အခန်း (၃၃၃-၃၃၄)

အခန်း ၃၃၃ - ငါ မျှော်လင့်နေတယ်

ဖုန်းချီမြို့၏ အဖြစ်အပျက်ကို ရှန်းဝူဂိုဏ်း မှ လင်ရှောင်က ကိုင်တွယ်ဖြေရှင်းခဲ့သည်။

ခဏအတွင်းမှာပင် ထိုသတင်းသည် သိုင်းလောကတစ်ခုလုံး၌ ဟိုးဟိုးကျော်သွားတော့​၏။

အဓိကဂိုဏ်းကြီးအများအပြားက ထိုတိုက်ခိုက်မှုကို ချက်ချင်းပင် ရှုတ်ချကြပြီး ရှန်းဝူဂိုဏ်း၏ ဂုဏ်သိက္ခာမှာလည်း ပြင်းထန်စွာ ထိခိုက်သွားခဲ့သည်။

ဟုတ်ပါသည်၊ ဒါတွေက အပေါ်ယံမျှသာဖြစ်ပြီး အသေအချာ မစဉ်းစားတတ်သူတွေကသာ မျက်ကန်းယုံကြည်ကြခြင်းဖြစ်သည်။

အမှန်စင်စစ်တွင်မူ လူအများစုသည် သူပြောခဲ့သော ပထမဆုံးစကားနှစ်ခွန်းကို ထည့်သွင်းစဉ်းစားနေကြသည်။

ဤဖြစ်ရပ်၏ အရင်းအမြစ်မှာ လင်ကျိုနန်းတော် ၏ လက်ချက်ဖြစ်နိုင်ခြေရှိခြင်း။

ဆွေးနွေးမှုများ၏ ဗဟိုချက်ဖြစ်နေသော လင်ကျိုနန်းတော်နှင့် ရှန်းဝူဂိုဏ်းတို့မှာမူ လုံးဝဝေခွဲမရ ဖြစ်နေကြသည်။

၎င်းတို့က ဒါဟာ ကောလာဟလသာဖြစ်ကြောင်း ချက်ချင်းထုတ်ပြန်ခဲ့သော်လည်း ယခုအခြေအနေတွင် ကောလာဟလများက တောမီးကဲ့သို့ ပျံ့နှံ့နေပြီ။

မည်သူကမျှ ထိုစကားများကို မယုံကြည်ကြတော့ပေ။

သိပ်ပြီး ဉာဏ်မရှိသူများနှင့် ဖုန်းချီမြို့မှ လျိုမိသားစုတို့သည် ထိုဂိုဏ်းနှစ်ခု၏ တံခါးဝသို့ ရောက်ရှိလာကြသည်။

၎င်းတို့သည် ဆန္ဒပြကြသည်၊ ခြိမ်းခြောက်ကြသည်၊ ပြီးနောက် အဖြေတောင်းခံကြသည်။

အခြားတစ်ဖက်တွင်မူ မင်မင်းဆက် သည် အလွန်အမင်း ဒေါသထွက်နေခဲ့​၏။

စုန့်ရှန်းဂိုဏ်းသည် လွန်ခဲ့သော ရက်အနည်းငယ်ကမှ လူစုခွဲခံထားရပြီး ဂိုဏ်းအတွင်း ပြစ်မှုကျူးလွန်သူ အားလုံးလည်း အဖမ်းခံထားရသည်။

ဂိုဏ်းချုပ်နှင့် အကြီးအကဲများပင် ချွင်းချက်မရှိ ထိန်းသိမ်းခံထားရ​၏။

သိုင်းလောကတွင် ကျော်ကြားလှသော စုန့်ရှန်းတောင်မှ ဂန္ထဝင်အကြီးအကဲသည်လည်း ကောင်းကင်အကျဉ်းထောင်ထဲ၌ အကျဉ်းကျနေသည်ဟု ကောလာဟလများ ထွက်ပေါ်နေသည်။

ထိုကဲ့သို့သော အဖြစ်အပျက်ကြီးသည် မူအရဆိုလျှင် သိုင်းလောကတွင် သွေးချောင်းစီးစေပြီး လူယုတ်မာများကို တုန်လှုပ်ချောက်ချားသွားစေရမည်။

အမှန်တကယ်လည်း ထိုသို့ပင် ဖြစ်ခဲ့သည်။

ထိုသတင်းကို သိရှိပြီးနောက် ဂိုဏ်းအသီးသီးသည် အင်အားစုစည်းကာ နန်းတော်ထံမှ တရားမျှတမှု တောင်းဆိုရန် ကြိုးပမ်းခဲ့ကြသည်။

သို့သော် ထိုနေ့က ဖြစ်ပျက်ခဲ့သော အဖြစ်အပျက်များနှင့် လျှို့ဝှက်ဆန်းကြယ်သော အဖွဲ့အကြောင်းကို သိရှိသွားသောအခါ...

ခဏအတွင်းမှာပင် ဂိုဏ်းအားလုံးသည် တိတ်ဆိတ်သွားကြ​၏။

မည်သူမျှ ပြန်လည်တုံ့ပြန်ရန် မဝံ့ရဲကြတော့ပေ။

အကယ်၍ ဤအချိန်တွင် သွားရောက် ရန်စမိပါက မင်မင်းဆက်၏ သေနတ်ပြောင်းဝကို သွားနင်းသကဲ့သို့ ဖြစ်ပေလိမ့်မည်။

ဖြစ်နိုင်သည်မှာ၊ ဂိုဏ်းအချို့သည် ဂိုဏ်းစာရင်းမှပင် ပယ်ဖျက်ခံရနိုင်သည်။

သို့သော် ယခုအခြေအနေမှာ အစိုးရအတွက် မျက်နှာဖြတ်ရိုက်ခံရသလို ဖြစ်နေသည်မှာ အမှန်ပင်။

ထို့ကြောင့် နန်းတော်က ချက်ချင်းအရေးယူရန် တိုက်တွန်းခဲ့ပြီး မြောက်ပိုင်းပြည်နယ်များဆိုင်ရာ ဘုရင်ခံ၏ အိမ်တော်သို့ အမိန့်တော်စာတစ်စောင် ပေးပို့ခဲ့သည်။

......

မင်မင်းဆက်၏ မြောက်ဘက်တွင် မြောက်ပိုင်းခရိုင်များ ရှိသည်။

အနီနှင့် အဖြူရောင် ဝတ်စုံကို ဝတ်ဆင်ထားသော မြောက်ပိုင်းဘုရင်ခံသည် သူ၏ စားပွဲတွင် မတ်မတ်ထိုင်နေ​၏။

သူ၏ အကြည့်များသည် အေးစက်တင်းမာနေပြီး နှုတ်ခမ်းထောင့်တွင်လည်း လှောင်ပြုံးတစ်ခု ရှိနေသည်။

စားပွဲပေါ်တွင် ပိုးထည်စာလိပ်နှစ်ခု ရှိနေသည်။

တစ်ခုက လင်ကျိုနန်းတော်အကြောင်းဖြစ်ပြီး နောက်တစ်ခုက ရှန်းဝူဂိုဏ်းမှ လင်ရှောင်းအကြောင်း ဖြစ်သည်။

အစိုးရအရာရှိများ အလုပ်လုပ်သည့်အခါ ပို၍ စေ့စပ်သေချာရန် လိုအပ်​၏။

သူ၏ သတင်းပေးများမှတစ်ဆင့် သက်ဆိုင်ရာ သတင်းအချက်အလက်များကို စုစည်းထားပြီးဖြစ်​၏။

ထိုစဉ်က ဘေးမှကြည့်နေသူများ၏ စုံစမ်းချက်အရ မျက်နှာဖုံးစွပ်ထားသူသည် ဂိုဏ်းနှစ်ခု၏ အမည်ကို ပြောကြားခဲ့သည်။

ဒုတိယဂိုဏ်းအမည်မှာ တမင်လုပ်ကြံဖန်တီးထားခြင်းနှင့် ပိုတူပြီး၊ ပထမတစ်ခုမှာမူ မတော်တဆ လွှတ်ခနဲ ပြောမိသွားခြင်းနှင့် ပိုတူနေသည်။

ဟုတ်ပါသည်၊ ဒါက ခန့်မှန်းချက်သက်သက်သာ။

အမှန်စင်စစ် အမည်နှစ်ခုလုံးသည် လွဲမှားအောင် လုပ်ဆောင်ထားခြင်း ဖြစ်နိုင်သည်။

လွန်ခဲ့သော နှစ်များစွာကလည်း ဤကဲ့သို့သော အခြေအနေမျိုးကို ကြုံတွေ့ခဲ့ဖူးသည်။

သို့သော် ထိုသူများသည် ယခုလောက် မရဲတင်းကြသလို၊ ပြစ်မှုကျူးလွန်သူများသည်လည်း ယခုလောက် အစွမ်းမထက်ခဲ့ကြပေ။

အမှုတွဲများအရ လွန်ခဲ့သော တစ်နှစ်က ပေလျဲ့ပြည်နယ်ရှိ လင်တောက်ဂိုဏ်း နှင့် ဟန်ယွန်ဂိုဏ်း တို့ ပြင်းပြင်းထန်ထန် တိုက်ခိုက်ခဲ့ကြဖူးသည်။

အကြောင်းရင်းမှာ တစ်ဖက်နှင့်တစ်ဖက် တပည့်များကို ချောင်းမြောင်းတိုက်ခိုက်ပြီး ဒဏ်ရာရစေခဲ့သောကြောင့်။

နှစ်ဖက်စလုံး၏ ဒေါသများ စုပုံလာရာမှ တိုက်ပွဲဖြစ်ပွားခဲ့ခြင်းပင်။

ယခုအခြေအနေသည်လည်း ထိုသို့ပင် ဖြစ်ပုံရ​၏။

မကြာသေးမီက စုန့်ရှန်းဂိုဏ်း လူစုခွဲခံရမှုကို ပြန်လည်စဉ်းစားရင်း မြောက်ပိုင်းဘုရင်ခံသည် စားပွဲကို လက်ချောင်းများဖြင့် အသာအယာခေါက်ကာ အတွေးနက်နေခဲ့သည်။

ပြည်နယ်တစ်ခု၏ ဘုရင်ခံတစ်ဦးအနေဖြင့် သူ၏အစွမ်းမှာ မနိမ့်လှပေ။

တိုက်ပွဲများနှင့် ဝေးကွာနေသည်မှာ ကြာပြီဖြစ်သော်လည်း သူ၏ ကျင့်စဉ်အဆင့်မှာ ဒုတိယအဆင့်ရှိနေသေးသည်။

သို့သော် ဤအချက်အလက်များပေါ်တွင်သာ အခြေခံပြီး တစ်ဖက်လူ မည်သည့်ကိုယ်ခံပညာ အမျိုးအစားကို အသုံးပြုနေသည်ကို မြောက်ပိုင်းဘုရင်ခံပင်လျှင် အဆုံးအဖြတ် မပေးနိုင်ပေ။

သူသည် အဖိုးတန်ဓားကို လက်ဝါးဖြင့် ချေမှုန်းနိုင်ပြီး လက်သီးဖြင့် ဓားသွားကို အစိတ်စိတ်အမြွှာမြွှာ ဖြစ်စေနိုင်သည်။

၎င်းသည် ကြီးမားသော ခွန်အားနှင့် မာကျောသော ခန္ဓာကိုယ်ရှိခြင်းပင်။

ထိုသို့သော လက္ခဏာရှိသည့် ကိုယ်ခံပညာ ဂိုဏ်းပေါင်းများစွာ ရှိနေသည်။

မြောက်ပိုင်းဘုရင်ခံသည် ဆုံးဖြတ်ချက်မချနိုင်သဖြင့် ခေါင်းကိုပွတ်ကာ စိတ်ညစ်နေရသည်။

သတင်းအချက်အလက်များအရ ဖြစ်နိုင်ခြေအရှိဆုံးမှာ အဖွဲ့အစည်းတစ်ခု သို့မဟုတ် လူပုဂ္ဂိုလ်အချို့က တမင်တကာ ရှုပ်ထွေးအောင် ဖန်တီးနေခြင်းဖြစ်သည်။

သူတို့၏ ရည်ရွယ်ချက်မှာ ဂိုဏ်းအချင်းချင်းကြားနှင့် မင်မင်းဆက်နှင့် သိုင်းလောကကြား ပဋိပက္ခဖြစ်အောင် ရန်တိုက်ပေးရန်ဖြစ်ပြီး ၎င်းတို့က ကြားမှ အကျိုးအမြတ် ထုတ်လိုခြင်း။

ထို့ကြောင့် အကယ်၍ ထိုဂိုဏ်းနှစ်ခုမှ လူများကို သွားရောက်ဖမ်းဆီးပါက နားလည်မှုလွဲမှားမှုများစွာ ဖြစ်ပေါ်လာနိုင်ပေသည်။

သူ၏ ထောက်လှမ်းရေး အစွမ်းဖြင့် အမှန်တရားကို ခန့်မှန်းနိုင်သော်လည်း သာမန်ပြည်သူများနှင့် လေလှိုင်းစီးသူများကမူ ယုံကြည်ချင်မှ ယုံကြည်ကြမည်။

"ငါတို့ရဲ့ ပြိုင်ဘက်က တကယ်ကို ပါးနပ်တဲ့ အကွက်ကို ရွှေ့လိုက်တာပဲ"

"ပြီးတော့မှ ဖြစ်ပျက်ရမယ့် အချိန်ကလည်း ဒီအချိန်မှ ဖြစ်ရတယ်လို့"

မြောက်ပိုင်းဘုရင်ခံသည် သက်ပြင်းတစ်ချက်ချကာ စားပွဲအောက်မှ အံဆွဲကို ဆွဲဖွင့်လိုက်သည်။

သစ်သားပြားလေးတစ်ခုကို ထုတ်ယူလိုက်ပြီး အပေါ်မှ အမှတ်အသားကို ကြည့်ကာ အတွေးနက်သွားပြန်သည်။

စုန့်ရှန်းဖြစ်ရပ်ပြီးနောက် ဤပစ္စည်းကို အင်အားကြီး ပုဂ္ဂိုလ်အသီးသီးထံ ပေးပို့ခဲ့သည်။

၎င်းတို့သည် စစ်သေနာပတိ ဝေဝမ် နှင့် ကျန်းဟယ် တို့ ပူးပေါင်းလေ့ကျင့်ထားသော အဖွဲ့ကို ကိုယ်စားပြုသည်။

၎င်းတို့သည် 'ဝူရွှီကာကွယ်ရေး' ဟူသော စာလုံးလေးလုံးဖြင့် အဆင့်ခွဲခြားထားသည်။

မြောက်ပိုင်းဘုရင်ခံထံ ခွဲဝေပေးထားသော အဖွဲ့မှာ နောက်ဆုံးအဆင့်ပင်။

၎င်းတို့တွင် တတိယအဆင့် ကျွမ်းကျင်သူတစ်ဦးကို သတ်ဖြတ်နိုင်သည့် ဆဋ္ဌမအဆင့်နှင့် စတုတ္ထအဆင့် ကျွမ်းကျင်သူများ ပါဝင်သည်။

ဤတံဆိပ်သည် စစ်အင်အားကို အသုံးပြုနိုင်သော အခြေခံအထောက်အထား ဖြစ်သည်။

ထိုအရာကို စိုက်ကြည့်ရင်း မြောက်ပိုင်းဘုရင်ခံသည် အချိန်အတော်ကြာ တိတ်ဆိတ်သွားတော့​၏။

...

ဖုန်းချီမြို့ရှိ တည်းခိုခန်းတစ်ခုတွင်၊ မိမိ၏ အဝတ်အစားများ ပြန်လဲထားသော ရွှီကျွင်းသည် ကုတင်ရှေ့တွင် တိတ်ဆိတ်စွာ ထိုင်နေ​၏။

သူ၏ မျက်လုံးများသည် ကြမ်းပြင်ကိုသာ အကြာကြီး စိုက်ကြည့်နေမိသည်။

အမှန်စင်စစ်တွင် ဤအရာသည် အစိုးရနှင့် သိုင်းလောကအကြား ပဋိပက္ခဖြစ်အောင် ရန်တိုက်ပေးခြင်းသာ။

ရွှီကျွင်း၏ စရိုက်အရ လူသတ်ခြင်းသည် ကြက်တစ်ကောင်ကို သတ်ရသကဲ့သို့ သူ ကျင့်သားရနေပြီဖြစ်​၏။

သို့သော် လွန်ခဲ့သော ရက်က တွေ့ခဲ့သော ရဲမက်သည် အရူးတစ်ယောက်ကဲ့သို့ တိုက်ခိုက်ခဲ့​၏။

ထိုသူ၏ နောက်ခံသည် သူတို့နှစ်ဦးကြားက ပဋိပက္ခနှင့် ဆက်စပ်နေသည်မှာ သိသာလှသည်။

ယခင်ကဖြစ်စေ၊ ယခုဖြစ်စေ သူသည် ဤအရာများကို စုံစမ်းရန် အချိန်မရှိပေ။

သူသည် ထိုသူ၏ အခြေအနေမှာ မိမိနှင့် တူညီနိုင်သည်ဟုသာ ခန့်မှန်းနေမိသည်။

သူတို့အားလုံးသည် ကြောက်ရွံ့မှုနှင့် အရိပ်မည်းများအဖြစ် ဖော်ပြနိုင်သော အရာများကို ကြုံတွေ့ခဲ့ကြရသူများသာ။

သက်ပြင်းအရှည်ကြီး ချလိုက်ပြီးနောက်၊ သိုင်းဧကရာဇ်၏ သွေးမျိုးဆက်ရှိသော ကျွမ်းကျင်သူသည် ဝတ်ရုံနက်ကို ဝတ်ဆင်လိုက်သည်။

ညမှောင်ရီတွင် သူသည် လမ်းကြားလေးတစ်ခုသို့ လျင်မြန်စွာ ရောက်ရှိသွားသည်။

ထိုနေရာတွင် လူတစ်ယောက်က စောင့်နေ​၏။

ရွှီကျွင်းကို မြင်သောအခါ ထိုသူက ချက်ချင်း ရယ်မောလိုက်သည်။

"ကောင်းတယ်၊ ယွမ်မင်းဆက်က မင်းရဲ့ စွမ်းဆောင်မှုကို မှတ်မိနေမှာပါ"

"နောင်တစ်ချိန်မှာ မင်း ထိုက်တန်တဲ့ ဆုလာဘ်တွေကို ရလိမ့်မယ်"

ရွှီကျွင်းက နှာခေါင်းတစ်ချက် ရှုံ့လိုက်ပြီး ဘာမှ ပြန်မပြောပေ။

ထိုဝတ်ရုံနက်နှင့်လူသည် စိတ်မဆိုးဘဲ ရှေးဟောင်းစာအုပ်တစ်အုပ်ကို ထုတ်ပေးလိုက်သည်။

"မင်း ပထမတစ်ဝက်ကို တတ်မြောက်သွားပြီဆိုတော့ အခု ကျန်တဲ့အပိုင်းကို ပေးရမယ့်အချိန်ပဲ"

"မင်းရဲ့ သွေးမျိုးဆက် နိုးထလာတဲ့အခါ မင်း ဘယ်လောက်အထိ အစွမ်းထက်လာမလဲဆိုတာကို ငါ တကယ် မျှော်လင့်နေမိတယ်"

"ကျေးဇူးပဲ"

ခဏမျှ တိတ်ဆိတ်သွားပြီးနောက် ရွှီကျွင်းသည် ခေါင်းငြိမ့်ကာ လမ်းကြားထဲမှ ထွက်ခွာသွားသည်။

ထွက်ခွာသွားသော ကျောပြင်ကို ကြည့်ရင်း ဝတ်ရုံနက်နှင့်လူက ပို၍ ကျယ်လောင်စွာ ရယ်မောလိုက်​၏။

"ငါ မျှော်လင့်နေတယ်..."

အခန်း ၃၃၄ - အနောက်ဘက်ဒေသများအကြောင်း ဆွေးနွေးခြင်း

ဝူတန်တောင်၏ တောင်တံခါးဝတစ်ခုလုံးသည် တိတ်ဆိတ်ငြိမ်သက်နေ၏။

အခြားဂိုဏ်းများနှင့်မတူဘဲ ဝူတန်ဂိုဏ်း၏ ဂုဏ်သတင်းမှာ မကြာသေးမီနှစ်များအတွင်း အရှိန်အဟုန်ဖြင့် တိုးတက်လာခဲ့သည်။

၎င်း၏ အကြောင်းရင်းတစ်ခုမှာ ချန်အာကော နှင့် လင်ချွမ် ဟူသော ပြိုင်ဘက်ကင်းပညာရှင် နှစ်ဦး ပေါ်ထွက်လာခြင်းကြောင့်ဖြစ်သည်။

ထို့ကြောင့် သူတို့၏ အင်အားမှာ ယှဉ်နိုင်သူမရှိဘဲ သိုင်းပညာစွမ်းရည်မှာလည်း အနှိုင်းမဲ့ ဖြစ်နေတော့​၏။

ဒုတိယအကြောင်းရင်းမှာ အရှေ့တရုတ်ပင်လယ်တွင် ဖြစ်ပွားခဲ့သော ယခင်တိုက်ပွဲကြောင့်ပင်။

ထိုစဉ်က အဓိကသိုင်းဂိုဏ်းကြီးအများအပြားသည် တိုက်ပွဲဝင်ရန် တောင်းဆိုမှုကို တုံ့ပြန်ခဲ့ကြသော်လည်း လက်တွေ့တွင် ထိပ်တန်းတိုက်ခိုက်ရေးသမား အများစုမှာ သူတို့၏အင်အားကို ချန်ထားခဲ့ကြခြင်း သို့မဟုတ် ရှုပ်ထွေးနေသော အခြေအနေကို အခွင့်ကောင်းယူခဲ့ကြခြင်းသာ။

ထို့ကြောင့် ၎င်းသည် မင်မင်းဆက် နှင့် တရားမျှတသော မဟာမိတ်အဖွဲ့ တို့အတွက် ကြီးမားသော ဆုံးရှုံးမှုများကို ဖြစ်ပေါ်စေခဲ့သည်ဟု ဆိုနိုင်သည်။

ထိုစစ်ပွဲအတွင်း ဂိုဏ်းအနည်းငယ်သာလျှင် သူတို့၏ တာဝန်ယူမှုနှင့် ကတိကဝတ်များကို ပြသကာ စစ်မှန်သော ကြီးမြတ်မှုကို သက်သေထူနိုင်ခဲ့ကြသည်။

၎င်းတို့အနက် ဝူတန်ဂိုဏ်းမှာ သဘာဝကျကျပင် ပထမနေရာတွင် ရှိနေခြင်း။

ယွဲ့ချင်းရို ၏ နောက်ဆုံးမိနစ် ကယ်ဆယ်ရေး ဖြစ်စေ၊ အကြီးအကဲ ရှီယွမ် နှင့် အခြားသူများ၏ ဒီရေလှိုင်းကို ပြောင်းပြန်လှန်နိုင်ခဲ့သော ကြိုးပမ်းမှုများဖြစ်စေ လူအများအပေါ် အလွန်ကောင်းမွန်သော အထင်အမြင်များကို ချန်ထားရစ်ခဲ့သည်။

ဝေဝမ်ပင်လျှင် ထိုအဖြစ်အပျက်ကြီးကို ကြုံတွေ့ပြီးနောက် ကျန်းဟယ် နှင့် ပူးပေါင်းရန် ဆုံးဖြတ်ခဲ့သည်။

သူတို့၏ အစီအစဉ်မှာ အဓိကသိုင်းဂိုဏ်းကြီးများ၏ အင်အားကို လျှော့ချရန်။

ကန့်သတ်ချက်များ သတ်မှတ်ရန်နှင့် နောက်ဆုံးတွင် ၎င်းတို့အား နန်းတော်၏ ထိန်းချုပ်မှုအောက်သို့ သွတ်သွင်းရန် ဖြစ်သည်။

သို့သော် သူသည် ဝူတန်ဂိုဏ်းအပေါ်တွင်မူ မည်သည့်မကောင်းသော အကြံအစည်မျှ မရှိခဲ့ပေ။

ရလဒ်အနေဖြင့် ဝူတန်​၏ ဂုဏ်သတင်းမှာ ထိုနှစ်တွင် အမြင့်ဆုံးသို့ ရောက်ရှိသွားခဲ့သည်။

ဝူတန်ဂိုဏ်း၏ ဘေးဆောင်ခန်းမအတွင်း၌မူ တောင်တံခါးဝ၏ ခြောက်ကပ်နေမှုနှင့် ဆန့်ကျင်ဘက်ဖြစ်ကာ ယခုအခါ ထိပ်တန်းဂိုဏ်းများမှ ပညာရှင် တစ်ဆယ်ကျော်နှင့် ပြည့်နှက်နေလေ​၏။

စားပွဲ၏ ထိပ်ဆုံးနေရာတွင် အိမ်ရှင်ဖြစ်သူ ယင်ဟွိုက်ယွီ၊ လင်ယန်ရွှယ် နှင့် ယွဲ့ချင်းရို တို့ကဲ့သို့ အဓိကပညာရှင်များ ထိုင်နေကြသည်။

ဓမ္မဓိဋ္ဌာန်ကျကျ ပြောရလျှင် လင်ယန်ရွှယ်နှင့် အခြားသူများသည် ဝူတန်ဂိုဏ်းဝင်များ မဟုတ်ကြချေ။

ထိုသို့သော အခြေအနေမျိုးတွင် သူတို့ ပေါ်မလာသင့်ပေ။

ပေါ်လာလျှင်ပင် အဓိကနေရာတွင် မရှိသင့်ပေ။

သို့သော် လက်တွေ့တွင် လူအနည်းငယ်မှလွဲ၍ လူအများစုမှာ လင်ချွမ်နှင့် အခြားသူများ၏ ဆက်ဆံရေးကို သိရှိကြသဖြင့် မည်သူမျှ ဤကိစ္စကို မေးခွန်းထုတ်ခြင်း မရှိကြပေ။

"လူကြီးမင်းတို့ခင်ဗျား... ကျွန်တော် ခင်ဗျားတို့ကို ဖိတ်ကြားရတဲ့ အကြောင်းရင်းကိုတော့ အရင်စာထဲမှာ ရှင်းပြထားပြီးသားဖြစ်ပါတယ်"

"တကယ်လို့ ဒါနဲ့ပတ်သက်ပြီး သံသယရှိသေးတယ်ဆိုရင် လွတ်လွတ်လပ်လပ် မေးမြန်းနိုင်ပါတယ်"

ဘယ်ဘက်မှ တတိယနေရာတွင် ထိုင်နေသော မျက်ခုံးဖြူနှင့် အဖိုးအိုတစ်ဦးက လက်ကို ဖြည်းညှင်းစွာ မြှောက်လိုက်သည်။

လူတိုင်း၏ အာရုံစိုက်မှု ရရှိပြီးနောက် သူက မေးခွန်းထုတ်လေ​၏။

"ချွမ်ရွှယ်ဂိုဏ်းချုပ်ဆီက စာအရဆိုရင် အနောက်ဘက်ဒေသက လူတွေက အဓိကသိုင်းဂိုဏ်းတွေကို ထိန်းချုပ်ဖို့ အလယ်ပိုင်းဒေသကို ကျူးကျော်လာတယ်လို့ ဆိုတယ်၊ အဲဒါအတွက် ဘာသက်သေရှိလို့လဲ"

ထိုအခါ လင်ယန်ရွှယ်က တည်ငြိမ်စွာ ပြန်လည်ဖြေကြားသည်။

"ချွမ်ရွှယ်ဂိုဏ်းက တပည့်အများအပြား ဒါကို သက်သေခံနိုင်ပါတယ်"

အကြီးအကဲ မျက်ခုံးဖြူက ခေါင်းခါလိုက်ပြီး

"ချွမ်ရွှယ်ဂိုဏ်းက နတ်ဆိုးဂိုဏ်းပဲ၊ အနှစ်မရှိတဲ့ ကတိတွေပေးတတ်ပြီး ယုံရခက်တယ်"

ထိုစကားကို ကြားသောအခါ လင်ယန်ရွှယ် မျက်မှောင်ကြုတ်သွားပြီး

"တောင်တံခါးဝ အပြင်ဘက်မှာ တိုက်ပွဲဖြစ်ပွားခဲ့တဲ့ လက္ခဏာတွေ ရှိနေပါတယ်၊ ဒါကို ဝူတန်ရဲ့ အကြီးအကဲတွေကလည်း အတည်ပြုပေးထားပါတယ်"

"ဒါတွေဟာ သက်သေတွေပါပဲ၊ မျက်ခုံးဖြူအကြီးအကဲ... ဒီကိစ္စဟာ နတ်ဆိုးဂိုဏ်း ဟုတ်မဟုတ်နဲ့ မဆိုင်ပါဘူး၊ လက်ရှိကိစ္စကိုပဲ ဆွေးနွေးပေးပါ"

အခြားတစ်ဖက်သား၏ မျက်နှာတွင် အထင်အမြင်သေးသော အမူအရာကို မြင်သောအခါ အိမ်ရှင်၏ မျက်လုံးများတွင်လည်း မကျေနပ်သည့် အရိပ်အယောင်များ ပေါ်လာပြီး ချက်ချင်းပင် ဝင်ပြောလေသည်။

"အကြီးအကဲ မျက်ခုံးဖြူက ချွမ်ရွှယ်ဂိုဏ်းကို မယုံတာလား၊ ဒါမှမဟုတ် ဝူတန်ကိုပဲ မယုံတာလား"

"ကျွန်တော့်တပည့်တွေနဲ့ အကြီးအကဲတွေ အားလုံး စုံစမ်းစစ်ဆေးပြီး ဒါဟာ မှန်ကန်ကြောင်း အတည်ပြုပြီးသားပါ"

"အကြီးအကဲက ခင်ဗျားတို့ဂိုဏ်းကို ကိုယ်စားပြုတာဖြစ်လို့ နားလည်မှုမလွဲအောင် စကားကို ဆင်ခြင်ပေးပါ"

အိမ်ရှင်၏ ပြစ်တင်ဝေဖန်မှုကို ခံရပြီးနောက် အကြီးအကဲ မျက်ခုံးဖြူ၏ မျက်နှာမှာ အနည်းငယ် ပျက်သွား​၏။

သို့သော် အမှန်တရားမှာ သူတို့လက်ထဲတွင် မရှိဘဲ ဝူတန်ဂိုဏ်းက အာမခံထားခြင်းပင်။

ချွမ်ရွှယ်ဂိုဏ်းမှာ မူလက နတ်ဆိုးဂိုဏ်းဖြစ်သော်လည်း ဤအခြေအနေတွင် ၎င်း၏ ရပ်တည်ချက်ကို မည်သူမျှ မလှုပ်ခါနိုင်ပေ။

သူ နှုတ်ပိတ်သွားသည်ကို မြင်သောအခါ အိမ်ရှင်က အခန်းထဲကို တစ်ချက်ဝေ့ကြည့်ကာ မေးလိုက်သည်။

"မိတ်ဆွေတို့... တခြားမေးစရာ ရှိပါသေးလား"

"ဒီကိစ္စက အရမ်းအရေးကြီးပါတယ်၊ ဂိုဏ်းချုပ်လင်ကိုယ်တိုင်တောင် ပြင်းထန်တဲ့ ဒဏ်ရာတွေ ရခဲ့ပါတယ်"

"တပည့်တွေနဲ့ အစောင့်အရှောက်တွေ အသက်စွန့်ပြီး သတင်းပို့ခဲ့တာကြောင့်သာ မဟုတ်ရင် ကျွန်တော်တို့တွေ အမှောင်ထဲမှာ ရှိနေပြီး ကယ်ဆယ်ဖို့ အချိန်မီမှာ မဟုတ်ပါဘူး"

"အနောက်ဘက်သားတွေ နောက်တစ်ခါ ထပ်လာရင် ဂိုဏ်းတစ်ခုလုံး ပြုတ်ပြုတ်ပြုန်းသွားနိုင်တယ်၊ ဒါက မဖြစ်နိုင်တာ မဟုတ်ဘူး"

ထိုစကားကို ကြားသောအခါ အခြားပညာရှင်များအားလုံးက သဘောတူညီစွာ ခေါင်းညိတ်ကြသည်။

"ဒါပေမဲ့ အဲဒီ အနောက်ဘက်ဒေသဆိုတာ ဘယ်နားမှာလဲ၊ သူတို့ ဘယ်တော့ ရောက်လာမှာလဲ"

အိမ်ရှင်မှာ အံ့အားသင့်သွားပြီး မေးခွန်းမေးသူကို ကြည့်လိုက်​၏။

ထိုသူမှာ ပိန်ပိန်ပါးပါး အသားညိုညိုဖြစ်ပြီး တစ်နှစ်ပတ်လုံး လယ်ကွင်းထဲတွင် အလုပ်လုပ်နေရသူနှင့် တူသည်။

အိမ်ရှင်က သူ့ကို ခေါင်းညိတ်ပြကာ အနည်းငယ် ဦးညွှတ်နှုတ်ဆက်ပြီး ရှင်းပြလေသည်။

"ဒီအနောက်ဘက်က ဧည့်သည်တွေဟာ သဲကန္တာရရဲ့ အလွန်ကနေ လာတာပါ"

"သူတို့မှာ ပြာလွင်တဲ့ မျက်လုံးတွေနဲ့ မြင့်မားတဲ့ နှာခေါင်းတွေ ရှိကြတယ်၊ သူတို့ရဲ့ ရုပ်ရည်က တော်တော်လေး ထူးဆန်းတယ်"

"သူတို့ပြောတဲ့ ဘာသာစကားဟာ မင်မင်းဆက်က ဘာသာစကားနဲ့ လုံးဝကွာခြားတယ်"

"သူတို့ရဲ့ နည်းစနစ်တွေက သိုင်းပညာတွေ ဖြစ်ပေမဲ့ ကွဲပြားတဲ့ လမ်းကြောင်းကို သွားကြတယ်"

"အသေးစိတ် အခြေအနေကို သိရဖို့ အကြီးအကဲလင်ကို စုံစမ်းဖို့ လွှတ်ထားတာ အခုဆိုရင် တစ်နှစ်ကျော်ပြီ"

ထိုသို့ပြောရင်း အိမ်ရှင်က မျက်မှောင်ကြုတ်လိုက်ရာ အနည်းငယ် စိုးရိမ်နေပုံရ​၏။

အကယ်၍ လင်ချွမ်သာ တစ်နှစ်ပတ်လုံး ပျောက်မနေခဲ့လျှင် သတင်းပြန်မလာသော်လည်း သူတို့ ဤမျှ စိုးရိမ်မည် မဟုတ်ပေ။

လင်ချွမ် မထွက်ခွာမီက အနောက်ဘက်ဒေသရှိ ဂိုဏ်းများ၏ အခြေအနေကို စုံစမ်းရန်နှင့် ကလဲ့စားချေရန် သွားမည်ဟု ပြောခဲ့ခြင်း။

သို့သော် သတင်းအစအနမရှိဘဲ တစ်နှစ်ကုန်ဆုံးသွားခဲ့ပြီ။

ဓားနတ်ဘုရား ပင်လျှင် အတူတူ ဖြစ်သည်။

ဤသို့သော အခြေအနေမျိုးတွင် မည်သူမဆို စိုးရိမ်ကြမည်ပင်။

ထို့ကြောင့် အချိန်အတော်ကြာ စောင့်ဆိုင်းပြီးနောက် အခြေအနေကို လေ့လာရန် ဂိုဏ်းကြီးများကို စုဝေးစေရန် ဆုံးဖြတ်ခဲ့ကြခြင်း ဖြစ်သည်။

လင်ချွမ် သွားနှင့်ပြီဖြစ်ကြောင်း သိရသောအခါ အကြီးအကဲများအားလုံး သက်ပြင်းချနိုင်သွားကြသည်။

လင်ချွမ်​၏ စွမ်းရည်ကို သူတို့အားလုံး သိထားကြ​၏။

သူသည် ထိပ်တန်းအဆင့်တွင် ရှိသည်ဟု ယူဆရသော ဆရာတစ်ဦး ဖြစ်သဖြင့် သူ့လက်ချက်နှင့်ဆိုလျှင် အခြေအနေမှာ လုံးဝ ဘေးကင်းနိုင်သည်ဟု ထင်ကြသည်။

ထို့ကြောင့် အကြီးအကဲများ စိတ်လှုပ်ရှားလာကြပြီး စစ်ချီရန် အဆင်သင့်ရှိကြောင်း အကြံပြုချက်များ ပေးလာကြသည်။

သို့သော် သူတို့ စိတ်လှုပ်ရှားနေစဉ်မှာပင် တောင်ခြေတွင် လူရိပ်တစ်ခု ပေါ်လာခဲ့​၏။

ထိုသူမှာ မျက်နှာတစ်ဝက်ကို မျက်နှာဖုံးစွပ်ထားပြီး ရိုးရိုးရှင်းရှင်း ရုပ်ရည်ရှိကာ လူအုပ်ထဲရောက်လျှင် ရှာမတွေ့နိုင်သော အမျိုးအစား ဖြစ်သည်။

သူ၏ ကိုယ်ပေါ်တွင် ဝတ်ရုံနက်ကို ခြုံထားပြီး တောင်တံခါးဝသို့ ရောက်သောအခါ တံခါးစောင့်အား တိုက်ရိုက်ပြောလိုက်သည်။

"လင်ချွမ်ကို ထွက်လာခဲ့ဖို့ သွားပြောလိုက်၊ ဟေးချင်း သူ့ကို လာတွေ့တယ်လို့ ပြောလိုက်"

တောင်ခြေရှိ တပည့်များ ကြောင်အမ်းအမ်းဖြစ်ကာ ဝေခွဲမရဖြစ်နေသည်ကို မြင်သောအခါ ဟေးချင်းက ပြုံးလျက် ခေါင်းခါလိုက်သည်။

သူ၏ ခန္ဓာကိုယ်မှာ ရုတ်တရက် ဖောင်းကားလာပြီး ကြီးမားသော အရိပ်ကြီးတစ်ခုအဖြစ် ပြောင်းလဲသွား​၏။

တစ်ချိန်တည်းမှာပင် သူ၏ အတွင်းအားဖြင့် ဟိန်းဟောက်သံမှာ တောင်တစ်ခုလုံးသို့ ပျံ့နှံ့သွားလေသည်။

"လင်ချွမ်....ထွက်လာပြီး ငါနဲ့တွေ့စမ်း"

ထိုအသံမှာ တောင်တစ်ခုလုံးတွင် ပဲ့တင်ထပ်သွားပြီး ပညာရှင်များစွာကို အံ့အားသင့်သွားစေသည်။

ဟေးချင်း ဟူသော အမည်ကို ကြားသောအခါ အဓိကနေရာတွင် ထိုင်နေသော ယွဲ့ချင်းရို နှင့် လင်ယန်ရွှယ် တို့မှာ တုန်လှုပ်သွားကြသည်။

သူတို့ ထိတ်လန့်တကြား ထရပ်လိုက်ကြရာ အချင်းချင်း၏ မျက်လုံးများထဲတွင် စိုးရိမ်ထိတ်လန့်မှုကို မြင်နေရသည်။

အိမ်ရှင်မှာလည်း လုံးဝ ဝေခွဲမရဖြစ်သွားပြီး မေးလိုက်သည်။

"ဂိုဏ်းချုပ်လင်... ဒီ ဟေးချင်း ဆိုတာ ဘယ်သူလဲ"

"သူက ချိပ်ပိတ်ခံထားရတဲ့ ရှေးဟောင်း သိုင်းပညာရှင်တစ်ယောက်ပဲ"

"လင်ချွမ်က သူ့ကို ကယ်တင်ပြီး လွှတ်ပေးခဲ့တာ၊ ဒါပေမဲ့ ဒီလူက ကျေးဇူးမသိတတ်တဲ့သူပဲ"

ထိုစကားကို ကြားသောအခါ အခန်းထဲရှိ လူအားလုံးသည် နောက်ထပ်ပြောရန် မလိုတော့ဘဲ အခြေအနေကို နားလည်သွားကြလေတော့သည်။