အခန်း (၅၃၃-၅၃၅)

အခန်း ၅၃၃ - ပြင်းထန်သော ရိုက်ခတ်မှု

"ခြောက်လကျော်တောင် ရှိသွားပြီ။ ဒီတစ်ခါ ထွက်လာကြရင် စမ်းသပ်ပွဲတွေ ပြီးပြီထင်တယ်" ဟု အပြင်ဘက်ရှိ အကြီးအကဲများက မျှော်လင့်တကြီး စောင့်ဆိုင်းနေကြသည်။ မဟာဧကရီ၏ အမွေအနှစ်မှာ သာမန်မဟုတ်သဖြင့် မိမိတို့၏ တပည့်များ အနည်းငယ်ရရှိခဲ့လျှင်ပင် ဂိုဏ်းအတွက် ကြီးမားသော အကျိုးကျေးဇူး ဖြစ်ထွန်းမည်ဖြစ်သည်။

ရှန်းထူကျွယ် နှင့် လက်တစ်ထောင်အဘွားအို တို့သည် အလွန်ပင် ယုံကြည်ချက် ရှိနေကြသည်။ အထူးသဖြင့် ရှန်းထူနန်ထျန်းမှာ သူတို့မိသားစု၏ နှစ်တစ်ထောင်အတွင်း အတော်ဆုံး ပါရမီရှင်ဖြစ်သဖြင့် သူသည် အကောင်းဆုံးသော အမွေအနှစ်များကို ရရှိလာလိမ့်မည်ဟု သူတို့ တွေးထားကြသည်။

လက်တစ်ထောင်အဘွားအိုသည် လင်မိသားစုဘက်သို့ မထီမဲ့မြင် ကြည့်လိုက်ပြီး "မင်းတို့ တပည့်တွေနဲ့ အဲ့ဒီ ယီယွင်ဆိုတဲ့ ကောင်လေးရဲ့ အလောင်းတွေကို ကောက်ဖို့သာ ပြင်ထားလိုက်တော့" ဟု အော်ဟစ်စိန်ခေါ်လိုက်သည်။ လင်မိသားစု မယ်တော်ကြီးကလည်း ဒေါသတကြီး ပြန်လည် တုံ့ပြန်လိုက်ရာ နှစ်ဖက်စလုံးတွင် တင်းမာမှုများ အထွတ်အထိပ်သို့ ရောက်ရှိနေသည်။

ထိုစဉ် မဟာဧကရီ နယ်မြေ၏ ဝင်ပေါက်တွင် အလင်းတန်းတစ်ခု လက်ခနဲ ပေါ်လာပြီး ပထမဆုံး လူတစ်ယောက် ထွက်ပေါ်လာသည်။ သူသည် ရှန်းထူမိသားစု၏ တပည့်ဝတ်စုံကို ဝတ်ဆင်ထားသည်။

ရှန်းထူမိသားစုမှ အကြီးအကဲတစ်ဦးက ဝမ်းသာအားရဖြင့် သွားရောက်ဖမ်းယူရန် ကြိုးစားလိုက်သော်လည်း သူ၏ မျက်နှာမှာ ရုတ်တရက် အေးခဲသွားသည်။ ထိုတပည့်မှာ လေထဲတွင် မည်သည့် လှုပ်ရှားမှုမျှ မရှိဘဲ အိတ်တစ်အိတ်ကဲ့သို့ ပျော့ခွေနေချေပြီ။

"သူ သေနေပြီ"

ထိုသူမှာ ရှန်းထူမိသားစု၏ ထိပ်သီးပါရမီရှင်တစ်ဦးဖြစ်သော ရှန်းထူထျန်းယွဲ့ ဖြစ်သည်။

လက်တစ်ထောင်အဘွားအိုမှာ မျက်နှာပျက်သွားသော်လည်း "ဒါက မတော်တဆ ဖြစ်မှာပါ၊ ကျန်တဲ့သူတွေတော့ အဆင်ပြေမှာပါ" ဟု မိမိကိုယ်ကို နှစ်သိမ့်လိုက်သည်။

သို့သော်လည်း... ဒုတိယမြောက်၊ တတိယမြောက်နှင့် စတုတ္ထမြောက် လူများ ဆက်တိုက် ထွက်ပေါ်လာသည်။ သူတို့အားလုံးမှာ ရှန်းထူမိသားစုနှင့် သူတို့၏ မဟာမိတ် လီမီးဂိုဏ်းမှ တပည့်များဖြစ်ပြီး အားလုံးမှာ အလောင်းများ သာ ဖြစ်နေသည်။

ရှန်းထူကျွယ်က အလောင်းများကို စစ်ဆေးကြည့်ရာတွင် "မြားဒဏ်ရာတွေ" ဟု ဟိန်းဟောက်လိုက်သည်။ မြားတစ်ချက်တည်းဖြင့် သူတို့၏ သွေးကြောများနှင့် နတ်အမြုတေများကို ဖျက်ဆီးထားခြင်း ဖြစ်သည်။ လီမီးတောက်ဂိုဏ်းမှ ပါရမီရှင်မှာမူ ဒဏ်ရာမရှိဘဲ သေဆုံးနေခြင်းဖြစ်ပြီး ၎င်းမှာ လင်ရှင်းထုံ၏ သန့်စင် ဥပဒေသဖြင့် အသက်ဓာတ်ကို ငြိမ်းသတ်ခြင်း ခံထားရခြင်း ဖြစ်သည်။

နောက်ဆုံးတွင် ရှန်းထူမိသားစု၏ နံပါတ် (၂) ပါရမီရှင် ရှန်းထူယာ ၏ အလောင်း ထွက်ပေါ်လာသောအခါ ရှန်းထူမိသားစုဝင် အားလုံးမှာ အရူးများကဲ့သို့ ဖြစ်သွားကြတော့သည်။

"ယာ တောင် သေသွားတာလား"

ရှန်းထူကျွယ်၏ မျက်နှာမှာ ဒေါသကြောင့် ကြောက်မက်ဖွယ်ကောင်းအောင် တွန့်လိမ်သွားသည်။ တပည့်များအားလုံးမှာ တိုက်ကွက်တစ်ချက်တည်းဖြင့် အသတ်ခံထားရခြင်း ဖြစ်သည်။ ဤဒဏ်ရာများတွင် ပါရှိသော ဥပဒေသစွမ်းအင်များမှာ အလွန်ပင် နက်ရှိုင်းလှသဖြင့် ရှန်းထူကျွယ်ပင်လျှင် ၎င်းတို့ကို အပြည့်အဝ နားမလည်နိုင်ချေ။

အခြားဂိုဏ်းမှ အကြီးအကဲများမှာမူ ရှန်းထူမိသားစု၏ အရှုံးကို ကြည့်ကာ လှောင်ပြောင်နေကြသည်။ "ဒီလူသတ်သမားက တကယ်ကို အစွမ်းထက်တာပဲ။ တပည့်တွေကို တိုက်ကွက်တစ်ချက်တည်းနဲ့ သတ်နိုင်တယ်ဆိုတော့ စွမ်းအားချင်းက တကယ်ကို ကွာခြားလွန်းတယ်" ဟု ဝိုင်းဝန်း ပြောဆိုနေကြရာ ရှန်းထူကျွယ်မှာ ပေါက်ကွဲတော့မည့် မီးတောင်တစ်ခုကဲ့သို့ ဖြစ်နေပါတော့သည်။

အခန်း ၅၃၄ - အကုန်အစင် သုတ်သင်ခံရခြင်း

မဟာဧကရီ နယ်မြေအတွင်းသို့ မဝင်မီက ရှန်းထူမိသားစုသည် အခြားဂိုဏ်းများနှင့် ဝိညာဉ်စာချုပ် ချုပ်ဆိုထားပြီးသား ဖြစ်သည်။ သို့သော် ယခုအခါ ရှန်းထူမိသားစု၏ ပါရမီရှင်များ တစ်ဦးပြီးတစ်ဦး အသတ်ခံနေရသည်ကို မြင်သောအခါ အခြားအကြီးအကဲများမှာ ကူညီဖေးမမည့်အစား ကျိတ်၍ ဝမ်းသာနေကြသည်။ ရှန်းထူမိသားစုသည် နယ်မြေဝင်ခွင့် သတင်းအချက်အလက်များကို အခြားဂိုဏ်းများထံမှ အဆမတန် ဈေးတင်ရောင်းချခဲ့ဖူးသဖြင့် လူမုန်းများနေခြင်း ဖြစ်သည်။

ရှန်းထူမိသားစု အကြီးအကဲများမှာ ဒေါသကြောင့် ပေါက်ကွဲလုမတတ် ဖြစ်နေစဉ် လက်တစ်ထောင်အဘွားအို က လင်မိသားစုဘက်သို့ လက်ညှိုးငေါ့ငေါ့ထိုးကာ ဟိန်းဟောက်လိုက်သည်။ "ဒါ လင်မိသားစုက ကလေးတွေ လုပ်တာပဲ ဖြစ်ရမယ် သူတို့ကလွဲရင် ငါတို့လူတွေကို ဘယ်သူ သတ်မှာလဲ"

ရှန်းထူကျွယ်ကလည်း လင်မိသားစု မယ်တော်ကြီးကို အဖြေပေးရန် တောင်းဆိုလိုက်သည်။ အခြေအနေမှာ အလွန်ပင် တင်းမာသွားပြီး အကြီးအကဲများကြားတွင် တိုက်ပွဲတစ်ခု စတင်တော့မည့်အလား ဖြစ်နေသည်။

လင်မိသားစု မယ်တော်ကြီးကမူ ခပ်အေးအေးပင် လှောင်ပြောင်လိုက်သည်။ "သက်သေမရှိဘဲ လာမစွပ်စွဲနဲ့။ မင်းတို့ တပည့်တွေက အစွမ်းမရှိလို့ နယ်မြေထဲက စက်ရုပ်မြားတွေနဲ့ သေတာလည်း ဖြစ်နိုင်တာပဲ"

လက်တစ်ထောင်အဘွားအိုမှာ ဒေါသကြောင့် တုန်ရင်နေသည်။ "မြားဒဏ်ရာတွေမှာ သန့်စင်ယန် ဥပဒေသတွေ ကျန်နေသေးတယ်။ အဲ့ဒီ ယီယွင်ဆိုတဲ့ အကောင်လေးက မြားသုံးသလို၊ ယန်ဥပဒေသကိုလည်း ကျင့်ကြံတာ ငါသိတယ်"

မယ်တော်ကြီးက ထပ်မံ လှောင်ပြောင်ပြန်သည်။ "အိုး... ဒါဆိုလည်း ငါစုံစမ်းပေးပါ့မယ်။ တကယ်လို့ ငါ့တပည့်တွေက မင်းတို့လူတွေကို သတ်တာဆိုရင် သူတို့ကို ရက် ၁၀၀ လောက် အခန်းပိတ်ပြီး ပြစ်ဒဏ်ပေးပါ့မယ်။ ဒါပေမဲ့ တစ်ခုတော့ ရှိတယ်... အသက် ၁၆ နှစ်ပဲ ရှိသေးပြီး ကျင့်ကြံဆင့် နိမ့်ပါးတဲ့ ယီယွင်က မင်းတို့ရဲ့ ပါရမီရှင် ၃ ယောက်ကို ဘယ်လိုလုပ် သတ်နိုင်မှာလဲ ရှန်းထူနန်ထျန်းကော ဘာလုပ်နေလို့လဲ သူက ငါတို့လူတွေကို အသတ်မခံရအောင် မကာကွယ်ပေးနိုင်ဘူးလား"

မယ်တော်ကြီး၏ စကားများကြောင့် အခြားဂိုဏ်းမှ အကြီးအကဲများမှာ ဟားတိုက် ရယ်မောကုန်ကြသည်။ လက်တစ်ထောင်အဘွားအိုမှာ မျက်နှာတစ်ခုလုံး နီမြန်းနေပြီး "နန်ထျန်းက မင်းတို့လူတွေကို အလောင်းတွေအဖြစ် တစ်ခုပြီးတစ်ခု ပြန်ပို့ပေးလိမ့်မယ်၊ စောင့်ကြည့်နေလိုက်" ဟု ကျိန်းဝါးလိုက်သည်။

ထိုစဉ် မဟာဧကရီ နယ်မြေ၏ ဝင်ပေါက်မှ အလင်းတန်းတစ်ခု ထပ်မံ ထွက်ပေါ်လာသည်။ လူတိုင်း၏ အာရုံမှာ ထိုနေရာသို့ ရောက်သွားကြသည်။ လက်တစ်ထောင်အဘွားအိုမှာ လင်မိသားစုဝင် သို့မဟုတ် ယီယွင်၏ အလောင်း ဖြစ်လိမ့်မည်ဟု မျှော်လင့်နေသည်။

သို့သော်... အလင်းတန်းထဲမှ ထွက်လာသော အလောင်းမှာ အဝတ်အစားများ စုတ်ပြတ်သတ်နေပြီး ရင်ဘတ်တွင် ဓားဖြင့် အထိုးခံထားရသော ဒဏ်ရာကြီးတစ်ခု ပါရှိသည်။ ရေလှိုင်းများကြောင့် အလောင်း၏ ဖရိုဖရဲ ဖြစ်နေသော ဆံပင်များ ဖယ်ခွာသွားသောအခါ...

ရှန်းထူနန်ထျန်း

ထိုမျက်နှာကို မြင်လိုက်ရသည်နှင့် လက်တစ်ထောင်အဘွားအိုမှာ လျှပ်စီးအပစ်ခံလိုက်ရသကဲ့သို့ တောင့်တင်းသွားသည်။ သူမ၏ မျက်လုံးများမှာ သွေးရောင်လွှမ်းသွားပြီး ပါးစပ်မှ သွေးတစ်လုပ် အန်ထုတ်လိုက်ရသည်။

"မဖြစ်နိုင်ဘူး... အားးးးးး"

သူမသည် သူမ၏ အချစ်ဆုံးမြေး၊ ရှန်းထူမိသားစု၏ အနာဂတ်မျှော်လင့်ချက်ဖြစ်သော ရှန်းထူနန်ထျန်း၏ အလောင်းကို ပိုက်ပွေ့ကာ ရူးမတတ် အော်ဟစ်နေပါတော့သည်။ ရှန်းထူကျွယ်က အလောင်းကို စစ်ဆေးကြည့်ရာတွင် "ဓားဒဏ်ရာ" ဟု ဆိုကာ ပတ်ဝန်းကျင်ရှိ အကြီးအကဲအားလုံးကို လူသတ်လိုသော မျက်လုံးများဖြင့် စိုက်ကြည့်လိုက်သည်။

ဘယ်သူ သတ်လိုက်တာလဲ.....

လင်မိသားစု အကြီးအကဲများပင်လျှင် မှင်သက်နေကြသည်။ ရှန်းထူနန်ထျန်းမှာ အလွန်အစွမ်းထက်သူ ဖြစ်သဖြင့် ယီယွင် သို့မဟုတ် လင်မိသားစု တပည့်များက သတ်နိုင်လိမ့်မည်ဟု သူတို့ မထင်ထားမိပေ။

ရှန်းထူနန်ထျန်း၏ အလောင်းနောက်တွင် နောက်ထပ် အလောင်းအချို့ ထပ်မံ ထွက်ပေါ်လာပြန်သည်။ အားလုံးမှာ ရှန်းထူမိသားစု၏ အဓိက ပါရမီရှင်များသာ ဖြစ်သည်။

အကုန်အစင် သုတ်သင်ခံလိုက်ရပြီ။

ရှန်းထူမိသားစု၏ အနာဂတ် ပါရမီရှင် အားလုံးမှာ မဟာဧကရီ နယ်မြေအတွင်းတွင် အစုလိုက်အပြုံလိုက် အသတ်ခံလိုက်ရခြင်းပင်။ မည်သို့သော အကြောင်းကြောင့် ဤကဲ့သို့သော ကြောက်မက်ဖွယ် ရလဒ် ထွက်ပေါ်လာရသနည်းဆိုသည်ကိုမူ မည်သူမျှ မသိနိုင်ပါတော့ချေ။

အခန်း ၅၃၅ - ပြဿနာကို ဖြေရှင်းခြင်း

မိမိတို့တပည့်များ အစုလိုက်အပြုံလိုက် အသတ်ခံလိုက်ရသဖြင့် ရှန်းထူကျွယ်၏ ဒေါသမှာ ထိန်းမနိုင်သိမ်းမရ ဖြစ်နေသည်။ သူ၏ အလိုလိုသိစိတ်က ဤကိစ္စသည် လင်မိသားစုနှင့် ပတ်သက်နေသည်ဟု ပြောနေသော်လည်း၊ ယီယွင်နှင့် လင်ရှင်းထုံတို့တွင် ဤမျှစွမ်းအားရှိသည်ကိုမူ သူ မယုံကြည်နိုင်သေးပေ။ သို့သော် ရှန်းထူမိသားစုမှာ ပေါက်ကွဲထွက်လုနီးပါး ဖြစ်နေပြီး လင်မိသားစုနှင့် အချိန်မရွေး တိုက်ပွဲစတော့မည့်အလား တင်းမာနေသည်။

ထိုစဉ် လင်မိသားစု အကြီးအကဲ တျန်းကျူး၏ နားထဲသို့ အရေးပေါ် အသံပို့လွှတ်ခြင်းတစ်ခု ရောက်ရှိလာသည်။ ၎င်းသည် လင်မိသားစု၏ အရေးပေါ်အချက်ပြစနစ်ပင် ဖြစ်သည်။

မဟာဧကရီ နယ်မြေအတွင်း၌မူ .....

ယီယွင်သည် အခြေအနေကို ပိုမိုကောင်းမွန်အောင် ကိုင်တွယ်ရန် ဆုံးဖြတ်လိုက်သည်။ သူသည် ကျင့်ကြံသူအားလုံးကို ကြည့်ကာ လေသံကို ပြောင်းလဲလိုက်သည်။

"အားလုံးပဲ... မဟာဧကရီရဲ့ အမွေအနှစ်အကြောင်းကို စိုးရိမ်နေကြတာ ကျွန်တော် သိပါတယ်။ ဒါပေမဲ့ အမှန်တရားက ခင်ဗျားတို့ ထင်သလို မဟုတ်ဘူး။ ကျွန်တော်တို့ ရခဲ့တာက 'မဟာဧကရီ နှလုံးသားကျမ်း' ဆိုတဲ့ ကျင့်စဉ်တစ်ခုပဲ ရှိပါတယ်။ ဒီကျင့်စဉ်က ယင်နဲ့ယန် တွဲဖက်ကျင့်ကြံရတာ ဖြစ်ပြီး ကျင့်ကြံမယ့်သူတွေက 'သန့်စင်ယန်ခန္ဓာ' နဲ့ 'သဘာဝယင်သွေးကြော'ရှိတဲ့သူတွေ ဖြစ်ဖို့ လိုပါတယ်။ ဒါမျိုးက ဒီကမ္ဘာမှာ ရှာဖို့ တော်တော်မလွယ်ဘူးဆိုတာ ခင်ဗျားတို့ သိမှာပါ"

ယီယွင်၏ စကားကြောင့် ကျင့်ကြံသူအချို့မှာ လောဘစိတ် လျော့နည်းသွားကြသည်။ သို့သော် ယီယွင်က ထိုမျှနှင့် မရပ်သေးဘဲ အရေးကြီးဆုံး ဆုံးဖြတ်ချက်တစ်ခုကို ကြေညာလိုက်သည်။

"ဒီကျင့်စဉ်က အရမ်းကို နက်နဲလွန်းတဲ့အတွက် ကျွန်တော်နဲ့ လင်ရှင်းထုံဟာ ဒီနယ်မြေထဲမှာပဲ နှစ် ၁၀၀ ကြာအောင် အခန်းပိတ် ကျင့်ကြံသွားဖို့ ဆုံးဖြတ်လိုက်ပါတယ်။ ဒါ့အပြင်... ကျွန်တော်တို့ဟာ လင်မိသားစုနဲ့ ပတ်သက်သမျှ အဆက်အသွယ်အားလုံးကို အပြီးတိုင် ဖြတ်တောက်လိုက်ပါပြီ"

ဤစကားကြောင့် အားလုံး မှင်သက်သွားကြသည်။ လင်မိသားစုနှင့် အဆက်အသွယ်ဖြတ်ခြင်းမှာ လင်မိသားစုကို အခြားဂိုဏ်းများ၏ ရန်မှ ကာကွယ်ရန် ဖြစ်သည်။ အကယ်၍ ဂိုဏ်းကြီးများက လင်မိသားစုကို ဝိုင်းတိုက်လျှင်ပင် ယီယွင်တို့က ထိုနေရာမှာ မရှိတော့သဖြင့် တိုက်ခိုက်ခြင်းမှာ အဓိပ္ပာယ်မရှိတော့ပေ။ တစ်ဖက်တွင်လည်း ယီယွင်နှင့် လင်ရှင်းထုံတို့သာ အနာဂတ်တွင် အရှင်သခင်ကြီးများ ဖြစ်လာခဲ့ပါက ထိုဂိုဏ်းများကို ပြန်လည် လက်စားချေမည်ကို စိုးရိမ်ရသဖြင့် အခြားသူများမှာ လင်မိသားစုကို ရန်စရန် ဝန်လေးသွားကြသည်။

"ဒီကောင်လေးက တကယ့်ကို ပါးနပ်တာပဲ။ သွေးချောင်းစီးမယ့် စစ်ပွဲတစ်ခုကို မျက်တောင်တစ်ခတ်အတွင်းမှာပဲ ဖြေရှင်းလိုက်တယ်" ဟု စုမျိုးနွယ် ကျင့်ကြံသူက တွေးမိသည်။

ယီယွင်သည် လင်ရှောင်တျယ်တို့ လူစုကို ခေါ်ကာ နတ်မျှော်စင် အတွင်းသို့ ဝင်ရောက်သွားသည်။ အပြင်ဘက်ရှိ ကျင့်ကြံသူများမှာ ယီယွင်သည် ဤနယ်မြေတစ်ခုလုံးကို ထိန်းချုပ်နိုင်စွမ်း ရှိနေပြီဖြစ်ကြောင်း နားလည်လိုက်ကြပြီး မနာလိုစိတ်များဖြင့် ကြည့်နေရုံမှအပ ဘာမျှ မတတ်နိုင်တော့ချေ။