စစ်ပွဲ စတင်တော့မယ်

ပတ်ဝန်းကျင်အခြေအနေ တိတ်ဆိတ်ငြိမ်သက်နေသည်။

သတ်ဖြတ်လိုခြင်း အငွေ့အသက်တစ်ခုက မိုးကောင်းကင်ယံကို ထွင်းဖောက်သွားပေ၏။

သို့သော် မည်သူကမျှ အချိန်အတော်ကြာသည်အထိ မလှုပ်ရှားခဲ့ကြချေ။

အနီရောင်နတ်ဆိုးခေါင်းဆောင် ချီဖန်းသည် ပတ်ဝန်းကျင်ကို ကြည့်ကာ ကျယ်လောင်သောအသံဖြင့် ပြောဆိုလိုက်သည်။

"လူတိုင်းပဲ... အစစ်အမှန်နတ်ဆိုးအမွေအနှစ်မှာ ပိုင်ရှင်ရှိနေပြီ...ဒီနေရာမှာရှိတဲ့ လူတိုင်းက အစစ်အမှန်နတ်ဆိုးအမွေအနှစ်အတွက် ရောက်နေကြတာလို့ ငါ ယုံကြည်တယ်..."

"အခု အစစ်အမှန်နတ်ဆိုးအမွေအနှစ် ပိုင်ရှင်က ရှိနေပြီဆိုတော့ မင်းတို့က ဘာကို စောင့်နေကြတာလဲ..."

"မင်းတို့က အတူပူးပေါင်းပြီးတော့ သူ့ကို တိုက်ခိုက်ပြီး အစစ်အမှန်နတ်ဆိုးအမွေအနှစ်ကို လုယူသင့်တယ်..."

သူသည် လူများအားလုံးကို ပိုင်လင်းအား အတူတကွ တိုက်ခိုက်ရန် လှုံ့ဆော်နေကြောင်း သိသာထင်ရှားသည်။

သူ၏စကားများတွင် လှုံ့ဆော်မှုနှင့် ရန်စမှုများ ပါဝင်နေပေ၏။

အမှန်တကယ်ကိုပင် လူအနည်းငယ်က စတင်၍ လှုပ်လှုပ်ယွယွ ဖြစ်လာခဲ့ကြသည်။

သို့သော် သူတို့သည် လှုပ်ရှားလိုသော စိတ်ဆန္ဒကို ချက်ချင်းဖိနှိပ်လိုက်ကြသည်။

ဤလူများအားလုံးသည် ကျင့်ကြံခြင်းလောကတွင် နှစ်ပေါင်းများစွာကြာအောင် စမ်းသပ်မှုများနှင့် ဆင်းရဲဒုက္ခများကို ဖြတ်သန်းခဲ့ကြသူများပင်။

သူတို့ တစ်ဦးစီတိုင်းသည် လိမ္မာပါးနပ်ကြပြီး အတွေ့အကြုံရင့် မြေခွေးအိုကြီးတစ်ကောင်ထက်ပင် ပို၍ကောက်ကျစ်ကြသည်။

လူများအားလုံးတွင် ကိုယ်ပိုင်စဉ်းစားဆင်ခြင်မှုများ ရှိနေကြ၏။

ကောင်းကင်နက်နဲသိမ်မွေ့ နယ်ပယ် အလယ်အလတ်အဆင့်တွင်သာ ရှိသော ကျင့်ကြံဆင့်ဖြင့် အစစ်အမှန်နတ်ဆိုးအမွေအနှစ်ကို သယ်ဆောင်ထားသည့် ပိုင်လင်းသည် အမှန်တကယ်ကို အလွန်ဆွဲဆောင်မှုရှိနေကြောင်း ဆိုရပေမည်။

ရောက်ရှိနေသူများအကြားတွင် ကောင်းကင်နက်နဲသိမ်မွေ့ နယ်ပယ် ကျင့်ကြံမှုသည် အောက်ခြေအဆင့်တွင် ရှိသည်ဟု အမှန်တကယ် ယူဆနိုင်သည်။

သူတို့တစ်ဦးစီတိုင်းတွင် ပိုင်လင်း၏လက်ထဲမှ အစစ်အမှန်နတ်ဆိုးအမွေအနှစ်ကို လုယူနိုင်ခြေ ရှိပုံရပေ၏။

သို့သော် မည်သူကမျှ ငတုံးငအများ မဟုတ်ကြချေ။

အကယ်၍ ပိုင်လင်းတွင် ထိုစွမ်းအားအဆင့်သာ အမှန်တကယ် ရှိနေပါက မြောက်ပိုင်းဒေသ၏ ထိပ်သီးအင်အားစုကြီး လေးစုထဲမှ တစ်စုဖြစ်သော မြောက်ပိုင်းနတ်ဆိုးလှိုဏ်ဂူကို သူမ မည်သို့ ရင်ဆိုင်ရဲမည်နည်း။

ထို့ပြင် အစစ်အမှန်နတ်ဆိုးအမွေအနှစ် ပိုင်ရှင်သည် မည်သည့်အာမခံချက်များကို ဖုံးကွယ်ထားသည်အား မည်သူမျှ မသိကြချေ။

အခြေအနေများ ရှင်းလင်းမသွားမီ...

မည်သူက ပထမဆုံး စွန့်စားရဲမည်နည်း။

မြောက်ပိုင်း နတ်ဆိုးလှိုဏ်ဂူကို အခြေအနေ အရင်ဆုံး စမ်းသပ်ခိုင်းသည်က ပိုကောင်းပေလိမ့်မည်။

ထို့နောက် သူတို့ လုပ်နိုင်သည်မှာ နောက်ကျိနေသော ရေထဲတွင် ငါးဖမ်းရန် ရေကို မွှေနှောက်ခြင်းသာ ဖြစ်ပေ၏။

ဤသည်ကို မြင်တွေ့ချိန်၌ လူများအားလုံး မည်သည့်အရာအား တွေးတောနေသည်ကို ချီဖန်းက သိလိုက်သည်။

ဤသည်က လူများအားလုံးသည် မြောက်ပိုင်း နတ်ဆိုးလှိုဏ်ဂူကို ကင်းထောက်တစ်ဦးအဖြစ် သဘောထားနေကြောင်း ရှင်းလင်းနေပေ၏။

ရုတ်ချည်းဆိုသလိုပင် သူ၏မျက်နှာ သုန်မှုန်သွားခဲ့သည်။

ထို့နောက် သူ၏ မျက်လုံးများ တောက်ပသွားသည်နှင့်အမျှ နောက်ထပ်အစီအစဉ်တစ်ခုက သူ၏စိတ်ထဲတွင် ထွက်ပေါ်လာခဲ့သည်။

သူက ကျယ်လောင်သောအသံဖြင့် ထပ်မံ၍ ပြောဆိုလိုက်၏။

"လူတိုင်းပဲ... အစစ်အမှန်နတ်ဆိုးအမွေအနှစ်က တစ်ခုတည်းရှိပြီးတော့ ဒီနေရာမှာ လူသောင်းနဲ့ချီပြီး ရှိနေတယ်..."

"လူတိုင်းက ဒါကို လိုချင်ကြပေမဲ့ ဒီအမွေအနှစ်ကို သေချာပေါက် ရနိုင်မယ်လို့ ဘယ်သူက အာမခံနိုင်မလဲ..."

"ငါ့မှာ အကြံပြုချက်တစ်ခု ရှိတယ်..."

"ဘယ်သူက ငါတို့ မြောက်ပိုင်းနတ်ဆိုးလှိုဏ်ဂူနဲ့ မဟာမိတ်ဖွဲ့ဖို့ ဆန္ဒရှိလဲ..."

"တကယ်လို့ မင်းတို့က ငါတို့ မြောက်ပိုင်း နတ်ဆိုးလှိုဏ်ဂူနဲ့အတူ သေအတူရှင်မကွာ ပူးပေါင်းမယ်ဆိုရင်...ငါတို့ရဲ့ အင်အားတွေကို ပေါင်းစပ်ပြီး ဒီအမွေအနှစ်ကို လုယူပြီးတာနဲ့ ငါတို့ မြောက်ပိုင်း နတ်ဆိုးလှိုဏ်ဂူက ကံကောင်းခြင်းတွေကို တန်းတူခွဲဝေပေးဖို့ ဆန္ဒရှိတယ်..."

"တကယ်လို့ အစစ်အမှန်နတ်ဆိုးအမွေအနှစ်မှာ ကျင့်စဉ်နည်းစနစ်နဲ့ ဆန်းကြယ်စွမ်းရည်တွေ ပါဝင်တယ်ဆိုရင် ငါတို့က အဲ့ဒါတွေကို မျှဝေပေးဖို့ ဆန္ဒရှိတယ်..."

"တကယ်လို့ အမွေအနှစ်ထဲမှာ လျှို့ဝှက်နယ်မြေတွေ နတ်ဘုရားရတနာတွေ ရှိနေရင်လည်း ငါတို့ရဲ့ မဟာမိတ်တွေကို မျှဝေပေးဖို့ ဆန္ဒရှိတယ်..."

"ဘယ်သူက ငါတို့ မြောက်ပိုင်း နတ်ဆိုးလှိုဏ်ဂူနဲ့ မိတ်ဆွေဖွဲ့ဖို့ ဆန္ဒရှိလဲဆိုတာကို ငါ သိချင်တယ်..."

ဤစကားများကို ပြောဆိုလိုက်သည်နှင့်တပြိုင်နက်...

လူများအားလုံး၏မျက်လုံးများ အနည်းငယ် တောက်ပသွားပေ၏။

ဤအကြံပြုချက်မှာ အလွန်ဆွဲဆောင်မှုရှိကြောင်း ဆိုရပေမည်။

လက်ရှိနေရာတွင် ရောက်ရှိနေသူများအနက် မရေမတွက်နိုင်သော အရှင်သခင်များနှင့် အစွမ်းထက်ကျင့်ကြံသူများ ရှိနေခဲ့သည်။

အရှင်သခင်များနှင့်အစွမ်းထက်သူများ စုဝေးနေသဖြင့် ဆွဲဆောင်မှုရှိပြီး လိုချင်တပ်မက်ဖွယ်ကောင်းလှသော အစစ်အမှန်နတ်ဆိုးအမွေအနှစ်ကို ရရှိရန် မည်သူက လူတိုင်းကို အနိုင်ယူနိုင်မည်ဟု အာမခံနိုင်မည်နည်း။

သို့သော် သူတို့သည် မြောက်ပိုင်းနတ်ဆိုးလှိုဏ်ဂူနှင့် မဟာမိတ်ဖွဲ့ပါက ကွာခြားသွားပေလိမ့်မည်။

မြောက်ပိုင်းနတ်ဆိုးလှိုဏ်ဂူသည် မြောက်ပိုင်းဒေသ၏ ထိပ်သီးအင်အားစုကြီးလေးစုအနက်မှ တစ်စုပင်။

သူတို့သည် ပိုင်လင်းနှင့် မည်သို့သော ရန်ငြိုးများ ရှိနေပါစေ အစစ်အမှန်နတ်ဆိုးအမွေအနှစ်ကို အတင်းအကြပ်လုယူရန် အရည်အချင်းအပြည့်မီဆုံးနှင့် အစွမ်းထက်ဆုံး အဖွဲ့အစည်းများအနက်မှတစ်ခု ဖြစ်ပုံရပေ၏။

အကယ်၍ သူတို့သာ မြောက်ပိုင်းနတ်ဆိုးလှိုဏ်ဂူနှင့် မဟာမိတ်ဖွဲ့နိုင်ပါက အစစ်အမှန်နတ်ဆိုးအမွေအနှစ်တွင် မှတ်တမ်းတင်ထားသော ကျင့်စဉ်နည်းစနစ်များနှင့် ဆန်းကြယ်စွမ်းရည်များကို အမှန်တကယ် ရရှိနိုင်သရွေ့ သူတို့၏ ခရီးစဉ်မှာ အချည်းနှီး ဖြစ်မည်မဟုတ်ချေ။

တချို့လူများက သွေးဆောင်ခံရမှုကို စဥ်းစားနေချိန်တွင် တချို့ကမူ လှုပ်ရှားနေခဲ့လေပြီ။

"မြောက်ပိုင်းနတ်ဆိုးလှိုဏ်ဂူက မိတ်ဆွေတို့... ငါတို့ နတ်ဘုရားဓားတောင်ထိပ် ပါဝင်လာတာကို ကြိုဆိုမလားဆိုတာ သိချင်မိတယ်..."

အားကောင်းပြီး အစွမ်းထက်သော အသံတစ်သံက နေရာတစ်ခုလုံးသို့ ပျံ့နှံ့သွားကာ ရေတွက်၍မရနိုင်သော အကြည့်များကို ချက်ချင်းဆွဲဆောင်သွားနိုင်ခဲ့ပေ၏။

သူတို့ လှမ်းကြည့်လိုက်ချိန်တွင် အဘိုးအိုတစ်ဦးက အားကောင်းသော ခြေလှမ်းများဖြင့် ရှေ့သို့ လျှောက်လှမ်းလာသည်ကို မြင်တွေ့လိုက်ရသည်။

သူ၏နောက်တွင် လူဆယ်ယောက်ထက်မက လိုက်ပါလာခဲ့သည်။

သူတို့ တစ်ဦးစီတိုင်းသည် အစွမ်းထက်သူများ ဖြစ်ကြပြီး ထူးခြားသော စွမ်းအားများ ရှိကာ အမှန်တကယ်ကို အထင်ကြီးဖွယ် ကောင်းလှသည်။

"သူပဲ..."

တစ်စုံတစ်ယောက်၏ မျက်လုံးများ တောက်ပသွားပြီး သူ၏စိတ်နှလုံးသားထဲတွင် လှိုင်းဂယက်များ ထလာခဲ့သည်။

ထိုလူမှာ တခြားသူမဟုတ်ဘဲ ပျံသန်းခြင်းအင်မော်တယ်ဂိုဏ်းမှ နတ်ဘုရားဓားတောင်ထိပ်၏ တောင်သခင်ဟောက်ချန်ပင်။

ဤအစစ်အမှန်နတ်ဆိုး တိုက်ပွဲတွင် ပျံသန်းခြင်းအင်မော်တယ်ဂိုဏ်းမှ တောင်ထိပ်တစ်ခုသာ ပါဝင်ခဲ့ပေ၏။

တစ်နည်းအားဖြင့် နတ်ဘုရားဓားတောင်ထိပ်သည် ပျံသန်းခြင်းအင်မော်တယ်ဂိုဏ်းကို ကိုယ်စားပြုသည်။

ဟောက်ချန်၏ထွက်ပေါ်လာမှုက မြောက်ပိုင်း နတ်ဆိုးလှိုဏ်ဂူမှ လူများကို အလွန်ဝမ်းသာသွားစေခဲ့သည်။

အနီရောင်နတ်ဆိုးခေါင်းဆောင် ချီဖန်းက ပြောဆိုလိုက်သည်။

"တောင်သခင်ဟောက်ချန် ငါတို့ မြောက်ပိုင်း နတ်ဆိုးလှိုဏ်ဂူနဲ့ မဟာမိတ်ဖွဲ့တာက ငါတို့အတွက် အရမ်းဂုဏ်ယူဝမ်းမြောက်စရာပါပဲ..."

"ဒီနတ်ဆိုးမြို့တော်မှာ ငါတို့ အင်အားစုနှစ်စု ပူးပေါင်းလိုက်တာနဲ့ ဘယ်သူက ငါတို့ကို တားဆီးနိုင်မှာလဲ..."

ဤစကားများသည် အလွန်အမင်း မောက်မာလှပေ၏။

သို့သော် မည်သူကမျှ ထိုစကားများကို ငြင်းဆိုနိုင်ခြင်း မရှိခဲ့ကြချေ။

ဤသည်ကို မြင်တွေ့ချိန်၌ တချို့သော အင်အားစုများက ရှေ့အလားအလာကို ဖန်တီးပြီးပြီဟု ခံစားလိုက်ရသည်။

သူတို့သည် မြောက်ပိုင်း နတ်ဆိုးလှိုဏ်ဂူနှင့် မဟာမိတ်ဖွဲ့ရန် ဆက်တိုက်တောင်းဆိုခဲ့ကြသည်။

တုံ့ပြန်မှုအနေဖြင့် မြောက်ပိုင်း နတ်ဆိုးလှိုဏ်ဂူသည် ပူးပေါင်းလာသူအားလုံးကို လက်ခံခဲ့သည်။

အချိန်တခဏအတွင်း၌ ပတ်ဝန်းကျင်တွင် အပြောင်းအလဲတစ်ခု ဖြစ်ပေါ်လာခဲ့သည်။

မြောက်ပိုင်းနတ်ဆိုးလှိုဏ်ဂူ မဟာမိတ်အဖွဲ့၏ အင်အားသည် အလွန်အမင်း တိုးလာခဲ့ပြီး အရပ်မျက်နှာအဘက်ဘက်ကို ဖိနှိပ်နိုင်သည့် အရှိန်အဝါကို ပြသနေကာ မည်သူကမျှ သူတို့၏ အမိန့်များကို မလွန်ဆန်ရဲကြချေ။

နတ်ဆိုးနန်းတော်သည် နံဘေးမှ ရပ်ကြည့်နေခဲ့ပေ၏။

သူတို့အနက် လူတစ်ယောက်ပြီး တစ်ယောက်သည် ဟိုဟိုဒီဒီကြည့်နေကာ ပြပွဲကိုကြည့်ရန် ရောက်နေသည့်ဟန်ပန်ကို ပြသနေခဲ့သည်။

နောက်ထပ် လူတစ်စုကမူ နောက်နေသော ရေထဲတွင် ငါးဖမ်းလိုသည့်အလား ရှုပ်ထွေးမှုကြားမှ အခွင့်ကောင်းယူလိုကြသည်။

ဤအုပ်စု၏ဖွဲ့စည်းမှုမှာ အလွန်ရှုပ်ထွေးလှပေ၏။

လေလွင့်ကျင့်ကြံသူများ မြင့်မြတ်သော လျှို့ဝှက်မိသားစုဝင်များနှင့် ဂိုဏ်းအင်အားစုများ ပါဝင်သည်။

ဤလူစု၏အတွေးများမှာ အလွန်ရှုပ်ထွေးပြီး အလွန်လည်း ရိုးရှင်းလှ၏။

မြောက်ပိုင်းနတ်ဆိုးလှိုဏ်ဂူသည် အပြောကောင်းသော်လည်း သူတို့၏ဘဝအတွေ့အကြုံများအရ တောင်များကို အားကိုးခြင်းက ပြိုကျစေနိုင်ပြီး ရေကို အားကိုးခြင်းက စီးဆင်းသွားစေနိုင်သဖြင့် သူတို့ကိုယ်သူတို့သာ အယုံကြည်ရဆုံးဖြစ်သည်ဟု ယုံကြည်ထားကြသည်။

တစ်နည်းအားဖြင့် သူတို့သည် တခြားသူများကို မယုံကြည်ဘဲ သူတို့ကိုယ်သူတို့သာ ယုံကြည်ကြသည်။

မြောက်ပိုင်းနတ်ဆိုးလှိုဏ်ဂူ မဟာမိတ်အဖွဲ့ အားကောင်းလာသည်နှင့်အမျှ...

မြောက်ပိုင်းနတ်ဆိုးလှိုဏ်ဂူ၏ နတ်ဆိုးခေါင်းဆောင်ငါးဦး၏ ယုံကြည်ချက်များ မကြုံစဖူး မြင့်တက်လာပေ၏။

မည်သို့ပင်ဆိုစေကာမူ သူတို့၏မဟာမိတ်များထဲတွင် အလွန်ဩဇာလွှမ်းမိုးမှုရှိသော ကောင်းကင်နတ်ဘုရားတောင်လည်း ပါဝင်သည်။

ထိပ်သီးအင်အားစုကြီးလေးစုအနက် သုံးစုက သူတို့နှင့် တစ်ဖက်တည်း ရပ်တည်နေခဲ့သည်။

ဤကဲ့သို့ လူစာရင်းဖြင့် ပိုင်လင်းတွင် အာမခံချက်များ ရှိနေလျှင်ပင် သူတို့သည် မည်သည့်အရာကို ကြောက်ရွံရမည်နည်း။

စွမ်းအားကွာဟချက်သည် အတိုင်းအတာတစ်ခုအထိ ရောက်ရှိသွားချိန်၌ အမျိုးမျိုးသော စမ်းသပ်မှုများကို ဆက်လက်၍ လုပ်ဆောင်ရန် မလိုအပ်တော့ချေ။

ယနေ့တွင် သူတို့က ပိုင်လင်းအား အစွမ်းထက်သောအရှိန်အဝါဖြင့် တိုက်ရိုက်ဖိနှိပ်ပြီး သတ်ဖြတ်ရပေမည်။

ဤသည်ကို တွေးတောမိချိန်၌ အနီရောင်နတ်ဆိုးခေါင်းဆောင် ချီဖန်းသည် ရှေ့သို့ထွက်လာပြီး ပိုင်လင်းအား ပြောဆိုလိုက်၏။

"ပိုင်လင်း....မင်းဆီမှာ ကံကောင်းခြင်းတချို့ ရှိနေတယ်ဆိုတာကတော့ ငြင်းလို့မရဘူး...ဒါပေမဲ့ အမွေအနှစ်ကို ရပြီးပြီးချင်း မင်းက မြောက်ပိုင်း နတ်ဆိုးလှိုဏ်ဂူရဲ့ စွမ်းအားကို ရန်စရဲတယ်ပေါ့..."

"မင်းကို သတ္တိရှိတယ်လို့ ပြောရမလား ဒါမှမဟုတ် မိုက်မဲတယ်လို့ ပြောရမလားဆိုတာ ငါ မသိတော့ဘူး..."

"အရင်တုန်းက မင်းကို အကြိမ်များစွာ ထွက်ပြေးခွင့်ပြုခဲ့တယ်... ဒါပေမဲ့ ဒီနေ့ ငါတို့ မြောက်ပိုင်း နတ်ဆိုးလှိုဏ်ဂူက မင်းကို နောက်ထပ်အခွင့်အရေး ပေးမှာမဟုတ်ဘူး..."

မောက်မာပြီး ရိုင်းပျသော ချီဖန်းကို ရင်ဆိုင်ရချိန်တွင် ပိုင်လင်းက ဂရုမစိုက်သော လေသံဖြင့်သာ တုံ့ပြန်လိုက်သည်။

"မြောက်ပိုင်းနတ်ဆိုးလှိုဏ်ဂူ... အခု နင်တို့က ဟောင်ဖို့ပဲ တတ်တော့တာလား...ဘာလို့ စကားတွေ အများကြီး ပြောနေမှာလဲ...နင်တို့ တိုက်ရဲရင် တိုက်လေ..."

'တိုက်လေ' ဟူသော စကားလုံးကို ပြင်းထန်သောစွမ်းအားဖြင့် ပြောဆိုလိုက်ခြင်းဖြစ်ကာ စိတ်လှုပ်ရှားဖွယ်နှင့် စိတ်အားထက်သန်ဖွယ် ကောင်းလှပြီး လူများကို သွေးဆူလာသကဲ့သို့ပင် ခံစားရစေသည်။

မရေမတွက်နိုင်သော လူများက ပိုင်လင်းကို ကြည့်လိုက်ကြ၏။

ဤအချိန်တွင် ပိုင်လင်း၏ဆံနွယ်ရှည်များ လူးလွန့်နေပြီး သူမ၏အရပ်မြင့်မားသော ပုံရိပ်သည် လောကကြီးတွင် တည်ရှိနေသော ကြာဖြူတစ်ပွင့်နှင့် တူညီနေကြောင်း ဆိုရပေမည်။

သူမ၏မျက်လုံးများထဲတွင် ကြောက်ရွံ့မှု အရိပ်အယောင် အနည်းငယ်မျှပင် မရှိဘဲ အဆုံးအစမဲ့သော တိုက်ခိုက်လိုစိတ်များသာ ပြင်းထန်နေပေ၏။

သူမ၏ ခန္ဓာကိုယ်အနှံ့အပြားတွင် သူရဲကောင်းဆန်သော စိတ်ဓာတ်များ ထွက်ပေါ်နေခဲ့သည်။

သူရဲကောင်းဆန်ပြီး ရဲရင့်ခြင်းဟူသည်က မည်သို့ဖြစ်သည်ကို သူမက ပြီးပြည့်စုံစွာ ပြသနေပေ၏။

သူမသည် အမျိုးသားများထက် မနိမ့်ကျသော အမျိုးသမီးတစ်ဦးပင်။

"မင်းက သေချင်နေမှတော့ မင်းရဲ့ ဆန္ဒကို ငါ ဖြည့်ဆည်းပေးရမှာပေါ့..."

ချီဖန်းသည် ဆက်လက်၍ တွေဝေမနေတော့ချေ။

ထို့နောက် သူက ကျယ်လောင်သောအသံဖြင့် အော်ဟစ်လိုက်သည်။

"အားလုံးပဲ..ကျေးဇူးပြုပြီး ငါ့ကို ကာကွယ်ပေးပါ... ပြီးတော့ ငါ သူ့ကို ဘယ်လိုသတ်မလဲ... သူ့ရဲ့စိတ်ဝိညာဉ်ကို ဘယ်လိုထုတ်ယူမလဲ... ပြီးတော့ အစစ်အမှန်နတ်ဆိုးအမွေအနှစ် ကံကောင်းခြင်းကို သိမ်းပိုက်ဖို့ သူ့ရဲ့ မှတ်ဉာဏ်တွေကို ဘယ်လိုရှာဖွေမလဲဆိုတာ စောင့်ကြည့်နေကြတော့..."

သူ စကားပြောဆိုနေစဉ်မှာပင် ခြေတစ်လှမ်း တိုးပြီး တိုက်ရိုက်လှုပ်ရှားလိုက်၏။

ဤလှုပ်ရှားမှုနှင့်အတူ ပင်လယ်ထဲမှ ထွက်ပေါ်လာသော အစစ်အမှန် နဂါးတစ်ကောင်အလား ထိတ်လန့်ဖွယ် နတ်ဘုရားအလင်းတန်းများက သူ၏ခန္ဓာကိုယ်မှ ပွင့်အံ့ထွက်လာခဲ့သည်။

လက်ဝါးရိုက်ချက်တစ်ခု ထွက်ပေါ်လာပြီး တောင်တစ်လုံးကဲ့သို့ ကြီးမားသော လက်ဝါးပုံရိပ်ယောင်ကြီးသည် ထိတ်လန့်ဖွယ် ဥပဒေသစွမ်းအားများကို သယ်ဆောင်လာကာ လေဟာနယ်ကို ပေါက်ကွဲသွားစေသည်။

သတ်ဖြတ်လိုခြင်း အငွေ့အသက်များ မြင့်တက်လာပြီး တိမ်များနှင့်မိုးကောင်းကင်ယံထဲသို့ ပေါင်းစပ်ဝင်ရောက်သွားခဲ့သည်။

ဤသည်က တမဟုတ်ချင်း သတ်ဖြတ်ရန် ရည်ရွယ်ထားသော လှုပ်ရှားမှုတစ်ခု ဖြစ်ကြောင်း သိသာထင်ရှားပေ၏။

သူသည် စွမ်းအားကို အနည်းငယ်မျှပင် ချန်လှပ်ထားခြင်း မရှိခဲ့ချေ။