ကောင်းကင်နတ်ဘုရားတောင်၏ သစ္စာဖောက်မှု

ကောင်းကင်နတ်ဘုရားတောင်နှင့် မြောက်ပိုင်း နတ်ဆိုးလှိုဏ်ဂူတို့၏ မဟာမိတ်ဖွဲ့မှုသည် ယခင်က မြောက်ပိုင်းနတ်ဆိုးလှိုဏ်ဂူနှင့် ဆက်နွယ်ခဲ့သော အင်အားစုများနှင့် နှိုင်းယှဉ်၍ မရနိုင်ချေ။

အင်အားစုနှစ်စုသည် သဘောတူညီချက်တစ်ခုကို လက်မှတ်ရေးထိုးခဲ့ကြပြီးနောက် ဂိုဏ်းများ၏ဂုဏ်သိက္ခာကို ရင်းနှီးထားသော ပေါင်းစည်းမှုတစ်ခု ဖြစ်ပေ၏။

ထိုပေါင်းစည်းမှု၏ချည်နှောင်နိုင်စွမ်းမှာ မိုးကောင်းကင်တာအိုကို တိုင်တည်၍ ကျိန်ဆိုသော ကတိသစ္စာထက် အနည်းငယ်သာ လျော့နည်းသည်။

နှစ်ဖက်လုံးသည် စည်းလုံးညီညွတ်သော ပေါင်းစည်းမှုတစ်ခုအဖြစ် ဆောင်ရွက်ရန် သဘောတူညီခဲ့ကြသည်။

အကယ်၍ တစ်ဖက်က အခက်အခဲနှင့် ကြုံတွေ့ရပါက အခြားတစ်ဖက်က ခြွင်းချက်မရှိ ပံ့ပိုးကူညီရပေမည်။

ကောင်းကင်နတ်ဘုရားတောင်သာ တိုက်ပွဲထဲသို့ ဝင်ရောက်လာပါက အခြေအနေသည် သံသယဖြစ်ဖွယ်မရှိဘဲ ချက်ချင်းပြောင်းပြန်ဖြစ်သွားပေမည်။

နတ်ဆိုးနန်းတော်၏ သတိပေးချက်များနှင့် ပတ်သက်၍မူ သူတို့သည် ထိုကိစ္စကို ထည့်တွက်ခြင်း မရှိတော့ချေ။

မြောက်ပိုင်းနတ်ဆိုးလှိုဏ်ဂူနှင့် ကောင်းကင်နတ်ဘုရားတောင်တို့၏ အခြေခံအုတ်မြစ်များကြောင့် အကယ်၍ သူတို့သာ ပူးပေါင်းလိုက်ပါက တစ်ဖက်လူကို ကြောက်ရွံ့ရန် မလိုအပ်တော့ကြောင်း ချီဖန်းက ခံစားမိပေ၏။

တစ်ဖက်အင်အားစုမှ ပြသခဲ့သော စွမ်းအားသည် အမှန်တကယ်ကို အံ့အားသင့်ဖွယ်ကောင်းကြောင်း သူ ငြင်းဆန်၍ မရနိုင်ချေ။ သို့သော် မြောက်ပိုင်းနတ်ဆိုးလှိုဏ်ဂူနှင့် ကောင်းကင်နတ်ဘုရားတောင်တို့သည် မြောက်ပိုင်းဒေသကို မရေမတွက်နိုင်သော နှစ်ပေါင်းများစွာ ကြီးစိုးခဲ့ကြသည် မဟုတ်လော...

သူတို့ကို ကိုင်တွယ်ရန် လွယ်ကူနိုင်မည်လော...

ဤသည်ကို တွေးမိချိန်၌...ချီဖန်းသည် ကောင်းကင်နတ်ဘုရားတောင် ရှိရာဘက်သို့ကြည့်ကာ ကျယ်လောင်သောအသံဖြင့် အော်ဟစ်လိုက်၏။

"ကောင်းကင်နတ်ဘုရားတောင်နဲ့ ငါ့တို့မြောက်ပိုင်း နတ်ဆိုးလှိုဏ်ဂူတို့က မဟာမိတ်ဖွဲ့ထားပြီး အပြန်အလှန် ကူညီထောက်ပံ့သူတွေအဖြစ် ဆောင်ရွက်နေကြတာပဲ..."

"ဂိုဏ်းချုပ်လင်း... မင်း အခု မလှုပ်ရှားရင် ဘယ်တော့ လှုပ်ရှားမှာလဲ..."

ဤစကားများ ထွက်ပေါ်လာသည်နှင့်တစ်ပြိုင်နက် တချို့လူများသည် လှုပ်ရှားသွားခဲ့ကြ၏။

ထိပ်သီးအင်အားစုကြီးလေးစု စာရင်းဝင်များ ဖြစ်ကြသော မြောက်ပိုင်းနတ်ဆိုးလှိုဏ်ဂူနှင့် ကောင်းကင်နတ်ဘုရားတောင်တို့သည် တိတ်တဆိတ် မဟာမိတ်ဖွဲ့ထားကြလိမ့်မည်ဟု သူတို့ ဘယ်သောအခါမျှ ထင်မှတ်မထားခဲ့ကြချေ။

ထိပ်သီးအင်အားစုကြီးတစ်စုသည် လူတိုင်း၏ ခေါင်းအထက်ရှိ တောင်ကြီးတစ်လုံးနှင့် တူညီပေ၏။

ကြီးမားသော ထိပ်သီးအင်အားစုကြီးနှစ်စု၏ မဟာမိတ်အဖွဲ့က မည်မျှထိ အစွမ်းထက်နေမည်နည်း...

ဤသည်က တစ်အပေါင်းတစ် ညီမျှခြင်းနှစ်ဟု ဆိုသလောက် မရိုးရှင်းချေ။

တောင်ကြီးနှစ်လုံး ပေါင်းစပ်လိုက်ခြင်းက သံသယဖြစ်ဖွယ်မရှိဘဲ တစ်အပေါင်းတစ်ထက် များစွာ ပို၍ကြီးမားသော စွမ်းအားများကို ထုတ်လွှတ်ပေးနိုင်ပေမည်။

ဤသည်ကို တွေးမိချိန်၌ မရေမတွက်နိုင်သောလူများ၏ အကြည့်များက ကောင်းကင်နတ်ဘုရားတောင် ရှိရာဘက်သို့ တပြိုင်နက်တည်း ကျရောက်သွားကြသည်။

လူများအားလုံး၏ စောင့်ကြည့်နေသော အကြည့်များအောက်တွင် လူအုပ်ကြား၌ မူလက အလွန် သိုသိုသိပ်သိပ် နေခဲ့သော ကောင်းကင်နတ်ဘုရားတောင်သည် လူအများ၏ရှေ့မှောက်သို့ သိသာထင်ရှားစွာ ထွက်ပေါ်လာခဲ့ပေ၏။

လူများအားလုံးကို စိတ်ရှုပ်ထွေးစေခဲ့သည်မှာ ထိပ်သီးအင်အားစုကြီး တစ်စုအနေဖြင့် ကောင်းကင်နတ်ဘုရားတောင်သည် နတ်ဆိုးနန်းတော်နှင့် မည်သို့ ရောထွေးသွားသနည်း ဆိုသည်ကိုပင်။

ကောင်းကင်နတ်ဘုရားတောင်မှ လူများကလည်း မြောက်ပိုင်းနတ်ဆိုးလှိုဏ်ဂူမှ ဤအချိန်တွင် သူတို့ကို အကူအညီ တောင်းလိမ့်မည်ဟု ထင်မှတ်မထားခဲ့ကြချေ။

ဤကောင်စုတ်များကြောင့်သာ ကောင်းကင်နတ်ဘုရားတောင်သည် ယခင်က မျိုးတုံးလုမတတ် ဖြစ်ခဲ့ရခြင်း ဖြစ်ပေ၏။

ယခုချိန်၌ တစ်ဖက်လူသည် သူတို့၏အကူအညီကို တောင်းခံနေရုံသာမက သူတို့အရှင်သခင်များ၏သခင်နှင့် ရှုပ်ထွေးသော ဆက်ဆံရေး ရှိနေသည့် ပိုင်လင်းကိုလည်း တိုက်ခိုက်နေကြသည်။

အချိန်တခဏအတွင်းတွင် သူတို့၏မျက်နှာအမူအယာများ အလွန်ဆိုးရွားသွားခဲ့သည်။

အကယ်၍ ကြက်သခင်ကြီးက သူတို့သည် မြောက်ပိုင်းနတ်ဆိုးလှိုဏ်ဂူနှင့် ပူးပေါင်းကြံစည်နေဆဲဖြစ်ကြောင်း အထင်အမြင်လွဲသွားပါက သူတို့ထံ၌ အသက်ဆယ်ချောင်းရှိလျှင်ပင် သေဆုံးရန် လုံလောက်မည် မဟုတ်ချေ။

ကောင်းကင်နတ်ဘုရားတောင်၏ ဂိုဏ်းချုပ်လင်းထျန်း၏မျက်နှာ ပို၍ပင် စိမ်းဖျော့သွားပေ၏။

သူက ချက်ချင်းဆိုသလိုပင် ချီဖန်းကို လက်ညှိုးထိုးပြီး ကျိန်ဆဲလိုက်သည်။

"မင်းအဖွားနဲ့ သွားပြီး မဟာမိတ်ဖွဲ့လိုက်..."

"တကယ်လို့ သခင်မလေးပိုင်လင်းက မင်းတို့အားလုံးကို သတ်မှရမှာ မဟုတ်ဘူးဆိုရင် ငါ ကိုယ်တိုင် မင်းကို သတ်ပစ်ချင်တယ်..."

"ပြီးတော့ ဒီနေ့ကစပြီး လောကကြီးပေါ်မှာ ကောင်းကင်နတ်ဘုရားတောင်ဆိုတာ မရှိတော့ဘူး... နတ်ဆိုးနန်းတော်လက်အောက်က ကောင်းကင်နတ်ဘုရားတောင်အဖွဲ့ပဲ ရှိတော့တယ်..."

"လက်ရှိ ကောင်းကင်နတ်ဘုရားတောင် အဖွဲ့ဝင်တွေအားလုံး...မြောက်ပိုင်းနတ်ဆိုးလှိုဏ်ဂူက ခွေးမသားတွေ ထွက်မပြေးနိုင်အောင် လေဟာနယ်ပိတ်လှောင်ခြင်း နတ်ဆိုးဝင်္ကပါကို ခင်းကျင်းကြစမ်း..."

လင်းထျန်း၏စကားများ အဆုံးသတ်သွားသည်နှင့် လူတစ်ရာခန့်သည် မိုးကောင်းကင်ယံသို့ ချက်ချင်းပျံသန်းသွားသည်။ သူတို့သည် ပတ်ဝန်းကျင်ရှိ လေဟာနယ်ကို ပိတ်ဆို့ဟန့်တားကာ မြောက်ပိုင်းနတ်ဆိုးလှိုဏ်ဂူ၏ ဆုတ်ခွာရာလမ်းကြောင်းကို ဖြတ်တောက်လိုက်ကြ၏။

ဤအပြောင်းအလဲက လူများအားလုံးကို အမှန်တကယ် အံ့အားသင့်သွားစေခဲ့သည်။

ကြီးမားသော ထိပ်သီးအင်အားစုကြီးနှစ်စု၏ မဟာမိတ်အဖွဲ့သည် အမှန်တကယ်ကို ခိုင်မာသော မဟာမိတ်အဖွဲ့တစ်ခု ဖြစ်လာမည်ဖြစ်ပြီး ရန်သူအားလုံးကို ရှင်းလင်းပစ်နိုင်စွမ်း ရှိလိမ့်မည်ဟု သူတို့ ယခင်က တွေးထင်ထားခဲ့ကြ၏။

အခြေအနေများက ဤမျှထိ လျှင်မြန်စွာ ပြောင်းလဲသွားပြီး အမှန်တကယ်ကို အံ့အားသင့်ဖွယ်ကောင်းလောက်အောင် ဖြစ်သွားလိမ့်မည်ဟု မည်သူမျှ ထင်မှတ်မထားခဲ့ကြချေ။

ကောင်းကင်နတ်ဘုရားတောင်သည် အကူအညီပေးရန် လက်ကမ်းမပေးခဲ့ရုံသာမက သူတို့ကို ကျောချမ်းအောင်ပင် ဓားဖြင့် ထိုးလိုက်ပေ၏။

ဤဓားဖြင့်ထိုးခြင်းကို ကြည့်ရုံဖြင့်ပင် သူတို့သည် စူးရှသော နာကျင်မှုကို ခံစားလိုက်ရသဖြင့် ကောင်းကင်နတ်ဘုရားလှိုဏ်ဂူမှ လူများအတွက်မူ ထည့်ပြောနေရန်ပင် မလိုတော့ချေ။

သစ္စာမဲ့သော လင်းထျန်းကို ရင်ဆိုင်ရချိန်တွင် ချီဖန်း၏မျက်လုံးများ ပြူးကျယ်သွားခဲ့သည်။

သူသည် လေဟာနယ်ထဲတွင် တောင့်တင်းစွာ မတ်တတ်ရပ်နေခဲ့သည်။

ထို့နောက် သူသည် ခြေတစ်လှမ်း ရှေ့တိုးလိုက်ပြီး တုန်ရီနေသော လက်ညှိုးဖြင့် လင်းထျန်းကို ညွှန်ပြကာ သူ၏မျက်လုံးများ သွေးရောင်လွှမ်းနေပေ၏။

သူသည် မယုံကြည်နိုင်လောက်အောင် ဒေါသထွက်နေခဲ့သည်။

"ဘာလို့လဲ..."

"ငါတို့ အရင်က မဟာမိတ်ဖွဲ့ဖို့ သဘောတူထားခဲ့တာပဲ... နောက်ဆုံးအခိုက်အတန့်ကျမှ မင်းက ဘယ်လိုလုပ်ပြီးတော့ ကတိဖျက်နိုင်ရတာလဲ..."

"ဒါတင်မကသေးဘူး... မင်းကငါတို့ရဲ့ ဆုတ်ခွာရာလမ်းကြောင်းကိုတောင် ပိတ်ဆို့ချင်နေသေးတာလား..."

ချီဖန်း၏ စိတ်ရှုပ်ထွေးမှု ဇဝေဇဝါဖြစ်မှုနှင့် အဆုံးမဲ့ နာကြည်းမှုများက နံဘေးမှ ကြည့်နေသူများကို သူ့အတွက် အလိုအလျောက် ဝမ်းနည်းသွားစေခဲ့သည်။

တစ်ဖက်လူ၏နာကြည်းမှုသည် ခင်ပွန်းဖြစ်သူ၏ စွန့်ပစ်ခြင်းခံရသော မယားငယ်တစ်ဦးကဲ့သို့ အလွန်ကြီးမားနေသည်ဟု သူတို့ ခံစားလိုက်ရသည်။

ချီဖန်း၏မေးခွန်းထုတ်မှုများကို ရင်ဆိုင်ရချိန်၌ လင်းထျန်းသည် စကားတစ်ခွန်းမျှ မပြောဘဲ လှောင်ပြုံးသာ ပြုံးနေခဲ့ပေ၏။

ဤသည်ကို မြင်တွေ့ချိန်၌ ချီဖန်း အလွန်အမင်း ဒေါသထွက်သွားခဲ့သည်။

"လင်းထျန်း... ထိပ်သီးအင်အားစုကြီးလေးစုထဲက တစ်ခုရဲ့ ဂိုဏ်းချုပ်အနေနဲ့ မင်းက ဘယ်လိုလုပ်ပြီးတော့ ဒီလောက်ထိ သစ္စာဖောက်တဲ့ လုပ်ရပ်မျိုးကို လုပ်နိုင်ရတာလဲ... လောကကြီးရဲ့ လှောင်ပြောင်မှုကို ခံရမှာကို မင်း မကြောက်ဘူးလား..."

သူ၏ဒေါသသည် ကောင်းကင်ယံလောက် မြင့်မားပြီး ပင်လယ်လောက် နက်ရှိုင်းနေခဲ့သည်။

ယခုအချိန်တွင် လင်းထျန်းအပေါ် သူ၏မုန်းတီးမှုမှာ ပိုင်လင်းအပေါ် မုန်းတီးမှုထက်ပင် သာလွန်နေသည်။

သူသာမက မြောက်ပိုင်း နတ်ဆိုးလှိုဏ်ဂူ၏ တခြားအဖွဲ့ဝင်အားလုံးသည်လည်း ဒေါသထွက်နေကြ၏။

သူတို့သည် တစ်ယောက်ပြီး တစ်ယောက် လင်းထျန်းကို စတင်၍ ကျိန်ဆဲလိုက်ကြသည်။

"လင်းထျန်း... သစ္စာဖောက်ခွေးကောင်..."

"မြောက်ပိုင်းနတ်ဆိုးလှိုဏ်ဂူက မင်းကို ဘယ်လိုအမှားတွေ ကျူးလွန်ခဲ့လို့လဲ..."

"ဒီလောက် အရေးကြီးတဲ့ အချိန်ကျမှ မင်းက ငါတို့ကို ဘယ်လိုလုပ်ပြီးတော့ သစ္စာဖောက်နိုင်ရတာလဲ..."

...

စိတ်လွတ်လုမတတ် ဒေါသထွက်နေသော မြောက်ပိုင်းနတ်ဆိုးလှိုဏ်ဂူမှ လူအုပ်ကြီးကို ရင်ဆိုင်ရချိန်၌ လင်းထျန်းက ခပ်ဖျော့ဖျော့ လှောင်ပြုံးတစ်ခုကိုသာ ပြုံးပြလိုက်၏။

"မြောက်ပိုင်း နတ်ဆိုးလှိုဏ်ဂူ... မင်းတို့က ဟောင်ဖို့ပဲ တတ်တော့တာလား..."

"ငါ... လင်းထျန်းက မင်းတို့ရဲ့နောက်ကျော ဓားနဲ့ ထိုးလိုက်ပြီ... မင်းတို့ ဘာလုပ်နိုင်လဲ..."

ဤစကားများ ထွက်ပေါ်လာသည်နှင့်တပြိုင်နက် မြောက်ပိုင်း နတ်ဆိုးလှိုဏ်ဂူမှ လူများအားလုံး ဒေါသထွက်သွားသည်။

သူတို့၏အဆုတ်များ ဒေါသကြောင့် ပေါက်ကွဲတော့လုမတတ် ဖြစ်နေခဲ့သည်။

သို့သော် သူတို့ ဒေါသထွက်နေသော်လည်း တစ်ဖက်လူကို မည်သို့မျှ မလုပ်နိုင်ကြချေ။

ထို့ပြင် လင်းထျန်းက "ငါ မင်းတို့ရဲ့နောက်ကျောကို ဓားနဲ့ ထိုးလိုက်ပြီ... မင်းတို့ ဘာလုပ်နိုင်လဲ" ဟူသော မျက်နှာအမူအယာကို ပြသနေပေ၏။

"ဖူး..."

တစ်စုံတစ်ယောက်က အလွန်အမင်း ဒေါသထွက်သွားသဖြင့် နေရာ၌ပင် သွေးအန်လိုက်သည်။

တခြားလူများ၏မျက်လုံးများမှာ နွားမျက်လုံးများထက်ပင် ပို၍ပြူးကျယ်နေပြီး လင်းထျန်းကို အကြည့်ဖြင့် သေစေချင်နေသည့်ပုံ ပေါက်နေခဲ့သည်။

ဤသည်က သူတို့၏ မျက်လုံးများကို ကျွတ်ထွက်သွားစေမည်လောဟု လူများကို စိုးရိမ်သွားစေခဲ့သည်။

တိုက်ပွဲဟု ခေါ်သော ဤအရာမှာ အရှေ့လေက အနောက်လေကို လွှမ်းမိုးခြင်း သို့မဟုတ် အနောက်လေက အရှေ့လေကို လွှမ်းမိုးခြင်းပင်။

ကောင်းကင်နတ်ဘုရားတောင်၏ သစ္စာဖောက်မှုနှင့်အတူ မြောက်ပိုင်းနတ်ဆိုးလှိုဏ်ဂူ အဖွဲ့ဝင်များအားလုံး ဒေါသထွက်နေခဲ့ကြပြီး သူတို့၏ စိတ်ဓာတ်များလည်း အကြီးအကျယ် ကျဆင်းသွားခဲ့သည်။

မြောက်ပိုင်းနတ်ဆိုးလှိုဏ်ဂူ၏ အရှိန်အဝါ အားနည်းသွားသည်နှင့်အမျှ ပိုင်လင်း၏ဘက်တွင် ပို၍အားကောင်းလာပေ၏။

အချိန်တခဏအတွင်းမှာပင် သူမ၏လက်ချက်ဖြင့် အသက်ဆုံးရှုံးရသူ အရေအတွက်မှာ သိသိသာသာ မြင့်တက်လာခဲ့သည်။

ပိုင်လင်းသည် ရန်သူများကို သတ်ဖြတ်နေစဉ် သူမ၏စိတ်နှလုံးသားထဲတွင် သံသယများစွာ ပေါက်ဖွားလာခဲ့သည်။

ကောင်းကင်နတ်ဘုရားတောင်၏ ဂိုဏ်းချုပ်ကို သူမ မည်သည်ကြောင့် မသိဘဲ နေမည်နည်း....

ဤသည်မှာ မြောက်ပိုင်းဒေသ ထိပ်သီးအင်အားစုကြီးတစ်စု၏ဂိုဏ်းချုပ်ပင်။

သူမသည် ကလေးဘဝကတည်းက လင်းထျန်း၏ဒဏ္ဍာရီများကိုပင် ကြားဖူးခဲ့ပေ၏။

ထိုကဲ့သို့လူမျိုးသည် မြောက်ပိုင်း နတ်ဆိုးလှိုဏ်ဂူ အဖွဲ့ဝင်များ၏ ဆုတ်ခွာရာလမ်းကြောင်းကို ပိတ်ဆို့ပေးကာ သူမအတွက် လှုပ်ရှားပေးလိမ့်မည်ဟု သူမ ဘယ်သောအခါမျှ ထင်မှတ်မထားခဲ့ချေ။

ပထမဆုံး ကြက်ပေါက်စတစ်... ယခု လင်းထျန်း... သူတို့ မည်သည်ကြောင့် သူမကို ကူညီနေကြသနည်း....

သူမ၏မှတ်ဉာဏ်ထဲတွင် ဤလူများနှင့် သူမတွင် မည်သည့်ဆက်ဆံရေးမျှ မရှိခဲ့ချေ။

ပိုင်လင်းသည် အကြောင်းအရာများကို တွေးတောနေသော်လည်း သူမ၏တိုက်ခိုက်မှု အရှိန်မှာ အနည်းငယ်မျှ နှေးကွေးမသွားခဲ့ချေ။

မကြာမီမှာပင် သူမ၏ခြေရင်းတွင် အလောင်းများ စုပုံလာခဲ့သည်။

ဤသည်က သူမ၏ ပုံမှန်မဟုတ်သော စွမ်းအားကြောင့် နံဘေးမှ စောင့်ကြည့်နေသူများကို အံ့အားသင့်သွားစေခဲ့သည်။

သူမ တစ်ယောက်တည်းဖြင့် ထိပ်သီးအင်အားစုကြီး တစ်စုလုံးကို ဤအခြေအနေအထိ တိုက်ခိုက်နိုင်ခြင်းမှာ အမှန်တကယ်ပင် ယုံကြည်နိုင်စရာ မရှိချေ။

"ဒီနေ့ မြောက်ပိုင်းနတ်ဆိုးလှိုဏ်ဂူက အဆုံးသတ်သွားတော့မယ်လို့ ငါ ထင်တယ်..."

တစ်စုံတစ်ယောက်က အံ့အားသင့်နေသော မျက်နှာအမူအယာဖြင့် ရေရွတ်လိုက်ကာ မြောက်ပိုင်း နတ်ဆိုးလှိုဏ်ဂူ၏ အဆုံးသတ်ကို တစ်ဖက်သတ် ထုတ်ပြန်ကြေညာလိုက်၏။

"အဲ့ဒါက အမှန်ပဲ မဟုတ်လား..."

"ပိုင်လင်းရဲ့စွမ်းအားက မြောက်ပိုင်းနတ်ဆိုးလှိုဏ်ဂူကို ဒုက္ခရောက်စေဖို့ လုံလောက်တယ်..."

"အခုကောင်းကင်နတ်ဘုရားတောင်က သူတို့ကို သစ္စာဖောက်ပြီး ဘက်ပြောင်းသွားပြီဆိုတော့ အခြေအနေကို ပြောင်းပြန်လှန်နိုင်မယ့် ဘယ်ဖြစ်နိုင်ခြေကိုမှ ငါ မစဉ်းစားတတ်တော့ဘူး..."

တခြားလူတစ်ဦးက ထောက်ခံလိုက်၏။

"ဒါနဲ့... နောက်ထပ် အဓိကအချက် တစ်ချက်ကို သတိထားမိတာ ငါ တစ်ယောက်တည်းလား..."

ထိုအချိန်မှာပင် အနီးအနားရှိ တစ်စုံတစ်ယောက်က စကားဝိုင်းထဲသို့ ဝင်ရောက်လာခဲ့သည်။

"မြောက်ပိုင်းဒေသရဲ့ ထိပ်သီးအင်အားစုကြီး လေးစုထဲက တစ်စုဖြစ်တဲ့ ဂုဏ်သိက္ခာရှိလှတဲ့ ကောင်းကင်နတ်ဘုရားတောင်က နတ်ဆိုးနန်းတော်နဲ့ တကယ်ကြီး ပူးပေါင်းသွားပြီးတော့... နတ်ဆိုးနန်းတော်ရဲ့ လက်အောက်ခံ ဖြစ်သွားခဲ့ပြီ...အဲ့ဒီနတ်ဆိုးနန်းတော် အင်အားစုရဲ့ ကြောက်ဖို့ကောင်းတာက ငါတို့ စိတ်ကူးယဉ်တွေးတောနိုင်တာထက်ကို ကျော်လွန်နေပြီလို့ မင်းတို့ မထင်ဘူးလား..."

ဤစကားများ ထွက်ပေါ်လာသည်နှင့်တပြိုင်နက် လူများအားလုံး ထိတ်လန့်ကြောက်ရွံမှုကို ခံစားလိုက်ရသည်။

အမှန်တကယ်ပင် သူတို့၏ အာရုံကြောများမှတုံ့ပြန်မှုသည် ဤမျှထိ နှေးကွေးမနေသင့်ချေ။

သို့သော် ယနေ့တွင် အဖြစ်အပျက်များ အလွန်များပြားခဲ့သည်။

အံ့အားသင့်ဖွယ် အဖြစ်အပျက်များ တစ်ခုပြီးတစ်ခု ဖြစ်ပေါ်လာခဲ့ပြီး လူများကို ထုံကျဉ်သွားလုမတတ်ပင် ဖြစ်စေခဲ့ပေ၏။

ပထမဆုံးအနေဖြင့် ကျင့်ကြံသူများကို တုန်လှုပ်သွားစေသော အစစ်အမှန်နတ်ဆိုးအမွေအနှစ် ထွက်ပေါ်လာခြင်း...

ထို့နောက် ပိုင်လင်းနှင့် မြောက်ပိုင်း နတ်ဆိုးလှိုဏ်ဂူတို့ကြားမှ တိုက်ပွဲ...

တစ်ကြိမ် အသတ်ခံရပြီးနောက် ပြန်လည်ရှင်သန်လာနိုင်ကာ ပြန်လည်ရှင်သန်ပြီးနောက် စွမ်းအားများ မြင့်တက်လာသည့် ထူးဆန်းသော စွမ်းရည်က လူများကို ကြောက်ရွံ့သွားစေခဲ့သည်။

ထို့နောက် နတ်ဆိုးနန်းတော်သခင် ကြက်ပေါက်စတစ် ပေါ်လာကာ ယန်သုံးပါးနယ်ပယ် တတိယအဆင့်မှ အစွမ်းထက်ကျင့်ကြံသူတစ်ဦးကို လှုပ်ရှားမှု တစ်ခုတည်းဖြင့် အနိုင်ယူခဲ့ပြီး လူများအားလုံးကို အလွန်အမင်း အံ့အားသင့်သွားစေခဲ့သည်။

ထို့နောက် ကြီးမားသော ထိပ်သီးအင်အားစုကြီး နှစ်စု၏မဟာမိတ်ဖွဲ့မှုနှင့် ကောင်းကင်နတ်ဘုရားတောင်၏ သစ္စာဖောက်မှုတို့ ဖြစ်ပေါ်လာခဲ့သည်။

ဤအဖြစ်အပျက် တစ်ခုစီတိုင်းကို စဥ်းစားကြည့်မည်ဆိုပါက မြောက်ပိုင်းဒေသ တစ်ခုလုံးကို လှုပ်ခတ်သွားစေနိုင်သော သတင်းများ ဖြစ်သည်။

ထိုအရာအားလုံး ပေါင်းစပ်သွားခြင်းက သံသယဖြစ်ဖွယ်မရှိဘဲ အလွန် ပေါက်ကွဲစေနိုင်သော အကျိုးသက်ရောက်မှုတစ်ခုကို ဖန်တီးပေးခဲ့သည်။

သေချာသည်က ဤသည်မှာ အရာအားလုံး မဟုတ်သေးချေ။

မယုံနိုင်စရာ ကိစ္စတစ်ရပ်မှာ...

ဂုဏ်သိက္ခာရှိသော ကောင်းကင်နတ်ဘုရားတောင်သည် နတ်ဆိုးနန်းတော်နှင့် ပူးပေါင်းပြီးနောက် သူတို့ကိုယ်သူတို့ ကောင်းကင်နတ်ဘုရားတောင်အဖွဲ့ဟု အမှန်တကယ် ရည်ညွှန်းခဲ့ခြင်းပင်။

ကောင်းကင်နတ်ဘုရားတောင်အဖွဲ့ဆိုသည်က မည်သည့်အရာ ဖြစ်သနည်း...

သူတို့၏ မျက်လုံးထဲတွင် အမြင့်မြတ်ဆုံးနှင့် ကျော်လွှား၍မရနိုင်သော တောင်ကြီးသည် အမှန်တကယ်ကို လက်အောက်ခံအဖွဲ့တစ်ဖွဲ့ ဖြစ်သွားလိမ့်မည်ဟု လူအများစုက ဘယ်သောအခါမျှ ထင်မှတ်မထားခဲ့ကြချေ။

သူတို့ မယုံကြည်နိုင်ဖြစ်နေစဉ်မှာပင် နတ်ဆိုးနန်းတော်အပေါ် သူတို့အားလုံး၏ ရိုသေလေးစားမှုမှာ အဆင့်သစ်တစ်ခုသို့ ချက်ချင်းမြင့်တက်သွားပေ၏။

လူအများစုသည် ပို၍နက်ရှိုင်းစွာ မတွေးဘဲ မနေနိုင်ခဲ့ကြချေ။

လက်ရှိချိန်၌ ကောင်းကင်နတ်ဘုရားတောင်သည် နတ်ဆိုးနန်းတော်၏အင်အားစုထဲသို့ ပေါင်းစည်းသွားခဲ့လေပြီ။

နတ်ဆိုးနန်းတော်သခင်၏ ယခင်လုပ်ရပ်များနှင့် ပေါင်းစပ်လိုက်ချိန်၌ သူတို့နှင့် ပိုင်လင်းကြားတွင် နက်ရှိုင်းသော ဆက်ဆံရေးတစ်ခု ရှိနေပုံရပေ၏။

ဤနတ်ဆိုးနန်းတော်သည် ပိုင်လင်းနှင့် တစ်ဖက်တည်း ရပ်တည်နေသော အင်အားစုတစ်ခု ဖြစ်ကြောင်း သိသာထင်ရှားနေသည်။

ဤကဲ့သို့ ဧရာမတည်ရှိမှုကြီးက နံဘေးမှ စောင့်ကြည့်နေသဖြင့် သူတို့သည် ယနေ့၌ သမိုင်းဝင် အခိုက်အတန့်တစ်ခုကို အမှန်တကယ် မြင်တွေ့နိုင်တော့ပေမည်။ ဤသည်မှာ ထိပ်သီးအင်အားစုကြီးတစ်စု၏ ကျဆုံးခြင်းပင်။

ဤသည်ကို တွေးမိသည်နှင့် တပြိုင်နက် လူအများစုသည် သူတို့၏သွေးများ ဆူပွက်လာကာ ဂဏာမငြိမ်ဖြစ်သော ခံစားချက်ကို ခံစားလိုက်ရသည်။

ထိပ်သီးအင်အားစုကြီးတစ်စုသည် မည်သည့်အရာကို ကိုယ်စားပြုသနည်း....

ဤသည်က လူတိုင်း၏ခေါင်းပေါ်ရှိ တောင်ကြီးတစ်လုံး ဖြစ်ရုံသာမက လူများ၏နှလုံးသားထဲတွင် ရိုက်နှိပ်ခံထားရသော ပြိုင်ဘက်ကင်းသည့် သင်္ကေတတစ်ခုလည်း ဖြစ်ပေ၏။

ဤသည်က သူတို့၏သွေးများထဲတွင် စီးဆင်းနေပြီး သူတို့၏မျိုးဆက်များဆီသို့ လက်ဆင့်ကမ်းလာခဲ့သည်။

ယခု၌မူ ထိုတောင်ကြီး ပြိုကျတော့မည့် အခြေအနေမှာ ထင်ရှားနေခဲ့လေပြီ။

ဤအဖြစ်အပျက် အဆုံးသတ်သွားပြီးနောက် မြောက်ပိုင်းဒေသသည် အင်အားစုများ၏ အသစ်စက်စက် အပြောင်းအလဲတစ်ခုကို မလွဲမသွေ ကြိုဆိုရမည်ဖြစ်ကြောင်း လူများအားလုံး မသဲမကွဲ ခံစားလိုက်ရသည်။

Thank For Reading.