လာထိပါးတော့လည်း ရှင်းပစ်ရုံပေါ့

Vol. 20 Ch. 208

မကြာမီ သူတို့ သုံးဦးသည် စုန့်ဝမ်၏ ဂူအိမ်သို့ ရောက်ရှိလာခဲ့သည်။ မြွေလူသားများ၏ အခြေအနေကို ကြည့်ပြီးနောက် ရုန်ကျင့်ယွမ် အလွန်ကျေနပ်သွားသည်။

"အကြီးအကဲဝူ... မင်းရဲ့ စွမ်းဆောင်မှုတွေကို ဂိုဏ်းချုပ်ဆီ တင်ပြပေးမယ်၊ ပြီးတော့ တာဝန်ခံအကြီးအကဲရာထူး လျှောက်ထားပေးမယ်။ ဂိုဏ်းချုပ်လည်း မင်းကြိုးစားတာကို ကျေနပ်လိမ့်မယ်လို့ ငါယုံကြည်တယ်"

"ကျေးဇူးတင်ပါတယ် အကြီးအကဲရုန်" ဟု စုန့်ဝမ်က ပြောလိုက်သည်။

"ဂျူနီယာမောင်လေးဝူ... ငါ့ကိုလည်း အလောင်းသန့်စင်တာနဲ့ ပတ်သက်ပြီး သင်ပေးပါဦး" ဟု ကျိုးစစ်ယိက တောင်းဆိုလိုက်သည်။

"စီနီယာအစ်မကျိုး... ကျွန်တော်လည်း အစ်မပေးတဲ့ ကျောက်စိမ်းပြားထဲက နည်းလမ်းတွေကိုပဲ စမ်းသပ် ကြည့်နေတာပါ၊ သင်ပေးတယ်လို့ မပြောဝံ့ပါဘူး။ အကယ်၍ ကျွန်တော့်ကို ယုံကြည်တယ်ဆိုရင် နောက်တစ်ခါ စီနီယာအစ်မ အလောင်းသန့်စင်တဲ့အခါ ဘေးကနေ စောင့်ကြည့်ပေးပြီး အကြံပြုပေးပါ့မယ်" ဟု စုန့်ဝမ်က ပြန်ဖြေလိုက်သည်။

ကျိုးစစ်ယိ ပြုံးရွှင်သွားသည်။

"အဲဒါဆိုရင်တော့ အရမ်းကောင်းတာပေါ့"

……

ခုနစ်ရက်အကြာတွင် စုန့်ဝမ်ကို ဆေးတောင်ထိပ်၏ အကြီးအကဲတစ်ဦးအဖြစ် ခန့်အပ်ကြောင်း တရားဝင် ကြေညာချက် ထွက်ပေါ်လာခဲ့သည်။

ထိုအချိန်တွင် စုန့်ဝမ်မှာ ရွှမ်ဆေးဖော်စပ်ရေးခန်းမအတွင်း ဆေးလုံးများ ဖော်စပ်နေချိန် ဖြစ်သည်။ ရာထူးတိုးသတင်းမှာ လျင်မြန်စွာ ပျံ့နှံ့သွားခဲ့ပြီး ခန်းမအတွင်းရှိ ဆေးဖော်စပ်သူအားလုံး ချက်ချင်းဆိုသလို သိရှိသွားကြသည်။ စုန့်ဝမ်နှင့် ရင်းနှီးသည်ဖြစ်စေ၊ မရင်းနှီးသည်ဖြစ်စေ အားလုံးကပင် လာရောက် ဂုဏ်ပြုကြသည်။ တွေ့ရခဲသော ဟော်တင်းပင်လျှင် ဆေးဖော်စပ်ခြင်းကို ခဏရပ်၍ ဂုဏ်ပြုရန် ရောက်ရှိလာခဲ့သည်။

သားရဲသခင်ဂိုဏ်းသို့ ဝင်ရောက်သည်မှာ လေးလမျှသာ ရှိသေးသော စုန့်ဝမ်ကဲ့သို့ လူမျိုးအတွက် ဤမျှမြန်မြန် ရာထူးတိုးခြင်းမှာ အလွန်ပင် ရှားပါးလှသည်။

ကျော့ရွှေယွင်မှာမူ ခပ်လှမ်းလှမ်းမှနေ၍ စုန့်ဝမ်ကို မနာလိုစွာ စိုက်ကြည့်နေခဲ့သည်။ သူမသည် ရွှမ်ဆေးဖော်စပ်ရေးခန်းမ၏ ဂုဏ်ထူးဆောင်အကြီးအကဲ ဖြစ်လာကတည်းက တာဝန်ခံအကြီးအကဲရာထူး တစ်ခုခု ရယူနိုင်ရန် နည်းမျိုးစုံဖြင့် ကြံစည်ခဲ့သည်။ အခြားသူများကို ဖားယားခဲ့ရုံသာမက သူမ၏အလှအပကိုပင် ရင်းနှီးခဲ့ပြီး ဆေးဖော်စပ်ခြင်းကိုလည်း ကြိုးကြိုးစားစား လေ့ကျင့်ခဲ့သည်။

သို့သော် သူမနှင့်အတူ ဂုဏ်ထူးဆောင်အကြီးအကဲ ဖြစ်လာခဲ့သော အခြားသုံးဦးနှင့် နှိုင်းယှဥ်လျှင် အလွန်အမင်း ကွာခြားသွားသဖြင့် မနာလိုစိတ် ပြင်းပြလာသည်။ ဟော်တင်းမှာ ဆေးဖော်စပ်ခြင်းတွင် ပါရမီထူးချွန်ပြီး တောင်သခင်၏ တပည့်ဖြစ်ရာ အာဏာလုရန် မလိုဘဲ ကြိုးစားရုံဖြင့် အရာအားလုံး ရရှိမည့်သူ ဖြစ်သည်။ ကျိုးစစ်ယိမှာလည်း ဒုတိယတောင်သခင်၏ သမီးဖြစ်သဖြင့် တာဝန်တစ်ခု ပြီးရုံဖြင့် တောင်ထိပ်အကြီးအကဲ ရာထူးသို့ အလိုအလျောက် တက်လှမ်းသွားခဲ့သည်။

ယခုဆိုလျှင် လမ်းခုလတ်မှ ဝင်လာသော လေလွင့်ကျင့်ကြံသူ ဝူရှန်းပင်လျှင် တောင်ထိပ်အကြီးအကဲတစ်ဦး ဖြစ်သွားခဲ့ပြီ။ ဤအချက်က ကျော့ရွှေယွင်ကို အလွန်အမင်း မကျေမနပ် ဖြစ်စေသည်။ ထိုသူ၏ ဆေးဖော်စပ်မှုမှာ သာမန်မျှသာ ဖြစ်ပြီး သူမလောက်လည်း မကြိုးစားဘဲနှင့် သူမထက် အရင် ရာထူးတက်သွားခြင်းကို မည်သို့မျှ လက်မခံနိုင်ပေ။

စုန့်ဝမ်မှာမူ ကျော့ရွှေယွင်၏ မကျေနပ်မှုကို သတိမထားမိဘဲ ဂုဏ်ပြုသူများနှင့် ခေတ္တစကားပြောပြီးနောက် ဂူအိမ်သို့ ပြန်လာခဲ့သည်။ ကူပိုးကောင်မှာ လွန်ခဲ့သော ဆယ်ရက်အတွင်း အသားလုံး ၁၅ လုံး စားသုံးခဲ့ပြီးနောက် အဆင့်တက်ရန် လက္ခဏာများ ပြသလာခဲ့ပြီ ဖြစ်သည်။

စုန့်ဝမ်လည်း အသားလုံး လေးလုံးကို ထုတ်ယူ၍ ကူပိုးကောင်ရှေ့တွင် ချပေးလိုက်သည်။ ၎င်းမှာ သူလောလောဆယ် ဖယ်ချန်ထားနိုင်သည့် အများဆုံး အရေအတွက် ဖြစ်သည်။ ပိုးကောင်သည် အသားလုံး သုံးလုံးခွဲကို အငမ်းမရ စားသောက်ပြီးနောက် ဗိုက်တင်းကာ ငြိမ်သက်သွားခဲ့သည်။

တစ်နာရီခန့်အကြာတွင် ကူပိုးကောင်သည် ပတ်ဝန်းကျင်မှ ဝိညာဉ်စွမ်းအင်များကို စတင်စုပ်ယူလေတော့သည်။ ယင်းမှာ အဆင့်တက်တော့မည့် လက္ခဏာပင်။ ထို့ကြောင့် ဝိညာဉ်ကျောက် အမြောက်အမြားကို ထုတ်ယူ ချေဖျက်လိုက်ရာ သန့်စင်သော ဝိညာဉ်စွမ်းအင်များ ဂူအတွင်း ပြည့်နှက်သွားပြီး ကူပိုးကောင် အားပါးတရ စုပ်ယူနိုင်သွားသည်။ နှစ်ရက်အတွင်း ဝိညာဉ်ကျောက် ၄,၃၀၀ ကျော်ကို အသုံးပြုခဲ့ရပြီးနောက် ကူပိုးကောင်မှာ စုပ်ယူခြင်းကို ရပ်တန့်ကာ အိပ်မောကျသွားခဲ့သည်။

နောက်ဆယ်ရက်အကြာတွင် မြွေလူသားများ၏ အခြေအနေ တည်ငြိမ်လာပြီဖြစ်ရာ အလောင်းသန့်စင်ခြင်းကို ပြန်စနိုင်ပြီ ဖြစ်သည်။

စုန့်ဝမ်သည် မြွေဂူသို့သွား၍ အသားလုံး ၇၀ ကို ယူဆောင်ကာ ဂူအိမ်သို့ ပြန်လာခဲ့သည်။ အလောင်းသန့်စင်ခြင်းကို နှစ်ရက်အတွင်း အပြီးသတ်လိုက်ပြီးနောက် အပြင်သို့ ချက်ချင်းမထွက်သေးဘဲ သွေးဝိညာဉ်ဆေးလုံးများကို ဆက်လက်ဖော်စပ်ခဲ့သည်။ နောက်ထပ် လေးရက်အကြာမှ ဂူအိမ်အပြင်သို့ ထွက်လာခဲ့သည်။ ဤခြောက်ရက်တာ အချိန်ကာလမှာ အတွေ့အကြုံနုသူတစ်ဦးအတွက် အလောင်းသန့်စင်ရန် လိုအပ်သော အချိန်အတိအကျပင် ဖြစ်သည်။

စုန့်ဝမ်သည် ရွှမ်ဆေးဖော်စပ်ရေးခန်းမသို့ ထွက်လာရာ ရင်ပြင်သို့အရောက် အသင့်စောင့်နေသော ဝမ်မင်နှင့် တွေ့လိုက်ရသည်။ စကားအနည်းငယ် ပြောဆိုပြီးနောက် စုန့်ဝမ်သည် သိုလှောင်အိတ်တစ်ခုကို ဝမ်မင်ထံ ကမ်းပေးလိုက်သည်။ ဝမ်မင်က စစ်ဆေးပြီး ဝတ်ရုံအတွင်း ထည့်လိုက်ကာ သိုလှောင်အိတ်ကို စုန့်ဝမ်ထံ ပေးလိုက်သည်။

ဝိညာဥ်ကျောက်များ ပေးချေရင်း "အကြီးအကဲဝူ... ဒီတစ်ခေါက် ဆေးလုံးပေးတာ သဘောတူထားတာထက် နှစ်လတောင် နောက်ကျနေပြီနော်" ဟု ဝမ်မင်က မကျေမနပ် ပြောလိုက်သည်။

စုန့်ဝမ်က "ငါ အခုတလော အလုပ်အရမ်းများနေလို့ ဆေးဖော်ဖို့ အချိန်မရတာပါ" ဟု အေးဆေးစွာ ပြန်ဖြေသည်။

ဝမ်မင်က စာရွက်တစ်ရွက်ကို ကမ်းပေးရင်း "ဒါက ကျွန်တော် လိုချင်တဲ့ ဆေးလုံးစာရင်းပဲ၊ သုံးလအတွင်း အကုန်ရအောင် လုပ်ပေးပါ" ဟု ဆိုသည်။

သို့သော် စုန့်ဝမ်က ထိုစာရွက်ကို မယူဘဲ ခေါင်းခါပြလိုက်သည်။

"အကြီးအကဲဝမ်... ကျွန်တော်တို့ အရောင်းအဝယ်ကို ဒီမှာတင် ရပ်လိုက်ရအောင်"

စုန့်ဝမ်သည် သူရင်းနှီးပြီးသား ဆေးလုံးများအတွက် အချိန်မဖြုန်းလိုတော့ပေ။

ထိုစကားကြောင့် ဝမ်မင် မျက်နှာပျက်သွားသည်။

"အကြီးအကဲဝူ... မင်း ဘာကို ဆိုလိုတာလဲ။ အခုမှ ငါ့ကို ကျောခိုင်းမလို့လား။ မင်း သားရဲဘုရင်ဂိုဏ်းထဲကို အဆင်ပြေပြေ ဝင်နိုင်ဖို့ ငါအာမခံပေးခဲ့တာကို မမေ့နဲ့ဦး။ အခု တောင်ထိပ်အကြီးအကဲ ဖြစ်လာတာနဲ့ ငါ့ကို ချက်ချင်း ပစ်ပယ်တော့မလို့လား"

"အကြီးအကဲဝမ်ရဲ့ ကျေးဇူးကို ကျွန်တော် အမြဲမှတ်မိပါတယ်၊ ဒါပေမဲ့ ဂိုဏ်းကဟတာဝန်အသစ် ပေးထားလို့ ဆေးဖော်ဖို့ အချိန်မရှိတော့တာပါ"

ဝမ်မင်က အေးစက်စွာဖြင့် "သေသေချာချာ စဉ်းစားဦးနော်၊ ငါ့ကို တကယ်ပဲ ငြင်းမှာလား" ဟု ခြိမ်းခြောက်သည့်ဟန်ဖြင့် ပြောလာသည်။

စုန့်ဝမ်က "တခြားသူကိုသာ အကူအညီတောင်းလိုက်ပါ" ဟု ပြောကာ လှည့်ထွက်ရန် ပြင်လိုက်သည်။

"အကြီးအကဲဝူ... မင်း စုံစမ်းခိုင်းထားတဲ့ ကိစ္စနဲ့ ပတ်သက်ပြီး သတင်းရထားပြီ၊ မသိချင်တော့ဘူးလား"

ဝမ်မင်စကားကြောင့် စုန့်ဝမ် ခြေလှမ်းရပ်ပြီး လှည့်ကြည့်လိုက်မိသည်။ စုန့်ဝမ်သည် သားရဲသခင်ဂိုဏ်းထဲသို့ ရောက်နေသော်လည်း အလောင်းနတ်ဆိုးဂိုဏ်း၏ ခြိမ်းခြောက်မှုမှာ ရှိနေဆဲ ဖြစ်သည်။ သူကိုယ်တိုင် အပြင်သို့ မကြာခဏ မထွက်နိုင်သဖြင့် ဝမ်မင်အား အချက်အလက်များ စုံစမ်းခိုင်းထားခဲ့ခြင်း ဖြစ်သည်။ ဝမ်မင်၏ ယုံကြည်မှုကို ရရန်အတွက် စုန့်ဝမ်က "သူ့ဆရာမှာ အလောင်းနတ်ဆိုးဂိုဏ်းမှ အကြီးအကဲတစ်ဦး၏ သတ်ဖြတ်ခြင်းကို ခံခဲ့ရသဖြင့် ထိုသူကို လိုက်လံရှာဖွေနေသည်ဟူသော ဇာတ်လမ်းတစ်ပုဒ် ဖန်တီးခဲ့သည်။

"ဒီတစ်ခါက အဆင့်နိမ့် နတ်ဆိုးကျင့်ကြံသူတွေအကြောင်း မဟုတ်ဘူး၊ အလောင်းနတ်ဆိုးဂိုဏ်းနဲ့ ပတ်သက်နေတာ" ဟု ဝမ်မင်က ဆိုလိုက်သည်။ ဝမ်မင်က သူ၏လက်ထဲမှ စာရွက်ကို မြှောက်ပြကာ "ဆေးဖော်ပေးမယ့် ကိစ္စကော ဘယ်လိုလဲ" ဟု အပေးအယူ လုပ်လာသည်။

စုန့်ဝမ်ကလည်း "အကြီးအကဲဝမ်က ကျွန်တော့်အပေါ် ကျေးဇူးရှိသူဆိုတော့ အတတ်နိုင်ဆုံး ကူညီပါ့မယ်" ဟု ပြန်ဖြေလိုက်သည်။

ဝမ်မင်က ခေါင်းညိမ့်ရင်း "မကြာသေးခင်က အရှေ့ဟွာဖန်းစျေးမှာ အခြေတည်အဆင့် အလောင်းနတ်ဆိုးဂိုဏ်းသား သုံးဦးထက်မနည်း တွေ့ခဲ့တယ်။ သူတို့က ဂိုဏ်းကနေ ထွက်ပြေးသွားတဲ့ သစ္စာဖောက်တွေကို လိုက်လံဖမ်းဆီးနေတာလို့ ယူဆရတယ်။ မင်းရဲ့ဆရာ သေဆုံးရတာကလည်း အဲဒီသစ္စာဖောက်တွေထဲက တစ်ယောက်ကြောင့် ဖြစ်နိုင်တယ်" ဟု အသံပို့လွှတ်နည်းဖြင့် ပြောပြလိုက်သည်။ ထို့နောက် သူသည် စုန့်ဝမ်ထံသို့ စာရွက်ကို ကမ်းပေးလိုက်သည်။

စုန့်ဝမ် ထိုစာရွက်ကို ကြည့်လိုက်သောအခါ အလွန်အံ့ဩသွားခဲ့သည်။ ဝမ်မင် လိုချင်သည့်အရာများထဲ ငွေရောင်ဦးချိုမြက် ပါဝင်နေသောကြောင့် ဖြစ်သည်။ ထိုမြက်မှာ ဂိုဏ်းက တင်းတင်းကျပ်ကျပ် ထိန်းချုပ်ထားသော ပစ္စည်းဖြစ်ပြီး တောင်ထိပ်အကြီးအကဲ ရာထူးဖြင့်ပင် အလွယ်တကူ ရနိုင်သောအရာ မဟုတ်ပေ။

စုန့်ဝမ်က ထိုအကြောင်းကြောင့် ငြင်းပယ်သောအခါ ဝမ်မင်က ဖိအားပေးလာသည့်အပြင် သူသည် ဥပဒေခန်းမမှဖြစ်ပြီး စုန့်ဝမ်၏ နောက်ကြောင်းကို စစ်ဆေးနိုင်ကြောင်း ခြိမ်းခြောက်လာခဲ့သည်။ ဤခြိမ်းခြောက်မှုကြောင့် စုန့်ဝမ်၏ စိတ်ထဲတွင် သတ်ဖြတ်လိုစိတ်များ ပေါ်ပေါက်လာပြီး လူသတ်ရန်အတွက် အခြားသူကို အသုံးချမည့် အကြံတစ်ခုကို ချက်ချင်း ရရှိသွားခဲ့သည်။

ထို့ကြောင့် သတ်ဖြတ်လိုစိတ်ကို ချိုးနှိမ်ပြီး ဝမ်မင်၏ ခြိမ်းခြောက်မှုကို ကြောက်လန့်သွားဟန် ဆောင်လိုက်သည်။ သူ့ခန္ဓာကိုယ်ပတ်လည်တွင် သတိထားမိလောက်သော အလောင်းချီ အငွေ့အသက်အချို့ကို ခဏမျှ ထွက်ပေါ်စေပြီး ချက်ချင်း ပြန်ဖုံးကွယ်လိုက်သည်။ ထို့နောက် သူသည် ထိတ်လန့်တုန်လှုပ်နေသော အမူအရာဖြင့် နှုတ်ပင်မဆက်ဘဲ ဂူအိမ်သို့ အမြန်ပြန်လာခဲ့သည်။

ဝမ်မင်မှာမူ စုန့်ဝမ်၏ ကြောက်လန့်နေသော ပုံစံကို ကြည့်ကာ ကျေနပ်စွာ ပြုံးကျန်ရစ်ခဲ့သည်။ "သုံးလအကြာမှာ ဒီစာရင်းထဲက ပစ္စည်းတွေ အကုန်ရရမယ်၊ တစ်ခုခု လိုတာနဲ့ မင်းရဲ့ လျှို့ဝှက်ချက်တွေ ဥပဒေခန်းမကို ရောက်သွားလိမ့်မယ်" ဟု လှမ်း၍ ခြိမ်းခြောက်လိုက်သည်။

နောက်တစ်နေ့တွင် စုန့်ဝမ်သည် ဂူအိမ်အပြင်ဘက်၌ သူ့ကို စောင့်ကြည့်နေသော ကြွက်သားရဲတစ်ကောင် ရှိနေကြောင်း ကူပိုးကောင်ထံမှ သတင်းရရှိခဲ့သည်။ ထိုကြွက်မှာ ဝမ်မင်၏ ဝိညာဉ်သားရဲ ဖြစ်နိုင်ပြီး သူ့ကို စောင့်ကြည့်ရန် ထားခဲ့ခြင်း ဖြစ်ပေလိမ့်မည်။ စုန့်ဝမ်က "ဒါ ငါ့အတွက် အခွင့်အရေးပဲ" ဟု တွေးကာ ဂူအိမ်အပြင်သို့ ထွက်လာခဲ့သည်။ ထို့နောက် အကြောဆန့်ဟန်ဆောင်ရင်း အလောင်းချီ အော်ရာအချို့ကို လေထဲသို့ တမင်ထုတ်လွှတ်လိုက်သည်။ ထိုစွမ်းအင်များမှာ လေထဲတွင် ချက်ချင်း ပျောက်ကွယ်သွားသော်လည်း စောင့်ကြည့်နေသော ကြွက်မှာမူ သတိထားမိသွားခဲ့သည်။

……..

ရက်ပေါင်း ၂၀ ကြာပြီးနောက် စုန့်ဝမ်သည် မြွေလူသား နှစ်ကောင်ကို စတုတ္ထအကြိမ်မြောက် သန့်စင်မှု ပြီးစီးသွားခဲ့သည်။ ယခုအခါ ၎င်းတို့၏ ခန္ဓာကိုယ်မှာ အလောင်းချီများဖြင့် ဖုံးလွှမ်းနေပြီး အသားများမှာ ခြောက်ကပ်လာကာ မြွေကြေးခွံများမှာလည်း အက်ကွဲလာခဲ့သည်။ ၎င်းမှာ ဖုတ်ကောင်အဖြစ်သို့ ပြောင်းလဲတော့မည့် အခြေအနေ ဖြစ်သည်။ စုန့်ဝမ်သည် ဂူ၏ အကာအကွယ်ကို ခေတ္တမျှ ဖွင့်ထုတ်လိုက်ရာ ဂူအတွင်းရှိ အခြေအနေများကို အပြင်မှ မြင်နိုင်စေခဲ့သည်။ ထို့နောက် မတော်တဆ ဖွင့်မိသယောင်ဖြင့် အမြန်ပြန်ပိတ်လိုက်သည်။

အချိန်များ ကုန်ဆုံးသွားခဲ့ပြီး ဝမ်မင်နှင့် ချိန်းဆိုထားသော သုံးလပြည့်သည့်နေ့သို့ ရောက်ရှိလာသည်။ မြွေလူသားများမှာ အကြိမ်ကြိမ် သန့်စင်ခြင်း ခံထားရသော်လည်း ၎င်းတို့၏ ပြင်းထန်သော အသက်ဓာတ်ကြောင့် သေဆုံးမသွားဘဲ၊ အလောင်းချီနှင့် အသက်ဓာတ်တို့မှာ ခန္ဓာကိုယ်အတွင်း စတင်ပေါင်းစပ်လာခဲ့သည်။ ဤသည်မှာ စုန့်ဝမ်၏ ကျွမ်းကျင်မှုနှင့် မြွေလူသားများ၏ ထူးခြားသော ကြံ့ခိုင်မှုကြောင့် ဖြစ်သည်။

နောက်တစ်နေ့တွင် ဝမ်မင် ရောက်ရှိလာပြီး ဂူအိမ်အပြင်ဘက်မှနေ၍ စုန့်ဝမ်ကို အော်ဟစ် ခြိမ်းခြောက်လေတော့သည်။ စုန့်ဝမ်လည်း စိုးရိမ်ထိတ်လန့်ဟန်ဖြင့် ဂူအိမ်အပြင်သို့ ထွက်လာခဲ့သည်။

………