အဂ္ဂိရတ်ပညာနှင့် လုပ်ဆောင်ချက်နယ်မြေ

[ဖွင့်လှစ်မှု မအောင်မြင်ပါ၊ သတ္တမအကြိမ် ကြိုးစားနေသည်...]

ငါ့ရဲ့ ဖန်တီးရှင် ခွင့်ပြုချက်တွေ နောက်ဆုံးတော့ ပြန်ရတော့မှာလား..။

တိုက်ခိုက်ရေးနဲ့ ပတ်သက်တဲ့ စွမ်းရည်မျိုး ဖြစ်နေမလား....။

[ဖွင့်လှစ်မှု မအောင်မြင်ပါ၊ ဖန်တီးရှင် ခွင့်ပြုချက် အစိတ်အပိုင်းတစ်ခုကို ပေးအပ်ပါသည် - အဂ္ဂိရတ်ပညာ]

"အဂ္ဂိရတ်ပညာ ဟုတ်လား။"

ကြားရတာတော့ အဆင့်မြင့်မယ့်ပုံပဲ။

ချီရွှယ်ဖေးရဲ့ ဆေးဘုရင် စွမ်းရည်နဲ့ ဆင်တူမလားပဲ။

သူသည် လက်ပတ်နာရီကို ဖွင့်ကြည့်လိုက်ရာ အဓိက လုပ်ဆောင်ချက်တွေထဲမှာ အဂ္ဂိရတ်ပညာ ဆိုတဲ့ ရွေးချယ်စရာ အသစ်တစ်ခု တိုးလာတာကို တွေ့လိုက်ရသည်။

သူ ချက်ချင်းပဲ နှိပ်ဖွင့်ကြည့်လိုက်၏။

ထိုစာမျက်နှာကား ရိုးရှင်းပါသည်၊ စာသားအနည်းငယ်နဲ့ ပုံစံထုတ်လုပ်နည်း တစ်ခုပဲ ရှိ၏။

[စွမ်းရည်: မီတာ ၅၀၀ ပတ်လည်အတွင်းရှိ အဂ္ဂိရတ်ပစ္စည်းများကို ရှာဖွေဖော်ထုတ်နိုင်သည်။]

[အဂ္ဂိရတ် ပေါင်းစပ်ဖန်တီးမှု စင်မြင့် (အပြာရောင်အဆင့်): အဂ္ဂိရတ်ပစ္စည်းများနှင့် ကုန်ချောပစ္စည်းများကို ပေါင်းစပ်ဖန်တီးရာတွင် အသုံးပြုနိုင်သည်။ လိုအပ်သည့် ပစ္စည်းများ - ကျောက်တုံး (အစိမ်းရောင်အဆင့်) ၉၀ခု ၊ ကျောက်တုံး (အပြာရောင်အဆင့်) ၁၀ခု ၊ သံတုံး (အပြာရောင်အဆင့်) ၅ခု ]

ပေါင်းစပ်ဖန်တီးမှု စင်မြင့်အသစ်ပါလား ၊ ဘာတွေ လုပ်လို့ရမလဲဆိုတာ သိချင်စမ်းပါဘိ။

အခုဆိုလျှင် မီတာ ၅၀၀ အတွင်းက အဂ္ဂိရတ်ပစ္စည်းတွေကို သူ ရှာတွေ့နိုင်ပြီဖြစ်သည်။

သူ အာရုံစိုက်ပြီး ကြည့်လိုက်တဲ့အခါ သူ့ရဲ့ ပစ္စည်းခွဲခြားနိုင်တဲ့ စွမ်းရည်ကနေ ထွက်ပေါ်နေကျ အဖြူ၊ အစိမ်း၊ အပြာ၊ ခရမ်းရောင် အလင်းတန်းတွေအပြင် အဝါရောင်အလင်းတန်း အသစ်တစ်ခုကိုပါ မြင်လိုက်ရ၏။

ဒီအလင်းတန်းက တခြားအလင်းတွေနဲ့ မတူဘဲ အကာအကွယ်တွေ ရှိနေရင်တောင် ထိုးဖောက်မြင်နေရခြင်း ဖြစ်၏။

သူ ပြတင်းပေါက်ကနေ လှမ်းကြည့်လိုက်ရာ သစ်ပင်အိမ်နဲ့ မလှမ်းမကမ်းက မြေအောက်ထဲတွင် အဝါရောင်အလင်းတန်း တစ်ခုကို တွေ့လိုက်ရသည်။

အဲဒါက အဂ္ဂိရတ်ပစ္စည်းများလား....။

ဒီစင်မြင့်ကို အရင်လုပ်ကြည့်မှပဲ ဘာပစ္စည်းတွေ ရှိလဲ အဂ္ဂိရတ်ပညာက ဘာတွေလုပ်လို့ရလဲ သိချင်နေပြီ....။

ဒါပေမဲ့ သူ့ဆီမှာ အပြာရောင်အဆင့် ကျောက်တုံးနဲ့ သံတုံးတွေက မလောက်သေးပေ။

လီဝမ်ရှီးဆီမှာတော့ ရှိမှာ သေချာတာကြောင့် သူမဆီကပဲ တောင်းရမည်။

"ထားလိုက်ပါတော့... မလောသေးပါဘူး၊ စွမ်းရည်က ပျောက်သွားမှာမှ မဟုတ်တာ။ အရင်ဆုံး အဆင့်မြင့်သွားတဲ့ သစ်ပင်အိမ်ရဲ့ စွမ်းဆောင်ရည်တွေကို အရင်ကြည့်ရအောင်။"

အလှဆင်ရမှတ်ကို ဘာအတွက် သုံးရမလဲဆိုတာကို သူ ပိုပြီး စိတ်ဝင်စားနေခြင်း ဖြစ်၏။

စာမျက်နှာတွေကို ရှာကြည့်ပြီးနောက် အလှဆင်ရမှတ် အောက်မှာ မူလကရှိတဲ့ အနုပညာရှင် ဆိုတဲ့ ကဏ္ဍအပြင် လုပ်ဆောင်ချက်နယ်မြေ ဆိုတဲ့ ကဏ္ဍသစ်တစ်ခု ပေါ်လာတာကို ရွှီရှင်း တွေ့လိုက်ရသည်။

၎င်းကို နှိပ်ဝင်လိုက်တဲ့အခါ အပေါ်ဆုံးမှာ စာသားလေး တစ်ကြောင်း ရှိနေ၏။

[လက်ရှိ အလှဆင်ရမှတ်: ၁၇၆.၄၊ စုစုပေါင်း ခွဲဝေနိုင်သည့် မြှင့်တင်မှု: ၁၇၆%]

စုစုပေါင်း မြှင့်တင်မှု ဆိုပါလား....။

ဒါက ဘာကို ဆိုလိုတာလဲ။

ခွဲဝေပေးရမယ် ဆိုတာကကော...။

ရွှီရှင်း အောက်ကို ဆက်ကြည့်လိုက်ရာ ပုံစံထုတ်လုပ်နည်း အချို့ကို တွေ့လိုက်ရသည်။

စားသောက်ခန်း ဆိုင်းဘုတ်၊ အိပ်ခန်း ဆိုင်းဘုတ်၊ မီးဖိုချောင် ဆိုင်းဘုတ်...။

"ဆိုင်းဘုတ်တွေလား.."

ရွှီရှင်း ဇဝေဇဝါ ဖြစ်သွားပြီး ထိုဆိုင်းဘုတ်တွေရဲ့ ဖော်ပြချက်ကို ချက်ချင်း စစ်ဆေးလိုက်၏။

[စားသောက်ခန်း ဆိုင်းဘုတ် (အစိမ်းရောင်အဆင့်): သစ်ပင်အိမ်အတွင်းရှိ အလုံပိတ်အခန်း တစ်ခုတွင် ချိတ်ဆွဲထားရမည်။ ထိုအခန်းကို စားသောက်ခန်းအဖြစ် သတ်မှတ်ပေးပြီး စားသောက်ချိန်တွင် အစားအစာများ၏ အာနိသင်ကို မြှင့်တင်ပေးမည်။ လိုအပ်သည့် ပစ္စည်းများ - သစ်လုံး (အစိမ်းရောင်အဆင့်) ၅ခု ၊ သစ်သား (အစိမ်းရောင်အဆင့်) ၅ခု ]

"ဒါက..."

ရွှီရှင်း မျက်လုံးတွေ ပြူးသွားပြီး အောက်ကို ဆက်ဖတ်လိုက်သည်။

[အိပ်ခန်း ဆိုင်းဘုတ် (အစိမ်းရောင်အဆင့်): သစ်ပင်အိမ်အတွင်းရှိ အလုံပိတ်အခန်း တစ်ခုတွင် ချိတ်ဆွဲထားရမည်။ ထိုအခန်းကို အိပ်ခန်းအဖြစ် သတ်မှတ်ပေးပြီး အိပ်စက်ချိန်တွင် အားအင်ပြန်လည် ပြည့်ဝမှုကို မြှင့်တင်ပေးမည်။ လိုအပ်သည့် ပစ္စည်းများ - သစ်လုံး (အစိမ်းရောင်အဆင့်) ၅ခု ၊ သစ်သား (အစိမ်းရောင်အဆင့်) ၅ခု ]

ဆိုင်းဘုတ် နှစ်ခုရဲ့ ဖော်ပြချက်ကို ကြည့်ရုံနဲ့တင် ဒီ လုပ်ဆောင်ချက်နယ်မြေ ရဲ့ အခန်းကဏ္ဍကို ရွှီရှင်း နားလည်သွားချေပြီ။

ဒါဟာ အခန်းတစ်ခုချင်းစီကို သီးသန့်စွမ်းရည်တွေ သတ်မှတ်ပေးပြီး အာနိသင်တွေကို မြှင့်တင်ပေး၏။

သာမန်အခန်းတွေကို တကယ့် စားသောက်ခန်း၊ တကယ့် အိပ်ခန်းတွေ ဖြစ်အောင် ပြောင်းလဲပေးတာပင်။

ဒီဆိုင်းဘုတ် အမျိုးအစားတွေကလည်း စုံလင်လှသည်။

စားသောက်ခန်းနဲ့ အိပ်ခန်းအပြင် မီးဖိုချောင်၊ စိုက်ပျိုးရေးခန်း၊ သတ္တုအရည်ကျိုခန်း၊ အလုပ်ရုံ၊ အနုပညာခန်းနဲ့ အခုလေးတင် ရလိုက်တဲ့ အဂ္ဂိရတ်ပညာနဲ့ ပတ်သက်တဲ့ အဂ္ဂိရတ်ခန်း ဆိုင်းဘုတ်တောင် ပါသေးသည်။

မီးဖိုချောင် ဆိုင်းဘုတ်က ချက်ပြုတ်တဲ့ အရှိန်နဲ့ အစားအသောက် အာနိသင်တွေကို မြှင့်တင်ပေးမည်။

စိုက်ပျိုးရေးခန်း ဆိုင်းဘုတ်က အပင်တွေရဲ့ ကြီးထွားနှုန်းကို မြန်စေမည်။

သတ္တုအရည်ကျိုခန်း ဆိုင်းဘုတ်က သတ္တုကျိုတဲ့ အရှိန်ကို မြန်စေပြီး တစ်ခါတရံ ကုန်ကြမ်း သုံးစွဲမှုကို လျှော့ချပေးမည်။

အလုပ်ရုံ ဆိုင်းဘုတ်က ပစ္စည်းလုပ်တဲ့ အောင်မြင်မှုကို မြှင့်တင်ပေးပြီး ကုန်ကြမ်း သုံးစွဲမှုကိုလည်း လျှော့ချပေးမည်။

အနုပညာခန်း ဆိုင်းဘုတ်ကတော့ ထွင်းထုတာ၊ ပန်းချီဆွဲတာ စတဲ့ အနုပညာ အလုပ်တွေကို ပိုပြီး မြန်မြန်ဆန်ဆန် လုပ်နိုင်စေမှာ ဖြစ်သည်။

ဒီဆိုင်းဘုတ်တွေအားလုံးဟာ လုပ်ဆောင်ချက် အမျိုးမျိုးကို ကိုယ်စားပြုနေကြခြင်းဖြစ်၏။

ဒါတွေကို လက်တွေ့စမ်းသပ်ဖို့အတွက် သူသည် အိပ်ခန်း ဆိုင်းဘုတ် တစ်ခုကို ချက်ချင်း လုပ်လိုက်သည်။

ဆိုင်းဘုတ်က နာမည်ကတ်ပြား တစ်ခုလောက်ပဲ ရှိပြီး အပေါ်မှာ ကုတင်ပုံလေး ဆွဲထားကာ အောက်မှာတော့ စာသားလေး တစ်ကြောင်း ပါရှိသည်။

[မြှင့်တင်မှု အတိုင်းအတာ: ၀%]

ရွှီရှင်းသည် ထိုဆိုင်းဘုတ်ကို နံရံမှာ ချိတ်လိုက်၏။

[အခန်းအတွင်း၌ အိပ်ခန်း ဆိုင်းဘုတ် ရှိနေကြောင်း စစ်ဆေးတွေ့ရှိရပါသည်။ ဤအခန်းကို အိပ်ခန်းအဖြစ် သတ်မှတ်မည်လား။ သတ်မှတ်ပြီးနောက် ၇ ရက်အတွင်း ပြန်လည်ပြင်ဆင်၍ မရနိုင်ပါ၊ သေသေချာချာ ရွေးချယ်ပေးပါ။]

ရွှီရှင်းက ဟုတ်ကဲ့ ကို တန်းရွေးလိုက်သည်။

ဒီအခန်းမှာ အစကတည်းက အိပ်ခန်း ဖြစ်၏။

"ဒင်"

[ဤအခန်းကို အိပ်ခန်းအဖြစ် သတ်မှတ်ပြီးပါပြီ၊ မြှင့်တင်မှု အတိုင်းအတာကို ခွဲဝေပေးမည်လား။ ခွဲဝေပြီးနောက် ပြန်ဖျက်၍ မရနိုင်ပါ၊ သေသေချာချာ ရွေးချယ်ပေးပါ။]

[လက်ရှိ စုစုပေါင်း ခွဲဝေနိုင်သည့် မြှင့်တင်မှု: ၁၇၆%]

ပြန်ဖျက်လို့ မရဘူးလား....။

ရွှီရှင်း မျက်မှောင်ကြုတ်ရင်း စမ်းသပ်တဲ့အနေနဲ့ ၁% ကို ခွဲဝေပေးလိုက်၏။

ဆိုင်းဘုတ်ပေါ်က စာသားက ၀% ကနေ ၁% လို့ ချက်ချင်း ပြောင်းသွားသည်။

ဒါပေမဲ့ ၁% ဆိုတာ နည်းလွန်းတာကြောင့်ရော သူ အိပ်ပျော်နေတာမဟုတ်ကြောင့်ရော ဘာထူးခြားမှုကိုမှ မခံစားရပေ။

လုပ်ဆောင်ချက်နယ်မြေ စာမျက်နှာပေါ်က စုစုပေါင်း ခွဲဝေနိုင်သည့် မြှင့်တင်မှု ရမှတ်ကလည်း ၁၇၅% လို့ ပြောင်းသွားချေပြီ။

ရွှီရှင်း ဆက်ပြီး စမ်းကြည့်တဲ့အခါ ဒီရမှတ်ကို ထပ်တိုးလို့ပဲ ရပြီး ပြန်လျှော့လို့ မရတာကို တွေ့လိုက်ရသည်။

၁% ပေးပြီးတာနဲ့ အဲဒါက အတည်ဖြစ်သွားတာပေါ့....။

ဆိုင်းဘုတ်ကို နံရံကနေ ပြန်ဖြုတ်ဖို့ လုပ်ကြည့်တော့လည်း ၇ ရက်ပြည့်မှ ပြန်ယူလို့ရမယ်ဆိုတဲ့ အသိပေးချက် တက်လာသည်။

ရွှီရှင်း ခဏတာ စဉ်းစားပြီးနောက် အားလုံးကို နားလည်သွားတော့သည်။

အလှဆင်ရမှတ်ကနေ ရလာတဲ့ ရာခိုင်နှုန်း မြှင့်တင်မှုတွေဟာ အလိုအလျောက် မြှင့်ပေးတာ မဟုတ်ဘဲ လုပ်ဆောင်ချက် နယ်မြေတစ်ခုချင်းစီကို ကိုယ်တိုင် ခွဲဝေပေးရတာ ဖြစ်သည်။

ဂိမ်းတွေထဲက စွမ်းရည်ရမှတ် တွေလိုပင် စုစုပေါင်း ရမှတ်ကို ကိုယ်နှစ်သက်တဲ့ နေရာတွေမှာ ခွဲပေးရခြင်းဖြစ်သည်။

ဥပမာအားဖြင့် သူက ဒီ ၁၇၆% လုံးကို အိပ်ခန်းမှာပဲ ပုံပေးလိုက်လျှင် တခြား အခန်းတွေအတွက် ဘာမှ ကျန်မှာ မဟုတ်တော့ပေ။

ထပ်ပြီး မြှင့်ချင်ရင်တော့ အလှဆင်ရမှတ် တိုးအောင် ထပ်လုပ်ရမည်ဖြစ်သည်။

ဒီလုပ်ဆောင်ချက်က တကယ်ကို အသုံးဝင်လှ၏။

သူ့အတွက်တင် မဟုတ်ဘဲ အသက်ရှင်ကျန်ရစ်သူ အားလုံးအတွက်ပါ ကြီးမားတဲ့ အပြောင်းအလဲ ဖြစ်သည်။

သာမန်လူတွေက အလှဆင်ရမှတ် နည်းမယ်ဆိုရင်တောင် သူတို့ရတဲ့ ရမှတ်တွေကို လုပ်ဆောင်ချက် တစ်ခုတည်းမှာပဲ ပုံအောပြီး အထူးပြု လုပ်လို့ ရ၏။

ဥပမာအားဖြင့် တစ်ယောက်ယောက်က အပင်စိုက်တာ ဝါသနာပါလျှင် သစ်ပင်အိမ် တစ်ခုလုံးကို စိုက်ပျိုးရေးခန်းအဖြစ် ပြောင်းပြီး ရသမျှ ရမှတ်တွေ အကုန်အဲဒီမှာ ပုံပေးလိုက်လျှင် သူစိုက်တဲ့ အပင်တွေက တခြားသူတွေထက် အများကြီး ပိုမြန်မြန် ကြီးထွားလာမည်ဖြစ်သည်။

မီးဖိုချောင်မှာ ပုံပေးလိုက်လျှင်လည်း သူချက်တဲ့ အစားအစာတွေက အာနိသင် ပိုထူးကဲမှာ ဖြစ်သည်။

ဒါဟာ သစ်ပင်အိမ်ကို စွမ်းရည်ရမှတ်တွေ ပေးလိုက်တာနဲ့ တူ၏။

အရင် သစ်ပင်အိမ်က သာမန်အခန်းတွေနဲ့ တူနေပေမဲ့ အခုတော့ အသက်ရှင်ကျန်ရစ်သူတွေဟာ ကိုယ့်သစ်ပင်အိမ်ကို ဘယ်လမ်းကြောင်းကို ဦးတည်ပြီး မြှင့်တင်မလဲဆိုတာ ရွေးချယ်နိုင်သွားကြချေပြီ။

ရွှီရှင်းရဲ့ သစ်ပင်အိမ်က သူများတွေထက်ကြီးမားရာ အိပ်ခန်း၊ စားသောက်ခန်း၊ မီးဖိုချောင်၊ စိုက်ပျိုးရေးခန်း၊ အလုပ်ရုံ စသဖြင့် အကုန်ရှိနေ၏။

ပြီးတော့ သူ့ရဲ့ အလှဆင်ရမှတ်ကလည်း မြင့်တာကြောင့် ရွေးချယ်စရာတွေ အများကြီး ရှိနေသည်။

တစ်ခုတည်းကိုပဲ အားစိုက်မလား၊ ဒါမှမဟုတ် မျှမျှတတ ခွဲဝေပေးမလား ဆိုတာပဲ စဉ်းစားရမှာ ဖြစ်သည်။

"ထားလိုက်ပါတော့... အခုလောလောဆယ် ဒါတွေကို မစဉ်းစားသေးဘူး။"

သူ့ရဲ့ အကြားအာရုံက မြှင့်တင်ထားတဲ့အတွက် ကြောင့် ခေါင်းထဲမှာ အသံတွေ အများကြီးနဲ့ အာရုံစိုက်ဖို့ ခက်နေသည် မဟုတ်ပါလား။

ဒီကိစ္စကို စူးစမ်းရှာဖွေသူများအဖွဲ့ဝင်တွေနဲ့ နောက်မှပဲ ဆွေးနွေးတော့မည်။

အဖွဲ့ဝင် တစ်ယောက်ချင်းစီက တစ်ခုစီကို အထူးပြုပြီး လုပ်နိုင်မည်ဆိုလျှင်တော့ အကောင်းဆုံးပင်။

အရင်ဆုံး အဆင့်သတ်မှတ်ချက်စာရင်းက ဆုတွေကို အရင်ယူရမည်။

သူသည် အဆင့်သတ်မှတ်ချက်စာရင်း ကို ဖွင့်လိုက်ရာ သစ်ပင်အိမ် ကာကွယ်ရေးတိုက်ပွဲ အတွက် အဆင့်စာရင်း ပေါ်လာသည်။

ထင်ထားတဲ့အတိုင်း သူကတော့ စာရင်းထဲမှာ ပါနေတုန်းပင်။

[ဤအရာသည် အထူးအဆင့်သတ်မှတ်ချက်စာရင်း ဖြစ်ပါသည်။ အဆင့်အစီအစဉ်ကို ကျပန်းသတ်မှတ်ထားပြီး ဆုလာဘ်များမှာ အတူတူပင် ဖြစ်ပါသည်။]

ဒါဟာ နယ်မြေပေါင်းစုံက လူတွေပါဝင်တဲ့ စာရင်းတစ်ခုဖြစ်၏။

အစီစဉ်က ကျပန်းဆိုပေမဲ့ သူ့နာမည်ကတော့ တောအုပ် ၁၈၈ နယ်မြေ ဆိုတဲ့ အမှတ်အသားနဲ့အတူ အပေါ်ဆုံးမှာ ထင်ထင်ရှားရှား ရှိနေသည်။

ဒီတစ်ခါ စာရင်းမှာ လူပေါင်း ငါးရာကျော် ပါဝင်နေတာကြောင့် အရင်ကထက် အများကြီး ပိုများလာ၏။

ရွှီရှင်း အပေါ်ကနေ အောက်ကို ကြည့်လိုက်တဲ့အခါ တောအုပ် ၁၈၈ နယ်မြေကနေ သူ့အပြင် ဝမ်ကွေ့ရှင်း၊ ကျိချောင်းယန်နဲ့ ဝမ်လေ့တို့ပါ ပါနေတာကို တွေ့လိုက်ရသည်။

စာရင်းထဲပါတဲ့ လူတွေဟာ မြေအောက်က ဗီဇပြောင်းအပင် နှလုံးသားကို သတ်နိုင်ခဲ့တဲ့သူတွေ ဖြစ်ရပေမည်။

ရွှီရှင်းသည် ဆုယူရန် ခလုတ်ကို နှိပ်လိုက်၏။

[ဆုလာဘ်ကို ရရှိပါသည်: အလှဆင်ရမှတ် မြှင့်တင်မှု။ ဤဆုကို ရရှိသူများသည် မူလ အလှဆင်ရမှတ်အပေါ် အခြေခံ၍ ၂၀% ထပ်မံ တိုးမြှင့်ရရှိမည် ဖြစ်ပါသည်။]

"ဝိုး"

အလှဆင်ရမှတ်ရဲ့ အာနိသင်ကိုသာ စောစောက မသိခဲ့လျှင် ဒီဆုကို သူ သိပ်ပြီး အထင်ကြီးမှာ မဟုတ်ပေ။

ဒါပေမဲ့ အခုတော့ လုပ်ဆောင်ချက်နယ်မြေ ဆိုတဲ့ လုပ်ဆောင်ချက်အသစ်နဲ့ ပေါင်းလိုက်တဲ့အခါ ဒါဟာ နောက်ထပ် မြှင့်တင်မှု ၂၀% အပိုရလိုက်တာနဲ့ အတူတူပင်။

အလှဆင်ရမှတ်က ချက်ချင်းဆိုသလို ခုန်တက်သွားတော့သည်။

[လက်ရှိ အလှဆင်ရမှတ်: ၂၁၁.၆၈ (၁၇၆.၄ + ၃၅.၂၈)၊ စုစုပေါင်း ခွဲဝေနိုင်သည့် မြှင့်တင်မှု: ၂၁၀%]

အလှဆင်ရမှတ် ၃၅ မှတ်နီးပါး ချက်ချင်း တိုးသွားရုံတင်မကဘဲ နောက်ပိုင်း သူထွင်းမယ့် ရုပ်တုတွေ၊ ဆွဲမယ့် ပန်းချီတွေအားလုံးဟာလည်း ကိုယ့်အတွက်ကိုယ် သုံးမယ်ဆိုလျှင် ၂၀% အပို အလှဆင်မှု ရရှိမှာ ဖြစ်သည်။

ဒါတွေကတော့ သစ်ပင်အိမ် အဆင့်မြှင့်ပြီးနောက် ရလာတဲ့ လုပ်ဆောင်ချက် အသစ်တွေဖြစ်၏။

ခြုံငုံကြည့်ရလျှင် ဒီတစ်ခါ အဆင့်မြှင့်တင်မှုဟာ သစ်ပင်အိမ်ရဲ့ စွမ်းဆောင်ရည်တွေကို အများကြီး တိုးတက်သွားစေသည်။

ပြင်ပ ကာကွယ်ရေးနယ်မြေက ၃ ကီလိုမီတာ ပိုကျယ်လာပြီး ကာကွယ်နိုင်စွမ်း မြင့်တက်လာရုံတင်မကဘဲ အတွင်းပိုင်းမှာလည်း စွမ်းရည်ရမှတ် ခွဲဝေပေးခြင်း နှင့် လုပ်ဆောင်ချက်တွေကို မြှင့်တင်နိုင်သွားပြီ ဖြစ်သည်။

အရင်က သစ်ပင်အိမ်နဲ့ နှိုင်းယှဉ်လျှင်တော့ အခု သစ်ပင်အိမ်က ဘယ်လောက်အထိ ပိုပြီး အစွမ်းထက်သွားလဲဆိုတာ မခန့်မှန်းနိုင်တော့ပေ။

---

အခန်း ၁၈၁ ပြီး။