အခန်း (၆၀၉-၆၁၀)

အခန်း ၆၀၉ ချောက်နက်တာအိုပင်လယ်သို့ ဆင်းသက်ခြင်း

စစ်ခုံရုံးသည် မဟာကောင်းကင်နှင့်မြေကြီးအထက်ရှိ ထူးကဲသော အင်အားစုတစ်ခု ဖြစ်သည့်အတွက် ၎င်း၏ လက်အောက်တွင် မရေမတွက်နိုင်သော သတ္တဝါများ ရှိနေပြီး အများစုမှာ အတင်းအဓမ္မ ခိုင်းစေခံထားရသူများ ဖြစ်ကြသည်။

ကုအန်သည် စစ်ခုံရုံးအတွက် ကျင့်ကြံခြင်း အထောက်အပံ့များ တူးဖော်ပေးနေရသည့် ကျွန်ပြုခံထားရသော လူမျိုးနွယ်စုများစွာကိုပင် မြင်တွေ့ခဲ့ရ၏။

သူသည် အမတဧကရာဇ်၏ ခမ်းနားသော ခန်းမဆောင်အတွင်း၌ ရပ်လျက် ခါးမှ ယန်ဟုန်ဓားကို ဆွဲထုတ်လိုက်သည်။

ယန်ဟုန်ဓားမှာ သာမန် ရတနာဓားတစ်ချောင်းမျှသာ ဖြစ်သော်လည်း ရဲလန် ပေးအပ်ခဲ့သော လက်ဆောင်ဖြစ်သည့်အတွက် သူ အနှစ်သက်ဆုံး ဓားဖြစ်နေဆဲပင်။

သူသည် ဓားကို ပေါ့ပေါ့ပါးပါးပင် ရှေ့သို့ ဝှေ့ယမ်းလိုက်သော်လည်း ထိုဓားချက်ဖြင့်ပင် စစ်ခုံရုံး၏ ကံကြမ္မာကို ပိုင်းဖြတ်လိုက်လေသည်။

သူသည် လုံမျိုးနွယ်အပေါ် အငြိုးအတေး ထားရှိသူများကို အကြောင်းနှင့်အကျိုး စွမ်းအားကို အသုံးပြု၍ စတင် သုတ်သင်လိုက်သည်။ နောင်တွင် လုံမျိုးနွယ်ကို မည်သူက ပစ်မှတ်ထားမည်နည်းဆိုသည်ကို တွက်ချက်လိုက်ရုံသာ ဖြစ်၏။

၎င်းအပြင် ကုအန်သည် သတ်ဖြတ်မှုများ အလွန်အကျွံ ပြုလုပ်ထားသော စစ်ခုံရုံးမှ သတ္တဝါများကိုလည်း ရှင်းလင်းပေးလိုက်သည်။

စစ်ခုံရုံး လက်အောက်ရှိ သတ္တဝါ အရေအတွက်မှာ အလွန်များပြားလှသဖြင့် အားလုံးကို သတ်ဖြတ်ခြင်းက ပြဿနာကြီးကြီးမားမား ဖြစ်ပေါ်စေနိုင်ပြီး အထူးသဖြင့် ကောင်းကင်နန်းတော်ကို ဆွပေးသကဲ့သို့ ဖြစ်သွားပေလိမိမည်။

ကုအန်၏ ကျင့်စဉ်စွမ်းအားမှာ နက်နဲလှသော်လည်း ကောင်းကင်နန်းတော်၏ အကြောင်းနှင့်အကျိုးကိုမူ ယခုထိ မတွက်ချက်နိုင်သေးပေ။

အကြောင်းနှင့်အကျိုး စွမ်းအားကြောင့် ရန်သူများမှာ မသိမသာ သေဆုံးကုန်ကြ၏။ စစ်ခုံရုံး၏ ကံကြမ္မာ ပြိုလဲသွားသည်နှင့်အမျှ ကြယ်တာရာ ကောင်းကင်ယံရှိ နန်းတော်များ၊ မြို့ကြီးများနှင့် မျှော်စင်များမှာ စတင် ပျက်စီးလာတော့သည်။

သတ္တဝါများစွာမှာ ထွက်ပြေးရန် ကြိုးစားကြသော်လည်း အမြင်အာရုံများ ဝေဝါးလာပြီး အသိစိတ်များ အမှောင်ထုထဲသို့ နစ်မြုပ်သွားကြရ၏။

သူတို့ သေဆုံးသွားကြပြီး သူတို့၏ တာအိုလမ်းစဉ်များလည်း ပျက်သုဉ်းသွားခဲ့သည်။

ဘေးဒုက္ခမှာ ရုတ်တရက် ကျရောက်လာခြင်းဖြစ်ရာ သေဆုံးသူများမှာ တုံ့ပြန်ရန်ပင် အချိန်မရလိုက်ကြချေ။

စစ်ခုံရုံး၏ ကံကြမ္မာကြောင့် ယခုလေးတင် အသက်ပြန်ရှင်လာခဲ့သော ကျင့်ကြံသူများသည် စစ်နတ်ဘုရားဘိုးဘေးနဂါး ဓမ္မရုပ်သွင်၏ ကြောက်မက်ဖွယ်ကောင်းပုံကို ဆွေးနွေးနေကြတုန်းမှာပင် တစ်ယောက်ပြီးတစ်ယောက် ပျက်စီးသွားကြရသည်။

နောက်မှ သေဆုံးရသူများမှာ ပို၍ ခံစားရသည်။ သူတို့၏ စိတ်ဝိညာဉ်ကို စိတ်ပျက်အားငယ်မှုများက တိုက်ခိုက်နေသော်လည်း သူတို့မှာ ဘာမှ မတတ်နိုင်ဘဲ စောင့်ဆိုင်းနေရုံသာ ရှိတော့၏။

စစ်ခုံရုံးအတွင်းမှ ဆူညံသံများ ထွက်ပေါ်လာသော်လည်း မကြာမီမှာပင် ထိုအသံများ ပျောက်ကွယ်သွားသည်။

စကြဝဠာကြီးမှာ တဖြည်းဖြည်း မှောင်မိုက်သွားပြီး တာအိုစည်းမျဉ်းများမှ မွေးဖွားလာသော ဧရာမ ဖြစ်တည်မှုကြီး၏ ငြိမ်သက်စွာ သေဆုံးခြင်းကို ကြေညာလိုက်တော့သည်။

"ဟူး..."

ဖန်းရွှမ်သည် ရုတ်တရက် မျက်လုံးများကို ဖွင့်လိုက်ပြီး အသက်ကို ပြင်းပြင်းရှူနေရကာ တစ်ကိုယ်လုံး ချွေးများဖြင့် ရွှဲနစ်နေသည်။ သွေးရောင်လွှမ်းနေသော သူ၏ မျက်လုံးများတွင် ကြောက်ရွံ့မှုများ ပြည့်နှက်နေ၏။

သူ ထထိုင်လိုက်ပြီး ခေါင်းလှည့်ကြည့်လိုက်ရာ ခြောက်သွေ့သော တောင်ကုန်းတစ်ခုပေါ်တွင် ရောက်နေကြောင်း တွေ့လိုက်ရသည်။ ဤနေရာရှိ ပါးလွှာသော ဝိညာဉ်စွမ်းအင်များကြောင့် ဤသည်မှာ သေမျိုးနယ်မြေဖြစ်ကြောင်း သူ ချက်ချင်း သဘောပေါက်လိုက်၏။

ငါ မသေသေးဘူးလား...

ဖန်းရွှမ် အလွန် ဝမ်းသာသွားသည်။ အကယ်၍ သူ သေဆုံးသွားပြီး အသက်ပြန်ရှင်လာခဲ့လျှင် သူသည် စစ်ခုံရုံးအတွင်း၌သာ ရှိနေသင့်သည် မဟုတ်ပါလား။ ဆိုလိုသည်မှာ သူ၏ ပြိုင်ဘက်က သူ့ကို အသက်ရှင်ခွင့် ပေးလိုက်ခြင်း ဖြစ်ပေလိမိမည်။

စစ်ခုံရုံးအတွင်း၌ အသက်ပြန်ရှင်နိုင်လျှင်ပင် ဖန်းရွှမ်မှာ မသေချင်တော့ပေ။ သေဆုံးခြင်းက သူ၏ ကျင့်ကြံမှုအဆင့်နှင့် ကံတရားကို လျော့နည်းစေသောကြောင့် ဖြစ်သည်။

စစ်ခုံရုံး၏ ကြီးမားသော ဆုံးရှုံးမှုများကို တွေးမိသောအခါ ဖန်းရွှမ်သည် ၎င်း၏ အသက်စွမ်းအားမှာ ဆိုးရွားစွာ ထိခိုက်သွားပြီဖြစ်ပြီး နောက်ပိုင်းတွင် အခြားရန်သူများ၏ တိုက်ခိုက်မှုကို ခံရနိုင်ကြောင်း ခံစားလိုက်ရသည်။

စစ်ခုံရုံး... ပြန်လမ်းမရှိတော့ဘူး။

ကောင်းကင်စိတ်ဝိညာဉ်မဟာကမ္ဘာမှ ထိုကြောက်မက်ဖွယ်ကောင်းသော ပုဂ္ဂိုလ်ကြီးသည် စစ်ခုံရုံးကို ဆက်လက် လက်စားချေလိမ့်မည်ဟု ဖန်းရွှမ် ခံစားနေရသည်။

သူ မတ်တတ်ထရပ်လိုက်ရာ နေရောင်ခြည်က သူ၏ ကိုယ်ပေါ်သို့ ကျရောက်လာသဖြင့် အသစ်တစ်ဖန် ပြန်လည်မွေးဖွားလာသကဲ့သို့ ခံစားလိုက်ရ၏။

"စစ်ခုံရုံး အထက်ပိုင်းကလူတွေက ဒီလောက်အစွမ်းထက်တဲ့လူကို သွားပြီး ရန်စတာ တကယ့်ကို မိုက်မဲလွန်းတာပဲ... ငါတော့ အသက်ရှင်ဖို့ လမ်းသစ် ရှာရတော့မယ်..." ဖန်းရွှမ် တီးတိုးရေရွတ်လိုက်ပြီး ပြီးခဲ့သော တိုက်ပွဲအကြောင်း တွေးမိရုံဖြင့် တုန်ရီနေမိဆဲပင်။

ထိုကြောက်မက်ဖွယ်ကောင်းသော ပုဂ္ဂိုလ်ကြီး၏ ရန်သူအဖြစ် သူ မနေရဲတော့ပေ။ သူနှင့် ဝေးနိုင်သမျှ ဝေးဝေးတွင်သာ နေလိုတော့သည်။

သူသည် အရပ်မျက်နှာတစ်ခုသို့ ခုန်တက်လိုက်ပြီး လန့်သွားသော ငန်းတစ်ကောင်အလား ကောင်းကင်ယံသို့ ပျံသန်းကာ မျက်စိတစ်မှိတ်အတွင်း ပျောက်ကွယ်သွားတော့သည်။

သက်တမ်းတာအိုနယ်မြေ၊ ခြံဝင်းအတွင်း၌ ကုအန်သည် ရတနာသွန်းလုပ်သည့် မီးဖိုရှေ့တွင် ရပ်လျက် အတွင်းမှ တာအိုရတနာများကို ကြည့်ရှုနေသည်။

ထျန်းယောင်အာသည် သူ၏ ဘေးတွင် ရပ်ကာ စိတ်ဝင်တစား စောင့်ကြည့်နေ၏။ စစ်ခုံရုံး ပျက်စီးသွားခဲ့သည်မှာ နှစ်ဝက်ခန့် ရှိပြီဖြစ်သည်။ သက်ရှိအားလုံးမှာ အိပ်မက်တစ်ခု မက်ခဲ့သကဲ့သို့ ခံစားနေရဆဲပင်။

ဤကပ်ဘေးကြီးပြီးနောက် ကောင်းကင်စိတ်ဝိညာဉ်မဟာကမ္ဘာမှ ဂိုဏ်းအသီးသီးတို့သည် ဖိအားများကို ခံစားလာရသဖြင့် ပေါ့ပေါ့ဆဆ မနေကြတော့ဘဲ တစ်ကမ္ဘာလုံးတွင် တံခါးပိတ်ကျင့်ကြံသည့် အလေ့အထကြီးတစ်ခု ဖြစ်ပေါ်လာခဲ့သည်။

"ဆရာသခင်... စစ်ခုံရုံးက တကယ်ပဲ ပျောက်ကွယ်သွားပြီလားဟင်" ထျန်းယောင်အာက မနေနိုင်ဘဲ မေးလိုက်သည်။

ကုအန်က ပေါ့ပေါ့ပါးပါးပင် "ပျောက်ကွယ်သွားသည်ဖြစ်စေ၊ မပျောက်ကွယ်သွားသည်ဖြစ်စေ မင်းနဲ့ ဘာဆိုင်လို့တုန်း... ကျင့်ကြံတာကိုပဲ အာရုံစိုက်စမ်းပါ... အပြင်မှာရှိတဲ့ ကျင့်ကြံသူတွေဆိုရင် အရင်ကထက် ပိုပြီး ကြိုးစားနေကြပြီ"

သူသည် အဆင့်တက်ရန် စဉ်းစားနေခြင်း ဖြစ်သည်။

ဤတိုက်ပွဲပြီးနောက် သူ အဆင့်တက်ရမည့်အချိန် ရောက်ပြီ ဖြစ်၏။ သူသည် သူ၏ အချက်အလက်စာမျက်နှာကို ထုတ်ကြည့်လိုက်သည်။

[အမည် - ကုအန်]

[သက်တမ်း - ၂၂,၀၉၈ / ၈၃၁,၀၀၈,၆၇၈,၁၄၆]

[ခန္ဓာကိုယ် - ကမ္ဘာဦးပြန်လည်မွေးဖွားခြင်းအမတခန္ဓာ]

[ကျင့်ကြံမှုအဆင့် - ထိုက်ချင်းရွှေအမတအဆင့် ပြည့်စုံခြင်း]

...

သက်တမ်း ၈၃၀ ဘီလီယံကျော်

ဤတိုက်ပွဲက သူ၏ သက်တမ်းကို ၆၀၀ ဘီလီယံ ၇၀၀ ဘီလီယံအထိ တိုးပွားစေခဲ့ရာ နှစ်ပေါင်း နှစ်သောင်းကြာ အလုပ်လုပ်ခဲ့ရသည်ထက်ပင် သာလွန်နေသေးသည်။ ၎င်းအပြင် စစ်ခုံရုံးထံမှ ရတနာများစွာကိုလည်း သူ သိမ်းပိုက်နိုင်ခဲ့၏။ သူသည် ထိုရတနာများ၏ ထက်ဝက်ကို ကောင်းကင်စိတ်ဝိညာဉ်မဟာကမ္ဘာအတွင်းသို့ သက်ရှိအားလုံးအတွက် အခွင့်အလမ်းများအဖြစ် ဖြန့်ဝေပေးရန် ရည်ရွယ်ထားသည်။

လုံမျိုးနွယ်အတွက် အငြိုးအတေးများကို ဖြေရှင်းပေးရန်အတွက် သူသည် စစ်ခုံရုံးအတွင်းရှိ လုံမျိုးနွယ်ကို ခြိမ်းခြောက်နိုင်သည့် သတ္တဝါအားလုံးကို သုတ်သင်လိုက်ခြင်း ဖြစ်သည်။ အရေအတွက်မှာ အလွန်များပြားလှသဖြင့် သူ၏ ရင်ထဲတွင်လည်း ခံစားချက်များ ဖြစ်ပေါ်နေ၏။

စစ်ခုံရုံးမှ သတ္တဝါအားလုံးကို မချေမှုန်းခဲ့သော်လည်း ယနေ့မှစ၍ စစ်ခုံရုံးဟူသည်မှာ ရှိတော့မည် မဟုတ်ပေ။

ကုအန်သည် စူးစမ်းလိုစိတ်ဖြင့် ကောင်းကင်စိတ်ဝိညာဉ်မဟာကမ္ဘာဆီသို့ ချဉ်းကပ်လာနေသော အားကောင်းသည့် အကြောင်းနှင့်အကျိုး စွမ်းအားများကို ခံစားမိနေသည်။

စစ်ခုံရုံး ပျက်စီးသွားခြင်းက နောက်ဆုံးတွင် အင်အားကြီး အဖွဲ့အစည်းများစွာ၏ အာရုံစိုက်မှုကို ရရှိသွားခဲ့ခြင်း ဖြစ်ပေသည်။

"ကျွန်မ ကြိုးစားပြီး ကျင့်ကြံပါ့မယ်... ဒါပေမဲ့ လွတ်ငြိမ်းရာအမတအဆင့်ကို ရောက်ဖို့ ဘယ်နှစ်နှစ်လောက် ကြာမလဲ မသိဘူး... ကျင့်ကြံလေလေ ဆရာနဲ့ ကျွန်မကြားက ကွာဟချက်က ပိုကြီးလာတယ်လို့ ခံစားရလေလေပဲ... ဆရာက အခုဆို အသက် ဘယ်လောက်ရှိပြီလဲဟင်" ထျန်းယောင်အာက လွမ်းဆွတ်တမ်းတဟန်ဖြင့် မေးလိုက်ရာ ဤသည်မှာ သူတို့ကြားတွင် မကြာခဏ ပြောဖြစ်သည့် အကြောင်းအရာတစ်ခု ဖြစ်သည်။

ကုအန်နှင့် တွေ့ဆုံချိန်ကတည်းက သူသည် လက်ရှိ အစွမ်းအတိုင်း ရှိနေခဲ့သည်ဟု လူတိုင်းက ထင်မြင်နေကြသည်။ ကုအန်မှာ အခက်အခဲဖြစ်နေသည်ကိုလည်း သူတို့ တစ်ခါမျှ မမြင်ဖူးကြချေ။

အခက်အခဲ ဖြစ်နေသည်ကို မဆိုထားနှင့်၊ ကုအန် စိုးရိမ်ပူပန်နေသည့် ပုံစံကိုပင် သူတို့ မမြင်ဖူးကြပေ။ ဤမျှ ပြိုင်ဘက်ကင်းသော ကျင့်ကြံမှုအဆင့်မျိုးနှင့်ဆိုလျှင် စိုးရိမ်ပူပန်ရန် ခက်ခဲလိမ့်မည်မှာ အမှန်ပင်။

ကုအန်က ထျန်းယောင်အာကို လှည့်ကြည့်ပြီး ဘာမှမပြောဘဲ သူမ၏ ခေါင်းကိုသာ ပွတ်သပ်ပေးလိုက်သည်။

သူသည် သူ၏ စိတ်ထဲတွင်သာ ပြန်ဖြေလိုက်၏။

'တကယ်တော့ ငါက မင်းထက် သိပ်ပြီး အသက်မကြီးပါဘူး...'ထျန်းယောင်အာကတော့ ဆက်တိုက် စကားပြောနေဆဲပင်။ သူမတွင် မေးစရာ မေးခွန်းများမှာ မကုန်နိုင်အောင် ရှိနေပုံရသည်။

သူ၏ ကျင့်ကြံမှုအဆင့်နှင့် မသက်ဆိုင်သရွေ့ ကုအန်က စိတ်ရှည်လက်ရှည် ပြန်ဖြေပေးလေ့ရှိသည်။

သို့သော် သူ၏ စိတ်ကမူ အဆင့်တက်မည့်အရေးကိုသာ ရောက်ရှိနေပြီ ဖြစ်၏။

သက်တမ်း ၈၃၀ ဘီလီယံဆိုလျှင် ပိုမိုမြင့်မားသော အဆင့်တစ်ခုသို့ တက်လှမ်းရန် လုံလောက်ပါ့မလား။

သက်တမ်း ၁ ထရီလီယံ ပြည့်မှ ရရှိမည့် လုပ်ဆောင်ချက်အသစ်ကို စောင့်သင့်သလားဟု သူ တွန့်ဆုတ်နေမိသော်လည်း ကောင်းကင်စိတ်ဝိညာဉ်မဟာကမ္ဘာသို့ ချဉ်းကပ်လာနေသော အင်အားစုများကို တွေးမိသောအခါ မစောင့်နိုင်တော့ဟု သူ ခံစားလိုက်ရသည်။

အဆင့်တက်ဖို့က ပထမဆုံးပဲ...

ကုအန်၏ အမူအရာ တည်ကြည်သွားပြီး ဒီညမှာပင် အဆင့်တက်ရန် ဆုံးဖြတ်လိုက်၏။

ထိုအချိန်အတွင်း သက်တမ်းနယ်မြေမှ တပည့်များက သူ့ထံသို့ တစ်ယောက်ပြီးတစ်ယောက် လာရောက်လည်ပတ်ကြသဖြင့် ခြံဝင်းအတွင်း၌ စည်ကားနေသည်။

နေဝင်၍ လထွက်ပေါ်လာသောအခါ ကုအန်သည် ရတနာသွန်းလုပ်သည့် မီးဖို နောက်ကို စောင့်ကြပ်နေသော ရှန်ကျန်းကို စကားပြောပြီးနောက် ခြံဝင်းထဲမှ လမ်းလျှောက်ထွက်လာခဲ့သည်။

လရောင်အောက်တွင် သက်တမ်းတာအိုနယ်မြေမှာ ဆေးဖက်ဝင်ဥယျာဉ်များနှင့် အံ့ဖွယ်သစ်ပင်များဖြင့် လှပတင့်တယ်နေ၏။ အချို့မှာ မှိန်ပျပျ အလင်းရောင်များ ဝန်းရံနေပြီး အချို့မှာမူ စပျစ်နွယ်များကို တွန့်လိမ်လျက် သက်ရှိထင်ရှား ရှိနေကြသည်။

ကုအန်သည် နယ်မြေအတွင်းရှိ ရှုခင်းများကို ခံစားရင်း လမ်းလျှောက်လာခဲ့သည်။ သူသည် ဖူယို သရဲမယ်တော်အပေါ် အလွန်ကျေနပ်နေမိ၏။ သူမသည် ဆေးအပင် ထုတ်လုပ်မှုကို ကူညီပေးရုံသာမက နယ်မြေကိုလည်း ပိုမိုလှပအောင် ဖန်တီးပေးခဲ့သည် မဟုတ်ပါလား။

သာယာလှပသော ပတ်ဝန်းကျင် ရှိနေခြင်းက အမြဲတမ်း ကောင်းမွန်သော အရာတစ်ခုပင်။

နယ်မြေ၏ အစွန်းသို့ ရောက်သောအခါ ကုအန်သည် ရေကန်တစ်ခု၏ ဘေးတွင် ရပ်လိုက်ပြီး သက်တမ်းအဆင့်ချိုးဖျက်ခြင်း လုပ်ဆောင်ချက်ကို စတင်လိုက်သည်။

[သက်တမ်းအဆင့်ချိုးဖျက်ခြင်း လုပ်ဆောင်ချက်ကို သင် စတင်လိုက်ပြီ။ သင်၏ လက်ရှိအဆင့်အပေါ် အခြေခံ၍ အောက်ပါ အဆင့်တက်ရမည့် နေရာများကို ရွေးချယ်ပါ။]

[၁။ မဟာတာအို လမ်းစဉ်]

[၂။ ထာဝရကောင်းကင်ကိုးခု]

[၃။ ချောက်နက် တာအိုပင်လယ်]

[၄။ အဝါရောင်ကောင်းကင်သို့ တက်လှမ်းခြင်း]

[၅။ လင်တောင်]

[၆။ အဆုံးမဲ့ ကျောက်စိမ်းရေကန်]

[၇။ အမတ ကျင့်ကြံခြင်းဂူ]

[၈။ ဒုက္ခပင်လယ်]

[၉။ ထိုက်ဝေ မဟာကမ္ဘာ]

ချောက်နက် တာအိုပင်လယ်ကို ရွေးချယ်စရာအဖြစ် မြင်လိုက်ရသောအခါ ကုအန် စိတ်ဝင်စားသွား၏။

တစ်လသာ ရှိသေးသဖြင့် ချောက်နက် တာအိုပင်လယ်မှာ နီဟိုင် ကျန်းရန် သေဆုံးမှုကိစ္စကို ဖြေရှင်းပြီးလောက်ဦးမည် မဟုတ်ပေ။ အကယ်၍ သူသာ ထိုနေရာတွင် အဆင့်တက်ရန် ကြိုးစားရင်း ကြီးမားသော လှုပ်ခတ်မှုတစ်ခု ဖန်တီးလိုက်ပါက ချောက်နက် တာအိုပင်လယ်က နီဟိုင် ကျန်းရန် သေဆုံးမှုကို မေ့သွားနိုင်ပေသည်။

ဘာပဲဖြစ်ဖြစ် သက်တမ်းအဆင့်ချိုးဖျက်ခြင်းက သူ့ကို ယာယီအားဖြင့် ဘေးကင်းသော နေရာတစ်ခုသို့ ပို့ဆောင်ပေးမည်ဖြစ်ပြီး သက်တမ်းအတားအဆီး၏ ကာကွယ်မှုကြောင့် သူ အဆင်ပြေပေလိမည်။

နီဟိုင် ကျန်းရန်၏ မှတ်ဉာဏ်များအရ ချောက်နက် တာအိုပင်လယ်မှာ အတိုင်းအဆမရှိ ကျယ်ပြောလှသည်။ သူ ရောက်ရှိမည့် နေရာမှာ မည်သည့်အင်အားစုနှင့်မဆို ဝေးကွာသော နေရာဖြစ်နိုင်ပေသည်။

သေချာ စဉ်းစားပြီးနောက် ကုအန် ရွေးချယ်မှု ပြုလုပ်လိုက်၏။

[ချောက်နက် တာအိုပင်လယ်သို့ ပို့ဆောင်ရန် သက်မ်း ၁၀ ဘီလီယံနှစ် လိုအပ်သည်။ ဆက်လက် လုပ်ဆောင်မှာလား။]

ဆက်လုပ်မယ်။

ထို့နောက် ကုအန် မူးဝေသွားသကဲ့သို့ ခံစားလိုက်ရပြီး သူ၏ အမြင်အာရုံများ ဝေဝါးသွားတော့သည်။

သူသည် ထိုက်ချင်းရွှေအမတအဆင့်ကို ကျော်လွန်ပြီး မကြုံစဖူးသော အဆင့်တစ်ခုသို့ ရောက်ရှိရန် စိတ်လှုပ်ရှားစွာဖြင့် စောင့်ဆိုင်းနေလိုက်၏။

သူသည် နှစ်ပေါင်း နှစ်သောင်းကျော် အသက်ရှင်ခဲ့ပြီးဖြစ်ရာ ယခုခေတ်တွင် သူ့ကို စိတ်လှုပ်ရှားစေသော အရာမှာ ရှားပါးလှသည်။ သို့သော် ပိုမို အစွမ်းထက်လာခြင်းကတော့ သူ့ကို အမြဲတမ်း ပျော်ရွှင်စေသည် မဟုတ်ပါလား။

အခန်း ၆၁၀ ကောင်းကင်ဖွင့်တာလော့အမတ နှောင်းပိုင်းအဆင့်သို့ တက်လှမ်းခြင်း

ကုအန် မျက်လုံးများကို ဖွင့်လိုက်ရာ မြင်တွေ့လိုက်ရသည်မှာ မှိန်ပျပျ စကြဝဠာကြီးဖြစ်ပြီး အရပ်မျက်နှာအနှံ့တွင် တာအိုမြူခိုးများ ဝဲပျံနေသဖြင့် သူ အလွန် စိတ်လှုပ်ရှားသွားခဲ့သည်။

သူသည် ချက်ချင်းပင် သက်တမ်းအတားအဆီးကို စတင်လိုက်ပြီးနောက် ချောက်နက် တာအိုပင်လယ်ကို ထပ်မံ စူးစမ်းလိုက်၏။

သူ၏ ခြေဖဝါးအောက်တွင်လည်း ဝိညာဉ်မြူခိုးများ ရှိနေသော်လည်း ခိုင်မာသော မြေပြင်ပေါ်တွင် ရပ်နေရသကဲ့သို့ ခံစားချက်ကို ပေးစွမ်းနေသည်။

ဤစကြဝဠာကြီးမှာ မှောင်မိုက်နေပြီး ကြယ်ရောင်များ မရှိပေ။ ယင်းအစား အရပ်မျက်နှာအမျိုးမျိုးသို့ စီးဆင်းနေသော အလင်းမြစ်များ ရှိနေသဖြင့် စကြဝဠာကြီးကို မှိန်ပျပျ လင်းလက်စေသည်။

ချောက်နက်ဟူသော အမည်ပေးထားခြင်းမှာ မဆန်းတော့ပေ။ ဤနေရာတွင် ကြာကြာနေလေလေ သေခြင်းတရားကဲ့သို့သော ငြိမ်သက်မှုကို ပိုမို ခံစားရလေလေ ဖြစ်သည်။

မည်သည့်အရပ်မှမဆို ကြောက်မက်ဖွယ်ကောင်းသော ဖြစ်တည်မှုများ အချိန်မရွေး ထွက်ပေါ်လာပြီး လူတစ်ယောက်ကို အပိုင်းပိုင်း ဆုတ်ဖြဲပစ်နိုင်သကဲ့သို့ ခံစားရ၏။

ကုအန်၏ နှလုံးသားမျက်လုံးက အဝေးတစ်နေရာတွင် လွင့်မျောနေသော မြို့တော်ကြီးတစ်ခုကို တွေ့မြင်လိုက်ရသည်။ ၎င်းမှာ ကောင်းကင်စိတ်ဝိညာဉ်မဟာကမ္ဘာ၏ ထက်ဝက်ခန့် ကြီးမားပြီး အပြင်ဘက်တွင် အနက်ရောင် နဂါးတစ်ကောင်စီ ရစ်ပတ်ထားသော အနက်ရောင် မျှော်စင် ၃၆ ခု ရှိနေသဖြင့် ကြောက်မက်ဖွယ်ကောင်းလောက်အောင် ထည်ဝါလှသည်။

ချောက်နက် ဧကရာဇ်မြို့တော်

နီဟိုင် ကျန်းရန်မှာ ဤမြို့နှင့် ဆက်နွယ်သူ ဖြစ်သည်။ ချောက်နက် တာအိုပင်လယ်အတွင်းတွင် ဤမြို့တော်မှာ အုပ်စိုးသူအဆင့် အင်အားစုတစ်ခု ဖြစ်၏။ ထိုမြို့တော်အတွင်း၌ ထိုက်ချင်းရွှေအမတများ ရှိကြပြီး နီဟိုင် ကျန်းရန် မြင်တွေ့ခဲ့ဖူးသော ထိုက်ချင်းရွှေအမတ အရေအတွက်မှာပင် ၅ ပါးခန့် ရှိသည်။

နီဟိုင် ကျန်းရန်မှာ ဤမြို့နှင့် ဆက်နွယ်နေသော်လည်း ၎င်းအကြောင်းကို အပြည့်အဝ နားမလည်ခဲ့ချေ။ ချောက်နက် ဧကရာဇ်မြို့တော်အတွင်း၌ အဆင့်အတန်း ခွဲခြားမှုမှာ အလွန် တင်းကျပ်လှပြီး အဆင့်တစ်ခုစီ၏ ကွာခြားချက်မှာ အမတနှင့် သေမျိုးကဲ့သို့ ကွာခြားသည်။

တာအိုဧကရာဇ်တစ်ပါးက ချောက်နက် ဧကရာဇ်မြို့တော်ကို တည်ထောင်ခဲ့ခြင်းဖြစ်ပြီး ထိုသူ၏ ကံတရားကို တာအိုစည်းမျဉ်းများက အသိအမှတ်ပြုထားကြောင်း ဆိုကြသည်။

ကိုယ်ပိုင်အဆင့်အတွင်း၌ တာအိုဧကရာဇ်တစ်ပါးသည် ရန်သူတစ်ရာကို တစ်ကိုယ်တည်း ယှဉ်ပြိုင်နိုင်စွမ်း ရှိလေ့ရှိသဖြင့် တာအိုဧကရာဇ် အမြောက်အမြားမှာ ချောက်နက် ဧကရာဇ်မြို့တော်သို့ စုရုံးလာကြခြင်း ဖြစ်သည်။

နီဟိုင် ကျန်းရန်သည် ဟန်ထျန်းရွှေအမတအဆင့်သို့ စတင်ရောက်ရှိစဉ်က တာအိုဧကရာဇ်တစ်ပါး၏ ဖိနှိပ်မှုကို ရင်ဆိုင်ခဲ့ရဖူးသည်။ ထိုနေ့တွင် မဟာကမ္ဘာတစ်ထောင်၌ ပြိုင်ဘက်ကင်း လှည့်လည်သွားလာနိုင်သော ဤပုဂ္ဂိုလ်ကြီးမှာ သူ၏ ဖိနှိပ်သူရှေ့တွင် ခွေးတစ်ကောင်အလား ဒူးထောက်၍ အရှက်တကွဲ ဖြစ်ခဲ့ရ၏။

နီဟိုင် ကျန်းရန်မှာ အားနည်းသောကြောင့် မဟုတ်ဘဲ တစ်ဖက်လူ၏ စွမ်းအားက သူ့ကို သုတ်သင်ပစ်နိုင်လောက်အောင် သာလွန်နေသောကြောင့် ဖြစ်သည်။ သူ ပျက်စီးတော့မည့် အခြေအနေတွင် အသနားခံရန် ရွေးချယ်ခဲ့ရသည်။

ဤသည်မှာ သူ၏ နှလုံးသားထဲတွင် နက်နက်ရှိုင်းရှိုင်း မြှုပ်နှံထားသော မှတ်ဉာဏ်တစ်ခုဖြစ်ပြီး အမတဧကရာဇ်ပင်လျှင် မသိရှိခဲ့ချေ။

ထိုမှတ်ဉာဏ်ကြောင့်ပင် နီဟိုင် ကျန်းရန်မှာ ချောက်နက် ဧကရာဇ်မြို့တော်မှ ထွက်ခွာရန် ဆုံးဖြတ်ခဲ့ခြင်း ဖြစ်သည်။

အမတဧကရာဇ်မှာ သူ့ကို မိတ်ဖွဲ့ခဲ့ပြီး သူ့မှတစ်ဆင့် ချောက်နက် ဧကရာဇ်မြို့တော်သို့ ဝင်ရောက်လိုခဲ့သည်။ သူသည် အမှန်တကယ်ပင် ကူညီပေးခဲ့သော်လည်း သူ၏ အကူအညီနှင့်ပင် အမတဧကရာဇ်အတွက် ချောက်နက် ဧကရာဇ်မြို့တော်၌ ခြေကုတ်ယူရန် ခက်ခဲခဲ့၏။

ရှည်လျားလှသော နှစ်ကာလများအတွင်း ကိုယ်ပိုင်အင်အားစု တည်ဆောက်ရန်အတွက် အမတဧကရာဇ်သည် နယ်ပယ်အသီးသီးမှ ထူးချွန်သော မူလဘူတရွှေအမတ ၁၆ ပါးကို မွေးမြူခဲ့သည်။ ထိုအထဲမှ ၇ ပါးမှာ တာအိုဧကရာဇ် ဖြစ်လာရန် အရည်အချင်း ရှိသူများ ဖြစ်ကြသည်။

ကုအန်သည် အဝေးမှ ချောက်နက် ဧကရာဇ်မြို့တော်ကို ကြည့်ရင်း နီဟိုင် ကျန်းရန်၏ မှတ်ဉာဏ်များကို ပြန်လည် မြင်ယောင်နေမိ၏။

အတန်ကြာ ကြည့်ရှုပြီးနောက် သူ၏ အကြည့်ကို အခြားအရပ်မျက်နှာများသို့ လွှဲလိုက်သည်။

သူသည် အခြားသော အစွမ်းထက်သည့် ကံတရားများကို ခံစားမိနေ၏။ ချောက်နက် ဧကရာဇ်မြို့တော်မှာ ချောက်နက် တာအိုပင်လယ်တွင် အစွမ်းအထက်ဆုံး အင်အားစုတော့ မဟုတ်ပေ။

အကယ်၍ သူသာ ချောက်နက် တာအိုပင်လယ်တွင် မွေးဖွားခဲ့ပါက လွတ်မြောက်နိုင်ရန် ဘယ်နှစ်နှစ်လောက် ရုန်းကန်ရမည်နည်းဟု သူ သိချင်နေမိသည်။

ကုအန်သည် ယခင်က အကြောင်းနှင့်အကျိုးလမ်းစဉ်အတိုင်း စစ်ခုံရုံးသို့ လိုက်ပါသွားခဲ့ပြီးနောက် တာအိုမဲ့ ကောင်းကင်ပိုက်ကွန်ခြေလှမ်းကို အသုံးပြု၍ ခြေလှမ်းအနည်းငယ်အတွင်း စစ်ခုံရုံးသို့ ရောက်ရှိခဲ့သည်။

သို့သော် ချောက်နက် တာအိုပင်လယ်မှာ မတူညီပေ။ ဤနေရာရှိ တာအိုစည်းမျဉ်းများမှာ ပိုမို အားကောင်းလှသဖြင့် ကုအန်အနေဖြင့် တာအိုမဲ့ ကောင်းကင်ပိုက်ကွန်ခြေလှမ်းကို အသုံးပြု၍ တစ်ကြိမ်တည်းနှင့် အပြင်သို့ ထွက်ခွာနိုင်ခြင်း မရှိဘဲ ပင်လယ်အတွင်း၌သာ လွတ်လပ်စွာ သွားလာနိုင်မည် ဖြစ်သည်။

ရုတ်တရက် ကုအန်သည် အဆုံးအစမရှိသော ဝိညာဉ်မြူခိုးများကြားတွင် ဧရာမ သတ္တဝါကြီးတစ်ကောင်ကို တွေ့လိုက်ရသည်။ ၎င်းမှာ ကမ္ဘာပေါင်း သောင်းနှင့်ချီ ဝန်းရံထားသော ကြီးမားလှသည့် ဝေလငါးကြီးတစ်ကောင် ဖြစ်ပြီး ထိုကမ္ဘာများအတွင်းသို့ ဝိညာဉ်စွမ်းအင်များကို အဆက်မပြတ် ထုတ်လွှတ်ပေးနေ၏။

ထိုကမ္ဘာအချို့တွင် အာကာပြင်တာအိုအမတ၏ အရှိန်အဝါများပင် ပါဝင်နေသည်။

အလွန် ဝေးကွာလွန်းသဖြင့် ကုအန်အနေဖြင့် သက်တမ်းထောက်လှမ်းခြင်းကို အသုံးမပြုနိုင်သော်လည်း နှလုံးသားမျက်လုံးမှတစ်ဆင့် အာရုံခံနိုင်၏။

ဤဝေလငါးကြီးမှာ ဟန်ထျန်းရွှေအမတအဆင့် ပြည့်စုံခြင်း ကျင့်ကြံမှုအဆင့်တွင် ရှိနေသည်။

ထိုကမ္ဘာများအတွင်းရှိ သက်ရှိအားလုံးမှာ ၎င်း၏ တည်ရှိမှုကို မသိရှိကြပေ။ အာကာပြင်တာအိုအမတကဲ့သို့သော တန်ခိုးရှင်များပင်လျှင် ပြင်ပကောင်းကင်သို့ ခုန်ထွက်နိုင်စွမ်း မရှိကြချေ။

ကုအန် နက်နဲစွာ ခံစားလိုက်ရသည်။ လူဆိုသည်မှာ မွေးဖွားလာကတည်းက အချုပ်အနှောင် ခံထားရသူများ ဖြစ်၏။ မည်မျှပင် အဆင့်မြင့်သော နယ်ပယ်သို့ ရောက်ရှိပါစေ လူတစ်ယောက်ကို အမြဲတမ်း ကန့်သတ်ထားသော ကမ္ဘာများ ရှိနေတတ်သည် မဟုတ်ပါလား။

သူသည် ထိုနေရာ၌ပင် ဝင်ထိုင်လိုက်ပြီး သူ၏ အချက်အလက်စာမျက်နှာကို ဖွင့်ကာ ကျင့်ကြံမှုအဆင့်ဟူသော စာလုံးနှစ်လုံးထံသို့ သက်တမ်း ၁၀ ဘီလီယံကို တိုက်ရိုက် ထည့်ဝင်လိုက်သည်။

အချက်ပြစာသားတစ်ခု ချက်ချင်း ပေါ်လာ၏။

[သင်သည် နှစ်သန်းပေါင်း ၅၀၀ ကြာအောင် ချီသန့်စင်ခြင်းကို ကျင့်ကြံခဲ့သည်။ တာအိုအရှင်သခင် စွမ်းအားကို အသုံးပြု၍ တာလော့တာအိုအသီးကို အတင်းအဓမ္မ စိန်ခေါ်လိုက်သဖြင့် ကပ်ဘေး စတင်ကျရောက်လာသည်။ သို့သော် ဥပဒေသအားလုံး တည်ရှိရာ တာလော့အမတကပ်ဘေးကို သင် မကျော်လွှားနိုင်ခဲ့သဖြင့် အဆင့်တက်ခြင်း ကျရှုံးသွားခဲ့သည်။]

[သင်သည် နှစ် ၁ ဘီလီယံ ကြာအောင် ချီသန့်စင်ခြင်းကို ကျင့်ကြံခဲ့သည်။ တာအိုအရှင်သခင် စွမ်းအားကို အသုံးပြု၍ တာလော့တာအိုအသီးကို အတင်းအဓမ္မ စိန်ခေါ်လိုက်သဖြင့် ကပ်ဘေး စတင်ကျရောက်လာသည်။ သို့သော် ဥပဒေသအားလုံး တည်ရှိရာ တာလော့အမတကပ်ဘေးကို သင် မကျော်လွှားနိုင်ခဲ့သဖြင့် အဆင့်တက်ခြင်း ကျရှုံးသွားခဲ့သည်။]

...

တာလော့တာအိုအသီး...

ဥပဒေသအားလုံး တည်ရှိရာ တာလော့အမတကပ်ဘေး...

နှစ်သန်း ၅၀၀ တိုင်းမှာ ကပ်ဘေးတစ်ခု...

ကုအန် စိတ်ဓာတ်များ တက်ကြွလာသည်။ ဒဏ္ဍာရီလာ တာလော့အမတ ဆိုတာ တကယ်ပဲ ရှိနေတာလား။

မကြာမီ အချက်ပြချက်များ အားလုံး ငြိမ်သက်သွားပြီး ကျရှုံးခြင်းဖြင့်သာ အဆုံးသတ်သွားခဲ့သည်။

ကုအန် စိတ်မပျက်ဘဲ သက်တမ်းများကို ဆက်လက် ထည့်ဝင်လိုက်၏။

ပထမဆုံး ဘီလီယံ ၁ ပြီးနောက် နောက်ထပ် ၁ ဘီလီယံ

စက္ကန့်ပိုင်းအတွင်းမှာပင် ကုအန်သည် သက်တမ်း ၁၀ ဘီလီယံအထိ အသုံးပြုခဲ့သော်လည်း ကျရှုံးခြင်းနှင့်သာ ရင်ဆိုင်နေရဆဲ ဖြစ်သည်။

ယခုတစ်ကြိမ်တွင် ကျင့်ကြံမှုအဆင့်ကိုသာ အဆင့်တက်ရန် ကြိုးစားခြင်းဖြစ်သဖြင့် သက်တမ်းအတားအဆီးအတွက် ဘီလီယံ ၂၀၀ ခန့်သာ ချန်ထားရန် လိုအပ်သည်။

ဆက်လုပ်... ဆက်လုပ်စမ်းပါ။

ဒီနေ့တော့ တာလော့တာအိုအသီးကို ရအောင် ယူမယ်။

ကုအန် တိုက်ခိုက်လိုစိတ်များ ပြည့်နှက်နေပြီး သက်တမ်းများကို အဆက်မပြတ် ထည့်ဝင်နေ၏။

ကျရှုံး...

ကျရှုံး...

ကျရှုံး...

၄၈၀ ဘီလီယံအထိ ရောက်ရှိသွားသောအခါ နောက်ဆုံးတွင် အပြောင်းအလဲတစ်ခု ဖြစ်ပေါ်လာသည်။

"သင်သည် နှစ် ၇ ဘီလီယံ ကြာအောင် ချီသန့်စင်ခြင်းကို ကျင့်ကြံခဲ့သည်။ တာအိုအရှင်သခင် စွမ်းအားကို အသုံးပြု၍ တာလော့တာအိုအသီးကို အတင်းအဓမ္မ စိန်ခေါ်လိုက်သဖြင့် ကပ်ဘေး စတင်ကျရောက်လာသည်။ သင်သည် 'ဥပဒေသအားလုံး ပါဝင်သော တာလော့အမတကပ်ဘေး' ကို ကျော်လွှားနိုင်ခဲ့သဖြင့် အဆင့်တက်ခြင်း အောင်မြင်သွားခဲ့သည်။ သင်၏ ရွှေအမတတာအိုအသီးသည် တာလော့တာအိုအသီးအဖြစ် ပြောင်းလဲသွားပြီး သင်၏ ကျင့်ကြံမှုအဆင့်မှာ ကောင်းကင်ဖွင့် တာလော့အမတ အစောပိုင်းအဆင့်သို့ ရောက်ရှိသွားခဲ့သည်။"

"သင်သည် နှစ် ၈ ဘီလီယံကြာအောင် ချီသန့်စင်ခြင်းကို ကျင့်ကြံခဲ့သည်။ သင်၏ ကျင့်ကြံမှုအဆင့်မှာ ပိုမို တိုးတက်လာခဲ့သည်။"

...

ကုအန် ပြုံးလိုက်မိသည်။ သူ၏ အဆင့်တက်မှု ကျရှုံးသွားမည်ကို သူ အမှန်တကယ်ပင် စိုးရိမ်နေခဲ့ခြင်း ဖြစ်သည်။

ဤအဆင့်တက်မှု မတိုင်မီတွင် သူသည် သူ၏ သက်တမ်းကို ဆင့်ကဲပြောင်းလဲခြင်းနှင့် တိုးတက်အောင် ပြုလုပ်ခြင်းများအတွက် အသုံးမပြုခဲ့သော်လည်း အမတဧကရာဇ်မျက်လုံး၏ အဆုံးမရှိသော အံ့ဖွယ်စွမ်းအားများမှာ ကပ်ဘေးကို ကျော်လွှားရာတွင် အရေးပါသော အခန်းကဏ္ဍမှ ပါဝင်ခဲ့ပုံရသည်။

သူသည် ကျင့်ကြံမှုအဆင့်ကို ကောင်းကင်ဖွင့် တာလော့အမတအဆင့်၏ အထွတ်အထိပ်သို့ ရောက်ရှိရန် မျှော်လင့်ချက်ဖြင့် သက်တမ်းများကို ဆက်လက် ထည့်ဝင်လိုက်၏။

သို့သော် သူသည် ကောင်းကင်ဖွင့် တာလော့အမတ နှောင်းပိုင်းအဆင့်သို့ ရောက်ရှိချိန်တွင် သူ၏ သက်တမ်းမှာ ဘီလီယံ ၂၀၀ အထိ ထိုးဆင်းသွားသဖြင့် ရှေ့ဆက်ရန် ကြောက်ရွံ့သွားခဲ့သည်။

သက်တမ်းအတားအဆီးကြောင့် သူ၏ သက်တမ်းများ ကုန်ခမ်းသွားမည်ကို သူ စိုးရိမ်နေမိခြင်း ဖြစ်သည်။

တာအိုဝိညာဉ်ချီများမှာ သူ၏ ခန္ဓာကိုယ်အတွင်းသို့ စတင် စီးဝင်လာပြီး သူ၏ ရုပ်ခန္ဓာမှာ တာအိုအလင်းတန်းများ၏ အရောင်အဝါအောက်တွင် ချက်ချင်းပင် နစ်မြုပ်သွားတော့သည်။

သက်တမ်းအတားအဆီး၏ အပြင်ဘက်တွင် တာအိုဝိညာဉ်မြူခိုးများမှာ သိသိသာသာ ဆူပွက်လာပြီး ကျယ်ပြန့်လှသော ဝိညာဉ်စွမ်းအင် မြူခိုးပင်လယ်ကြီးအတွင်း၌ လှိုင်းဂယက်များ ဖြစ်ပေါ်စေသည်။ အနီးကပ် ကြည့်ရှုပါက ထိုလှိုင်းဂယက်များမှာ အလွန် ပြင်းထန်ပြီး ခမ်းနားထည်ဝါလှ၏။

ထူးဆန်းသော ဖြစ်ရပ်ဆန်းများမှာ ခန့်မှန်း၍မရနိုင်အောင် ပေါ်ထွက်လာသည်။ မကြာမီမှာပင် ချောက်နက် တာအိုပင်လယ်အတွင်းရှိ နေရာအသီးသီးတွင် ဝိညာဉ်စွမ်းအင်များ ထကြွလာမှုနှင့် တာအိုစည်းမျဉ်းများ ပေါ်ထွက်လာမှုတို့ ဖြစ်ပေါ်လာတော့သည်။

ကုအန်အနေဖြင့် ကောင်းကင်ဖွင့် တာလော့အမတ၏ အမွေအနှစ်မှတ်ဉာဏ်များကို လက်မခံရသေးမီမှာပင် စွမ်းအားကြီးမားသော စိတ်အာရုံများစွာ ဖြတ်သန်းသွားသည်ကို သူ အာရုံခံမိလိုက်၏။

ထိုက်ချင်းရွှေအမတ၊ ဟန်ထျန်းရွှေအမတ...

ကုအန်သည် ထိုစိတ်အာရုံများ၏ ကျင့်ကြံမှုအဆင့်ကို တိတ်တဆိတ် တွက်ချက်ကြည့်လိုက်ရာ ချောက်နက် တာအိုပင်လယ်မှာ တကယ်ပင် ကြောက်စရာကောင်းပြီး စစ်ခုံရုံးနှင့် နှိုင်းယှဉ်၍မရနိုင်အောင် သာလွန်ကြောင်း သိလိုက်ရသည်။

စစ်ခုံရုံးသည်ပင်လျှင် ကောင်းကင်စိတ်ဝိညာဉ်မဟာကမ္ဘာအတွက် ယှဉ်ပြိုင်၍မရနိုင်သော အင်အားကြီး အဖွဲ့အစည်းကြီး ဖြစ်နေသည် မဟုတ်ပါလား။

မကြာမီမှာပင် ကုအန်၏ စိတ်ထဲသို့ အမွေအနှစ်မှတ်ဉာဏ်များ အဆက်မပြတ် ဝင်ရောက်လာပြီး သူ ထိုမှတ်ဉာဏ်များထဲတွင် နစ်မြောမသွားမီ စိတ်ထဲတွင် အတွေးတစ်ခုသာ ရှိတော့၏။

'ချောက်နက် တာအိုပင်လယ်ကို ပေါ့ပေါ့ဆဆ သွားပြီး မရန်စနဲ့...'

ကုအန် မျက်လုံးများကို မှိတ်လိုက်သောအခါ သူ၏ ဘေးပတ်လည်ရှိ တာအိုအလင်းမှာ ရုတ်တရက် မှေးမှိန်သွားသည်။ သူ မော့ကြည့်လိုက်ရာ လျှို့ဝှက်ဆန်းကြယ်ပြီး ဧရာမ အနက်ရောင် ငှက်ကြီးတစ်ကောင် သူ၏ အထက်မှ ပျံသန်းသွားသည်ကို တွေ့လိုက်ရ၏။ ၎င်း၏ ခန္ဓာကိုယ်မှာ အလွန်ကြီးမားလှပြီး အမွှေးအတောင် တစ်ခုချင်းစီမှာ တောင်ကြီးများသဖွယ် ကြီးမားလှသည်။

အမှောင်ထု ကုအန့်ထံမှ ဖယ်ခွာသွားရန် အချိန်အတန်ကြာအောင် စောင့်လိုက်ရ၏။

သက်တမ်းအတားအဆီး၏ အတွင်းဘက်တွင် ရှိနေသော ကုအန်မှာ ထိုအရာကို မသိရှိဘဲ အမွေအနှစ်မှတ်ဉာဏ်များထဲတွင်သာ အပြည့်အဝ နစ်မြောနေခဲ့သည်။

နာရီဝက်ခန့် ကြာပြီးနောက်တွင်မှ သူ နောက်ဆုံး၌ မျက်လုံးများကို ဖွင့်လိုက်သည်။ သူသည် ကောင်းကင်ဖွင့် တာလော့အမတ ဖြစ်လာခဲ့ပြီ ဖြစ်သည်။

ဤအဆင့်အတန်းကို ရရှိပြီးနောက် ကုအန်သည် ချောက်နက် တာအိုပင်လယ်ကို ကြည့်လိုက်ရာ ၎င်းမှာ လုံးဝ ချဉ်းကပ်၍ မရနိုင်သော နေရာတစ်ခု မဟုတ်တော့ကြောင်း ခံစားလိုက်ရ၏။

သူ၏ ကျင့်ကြံမှုအဆင့်မှာ ဆက်လက် တိုးတက်နေဆဲပင်။ သူသည် အတားအဆီးက ဝါးမြိုနေသော သက်တမ်းကိန်းဂဏန်းများကို ကြည့်လိုက်ရာ ကိန်းဂဏန်းများမှာ ထိတ်လန့်ဖွယ်ကောင်းလောက်အောင် ခုန်တက်နေသော်လည်း သူ၏ အသက်ရှင်သေဆုံးမှုအတွက်မူ ခြိမ်းခြောက်မှု မဖြစ်နိုင်တော့ချေ။

တာလော့တာအိုအသီးမှာ ရွှေအမတတာအိုအသီးထက် များစွာ ပိုမို ရှုပ်ထွေးလှပြီး ရှေးဟောင်း တာအိုပုံစံများဖြင့် ဖုံးလွှမ်းနေကာ ၎င်း၏ အထက်ရှိ ထိုက်ချင်း စိမ်းလဲ့သော ကောင်းကင်မှာ အမှန်တကယ်ပင် ကောင်းကင်ခန္ဓာတစ်ခုအဖြစ် ပြောင်းလဲစပြုလာပြီ ဖြစ်သည်။

ထိုကောင်းကင်ယံမှာ ကံတရားနှင့် အကြောင်းနှင့်အကျိုးကို သတိရစေသော ကမ္ဘာလောက၏ ဥပဒေသ သုံးထောင်ကို ထိန်းချုပ်နိုင်သည့် စွမ်းအားတစ်ရပ် ရှိနေသည်။ အကယ်၍ သူ အမည်တစ်ခု ပေးရမည်ဆိုပါက ၎င်းမှာ ကောင်းကင်တာအိုနှင့် ဆင်တူသည်ဟု ကုအန် ခံစားရ၏။

ကုအန်သည် သူ၏ ခေါင်းပေါ်မှ ပျံသန်းသွားကြသော မရေမတွက်နိုင်သော ပုံရိပ်များကို သတိပြုမိလိုက်၏။ ၎င်းတို့မှာ ယခင် စစ်ခုံရုံး၏ စစ်တပ်များထက်ပင် ပိုမို ခမ်းနားထည်ဝါပြီး အရေအတွက် များပြားလှသည်။

သူသည် သက်တမ်းထောက်လှမ်းခြင်းကို အဆက်မပြတ် အသုံးပြု၍ ဖြတ်သွားသူများ၏ အရှိန်အဝါကို အာရုံခံကြည့်လိုက်သည်။

လွတ်ငြိမ်းရာအမတအဆင့် ရှိသော သတ္တဝါမှာ မရှိသလောက်ပင်။

ချောက်နက် တာအိုပင်လယ်တွင်လည်း သေမျိုးဝိညာဉ်များ ရှိကြသော်လည်း သူတို့မှာ ကမ္ဘာငယ်လေးများအတွင်း ပိတ်မိနေကြခြင်း သို့မဟုတ် သက်တမ်းနယ်မြေများအတွင်း၌ ပုန်းအောင်းနေကြခြင်း ဖြစ်ပြီး ချောက်နက် တာအိုပင်လယ်တစ်ခုလုံးကို လွှမ်းခြုံသွားသော ဤဖြစ်ရပ်ဆန်းကို ထွက်ကြည့်ရန် မဝံ့ရဲကြချေ။

"တာလော့တစ်ပါး ရောက်ရှိလာတာပဲ... ဘာလို့ ကိုယ့်ကိုယ်ကိုယ် ထုတ်မပြတာလဲ"

ရှေးဟောင်းအသံတစ်သံ ဟင်းလင်းပြင်ထဲတွင် ရုတ်တရက် ပဲ့တင်ထပ်သွားရာ တစ်ဖက်လူမှာလည်း ကောင်းကင်ဖွင့် တာလော့အမတ တစ်ပါးဖြစ်ကြောင်း ကုအန် သိလိုက်၏။

ချောက်နက် တာအိုပင်လယ်ရဲ့ အခြေခံအုတ်မြစ်က တကယ်ကို နက်နဲလှပါလား။

သူသည် မည်သည့်အသံမှ မပြုလုပ်ဘဲ လျင်မြန်စွာ တိုးတက်လာနေသော ကျင့်ကြံမှုအဆင့်၏ ပျော်ရွှင်မှုကိုသာ ဆက်လက် ခံစားနေလိုက်သည်။

ထိုအသံ ထပ်မံ ထွက်ပေါ်မလာတော့သော်လည်း ပိုမို အစွမ်းထက်သော ပုံရိပ်များ ဖြတ်သန်းသွားသည်ကို ကြည့်ခြင်းအားဖြင့် တစ်ဖက်လူမှာ ဒေါသထွက်နေကြောင်း သိနိုင်၏။

အချိန်များ ဆက်လက် ကုန်ဆုံးနေသည်။

ကောင်းကင်ဖွင့် တာလော့အမတ အလယ်အလတ်အဆင့်...

ကောင်းကင်ဖွင့် တာလော့အမတ နှောင်းပိုင်းအဆင့်...

ပုံရိပ်များစွာ ဖြတ်သန်းသွားသော်လည်း မည်သည့်သတ္တဝါမျှ သူ၏ သက်တမ်းအတားအဆီးကို ထိုးဖောက်နိုင်ခြင်း မရှိချေ။ ဘာပဲဖြစ်ဖြစ် သူ၏ သက်တမ်းအတားအဆီးမှာ ဤဟင်းလင်းပြင်ကြီးအတွက်ဆိုလျှင် ဖုန်မှုန့်တစ်စက်လောက်သာ သေးငယ်နေသည် မဟုတ်ပါလား။

ကုအန်သည် သူ၌ သက်တမ်း ဘီလီယံ ၃၀ ခန့်သာ ကျန်တော့သည်ကို သတိပြုမိလိုက်သဖြင့် အနည်းငယ် စိတ်မသက်မသာ ဖြစ်သွားသည်။

သက်တမ်းက လိုနေသေးတာပဲ။

မည်သို့ပင်ဆိုစေ သူသည် ကောင်းကင်ဖွင့် တာလော့အမတ ဖြစ်လာခဲ့ပြီဖြစ်ရာ အဆင့်ကြီးတစ်ခုကို ကြီးမားသော ခြေလှမ်းဖြင့် တက်လှမ်းနိုင်ခဲ့ခြင်း ဖြစ်သည်။ အဆင့်အထွတ်အထိပ်သို့ ရောက်ရန်အတွက် နောက်ထပ် အခွင့်အရေးတစ်ခု သူ ထပ်ရှာနိုင်ပါသေးသည်။

ဤအဆင့်တက်မှုအတွက် စုစုပေါင်း သက်တမ်း ၈၀၀ ဘီလီယံနီးပါး ကုန်ဆုံးခဲ့ရခြင်း ဖြစ်သည်။

ကုအန် ဖြည်းညင်းစွာ မတ်တတ်ထရပ်လိုက်သည်။ သူသည် ချောက်နက် တာအိုပင်လယ်ကို ထပ်မံကြည့်ရှုလိုက်ရာ ယခုအခါတွင် ပိုမို ရှင်းလင်းစွာ မြင်တွေ့နိုင်စွမ်း ရှိလာခဲ့ပြီ ဖြစ်၏။

အမှန်စင်စစ်တွင် ချောက်နက် တာအိုပင်လယ်မှာ အတိုင်းအဆမရှိ ကျယ်ပြောပြီး သဘာဝအံ့သြဖွယ်များဖြင့် ပြည့်နှက်နေသည်။ သို့သော် တစ်ချိန်က အစွမ်းထက်လှသည်ဟု ထင်ခဲ့ရသော ချောက်နက် ဧကရာဇ်မြို့တော်မှာ ယခုအခါ သူ၏ မျက်လုံးထဲတွင် အရှိန်အဝါများ ပျောက်ကွယ်သွားသကဲ့သို့ ရှိနေတော့သည်။