ပထမဆုံးတပည့်ရင်း ဟယ့်မင်ယဲ့

မိစ္ဆာသားရဲတို့၏ ဟိန်းဟောက်သံများမှာ အလွန်ပင် ပြင်းထန်လှ၏။ ဂိုဏ်းသို့ အသစ်ဝင်လာသော တပည့်များ သို့မဟုတ် လက်တွေ့တိုက်ပွဲ အတွေ့အကြုံ နည်းပါးသူများမှာ ကြောက်ရွံ့တုန်လှုပ်နေကြပြီ ဖြစ်သည်။

လှောင်အိမ်များအတွင်း ပိတ်လှောင်ထားသော်လည်း ထိုမိစ္ဆာသားရဲများဆီမှ ထွက်ပေါ်လာသော ဖိအားမှာ ကြီးမားလှပေသည်။

“မိစ္ဆာသားရဲတွေ အများကြီးပါလား...”

ရွှီနင်သည် ပွဲကြည့်စင်ပေါ်မှနေ၍ စင်မြင့်ထက်သို့ တစ်ခုပြီးတစ်ခု သယ်ဆောင်လာသော သံလှောင်အိမ်များကို ကြည့်ရှုနေမိသည်။

အချို့သော လှောင်အိမ်များကို အဝတ်ဖြင့် သေချာဖုံးအုပ်ထားခြင်း မရှိသဖြင့် အတွင်း၌ မိစ္ဆာသားရဲ တစ်ကောင်ထက်မက ရှိနေသည်ကို မြင်တွေ့နေရ၏။

ထို့ပြင် လှောင်အိမ်များ တစ်ခုပြီးတစ်ခု ရောက်ရှိလာသည်နှင့်အမျှ ထွက်ပေါ်လာသော အော်ရာများမှာလည်း ပိုမိုပြင်းထန်လာလေသည်။ တစ်ခုသော လှောင်အိမ်အတွင်း၌ ဟင်းလင်းပြင်နယ်ပယ်အဆင့်ရှိ မိစ္ဆာသားရဲတစ်ကောင် ရှိနေကြောင်းကိုပင် ရွှီနင် အာရုံခံမိလိုက်သည်။

“အင်အားတွေ တော်တော်များတာပဲ” ရွှီနင်က သက်ပြင်းချလိုက်မိသည်။

“ဒါပေမဲ့ တပည့်တွေရဲ့ စွမ်းရည်ကို စမ်းသပ်ဖို့အတွက်ပဲ ဒီလောက် လူအင်အား၊ ပစ္စည်းအင်အား အများကြီးသုံးပြီး မိစ္ဆာသားရဲတွေကို ဖမ်းဆီးပြီး မိစ္ဆာနှိမ်နင်းရေးပွဲတော် ကျင်းပတာကတော့...”

ရွှီနင်၏ သံသယကို ကြားသောအခါ လဲ့ချိုင်ဝေးက ရှင်းပြလေသည်။

“ဒါက အကြောင်းရင်း တစ်ခုဆိုပေမဲ့ အကုန်လုံးတော့ မဟုတ်ဘူး။ လွန်ခဲ့တဲ့ နှစ်ပေါင်း ၃၀၀ တုန်းက ကျိဖုန်းစီရင်စုမှာ ကြောက်စရာကောင်းတဲ့ မိစ္ဆာသားရဲလှိုင်းတစ်ခု ဖြစ်ခဲ့ဖူးတယ်။ အဲဒီသားရဲလှိုင်းက ကျိဖုန်းစီရင်စု တစ်ခုလုံးကို သားရဲပင်လယ်ကြီးအဖြစ် ပြောင်းလဲပစ်ခဲ့တာ။ ကျိဖုန်းစီရင်စုက အဓိက သားရဲအုပ်စုကြီးထဲကနေ ခွဲထွက်လာတဲ့ အုပ်စုတစ်ခုက ဖေးယွင်စီရင်စုထဲကို ပြေးဝင်လာပြီး ဖေးယွင်မင်းဆက်ကို ပျက်သုဉ်းစေခဲ့တယ်။ အဲဒါကြောင့် ဖေးယွင်ပြည်နယ်ဟာ မတည်ငြိမ်တဲ့ ခေတ်ကာလတစ်ခုထဲကို ရောက်သွားခဲ့ရတာ။ ဖေးယွင်စီရင်စုကို ယွမ်ရှန်းဂိုဏ်းက ဝင်ရောက်ဖြေရှင်းပေးမှပဲ အခြေအနေတွေ ပြန်ငြိမ်သွားခဲ့တယ်”

လဲ့ချိုင်ဝေးက ဆက်ပြောပြသည်။ “သွယ်ဝိုက်ပြီး ထိခိုက်ခဲ့ရတဲ့ ဖေးယွင်စီရင်စုတောင် အဲဒီလောက် ဒုက္ခရောက်ခဲ့ရင် မိစ္ဆာသားရဲ တိုက်ခိုက်မှုရဲ့ ဗဟိုချက်ဖြစ်တဲ့ ကျိဖုန်းစီရင်စုဆိုရင် ပြောစရာတောင် မလိုတော့ဘူး။ ကျိဖုန်းစီရင်စုမှာရှိတဲ့ အဖွဲ့အစည်း အသီးသီးက အာဃာတတွေကို ဘေးဖယ်ထားပြီး ရန်သူကို အတူတကွ ရင်ဆိုင်ခဲ့ကြရတယ်။ အဓိကဂိုဏ်းကြီးတွေ အားလုံး မဟာမိတ်ဖွဲ့ပြီး အချင်းချင်း ကူညီကြလို့သာ အခြေအနေကို ထိန်းချုပ်နိုင်ခဲ့တာ”

“ဒါပေမဲ့ အဲဒီအချိန်မှာ ကျိဖုန်းစီရင်စုက ပျက်စီးယိုယွင်းနေပြီဖြစ်သလို လူအမြောက်အမြားလည်း သေဆုံးခဲ့ကြရတယ်။ အဲဒီလို မျှော်လင့်ချက် ကင်းမဲ့နေတဲ့ အချိန်မှာ ရှီဖုန်းရွှီလိုမျိုး သူရဲကောင်းတွေက ဂိုဏ်းအသီးသီးက ထိပ်တန်းပညာရှင်တွေနဲ့ လက်တွဲပြီး မိစ္ဆာဘုရင် ‘ဟင်းလင်းပြင်သားရဲ’ ကို အမြစ်ပြတ် သုတ်သင်နိုင်ခဲ့ကြတယ်။ နောက်ဆုံးမှာတော့ လူသားတွေက မိစ္ဆာသားရဲတွေကို အနိုင်ယူပြီး ကျိဖုန်းစီရင်စုရဲ့ အရှင်သခင်တွေအဖြစ် ပြန်လည်ရပ်တည်နိုင်ခဲ့တာပေါ့”

“အဲဒီနောက်မှာ ရှီဖုန်းရှုက ကျိဖုန်းစီရင်စုမှာ မင်းဆက်တစ်ခုကို ခေတ္တ တည်ထောင်ခဲ့ပေမဲ့ သူ ပျောက်ကွယ်သွားပြီးနောက် နှစ်ပေါင်း ၃၀ အကြာမှာ အဲဒီမင်းဆက်က ပြိုလဲသွားခဲ့တယ်။ အဲဒီကတည်းက ကျိဖုန်းစီရင်စုကို ဂိုဏ်းအသီးသီးက ခွဲဝေအုပ်ချုပ်ခဲ့ကြတာ။ အခုခေတ် သာမန်လူတွေနဲ့ သိုင်းသမားတွေက လွန်ခဲ့တဲ့ နှစ်ပေါင်း ၃၀၀ က မိစ္ဆာသားရဲ ကျူးကျော်မှုကို မေ့နေကြပြီ ဆိုပေမဲ့ ဂိုဏ်းကြီးတွေကတော့ သတိရှိနေစေဖို့အတွက် ဒီမိစ္ဆာနှိမ်နင်းရေးပွဲတော်ကို အစဉ်အလာအတိုင်း ဆက်လက် ကျင်းပနေကြတာပဲ”

ရွှီနင်က နားထောင်ရင်း တိတ်ဆိတ်စွာ ခေါင်းညိတ်လိုက်သည်။ ‘ကျိဖုန်းစီရင်စုမှာ ဒီလိုမျိုး မှောင်မိုက်တဲ့ အတိတ်တစ်ခု ရှိခဲ့တာကိုး’

ရွှီနင်သည် ယခုမှပင် ဤမိစ္ဆာနှိမ်နင်းရေးပွဲတော်၏ အဓိပ္ပာယ်ကို နားလည်သွားတော့သည်။

“ဟိုမှာကြည့်စမ်း... အဲဒါ စီနီယာ ဟယ့်မင်ယဲ့ပဲ”

လဲ့ချိုင်ဝေးက စင်မြင့်ဆီသို့ ရုတ်တရက် ညွှန်ပြလိုက်ရာ သူမ၏အသံမှာ စိတ်လှုပ်ရှားမှုကြောင့် အနည်းငယ် တုန်ရီနေသည်။

ရွှီနင် လှမ်းကြည့်လိုက်သောအခါ အပြာရင့်ရောင် ဝတ်စုံရှည်ကို ဝတ်ဆင်ထားသည့် လူငယ်တစ်ဦး စင်ပေါ်သို့ လမ်းလျှောက်တက်လာသည်ကို တွေ့လိုက်ရသည်။

သူ၏ ဆံပင်ရှည်များမှာ လေထဲတွင် ဝဲပျံနေပြီး ကျောတွင် ဓားရှည်တစ်လက်ကို လွယ်ထားသည်။ သူသည် ဓားအိမ်ထဲမှ ထွက်လာသော ဓားတစ်လက်ကဲ့သို့ပင် သူ၏ စူးရှထက်မြက်မှုကို လူတိုင်း သိသာထင်ရှားစွာ အာရုံခံမိနေကြသည်။

“ဟယ့်မင်ယဲ့...”

ရွှီနင်သည် ဤသူ၏ သတင်းကို ယခင်က ကြားဖူးသည်။

သူသည် ယွဲ့လန်ဂိုဏ်း၏ ပထမဆုံးသော တပည့်ရင်းဖြစ်ပြီး ဂိုဏ်းချုပ် မီရှင်းယယ်၏ တပည့်လည်း ဖြစ်သည်။

သူ၏ အင်အားမှာ အနည်းဆုံး ဟင်းလင်းပြင်နယ်ပယ် ခုနစ်ဆင့်မြောက်ဖြစ်သော အထွတ်အထိပ်နယ်ပယ်သို့ ရောက်ရှိနေပြီဟု ကောလာဟလများ ထွက်ပေါ်နေခဲ့သည်။ အသက် ၃၀ သာ ရှိသေးသော်လည်း သူ၏ စွမ်းရည်မှာ ဂိုဏ်း၏ အကြီးအကဲများနှင့်ပင် ယှဉ်နိုင်နေပြီ ဖြစ်သည်။

ဟယ့်မင်ယဲ့ ပေါ်လာခြင်းက လူထောင်ပေါင်းများစွာ၏ အာရုံကို ဖမ်းစားလိုက်သည်။

သူ စင်ပေါ်သို့ ရောက်သည်နှင့် ကြီးမားသော လှောင်အိမ်တစ်ခုကိုလည်း ရှေ့သို့ တွန်းထုတ်လာကြသည်။ လှောင်အိမ်ပေါ်မှ အဝတ်ကို ဆွဲဖယ်လိုက်သောအခါ ကြောက်မက်ဖွယ်ကောင်းသော သားရဲကြီးတစ်ကောင်ကို လူတိုင်း မြင်တွေ့လိုက်ရသည်။

ထိုသားရဲကြီးမှာ အမြင့် ၁၀ မီတာခန့်ရှိပြီး တစ်ကိုယ်လုံးမှာ အစိမ်းရင့်ရောင် အကြေးခွံများ ဖုံးအုပ်ထားကာ ရက်စက်ကြမ်းကြုတ်သော မျက်လုံးနီကြီးများ ရှိသည်။ သူ၏ ခြေလက်များမှာ တုတ်ခိုင်ပြီး အမြီးတွင် ဆူးချွန်များစွာ ပါရှိသည်။

သူ၏ ခန္ဓာကိုယ်ပေါ်တွင် ဝါကျင်ကျင် လိုင်းများ ရှိနေပြီး အသက်ရှူလိုက်တိုင်း နက်မှောင်သော အဝါရောင် အရှိန်အဝါများ ထွက်ပေါ်နေလေသည်။

လှောင်အိမ်တံခါး ပွင့်သွားလေသည်။

ထိုသားရဲကြီး ထွက်လာသည်နှင့်တစ်ပြိုင်နက် သူ၏ ကြမ်းတမ်းသော ဖိအားများမှာ အရပ်မျက်နှာအနှံ့သို့ ပျံ့နှံ့သွားသည်။ ရွှီနင်ပင်လျှင် အနည်းငယ် စိုးရိမ်စိတ် ဝင်သွားရသည်။

“ဒီမိစ္ဆာသားရဲရဲ့ အင်အားက ဟင်းလင်းပြင်နယ်ပယ် အလယ်အလတ်အဆင့်မှာတင် ရှိတော့မှာ မဟုတ်ဘူး...”

အဝေးမှ ကြည့်နေရသော်လည်း ရွှီနင်မှာ ထိုသားရဲကြီးထံမှ ပြင်းထန်သော ခြိမ်းခြောက်မှုကို ခံစားနေရသည်။

“ဒါက ဟင်းလင်းပြင်နယ်ပယ် အဆင့်မြင့် မိစ္ဆာသားရဲပဲ ဖြစ်ရမယ်။ ဟင်းလင်းပြင်နယ်ပယ် ခုနစ်ဆင့်မြောက် သိုင်းသမားတစ်ယောက်နဲ့ ယှဉ်နိုင်မှာ သေချာတယ်”

သားရဲကြီး လှောင်အိမ်ထဲမှ ထွက်လာသည်နှင့် စင်မြင့်၏ ထောင့်လေးထောင့်မှ အလင်းတန်းများ ရုတ်တရက် ထွက်ပေါ်လာပြီးနောက် တစ်ခုနှင့်တစ်ခု ဆက်သွယ်သွားကာ စင်မြင့်ထက်တွင် ပွင့်လင်းမြင်သာသော အလင်းအကာအကွယ်တစ်ခုကို ဖြစ်ပေါ်စေခဲ့သည်။

‘ဒါက ဟင်းလင်းပြင်နယ်ပယ် ခုနစ်ဆင့်ဖြစ်တဲ့ အထွတ်အထိပ်နယ်ပယ်ရဲ့ အစွမ်းလား’

ရွှီနင်သည် အလင်းအကာအကွယ်ကို ကြည့်ရင်း စဉ်းစားနေမိသည်။ ဤအလင်းအကာအကွယ်သည် ပွဲကြည့်ပရိသတ်များကို မထိခိုက်စေရန် သီးသန့်ခွဲထုတ်ထားသည့် ‘အတားအဆီး’ တစ်ခုနှင့် တူလှပေသည်။

ဟင်းလင်းပြင်နယ်ပယ်၏ လေးဆင့်မှ ခြောက်ဆင့်အထိမှာ နယ်ပယ်၏ ဝိသေသလက္ခဏာများကို နားလည်သဘောပေါက်အောင် စုဆောင်းရသည့် အဆင့်များဟု ဆိုကြသည်။

ခုနစ်ဆင့်နှင့် အထက်သို့ ရောက်ရှိသွားသောအခါတွင်မူ ဟင်းလင်းပြင်နယ်ပယ် သိုင်းသမားတစ်ဦးသည် သာမန်သိုင်းပညာများကို ကျော်လွန်သော နည်းလမ်းများကို ထုတ်ဖော်နိုင်ပြီ ဖြစ်သည်။ ရွှီနင်၏ အမြင်တွင်မူ သူတို့၏ နည်းလမ်းများမှာ အလွန်ပင် ဆန်းကြယ်လှပေသည်။

အလင်းအကာအကွယ်အတွင်း၌ သားရဲကြီးမှာ ဟိန်းဟောက်ရင်း ဟယ့်မင်ယဲ့ကို စိုက်ကြည့်နေသည်။

သူ၏ ခန္ဓာကိုယ်ပေါ်မှ ဝါကျင်ကျင်လိုင်းများမှာ ပိုမိုတောက်ပလာလေသည်။ သားရဲကြီးသည် မြေကြီးကို ဆောင့်နင်းလိုက်ရာ စင်ပေါ်ရှိ ကျောက်တုံးနှင့် မြေစာခဲများမှာ အသက်ဝင်လာသကဲ့သို့ လေထဲတွင် ဝဲပျံလာပြီးနောက် ဟယ့်မင်ယဲ့ထံသို့ အရှိန်အဟုန်ဖြင့် ပြေးဝင်သွားတော့သည်။

ထိုအရာကိုမြင်သော်လည်း ဟယ့်မင်ယဲ့မှာ လုံးဝ ထိတ်လန့်ခြင်း မရှိပေ။ သူသည် လက်ထဲမှ ဓားရှည်ကို ဝှေ့ယမ်းလိုက်ရာ ဓားသွားမှ အရှိန်အဝါများ ပေါက်ကွဲထွက်လာပြီး ပြေးဝင်လာသော ကျောက်တုံးများကို ရိုက်ခွဲပစ်လိုက်သည်။

သားရဲကြီး၏ အကြေးခွံများပေါ်တွင် အဝါရောင် အလွှာတစ်ခု ဖုံးလွှမ်းသွားပြီး သူ၏ ကြီးမားသော လက်သည်းများဖြင့် ဟယ့်မင်ယဲ့ကို လှမ်းပုတ်လိုက်သည်။

ဟယ့်မင်ယဲ့မှာ ခြေဖျားထောက်ကာ လေထဲသို့ ခုန်တက်လိုက်ပြီး သားရဲကြီးနှင့် မျက်နှာချင်းဆိုင်လိုက်သည်။

ရှပ်... ရှပ်...

ဟယ့်မင်ယဲ့၏ ဓားရှည်မှာ ဘယ်ညာ လျင်မြန်စွာ ဝှေ့ယမ်းသွားသည်။ အပြာနုရောင် ဓားရိပ်များမှာ သားရဲကြီးကို ချက်ချင်း ဖုံးလွှမ်းသွားလေသည်။

သားရဲကြီး၏ ခန္ဓာကိုယ်ပေါ်မှ အဝါရောင် အကြေးခွံများမှာ တဖြည်းဖြည်း စုတ်ပြဲသွားပြီး သွေးများ စီးကျလာတော့သည်။

သားရဲကြီးမှာ နာကျင်စွာ အော်ဟစ်လာပြီး ပိုမို ကြမ်းတမ်းလာသည်။ သူသည် သူ၏ ခြေလက်များနှင့် အမြီးကို ဝှေ့ယမ်းကာ ဟယ့်မင်ယဲ့ကို ရိုက်သတ်ရန် ကြိုးစားသော်လည်း အချည်းနှီးပင် ဖြစ်သည်။

သားရဲကြီး၏ ခန္ဓာကိုယ်အနှံ့တွင် ဒဏ်ရာများ ပြည့်နှက်နေချိန်၌ ဟယ့်မင်ယဲ့၏ လက်ထဲမှ ဓားရှည်မှာ စူးရှသော အသံတစ်ခု ထွက်ပေါ်လာသည်။

ထို့နောက် အပြာရောင်အလင်းတန်းများမှာ သားရဲကြီး၏ ခန္ဓာကိုယ်ပေါ်တွင် တစ်ခုနှင့်တစ်ခု ယှက်နွယ်သွားပြီး ခဏအတွင်းမှာပင် သားရဲကြီးမှာ ဒဏ်ရာအမြောက်အမြားဖြင့် သွေးမိုးများအဖြစ်သို့ ပြောင်းလဲသွားတော့သည်။

အဆင့်မြင့် ဟင်းလင်းပြင်နယ်ပယ် မိစ္ဆာသားရဲတစ်ကောင်အား ဟယ့်မင်ယဲ့မှာ အလွယ်တကူပင် သတ်ဖြတ်လိုက်နိုင်ခဲ့ချေပြီ။

ချက်ချင်းဆိုသလိုပင် ပွဲကြည့်စင်များထက်မှ အားပေးသံများ ဟိန်းထွက်လာသည်။ ထောင်ပေါင်းများစွာသော တပည့်များမှာ ဟယ့်မင်ယဲ့၏ အစွမ်းကို မြင်လိုက်ရသဖြင့် မှင်တက်သွားကြရသည်။

ရွှီနင်သည်လည်း အဆင့်မြင့် ဟင်းလင်းပြင်နယ်ပယ် သိုင်းသမားတစ်ယောက်၏ စွမ်းအားကို ပထမဆုံးအကြိမ် မျက်မြင်တွေ့လိုက်ရခြင်း ဖြစ်သည်။

“တကယ်ကို သန်မာတာပဲ...”

ရွှီနင်သည် မိမိကိုယ်ကိုယ် ဟယ့်မင်ယဲ့၏ ပြိုင်ဘက် မဟုတ်မှန်း ခံစားမိလိုက်သည်။

သို့သော် သူ စိတ်ဓာတ်မကျပေ။ သူ့ကိုယ်သူ အချိန်အလုံအလောက် ပေးနိုင်သရွေ့ ဟယ့်မင်ယဲ့၏ အဆင့်ကို သေချာပေါက် တက်လှမ်းနိုင်လိမ့်မည်ဟု ယုံကြည်မိသည်။

အားလုံး၏ အားပေးသံများကြားတွင် အလင်းအကာအကွယ်မှာ ပျောက်ကွယ်သွားပြီး ဟယ့်မင်ယဲ့သည် စင်ပေါ်မှ ဆင်းလာခဲ့သည်။

“ဂိုဏ်းချုပ်... မင်ယဲ့က ရှစ်ဆင့်မြောက်ကို ရောက်သွားတာလား။ သူ ရေစီးပမာ ဓားကွက်ကိုလည်း ကိုးဆင့်မြောက်အထိ ကျင့်ကြံနိုင်သွားတာလား”

ဆံပင်ဖြူ အကြီးအကဲက မီရှင်းယယ်၏ ဘေးတွင် ထိုင်ရင်း မေးလိုက်သည်။

မီရှင်းယယ်က သူ၏ မုတ်ဆိတ်ကို ပွတ်သပ်ကာ ပြုံးလျက် ခေါင်းညိတ်လိုက်သည်။ သူသည် သူ၏ တပည့်အပေါ် အလွန်ပင် ကျေနပ်အားရနေပုံရသည်။

“ဆရာ”

ဟယ့်မင်ယဲ့ လမ်းလျှောက်ဆင်းလာပြီး မီရှင်းယယ်၏ ဘေးတွင် ထိုင်လိုက်သည်။

“မဆိုးဘူးပဲ”

မီရှင်းယယ်က သူ့ကို ချီးကျူးလိုက်သည်။ ဟယ့်မင်ယဲ့သည် ယနေ့ မိစ္ဆာနှိမ်နင်းရေးပွဲတော်အတွက် အကောင်းဆုံး အစပျိုးပေးနိုင်ခဲ့သည်။

ဟယ့်မင်ယဲ့ စင်ပေါ်မှ ဆင်းသွားပြီးနောက် အနားတွင်ရှိသော တပည့်များက စင်မြင့်ကို ချက်ချင်း သန့်ရှင်းရေး လုပ်လိုက်ကြသည်။

ထို့နောက် မိစ္ဆာနှိမ်နင်းရေးပွဲတော်အား စီစဉ်သူ အကြီးအကဲက စင်ပေါ်သို့ တက်လာခဲ့သည်။ သူသည် လူထောင်ပေါင်းများစွာကို ရင်ဆိုင်ကာ ရင်ဘတ်ကို ကော့၍ အားမာန်အပြည့်ဖြင့် အော်ပြောလိုက်သည်။

“တပည့်ရင်း ဟယ့်မင်ယဲ့က အဆင့်မြင့် ဟင်းလင်းပြင်နယ်ပယ် မိစ္ဆာသားရဲကို သတ်ပြခဲ့ပြီ။ နောက်ထပ်ကတော့ မင်းတို့တွေရဲ့ အလှည့်ပဲ”

အကြီးအကဲကအကြီးအကဲက ဆက်ပြောလိုက်သည်။

“အပြင်စည်းပဲဖြစ်ဖြစ်၊ အတွင်းစည်းပဲဖြစ်ဖြစ်၊ ပင်တိုင်တပည့်ပဲဖြစ်ဖြစ် မိစ္ဆာသားရဲတွေကို ရင်ဆိုင်မယ့် တပည့်တွေအားလုံး သတ္တိရှိရှိနဲ့ ကိုယ့်ရဲ့ အစွမ်းကို အပြည့်အဝ ထုတ်ဖော်ပြကြဖို့ ငါ မျှော်လင့်တယ်။ မင်းတို့ရဲ့ စွမ်းဆောင်ရည်တွေကို အကြီးအကဲတွေနဲ့ ဂိုဏ်းတာဝန်ခံတွေက စောင့်ကြည့်နေမှာပါ။ အစွမ်းပြနိုင်ပြီး အကြီးအကဲတွေရဲ့ သဘောကျမှုကို ရမယ်ဆိုရင် မင်းတို့ဟာ အပြင်စည်းကနေ အတွင်းစည်းကို၊ အတွင်းစည်းကနေ အမည်ခံတပည့်အဖြစ်ကို တက်လှမ်းနိုင်မှာပါ”

အကြီးအကဲ၏ စကားကြောင့် ထောင်ပေါင်းများစွာသော တပည့်များ၏ ရင်ခုန်သံများ မြန်လာခဲ့သည်။ ဤသို့ အဆင့်တိုးခြင်းက သူတို့၏ ဂုဏ်ဒြပ်ကိုသာမက ရရှိမည့် အရင်းအမြစ် ပမာဏကိုလည်း ပြောင်းလဲပေးမည် မဟုတ်ပါလား။

အဆင့်အတန်းမြင့်လေ၊ ပိုမိုကောင်းမွန်သော အရင်းအမြစ်များကို ခံစားရလေဖြစ်သဖြင့် သူတို့၏ အနာဂတ်မှာ ပိုမိုတောက်ပလာမည် ဖြစ်သည်။

“နောက်ထပ်ကတော့ အပြင်စည်းတပည့်တွေအတွက် မိစ္ဆာနှိမ်နင်းရေး ၁၅ ချီကို စတင်မှာဖြစ်ပါတယ်” အကြီးအကဲက ဆိုသည်။

“တစ်ချီကို အပြင်စည်းတပည့် ၁၀၀ စီ စင်ပေါ်တက်ပြီး မိစ္ဆာသားရဲတွေကို တိုက်ခိုက်ရမယ်။ ဒီအခြေအနေအတွင်းမှာ မိစ္ဆာသားရဲတွေကြောင့် ဒဏ်ရာပြင်းပြင်းထန်ထန် ရနိုင်ပေမဲ့ အသက်အန္တရာယ်အတွက်တော့ မပူပါနဲ့။ လိုအပ်ရင် အကြီးအကဲတွေက ကယ်တင်ပေးပါလိမ့်မယ်”

“နေရာ ၁၀၀ ပဲ ရှိတာမို့လို့ ကိုယ့်ဘာသာ တိုက်ယူကြ။ ပထမဆုံးအချီကို အခုပဲ စတင်မယ်”

အကြီးအကဲ စကားဆုံးသည်နှင့် အပြင်စည်းတပည့်အချို့မှာ စင်ပေါ်သို့ အလုအယက် ပြေးတက်သွားကြတော့သည်။

“သူတို့တွေ အတော်လေး စိတ်အားထက်သန်နေကြတာပဲ...”

ရွှီနင်သည် ပြေးတက်သွားသော အပြင်စည်းတပည့်များကို ကြည့်ရင်း သူတို့၏ စိတ်လှုပ်ရှားမှုကို ရှင်းလင်းစွာ ခံစားမိနေသည်။

“ပထမဆုံး တက်သွားတဲ့ လူ ၁၀၀ ထဲမှာ ထက်ဝက်နီးပါးက ဟင်းလင်းပြင်နယ်ပယ် သိုင်းသမားတွေပဲ...”

ရွှီနင်သည် စင်ပေါ်သို့ ခုန်တက်သွားသော တပည့်များကို ကြည့်ကာ ဟင်းလင်းပြင်နယ်ပယ် သိုင်းသမား အရေအတွက်ကို ခန့်မှန်းကြည့်လိုက်သည်။

ယွဲ့လန်ဂိုဏ်း၏ အပြင်စည်းတွင် တပည့်ပေါင်း ၃၀၀၀ နီးပါး ရှိလေသည်။

ထို ၃၀၀၀ မှာ သာမန်မျိုးရိုးမှ လာသူများ ဖြစ်ကြသည်။ ထိုသူတို့မှာ ရွှီနင်တို့ကဲ့သို့ ယွဲ့လန်ဂိုဏ်း၏ လက်အောက်ခံ မိသားစုများမှ ထောက်ခံချက်ဖြင့် လာကြသူများနှင့် မတူပေ။

အပြင်စည်းတပည့် အများစုမှာ သာမန်သိုင်းသမားများသာ ဖြစ်ကြသည်။ သူတို့အနေဖြင့် အပြင်စည်းမှ အတွင်းစည်းသို့ တက်လှမ်းလိုပါက ဤမိစ္ဆာနှိမ်နင်းရေးပွဲတော်တွင် ကောင်းမွန်စွာ စွမ်းဆောင်ပြနိုင်ရန် လိုအပ်သည်။

စတင်တက်သွားသော လူ ၁၀၀ မှာ သူတို့ကိုယ်သူတို့ ယုံကြည်မှုရှိသည့် ထူးချွန်သော တပည့်များ ဖြစ်ကြသည်။

“အပြင်စည်းတပည့်တွေထဲမှာ ဟင်းလင်းပြင်နယ်ပယ် ကျွမ်းကျင်သူ ၁၀၀ နီးပါးရှိတာပဲ။ အတွင်းစည်းက လူဦးရေနဲ့ သိပ်မကွာဘူး”

ရွှီနင်က တိုးတိုးလေး ရေရွတ်လိုက်သည်။

“ဟုတ်တယ်၊ အပြင်စည်းတပည့်တွေကို လျှော့မတွက်နဲ့”

လဲ့ချိုင်ဝေးက အနည်းငယ် သက်ပြင်းချလိုက်သည်။

“အတွင်းစည်းတပည့် တစ်ယောက်ဖြစ်နေပေမဲ့ ငါက အခုထိ ဟင်းလင်းပြင်နယ်ပယ်ကို မရောက်သေးတော့ နည်းနည်းတော့ ရှက်ဖို့ကောင်းတာပေါ့”

“စီနီယာအမလဲ့... ကိုယ့်ကိုယ်ကိုယ် သိမ်ငယ်မနေပါနဲ့”

ရွှီနင်က နှစ်သိမ့်လိုက်သည်။

“အပြင်စည်းတပည့် ၃၀၀၀ မှာ ဟင်းလင်းပြင်နယ်ပယ် သိုင်းသမားဆိုတာ အယောက် ၃၀ မှာ တစ်ယောက်တောင် မရှိပါဘူး။ သက်တမ်းရင့် အပြင်စည်းတပည့်တွေ ဟင်းလင်းပြင်နယ်ပယ်ကို ရောက်သွားတာက သဘာဝကျပါတယ်”

လဲ့ချိုင်ဝေးသည် ထိုစကားကို ကြားသောအခါ ခေါင်းညိတ်လိုက်သည်။

ထိုအပြင်စည်းတပည့်များ၏ အခြေအနေကို သူမ ကောင်းစွာ သိသည်။ သူတို့ထဲမှ အချို့မှာ ဟင်းလင်းပြင်နယ်ပယ်သို့ ရောက်နေကြသော်လည်း အဆင့်နိမ့် ဟင်းလင်းပြင်နယ်ပယ် လျှို့ဝှက်ကျင့်စဉ်ကိုသာ ကျင့်ကြံထားကြရသဖြင့် သူတို့၏ အနာဂတ်မှာ အတော်လေး အကန့်အသတ် ရှိနေမည်ဖြစ်သည်

အပြင်စည်းမှ ဟင်းလင်းပြင်နယ်ပယ် သိုင်းသမားတစ်ယောက် အတွင်းစည်းသို့ ရောက်လာလျှင်ပင် အောက်ခြေအဆင့်တွင်သာ နေရမည်ဖြစ်ပြီး အဖွဲ့အစည်း၏ အရေးပါသော အစိတ်အပိုင်းတစ်ခု ဘယ်တော့မှ ဖြစ်လာလိမ့်မည် မဟုတ်ပေ။

“အပြင်စည်းတပည့်တွေနဲ့ မိစ္ဆာသားရဲတွေရဲ့ ပထမဆုံးအချီ စပြီ...”

စင်မြင့်ထက်တွင် အလင်းအကာအကွယ်ကို ပြန်လည် တည်ဆောက်လိုက်ပြီး မိစ္ဆာသားရဲ အများအပြားကို လွှတ်လိုက်သည်။

ထိုမိစ္ဆာသားရဲများတွင် ဟင်းလင်းပြင်နယ်ပယ်နှင့် သာမန်နယ်ပယ်မှ သားရဲများ ပါဝင်သည်။

စင်ပေါ်သို့ ရောက်သည်နှင့် သူတို့သည် အပြင်စည်းတပည့်များနှင့် ချက်ချင်း တိုက်ခိုက်ကြတော့သည်။ စင်မြင့်ထက်တွင် တိုက်ခိုက်သံများနှင့် အော်ဟစ်သံများ ပြည့်နှက်နေလေသည်။

“ဒီအပြင်စည်းတပည့်တွေ တကယ်ကို အစွမ်းကုန် ကြိုးစားနေကြတာပဲ...”

အတွင်းစည်း တာဝန်ခံများ၏ အသိအမှတ်ပြုမှုကို ရရှိရန်အတွက် အပြင်စည်းတပည့် အများအပြားသည် သူတို့ကိုယ်သူတို့ အစွမ်းကုန် ထုတ်ပြနေသည်ကို ရွှီနင် သတိထားမိလိုက်သည်။

အချို့သော အပြင်စည်းတပည့်များ၏ ဝမ်းနည်းဖွယ် အခြေအနေကိုလည်း ရွှီနင် ခံစားမိနေသည်။

မကြာခင်တွင် ထိုအချီမှာ ပြီးဆုံးသွားသည်။

ဟယ့်မင်ယဲ့၏ အစောပိုင်း သန့်ရှင်းသပ်ရပ်သော တိုက်ကွက်များနှင့် နှိုင်းယှဉ်ပါက အပြင်စည်းတပည့်များမှာ တိုက်ပွဲအပြီးတွင် အတော်လေး ပင်ပန်းနွမ်းနယ်နေဟန် ရှိသည်။

ပထမအချီမှ မိစ္ဆာသားရဲများအားလုံး အသတ်ခံလိုက်ရပြီးနောက် စင်ပေါ်တွင် ဟင်းလင်းပြင်နယ်ပယ် သိုင်းသမား ခြောက်ယောက်မှ ခုနစ်ယောက်အထိသာ ကျန်ရှိတော့သည်။

သူတို့ထဲမှ လေးယောက်မှာ ကောင်းမွန်စွာ စွမ်းဆောင်နိုင်ခဲ့သဖြင့် အတွင်းစည်း တာဝန်ခံများ၏ သဘောကျမှုကို ရရှိခဲ့ပြီး အတွင်းစည်းတပည့်အဖြစ် သတ်မှတ်ခြင်း ခံခဲ့ရသည်။

ထို့နောက် ဒုတိယအချီ စတင်ခဲ့သည်။ ဒုတိယအချီတွင်မူ ဟင်းလင်းပြင်နယ်ပယ် သိုင်းသမားအရေအတွက်မှာ သိသိသာသာ လျော့နည်းသွားသည်။

အင်အားကြီးသူများမှာ ပထမအချီတွင်ကတည်းက စင်ပေါ်သို့ တက်သွားခဲ့ကြသောကြောင့် ဖြစ်သည်။

“လူတိုင်းက အခုထိ အရမ်း စိတ်လှုပ်ရှားနေကြတုန်းပဲ...”

အပြင်စည်းတပည့် ၃၀၀၀ ရှိသော်လည်း သူတို့ထဲမှ ထက်ဝက်ခန့်သာ စင်ပေါ်တက်ခွင့် ရကြမည်ဖြစ်သည်။ အကြီးအကဲများ၏ အကာအကွယ် ရှိသောကြောင့် အသက်အန္တရာယ် မစိုးရိမ်ရသဖြင့် လူတိုင်းက ထိုမိစ္ဆာသားရဲများကို စမ်းသပ်တိုက်ခိုက်လိုကြသည်။

“ဒီအတိုင်းဆိုရင် ၁၅ ချီ ပြီးဖို့ အနည်းဆုံး သုံးနာရီလောက် ကြာလိမ့်မယ်”

အတွင်းစည်းတပည့်တွေ တက်ဖို့အတွက် အချိန်အတော်ကြာ စောင့်ရဦးမည်ဖြစ်ကြောင်း ရွှီနင် တွက်ချက်လိုက်သည်။ အပြင်စည်းတပည့်များ၏ ၁၅ ချီ ပြီးဆုံးသွားချိန်တွင် နှစ်နာရီခွဲခန့် ကုန်လွန်သွားခဲ့ချေပြီ။

‘အတွင်းစည်းတပည့်တွေ တက်ဖို့ အချိန်ရောက်ပြီ’

အပြင်စည်းများအလှည့် ပြီးဆုံးသွားသောအခါ ရွှီနင်သည် သူတို့၏ အလှည့်ရောက်တော့မည်ကို သိလိုက်သည်။

ရွှီနင်သည် အနည်းငယ် စိတ်လှုပ်ရှားကာ စမ်းသပ်လိုစိတ်များ ပြင်းပြနေသည်။ သူ၏ စိတ်ထဲတွင်မူ ဟင်းလင်းပြင်နယ်ပယ် အလယ်အလတ်အဆင့် မိစ္ဆာသားရဲတစ်ကောင်နှင့်ပင် ယှဉ်ပြိုင်တိုက်ခိုက်လိုနေသည်။

“နောက်ထပ်ကတော့ အတွင်းစည်းတပည့်တွေရဲ့အလှည့်ပဲ ဖြစ်ပါတယ်”

စီစဉ်သူ အကြီးအကဲက စင်ပေါ်မှနေ၍ အော်ပြောလိုက်သည်။

“အတွင်းစည်းတပည့်တွေနဲ့ မိစ္ဆာသားရဲတွေရဲ့ တိုက်ပွဲကို ငါးချီ ခွဲခြားထားပြီး တစ်ချီမှာ လူအယောက် ၂၀ စီ ပါဝင်မှာ ဖြစ်ပါတယ်”

“တစ်ချီမှာ အယောက် ၂၀ ပဲလား...”

ရွှီနင် မျက်မှောင်ကြုတ်လိုက်မိသည်။

“နည်းလှချည်လား...”

“ရွှီနင်... မင်း အဆင်သင့်ဖြစ်ပြီလား”

နင်ရွှင်က လမ်းလျှောက်လာပြီး “မင်း ဘယ်နှစ်ချီမြောက်မှာ ဝင်တိုက်မှာလဲ” ဟု မေးလိုက်သည်။

“ပထမအချီကတော့ အတွင်းစည်းက အတော်ဆုံးလူတွေနဲ့ ပြည့်နေမှာ သေချာတယ်။ အတွင်းစည်း အုပ်စုတွေရဲ့ ခေါင်းဆောင်တွေက ပထမဆုံး ဝင်တိုက်ကြမှာဆိုတော့ အဲဒီလူတွေနဲ့ ပြိုင်ရတာက အရမ်း ဖိအားများလိမ့်မယ်”

ရွှီနင် မဖြေရသေးမီမှာပင် နင်ရွှင်က ဆက်ပြောပြလေသည်။

“မင်းကို ဒုတိယအချီမှာ ဝင်တိုက်ဖို့ ငါအကြံပေးချင်တယ်။ ဒါမှ ငါလည်း မင်းနဲ့အတူ တိုက်လို့ရမှာ။ မင်း မိစ္ဆာသားရဲတွေကို တိုက်တဲ့အခါ မင်းရဲ့ အစွမ်းကို ပိုပြနိုင်အောင်၊ အကြီးအကဲတွေရှေ့မှာ မျက်နှာပွင့်အောင် ငါကူညီပေးမယ်လေ”

ရွှီနင်က ထိုအကြံဉာဏ်ကို ကြားသော် စဉ်းစားလိုက်ပြီး ပြောလိုက်သည်။

“စီနီယာနင်... ကျွန်တော် ပထမဆုံးအချီမှာပဲ ဝင်တိုက်မယ်”

“ပထမဆုံးအချီ ဟုတ်လား”

နင်ရွှင်ကနင်ရွှင်က မေးလိုက်သည်။

“ဒါပေမဲ့ ပထမအချီက ပြိုင်ဘက်တွေက...”

“ရပါတယ်”

ရွှီနင်က ဆိုသည်။ “ပြိုင်ဘက်က သန်မာလေ၊ ကျွန်တော် ပိုပြီး စွမ်းဆောင်နိုင်လေပဲ။ အဲဒါမှ အကြီးအကဲတွေရဲ့ သဘောကျမှုကို ပိုရနိုင်မှာဖြစ်သလို အမည်ခံတပည့်အဖြစ် ရွေးချယ်ခံရဖို့ အခွင့်အရေး ပိုများမှာပေါ့”

ရွှီနင်သည် အမည်ခံတပည့်အဖြစ် အဆင့်တက်ခြင်း၏ အကျိုးကျေးဇူးကို သိထားသည်။

အကြီးအကဲတစ်ယောက်အား ကျောထောက်နောက်ခံအဖြစ် ရထားခြင်းက သူ၏ အနာဂတ်အတွက်ရော လက်သီးခုနစ်ဖော်အဖွဲ့၏ အနာဂတ်အတွက်ပါ များစွာ အထောက်အကူ ဖြစ်ပေလိမ့်မည်။

“ဒါပေမဲ့ အုပ်စုခေါင်းဆောင်တွေရဲ့ အစွမ်းက...”

နင်ရွှင်က သူ့ကို ဆက်လက် နားချချင်နေသေးသော်လည်း ရွှီနင်က ဆုံးဖြတ်ချက် ချပြီးသား ဖြစ်သည်။

“စီနီယာနင်... စိတ်မပူပါနဲ့”

ရွှီနင်က ပြုံးလျက် မတ်တတ်ရပ်လိုက်ပြီး စင်မြင့်၏ အလယ်ဆီသို့ ဦးတည်ကာ လမ်းလျှောက်သွားတော့သည်။

ရွှီနင် မတ်တတ်ရပ်လိုက်သည်နှင့်တစ်ပြိုင်နက် လခြမ်းဓားအဖွဲ့၏ ခေါင်းဆောင် ကူရီးရှန်သည်လည်း တစ်ချိန်တည်းမှာပင် ထရပ်လိုက်လေသည်။

နှစ်ယောက်သား တစ်ဦးကိုတစ်ဦး လှမ်းကြည့်လိုက်ကြသည်။ သူတို့၏ မျက်လုံးများထဲတွင် ရန်လိုမှုများ ပြည့်နှက်နေသည်ကို အတိုင်းသား မြင်တွေ့နေရသည်။

“ရွှီနင်လား...”

ကူရီးရှန်က ထူးဆန်းသော အပြုံးတစ်ခုကို ပြုံးလိုက်လေသည်။