ရန်ယွီနတ်ဘုရားမရဲ့ ပြိုင်ဘက်ကြီး... ပေါ်ထွက်လာခဲ့ပြီလား

စူးရွှမ်သည် မည်သည့်နေရာသို့ ဦးတည်သည်ကို မသိနိုင်သည့် မြေအောက် လှေကားအတိုင်း ဆက်လက် ဆင်းလျှောက်သွားသည်။

"စစ်မှန်တဲ့ ဓားလမ်းစဉ်ဆိုတာဟာ ရှေ့ကို ရဲဝံ့စွာ ချီတက်ပြီး၊ ဓားဖြင့် စိတ်နှလုံးကို ဖြတ်တောက်ရုံသာမက ဓားနှလုံးသားကို ပြုစုပျိုးထောင်ဖို့ မရေမတွက်နိုင်တဲ့ စမ်းသပ်မှုတွေနဲ့ ဒုက္ခတွေကို ဖြတ်သန်းရမယ် ....ဒါမှသာ စစ်မှန်တဲ့ဓားတစ်လက်ကို ရရှိနိုင်လိမ့်မယ်"

" ဒါမှသာ ဒီဓားနဲ့ တောင်ကို ရွှေ့ ၊ မြစ်ကို ပိုင်းဖြတ်လို့ ...မကောင်းဆိုးဝါးတွေကို နှင်ထုတ်ကာ ၊ နတ်ဆိုးတွေကို နှိမ်နင်းရင်း နတ်ဘုရားတွေကို သတ်ဖြတ်နိုင်မယ် ...ကြယ်ကို ဆွတ်ယူကာ မြေကြီးကို ဖျက်ဆီးလို့ ၊ ကောင်းကင်ကို ဖြတ်တောက်မယ် "

"ဒါပေမဲ့ ဒီလမ်းဟာ လွယ်ကူတဲ့ လမ်းတော့ မဟုတ်ဘူး"

ထိုသို့ ညည်းညူရင်း ၊ စူးရွှမ်၏ အရိပ်သည် မှောင်မိုက်သော စင်္ကြအဆုံးတွင် ဖြည်းညှင်းစွာ ပျောက်ကွယ်သွားခဲ့သည်။

သို့သော်ငြား ၊ ဤလမ်းသည် မလွယ်ကူချေ။ ၎င်းသည် ချောက်ကမ်းပါးတစ်ခု ဖြစ်နိုင်သလို သို့မဟုတ် မျှော်လင့်ချက်ကင်းမဲ့ခြင်းလည်း ဖြစ်နိုင်သည်။

သို့သော်လည်း တစ်ချိန်တည်းမှာပင် ၊ မြက်ခင်းပြင်ကို လောင်ကျွမ်းစေနိုင်သော မီးပွားကို လက်ထဲတွင်ရှိသော ဓားဖြင့် ငြိမ်းသတ်နိုင်ပေလိမ့်မည်။

..........

ဝုန်း ！ ！

ကောင်းကင်ယံတွင် တသိမ့်သိမ့် ရိုက်ခတ်လှုပ်ရှားနေသော ဓားစွမ်းအင် သမုဒ္ဒရာကြီးအတွင်း ၊ လင်းဟန်သည် သူ၏ လက်ကို ဝှေ့ယမ်းလှုပ်ရှားလိုက်သည်နှင့် အေးစိမ့်သော အအေးဓာတ်သည် 'လူ့လောက ဓား' အပေါ်တွင် စုပုံလာသည်။

လင်းဟန်သည် လျှပ်တပြတ် ဝင်းလက်သွားသော လျှပ်စီးကြောင်းအလား သူ့လက်ကို ဝှေ့ယမ်းလိုက်သည်။

ရွှမ်း! !

မျက်စိစူးရှစေသော ဓားအလင်းတန်းသည် ရုတ်တရက် ဝင်းလက်တောက်ပသွားပြီး ၊ ဓားချင်းထိမှန်သံများသည် မိုးခြိမ်းသံအလား မြည်ဟည်းထွက်ပေါ်လာသည်။

အလျားလိုက် ဓားသွားတစ်ချက်သည် ကောင်းကင်နှင့် မြေကြီး၏ လျှို့ဝှက်ဆန်းကြယ်သော အငွေ့အသက်များကို ယူဆောင်လာသကဲ့သို့ ၎င်းကို တားဆီးရန် ခက်ခဲစေသည်။

"မဖြစ်နိုင်ဘူးမလား.... ဒီလောက်မြန်မြန် အနိုင်အရှုံး ပေါ်တော့မှာလား"

ထိုမြင်ကွင်းကို မြင်လိုက်ရသော ကျင့်ကြံသူတိုင်း ၊ လက်ဖဝါးများ ချွေးထွက်ကာ ရင်ခုန်သံများ မြန်ဆန်လာကြသည်။

ဤရုတ်တရက် ဖြစ်ပေါ်လာသော ဓားချက်သည် လူတိုင်းကို အံ့အားသင့်စေခဲ့သည်။

လင်းဟန်သည် စူးချန်ကဲနှင့် ယှဉ်ပြိုင်နေသည့် အတောအတွင်း ၊ ဤမျှ ကြောက်မက်ဖွယ်ကောင်းသော ဓားတစ်ချက်ကို ထုတ်လာခဲ့လိမ့်မည်ဟု မည်သူမျှ ထင်မထားခဲ့ပေ။

ဓား၏ အရှိန်အဝါသည် လူတိုင်းကို အသက်ရှုကျပ်စေပြီး ၊ ဤဓားတစ်ချက်သည် မိုးမြေတစ်ခွင်လုံးကို တုန်လှုပ်သွားစေနိုင်သည့်အလား ထင်မှတ်ရသည်။

အလွန်ဝေးကွာသော နေရာမှ ကြည့်ရှုနေကြသော ကျင့်ကြံသူများပင်လျှင် မိမိကိုယ်ကို ပုရွက်ဆိတ်များကဲ့သို့ ခံစားလိုက်ရပြီး ၊ စိတ်ပျက်အားငယ်မှု နှင့် ကြောက်ရွံ့မှုများ ဖြစ်ပေါ်လျက် ရှိသည်။

သို့သော်လည်း လူတိုင်း၏ ထိတ်လန့်တုန်လှုပ်မှုနှင့် နှိုင်းယှဉ်ရလျှင် ၊

ဤဓားချက်အောက်တွင် ရှိနေသော စူးချန်ကဲသည် ယခင်ကအတိုင်းပင် ယုံကြည်ချက်အပြည့်ဖြင့် သူ၏ တည်ငြိမ်မှုကို ဆက်လက်ထိန်းသိမ်းထားဆဲ ဖြစ်သည်။

အဖြူရောင် ဝတ်ရုံထည်သည် ဓားစွမ်းအင်၏ ဟိန်းဟောက်သံအောက်တွင် တဖျပ်ဖျပ် လွင့်နေပြီး ၊ သူ၏ နက်မှောင်သော ဆံနွယ်များသည် လေထဲတွင် ကခုန်နေလေ၏။ နက်နဲတောက်ပသော မျက်ဝန်းတစ်စုံ၌ အံ့အားသင့်သော အရိပ်အမြွက်များ ရှိနေပြီး ၊ သူ့ထံသို့ ကျဆင်းလာသော ဓားစွမ်းအင်မြစ်ကို စူးစိုက်ကြည့်ရှုနေသည်။

လင်းဟန် ထုတ်လွှတ်လိုက်သော ဤဓားတစ်ချက်သည် အမှန်ပင် ထူးခြားပေသည်။

ဤမျှ ကြီးမားသော ဓားစွမ်းအင်၏ လွှမ်းမိုးမှုအောက်တွင် ၊ ဤနေရာရှိ ကောင်းကင်နှင့် မြေကြီးသည် ၎င်း၏ လွှမ်းမိုးမှုကို ခံရကာ ဘေးပတ်ပတ်လည်တွင် ဝဲဂယက်သဖွယ် စုဝေးလာကြသည်။

ထို့အပြင် ဤဓားစွမ်းအင်မြစ်အောက်တွင် ရှိနေသော စူးချန်ကဲ၏ စိတ်ထဲတွင် မိမိကိုယ်ကိုယ် အရေးမပါသော ဖြစ်တည်မှုကဲ့သို့ ခံစားချက်တစ်ခု ဖြစ်ပေါ်လာစေသည်။

"ဒီဓားက တကယ်ကို အစွမ်းထက်ပေမယ့် ဒါပေမဲ့ ပြီးပြည့်စုံဖို့ လိုပါသေးတယ် "

စူးချန်ကဲသည် ထိုက်တောင် ကဲ့သို့ မလှုပ်မယှက် တည်ငြိမ်စွာဖြင့် ရပ်နေကာ ၊ သူ၏ ကောင်းကင်လမ်းစဉ် အာဏာစက် ဓားကို ဆုပ်ကိုင်လျက် ထိုအရာကို ထိပ်တိုက်ရင်ဆိုင်ရန် အသင့်အနေအထားဖြင့် ရှိနေသည်။

ဧရာမ ဓားသက်တံ့ကြီးသည် သူ့ကို ဝါးမျိုတော့မည့် အချိန် ၊

သူ၏လှုပ်ရှားမှုများသည် လောကကို ဖန်တီးလေသကဲ့သို့ ၊ မလိုအပ်သော အလှဆင်မှုများ မပါဝင်ဘဲ သဘာဝကျကျဖြင့် ရှေ့သို့ လှပစွာ ခုတ်ပိုင်းလိုက်သည်။

ချွင်——! !

မိုးကောင်းကင်ရှိ လကို အလျားလိုက် ဖြတ်တောက်လိုက်သကဲ့သို့ ၊ ‌မိုးကောင်းကင်ကိုပင် တုန်လှုပ်သွားစေသော ပေါက်ကွဲသံများ ထွက်ပေါ်လာကာ ၊ ကြည့်ရှုနေသူတိုင်းကို ထိတ်လန့်တုန်လှုပ်သွားစေသည်။

ထို့နောက် ထိတ်လန့်စရာကောင်းသော မြင်ကွင်းတစ်ခု ဖြစ်ပေါ်လာခဲ့သည်—

မူလက စူးချန်ကဲကို ဝါးမျိုတော့မည့် ဓားသမုဒ္ဒရာပင်လယ်ကြီးသည် အလွန်အားကောင်းသော စွမ်းအားတစ်ခု၏ ထိုးနှက်မှုကို ခံလိုက်ရပုံပေါ်သည်။

စူးချန်ကဲကို ဝါးမျိုတော့မည့် အခိုက်တန့်မှာပင် ၊ အဖြူရောင်အလင်း တစ်ချက် ဝင်းလက်သွားပြီး ချက်ချင်းဆိုသလိုပင် အလယ်နေရာ၌ ပေါက်ကွဲမှုကြီးတစ်ခု ဖြစ်ပေါ်ခဲ့သည်။

ထူထပ်သော တိမ်မည်းများဖြင့် ဖုံးလွှမ်းနေသော မိုးကောင်းကင်ကြီးကို လေပြင်းမုန်တိုင်းတစ်ခုက တိုက်ခတ်သွားပြီးနောက် ၊ ရုတ်တရက်ဆိုသလို တိမ်များ ကင်းစင်ကာ ထွက်ပေါ်လာသော လမင်းကို မြင်တွေ့လိုက်ရသကဲ့သို့ပင်။

မိုးမြေတစ်ခွင်လုံးကို လွှမ်းခြုံထားသော ဓားစွမ်းအင်များသည် ချက်ချင်းပင် ပြိုကွဲပျောက်ကွယ်သွားသည်ကို မြင်တွေ့လိုက်ရသဖြင့် လူတိုင်း ထိတ်လန့်တုန်လှုပ်သွားကြသည် ။

သူတို့၏ စိတ်ဝိညာဉ်သည် ကြီးမားသော ဆူနာမီ လှိုင်းလုံးကြီးများ၏ ရိုက်ခတ်မှုကို ခံလိုက်ရသကဲ့သို့ ၊ လူတိုင်း၏ အမူအရာများသည် မေးရိုးပြုတ်လုမတတ် ပါးစပ်အဟောင်းသား ဖြစ်နေကြသည်။

"ဒါက.........."

အကယ်၍ ယခင်က စူးချန်ကဲသည် သူတို့၏ မှတ်ဉာဏ်ထဲတွင် ထူထပ်သော တိမ်မည်းများဖြင့် ဖုံးအုပ်ခံထားသော တောက်ပသော လမင်း ဖြစ်ခဲ့ပါက ၊

ဤအခိုက်အတန့်တွင်မူ ၊ တိမ်မည်းများ ကင်းစင်ကာ ကောင်းကင်ယံမှ လူ့လောကသို့ ရောင်ခြည်များ ဖြာကျလာသော လူတိုင်း မော့ကြည့်ရသည့် လမင်းတစ်စင်း ဖြစ်ပေလိမ့်မည်။

ယခင်က ပါရမီရှင်တပည့်များသည် စူးချန်ကဲသည် အားကောင်းသော နောက်ခံကို အမှီပြုနေရပြီး ၊ သူ၏ အရည်အချင်းသည် အမတနယ်မြေရှိ ထိပ်တန်း ပါရမီရှင်များထက် များစွာ နိမ့်ကျမည်ဟု ထင်မှတ်ခဲ့ကြသည်။

သို့သော်လည်း ဤတစ်ခေါက် နတ်ဘုရားလက်နက် အမတမျှော်စင် ခရီးစဉ်တွင် စူးချန်ကဲသည် လောကလူသားများကို ထိတ်လန့်သွားစေသည့် ဖြစ်ရပ်များကို တစ်ခုပြီးတစ်ခု ဖန်တီးခဲ့သည်ဟု ဆိုနိုင်သည်။

ဤသူသည် လောကကိုကျော်လွန်ကာ မရေတွက်နိုင်သော ပါရမီရှင်များ အားကျရသည့် ပါရမီရှင်တစ်ဦး ဖြစ်ပေသည်။

" စူး မိတ်ဆွေ ရဲ့ ဓားလမ်းစဉ် အရည်အချင်းက ကျုပ် တစ်သက်တာ တွေ့ဖူးသမျှ ပါရမီရှင်အားလုံးထဲမှာ ပထမအဆင့်ပဲ!"

မိမိ၏ အပြင်းထန်ဆုံး ဓားချက်ကိုပင် စူးချန်ကဲသည် လွယ်လင့်တကူ ဟန့်တားနိုင်သည်ကို မြင်လိုက်ရချိန်တွင်။

လင်းဟန်သည် မျက်နှာပျက်သွားမည့်အစား ဆန့်ကျင်ဘက်အနေဖြင့် ချီးကျူးစကား ဆိုလိုက်သည်။

"ဒီတစ်ကြိမ် ယှဉ်ပြိုင်မှု ပြီးဆုံးသွားရင် ၊ ကျုပ် ခင်ဗျားနဲ့အတူ အရက်သောက်ရင်း ဓားပညာရပ်ကို အတူတူ စူးစမ်းလေ့လာဖို့ မျှော်လင့်မိတယ်"

" မိတ်ဆွေ လင် ၊ ခင်ဗျားကလည်း ကျုပ် ကြုံတွေ့ဖူးသမျှ ဓားသမားတွေထဲမှာ အစွမ်းထက်‌ဆုံးပဲ ၊ ခင်‌ဗျားရဲ့ ဓားက နာမည်နဲ့ တကယ်ကို လိုက်ဖက်ပါပေတယ်"

စူးချန်ကဲသည် ချဲ့ကားပြောဆိုခဲ့ခြင်း မဟုတ်ပေ။

လင်းဟန်၏ ဓားတစ်ချက်သည် မိုးနှင့်မြေကို တုန်လှုပ်စေကာ ၊ စကြဝဠာ တစ်ခုလုံးကိုပင် လှစ်ပစ်နိုင်စွမ်း ရှိသည်ဟု ဆိုရပေလိမ့်မည်။ ဓားသည် သူဖြစ်ပြီး ၊ သူသည် ဓားဖြစ်သည်။

အဆိုပါ ဓားချက်အောက်တွင် ၊ စစ်မှန်အမတ နယ်ပယ်အဆင့်ရှိ မည်သည့်ကျင့်ကြံသူမဆို ၎င်း၏ ဒဏ်ချက်ကို ခံယူနိုင်မည်မဟုတ်ဟု ထင်မှတ်ရသည်။

မိမိ၏ ခန္ဓာဖွဲ့စည်းပုံသာ လုံလောက်စွာ အားကောင်းခြင်း မရှိခဲ့ပါက၊ သူသည်ပင် စောနက ဓားတစ်ချက်စာကို ခံယူနိုင်လိမ့်မည် မဟုတ်ပေ။

" စူး မိတ်ဆွေ ၊ မင်းမှာ အရေးကြီးတဲ့ ကိစ္စရှိတယ်ဆိုတာ ငါ သိတယ်"

" အဲ့တော့ ငါတို့ ဓားတစ်ချက်တည်းနဲ့ အနိုင်အရှုံး ဆုံးဖြတ်ကြရအောင်၊ ဘယ်လိုလဲ "

ထိုစကားကို ကြားလိုက်ရချိန်တွင် ၊ စူးချန်ကဲသည် ခဏတာ အံ့အားသင့်သွားပြီး ၊ ထို့နောက် ပြုံးမိလိုက်သည်။

တဖက်လူသည် ယှဉ်ပြိုင်မှု တရားမျှတစေရန်အတွက် ဦးစွာ သူ့အား ဆေးတစ်ဘူး ပစ်‌ပေးကာ ဒဏ်ရာကို ကုသစေခဲ့သည်။

ယခုတွင်မူ ၊ မိမိတွင် အရေးကြီးကိစ္စများ ရှိနေ‌သည်ကို မြင်ပြီး အချိန်ဖြုန်းတီးခြင်း မရှိစေရန် ယှဉ်ပြိုင်ချိန်ကို လျှော့ချရန် ဦးစားပေးနေပြန်သည်။

စူးချန်ကဲသည်ပင် ဤမျှဖြောင့်မတ်သော ဓားသမားအပေါ်တွင် သဘောကျသော ခံစားချက်တစ်ခု မလွှဲမရှောင်သာ ဖြစ်ပေါ်လာမိသည်။

"ကောင်းပြီ"

ထိုစကားသံအဆုံးတွင် သူတို့ နှစ်ယောက်သည် အချင်းချင်း ကြည့်ကာ ပြုံးလိုက်ကြသည်။

သူတို့၏ အမူအရာသည် နှစ်ပေါင်းများစွာ မတွေ့ခဲ့ရသော မိတ်ဆွေဟောင်းများကဲ့သို့ ၊ အချင်းချင်း ချစ်ခင်လေးစားသော အငွေ့အသက်များ ရှိနေခဲ့သည်။

ထိုမြငိကွင်းကို အဝေးကနေ ကြည့်ရှုနေသော ကွေးယွမ်အမတဂိုဏ်းမှ လူများမှာ အမူအရာမျိုးစုံ ဖြစ်နေကြသည်။

မိမိတို့၏ ချန်ကဲဆက်ခံသူသည် ပြင်ပလူများရှေ့တွင် ဤကဲ့သို့သော မျက်နှာအမူအရာမျိုးကို ထုတ်ဖော်ပြသသည်မှာ ဒါပထမ‌ဆုံးအကြိမ်သာ ဖြစ်သည်။

" မဟုတ်မှလွဲရော ....."

ဝမ်မင်တစ်ယောက် မနေနိုင်ဘဲ ရေရွတ်မိလိုက်သည်။

"ရန်ယွီနတ်ဘုရားမရဲ့ ပြိုင်ဘက်... ပေါ်ထွက်လာခဲ့ပြီလား"