စစ်တူရှန်ရဲ့ အမွေအနှစ်

"အဟမ်း... ညီအစ်ကိုလင်း၊ ကျန့်ခန်းယွမ်ထဲမှာ အားနေတဲ့ ဗီလာတွေ ရှိသေးလား"

အဓိက အလုပ်ကိစ္စများ ဆွေးနွေးပြီးသွားသည်နှင့် ချင်းလင်က ဖားလျားသည့်အမူအရာဖြင့် ချက်ချင်း မေးလိုက်သည်။

"ရှိပါသေးတယ်၊ ဘာဖြစ်လို့လဲ"

လင်းဖန်က ပေါ့ပေါ့ပါးပါးပင် ပြန်ဖြေလိုက်သည်။

ကျန့်ခန်းယွမ်တွင် ဗီလာအလုံးပေါင်း ၁၂၀ ရှိပြီး အလွန်ကျယ်ဝန်းသည်။ အများစုမှာ နှစ်ထပ်ခွဲ အဆောက်အအုံများ ဖြစ်ကြပြီး သုံးထပ်ခွဲဗီလာမှာ ဆယ်ဂဏန်းခန့် ရှိသည်။ လူပေါင်း သောင်းချီ နေထိုင်နိုင်လောက်အောင် ကျယ်ဝန်းလှရာ ဝန်ဆောင်မှုအဖွဲ့ဝင်များအားလုံး နေထိုင်လျှင်ပင် ဗီလာထက်ဝက်နီးပါး အားနေဦးမည် ဖြစ်သည်။

"ဟဲဟဲ တို့တွေကြားက သံယောဇဉ်ကို ကြည့်ဦးလေကွာ ငါ့ကို တစ်လုံးလောက် ပေးပါလား၊ မူရင်းဈေးအတိုင်း ငါဝယ်ပါ့မယ်"

ချင်းလင်က လက်နှစ်ဖက်ကို ပွတ်ရင်း ရှက်သလိုလို အမူအရာဖြင့် လင်းဖန်ကို ကြည့်လိုက်သည်။

"ဖူး"

လင်းဖန် တစ်ယောက် သောက်လက်စ ရေပင် ပန်းထွက်မတတ် ဖြစ်သွားသည်။ ချင်းလင်၏ ထိုအမူအရာမှာ တကယ့်ကို ကြည့်ရဆိုးလှသည်။

"ကဲပါ... ဟန်ဆောင်မနေပါနဲ့တော့ ငါ မင်းအတွက် တစ်လုံး ပေးပါ့မယ် ပိုက်ဆံလည်း ပေးမနေနဲ့၊ ငါ့မှာ ပိုက်ဆံ မလိုပါဘူး ဒါပေမဲ့ အထဲက အပြင်အဆင်ကိုတော့ မင်းဘာသာမင်း လုပ်ရမှာနော်"

"ယေး"

ချင်းလင်တစ်ယောက် ပျော်လွန်း၍ ထခုန်တော့သည်။ ဘေးနားရှိ ဝမ်ချောင်ကလည်း ထိုအခြေအနေကို ကြည့်ပြီး

"ညီအစ်ကိုလင်း... ငါ့ကိုလည်း..."

လင်းဖန်က လက်ကာပြလိုက်သည်။ ချက်ချင်းပင် မိုရှင်းယာက အထဲသို့ဝင်သွားပြီး ဗီလာ အမှတ် (၆၆) နှင့် (၆၇) ၏ သော့နှစ်စုံကို ယူလာကာ သူတို့နှစ်ဦးကို ပေးလိုက်သည်။ အဆိုပါ ဗီလာများမှာ လျှို့ဝှက်နံပါတ်သော့များ ဖြစ်သော်လည်း စက်မှုသော့များကိုလည်း လုံးဝ ဖျက်သိမ်းထားခြင်း မရှိပေ။

"ဟဲဟဲ ဒါဆိုရင် ငါတို့တွေက အားမနာတော့ဘူးနော် အမြန်ဆုံးပဲ အပြင်အဆင်တွေ လုပ်ဖို့ စီစဉ်လိုက်တော့မယ်"

ဟု ဝမ်ချောင်နှင့် ချင်းလင်တို့က ဆိုလိုက်သည်။

ကျန့်ခန်းယွမ်တွင် နေထိုင်ခွင့်ရခြင်းမှာ သူတို့အတွက် ကံကောင်းခြင်းတစ်ရပ် ဖြစ်သည်။ အဘယ်ကြောင့်ဆိုသော် ဤနေရာသည် လင်းဖန်၏ သီးသန့်နယ်မြေဖြစ်ပြီး လုံခြုံရေးမှာလည်း အထူးကောင်းမွန်သောကြောင့် ဖြစ်သည်။ ပြင်ပမှ လူစိမ်းများကို ခေါ်လာပါက လုံခြုံရေးအတွက် စိုးရိမ်ရသဖြင့် သူတို့နှစ်ဦးစလုံးက အပြင်အဆင်လုပ်ငန်းများကို အတူတူ အမြန်ဆုံး အပြီးသတ်ရန် ဆုံးဖြတ်လိုက်ကြသည်။

"မင်းတို့နှစ်ယောက်ကတော့ တကယ်ပဲ..."

လင်းဖန်က သူတို့ကို သံသယဖြင့် ကြည့်လိုက်သည်။

"ဟဲဟဲ... ကျန့်ခန်းယွမ်က အရမ်းကောင်းနေလို့ တို့တွေလည်း မနေနိုင်ဘဲ မနာလိုဖြစ်သွားတာပါ"

ဟု ချင်းလင်က ပြုံး၍ ပြောသည်။ အမှန်စင်စစ် သူတို့နှစ်ဦးစလုံးက ဤနေရာ၏ လုံခြုံရေးကို သဘောကျနေကြခြင်း ဖြစ်သလို၊ သူဌေးကြီးလင်းဖန်၏ အိမ်သို့လည်း မကြာခဏ ထမင်းလာစားနိုင်မည် မဟုတ်ပါလား။

"ရပါပြီ... ရပါပြီ"

လင်းဖန်က လက်ကာပြလိုက်သည်။

တကယ်တော့ သူသည် ဝမ်ချောင်တို့ကို စနောက်ရုံသာ ဖြစ်သည်။ ဤဗီလာများအပေါ် သူ အလွန်အမင်း တွယ်တာနေခြင်းမျိုး မရှိပေ။ ကျန့်ခန်းယွမ်တွင် သူနှင့် ဝန်ဆောင်မှုအဖွဲ့သာရှိသဖြင့် အနည်းငယ် ခြောက်ကပ်နေရာ ဝမ်ချုန်းတို့ ရောက်လာခြင်းက ပို၍ စည်ကားစေပေလိမ့်မည်။ သာမန်လူများအတွက် ယွမ်သန်း ရာချီတန်သော ဗီလာမှာ တန်ဖိုးကြီးသော်လည်း သူ့အတွက်မူ ဖုန်မှုန့်မျှသာ ဖြစ်သည်။

ဝမ်ချောင်နှင့် ချင်းလင်တို့မှာ လင်းဖန်ကို နှုတ်ဆက်ပြီးနောက် ကျန့်ခန်းယွမ်မှ အလျင်အမြန် ထွက်ခွာသွားကြသည်။ လင်းဖန်မှာမူ ယခုလေးတင် အမွေဆက်ခံထားသော ပရိုဂရမ်ရေးဆွဲခြင်း အတတ်ပညာများကို ပြန်လည် စုစည်းရန် အချိန်ယူလိုက်တော့သည်။

"စနစ် ငါ့မှာ မယူရသေးတဲ့ ဆုလာဘ် ရှိသေးလား"

စာကြည့်ခန်းထဲတွင် တိတ်ဆိတ်စွာ ထိုင်နေရင်း ရှေ့မှ အလင်းမျက်နှာပြင်ကို ကြည့်ကာ လင်းဖန်က စိတ်ထဲမှ မေးလိုက်သည်။

【ဒင်! ဂုဏ်ယူပါသည် စနစ်ရှင် ပင်မမစ်ရှင်ဖြစ်သော 'အသက်မွေးဝမ်းကျောင်း စတင်ခြင်း - နီဗားနားအိတိဖုန်း ပထမဆုံးနေ့ ရောင်းအား ယွမ်သန်း ၁၀၀ ကျော်ခြင်း' ကို အောင်မြင်စွာ ပြီးမြောက်ခဲ့ပါသည်】

【ဆုလာဘ်အနေဖြင့် 'အမွေဆက်ခံခွင့်' တစ်ကြိမ် ရရှိပါသည်】

【အမွေဆက်ခံခွင့်ကို အသုံးပြုမလား】

"အသုံးပြုမယ်"

လင်းဖန်က မဆိုင်းမတွပင် ခေါင်းညိမ့်လိုက်သည်။

ခဏအကြာ...

【ဒင်! ဂုဏ်ယူပါသည် စနစ်ရှင် စစ်တူရှန်ရဲ့ အမွေအနှစ်ကို ဆက်ခံရရှိခဲ့ပြီး 'ကွန်ပျူတာ တရုတ်စာလုံး ပရိုဂရမ်ဘာသာစကား' ကို ရရှိသွားပါပြီ】

【စစ်တူရှန့်- ဇာတိမှာ အပြိုင်ကမ္ဘာမှ 'ကမ္ဘာမြေကြယ်' ၏ ယန်ဟွမ်အင်ပါယာဖြစ်ပြီး၊ 'ကွန်ပျူတာ တရုတ်စာလုံး ပရိုဂရမ်လောက၏ ဖခင်' ဟု ဘွဲ့နာမည် ရရှိထားသည် သူက ၂၁ ရာစုအတွင်း ကမ္ဘာမြေကြယ်၏ အကြီးကျယ်ဆုံး သိပ္ပံပညာရှင်များထဲမှ တစ်ဦး ဖြစ်သည်】

'တရုတ်စာလုံး ပရိုဂရမ်ဘာသာစကား' ဟုတ်လား...

သူ ရရှိလိုက်သည့် အမွေအနှစ်ကို ကြည့်ပြီး လင်းဖန် ဆွံ့အသွားမိသည်။

ယခင်က ကွန်ပျူတာဘာသာစကားနှင့် ပရိုဂရမ်ရေးဆွဲခြင်း အတတ်ပညာများကို ရရှိခဲ့ပြီး ဖြစ်သည်။ ယခုမူ တရုတ်စာလုံးဖြင့် ပရိုဂရမ်ရေးသည့် နည်းပညာကို ရရှိလာခြင်း ဖြစ်သည်။ စနစ်သည် သူ့ကို တမင် စနောက်နေခြင်းလော၊ သို့မဟုတ် လက်ရှိကမ္ဘာ၏ နည်းပညာအဆင့်အတန်းကို စိတ်တိုင်းမကျခြင်းလော မသိရပေ။ စမတ်ဖုန်းလည်ပတ်မှုစနစ်ကို တီထွင်ခဲ့သည်မှာ မလုံလောက်သေးဘဲ ယခုအခါ ကွန်ပျူတာလောကကိုပါ တော်လှန်ပြောင်းလဲရန် ကြိုးစားနေခြင်း ဖြစ်သည်။

သူသည် စာကြည့်ခန်းရှိ ကွန်ပျူတာရှေ့တွင် ထိုင်ကာ သူ၏ ဦးနှောက်ထဲသို့ ရောက်ရှိလာသော ဗဟုသုတများကို စတင် စမ်းသပ်ကြည့်သည်။ အချက်အလက်များစွာက သူ၏ ဦးနှောက်ထဲတွင် နေရာယူထားရာ အမြန်ဆုံး လေ့လာမှတ်သားခြင်း မပြုပါက သူ၏ ဦးနှောက်မှာ ပေါက်ကွဲမတတ် ခံစားနေရသည်။

အချိန်တစ်နာရီခန့် ကုန်လွန်သွားသောအခါ လင်းဖန်သည် တရုတ်စာလုံးများကို စတင် ရိုက်နှိပ်ကြည့်သည်။ သူသည် ပရိုဂရမ်ရေးဆွဲခြင်း အတတ်ပညာနှင့် တရုတ်စာလုံး ပရိုဂရမ်ဘာသာစကားတို့ကို ပေါင်းစပ်ကာ အဆက်မပြတ် လေ့လာနေတော့သည်။

"စစ်တူရှန်က တကယ့် ပါရမီရှင်ပဲ"

သုတေသန လုပ်နေရင်း လင်းဖန် တစ်ယောက် အံ့သြစွာ ရေရွတ်လိုက်မိသည်။

ပြိုင်ဘက်ကမ္ဘာမှ ယန်ဟွမ်အင်ပါယာတွင် အသုံးပြုသော တရုတ်စာလုံးနှင့် ယနေ့ခေတ် တရုတ်စာလုံးမှာ အနည်းငယ် ကွဲပြားသော်လည်း အခြေခံအားဖြင့် ဆင်တူကြသည်။ လက်ရှိ ကမ္ဘာ့ကွန်ပျူတာလောကတွင် အသုံးပြုနေသော ပရိုဂရမ်ဘာသာစကားများမှာ အနောက်နိုင်ငံသားများက အင်္ဂလိပ်စာလုံးများကို အခြေခံ၍ တီထွင်ခဲ့ကြခြင်း ဖြစ်သည်။

တရုတ်စာလုံးနှင့် အင်္ဂလိပ်စာလုံးမှာ လုံးဝ ကွဲပြားသော ဘာသာစကားများ ဖြစ်ကြသည်။ အင်္ဂလိပ်စာမှာ တစ်ဖက်မြင်စာလုံးပေါင်းစနစ် ဖြစ်သော်လည်း၊ တရုတ်စာမှာ ရုပ်ပုံသင်္ကေတများမှ ဆင်းသက်လာသော နှစ်ဖက်မြင်စာလုံးများ ဖြစ်ကြသည်။ ထို့ကြောင့် တရုတ်စာလုံးများကို အင်္ဂလိပ်အခြေခံ ကွန်ပျူတာစနစ်များတွင် အသုံးပြုရန်မှာ အလွန်ခက်ခဲလှသည်။

သို့သော် စစ်တူရှန်၏ တီထွင်မှုမှာ အင်္ဂလိပ်အခြေခံ ကွန်ပျူတာများနှင့်လည်း ကိုက်ညီမှုရှိအောင် ဖန်တီးထားခြင်း ဖြစ်သည်။ ဤကဲ့သို့သော အသစ်စက်စက် ကွန်ပျူတာဘာသာစကား စနစ်ကြီးတစ်ခုမှာ လင်းဖန်အတွက် ယခင်က မကြုံဖူးသေးသော နယ်ပယ်သစ်တစ်ခု ဖြစ်သည်။ ၎င်းမှာ C Language သင်ယူခြင်းထက် များစွာ ပိုမိုနက်နဲလှသည်။

တစ်နေ့ခင်းလုံး သူသည် ဤတရုတ်စာလုံး ပရိုဂရမ်ဘာသာစကားကို လေ့လာရင်း အချိန်ကုန်သွားခဲ့သည်။ အချိန်ကုန်မှန်း မသိလောက်အောင်ပင် သူသည် သိပ္ပံနည်းကျ သုတေသနလောကထဲတွင် စိတ်ဝင်တစား နစ်မြုပ်နေခဲ့ပေတော့သည်။