အခန်း (၂၁၅၅-၂၁၅၆)

အပိုင်း(၂၁၅၅)

အီလီစီယမ် အသေး၏ ပဲ့ကိုင်နေရာတွင် ရှိနေသော ဝေဝူယင် ၏ အကြည့်မှာ အနည်းငယ် ပြောင်းလဲသွားပြီး ကျေနပ်သော အပြုံးတစ်ခု ပေါ်လွင်လာသည်။ တောက်ပသော ကြယ်နန်းတော် အနေဖြင့် သူ၏ မျှော်လင့်ချက်အတိုင်း ပြုမူနေသရွေ့၊ သူတို့၏ အမည်ဂုဏ်သတင်းနှင့် တန်ဖိုးကို ထိန်းသိမ်းရန် လိုအပ်သော ထိန်းချုပ်မှုမျိုး ရှိနေသရွေ့ အနာဂတ်တွင် ဖြစ်လာမည့် ကိစ္စရပ်များ၊ အထူးသဖြင့် နီးကပ်လာသော စစ်ပွဲအတွက် များစွာ ပိုမိုလွယ်ကူသွားပေလိမ့်မည်။

သို့သော်လည်း ကောင်းကင်စစ်ဝိညာဉ်မှာမူ အထွတ်အထိပ် သူတော်စင် တစ်ဦး သတိပေးချက်မရှိဘဲ ရောက်ရှိလာမည်ကို စိုးရိမ်ကာ တစ်ချိန်လုံး ထိတ်လန့်နေခဲ့သည်။ သူမသည် ရွှေရောင်အစုအဝေးအဖြစ် ပုံသဏ္ဌာန်အမျိုးမျိုး ပြောင်းလဲကာ စိတ်မအေးနိုင်ဘဲ ရှိနေ၏။ အသက်နှစ်ရာပင် မပြည့်သေးသော လူငယ်တစ်ဦးက မည်သို့လျှင် ဤမျှအထိ အဆင့်မြင့်သော အင်အားစုများနှင့် ကစားရဲရသနည်း။ ဤသည်မှာ ငရဲဘုံ၏ အစွန်းနားတွင် တွဲလွဲခိုနေခြင်းနှင့် တူပြီး အမှားအယွင်း အနည်းငယ်ရှိရုံဖြင့် ပြုတ်ကျသွားနိုင်ပေသည်။

ဝေဝူယင်သည် ရာစုနှစ်တစ်ခုနီးပါး ထိုအစွန်းနားတွင် အမြဲရှိနေခဲ့ကြောင်း သူမ မသိရှာပေ။ ထို့ပြင် သူသည် အောက်သို့ အကြိမ်အတော်ကြာ ခုန်ချခဲ့ဖူးပြီး ထိခိုက်ဒဏ်ရာမရဘဲ ပြန်လည် တက်လာနိုင်ခဲ့သူလည်း ဖြစ်သည်။ ကံကြမ္မာလေပြင်းများက သူ့ကို ပိုမိုနက်ရှိုင်းသော နေရာများသို့ အမြဲတမ်း ပြန်လည်တွန်းပို့နေမည်ကို သိထားသည့်အတွက် ထိုအစွန်းနားမှ သူ ထွက်ခွာနိုင်ခြင်း မရှိချေ။

ဝေဝူယင် သည် ဂလက်ဆီတစ်ခုလုံးကိုပင် အကွက်ချ စီစဉ်ရဲသည်ဖြစ်ရာ အထွတ်အထိပ် သူတော်စင် များကိုလည်း အကွက်ချရန် ဝန်လေးမည်မဟုတ်ပေ။ နောင်အနာဂတ်တွင်မူ နတ်ဘုရားများနှင့် တန်ခိုးရှင် များပင် ထိုစာရင်းထဲတွင် ပါဝင်လာနိုင်ပေသည်။

နောက်ဆုံးတွင် အထွတ်အထိပ် ပညာရှင်အမြောက်အမြား၏ စူးစမ်းသော အကြည့်များအောက်တွင် ကြယ်တာရာ ရွှေ့ပြောင်းခြင်း အလင်းတန်း သုံးခုမှာ ကြီးထွားခြင်းဇုံ၏ အနောက်မြောက်ဘက် ဒေသရှိ လှည့်ပတ်ဖွံ့ဖြိုးမှု ကြယ်ကွင်းပြင်သို့ ရောက်ရှိလာခဲ့သည်။ ထိုကျယ်ပြောသော ဒေသအတွင်းရှိ အစွမ်းကုန် သန့်စင်ခြင်း ခန်းမ တည်ရှိရာ နှလုံးသားငယ် ကြယ်တာရာ နယ်မြေသို့ ရောက်ရှိသွားခြင်း ဖြစ်သည်။

အဖြူရောင် ကောင်းကင် သည် စိတ်လှုပ်ရှားမှုကြောင့် သူမ၏ လက်ငယ်လေးနှစ်ဖက်ကို တင်းတင်းဆုပ်ထားမိသည်။ ဝေဝူယင် က ဤကိစ္စကို ဦးဆောင်ပြီး ကိုင်တွယ်ဖြေရှင်းမည်ဟု ဆုံးဖြတ်ထားသော်လည်း သူမမှာမူ မိုးကုပ်စက်ဝိုင်း မျှော်စင်ခုနစ်ခု ၏ အာဏာစက်ဖြင့် ထုတ်ပြန်ထားသော ဖမ်းဝရမ်းအောက်တွင် ရှိနေဆဲ ဖြစ်သည်။ ထို့ပြင် သူတို့သည် တာအို တိုက်ပွဲတွင် ရှုံးနိမ့်ခဲ့သဖြင့် မျိုးနွယ်စုဆိုင်ရာ အခွင့်အရေးများနှင့် ဆေးဖော်စပ်နည်းများကို ဆုံးရှုံးခဲ့ရသည်။ ဤသည်မှာ မည်သည့်အဖွဲ့အစည်းအတွက်မဆို ကျဆုံးခြင်း၏ အစဦး လက္ခဏာပင် ဖြစ်သည်။ ထိုသို့သော အခြေအနေမျိုးတွင် သူမ မည်သို့ စိတ်မလှုပ်ရှားဘဲ နေနိုင်ပါမည်နည်း။

ဤခရီးစဉ်သည် သူမ၏ ကံကြမ္မာကို ဆုံးဖြတ်ပေးပေလိမ့်မည်။ ထို့နောက်တွင်ကော ဘာတွေ ကျန်ရစ်ဦးမည်နည်း။

...

နှလုံးသားငယ် ကြယ်တာရာ နယ်မြေ...

ထိုကြယ်တာရာနယ်မြေသည် နေကြယ်ပုအမျိုးအစားများတွင်ပင် အသေးငယ်ဆုံးဟု သတ်မှတ်နိုင်သော နေကြယ်ငယ်လေး တည်ရှိရာ အရပ်ဖြစ်သည်။ သို့သော်လည်း ထိုနေကြယ်မှ ထုတ်လွှတ်သော စွမ်းအင်များမှာမူ အလွန်တရာ ပြင်းထန်ပြီး သန့်စင်လှရာ ဒြပ်ထုကြီးမားလွန်းသော နေကြယ်ကြီးများနှင့်ပင် ယှဉ်နိုင်စွမ်းရှိ၏။ ထို့အပြင် ၎င်းမှာ ထူးခြားသော ကြီးထွားခြင်း ဂုဏ်သတ္တိရှိသည့် လျှို့ဝှက်ရောင်စဉ် ပတ်လမ်းလေးခု ဝန်းရံထားသော နေကြယ်လည်း ဖြစ်သည်။ ထိုပတ်လမ်းများသည် နေကြယ်၏ အမတေစွမ်းအင်များကို သန့်စင်ပေးပြီး ကြယ်တာရာ နယ်မြေ တစ်ခုလုံးကို ကြွယ်ဝစေကာ ကြီးထွားခြင်းကို အခြေခံသည့် ကျင့်စဉ်များကို ပိုမိုအားကောင်းစေရုံမျှမက ဂြိုဟ်များနှင့် လများအပါအဝင် ကြယ်တာရာ နယ်မြေတစ်ခုလုံးကိုပါ လှုံ့ဆော်နိုးကြားစေသည်။

ကြယ်တာာ နယ်မြေကို အပေါ်ယံမျှ ကြည့်ရုံဖြင့်ပင် အလွန်တန်ဖိုးကြီးမားပြီး အလားအလာ ကောင်းလှသည်ကို တွေ့နိုင်ပေမည်။ သစ်ပင်ပန်းမန်များ၊ သတ္တုရိုင်းများ၊ ရေကြည်များ၊ တောင်တန်းများနှင့် အခြားသော အရင်းအမြစ် များစွာတို့သည် အဆင့်မြင့် လျှို့ဝှက်အဆင့် အရည်အသွေးများဖြင့် ပြည့်နှက်နေသည်။

လှည့်ပတ်ဖွံ့ဖြိုးမှု ကြယ်ကွင်းပြင်သည် ကြယ်တာရာ နယ်မြေပေါင်း သောင်းချီ တည်ရှိသဖြင့် အလွန်တရာ ကျယ်ပြောလှသော်လည်း တိုင်းတာ တွက်ချက်ကြည့်မည်ဆိုပါက ဤ "နှလုံးသားငယ် ကြယ်တာရာ နယ်မြေ" တစ်ခုတည်း၏ တန်ဖိုးမှာ ဂလက်ဆီဇုန်ကြီး တစ်ခုလုံး၏ သဘာဝ အရင်းအမြစ် တန်ဖိုး ၂၀ ရာခိုင်နှုန်းခန့် ရှိပေသည်။ ကြီးထွားခြင်းဇုံ၏ အနောက်မြောက်ဒေသရှိ "အစွမ်းကုန် သန့်စင်ခြင်းခန်းမ" ဤနေရာ၌ တည်ရှိနေခြင်းမှာ ထိုက်တန်လှသည်ဟု ဆိုရမည်။

အစွမ်းကုန် သန့်စင်ခြင်း ခန်းမသည် ဂြိုဟ်၊ လ သို့မဟုတ် ဂြိုဟ်သိမ်ဂြိုဟ်မွှား တစ်ခုပေါ်တွင် တည်ရှိနေခြင်း မဟုတ်ဘဲ ကုန်းမြေတိုက်ကြီးသဖွယ် မြေပြန့်ပြင်ပေါ်တွင် တည်ရှိနေခြင်း ဖြစ်သည်။ ထိုလွင့်မျောနေသော တိုက်ကြီးပေါ်တွင် အလွန်ကြီးမား ခမ်းနားပြီး ကြွယ်ဝချမ်းသာမှု အတိရှိသော နန်းတော်ကြီးတစ်ခု တည်ရှိနေ၏။ နန်းတော်၏ နံရံများကို အုတ်များဖြင့် တည်ဆောက်ထားသော်လည်း ထိုအုတ်တစ်ချပ်စီမှာ သာမန်အုတ်များ မဟုတ်ဘဲ "လျှို့ဝှက်မြေကြီး အမတေကျောက်တုံး" များ ဖြစ်ကြသည်။

နန်းတော်၏ ကြီးမားလှသော အရွယ်အစားကြောင့် နံရံများအပြင် ကြွေပြားကြမ်းပြင်များ၊ အမိုးများနှင့် အုတ်မြစ်များကိုပါ ထည့်သွင်းတွက်ချက်မည်ဆိုလျှင် ထိုနေရာမှ ထုတ်ယူနိုင်သော အမတေကျောက်တုံး အရေအတွက်မှာ သန်းပေါင်း ဆယ်ချီ၍ ရှိနိုင်သည်ဟု ခန့်မှန်းရပေသည်။

ဤနန်းတော်ကြီး တစ်ခုတည်း၏ ကြွယ်ဝမှုကို နားလည်ရန် ခဲယဉ်းလှသော်လည်း သာမန်အားဖြင့် နှိုင်းယှဉ်ပြရလျှင် ချိပ်ပိတ် နယ်မြေများအတွင်း ပြုလုပ်သည့် လေလံပွဲများတွင် ကြယ်တာရာအဆင့်ရှိသော ဂြိုဟ်ငယ်တစ်လုံး၏ တန်ဖိုးမှာ လျှို့ဝှက်ကျောက်တုံး ၃ တုံးထက် အနည်းငယ်မျှသာ ပို၍ တန်ဖိုးရှိသည်။ အဂ္ဂိရတ် ထုတ်ကုန်များ၏ တန်ဖိုးနှင့် နှိုင်းယှဉ်လျှင်မူ အဆင့်မြင့်၊ အရည်အသွေးနိမ့် လျှို့ဝှက်မြေကြီးအဆင့်ရှိ "လျှို့ဝှက်စိတ်ဆန္ဒ ပေါင်းစည်းခြင်း ဆေးလုံး" တစ်လုံးလျှင် လျှို့ဝှက်မြေကြီး အမတေကျောက်တုံး ၃၀၀ တန်ဖိုး ရှိလေသည်။

ဤခမ်းနားထည်ဝါလှသော အဆောက်အအုံ၏ အလယ်ဗဟိုတွင် စက်ဝိုင်းပုံ ကွင်းပြင်တစ်ခုရှိပြီး ၎င်း၏ အလယ်၌ မျှော်စင်တစ်ခု တည်ရှိနေသည်။ မျှော်စင်မှာ အလွန်မမြင့်ဘဲ ပေ ၇၀ ခန့်သာရှိကာ ၇ ထပ်မျှသာ ရှိ၏။ မျှော်စင်၏ ပြင်ပဒီဇိုင်းကို ကြီးထွားခြင်း ဂုဏ်သတ္တိ၏ ပင်တိုင်အရောင်ကို အခြေခံ၍ ကျန်ရှိသော အဂ္ဂိရတ် ဂုဏ်သတ္တိ ၆ မျိုး၏ အရောင်များဖြင့် ခြယ်သထားသည်။ ၎င်းသည် ရှုပ်ထွေးတောက်ပြောင်နေခြင်း မရှိသော်လည်း စိမ်းလန်းစိုပြည်သော မြက်ခင်းပြင်များနှင့် ကျောက်ခင်းလမ်းများကြားတွင် တစ်သီးတစ်သန့်တည်း ရပ်တည်နေပုံမှာ အလွန်တရာ အရှိန်အဝါ ကြီးမားလှသည်။ မျှော်စင်သည် နန်းတော်နံရံများထက် သေးငယ်သော်လည်း မည်သည့်အရပ်မျက်နှာမှ ကြည့်သည်ဖြစ်စေ လူတို့၏ အကြည့်ကို ဖမ်းစားထားသကဲ့သို့ ထင်ရှားပေါ်လွင်နေပေသည်။

ဤသည်ကား "အစွမ်းကုန် သန့်စင်ခြင်း ခန်းမ" ပင် ဖြစ်တော့သည်။

ဤနေရာ၌ လူသွားလူလာများမှာ မပြတ်သလောက် ရှိနေပြီး ဟင်းလင်းပြင် သင်္ဘောများမှာလည်း လွင့်မျောနေသော ကုန်းမြေတိုက်ကြီးကို ပတ်ချာလည် ဝန်းရံနေသည့် ဂြိုဟ်သိမ်ဂြိုဟ်မွှား ဆိပ်ကမ်းများတွင် ဆိုက်ကပ်ထားကြသည်။ မိနစ်အနည်းငယ်တိုင်းတွင် အဝင်အထွက်များ ရှိနေသဖြင့် အလွန်စည်ကားလှ၏။ တစ်ခါတစ်ရံတွင် ကျင့်ကြံသူများက လမ်းကြောင်းများ မပိတ်ဆို့စေရန် စနစ်တကျ ထိန်းကျောင်းပေးနေရသည်အထိ လူအုပ်စုများ ပြည့်နှက်နေတတ်သည်။

ဝှစ်... ဝှစ်... ဝှစ်...

ရုတ်ခြည်းပင် ကြယ်တာရာ ရွှေ့ပြောင်းခြင်း အလင်းတန်း သုံးခုမှာ နှလုံးသားငယ် ကြယ်တာရာ နယ်မြေ၏ အစွန်းတွင် ရပ်တန့်သွားသည်။ လျင်မြန်သော ခရီးစဉ်ကို အထောက်အကူပြုသည့် သက်တန့်ရောင် လမ်းကြောင်းနှင့် အကာအကွယ် အခွံများမှာလည်း လှပစွာ ပျောက်ကွယ်သွားတော့သည်။

နှလုံးသားငယ် ကြယ်တာရာ နယ်မြေ၏ အာကာသမှာ မည်သည့် အာကာသ ကူးသန်းမှုကိုမဆို တားမြစ်ထားသော အကာအကွယ်များဖြင့် လွှမ်းခြုံထားသည်။ ဤသည်မှာ ဝင်္ကပါ တစ်ခုဖြင့် တားမြစ်ထားခြင်း မဟုတ်ဘဲ စည်းကမ်းတစ်ခုမျှသာ ဖြစ်သော်လည်း အစွမ်းကုန် သန့်စင်ခြင်း ဂလက်ဆီ၏ "မိုးကုပ်စက်ဝိုင်း မျှော်စင်ခုနစ်ခု" မှ ချမှတ်ထားသော စည်းကမ်းဖြစ်သဖြင့် ချိုးဖောက်သူတိုင်းမှာ ချက်ချင်းဆိုသလို လက်တုံ့ပြန်ခြင်း ခံရမည် ဖြစ်သည်။

တစ်ခါက လုပ်ကြံသတ်ဖြတ်သူများ၏ လိုက်လံခြင်းကို ခံနေရသော အစွမ်းထက်သည့် လျှို့ဝှက်အရှင် တစ်ဦး ရှိခဲ့ဖူးသည်။ သူသည် အလွန်အမင်း ထိတ်လန့်တကြား ဖြစ်နေစဉ်အတွင်း ထွက်ပြေးရန်အတွက် ဟင်းလင်းပြင် ရတနာတစ်ခုကို အသုံးပြု၍ အာကာသ ကူးပြောင်းခြင်း ပြုလုပ်ခဲ့ရာ မတော်တဆဖြစ်ပြီး အစွမ်းကုန် သန့်စင်ခြင်း ခန်းမ တည်ရှိရာ ကြယ်တာရာ နယ်မြေအတွင်းသို့ ရောက်ရှိသွားခဲ့သည်။

ထိုစဉ် ဂလက်ဆီ၏ ဆယ်ပုံတစ်ပုံခန့် ဝေးကွာသော အရပ်မှ ဉာဏ်အလင်းရ သူတော်စင် တစ်ဦးက ဖော်ပြ၍မရနိုင်အောင် လျင်မြန်သော တိုက်ခိုက်မှုတစ်ခု ပြုလုပ်ခဲ့ရာ ထိုသူမှာ နေရာတင် ချက်ချင်း သေဆုံးသွားခဲ့ရသည်။

မည်သည့် မေးခွန်းမျှ မမေးခဲ့သလို သေခါနီး အော်ဟစ်သံပင် မကြားလိုက်ရပေ။ လုပ်ကြံသတ်ဖြတ်သူများမှာပင် ထိုသူ သေဆုံးသွားသည်ကို နှစ်ပေါင်း နှစ်ရာကြာမှ သိရှိခဲ့ရသည်။

ဤသတင်း ထွက်ပေါ်လာသောအခါ အာကာသ ဆိုင်ရာ ထူးခြားဖြစ်စဉ်များ သို့မဟုတ် ဟင်းလင်းပြင် ရတနာများကို အသုံးပြုမိခြင်းကြောင့် မည်သည့် သဲလွန်စမျှ မကျန်ဘဲ ပျောက်ကွယ်သွားရသည့် ထောင်ပေါင်းများစွာသော ကျင့်ကြံသူများ၏ သတင်းများလည်း ပျံ့နှံ့လာခဲ့သည်။ ထိုအချိန်မှစ၍ မရေရာသော ထွက်ပြေးခြင်း ရတနာများကို အသုံးပြုခြင်းမှာ တစ်လောကလုံး အတိုင်းအတာဖြင့် တားမြစ်ခြင်း ခံခဲ့ရသည်။

နောင်တွင် မယုံနိုင်စရာ ကောင်းသော တိုက်ပွဲတစ်ခု ဖြစ်ပွားခဲ့သေးသည်။ မျှော်စင်ခုနစ်ခုအတွက် တာအို တရားဥပဒေ စောင့်ရှောက်သူအဖြစ် တာဝန်ယူထားသော ထိုဉာဏ်အလင်းရ သူတော်စင်သည် အဖွဲ့အစည်းတစ်ခုမှ အဆင့်နိမ့် လောကအဂ္ဂိရတ်ပညာရှင် အမျိုးသမီးတစ်ဦး၏ ချစ်လှစွာသော ၃၂ ယောက်မြောက် ခင်ပွန်းကို သတ်မိခဲ့သည်။

ထိုအဂ္ဂိရတ်ပညာရှင်က သူမခင်ပွန်း၏ အသက်ကို ပြန်ပေးရန် သို့မဟုတ် ရှင်းပြချက်ပေးရန် တောင်းဆိုခဲ့သည်။ သို့သော် ထိုဖြစ်ရပ်မှာ နှစ်ပေါင်းများစွာ ကြာမြင့်သွားပြီ ဖြစ်သဖြင့် "အချိန်ပြန်လှည့်ခြင်း" ကျင့်စဉ်ကို အသုံးပြုလျှင်ပင် ဝိညာဉ်ကို ထိခိုက်စေမည့် ကြီးမားသော စတေးမှုများ မပြုဘဲ လွယ်ကူစွာ လုပ်ဆောင်နိုင်မည် မဟုတ်ပေ။

သူမ၏ တောင်းဆိုချက်ကို ငြင်းပယ်ခြင်း ခံရသည့်အခါ အဆင့်နိမ့် လောကအဂ္ဂိရတ်ပညာရှင်မှာ အစွန်းကုန် ဆိုးသွမ်းပြတော့သည်။ သူမ၏ တစ်သက်တာ စုဆောင်းထားသော ကြွယ်ဝမှုများ၊ အမွေအနှစ်များနှင့် ဆေးဖော်စပ်နည်း အားလုံးကို ထိုဉာဏ်အလင်းရ သူတော်စင်၏ ဦးခေါင်းနှင့် လဲလှယ်မည်ဟု ကြေညာခဲ့သည်။ အကယ်၍ တစ်စုံတစ်ဦးက သူမ၏ သက်တမ်းမကုန်မီ ထိုသူတော်စင်၏ ဦးခေါင်းကို ယူဆောင်လာပေးနိုင်လျှင် သူမ၏ ကျန်ရှိသော ဘဝတစ်လျှောက်လုံးကို ထိုသူ၏ အစေခံအဖြစ်နှင့် ကျင့်ကြံခြင်းအတွက် မြှုပ်နှံမည်ဟု ကမ်းလှမ်းခဲ့သည်။

ဤဖြစ်ရပ်ကြောင့် တစ်လောကလုံးကို တုန်လှုပ်စေသော တိုက်ပွဲကြီး ဖြစ်ပွားခဲ့ပြီး ဂျူနီယာ အဆင့် လောကရှန့်ထို အဂ္ဂိရတ်ပညာရှင် တစ်ဦး၏ ဩဇာအာဏာ မည်မျှကြီးမားကြောင်းကို သက်သေပြခဲ့သည်။ အဂ္ဂိရတ်ပညာရှင်သည် ဉာဏ်အလင်းရ သူတော်စင် သေဆုံးသည်ကို ကိုယ်တိုင် မမြင်တွေ့ခဲ့ရသော်လည်း ထိုသူတော်စင်မှာ သူ၏ အစစ်အမှန် ဝိညာဉ်နှင့် ကျင့်ကြံခြင်းတို့တွင် အစားထိုးမရနိုင်သော ပျက်စီးမှုများ ခံစားခဲ့ရပြီး ဒဏ္ဍာရီလာ ပဲ့တင်ထပ် ဝိညာဉ်အဆင့်သို့ တက်လှမ်းနိုင်ခြင်း မရှိတော့ဘဲ လမ်းဆုံးသွားခဲ့ရသည်ဟု ဆိုကြသည်။

မျှော်စင်ခုနစ်ခု၏ စည်းကမ်းများမှာလည်း ထိုဉာဏ်အလင်းရ သူတော်စင်ကို အကာအကွယ် မပေးခဲ့ပေ။ အဂ္ဂိရတ်ပညာရှင်များအပေါ် အလွန်အကျွံ ကာကွယ်ပေးထားသော စည်းကမ်းများကြောင့် သူ၏ ကံကြမ္မာမှာ ဆိုးရွားခဲ့ရသည်။ သို့သော်လည်း စည်းကမ်းချိုးဖောက်သူများကို သတ်ဖြတ်မည်ဟူသော အချက်ကိုမူ ထိုသူတော်စင်၏ ဆက်ခံသူက ဆက်လက် ကျင့်သုံးနေဆဲ ဖြစ်သည်။

အဖြူရောင် ကောင်းကင်သည် ခရီးသွားနေစဉ်အတွင်း ဝေ့ဝူယင်နှင့် အခြားသူများကို ဤအကြောင်းအရာများကို ရှင်းပြနေခဲ့ခြင်း ဖြစ်သည်။

"တကယ့်ကို အာဏာရှင်ဆန်တာပဲ"

အီမန်တက်က အံ့ဩတကြီး ရေရွတ်လိုက်သည်။ ဂျူနီယာ အဆင့် လောကရှန့်ထို အဂ္ဂိရတ်ပညာရှင် တစ်ဦးက ဉာဏ်အလင်းရ သူတော်စင် တစ်ဦး၏ လမ်းစဉ်ကို ဖျက်ဆီးပစ်ခဲ့သည် မဟုတ်ပါလား။

***

အပိုင်း (၂၁၅၆)

"အဲဒီ ကမ်းလှမ်းချက်က အခုထိ ရှိနေတုန်းလား..."

နက်ပစ်က လိုချင်တပ်မက်သော မျက်လုံးများဖြင့် မေးလိုက်သည်။ အဂ္ဂိရတ်ပညာရှင်မှာ ကွယ်လွန်သွားပြီ ဖြစ်သော်လည်း သူမ၏ တစ်သက်တာ ကြွယ်ဝမှုမှာ နက်ပစ်ကဲ့သို့ သူတော်စင် တစ်ဦးအတွက်ပင် အလွန်တရာ ဆွဲဆောင်မှု ရှိနေပေလိမ့်မည်။

အဖြူရောင် ကောင်းကင်က ခေါင်းညိတ်ပြလိုက်၏။

"ရှိနေတုန်းပဲ... အဲဒီ ဉာဏ်အလင်းရ သူတော်စင်က အစွမ်းကုန် သန့်စင်ခြင်း ခန်းမထဲမှာပဲ အမြဲတမ်း တံခါးပိတ် ကျင့်ကြံနေတယ်လို့ ကြေညာထားတာ အခုဆိုရင် နှစ်ပေါင်း ၄၃,၀၀၀ ကျော်သွားပြီ... ဒါပေမဲ့ ကမ်းလှမ်းမှုက အခုထိ အသက်ဝင်နေတုန်းဆိုတော့ သူ အသက်ရှင်နေသေးတာ သေချာတယ်"

နက်ပစ်က နှုတ်ခမ်းလေး ဆူလိုက်သည်။ မျှော်စင်ခုနစ်ခု၏ စည်းကမ်းများသည် အဂ္ဂိရတ်ပညာရှင်များဘက်သို့ အလွန်အမင်း ဘက်လိုက်ထားပြီး သူတို့၏ အစောင့်အရှောက်ကိုပင် သတ်ဖြတ်ရန် ခွင့်ပြုထားသော်လည်း ထိုသူတော်စင် ပုန်းအောင်းနေသော နည်းလမ်းမှာမူ အကောင်းဆုံး ဖြစ်နေပေသည်။ သူသည် ကျန်ရှိသော ဘဝတစ်လျှောက်လုံးကို ထိုနေရာတွင်သာ အေးချမ်းစွာ ကုန်ဆုံးသွားပေလိမ့်မည်။

နက်ပစ်၏ မကျေမနပ်ဖြစ်နေမှုကြောင့် နက်ပရီမှာ ဘာပြောရမှန်းမသိဖြစ်ကာ နှုတ်ဆိတ်နေမိတော့သည်။

"အဂ္ဂိရတ်ပညာရှင်တစ်ယောက်ကို ဘယ်တော့မှ လျှော့မတွက်နဲ့..."

လော့နင်က သူမ၏ ရင်ထဲရှိအတိုင်း အလေးအနက် ပြောလိုက်သည်။

"ငါလည်း သဘောတူပါတယ်"

အီမန်တက်က ရယ်မောရင်း လော့နင်ကို နောက်ပြောင်ကျီစယ်သော အကြည့်ဖြင့် ကြည့်လိုက်သည်။ သူမ၏ မျက်နှာတွင် လှောင်ပြောင်လိုသော အပြုံးတစ်ခု ရှိနေ၏။

"..."

အဂ္ဂိရတ် အမိန့်တော်ကို ကိုင်ဆောင်ထားပြီး အဓမ္မ ခေါ်ဆောင်ခြင်း ခံခဲ့ရသော တာအို ဥပဒေ ထိန်းသိမ်းသူ၏ ရင်ထဲတွင် လှိုင်းဂယက်များ ထလျက် တိတ်ဆိတ်စွာ စောင့်ကြည့်နေမိသည်။ သူသည် စောစောလေးကတင် ခုခံနိုင်စွမ်းမရှိသော ဝိညာဉ်အင်အားတစ်ခု၏ အေးခဲမှုကို ခံခဲ့ရပြီး ကြယ်တာရာ ရွှေ့ပြောင်းခြင်း အလင်းတန်းဖြင့် ဤနေရာသို့ ပါလာခဲ့ရခြင်း ဖြစ်သည်။ ဤအခြေအနေကို သူ ဘယ်လို နားလည်ရမှန်းပင် မသိတော့ပေ။

ထို့အပြင် သူ မဆင်မခြင် ပြုမူရန်လည်း မဝံ့ရဲပေ။ ဝေ့ဝူယင်၏ စွမ်းအားက သူ့ကို တုန်လှုပ်ခြောက်ခြားစေသလို ဝေ့ဝူယင်၏ "သာလွန် သန့်စင် အဂ္ဂိရတ် ကြယ်တာရာ" များမှာလည်း အဂ္ဂိရတ်တာအိုတွင် သူ၏ အောင်မြင်မှုများ မည်မျှ ကြီးမားကြောင်း သက်သေပြနေသည်။ ဝေ့ဝူယင်သည် ဤမျှ အစွမ်းထက်သော ကျင့်စဉ်ကို အသုံးပြုနိုင်သည်ဖြစ်ရာ သူက အဂ္ဂိရတ် ဝိညာဉ် လျှို့ဝှက်အာဏာရှင်အဆင့် မဟုတ်ဘဲ အထွတ်အထိပ် သူတော်စင်တစ်ဦး ဖြစ်နိုင်ခြေ များလှသည်။

သာ၍ဆိုးသည်က ထိုပုဂ္ဂိုလ်မှာ "တောက်ပသော ကြယ်နန်းတော်" နှင့် နက်ရှိုင်းသော ဆက်နွှယ်မှု ရှိနေခြင်းပင်။

တာအို ဥပဒေ ထိန်းသိမ်းသူမှာ စိတ်ဓာတ်များပင် ကျလုနီးပါး ဖြစ်နေခဲ့ပြီ ဖြစ်သည်။ သူက အဘယ်ကြောင့် ဤကိစ္စတွင် ပါဝင်ပတ်သက်နေရသနည်း။ အဘယ်ကြောင့် သူ့ကို အဂ္ဂိရတ် အမိန့်တော် ပေးထားရသနည်း။ သူသည် အဘယ်ကြောင့် ဤမျှ စိတ်အားထက်သန်စွာဖြင့် အပြေးအလွှား ရောက်လာရသနည်း။

သူ အိမ်ပြန်ချင်လှပြီ။ ဤကိစ္စမှာ ပို၍ ရှုပ်ထွေးလာတော့မည်မှာ အမှန်ပင်။

ဝေ့ဝူယင်က အီလီစီယံ အသေးပေါ်မှ နေ၍ သူတော်စင်အဆင့်ရှိ တာအို ဥပဒေ ထိန်းသိမ်းသူကို လှမ်းကြည့်လိုက်၏။ ထို့နောက် သူက တည်ငြိမ်စွာပင် ပြောလိုက်သည်။

"ငါတို့ အထဲဝင်ဖို့ အဆင်သင့်ဖြစ်ပြီ"

"..."

တာအို ဥပဒေ ထိန်းသိမ်းသူမှာ ငိုရခက် ရယ်ရခက်ဖြင့် ပုန်းစရာနေရာလည်း မရှိသဖြင့် အဂ္ဂိရတ် အမိန့်တော်ကို အသက်သွင်းရင်း ခေါင်းညိတ်ပြလိုက်ရုံသာ တတ်နိုင်တော့သည်။

"သွားကြစို့"

သူက ဝိညာဉ်သံကြိုးများကို အသုံးပြုရန် သို့မဟုတ် ရိုင်းစိုင်းသော လေသံဖြင့် ပြောရန် မဝံ့ရဲတော့ဘဲ မလေးမစားပြုသည့် အရိပ်အယောင် အနည်းငယ်မျှ မပါသော သာမန်လေသံဖြင့်သာ ပြောလိုက်တော့သည်။

အဖြူရောင် ကောင်းကင်မှာ စိုးရိမ်နေဆဲ ဖြစ်သော်လည်း အနည်းငယ်တော့ စိတ်သက်သာရာ ရသွားသလို ခံစားလိုက်ရသည်။ သူမက တာအို တရား ဥပဒေ စောင့်ရှောက်သူဘက်သို့ လှည့်ကာ မေးလိုက်သည်။

"တိုက်ပွဲဖြစ်ပြီးနောက် ဘာတွေ ဆက်ဖြစ်ခဲ့လဲ..."

အဇူရာပင်လယ်မှာ တစ်နည်းနည်းဖြင့် ရှုံးနိမ့်သွားခဲ့ပြီး သူတို့ဘက်က အလောင်းအစားကို မဖြည့်ဆည်းနိုင်ခဲ့သည့်အတွက် သူမ အလွန် သိချင်နေမိသည်။

"..."

တာအို တရားဥပဒေ စောင့်ရှောက်သူမှာ ဖြေရန် ဝန်လေးနေပုံ ရ၏။ ပုံမှန်ဆိုလျှင် အခြေခံလောက် ရှင်းပြပြီး ရာဇဝတ်သားများကို ချိတ်ပိတ်ကာ မည်သည့် စကားမျှ ထပ်မပြောဘဲ ခေါ်ဆောင်သွားရုံသာ ဖြစ်သည်။ အကယ်၍ ငြင်းဆန်ပါက ထိုနေရာတင် သတ်ဖြတ်ပစ်လိုက်ရုံပင်။

သို့သော် သူက မကျေမနပ် နှာခေါင်းရှုံ့ရန် ပြင်လိုက်စဉ်မှာပင် ကြောက်မက်ဖွယ် အကြည့်တစ်ခုက သူ့ကို ထိုးဖောက်သွားသဖြင့် သူ၏ ကျောရိုးများပင် စိမ့်တက်သွားရသည်။

ဝေ့ဝူယင်၏ စောစောက ခြိမ်းခြောက်မှုကို သူ ပြန်သတိရသွား၏။

"ငါတို့ အားလုံး ကြီးထွားခြင်းဇုံကို တိုက်ရိုက် သွားမှာ... မင်း တစ်ခုခု လုပ်ဖို့ ကြိုးစားရင် ငါ မင်းကို အရင်သတ်မယ်... ပြီးမှ မင်းသေတဲ့ကိစ္စကို မျှော်စင်နဲ့ အဂ္ဂိရတ် ထုတ်ကုန်တွေ လဲလှယ်ပြီး ဖြေရှင်းလိုက်မယ်"

ဤသည်မှာ မျှော်စင်ခုနစ်ခုမှ ချမှတ်ထားသော စည်းကမ်းဖြစ်သည်။ ပုံမှန်နှင့် ခြားနားစွာပင် အဂ္ဂိရတ်ပညာရှင် တစ်ယောက်က တစ်စုံတစ်ဦးကို သတ်ဖြတ်လျှင် ဒဏ်ကြေးသာ ပေးဆောင်ရပြီး တာအို တရားဥပဒေ စောင့်ရှောက်သူများပင်လျှင် ဤကင်းလွတ်ခွင့်တွင် မပါဝင်ပေ။

ဆန့်ကျင်ဘက်အနေဖြင့် အဂ္ဂိရတ်ပညာရှင်ကို ပြန်လည် ထိခိုက်စေခြင်းမှာမူ တာအိုတိုက်ပွဲ သို့မဟုတ် အလောင်းအစားတစ်ခု၏ ရလဒ်မှလွဲ၍ တားမြစ်ထားသည်။ ထို့ကြောင့် အဂ္ဂိရတ်ပညာရှင်တစ်ဦးကို ရန်စခြင်းမှာ မည်သည့် ကျင့်ကြံခြင်းအဆင့် သို့မဟုတ် အဆင့်အတန်းရှိပါစေ အမိုက်မဲဆုံး အလုပ်ပင် ဖြစ်သည်။

ဉာဏ်အလင်းရ သူတော်စင်အဆင့်ရှိသော တာအို တရားဥပဒေ စောင့်ရှောက်သူတစ်ဦး၏ အသက်မှာ အဂ္ဂိရတ် ထုတ်ကုန် အနည်းငယ်ထက်မက တန်ဖိုးရှိမည်မှာ သေချာသော်လည်း သူ၏ အသက်ကို ဝယ်ယူ၍ ရနိုင်သေးသည်။ မှန်ပေသည်။ ဤအချက်မှာ အခြေအနေ နှစ်ရပ်အောက်တွင်သာ ဖြစ်နိုင်သည်။

လောကရှန့်ထို အဂ္ဂိရတ်ပညာရှင် ဖြစ်ရမည်၊ သို့မဟုတ် အနည်းဆုံး မြေကြီးရှန့်ထို အဂ္ဂိရတ်ပညာရှင်အဆင့်ရှိသော အဂ္ဂိရတ်ဝိညာဉ် ပိုင်ရှင် ဖြစ်ရမည်။

သို့သော်ငြားလည်း... အဂ္ဂိရတ်ပညာရှင်များသည် အလောင်းအစားများနှင့် ပြိုင်ပွဲများမှတစ်ဆင့် မကြာခဏ အသတ်ခံနေရဆဲပင်။ မိမိ၏ အသက်မှာ တန်ဖိုးနည်းသွားမည်ကို စိုးရိမ်သဖြင့် သူ ဆိတ်ဆိတ်မနေရဲတော့ပေ။

"လောကရှန့်ထို အဇူရာပင်လယ်နဲ့ ပင်လယ်နှင့်ကောင်းကင် အဖွဲ့အစည်းကို အစွမ်းကုန် သန့်စင်ခြင်း ဂလက်ဆီအတွင်း ကုန်သွယ်မှု ပိတ်ဆို့လိုက်ပြီ... ပြီးတော့ အဂ္ဂိရတ်ပညာရှင် အားလုံးကိုလည်း အဂ္ဂိရတ် ဖော်စပ်ခြင်း အမိန့်တော်နဲ့အတူ ကမ္ဘာလုံးဆိုင်ရာ ဖမ်းဝရမ်း ထုတ်ထားတယ်... ဒီကိစ္စ ပြေလည်သွားတဲ့အထိ၊ ဒါမှမဟုတ် တစ်ဖက်လူက မူလအလောင်းအစားရဲ့ ၁၀ ဆ လျော်ကြေးကို ရရှိတဲ့အထိပဲ"

"အဂ္ဂိရတ် ဖော်စပ်ခြင်း အမိန့်တော်လား"

အဖြူရောင် ကောင်းကင်၏ မျက်နှာမှာ ချက်ချင်း ပြာနှမ်းသွားပြီး တစ်စထက်တစ်စ ပို၍ ဆိုးရွားလာသည်။

"အဂ္ဂိရတ် ဖော်စပ်ခြင်း အမိန့်တော်ဆိုတာ ဘာလဲ"

နက်ပစ်က သိချင်စိတ်ဖြင့် မျက်တောင်ခတ်ရင်း မေးလိုက်သည်။

နက်ပရီက ရှင်းပြလိုက်၏။

"အဂ္ဂိရတ် ဖော်စပ်ခြင်း အမိန့်တော် ဆိုတာက အဂ္ဂိရတ်ပညာရှင် တစ်ယောက် ဒါမှမဟုတ် အဂ္ဂိရတ် အဖွဲ့အစည်း တစ်ခုကို အကြွေးဆပ်ဖို့ ဒါမှမဟုတ် ကတိတစ်ခု တည်စေဖို့အတွက် မရပ်မနား ဆေးဖော်စပ်ဖို့ အတင်းအကျပ် အမိန့်ပေးတာပဲ"

"အတင်းအကျပ် အမိန့်ပေးတာလား"

နက်ပစ် အံ့အားသင့်သွားသည်။

"ပြောရရင် ပင်လယ်နဲ့ ကောင်းကင် အဖွဲ့အစည်းမှာရှိတဲ့ လူတိုင်းဟာ အဂ္ဂိရတ်ကျွန်တွေ ဖြစ်သွားတာပဲ... သတ်မှတ်ထားတဲ့ အဂ္ဂိရတ် ထုတ်ကုန်တွေကို မရပ်မနား ဖော်စပ်ပေးရမယ်... ချိုးဖောက်သူတွေကို ကွပ်မျက်မယ်... စာချုပ်ကာလအတွင်းမှာ ဒါမှမဟုတ် စာချုပ် မပြည့်စုံမချင်း ကျန်းမာရေးအတွက် ကျင့်ကြံတာကလွဲလို့ ကျန်တာ ဘာမှ လုပ်ခွင့်မရှိဘူး"

ပါခတ်က သက်ပြင်းချရင်း ခေါင်းခါကာ ထပ်ဖြည့်လိုက်သည်။

"တကယ်လို့ အမိန့်တော်က အချိန်တစ်ခုအတွင်း ဒါမှမဟုတ် အရေအတွက်တစ်ခုတည်း အတွက်ဆိုရင်တော့ အဆင်ပြေပါသေးတယ်... ဒါပေမဲ့ သတ်မှတ်ချိန်အတွင်း အရေအတွက် မပြည့်မီဘူးဆိုရင်တော့ အဲဒီ အဖွဲ့အစည်းတစ်ခုလုံးကို အပြတ်ရှင်း ပစ်လိုက်မှာပဲ"

"..."

နက်ပစ်မှာ ထိုကဲ့သို့ အကြောင်းအရာမျိုးကို ကြားဖူးသော်လည်း ဤသည်မှာ ရူးသွပ်စရာ ကောင်းလှသည်။ အဆိုးရွားဆုံး အဂ္ဂိရတ် ဖော်စပ်ခြင်း အမိန့်တော်များမှာ အကြွေးကျေသည့်အထိ လုပ်ဆောင်ရခြင်းပင် ဖြစ်သည်။ ပင်လယ်နှင့်ကောင်းကင် အဖွဲ့အစည်းမှ လူမည်မျှသည် သူတို့၏ တစ်သက်တာလုံးကို ဆေးဖော်စပ်ရင်း ကုန်ဆုံးသွားရမည်ကို မည်သူ သိနိုင်ပါမည်နည်း။

"ဒါပေမဲ့ အဆင်ပြေမှာပါ... ရှင့်မှာ အဖြူရောင် ကောင်းကင် ကျောက်မျက် ရှိနေတာပဲ... ဒီကိစ္စကို ဖြေရှင်းရတာ သိပ်မခက်ခဲလောက်ပါဘူး"

လော့နင်က အဖြူရောင် ကောင်းကင်ကို နှစ်သိမ့်သော အပြုံးဖြင့် အားပေးရန် ကြိုးစားလိုက်သည်။

သို့သော် အဖြူရောင် ကောင်းကင်၏ ဖြူရော်နေသော မျက်နှာမှာ သေလူကဲ့သို့ပင် ပို၍ ပြာနှမ်းသွားသည်။

"အဲဒါက အဲဒီလောက် မရိုးရှင်းဘူး"

တာအို တရားဥပဒေ စောင့်ရှောက်သူက လော့နင်၏ အကောင်းမြင်လွန်းသော အတွေးကို အထင်အမြင်သေးစွာဖြင့် ထပ်ဖြည့်ပြောလိုက်သည်။ သို့သော် ဝေ့ဝူယင်၏ အကြည့်ကို ခံစားမိလိုက်သောအခါ သူသည် တံတွေးတစ်ချက် မျိုချလိုက်ပြီး အမြန် ရှင်းပြတော့သည်။

"လျော်ကြေးပေးတာကလွဲလို့ ဒီကိစ္စက ပြေလည်ဖို့ မလွယ်ဘူး... အဖြူရောင် ကောင်းကင် ကျောက်မျက် တစ်လုံးတည်းနဲ့လည်း ဘာမှ မထူးခြားနိုင်ဘူး... ဘာလို့လဲဆိုတော့ လျော်ကြေးအနေနဲ့ အဖြူရောင် ကောင်းကင် ကျောက်မျက် ၁၁ လုံး၊ ဒါမှမဟုတ် အဲဒါနဲ့ ညီမျှတဲ့ ပစ္စည်းတွေ၊ ရတနာတွေ ပေးရမှာမို့လို့ပဲ...”

“ဒါတင်မကသေးဘူး... အမွေအနှစ် ပိုင်ဆိုင်ခွင့်နဲ့ ဆေးဖော်စပ်နည်းတွေရဲ့ တန်ဖိုးကိုပါ ၁၀ နဲ့ မြှောက်ပြီး ထပ်ဆောင်း လျော်ကြေးပေးရဦးမှာ"

"..."

ထိုအခါမှသာ နက်ပစ်နှင့် လော့နင်တို့သည် အဖြူရောင် ကောင်းကင် ရင်ဆိုင်နေရသော အကြွေးမှာ မည်မျှ ကြီးမားကြောင်းကို နားလည်သွားကြတော့သည်။

...