တာအိုကျင့်စဉ် သုံးမျိုး

အဖိုးအို၏ ပြောပြချက်အရ လွန်ခဲ့သော နှစ်ပေါင်းသန်းနှင့်ချီသည့် ကမ္ဘာကြီးတစ်ခုမှာ ထန်ထျန်း၏ မျက်စိရှေ့တွင် တဖြည်းဖြည်း ပေါ်လာတော့သည်။

ထိုစဉ်က ကျင့်ကြံခြင်း ယဉ်ကျေးမှုမှာ အလွန်တရာ အထွတ်အထိပ်သို့ ရောက်ရှိနေပြီး ကမ္ဘာအသီးသီးတွင် အလွန်အစွမ်းထက်သော ထိပ်တန်းပညာရှင်ကြီးများစွာ ပေါ်ထွက်ခဲ့ကြသည်။

တာအိုအဆင့် ပညာရှင်များမှာ ရှားပါးလှသည်မဟုတ်ပေ။

ကျိကျွင်းများပင်လျှင် သူတို့အုပ်စိုးသည့် ကမ္ဘာတစ်ခုတည်းကိုသာ စိုးမိုးနိုင်ကြပြီး ယခုခေတ်ကဲ့သို့ ကျိကျွင်းတစ်ပါး၏ လက်အောက်တွင် ကမ္ဘာပေါင်း ဆယ်ဂဏန်းအထိ ရှိနေခြင်းမျိုး မဟုတ်ပေ။

ထိုစဉ်က အချို့သော ကမ္ဘာများတွင် ကျိကျွင်းနှစ်ပါး၊ သုံးပါးအထိပင် ရှိခဲ့ကြသည်။

ထိုသို့ အစွမ်းထက်သူများ ပေါများလှသည့်ကြားမှ ယွီဟွားအင်မော်တယ် နိုင်ငံမှာ ထိုခေတ်က စကြဝဠာအနန္တတွင် ထိပ်တန်းအကျဆုံး ဖြစ်ခဲ့ပြီး ၎င်း၏ သြဇာအာဏာမှာ ကမ္ဘာပေါင်းများစွာ၏ ထက်ဝက်နီးပါးအထိ လွှမ်းမိုးခဲ့သည်။

ကျိကျွင်းအဆင့် ပညာရှင်များမှာလည်း နေရာအနှံ့ရှိနေပြီး အစွမ်းအထက်ဆုံး ဖြစ်သော 'ယွီဟွားဘိုးဘေးခြောက်ဦး' မှာမူ ဝူရှန့် ကျိကျွင်းအဆင့်သို့ ရောက်ရှိကာ စကြဝဠာအနန္တ၏ ထိပ်ဆုံးတွင် အမှန်တကယ် ရပ်တည်နိုင်ခဲ့ကြသည်။

ယခင်က ယွီဟွားအင်မော်တယ် နိုင်ငံ၏ အတိုင်းအဆမရှိ ကြီးကျယ်ခမ်းနားမှုကို ဖော်ပြရန်မှာ လုံးဝ ပိုပြောခြင်းမဟုတ်ပေ။

ထန်ထျန်း မြင်တွေ့နေရသော ဤအဖိုးအိုမှာ ထိုစဉ်က ယွီဟွားဘိုးဘေး ခြောက်ဦးထဲမှ တစ်ဦးဖြစ်ပြီး ဘွဲ့အမည်မှာ ပိုင်ရွှီဘိုးဘေး ပင် ဖြစ်သည်။

သို့သော် မည်မျှပင် အစွမ်းထက်သည့် တည်ရှိမှုမျိုး ဖြစ်ပါစေ၊ အထွတ်အထိပ်သို့ ရောက်ပြီးလျှင် ဆုတ်ယုတ်ရမည်ဟူသော နိယာမမှ လွတ်မြောက်နိုင်ပုံမရပေ။

ယွီဟွားအင်မော်တယ် နိုင်ငံက စကြဝဠာအနန္တ၏ ထိပ်ဆုံးတွင် ရပ်တည်နေချိန်၌ သူတို့က ဤကမ္ဘာကြီး၏ အခြေခံအကျဆုံး အရာများအပေါ် စိတ်ဝင်စားလာခဲ့ကြသည်။

မူလဝိညာဉ်ငါးပါး ဖြစ်သော နေ၊ လ၊ ကြယ်တာရာ၊ ကောင်းကင်တာအိုနှင့် ကမ္ဘာ့စိတ်ဆန္ဒ တို့မှာ အမြဲတမ်း အားကောင်းလှသဖြင့် သူတို့က ထိုအရာများကို ရယူရန် မရည်ရွယ်ခဲ့ကြပေ။

သို့သော် မူလ အထွတ်အထိပ်ရတနာ ၅ ပါး ဖြစ်သော ကောင်းကင်ခွဲဓား၊ ဟင်းလင်းပြင် ခေါင်းလောင်း၊ ကျန်းရှီတံဆိပ်တုံး၊ ထာဝရကြေးမုံ နှင့် ကြေးနီဒယ်ဆောက် အိုး တို့မှာမူ နှစ်ကာလ ရှည်ကြာစွာ တိုက်ပွဲများ ဖြစ်ပွားခဲ့ပြီးနောက် မူလစွမ်းအားများ ကုန်ဆုံးနေကြပြီ ဖြစ်သည်။

ကောင်းကင်ခွဲဓားက ဟင်းလင်းပြင်အဝေးသို့ ထွက်ခွာသွားပြီး ထာဝရကြေးမုံက လုံးဝ ပုန်းကွယ်သွားခဲ့သည်။ ကျန်ရှိသော အထွတ်အထိပ်ရတနာ ၃ ပါးမှာမူ ရှေးယခင်က ကြောက်မက်ဖွယ် တည်ရှိမှုကြီးများ၏ ဖျက်ဆီး ခြင်းကို ခံခဲ့ရသဖြင့် အစိတ်အပိုင်းများ ကွဲထွက်သွားခဲ့ရာ ၎င်းတို့ကို သိမ်းပိုက်ရန် အခွင့်အရေး အပြည့်အဝ ရှိနေခဲ့သည်။

ထို့ကြောင့် ယွီဟွားအင်မော်တယ် နိုင်ငံမှာ ၎င်းတို့အပေါ် အာရုံကျသွားခဲ့သည်။

ကြီးမားသော အင်အားနှင့် တိုက်ပွဲများစွာကို ရင်းနှီးခဲ့ရပြီးနောက် အင်မော်တယ် နိုင်ငံက မူလ အထွတ်အထိပ်ရတနာ ၃ မျိုးထဲမှ တစ်ခုဖြစ်သော ကျန်းရှီတံဆိပ်တုံး၏ အပိုင်းအစကို အောင်မြင်စွာ ရရှိခဲ့သည်။

၎င်းမှာ ကွဲထွက်သွားသော အစိတ်အပိုင်းများထဲမှ အကြီးဆုံး အပိုင်းအစ ဖြစ်သည်။

၎င်းကို ကျန်းရှီကျောက်စာတိုင်အဖြစ် သွန်းလုပ်ပြီးနောက် ယွီဟွားအင်မော်တယ် နိုင်ငံမှာ ၎င်း၏ ကြောက်မက်ဖွယ် စွမ်းအားကို အသုံးပြုကာ နောက်ထပ်တစ်ကြိမ် အရှိန်အဝါ အကြီးဆုံးသော အချိန်ကာလကို ပိုင်ဆိုင်ခဲ့ရပြန်သည်။

ထိုစဉ်က စကြဝဠာအနန္တ တစ်ခုလုံးတွင် ယွီဟွားအင်မော်တယ် နိုင်ငံကို ယှဉ်နိုင်သူ မရှိသလောက်ပင်။

သို့သော် လူတို့၏ လောဘမှာ အဆုံးမရှိပေ။

ဤမူလ အထွတ်အထိပ်ရတနာကို ရရှိပြီးနောက် ယွီဟွားဘိုးဘေး ခြောက်ဦးမှာ ကျင့်ကြံခြင်း၏ နောက်ဆုံးပန်းတိုင်ကို မျှော်မှန်းခဲ့ကြသည်။

ယုံဟန်ကျိကျွင်း

၎င်းမှာ ဒဏ္ဍာရီလာ အဆင့် တစ်ခုဖြစ်ပြီး ကမ္ဘာကြီး၏ အဆုံးစွန်ဟု ခေါ်ဆိုနိုင်သည်။

ကမ္ဘာကြီး စတင်ဖန်တီးကတည်းက ဤအဆင့်သို့ ရောက်ရှိနိုင်သော သတ္တဝါမှာ လက်ချိုးရေတွက်၍ ရသည်အထိ နည်းပါးလှပြီး အားလုံးမှာလည်း မရေမရာ တည်ရှိမှုများသာ ဖြစ်ကြသည်။

ယုံဟန်ကျိကျွင်း အဆင့်သို့ အမှန်တကယ် ရောက်ရှိကြောင်း အတည်ပြုနိုင်သူများမှာ မူလ အထွတ်အထိပ်ရတနာ ၅ ပါးနှင့် မူလဝိညာဉ် ၅ ပါးတို့သာ ရှိသည်။

လောကတွင် ပျံ့နှံ့နေသော ဒဏ္ဍာရီတစ်ခု ရှိသည်။ အကယ်၍ သက်ရှိတစ်ဦးက ဤအဆင့် သို့ ရောက်ရှိသွားပါက သူ၏ ခွန်အားမှာ မူလရတနာများနှင့် မူလဝိညာဉ်များထက်ပင် ပိုမိုအားကောင်းလာမည်ဖြစ်ပြီး ကမ္ဘာကြီးတစ်ခုလုံး၏ အထက်တွင် အမှန်တကယ် ရပ်တည်နိုင်မည် ဖြစ်သည်။

ဝူရှန့် ကျိကျွင်းအဆင့်သို့ ရောက်ရှိနေသော ယွီဟွားဘိုးဘေး ခြောက်ဦးမှာ ဤအခွင့်အရေးကို လက်လွှတ်မခံလိုသဖြင့် ကြိုးစားရန် ဆုံးဖြတ်ခဲ့ကြသည်။

နောက်ဆုံးတွင် သူတို့က နည်းလမ်းတစ်ခုကို ကြံစည်ခဲ့ကြသည်။ ၎င်းမှာ သတ္တဝါပေါင်းစုံ၏ သွေးနှင့် ဝိညာဉ်များကို အသုံးပြုကာ ကောင်းကင်တာအိုကို ပြောင်းပြန်လှန်ပြီး ကျန်းရှီကျောက်စာတိုင်ကို ပြန်လည်ညစ်ညမ်းစေရန် ဖြစ်သည်။ ထိုမှတစ်ဆင့် ကျောက်စာတိုင်၏ စိတ်ဆန္ဒကို ဖျက်ဆီးကာ ၎င်းအတွင်းမှ မူလစွမ်းအားများနှင့် နိယာမများကို ထုတ်ယူရန် ရည်ရွယ်ခဲ့ခြင်းဖြစ်သည်။

ဤရည်ရွယ်ချက်အတွက် သူတို့က စကြဝဠာအနန္တတွင် ရက်စက်ကြမ်းကြုတ်သော စစ်ပွဲများကို ဆင်နွှဲခဲ့ကြသည်။ မရေမတွက်နိုင်သော သတ္တဝါများကို မြေအောက်ကမ္ဘာ၏ ထိုသွေးကန်ရှိရာသို့ ပို့ဆောင်ကာ ယဇ်ပူဇော်ခဲ့ကြသည်။

ကမ္ဘာများစွာမှာလည်း သတ္တဝါတစ်ကောင်မှ မကျန်တော့ဘဲ သေဆုံးနေသော ကမ္ဘာများအဖြစ် ပြောင်းလဲသွားခဲ့ရသည်။

မည်မျှသော ကမ္ဘာများကို သိမ်းပိုက်ခဲ့ရသည် မသိသော်လည်း နောက်ဆုံးတွင် သူတို့ လိုချင်သော ရလဒ်ကို မြင်တွေ့ခဲ့ရသည်။

ကျန်းရှီကျောက်စာတိုင်၏ စိတ်ဆန္ဒမှာ ပြိုကွဲသွားခဲ့ပြီး ကြောက်မက်ဖွယ်ကောင်းသော ဖန်ဆင်းခြင်းစွမ်းအားများ ထွက်ပေါ်လာခဲ့သည်။

သို့သော် ထိုအချိန်က မည်သူမျှ မထင်မှတ်ထားခဲ့သည်မှာ ဤအရာက ယွီဟွားအင်မော်တယ် နိုင်ငံကို အစအနမကျန် ပြာဖြစ်သွားစေလိမ့်မည် ဟူ၍ပင်။

"ဖန်ဆင်းခြင်းစွမ်းအား ဆိုတာ သက်ရှိတွေ ထိန်းချုပ်နိုင်တဲ့ အရာမျိုး မဟုတ်ဘူး။ ငါတို့ သတိထားမိတဲ့အချိန်မှာ အရမ်းနောက်ကျသွားပြီ"

ပိုင်ရွှီဘိုးဘေးက တိုးညှင်းစွာ ပြောလိုက်သည်။ "ငါတို့ ခြောက်ယောက်လုံး အစွမ်းကုန် ကြိုးစားခဲ့ကြပေမဲ့ အဲဒီစွမ်းအား ပေါက်ကွဲထွက်လာတာကို မတားဆီးနိုင်ခဲ့ဘူး"

"အဲဒီနောက်မှာ ဖန်ဆင်းခြင်းစွမ်းအားတွေက ယွီဟွားလောက တစ်ခုလုံးကို လွှမ်းခြုံသွားပြီး မျက်စိတစ်မှိတ်အတွင်းမှာပဲ အရာအားလုံးကို ဖျက်ဆီးပစ်လိုက်တော့တာပဲ"

"အင်မော်တယ် နိုင်ငံရဲ့ အမွေအနှစ်တွေ၊ မရေမတွက်နိုင်တဲ့ သတ္တဝါတွေ၊ ကောင်းကင်တာအို နိယာမတွေနဲ့ အရာအားလုံးက ခဏချင်းမှာပဲ ပြာဖြစ်သွားခဲ့ရတယ်။"

"အဲဒီ ကြောက်စရာကောင်းတဲ့ စွမ်းအားရဲ့ ရိုက်ခတ်မှုအောက်မှာ ငါတို့ ခြောက်ယောက်ရဲ့ ဝိညာဉ်နဲ့ မူလအသက်စွမ်းအားတွေလည်း လျင်မြန်စွာ ပျက်စီးသွားခဲ့ရတယ်။ ဒါက ဘယ်လိုမှ ကုစားလို့မရတဲ့ အခြေအနေပဲ"

"နောက်ဆုံးမှာ ငါ့သူငယ်ချင်း ငါးယောက်လုံး လုံးဝ ပျောက်ကွယ်သွားခဲ့ပြီး ငါကတော့ ကျန်းရှီကျောက်စာတိုင်နဲ့ တစ်စိတ်တစ်ပိုင်း ပေါင်းစပ်မိသွားခဲ့လို့ ငါ့ရဲ့ စိတ်ဆန္ဒ တစ်စိတ်တစ်ပိုင်းက ကျောက်စာတိုင်ထဲမှာ ပိတ်လှောင်ခံလိုက်ရတာပဲ"

"ငါတို့ ကိုယ်တိုင် ဖန်တီးခဲ့တဲ့ အရာအားလုံးကို ငါတို့ ကိုယ်တိုင်ပဲ ပြန်ဖျက်ဆီးခဲ့ရတာကို ငါ့မျက်စိနဲ့ တပ်အပ် မြင်ခဲ့ရတယ်"

ပြောပြီးနောက် ပိုင်ရွှီဘိုးဘေးက နက်နက်ရှိုင်းရှိုင်း သက်ပြင်းချလိုက်သည်။

သူ၏ မျက်ဝန်းထဲတွင် ထန်ထျန်းက အဆုံးမရှိသော နောင်တနှင့် အပြစ်ရှိစိတ်များကို မြင်တွေ့လိုက်ရသည်။

အကယ်၍ ပိုင်ရွှီဘိုးဘေးသာ အချိန်ပြန်လှည့်ခွင့် ရမည်ဆိုပါက ဤလမ်းကို တစ်ဖန် ရွေးချယ်တော့မည် မဟုတ်ကြောင်း သူ ယုံကြည်သည်။

သို့သော် လက်တွေ့တွင် 'အကယ်၍' ဆိုသည်မှာ မရှိပေ။

နှစ်ကာလ အရှည်ကြီးအတွင်း၌ မရေမတွက်နိုင်သော သတ္တဝါများမှာ အထွတ်အထိပ်သို့ တက်လှမ်းရန် ကြိုးစားရင်း လမ်းခုလတ်တွင် သေဆုံးခဲ့ကြရသည်။

ဤသည်မှာ ကံကြမ္မာပင် ဖြစ်ကာ ရှောင်လွှဲ၍ မရနိုင်သော ကံကြမ္မာပင်။

တိတ်ဆိတ်နေသော ပိုင်ရွှီဘိုးဘေးကို ကြည့်ရင်း ထန်ထျန်းက. ဖြေးဖြေးချင်း ပြောလိုက်သည်။ "အတိတ်က ကိစ္စတွေက ပြီးသွားပါပြီ"

"အဖိုးလည်း စိတ်လျှော့လိုက်ပါတော့"

ဤကဲ့သို့သော ကိစ္စမျိုးကို သူလည်း မည်သို့ နှစ်သိမ့်ရမည် မသိပေ။

အတိအကျ ပြောရလျှင် ပိုင်ရွှီဘိုးဘေးတို့မှာ သူတို့ ကိုယ်တိုင် လုပ်ခဲ့သည့် အကျိုးကို ခံစားနေရခြင်းပင်။

သို့သော် ထန်ထျန်း၏ စကားကို ကြားပြီးနောက် ပိုင်ရွှီဘိုးဘေးက ခေါင်းပြန်မော့လာကာ ပြုံးလိုက်ပြီး ပြောသည်။ "ငါ ပိုင်ရွှီဆိုတဲ့သူက နှစ်ပေါင်း သောင်းနဲ့ချီပြီး စကြဝဠာမှာ ဝံ့ကြွားခဲ့တာ၊ အခုတော့ မျိုးဆက်သစ် လူငယ်လေး တစ်ယောက်ရဲ့ နှစ်သိမ့်မှုကို ခံနေရပါလား"

"တကယ်ပဲ ရယ်စရာကောင်းလိုက်တာ"

"ထားလိုက်ပါတော့၊ အဲဒီကိစ္စတွေက အတိတ်ဟောင်းတွေပဲ၊ ထပ်မပြောတော့ဘူး"

"မင်း တစ်ခုခု တောင်းဆိုပါ၊ အဲဒါက ပိုပြီး အကျိုးရှိလိမ့်မယ်"

ထန်ထျန်းက အနည်းငယ် ရှက်ကိုးရှက်ကန်းဖြင့် ပြောလိုက်သည်။ "ဒါပေမဲ့ ကျွန်တော် အဖိုးဆီက ဘာတောင်းရမလဲ တကယ် မသိဘူး ဖြစ်နေတယ်"

အတိအကျ ပြောရလျှင် စိတ်ဆန္ဒ တစ်စိတ်တစ်ပိုင်းသာ ကျန်တော့ပြီး ကျန်းရှီကျောက်စာတိုင်ထဲတွင် ပိတ်လှောင်ခံထားရသော ပိုင်ရွှီဘိုးဘေးက ဘာလုပ်ပေးနိုင်ဦးမလဲ ဆိုသည်ကို သူ မသိခြင်းဖြစ်သည်။

ပိုင်ရွှီဘိုးဘေးက ထန်ထျန်း၏ စိတ်ကို ရိပ်မိပုံရကာ တဟားဟား ရယ်မောလိုက်ပြီး ပြောသည်။ "ယွီဟွားအင်မော်တယ် နိုင်ငံ ဆိုတာ အထွတ်အထိပ်ကို ရောက်ခဲ့တာ၊ အမွေအနှစ်တွေကလည်း အနန္တပဲ"

"တခြားအရာတွေကို ထားလိုက်ဦး၊ အင်မော်တယ် နိုင်ငံရဲ့ လျှို့ဝှက်ကျင့်စဉ် တွေနဲ့ အင်မော်တယ်သိုင်းပညာတွေက တစ်ချိန်က စကြဝဠာအနန္တ တစ်ခုလုံးက လိုချင်တပ်မက်ခဲ့ကြတဲ့ အရာတွေပဲ"

"အဲဒီအထဲမှာ မူလ တာအိုကျင့်စဉ် တွေတောင် မနည်းဘူး"

"မင်းလည်း ဟိုကောင်လေးလိုပဲ ငါ့ဆီကနေ သိုင်းပညာ တချို့ သင်ယူသွားနိုင်တယ်။ မင်းအတွက် အကျိုးကျေးဇူး အများကြီး ရှိမှာပါ"

"ဒါပေမဲ့ ဘယ်လောက်အထိ သင်ယူနိုင်မလဲ ဆိုတာကတော့ မင်းရဲ့ ဉာဏ်အလင်းပွင့်မှု ပေါ်မှာပဲ မူတည်လိမ့်မယ်"

ဤစကားကို ကြားသောအခါ ထန်ထျန်း ချက်ချင်း မှင်တက်သွားသည်။

"ဘယ်သူလဲ"

ပိုင်ရွှီဘေးက ကျန်းရှီကျောက်စာတိုင် ခြေရင်းတွင် ထိုင်နေသော လုမင်၏ ခန္ဓာ အလွတ်ကို လက်ညှိုးထိုးပြလိုက်သည်။

"သူပေါ့"

"မင်းတို့ရဲ့ တချို့သော အငွေ့အသက်တွေကို ကြည့်ရရင် မင်းတို့က နေရာတစ်ခုတည်းက လာကြတာ မဟုတ်လား"

"နှစ်ပေါင်း တစ်ရာလောက် ကြာသွားပြီဆိုတော့ သူလည်း အခုလောက်ဆို ကြီးကျယ်တဲ့ အောင်မြင်မှုတွေ ရနေလောက်ပြီ"

"မင်းက သူ လမ်းညွှန်ပေးလို့ ဒီကို ရောက်လာတာ မဟုတ်ဘူးလား"

ထန်ထျန်းက ခေါင်းခါလိုက်သည်။

"မဟုတ်ပါဘူး၊ ကျွန်တော်နဲ့ သူက မရင်းနှီးပါဘူး"

"ပြီးတော့ သူက ဘာအောင်မြင်မှုမှလည်း မရခဲ့သလို လူအများစုက သူ့နာမည်ကိုတောင် မကြားဖူးကြပါဘူး"

ပိုင်ရွှီဘိုးဘေးက အနည်းငယ် အံ့သြသွားကာ "ဒါကတော့ တကယ် မထင်ထားတာပဲ"

"အဲ့တုန်းက သူ ငါ့ဆီကနေ အလွန်အားကောင်းတဲ့ တာအိုကျင့်စဉ် သုံးမျိုးကို သင်ယူသွားခဲ့တာလေ"

ထန်ထျန်း မျက်ခုံးပင့်မိသွားသည်။

"ဘယ်သုံးမျိုးလဲ"