အခန်း (၂၁၈၉-၂၁၉၀)

အပိုင်း(၂၁၈၉)

ဝုန်း...

ဟင်းလင်းပြင်တစ်ခုလုံးကို တုန်ဟိန်းသွားစေသည့် ပေါက်ကွဲသံကြီးတစ်ခု ထွက်ပေါ်လာ၏။ ၎င်းက မန်နာ စွမ်းအင်များကို လှုပ်ခတ်စေကာ ပြင်းထန်သော စွမ်းအင်လှိုင်းများကို ရိုက်ခတ်သွားစေသည်။

မူလအာရုဏ်ဦး နန်းတော် ၏ အောက်ဘက်တွင် အစွမ်းကုန် သန့်စင်ခြင်း ခန်းမ ၏ နန်းတော်တိုက်ကြီး တည်ရှိပြီး ၎င်းမှာ လွတ်လပ်စွာ ပျံဝဲနေသော ကုန်းမြေတိုက်ကြီးပေါ်တွင် တည်ရှိသည်။ ထိုကုန်းမြေပေါ်ရှိ မှီတင်းနေထိုင်သူ အပေါင်းတို့သည် အပြင်ဘက်သို့ ထွက်လာကြကာ သို့မဟုတ်ပါကလည်း... ပြတင်းပေါက်များအနီးမှနေ၍ ကောင်းကင်ယံရှိ နန်းတော်ဆီသို့သာ မျက်တောင်မခတ်တမ်း စိုက်ကြည့်နေကြသည်။

သူတို့၏ မျက်နှာထက်တွင် မယုံကြည်နိုင်မှု၊ မသေချာမှု၊ ကြောက်ရွံ့မှု၊ ထိတ်လန့်မှု၊ စိတ်ဝင်စားမှု၊ အံ့ဩကြည်ညိုမှု၊ လိုချင်တပ်မက်မှုနှင့် မျှော်လင့်ချက်များ စသည့် ခံစားချက်မျိုးစုံ ယှက်သန်းနေကြ၏။ အချို့မှာ တစ်ကိုယ်တည်း ထိုင်နေကြသလို၊ အချို့မှာ မိမိတို့၏ တာအိုလက်တွဲဖော်များနှင့် အချို့ကလည်း အုပ်စုလိုက် ဝိုင်းဖွဲ့နေကြသည်။

အချို့မှာမူ လက်ဟန်ချိပ်စည်းများကို ဖော်ဆောင်လျက် မိမိတို့၏ ကျင့်ကြံခြင်း အခြေခံကို တိတ်ဆိတ်စွာ လည်ပတ်နေကြပြီး အချို့မှာ စွမ်းအင်နှင့် အမတေများကို သိုလှောင်ရန် ဒီဇိုင်းထုတ်ထားသည့် ထူးဆန်းသော ကိရိယာများကို ကိုင်ဆောင်ထားကြသည်။

သူတို့၏ ဦးခေါင်းအထက်ရှိ မူလအာရုဏ်ဦး နန်းတော် မှ မိုးခြိမ်းသံကဲ့သို့ ဟိန်းဟောက်သံများ ထွက်ပေါ်ကာ သူတို့၏ စိတ်ဝိညာဉ်များကို တုန်လှုပ်စေပြီး အိပ်စက်ခွင့် မရအောင် နှောင့်ယှက်နေသည်မှာ ဤတစ်ကြိမ်သည် ပထမဆုံး မဟုတ်ပေ။ အစပိုင်းတွင် သူတို့ ထိတ်လန့်ခဲ့ကြသည်။ နယ်ခြားသားတစ်ဦးကြောင့် ဖြစ်ပေါ်လာသော ထိုမျှ ကြီးမားသည့် ဆူညံသံကို ကြားရလျှင် မည်သူက မကြောက်ဘဲ နေမည်နည်း။ သို့သော် မကြာမီမှာပင် ထိုကြောက်ရွံ့မှုမှာ အခြားသော ခံစားချက်တစ်ခုထံ လမ်းဖယ်ပေးလိုက်ရသည်။ ၎င်းမှာ အခြားမဟုတ်၊ လောဘ ပင် ဖြစ်တော့သည်။

အဘယ်ကြောင့်ဆိုသော် ထိုပေါက်ကွဲမှုဖြစ်ပြီးနောက် နောက်ဆက်တွဲအနေဖြင့် ထူးကဲစွာ သန့်စင်ထားသော နေကြယ် အမတေများ ရောယှက်နေသည့် အသန့်စင်ဆုံး မြူခိုး များ ယိုစိမ့်ထွက်ပေါ်လာသောကြောင့်ပင်။ ထို အသန့်စင်ဆုံး မြူခိုး များသည် အံ့ဩစရာကောင်းလောက်အောင် သန့်စင်လွန်းလှပေသည်။

အစွမ်းကုန် သန့်စင်ခြင်း ဂလက်ဆီ တွင် အသန့်စင်ဆုံး မြူခိုး များကို အဆင့်အတန်းနှင့် အရည်အသွေးအလိုက် ခွဲခြားထားလေ့ရှိပြီး ၎င်းတို့၏ အသုံးဝင်ပုံပေါ် မူတည်၍ ကွဲပြားသော အခေါ်အဝေါ်များလည်း ရှိကြသည်။ ဤသည်မှာ သူတို့ ပိုင်ဆိုင်ထားသည့် အဂ္ဂိရတ်တာအို နက်ရှိုင်းမှုကို ပြသနေခြင်းပင်။

ထို့ကြောင့် အဆင့်ကိုး သေမျိုးအဆင့် အဂ္ဂိရတ် ထုတ်ကုန်များကို အဆက်မပြတ် ဖော်စပ်ခြင်းဖြင့် ထွက်ပေါ်လာသော အသန့်စင်ဆုံး မြူခိုး ကို ပထမအဆင့် မြူခိုး (အနိမ့်ဆုံးအဆင့်) ဟု သတ်မှတ်သည်။

အဂ္ဂိရတ် ထုတ်ကုန်များကို စုဆောင်းခြင်း ဖြစ်စေ၊ အဆင့်နိမ့်ဆေး ၇၇၇ လုံး၊ အဆင့်မြင့်ဆေး ၇၇ လုံး သို့မဟုတ် အထွတ်အထိပ် အဆင့်ဆေး ၇ လုံးကို ဖော်စပ်ခြင်းဖြင့် ဖြစ်စေ ဒုတိယအဆင့် မြူခိုး ကို ဖန်တီးနိုင်သည်။

ပထမအဆင့် မြူခိုးမှာ အပေါ်ယံမျှသာ ဖြစ်ပြီး လက်တွေ့အသုံးချမှုထက် ဂုဏ်သိက္ခာပိုင်းအတွက်သာ ပို၍ သုံးကြသည်။ ဒုတိယအဆင့် မြူခိုးမှာကား ပိုမို လက်တွေ့ကျပြီး ကျင့်စဉ်များ၊ ဂါထာများနှင့် နည်းလမ်းမျိုးစုံတွင် အသုံးပြုနိုင်သည်။ ဝေ့ဝူယင်၏ အဋ္ဌမ ရင်းမြစ် အသွင်ပြောင်းလဲခြင်း အစီအရင် သည်ပင် ဤဒုတိယအဆင့် မြူခိုးကို အခြေခံထားခြင်း ဖြစ်သည်။

တတိယအဆင့် မြူခိုးအတွက်မူ လျှို့ဝှက်မြေကြီးအဆင့် ဆေးများ သို့မဟုတ် အဆင့်ကိုး သာလွန်ခြင်း အဆင့် အရည်အသွေး ထုတ်ကုန်များ ၇,၇၇၇ လုံးအထိ လိုအပ်သည်။ ဤအဆင့်သို့ ရောက်လျှင် အဂ္ဂိရတ်သင်္ကေတ များကို သန့်စင်နိုင်ပြီဖြစ်သလို၊ အဂ္ဂိရတ် ကြယ်တာရာ များ၏ စွမ်းအားများကိုလည်း အထွတ်အထိပ်အထိ အသုံးချနိုင်သည်။ ဥပမာအားဖြင့် အစစ်အမှန် ရှန့်ထို တစ်ဦး၏ လောကနိုးထခြင်း ကဲ့သို့သော အဂ္ဂိရတ်တာအို၏ ထင်ရှားပြသမှုမျိုးကို ဖန်တီးနိုင်သည်။

အသန့်စင်ဆုံး မြူခိုး ကို လူအများ တပ်မက်ကြသည့် စစ်မှန်သော အကြောင်းရင်းသည်ကား ဂလက်ဆီတစ်ခုလုံးတွင် ပျံ့နှံ့နေသော နည်းလမ်းတစ်ခုကြောင့်ပင်။ ၎င်းနည်းလမ်းအရ သာမန်ကျင့်ကြံသူများသည် ဤမြူခိုးကို အသုံးပြု၍ မသန့်စင်မှုများကို ဖယ်ရှားနိုင်ခြင်း၊ အဂ္ဂိရတ်ဝိညာဉ် အကြွင်းအကျန်များကို ချေဖျက်နိုင်ခြင်းနှင့် အဂ္ဂိရတ်ပစ္စည်းများနှင့် အခြားသော ကျင့်ကြံခြင်း ပစ္စည်းများကို သန့်စင်ရာတွင် ပိုမို လွယ်ကူချောမွေ့စေခြင်းတို့ကြောင့် ဖြစ်သည်။

တစ်ဖက်တွင်လည်း အသန့်စင်ဆုံး မြူခိုး ကို အသုံးပြုခြင်းဖြင့် ပြင်ပအဂ္ဂိရတ်စွမ်းအင်များကို အသုံးပြုကာ ဆေးဖော်စပ်သည့် နည်းလမ်းမှာ မြူခိုး၏ အဆင့်ပေါ်မူတည်၍ ပိုမို မြင့်မားသွားနိုင်သည်။ အမှန်စင်စစ် အစွမ်းကုန် သန့်စင်ခြင်း ဂလက်ဆီ တွင်ပင် အဂ္ဂိရတ်ပညာရှင် အများစုမှာ အဂ္ဂိရတ်ချီနှလုံးသားကို မရရှိထားကြပေ။ ၎င်းမှာ ပါရမီမရှိခြင်းကြောင့်သော်လည်းကောင်း သို့မဟုတ် ထူးခြားသော အဆင့်သို့ တက်လှမ်းရန်အတွက် မိမိတို့၏ တိုက်ခိုက်ရေးစွမ်းရည်နှင့် အနာဂတ် သက်တမ်းကို စတေးရန် ဝန်လေးသောကြောင့်သော်လည်းကောင်း ဖြစ်နိုင်သည်။

သို့သော် အဂ္ဂိရတ် ထုတ်ကုန်များတွင် တင်းကြပ်သော လိုအပ်ချက်များ ရှိနေပြီး ပြင်ပနည်းလမ်းဖြင့် ကျင့်ကြံထားသော အဂ္ဂိရတ်စွမ်းအင် အများစုမှာ ဆေးဖော်စပ်သည့် လုပ်ငန်းစဉ်အတွင်း အာနိသင်နှင့် အမတေများမှာ ပျော့သွားလေ့ရှိသည်။ ဥပမာအားဖြင့် အဂ္ဂိရတ်ဝိညာဉ် ကျင့်ကြံခြင်း လမ်းစဉ်သည် ကျင့်ကြံသူတစ်ဦး၏ အဂ္ဂိရတ်စွမ်းအင်များကို သာမန်ထက် တစ်ဆင့် ပို၍ မြင့်မားစေကြောင်း လူသိများသည်။

လွန်ခဲ့သော နှစ်ပေါင်းများစွာက ပါရမီရှင် အဂ္ဂိရတ်ပညာရှင်တစ်ဦးသည် ဤပြဿနာကို အသန့်စင်ဆုံး မြူခိုး ဖြင့် ဖြေရှင်းခဲ့သည်။ မြူခိုးကို အသုံးပြု၍ မိမိ၏ ပြင်ပအဂ္ဂိရတ်စွမ်းအင်များကို သန့်စင်ခြင်းဖြင့် ကျင့်ကြံသူများသည် ၎င်းတို့၏ စွမ်းအင်အဆင့်ကို အတုအယောင် မြှင့်တင်နိုင်ပြီး စစ်မှန်သော အဂ္ဂိရတ်ပညာရှင်များကဲ့သို့ ဆေးဝါးများကို ဖော်စပ်နိုင်သလို၊ မိမိတို့၏ တိုက်ခိုက်ရေး စွမ်းအားကိုလည်း ဆက်လက် ထိန်းသိမ်းထားနိုင်သည်။

ပထမအဆင့် မြူခိုးသည် ကြယ်တာရာ အမြုတေ အဆင့် အဂ္ဂိရတ်ပညာရှင်တစ်ဦး၏ အဂ္ဂိရတ်အင်အားနှင့် ညီမျှသည်။ ဒုတိယအဆင့် မြူခိုးသည် လျှို့ဝှက်အာဏာရှင်အဆင့်၏ အစောပိုင်းအဆင့်များ (လျှို့ဝှက်ကြယ်တာရာ၊ လျှို့ဝှက်ဝိညာဉ်၊ သေမျိုးတစ်ပိုင်း အရှင်သခင်နှင့် မြေကြီးရှန့်ထို) နှင့် ညီမျှပြီး၊ တတိယအဆင့် မြူခိုးမှာမူ လျှို့ဝှက်အာဏာရှင်အဆင့်၏ အမြင့်ပိုင်းအဆင့်များ (လောကရှန့်ထို၊ ကောင်းကင်ရှန့်ထို၊ အာဏာရှင် ရှန့်ထိုနှင့် အစစ်အမှန် သူတော်စင်) တို့နှင့် ယှဉ်ပြိုင်နိုင်သည်။

နောက်ဆုံးအနေဖြင့် အသန့်စင်ဆုံး မြူခိုး သည် ကမ္ဘာလောကတွင် မရှိသော်လည်း သဘာဝအတိုင်း ဖြစ်ပေါ်နေသော အဂ္ဂိရတ်အမတေဟု ယူဆနိုင်ပြီး ၎င်းသည် အဂ္ဂိရတ်ဝိညာဉ် ကျင့်ကြံသူများ၏ ကျင့်ကြံခြင်း လမ်းစဉ်ကို တိုက်ရိုက် အထောက်အကူ ပြုနိုင်သည်။

ကံမကောင်းစွာဖြင့် ဤအချက်ကြောင့်ပင် ရှားပါးလှသော အသန့်စင်ဆုံး မြူခိုး များသည် ကျင့်ကြံသူများနှင့် အဂ္ဂိရတ်ပညာရှင်များအတွက် အလွန်တန်ဖိုးကြီးမားသွားပြီး ဝယ်လိုအား အဆမတန် မြင့်မားသော်လည်း ရရှိနိုင်မှု အနည်းဆုံးဖြစ်သော ဈေးကြီးလှသည့် ပစ္စည်းတစ်ခု ဖြစ်လာခဲ့သည်။ အဘယ်ကြောင့်ဆိုသော် ၎င်းကို ဖန်တီးနိုင်သူများမှာလည်း မိမိတို့ကိုယ်တိုင် ပြန်လည် အသုံးပြုလိုသောကြောင့် ဖြစ်သည်။

ယခုအခါ မူလအာရုဏ်ဦး နန်းတော် ၏ အကာအကွယ် ဆေဘာ အစီအရင်ကြားမှ ယိုစိမ့်ထွက်လာသော မြူခိုးမှာ ဒုတိယအဆင့် မြူခိုး ဖြစ်နေသည်။ ၎င်းသည် နတ်ဘုရားတို့၏ မြူနှင်းများ ရေတံခွန်ကဲ့သို့ စီးကျလာသကဲ့သို့ အောက်ဘက်သို့ လွင့်မျောလာသော်လည်း ဓားအစီအရင်၏ နယ်နိမိတ်အတွင်း၌သာ တန့်နေပြီး ထပ်ခါတလဲလဲ ဖြစ်ပေါ်နေသော ပေါက်ကွဲမှုများကြောင့်သာ အောက်သို့ အရှိန်အဟုန်ဖြင့် တွန်းပို့ခြင်း ခံနေရသည်။

ဤသည်မှာ ကောင်းချီးပေးသော အခွင့်အရေးပင် ဖြစ်တော့သည်။

အဘယ်ကြောင့် ဤသို့ ဖြစ်ရသနည်း။

အရာအားလုံးမှာ လွန်ခဲ့သော ခုနစ်ရက်က စတင်ခဲ့သည်။

ဝေ့ဝူယင်သည် သူ၏ အဂ္ဂိရတ်တာအိုတွင် သမိုင်းမတင်ဖူးသော ခုန်ပျံကျော်လွှားမှုတစ်ခုကို လုပ်ဆောင်ရန် ဆုံးဖြတ်ခဲ့သည်။ သူသည် သူ၏ သီအိုရီကို လက်တွေ့စမ်းသပ်ရန်နှင့် သာလွန်ခြင်း အဆင့် အရည်အသွေး ရှိသော လျှို့ဝှက်အဆင့် အဂ္ဂိရတ် ထုတ်ကုန် တစ်ခုကို ဖန်တီးရန် စိတ်ပိုင်းဖြတ်ခဲ့သည်။

ပထမဦးစွာ သူသည် တစ်ရက်လျှင် တစ်လနှင့် ညီမျှသော လေပွေဇုံကို အသုံးပြုခဲ့ပြီး နောက်လာမည့် ၂၄ ရက် (အမှန်စင်စစ် နှစ်နှစ်ခန့်ကြာမည့် ကာလ) ကို အောင်မြင်အောင် ကြိုးပမ်းရန် ရည်ရွယ်ခဲ့သည်။ ထို့နောက် သူ၏ မှတ်စုများနှင့် ဖြစ်နိုင်ခြေရှိသော အတွေးများကို စုစည်းကာ ဆေးဖော်စပ်ခြင်းကို စတင်ခဲ့သည်။ ကျန်ရှိသောအရာမှာ ဆေးဖော်စပ်ခြင်းဖြင့် စမ်းသပ်ရန်သာ ဖြစ်သည်။

သို့သော် ထိုနေရာမှာပင် ပြဿနာ စတင်တော့သည်။

ဝေ့ဝူယင်သည် ပိုင်ရှု နှင့်အတူ လေပွေဇုံအတွင်း နောက်ထပ် သုံးလခန့် အချိန်ကုန်ဆုံးခဲ့သည်။ သူသည် အလွန်ပင် အာရုံစိုက်ထားပြီး သူ၏ ကျင့်ကြံခြင်း အခြေခံကို အပြည့်အဝ အသုံးပြုကာ သုံးဆယ့်သုံးသွယ် ကောင်းကင် ဆေးဖော်စပ်နည်း ကို အသုံးပြု၍ သွေးပူလေ့ကျင့်ခန်း ပြုလုပ်ခဲ့သည်။ သူ၏ လက်ထဲတွင် ဖော်စပ်စမ်းသပ်စရာ ပစ္စည်းများမှာလည်း အလျှံပယ် ရှိနေသည်။

ထိုအထဲတွင် လျှို့ဝှက်လောကအဆင့် အဂ္ဂိရတ် ထုတ်ကုန်ဖြစ်သော ချောက်ကမ္ဘာ အဖြူရောင် ဆေးလုံး ကဲ့သို့သော ပစ္စည်းများလည်း ပါဝင်ရာ၊ ထိုဆေးလုံးမှာ ခရမ်းရောင် ပင်လယ်၊ မီးခိုးရောင် နှင်းဆီ၊ သွေးဓားနှင့် နတ်မိမယ် တိတ်ဆိတ်ခြင်းတို့၏ မျက်လုံးများတွင် လောဘရိပ်များ ထင်ဟပ်လာစေရန် လုံလောက်လှပေသည်။ သူတို့မှာ အသားကို ဆာလောင်မွတ်သိပ်နေသော တောခွေးများကဲ့သို့ပင်။ သူတို့၏ အကြည့်များကို သူ မှတ်မိနေသေးသည်။

ချောက်ကမ္ဘာ အဖြူရောင် ဆေးလုံး မှာ အဘိဿဲလ် မျိုးနွယ်များအတွက်သာ သီးသန့်ဖြစ်သော်လည်း သူကမူ အချို့ကို ဖော်စပ်ပေးရန် ဝန်မလေးခဲ့ပေ။

အကယ်၍ ဝေ့ဝူယင်သည် လျှို့ဝှက်လောကအဆင့် အဂ္ဂိရတ် ထုတ်ကုန်များကို အကြိမ်ရေ ၃၃ ကြိမ်တိုင်တိုင် တစ်ဆက်တည်း ဖော်စပ်နေသည်မှာ သွေးပူ လေ့ကျင့်ခန်း ပြုလုပ်ရုံမျှသာ ဖြစ်သည်ဟု အများသူငါ သိသွားပါက မရေမတွက်နိုင်သော အဂ္ဂိရတ်ပညာရှင်များမှာ နှလုံးရပ်ပြီး ပြန်လည် မွေဖွားခြင်း စက်ဝန်း အတွင်း မိမိအလိုအလျောက် ခုန်ဆင်းသွားကြပေလိမ့်မည်။

သို့သော် ဤအခြေအနေမှာ ဝေ့ဝူယင်အတွက်မူ ထူးဆန်းသောအရာ မဟုတ်ပေ။ လျှို့ဝှက်အာဏာရှင်အဆင့်၏ ပထမအဆင့်သို့ သူ တက်လှမ်းနိုင်ခဲ့ပြီးကတည်းက သူ၏ စွမ်းအင်အရည်အသွေးမှာ နယ်ပယ်အသစ်တစ်ခုသို့ ရောက်ရှိသွားခဲ့ပြီ ဖြစ်သည်။ အစဉ်အလာများကို ဖီဆန်သူဖြစ်ပြီး သမိုင်းတွင် ပထမဆုံးသော သေမျိုး အဂ္ဂိရတ် ရှန့်ထိုပညာရှင် ဖြစ်လာသူပီပီ ဝေ့ဝူယင်၏ ကျင့်ကြံမှုမှာ သာမန်စံနှုန်းများကို အဆမတန် ကျော်လွန်နေခဲ့သည်။ ဤသည်မှာ သူ အပြင်းအထန် ကြိုးစားခဲ့ပြီး အသက်နှင့်ရင်းကာ ရယူခဲ့သော အားသာချက်များ၏ စုစည်းမှုပင် ဖြစ်သည်။

ထို့ပြင် သူ၏ ဒုတိယစိတ်ကလည်း ပြီးပြည့်စုံမှုနှင့် ဗဟုသုတအသစ်များကို အဆက်မပြတ် ရှာဖွေနေသဖြင့် အဂ္ဂိရတ်နည်းစနစ်မျိုးစုံကို လေ့လာကာ များစွာ တိုးတက်ကောင်းမွန်အောင် ပြုလုပ်ထားပြီး ဖြစ်သည်။ မစမ်းသပ်ရသေးသော အစီအရင်များ၊ ကျင့်စဉ်များနှင့် ရှိရင်းစွဲ နိယာမများကို ပြုပြင်မွမ်းမံမှုများကို လက်တွေ့အသုံးချကြည့်ရာတွင်လည်း အများစုမှာ အောင်မြင်မှု ရရှိခဲ့သည်။ သူ၏ မဂ္ဂီဆိုင်ရာ အစိတ်အပိုင်းများကို ဒုတိယစိတ်က အတားအဆီးမဲ့စွာ ထိန်းချုပ်ထားနိုင်သည်မှာ သိသာလှပေသည်။ ထိုဝေ့ဝူယင်က စစ်မှန်သော ပညာရှင်တစ်ဦးပင်။

သို့သော်လည်း ၎င်းတို့အား လက်တွေ့အသုံးချမှုအပိုင်းတွင်မူ ဒုတိယစိတ်မှာ သူ၏နောက်၌သာ ရှိနေပေလိမ့်မည်။ ထိုသို့ပြောခြင်းမှာ ပြိုင်ဆိုင်နေခြင်း မဟုတ်ပါချေ။ သူတို့ နှစ်ယောက်က အတူတူသာ ဖြစ်သည်။

***

အပိုင်း(၂၁၉၀)

ပထမတစ်လ ကုန်ဆုံးသွားချိန်တွင် ဝေ့ဝူယင်သည် သွေးပူ လေ့ကျင့်ခန်း လုပ်ငန်းစဉ်ကို အဆုံးသတ်လိုက်သည်။ ထိုအတောအတွင်း သူသည် အဂ္ဂိရတ်နည်းလမ်း ၂၈ မျိုးကို အသုံးပြုကာ လျှို့ဝှက်မြေကြီးအဆင့် အဂ္ဂိရတ် ထုတ်ကုန်ပေါင်း ၂,၅၄၁ ခု (ဆေးရည်၊ ဆေးအနှစ်နှင့် ဆေးလုံးများ အပါအဝင်) ကို ဖော်စပ်ခဲ့သည်။ လျှို့ဝှက်လောကအဆင့် အဂ္ဂိရတ် ထုတ်ကုန်များအတွက်မူ ၂၆၄ ခုအထိ ဖော်စပ်နိုင်ခဲ့သည်။

ဤအချိန်တွင် အဂ္ဂိရတ်အခန်းတစ်ခုလုံး၌ အသန့်စင်ဆုံး မြူခိုး များ ဝဲလည်နေပြီး ပိုင်ရှုမှာမူ ထိုမြူခိုးများကို သူမ၏ ခန္ဓာကိုယ်အတွင်းသို့ အငမ်းမရ မျိုချနေတော့သည်။ သူမမှာ အတိုင်းအထက်အလွန် ဝမ်းမြောက်နေလေပြီ။

အဘယ်ကြောင့်ဆိုသော် ထို ၂,၈၀၅ ခုသော အဂ္ဂိရတ် ထုတ်ကုန်များမှာ လျှို့ဝှက်မြေကြီးအဆင့်ဖြစ်စေ၊ လျှို့ဝှက်လောကအဆင့်ဖြစ်စေ...

အထွတ်အထိပ် အဆင့်များသာ ဖြစ်နေသောကြောင့်ပင်။

သူမသည် ထိုမြူခိုးများကို သရဲဝင်စီးသူ တစ်ကောင်လို စားသုံးနေသည်။ ဤသည်မှာ အဂ္ဂိရတ်တာအို၏ ဝိညာဉ်တိုင်းက အသက်ပေးပြီး ရယူလိုသည့် အရသာရှိလှသော စားသောက်ပွဲကြီး တစ်ခုပင်။ သတ်ဖြတ်ပြီး ရယူရလျှင်ပင် တန်လှပေသည်။

“ငါ့ရဲ့ နည်းစနစ်တွေက အများကြီး တိုးတက်လာပြီ... ဖန်တီးခြင်းမျက်လုံး က ရှိပြီးသား ပစ္စည်းတစ်ခုကို ပြီးပြည့်စုံတဲ့ ဒါမှမဟုတ် ပိုမိုကောင်းမွန်တဲ့ ပုံစံမျိုးနဲ့ ပြန်လည်ဖန်တီးနိုင်တဲ့အတွက် အရည်အသွေးပိုင်း ပြဿနာတွေကို ဖြေရှင်းပေးနိုင်တယ်... အဲဒါက တကယ် အထောက်အကူဖြစ်တာပဲ... ဒါပေမဲ့ ငါတို့ရဲ့ စုဆောင်းမှုတွေအားလုံးကနေ ဒီလို စံနှုန်းတစ်ခု ထွက်လာလိမ့်မယ်လို့တော့ မထင်ထားမိဘူး… ဆေးဖော်စပ်တဲ့ အရှိန်ကတောင် စဉ်းစားကြည့်ရင် ရူးချင်စရာပဲ”

ဝေ့ဝူယင်သည် သွေးပူလေ့ကျင့်ခန်း လုပ်ပြီးနောက်တွင် ဤကဲ့သို့ တွေးတောမိသည်။ မူလက ပိုင်ရှုကို အသန့်စင်ဆုံး မြူခိုး များ စားသုံးနိုင်ရန် အနားပေးဖို့ ရည်ရွယ်ခဲ့သော်လည်း သူ၏ စိတ်ကူးကို ပိုင်ရှုက စိတ်ဆိုးမာန်ဆိုးဖြင့် ချက်ချင်း ငြင်းပယ်လိုက်သည်။

ပိုင်ရှုမှာ ငိုတော့မည့်ဆဲဆဲပင်...။ သူမမှာ ဖခင်ဖြစ်သူက အစာငတ်ထားခဲ့ပြီးမှ ပေါင်မုန့်တစ်လုံး ပေးလိုက်သဖြင့် နောက်ထပ် မပေးတော့မှာကို စိုးရိမ်နေသည့် ကလေးငယ်တစ်ဦးနှင့် တူနေသည်။ စကားလုံးတစ်လုံးမျှ မပြောဘဲနှင့်ပင် ပိုင်ရှုမှာ ဝေ့ဝူယင်အား လူဆိုးတစ်ဦးအဖြစ် ချက်ချင်း ပုံဖော်လိုက်လေတော့သည်။

သို့သော် ဝေ့ဝူယင်က စိုးရိမ်သဖြင့် သတိပေးမိသည်။ အရည်အသွေးမြင့်မားသော အဂ္ဂိရတ် ထုတ်ကုန်များကြောင့် ထွက်ပေါ်လာသည့် အသန့်စင်ဆုံး မြူခိုး ပမာဏမှာ အဆမတန် များပြားလှသည်။ ဤသည်မှာ လျှို့ဝှက်အဆင့် အထွတ်အထိပ် အဂ္ဂိရတ် ထုတ်ကုန် ၂,၈၀၅ ခုစာ ဖြစ်သည်။

အခန်းအတွင်း ဖိသိပ်ခံထားရသော အသန့်စင်ဆုံး မြူခိုး များမှာ တတိယအဆင့်ကိုပင် ကျော်လွန်သွားခဲ့လေပြီ။ ဤသည်မှာ စတုတ္ထအဆင့် မြူခိုး ပင် ဖြစ်သည်။ ထို့ပြင် ၎င်းမှာ ထိုအဆင့်ထက်ပင် ထပ်မံ ကျော်လွန်ရန် အရှိန်ယူနေသယောင် ရှိသည်။

မကျေမချမ်း ဖြစ်နေသော ပိုင်ရှု၏ မျက်နှာလေးကို မြင်ရသောအခါ ဝေ့ဝူယင် အလျှော့ပေးလိုက်ရသည်။ သူမ၏ ပါးလေးကို ဆွဲညှစ်ကာ သက်ပြင်းချလိုက်မိ၏။ နောက်လာမည့် နှစ်လမှာမူ သူ၏ စိုးရိမ်မှုများကို အတည်ပြုပေးခဲ့သည်။

ဝေ့ဝူယင်သည် ဆေးဖော်စပ်ခြင်း၏ ပေါင်းစပ်ခြင်း အဆင့်တွင် မသေမျိုးမျက်လုံး မှ ထာဝရအော်ရာကို ထည့်သွင်းရန် စတင် ကြိုးပမ်းတော့သည်။

သို့သော်... သူ ကျရှုံးခဲ့သည်။

တစ်ကြိမ်...

နောက်တစ်ကြိမ်...

ထပ်ကာထပ်ကာ...

အကြိမ်ကြိမ်...

ထပ်မံ၍ ကျရှုံးပြန်သည်။

ဝေ့ဝူယင်သည် အာရုဏ်ဦး ပါရဂွန် ထုဆစ်ခြင်း ဆေးလုံး ဖော်စပ်စဉ်က ရရှိခဲ့သော ကန့်သတ်ချက်ရှိသည့် ထာဝရကောင်းချီးကို ပြန်လည် ဖြည့်တင်းရန်အတွက် သူ၏ ကြယ်တာရာ ပါရဂွန် ခန္ဓာကိုယ် ကိုသာ အဓိက အားကိုးနေရသည်။ ၎င်းမှာ အလုပ်ဖြစ်နေသည်။ ပုံမှန်အားဖြင့် ကုန်ဆုံးသွားမည့် အရင်းအမြစ်တစ်ခုမှာ ယခုအခါ အကန့်အသတ်မရှိသော အရာတစ်ခု ဖြစ်လာခဲ့ပြီ။ ဤအချက်ကို သိလိုက်ရခြင်းက သူ့ကို စိတ်အေးသွားစေပြီး သူ့ ခန္ဓာကိုယ်၏ အံ့မခန်းမှုကို ကျေနပ်အားရစေသည်။ သူ၏ ကျင့်ကြံခြင်း အဆင့်အတန်းထက် များစွာ သာလွန်သော ပြင်းထန်သည့် စွမ်းအင်များကို သိုလှောင်နိုင်သည့် ကုန်ခမ်းခြင်းမရှိသော ခန္ဓာကိုယ်ကို ဖန်တီးရန် သူ၏ ကြိုးပမ်းမှုများမှာ ကောင်းကင်ဖီဆန်သည့် စွမ်းအားများကို ပြသနေပြီ ဖြစ်သည်။

သူ ဆက်လက် စမ်းသပ်နေသည်။ ပစ္စည်းများအတွင်းသို့ စွမ်းအင်သွင်းကြည့်သည်။ ဆေးဖော်စပ်ခြင်း အဆင့် ၇ ဆင့်စလုံးတွင် ထာဝရအော်ရာကို ထည့်သွင်းရန် ကြိုးစားသည်။ အဂ္ဂိရတ် အာကာရှစ် လျှို့ဝှက်အင်အား အတွင်းသို့ သွတ်သွင်းခြင်း၊ ကုန်ကြမ်းများ ထုတ်ယူခြင်း၊ ကြီးထွားစေခြင်းနှင့် အသွင်ပြောင်းခြင်း စသည့် အဆင့်တိုင်းတွင် ထာဝရအော်ရာကို အရှေ့တန်းမှ ထားကာ စမ်းသပ်ခဲ့သည်။ သို့သော်လည်း...

ကျရှုံးခဲ့သည်...။

ပိုင်ရှုမှာမူ ဗိုက်အလွန်ပြည့်နေပြီ ဖြစ်သည်။ ထွက်ပေါ်လာသမျှ အသန့်စင်ဆုံး မြူခိုး များကို အမီစုပ်ယူရန် ကြိုးစားရင်း လွန်စွာ အားစိုက်ခဲ့ရသော်လည်း သူမ ကျရှုံးသွားခဲ့ပြီ ဖြစ်သည်။

သို့သော်လည်း... ဝေ့ဝူယင်မှာမူ ထိုအချိန်တွင် စွဲလမ်းမှု ခံစားချက် အတွင်း နစ်မွန်းနေလေပြီ။ သူသည် မနားတမ်း ကြိုးစားနေဆဲ။

အဆင့်နိမ့်ဆေးများကို စမ်းသည်။ အမျိုးအစား မတူသော ဆေးများကို စမ်းသည်။ အမတေ ဆေးလုံး များကိုပင် အသုံးချခဲ့သည်။ သူ သိသမျှ အဂ္ဂိရတ် ထုတ်ကုန် အမျိုးအစားအားလုံးကို တစ်ခုပြီးတစ်ခု အသုံးပြုကာ စမ်းသပ်တော့သည်။

အားလုံးကို... နောက်ဆုံးတစ်ခုအထိ... စမ်းသပ်ခဲ့သည်။

ဝေ့ဝူယင်သည် နည်းလမ်းမျိုးစုံကို အသုံးပြုခဲ့ပြီး သူ၏ အာရုံစိုက်မှုမှာလည်း အထွတ်အထိပ်သို့ ရောက်ရှိနေသည်။ အချို့သော အသိုင်းအဝိုင်းများတွင် ဤအခြေအနေကို ဈာန်ဝင်စားမှု အခြေအနေ ဟု ခေါ်ကြပေလိမ့်မည်။ သုံးဆယ့်သုံးသွယ် ကောင်းကင် ဆေးဖော်စပ်နည်း ကို အသုံးမပြုခဲ့သော်လည်း နှစ်လအတွင်း ဝေ့ဝူယင် ဖော်စပ်ခဲ့သော အဂ္ဂိရတ် ထုတ်ကုန် အရေအတွက်မှာ ပထမတစ်လ သွေးပူ လေ့ကျင့်ခန်း လုပ်စဉ်က ဖော်စပ်ခဲ့သည်ထက် များစွာ သာလွန်သွားခဲ့သည်။ အနည်းငယ်မျှသာ သာလွန်ခြင်း မဟုတ်ဘဲ လေးဆခန့် ပိုများသွားခြင်း ဖြစ်သည်။

အံ့ဩစရာ အကောင်းဆုံး အချက်က... အဂ္ဂိရတ် ထုတ်ကုန်တိုင်းမှာ အထွတ်အထိပ် အဆင့်များသာ ဖြစ်နေခြင်းပင်။

အပြင်ဘက်မှ ဟိန်းဟောက်သံများမှာမူ ပိုင်ရှု၏ မကျေမနပ်ဖြစ်မှုနှင့် ဝန်လေးမှုများ၏ ရလဒ်ပင် ဖြစ်သည်။ သူမသည် စတုတ္ထအဆင့် အသန့်စင်ဆုံး မြူခိုး များကို အပြင်ဘက်သို့ အဆက်မပြတ် စွန့်ထုတ်နေရပြီး၊ ဝေ့ဝူယင် မသိအောင် အပြင်ဘက်တွင် သိမ်းဆည်းထားပြီးကာမှ ပြန်လည် မျိုချရန် ကြိုးစားနေသည်။ ယခုတစ်ကြိမ်တွင် ဝေ့ဝူယင် တကယ်ပင် သတိမထားမိခဲ့ပေ။

ကံဆိုးစွာပင်.. သူမ အပြင်ဘက်သို့ အသန့်စင်ဆုံး မြူခိုးများကို စွန့်ထုတ် လိုက်တိုင်း အပြင်ဘက်မှ အစီအရင်မှာ တစ်ဝက်တစ်ပျက် ပွင့်သွားလေ့ရှိပြီး အဆမတန် အာနိသင် လျော့နည်းသွားကာ ဒုတိယအဆင့် မြူခိုးများအဖြစ် အပြင်သို့ လွင့်စင်ထွက်သွားရလေသည်။

တတိယလ ရောက်သောအခါ ဤဖြစ်ရပ်အကြောင်းမှာ ပျံ့နှံ့သွားခဲ့ပြီး ကံကောင်းသည့် အဂ္ဂိရတ်ပညာရှင်များ ရရှိနေသည့် ကံကောင်းမှုများ အကြောင်းကိုလည်း လူတိုင်း သိသွားကြတော့သည်။

သို့သော် ဤမျှဖြင့် ဘယ်မှာ အဆုံးသတ်ပါမည်နည်း။ သတင်းများ ပျံ့နှံ့သွားသောအခါ လှည့်ပတ် ဖွံ့ဖြိုးမှု ကြယ်ကွင်းပြင် တစ်ခုလုံး နိုးကြားသွားခဲ့သည်။ ဟောင်ချန်းရွှယ်လည်း သတင်းရရှိသွားသဖြင့် အမြန်ဆုံး ပြန်လာရန် ပြင်ဆင်နေလေပြီ။

သို့သော်လည်း ထိုအရာမှာ အစမျှသာ ရှိပါသေးသည်။

အဂ္ဂိရတ် အခန်းအတွင်း၌... စိတ်လှုပ်ရှားနေသော အသံနှစ်သံ ရုတ်တရက် ဟိန်းထွက်လာခဲ့လေသည်...။

"ငါ့မှာ စိတ်ကူးတစ်ခုရှိတယ်"

ဝေ့ဝူယင်က အာမေဍိတ်သံ ပြုလိုက်၏။

"ငါတို့ ဘာလို့ ခဏခဏ ကျရှုံးနေရလဲဆိုတာ ငါသိပြီ"

ဝေ့ဝူယင်၏ ဒုတိယစိတ်ကလည်း တစ်ပြိုင်နက်တည်း ဟစ်အော်လိုက်လေသည်။

အမှန်စင်စစ် သူတို့နှစ်ဦးစလုံးမှာ ကျရှုံးမှုနှင့် ရင်ဆိုင်နေရခြင်းဖြစ်ပြီး ထိုပြဿနာကို ဖြေရှင်းရန် အစွမ်းကုန် ကြိုးစားနေကြခြင်းလည်း ဖြစ်သည်။

"အိုး... ဟုတ်လား"

ဝေ့ဝူယင်သည် သူ၏ သာလွန် သန့်စင် အဂ္ဂိရတ် ကြယ်တာရာများ၏ စွမ်းအားကို အသုံးပြု၍ ဝဲလည်နေသော စတုတ္ထအဆင့် မြူခိုးများကို အလျင်အမြန်ပင် ငြိမ်သက်သွားအောင် ထိန်းချုပ်လိုက်လိုက်၏။

"မင်းဆိုလိုတာက ငါ့ကြောင့်လို့ ပြောတာလား"

ဒုတိယစိတ်မှာ ဝေ့ဝူယင်၏ ညာဘက်မျက်ဝန်း သူငယ်အိမ်အတွင်း၌ ကိန်းအောင်းနေသော စိတ်အလွှာတစ်ခုဖြစ်ရာ ဆေးဖော်စပ်မှုကို အနီးကပ်ဆုံး မြင်တွေ့နေရသူလည်း ဖြစ်သည်။ သူက အချက်အလက်ကျကျပင် ပြန်ပြောလိုက်၏။

"အေး... ဟုတ်တယ်... ငါသိတာကတော့ ဒါဟာ မင်းကြောင့်ပဲ"

"ငါလည်း အဲဒီလိုပဲ ထင်တယ်"

ဝေ့ဝူယင်က ခေါင်းညိတ်လိုက်သည်။ သူသည် ထာဝရအော်ရာကို လုပ်ငန်းစဉ် သို့မဟုတ် ပစ္စည်းများအတွင်းသို့ ထည့်သွင်း၍မရခြင်း မဟုတ်ဘဲ သူ၏ အဂ္ဂိရတ် အာကာရှစ် လျှို့ဝှက်အင်အား ၏ အရည်အသွေး နိမ့်ကျနေခြင်းကြောင့် ဖြစ်ကြောင်း သိမြင်သွားခဲ့သည်။

"မင်းရဲ့ လျှို့ဝှက်အင်အားက ထာဝရအော်ရာကို ပစ္စည်းတွေထဲမှာ ကပ်ငြိနေအောင် ဒါမှမဟုတ် ဆေးဖော်စပ်တဲ့ ဖြစ်တည်မှုဖြစ်စဉ်မှာ သူ့ရဲ့ ဂုဏ်သတ္တိတွေကို ထိန်းထားနိုင်အောင် မစွမ်းဆောင်နိုင်ဘူး... လုပ်ငန်းစဉ် တစ်လျှောက်လုံးမှာ ထာဝရအော်ရာတွေ အလျှံပယ် ရှိနေသယောင် ထင်ရပေမဲ့ ထွက်လာတဲ့ အဂ္ဂိရတ် ထုတ်ကုန်မှာကျတော့ ထာဝရရဲ့ အငွေ့အသက် တစ်စက်မှ မကျန်တော့ဘူး... ဒါပေမဲ့ အဲဒီ အော်ရာတွေ ဘယ်ကို ပျောက်သွားလဲဆိုတာကိုတော့ ငါ မပြောနိုင်ဘူး... မင်းရော သိလား"

ဒုတိယစိတ်က ခွဲခြမ်းစိတ်ဖြာပြီး မေးခွန်းထုတ်လိုက်သည်။ ဝေ့ဝူယင်သည် အဂ္ဂိရတ်ပညာရှင်များ ကြုံတွေ့လေ့ရှိသော အမှားများကို ရှောင်ရှားရန်နှင့် အစောပိုင်းကတည်းက အသာစီးရရှိရန် ဝိညာဉ်အင်အားကို အသုံးပြုမည့်အစား ကောင်းကင်ဘုံ နတ်မျက်လုံးများကိုသာ အားကိုးခဲ့သည်။ သို့သော်လည်း နောက်ဆုံးအဆင့်သို့ ရောက်သည့်အခါ ပျောက်ဆုံးသွားသော ထာဝရအော်ရာကို သူ ရှာမတွေ့ခဲ့ပေ။

၎င်းမှာ လုံးဝ ကွယ်ပျောက်သွားသကဲ့သို့ပင်။

ဝေ့ဝူယင် ခေါင်းကို ခါယမ်းကာ သက်ပြင်းချလိုက်၏၊။

"ငါလည်း မသိဘူး"