အခန်း (၂၁၅၃-၂၁၅၄)

အပိုင်း(၂၁၅၃)

"ရှင်က တောက်ပသော ကြယ်နန်းတော် နဲ့ အဆက်အသွယ် ရှိတာလား..."

အဖြူရောင် ကောင်းကင်သည် ယခင်က ကြယ်တာရာ တံတားမှ ကြယ်တာရာ ရွှေ့ပြောင်းခြင်း အလင်း ကို အသုံးပြု၍ အဖြူရောင် ကောင်းကင် ဂလက်ဆီသို့ အချိန်တိုအတွင်း ရောက်ရှိခဲ့ဖူးသည်။ ထို့ကြောင့်ပင် သူမသည် ကြယ်တာရာ ရွှေ့ပြောင်းခြင်း အလင်းတန်း၏ အရှိန်အဝါကို အလွန် ရင်းနှီးနေသည်။

"နေဦး..."

အဖြူရောင် ကောင်းကင်သည် ကြယ်တာရာ တံတား၏ တစ်ကြောင်းပြန် သဘောသဘာဝနှင့် ၎င်းကို အသက်သွင်းရန် လိုအပ်သည့် ကြီးမားလှသော အစီအရင်ကြီးကို ရုတ်တရက် သတိရလိုက်သည်။ ကြယ်တာရာ တံတားက မည်ကဲ့သို့ ဤနေရာတွင် အလုပ်လုပ်နိုင်ရသနည်း။ သူမ၏ ဦးနှောက်မှာ လုံးဝ ဝေဝါးသွားပြီး မူးဝေလာသကဲ့သို့ ခံစားလိုက်ရသည်။

"သူက ကိုယ်ပိုင် ကြယ်တာရာ တံတားကို ဖန်တီးနိုင်တာလား"

နတ်ပရီက သူ၏ တုန်လှုပ်မှုကို ထိန်းချုပ်ရင်း လေးနက်စွာ မေးလိုက်သည်။ သူ၏ စိတ်အခြေအနေမှာလည်း မဆန်းပေ။ ရှေးဟောင်း ချိတ်ပိတ်နယ်မြေတွင် ဆိုလျှင် ကြယ်တာရာ ဖြတ်သန်းမှု အလင်းကို ထုတ်လုပ်နိုင်သည့် အရာနှစ်ခုသာ ရှိသည်။ တစ်ခုမှာ ထူးခြားသောအင်အားစုတစ်ခုက ချန်ရစ်ခဲ့သည့် ရှေးဟောင်း အစီအရင်ကြီး ဖြစ်ကြီး နောက်တစ်ခုမှာမူ အလွန်အဖိုးတန်သော ပစ္စည်းများနှင့် တည်ဆောက်ထားသည့် အဆုံးမဲ့ ဟင်းလင်းပြင် ကြေးမုံပင် ဖြစ်ပေသည်။

အာကာသ ဝေဟင်ဂိုဏ်းသည်ပင် အဆုံးမဲ့ ခရီးသွားနယ်မြေမှ စွမ်းအင်များကို အဆမတန် စုပ်ယူအသုံးပြုရသဖြင့် ထိုအစီအရင်ကို အသုံးပြုခဲလှသည်။ သို့သော် ၎င်း၏ ဒဏ္ဍာရီလာ အရှိန်နှင့် မည်သည့်နေရာသို့မဆို သွားလာနိုင်စွမ်းတို့ကြောင့် ရှေးဟောင်း ချိတ်ပိတ်နယ်မြေ တစ်ခုလုံးတွင် ယနေ့တိုင် ကျော်ကြားနေဆဲ ဖြစ်သည်။

အခြားတစ်ဖက်တွင်မူ အီလီစီယမ် အသေး သည် ၎င်း၏ ကိုယ်ပိုင် အစီအရင်များမှ တစ်ဆင့် ကြယ်တာရာ ရွှေ့ပြောင်းခြင်း အလင်း ကို ဖန်တီးနိုင်သည်။ ဂလက်ဆီ (၄) ခုနှင့် ၎င်းတို့ကြားရှိ ဟင်းလင်းပြင်များကို ဖြတ်ကျော်ရန် (၄) နှစ်တည်းနှင့် ခရီးပေါက်ခဲ့ခြင်းမှာ ဤအချက်ကြောင့်ပင်။

၄ နှစ်...

မှောင်မိုက်သော ဟင်းလင်းပြင်ကြီး၏ အတိုင်းအဆမဲ့ ကျယ်ပြောလှပုံနှင့် အကွာအဝေးကို စကားလုံးဖြင့် ဖော်ပြရန်ပင် ခက်ခဲလှပေသည်။

"ကိုယ်ပိုင် ကြယ်တာရာ တံတားကို ဖန်တီးနိုင်တာလား..."

အဖြူရောင် ကောင်းကင်မှာ အံ့သြလွန်းသဖြင့် ဝေ့ဝူယင်၏ လက်မောင်းကို လှမ်းကိုင်ရန် ခုန်အုပ်လိုက်သော်လည်း ပါခက် ထုတ်လွှတ်လိုက်သော မမြင်ရသည့် အားလှိုင်းတစ်ခုကြောင့် ရပ်တန့်သွားခဲ့ရသည်။ သူမ အနည်းငယ် ယိုင်နဲ့သွားပြီးမှ မိမိကိုယ်ကိုယ် ထိန်းချုပ်မှု လွတ်သွားကြောင်း သတိထားမိကာ ချောင်းတစ်ချက် ဟန့်လိုက်သည်။ ထို့နောက် ပါခက်ကို မျက်စောင်းတစ်ချက် ထိုးလိုက်ပြီးမှ ဝေ့ဝူယင်ကို ပြန်မေးလိုက်၏။

"သူပြောတာ တကယ်လား... ရှင်က ကိုယ်ပိုင် ကြယ်တာရာ တံတားကို ဖန်တီးနိုင်တာလား..."

ဝေ့ဝူယင်သည် စစ်တလင်းမှ ပြန်လာခဲ့စဉ်ကတည်းက ကြယ်တာရာ ဖြတ်သန်းမှု အလင်း၏ နက်နဲသော သဘောတရားများကို နားလည်ခဲ့ပြီး ဖြစ်သည်။ သူ၏ ဟင်းလင်းပြင် နဂါး စွမ်းအင် သို့မဟုတ် အချိန်နှင့် ဟင်းလင်းပြင်ဆိုင်ရာ သာမည အာဏာများဖြင့် ၎င်းကို ဖန်တီးနိုင်စွမ်း ရှိသည်။ သို့သော် သူသည် ဟင်းလင်းပြင် တံခါး ဖန်တီးခြင်း နည်းလမ်း ကိုသာ အမြဲအသုံးပြုလေ့ရှိရာ ကြယ်တာရာ ဖြတ်သန်းမှု အလင်းမှာ သူ့အတွက် ခေတ်နောက်ကျသော သွားလာမှု နည်းလမ်းတစ်ခုသာ ဖြစ်နေတော့သည်။

ဝေ့ဝူယင်သည် တောက်ပသော ကြယ်နန်းတော် ၏ စွမ်းအင် အမှတ်အသားကို အသုံးပြု၍ ကြီးထွားခြင်းဇုံသို့ ဦးတည်ချက် သတ်မှတ်လိုက်သည်။ ထိုအမှတ်အသားသည် ဂလက်ဆီဇုံများ၊ ကြယ်စုတန်းများနှင့် နယ်မြေအသီးသီးရှိ အကာအကွယ် အစီအရင်များကို ဖြတ်ကျော်ခွင့် ရရှိထားခြင်း ဖြစ်သည်။

ဝေ့ဝူယင်သည် မိမိ၏ ပေါ့ဆသော ဝန်ခံချက်တစ်ခုကြောင့် တောက်ပသော ကြယ်နန်းတော် ၏ ဂလက်ဆီတွင်း စီးပွားရေးလုပ်ငန်းများ တစ်ခဏချင်း ပြိုလဲသွားမည်ကို မလိုလားသဖြင့် နှုတ်မှ ဤသို့ ပြောလိုက်၏။

"ဘယ်ကသာ လာရမှာလဲ... ရယ်စရာတွေ... ဒါက တောက်ပသော ကြယ်နန်းတော် က ငါ့ကို လက်ဆောင်ပေးထားတဲ့ စမ်းသပ်ဆဲ ကြယ်တာရာ ကြယ်တာရာ ဓာတ်ပြား တစ်ခုကို စမ်းကြည့်နေတာပါ... တော်တော် အသုံးဝင်တယ် မဟုတ်လား"

နယ်မြေအသီးသီးကို ဖြတ်သန်းစဉ်အတွင်း အစွမ်းထက် ကျင့်ကြံသူ အများအပြားက သူတို့ကို စောင့်ကြည့်နေကြသည်။ အစီအရင်များ ပိတ်ထားသဖြင့် ကြယ်တာရာ ဖြတ်သန်းမှု အလင်းသည် ချောင်းမြောင်းနားထောင်မှုကို မတားဆီးနိုင်ပေ။ အကယ်၍ သူသာ သူတို့၏ အရှိန်အဝါကို အတုခိုးနိုင်ကြောင်း သိသွားပါက တောက်ပသော ကြယ်နန်းတော် သည် ဖောက်သည်အားလုံး ဆုံးရှုံးသွားမည်ဖြစ်သလို၊ အဖွဲ့အစည်းတိုင်းကလည်း သူတို့၏ ဝင်ထွက်ခွင့် အခွင့်အရေးများကို ထာဝရ ပိတ်ပင်လိုက်ကြပေလိမ့်မည်။

အဖြူရောင် ကောင်းကင်သည် နားလည်သွားသကဲ့သို့ မျက်ဝန်းများ တောက်ပလာသည်။ သို့သော် ချက်ချင်းဆိုသလိုပင် သူမ၏ အကြည့်ထဲ၌ ဇဝေဇဝါ ဖြစ်မှုများ ဝင်ရောက်လာပြန်သည်။ မည်သည့်အချက်ကြောင့် ဇဝေဇဝါ ဖြစ်နေသည်ကိုမူ သူမ အဖြေရှာမရပေ။ ဝေ့ဝူယင်၏ စကားများက တစ်ခုခု လွဲနေသကဲ့သို့သာ ခံစားနေရခြင်း ဖြစ်သည်။

ဝေ့ဝူယင်ကမူ ပြုံးလိုက်မိ၏။ သူ၏ လုပ်ရပ်ကြောင့် နောင်တွင် တောက်ပသော ကြယ်နန်းတော် ထံမှ ဧည့်သည်တော်များ ရောက်လာမည်မှာ သေချာနေပြီ ဖြစ်သည်။ ၎င်းသည် သူ၏ ရည်မှန်းချက်နှင့်လည်း ကွက်တိ ကျနေပေသည်။

တတိယမြောက် သက်တန့်ရောင် အလင်းတန်းအတွင်း၌မူ သူတော်စင်အဆင့် တရားဥပဒေ ထိန်းသိမ်းသူသည် လှုပ်ရှားနိုင်စွမ်းနှင့် အတွေးအခေါ်များကို ပြန်လည်ရရှိလာပြီ ဖြစ်သည်။ သို့သော် သူ၏ ဝိညာဉ်ထဲတွင် ကြောက်ရွံ့မှုများ ခိုအောင်းနေပြီး မိမိ၏ အခြေအနေကို အားကိုးရာမဲ့စွာ လက်ခံနေရရုံသာ ရှိတော့သည်။ ထိုနေရာရှိ အဂ္ဂိရတ်ပညာရှင်မှာ အထွတ်အထိပ် သူတော်စင် တစ်ဦး ဖြစ်နေလိမ့်မည်ဟု မည်သူက ထင်ထားပါမည်နည်း။ သူ ဘယ်လောက်တောင် ကံဆိုးလိုက်သနည်း။

သူတို့သည် ဝေ့ဝူယင်၏ တိကျသော ကျင့်ကြံမှုအဆင့်ကို မသိနိုင်ကြပေ။ ဝိညာဉ်ချိတ်ပိတ် မန္တန် ကြောင့် တောင့်တင်း အေးခဲသွားခဲ့ရပြီးနောက်၊ သူတို့၏ စိတ်ကူးထက် ကျော်လွန်သော အာဏာစက် ပြင်းထန်လှသည့် ဝိညာဉ်စွမ်းအားကို ခံစားလိုက်ရသဖြင့် ဝေ့ဝူယင်ကို အထွတ်အထိပ် သူတော်စင် တစ်ဦးအဖြစ်သာ ယုံကြည်နေကြတော့သည်။

အစွမ်းကုန် သန့်စင်ခြင်း ဂလက်ဆီ ကို ဂလက်ဆီဇုံ (၇) ခု ခွဲခြားထားပြီး တစ်ခုချင်းစီကို အဂ္ဂိရတ်ပညာ၏ ကဏ္ဍ (၇) မျိုးအလိုက် အမည်ပေးထားသည်။ သို့သော် ထိုဇုံများကို အမှန်တကယ် အုပ်ချုပ်သူဟူ၍ မရှိပေ။ သက်ဆိုင်ရာ မျှော်စင်များသည် အဂ္ဂိရတ် တာအို၏ အမြင့်ဆုံး အာဏာပိုင်များ ဖြစ်ကြသော်လည်း သူတို့မှာ အစွမ်းအထက်ဆုံး သို့မဟုတ် နယ်မြေအကျယ်ဆုံး ပိုင်ဆိုင်သူများတော့ မဟုတ်ကြပါချေ။

မျှော်စင် (၇) ခုမှာ သက်ဆိုင်ရာ ဇုံများ၏ ကိုယ်စားလှယ်များနှင့် ဂလက်ဆီ ဥပဒေကို ထိန်းသိမ်းသူများသာ ဖြစ်ကြပြီး၊ သူတို့တွင် ကြီးမားသော စွမ်းအား ရှိသော်လည်း လူတိုင်းအပေါ် ပကတိ အာဏာစက် မရှိကြပေ။ အာဏာကို တက္ကသိုလ်များ၊ အကယ်ဒမီများ၊ နန်းတော်များနှင့် ခန်းမဆောင်များက ခွဲဝေယူထားကြသည်။

အမှန်စင်စစ် အစွမ်းကုန် သန့်စင်ခြင်း ဂလက်ဆီ အတွင်း အဆင့်အတန်း တိုးမြှင့်ခြင်း၊ မျိုးနွယ်စု ကြီးထွားခြင်းနှင့် နယ်မြေချဲ့ထွင်ခြင်းတို့မှာ အလွန် ထူးဆန်းလှသည်။ မျှော်စင် (၇) ခုမှလွဲ၍ အဆင့်မြင့် အဖွဲ့အစည်းအနည်းငယ်သာ ဇုံတစ်ခုတည်းတွင် အခြေချ ဖွံ့ဖြိုးတိုးတက်လေ့ ရှိကြသည်။

ဥပမာအားဖြင့် ပင်လယ်နှင့် ကောင်းကင် တက္ကသိုလ် ကို စိန်ခေါ်ခဲ့သော ကြည်နူးကျောက်စိမ်း တက္ကသိုလ် သည် ဇုံ (၃) ခုဖြစ်သည့်ကြီးထွားခြင်းဇုံ၊ သန့်စင်ခြင်းဇုံနှင့် ထိန်းသိမ်းခြင်းဇုံတို့တွင် နယ်မြေများ ပိုင်ဆိုင်ထားသည်။

ဂလက်ဆီတစ်ခုလုံးတွင် မျိုးနွယ်စုများ ဤကဲ့သို့ ပျံ့နှံ့နေခြင်းကြောင့်ပင် မျှော်စင်များမှာ ပကတိ အာဏာ မပိုင်ဆိုင်နိုင်ခြင်း ဖြစ်သလို၊ အဂ္ဂိရတ် မျိုးဆက်များမှာလည်း အစဉ်တစိုက် တိုးတက်မှုနှင့် ပြင်းထန်သော ပြိုင်ဆိုင်မှုများကြောင့် အလွန် နက်နဲလှခြင်း ဖြစ်သည်။

ကြည်နူးကျောက်စိမ်း တက္ကသိုလ် အကြောင်း ပြောရလျှင် သူတို့သည် ကြီးထွားခြင်းဇုံ တွင် အကယ်ဒမီကို တည်ထောင်ခဲ့ပြီး၊ တာအို တိုက်ပွဲများ၊ အထူးသဖြင့် အဂ္ဂိရတ် တိုက်ပွဲများမှတစ်ဆင့် ဆေးဖက်ဝင် ပစ္စည်းများနှင့် ကျင့်ကြံသူများကို မွေးမြူရန် အဖိုးတန် နယ်မြေများကို အနိုင်ရယူခဲ့သည်။

သူတို့သည် နယ်မြေများ၊ မျိုးနွယ်စုများနှင့် ရတနာများကို အစဉ်တစိုက် အနိုင်ယူရင်း နောက်ဆုံးတွင် လောကရှန့်ထို အဂ္ဂိရတ်ပညာရှင် တစ်ဦး ဦးဆောင်သော တက္ကသိုလ် အဆင့်သို့ ရောက်ရှိလာခဲ့ခြင်း ဖြစ်သည်။ ၎င်းမှာ အဖွဲ့အစည်း အများအပြား ကြိုးပမ်းနေကြသော ခက်ခဲသည့် ခရီးစဉ်တစ်ခုပင်။

အဖွဲ့အစည်းတစ်ခုသည် မျှော်စင် (၇) ခုထဲမှ တစ်ခု ဖြစ်လာမှသာလျှင် ဇုံတစ်ခုတည်းတွင်သာ အခြေချရန် တင်းကျပ်စွာ ကန့်သတ်ခံရမည် ဖြစ်သည်။

ပင်လယ်နှင့် ကောင်းကင် တက္ကသိုလ် သည်လည်း ကြီးထွားခြင်းဇုံ အတွင်းရှိ တက္ကသိုလ်တစ်ခုအဖြစ် စတင်ခဲ့ပြီး၊ စီနီယာ လောကရှန့်ထို အဖြူရောင် ကောင်းကင်နှင့် ဂျူနီယာ လောကရှန့်ထို အဇူရာပင်လယ်တို့၏ သက်ဆိုင်ရာ ဆရာများထံမှ အမွေရခဲ့သော အမွေအနှစ်များပေါ်တွင် အခြေခံ၍ ပိုမိုမြင့်မားသော အဆင့်သို့ တက်လှမ်းရန် ကြိုးစားနေကြခြင်း ဖြစ်သည်။

ယခုအခါ လှပစွာ တောက်ပနေသော ကြယ်တာရာ ရွှေ့ပြောင်းခြင်း အလင်းတန်း (၃) ခုမှာ ကြီးထွားခြင်းဇုံ ၏ အနောက်မြောက်ဘက် ဒေသသို့ ချဉ်းကပ်လာနေပြီ ဖြစ်သည်။ ဤကျယ်ပြောလှသော ဒေသအတွင်း၌ အတိုင်းအဆမဲ့ သန့်စင်ခြင်းဟု အမည်ရသော ခန်းမ တစ်ခု ရှိပြီး၊ ၎င်းသည် တရားဥပဒေ ထိန်းသိမ်းသူများ၊ ခိုင်လုံမှု အဆုံးအဖြတ်ပေးသူများ၊ စိန်ခေါ်မှုနှင့် တာအို တိုက်ပွဲများကို စီစဉ်သူများ၊ လျှို့ဝှက် ကစားပွဲ၏ ဒိုင်လူကြီးများနှင့် ရာထူးတိုးမြှင့်ခြင်းများကို ဆုံးဖြတ်သူများအဖြစ် အဖုံဖုံသော ကိစ္စရပ်များကို ကိုင်တွယ်သည်။ ဂလက်ဆီတစ်ခုလုံးတွင် အလုပ်အများဆုံး အဖွဲ့အစည်းပင်...။

သူတို့သည် ဇုံ (၇) ခု၏ ကိုယ်စားလှယ်များဖြစ်သော မိုးကုပ်စက်ဝိုင်း မျှော်စင် ခုနစ်ခု မှ ပေးအပ်ထားသော အာဏာကို အသုံးပြု၍ ကြည်နူးကျောက်စိမ်း တက္ကသိုလ် ကိုယ်စား အဂ္ဂိရတ် အမိန့်တော် ကို ထုတ်ပြန်ခဲ့သည့် တာဝန်သိ အဖွဲ့အစည်းလည်း ဖြစ်သည်။

သူတို့၏ ကြယ်တာရာ နယ်မြေကို အတိုင်းအဆမဲ့ ကြီးထွားခြင်း ကြယ်တာရာ နယ်မြေ ဟု ခေါ်ဆိုကြသည်။

ယနေ့၌... သက်တန့်ရောင် အလင်းတန်း (၃) ခု ရောက်ရှိလာခြင်းက များပြားလှသော အင်အားစုများကို လှုပ်ခတ်သွားစေခဲ့တော့သည်။

***

အပိုင်း(၂၁၅၄)

ဝိညာဉ်ကို ဖမ်းစားနိုင်စွမ်းရှိပြီး အသက်ရှူမှားလောက်အောင် လှပဆန်းကြယ်လှသည့် သက်တန့်ရောင်စဉ်တန်း သုံးခုသည် အစွမ်းကုန် သန့်စင်ခြင်း ဂလက်ဆီ အတွင်းသို့ မျှော်လင့်မထားသော ဂယက်ရိုက်ခတ်မှုများကို ဆောင်ကြဉ်းလာခဲ့သည်။ ဤသည်မှာ တောက်ပသော ကြယ်နန်းတော်မှ ပိုင်ဆိုင်ပြီး အသက်သွင်းလိုက်သည့် ကြယ်တာရာ တံတားကို အသုံးပြုမှသာ မြင်တွေ့ရတတ်သည့် ခဲယဉ်းသော ဖြစ်စဉ်တစ်ခု ဖြစ်သော်လည်း၊ ကြီးမြတ်သော တည်ရှိမှုတစ်ခု၏ အမှတ်အသားအဖြစ် လူအများက ကျယ်ကျယ်ပြန့်ပြန့် အသိအမှတ်ပြုထားကြသည်။

အစပိုင်းတွင် အာရုံခံစားမှု ထက်မြက်သူတို့သည် ထိုသို့ ဝင်ရောက်လာသော ကြယ်တာရာ ရွှေ့ပြောင်းခြင်း အလင်းတန်းကို သတိပြုမိကြပြီး မည်သူများ ရောက်ရှိလာသနည်း၊ မည်သည့်နေရာသို့ ဦးတည်နေသနည်းဟူသည်ကို ဝိုင်းဝန်းတွေးဆ ငြင်းခုံနေကြသည်။

ထိုမျှလောက်သော အချိန်တိုအတွင်း ဂလက်ဆီအနှံ့ ခရီးနှင်နိုင်ရန် မည်မျှအထိ အံ့မခန်းဖွယ်ရာ ကြွယ်ဝမှုနှင့် အဆက်အသွယ်ကောင်းများ ရှိရမည်နည်းဟုလည်း မနာလိုတကြီး ရေရွတ်နေကြ၏။

သို့သော်လည်း မနာလိုမှုနျင့် လိုချင်တပ်မက်မှုတို့ဖြင့် ပြည့်နှက်နေသော ထိုဆွေးနွေးပွဲများသည် မလွဲမသွေ ပေါ်ပေါက်လာမည့် မေးခွန်းတစ်ခုကြောင့် ရုတ်ချည်း ရပ်တန့်သွားခဲ့ရသည်။ ၎င်းမေးခွန်းမှာ

"သူတို့ ဘယ်ကြယ်တံတား အစီအရင်ကို သုံးခဲ့တာလဲ..."

ဟူ၍...။

၎င်းမှာ ရိုးရှင်းသော မေးခွန်းတစ်ခုကဲ့သို့ ထင်ရသော်လည်း သေချာစွာ စဉ်းစားကြည့်လျှင်မူ တောက်ပသော ကြယ်နန်းတော် သည် အစွမ်းကုန် သန့်စင်ခြင်း ဂလက်ဆီ ၏ ပြင်ပတွင် မည်သည့် ကြယ်တံတားကိုမျှ တည်ဆောက်ထားခြင်း မရှိပေ။ တစ်ခုမျှပင် မရှိချေ။

ထို့ပြင် အီလီဆီယမ် အသေး ကဲ့သို့သော ကြယ်တာရာ ကူးပြောင်းခြင်း အလင်းတန်းကို ဖန်တီးလမ်းညွှန်ပေးနိုင်သည့် ဒဏ္ဍာရီလာ ကိရိယာများ သို့မဟုတ် ဟင်းလင်းပြင် သင်္ဘောများ ရှိနေနိုင်သော်လည်း သူတို့မှာ အလွန်တရာ ရှားပါးလှသည်။ ၎င်းအပြင် အစွမ်းကုန် သန့်စင်ခြင်း ဂလက်ဆီ ၏ ခံစစ်စည်းများက မည်သည့် ကျူးကျော်မှုကိုမဆို တွန်းလှန်တားဆီးပေလိမ့်မည်။

တောက်ပသော ကြယ်နန်းတော် ၏ ထူးခြားသော အော်ရာ တစ်ခုတည်းသာလျှင် လောကဖျက်ဆီးမည့် အတားအဆီးမျိုး မရှိဘဲ ထိုခံစစ်စည်းကို ကျော်ဖြတ်နိုင်စွမ်း ရှိပေသည်။ ဆိုလိုသည်က သူတို့အား ပေးအပ်ထားသော ခွင့်ပြုချက်အရ ဝင်ထွက်သွားလာနိုင်ခြင်းပင် ဖြစ်သည်။

သို့သော်လည်း ယခုမြင်တွေ့နေရသော ကြယ်တာရာ ရွှေ့ပြောင်းခြင်း အလင်းတန်း၏ ဦးတည်ရာနှင့် မြစ်ဖျားခံရာမှာ အဆိုပါ သီအိုရီအားလုံးကို ဆန့်ကျင်နေသည်။ သို့သော်ငြားလည်း ၎င်းမှာ တောက်ပသော ကြယ်နန်းတော် ၏ အဆင့်မြှင့်တင်ထားသော အလင်းတန်း ဖြစ်နေသည်မှာကား အမှန်ပင်...။

တစ်ခုခုတော့ မှားနေချေပြီ ဖြစ်သည်။

ထို့ကြောင့်ပင် အစွမ်းထက်သော ဝိညာဉ်အာရုံ ပိုင်ရှင် အမြောက်အမြားသည် အခြေအနေကို စုံစမ်းရန် ထိုအလင်းတန်းနောက်သို့ အလုအယက် လိုက်ပါခဲ့ကြသည်။ အချို့မှာ သိချင်ရုံသက်သက် ဖြစ်သော်လည်း အချို့မှာမူ အလွန်အမင်း အာဏာစက် ပြင်းထန်လှသည်။

ဝေ့ဝူယင်ကမူ ၎င်းကို အေးအေးဆေးဆေးပင် ရင်ဆိုင်ခဲ့ပြီး ဤသည်မှာ တောက်ပသော ကြယ်နန်းတော် ၏ အသစ်စက်စက် စမ်းသပ်တီထွင်မှုသာ ဖြစ်ကြောင်း တိုက်ရိုက် ဝန်ခံလိုက်သည်။ ဤအချက်က ရန်သူများအကြားတွင် နန်းတော်၏ အရှိန်အဝါ ကြီးထွားလာနိုင်မှုအပေါ် သံသယနှင့် မကျေနပ်မှုများကို ဖြစ်စေသော်လည်း အချို့သောသူများအတွက်မူ စိတ်သက်သာရာရမှုနှင့် စိတ်လှုပ်ရှားမှုကို ဆောင်ကြဉ်းပေးခဲ့သည်။

အချို့မှာ တောက်ပသော ကြယ်နန်းတော် တွင် ရင်းနှီးမြှုပ်နှံမှု အမြောက်အမြား ပြုလုပ်ထားကြပြီး ထိုခွင့်ပြုချက်များ သို့မဟုတ် ဒေသအနှံ့ ဝင်ထွက်သွားလာခွင့်များမှတစ်ဆင့် အကျိုးအမြတ်များ ရရှိနေကြသူများ ဖြစ်သည်။

သို့သော်လည်း အဖွဲ့အစည်းတစ်ခုအတွက်မူ သူတို့မှာ မယုံနိုင်လောက်အောင်ပင် အံ့အားသင့် ဇဝေဇဝါ ဖြစ်နေရသည်။

တောက်ပသော ကြယ်နန်းတော် ၏ ကြယ်တံတားသည် တစ်နေရာတည်းတွင်သာ တည်ရှိသည်။ ၎င်းမှာ ဖြူဖွေး တောက်လောင်နေသော နေမင်း တစ်စင်းကို ဗဟိုပြုထားသည့် ကြယ်ကွင်းပြင်တစ်ခုလုံး ဖြစ်ပြီး ထိုနေမင်းသည် ဂလက်ဆီတစ်ခုလုံးတွင် ကျော်ကြားသော ကြယ်တံတား၏ အဓိက အစီအရင် အလံတိုင်လည်း ဖြစ်သည်။

ဂြိုဟ်တိုင်းမှသည် လ များအထိ၊ ဟင်းလင်းပြင် အမှိုက်သရိုက်များနှင့် တူသော ဂြိုဟ်သိမ်ဂြိုဟ်မွှားများအထိ ကြယ်ကွင်းပြင်တစ်ခုလုံးသည် ကြယ်တံတား ဟု ခေါ်တွင်သော အစီအမံကြီး၏ အစိတ်အပိုင်းများ ဖြစ်ကြသည်။

ထိုနေရာတွင် ဂြိုဟ်ခြောက်လုံးရှိပြီး ၎င်းတို့သည် နေကြယ်ကို ဗဟိုပြုကာ ကောင်းကင်ယံတွင် နက္ခတ်ခုနစ်လုံး ပုံသဏ္ဌာန် ဖြစ်ပေါ်နေသည်။ အဝေးမှ ကြည့်လျှင် ဂြိုဟ်တစ်ခုချင်းစီ၏ လေထုအလွှာများမှ အလင်းပြန်မှုကြောင့် သူတို့ကို သီးခြားနေမင်းများဟုပင် မှားယွင်းထင်မှတ်နိုင်ပေသည်။

ထိုနေရာကို တောက်ပသော ကြယ်ခုနစ်လုံး ကွင်းပြင် ဟု လူတိုင်း သိကြပြီး ၎င်းမှာ တောက်ပသော ကြယ်နန်းတော် နှင့် ဂလက်ဆီအတွင်း ခရီးသွားလာမှုကို ဘေးကင်းလွယ်ကူ လျင်မြန်စေသည့် ကြယ်တံတား အစီအမံ တည်ရှိရာ အရပ်ဖြစ်သည်။

အင်အားစုအားလုံးနှင့် အထွတ်အထိပ် ပညာရှင်များအားလုံး အကျိုးရှိစေရန်အတွက် ကြားနေဖြစ်ရန် လိုအပ်သောကြောင့် တောက်ပသော ကြယ်ခုနစ်လုံး ကွင်းပြင် သည် အစွမ်းကုန် သန့်စင်ခြင်း ဂလက်ဆီ ၏ အစိတ်အပိုင်း ဖြစ်သော်လည်း မည်သည့် ဂလက်ဆီဇုံ ခုနစ်ခုတွင်မျှ ပါဝင်ခြင်း မရှိပေ။ ၎င်းမှာ ဂလက်ဆီအတွင်း နေထိုင်သူအားလုံး၏ သဘောတူညီချက်အရ သီးခြားရပ်တည်နေသော ကြယ်ကွင်းပြင်ဖြစ်ပြီး တားမြစ်နယ်မြေတစ်ခုအဖြစ် ရှုမြင်ကြသည်။

၎င်းအား မိုးကုပ်စက်ဝိုင်း မျှော်စင်ခုနစ်ခု၏ လက်အောက်ခံ မဟုတ်ဘဲ လွတ်လပ်ခွင့် ပေးထားရုံသာမက အထူးကာကွယ်စောင့်ရှောက်မှုများ ပေးထားပြီး အချို့သော တာဝန်ဝတ္တရားများမှလည်း ကင်းလွတ်ခွင့် ပေးထားသည်။ ဤအချက်ကပင် တောက်ပသော ကြယ်နန်းတော် အထူးသဖြင့် ကြယ်တံတား သည် ဂလက်ဆီအတွက် မည်မျှအရေးပါကြောင်း သက်သေပြနေသည်။

အဘယ်ကြောင့်နည်း။

ဂလက်ဆီပြင်ပသို့ ခရီးသွားလာမှုနှင့် အဂ္ဂိရတ် ကုန်သွယ်မှု၊ သယ်ယူပို့ဆောင်မှု အားလုံးနီးပါးကို ဤကြယ်တံတားမှတစ်ဆင့် လုပ်ဆောင်ရသောကြောင့် ဖြစ်သည်။ ဤကြယ်တံတားကြောင့်သာ ရတနာ ချိုင့်ဝှမ်း ဂလက်ဆီ နှင့် စည်းစိမ် ပျက်သုဉ်းခြင်း ဂလက်ဆီ ကဲ့သို့သော အိမ်နီးချင်း ဂလက်ဆီများမှ ကျင့်ကြံသူများ၊ သီးခြားရပ်တည်နေသည့် အထွတ်အထိပ် အင်အားစုများသည် အဆင့်မြင့် အဂ္ဂိရတ် အရင်းအမြစ်များကို ရရှိနိုင်ကြခြင်း ဖြစ်သည်။

ထို့ကြောင့် ၎င်းကို မဖြစ်မနေ အကာအကွယ်ပေးရမည်။

တောက်ပသော ကြယ်နန်းတော် ကို ခြိမ်းခြောက်လာခြင်းသည် ဂလက်ဆီ အမြောက်အမြားထံမှ တုံ့ပြန်မှုများကို အချိန်တိုအတွင်း မလွဲမသွေ ရရှိစေလိမ့်မည်ဟု ဆိုလျှင် ပိုသည်ဟု မဆိုနိုင်ပေ။

ဤအရေးပါသော အဖွဲ့အစည်း၏ ပင်မဌာနချုပ်မှာ ကျောက်သားဖြင့် တည်ဆောက်ထားသော နန်းတော်တစ်ခု ဖြစ်ပြီး ၎င်းကို ကြီးမားသည်၊ သေးငယ်သည်၊ ခမ်းနားသည် သို့မဟုတ် ဆင်းရဲသည် စသည်ဖြင့် ဖော်ပြရန်ပင် ခက်ခဲလှသည်။

နန်းတော်၏ နံရံများမှ ဝိညာဉ်ကို နွေးထွေးစေနိုင်သော အပူဓာတ်ပါသည့် အလင်းတန်းမှိန်မှိန်များ ထွက်ပေါ်နေပြီး အုတ်ခဲတိုင်းတွင်လည်း လှပသော လျှို့ဝှက်သင်္ကေတများကို ထွင်းထုထားသည်။ ထိုအုတ်ခဲများကို စနစ်တကျ စီထားပုံမှာ ကောင်းကင်မှ မှန်ကန်သော ထောင့်ချိုး၊ မှန်ကန်သော အချိန်တွင် ကြည့်ရှုပါက တောက်ပနေသော ကြယ်တစ်စင်း၏ အံ့ဖွယ်ပုံရိပ်ကို မြင်တွေ့ရမည် ဖြစ်သည်။

ဤနန်းတော်၏ ပင်မခန်းမဆောင်အတွင်းတွင် လူသုံးဦးသည် လုံးဝန်းသော စားပွဲတစ်ခုတွင် ထိုင်နေကြပြီး စားပွဲအလယ်ရှိ ရေမျက်နှာပြင်သဖွယ် ဖန်သားပြင်တစ်ခုကို စိုက်ကြည့်နေကြသည်။ ထိုမျက်နှာပြင်ပေါ်တွင် ကြယ်တာရာ ရွှေ့ပြောင်းခြင်း အလင်းတန်း သည် ဂလက်ဆီခံစစ်များကို ကျော်ဖြတ်ကာ တစ်နေရာရာသို့ ဦးတည်နေသည့် ပုံရိပ်ကို ထင်ဟပ်နေသည်။

စားပွဲရှိ ဦးဆောင်နေရာတွင် ထိုင်နေသူမှာ ဆံပင်ဖြူနှင့် လူငယ်တစ်ဦး ဖြစ်သည်။ သူသည် လှုပ်ရှားသက်ဝင်နေသော ကြယ်တာရာ ဝတ်စုံကို ဆင်မြန်းထားပြီး ဝတ်စုံပေါ်ရှိ ဖြူဖွေးတောက်လောင်နေသော ကြယ်တိုင်းမှ နွေးထွေးမှုကို ထုတ်လွှတ်နေသည်။ သူသည် လက်နှစ်ဖက်ကို စားပွဲပေါ်တွင် တင်ထားပြီး ဖြူဖွေးသော မျက်ကြည်လွှာနှင့် ကြယ်တာရာ မျက်ဝန်းတို့ဖြင့် ပုံရိပ်ကို စူးစိုက်ကြည့်နေ၏။

သူသည် ရုပ်ချောသည်၊ ရုပ်ဆိုးသည်ဟု မဆိုနိုင်သော်လည်း မြင့်မြတ်ပြီး ကြွယ်ဝချမ်းသာသော အရှိန်အဝါကို ထုတ်လွှတ်နေကာ အလွန်အမင်း အရေးပါသူတစ်ဦး၏ အသွင်နှင့် နက်ရှိုင်းသော အရှိန်အဝါမျိုး ရှိနေသည်။ သူ၏ ကြယ်တာရာ မျက်ဝန်းများသည် ဝိညာဉ်အလင်းတန်းများ တောက်ပနေပြီး သူ စိုက်ကြည့်လိုက်တိုင်း ကောင်းကင်ဘုံကို မြင်တွေ့နိုင်သကဲ့သို့ပင်။ ဤလက္ခဏာမှာ သူ၏ အံ့မခန်းဖွယ် ကျင့်ကြံခြင်း အဆင့်ကို ဖော်ပြနေခြင်း ဖြစ်သည်။

သူကား အထွတ်အထိပ် သူတော်စင် တစ်ဦး ဖြစ်ပေသည်။

သူ၏ ဘေးတွင်မူ ရုပ်ချင်း အလွန်တူသော လူနှစ်ဦး ရှိနေပြီး သူတို့မှာ မောင်နှမ တော်စပ်ပုံရသည်။ အသက်နှစ်ဆယ် အစောပိုင်း အရွယ်ခန့်သာ ရှိသေးသော ထိုအမျိုးသားနှင့် အမျိုးသမီးသည် ရွှေရောင်ဆံနွယ်များ၊ သွယ်လျသော ခန္ဓာကိုယ်နှင့် အပြစ်ပြောစရာမရှိသော အသားအရေတို့ကြောင့် အလွန်အမင်း ဆွဲဆောင်မှု ရှိလှသည်။ သို့သော်လည်း သူတို့၏ လူငယ်ပုံစံနောက်ကွယ်တွင် ရင့်ကျက်သော ပညာနှင့် သက်တမ်းရင့်မှုကို ဖော်ပြနေသည့် မျက်ဝန်းများ ရှိနေသည်။ အထူးသဖြင့် ဝိညာဉ်စွမ်းအင် နှင့် ရောယှက်နေသော ဝိညာဉ်အလင်းတန်းမှိန်မှိန်မှာ သူတို့တွင် ဝိညာဉ်အမြင် ရှိနေကြောင်း ပြသနေသည်။

သူတို့မှာ အထွတ်အထိပ် သူတော်စင်များ မဟုတ်ကြသော်လည်း ထိုအဆင့်နှင့် သိပ်မဝေးတော့သူများ ဖြစ်ကြသည်။

သူတို့ကား ဉာဏ်အလင်းရ သူတော်စင်များ ပင် ဖြစ်တော့သည်။

သူတို့အားလုံး ဖန်သားပြင်ကို တိတ်ဆိတ်စွာ စိုက်ကြည့်နေစဉ်မှာပင် ကြယ်တာရာ မျက်ဝန်းပိုင်ရှင် အဂ္ဂိရတ်ပညာရှင်၏ ရဲတင်းလှသော မုသားစကားများကို ကြားလိုက်ရလေသည်။ ဉာဏ်အလင်းရ သူတော်စင် နှစ်ဦးမှာ သံသယစိတ်ဖြင့် တစ်ဦးကိုတစ်ဦး ခဏမျှ ကြည့်လိုက်ကြပြီးနောက် ဆံပင်ဖြူနှင့် အထွတ်အထိပ် သူတော်စင် ထံသို့ အကြည့်လွှဲလိုက်ကြ၏။

"..."

"..."

"..."

အချိန်အတော်ကြာ တိတ်ဆိတ်သွားပြီးနောက် ဆံပင်ဖြူနှင့်လူငယ်သည် ရယ်မောတော့မည့်ဟန်ဖြင့် မတတ်သာသလို ပြုံးလိုက်သည်။

"လောကရှန့်ထို အဖြူရောင် ကောင်းကင် နဲ့ ကိစ္စကို ဖြေရှင်းဖို့ စိတ်လောသွားတာနဲ့ပဲ ငါ့ရဲ့ အစီအစဉ်တွေကို သူက ဖွင့်ချလိုက်လိမ့်မယ်လို့ ဘယ်သူထင်မှာလဲ... အမြဲတမ်း စိတ်လိုက်မာန်ပါ လုပ်တတ်တာပဲ"

ဆံပင်ဖြူနှင့် အထွတ်အထိပ် သူတော်စင် သည် ခေါင်းကိုခါယမ်းရင်း သူ့ထံသို့ ရောက်ရှိနေသော သံသယအကြည့်များကို တုံ့ပြန်လိုက်သည်။

"ဒီကိစ္စက လူသိရှင်ကြား ဖြစ်သွားပြီဆိုတော့ ငါကိုယ်တိုင်ပဲ ကိုင်တွယ်ရတော့မယ်... ဒီကိစ္စကို အခုထိ လျှို့ဝှက်ထားခဲ့တဲ့အတွက် မင်းတို့နှစ်ယောက်ကို တောင်းပန်ရတော့မှာပဲ..."

သူ၏ စကားကြောင့် ထိုလူငယ်နှစ်ဦးမှာ ထိတ်လန့်တကြား ဖြစ်သွားကြသည်။

"ကျွန်တော်တို့ကို တောင်းပန်နေဖို့ မလိုပါဘူး နန်းတော်သခင်"

လူငယ်က အလျင်အမြန် ဆိုသည်။

အမျိုးသမီးငယ်ကလည်း နှလုံးသားကို ဖမ်းစားနိုင်သည့် တောက်ပသော အပြုံးဖြင့် ထောက်ခံလိုက်၏။

"တောင်းပန်ဖို့ လုံးဝ မလိုပါဘူး နန်းတော်သခင်"

နန်းတော်သခင် ဟု ခေါ်ဝေါ်ခြင်းခံရသော ဆံပင်ဖြူနှင့် အထွတ်အထိပ် သူတော်စင် သည် ရယ်မောရုံသာ တုံ့ပြန်နိုင်တော့သည်။ သူက လက်နှစ်ဖက်ကို ဆုပ်လိုက်ရာ ရေမျက်နှာပြင်သဖွယ် ဖန်သားပြင်မှာ ကြည်လင်သော အရည်များအဖြစ် ပေါက်ကွဲသွားပြီး စားပွဲအလယ်ရှိ ကြွေပန်းကန်လုံးငယ်ထဲသို့ ပြန်လည်ဝင်ရောက်သွားသည်။

"ကဲ... ငါတို့ ခုနက ဆွေးနွေးနေတဲ့ ခန်းမသခင်ရှန်း ရဲ့ မင်္ဂလာလက်ဆောင် ကိစ္စကိုပဲ ဆက်ပြောကြရအောင်"

ဉာဏ်အလင်းရ သူတော်စင် နှစ်ဦးမှာ ညီညာစွာ ခေါင်းညိတ်လိုက်ကြသော်လည်း အမှန်စင်စစ် သူတို့၏ ရင်ထဲတွင် တဒိန်းဒိန်း ခုန်နေကြသည်။ သူတို့မှာ အူကြောင်ကြောင်များ မဟုတ်ကြချေ။ အဖြစ်မှန်ကို သံသယရှိသော်လည်း နောက်ဆက်တွဲ ရလဒ်ကို ကြောက်ရွံ့သောကြောင့် မဖွင့်ဟရဲကြခြင်း ဖြစ်သည်။ အကယ်၍ ဂလက်ဆီပြင်ပမှ တစ်စုံတစ်ယောက်သည် ကြယ်တံတား အစီအရင် မရှိဘဲ ကြယ်တံတား ၏ အော်ရာနှင့် စွမ်းအင်ကို အသုံးချနိုင်သည်ဆိုပါက ၎င်းသည် ဂလက်ဆီအမြောက်အမြား၏ အခြေအနေကို ပြောင်းလဲပစ်နိုင်ပြီး သူတို့၏ လုပ်ငန်းကိုပါ ခြိမ်းခြောက်လာနိုင်ပေသည်။

ထိုသို့သာဆိုလျှင် တောက်ပသော ကြယ်နန်းတော် မှာ ရုတ်ချည်း ပြိုလဲသွားနိုင်သည်။ အကယ်၍ ပြင်ပလူတစ်ဦးက သူတို့၏ လုံခြုံရေးကို ဖောက်ထွင်းပြီး ဂလက်ဆီအနှံ့ သွားလာခွင့်ကို အလွဲသုံးစားလုပ်နေခြင်းသာ မှန်ကန်ပါက၊ နန်းတော်သခင်အနေဖြင့် အလွန်အမင်း ထိတ်လန့်ပြီး အလျင်စလို တုံ့ပြန်မိကာ သူတို့အား အဆုံးသတ်စေမည့် ဤသိသာထင်ရှားသော ဟာကွက်ကို ဖော်ထုတ်မိမည်ကို သူတို့ စိုးရိမ်နေကြသည်။

အခြေအနေအားလုံးမှာ သူတို့၏ ထိန်းချုပ်မှုအောက်တွင် ရှိနေသရွေ့၊ အဖြစ်မှန်ကို သိလိုသော စိတ်ကို ထိန်းချုပ်ထားနိုင်သရွေ့ အရာအားလုံးကို ကိုင်တွယ်နိုင်သည်။ အလွန်အမင်း ဂရုတစိုက်ဖြင့် သိမ်သိမ်မွေ့မွေ့နှင့် ပြီးပြည့်စုံစွာ ကိုင်တွယ်ရပေမည်။

***