အခန်း (၁၉၇-၁၉၈)

အခန်း (၁၉၇) နက်နဲလှသော ကျင်းယွမ်ဂိုဏ်းနှင့် ရှောင်ပိုင်၏ တုန်လှုပ်မှု

ဂိုဏ်းသခင် အာဏာလွှဲပြောင်းပွဲ အခမ်းအနား ကျင်းပရန် နှစ်လပင် မလိုတော့ပေ။ ထို့ကြောင့် ဂျိချန်းဖန်သည် အလောတကြီး ပြန်မသွားဘဲ ရှောင်ပိုင်ကို ခေါ်ဆောင်ကာ ခရီးတစ်လျှောက် အေးအေးလူလူပင် ပြန်လာခဲ့သည်။

မျှော်စင်တောင်တန်းမှ ထွက်ခွာလာပြီးနောက် သူတို့သည် တောင်စမ်းချောင်းများတစ်လျှောက် လှည့်လည်ခဲ့ကြပြီး ရှေးဟောင်းစုန်းနွယ်စု၏ မျိုးနွယ်စုခွဲတစ်ခုရှိရာသို့ပင် ဝင်ရောက်လေ့လာခဲ့ကြသေးသည်။

သို့သော်လည်း... အချိန်ဟူသည်မှာ မည်သူ့ကိုမျှ မစောင့်ပေ။ မျက်စိတစ်မှိတ်အတွင်းမှာပင် နှစ်ပေါင်းသုံးရာ ကုန်ဆုံးသွားခဲ့ပြီဖြစ်သည်။

ရှောင်ပိုင် သိကျွမ်းခဲ့သော စုန်းမျိုးနွယ်စုမှ မိတ်ဆွေများအားလုံး ကွယ်လွန်သွားကြပြီဖြစ်သည်။ သူတို့၏ သက်တမ်းမှာ နှစ်ပေါင်းရာဂဏန်းမျှသာ ရှည်ကြာသောကြောင့် သူတို့သည် ဤလောကထဲသို့ လာရောက်ခဲ့ကြပြီးနောက် တိတ်ဆိတ်စွာပင် ဘဝဇာတ်သိမ်းသွားခဲ့ကြလေသည်။

ကောင်းကင်ယံထက်တွင် ရှောင်ပိုင်သည် ဂျိချန်းဖန်၏ ဘေး၌ရပ်ရင်း အောက်ဘက်မှ စုန်းနွယ်စု ကျေးရွာလေးကို ငေးကြည့်နေမိသည်။ သူမ၏ ရင်ထဲတွင် ထူးဆန်းသော ဝမ်းနည်းမှုတစ်ခု တိုးဝင်လာ၏။

"ရာစုနှစ် သုံးခု အတွင်းမှာပဲ... ဒီလောကထဲမှာ ငါသိတဲ့သူ တစ်ယောက်မှ မကျန်တော့ဘူးလား" သူမ တိုးတိုးလေး ရေရွတ်လိုက်မိသည်။ လွန်ခဲ့သော နှစ်ပေါင်းသုံးရာက မိတ်ဆွေများမှာ ယခုဆိုလျှင် မြေစာပင် ဖြစ်နေကြပြီ။

ဂျိချန်းဖန်ကတော့ ရှေ့မှ မြင်ကွင်းအားလုံးကို တည်ငြိမ်စွာ ကြည့်နေသည်။ နွေဦးလေပြေက သက်ရှိတို့ကို ရှင်သန်စေသကဲ့သို့ ခေတ်သစ်တစ်ခုမှာလည်း မလွဲမသွေ စတင်လာမည်ဖြစ်သည်။

ဆောင်းဦးလေကြောင့် သစ်ရွက်များ ကြွေလွင့်ရသကဲ့သို့ ခေတ်တစ်ခုမှာလည်း မလွဲမသွေ ဘဝဇာတ်သိမ်းရမည်သာ။

ရှောင်ပိုင်က သူမ၏ တစ်ဦးတည်းသော မိတ်ဆွေဖြစ်သူ ဂျိချန်းဖန်ဘက်သို့ လှည့်ကြည့်လိုက်ပြီး တိုးညှင်းစွာ မေးလိုက်သည်။ "မင်းကကော ငါ့ဘေးမှာ ဘယ်လောက်ကြာကြာ နေပေးနိုင်မှာလဲ"

ဂျိချန်းဖန် သက်ပြင်းတစ်ချက်ကို ခပ်ဖွဖွချလိုက်ပြီး ခိုင်မာသော အကြည့်တို့ဖြင့် ပြန်ကြည့်ကာ ပြောလိုက်သည်။

"စိတ်မပူပါနဲ့... ဒီလောကမှာ ထာဝရရှင်သန်ခြင်း မရှိဘူးဆိုရင်တောင်... ငါ ရောက်လာပြီပဲ။ မင်းအတွက် ထာဝရရှင်သန်ခြင်းကို ငါ ဖန်တီးပေးမယ်။ အခုကစပြီး မင်း တစ်ယောက်တည်း မဟုတ်တော့ဘူး၊ ငါ မင်းဘေးမှာ ရှိနေပေးမယ်"

လောကတွင် မူလက လမ်းဟူသည် မရှိပါ။ လူများစွာ လျှောက်လှမ်းကြသောအခါမှ လမ်းဟူသည် ဖြစ်ပေါ်လာခြင်းဖြစ်သည်။

သူ၊ ဂျိချန်းဖန်သည် ထာဝရရှင်သန်ခြင်း လမ်းစဉ်ကို ဖန်တီးသူ ဖြစ်လာမည်ဖြစ်ပြီး ဤခေတ်ကြီးကို "ချန်ရှန်း" (ထာဝရရှင်သန်ခြင်း) ခေတ်ဟု အမည်ပေးမည်ဖြစ်သည်။

"သွားကြစို့" ရှောင်ပိုင်က သာယာစွာ ပြုံးလိုက်ပြီး ဂျိချန်းဖန်၏ ဘေးသို့ လာကာ အသာအယာ ဖက်လိုက်သည်။

မနေ့ညကစပြီး ဂျိချန်းဖန်နှင့် သူမ၏ ဆက်ဆံရေးမှာ အနည်းငယ် ရှုပ်ထွေးသွားခဲ့သည်။ သူငယ်ချင်းလား........... ထိုထက်မကတော့။ ချစ်သူလား........... ထိုအဆင့်ထိတော့ မရောက်သေး။ "ညီအစ်ကို" ဆိုသည့် စကားလုံးကသာ သူတို့၏ ဆက်ဆံရေးကို အကောင်းဆုံး အကျဉ်းချုပ်နိုင်မည် ထင်သည်။

ဂျိချန်းဖန်က ရှောင်ပိုင်ကို အသာအယာ ပွေ့ဖက်လိုက်ပြီး လက်တစ်ချက် ဝေ့ယမ်းကာ 'ဟုန်လူ ဓားနတ်ဘုရား' ကို ဆင့်ခေါ်လိုက်သည်။ ရဲရဲတောက်နေသော ဓားရောင်ခြည်က သူတို့နှစ်ဦးကို လွှမ်းခြုံသွားပြီး ကောင်းကင်ယံသို့ မြားတစ်စင်းကဲ့သို့ ထိုးတက်သွားလေတော့သည်။

...

ဂျိချန်းဖန်နှင့် ရှောင်ပိုင်တို့ ကျင်းယွမ်ဂိုဏ်းသို့ ပြန်ရောက်လာသောအခါ တစ်လခန့် ကုန်ဆုံးသွားပြီဖြစ်သည်။ ယခုဆိုလျှင် အာဏာလွှဲပြောင်းပွဲ အခမ်းအနားကျင်းပရန် တစ်လခန့်သာ လိုတော့သည်။

နတ်ဘုရားနယ်မြေအတွင်းရှိ အထက်လမ်းဂိုဏ်းအားလုံးမှာ ကျင်းယွမ်ဂိုဏ်းထံမှ သတင်းစကားကို လက်ခံရရှိထားကြပြီး သူတို့၏ ထူးချွန်သော တပည့်များကို ဦးဆောင်ကာ ကျင်းယွမ်ဂိုဏ်းသို့ ဦးတည်လာနေကြပြီဖြစ်သည်။ ကျင်းယွမ်ဂိုဏ်း၏ နောက်ထပ် ဂိုဏ်းသခင်သစ် ပေါ်ထွက်လာခြင်းကို သက်သေအဖြစ် ကြည့်ရှုရန် ပြင်ဆင်နေကြခြင်းပင်။

"ရှူးးး....."

တောက်ပသော ဓားရောင်ခြည်တစ်ခု လျှပ်ခနဲ ပေါ်လာပြီး ထုံထျန်းတောင်ထိပ်၏ ခြေရင်းသို့ ဖြည်းညှင်းစွာ ဆင်းသက်လိုက်သည်။ ဂျိချန်းဖန်သည် မူလက ရှောင်ပိုင်ကို ထိုက်ကျူးတောင်ထိပ်သို့ ခေါ်သွားရန် စိတ်ကူးထားသော်လည်း လျိုဝေနှင့် လေးမြီးမြေခွေးတို့မှာ ထုံထျန်းတောင်ထိပ်တွင် ရှိနေသောကြောင့် ရှောင်ပိုင်ကိုပါ ဤနေရာသို့ တိုက်ရိုက်ခေါ်လာခဲ့ခြင်း ဖြစ်သည်။

ထို့အပြင် ဂိုဏ်းသခင်ကိုလည်း နှုတ်ဆက်ရန် လိုအပ်သည် မဟုတ်လား။

"စီနီယာအကို ဂျိ ကို ဂါရဝပြုပါတယ်..........."

ထုံထျန်းတောင်ထိပ်ရှိ တပည့်များမှာ ဂျိချန်းဖန်ကို မြင်သည်နှင့် သူတို့၏ အလုပ်များကို ရပ်တန့်ကာ ရိုသေစွာ ဦးညွှတ်နှုတ်ဆက်ကြသည်။

"အင်း..." ဂျိချန်းဖန်က ပြုံးလျက် ခေါင်းညိတ်ပြလိုက်သည်။ တပည့်များကတော့ ဂျိချန်းဖန်၏ ဘေးမှ ရှောင်ပိုင်ကို ကြည့်ကာ သူမမှာ မည်သူဖြစ်ကြောင်း စပ်စုလိုသော မျက်လုံးများဖြင့် ကြည့်နေကြသည်။

ဂျိချန်းဖန်က ရှောင်ပိုင်ကို ခေါ်ဆောင်ကာ ယူကျင်းခန်းမသို့ ဦးတည်လိုက်သည်။ တိမ်ပင်လယ်ကို ဖြတ်ကျော်ပြီး သက်တန့်တံတားပေါ်သို့ တက်ခါနီးတွင်...

"ဝေါင်းးး....."

သက်တန့်တံတားအောက်ရှိ နက်ရှိုင်းသော ရေကန်ထဲမှ နက်ရှိုင်းသော ဟိန်းသံကြီးတစ်ခု ထွက်ပေါ်လာသည်။

"ဘုန်း..........."

ရုတ်တရက် ရေကန်ကြီး ပေါက်ကွဲထွက်လာသကဲ့သို့ ရေစက်ရေပေါက်များ လွင့်စင်သွားပြီး တံတားဘေးတွင် ဧရာမ သတ္တဝါကြီးတစ်ကောင် ပေါ်လာသည်။ ၎င်းတွင် နဂါးခေါင်း၊ ခြင်္သေ့ကိုယ်ထည်ရှိပြီး တစ်ကိုယ်လုံး အကြေးခွံများဖြင့် ဖုံးအုပ်ထားကာ ကြောက်မက်ဖွယ်ကောင်းသော အစွယ်နှစ်ချောင်းနှင့်အတူ အားလုံးကို ဖိအားပေးနိုင်သော အသွင်ရှိသည်။

၎င်းမှာ ကျင်းယွမ်ဂိုဏ်း၏ နတ်ဘုရားသားရဲ 'ကီရင်' ပင် ဖြစ်သည်။ ၎င်း၏ အကြည့်မှာ ဂျိချန်းဖန်၏ ဘေးရှိ ရှောင်ပိုင်ပေါ်တွင် ကျရောက်နေပြီး အင်အားကြီးမားသော အရှိန်အဝါကို ထုတ်လွှတ်နေသောကြောင့် ပတ်ဝန်းကျင်ရှိ တပည့်များမှာ အံ့အားသင့်ကာ ဆုတ်ခွာသွားကြရသည်။

"နတ်ဘုရားသားရဲကြီး စိတ်ဆိုးနေတာလား"

"ဘာတွေဖြစ်နေတာလဲ"

တပည့်များ မသိသည်မှာ နတ်ဘုရားသားရဲကြီးမှာ စိတ်ဆိုးနေခြင်း မဟုတ်ဘဲ ထူးခြားသော စွမ်းအင်တစ်ခုကို ခံစားမိသောကြောင့် စပ်စုလိုစိတ်ဖြင့် ထွက်ကြည့်ခြင်းသာ ဖြစ်သည်။

"ဟယ်လို......" ရှောင်ပိုင်က ပြုံးလျက် နတ်ဘုရားသားရဲကြီးကို နှုတ်ဆက်လိုက်သည်။

"ဝေါင်း..........." နတ်ဘုရားသားရဲကြီးက တိုးညှင်းစွာ တစ်ချက်ဟိန်းလိုက်ပြီးနောက် ရေကန်နက်ကြီးထဲသို့ ပြန်လည် ဆင်းသက်သွားလေတော့သည်။

ထိုသတ္တဝါကြီး ထွက်ခွာသွားသည်ကို ကြည့်ရင်း ရှောင်ပိုင်က ဇဝေဇဝါဖြင့် မေးလိုက်သည်။ "မင်းတို့ ကျင်းယွမ်ဂိုဏ်းရဲ့ ကီရင်က လည်ချောင်းထဲက အရိုးကို မချေဖျက်ရသေးဘူးလား" (မှတ်ချက် သားရဲများ လူစကားပြောနိုင်ရန် လည်ချောင်းရှိ အရိုးကို ကျင့်စဉ်ဖြင့် ချေဖျက်ရသည်ကို ဆိုလိုခြင်းဖြစ်သည်။)

"ငါလည်း မသိဘူး" ဂျိချန်းဖန်က ခေါင်းခါပြလိုက်သည်။ သူမှတ်မိသလောက်တော့ ဤကမ္ဘာရှိ မြေခွေးနွယ်စုမှအပ ကျန်သည့် နတ်ဘုရားသားရဲများနှင့် မိစ္ဆာသားရဲများမှာ လူစကား မပြောနိုင်ကြချေ။

ထို့အပြင် လူအသွင်သို့လည်း မပြောင်းလဲနိုင်ကြပေ။

ရှောင်ပိုင်က ခေါင်းညိတ်လိုက်ပြီး "အားတဲ့အချိန်ကျရင် အဲဒီအရိုးကို ဘယ်လိုချေဖျက်ရမလဲဆိုတာ ငါ သင်ပေးလိုက်မယ်" ဟု ဆိုသည်။

သူတို့ ဆက်လက်လျှောက်လှမ်းရန် ပြင်လိုက်စဉ် ရှေ့မှ ရင်းနှီးသော ပုံရိပ်တစ်ခု အရှိန်အဝါဖြင့် ချဉ်းကပ်လာသည်ကို တွေ့လိုက်ရသည်။ အစိမ်းရင့်ရောင် ဝတ်စုံကို ဝတ်ဆင်ထားသော တောက်ရွှမ်း ဖြစ်သည်။

"ဂိုဏ်းသခင်လောင်း ဂျိချန်းဖန်၊ မင်း နောက်ဆုံးတော့ ပြန်ရောက်လာပြီပဲ"

တောက်ရွှမ်းသည် ဂျိချန်းဖန်ကို မြင်လိုက်ရသောအခါ အခြေအနေကို အကြမ်းဖျင်း နားလည်သွားသည်။

သူသည် နတ်ဘုရားသားရဲကြီး၏ အရှိန်အဝါကြောင့် တပည့်တစ်ယောက်ယောက်ကများ စော်ကားမိသလားဟု ထင်ကာ ထွက်လာခြင်းပင်။

"ဂိုဏ်းသခင် စီနီယာဦးလေး..." ဂျိချန်းဖန်က အရိုအသေပြုလိုက်သည်။

"အင်း... ယူကျင်းခန်းမထဲမှာပဲ စကားပြောကြတာပေါ့" တောက်ရွှမ်းက ဂျိချန်းဖန်၏ ဘေးမှ ရှောင်ပိုင်ကို တစ်ချက်ကြည့်ကာ ပြောလိုက်သည်။

ရှောင်ပိုင်၏ လှပသော မျက်ဝန်းများမှာ အနည်းငယ် ကျဉ်းမြောင်းသွား၏။

သူမသည် ရှေ့မှ တာအိုသခင်ကို ကြည့်ရင်း စိတ်ထဲတွင် တုန်လှုပ်မှုတစ်ခု ဖြစ်ပေါ်လာသည်။

ထိုက်ကျင်း အဆင့်လား........... နောက်ထပ် ထိုက်ကျင်း တစ်ယောက်ပါလား...........

အခန်း (၁၉၈) ကျင်းယွမ်ဂိုဏ်း၏ အုတ်မြစ်နှင့် အနာဂတ်အစီအစဉ်များ

အမှန်အတိုင်း ပြောရလျှင် ကျင်းယွမ်ဂိုဏ်း၏ လက်ရှိဂိုဏ်းသခင်သည်လည်း ထိုက်ကျင်း အဆင့် ကျင့်ကြံသူတစ်ယောက် ဖြစ်နေလိမ့်မည်ဟု ရှောင်ပိုင် လုံးဝ မမျှော်လင့်ထားခဲ့မိပေ။

ဂိုဏ်းတစ်ခုတည်းမှာတင် ထိုက်ကျင်းအဆင့် ကျင့်ကြံသူ နှစ်ယောက်တောင် ရှိနေတာလား။

ဒါက...

ရှောင်ပိုင်၏ လှပသော မျက်ဝန်းအစုံတွင် တုန်လှုပ်မှုရိပ်များ ဖြတ်ပြေးသွားသည်။ ထိုက်ကျင်းအဆင့် ပညာရှင်တစ်ယောက်တည်းနှင့်ပင် ဤလောကကြီးကို ရာစုနှစ်ပေါင်းများစွာ ဖိနှိပ်အုပ်ချုပ်ရန် လုံလောက်နေပြီဖြစ်သည်။

ယခုမူ ကျင်းယွမ်ဂိုဏ်းတွင် ထိုက်ကျင်းအဆင့် နှစ်ယောက်ရှိနေသည့်အပြင် တစ်ယောက်က အလွန်ပင် ငယ်ရွယ်နုပျိုနေသေးသည်။

နတ်ဘုရားနယ်မြေ၏ အနာဂတ်သည် ကျင်းယွမ်ဂိုဏ်း၏ လက်ထဲသို့ ရောက်ရှိသွားတော့မည်ဟု ရှောင်ပိုင်၏ ရင်ထဲတွင် ကြိုတင်ဟောကိန်း ထုတ်မိနေပြီဖြစ်သည်။

သူမသည် ဘေးရှိ ဝတ်စုံဖြူနှင့် လူငယ်လေးကို အံ့ဩတကြီး ကြည့်နေမိသည်။ ဂျိချန်းဖန်သည် အဘယ်ကြောင့် ဖန်ရှန်းဂူကို အရေးမလုပ်သလို သဘောထားခဲ့သည်ကို သူမ ယခုမှပင် နားလည်သွားတော့သည်။

သူက သူတို့ကို တစ်ခါမှပင် မျက်စိထဲ ထည့်မထားခဲ့ခြင်း ဖြစ်သည်။

မှန်ပေသည်။ ထိုက်ကျင်းအဆင့် ကျင့်ကြံသူ နှစ်ဦး၊ ကျင်းယွမ်ဂိုဏ်း၏ ကျူးရှန်းဓား ၊ ပြီးတော့ နတ်မီးမှန် ကဲ့သို့ နတ်ဘုရားလက်နက်ကလည်း ကျင်းယွမ်ဂိုဏ်း၏ လက်ထဲတွင် ရှိနေသည်။

ဤမျှ ခိုင်မာသော အုတ်မြစ်ရှိသည့် ကျင်းယွမ်ဂိုဏ်းကို မည်သူကများ ယှဉ်ပြိုင်နိုင်ပါတော့မည်နည်း။

ယူကျင်းခန်းမ ထဲသို့ လျှောက်လှမ်းဝင်လာသည့် တစ်လျှောက်လုံး ရှောင်ပိုင်မှာ စိတ်နှင့်လူနှင့် မကပ်ဘဲ ဖြစ်နေရှာသည်။

အတိအကျ ပြောရလျှင် သူမသည် အလွန်အမင်း တုန်လှုပ်သွားရသဖြင့် ဘာပြောရမှန်းပင် မသိတော့ခြင်း ဖြစ်သည်။

ဂျိချန်းဖန်က သူမကို တစ်ချက်ကြည့်လိုက်သည်။ ရှောင်ပိုင် ဘာတွေ တွေးနေသည်ကို သူ ခန့်မှန်းမိပါသည်။ ကျင်းယွမ်ဂိုဏ်း၏ လက်ရှိ အင်အားမှာ အပြင်လောကသို့သာ ပေါက်ကြားသွားပါက တစ်လောကလုံးကို တုန်လှုပ်သွားစေမည်မှာ အမှန်ပင်။

"ဂိုဏ်းသခင် စီနီယာဦးလေး..."

ဂျိချန်းဖန်က ရှောင်ပိုင်ကို တောက်ရွှမ်းနှင့် စတင်မိတ်ဆက်ပေးလိုက်သည်။ "ဒါက မြေခွေးမျိုးနွယ်စုရဲ့ မျိုးနွယ်စုခေါင်းဆောင်၊ နတ်ဘုရားနယ်မြေမှာ ကျန်ရှိနေတဲ့ တစ်ဦးတည်းသော ကိုးမြီးကောင်းကင်မြေခွေး ပါ၊ ပြီးတော့ ဂျူနီယာညီလေး ခြောက်မြီး ရဲ့ အမေလည်း ဖြစ်ပါတယ်"

သူက ရှောင်ပိုင်၏ အကြောင်းကို အကျဉ်းချုပ် ရှင်းပြလိုက်သည်။ ထို့နောက် ဂျိချန်းဖန်က စကားလမ်းကြောင်းကို ချက်ချင်း ပြောင်းလိုက်သည်။

"လွန်ခဲ့တဲ့ နှစ်ပေါင်းသုံးရာက ရှောင်ပိုင်ဟာ သူမရဲ့ မျိုးနွယ်စုတစ်ခုလုံးရဲ့ အင်အားကို သုံးပြီး ဖန်ရှန်းဂူဂိုဏ်းကို ကျူးကျော်ခဲ့တယ်၊ အဓိကကတော့ ရှေးဟောင်းစုန်းမျိုးနွယ်စုရဲ့ ရတနာဖြစ်တဲ့ နတ်မီးမှန်ကို ပြန်လည်ရယူပေးဖို့ပါ..."

ဂျိချန်းဖန်က ဖြစ်ကြောင်းကုန်စင်ကို စကားလုံး အနည်းငယ်ဖြင့် ရှင်းလင်းစွာ ပြောပြလိုက်သည်။

"ဪ... ဒီလိုကိုး"

တောက်ရွှမ်းက စဉ်းစားဟန်ဖြင့် ခေါင်းညိတ်လိုက်သည်။ သူသည် ဤကိစ္စအပေါ် အများကြီး အာရုံမထားပေ။

နတ်မီးမှန်က ယခုဆိုလျှင် ကျင်းယွမ်ဂိုဏ်း၏ လက်ထဲသို့ ရောက်နေပြီဖြစ်ရာ နောက်ထပ် ပြောနေစရာ မလိုတော့ပေ။

အနာဂတ်တွင် ကျင်းယွမ်ဂိုဏ်းနှင့် ဖန်ရှန်းဂူဂိုဏ်းတို့ ထိပ်တိုက်တွေ့ကြမည်မှာ သေချာသည်။

ဒါပေမဲ့ ဘာဖြစ်လဲ။

တွေ့ချင်သလိုတွေ့စမ်း။ ငါ့ကျင်းယွမ်ဂိုဏ်းမှာ ထိုက်ကျင်းအဆင့် သုံးယောက်တောင် ရှိနေတာ၊ မင်းတို့ကို ကြောက်နေစရာလား။

တောက်ရွှမ်း၏ အတွေးအခေါ်များမှာ တဖြည်းဖြည်း ပြောင်းလဲလာခဲ့ပြီဖြစ်သည်။ သူသည် ယခင်က တရားမျှတမှုကို အလွန်အမင်း ဂရုစိုက်သူဖြစ်သော်လည်း ဂျိချန်းဖန်၏ လွှမ်းမိုးမှုကြောင့် သူ၏ အမြင်များမှာ ပိုမို ကျယ်ပြန့်လာခဲ့သည်။

ယခင်က တောက်ရွှမ်းသည် ကျင်းယွမ်ဂိုဏ်းကို သူ၏ လက်ထက်တွင် မဆုတ်ယုတ်အောင် မည်သို့ ထိန်းသိမ်းရမည်ကိုသာ တွေးခဲ့သော်လည်း ယခုမူ သူနှင့် ဂျိချန်းဖန်၏ လက်ထက်တွင် ကျင်းယွမ်ဂိုဏ်းကို မည်သို့ ပိုမို ထွန်းကားအောင် လုပ်ဆောင်ရမမည်ကိုသာ တွေးနေတော့သည်။

"တာအိုမိတ်ဆွေ ကိုးမြီးမြေခွေးမှာ အနာဂတ်အတွက် သွားစရာ နေရာရှိလား" တောက်ရွှမ်းက ညင်သာသော လေသံဖြင့် မေးလိုက်သည်။

ထိုစကားကြောင့် ရှောင်ပိုင်မှာ ရုတ်တရက် အနေခက်သွားရသည်။ တောက်ရွှမ်းကဲ့သို့ ထိုက်ကျင်းအဆင့် ပညာရှင်တစ်ဦးနှင့် ရင်ဆိုင်ရသောအခါ သူမ၏ ရင်ထဲတွင် အနည်းငယ် စိုးရိမ်မိလာ၏။

အကယ်၍ သူမက ကျင်းယွမ်ဂိုဏ်းမှာ နေချင်သည်ဟု ပြောလိုက်လျှင် ဤဂိုဏ်းသခင်က သူမကို လက်ခံပါ့မလား။

ဂျိချန်းဖန်က ရှောင်ပိုင်၏ စိုးရိမ်မှုကို မြင်လိုက်ရသဖြင့် တောက်ရွှမ်းကို တိုက်ရိုက်ပင် ပြောလိုက်သည်။

"ဂိုဏ်းသခင် စီနီယာဦးလေး၊ ရှောင်ပိုင်ကို အခုကစပြီး ကျွန်တော်တို့ ကျင်းယွမ်ဂိုဏ်းမှာ အကြီးအကဲ တစ်ယောက်အဖြစ် ထားပေးစေချင်ပါတယ်၊ ဒါကို ကျွန်တော် သူမနဲ့ အရင်ကတည်းက တိုင်ပင်ထားပြီးသားပါ"

"ကောင်းပြီလေ" တောက်ရွှမ်းက ခေါင်းညိတ်လိုက်သည်။ သူ၏ အကြည့်မှာ ဂျိချန်းဖန်နှင့် ရှောင်ပိုင်ကို တစ်ချက် လှည့်ကြည့်သွားသော်လည်း ဘာမှတော့ မပြောပေ။ အနည်းငယ် ထူးဆန်းနေသည်ဟုသာ ခံစားနေရသည်။

"ဒါဆိုရင်တော့ တာအိုမိတ်ဆွေ ကိုးမြီးမြေခွေး၊ မင်းကို ငါ့ရဲ့ ထုံထျန်းတောင်ထိပ်မှာပဲ တောင်စောင့်အကြီးအကဲ အဖြစ် တာဝန်ပေးအပ်ပါ့မယ်" တောက်ရွှမ်းက မေးခွန်းထုတ်ဟန်ဖြင့် ဆိုလိုက်သည်။

"ကျေးဇူးတင်ပါတယ် တာအိုသခင်ကြီး" ရှောင်ပိုင်က အနည်းငယ် ဦးညွှတ်လိုက်သည်။

"ဂိုဏ်းသခင် စီနီယာဦးလေး..."

ဂျိချန်းဖန်က နောက်ထပ် ကိစ္စတစ်ခုကို တင်ပြလိုက်ပြန်သည်။ "ပြီးခဲ့တဲ့ ရက်ပိုင်းက ကျွန်တော့်ကို ပြောခဲ့တဲ့ အနောက်ဘက် သေမင်းတောအုပ် ကိစ္စနဲ့ ပတ်သက်ပြီး ကျွန်တော် သဲလွန်စအချို့ ရထားပါတယ်"

"ဪ... ဟုတ်လား" တောက်ရွှမ်း မျက်ခုံးပင့်သွားသည်။ သူက ဂျိချန်းဖန်ကို အံ့ဩတကြီး ကြည့်ကာ "ဂိုဏ်းသခင်လောင်း ဂျိ၊ မင်းက မိစ္ဆာဂိုဏ်းတွေဆီကနေ သတင်းတစ်ခုခု ရလာတာလား"

"မဟုတ်ပါဘူး" ဂျိချန်းဖန်က ခေါင်းခါလိုက်ပြီး တုန်လှုပ်ဖွယ် စကားတစ်ခွန်းကို ဆိုလိုက်သည်။ "စီနီယာဦးလေး... မကြာသေးခင်က ကျွန်တော် တောင်ဘက်နယ်စပ်မှာ တစ်ခုခုကို တွေ့ခဲ့တယ်"

"ဖန်ရှန်းဂူဂိုဏ်းက... တောင်ဘက်နယ်စပ်က လူရိုင်းတွေနဲ့ လျှို့ဝှက် ပူးပေါင်းနေကြတယ်........"

"ဘာ................" တောက်ရွှမ်း၏ မျက်နှာအမူအရာ ချက်ချင်း ပြောင်းလဲသွားသည်။ သူက တည်ကြည်သော မျက်နှာဖြင့် ဂျိချန်းဖန်ကို ကြည့်ကာ "ဒါက တကယ်ပဲလား"

"အတိအကျပါပဲ........" ဂျိချန်းဖန်က လေးနက်စွာ ခေါင်းညိတ်လိုက်သည်။ ဖန်ရှန်းဂူဂိုဏ်းမှ အကြီးအကဲ လျူရွှန်းသည် လူရိုင်းမျိုးနွယ်စုမှ ပုရောဟိတ်ကြီးနှင့် မည်သို့ အရောင်းအဝယ် လုပ်နေသည်ကို သူက ပြန်လည် ပြောပြလိုက်သည်။

"အနောက်ဘက် သေမင်းတောအုပ်ထဲမှာ ကောင်းကင်ဧကရာဇ်ရဲ့ ရတနာတိုက် ပွင့်တော့မှာပါ၊ အဲဒီထဲမှာ အခွင့်အရေးတွေ အများကြီးရှိတယ်၊ ပြီးတော့... ကောင်းကင်ကျမ်း တတိယမြောက်တွဲလည်း အဲဒီထဲမှာ ရှိနေတယ်........" ဂျိချန်းဖန်က အေးအေးဆေးဆေးပင် ပြောလိုက်သည်။

ထိုစကားကို ကြားလိုက်သောအခါ တောက်ရွှမ်း၏ မျက်လုံးများ အရောင်တောက်သွားသည်။ သူသည် ကောင်းကင်ကျမ်း၏ တန်ဖိုးကို ကောင်းကောင်းသိသလို ဂျိချန်းဖန်သည် ကောင်းကင်ကျမ်း ငါးတွဲလုံးကို စုဆောင်းရန် စီစဉ်နေသည်ကိုလည်း သိထားသည်။

"ဂိုဏ်းသခင်လောင်း ဂျိ... မင်း ဘာဆက်လုပ်ဖို့ စီစဉ်ထားသလဲ" တောက်ရွှမ်းက လေးနက်သော လေသံဖြင့် မေးလိုက်သည်။

ဂျိချန်းဖန်က အနည်းငယ် စဉ်းစားလိုက်ပြီးနောက် "ကောင်းကင်ဧကရာဇ်ရဲ့ ရတနာတိုက်ကိစ္စကို ခဏထားပါဦး၊ အဲဒီထဲက ပစ္စည်းတွေကိုတော့ ကျွန်တော် မရရအောင် ယူမှာပါ၊ ကောင်းကင်ကျမ်းက ကျွန်တော့်ရဲ့ တာအိုလမ်းစဉ်အတွက် အရမ်းအရေးကြီးလို့ပါ..."

သူက စကားလမ်းကြောင်းကို ဖန်ရှန်းဂူဂိုဏ်းဘက်သို့ ပြန်လှည့်လိုက်သည်။

"စီနီယာဦးလေး... ကျွန်တော်တို့ ဖန်ရှန်းဂူအပေါ် ထားတဲ့ သဘောထားကို ပြန်လည် သုံးသပ်ဖို့ လိုနေပါပြီ။ သူတို့က တောင်ဘက်နယ်စပ်က လူရိုင်းတွေနဲ့ ပူးပေါင်းပြီး သားရဲနတ်ဘုရား ကို ပြန်လည် နိုးထစေဖို့ ကြိုးစားနေကြတာ..."

"သူတို့က သေတွင်းတူးနေကြတာပဲ........" ဂျိချန်းဖန်က အေးစက်စက် လေသံဖြင့် ဆိုလိုက်သည်။

သူက သားရဲနတ်ဘုရား၏ တည်ရှိမှုနှင့် ၎င်း၏ အစွမ်းအစကို တောက်ရွှမ်းအား ရှင်းပြလိုက်သည်။

"သားရဲနတ်ဘုရားဆိုတာ လောကကြီးရဲ့ မကောင်းတဲ့ စွမ်းအင် တွေကနေ ဖြစ်တည်လာတာပါ။ သူက သတ်ဖြတ်လိုစိတ် အရမ်းပြင်းထန်သလို သူ့ရဲ့ အစွမ်းကလည်း ထိုက်ကျင်းအဆင့်ရဲ့ အထွက်အထိပ်မှာ ရှိနေတယ်။ အကယ်၍ သူသာ နိုးထလာမယ်ဆိုရင် တစ်လောကလုံး ပျက်စီးသွားနိုင်တယ်"

"ဖန်ရှန်းဂူဂိုဏ်းရဲ့ လုပ်ရပ်က... တကယ့်ကို ယုတ်မာလွန်းတဲ့ ရည်မှန်းချက်ပဲ........"

တောက်ရွှမ်းမှာ ထိုစကားများကို ကြားရသောအခါ အလွန်ပင် တုန်လှုပ်သွားရသည်။ အခြေအနေများမှာ သူ မျှော်လင့်ထားသည်ထက် ပိုမို ဆိုးရွားနေသည်။

ကျင်းယွမ်ဂိုဏ်းက ဖန်ရှန်းဂူဂိုဏ်းကို အရေးမယူရသေးခင်မှာပင် ဖန်ရှန်းဂူက မိစ္ဆာဂိုဏ်း ဖြစ်နေနှင့်သည်။

"ဂိုဏ်းသခင်လောင်း ဂျိ... မင်းမှာ ဒါကို ဖြေရှင်းဖို့ နည်းလမ်းရှိလား" တောက်ရွှမ်းက စိုးရိမ်တကြီး မေးလိုက်သည်။ သားရဲနတ်ဘုရား၏ ရုတ်တရက် ပေါ်ထွက်လာမှုကြောင့် သူ စိတ်မအေးဖြစ်နေမိသည်။

ဂျိချန်းဖန်က စဉ်းစားကာ "သားရဲနတ်ဘုရားဟာ လောကရဲ့ မကောင်းတဲ့ စွမ်းအင်တွေကနေ ဖြစ်တည်လာတာမို့ မသေနိုင်တဲ့ ခန္ဓာကိုယ် ရှိပါတယ်။ သူ လွတ်မြောက်လာပြီး သူ့ရဲ့ မသေနိုင်တဲ့ ခန္ဓာကိုယ် ဆုံးရှုံးသွားတဲ့ အချိန်ကျမှသာ သူ့ကို နှိမ်နင်းဖို့ အခွင့်အရေး ရမှာပါ... စီနီယာဦးလေး စိတ်ချပါ၊ ဒီကိစ္စကို ကျွန်တော် ကိုင်တွယ်နိုင်ပါတယ်" ဟု အားပေးလိုက်သည်။

သူသည် လာမည့်ကာလအတွင်း ရှစ်မျက်နှာ မီးတောက်အစီအရင် ကို အဆင်သင့် ဖြစ်နေအောင် လုပ်ဆောင်ရန်သာ လိုအပ်သည်။ တစ်ကယ်လို့ အဆင်မသင့်ဖြစ်ရင်တောင်မှ ကျင်းယွမ်ဂိုဏ်းရဲ့ ကျူးရှန်းဓားအစီအရင် ကို အစွမ်းကုန် အသုံးချလိုက်မယ်ဆိုရင် သားရဲနတ်ဘုရားကို ပြင်းပြင်းထန်ထန် ဒဏ်ရာရအောင် လုပ်နိုင်ပေလိမ့်မည်။ ဘာမှ စိတ်ပူစရာ မရှိပေ။