အခန်း (၃၉၁)

အခန်း။ ၃၉၁

ကျောက်လင်းသည် စိတ်လောကြီးစွာဖြင့် ရှေ့မှောက်ရှိ လီမြစ်အခြေစိုက်စခန်းဆီသို့ အရှိန်အဟုန်ပြင်းစွာ ပြေးဝင်သွားသည်။

ဂါးးးဂီးးးဂါးးးး

မမျှော်လင့်ဘဲ သူမသည် မြို့တံတိုင်းနှင့် တစ်ကီလိုမီတာခန့်အကွာသို့ ရောက်ရှိလာသောအခါ တံတိုင်းအောက်ခြေ၌ လှည့်လည်ကျက်စားနေကြသော ဇွန်ဘီများသည် လှုပ်ရှားသံကို ကြားသွားကြကာ ချက်ချင်းဆိုသလိုပင် ဟိန်းဟောက်သံများ ဆက်တိုက်ထွက်ပေါ်လာပြီး ၎င်းတို့သည် လက်သည်းများကို ထောင်ကာ ကျောက်လင်းရှိရာသို့ အနက်ရောင်ဒီရေလှိုင်းကြီးပမာ စုပြုံ၍ တိုးဝင်လာကြတော့သည်။

တောက်…ကိုယ့်လူကိုတောင် ခွဲခြားမသိတဲ့ အသုံးမကျတဲ့ ဇွန်ဘီအုပ်တွေ။ ဇွန်ဘီဘုရင်လို့ အမည်ခံထားတဲ့ လုချွမ်းဆိုတာလည်း တကယ့်ကို အားကိုးမရတဲ့ အမှိုက်ပဲ။

ကျောက်လင်းသည် စိတ်ထဲမှ ကြိတ်၍ အပြစ်တင်မိသည်။

သာမန်ဇွန်ဘီအဆင့်နဲ့ ငါ့ကို တိုက်ခိုက်ရဲတယ်ပေါ့။ တကယ့်ကို အားကိုးမရတဲ့ အကောင်

ငယ်လေးတွေပဲ။

ရှပ်...

ထို့နောက် ကျောက်လင်းသည် အေးစက်စွာ ပြုံးလိုက်ပြီး ခါးကြားမှ တိုက်ပွဲဝင်ဓားကို ဆွဲထုတ်လိုက်၏။ သူမ၏ အရှိန်အဝါသည်လည်း အိမ်ထဲမှ ထွက်ပေါ်လာတော့မည့် ပြိုင်ဘက်ကင်းနတ်ဓားတစ်စင်းအလား ထက်မြက်စူးရှသွားလေတော့သည်။

ခြေသံများ အနားသို့ တိုးကပ်လာသည်နှင့်အမျှ ဇွန်ဘီတို့၏ ကြောက်မက်ဖွယ် မျက်နှာသွင်ပြင်များကို ကျောက်လင်းသည် အထင်အရှား မြင်တွေ့နေရပြီ ဖြစ်သည်။

ဘုန်း…

ဇွန်ဘီအုပ်ကြီး အနားသို့ ချဉ်းကပ်လာသောအခါ ကျောက်လင်းသည် စွမ်းအားများကို စုစည်းကာ ရှေ့သို့ ပြင်းထန်စွာ တိုးဝင်သွားသည်။

ရွှမ်း... ရွှမ်း... ရွှမ်း...

မျက်စိတစ်မှိတ်အတွင်းမှာပင် ကျောက်လင်းသည် လျှပ်စီးတန်းတစ်ခုအဖြစ်သို့ ပြောင်းလဲသွားသကဲ့သို့ ယပ်တောင်ပုံစံအတိုင်း ရှေ့သို့ လှည်းကျင်းကာ တိုက်ခိုက်သွားတော့သည်။ လမ်းကြောင်းတစ်လျှောက်ရှိ ဇွန်ဘီအားလုံးသည် လျှပ်စီးကဲ့သို့ မြန်ဆန်လှသော ဓားအလင်းတန်းအောက်တွင် ဦးခေါင်းပြတ်ထွက်သွားကြပြီး ဒိုမီနိုတုံးများသဖွယ် တစ်ကောင်ပြီးတစ်ကောင် လဲကျသွားကြကုန်၏။

မကြာမီမှာပင် ရှေ့၌ လမ်းကြောင်းတစ်ခု ပွင့်သွားသော်လည်း အနောက်မှ တိုးဝင်လာသော ဇွန်ဘီများကြောင့် ထိုနေရာက ပြန်လည်ပိတ်ဆို့သွားပြန်သည်။ သို့သော် ကျောက်လင်းသည် တစ်ဦးတည်းသော အင်အားဖြင့် ဇွန်ဘီအုပ်ကြီးထဲသို့ ခုန်ဝင်သွားကာ ဓားသွားကို လျှပ်စီးပမာ ကခုန်စေလျက် ဇွန်ဘီတို့၏ အသက်ကို တစ်တန်းပြီးတစ်တန်း ရဲရဲဝံ့ဝံ့ ခြွေယူနေတော့သည်။

တစ်ဖက်တွင်မူ အခြေစိုက်စခန်းအတွင်းရှိ လုချွမ်းသည် သူ၏ စိတ်စွမ်းအားဖြင့် ချိတ်ဆက်ထားသော ဇွန်ဘီအချို့ ရုတ်တရက် အဆက်အသွယ် ပြတ်တောက်သွားသည်ကို ချက်ချင်းပင် သိရှိလိုက်သည်။

"ဘာတွေဖြစ်နေတာလဲ ဘာကြောင့် ဇွန်ဘီအတော်များများ အခက်တွေ့နေရတာလဲ"

ဆိုဖာပေါ်တွင် ထိုင်လျက် ဇွန်ဘီရုပ်သေးများကို ထိန်းချုပ်နေသော လုချွမ်းသည် မျက်လုံးများကို ရုတ်တရက် ဖွင့်လိုက်ပြီး မျက်မှောင်ကြုတ်လိုက်၏။ အဆက်အသွယ် ပြတ်တောက်သွားသော ဇွန်ဘီများအားလုံးမှာ မြို့တံတိုင်းအပြင်ဘက်မှ ဖြစ်ကြောင်း သိရှိသွားသောအခါ လုချွမ်း၏ မျက်နှာရိပ်မျက်နှာကဲမှာ ပြောင်းလဲသွားတော့သည်။

ထို့နောက် လုချွမ်းသည် တံတိုင်းထိပ်ရှိ ဆင့်ကဲပြောင်းလဲပြီးသား ဇွန်ဘီရုပ်သေး၏ အမြင်အာရုံကို အသုံးချ၍ အောက်ဘက်သို့ လှမ်းကြည့်လိုက်သည်။ ပထမဆုံး မြင်လိုက်ရသည်မှာ ဇွန်ဘီအုပ်ကြီးအလယ်တွင် ပြင်းထန်စွာ တိုက်ခိုက်နေသော ကျောက်လင်းပင်။

"ကျောက်လင်းပါလား"

ကျောက်လင်းကို မြင်သောအခါ လုချွမ်းသည် အံ့အားသင့်သွားမိ၏။ သူမ ရောက်ရှိလာလိမ့်မည်ဟု သူ လုံးဝ မမျှော်လင့်ထားဘဲ အခြားတစ်စုံတစ်ဦးဟုသာ ထင်မှတ်ထားခဲ့ခြင်းပင်။ ချက်ချင်းပင် သူ၏ မျက်ဝန်းအစုံ၌ နောက်ပြောင်လိုသော အရိပ်အယောင်များ ဖြတ်ပြေးသွားပြီး ကျောက်လင်းအား ကျီစယ်ရန် ဆုံးဖြတ်လိုက်သည်။

ဂါးး..ရ

ဗီလာအိမ်အပြင်ဘက်တွင် ရှိနေသော အင်အားကြီးမားလှသည့် ဧရာမဇွန်ဘီက ချက်ချင်းပင် လှုပ်ရှားသွားတော့သည်။

ဂျုန်း...

လူသားပုံသဏ္ဌာန် သတ်ဖြတ်ရေးစက်ယန္တရားနှင့် တူလှသော ဧရာမဇွန်ဘီသည် မြေပြင်ကို ပြင်းထန်စွာ နင်းခြေလိုက်ရာ ကမ္ဘာမြေကြီးမှာပင် တုန်ခါသွားပြီး ၎င်း၏ ဧရာမခန္ဓာကိုယ်ကြီးဖြင့် မြို့အစွန်အဖျားဆီသို့ အရှိန်အဟုန်ဖြင့် ပြေးထွက်သွားသည်။

ဘုန်း…

ထိုအချိန်တွင် ကျောက်လင်းသည် သူ၏ စွမ်းအားဖြင့် ဇွန်ဘီအုပ်ကြီးကြား၌ လမ်းကြောင်းတစ်ခုကို ဖောက်ထွက်နိုင်ခဲ့သဖြင့် အလွန်ပင် ဂုဏ်ယူဝင့်ကြွားနေပြီး မြို့ဂိတ်တံခါးဆီသို့ လျင်မြန်စွာ ချဉ်းကပ်နေပြီ ဖြစ်သည်။ လမ်းတစ်လျှောက် တိုက်ခိုက်လာသော ဇွန်ဘီများကိုလည်း ကျောက်လင်းသည် မဆိုင်းမတွဘဲ လျင်မြန်စွာ သုတ်သင်ရှင်းလင်းနိုင်ခဲ့သည်။

ဘုန်း….

ရုတ်တရက် ကောင်းကင်ယံမှ ပုံရိပ်တစ်ခုသည် အောက်သို့ ဒိုင်းခနဲ ခုန်ဆင်းလာပြီး ကျောက်လင်း၏ လမ်းကို ပိတ်ဆို့လိုက်သည်။ ဧရာမဇွန်ဘီ၏ ထွားကျိုင်းသန်မာလှသော ခန္ဓာကိုယ်ကြီးသည် မြေပြင်ပေါ်သို့ ကျရောက်သွားရာ ပြင်းထန်သော တုန်ခါမှုကို ဖြစ်ပေါ်စေပြီး ကျယ်လောင်လှသော အသံကြီးမှာ မိုးခြိမ်းသံပမာ ပဲ့တင်ထပ်သွားတော့သည်။

ဟိန်းဟောက်သံနှင့်အတူ လေလှိုင်းများက ကောင်းကင်ယံ၌ လျင်မြန်စွာ ပြန့်ကားသွားပြီး အရပ်မျက်နှာအနှံ့သို့ ရိုက်ခတ်သွားရာ ပတ်ဝန်းကျင်ရှိ ဇွန်ဘီများမှာလည်း ဟန်ချက်ပျက်ကာ လွင့်စင်သွားကြကုန်၏။

ဧရာမဇွန်ဘီကို မြင်တွေ့လိုက်ရသောအခါ ကျောက်လင်းသည် ခြေလှမ်းများကို ရပ်တန့်လိုက်ပြီး အံ့အားသင့်သော မျက်နှာထားဖြင့် ကြည့်နေမိသည်။

"အဆင့်မြင့် ဆင့်ကဲပြောင်းလဲထားတဲ့ ဇွန်ဘီပါလား။ လုချွမ်းတစ်ယောက် ငါရောက်နေတာကို သိသွားပြီ ထင်တယ်"

ကျောက်လင်း၏ မျက်ဝန်းများမှာ အရောင်တောက်ပသွားပြီး သူမ၏ မျက်နှာထက်၌ အပြုံးတစ်ခု ပေါ်ပေါက်လာသည်။

ဂျုန်း...

ဂါး…

တုန်ခါသံများ အဆက်မပြတ် ထွက်ပေါ်နေစဉ် ဧရာမဇွန်ဘီသည် ကြောက်မက်ဖွယ်ကောင်းလောက်အောင် ဟိန်းဟောက်လိုက်၏။ ထို့နောက် ပြင်းထန်သော စွမ်းအင်များဖြင့် ပြည့်နှက်နေပြီး ဝင်းလက်နေသော လက်သည်းဓားများကို ဝှေ့ယမ်းကာ ကျောက်လင်းရှိရာသို့ တဟုန်ထိုး ပြေးဝင်လာတော့သည်။

ဧရာမဇွန်ဘီ၏ အရှိန်မှာ အံ့မခန်း မြန်ဆန်လှသဖြင့် မျက်စိတစ်မှိတ်အတွင်းမှာပင် သူမ၏ အနီးသို့ ရောက်ရှိလာသည်။

"ဒါ ဘယ်လိုဖြစ်တာလဲ"

ကျောက်လင်းသည် စဉ်းစားနေရန် အချိန်မရှိတော့သဖြင့် သူမ၏ ဓားကို မြှောက်၍ အတင်းအကျပ် ခုခံလိုက်ရသည်။

ဘုန်း…

နှစ်ဖက်စလုံးသည် ချက်ချင်းပင် တိုက်ပွဲဖြစ်ပွားကြကုန်၏။ ထက်မြက်လှသော တိုက်ပွဲဝင်ဓားနှင့် ခိုင်မာလှသော သံမဏိလက်သည်းတို့ ထိတွေ့မိသောအခါ ပေါက်ကွဲသံကြီး ထွက်ပေါ်လာပြီး ကြောက်မက်ဖွယ်ရာ တုန်ခါလှိုင်းများသည် အရပ်မျက်နှာအနှံ့သို့ ရိုက်ခတ်သွားတော့သည်။

ရှေ့သို့ တိုးဝင်လာသော ဇွန်ဘီများသည်လည်း လွင့်စင်သွားကြပြီး ဟင်းလင်းပြင်တစ်ခုလုံးမှာ တုန်ခါသွားသည်။ တစ်ချိန်တည်းမှာပင် ထိခိုက်မိသည့် အရှိန်ကြောင့် နှစ်ဦးစလုံး အနောက်ဘက်သို့ လွင့်ထွက်သွားကြကုန်၏။

ဂီး….

မမျှော်လင့်ဘဲ ကြောက်မက်ဖွယ်ကောင်းလှသော ဧရာမဇွန်ဘီသည် မဆုတ်မနစ်သော တိုက်ခိုက်ရေးသမားတစ်ဦးပမာ ရဲရဲဝံ့ဝံ့ပင် ထပ်မံ၍ တိုးဝင်လာပြန်သည်။

"ဟေ့... လုချွမ်း ငါပါ... ကျောက်လင်းပါ"

၎င်းကို မြင်တွေ့လိုက်ရသောအခါ ကျောက်လင်းမှာ မတတ်နိုင်တော့သည့်အဆုံး နောက်ကွယ်ရှိ အခြေစိုက်စခန်းဆီသို့ ဦးတည်ကာ အော်ဟစ်လိုက်တော့သည်။

သူမသည် သတင်းစကားပါးရန် ရောက်ရှိလာခြင်းဖြစ်ပြီး ဆင့်ကဲပြောင်းလဲထားသည့် ဇွန်ဘီတစ်ကောင်နှင့် တိုက်ခိုက်ရန် ရည်ရွယ်ထားခြင်း မဟုတ်ပေ။

သို့သော် ကျောက်လင်းသည် သူ၏အမည်ကို ဖော်ပြခဲ့သော်လည်း ဧရာမဇွန်ဘီသည် ရပ်တန့်

မည့် အရိပ်အယောင်မရှိဘဲ အဆက်မပြတ် တိုးဝင်တိုက်ခိုက်နေဆဲပင်။

"တောက်... လုချွမ်း... နင် ငါ့ကို အနိုင်ကျင့်ရလွယ်တယ်လို့ တကယ်ပဲ ထင်နေတာလား"

ဤအခြေအနေကြောင့် ကျောက်လင်းသည် ဒေါသတကြီး ဆဲဆိုမိပြီး သူမ၏ စိတ်တိုတတ်သော အကျင့်မှာလည်း ချက်ချင်းပင် ထွက်ပေါ်လာတော့သည်။

ဇွန်ဘီဘုရင် ဖြစ်သည့် လုချွမ်းသည် ဤမျှကျယ်လောင်လှသော ဆူညံသံကို သတိမထားမိဘဲ နေလိမ့်မည်ဟု သူမ မယုံကြည်ပေ။ အထူးသဖြင့် ဤအဆင့်မြင့် ဆင့်ကဲဇွန်ဘီ ပေါ်ပေါက်လာခြင်းမှာ လုချွမ်းက တမင်သက်သက်ညှစ်၍ နှောင့်ယှက်နေခြင်း ဖြစ်ကြောင်း ထင်ရှားလှသည်။

"သေစမ်း"

တိုးဝင်လာသော ဧရာမဇွန်ဘီကို စိုက်ကြည့်ရင်း ကျောက်လင်းသည် ဒေါသတကြီး ဟစ်အော်လိုက်ပြီး တိုက်ပွဲဝင်ဓားကို ဝှေ့ယမ်းကာ ရှေ့ချင်းဆိုင် တိုးဝင်လိုက်သည်။

ဂျုန်း...

ဧရာမဇွန်ဘီသည် လက်မောင်းများကို လွှဲယမ်းလိုက်ရာ ၎င်း၏ သံမဏိလက်သည်းများက လေထုကို ဖြတ်သန်းလျက် အန္တရာယ်ရှိသော လက်သည်းရာများကို ထင်ကျန်စေခဲ့သည်။ ကျောက်လင်းသည်လည်း တစ္ဆေတစ်ကောင်ပမာ လျင်မြန်စွာ လှုပ်ရှားလျက် သူမ၏ တိုက်ပွဲဝင်ဓားဖြင့် လေထုကို ဖြတ်သန်းကာ ဧရာမဇွန်ဘီအား မနားတမ်း ခုတ်ပိုင်းလေတော့သည်။

ထိတ်လန့်ဖွယ်ရာ ကောင်းလှသော ဓားချက်သည် သံမဏိလက်သည်းများ၏ ခုခံမှုကို ထိုးဖောက်သွားပြီး ဧရာမဇွန်ဘီ၏ လက်မောင်းများကို ခုတ်မိရာ သွေးစိမ်းများ ပန်းထွက်သွားပြီး ဒဏ်ရာဗရပွ ဖြစ်သွားသည်။

ခေတ္တခဏအတွင်းမှာပင် ကျောက်လင်းသည် ဧရာမဇွန်ဘီကို အပြတ်အသတ် ဖိနှိပ်ထားနိုင်ခဲ့ပြီ ဖြစ်သည်။ ဧရာမဇွန်ဘီက မည်သို့ပင် ပြန်လည်တိုက်ခိုက်စေကာမူ သူမ၏ ပြင်းထန်လှသော ဖိအားအောက်မှ ရုန်းထွက်နိုင်ခြင်း မရှိတော့ပေ။

"နောက်ဆုံးတွေ့ခဲ့တဲ့ အချိန်နဲ့စာရင် သူမရဲ့ အစွမ်းက ဒီလောက်အထိ တိုးတက်လာလိမ့်မယ်လို့ မထင်ထားမိဘူး"

ကျောက်လင်း၏ ပြောင်းလဲသွားသော စွမ်းရည်ကို ခံစားမိလိုက်သဖြင့် လုချွမ်းမှာ အနည်းငယ် အံ့အားသင့်သွားမိသည်။ ယခင်က ကျောက်လင်း၏ အစွမ်းသည် အဆင့် ၄ သို့ ရောက်ရှိနေခဲ့လျှင်ပင် အဆင့် ၄ ဇွန်ဘီရုပ်သေးဖြစ်သော ဧရာမဇွန်ဘီနှင့် ရင်ဆိုင်ရာတွင် အများဆုံး သရေအဆင့်သာ ရှိနိုင်ပြီး ယခုကဲ့သို့ အပြတ်အသတ် ဖိနှိပ်နိုင်ရန်မှာ မဖြစ်နိုင်သလောက်ပင်။

လုချွမ်းသည် အကြည့်ကို လွှဲလိုက်ပြီး စိတ်ကူးတစ်ခု ရသွားသဖြင့် မြို့အစွန်အဖျားသို့ ဦးတည်ရန် အဆင့် ၄ ဇွန်ဘီရုပ်သေး နှစ်ကောင်ကို ထပ်မံ၍ စေလွှတ်လိုက်သည်။

"မင်းရဲ့ အကန့်အသတ်က ဘယ်နေရာမှာလဲဆိုတာ ငါ စမ်းကြည့်ရသေးတာပေါ့"

ထိုအချိန်တွင် တိုက်ပွဲသံများကြောင့် နိုးလာသော ကျိရုရွှယ်သည် လေးနက်သော မျက်နှာထားဖြင့် ဧည့်ခန်းထဲသို့ ဝင်လာပြီး လုချွမ်းကို မေးမြန်းလိုက်သည်။

"ဖေဖေ လူသားတွေ လာတိုက်နေတာလား"

အသံကြားသည်နှင့် လုချွမ်းသည် ချက်ချင်းထရပ်ကာ စာရွက်ပေါ်တွင် ရေးသားလိုက်သည်။

"မဟုတ်ဘူး ချီချီလေး မင်းရဲ့ အန်တီကျောက်လင်း ရောက်လာတာပါ။ ဖေဖေက သူမရဲ့ အခုလက်ရှိ အစွမ်းကို စမ်းသပ်နေတာ"

"ကျောက်လင်းလား သူ ဘာလို့ ပြန်လာတာလဲ"

စာရွက်ပေါ်က စာများကို မြင်သောအခါ ကျိရုရွှယ်မှာ မှင်တက်သွားမိသည်။

သူ အပြင်မှာ ဒုက္ခရောက်လို့ ပြန်လာချင်တာများလား...