နတ်ဆိုးဝိညာဉ်အား ထာဝရနှိမ်နင်းခြင်း

ကုချင်းဖန်၏ မျက်နှာအမူအရာ ပြောင်းလဲသွားပြီး သူ၏လက်အင်္ကျီကို ဝှေ့ယမ်းလိုက်ရာ ရှေးဟောင်းမြေမှုန့်များ လွင့်စင်သွားပြီး ရှေးဟောင်းကျောက်စာတိုင်တစ်ခု သူ၏ရှေ့မှောက်တွင် အပြည့်အဝ ပေါ်ထွက်လာခဲ့သည်။

"နတ်ဆိုးဝိညာဉ်များအား ထာဝရနှိမ်နင်းရာ"

ကျောက်စာတိုင်ပေါ်တွင် ရိုးရှင်းသော စာလုံးလေးလုံးသာ ရှိသည်။

သို့သော် ထိုစာလုံးလေးလုံးမှာ ကုချင်းဖန်၏ မျက်လုံးထဲ၌ ခန့်ညားထည်ဝါသော အငွေ့အသက်များအဖြစ် ကျရောက်လာပြီး သူ၏အမြင်အာရုံထဲတွင် အထွတ်အထိပ် ပုဂ္ဂိုလ်တစ်ဦး ပေါ်လာသကဲ့သို့ ဖြစ်သွားသည်။

ရွှေရောင်ချပ်ဝတ်တန်ဆာ ဝတ်ဆင်ထားပြီး ရုပ်သွင်ကို အတိအကျ ခွဲခြား၍မရသော သန်မာသည့် ပုံရိပ်တစ်ခုမှာ ဟင်းလင်းပြင်ကို ရိုက်ခွဲကာ ထူးဆန်းသော နတ်ဘုရားနှင့်အတူ ရောမော်ကွန်းဝင် တိုက်ပွဲတစ်ခုကို ဆင်နွှဲနေသည်။ ထိုတိုက်ပွဲကြောင့် ကောင်းကင်ယံများ ပြိုကျကာ မြစ်ရေများပင် ပြောင်းပြန်စီးဆင်းကုန်သည်။

နောက်ဆုံးတွင်။

ထူးဆန်းသော နတ်ဘုရားမှာ ရွှေရောင်ချပ်ဝတ်တန်ဆာဝတ် နတ်ဘုရားစစ်သူကြီး၏ လက်ချက်ဖြင့် လုံးဝနှိမ်နင်း သတ်ဖြတ်ခြင်း ခံလိုက်ရသည်။

ထို့နောက် ရွှေရောင်ချပ်ဝတ်တန်ဆာဝတ် နတ်ဘုရားစစ်သူကြီးသည် ထိုနတ်ဘုရား ကျဆုံးခဲ့သည့် နေရာတွင် ကျောက်စာတိုင်တစ်ခုကို ထားရစ်ခဲ့သည်။

"ငါက ထိုက်ရိနတ်ဘုရားမင်းဆက်ရဲ့ ထျန်းခွေပဲ၊ ဒီနေရာက နတ်ဆိုးဝိညာဉ်ကို နှိမ်နင်းဖို့ အမိန့်အရ လာခဲ့တာ"

လေးနက်တည်ကြည်သော အသံတစ်ခုမှာ ခေတ်အဆက်ဆက်ကို ဖောက်ထွင်း၍ ထွက်ပေါ်လာပုံရပြီး စစ်မြေပြင်၏ သွေးနှင့် သံမဏိ အငွေ့အသက်များ၊ သတ်ဖြတ်လိုသော အာရုံများမှာ နှလုံးသားကို တုန်လှုပ်ခြောက်ခြားစေသည်။

ထို့နောက် မြင်ကွင်းမှာ ပျောက်ကွယ်သွားခဲ့သည်။

...

"ထိုက်ရိနတ်ဘုရားမင်းဆက်"

"ထျန်းခွေ"

ကုချင်းဖန်၏ မျက်နှာအမူအရာမှာ လေးနက်သွားခဲ့သည်။

ယခုလေးတင် မြင်တွေ့လိုက်ရသော မြင်ကွင်းမှာ ဘာကို ဖော်ပြနေသလဲဆိုသည်ကို သူ သဘာဝအတိုင်း နားလည်လိုက်သည်။ ၎င်းမှာ ကျောက်စာတိုင်ကို လာရောက်ထားရှိခဲ့သော ရှေးဟောင်းအစွမ်းထက် ပုဂ္ဂိုလ်၏ ကျန်ရှိနေသော တာအိုစီးချက်ပင် ဖြစ်ပြီး နှစ်ပေါင်းမရေမတွက်နိုင်အောင် ကြာမြင့်ခဲ့သော်လည်း ထိုမြင်ကွင်းကို မှတ်တမ်းတင်ထားခြင်း ဖြစ်သည်။

ပုံရိပ်ယောင်မှတစ်ဆင့်သာ ရွှေရောင်ချပ်ဝတ်တန်ဆာဝတ် အစွမ်းထက် ပုဂ္ဂိုလ်ကို မြင်တွေ့ခဲ့ရသော်လည်း ကုချင်းဖန်အနေဖြင့် ထိုပုဂ္ဂိုလ်မှာ မဟာသူတော်စင်ထက်ပင် သာလွန်သော ကြောက်မက်ဖွယ် ဖြစ်တည်မှုတစ်ခုဖြစ်ကြောင်း ကောက်ချက်ချနိုင်သည်။

၎င်းမှာ သူတော်စင်ဘုရင်တစ်ဦး ဖြစ်နိုင်သည်

သို့မဟုတ် သူတော်စင်ဘုရင်ထက်ပင် သာလွန်နေနိုင်သည်။

ထိုနှစ်ခုအနက် ကုချင်းဖန်သည် နောက်ဆုံးတစ်ခုကို ပို၍ အလေးသာနေမိသည်။

ဘာပဲဖြစ်ဖြစ် ရွှေရောင်ချပ်ဝတ်တန်ဆာဝတ် အစွမ်းထက် ပုဂ္ဂိုလ်နှင့် ထူးဆန်းသော နတ်ဘုရားတို့၏ တိုက်ပွဲကို ကြည့်ခြင်းအားဖြင့် ထိုအချိန်က နတ်ဘုရားမှာ ယခုထက် အဆပေါင်းများစွာ ပိုမိုအစွမ်းထက်ခဲ့ပြီး ယခုနှင့် နှိုင်းယှဉ်၍ပင် မရနိုင်ပေ။

ဤသည်ကို တွေးတောရင်း ကုချင်းဖန်သည် သက်ပြင်းအရှည်ကြီး ချလိုက်သည်။

ဧကရာဇ်တစ်ပိုင်း။

ထူးဆန်းသော နတ်ဘုရားကို နှိမ်နင်းခဲ့သည့် ရွှေရောင်ချပ်ဝတ်တန်ဆာဝတ် အစွမ်းထက် ပုဂ္ဂိုလ်မှာ ဧကရာဇ်တစ်ပိုင်းနယ်ပယ်မှ ပုဂ္ဂိုလ်တစ်ဦး ဖြစ်ပေလိမ့်မည်။

ထိုက်ရိနတ်ဘုရားမင်းဆက်။

ဤအမည်နှင့် ပတ်သက်၍မူ။

ကုချင်းဖန် အလွန်စိမ်းနေသည်။

သူ သိရှိထားသော ရှေးဟောင်းအင်အားစုများစွာထဲတွင် ထိုက်ရိနတ်ဘုရားမင်းဆက်နှင့် ပတ်သက်သည့် မှတ်တမ်းများ လုံးဝမရှိပေ။

"ရှေးဟောင်းခေတ်တုန်းက ကိုးပြည်နယ်ကနေ ပေါ်ထွက်ခဲ့တဲ့ အထွတ်အထိပ် အင်အားစုက ထိုက်ရိနတ်ဘုရားမင်းဆက် ဖြစ်နိုင်တယ်"

ကုချင်းဖန် တွေးတောနေမိသည်။

ကိုးပြည်နယ်တွင် ရှေးခေတ်ကာလက အထွတ်အထိပ် အင်အားစုတစ်ခု မွေးဖွားခဲ့ဖူးကြောင်း သူ ကောင်းကောင်းသိသည်။ ၎င်းမှာ နှစ်ပေါင်းများစွာအတွင်း အစွမ်းထက်သူများစွာ ကိုးပြည်နယ်သို့ ဝင်ရောက်လာကြသည့် အခြေခံအကြောင်းရင်းလည်း ဖြစ်သည်။

အကယ်၍ ထိုအင်အားစုမှာ ထိုက်ရိနတ်ဘုရားမင်းဆက်သာ ဆိုပါက အဓိပ္ပာယ်ရှိသွားပေလိမ့်မည်။

ဘာပဲဖြစ်ဖြစ် ထိုက်ရိနတ်ဘုရားမင်းဆက်မှာ အမှန်တကယ်ပင် အစွမ်းထက်လှသည်။

ထို့အပြင် ရွှေရောင်ချပ်ဝတ်တန်ဆာဝတ် အစွမ်းထက် ပုဂ္ဂိုလ်၏ စကားအရ သူသည် ထိုက်ရိနတ်ဘုရားမင်းဆက်၏ အစွမ်းအထက်ဆုံး ပုဂ္ဂိုလ်မဟုတ်ဘဲ အမိန့်အရ လုပ်ဆောင်နေခြင်းသာ ဖြစ်သည်။

ဧကရာဇ်တစ်ပိုင်းကို အမိန့်ပေးနိုင်ရန်မှာ မဟာဧကရာဇ်တစ်ဦးတွင်သာ အရည်အချင်းရှိသည်။

တစ်နည်းအားဖြင့်ဆိုသော်။

ထိုက်ရိနတ်ဘုရားမင်းဆက်တွင် မဟာဧကရာဇ်တစ်ပါး ရှိခဲ့ပုံရသည်။

ပို၍အရေးကြီးသည်မှာ။

နတ်ဘုရားမင်းဆက်။

၎င်းမှာ မဟာမင်းဆက်ထက်ပင် သာလွန်သည်။

ယခုလက်ရှိ မဟာမင်းဆက် အဆင့်သို့သာ ရောက်ရှိသေးသော သိုင်းနတ်ဘုရားမင်းဆက်နှင့် နှိုင်းယှဉ်လျှင် နတ်ဘုရားမင်းဆက်ဆိုသည်မှာ အဝေးကြီးပင်။

အနည်းဆုံးတော့။

ကုချင်းဖန် သိရှိထားသမျှထဲတွင်။

ရှေးဟောင်းမြင့်မြတ်သော သီးခြားနယ်မြေတွင် မဟာမင်းဆက်များ ရှိသော်လည်း နတ်ဘုရားမင်းဆက်များနှင့် ပတ်သက်၍မူ သတင်းအချက်အလက် မရှိပေ။

"အရင်က ကျန်ရစ်ခဲ့တဲ့ မသေမျိုးသွန်းလုပ်ရေးနန်းတော်ဆိုတာကလည်း ထိုက်ရိနတ်ဘုရားမင်းဆက်ရဲ့ အကြွင်းအကျန် ဖြစ်နိုင်တယ်။ နတ်ဘုရားမင်းဆက်ကနေ မသေမျိုးမင်းဆက်၊အဲဒီအထက်မှာကတော့ မသေမျိုးနန်းတော်ပဲ"

နတ်ဘုရားမင်းဆက်သည် အဆုံးစွန် မဟုတ်သော်လည်း နတ်ဘုရားမင်းဆက်တစ်ခု ဖြစ်တည်လာရန်မှာ လုံးဝမလွယ်ကူပေ။

မသေမျိုးသွန်းလုပ်ရေးနန်းတော်ထဲတွင်။

မဟာမင်းဆက်များ၏ အခြေခံအုတ်မြစ်နှင့် ပတ်သက်သော မှတ်တမ်းများ ရှိသည်။

အနိမ့်ဆုံး မဟာမင်းဆက်များပင်လျှင် မဟာသူတော်စင်နှင့် ယှဉ်နိုင်သော ချီကံကြမ္မာ များ ရှိကြပြီး အစွမ်းအထက်ဆုံး မဟာမင်းဆက်များမှာ သူတော်စင်ဘုရင်ကိုပင် နှိမ်နင်းနိုင်သည်။

မဟာမင်းဆက်များ၏ အထက်တွင်မူ နတ်ဘုရားမင်းဆက်များ ရှိသည်။

မသေမျိုးသွန်းလုပ်ရေးနန်းတော်ထဲတွင် ၎င်းတို့၏ စွမ်းအားနှင့် ပတ်သက်၍ မှတ်တမ်းမရှိသော်လည်း။

နတ်ဘုရားမင်းဆက်များသည် မဟာဧကရာဇ် အဆင့်နှင့် ပတ်သက်နေမည်ဖြစ်ကြောင်း တွေးကြည့်ရုံနှင့် သိနိုင်သည်။

မသေမျိုးမင်းဆက်နှင့် ပတ်သက်၍မူ။

၎င်းသည် ဤလောကတွင် ရှိနိုင်မည် မဟုတ်ပေ။

ဘာပဲဖြစ်ဖြစ် ရှေးဟောင်းမြင့်မြတ်သော သီးခြားနယ်မြေ၏ အကန့်အသတ်မှာ ဧကရာဇ်နယ်ပယ်ဖြစ်ပြီး ထိုထက်ကျော်လွန်ပါက ရှာဖွေရခက်ခဲသော မသေမျိုး ဖြစ်ပေလိမ့်မည်။

ထို့နောက် ကုချင်းဖန် အခြားအရာတစ်ခုကို တွေးမိပြန်သည်။

ရှေးဟောင်းမြင့်မြတ်သော သီးခြားနယ်မြေ၏ မှတ်တမ်းများတွင် ကိုးပြည်နယ်မှ အထွတ်အထိပ် အင်အားစုမှာ ရုတ်တရက် ပျောက်ကွယ်သွားခဲ့သည်ဟု ဆိုသည်။

အကယ်၍ ထိုက်ရိနတ်ဘုရားမင်းဆက်မှာ ထိုအင်အားစုသာ ဆိုပါက၊ ဧကရာဇ်နယ်ပယ်ရှိသော ထိပ်သီးနတ်ဘုရားမင်းဆက်တစ်ခုကို အသံတိတ် ပျောက်ကွယ်သွားစေနိုင်သည့် အစွမ်းမှာ အဘယ်နည်း။

"မင်းဆက်တစ်ခုလုံး နတ်ဘုရားအဖြစ် တက်လှမ်းသွားတာလား "

"ဒါမှမဟုတ် တားဆီးလို့မရတဲ့ စွမ်းအားတစ်ခုခုကြောင့် မျိုးဖြုတ်သုတ်သင်ခံလိုက်ရတာလား"

ကုချင်းဖန်၏ စိတ်ထဲတွင် အမျိုးမျိုးသော ထင်မြင်ချက်များ ပေါ်လာသော်လည်း သူ အတည်မပြုနိုင်ပေ။

မင်းဆက်တစ်ခုလုံး တက်လှမ်းသွားသည်ဟူသော အတွေးမှာ အံ့သြစရာ ကောင်းသော်လည်း တိုက်ရိုက်သုတ်သင်ခံရသည်မှာလည်း မဖြစ်နိုင်သကဲ့သို့ပင်။

ထိုက်ရိနတ်ဘုရားမင်းဆက်၏ အခြေခံအုတ်မြစ်ကို တစ်စွန်းတစ်စသာ မြင်ခဲ့ရသော်လည်း ကုချင်းဖန်သည် ထိုအင်အားစု၏ စွမ်းအားကို နားလည်သည်။

ခေါင်းကို ခါယမ်းလိုက်ရင်း။

ကုချင်းဖန် ထိုအတွေးများကို ဖယ်ထုတ်လိုက်သည်။

သူသည် သူ၏အကြည့်ကို ရှေ့ရှိ ကျောက်စာတိုင်ဆီသို့ ပြန်လည်ပို့ဆောင်လိုက်သည်။

"အဲဒီအချိန်တုန်းက ထျန်းခွေလို့ အမည်ရတဲ့ အစွမ်းထက် ပုဂ္ဂိုလ်က ထူးဆန်းတဲ့ နတ်ဘုရားကို နှိမ်နင်းခဲ့ပေမဲ့ အဲဒီနတ်ဘုရားက အမှန်တကယ် ပျောက်ကွယ်သွားမှာ မဟုတ်ဘူးဆိုတာကို သူ ကြိုမြင်ခဲ့ပုံရတယ်၊ ဒါကြောင့် နှိမ်နင်းဖို့အတွက် ဒီကျောက်စာတိုင်ကို ထားခဲ့တာပဲ။ ဒါမှမဟုတ် နတ်ဘုရားက တကယ်သေသွားပေမဲ့ အနာဂတ်မှာ ပြန်လည်ရှင်သန်လာတာမျိုး မဖြစ်အောင် ဒီကျောက်စာတိုင်ကို ထားခဲ့တာလည်း ဖြစ်နိုင်တယ်"

"ဘာပဲဖြစ်ဖြစ် အရင်က နတ်ဆိုးဝိညာဉ် ပေါ်မလာခဲ့တာက ဒီကျောက်စာတိုင်ရဲ့ နှိမ်နင်းမှု စွမ်းအားကြောင့်ပဲ"

"ဒါပေမဲ့ နှစ်ပေါင်းများစွာ ကြာလာတဲ့အခါ ကျောက်စာတိုင်ထဲက စွမ်းအားတွေက တဖြည်းဖြည်း လျော့ပါးလာပြီး နတ်ဆိုးဝိညာဉ် လွတ်မြောက်ဖို့ အခွင့်အရေး ရသွားတာပဲ"

ကုချင်းဖန်၏ မျက်လုံးများ လက်ခနဲ ဖြစ်သွားသည်။

သူ ကောက်ချက်ချနိုင်သည်။

ထိုက်ရိနတ်ဘုရားမင်းဆက်၏ နတ်ဆိုးဝိညာဉ် နှိမ်နင်းရာ နေရာများမှာ သူ၏ရှေ့မှောက်က နေရာတစ်ခုတည်း မဟုတ်နိုင်ပေ။

ထူးဆန်းသော နတ်ဘုရား ပြန်လည်ရှင်သန်လာနိုင်ခြေကို ထည့်သွင်းစဉ်းစားရင်း ကုချင်းဖန်သည် ပေါ့ဆ၍မရကြောင်း သိသည်။ သူသည် ဤနေရာကို နတ်ဘုရားကောင်းကင်မိုးကြိုးဖြင့် သန့်စင်ထားပြီးသား ဖြစ်သော်လည်း သူ၏ နတ်ဘုရားစိတ်အာရုံကို ဖြန့်ကြက်ကာ အနာဂတ်တွင် နတ်ဘုရား ပြန်လည်ရှင်သန်နိုင်မည့် မည်သည့်အခွင့်အရေးမျိုးမှ မရှိစေရန် နေရာအနှံ့ကို စေ့စေ့စပ်စပ် ရှာဖွေလိုက်သည်။

"တကယ်ရှိနေတာပဲ..."

ကုချင်းဖန်၏ နတ်ဘုရားစိတ်အာရုံမှာ ရုတ်တရက် လှုပ်ရှားသွားပြီး နတ်ဘုရား ကျဆုံးခဲ့သော နေရာတွင် အားနည်းသော်လည်း အလွန်ထူးဆန်းသော စွမ်းအားတစ်ခုကို ရှာဖွေတွေ့ရှိလိုက်သည်။

ကုချင်းဖန်က လက်ကို ဆန့်ထုတ်လိုက်ရာ သူ၏ လက်ဖဝါးထဲတွင် ယုတ်မာသော အနက်ရောင် စွမ်းအားမျှင်တစ်ခု ပေါ်လာတော့သည်။