အခန်း (၂၁၈၇-၂၁၈၈)

အပိုင်း(၂၁၈၇)

လှည့်ပတ် ဖွံ့ဖြိုးမှု ကြယ်ကွင်းပြင်၊ နှလုံးသားငယ် ကြယ်တာရာ နယ်မြေ...

လွန်ခဲ့သည့် ရက်အနည်းငယ်အတွင်း လူအပေါင်း၏ အာရုံသည် အသစ် ရောက်ရှိလာသော အာရုဏ်ဦး အဂ္ဂိရတ် ရှန့်ထို၏ လက်အောက်ငယ်သားများထံသို့သာ စုပြုံရောက်ရှိနေခဲ့သည်။ ဤအခြေအနေကို အနည်းငယ်မျှ အာရုံလွှဲနိုင်သည်ဆို၍ သူရဲကောင်းတာအို နန်းတော် ကို တည်ထောင်သူဖြစ်ပြီး လက်ရှိ နန်းတော်သခင်လည်းဖြစ်သူ ရှန့်လျို ကျင်းပတော့မည့် သုံးထပ်ကွမ်း မင်္ဂလာအခမ်းအနား တစ်ခုသာ ရှိလေသည်။

ဤဖြစ်ရပ်နှစ်ခုမှာ လက်ရှိကာလနှင့် နောင်လာမည့် အနာဂတ်ကာလ ဆွေးနွေးမှုများတွင် လွှမ်းမိုးထားပြီး လူအများက အမျိုးမျိုး ခန့်မှန်းပြောဆိုနေကြသည်။ သို့သော် သတင်းရပ်ကွက်များကို အလှုပ်ခတ်နိုင်ဆုံးနှင့် အာရုံစိုက်မှု အရှိဆုံး သတင်းမှာကား နှောင်ကြိုးဖွဲ့ခြင်း၊ ဂုဏ်ပြုခြင်းနှင့် ယှဉ်ပြိုင်ခြင်း ဟူသော သုံးထပ်ကွမ်း အခမ်းအနားသို့ တက်ရောက်ရန် အာရုဏ်ဦး အဂ္ဂိရတ် ရှန့်ထိုက ဖိတ်ကြားလွှာကို လက်ခံလိုက်ပြီဟူသော အတည်ပြုချက်ပင် ဖြစ်တော့သည်။

ထိုသတင်းထွက်ပေါ်လာပြီးနောက် နေရာဦးရန် ကြိုးပမ်းသူများကြောင့် တက်ရောက်မည့်သူ အရေအတွက်မှာ ချက်ချင်းပင် ထိုးတက်သွားခဲ့သည်။ လူအပြောအဆို အများဆုံး အကြောင်းအရာမှာကား အာရုဏ်ဦး အဂ္ဂိရတ် မျိုးဆက်သစ် အဂ္ဂိရတ် ထုတ်ကုန်များနှင့် ၎င်းတို့၏ အာနိသင်များအကြောင်းပင် ဖြစ်သည်။ အာရုဏ်ဦး နေမီးတောက် ဆေးလုံး၊ နေကြယ်မျိုးစေ့ ဆေးလုံး၊ ဝိညာဉ်ပင်လယ် အမြုတေဆေး၊ သွေးဟိန်းသံ ဆေးအနှစ်၊ ကောင်းကင်မူလ ဆေးအနှစ်၊ အာရုဏ်ဦး လေပွေဇုံ ဆေးတောင့်နှင့် အာရုဏ်ဦး နေကြတ် လောကဆေးလုံး စသည်တို့မှာ အာနိသင်ရော အဆင့်အတန်းပါ လက်ရှိရှိနေသော အဂ္ဂိရတ် ထုတ်ကုန်များကို အသာစီးရယူကာ အစဉ်အလာများကို ရိုက်ချိုးလိုက်သည့် ပစ္စည်းများ ဖြစ်ကြပေသည်။

ကျင့်ကြံသူတိုင်းအတွက် အသုံးမဝင်သော ဆေးဟူ၍ တစ်မျိုးမျှ မရှိသည့်အပြင် အဂ္ဂိရတ်တာအို၏ အမျိုးအစား လေးခုစလုံး ပါဝင်နေသေးသည်။ ဆေးတစ်မျိုးချင်းစီအလိုက် သန့်စင်ရန် လိုအပ်ချက်များ ကွဲပြားနိုင်သော်လည်း ထိုအချက်မှာ အရေးမပါလှသော အသေးအဖွဲ ကိစ္စမျှသာ ဖြစ်သည်။

လော့နင် သည် အာရုဏ်ဦး အဂ္ဂိရတ် မျိုးဆက်၏ သတင်းများကို ပိုမို ဟိုးလေးတကျော်ကျော်အောင် ဖန်တီးနေသည်။ သူမသည် ထိပ်တန်းအဖွဲ့အစည်းများမှ ကံထူးသူအချို့ကို ထိုဆေးများအား မြည်းစမ်းကြည့်ရန် ရောင်းချခဲ့သည်။ ထိုအခါ ဆေးအာနိသင်များမှာ ဝေဝါးမနေတော့ဘဲ လက်တွေ့ကျလာသဖြင့် ဆွေးနွေးငြင်းခုံမှုများမှာ ပိုမို ပြင်းထန်လာခဲ့လေသည်။

လော့နင်က မြည်းစမ်းခွင့် ပေးလိုက်သည်နှင့် တစ်ပြိုင်နက် ရူးသွပ်မှုများက နောက်ကွယ်မှ ကပ်ပါလာတော့သည်။

မျိုးဆက်တစ်ခုကို တည်ထောင်သူအဖြစ် ဝေ့ဝူယင်၏ ဂုဏ်သတင်းမှာလည်း သိသိသာသာ မြင့်တက်လာခဲ့ပြီး ပြင်ပဖန်တီးရှင် ဘုရင်များ အဆင့်သတ်မှတ်ချက်တွင် ပါဝင်သော လူပေါင်း တစ်သောင်းအနက် ရက်အနည်းငယ်အတွင်း အဆင့် ၇၃ မှ အဆင့် ၂၆ ထို့သို့ ခုန်တက်သွားခဲ့သည်။

တစ်ဖက်တွင်လည်း လော့နင်သည် သေမျိုးအဆင့် အဂ္ဂိရတ် ထုတ်ကုန်များကို မယုံကြည်နိုင်စရာ အရှိန်အဟုန်ဖြင့် ဖော်စပ်နိုင်သည့် သူမ၏ အံ့မခန်းပါရမီကို ပြသခဲ့ရာ ပြင်ပဖန်တီးရှင် ဘုရင်များ အဆင့်သတ်မှတ်ချက်တွင် အဆင့် ၉,၉၉၆ ချီးမြှင့်ခြင်း ခံရလေသည်။

ထိုထိပ်တန်းစာရင်းများကို စောင့်ကြည့်သူအများစုကမူ ဤသည်မှာ လော့နင်ထံမှ မျက်နှာသာရစေရန် ကံကြမ္မာ ဟေဇက်အဖွဲ့ က နူးညံ့စွာ ဖော်ပြလိုက်ခြင်း ဖြစ်သည်ဟု ယူဆကြသည်။ လာဘ်ထိုးသည်ဟူသော ကောလာဟလများပင် ထွက်ပေါ်နေသလို၊ လော့နင်က အာရုဏ်ဦး နေမီးတောက် ဆေးလုံး၏ အထွတ်အထိပ် အဆင့် အာနိသင်ကို စစ်ဆေးခွင့်ပြုခဲ့ခြင်းကလည်း အထောက်အကူ ဖြစ်စေခဲ့သည်။

သို့သော် ဤသည်မှာ ရည်ရွယ်ချက်ရှိရှိ ပြုလုပ်ခြင်းလည်း ဖြစ်သည်။ အဘယ်ကြောင့်ဆိုသော် လူငယ်ပါရမီရှင် ကျင့်ကြံသူများ လျှို့ဝှက်အာဏာရှင်အဆင့်သို့ တက်လှမ်းရန် အထောက်အကူပြုသော ပစ္စည်းများ၊ နယ်မြေများ၊ ကျင့်စဉ်များနှင့် အဖွဲ့အစည်းများအတွက် သီးသန့် အဆင့်သတ်မှတ်ချက်တစ်ခု ရှိနေသောကြောင့် ဖြစ်သည်။

အာရုဏ်ဦး နေမီးတောက် ဆေးလုံးကို အဆင့်နိမ့်၊ အဆင့်မြင့်၊ အထွတ်အထိပ် အဆင့်နှင့် သာလွန်ခြင်း အဆင့် အရည်အသွေး ဟူ၍ အရည်အသွေးမျိုးစုံ အပေါ် မူတည်ပြီး စစ်ဆေးခဲ့ရာ တစ်သောင်းသော စာရင်းတွင် အဆင့် ၇ ရရှိခဲ့လေသည်။

အဆင့် ၇...

ဤဆေးလုံးသည် ကျင့်ကြံခြင်း လူ့အဖွဲ့အစည်း တစ်ခုလုံး၏ စံနှုန်းများကို အသစ်ပြန်လည် သတ်မှတ်လိုက်သည်ကို ထောက်ဆလျှင် ဤအဆင့်မှာ ထိုက်တန်လှပေသည်။ ထို့ပြင် ထိပ်ဆုံးငါးမျိုးမှာ ပါရမီ လုံးဝမရှိသူ သို့မဟုတ် သာမန် ကျောက်တုံးတစ်တုံးကိုပင် အဆင့်တက်လှမ်းစေနိုင်သည့် အလွန်ရှားပါးသော ကောင်းကင်ဖီဆန်သည့် ပစ္စည်းများ ဖြစ်ကြသည်။ ထို့ကြောင့် အဆင့် ၇ ရရှိခြင်းမှာ အာနိသင်နှင့် ရရှိနိုင်မှုအပိုင်းတွင် အကောင်းဆုံးများပြီးလျှင် ဒုတိယလိုက်သည်ဟု ဆိုရမည် ဖြစ်သည်။

လော့နင်သည် သူတော်စင် သုံးဦး ခြံရံလျက် နေရာအနှံ့သို့ လှည့်လည်ခြင်းကလည်း အံ့အားသင့်ဖွယ် ဖြစ်ရပ်များကို ဖန်တီးခဲ့သည်။ အထူးသဖြင့် အင်အားစုငယ်လေးများဆီသို့ သွားရောက်လည်ပတ်ချိန်တွင် ဖြစ်သည်။ သူတော်စင် တစ်ဦး၏ တည်ရှိမှုသည်ပင် ကောင်းချီးမင်္ဂလာ တစ်ခု ဖြစ်နိုင်ပြီး အီမန်တက် သည် လော့နင်အပေါ် ရိုသေမှုပြသူတိုင်းကို ရက်ရက်ရောရော ရှိလှသည်။ သူမသည် လော့နင်၏ ချစ်သူဖြစ်သဖြင့် ဤသို့ ပြုမူခြင်းမှာ သူမအတွက် အပန်းမကြီးလှပေ။

နတ်ပရီ သည်လည်း ခေါင်းဆောင်အဖြစ် လျှို့ဝှက် ဝိညာဉ် အဆင့် တစ်ဦးသာ ရှိသော ဂြိုဟ်ငယ်လေးတစ်ခုရှိ အဖွဲ့အစည်းငယ်လေးတစ်ခုတွင် ပရိသတ် တစ်သိန်းခွဲကို တစ်နာရီကြာ တာအိုဟောပြောပွဲ ပြုလုပ်ပေးခဲ့သည်။ ထိုဟောပြောပွဲကို နာယူခွင့်ရသူတိုင်းမှာ မယုံကြည်နိုင်လောက်အောင် အဆင့်တက်လှမ်းမှုများ ကြုံတွေ့ခဲ့ရပြီး ထိုအဖွဲ့အစည်းခေါင်းဆောင်မှာလည်း မကြာမီမှာပင် သေမျိုးတစ်ပိုင်း အရှင်သခင် အဆင့်သို့ တက်လှမ်းရန် တံခါးပိတ် ကျင့်ကြံခြင်း ပြုလုပ်ခဲ့လေသည်။ ဤဖြစ်ရပ်မှာ တစ်လောကလုံးကို မှင်တက်သွားစေခဲ့သည်။

အမှန်စင်စစ် သူတော်စင် တစ်ဦးကို ဤသို့ ပြုလုပ်ရန် စည်းရုံးခြင်းမှာ မဖြစ်နိုင်သလောက် ခက်ခဲလှသည်။ ဤသည်က လော့နင်အား အလွန် ရက်ရောသဘောကောင်းပြီး ပါရမီရှင်များကို ပြုစုပျိုးထောင်ပေးသူအဖြစ် ပုံဖော်ပေးလိုက်ခြင်းပင် ဖြစ်သည်။

လော့နင်သည် လှည့်ပတ် ဖွံ့ဖြိုးမှု ကြယ်ကွင်းပြင် တစ်လျှောက်တွင် မသိမသာ ဝါဒဖြန့်မှုများကို ဦးဆောင်နေသဖြင့် အာရုဏ်ဦး အဂ္ဂိရတ် မျိုးဆက်၏ ဂုဏ်သတင်းမှာ တစ်ရက်ထက်တစ်ရက် ကြီးထွားလာနေသည်။

တစ်ဖက်တွင်လည်း ကံကြမ္မာ ဟေဇက်အဖွဲ့ က လှိုင်းတံပိုးများစွာ ထပ်မံ ဖန်တီးနေပြန်သည်။ သတင်းပေးပို့မှု စာရင်းသွင်းနှုန်းမှာ ရက်အနည်းငယ်အတွင်း ၁၈ ရာခိုင်နှုန်းအထိ စံချိန်တင် မြင့်တက်လာခဲ့သည်။ ဤသို့ မြင့်တက်လာရခြင်း၏ အဓိက အကြောင်းရင်းမှာ ကပ်ဘေး အလှမယ်များ အဆင့်သတ်မှတ်ချက်တွင် လူသစ်သုံးဦး ပါဝင်လာခြင်းကြောင့်ပင်။

သူတို့မှာ ယွီစွန်းလီ၊ ချင်ချူးမူနှင့် လော့နင်တို့ပင်။

ပုံမှန်အားဖြင့် ဤစာရင်းဝင်သူများသည် အလှအပအပြင် အခြားသော ထူးခြားသည့် စွမ်းဆောင်ရည်များ ရှိကြသူများ ဖြစ်သည်။ လော့နင်မှာမူ အထင်ရှားဆုံးပင်။ သူမသည် အဂ္ဂိရတ်ဝိညာဉ် ကို ပိုင်ဆိုင်ထားပြီး အာရုဏ်ဦး အဂ္ဂိရတ် ရှန့်ထို၏ ကျောထောက်နောက်ခံရှိသည့် မျိုးဆက်ဝင် မြေကြီးရှန့်ထို အဂ္ဂိရတ်ပညာရှင် လူငယ်တစ်ဦး ဖြစ်သည်။

အဂ္ဂိရတ်တာအို ထွန်းကားပြီး အမြင့်မြတ်ဆုံး လမ်းစဉ်အဖြစ် သတ်မှတ်ထားသော အစွမ်းကုန် သန့်စင်ခြင်း ဂလက်ဆီ အတွင်း၌ သူမ ပါဝင်လာခြင်းမှာ အငြင်းပွားဖွယ် မရှိပေ။ သူမ၏ မကြာသေးမီက စွမ်းဆောင်ရည်များနှင့် အလှအပမှာ ပြုံးလိုက်လျှင်ပင် စိတ်ဓာတ်များကို မြှင့်တင်ပေးနိုင်သလို၊ မျက်မှောင်ကြုတ်လိုက်လျှင်လည်း စစ်ပွဲများကို ဖြစ်ပွားစေနိုင်စွမ်း ရှိသည်။

အကယ်၍ တစ်စုံတစ်ဦးက သူမကို မလေးမစား ပြုမူခဲ့ပါက သူမအတွက် တိုက်ခိုက်ပေးမည့် နိမ့်ပါးသော ကျင့်ကြံသူများသာမက၊ ဖျက်ဆီးပစ်ရန် အသင့်စောင့်နေသည့် သူတော်စင်များပင် ရှိနေကြသည်။

ကျန်အမျိုးသမီး နှစ်ဦးမှာမူ မျှော်လင့်မထားသော ထပ်တိုးမှုများ ဖြစ်သည်။ သူတို့သည် အာရုဏ်ဦး အဂ္ဂိရတ် ရှန့်ထိုနှင့် နီးကပ်သော ဆက်နွှယ်မှု ရှိကြောင်း သတင်းပေါက်ကြားပြီးနောက်တွင်မှ စာရင်းသွင်းနှုန်းများ မြင့်တက်လာခြင်း ဖြစ်သည်။

အံ့အားသင့်စရာ အကောင်းဆုံးမှာ ယွီစွန်းလီ၏ တည်ရှိမှုပင်။ ထိပ်တန်းအဆင့်ရှိသူများက သူမတွင် ချင်းဆွေဟွကျိ ခန္ဓာကိုယ် ရှိကြောင်း သိရှိသွားကြသည်။ အမျိုးအစားနှင့် အဆင့်အတန်းကို တိတိကျကျ မသိရသေးသော်လည်း ဤအချက်မှာ သူမကို စာရင်းထဲ ထည့်သွင်းရန် လုံလောက်လှပေသည်။ ပိုမို သိရှိလိုပါက ကြောက်မက်ဖွယ် သားရဲတစ်ကောင် စောင့်ကြပ်နေသည့် သူမကို ထောက်လှမ်းရပေလိမ့်မည်။

သို့သော်လည်း ချင်ချူးမူ မှာမူ သူမ၏ ထူးခြားသော မျိုးနွယ်နှင့် ထူးကဲသော ပါရမီကြောင့်သာ စာရင်းသွင်းခံရခြင်း ဖြစ်သည်။ သူမသည် သစ်သားကျင့်ကြံသူ တစ်ဦး၏ အပြစ်အနာအဆာကင်းသော စံပြပုံရိပ်ဖြစ်ပြီး သူမ၏ အလှအပနှင့် အမူအရာမှာ ရင်သပ်ရှုမောဖွယ် ဖြစ်သည်။ သူမသည် စာရင်း၏ နံပတ်စဉ် တစ်သောင်းတွင်သာ ရှိသော်လည်း ရုပ်ပိုင်းဆိုင်ရာ၊ စိတ်ပိုင်းဆိုင်ရာနှင့် စွမ်းအင် သွေးကြောစနစ်ဆိုင်ရာ သုံးထပ်ကွမ်း ပါရမီရှင် ဖြစ်ကြောင်း သတင်းများ ထွက်လာပြီးနောက် သူမ၏ တည်ရှိမှုကို မည်သူမျှ မငြင်းခုံနိုင်တော့ပေ။

စိတ်လှုပ်ရှားစရာ အကောင်းဆုံး အချက်မှာကား ယွီစွန်းလီနှင့် ချင်ချူးမူ တို့ နှစ်ဦးစလုံးသည် အာရုဏ်ဦး အဂ္ဂိရတ် ရှန့်ထို၏ ဇနီးများ ဖြစ်နေခြင်းပင်။

ချောင်စွေ့ဖုန်းမှာ ကျင့်ကြံသူတစ်ဦးအဖြစ် ပိုမို တက်ကြွစွာ လှုပ်ရှားနေသော်လည်း ထိုအလှနတ်သမီး စာရင်းတွင် ပါဝင်နိုင်ခြင်း မရှိသေးပေ။ သို့သော် သူမသည် ဂုဏ်သတင်းကြီးသော ကျင့်ကြံသူများကို လိုက်လံ စိန်ခေါ်ရင်း တိုက်ပွဲကျွမ်းကျင်မှုများကို လေ့ကျင့်နေသည်။ သူမသည် တိုက်ခိုက်ရသည်ကို အနည်းငယ် ရူးသွပ်နေသူပင် ဖြစ်သည်။ သူမနှင့် ပတ်သက်၍ လူသိများသော အချက်မှာ ရက်ရောခြင်းပင်။ သူမ၏ စိန်ခေါ်မှုကို လက်ခံပြီး အစွမ်းကုန် တိုက်ခိုက်သူတိုင်းကို နိုင်သည်ဖြစ်စေ၊ ရှုံးသည်ဖြစ်စေ၊ ဒဏ်ရာရသည်ဖြစ်စေ ထိုက်တန်သော ဆုလာဘ်များကို ပေးလေ့ရှိသည်။

နောက်ရက်သတ္တပတ် အနည်းငယ်အတွင်း ချောင်စွေ့ဖုန်းသည် ကျင့်ကြံသူများက မိမိတို့ဆီသို့ လာရောက်လည်ပတ်ရန် ဆုတောင်းရလောက်သည့် ပုဂ္ဂိုလ်တစ်ဦး ဖြစ်လာပေလိမ့်မည်။ အဘယ်ကြောင့်ဆိုသော် သူမသည် ထိုစိန်ခေါ်ပွဲများတွင် မည်သူ့ကိုမျှ သတ်ဖြတ်ခြင်း မရှိသောကြောင့်ပင်။

***

အပိုင်း(၂၁၈၈)

နှလုံးသားငယ် ကြယ်တာရာ နယ်မြေ၊ အစွမ်းကုန် သန့်စင်ခြင်း ခန်းမ၏ နန်းတော်တိုက်ကြီး အထက်ဝယ်...

လွတ်လပ်စွာ လွင့်မျောနေသော ကုန်းမြေတိုက်ကြီး၏ အထက် ကောင်းကင်ယံတွင် ငွေရောင်တောက်ပသော နန်းတော်တစ်ခုမှာ အရာအားလုံးကို အရေးမစိုက်သကဲ့သို့ တည်ရှိနေသည်။ ထိုနန်းတော်၏ ပတ်လည်တွင် ဆေဘာအလင်းတန်း သေးသေးလေးများဖြင့် ဖွဲ့စည်းထားသော အလင်းတန်း ဆယ့်ရှစ်ခုမှာ ကောင်းကင် ကြယ်တာရာများအလား ဝန်းရံလှည့်ပတ်နေကြ၏။ ကြောက်မက်ဖွယ်ကောင်းလှသော ထိုမြင်ကွင်းကြောင့် အစွမ်းကုန် သန့်စင်ခြင်း ခန်းမ မှ အဖွဲ့ဝင်အချို့မှာ မိမိတို့နယ်မြေအပေါ် မလေးမစား ပြုမူခံရသည်ဟု ယူဆကာ ဒေါသထွက်နေကြသော်လည်း ဟောင်ချန်းရွှယ် ကမူ ထိုကန့်ကွက်မှုအားလုံးကို လျစ်လျူရှုကာ အတင်းအကျပ် နှုတ်ပိတ်ထားခဲ့သည်။

ဝေ့ဝူယင်အနေဖြင့် တိတ်ဆိတ်စွာ ကျင့်ကြံရန် နေရာလိုအပ်နေသဖြင့် သူတို့၏ အထက်ကောင်းကင်တွင် နေရာပေးရန် သူက ဝန်မလေးခဲ့ပေ။ အထူးသဖြင့် ဤနယ်မြေသည် အမြင့်မြတ်ဆုံး ရဲတိုက် ခုနစ်ခု ၏ အကာအကွယ်အောက်တွင် ရှိနေသောကြောင့် ဖြစ်သည်။ ထို့ပြင် ဤကဲ့သို့ စေတနာပြခြင်းဖြင့် သူတို့အကြား ဆက်ဆံရေးကို ပိုမိုခိုင်မာစေမည် မဟုတ်ပါလား။

မူလအာရုဏ်ဦး နန်းတော် အတွင်း၌မူ အာရုဏ်ဦး ခြေချခြင်း မှော်သန့်စင် ဆေးအိုးသည် နို့နှစ်ရောင် အလင်းတန်းများ မှိန်ဖျော့စွာ လင်းလက်နေပြီး ၎င်း၏ မျက်နှာပြင်ပေါ်တွင် ကြယ်တာရာများ၏ ဘဝစက်ဝန်းမှာ ခန့်ညားထည်ဝါစွာ ပေါ်လွင်နေသည်။ ဝေ့ဝူယင်၏ အဂ္ဂိရတ် အခန်းမှာ အတော်ပင် ကျယ်ဝန်းလှပြီး ကြမ်းပြင်ထက်တွင် တစ်ပေခန့်အမြင့်ရှိသော အသန့်စင်ဆုံး မြူခိုး များ ပျံ့နှံ့နေသဖြင့် သူ၏ ခြေထောက်များကိုပင် မမြင်ရချေ။ လေထဲတွင် ပျံဝဲနေသော ပေစာလိပ်များ၊ ကျောက်ပြားများနှင့် စာအုပ်များမှ ပြင်းထန်သော စိတ်စွမ်းအင်များ ထွက်ပေါ်နေပြီး ဝေ့ဝူယင်၏ အလိုအတိုင်း သတင်းအချက်အလက်များကို မှတ်တမ်းတင်ခြင်း၊ ရှာဖွေခြင်းတို့ကို ပြုလုပ်ပေးနေကြသည်။

ဤ မူလအာရုဏ်ဦး နန်းတော် သည် ကျင့်ကြံခြင်းအတွက် အထောက်အကူပြုသော အစီအရင်များ၊ ကွန်ရက်များဖြင့် အထပ်ထပ် တည်ဆောက်ထားပြီး တစ်ပြိုင်နက်တည်းမှာပင် အဂ္ဂိရတ်ပညာအတွက် အထူးသီးသန့် အစီအရင်များလည်း ပါဝင်နေသည်။ ဆေးဖော်စပ်သည့် စားပွဲကိုပင် ဝေ့ဝူယင်၏ အသန့်စင်ဆုံးသော အဂ္ဂိရတ် အာကာရှစ် စွမ်းအင်များဖြင့် ထုလုပ်ထားပြီး အစီအရင် အဆင့်ဆင့်ကို ရေးထိုးထားလေသည်။

"ဆရာ..."

ပိုင်ရှု ၏ စိတ်လှုပ်ရှားနေသော အသံမှာ အဂ္ဂိရတ်အိုးအတွင်းမှ ထွက်ပေါ်လာသည်။ အာရုဏ်ဦး ခြေချခြင်း မှော်သန့်စင် ဆေးအိုးသည် သူမ၏ ခန္ဓာကိုယ်ဖြစ်ပြီး သူမသည် အဂ္ဂိရတ်တာအို၏ ဝိညာဉ်တစ်ခုအဖြစ် ထိုအိုးနှင့် ခွဲခြားမရအောင် ဆက်နွှယ်နေသူ ဖြစ်သည်။

ဝေ့ဝူယင် နောက်ဆုံး ဆေးဖော်စပ်ခဲ့သည်မှာ ပြတ်သားသော ဆည်းဆာ ဂလက်ဆီ (ယခင် အမည်မဲ့ ဂလက်ဆီ) ၏ ဆွေးနွေးပွဲ မတိုင်မီ ရက်အနည်းငယ်က ဖြစ်သည်။ ထိုစဉ်က ပိုင်ရှုသည် လော့နင်နှင့်အတူ ရှိနေခဲ့ပြီး ဤအစွမ်းကုန် သန့်စင်ခြင်း ဂလက်ဆီ တွင် ပြုလုပ်နေသကဲ့သို့ပင် သူ၏ ဂုဏ်သတင်းနှင့် မျိုးဆက်အကြောင်းကို ကျယ်ကျယ်ပြန့်ပြန့် သိရှိအောင် ကူညီပေးခဲ့သည်။ ထို့ကြောင့် ပိုင်ရှုသည် ဝေ့ဝူယင်၏ ထိုဆေးဖော်စပ်မှုကို ကိုယ်တိုင် မမြင်ဖူးခဲ့ဘဲ ကောင်းကင်စစ်ဝိညာဉ်ထံမှသာ ပြန်ကြားခဲ့ရသည်။

သူမ ကြားသိရသလောက်ဆိုလျှင် ဝေ့ဝူယင်သည် သေမျိုးအဆင့် အဂ္ဂိရတ် ထုတ်ကုန်ပေါင်း သောင်းနှင့်ချီ၍ ဖော်စပ်ခဲ့ရာ အားလုံးမှာ သာလွန်ခြင်း အဆင့် အရည်အသွေးများ ဖြစ်ကြပြီး ထိုမျှများပြားသော ပမာဏကို မယုံကြည်နိုင်လောက်အောင် တိုတောင်းလှသည့် မိနစ်သုံးဆယ် အတွင်းမှာပင် ပြီးမြောက်အောင် ဖော်စပ်ခဲ့ခြင်း ဖြစ်သည်။

ဝေ့ဝူယင်၏ ဆေးဖော်စပ်မှု အရှိန်အဟုန်မှာ အမြဲတမ်း ပုံမှန်ထက် ထူးကဲနေခဲ့သော်လည်း ဤသည်မှာမူ ကောင်းကင်ကိုပင် ဖီဆန်လွန်းလှပေသည်။

သူမ မနာလို ဖြစ်မိသည်မှာ အမှန်ပင်။ ထိုစဉ်က ထွက်ပေါ်လာသော အသန့်စင်ဆုံး မြူခိုး များသည် မည်မျှပင် အရသာရှိလိမ့်မည်နည်း။ ထိုမြူခိုးများကို လက်ခံရရှိမည့် အဂ္ဂိရတ်အိုးမှာ သူမ အဘယ်ကြောင့် မဖြစ်ခဲ့ရပါသနည်း။

ထို့ပြင် ဝေ့ဝူယင်၏ အံ့မခန်း အဂ္ဂိရတ် စွမ်းဆောင်ချက်များကို မြင်တွေ့ရလွန်း၍ ထုံထိုင်းနေပြီဖြစ်သော ကောင်းကင်စစ်ဝိညာဉ် ပင်လျှင် ယခုလာမည့် စီမံကိန်းနှင့် ပတ်သက်၍ ပုံမှန်မဟုတ်ဘဲ တိတ်ဆိတ်ငြိမ်သက်ကာ စိုးရိမ်တကြီး ဖြစ်နေလေသည်။

သို့သော်လည်း သူတို့နှစ်ဦးစလုံး သိထားသည့် အချက်မှာ ဝေ့ဝူယင်၏ လမ်းစဉ်သည် ကောင်းကင်စစ်ဝိညာဉ် ၏ မြင့်မားသော ဗဟုသုတများ သို့မဟုတ် ပိုင်ရှု ၏ ရှေးဟောင်း မှတ်ဉာဏ်များထဲရှိ ပုံမှန် အတွေ့အကြုံနှင့် နားလည်မှု ဘောင်များမှ လွန်ကဲကာ သွေဖည်နေပြီ ဖြစ်ခြင်းပင်။

အဘယ်ကြောင့်ဆိုသော် သူသည် မိမိ၏ ကိုယ်ပိုင်အစွမ်းကိုသာ အားကိုးပြီး ကောင်းကင်ရတနာ သုံးပါးကို ကိုင်ဆောင်ထားသည့် ဉာဏ်အလင်းရ သူတော်စင် တစ်ဦးကို တိုက်ခိုက် အောင်နိုင်ခဲ့သည့် သေမျိုးတစ်ဦး ဖြစ်သောကြောင့်ပင်။ ဤသည်မှာ သမိုင်းတွင် တစ်ကြိမ်မျှ မရှိဖူးသေးသော စွမ်းဆောင်ချက် ဖြစ်ပေသည်။

"ပြီးခဲ့တဲ့တစ်ခေါက် ငါ ဆေးဖော်စပ်တုန်းက သေမျိုးအဆင့် သာလွန်ခြင်း အဆင့် အရည်အသွေး ဆေးလုံးတွေကို အသက်ရှူသလိုမျိုး သဘာဝကျကျ အဆက်မပြတ် ဖော်စပ်နိုင်ခဲ့တယ်... အဲ့တာက ငါ့ကို အတွေးတစ်ခု ရစေခဲ့တယ်... အဲဒီနောက်မှာတော့ ငါ့ခန္ဓာကိုယ်ထဲက ကောင်းချီးတွေကို တမင်တကာ ထိန်းချုပ်ပြီး ငါ့ရဲ့ စွမ်းအင်တွေထဲမှာ ပါဝင်နေတဲ့ လျှို့ဝှက်ဆန်းကြယ်တဲ့ ဂုဏ်သတ္တိတွေကို လျှော့ချကြည့်တဲ့အခါမှာ... အဆင့်နိမ့်၊ အဆင့်မြင့်နဲ့ အထွတ်အထိပ် အဆင့်တွေကို ငါ့အလိုရှိသလို ပြန်ပြီး ဖော်စပ်ဖို့ ခက်ခဲပေမဲ့ ဖြစ်နိုင်တယ်ဆိုတာ တွေ့ခဲ့ရတယ်..."

ဝေ့ဝူယင်သည် မျက်လုံးများကို မှိတ်ကာ သူ၏ အတိတ်က ကြိုးပမ်းမှုများကို စိတ်ကူးဖြင့် ပုံဖော်ရင်း ဆင်ခြင်နေမိသည်။ ကြယ်တာရာ ပါရဂွန် ခန္ဓာကိုယ်ကို တည်ဆောက်ပြီးနောက် ဝေ့ဝူယင်သည် သေမျိုးတာအို၊ လျှို့ဝှက်တာအိုနှင့် ထာဝရ အော်ရာတစ်ခု ဖြစ်ဟန်တူသော တန်ခိုးရှင်တာအိုတို့ဆီမှ ကောင်းချီးသုံးပါးကို ရရှိခဲ့သည်။

ထို့နောက် ဝေ့ဝူယင်သည် ဉာဏ်အလင်းရ သူတော်စင် နွေဦးကွင်းပြင်ကို တရားမျှတသော တစ်ဦးချင်း တိုက်ပွဲတွင် သတ်ဖြတ်နိုင်ခဲ့သောကြောင့် သေမျိုးတာအိုက ဒုတိယမြောက် ကောင်းချီးကို ထပ်မံ ချီးမြှင့်ခဲ့သည်။ ထိုကောင်းချီးမှာ သူ၏ ခန္ဓာကိုယ်ကို ထုဆစ်စဉ်က ရခဲ့သော ရေတစ်စက်စာ ကောင်းချီးထက် များစွာ သာလွန်ပြီး ကြီးမားသော ကန်ရေပြင်ကြီး သူ၏ ခန္ဓာကိုယ်အတွင်းသို့ စီးဝင်လာသကဲ့သို့ ပြင်းထန်လှသည်။

သူသည် သေမျိုးသူတော်စင် ခါးပတ်ကို ရရှိခဲ့ပြီး ထိုမှတစ်ဆင့် သူကိုယ်တိုင်မှာ သေမျိုး သူတော်စင် တစ်ဦး ဖြစ်လာခဲ့သည်။ တစ်နည်းအားဖြင့် ဝေ့ဝူယင်သည် သေမျိုးတာအို၏ အမြင့်မြတ်ဆုံးသော အသွင်သဏ္ဌာန်များကို ကိုယ်စားပြုနိုင်ခဲ့ပြီး ၎င်းကို အောင်နိုင်ခဲ့သည်ဟု ဆိုနိုင်သည်။ သမိုင်းတစ်လျှောက်တွင် ထိုဘွဲ့ထူးကို ပထမဆုံး ရရှိသူ မဟုတ်စေဦးတော့၊ သူသည် ၎င်း၏ အကျိုးကျေးဇူးများကို ခံစားနေရပြီ ဖြစ်သည်။ သေမျိုးတာအိုတွင် သူ့အတွက် ခက်ခဲသောအရာ ဟူ၍ မရှိတော့ဘဲ သေမျိုးနှင့် ဆက်နွယ်သော အရာအားလုံးကို အလိုလို သိမြင်နေခဲ့သည်။ ထိုအထဲတွင် အဂ္ဂိရတ်တာအို၏ အခြေခံ အချက်အလက်များကို အကောင်းဆုံး ထုတ်ယူခြင်း၊ ထိန်းသိမ်းခြင်းနှင့် လက်တွေ့အသုံးချခြင်းတို့လည်း ပါဝင်သည်။

ဤအချက်သည် မိနစ်သုံးဆယ်အတွင်း ဆေးလုံးပေါင်း သောင်းနှင့်ချီ၍ ဖော်စပ်နိုင်ခဲ့သည့် သူ၏ အံ့မခန်း အရှိန်အဟုန်အတွက် အဓိက အထောက်အကူ ဖြစ်စေခဲ့သည်။ သူသည် အမှန်တကယ်ပင် သေမျိုးတို့၏ ပါရဂွန် ဖြစ်လာခဲ့ပြီ ဖြစ်သည်။ ထို့ပြင် ၎င်းသည် လျှို့ဝှက်ဆန်းကြယ်သော အယူအဆများကို မည်သည့် ငြင်းပယ်မှု သို့မဟုတ် အခက်အခဲမျှ မရှိဘဲ ပေါင်းစပ်ထည့်သွင်းနိုင်စေသည်။ ထို့ကြောင့်ပင် သူနောက်ပိုင်း ဖော်စပ်သမျှ ဆေးလုံးများမှာ လျှို့ဝှက်အဆင့်ရှိသော အဂ္ဂိရတ်စွမ်းအင်များကို ငြင်းပယ်ခြင်း မရှိဘဲ အားလုံးမှာ သာလွန်ခြင်း အရည်အသွေးများ ဖြစ်နေရခြင်း ဖြစ်ပေသည်။

ဤသည်မှာ ကောင်းကင်ဘုံ နတ်မျက်လုံးများ၊ သေမျိုးသူတော်စင် ခါးပတ် နှင့် အဂ္ဂိရတ် အာကာရှစ် ကြယ်တာရာ ဝိညာဉ် တို့ မရှိဘဲ မည်သူမျှ တုပနိုင်သည့်အရာ မဟုတ်ပေ။ ထို့ပြင် အပြန်အလှန် လွတ်လပ်စွာ ကူးပြောင်းနိုင်သော ကြယ်တာရာ ဝိညာဉ်လေးခုမှ ထွက်ပေါ်လာသည့် အံ့မခန်း စွမ်းအင်ပမာဏနှင့် ကုန်ခမ်းသွားသည်ဟု မရှိသော ဖီဆန် အရွယ်အစားရှိ လောကချည်နှောင် ကြယ်တာရာ နယ်မြေ တို့၏ အစွမ်းကိုလည်း ထည့်သွင်းတွက်ချက်ရပေဦးမည်။

သို့သော် မိမိ အသစ်ရရှိထားသည့် ကျင့်ကြံခြင်း အဆင့်အတန်းနှင့် စွမ်းဆောင်ရည်များကို သိရှိနားလည်သွားပြီးနောက် ဝေ့ဝူယင်၏ စိတ်ထဲတွင် ရူးသွပ်ဖွယ်ရာ စိတ်ကူးတစ်ခု ပေါ်လာတော့သည်။ အကယ်၍ သေမျိုးအဆင့် သာလွန်ခြင်း အရည်အသွေး အဂ္ဂိရတ် ထုတ်ကုန်တစ်ခုကို ဖော်စပ်ရန် လျှို့ဝှက်တာအို၏ အော်ရာကို ထည့်သွင်းရန် လိုအပ်သည်ဆိုလျှင်၊ လျှို့ဝှက်အဆင့် သာလွန်ခြင်း အဆင့် အရည်အသွေး အဂ္ဂိရတ် ထုတ်ကုန်များအတွက်ကော မည်သို့ဖြစ်မည်နည်း။ ကောင်းချီးအဖြစ် ရရှိထားသော သူ၏ တန်ခိုးရှင်တာအို အော်ရာ သို့မဟုတ် ထာဝရအော်ရာကို ထည့်သွင်းခြင်းဖြင့် ထိုကဲ့သို့ပင် စွမ်းဆောင်နိုင်မည်လား။

သူ စမ်းသပ်ကြည့်ခဲ့သည်။

ထိုအရာက... မလုံလောက်သေးကြောင်း သူ သိလိုက်ရ၏။

သို့သော် ထိုအခါ သူသည် အခြားသော လမ်းကြောင်းတစ်ခုကို အသုံးပြုရန် စဉ်းစားမိသွားသည်။

၎င်းမှာ ကောင်းကင်ဘုံ နတ်မျက်လုံးများပင် ဖြစ်သည်။ အတိအကျဆိုရသော် မသေမျိုးမျက်လုံး နှင့် ဖန်တီးခြင်းမျက်လုံး တို့ ဖြစ်သည်။ ဤထာဝရအော်ရာကို ထုတ်ယူပြီး ဆေးဖော်စပ်ခြင်း လုပ်ငန်းစဉ်၏ နောက်ဆုံးအဆင့်ဖြစ်သော ပေါင်းစပ်ခြင်း အဆင့်တွင် တိုက်ရိုက် ထည့်သွင်းရန် သူ သီအိုရီ ထုတ်ခဲ့သည်။

ပုံမှန်အားဖြင့်ဆိုလျှင် သူ၏ ထာဝရအော်ရာ ကောင်းချီးမှာ ကုန်ခမ်းနိုင်သော အရာဖြစ်သော်လည်း ကြယ်တာရာ ပါရဂွန် ခန္ဓာကိုယ် နှင့် ပေါင်းစပ်ပြီးနောက်တွင်မူ ၎င်း၏ အစွမ်းမှာ ကုန်ဆုံးသွားသည်ဟူ၍ မရှိတော့ပေ။ သေမျိုးအော်ရာ၊ လျှို့ဝှက်အော်ရာ သို့မဟုတ် ထာဝရအော်ရာ မည်သည်ကိုပင် အသုံးပြုပါစေ၊ ၎င်းကို သုံးစွဲပြီးသည်နှင့် ပတ်ဝန်းကျင်ရှိ မန်နာနှင့် ကမ္ဘာလောက၏ ချီစွမ်းအင်များကို စုပ်ယူသန့်စင်ခြင်းဖြင့် အမြဲတမ်း အပြည့်အဝ ပြန်လည် ရရှိနေမည် ဖြစ်သည်။

"ငါ ထင်တာကတော့ အောင်မြင်ဖို့ အခွင့်အရေး ၁၇ ရာခိုင်နှုန်း ရှိတယ်..."

ဝေ့ဝူယင်၏ ဒုတိယစိတ်က သူ၏ လုပ်ဆောင်ချက်များကို အဆုံးသတ်ပြီးနောက် ဤအခိုက်အတန့်ကို လက်မလွှတ်လိုသဖြင့် ဝင်ရောက်မှတ်ချက်ပေးလိုက်သည်။ လျှို့ဝှက်အဆင့် သာလွန်ခြင်း အရည်အသွေး အဂ္ဂိရတ် ထုတ်ကုန်တစ်ခုကို ဖော်စပ်ခြင်းက ဝေ့ဝူယင် အတွက် မည်သို့သော အကျိုးကျေးဇူးများ ဆောင်ကြဉ်းပေးမည်နည်းဆိုသည်ကို သူ အလွန် သိချင်နေမိသည်။ ထိုသို့သော အခြေအနေမျိုးတွင် အခြား မည်သည့်အရာကိုမျှ အာရုံစိုက်နိုင်တော့မည် မဟုတ်ပေ။

အဂ္ဂိရတ်တာအိုတွင် ၎င်း၏ ကိုယ်ပိုင် ရည်ရွယ်ချက် အဆင့်အတန်းများ ရှိပြီး ၎င်းတို့ကို အသိအမှတ်ပြုမှုနှင့် ထိုက်တန်သော စွမ်းဆောင်ရည်များအပေါ် မူတည်၍ အဂ္ဂိရတ် ကြယ်တာရာများ အဖြစ် ချီးမြှင့်ခြင်း ခံရသည်။ ၎င်းတို့သည် အဂ္ဂိရတ်တာအိုအတွင်း အံ့မခန်း အစွမ်းများရှိသော မျက်လုံး ရည်ရွယ်ချက်များ ဖြစ်ကြသည်။ ပထမအဆင့်မှာ သေမျိုးဝိညာဉ် အဂ္ဂိရတ် ကြယ်တာရာ ဖြစ်ပြီး မိမိခြေထောက်ပေါ် မိမိရပ်တည်နိုင်သော သေမျိုး ဧကရာဇ် အဂ္ဂိရတ်ပညာရှင် ဟု ခေါ်ဆိုထိုက်သူတိုင်းကို ကောင်းချီးပေးထားခြင်း ဖြစ်သည်။

နောက်တစ်ဆင့်မှာ သာလွန်ဝိညာဉ် အဂ္ဂိရတ် ကြယ်တာရာဖြစ်သည်။ ဤအဆင့်ကို နည်းလမ်း ခုနစ်မျိုးဖြင့် ရရှိနိုင်သည်။ သေမျိုးအဆင့် သာလွန်ခြင်း အရည်အသွေး အဂ္ဂိရတ် ထုတ်ကုန်များ သို့မဟုတ် လျှို့ဝှက်မြေကြီးအဆင့် အထွတ်အထိပ် အဂ္ဂိရတ် ထုတ်ကုန် လေးမျိုးစလုံးကို ဖော်စပ်နိုင်ခြင်းဖြင့် အများအားဖြင့် ရရှိလေ့ရှိသည်။

၎င်း၏ နောက်တစ်ဆင့်မှာ သာလွန်သန့်စင် အဂ္ဂိရတ် ကြယ်တာရာများပင် ဖြစ်သည်။ ဝေ့ဝူယင်သည် လျှို့ဝှက်လောကအဆင့်တွင် အာရုဏ်ဦး လောက ရေလွှမ်းမိုးခြင်း ဆေးလုံးဟူသော အဂ္ဂိရတ်တာအို၏ ထုတ်ကုန်အသစ်ကို ဖန်တီးကာ သေမျိုးတို့၏ မျှော်လင့်ချက် အကန့်အသတ်အားလုံးကို ကျော်လွန်ပြခဲ့သဖြင့် ဤအဆင့်သို့ ရောက်ရှိခဲ့ခြင်း ဖြစ်သည်။ အလားတူပင် လျှို့ဝှက်လောကအဆင့် အထွတ်အထိပ် အဂ္ဂိရတ် ထုတ်ကုန်များကို ဖော်စပ်ခြင်းဖြင့်လည်း ဤအဆင့်ကို ရရှိနိုင်သည်။

ဆိုလိုသည်က... နောက်ထပ် တစ်ဆင့်တက်ရန် လျှို့ဝှက်ကောင်းကင်အဆင့် ထွတ်အထိပ် အဂ္ဂိရတ် ထုတ်ကုန် လေးမျိုးစလုံးကို ဖော်စပ်ရန် လိုအပ်သည်။ သို့မဟုတ် လျှို့ဝှက်ကောင်းကင်အဆင့် ထုတ်ကုန်အသစ်တစ်ခု ဖန်တီးခြင်းကဲ့သို့သော စွမ်းဆောင်ချက်မျိုး လိုအပ်သည်။

သို့သော် ဝေ့ဝူယင် အသေအချာ သိထားသည့် အချက်တစ်ခု ရှိသည်...။

လျှို့ဝှက်အဆင့် သာလွန်ခြင်း အရည်အသွေး အဂ္ဂိရတ် ထုတ်ကုန်တစ်ခုကို ဖော်စပ်ခြင်းမှာ ယခုအဆင့်နှင့် နောက်ထပ်တစ်ဆင့်ကိုပင် ကျော်လွန်သွားလိမ့်မည် ဖြစ်သည်။

အကယ်၍ ထိုစွမ်းဆောင်ချက်များကို အဆင့်များဖြင့် ခွဲခြားမည်ဆိုပါက သေမျိုးဝိညာဉ် အဂ္ဂိရတ် ကြယ်တာရာ ကို အသိအမှတ်ပြုမှု အဆင့် (၁)၊ သာလွန်သန့်စင် အဂ္ဂိရတ် ကြယ်တာရာ ကို အဆင့် (၃) ဟု သတ်မှတ်လျှင်၊ သူ၏ တွက်ချက်မှုအရ ရည်ရွယ်ချက်ရှိရှိ ဖော်စပ်ထားသော လျှို့ဝှက်အဆင့် သာလွန်ခြင်း အရည်အသွေး အဂ္ဂိရတ် ထုတ်ကုန်မှာ အဆင့် (၆) ရှိလိမ့်မည် ဖြစ်သည်။

အဆင့် (၆)...

ဤသည်မှာ ကြယ်တစ်လုံး နယ်မြေ၏ သမိုင်းတစ်လျှောက်တွင် တန်ခိုးရှင်အဆင့်သို့ တက်လှမ်းရန် ကြိုးပမ်းသော်လည်း မအောင်မြင်ခဲ့သည့် ကျောင်းလုံ ကဲ့သို့သော တည်ရှိမှုမျိုးမှသာ ဖန်တီးနိုင်စွမ်း ရှိသည့်အရာ ဖြစ်သည်။ ဤသည်မှာ ဒဏ္ဍာရီဆန်လှပေသည်။ အံ့မခန်းနိုင်လှပေသည်။ မဖြစ်နိုင်ဟု ထင်ရပေသည်။

ဝေ့ဝူယင်သည် ခရာတို၏ မြန်ဆန်နေသော နှလုံးခုန်သံကို ငြိမ်သက်အောင် ထိန်းလိုက်သည်။

သူ လုပ်နိုင်ပါမည်လော။

မည်သို့ပင် ဆိုစေ ကြိုးစားကြည့်ရပေမည်။

"စကြစို့..."