက်ကို ရုတ်တရက် ရိုက်လိုက်ရာ၊ သွေးနီရောင် အရိုးသံကြိုးမှာ ကြီးမားသော ကွန်ရက်တစ်ခုအဖြစ် ရက်လုပ်သွားပြီး မြင်းခေါင်းမိစ္ဆာဝိညာဉ်ကို တင်းကြပ်စွာ ဖမ်းချုပ်ထားလိုက်သည်။

အားဖြင့် တစ်ချက် ဆွဲလိုက်ရာ အရိုးသံကြိုးမှာ ရုတ်တရက် တင်းကြပ်သွားပြီး မြင်းခေါင်းမိစ္ဆာဝိညာဉ်ကို ဆွဲဖြဲပစ်လိုက်ရာ ၎င်းမှာ အလင်းစက်များအဖြစ် ပျောက်ကွယ်သွားသည်။

သတ္တမမြောက် ကြေးဝါဆီမီးခွက်မှာ ပေါက်ကွဲသွားပြီး၊ နောက်ထပ် တာအိုတစ်ခုဖြစ်သည့် ‘မြင်း’ ၏ အမွေအနှစ် သူမ၏ စိတ်ထဲတွင် ပေါ်လာပြန်သည်။

မိစ္ဆာဝိညာဉ်၏ ဝိညာဉ်နှိမ်နင်းခေါင်းလောင်းသံမှာ နောက်တစ်ကြိမ် မြည်ဟည်းလာပြန်ရာ မုန့်ဝမ်၏ ကိုယ်တွင်းအင်္ဂါများမှာ အနည်းငယ် နာကျင်လာသည်။

သူမသည် အေးစက်စွာ နှာခေါင်းရှုံ့လိုက်ရာ သူမ၏ ကိုယ်တွင်းရှိ သွေးမိစ္ဆာ နက်နဲသော ဝိညာဉ် က ရုတ်တရက် မျက်လုံးများကို ဖွင့်လိုက်သည်။ ပြင်းထန်သော မိစ္ဆာစွမ်းအင်တစ်ခု သူမ၏ ခန္ဓာကိုယ်မှ ပေါက်ကွဲထွက်လာပြီး ခေါင်းလောင်းသံကို ချက်ချင်းပင် ချေဖျက်ပစ်လိုက်သည်။

မုန့်ဝမ်သည် တစ်ချက် လှုပ်ရှားလိုက်ပြီး သိုးခေါင်းနှင့် မိစ္ဆာဝိညာဉ်၏ နောက်ကျောတွင် ပေါ်လာခဲ့သည်။ သူမ၏ လက်ချောင်းငါးချောင်းမှာ ချိတ်များကဲ့သို့ပင် ၎င်း၏ ဝိညာဉ်အတွင်းသို့ တိုက်ရိုက် ထိုးစိုက်လိုက်သည်။

“ပြီးသွားပြီ........”

သူမက အေးစက်စွာ ပြောလိုက်ပြီး လက်ချောင်းငါးချောင်းကို ရုတ်တရက် ဆုပ်လိုက်ရာ သိုးခေါင်းမိစ္ဆာဝိညာဉ်မှာ ပေါက်ကွဲသွားတော့သည်။

အဋ္ဌမမြောက် ကြေးဝါဆီမီးခွက်မှာ ပေါက်ကွဲသွားပြီး ၎င်း၏ မီးစာမှာ အလင်းတန်းတစ်ခုအဖြစ် ပြောင်းလဲကာ မုန့်ဝမ်၏ ခန္ဓာကိုယ်အတွင်းသို့ စီးဝင်သွားသည်။

နောက်ဆုံးတော့ ငါ့ရဲ့ ‘သိုး’ အမွေအနှစ်ကို ရရှိခဲ့ပြီ........

ဤအချိန်တွင် မိစ္ဆာနတ်ဘုရား စစ်သူကြီးဆယ့်နှစ်ပါး၏ အမွေအနှစ်ထဲမှ တာအို ရှစ်ခုကို သူမ ရရှိထားပြီ ဖြစ်သည်။

ကျန်ရှိနေသော မျောက်ခေါင်း၊ ကြက်ခေါင်းနှင့် ဝက်ခေါင်း မိစ္ဆာဝိညာဉ်များမှာ မုန့်ဝမ်၏ ရက်စက်မှုကို မြင်လိုက်ရသောအခါ ကြောက်ရွံ့သော မျက်နှာထားများဖြင့် အရပ်ရပ်သို့ ထွက်ပြေးကြသည်။

သို့သော် မုန့်ဝမ်သည် သူတို့ကို ထွက်ပြေးရန် အခွင့်အရေး ပေးပါမည်လော........

“ထွက်ပြေးချင်တာလား........ နောက်ကျသွားပြီ........”

သူမသည် သွေးရိပ်ခြေလှမ်းကို နင်းလိုက်ရာ သူမ၏ ပုံရိပ်မှာ ယဇ်ပလ္လင်ပေါ်တွင် တစ္ဆေတစ်ကောင်ကဲ့သို့ လှုပ်ရှားသွားပြီး မျောက်ခေါင်းမိစ္ဆာဝိညာဉ်ကို ချက်ချင်းပင် မှီသွားသည်။ အရိုးသံကြိုးမှာ အဆိပ်ရှိသော မြွေတစ်ကောင်ကဲ့သို့ ၎င်းကို ရစ်ပတ်လိုက်ပြီး ဝိညာဉ်ကို ဆွဲဖြဲပစ်လိုက်သည်။

နဝမမြောက် ကြေးဝါဆီမီးခွက်မှာ ပေါက်ကွဲသွားပြီး ‘မျောက်’ ၏ အမွေအနှစ်ကို ရရှိခဲ့သည်။

ကြက်ခေါင်းမိစ္ဆာဝိညာဉ်သည် အရှိန်ဖြင့် ထွက်ပြေးရန် ကြိုးစားသော်လည်း မုန့်ဝမ်၏ ဖမ်းဆုပ်ခြင်းကို လွယ်လင့်တကူ ခံလိုက်ရပြီး ၎င်း၏ ဝိညာဉ်မှာ ဆွဲဖြဲခံလိုက်ရသည်။

ဝက်ခေါင်းမိစ္ဆာဝိညာဉ်သည် ပြန်လည် ခုခံရန် ကြိုးစားသော်လည်း မုန့်ဝမ်၏ အကြွင်းမဲ့ စွမ်းအားရှေ့တွင် ၎င်း၏ ခုခံမှုမှာ အလွန်ပင် အချည်းနှီး ဖြစ်နေသည်။

မုန့်ဝမ်သည် လက်ဝါးနှစ်ဖက်ကို ရိုက်လိုက်ရာ အရိုးသံကြိုးမှာ အသားကြိတ်စက်တစ်ခုကဲ့သို့ ဝက်ခေါင်းမိစ္ဆာဝိညာဉ်ကို ဝါးမျိုဖျက်ဆီးပစ်လိုက်သည်။

ဒွါဒသမမြောက်(ဆယ်နှစ်ခုမြောက်) ကြေးဝါဆီမီးခွက်မှာ “ဘုန်း” ဟူသော အသံနှင့်အတူ ပေါက်ကွဲသွားသည်။

ယခုအခါ မုန့်ဝမ်သည် မိစ္ဆာနတ်ဘုရား စစ်သူကြီးဆယ့်နှစ်ပါး၏ အမွေအနှစ်ထဲမှ တစ်ဆယ့်တစ်မျိုးကို ရရှိထားပြီဖြစ်ပြီး ‘နဂါး’ ၏ အမွေအနှစ် တစ်ခုသာ ကျန်ရှိတော့သည်။

မုန့်ဝမ်သည် မှောင်မည်းနေသော ပဉ္စမမြောက် ကြေးဝါဆီမီးခွက်ကို ကြည့်လိုက်ပြီး ရှေ့သို့ လှမ်းရန် ပြင်လိုက်သည်။

ထိုအခိုက်တွင် ပဉ္စမမြောက် ကြေးဝါဆီမီးခွက်မှာ ရုတ်တရက် စူးရှသော အလင်းတန်းများနှင့်အတူ ပေါက်ကွဲထွက်လာပြီး ကြီးမားသော နဂါးပုံသဏ္ဌာန် ပုံရိပ်ယောင်တစ်ခုသည် ဆီမီးခွက်အတွင်းမှ ကောင်းကင်သို့ ထိုးတက်သွားသည်။ နဂါး၏ ဟိန်းဟောက်သံက ကောင်းကင်ယံကို တုန်ခါသွားစေပြီး ယဇ်ပလ္လင်တစ်ခုလုံး ပြင်းထန်စွာ တုန်ခါသွားသည်။

“နဂါးအမွေအနှစ်........”

မုန့်ဝမ်၏ မျက်လုံးများတွင် ပြင်းပြသော ဆန္ဒများ လက်ခနဲ ပေါ်သွားသော်လည်း၊ ချက်ချင်းပင် တည်ငြိမ် လေးနက်သွားသည်။

ဤနဂါးပုံသဏ္ဌာန် ပုံရိပ်ယောင်၏ စွမ်းအားမှာ ယခင် မိစ္ဆာဝိညာဉ်များထက် များစွာ ပိုမို ကြီးမားကြောင်း သူမ ခံစားလိုက်ရသည်။

“လူသားမျိုးနွယ်၊ မင်းက ငါတို့ မိစ္ဆာသားရဲမျိုးနွယ်ရဲ့ သန့်ရှင်းတဲ့ ယဇ်ပလ္လင်ကို ညစ်ညမ်းအောင် လုပ်ရဲတယ်ပေါ့........ မင်း သေထိုက်တယ်........”

နဂါးပုံသဏ္ဌာန် ပုံရိပ်ယောင်သည် လူသားစကားဖြင့် ပြောလိုက်ရာ၊ ၎င်း၏ အသံမှာ မုန့်ဝမ်၏ နားထဲတွင် မိုးခြိမ်းသံကဲ့သို့ ဟိန်းထွက်သွားသည်။

မုန့်ဝမ်သည် နှာခေါင်းရှုံ့လိုက်ပြီး နဂါးပုံသဏ္ဌာန် ပုံရိပ်ယောင်၏ အကြည့်ကို မကြောက်မရွံ့ ရင်ဆိုင်လိုက်သည်။

“မင်းလို ဝိညာဉ်အကြွင်းအကျန်လေးက ငါ့ရှေ့မှာ ဘဝင်မြင့်ရဲတယ်ပေါ့........ ဒီနေ့ မင်းကို လုံးဝ ပျောက်ကွယ်သွားအောင် ငါလုပ်ပြမယ်........”

စကားမဆုံးသေးမီမှာပင် မုန့်ဝမ်၏ မိစ္ဆာစွမ်းအင်မှာ ပြန်လည် မြင့်တက်လာပြီး၊ သူမ၏ သွေးမိစ္ဆာ ကောင်းကင်ဘုံကျင့်စဉ်ကို အစွမ်းကုန် လှုံ့ဆော်လိုက်သည်။ သူမသည် မိစ္ဆာနတ်ဘုရားတစ်ပါးကဲ့သို့ပင် နဂါးပုံသဏ္ဌာန် ပုံရိပ်ယောင်ဆီသို့ တစ်ဟုန်ထိုး ပြေးဝင်သွားသည်။

နဂါးပုံသဏ္ဌာန် ပုံရိပ်ယောင်သည် ဟိန်းဟောက်လိုက်ပြီး၊ ၎င်း၏ နဂါးလက်သည်းများဖြင့် ဟင်းလင်းပြင်ကို ဆွဲဖြဲကာ မုန့်ဝမ်၏ ဦးခေါင်းပေါ်သို့ ခုတ်ချလိုက်သည်။

မုန့်ဝမ်သည် တစ်ချက် လှုပ်ရှားလိုက်ရုံဖြင့် နဂါးလက်သည်းကို ရှောင်လိုက်ပြီး၊ တစ်ပြိုင်နက်တည်းမှာပင် လက်ကွက်များကို ဖော်ဆောင်ကာ နဂါးပုံသဏ္ဌာန် ပုံရိပ်ယောင်ကို ရစ်ပတ်မည့် မရေမတွက်နိုင်သော သွေးနီရောင် ချည်မျှင်များကို ပစ်လွှတ်လိုက်သည်။

သို့သော် သွေးနီရောင် ချည်မျှင်များသည် နဂါးပုံသဏ္ဌာန် ပုံရိပ်ယောင်၏ အနီးသို့ ရောက်သည်နှင့် ချက်ချင်းပင် ပျက်စီးသွားကြသည်။

မုန့်ဝမ် မျက်မှောင်ကြုတ်လိုက်မိသည် ..... ဤနဂါးဝိညာဉ်မှာ တကယ့်ကို ကိုင်တွယ်ရ ခက်ခဲလှသည်။

သို့သော် သူမ နောက်မဆုတ်ဘဲ သူမ၏ တိုက်ခိုက်လိုစိတ်မှာ ပိုမို ပြင်းထန်လာသည်။

သူမသည် လက်နှစ်ဖက်ကို ရုတ်တရက် ဆုပ်လိုက်ရာ သူမ၏ ကိုယ်တွင်းရှိ မိစ္ဆာစွမ်းအင်များမှာ ရူးသွပ်စွာ မြင့်တက်လာပြီး၊ နဂါးပုံသဏ္ဌာန် ပုံရိပ်ယောင်ကို ပြင်းထန်စွာ ထိုးစိုက်မည့် သွေးနီရောင် လှံရှည်ကြီးတစ်ခုအဖြစ် ပြောင်းလဲသွားသည်။

“ဘုန်း..................”

သွေးနီရောင် လှံရှည်ကြီးသည် နဂါးပုံသဏ္ဌာန် ပုံရိပ်ယောင်၏ နဂါးလက်သည်းနှင့် ထိပ်တိုက် တွေ့ဆုံသွားရာ နားကွဲမတတ် အော်ဟစ်သံတစ်ခု ထွက်ပေါ်လာသည်။

ဤတိုက်ခိုက်မှုကြောင့် ယဇ်ပလ္လင်တစ်ခုလုံး ပြင်းထန်စွာ တုန်ခါသွားပြီး၊ နဂါးတိုင်ပေါ်ရှိ မိစ္ဆာအမြုတေများမှာ ကွဲကြေသွားကာ မရေမတွက်နိုင်သော အလင်းစက်များအဖြစ် ပြောင်းလဲသွားသည်။

မုန့်ဝမ်မှာ ပြန်ကန်ထွက်လာသော စွမ်းအားကြောင့် နောက်သို့ လွင့်ထွက်သွားပြီး သွေးတစ်လုပ် အန်လိုက်ရသည်။

သို့သော် သူမ၏ မျက်လုံးများတွင် ရူးသွပ်မှု အရိပ်အယောင်များ လက်ခနဲ ပေါ်လာပြီး “နောက်တစ်ခေါက်........” ဟု အော်ဟစ်လိုက်သည်။

သူမသည် ရှေ့သို့ ထပ်မံ ပြေးဝင်သွားပြီး နဂါးပုံသဏ္ဌာန် ပုံရိပ်ယောင်နှင့် ပြင်းထန်စွာ တိုက်ခိုက်တော့သည်။

တိုက်ခိုက်မှု တစ်ခုစီတိုင်းက ယဇ်ပလ္လင်တစ်ခုလုံးကို တုန်ခါသွားစေပြီး၊ အချိန်မရွေး ပြိုကျတော့မည့်အလား ထင်ရသည်။

နဂါးပုံသဏ္ဌာန် ပုံရိပ်ယောင်၏ တိုက်ကွက်တစ်ခုစီတိုင်းတွင် ကမ္ဘာပျက်စေနိုင်သော စွမ်းအားများ ပါဝင်နေသည်။

နဂါးလက်သည်းများက ဟင်းလင်းပြင်ကို ဆွဲဖြဲနေပြီး၊ နဂါးအမြီးက စစ်မြေပြင်ကို ဝေ့ယမ်းနေကာ၊ နဂါး၏ အသက်ရှူထုတ်မှု တစ်ခုစီတိုင်းတွင် ရေမှာ ဆူပွက်လာပြီး ကမ္ဘာလောကကြီး၏ အရောင်အဆင်းမှာ ပြောင်းလဲသွားသည်။

သို့သော် မုန့်ဝမ်မှာမူ ကြောက်ရွံ့ခြင်း အလျဉ်းမရှိပေ။ သူမ၏ ပုံရိပ်မှာ တစ္ဆေတစ်ကောင်ကဲ့သို့ပင် ဖြစ်ပြီး၊ သွေးရိပ်ခြေလှမ်းကို အစွမ်းကုန် အသုံးပြုကာ နဂါးပုံသဏ္ဌာန် ပုံရိပ်ယောင်၏ တိုက်ကွက်များကြားတွင် လွတ်လပ်စွာ လှုပ်ရှားနေသည်။

“လူသားမျိုးနွယ်၊ မင်းရဲ့ ရုန်းကန်မှုတွေက အချည်းနှီးပဲ........”

နဂါးပုံသဏ္ဌာန် ပုံရိပ်ယောင်သည် ဟိန်းဟောက်လိုက်ပြီး ၎င်း၏ နဂါးလက်သည်းဖြင့် မုန့်ဝမ်ကို ယဇ်ပလ္လင်ပေါ်သို့ တိုက်ရိုက် ရိုက်ချလိုက်သည်။

“ဘုန်း..................”

ယဇ်ပလ္လင်မှာ ကြီးမားသော ကျင်းကြီးတစ်ခုအဖြစ် ပျက်စီးသွားပြီး မုန့်ဝမ်၏ ပုံရိပ်မှာ ထိုကျင်းအတွင်း မြှုပ်နှံခြင်း ခံလိုက်ရသည်။

သို့သော် နောက်တစ်ခဏမှာပင် ထိုကျင်းနက်ကြီးအတွင်းမှ ကြီးမားသော မိစ္ဆာစွမ်းအင်တစ်ခု ရုတ်တရက် ပေါက်ကွဲထွက်လာပြီး၊ မုန့်ဝမ်၏ ပုံရိပ်သည် မိစ္ဆာစွမ်းအင်များ ဝန်းရံလျက် အနိုင်မရနိုင်သော မိစ္ဆာနတ်ဘုရားတစ်ပါးကဲ့သို့ ထိုကျင်းအတွင်းမှ ကောင်းကင်သို့ ပျံတက်လာသည်။

“မင်းမှာ ရှိတဲ့ ခွန်အားက ဒါအကုန်ပဲလား........ ထမင်းမစားလာဘူးလား........”

မုန့်ဝမ်က နှာခေါင်းရှုံ့လိုက်ပြီး လက်နှစ်ဖက်ကို ရုတ်တရက် ဆုပ်လိုက်သည်။ သူမ၏ ကိုယ်တွင်းမှ မိစ္ဆာစွမ်းအင်များမှာ နောက်တစ်ကြိမ် မြင့်တက်လာပြီး၊ ယခင်ကထက် အဆပေါင်းများစွာ ပိုမို ကြီးမားသော သွေးနီရောင် လှံရှည်ကြီးအဖြစ် ပြောင်းလဲကာ နဂါးပုံသဏ္ဌာန် ပုံရိပ်ယောင်ဆီသို့ အရှိန်အဟုန်ဖြင့် ပစ်လွှတ်လိုက်သည်။

“သေစမ်း........”

ဖျက်ဆီးအား ပြင်းထန်လှသော သွေးနီရောင် လှံရှည်ကြီးသည် နဂါးပုံသဏ္ဌာန် ပုံရိပ်ယောင်၏ ရင်ဘတ်ကို တိုက်ရိုက် ထိုးဖောက်သွားသည်။

နဂါးပုံသဏ္ဌာန် ပုံရိပ်ယောင်သည် စူးရှစွာ အော်ဟစ်လိုက်ပြီး၊ ၎င်း၏ နဂါးလက်သည်းများဖြင့် သွေးနီရောင် လှံရှည်ကြီးကို ရူးသွပ်စွာ ဆွဲဖြဲရန် ကြိုးစားသော်လည်း ၎င်းကို ဆွဲထုတ်နိုင်ခြင်း မရှိပေ။

“ပြီးသွားပြီ........”

မုန့်ဝမ်သည် အေးစက်စွာ ပြောလိုက်ပြီးနောက် သူမ၏ လက်သီးများကို ရုတ်တရက် ဆုပ်လိုက်သည်။

နဂါးဝိညာဉ်၏ ကိုယ်တွင်းသို့ နက်နက်ရှိုင်းရှိုင်း ထိုးစိုက်နေသော သွေးနီရောင် လှံရှည်ကြီးမှာ နားကွဲမတတ် အသံနှင့်အတူ ပေါက်ကွဲသွားပြီး၊ ပြင်းထန်သော မိစ္ဆာစွမ်းအင်များက နဂါးပုံသဏ္ဌာန် ပုံရိပ်ယောင်၏ ဝိညာဉ်ကို ဆွဲဖြဲဖျက်ဆီးပစ်လိုက်သည်။

“မဖြစ်နိုင်ဘူး..................”

နဂါးပုံသဏ္ဌာန် ပုံရိပ်ယောင်သည် နာကျည်းမှုများ ပြည့်နှက်နေသော ဟိန်းဟောက်သံကြီးကို ထုတ်လွှတ်လိုက်ပြီး၊ ၎င်း၏ ဝိညာဉ်ခန္ဓာကိုယ်မှာ ပေါက်ကွဲသွားကာ အလင်းစက် ပေါင်းများစွာအဖြစ် ပြောင်းလဲ၍ မုန့်ဝမ်၏ ခန္ဓာကိုယ်အတွင်းသို့ စီးဝင်သွားသည်။

နောက်ဆုံးတွင် မိစ္ဆာနတ်ဘုရား စစ်သူကြီးဆယ့်နှစ်ပါး၏ အမွေအနှစ် အားလုံးသည် မုန့်ဝမ်၏ လက်ထဲသို့ ရောက်ရှိသွားလေတော့သည်........

အခန်း (၃၁၆) လူသားခန္ဓာမှ မိစ္ဆာခန္ဓာသို့ ပြောင်းလဲကျင့်ကြံခြင်း

သို့သော် သူမသည် ယဇ်ပလ္လင်မှ ထွက်ခွာရန် ပြင်လိုက်စဉ်မှာပင် ယဇ်ပလ္လင်တစ်ခုလုံး ရုတ်တရက် ပြင်းထန်စွာ တုန်ခါလာတော့သည်။

အပေါ်ဘက်ရှိ ကြယ်တာရာမြေပုံမှာ စတင်ပုံပျက်လာပြီး ရေမှာလည်း ကြောက်မက်ဖွယ်ကောင်းသော အရာတစ်ခု နိုးထလာတော့မည့်အလား ဆူပွက်လာသည်။

“မကောင်းတော့ဘူး........”

မုန့်ဝမ်၏ ရင်ထဲတွင် တင်းကြပ်သွားပြီး တွေဝေမနေဘဲ သွေးရိပ်ခြေလှမ်း ကို အသုံးပြုကာ ယဇ်ပလ္လင်ပြင်ပသို့ အမြန်ဆုံး ပြေးထွက်လိုက်သည်။

သူမ ယဇ်ပလ္လင်ပြင်ပသို့ ရောက်ရှိသွားသည့် ခဏမှာပင် ယဇ်ပလ္လင်တစ်ခုလုံးသည် နားကွဲမတတ် ဟိန်းဟောက်သံနှင့်အတူ ပြိုကျသွားပြီး ကြီးမားသော အရိပ်မည်းကြီးတစ်ခု ရေထဲမှ ကောင်းကင်သို့ ထိုးတက်လာသည်။

မုန့်ဝမ် နောက်သို့ လှည့်ကြည့်လိုက်ရာ ရှည်လျားပြီး မှောင်မည်းသော ထိုပုံရိပ်ကြီးမှာ ကြီးမားသော အရိပ်တစ်ခုကို ဖြစ်ပေါ်စေသည်။

၎င်း၏ လှုပ်ရှားမှုများက ချောက်နက်တစ်ခုလုံးကို လှုပ်ခတ်သွားစေပြီး ကောင်းကင်နှင့် မြေပြင်ကို ဖြတ်သန်းထားသော ကြေးဝါသံကြိုး ကိုးချောင်းမှာလည်း တင်းကြပ်သွားသည်။

မုန့်ဝမ်သည် သူမ၏ ထိတ်လန့်မှုကို ဖိနှိပ်ထားပြီး သွေးရိပ်ခြေလှမ်း၏ အရှိန်ဖြင့် အန္တရာယ်ရှိသော ထိုနေရာမှ လျင်မြန်စွာ ထွက်ခွာခဲ့သည်။

မုန့်ဝမ်သည် ယဇ်ပလ္လင်မှ ပြေးထွက်လာကာ ခြေကုပ်ပင် မယူရသေးမီမှာပင် သူမကို ပစ်မှတ်ထားထားသော အစွမ်းထက် မိစ္ဆာစွမ်းအင်တစ်ခုကို ခံစားလိုက်ရသည်။

သူမ မော့ကြည့်လိုက်ရာ ဝိညာဉ်ပြောင်းလဲခြင်းအဆင့် အစောပိုင်းမှ အစွမ်းထက်သော မိစ္ဆာကျင့်ကြံသူ အချို့သည် သူမဆီသို့ ဒေါသနှင့် သတ်ဖြတ်လိုသော အရှိန်အဝါများ ပြည့်နှက်နေသော မျက်လုံးများဖြင့် တစ်ဟုန်ထိုး ပြေးလာကြသည်ကို တွေ့လိုက်ရသည်။

“လူသားမျိုးနွယ် ပုရွက်ဆိတ်လေး၊ ငါတို့ မိစ္ဆာသားရဲမျိုးနွယ်ကို ဖျက်ဆီးရဲတယ်ပေါ့........ ဒီအမွေအနှစ် နယ်မြေမှာပဲ ဒီနေ့ မင်းရဲ့ ဝိညာဉ်တွေ လွင့်စင်သွားအောင် ငါတို့ သေချာပေါက် လုပ်ပေးမယ်........”

မိစ္ဆာစစ်သူကြီး ဂျင်ကျားသည် ဟိန်းဟောက်လိုက်ပြီး သူ၏ လေးကြိုးကို ပစ်ချကာ ကြေးဝါလှံရှည်ကြီး တစ်စင်းကို ထုတ်ယူလိုက်သည်။ အေးစက်စွာ တောက်ပနေသော လှံသွားမှာ မုန့်ဝမ်၏ လည်ပင်းဆီသို့ တိုက်ရိုက် ဦးတည်ထားသည်။

မုန့်ဝမ်က နှာခေါင်းရှုံ့လိုက်ပြီး သူမ၏ မျက်လုံးများတွင် အထင်အမြင်သေးသော အရိပ်အယောင်တစ်ခု လက်ခနဲ ပေါ်သွားသည်။

အကယ်၍ သူမ ယခင်ကကဲ့သို့ ဒဏ်ရာရထားဆဲ ဖြစ်ပါက ဤဝိညာဉ်ပြောင်းလဲခြင်းအဆင့် မိစ္ဆာကျင့်ကြံသူများကို သတိထားရပေလိမ့်မည်။

သို့သော် ယခုအခါ သူမသည် ဒဏ်ရာများ ပျောက်ကင်းသွားရုံတင်မကဘဲ မိစ္ဆာနတ်ဘုရား စစ်သူကြီးဆယ့်နှစ်ပါး၏ မိစ္ဆာဝိညာဉ်များကိုပါ ဝါးမျိုထားသဖြင့် သူမ၏ စွမ်းအားမှာ သိသိသာသာ မြင့်တက်နေပြီ ဖြစ်သည်။

ဝိညာဉ်ပြောင်းလဲခြင်းအဆင့် အစောပိုင်း မိစ္ဆာကျင့်ကြံသူများသည် သူမ နောက်ဆုတ်ရလောက်အောင် မစွမ်းသာတော့ပေ။

“မင်းတို့လား........”

မုန့်ဝမ်သည် မထင်မဲ့မြင် ပြုံးလိုက်ပြီး သူမ၏ မိစ္ဆာစွမ်းအင်များမှာ ရုတ်တရက် ပေါက်ကွဲထွက်လာသည်။

နက်မှောင်လှသော ချပ်ဝတ်တန်ဆာက သူမ၏ တစ်ကိုယ်လုံးကို ဖုံးလွှမ်းသွားပြီး သွေးနီရောင် အရိုးသံကြိုးများမှာ ရက်စက်လှသော မြွေဟောက် တစ်ဆယ့်နှစ်ကောင်ကဲ့သို့ သူမ၏ ဘေးပတ်လည်တွင် ကခုန်နေကြသည်။

“သေချင်နေတာပဲ........”

ဒေါသထွက်သွားသော ဂျင်ကျား သည် သူ၏ ကြေးဝါလှံရှည်ကြီးဖြင့် ပြင်းထန်စွာ တိုက်ခိုက်လိုက်ရာ ဟင်းလင်းပြင် ကို ဆွဲဖြဲပြီး မုန့်ဝမ်၏ လည်ပင်းဆီသို့ တိုက်ရိုက် ဦးတည်လာသည်။

မုန့်ဝမ်သည် လျင်မြန်သော လှုပ်ရှားမှုဖြင့် ထိုတိုက်ကွက်ကို ရှောင်လိုက်ပြီး သွေးရိပ်ခြေလှမ်း၏ စွမ်းအားအပြည့်ကို ထုတ်ဖော်လိုက်သည်။

သူမသည် လျင်မြန်စွာ လှုပ်ရှားလိုက်ပြီး သွေးနီရောင် အရိုးသံကြိုးကို ဖမ်းဆုပ်လိုက်ရာ ၎င်းမှာ အဆိပ်ရှိသော မြွေတစ်ကောင်ကဲ့သို့ ကြေးဝါလှံရှည်ကို ရစ်ပတ်သွားပြီး တစ်ခဏချင်းမှာပင် မြဲမြံစွာ ချုပ်ကိုင်လိုက်သည်။

“ခွမ်း........”

အရိုးသံကြိုးမှာ ရုတ်တရက် တင်းကြပ်သွားပြီး ကြေးဝါလှံရှည်ကြီးမှာ လွင့်ထွက်သွားသည်။

ဂျင်ကျား မှာ ထိတ်လန့်သွားပြီး ဘာမှပင် မတုံ့ပြန်နိုင်မီမှာပင် မုန့်ဝမ်သည် သူ၏ နောက်ကျောတွင် ပေါ်လာခဲ့သည်။ သူမ၏ လက်ချောင်းငါးချောင်းမှာ ချိတ်များကဲ့သို့ပင် သူ၏ ကျောပြင်အတွင်းသို့ တိုက်ရိုက် ထိုးစိုက်လိုက်သည်။

“ဗြိ........”

သွေးများ လွင့်စင်သွားပြီး ဂျင်ကျား မှာ စူးရှစွာ အော်ဟစ်လိုက်ရသည်။ သူ၏ ခန္ဓာကိုယ်မှာ မိစ္ဆာစွမ်းအင်များ၏ တိုက်စားမှုကို ချက်ချင်း ခံလိုက်ရပြီး ခြောက်ကပ်နေသော အလောင်းတစ်ခုအဖြစ် ပြောင်းလဲသွားသည်။

“မုန်းစရာကောင်းလိုက်တာ........”

၎င်းကို မြင်လိုက်ရသော အခြား မိစ္ဆာကျင့်ကြံသူများမှာ ဒေါသထွက်သွားကြပြီး သူတို့၏ မှော်လက်နက် များကို ထုတ်ဖော်ကာ မုန့်ဝမ်ကို ရူးသွပ်စွာ ဝိုင်းဝန်း တိုက်ခိုက်ကြသည်။

မုန့်ဝမ်သည် နှာခေါင်းရှုံ့လိုက်ပြီး သူမ၏ ပုံရိပ်မှာ ထိုမိစ္ဆာကျင့်ကြံသူများကြားတွင် တစ္ဆေတစ်ကောင်ကဲ့သို့ လှုပ်ရှားနေသည်။

သွေးနီရောင် အရိုးသံကြိုးမှာ သေမင်း၏ တံစဉ်ကဲ့သို့ပင် ဖြစ်ပြီး ဝေ့ယမ်းလိုက်တိုင်း သွေးစက်များ လွင့်စင်လာသည်။

“အား........................”

မိစ္ဆာကျင့်ကြံသူ တစ်ဦးမှာ အရိုးသံကြိုးဖြင့် ရင်ဘတ်ကို ထိုးဖောက်ခံလိုက်ရပြီး သူ၏ ဝိညာဉ်မှာလည်း မိစ္ဆာစွမ်းအင်များ၏ ဝါးမျိုခြင်းကို ချက်ချင်း ခံလိုက်ရသည်။

အခြား မိစ္ဆာကျင့်ကြံသူ တစ်ဦးမှာမူ လက်သီးဖြင့် အထိုးခံရသဖြင့် ဦးခေါင်းခွံ ကြေမွသွားကာ လွင့်ထွက်သွားပြီး ချက်ချင်း သေဆုံးသွားသည်။

“ပြေးကြ........ ပြေးကြ........ နဂါးသင်္ချိုင်းချောက်နက် မှာ အပြောင်းအလဲတွေ ဖြစ်နေပြီ၊ ငါတို့ ဒီသတင်းကို အပြင်ရောက်အောင် ပေးမှဖြစ်မယ်........”

ကျန်ရှိနေသော မိစ္ဆာကျင့်ကြံသူများသည် နောက်ဆုံးတွင် မုန့်ဝမ်၏ ကြောက်မက်ဖွယ်ကောင်းမှုကို သဘောပေါက်သွားပြီး လှည့်ပြေးရန် ပြင်ကြသည်။

“ထွက်ပြေးချင်တာလား........ နောက်ကျသွားပြီ........”

မုန့်ဝမ်သည် အေးစက်စွာ နှာခေါင်းရှုံ့လိုက်ပြီး သွေးရိပ်ခြေလှမ်းကို နင်းကာ မိစ္ဆာကျင့်ကြံသူ တစ်ဦးကို ချက်ချင်း မှီသွားသည်။

သူမ တစ်ချက် ဖမ်းဆုပ်လိုက်ရာ သွေးနီရောင် အရိုးသံကြိုးမှာ အဆိပ်ရှိသော မြွေကဲ့သို့ ၎င်းကို ရစ်ပတ်ပြီး ဆွဲဖြဲပစ်လိုက်သည်။

နောက်ဆုံးကျန်နေသော မိစ္ဆာကျင့်ကြံသူမှာမူ အလွန်အမင်း ထိတ်လန့်သွားပြီး ထွက်ပြေးရန်အတွက် သူ၏ မိစ္ဆာစွမ်းအားများကို ရူးသွပ်စွာ လှုံ့ဆော်နေသည်။

သို့သော် မုန့်ဝမ်၏ အရှိန်မှာ သူ လိုက်မမီနိုင်သော အဆင့်တွင် ရှိနေသည်။

သူမသည် တစ်ချက် လှုပ်ရှားလိုက်ပြီး ထိုမိစ္ဆာကျင့်ကြံသူ၏ ရှေ့တွင် ပေါ်လာကာ သူမ၏ လက်ချောင်းငါးချောင်းမှာ ၎င်း၏ ထိပ်ပြောင်ပေါ်သို့ တိုက်ရိုက် ထိုးစိုက်လိုက်သည်။

“မလုပ်ပါနဲ့........................”

နောက်ဆုံး မိစ္ဆာကျင့်ကြံသူမှာ နာကျင်စွာ အော်ဟစ်လိုက်သော်လည်း နောက်ဆုံးတွင် သေခြင်းတရားမှ မလွတ်မြောက်နိုင်ခဲ့ပေ။

မုန့်ဝမ်သည် သူမ၏ လက်ကို ပြန်ရုပ်သိမ်းလိုက်ပြီး ပတ်ဝန်းကျင်ကို အေးစက်စွာ စစ်ဆေးလိုက်သည်။ မည်သည့် အန္တရာယ်မှ မရှိတော့ကြောင်း အတည်ပြုပြီးနောက် သွေးရိပ်ခြေလှမ်းကို နင်းကာ ထွက်ခွာသွားခဲ့သည်။

မုန့်ဝမ်သည် မိစ္ဆာသင်္ချိုင်း မှ တိုက်ရိုက် ထွက်မသွားဘဲ၊ လူသူမရှိသော နေရာတစ်ခုကို ရှာဖွေကာ အသစ်ရရှိထားသော တာအို ဆယ့်နှစ်မျိုး၏ အမွေအနှစ်များကို သေချာစွာ လေ့လာနေခဲ့သည်။

မုန့်ဝမ်တွင် မိစ္ဆာသားရဲမျိုးနွယ် သွေးမျိုးဆက် မရှိသဖြင့် မူလက မိစ္ဆာနတ်ဘုရား စစ်သူကြီး၏ အမွေအနှစ်ကို ဆက်ခံနိုင်စွမ်း မရှိပေ။

သို့သော် အမွေအနှစ် ဆယ့်နှစ်မျိုးလုံးကို စုဆောင်းပြီးနောက် သူမ၏ စိတ်ထဲတွင် အတွေးတစ်ခု ရုတ်တရက် ပေါ်လာသည် ........ မိစ္ဆာတွေက လူသားအသွင် ပြောင်းလဲနိုင်ရင် လူသားတွေကရော မိစ္ဆာအသွင် မပြောင်းလဲနိုင်ဘူးလား........

ထိုအတွေးမှာ မုန့်ဝမ်၏ စိတ်ထဲတွင် ပေါ်လာသည်နှင့် သူမ ကိုယ်သူမ မတားဆီးနိုင်တော့ပေ။

သူမသည် လူသားပုံသဏ္ဌာန်ဖြင့် ရှိနေစဉ်မှာပင် မိစ္ဆာခန္ဓာတစ်ခုကို ကျင့်ကြံရန် စီစဉ်လိုက်သည်........

မုန့်ဝမ်မှာ သနားစရာကောင်းသော နက်နဲသော ဝိညာဉ်အဆင့်ကျင့်ကြံခြင်းအဆင့်သာ ရှိသည်။ လူသားမျိုးနွယ်ဝင် တစ်ဦးအနေဖြင့် သူမသည် မိစ္ဆာသင်္ချိုင်းမှ ထွက်ခွာပြီး ကောင်းကင်မိစ္ဆာ နယ်မြေ အတွင်းသို့ မသွားရဲပေ။

အကယ်၍ သူမ အောင်မြင်ခဲ့လျှင် အမွေအနှစ် ဆယ့်နှစ်မျိုးလုံးကို အပြည့်အဝ ဆက်ခံနိုင်မည်ဖြစ်ပြီး ဤမိစ္ဆာပေါင်းစုံ သင်္ချိုင်းမှ ထွက်ခွာနိုင်မည် ဖြစ်သည်။

အကယ်၍ မအောင်မြင်ခဲ့လျှင်မူ အခြားနည်းလမ်းများကို စဉ်းစားရပေလိမ့်မည်။

မုန့်ဝမ်သည် ထိုအတွေးကို သူမ၏ စိတ်ထဲတွင် အကြိမ်ကြိမ် သေချာစွာ စဉ်းစားလိုက်သည်။ ထိုနည်းလမ်းမှာ တကယ့်ကို ဖြစ်နိုင်ခြေရှိကြောင်း အတည်ပြုပြီးနောက်၊ လူသားခန္ဓာကိုယ်ကို အသုံးပြုကာ မိစ္ဆာခန္ဓာတစ်ခုကို ပြောင်းပြန် ကျင့်ကြံရန် စတင် ကြိုးစားခဲ့သည်။

သူမသည် တင်ပျဉ်ခွေ ထိုင်လိုက်ရာ၊ သူမ၏ ခန္ဓာကိုယ်အတွင်းရှိ မိစ္ဆာစွမ်းအင်နှင့် အပြင်ဘက်ရှိ မိစ္ဆာစွမ်းအင် တို့မှာ တစ်ခုနှင့်တစ်ခု ရောယှက်သွားပြီး ထူးဆန်းသော အလင်းကွင်းတစ်ခု ဖြစ်ပေါ်လာသည်။

မိစ္ဆာနတ်ဘုရား စစ်သူကြီးဆယ့်နှစ်ပါး၏ အမွေအနှစ်များမှာ သူမ၏ ကိုယ်တွင်း၌ စီးဆင်းနေသည်။ အမွေအနှစ် တစ်ခုစီတွင် ကြီးမားသော စွမ်းအားများ ပါဝင်နေသော်လည်း ထိုစွမ်းအားများမှာ လူသားမျိုးနွယ်၏ သွေးမျိုးဆက် နှင့် ပေါင်းစပ်၍ မရနိုင်ပေ။

“လူသားခန္ဓာကိုယ်ကနေ မိစ္ဆာခန္ဓာကို ပြောင်းလဲကျင့်ကြံတာက လုံးဝ မဖြစ်နိုင်တဲ့ အရာတော့ မဟုတ်ဘူး........”

“မိစ္ဆာတွေကို အထောက်အကူပြုပစ္စည်း အဖြစ် အသုံးပြုပြီး၊ သားရဲတွေကို အခြေခံအဖြစ် ထားကာ၊ သွေးမျိုးဆက်ကို ပြန်လည် ပုံဖော်နိုင်မယ်ဆိုရင် မိစ္ဆာခန္ဓာကို ပြောင်းပြန် ကျင့်ကြံဖို့ ကြိုးစားလို့ ရနိုင်တယ်...”

မုန့်ဝမ်က တိုးတိုးလေး ရေရွတ်လိုက်သည်။

သူမသည် အသက်ကို ပြင်းပြင်းရှူလိုက်ပြီး လက်ကွက်တစ်ခုကို ဖော်ဆောင်ကာ အပြင်ဘက်ရှိ မိစ္ဆာစွမ်းအင်များကို သူမ၏ ခန္ဓာကိုယ်အတွင်းသို့ ဖြည်းဖြည်းချင်း လမ်းညွှန်ပေးလိုက်သည်။

အကယ်၍ ဤမြင်ကွင်းကို အပြင်လောကမှ လူများ မြင်တွေ့ခဲ့လျှင် မရေမတွက်နိုင်သော လူများမှာ သေချာပေါက် ထိတ်လန့်သွားကြပေလိမ့်မည်။

သာမန် နက်နဲသော ဝိညာဉ်အဆင့် ကျင့်ကြံသူတစ်ဦးက လူသားခန္ဓာကိုယ်ကို အသုံးပြုကာ မိစ္ဆာခန္ဓာတစ်ခုကို ပြောင်းပြန် ကျင့်ကြံရန် ကြိုးစားနေခြင်းပင်။

အကယ်၍ တစ်စုံတစ်ခု မှားယွင်းသွားခဲ့လျှင် အသက် ဆယ်ချောင်း ရှိလျှင်ပင် သူ့ကို ကယ်တင်နိုင်မည် မဟုတ်ပေ။

မိစ္ဆာစွမ်းအင် များ သူမ၏ ခန္ဓာကိုယ်အတွင်းသို့ ဝင်ရောက်လာသည်နှင့်အမျှ မုန့်ဝမ် မျက်မှောင်ကြုတ်လိုက်မိပြီး သူမ၏ နဖူးပေါ်တွင် ချွေးစက်လေးများ ပေါ်လာသည်။ ၎င်းမှာ သူမ ကြီးမားသော နာကျင်မှုကို ခံစားနေရကြောင်း ထင်ရှားနေသည်။

အခြေအနေများမှာ သူမ ထင်ထားသလောက် မလွယ်ကူလှပေ။

ပထမဆုံး ကြိုးပမ်းမှုတွင် သူမ၏ သွေးကြော များအတွင်းရှိ မိစ္ဆာစွမ်းအင် နှင့် မကောင်းဆိုးရွားစွမ်းအင်တို့မှာ ပြင်းထန်စွာ ထိပ်တိုက် တွေ့ဆုံသွားကြပြီး၊ သွေးကြောများကို ဆွဲဖြဲလုနီးပါး ဖြစ်သွားစေသည်။

မုန့်ဝမ်သည် ညည်းတွားလိုက်ပြီး သူမ၏ နှုတ်ခမ်းထောင့်မှ သွေးစက်လေးများ ကျလာသဖြင့် ခဏတာ ရပ်နားလိုက်ရသည်။

“မရဘူး၊ မိစ္ဆာစွမ်းအင် နဲ့ မကောင်းဆိုးဝါးစွမ်းအင် ပဋိပက္ခက အရမ်း ပြင်းထန်လွန်းတယ်၊ ဒါကို ရှောင်ရှားနိုင်မယ့် နည်းလမ်းကို ငါ ရှာရမယ်........”

သူမသည် အသက်ကို ပြင်းပြင်းရှူလိုက်ပြီး အသက်ရှူမှုကို ပြန်လည် ထိန်းညှိကာ ဒုတိယအကြိမ် စတင် ကြိုးစားခဲ့သည်။

ဤတစ်ကြိမ်တွင် သူမသည် သူမ၏ ခန္ဓာကိုယ်အတွင်းရှိ မိစ္ဆာစွမ်းအင်များကို ဖိနှိပ်ထားပြီး အပြင်ဘက်မှ မကောင်းဆိုးရွားစွမ်းအင်များကိုသာ ဖြည်းဖြည်းချင်း ဝင်ရောက်စေခဲ့သည်။

သို့သော် မိစ္ဆာစွမ်းအင်၏ ထိန်းချုပ်မှု မရှိသောကြောင့် မကောင်းဆိုးရွားစွမ်းအင်များမှာ သူမ၏ သွေးကြောများအတွင်းသို့ ရောက်ရှိသွားသည်နှင့် ရူးသွပ်နေသော မြင်းတစ်ကောင်ကဲ့သို့ ရမ်းကားနေတော့သည်။

မုန့်ဝမ်၏ သွေးကြောများမှာ နောက်ထပ် ပြင်းထန်သော ထိုးနှက်ချက်တစ်ခုကို ခံလိုက်ရပြန်သဖြင့် သူမ ထပ်မံ ရပ်နားလိုက်ရသည်။

“ဒါလည်း မရသေးဘူး...”

မုန့်ဝမ် မျက်မှောင်ကြုတ်လိုက်ပြီး သူမ၏ မျက်လုံးများတွင် စဉ်းစားနေသော အရိပ်အယောင်တစ်ခု လက်ခနဲ ပေါ်သွားသည်။

တတိယအကြိမ် ကြိုးပမ်းမှုတွင် မုန့်ဝမ်သည် သူမ၏ မဟာဗျူဟာကို ပြောင်းလဲလိုက်သည်။

မကောင်းဆိုးဝါးစွမ်းအင်များကို ဇွတ်အတင်း ဝင်ရောက်စေမည့်အစား၊ သူမသည် ပထမဦးစွာ မိစ္ဆာစွမ်းအင် ကို အသုံးပြုကာ သွေးကြောများအတွင်း၌ လမ်းကြောင်းတစ်ခုကို ဖန်တီးလိုက်ပြီးနောက်မှ မကောင်းဆိုးရွားစွမ်းအင်များကို ဖြည်းဖြည်းချင်း လမ်းညွှန်ပေးခဲ့သည်။

ဤတစ်ကြိမ်တွင် မိစ္ဆာစွမ်းအင် နှစ်ခုကြားမှ ပဋိပက္ခမှာ အတန်ငယ် လျော့ပါးသွားသော်လည်း၊ သူမ၏ ခန္ဓာကိုယ်နှင့် အပြည့်အဝ ပေါင်းစပ်မှု မဖြစ်နိုင်သေးပေ။

“မရဘူး……”

မုန့်ဝမ်သည် သွားကို တင်းတင်းကြပ်ကြပ် စေ့ထားပြီး အသစ်အသစ်သော ကြိုးပမ်းမှုများကို ဆက်လက် လုပ်ဆောင်နေခဲ့သည်။

စတုတ္ထအကြိမ်၊ ပဉ္စမအကြိမ်၊ ဆဋ္ဌမအကြိမ်...

သွေးကြောများမှာ အကြိမ်ကြိမ် ဆွဲဖြဲခံရပြီး အကြိမ်ကြိမ် ပြန်လည် ပြုပြင်ခဲ့ရသည်။

ကြိုးပမ်းမှု တစ်ခုစီတိုင်းက မုန့်ဝမ်ကို ကြီးမားသော နာကျင်မှုများကို ပေးစွမ်းနေသည်။

သူမ၏ ခန္ဓာကိုယ်မှာ မိစ္ဆာစွမ်းအင် နှင့် မကောင်းဆိုးဝါးစွမ်းအင်တို့ ပြင်းထန်စွာ တိုက်ခိုက်နေကြသည့် စစ်မြေပြင်တစ်ခု ဖြစ်လာပုံရသည်။

သူမမှာမူ ထိုတိုက်ပွဲကြားတွင် ဟန်ချက်တစ်ခုကို အမြဲတစေ ရှာဖွေနေပြီး မကောင်းဆိုးဝါးစွမ်းအင်များကို စုပ်ယူနိုင်မည့် အခွင့်အရေးများကို ရှာဖွေနေခဲ့သည်။

နောက်ဆုံးတွင် မရေမတွက်နိုင်သော ကြိုးပမ်းမှုများ ပြုလုပ်ပြီးနောက် မုန့်ဝမ်သည် မျှော်လင့်ချက် ရောင်ခြည်တစ်ခုကို ရှာတွေ့သွားသည်။