အခန်း (၃၉၅)

အခန်း။ ၃၉၅

ဤသို့ ပေါ့ပေါ့ပါးပါး ပြုမူနေကြသော သားအဖနှစ်ဦးကို ကြည့်ပြီး ကျောက်လင်းမှာ ဒေါသထွက်လွန်း၍ မူးလဲမတတ်ပင် ဖြစ်သွားရသည်။ ၎င်းမှာ တကယ်ပင် ရယ်စရာကောင်းလှ၏။

သူတို့က ဒီအခြေအနေကို ကစားပွဲတစ်ခုလို့ ထင်နေကြတာလား။

အသက်ဘေးနှင့် ရင်ဆိုင်နေရချိန်တွင် သူမ၏ရှေ့မှောက်၌ ဖခင်နှင့် သမီးကြားရှိ သံယောဇဉ်ကို ပြသနေကြဆဲပင်။

ဤသည်မှာ အလွန်ပင် စိတ်ပျက်စရာကောင်းလှ၏။ ဤနှစ်ဦးစလုံးသည် သူမ ပြောခဲ့သမျှကို အလေးမထားဘဲ လျစ်လျူရှုထားကြသည်မှာ သိသာလှသည်။

ဤသည်မှာ သာမန်တိုက်ပွဲငယ်လေးတစ်ခု မဟုတ်ကြောင်း သူတို့ သိထားသင့်သည်။ မိုးကြိုးဟိန်းသံသားရဲကြီး၏ နောက်ကွယ်တွင် အခြေစိုက်စခန်းအားလုံးက ရပ်တည်နေကြခြင်းပင်။

အကယ်၍ မိုးကြိုးဟိန်းသံသာ ရှုံးနိမ့်သွားခဲ့လျှင် အခြားအခြေစိုက်စခန်းများကလည်း ငြိမ်သက်စွာ စောင့်ကြည့်နေကြလိမ့်မည် မဟုတ်ပေ။ ယခုတစ်ကြိမ်တွင် လုချွမ်းက လီမြစ်

အခြေစိုက်စခန်းကို သိမ်းပိုက်လိုက်ခြင်းက ထိုအခြေစိုက်စခန်းများ၏ အသည်းနှလုံးကို တိုက်ရိုက် ထိမှန်သွားစေခဲ့သည်။

အဘယ်ကြောင့်ဆိုသော် အခြေစိုက်စခန်းတစ်ခု အသိမ်းပိုက်ခံရလျှင်ပင် လုချွမ်းကဲ့သို့သောသူက မြို့ကိုပါ ထိန်းချုပ်လိုက်ခြင်းမျိုးမှာ အလွန်ပင် ရှားပါးသောကြောင့်ပင်။ ဤပြုမူချက်မှာ ပုံမှန်မဟုတ်သည်မှာ ထင်ရှားသည်။

ယခုအခါ သူတို့၏ ယုံကြည်မှုလွန်ကဲနေသော မျက်နှာထားများကို ကြည့်ရင်း ကျောက်လင်းမှာ များစွာ စိုးရိမ်ပူပန်နေမိတော့သည်။

လုချွမ်းနှင့် ချီချီလေးတို့သည် ဤဖြစ်ရပ်ကို ယခင်က လူသားအစိုးရဘက်မှ တိုက်ခိုက်မှုများနှင့် ထပ်တူထပ်မျှဟု ထင်မြင်နေကြခြင်း ဖြစ်နိုင်သည်ဟု သူမ သံသယဝင်မိခြင်းပင်။

သို့သော် ကျောက်လင်းသည် ဤတစ်ကြိမ်မှာ ယခင်အကြိမ်များနှင့် အခြေခံအားဖြင့် ကွာခြားနေသည်ကို ကောင်းစွာ သိရှိထားသည်။ အဆင့် ၅ သားရဲကြီးဖြစ်သော မိုးကြိုးဟိန်းသံမှာ လွယ်လွယ်ကူကူနှင့် ရင်ဆိုင်နိုင်မည့် သတ္တဝါ မဟုတ်ပေ။

ထို့အပြင် စစ်တပ်၏ ကျောထောက်နောက်ခံရှိသော ကျန်းပြည်နယ်မှ အမျိုးမျိုးသော အခြေစိုက်စခန်းများသည်လည်း ကြီးမားသော ပြဿနာတစ်ခု ဖြစ်လာနိုင်သည်။

လုချွမ်းသည် မည်မျှပင် သန်မာစေဦးတော့ ထိုအခြေစိုက်စခန်းအားလုံးကို တစ်ခုပြီးတစ်ခု အနိုင်တိုက်ရန်မှာ မဖြစ်နိုင်သလောက်ပင်။ ထိုသို့လုပ်ဆောင်ခြင်းက လူသားမျိုးနွယ်တစ်ခုလုံးနှင့် ရန်သူဖြစ်သွားစေပြီး လူသားများအနေဖြင့် တစ်နိုင်ငံလုံးအတိုင်းအတာဖြင့် စုပေါင်းကာ လုချွမ်းကို ရန်ပြုလာအောင် တွန်းပို့နေသကဲ့သို့ပင်။ လုချွမ်းသည် ဤမျှအထိ မိုက်မဲလိမ့်မည်ဟု သူမ မယုံကြည်ပေ။

ကျောက်လင်း၏ တင်းမာနေသော မျက်နှာထားကို ကြည့်ပြီး သူမ မကျေမနပ် ဖြစ်နေသည်ကို သိရှိသဖြင့် ယုံကြည်မှုအပြည့်ရှိနေသော လုချွမ်းက စာရွက်ပေါ်တွင် ရေးသားလိုက်သည်။

"ကျောက်လင်း... ငါတို့ကို သတိလာပေးတဲ့အတွက် ကျေးဇူးတင်ပါတယ်။ ဒါပေမဲ့ စိတ်မပူပါနဲ့ ငါတို့ ဒါကို ကိုင်တွယ်ဖြေရှင်းနိုင်ပါတယ်"

"ဟုတ်တယ် ဟုတ်တယ် စိတ်မပူပါနဲ့ အန်တီကျောက်လင်း။ လူသားအစိုးရရဲ့ အင်အားက ဘယ်လောက်ပဲ ကြီးမားပါစေ ဖေဖေနဲ့ ကျွန်မ ကိုင်တွယ်နိုင်ပါတယ်"

ကျိရုရွှယ်သည် သူမ၏ လေသံကို လေးနက်စေလျက် ခေါင်းကို အားပါးတရ ငြိမ့်လိုက်သည်။

သူမနှင့် ဖခင်ဖြစ်သူ ပူးပေါင်းလိုက်ပါက ဤလူသားအခြေစိုက်စခန်းများအနေဖြင့် အလွယ်တကူ လာရောက်ရန်စနိုင်မည့် ပြိုင်ဘက်များ မဟုတ်တော့ပေ။ အကယ်၍ တိုက်ပွဲအမှန်တကယ် ဖြစ်ပွားခဲ့လျှင်လည်း ကျူးကျော်လာသူများက သေချာပေါက် လက်ဗလာဖြင့်သာ ပြန်လှည့်သွားကြရပေလိမ့်မည်။

ဤသည်ကို မြင်တွေ့ရသောအခါ ကျောက်လင်းသည် နောက်တစ်ကြိမ် ထပ်မံ၍ နားချရန် ကြိုးစားမိပြန်သည်။

"ချီချီလေး... လုချွမ်း... အခြေအနေက နင်တို့ထင်သလို မရိုးရှင်းဘူးနော်။ အခုချက်ချင်း မထွက်သွားဘူးဆိုရင် နင်တို့ အန္တရာယ်ရှိလိမ့်မယ်"

"မိုးကြိုးဟိန်းသံဆိုတာ အဆင့် ၅ သားရဲကြီးဖြစ်ပြီးတော့ အဲဒီထဲမှာတောင် ထိပ်တန်းက ပါဝင်တဲ့ တကယ့်ကို ကြောက်စရာကောင်းတဲ့ သတ္တဝါကြီးပဲ။ အဆင့် ၅ ဆင့်ကဲပြောင်းလဲသူတစ်ယောက်တောင် သူ့ကို အနိုင်ယူဖို့ အတော်လေး ခဲယဉ်းလိမ့်မယ်"

"အရင်က အဲဒီသားရဲကြီးက ရှန်းချွမ်းအခြေစိုက်စခန်းကို တစ်ကောင်တည်းနဲ့ တိုက်ခိုက်ခဲ့ဖူးတယ်၊ အခု လီမြစ်အခြေစိုက်စခန်းကို သိမ်းပိုက်ဖို့ဆိုတာလည်း သူ့အတွက် မခဲယဉ်းဘူး"

အကယ်၍ လုချွမ်းနှင့် ချီချီလေးတို့သည် ယခုပင် မထွက်ခွာကြပါက ဟိန်းဟောက်သံ ရောက်ရှိလာသည့်အခါတွင်မူ အရာအားလုံး နောက်ကျသွားပေလိမ့်မည်။

ကျောက်လင်း၏ စကားကို နားထောင်ပြီးနောက် လုချွမ်းသည် ဟိန်းဟောက်သံနှင့် ပတ်သက်၍ သတိထားမိသွားသော်လည်း ထိုမျှသာ ဖြစ်သည်။

ဟိန်းဟောက်သံသည် သူ့အား ခြိမ်းခြောက်နိုင်သည့် စွမ်းအားရှိသည်မှာ မှန်သော်လည်း နှစ်ဦးစလုံးမှာ အဆင့် ၅ ချည်းသာ ဖြစ်ကြသည်။ အကယ်၍ ချောင်းမြောင်းတိုက်ခိုက်ခံရပါက ဒဏ်ရာအနာတရ ရရှိနိုင်သည်မှာ ခန့်မှန်းရခက်သော်လည်း သို့ရာတွင် ကျောက်လင်းကြောင့် ထိုအချက်ကို ကြိုတင်သိရှိထားပြီဖြစ်ရာ သူသည် အဆင်သင့် ပြင်ဆင်ထားနိုင်ပြီ ဖြစ်သည်။ ဟိန်းဟောက်သံက တိုက်ခိုက်လာလျှင်ပင် သူ့အား ထိခိုက်စေနိုင်မည် မဟုတ်တော့ပေ။

လုချွမ်းသည် သူကိုယ်ကိုယ် ယုံကြည်မှုအပြည့် ရှိနေသည်။ အကြောင်းမှာ သူ၏ လက်အောက်တွင် အဆင့် ၅ ဇွန်ဘီရုပ်သေး ငါးကောင်ရှိနေသောကြောင့်ပင်။ ဟိန်းဟောက်သံသည် မည်မျှပင် သန်မာစေဦးတော့ ဇွန်ဘီရုပ်သေး ငါးကောင်၏ စုပေါင်းစွမ်းအားကို ယှဉ်နိုင်ရန်မှာ မဖြစ်နိုင်ပေ။

ထိုအချိန်ကျလျှင် သူသည် ဟိန်းဟောက်သံကို သတ်ဖြတ်နိုင်ခဲ့သည်ဖြစ်စေ သို့မဟုတ် အခြေစိုက်စခန်းများ၏ ရှေ့မှောက်၌ အရှက်တကွဲ ထွက်ပြေးသွားအောင် ပြုလုပ်နိုင်ခဲ့သည်

ဖြစ်စေ ဤသည်မှာ လူသားအစိုးရဘက်ကို ပြင်းထန်သော သတိပေးချက်တစ်ခု ဖြစ်သွားပေလိမ့်မည်။ ထိုအခါမှသာ သူတို့သည် လီမြစ်အခြေစိုက်စခန်းကို လွယ်လွယ်နှင့် လာရောက်မတိုက်ခိုက်ဝံ့ဘဲ တွန့်ဆုတ်သွားကြမည်ပင်။

ယခု လုချွမ်း၏ လက်ရှိအင်အားဖြင့် ကျန်းပြည်နယ်ရှိ အခြေစိုက်စခန်းတစ်ခုကို သိမ်းပိုက်

ရန်မှာ လက်ဖျောက်တစ်ချက်တီးရသကဲ့သို့ လွယ်ကူနေသောကြောင့်ပင်။ လူသားများအနေဖြင့် သူ့အား ရန်စ၍ ပြဿနာမရှာလိုကြပါက သူ၏ တည်ရှိမှုကို လက်ခံကြရုံသာ ရှိတော့သည်။

အမှန်စင်စစ် ဤသည်မှာ လုချွမ်းအတွက် အကောင်းဆုံးဖြစ်လာနိုင်သည့် ရလဒ်တစ်ခု ဖြစ်သော်လည်း လူသားများက ထိုအတိုင်းပင် စဉ်းစားလုပ်ဆောင်ကြမည်လားဆိုသည်ကိုမူ သူ မသေချာသေးပေ။

တစ်ချိန်တည်းမှာပင် ကျိရုရွှယ်သည်လည်း သူမ၏ အဆင့် ၅ ပါရမီနှစ်ရပ်ဖြင့် မိုးကြိုးဟိန်းသံကို ဖိနှိပ်ထားနိုင်လိမ့်မည်ဟု အလားတူပင် ယုံကြည်နေမိသည်။

မိုးကြိုးဟိန်းသံနှင့် ပတ်သက်၍ သူမ သိရှိထားသမျှအရ ၎င်းသည် မည်မျှပင် အစွမ်းထက်

နေပါစေ သူမ၏ အချိန်ထိန်းချုပ်မှုစွမ်းအားအောက်မှ လွတ်မြောက်နိုင်မည် မဟုတ်ပေ။ အချိန်၏ စွမ်းပကားအောက်တွင် ပိတ်မိသွားသည်နှင့် ထိုသားရဲကြီးမှာ သူမ၏ စိတ်ကြိုက် ပြုမူခြင်းကိုသာ ခံရတော့မည် ဖြစ်သည်။

ထို့ပြင် ဖခင်ဖြစ်သူ၏ အကူအညီနှင့် အဆင့် ၅ ဆင့်ကဲဇွန်ဘီ အမြောက်အမြားရှိနေခြင်းမှာ အလှပြရန်သက်သက် မဟုတ်ပေ။ ကျိရုရွှယ်သည် ထိုမိုးကြိုးဟိန်းသံသားရဲကြီးကိုပင် ယဉ်ပါးအောင် မွေးမြူရန်အထိ စိတ်ကူးမိလိုက်သေးသည်။

မိုးကြိုးဟိန်းသံသည် အလွန်အစွမ်းထက်သော အဆင့် ၅ သားရဲကြီး ဖြစ်သည့်အတွက် ၎င်းကိုသာ ယဉ်ပါးအောင် ပြုလုပ်နိုင်ပါက သူတို့အဖွဲ့တွင် အဆင့် ၅ စွမ်းအားရှင် နောက်တစ်ဦး ထပ်မံတိုးပွားလာမည် ဖြစ်သည်။

"စိတ်မပူပါနဲ့ ကျောက်လင်း မိုးကြိုးဟိန်းသံတစ်ကောင်တည်းနဲ့တော့ လူသားအစိုးရဘက်က ငါတို့ကို မနိုင်နိုင်ပါဘူး"

လုချွမ်းက စာရွက်ပေါ်တွင် ရေးသားလိုက်၏။ လီမြစ်အခြေစိုက်စခန်းကို သိမ်းပိုက်စဉ်က တစ်နိုင်ငံလုံးအတိုင်းအတာဖြင့်ရှိသော အစိုးရအခြေစိုက်စခန်းများ၏ အင်အားကို သူ မြင်တွေ့ခဲ့ပြီးဖြစ်ရာ ထိုအင်အားမှာ ဤမျှသာ ဖြစ်သည်။

ဦးဆောင်လာမည့် မိုးကြိုးဟိန်းသံသားရဲကြီးကိုသာ ကိုင်တွယ်နိုင်ပါက ကျန်ရှိသော အခြေစိုက်စခန်းများအနေဖြင့် ခြိမ်းခြောက်မှုတစ်ခု ဖြစ်လာရန် ခဲယဉ်းလှသည်။

"ဟုတ်တယ် အန်တီကျောက်လင်း အဲဒီဝက်ဝံစုတ်ကြီးက ဖေဖေနဲ့ ချီချီ့ကို ဘယ်လိုမှ ယှဉ်နိုင်မှာ မဟုတ်ဘူး။ သူတို့ကို တကယ် မှတ်လောက်သားလောက် ဖြစ်အောင် လုပ်ပေးလိုက်မယ်"

ကျိရုရွှယ်က လက်သီးလေးများကို ကျစ်ကျစ်ပါအောင် ဆုပ်လျက် ယုံကြည်ချက်အပြည့်ဖြင့် ပြောလိုက်သည်။

"ဟူး... သူတို့က နင်တို့နဲ့ မိုးကြိုးဟိန်းသံကို အချင်းချင်း တိုက်ခိုက်ခိုင်းပြီး နှစ်ဖက်လုံး ပျက်စီးသွားအောင် လုပ်မှာကို နင်တို့ နားမလည်ကြဘူးလား"

ကျောက်လင်းသည် မျက်နှာတစ်ခုလုံး စိုးရိမ်ရိပ်များ လွှမ်းမိုးလျက် အသည်းအသန် နားချနေမိသည်။ ဤသည်မှာ လုချွမ်းနှင့် ချီချီလေးတို့၏ အသက်အန္တရာယ်နှင့် ပတ်သက်နေသဖြင့် သူတို့က ဂရုမစိုက်လျှင်ပင် သူမကတော့ လက်မလျှော့ဘဲ ဆက်လက်တားဆီးနေခြင်းပင်။

မိုးကြိုးဟိန်းသံသည် အဆင့် ၅ သားရဲကြီး ဖြစ်ရာ သူမ လက်လှမ်းမမီနိုင်သော အဆင့်အတန်းတစ်ခု ဖြစ်သည်။ သူမအနေဖြင့် လုချွမ်းနှင့် ချီချီလေးကို ယုံကြည်သော်လည်း အဆင့် ၅ သားရဲတစ်ကောင်၏ စွမ်းအားမှာ အံ့မခန်း ထူးခြားလှသည်။

အကယ်၍ လုချွမ်းနှင့် ချီချီလေးတို့က မိုးကြိုးဟိန်းသံကို အပြတ်အသတ် အသာစီးမရဘဲ နှစ်ဖက်စလုံး ဒဏ်ရာအပြင်းအထန် ရရှိသွားခဲ့မည်ဆိုလျှင် ထိုအခွင့်အရေးကို အသုံးချ၍ အခြေစိုက်စခန်းများက ဝိုင်းအုံတိုက်ခိုက်လာပါက ဖြစ်လာမည့် နောက်ဆက်တွဲရလဒ်များကို သူမ တွေးဝံ့စရာပင် မရှိတော့ပေ။

ထိုစကားကို ကြားသောအခါ ကျိရုရွှယ်၏ မျက်ဝန်းများမှာ အေးစက်သွားပြီး စိတ်ထဲမှ ကျိတ်၍ လှောင်ပြောင်မိသည်။

နှစ်ဖက်လုံး ပျက်စီးသွားမယ် ဟုတ်လား ဒီတစ်ကြိမ်တော့ သူတို့ မျှော်လင့်ချက်တွေ သဲထဲရေသွန် ဖြစ်သွားစေရမယ်။

သူမကိုယ်တိုင် အပါအဝင် လီမြစ်အခြေစိုက်စခန်းတွင် အဆင့် ၅ အင်အားစု ခြောက်ခုအထိ ရှိနေသည်။ မိုးကြိုးဟိန်းသံတစ်ကောင်တည်းနှင့် သူတို့ကို အထိနာအောင် လုပ်နိုင်လိမ့်မည်ဟု ထင်နေခြင်းမှာ စိတ်ကူးယဉ်အိမ်မက်သက်သက်သာ ဖြစ်ပေလိမ့်မည်။

အကယ်၍ ဤအစိုးရအခြေစိုက်စခန်းများက ထိုအတိုင်း အကွက်ချနေကြသည်မှာ အမှန်ဖြစ်လျှင် ဤအခွင့်အရေးကို အသုံးချ၍ ထိုအခြေစိုက်စခန်းကြီးများကို အကြီးအကျယ် ပညာပေးရန် ကျိရုရွှယ် ဝန်လေးနေမည် မဟုတ်ပေ။

"အန်တီကျောက်လင်း... နှစ်ဖက်လုံး ပျက်စီးသွားတာမျိုး ဖြစ်လာမှာ မဟုတ်လို့ စိတ်မပူပါနဲ့။ ဖေဖေ့ရဲ့ အစွမ်းက အဲဒီ မိုးကြိုးဟိန်းသံထက် အများကြီး သာပါတယ်"

ကျိရုရွှယ်က တက်ကြွသော အပြုံးဖြင့် ပြောလိုက်သည်။

"ဟုတ်တယ် ကျောက်လင်း အဲဒီအခြေစိုက်စခန်းတွေက မိုးကြိုးဟိန်းသံကို သုံးပြီး ငါတို့ကို တိုက်နိုင်မယ်လို့ ထင်နေကြရင်တော့ သူတို့ အစီအစဉ် အောင်မြင်မှာ မဟုတ်ဘူးဆိုတာ ငါ ပြပေးရမှာပေါ့"

လုချွမ်းက ခေါင်းညိတ်လျက် စာရွက်ပေါ်တွင် ထပ်မံ ရေးသားလိုက်သည်။