အခန်း (၅၄၂-၅၄၄)

အခန်း ၅၄၂ - စမ်းသပ်မှုများ ပြီးဆုံးခြင်း

ဤစမ်းသပ်မှု၏ ရလဒ်မှာ အလွန်ဆန်းကြယ်လှသည်။ ထျန်းယွမ်လောက၏ ထိပ်တန်းဂိုဏ်းကြီး အများအပြားသည် ယီယွင်နှင့် လင်ရှင်းထုံတို့က ရှန်းထူနန်ထျန်း အပါအဝင် ဥပဒေသမျိုးစေ့အဆင့် ကျင့်ကြံသူ အများအပြားကို သတ်ဖြတ်နိုင်ခဲ့သည်ဆိုသည့် အချက်ကို မယုံနိုင်အောင် ဖြစ်နေကြသည်။

မိသားစုအကြီးအကဲများ၏ ဖိအားပေး မေးမြန်းမှုကြောင့် လူငယ်ပါရမီရှင်များသည် မဟာဧကရီ နက်နဲသောနယ်မြေအတွင်း ဖြစ်ပျက်ခဲ့သမျှကို အစမှအဆုံး ပြန်လည် ပြောပြကြရတော့သည်။

သူတို့သည် စမ်းသပ်မှု စတင်ပုံမှစ၍ ယီယွင် ရရှိခဲ့သော 'အင်ပါရီယန် အမှတ်အသား အရေအတွက်၊ စိတ်ဝိညာဉ်စမ်းသပ်မှု နှင့် နတ်မျှော်စင် အကြောင်းများအထိ အသေးစိတ် ပြောပြခဲ့ကြသည်။

ကျောက်တုံးရင်ပြင်တွင် ရှေးဟောင်းမဟာဧကရီ သတ်မှတ်ထားသော အဆင့်သတ်မှတ်ချက်များမှာ "စစ်သည်တော်" မှသည် "နတ်ဘုရားဘွဲ့" အထိ ရှိကြောင်း သိလိုက်ရသည့်အခါ အားလုံး မှင်သက်သွားကြသည်။

ဂိုဏ်းအသီးသီးမှ အသည်းအသန် ပြိုးထောင်ခဲ့ရသော အနှိုင်းမဲ့ ပါရမီရှင်များသည် ရှေးဟောင်းမဟာဧကရီ၏ အမြင်တွင် အနိမ့်ဆုံးအဆင့်ကိုပင် မမီကြဘဲ အဆင့်မရှိသူများအဖြစ် သတ်မှတ်ခံရခြင်းကို လက်ခံရန် ခက်ခဲနေကြသည်။ ဤသည်မှာ မဟာဧကရီ နက်နဲသောနယ်မြေ၏ စမ်းသပ်မှုများ မည်မျှအထိ ခက်ခဲသည်ကို ဝါရင့်ပုဂ္ဂိုလ်ကြီးများအား နားလည်သွားစေခဲ့သည်။

သို့သော် ဤမျှ ခက်ခဲသော စမ်းသပ်မှုများကြားမှ ယီယွင်နှင့် လင်ရှင်းထုံတို့သည် နတ်မျှော်စင်အတွင်း၌ ရှေးဟောင်းမဟာဧကရီ၏ အသိအမှတ်ပြုမှုကို ရရှိခဲ့ရုံသာမက မဟာဧကရီ၏ အမွေအနှစ် အစိတ်အပိုင်းအချို့ကိုပါ ရရှိသွားသည်ဟူသော သတင်းမှာ ပို၍ပင် မယုံနိုင်စရာ ကောင်းလှသည်။

ကြည့်ရသည်မှာ ယီယွင်နှင့် လင်ရှင်းထုံတို့သည် ထိုအမွေအနှစ်ကို အတိုင်းအတာတစ်ခုအထိ တတ်မြောက်သွားပုံရသည်။ သို့မဟုတ်ပါက သူတို့၏ ကျင့်ကြံမှုအဆင့်နှင့် စွမ်းအားမှာ ဤမျှ တိုတောင်းသော အချိန်အတွင်း အဆမတန် တိုးတက်လာစရာ အကြောင်းမရှိပေ။

သာမန်အားဖြင့် အဆင့်မြင့်သော ကျင့်စဉ်များမှာ တတ်မြောက်ရန် ပို၍ ခက်ခဲလေ့ရှိသည်။ ယီယွင်နှင့် လင်ရှင်းထုံတို့ အမွေအနှစ် ရရှိခဲ့သည်မှာ မကြာသေးမီကမှ ဖြစ်ရာ၊ သူတို့ မည်သို့ ဤမျှ လျင်မြန်စွာ တတ်မြောက်သွားသနည်းဆိုသည်မှာ လူအများအတွက် ပဟေဠိ ဖြစ်နေသည်။

"ငါတို့ မိသားစုဆီ ပြန်ကြမယ်"

အကြီးအကဲတစ်ဦးက တည်ကြည်သော မျက်နှာပေးဖြင့် ပြောလိုက်သည်။ အကြီးအကဲ အများအပြားမှာ ယီယွင်နှင့် လင်ရှင်းထုံတို့ကို မနာလိုဖြစ်နေကြသည်။ သူတို့သည် သူတို့၏ အတော်ဆုံး တပည့်များကို စေလွှတ်ကာ အားစိုက်ခဲ့သော်လည်း ဘာမှမရဘဲ အထုတ်ခံလိုက်ရသည့်အတွက် သူတို့၏ ရင်ထဲတွင် မကျေမနပ် ဖြစ်နေကြခြင်းမှာ နားလည်ပေးနိုင်စရာပင်။

ဤနေရာတွင် ဆက်နေရန် အဓိပ္ပာယ် မရှိတော့သဖြင့် ဂိုဏ်းအသီးသီးမှ လူများမှာ ပြန်လည် ထွက်ခွာသွားကြသော်လည်း၊ အချို့မိသားစုများမှာမူ နက်နဲသောနယ်မြေကို မျက်စိကျနေဆဲ ဖြစ်သည်။ သူတို့သည် ယီယွင်၏ သဲလွန်စကို ရှာဖွေနိုင်ရန်အတွက် ထိုနေရာတဝိုက်တွင် လူတိတ်တဆိတ် ထားခဲ့ကြသည်။

ယီယွင်နှင့် လင်ရှင်းထုံတို့သည် နက်နဲသောနယ်မြေအတွင်း၌ နှစ်ပေါင်းတစ်ရာကြာ ကျင့်ကြံမည်ဟု ပြောခဲ့သည်ကို ကြားထားသော်လည်း ထိုမိသားစုများက သံသယရှိနေဆဲပင်။ ကံကောင်းလျှင် သူတို့ကို ဖမ်းမိနိုင်မည်ဟု မျှော်လင့်နေကြခြင်း ဖြစ်သည်။ ကင်းစောင့်ထားခြင်းမှာ သူတို့အတွက် အရင်းအနှီး သိပ်မများလှပေ။

အလားတူပင် ရှန်းထူမိသားစုမှာလည်း ထွက်ခွာသွားရန် အစီအစဉ် မရှိပေ။ ရှန်းထူကြွယ်နှင့် အပေါင်းအပါများသည် အဖြစ်မှန်ကို လက်ခံလိုက်ရသော်လည်း သူတို့၏ ဒေါသများမှာ ပေါက်ကွဲထွက်လုမတတ် ဖြစ်နေသည်။

ယီယွင်သည် သူတို့၏ လင်မိသားစုအပေါ် ကြံစည်မှုကို ဖျက်ဆီးခဲ့ရုံသာမက၊ နက်နဲသောနယ်မြေကိုလည်း လူပုံအလယ်တွင် ထုတ်ဖော်ခဲ့ရသည်။ ထို့ပြင် သူတို့၏ ပါရမီရှင်များအားလုံး အသတ်ခံလိုက်ရပြီး မျိုးဆက်သစ် ခေါင်းဆောင် ရှန်းထူနန်ထျန်းမှာလည်း ရက်စက်စွာ သေဆုံးခဲ့ရသည်။ သူတို့၏ ဆုံးရှုံးမှုမှာ ဖော်ပြ၍ပင် မရနိုင်တော့ချေ။

ဤစမ်းသပ်မှုကို ဦးဆောင်သူနှင့် ရှာဖွေတွေ့ရှိသူမှာ သူတို့ ဖြစ်သော်လည်း နောက်ဆုံးတွင် သူတို့သည်သာ အကြီးမားဆုံး အရှုံးသမားများ ဖြစ်ခဲ့ရသည်။

"ယီယွင်... လင်ရှင်းထုံ" ရှန်းထူကြွယ်၏ မျက်နှာမှာ မှောင်မှိုင်နေသည်။ သူ၏ အရှိန်အဝါကြောင့် ပတ်ဝန်းကျင်ရှိ လေပြင်းများပင် ငြိမ်သက်သွားသယောင် ရှိသည်။

သူ့ဘေးရှိ လက်တစ်ထောင် အဘွားအိုမှာ ကြောက်ရွံ့တုန်လှုပ်နေရာမှ ရုတ်တရက် ခေါင်းမော့လာပြီး သွေးရောင်လွှမ်းသော မျက်လုံးများဖြင့် အော်လိုက်သည် "လင်မိသားစုက ဒီကိစ္စကို ကြိုသိနေတာ ဖြစ်ရမယ်။ အဲဒါကြောင့် သူတို့ ကြိုထွက်သွားတာပဲ လင်မိသားစုကို ပြန်ပေးဆပ်ခိုင်းရမယ် ယီယွင်နဲ့ လင်ရှင်းထုံတို့က တခြားမိသားစုက လူငယ်တွေကိုလည်း သတ်ခဲ့တာ မဟုတ်လား ငါတို့ မဟာမိတ်ဖွဲ့ပြီး လင်မိသားစုကို အပြတ်ရှင်းပစ်ကြစို့"

"အပြတ်ရှင်းပစ်မယ် ဟုတ်လား" ရှန်းထူကြွယ်က အေးစက်စွာ နှာခေါင်းရှုံ့လိုက်ပြီး "မင်း ခုနက မကြားလိုက်ဘူးလား ယီယွင်နဲ့ လင်ရှင်းထုံက လင်မိသားစုနဲ့ ပတ်သက်မှု ဖြတ်တောက်လိုက်ပြီလို့ နက်နဲသောနယ်မြေထဲမှာ ကြေညာခဲ့ပြီးသား။ ငါ မမှားရင် လင်မိသားစု ပြန်ရောက်တာနဲ့ သူတို့လည်း ခုခံဖို့ ပြင်ဆင်ကြလိမ့်မယ်၊ ပြီးတော့ လင်ရှင်းထုံတို့နဲ့ မပတ်သက်တော့ကြောင်း ကြေညာကြလိမ့်မယ်"

"နောက်နှစ်ပေါင်း ရာချီတဲ့အထိ ယီယွင်တို့က လင်မိသားစုဆီ ပြန်လာမှာ မဟုတ်ဘူး။ လင်မိသားစုဆီမှာ မဟာဧကရီရဲ့ အမွေအနှစ် မရှိဘဲနဲ့ သူတို့ကို တိုက်ခိုက်ဖို့ တခြားဂိုဏ်းတွေကို ဆွဲဆောင်ဖို့ဆိုတာ မလွယ်ဘူး။ ရှေးဟောင်း အမွေအနှစ်ရှိတဲ့ မိသားစုကြီးတစ်ခုက အဆင်သင့် ပြင်ထားရင် သူတို့ကို အနိုင်ရဖို့တောင် ငါတို့ဘက်က အထိနာလိမ့်မယ်။ အဲဒီအချိန်မှာ ယီယွင်နဲ့ လင်ရှင်းထုံတို့က အနှိုင်းမဲ့ ဧကရီပညာရှင်တွေ ဖြစ်လာပြီး လက်စားပြန်ချေဖို့ ပြန်လာကြရင် အဲဒီတိုက်ပွဲမှာ ပါတဲ့သူတွေ အကုန်လုံး ဒုက္ခရောက်ကုန်လိမ့်မယ်"

"အဲဒီလို အကျိုးအမြတ်မရှိတဲ့ အလုပ်ကို ဘယ်သူက လုပ်ချင်မှာလဲ"

"ပြီးတော့ တခြားမိသားစုက တပည့်တွေ သေတာကလည်း မဟာဧကရီနယ်မြေထဲမှာ ဖြစ်တာ။ ဒါက သိုင်းလောကမှာ ထုံးစံပဲ။ သေတဲ့သူက သူတို့ထက် အားနည်းလို့ပဲ။ ထို့ပြင် သူတို့က အရင် အလစ်အငိုက် တိုက်ခဲ့တာဆိုတော့ သူတို့မှာ အကြောင်းပြချက် မရှိဘူး။ လင်မိသားစုကသာ လျော်ကြေး လုံလုံလောက်လောက် ပေးလိုက်ရင် အဲဒီဂိုဏ်းတွေက ဒီကိစ္စကို ဆက်ပြီး ပြဿနာ ရှာတော့မှာ မဟုတ်ဘူး"

"ဒီလို အခြေအနေမှာ လင်မိသားစုကို သွားတိုက်ခိုက်တာ ဘာထူးမှာလဲ" ရှန်းထူကြွယ်က အေးစက်စွာ ပြောရင်း သူ၏ ဝတ်ရုံလက်ကို ခါလိုက်သည်။ ရှန်းထူမိသားစုမှာ မျိုးဆက်သစ် ပါရမီရှင် အများအပြား ဆုံးရှုံးခဲ့ရပြီး ဖြစ်သည်။ အကယ်၍ လင်မိသားစုနှင့် အတင်းအဓမ္မ စစ်ဖြစ်ပြီး လူကြီးပိုင်းတွေပါ ထပ်သေကုန်လျှင် ရှန်းထူမိသားစု၏ အခြေခံအုတ်မြစ်မှာ လှုပ်ခါသွားပြီး လုံးဝ ပြိုလဲသွားနိုင်သည်။

ရှန်းထူကြွယ်မှာ ဒေါသထွက်နေသော်လည်း သူသည် မိသားစု၏ အကျိုးစီးပွားကိုသာ ရှေ့တန်းတင် စဉ်းစားခဲ့သည်။

"လက်တစ်ထောင်... မင်း လူအချို့ကို ခေါ်ပြီး ဒီနေရာတဝိုက်မှာ စောင့်ကြည့်နေပါ။ ယီယွင်က တခြား ထွက်ပေါက်တွေကို သိနေမှာ အသေအချာပဲ။ အကယ်၍ မင်း သူတို့ကို တွေ့ရင် ရက်ရက်စက်စက် သတ်ပစ်လိုက်"

လက်တစ်ထောင် အဘွားအိုက ခေါင်းညိတ်လိုက်သည်။ သူမ၏ မျက်ဝန်းများထဲတွင် လင်းတတစ်ကောင်ကဲ့သို့ ရက်စက်သော အရိပ်အယောင်များ လက်ခနဲ ဖြစ်သွားသည်။ သူမကဲ့သို့ ကျင့်ကြံသူအတွက် နှစ်ပေါင်းတစ်ရာဆိုသည်မှာ မရှည်လျားလှပေ။ သူမ၏ ရင်ထဲမှ အမုန်းတရားများကို ဖြေဖျောက်ရန် ယီယွင်ကို အပိုင်းပိုင်း ဆွဲဖြတ်ရမည်ဟု သူမ ကျိန်ဆိုလိုက်တော့သည်။

ခွဲခွာပြီးနောက် တစ်လခွဲခန့်အကြာ၊ ထျန်းယွမ်လောက၏ ကျယ်ပြောလှသော မြေပြင်တစ်ခုတွင်...

တောင်ထိပ်တစ်ခုမှာ ကောင်းကင်ယံသို့ ထိုးထွက်နေသည်။ ၎င်းမှာ ကောင်းကင်မှ ကျဆင်းလာသော ကြီးမားလှသည့် ဓားကြီးတစ်စင်း မြေပြင်တွင် စိုက်နေသကဲ့သို့ပင်။ အဝေးမှ ကြည့်လျှင်ပင် ထိုတောင်ထံမှ ထွက်ပေါ်နေသော ဓားအရှိန်အဝါကြောင့် အသက်ရှူပင် ကျပ်စေနိုင်သည်။

တောင်ပြန်လေများ တိုက်ခတ်နေသော်လည်း ထိုတောင်ထိပ်ပေါ်တွင် စိမ်းလန်းစိုပြေမှု တစ်စုံတစ်ရာမျှ မရှိဘဲ မီးခိုးရောင် ကျောက်တုံးကြီးများသာ ပြည့်နှက်နေသည်။

ဤတောင်ထိပ်မှာ ထျန်းယွမ်လောကတွင် အလွန်ထင်ရှားသည်။ အဘယ်ကြောင့်ဆိုသော် ၎င်းမှာ ထျန်းယွမ်လောက၏ အကြီးမားဆုံး အဖွဲ့အစည်း ဖြစ်သော "မဟာမိတ်သိုင်းအဖွဲ့" ၏ ဌာနချုပ် တည်ရှိရာ နေရာဖြစ်သောကြောင့် ဖြစ်သည်။

တောင်ပေါ်သို့ တက်ရန် အလွန် မတ်စောက်သော လမ်းတစ်ကြောင်းသာ ရှိသည်။ ၎င်းမှာ ဓားများဖြင့် ခုတ်ထစ်ထားသကဲ့သို့ပင်။ အနည်းငယ်မျှ မှားယွင်းလိုက်သည်နှင့် ဟန်ချက်ပျက်ကာ အောက်သို့ ပြုတ်ကျပြီး ခန္ဓာကိုယ်မှာ အပိုင်းပိုင်း ဖြစ်သွားနိုင်သည်။

ထိုတောင်တက်လမ်းကို ကြည့်ရုံနှင့်ပင် သာမန်သိုင်းပညာရှင်တစ်ဦးမှာ ဖိအားများကို ခံစားရပြီး မသိစိတ်အရ ကြောက်ရွံ့သွားမိပေလိမ့်မည်။

ယခုအချိန်တွင် ထိုရှည်လျားသော တောင်လမ်းပေါ်၌ သေးငယ်သော လူရိပ်နှစ်ခုမှာ တောင်ပေါ်သို့ လျင်မြန်စွာ တက်လှမ်းနေကြသည်။ ထိုလူနှစ်ဦးထဲမှ တစ်ဦးမှာ မျက်နှာတွင် သွေးများ ဖုံးလွှမ်းနေသော လူငယ်တစ်ဦး ဖြစ်ပြီး၊ အခြားတစ်ဦးမှာမူ ရင်ဘတ်တွင် ကြီးမားသော အပေါက်ကြီးတစ်ခု ပါရှိကာ ရက်စက်သော မျက်နှာထားရှိသည့် ရှန်းထူနန်ထျန်း ပင် ဖြစ်သည်။

သူတို့ နှစ်ဦးမှာ သွေးလမင်းအမှတ်အသား ပါရှိသော ယင်ဝိဉာဉ်တို့နှစ်ဉီးပင် ဖြစ်ကြသည်။

အခန်း ၅၄၃ - ကပ်ဘေးကြီး

ယင်တစ္ဆေနှစ်ကောင်သည် ကောင်းကင်သို့ ဦးတည်နေသော လမ်းအတိုင်း ပြေးတက်သွားကြသည်။ လမ်းခရီးတွင် မဟာမိတ်သိုင်းအဖွဲ့ မှ လူအချို့နှင့် ရံဖန်ရံခါ ဆုံမိသော်လည်း ဆန်းကြယ်စွာပင် ထိုလူများမှာ သူတို့ကို မမြင်ကြချေ။ သူတို့သည် ဤလောကတွင် တည်ရှိမနေသကဲ့သို့ပင်။

မဟာမိတ်သိုင်းအဖွဲ့၏ ဌာနချုပ်မှာ ထိုတောင်တက်လမ်း၏ အဆုံးတွင် တည်ရှိသည်။ ၎င်းမှာ ခမ်းနားထည်ဝါလှသော ကျောက်မျှော်စင်ကြီးတစ်ခု ဖြစ်သည်။ ရိုးရှင်းသော လက်ရာရှိပြီး လျှပ်စီးများ လက်နေသည့် နိမ့်ဆင်းနေသော တိမ်မည်းများ၏ အထက်တွင် မြင့်မားစွာ တည်ရှိနေသည်။

ယင်တစ္ဆေနှစ်ကောင်သည် ကျောက်မျှော်စင်၏ အမြင့်ဆုံးအဆင့်သို့ တိုက်ရိုက် ဝင်ရောက်သွားကြသည်။ မျှော်စင်အတွင်းပိုင်းမှာ မှောင်မည်းနေပြီး ပဲစေ့ခန့်ရှိသော မီးစာတစ်ခုကသာ ဟာလာဟင်းလင်းဖြစ်နေသော မျှော်စင်အတွင်းကို အလင်းပေးထားသည်။

မျှော်စင်အတွင်းသို့ ဝင်လိုက်သည်နှင့် ပြင်ပလောကနှင့် လုံးဝ အဆက်အသွယ် ပြတ်တောက်သွားသကဲ့သို့ ခံစားရပြီး မှောင်မည်းတိတ်ဆိတ်သော ဟင်းလင်းပြင်နှင့် အလင်းစလေးတစ်ခုသာ ကျန်ရစ်တော့သည်။ ဤနေရာတွင် အသက်ဓာတ်နှင့် အချိန်ဟူသည် မရှိသကဲ့သို့ပင်။ အရာအားလုံးမှာ ရပ်တန့်နေသကဲ့သို့ ခံစားရသည်။

ယင်တစ္ဆေနှစ်ကောင်မှာ မျှော်စင်ထဲသို့ ဝင်သည်နှင့် မြေပြင်ပေါ်သို့ ဝပ်တွားလိုက်ကြပြီး အလွန်ပင် ရိုသေကြောက်ရွံ့သော လေသံဖြင့် "မြင့်မြတ်သော တမန်တော်မင်း... ကျွန်တော်မျိုးတို့ တာဝန်မကျေပွန်ခဲ့ပါဘူး၊ ကျေးဇူးပြုပြီး အပြစ်ပေးတော်မူပါ" ဟု ဆိုလိုက်ကြသည်။

သူတို့နှစ်ဦးမှာ မြေပြင်တွင် ဒူးထောက်ရင်း အချိန်အတော်ကြာအောင် တိတ်ဆိတ်နေကြသည်။ ခန်းမကြီး၏ အနက်ရှိုင်းဆုံးနေရာမှ ထူထဲသော ဝတ်ရုံရှည်ကို ဝတ်ဆင်ထားသည့် အရပ်ရှည်ရှည် လူရိပ်တစ်ခုမှာ မှောင်ရိပ်ထဲမှ ဖြည်းဖြည်းချင်း လမ်းလျှောက်ထွက်လာသည်။

သူ၏ ရုပ်သွင်ကို ခန်းမအတွင်းရှိ မှောင်ရိပ်များက ဖုံးကွယ်ထားသော်လည်း သူ၏ မျက်ခုံးနှစ်ခုအကြားတွင်မူ လင်းလက်နေသော အနီရောင် အမာရွတ်တစ်ခု ရှိနေသည်ကို မှိန်ပြပြ မြင်နိုင်သည်။ ထိုအမာရွတ်မှာ တောက်လောင်နေသော မီးတောက်တစ်ခုကဲ့သို့ အရှိန်အဝါများ ထွက်ပေါ်နေသည်။

အကယ်၍ ထျန်းယွမ်လောက၏ ထိပ်တန်းဂိုဏ်းခေါင်းဆောင်များသာ ဤနေရာတွင် ရှိနေခဲ့ပါက ဤမီးတောက်အမာရွတ်ကို မြင်သည်နှင့် ထိုသူမှာ "မဟာမိတ်သိုင်းအဖွဲ့၏ လက်ရှိ မဟာမိတ်ခေါင်းဆောင်" ဖြစ်ကြောင်း ချက်ချင်း သိရှိကြပေလိမ့်မည်။ သူသည် ထျန်းယွမ်လောကတွင် အကြွင်းမဲ့ အာဏာရှိသူဖြစ်ပြီး သူ၏ စွမ်းအားမှာ ခန့်မှန်းရခက်လောက်အောင် နက်နဲလှသည်။

"မင်းတို့နှစ်ယောက်က မဟာမိတ်သိုင်းအဖွဲ့ ဌာနချုပ်ထဲကို ဒီလောက် အလျင်စလို ဝင်လာတာလား။ ဒီမှာ လူသားပညာရှင်တွေ အများကြီးရှိတယ်။ မင်းတို့ရဲ့ ကျင့်ကြံမှု အဆင့်နဲ့ဆိုရင် ယင်တစ္ဆေ လှည့်စားခြင်း အတတ်ကို သုံးထားရင်တောင် အလွယ်တကူ သတိထားမိသွားနိုင်တယ်။ အဲဒါက မလိုအပ်တဲ့ သံသယတွေကို ဖြစ်စေနိုင်တယ်"

"မြင့်မြတ်သော တမန်တော်မင်း ခွင့်လွှတ်တော်မူပါ။ အခြေအနေတွေက ရုတ်တရက် ပြောင်းလဲသွားလို့ ကျွန်တော်မျိုးတို့ 'နတ်ဆိုးသခင်' ထံကို အမြန်ဆုံး အစီရင်ခံဖို့ လိုအပ်နေလို့ပါ" ယင်တစ္ဆေနှစ်ကောင်မှာ သူတို့၏ ခန္ဓာကိုယ်များကို ပို၍ပင် နှိမ့်ချလိုက်ကြသည်။

သူတို့ပြောသော 'နတ်ဆိုးသခင်' မှာ နတ်သင်္ချိုင်းချောက်၏ အနက်ရှိုင်းဆုံးနေရာတွင် အိပ်ပျော်နေသူ ဖြစ်သည်။ ဤယင်တစ္ဆေနှစ်ကောင်မှာ စစ်မှန်သော နတ်ဆိုးသခင်ကို တွေ့ဆုံရန် အခွင့်အရေးဖြစ်စေ၊ အရည်အချင်းဖြစ်စေ မရှိကြချေ။ အမှန်တကယ်တော့ နတ်ဆိုးသခင်ဆိုသည်မှာ သူတို့အတွက် ဒဏ္ဍာရီတစ်ခုသာ ဖြစ်သည်။ သူတို့သည် သူတို့ရှေ့တွင် ရှိနေသော အနက်ရောင်ဝတ်ရုံဝတ် မြင့်မြတ်သော တမန်တော်ကိုသာ တွေ့ခွင့်ရှိသည်။

နတ်ဆိုးသခင်၏ အမိန့်များအားလုံးကို ဤတမန်တော်တစ်ဆင့်သာ ပေးပို့ခြင်း ဖြစ်ပြီး သူသည် မဟာမိတ်သိုင်းအဖွဲ့၏ ခေါင်းဆောင်လည်း ဖြစ်သည်။ မဟာမိတ်သိုင်းအဖွဲ့သည် နှစ်သန်းပေါင်းများစွာ တည်ရှိခဲ့ပြီး ထျန်းယွမ်လောကတွင် အမြစ်တွယ်နေသော ကြောက်မက်ဖွယ် အဖွဲ့အစည်းကြီး ဖြစ်သည်။

မီးတောက်အမာရွတ်နှင့် အမျိုးသားမှာ မည်သည့် ခံစားချက်မျှ မရှိဘဲ တည်ငြိမ်နေသည်။ သူက ဖြည်းဖြည်းချင်း ပြောလိုက်သည်။

"မင်းတို့နှစ်ယောက်က 'ယင်တစ္ဆေမည်း' ကို ကူညီပြီး မဟာဧကရီ နက်နဲသောနယ်မြေထဲကို ဝင်သွားခဲ့တာပဲ။ အခုတော့ ယင်တစ္ဆေမည်းရဲ့ ဝိညာဉ်အဆောင်က ကွဲကြေသွားပြီ၊ မင်းတို့နှစ်ယောက်ကလည်း ဒီအခြေအနေ ဖြစ်နေတယ်... ပြောစမ်း၊ ဘာဖြစ်ခဲ့တာလဲ နတ်ဆိုးသခင်ရဲ့ 'ဖျက်ဆီးခြင်းမျက်လုံး' ရဲ့ စွမ်းအားက နတ်မျှော်စင်ကြောင့် ဘယ်လိုဖြစ်ပြီး အဆက်အသွယ် ပြတ်တောက်သွားရတာလဲ"

နတ်သင်္ချိုင်းချောက်တွင်းမှ ထွက်ပေါ်လာသော ဖျက်ဆီးခြင်းမျက်လုံး အကြောင်းကို ကြားလိုက်ရသည့်အခါ ယင်တစ္ဆေနှစ်ကောင်မှာ ပို၍ပင် ကြောက်ရွံ့တုန်လှုပ်သွားကြသည်။ သူတို့သည် မဟာဧကရီ နက်နဲသောနယ်မြေအတွင်း ဖြစ်ပျက်ခဲ့သမျှကို အစီရင်ခံလိုက်ကြသည်။

တမန်တော်သည် တိတ်ဆိတ်စွာ နားထောင်နေသည်။ သူ၏ မျက်လုံးများထဲမှ အတွေးကို မည်သူမျှ မသိနိုင်ချေ။ ယီယွင်နှင့် လင်ရှင်းထုံတို့သည် မဟာဧကရီ၏ အသိအမှတ်ပြုမှုကို ရရှိခဲ့ပြီး အမွေအနှစ်အချို့ကို ဆက်ခံခဲ့သည်ဟူသော အချက်ကို ကြားလိုက်ရသည့်အခါမှသာ သူ၏ မျက်နှာပေးမှာ အနည်းငယ် ပြောင်းလဲသွားသည်။

"အဲဒီမိန်းမက နောက်ဆုံးတော့ ဆက်ခံသူကို ရှာတွေ့သွားတာလား ဟမ်း.... အပိုတွေပဲ။ လူငယ်ဆက်ခံသူ နှစ်ယောက်က ဘာလုပ်နိုင်မှာလဲ သူတို့မှာ အချိန်မှ မကျန်တော့တာ..."

တမန်တော်က သူဘာသာ ရေရွတ်ရင်း ခန်းမကြီး၏ အနက်ရှိုင်းဆုံးနေရာသို့ ပြန်လှည့်သွားသည်။ တမန်တော် ထွက်ခွာတော့မည်ကို မြင်သည့်အခါ ယင်တစ္ဆေနှစ်ကောင်က "မြင့်မြတ်သော တမန်တော်မင်း... ပြီးခဲ့တဲ့ နှစ်အနည်းငယ်အတွင်း ပျက်စီးခြင်းမျိုးနွယ်စု တွေကလည်း ပြင်ဆင်မှုတွေ စလုပ်နေပါပြီ။ သူတို့က ရှေးဟောင်းနတ်သင်္ချိုင်းချောက်ထဲက တံဆိပ်အချို့ကို ဖွင့်လိုက်ကြပြီ။

ပျက်စီးခြင်းသားရဲဘုရင်မဟောင်းကလည်း ဘုရင်မသစ်ကို ရာထူးလွှဲပေးလိုက်ပြီ။ သူတို့က သန့်စင်ဝိညာဉ်တော် ကိုလည်း ခေါ်ယူလိုက်ကြပြီ။ ကျွန်တော်မျိုးတို့ သူတို့နဲ့ စစ်ခင်းရတော့မယ်ထင်တယ်၊ ဘာဆက်လုပ်ရမလဲ"

"ပျက်စီးခြင်းမျိုးနွယ်စု သန့်စင် ဝိညာဉ်တော် ကို ခေါ်ယူတယ် ဟုတ်လား" တမန်တော်က ခြေလှမ်းရပ်လိုက်ပြီး အေးစက်စွာ ပြောလိုက်သည် "ငါတို့ ဘာမှလုပ်စရာ မလိုဘူး။ စောင့်နေရုံပဲ"

သူက လှောင်ပြုံးပြုံးလိုက်သည်။ သူ၏ အကြည့်မှာ ခန်းမကြီးကို ဖြတ်ကျော်ပြီး ထျန်းယွမ်လောကတစ်ခုလုံးကို ကျော်လွန်ကာ နီရဲနေသော 'ပြန်လမ်းမဲ့ ပင်လယ် ' ဆီသို့ ရောက်ရှိနေသကဲ့သို့ပင်...။

သေခြင်းတရားကဲ့သို့ ငြိမ်သက်နေသော ပြန်လမ်းမဲ့ ပင်လယ်ပြင်တွင် ရုတ်တရက် တောင်ထိပ်ခုနစ်ခု ပေါ်ထွက်လာသည်။ ထိုအနက်ရောင် တောင်ထိပ်ခုနစ်ခုမှာ ဘီလူးကြီးများအလား မတ်တတ်ရပ်နေကြသည်။

သေချာကြည့်လျှင်မူ ထိုတောင်ထိပ်များမှာ လူသားပုံသဏ္ဌာန်နှင့် ဆင်တူနေပြီး အလယ်တွင်ရှိသော တောင်မှာ အနက်ရောင် စစ်ဝတ်တန်ဆာ ဝတ်ဆင်ထားကာ လက်ထဲတွင် လှံရှည်တစ်စင်း ကိုင်ထားသော အမျိုးသားတစ်ဦးနှင့် တူလှသည်။

မဟာမိတ်သိုင်းအဖွဲ့ ခန်းမထဲမှ အနက်ရောင်ဝတ်ရုံဝတ် အမျိုးသားမှာ ဤမြင်ကွင်းကို မြင်နေရသည့်အလား သူ၏ နှုတ်ခမ်းထောင့်တွင် နက်နဲသော အပြုံးတစ်ခု ပေါ်လာသည်။

"ဝတ်ရုံနက် နတ်ဆိုးစစ်သည်တော်များ" နိုးထတော့မည်။

ထိုနတ်ဆိုးစစ်သည်တော်များမှာ ဖျက်ဆီး၍မရနိုင်သလို အကန့်အသတ်မရှိသော စွမ်းအားများကို ပိုင်ဆိုင်ထားကြသည်။ လွန်ခဲ့သော နှစ်သန်းပေါင်းများစွာက 'နီလာယန်သခင်' နှင့် ရှေးဟောင်းမဟာဧကရီတို့ပင်လျှင် သူတို့ကို အမြစ်ပြတ် ဖျက်ဆီးနိုင်ခြင်း မရှိခဲ့ချေ။

ထိုနတ်ဆိုးစစ်သည်တော် ခုနစ်ပါး ပြန်လည် မွေးဖွားလာသည့်အခါ ဤလောကတွင် မည်သည့်အရာကမျှ သူတို့ကို တားဆီးနိုင်မည် မဟုတ်တော့ချေ

ပြန်လမ်းမဲ့ ပင်လယ်ပြင်ရှိ နတ်ဆိုးစစ်သည်တော် တောင်တန်းကြီးများမှာ လောကကြီးကို ကသောင်းကနင်း ဖြစ်စေနိုင်သော သတ်ဖြတ်ခြင်းအငွေ့အသက်များ ထွက်ပေါ်နေသော်လည်း၊ ယခုအချိန်တွင်မူ ထိုစစ်သည်တော်၏ မျက်နှာမှာ ယီယွင် ကိုင်ထားသော အစီရင်ပြား ထဲမှ ပုံရိပ်တစ်ခုသာ ဖြစ်နေသေးသည်။

ယီယွင်သည် နတ်မျှော်စင် ပထမအဆင့်မှ ထိုအစီရင်ပြားကို ရရှိခဲ့ကတည်းက ၎င်းကို အမြဲတစေ လေ့လာနေခဲ့သည်။ နီလာယန်သခင်က အနက်ရောင်ဝတ်စုံဝတ် စစ်သည်တော်ကို အနိုင်ယူခဲ့သော ဓားချက်မှာ အဆုံးမရှိသော ဆွဲဆောင်မှုများဖြင့် ပြည့်နှက်နေသည်။

ယီယွင်သည် ယခင်ကတည်းက ထိုဓားချက်၏ အခြေခံများကို နားလည်ခဲ့သော်လည်း ယခု မဟာဧကရီ နှလုံးသားကျမ်းကို ကျင့်ကြံပြီးနောက်တွင်မူ လေ့လာလိုက်တိုင်း ပိုမိုနက်နဲသော အသိဉာဏ်များကို ရရှိလာခဲ့သည်။

မဟာဧကရီ နက်နဲသောနယ်မြေ၏ အပြင်ဘက်တွင်မူ မုန်တိုင်းမလာမီ လေပြင်းများ တိုက်ခတ်နေပြီ ဖြစ်သည်။ ယီယွင်သည် ပြင်ပတွင် ဘာဖြစ်နေသည်ကို အတိအကျ မသိသော်လည်း ကြီးမားလှသော ကပ်ဘေးကြီးတစ်ခု မကြာမီ ကျရောက်တော့မည်ကိုမူ သူ မှိန်ပြပြ ခံစားနေရသည်။

အခန်း ၅၄၄ - ငါးနှစ်တာ ကာလ

နေနှင့်လတို့သည် အချိန်နှင့်အမျှ အလဲအလှန် တာဝန်ယူရင်း ကုန်ဆုံးလာခဲ့သည်။ မဟာဧကရီ နက်နဲသောနယ်မြေကြောင့် ဖြစ်ပေါ်လာသော မုန်တိုင်းမှာလည်း ထျန်းယွမ်လောက တစ်ခုလုံးတွင် ပျံ့နှံ့သွားခဲ့ပြီ ဖြစ်သည်။

ရှေးဟောင်းမဟာဧကရီ သတ်မှတ်ထားသော ပါရမီရှင် "အဆင့် ခြောက်ဆင့်" အကြောင်းကို ကြားသိရသည့်အခါ ဂိုဏ်းကြီးအသီးသီးမှ ကောင်းကင်သားတော်များသည် မဟာဧကရီ၏ ရှေ့မှောက်တွင် သဲထဲတွင် နစ်မြုပ်နေသော လက်နက်ဟောင်းများသဖွယ် တန်ဖိုးမရှိဖြစ်နေကြောင်း အားလုံး သိသွားကြသည်။

ထိုသို့သော အခြေအနေမျိုးတွင် လင်မိသားစုမှ လာသော ယီယွင်နှင့် လင်ရှင်းထုံတို့က မဟာဧကရီ၏ အမွေအနှစ်ကို ရရှိသွားခြင်းမှာ အံ့အားသင့်စရာပင်။

မဟာဧကရီ၏ အမွေအနှစ်ဆိုသည်မှာ သေးငယ်သော ကိစ္စမဟုတ်ပေ။ ဂိုဏ်းကြီးများအားလုံးက ၎င်းကို လိုချင်တပ်မက်နေကြသော်လည်း ဘာမှမတတ်နိုင်ကြချေ။ စမ်းသပ်မှုများ ပြီးဆုံးသွားပြီးနောက်တွင်မူ သူတို့သည် ထိုနယ်မြေ၏ တံခါးဝကိုပင် ရှာမတွေ့ကြတော့ပေ။

လင်မိသားစုသည်လည်း ယီယွင်တို့နှင့် ပတ်သက်မှု မရှိကြောင်း ကြိုတင်ကြေညာထားသဖြင့် မည်သူမျှ လင်မိသားစုကို သွားရောက်တိုက်ခိုက်ရန် မဝံ့ရဲကြချေ။

ဤသို့ဖြင့် ရာသီများ ပြောင်းလဲလာခဲ့ရာ မဟာဧကရီ နက်နဲသောနယ်မြေကို မျှော်လင့်နေကြသော မိသားစုများမှာလည်း တဖြည်းဖြည်း နည်းပါးလာခဲ့သည်။ ရှန်းထူမိသားစု တစ်စုတည်းသာလျှင် မကျေမနပ်ဖြစ်ကာ ယီယွင်နှင့် လင်ရှင်းထုံတို့၏ သဲလွန်စကို ရှာတွေ့ရန် 'ပြန်လမ်းမဲ့ ပင်လယ်' ဆီသို့ သူတို့၏ ဝါရင့်ပညာရှင်များကို အမြဲစေလွှတ်၍ ကင်းလှည့်နေစေခဲ့သည်။

သို့သော် ယီယွင်နှင့် လင်ရှင်းထုံတို့မှာ ပျောက်ခြင်းမလှ ပျောက်ကွယ်သွားခဲ့သည်။ လူအများက သူတို့သည် နက်နဲသောနယ်မြေအတွင်း၌ ဆယ်စုနှစ်ပေါင်းများစွာ အောင်း၍ ကျင့်ကြံနေလိမ့်မည်ဟု ယုံကြည်နေကြသည်။ သူတို့ ပြန်ထွက်လာသည့်အခါ မည်မျှအထိ အစွမ်းထက်လာမည်ကို မည်သူမျှ မခန့်မှန်းနိုင်ချေ။

တစ်နှစ်ပြီးတစ်နှစ် ကုန်ဆုံးလာရာ ယခုအခါ စမ်းသပ်မှုများ ပြီးဆုံးခဲ့သည်မှာ ငါးနှစ် တိတိ ရှိခဲ့ပြီ ဖြစ်သည်။

သိုင်းသမားများအတွက် ငါးနှစ်ဆိုသည်မှာ မရှည်လျားသော အချိန်ဖြစ်သော်လည်း အချို့သောအရာများကို မေ့ပျောက်သွားစေရန် လုံလောက်သော အချိန်ဖြစ်သည်။ ဥပမာအားဖြင့် ဝဲဂယက်ထဲတွင် ရုတ်တရက် ပေါ်လာခဲ့သော၊ ကြည့်လိုက်ရုံနှင့် ဝိညာဉ်ပင် ကြေမွသွားစေနိုင်သည့် ကြီးမားလှသော 'ဖျက်ဆီးခြင်းမျက်လုံး' ကဲ့သို့သော အရာမျိုးပင်။

အချိန်ကြာလာသည်နှင့်အမျှ ထျန်းယွမ်လောကရှိ ဂိုဏ်းအသီးသီး၏ ထိုမျက်လုံးအပေါ် ကြောက်ရွံ့မှုမှာလည်း လျော့နည်းလာခဲ့သည်။ နတ်သင်္ချိုင်းချောက် ဆိုသည်မှာ နဂိုကတည်းက နက်နဲလှသည့် နေရာဖြစ်သဖြင့် ဆန်းကြယ်သော အရာများ ပေါ်လာခြင်းမှာ လက်ခံနိုင်စရာပင်။

ကြည့်ရသည်မှာ ထိုမျက်လုံးကြီးသည် ဝဲဂယက်အတွင်းမှ ထွက်လာမည့်ပုံ မပေါ်သဖြင့် သူတို့၏ အခြေခံအုတ်မြစ်ကို ထိခိုက်နိုင်လိမ့်မည်ဟု မထင်ကြတော့ပေ။

သို့သော် ယီယွင်အတွက်မူ ငါးနှစ်ဆိုသည်မှာ အလွန်ရှည်လျားသော အချိန်ဖြစ်သည်။ သူသည် ငယ်ရွယ်နေဆဲဖြစ်ပြီး ဘဝမှာ စတင်ကာစသာ ရှိသေးသည်။ ပါရမီရှင် လူငယ်တစ်ဦးအတွက် ငါးနှစ်ဆိုသည်မှာ သူ၏ ခွန်အားကို အဆမတန် တိုးတက်လာစေရန် လုံလောက်သော အချိန်ပင် ဖြစ်သည်။

ယခုနှစ်တွင် ယီယွင်သည် အသက် ၂၁ နှစ် ပြည့်ခဲ့ပြီ ဖြစ်သည်။ သူသည် ငါးနှစ်တိုင်တိုင် ကြိုးစားကျင့်ကြံခဲ့သော်လည်း သူ၏ ကျင့်ကြံမှုအဆင့်မှာမူ အလွန်လျင်မြန်ခြင်း မရှိခဲ့ချေ။

သူ၏ အဆင့်မှာ ဥပဒေသမျိုးစေ့ အဆင့်၏ အလယ်ပိုင်း အထွတ်အထိပ်တွင်သာ ရှိနေသေးပြီး အဆင့်နှောင်းပိုင်းသို့ ရောက်ရန် ခြေတစ်လှမ်းသာ လိုတော့သည်။ သူ၏ ကျင့်ကြံမှုအဆင့် နှေးကွေးနေရခြင်းမှာ သူ၏ အခြေခံကို ခိုင်မာအောင် လုပ်နေ၍သာ မဟုတ်ပေ။

ယီယွင်သည် အသက် ၂၁ နှစ်တွင် ဥပဒေသမျိုးစေ့အဆင့် အထွတ်အထိပ်သို့ ရောက်နေခြင်းမှာပင် ပြည့်စုံသော အခြေခံရှိနေပြီဟု ယုံကြည်သည်။ သူ ကျင့်ကြံမှု နှေးနေရသည့် အဓိက အကြောင်းရင်းမှာ အချိန်အများစုကို "မဟာဧကရီ နှလုံးသားကျမ်း" နှင့် နီလာယန်သခင်၏ "ဓားလမ်းစဉ်" တို့ကို လေ့လာနေသောကြောင့် ဖြစ်သည်။

မဟာဧကရီ နှလုံးသားကျမ်းမှာ "ယန်နတ်ဘုရားကျမ်း" နှင့် "ကိုးပါးနက်ရှိုင်း သန့်စင်ကျမ်း" တို့မှ ဆင်းသက်လာသော အထွတ်အထိပ် ပညာရပ် ဖြစ်သည်။ ၎င်းကို အောင်မြင်ရန်အတွက် ယင်နှင့်ယန် ဖြည့်ဆည်းပေးပြီး အသက်ဓာတ်ပါရှိသော "ယန်ဝိညာဉ်စွမ်းအင်ကိုးပါး"ကို ကျင့်ကြံရမည်။ ယီယွင်နှင့် လင်ရှင်းထုံတို့သည် သူတို့၏ အပေးအယူတည့်လှသော ခန္ဓာကိုယ်များကြောင့် ပထမအဆင့်ကို လျင်မြန်စွာ ကျင့်ကြံနိုင်ခဲ့သော်လည်း ဒုတိယအဆင့်မှာမူ လွယ်ကူခြင်း မရှိတော့ချေ။

သူတို့၏ ယွမ်ချီ ကို အသက်ဓာတ် ပေးနိုင်ရန်အတွက် သန့်စင် ယန်စွမ်းအင်ကို "ယန်ကိုးပါး ဝိညာဉ်စွမ်းအင်" အဖြစ် ပြောင်းလဲရမည်ဖြစ်ပြီး၊ သန့်စင် ယင်စွမ်းအင်ကိုမူ "စိမ်းမြသော ရိုးတွင်းခြင်ဆီ ဝိညာဉ်စွမ်းအင်" အဖြစ် ပြောင်းလဲရမည်။ သူတို့၏ ခန္ဓာကိုယ်သည် စွမ်းအင်များနှင့် ပေါင်းစပ်နိုင်စွမ်း ရှိရုံသာမက နက်နဲသော အသိဉာဏ်နှင့် အခွင့်အလမ်းများလည်း လိုအပ်သည်။

ယီယွင်နှင့် လင်ရှင်းထုံတို့တွင် အသိဉာဏ်မှာ မချို့တဲ့သော်လည်း အခွင့်အလမ်းဆိုသည်မှာ အလွယ်တကူ ရရှိနိုင်သော အရာမဟုတ်ပေ။ ဤသည်မှာ သူတို့၏ စွမ်းအင်တွင် ဝိညာဉ်အသိစိတ်လေးတစ်ခုကို ရရှိစေရန် လုပ်ဆောင်ရခြင်း ဖြစ်သည်။ ၎င်းကို ရရှိပြီးမှသာ တတိယအဆင့်ကို ဆက်လက် ကျင့်ကြံနိုင်မည် ဖြစ်သည်။ တတိယအဆင့်မှာ ပို၍ပင် ခက်ခဲလှပြီး ၎င်းကို အောင်မြင်ရန်မှာ ယီယွင်နှင့် လင်ရှင်းထုံတို့ တကယ်တမ်း "တစ်သားတည်း" ဖြစ်သွားရန်ပင် လိုအပ်သည်ဟု ဆိုသည်။

သူတို့၏ ခန္ဓာကိုယ်မှာ တစ်ဦးကိုတစ်ဦး သဘာဝအလျောက် ဆွဲဆောင်မှု ရှိကြသည်။ သူတို့ ပိုမိုကျင့်ကြံလေလေ၊ သူတို့၏ စွမ်းအင်မှာ ပို၍ ဝိညာဉ်ဆန်လာလေလေ ဖြစ်သည်။ နောက်ဆုံးခြေလှမ်းကို လှမ်းနိုင်သည့်အခါ ရရှိမည့် အကျိုးကျေးဇူးမှာလည်း ကြီးမားလှပေလိမ့်မည်။

ယခုအချိန်တွင် ယီယွင်သည် ချော်ရည်ကန်၏ အထက်တွင် ပေါလောပေါ်နေသော ကြာပန်းနီတစ်ခုပေါ်၌ ခြေတစ်ဖက်ကို ကွေးကာ အခြားခြေတစ်ဖက်ဖြင့် ထောက်၍ တရားထိုင်နေသည်။ သူသည် သန့်စင် ယန်စွမ်းအင်များကို ရှူရှိုက်နေခြင်း ဖြစ်သည်။

လင်ရှင်းထုံမှာမူ အဝေးမှ နှင်းခဲအိပ်ရာပေါ်တွင် ထိုင်နေရင်း ယီယွင်နှင့် ဟန်ချက်ညီညီ ကျင့်ကြံနေသည်။ ယင်နှင့်ယန် စွမ်းအင်များမှာ သူတို့နှစ်ဦး၏ ခန္ဓာကိုယ်အကြားတွင် လှည့်ပတ်နေကြသည်။

ယီယွင်က သူ၏ လက်များကို ဖြည်းဖြည်းချင်း မြှောက်လိုက်သည့်အခါ ရွှေရောင်နှင့် အပြာရောင် စွမ်းအင်လုံးလေးနှစ်ခုက သူ၏ ခန္ဓာကိုယ်ပတ်ပတ်လည်တွင် လှည့်ပတ်လာသည်။ ဤသည်မှာ သန့်စင် ယင်နှင့်ယန် စွမ်းအင်များ ဖြစ်ကြသည်။ လွန်ခဲ့သော ငါးနှစ်အတွင်း ယီယွင်သည် ယင်နှင့်ယန် နှစ်မျိုးစလုံးကို စတင် ကျင့်ကြံလာခဲ့သည်။

ထိုစွမ်းအင်လုံးလေးများမှာ ရံဖန်ရံခါတွင် 'ရွှေရောင်ကျီးကန်း' ရံဖန်ရံခါတွင် 'နဂါး' သို့မဟုတ် 'လိပ်နက်ကြီး' ပုံစံများအဖြစ် ပြောင်းလဲနေကြသည်။ ဤသည်မှာ စွမ်းအင်ကို အသက်ဓာတ်အဖြစ် ပြောင်းလဲရန် ပထမဆုံး ခြေလှမ်းပင် ဖြစ်သည်။

ဤငါးနှစ်အတွင်း ယီယွင်ကျင့်ကြံခဲ့သော "တိုက်အာနတ်ကျင့်စဉ်" မှ နေအလင်းချီ မှာ မဟာဧကရီ နှလုံးသားကျမ်း၏ ယန်စွမ်းအင်ဖြင့် လုံးဝ ပေါင်းစပ်သွားခဲ့ပြီး "ယန်ကိုးပါး ဝိညာဉ်စွမ်းအင်" ဖြစ်လာရန် အခြေခံအုတ်မြစ် ဖြစ်လာခဲ့သည်။

သို့သော် ယီယွင်သည် နောက်ဆုံးခြေလှမ်းကိုမူ မလှမ်းနိုင်သေးပေ။ အကြိမ်ကြိမ် ကြိုးစားခဲ့သော်လည်း မအောင်မြင်ခဲ့ချေ။ သာမန်အားဖြင့် ဤသို့ အခြေအနေမျိုး ကြုံရသည့်အခါ ပြင်ပသို့ ထွက်၍ လေ့ကျင့်ခရီး သွားခြင်းမှာ အကောင်းဆုံး ရွေးချယ်မှု ဖြစ်သည်။

သိုင်းပညာရှင်များ၊ အထူးသဖြင့် ပါရမီရှင် လူငယ်များသည် အမြဲတမ်း ဘေးကင်းလုံခြုံနေ၍ မရပေ။ အောင်း၍သာ ကျင့်ကြံနေပါက တစ်ချိန်ချိန်တွင် အကန့်အသတ်တစ်ခု နှင့် တိုးတတ်သည်။ ထိုအခါ လေ့ကျင့်ခရီးသွားခြင်း သို့မဟုတ် နက်နဲသောနယ်မြေများသို့ သွားခြင်းက သူတို့ကို အသိဉာဏ်အသစ်များ ပေးစွမ်းနိုင်ပြီး အဆင့်တက်လှမ်းနိုင်ရန် ကူညီပေးနိုင်သည်။

ယခုအခါ သူတို့ ငါးနှစ်တိုင်တိုင် အောင်းကျင့်ခဲ့ပြီးနောက် ထိုအခြေအနေမျိုး စတင် ပေါ်ပေါက်လာခဲ့ပြီ ဖြစ်သည်။ သို့သော် ယီယွင်နှင့် လင်ရှင်းထုံတို့သည် မဟာဧကရီ နှလုံးသားကျမ်း၏ ဒုတိယအဆင့်ကို အနည်းဆုံး မတတ်မြောက်ဘဲနှင့် နက်နဲသောနယ်မြေမှ ထွက်ခွာ၍ မရသေးပေ။

အပြင်သို့ ထွက်မရသဖြင့် ယီယွင်သည် နတ်မျှော်စင် အတွင်း၌သာ ရှာဖွေမှုများ ပြုလုပ်ခဲ့သည်။ 'နီလာယန်တံဆိပ်တော်' ဖြင့် ယီယွင်သည် နတ်မျှော်စင်၏ ဒုတိယအဆင့်ရှိ ကျယ်ပြောသော တောရိုင်းကမ္ဘာနှင့် စတုတ္ထအဆင့်ရှိ အေးစက်သော နှင်းခဲလွင်ပြင်တို့ကို ဖွင့်နိုင်သည်။ သူနှင့် လင်ရှင်းထုံတို့မှာ ထိုကမ္ဘာနှစ်ခုလုံးကို အကြိမ်ကြိမ် ရှာဖွေခဲ့သော်လည်း ထူးခြားမှု ဘာမှမတွေ့ခဲ့ရပေ။

ယနေ့တွင်မူ သူတို့သည် နတ်မျှော်စင်၏ တတိယအဆင့်သို့ ရောက်လာခဲ့ကြသည်။ ဤအဆင့်မှာ ကျင့်စဉ်ကျမ်းပေါင်းစပ်မှုများ ပြည့်နှက်နေသော ခန်းမကြီး ဖြစ်သည်။ သူတို့သည် ယခင်က ဤနေရာတွင် ကျင့်စဉ်များ လာရောက်ရွေးချယ်ခဲ့ဖူးသဖြင့် ဤနေရာနှင့် ရင်းနှီးပြီးသား ဖြစ်သည်။

သို့သော် ယနေ့တွင်မူ သူတို့နှစ်ဦးစလုံး ခြေလှမ်းများ ရပ်တန့်သွားကြသည်။

"ဟင်... ဒါက..."

သူတို့၏ ရှေ့တွင် ခန်းမနံရံ၌ ချိတ်ဆွဲထားသော ပုံတူပန်းချီကားနှစ်ချပ် ရှိနေသည်။ ထိုပုံနှစ်ပုံကို ယီယွင်နှင့် လင်ရှင်းထုံတို့သည် ယခင်က တစ်ဦးချင်းစီ မြင်ဖူးခဲ့ကြသည်။

တစ်ခုမှာ မဟာဧကရီ၏ ပုံတူ ဖြစ်သည်။ ရိုးရှင်းစွာ ဝတ်ဆင်ထားသော အမျိုးသမီးမှာ အနောက်ဘက်သို့သာ လှည့်နေပြီး သူမ၏ ဆံပင်ရှည်များမှာ လေထဲတွင် လွင့်ပျံနေသည်။ သူမသည် ဟင်းလင်းပြင်ပေါ်တွင် ခြေဖျားလေးဖြင့် လမ်းလျှောက်နေပြီး သူမ၏ ခြေလှမ်းတိုင်းအောက်တွင် နှင်းကြာပန်းများ ပွင့်လန်းလာနေသည်။

အခြားတစ်ခုမှာ နီလာယန်သခင်၏ ပုံတူ ဖြစ်သည်။ သူသည် မြေပြင်ပေါ်တွင် ထိုင်နေရင်း သစ်ပင်တစ်ပင်ကို ကျောမှီထားသည်။ လက်တစ်ဖက်တွင် ဝိုင်ဘူးကို ကိုင်ထားပြီး သောက်နေသည်။ သူ၏ ဘေးတွင်မူ သွေးများ စွန်းထင်နေသော ဓားတစ်စင်းမှာ မြေပြင်တွင် စောင်းစောင်းလေး စိုက်ထားသည်။

ဤပုံတူနှစ်ချပ်မှာ တစ်ခုက လှပပြီး တစ်ခုက ခပ်မိုက်မိုက် ပုံစံ ဖြစ်နေသည်။ ၎င်းတို့ကို ယှဉ်တွဲထားသည့်အခါ ဆန်းကြယ်သော ခံစားချက်တစ်ခုကို ပေးစွမ်းနေသည်။ ဤပုံနှစ်ပုံကို မြင်လိုက်ရသည့်အခါ ယီယွင်နှင့် လင်ရှင်းထုံတို့၏ စိတ်ထဲတွင် တစ်စုံတစ်ခုကို သတိရသွားပြီး ထူးခြားသော ခံစားချက်တစ်ခု ရရှိလိုက်ကြလေသည်။