ပူးပေါင်းကြံစည်မှု

"ဒါကတော့ ငါတို့သဘောတူညီချက်အတွက် ချုပ်ဆိုရမဲ့ ကတိကဝတ်စာချုပ်ပဲ" မေတ္တယျက ပြောရင်း စာလိပ်တစ်ခုကို ထုတ်ကာ သူတို့ထံ ကမ်းပေးလိုက်သည်။

"ဒါက တကယ်ရော လိုအပ်လို့လား။ ကျွန်မတို့ ယုံကြည်ပြီးသားပါ" ဝူဟုန်က ပြောလာသည်။

"အဲဒီအတွက် ကျေးဇူးတင်ပါတယ်။ ဒါပေမဲ့ စီးပွားရေးနဲ့ သံယောဇဉ်ကို သီးသန့်စီ ခွဲထားတာ အကောင်းဆုံးပဲလေ"

"ကောင်းပြီလေ" ဝူဟုန်က တည်ရှိမှုစာချုပ်ကို ဖတ်ကြည့်ပြီးနောက် အံ့အားသင့်သွားမိသည်။ သူမက စာချုပ်ကို လက်မှတ်ရေးထိုးပြီးနောက် ဝမ်ဝေ့ထံ ကမ်းပေးလိုက်ရာ ဝမ်ဝေ့ကလည်း သူမ အဘယ်ကြောင့် ဤသို့ တုံ့ပြန်ရသည်ကို သိလိုစိတ်ပြင်းပြမိသွားသည်။ အဖြေမှာ စာချုပ်ဖောက်ဖျက်ပါက ခံစားရမည့် အကျိုးဆက် ဖြစ်သည်။ အကယ်၍ မေတ္တယျသာ ကတိအတိုင်း ပြန်မပေးဆပ်နိုင်ပါက သူမ၏ အုတ်မြစ်တိုင် ၃ တိုင်ကို ဆုံးရှုံးရမည် ဖြစ်သည်။

သူမက ငါတို့ကို ကမ္ဘာဦးသူတော်စင်တွေနဲ့ ဘယ်လိုစာချုပ်ချုပ်ရမလဲဆိုတာ သင်ပေးနေတာလား

ဝမ်ဝေ့က တွေးလိုက်မိသည်။ ဤစာချုပ်အရ ဝမ်ဝေ့က ထိုသို့သော ထူးကဲသာလွန်ဖြစ်တည်မှုများကို မည်သို့ ကိုင်တွယ်ရမည်၊ မည်သို့သော အရာက သူတို့ကို ထိခိုက်နာကျင်စေနိုင်မည်ကို နားလည်သွားသည်။ ထို့ကြောင့် သူက ပြုံးရွှင်သော မျက်နှာထားဖြင့် လက်မှတ်ရေးထိုးလိုက်လေသည်။

စာချုပ်သည် မေတ္တယျ၏ ခန္ဓာကိုယ်ထဲသို့ စိမ့်ဝင်သွားပြီးနောက် သူမက ဝမ်ဝေ့ကို ကြည့်ကာ ပြောလိုက်သည်။

"နောက်ထပ် တစ်ခုရှိသေးတယ်။ တစ်ခါတလေမှာ ငါတို့က ပိုမိုကြီးမားတဲ့ ကောင်းကျိုးအတွက် တစ်ချို့အရာတွေကို လုပ်ဆောင်ရတတ်တယ်။ အဲဒီထဲမှာ ငါတို့ မနှစ်သက်တဲ့သူတွေ ပါဝင်နေရင်တောင်မှပေါ့"

"ဟင်... အဲဒါက ဘာကို ဆိုလိုတာလဲ"

"ငါ့စကားကိုပဲ မှတ်ထားလိုက်ပါ" မေတ္တယျက သက်ပြင်းချရင်း ဆိုသည်။

ဝမ်ဝေ့က ခဏမျှ မျက်မှောင်ကြုတ်သွားသော်လည်း ခေါင်းညိတ်ပြလိုက်သည်။ ထိုသူသုံးဦးသည် စကားအကြာကြီး မပြောဖြစ်ဘဲ တွေ့ဆုံမှုကို အဆုံးသတ်လိုက်ကြသည်။ သူတို့ ဗုဒ္ဓဘာသာစံအိမ်မှ ထွက်လာကြစဉ် ဝူဟုန်က မေးမြန်းလိုက်သည်။

"ခုနက ဘာအကြောင်းလဲ"

"ကိုယ်လည်း သေသေချာချာတော့ မသိဘူး။ ဒါပေမဲ့ မကောင်းတဲ့ အငွေ့အသက်တစ်ခုကို ခံစားနေရတယ်" ဝမ်ဝေ့က ပြန်ဖြေသည်။ သူ တစ်ခုခုကို ရိပ်မိသော်လည်း သူ၏ ထင်မြင်ချက် မှားယွင်းနေပါစေဟုသာ ဆုတောင်းနေမိသည်။

"ဒါတွေကို ထားလိုက်ပါတော့ … လဲလှယ်ရေးစာရင်းကို အသုံးချဖို့ မင်းမှာ ဘယ်လို နည်းဗျူဟာရှိလဲ"

"ကျွန်မရဲ့ အစောပိုင်း ဆုံးဖြတ်ချက်ကတော့ ကျွန်မရဲ့ ခွန်အားကို မြှင့်တင်ဖို့ပဲ။ ဒါမှ ကျွန်မ အမြန်ဆုံး သူတော်စင်အဆင့် တက်လှမ်းနိုင်မှာလေ။ ဒါပေမဲ့ အခုတော့ အုတ်မြစ်ကို မြှင့်တင်ဖို့ပဲ အာရုံစိုက်တော့မယ်"

"ကိုယ်တို့ဂိုဏ်းကတော့ ပြောင်းပြန်ပဲ။ သူတို့က လူတိုင်းရဲ့ အားထုတ်မှုတွေကို စုပ်ယူပြီး ထူးကဲသာလွန် ကောင်းကင်အလိုဆန္ဒတစ်ခုကို ရယူဖို့ ကြိုးစားနေကြတာ"

"အဲဒါကြောင့်ပဲ ရှင့်ရဲ့ ကန့်သတ်ချက်လေးက ရှိနေတာကိုး" ဝူဟုန်က သူ့ကို ခပ်စောင်းစောင်း ကြည့်လိုက်သည်။

"ကိုယ်က ဘယ်လိုလူလဲဆိုတာ သိရက်နဲ့ သူတို့က အဲဒီလို အကြံပြုကြတာလေ။ ကိုယ့်ကို အပြစ်တင်လို့ မရဘူး။ ပြီးတော့ ကိုယ်က တခြားနည်းလမ်းတွေနဲ့လည်း ကူညီပေးဦးမှာပါ" ဝမ်ဝေ့က သူ၏ မှောင်ခိုစျေးကွက်အကြောင်းကို ပြောပြရင်း ပြန်ဖြေလိုက်သည်။

"ရှင့်ဆီမှာ ကျွန်မ ယုံကြည်လို့ရတဲ့ အချက်တစ်ခုရှိရင် … အဲဒါကတော့ ရှင်က ပိုက်ဆံရမဲ့လမ်းကို အမြဲတမ်း ရှာတွေ့နေတာပဲ" ဝူဟုန်က ခေါင်းခါရင်း ဆိုသည်။

"မင်းအတွက် ကိုယ့်မှာ နည်းလမ်းတစ်ခု ရှိတယ်။ နားထောင်ချင်လား"

"အို... ဘာလဲ"

"ထူးကဲသာလွန် ကောင်းကင်အလိုဆန္ဒက အုတ်မြစ်တိုင် တစ်တိုင်တည်းကိုပဲ ခွင့်ပြုပေးနိုင်လိမ့်မယ်။ ဒါပေမဲ့ လူတွေကို ချို့ယွင်းချက်ရှိတဲ့ တာအိုသာလွန်ခြင်း ဖြစ်တည်အောင် ကူညီပေးမဲ့ အစီအရင်ကို မင်း ဖန်တီးနိုင်မယ်ဆိုရင် … ဂိုဏ်းတွေဆီ အဲဒါ အသုံးပြုခွင့်ပေးဖို့အတွက် ကြီးမားတဲ့ အဖိုးအခ တောင်းလို့ရတယ်။ အဲဒါက အုတ်မြစ်တိုင် ၃ တိုင်အထိ ရောက်အောင် မြှင့်တင်ပေးနိုင်ဖို့ လုံလောက်လိမ့်မယ်"

"နေပါဦး။ ကိုယ် အခုပဲ မေတ္တယျအကြောင်း စဉ်းစားမိတယ်။ အဲဒါက သူမကို အုတ်မြစ်တိုင် ၈ တိုင် ဒါမှမဟုတ် ၉ တိုင်အထိ ရောက်အောင် ကူညီပေးနိုင်လောက်တယ်။ ဒီအစီအရင်... မဟုတ်ဘူး... မင်းရဲ့ တည်ရှိမှုကိုယ်တိုင်က ဒီကစားပွဲကို ပြောင်းလဲပစ်လိုက်တာပဲ"

လူတွေရဲ့ အုတ်မြစ်ကို မြှင့်တင်ပေးနိုင်မဲ့ နည်းလမ်းကို ကမ်းလှမ်းပြီး ပိုက်ဆံ ဘယ်လောက်တောင် ရှာလို့ရမလဲဟု တွေးတောရင်း ဝမ်ဝေ့၏ မျက်လုံးများ တောက်ပလာသည်။

"ရှင် ပြောပုံက အဲဒီအစီအရင်က တည်ဆောက်ပြီးသားလိုလို ဒါမှမဟုတ် အောင်မြင်ဖို့ သေချာပေါက် အာမခံချက် ရှိနေသလိုပဲနော်"

"ဟုတ်တယ်။ ဒါပေမဲ့ အောင်မြင်ဖို့ အာမခံချက် မရှိဘူးဆိုတာကို ကြိုတင်သတိပေးထားသရွေ့ ကိုယ်တို့က ကြီးမားတဲ့ အဖိုးအခကို တောင်းခံလို့ ရနေတုန်းပဲလေ။ မဟုတ်သေးဘူး... ထားလိုက်ပါတော့ … ချို့ယွင်းချက်ရှိတဲ့ တာအိုသာလွန်ခြင်းကို ပိုင်ဆိုင်နိုင်တယ်ဆိုတာ မဟာတာအိုသူတော်စင် ဖြစ်လာဖို့ အခွင့်အလမ်း ပိုများတယ်လို့ ဆိုလိုတာပဲ။ ဒီလို အခွင့်အရေးမျိုးအတွက် လူတွေ ဘယ်လောက်တောင် အစွန်းရောက်သွားမလဲ ဘယ်သူသိမှာလဲ … အဲဒီတော့ မင်းမှာ ဒီလို စွမ်းရည်ရှိတာကို ဖုံးကွယ်ထားတာ အကောင်းဆုံးပဲ"

"ရှင် စိုးရိမ်ပေးတာကို ကျေးဇူးတင်ပေမဲ့ ကျွန်မတို့နဲ့ နီးစပ်တဲ့သူတွေအတွက် အသုံးပြုပေးဖို့ကတော့ ကောင်းတဲ့ အကြံဉာဏ်ပါပဲ"

"မင်း သေချာရဲ့လား" ဝမ်ဝေ့က မေးလိုက်သည်။ သူမကို ထိုစွမ်းရည်အား ထာဝရ ဖုံးကွယ်ထားစေချင်သည်။

"သေချာတာပေါ့ … ရှင်က ပိုက်ဆံရှာတာထက် ကျွန်မကို ပိုဂရုစိုက်မယ်လို့ ဘယ်သူ သိမှာလဲ" ဝူဟုန်က သူ့ကို နောက်ပြောင်သော သဘောဖြင့် တွန်းလိုက်သည်။

"အချစ်ရယ်... ဟွင်သွမ်းစကြဝဠာထဲက ရတနာအားလုံးဟာ မင်းရဲ့ ခြေသလုံးမွှေး တစ်မွှေးစာလောက်တောင် တန်ဖိုးမရှိပါဘူး" ဝမ်ဝေ့က သူမကို ရင်ခွင်ထဲ ပွေ့ပိုက်ရင်း ပြောလိုက်သည်။

"ရှင်က ရိုမန့်တစ်ဆန်နေတာလား ဒါမှမဟုတ် ခြေထောက်ကို ရူးသွပ်တဲ့ ရှင့်ရဲ့ စရိုက်ကြောင့် ဒီလိုတွေ ပြောနေတာလားဆိုတာ ခွဲမရတော့ဘူး"

"နှစ်ခုလုံးလည်း ဖြစ်နိုင်တာပဲလေ" ဝမ်ဝေ့က ဆိုရင်း သူမကို ပြင်းပြစွာ နမ်းရှိုက်လိုက်သည်။

"အဟမ်း..."

ထိုသူနှစ်ဦးက ဘေးနားမှ ဖြတ်သွားသော ဘုန်းတော်ကြီးကို ကြည့်ကာ ရပ်လိုက်ကြသည်။

"ဒကာတို့... ဒီနေရာက ဗုဒ္ဓဘာသာ နယ်မြေဖြစ်နေသေးတယ်။ ကျေးဇူးပြုပြီး ထိန်းထိန်းသိမ်းသိမ်းနေပေးကြပါ"

"တောင်းပန်ပါတယ် ဘုန်းတော်ကြီး" ဝမ်ဝေ့က ဆိုကာ သူမနှင့် ခွာလိုက်သည်။ ဘုန်းတော်ကြီးက ခေါင်းညိတ်ပြကာ ထွက်ခွာသွားသည်။

"ဒါတွေ အားလုံးက ရှင့်အပြစ်ပဲ"

"ဒါက ဘာလို့ ကိုယ့်အပြစ်ဖြစ်ရမှာလဲ"

"ရှင်က ကျွန်မကို အာရုံလွှင့်အောင် လုပ်တာလေ … တကယ်ကို ရှက်ဖို့ကောင်းလိုက်တာ"

"မင်းပုံစံက ရှက်နေတဲ့ပုံလည်း မပေါက်ပါဘူး" ဝမ်ဝေ့က ပြန်ပြောသည်။

"အဲဒီအစား သဘောကျနေတဲ့ပုံပဲ"

ဝူဟုန်က နှာခေါင်းရှုံ့လိုက်ရင်း လက်ကို ဝှေ့ယမ်းလိုက်သည်။

"ရှင် ဆိုလိုချင်တဲ့ အဓိပ္ပာယ်ကို မုန်းတယ်"

သူမသည် အရှိန်အဟုန်ဖြင့် ထွက်ခွာသွားသည်။ ဝမ်ဝေ့သည် ရယ်မောရင်း သူမနောက်သို့ လိုက်ရန် ကြိုးစားသော်လည်း သူမက အလွန်မြန်လှသဖြင့် ခြေလှမ်းအနည်းငယ်အတွင်း ပျောက်ကွယ်သွားသည်။ ထို့ကြောင့် ဝမ်ဝေ့က ပြုံးဖြဲဖြဲဖြင့် ဂိုဏ်းသို့ ပြန်လာခဲ့သည်။

သူ ပြန်ရောက်သည်နှင့် တွေ့ဆုံမှုအကြောင်းနှင့် အုတ်မြစ်တိုင်များအကြောင်းကို အားလုံးကို ပြောပြလိုက်သည်။ ဤသတင်းကို ကြားပြီးနောက် ဝမ်ဝေ့သည် ဝမ်ပေါ်ကို ကောင်းကင်အလိုဆန္ဒလမ်းစဉ်ကို လက်ခံရန် အောင်မြင်စွာ နားချနိုင်ခဲ့သည်။ ဝူဟုန်၏ နည်းလမ်းနှင့် သူ ကမ္ဘာဦးဟွင်သွမ်းသူတော်စင် ဖြစ်လာပြီးနောက် စွယ်စုံသုံးနည်းလမ်းကို အသုံးပြုပါက ဝမ်ပေါ်သည် အုတ်မြစ်တိုင် ၄ ခုအထိ ရရှိနိုင်လိမ့်မည်။ ထိုအဆင့်သည် သင့်လျော်သော ထူးကဲသာလွန်နည်းလမ်းတစ်ခုဖြင့် သူ့ဘာသာသူ တက်လှမ်းနိုင်မည့် အဆင့်လည်း ဖြစ်နေသည်။

……………………..

ကောင်းကင်တာအိုက စာလိပ်များနှင့် အုတ်မြစ်တိုင်လုံးများအကြောင်း ဖွင့်ချပြီးနောက် အရေးပေါ် အစည်းအဝေးလုပ်သည်မှာ တာအိုအခွင့်အလမ်းဂိုဏ်းတစ်ခုတည်း မဟုတ်ပေ။ ထိုညတွင် မည်သည့်အင်အားစုမှ အနားမရဘဲ သူတို့၏ အနာဂတ်အတွက် နည်းဗျူဟာများ ချမှတ်နေကြသည်။

မဟာချင်သူတော်စင်ခုံရုံး နန်းတော်

ယင်ကျန်းက အစည်းအဝေးကို အဆုံးသတ်ပြီးနောက် သန်းခေါင်ယံအချိန်အထိ စောင့်ဆိုင်းကာ တိတ်တဆိတ် ထွက်ခွာလာခဲ့ပြီး အသင်္ချေဂိုဏ်းမဟာမိတ်၏ ဌာနချုပ်သို့ တိုက်ရိုက် ဦးတည်ခဲ့လေသည်။ သူက အလွန် လျှို့ဝှက်စွာ လှုပ်ရှားခဲ့ပြီး တုကုပိုင်ထျန်း တစ်ယောက်တည်းသာ သူ၏ တည်ရှိမှုကို သိရှိနိုင်ရန် ခွင့်ပြုခဲ့သည်။

"ယင်ကျန်း... မင်း ဘာအလိုရှိလို့လဲ" တုကုပိုင်ထျန်းက လက်ပိုက်လျက် မတ်တတ်ရပ်ကာ မေးမြန်းလိုက်သည်။ သူသည် ယင်ကျန်းကို ထိုင်ရန် မဖိတ်ခေါ်သလို၊ အဖန်ရည် တည်ခင်းခြင်း သို့မဟုတ် မည်သည့် ဧည့်ဝတ်ကျေပွန်မှုကိုမျှ မပြသခဲ့ပေ။

ယင်ကျန်းက ဘာမှမပြောဘဲ စက္ကန့်အနည်းငယ်မျှ စိုက်ကြည့်နေသည်။ ထိုသူနှစ်ဦးက နဂါးပုံရိပ်ပါသော အနက်ရောင် ဝတ်စုံများကို ဆင်တူ ဝတ်ဆင်ထားကြသည်။ ထူးခြားချက်မှာ တုကုပိုင်ထျန်း၏ ဝတ်စုံတွင် နဂါးများသည် လက်ဖျားတွင် ရှိနေပြီး ထိုသို့သော မြင့်မြတ်သည့် သတ္တဝါများပင် သူ၏ လက်ဝါးအောက်တွင် နှိမ်နင်းခံထားရသည်ကို အဓိပ္ပာယ်ရသည်။ ယင်ကျန်း၏ ဝတ်စုံတွင်မူ နဂါးများသည် အင်္ကျီပေါ်တွင် ရှိနေပြီး သူကိုယ်တိုင်မှာ မိုးမြေကြားတွင် အမြင့်မြတ်ဆုံး သတ္တဝါတစ်ဦးအဖြစ် မှတ်ယူထားသည့် လက္ခဏာပင် ဖြစ်သည်။

"သတင်းတွေက အမှန်ပဲပေါ့ ဟုတ်လား" ယင်ကျန်းက မေးလိုက်သည်။

"မင်း ဘာကို ပြောတာလဲ"

"ကောင်းကင်တာအိုက မင်းတို့ မဟာမိတ်အဖွဲ့ကို မုန်းတီးနေတယ်ဆိုတာလေ"

"မင်းက ဒီလို အဓိပ္ပာယ်မရှိတာတွေ ပြောဖို့ ဒီကို လာတာလား"

"အဓိပ္ပာယ်မရှိတာ ဟုတ်လို့လား" ယင်ကျန်းက ပြုံးလိုက်သည်။

"မင်းတို့က တာအိုအခွင့်အလမ်းဂိုဏ်းကို သူတို့ရဲ့ လဲလှယ်ရေးစာရင်း ဖွင့်ပြဖို့ ဖိအားပေးဖို့ လူတွေကို စုစည်းနေတာနဲ့ပဲ အချိန်ကုန်နေတာ။ ဒါပေမဲ့ အစည်းအဝေး မစခင်လေးမှာပဲ ကောင်းကင်တာအိုက အဲဒါကို လူသိရှင်ကြား ထုတ်ပြန်လိုက်တယ်။ ဒါက တိုက်ဆိုင်မှုလို့ မင်း ထင်လား။ ဘယ်သူမှ ယုံမှာ မဟုတ်ဘူး"

"ကံတာအိုကို သုံးတဲ့ မင်းလိုလူတွေက တိုက်ဆိုင်မှုဆိုတာ မရှိဘူးဆိုတဲ့ အဓိပ္ပာယ်မရှိတဲ့ စကားတွေကိုပဲ အမြဲပြောနေတာပဲ" တုကုပိုင်ထျန်းက လှောင်ပြောင်လိုက်သည်။

"ဟွင်သွမ်းစကြဝဠာက အကျယ်ကြီးပဲ။ စာရင်းအင်းဆိုင်ရာ ထူးခြားချက်တွေက အမြဲတမ်း ဖြစ်နေကျပဲလေ"

"မင်းကိုယ်တိုင်တောင် မင်းစကားကို မယုံဘူးဆိုတာ ငါ သိပါတယ်။ ဒါပေမဲ့ မင်း ပြောတာ မှန်တယ်ပဲ ထားပါဦး" ယင်ကျန်းက တည်ငြိမ်စွာ ဆက်ပြောသည်။

"ဟို ကြွက်စုတ် ခုံ ရော ဘာလဲ။ သူ့ကျောင်းတော်ရဲ့ ကံကြမ္မာနဲ့ ကြီးပွားတိုးတက်မှုတွေက မင်းတို့ မဟာမိတ်အဖွဲ့ ပျက်သုဉ်းမှုနဲ့ ဆက်စပ်နေတာကို မင်း သတိမထားမိဘူးလို့တော့ လာမပြောနဲ့။ အဲဒါက ကောင်းကင်တာအိုက မင်းတို့ တည်ရှိမှုကို မုန်းတီးနေတယ်ဆိုတဲ့ ရှင်းလင်းတဲ့ လက္ခဏာပဲ မဟုတ်လား"

တုကုပိုင်ထျန်းသည် သူ့ကို စိုက်ကြည့်နေသည်။ သူ၏ အမူအရာမှာ တည်ငြိမ်နေသော်လည်း အပေါ်ယံသာ ဖြစ်သည်။

"လွန်ခဲ့တဲ့ ရွှေရောင်ခေတ်ကာလတုန်းက အစွန်းရောက်တဲ့ ကိန်းဂဏန်းဖြစ်တဲ့ ၉ ကို အခြေခံပြီး ရှေးဦးမူလ အင်အားစု ၉ ခု ပေါ်ထွန်းလာလိမ့်မယ်လို့ ငါ ဟောကိန်းထုတ်ခဲ့ဖူးတယ်။ ပြီးတော့ ပြည့်စုံခြင်းကို ကိုယ်စားပြုတဲ့ ၁၂ ကို အခြေခံပြီး သူတို့အထက်မှာ ထူးကဲသာလွန် အင်အားစု ၃ ခု ရှိလာမယ်လို့လည်း ဟောခဲ့တယ်"

"ဒါပေမဲ့ မင်းကြောင့် ငါ့ရဲ့ ဟောကိန်းက အလကား ဖြစ်သွားခဲ့ရတယ်။ ပထမမူလစစ်ပွဲတုန်းက မင်းရဲ့ မဟာမိတ်တွေကို သစ္စာဖောက်ပြီး ကိုယ့်ကိုယ်ကိုယ်ပဲ ကာကွယ်ဖို့ ဆုံးဖြတ်ခဲ့တဲ့အချိန်မှာ မင်းက မင်းရဲ့ သတ်မှတ်ထားတဲ့ ကံကြမ္မာကနေ လွတ်မြောက်သွားခဲ့တယ်။ အဲဒီလိုနဲ့ ပျက်စီးဖို့ ကံပါလာတဲ့ အင်အားစုများစွာရဲ့ ကံတရားနဲ့ ကံကြမ္မာတွေကို အောင်မြင်စွာ သိမ်းပိုက်နိုင်ခဲ့ပြီး အာဏာရှင်တစ်ယောက်အဖြစ် ရပ်တည်နိုင်ခဲ့တယ်"

"ဒါပေမဲ့ မင်းရဲ့ တည်ရှိမှုက ပုံမှန်မဟုတ်တဲ့ အခြေအနေတစ်ခု ဖြစ်နေခဲ့တယ်။ အဲဒါကြောင့် ကောင်းကင်တာအိုက မင်းရဲ့ တည်ရှိမှုကို လက်ခံနိုင်ဖို့ သူ့ရဲ့ အစီအစဉ်တစ်ခုလုံးကို ပြောင်းလဲခဲ့ရတယ်။ မင်းရဲ့ အကြည့်အရဆိုရင် မင်း ငါ့ကို မယုံဘူး ထင်တယ်" ယင်ကျန်းက ပြုံးလျက် ဆိုသည်။

တုကုပိုင်ထျန်းက ဘာမှ ပြန်မပြောပေ။ သို့သော် အဖြေကတော့ ထင်ရှားနေသည်။

"ဒုတိယမူလစစ်ပွဲတုန်းက မင်း ဘာလို့ ဒီလောက်တောင် ကံဆိုးခဲ့ရတာလဲဆိုတာ မင်း မစဉ်းစားမိဘူးလား။ မင်းက ကြိုးဆွဲဆရာ လုပ်ပြီး တာအိုအခွင့်အလမ်းဂိုဏ်းကို အားနည်းသွားအောင် ဒီစစ်ပွဲကို ဘယ်လိုပဲ အသုံးချဖို့ ကြိုးစားခဲ့ပါစေ။ မင်းရဲ့ အစီအစဉ်တွေက အမြဲတမ်း ပြောင်းပြန်ဖြစ်ပြီး မင်းတို့ဂိုဏ်းပဲ ကြီးမားတဲ့ အန္တရာယ်နဲ့ ရင်ဆိုင်ခဲ့ရတယ်"

"တကယ်တော့ အင်အားစုတစ်ခုအနေနဲ့ မင်းတို့က ဒီစစ်ပွဲမှာ အများဆုံး ပါဝင်ကူညီခဲ့ကြတယ်။ ဒါပေမဲ့ မင်းတို့ ရရှိတဲ့ ဆုလာဘ်က အနည်းဆုံးပဲ … အဲဒါက မတော်တဆလို့ မင်း ထင်နေတာလား။ မဟုတ်ဘူး... အာဏာရှင် ၁၃ ဖွဲ့ ရှိနေတဲ့ ကမ္ဘာ့ပုံစံကို ဖန်တီးခဲ့ရတဲ့အတွက် ကောင်းကင်တာအိုက ဆုံးရှုံးသွားတဲ့ ကံကြမ္မာနဲ့ ကံတရားတွေကို မင်းတို့ဆီကနေ ပြန်နှိုက်ယူပြီး အစားထိုးစေချင်လို့ပဲ"

"ငါရော၊ တခြားလူတွေရော မင်းကို ကျေးဇူးတင်သင့်တယ်လို့ ငါ ဝန်ခံပါတယ်။ ငါ့ရဲ့ တွက်ချက်မှုအရ အခုဆိုရင် ထူးကဲသာလွန် အင်အားစုက ၃ ဖွဲ့ မဟုတ်ဘဲ ၇ ဖွဲ့ ဖြစ်လာတော့မယ်။ အဲဒါတွေ အားလုံးက မင်းကြောင့်ပဲ"

"ယင်ကျန်း... မင်း ဒီကို ဘာလို့ လာတာလဲ" တုကုပိုင်ထျန်းက တည်ငြိမ်စွာ မေးလိုက်သည်။

"ငါတို့ တစ်ဦးကို တစ်ဦး ကူညီနိုင်လို့ ဒီကို လာတာပေါ့" ယင်ကျန်းက ပြုံးလျက် ပြန်ဖြေလိုက်လေသည်။