အခန်း (၂၂၀၇-၂၂၀၈)

အပိုင်း(၂၂၀၇)

ဟူး... ဟူး...

အီလီစီယမ် အသေး သင်္ဘောကြီးသည် ထောင်သောင်းမကသော သက်ရှိများ၏ အကြည့်အောက်တွင် နန်းတော်ရှိရာ ကုန်းမြေတိုက်ကြီးဆီသို့ ဦးတည် ခရီးနှင်လာခဲ့သည်။

ထိုအကြည့်များထဲတွင် တောင်တန်းထဲ၌ ပုန်းအောင်းနေသော သူတော်စင်၏ အကြည့်မှာ အထင်ရှားဆုံး ဖြစ်သည်။ ထိုမျက်ဝန်းထဲတွင် ထိတ်လန့်မှု၊ မယုံကြည်နိုင်မှု၊ ကြောက်ရွံ့မှုနှင့် ဝေခွဲမရနိုင်သော အတွေးများစွာ ဒွန်တွဲနေသည်။

နန်းတော်သခင်ရှန့်လျိုမှာလည်း ဝေ့ဝူယင်၏ စကားကြောင့် ဇဝေဇဝါ ဖြစ်နေရသည်။

“သူတော်စင် ခုနစ်ပါး... တခြား ပုန်းကွယ်နေတဲ့ သုံးပါး ရှိနေသေးတာလား...”

သူ၏ မျက်ဝန်းထဲတွင် သတိထားရမည့် အလင်းတန်းများ ဖြတ်သန်းသွားသည်။ ပုံမှန်ဆိုလျှင် ကောင်းကင်တာအို၏ စွက်ဖက်မှုကြောင့် ဤကဲ့သို့ ပေါ့ဆသော စကားမျိုးကို လျစ်လျူရှုမိစေမည် ဖြစ်သော်လည်း ယခုမူ ထိုသို့ ဖြစ်မလာခဲ့ပေ။ ထိုအစား သံသယ မျိုးစေ့မှာ ရှန့်လျို၏ စိတ်ထဲတွင် စွဲမြဲသွားပြီး ပိုမို ကြီးထွားလာလေတော့သည်။

အင်ပီရီယန် တစ်ဦး စွက်ဖက်လိုက်သောအခါတွင်မူ ကောင်းကင်တာအိုပင်လျှင် မတတ်နိုင်တော့ချေ။

ဤသည်မှာ ကောင်းကင်တာအို၏ မျက်နှာလိုက်မှုပင် ဖြစ်တော့သတည်း။

...

"တကယ်ကို ခမ်းနားလိုက်တဲ့ နေရာပဲ..."

ဂြိုဟ်၏ လေထုအလွှာကို ဖြတ်ကျော်ဝင်ရောက်လိုက်သည်နှင့် မြင်တွေ့လိုက်ရသော မြင်ကွင်းကြောင့် ချင်ချူးမူမှာ မချီးကျူးဘဲ မနေနိုင်အောင် ဖြစ်သွားရသည်။ ကောင်းကင်သို့ ထိုးတက်နေသော တောင်ထိပ်ကြီးတစ်ခု၏ အထက်တွင် သေမျိုးအငွေ့အသက်နှင့် လျှို့ဝှက်စွမ်းအင်များ ကြွယ်ဝစွာ ထွက်ပေါ်နေပြီး ကောင်းမွန်စွာ ပြုပြင်မွမ်းမံထားသည့် တိုက်ကြီးတစ်ခုသည် ဟင်းလင်းပြင်၌ လွင့်မျောနေလေသည်။ သူမ နောက်သို့ လှည့်ကြည့်လိုက်သောအခါတွင်လည်း မှိန်ပျပျ အလင်းတန်းများ ထုတ်လွှတ်နေသော ဟင်းလင်းပြင်သင်္ဘောများစွာမှာ ကောင်းကင်ယံ၌ စီတန်းလျက်ရှိရာ ကြယ်တာရာပေါင်းများစွာက ဤမြင်ကွင်းကို သက်သေအဖြစ် ဝိုင်းဝန်းကြည့်ရှုနေကြသကဲ့သို့ အလွန်ပင် ရသမြောက်လှပေသည်။

"အမြင်စူးရှလှပေတယ်..."

ရှေ့ဆုံးမှ လမ်းပြလာသော ချင်းလျန်ယုက ဆိုလိုက်သည်။ သူမသည် ပုံမှန်အားဖြင့် ဝင်ရောက်ခွင့် ကန့်သတ်ထားသော ဝင်္ကပါများနှင့် အစီအရင်များအားလုံးကို ကျော်ဖြတ်နိုင်ရန် ကူညီပေးနေခြင်း ဖြစ်သည်။

"ဒါဟာ သူရဲကောင်းတာအို နန်းတော် ရဲ့ ပထမသူရဲကောင်းတိုက်ကြီး ပဲ ဖြစ်ပါတယ်... နန်းတော်သခင်ရှန့်လျို ပထမဦးဆုံး ဖန်တီးခဲ့တဲ့ ကုန်းမြေတိုက်ကြီးလည်း ဖြစ်ပါတယ်... အဲဒီအချိန်ကစပြီး နှစ်ပေါင်း တစ်သိန်းကျော်တိုင်အောင် ကျင့်ကြံခြင်းအတွက် သန့်စင်တဲ့ နယ်မြေတစ်ခုဖြစ်ဖို့ အဆင့်ဆင့် ပြုပြင်မွမ်းမံလာခဲ့တာပါ"

"ဒီ ပထမသူရဲကောင်းတိုက်ကြီး မှာ အစဉ်အလာတစ်ခု ရှိပါတယ်... အဲဒါကတော့ နန်းတော်ကနေ ပညာသင်ယူပြီးမြောက်သွားတဲ့ တပည့်တွေရဲ့ စွမ်းအင်တွေကို ဒီကုန်းမြေတိုက်ကြီးထဲမှာ စီးဝင်ကိန်းအောင်းစေတာပဲ ဖြစ်ပါတယ်... ဒါ့အပြင် ကျောင်းတော်သားဟောင်းတွေရဲ့ အောင်မြင်မှုတွေကို ဂုဏ်ပြုတဲ့ အလေ့အထလည်း ရှိပါတယ်... နန်းတော်ပြင်ပမှာ ကျင့်ကြံခြင်း အဆင့်အတန်းတစ်ခုခု တိုးတက်လာတိုင်း သူတို့ကို ဒီကို ပြန်လည်ဖိတ်ခေါ်ပြီး သူတို့ရဲ့ စွမ်းအင်တွေကို တိုက်ကြီးရဲ့ အမြုတေထဲ ထည့်ဝင်စေပါတယ်... ဒါမှသာ ဒီနယ်မြေဟာ တစ်စတစ်စ ပိုမိုကျယ်ပြန့်လာမှာ ဖြစ်တယ်..."

"သူတို့အတွက်လည်း ဒါဟာ အင်အားဆုံးရှုံးမှုကြီးကြီးမားမား မဟုတ်သလို၊ အချိန်ကြာလာတာနဲ့အမျှ ဒီကုန်းမြေတိုက်ကြီးဟာ ထိပ်တန်း လျှို့ဝှက်အဆင့် ဂြိုဟ်တွေထက်တောင် ပိုမို အစွမ်းထက်လာခဲ့ပါတယ်... ဘာကြောင့်လဲဆိုတော့ နန်းတော်ရဲ့ သင်္ကေတဘုရင်တွေ၊ လောကရှန့်ထိုတွေ၊ မူလ တရားသူကြီးတွေ၊ လျှို့ဝှက်အရှင်တွေနဲ့ သူတော်စင်ပေါင်းများစွာဟာ သူတို့ရဲ့ ကျင့်ကြံခြင်း စွမ်းအင်တွေကို ဒီထဲမှာ ပေါင်းစပ်ထည့်ဝင်ထားကြလို့ပါပဲ... ဒီမြေကို အရမ်းပဲ မနာလိုဖြစ်ကြပြီး နာမည်ကျော် အဂ္ဂိရတ် ဧကရာဇ် များစွာကတောင် သူတို့ကိုယ်ပိုင် အသုံးပြုဖို့အတွက် အဖိုးတန်တဲ့ ဈေးနှုန်းတွေပေးပြီး ဝယ်ယူဖို့ ကြိုးစားခဲ့ကြဖူးပါတယ်"

ချင်းလျန်ယု၏ စကားများတွင် ကြီးမားသော ဂုဏ်ယူမှုနှင့် ကြည်ညိုမှုတို့ လွှမ်းမိုးနေလေသည်။ ဤတိုက်ကြီးသည် သူရဲကောင်းတာအို နန်းတော် ၏ အထွတ်အမြတ် ပြယုဂ်ပင် ဖြစ်သည်။ သူတို့၏ ကြိုးပမ်းအားထုတ်မှုအားလုံးကို ကိုယ်စားပြုနေပြီး သူတော်စင်လေးပါး၏ ကြီးမားသော စွမ်းအားများနှင့် နန်းတော်အဖွဲ့ဝင်များ၏ စဉ်ဆက်မပြတ် ပြုပြင်မွမ်းမံမှုများ ကိန်းအောင်းနေသော နေရာလည်း ဖြစ်သည်။

ယွီစွန်းလီ၏ မျက်ဝန်းများမှာ တောက်ပနေသည်။ သူမ တစ်ခုခု ပြောချင်သော်လည်း စကားလုံးများမှာ နှုတ်ခမ်းဖျားတွင်တင် ရပ်တန့်နေခဲ့သည်။ သို့သော် တစ်စုံတစ်ယောက်က ဦးအောင် ပြောလိုက်လေ၏။

"ဒီကုန်းမြေတိုက်ကြီးဟာ အရင်ကတော့ ဗလာဖြစ်နေတဲ့ ပန်းချီကားချပ်တစ်ခုနဲ့ တူနေမှာပဲ... အဲဒီပေါ်မှာ ရရှိလာတဲ့ အောင်မြင်မှုတွေနဲ့ သမိုင်းကြောင်းတွေကတော့ စုတ်ချက်တစ်ခုချင်းစီအလိုက် လှပတဲ့ အရောင်အသွေးတွေကို ခြယ်သသွားကြတာပေါ့... ဒါဟာ သမိုင်းကြောင်း၊ အစဉ်အလာ၊ ကြိုးစားအားထုတ်မှုနဲ့ လေးစားမှုတွေ ပေါင်းစပ်ထားတဲ့ တကယ့်ကို ပြောင်မြောက်တဲ့ လက်ရာမွန်ကြီးတစ်ခုပါပဲ"

ထိုစကားကြောင့် ယွီစွန်းလီ၏ မျက်ဝန်းများမှာ ပိုမိုတောက်ပသွားခဲ့သည်။ သူက ရင်ခွင်ထဲမှ နေ၍ ဝေ့ဝူယင်ကို မော့ကြည့်လိုက်ရာ နွေးထွေးမှုကို နှလုံးသားနှင့်ရော ခန္ဓာကိုယ်နှင့်ပါ ခံစားလိုက်ရပြီး သူ၏ ပခုံးပေါ်သို့ မှီတွယ်လိုက်မိသည်။

"တကယ်ကို အံ့ဩစရာကောင်းတဲ့ တင်စားချက်ပဲ..."

ချင်းလျန်ယုမှာ ထိုကဲ့သို့သော ခိုင်းနှိုင်းချက်မျိုးကို တစ်ခါမျှ မကြားဖူးသော်လည်း သူမ စိတ်ထဲရှိ ခံစားချက်နှင့် အတိအကျ ထပ်တူကျနေသည်ကို တွေ့လိုက်ရသည်။

"လူတွေ ဒီမြေကို ဝယ်ဖို့ ဘာကြောင့် ကြိုးစားကြတယ်ဆိုတာ အံ့ဩစရာ မရှိတော့ပါဘူး"

ချောင်စွေ့ဖုန်းကလည်း အံ့ဩတကြီး ပြောလိုက်သည်။ နှစ်ပေါင်း တစ်သိန်းကျော် သမိုင်းကြောင်းနှင့် စဉ်ဆက်မပြတ် သန့်စင်မှုများက အချည်းနှီး မဟုတ်ပေ။ ဤမြေသည် အစွမ်းကုန် သန့်စင်ခြင်း ဂလက်ဆီ တစ်ခုလုံးတွင် အကြီးကျယ်ဆုံးသော ကုန်းမြေတိုက်ကြီး မဟုတ်နိုင်သော်လည်း၊ မျှတအောင် ထိန်းညှိထားသော အမျိုးမျိုးသော စွမ်းအင်များကြောင့် ကျင့်ကြံသူ အများစုအတွက် အံဝင်ခွင်ကျဖြစ်သည့် သန့်စင်သော နယ်မြေတစ်ခု ဖြစ်နေခြင်းပင်။

ချောင်စွေ့ဖုန်းက စပ်စုချင်စိတ်ဖြင့် ဆက်မေးလိုက်သည်။

"ဒီကုန်းမြေတိုက်ကြီးရဲ့ တန်ဖိုးက ဘယ်လောက်ရှိမလဲ..."

ထိုအမေးကြောင့် ချင်းလျန်ယုမှာ ခဏမျှ ကြောင်သွားရသည်။ သို့သော် ထိုမေးခွန်းကို ပြန်လည် စဉ်းစားပြီးနောက်တွင် ပြုံးလျက် ပြန်ဖြေလိုက်၏။

"ကျွန်မတို့ ရရှိခဲ့ဖူးတဲ့ အမြင့်ဆုံး ကမ်းလှမ်းချက်ကတော့ လျှို့ဝှက်လောက အမတေကျောက်တုံး ပေါင်း သုံးသန်းလောက် တန်ဖိုးရှိတဲ့ ပစ္စည်းတွေပဲ ဖြစ်ပါတယ်"

"..."

မင်ရှုဖုန်းမှာ တံတွေးပင် သီးမတတ် ဖြစ်သွား၏။

သုံးသန်း...

ထိုအရာက ရူးသွပ်ဖွယ်ရာ ပမာဏပင်။

"အဲဒါကို ငြင်းပယ်ခဲ့တာလား"

လျူစုယင်က မယုံကြည်နိုင်စွာ မေးလိုက်သည်။ သူတို့သည် လွန်ခဲ့သည့် လအတွင်းက ဂလက်ဆီတစ်ခွင် လှည့်လည်သွားလာခဲ့ကြသဖြင့် ဤနေရာ၏ တန်ဖိုးများကို အနည်းငယ် နားလည်ထားပြီး ဖြစ်သည်။ ထိုပမာဏမှာ အထူးအရည်အသွေး မရှိသော ထိပ်တန်း လျှို့ဝှက်အဆင့် ဂြိုဟ်တစ်လုံး၏ တန်ဖိုး (၁.၅ သန်းခန့်) ထက်ပင် များစွာ သာလွန်နေသည် မဟုတ်ပါလော။

ထိုကဲ့သို့သော ဂြိုဟ်များကို သူတော်စင်များ သို့မဟုတ် လျှို့ဝှက်အရှင် အများအပြားက နှစ်ပေါင်း ထောင်နှင့်ချီကာ ပြုပြင်ဖန်တီးကြရခြင်း ဖြစ်ပြီး နောက်ပိုင်းတွင် အဖွဲ့အစည်းကြီးများထံသို့ အမြတ်အစွန်းကြီးစွာဖြင့် ပြန်လည်ရောင်းချကြခြင်း ဖြစ်သည်။ သူတော်စင် အများအပြားတွင် ယခုကဲ့သို့သော စီမံကိန်းမျိုးရှိကြပြီး ရေတိုတွင် စွမ်းအင်များကို အသုံးပြုရသော်လည်း ရေရှည်အတွက် အကျိုးအမြတ် ရရှိရန် ကြိုးစားကြခြင်း ဖြစ်သည်။

"မှန်ပါတယ်..."

ချင်းလျန်ယုက ပြုံးလျက် အတည်ပြုလိုက်သည်။

"ဒီ ပထမသူရဲကောင်းတိုက်ကြီး ဟာ သာမန် ကုန်းမြေတိုက်ကြီးတစ်ခု မဟုတ်ပါဘူး... သူ့ရဲ့ အမြုတေမှာ လောကဝိညာဉ် တစ်ခု ဖြစ်ပေါ်လာမယ့် အရိပ်အယောင်တွေ တွေ့နေရပြီ ဖြစ်သလို၊ ခမ်းနားတဲ့ သမိုင်းကြောင်းကလည်း ဈေးနှုန်းကို ပိုမို မြင့်တက်စေတာပါပဲ"

လောကဝိညာဉ်...

လောကဝိညာဉ်ဆိုသည်မှာ နေကြယ်ဝိညာဉ် နှင့် အလားသဏ္ဌာန် တူလှပေသည်။ ၎င်းမှာဝိညာဉ်တစ်ခု ပေါ်ပေါက်လာရန် အခြားနည်းလမ်းတစ်ခု ဖြစ်ပြီး ကြီးထွားနိုင်၊ ကျင့်ကြံနိုင်သော သက်ရှိတစ်ခုအဖြစ် ပြောင်းလဲသွားခြင်း ဖြစ်သည်။

ဖီဆန်လေးတွင် နေကြယ် ဝိညာဉ် တစ်ခု ရှိနေသကဲ့သို့ ဂြိုဟ် သို့မဟုတ် ကုန်းမြေတိုက်ကြီးတစ်ခုတွင် လောကဝိညာဉ် ပေါ်ပေါက်လာပါက ၎င်းတို့သည် ပဲ့တင်ထပ် ဝိညာဉ် အဆင့် ၏ အစွန်းအဖျားသို့ ထိတွေ့နေပြီဟု ဆိုနိုင်ပေတော့သတည်း။

ဝိညာဉ်များ ကိန်းအောင်းလာသော ကမ္ဘာများနှင့် ကြယ်တာရာများသည် ကောင်းကင်ဘုံနှင့် အကြီးအကျယ် ဆက်သွယ်နိုင်သည့် ကောင်းကင်ခန္ဓာ များ ဖြစ်လာနိုင်သော အလားအလာရှိပေသည်။ ဤသို့ဖြင့် ထိုကောင်းကင်ခန္ဓာများသည် အထွတ်အထိပ် လျှို့ဝှက်အဆင့် ကို ကျော်လွန်ကာ ဝိညာဉ်အဆင့် သို့ တက်လှမ်းသွားနိုင်မည် ဖြစ်သည်။

ဝေ့ဝူယင်သည် ထိုကုန်းမြေတိုက်ကြီးကို အကဲခတ်ကြည့်လိုက်ရာ မပြည့်စုံသေးသော လောကဝိညာဉ် ၏ ကနဦးအဆင့် အငွေ့အသက်ကို ခံစားမိလိုက်သည်။ သို့သော် ထိုကဲ့သို့ ကြီးမားသော အသွင်ကူးပြောင်းမှုကို စတင်နိုင်ရန်အတွက် စနစ်တကျ ပြုပြင်မွမ်းမံမှု မရှိဘဲ လောကဝိညာဉ် အစစ်အမှန် ဖြစ်လာရန်မှာမူ အလွန်ပင် လိုအပ်ချက်များ ရှိနေသေးသည်။

သို့သော်လည်း ကျင့်ကြံသူတစ်ဦးသည် ထူးခြားသော ကျင့်စဉ်အချို့ကို အသုံးပြုကာ လောကဝိညာဉ် ရှိသော ကမ္ဘာတစ်ခုကို သန့်စင်နိုင်ပါက အစစ်အမှန် သူတော်စင် အမိန့်တော်ကို ခေါ်ယူနိုင်မည်ဖြစ်ပြီး ထိုမှတစ်ဆင့် ဥပဒေသမျိုးစေ့ကို ပျိုးထောင်နိုင်မည် ဖြစ်သည်။

ဤသည်မှာ ဥပဒေသတစ်ခုကို ဖော်ထုတ်ရန်နှင့် ကောင်းကင်ဘုံနှင့် ပဲ့တင်ထပ်မှု တည်ဆောက်ရန်အတွက် အခြားရွေးချယ်စရာ လမ်းစဉ်တစ်ခုပင် ဖြစ်သည်။ ဥပဒေသမျိုးစေ့ တစ်ခု ရှိရုံဖြင့် ပဲ့တင်ထပ် ဝိညာဉ် အဆင့် အောက်ရှိ ကျင့်ကြံသူများသည် လျှို့ဝှက် အာဏာရှင် အဆင့်ထက် ကျော်လွန်၍ တက်လှမ်းရန် အခွင့်အလမ်း ပိုမိုများပြားလာမည် ဖြစ်သည်။ ထို့ပြင် ယခင်က မရရှိခဲ့လျှင်ပင် နောက်ပိုင်းတွင် အစစ်အမှန် သူတော်စင် နှင့် အစစ်အမှန် ဝိညာဉ် အဆင့်များသို့ ရောက်ရှိရန် များစွာ အထောက်အကူ ဖြစ်စေလိမ့်မည်။

ပြတ်သားသော ဆည်းဆာ ဂလက်ဆီ မှ ဥပဒေသများကို အောင်မြင်စွာ ကျင့်ကြံနိုင်ခဲ့သော သူတော်စင်လေးပါး ဖြစ်သည့် အီမန်တက်၊ နတ်ပရီ၊ ပါခက် နှင့် ရှက်တပ်စဖင့် တို့အနက် သူတော်စင် စဖင့် မှာ ဤလမ်းစဉ်ကို လိုက်ခဲ့သူ ဖြစ်သည်။ ထိုဂြိုဟ်မှာလည်း ဂလက်ဆီ၏ နယ်နိမိတ်အတွင်း မရှိသဖြင့် သူသည် ဂလက်ဆီ၏ အရေးကိစ္စများတွင် ပါဝင်ခဲလှခြင်း ဖြစ်သည်။ သူသည် ဤလမ်းစဉ်ကိုသာ စွဲစွဲမြဲမြဲ လိုက်စားနေခဲ့သည်။

သို့သော်လည်း ဤလမ်းစဉ်မှာ အလွန်ပင် ခက်ခဲပင်ပန်းလှသလို၊ အဖိုးအခကြီးမားပြီး စွန့်စားရမှုလည်း များလှသည်။ မပြည့်စုံသော ဝိညာဉ်တစ်ခု ရှိနေရုံဖြင့် ထိုကုန်းမြေတိုက်ကြီး သို့မဟုတ် ဂြိုဟ်သည် လောကဝိညာဉ် တစ်ခုအဖြစ် မွေးဖွားလာမည်ဟု အာမခံချက် မရှိပေ။ စနစ်တကျ ကျင့်ကြံ ပြုစုမှု မရှိလျှင် သဘာဝအတိုင်း ဝိညာဉ်တစ်ခု ပေါ်ပေါက်လာရန် နှစ်ပေါင်း သန်းနှင့်ချီ၊ သို့မဟုတ် ဘီလီယံနှင့်ချီ၍ပင် ကြာမြင့်နိုင်ပေသည်။

ပထမသူရဲကောင်းတိုက်ကြီး မှာမူ အပြင်းအထန် ပြုပြင်မွမ်းမံထားသဖြင့် ၎င်း၏ ဖွံ့ဖြိုးမှု ဖြစ်စဉ်မှာ လျင်မြန်စွာ ရှေ့သို့ ရောက်နေခြင်း ဖြစ်သည်။ သို့သော်လည်း သန်းနှင့်ချီသော ပြုပြင်မှုများ ပြုလုပ်ခဲ့လျှင်ပင် လောကဝိညာဉ် ဖြစ်လာရန် အလားအလာ မရှိသည်များလည်း ဒုနဲ့ဒေးပင်။

သို့ရာတွင် အင်အားကြီး ပုဂ္ဂိုလ်များအတွက်မူ ဤသို့သော ကုန်းမြေတိုက်ကြီးမျိုးကို တွေ့ရှိခြင်းမှာ ပဲ့တင်ထပ် ဝိညာဉ် အဆင့် သို့ တက်လှမ်းရန် အခွင့်အရေး တစ်ခုနှင့်ပင် တူလှပေသည်။

ချောင်စွေ့ဖုန်းသည် ထိုကုန်းမြေတိုက်ကြီးကို စိုက်ကြည့်ရင်း မျက်တောင်ခတ်လိုက်မိသည်။ ထို့နောက် သူမက မေးလိုက်၏။

"တန်ပြန် ကမ်းလှမ်းချက်က ဘယ်လောက်လဲ"

***

အပိုင်း(၂၂၀၈)

"တန်ပြန် ကမ်းလှမ်းချက် ဟုတ်လား..."

ချင်းလျန်ယု ထိုမေးခွန်းကြောင့် အံ့ဩသွားကာ မျက်မှောင်ကြုတ်လိုက်သည်။

"ဟုတ်တယ်... နန်းတော်သခင်ရှန့် ပြန်ပြောလိုက်တဲ့ ဈေးနှုန်းလေ"

ချောင်စွေ့ဖုန်းက ရှင်းပြလိုက်သည်။ လျူစုယင်က သူမကို တစ်ချက် စောင်းကြည့်လိုက်သည်။ သူမ၏ စိတ်ထဲ၌ ဘာတွေ တွေးနေသည်ကို လျူစုယင် ကောင်းစွာ သိနေသည် မဟုတ်ပါလော။

"ဟား ဟား... ကျွန်မတောင် မေ့နေတော့မလို့။ နန်းတော်သခင်က သူတို့ကို ဈေးနှုန်းတစ်ခု ပြောခဲ့တာတော့ ရှိတယ်၊ ဒါပေမဲ့ အတိအကျကိုတော့ ကျွန်မ မသိဘူး... သူ့ကိုပဲ တိုက်ရိုက် မေးကြည့်ရမှာပါ"

ချင်းလျန်ယုက ပြုံးလျက် ပြောလိုက်သည်။ ချောင်စွေ့ဖုန်းသည် ဤကုန်းမြေတိုက်ကြီးကို လိုချင်နေသည်မှာ အထင်အရှားပင်။ မကြာသေးမီက ကြယ်တာရာနယ်မြေများတစ်ခွင် လှည့်လည်ကာ ပါရမီရှင်များကို လိုက်လံ စိန်ခေါ်နေသော ချောင်စွေ့ဖုန်း၏ ရည်မှန်းချက်ကြီးမားသော စရိုက်ကို သူမ သိထားသည်။ ထို့ပြင် သူမသည် နိုင်သည်ဖြစ်စေ၊ ရှုံးသည်ဖြစ်စေ ဆုလာဘ်များ ပေးလေ့ရှိသဖြင့် လူတိုင်း တွေ့ချင်နေရသော စိန်ခေါ်မှု နတ်သမီး ဟုပင် ကျော်ကြားနေသူ ဖြစ်သည်။

ချောင်စွေ့ဖုန်းသည် ယွီစွန်းလီကို ဖက်ထားသော ဝေ့ဝူယင်ထံသို့ လှည့်ကြည့်လိုက်သည်။ ထိုနှစ်ဦးမှာ ဝိညာဉ်အာရုံဖြင့် တစ်ဦးနှင့်တစ်ဦး စကားပြောနေကြပုံ ရသည်။ ယွီစွန်းလီ၏ မျက်နှာတွင် အတိုင်းထက်အလွန် စိတ်လှုပ်ရှားမှုနှင့် စိတ်ဝင်စားမှုများ ပေါ်လွင်နေပြီး ဝေ့ဝူယင်၏ မျက်ဝန်းများမှာမူ တစ်စုံတစ်ခုကို နားလည်သဘောပေါက်သွားသယောင် ရှိသည်။ ယွီစွန်းလီသည် ဤပွဲကို အဘယ်ကြောင့် တက်ရောက်ချင်ရသလဲ ဆိုသည်ကို သူ အခုမှ သိလိုက်ရတော့သည်။ ဝေ့ဝူယင်မှာ ချောင်စွေ့ဖုန်း၏ စိုက်ကြည့်နေသော အကြည့်ကို ခံစားမိသဖြင့် သူမကို ပြန်ကြည့်လိုက်သည်။

သူ စိတ်ထဲမှသာ ခါးသီးစွာ ပြုံးလိုက်မိသည်။ မပြည့်စုံသော လောကဝိညာဉ် ၏ တန်ဖိုးကို သူ မသိသည် မဟုတ်ပေ။ အထူးသဖြင့် မြင့်မားသော လမ်းစဉ်ကို ရှာဖွေလိုသည့် ကျင့်ကြံသူများအတွက် ဤသည်မှာ အလွန် အဖိုးတန်လှသည်။ လူတိုင်းသည် သဘာဝအတိုင်း ဥပဒေသမျိုးစေ့ ကို မွေးဖွားနိုင်ခြင်း မရှိသလို၊ အလွန်ရှားပါးသော အမိန့်တော်မျိုးစေ့ ကိုလည်း မတွေ့နိုင်ကြပေ။ သို့မဟုတ် ကောင်းကင်ရှန့်ထို တစ်ဦးထံတွင် အဖိုးအခ ကြီးကြီးမားမားပေးကာ သူတော်စင် အတုအယောင် အမိန့်တော်ကို ခေါ်ယူရန်မှာလည်း မလွယ်ကူလှပေ။ ခေါ်ယူနိုင်ခဲ့လျှင်ပင် ပြည့်စုံစွာ ရရှိဖို့ မလွယ်ကူပါချေ။

အစစ်အမှန် သူတော်စင်၏ အမိန့်တော် သည်သာလျှင် မည်သည့် ကံစမ်းမှုကိုမျှ မလိုအပ်ဘဲ ဥပဒေသမျိုးစေ့ ကို အမြဲတမ်း ဖြစ်ပေါ်စေနိုင်စွမ်း ရှိသည်။

"ဒါပေါ့..."

သူက ချောင်စွေ့ဖုန်းကို ကြည့်ရင်း ညင်သာစွာ ပြောလိုက်၏။ ထိုအခါ ချောင်စွေ့ဖုန်း၏ မျက်နှာတွင် ပြုံးပန်းများ ဝေဆာသွားတော့သည်။ သူမ ဘာမှ ထပ်မပြောတော့ဘဲ ပထမသူရဲကောင်းတိုက်ကြီး ကိုသာ ယုံကြည်မှုအပြည့်ရှိသော မျက်ဝန်းများဖြင့် ကြည့်နေတော့သည်။

ချင်းလျန်ယုမှာမူ ထိုသူတို့၏ အပြန်အလှန် စကားကို နားမလည်နိုင်သော်လည်း သိပ်ပြီး ဂရုမစိုက်မိပေ။ သို့သော်လည်း ချောင်စွေ့ဖုန်းအနေဖြင့် စိတ်ပျက်စွာဖြင့်သာ ပြန်သွားရလိမ့်မည်ဟု သူမ ကြိုတင် ခန့်မှန်းထားမိသည်။

မကြာမီမှာပင် သူတို့သည် ကုန်းမြေတိုက်ကြီးအနီးရှိ ဆိပ်ကမ်း စခန်းသို့ ရောက်ရှိလာကြသည်။ ထိုနေရာတွင် ဟင်းလင်းပြင်သင်္ဘော အတော်များများ ရှိနေပြီး အများစုမှာ အရွယ်အစား သေးငယ်သော်လည်း အရည်အသွေး ကောင်းမွန်ကာ တာဝေး ခရီးသွားရန်အတွက် အသုံးပြုကြသည့် ဟင်းလင်းပြင် သင်္ဘော များ ဖြစ်ကြသည်။ အစွမ်းကုန် သန့်စင်ခြင်း ဂလက်ဆီ မှာ အဆင့်မြင့်ပြီး ကျင့်ကြံသူများ များပြားလှသော်လည်း၊ ကြယ်တာရာ နယ်မြေများကြားရှိ အမှောင် ဟင်းလင်းပြင် မှာမူ အလွန်ပင် အန္တရာယ် များလှပေသည်။ မူလ တရားသူကြီးများပင်လျှင် ဂလက်ဆီဇုံများ သို့မဟုတ် ကြယ်တာရာ နယ်မြေများကြားရှိ ဗလာနယ်မြေများကို ပေါ့ပေါ့ဆဆ ဖြတ်သန်းသွားလာခြင်း မပြုကြပေ။

အီလီစီယမ် အသေးမှာ ဆိပ်ကမ်း၌ ကျွမ်းကျင်စွာ ဆိုက်ကပ်လိုက်သည်။ ပထမသူရဲကောင်းတိုက်ကြီး ၏ လေထုမှာ အလွန်ပင် သန့်စင်ကာ သိပ်သည်းလှပြီး အဆင့်မြင့် ကြယ်တာရာ အမတေများနှင့် လျှို့ဝှက်အမတေများဖြင့် ကြွယ်ဝနေသည်။ ဤနေရာသည် သူရဲကောင်းတာအို နန်းတော် ၏ အထက်တန်းလွှာများအတွက် အဓိက ကျင့်ကြံရာနှင့် နေထိုင်ရာ ဖြစ်နေခြင်းမှာ အံ့ဩစရာ မဟုတ်တော့ပေ။

"ကြွပါရှင်..."

ချင်းလျန်ယုက အဖွဲ့သားများကို သင်္ဘောပေါ်မှ ဆင်းရန် ဖိတ်ခေါ်လိုက်သည်။

"..."

ထိုအချိန်တွင် အီမန်တက်က မျက်မှောင်ကြုတ်လိုက်မိသည်။ နတ်ပရီနှင့် နက်ပစ်တို့ပင်လျှင် ဤအခြေအနေမှာ အလွန်ပင် မသင့်တော်ဟု ခံစားမိကြသည်။

ဝေ့ဝူယင်တို့နှင့် ယခင်က မဆုံဖူးလျှင်ပင် ဧည့်သည်များ ဆိုက်ကပ်ချိန်တွင် အိမ်ရှင်ဖြစ်သော နန်းတော်သခင် ကိုယ်တိုင် ရှိနေသင့်သည် မဟုတ်ပါလော။ ယခုမူ ဝေ့ဝူယင်ကဲ့သို့ ထင်ရှားသော လောကရှန့်ထို အဂ္ဂိရတ်ပညာရှင် တစ်ဦးကို သာမန် ဧည့်သည်တစ်ဦးကဲ့သို့ ဆက်ဆံနေခြင်းမှာ ရိုင်းပျရာ ရောက်နေသည်။ ဒု-နန်းတော်သခင်ကိုယ်တိုင် လာရောက် လမ်းပြသည် ဆိုသော်လည်း သူတော်စင်လေးပါး ပါဝင်သော အဖွဲ့အတွက်မူ ဤသည်မှာ မလုံလောက်သော ဆက်ဆံရေးပင် ဖြစ်သည်။

အနည်းဆုံးတော့ နန်းတော်သခင်ရှန့်အနေဖြင့် သူ၏ ကိုယ်ပွား တစ်ခုကို စေလွှတ်ကာ အကြောင်းပြချက် တစ်ခုခုပေး၍ တောင်းပန်သင့်သည် မဟုတ်ပါလော။

အီမန်တက်၏ အော်ရာထဲတွင် မကျေနပ်မှုများ ပြည့်နှက်နေသည်။ ဤသည်မှာ လော့နင်အပေါ်ကိုလည်း သွယ်ဝိုက်သောနည်းဖြင့် စော်ကားရာ ရောက်နေသည်။ နန်းတော်သခင် ကိုယ်တိုင် လာရောက် ကြိုဆိုရန် သူတို့တွင် အရည်အချင်း မရှိသယောင် ပြုမူနေခြင်းကို သူမ ဒေါသ မထိန်းနိုင်အောင် ဖြစ်နေရသည်။ ဝေ့ဝူယင်ကတော့ ယွီစွန်းလီ၊ ချင်ချူးမူတို့နှင့် အာရုံများနေပြီး ပြဿနာ မရှာချင်သည့်ပုံ ပေါက်နေသည်။ သို့မဟုတ်လျှင် အီမန်တက် တစ်ခုခု လုပ်မိသည်မှာ ကြာလှပြီ ဖြစ်သည်။

ဟူး... ဟူး...

ဂလက်ဆီတစ်ခုလုံးကို ပြောင်းပြန်လှန်ပစ်နိုင်လောက်သော အရှိန်အဝါများမှာ ဟင်းလင်းပြင်၌ လှုပ်ခတ်သွားတော့သည်။

"နန်းတော်သခင်က ဘယ်မှာလဲ..."

လော့နင်က အေးစက်တည်ငြိမ်သော လေသံဖြင့် မေးလိုက်သည်။ သူမပင်လျှင် စိတ်လှုပ်ရှားမှုကို မဖုံးကွယ်နိုင်တော့ပေ။ အဘယ်ကြောင့်ဆိုသော် ဤသည်မှာ ဝေ့ဝူယင်ကို အဘက်ဘက်မှ စော်ကားလိုက်ခြင်း ဖြစ်သောကြောင့်ပင်။

ချင်းလျန်ယုသည် ထိုအေးစက်သော လေသံကို ကြားလိုက်ရသော်လည်း ကြိုတင်ပြင်ဆင်ထားပုံရကာ တည်ငြိမ်စွာပင် ပြန်ဖြေလိုက်၏။

"နန်းတော်သခင်ကတော့ ကျွန်မတို့ နန်းတော်ရဲ့ သူတော်စင်ကြီး သုံးပါး ပြန်လည်ရောက်ရှိလာတာကြောင့် သူတို့နဲ့အတူ အတိတ်ဟောင်းတွေကို တမ်းတရင်း အချိန်ကုန်နေပုံရပါတယ်..."

"..."

အီမန်တက်၏ မျက်ဝန်းများမှာ အန္တရာယ်ရှိစွာ ကျဉ်းမြောင်းသွားသည်။

လော့နင်ကမူ မည်သည့်ခံစားချက်မျှ မပါသော လေသံဖြင့် ပြန်ပြောလိုက်၏။

"နားလည်ပြီ"

သူမ၏ အမြင်တွင်မူ ဤနန်းတော်သခင်ရှန့်လျိုသည် သူမထံမှ မည်သည့်အရာကိုမျှ ရရှိရန် အရည်အချင်း မရှိတော့ပေ။ လော့နင်က ဝေ့ဝူယင်ဘက်ကို လှည့်ကြည့်လိုက်၏။ ထို့နောက် ပွင့်လင်းစွာပင်...

"အရှင်မင်းကြီး နန်းတော်သခင်ရှန့်အတွက် တွေ့ဆုံခြင်း လက်ဆောင်တစ်ခု ပြင်ဆင်ထားတယ် မဟုတ်လား... ဒါက တကယ့်ကို ကံဆိုးတာပဲ... အဲဒီလက်ဆောင်ကို ကျွန်မကို ပေးလို့ရမလား အရှင်... သူ့အတွက် ပေးရမယ့် လက်ဆောင်ကို ကျွန်မတို့အားလုံးရဲ့ ကိုယ်စား ကျွန်မပဲ ပေးလိုက်ပါ့မယ်..."

"ဟင်..."

ချင်းလျန်ယုမှာ ချက်ချင်းပင် သတိနိုးကြားသွားသည်။ တွေ့ဆုံခြင်း လက်ဆောင် ဆိုသည်မှာ မွေးနေ့လက်ဆောင် သို့မဟုတ် မင်္ဂလာလက်ဆောင်များနှင့် မတူညီဘဲ အိမ်ရှင်ကို တံခါးဝတွင်ဖြစ်စေ၊ ပထမဦးဆုံး တွေ့ဆုံချိန်တွင်ဖြစ်စေ ပေးလေ့ရှိသော အရာဖြစ်သည်။ ဤသည်မှာ ဖိတ်ကြားခံရသော ဧည့်သည်တစ်ဦးအနေဖြင့် အိမ်ရှင်အပေါ် ထားရှိသော လေးစားမှုနှင့် ကျေးဇူးတင်မှုကို ဖော်ပြခြင်းပင် ဖြစ်သည်။ ပုံမှန်အားဖြင့် ချင်းလျန်ယုသည် နန်းတော်သခင်ကိုယ်စား လက်ဆောင်များကို လက်ခံလေ့ရှိသော်လည်း နန်းတော်သခင်နှင့် လူကိုယ်တိုင် တွေ့ဆုံမည့်သူများမှာမူ ကိုယ်တိုင် ပေးလေ့ရှိကြသည်။

ဝေ့ဝူယင်သည် စိတ်ထဲမှ တဟားဟား ရယ်မောလိုက်မိသည်။ ဤမာနကြီးသော အမျိုးသမီးများမှာ တကယ့်ကို အံ့ဩစရာပင်။ တစ်ချက်တစ်ချက်တွင် ကလဲ့စားချေတတ်ကြသေးသည်။

"ရတာပေါ့... အဆင့်မြင့် အရည်အသွေးရှိတဲ့ အထွတ်အထိပ် လျှို့ဝှက်လောကအဆင့် ထုတ်ကုန် အချို့ပဲကို... မင်း စိတ်ကြိုက်သာ လုပ်ပါ" ဝေ့

ဝူယင်သည် ဓားများ၊ ဒိုင်းလွှားများနှင့် ချပ်ဝတ်တန်ဆာ ပုံသဏ္ဌာန်များ ထွင်းထုထားသော ငွေရောင်သေတ္တာတစ်လုံးကို ထုတ်ယူလိုက်သည်။ ၎င်းကို စစ်အမတေ ဖြင့် ဖန်တီးထား၏။ ၎င်းမျာ အထွတ်အထိပ်အဆင့် လျှို့ဝှက်လောက ကိရိယာတစ်ခုနှင့် အဆင့်ချင်း တူညီပေသည်။

ဝေ့ဝူယင် ထိုသေတ္တာကို လော့နင်ထံသို့ ပေါ့ပေါ့ပါးပါးပင် ပစ်ပေးလိုက်သည်။ လော့နင်၏ မျက်ဝန်းများမှာ တောက်ပသွားပြီး သူမ၏ ဝိညာဉ်အာရုံဖြင့် အတွင်းပိုင်းကို စစ်ဆေးကြည့်လိုက်သည်။

"အို... သူတော်စင် နိုးထခြင်း ဆေးရည် ပါလား... အရှင်မင်းကြီးကတော့ တကယ်ကို ရက်ရောလွန်းပါတယ်..."

လော့နင်၏ အပြုံးမှာ ဆွဲဆောင်မှုရှိသလို တစ်ချိန်တည်းမှာပင် ရက်စက်ကြမ်းကြုတ်လှပေသည်။ ချင်းလျန်ယု၏ မျက်နှာမှာမူ ရုတ်ခြည်းပင် ပျက်ယွင်းသွားတော့သည်။

သူတော်စင် နိုးထခြင်းဆေးရည် ဆိုသည်မှာ အထွတ်အထိပ် လျှို့ဝှက်လောကအဆင့် ထုတ်ကုန်ဖြစ်ပြီး တွက်ချက်၍မရနိုင်အောင် အဖိုးတန်လှပေသည်။ ၎င်းသည် လျှို့ဝှက်အရှင် များက ရရှိရန်အတွက် လူပင်သတ်ဝံ့ကြသည့် အဆင့်တက် အထောက်အကူပြု ပစ္စည်းတစ်ခုပင်။

၎င်း၏ အဓိက အာနိသင်မှာ ကျင့်ကြံသူများကို သီးခြားစွမ်းအင်တစ်မျိုးကို စုပ်ယူနိုင်ရန် ကူညီပေးသည့် လောကအလင်း ရောင်ပြန်ခြင်း ဆေးရည် နှင့် ဆင်တူသည်။ အစစ်အမှန် သူတော်စင် များအနေဖြင့် သူတော်စင်၏ အစစ်အမှန်သက်ရှူသံ တစ်စကို စုပ်ယူကာ ပေါင်းစပ်ရန် လိုအပ်ပြီး၊ ထိုအစကို အရည်အသွေး မြင့်မားစွာ ရရှိလေလေ သူတို့၏ အဋ္ဌမအကြိမ်မြောက် ခြေချခြင်းတွင် အောင်မြင်ရန် အခွင့်အလမ်း ပိုများလေလေ ဖြစ်သည်။

သူတော်စင်တစ်ဦး၏ ခန္ဓာကိုယ် တည်ဆောက်ပုံမှာ အခြေခံအားဖြင့် ကွဲပြားလှသည်။ သူတို့သည် လျှို့ဝှက်တာအိုနှင့် ပဲ့တင်ထပ်မှု အနည်းငယ် ရှိလာကာ ကောင်းကင်ဘုံနှင့်လည်း အလွန်ပါးလျသော ဆက်သွယ်မှုကို တည်ဆောက်နိုင်ကြသည်။ ဤ သူတော်စင်၏ အစစ်အမှန်သက်ရှူသံ ဆိုသည်မှာ အထွတ်အထိပ်အဆင့် အမတေများထက်ပင် သာလွန်သော လျှို့ဝှက်အမတေ၏ အမြင့်ဆုံး အသွင်သဏ္ဌာန်ဖြစ်ပြီး ကျင့်ကြံရန်မှာမူ အလွန်ပင် ခက်ခဲလှပေသည်။ ထိုအရာကို ပိုင်ဆိုင်ပြီး ၎င်း၏ ဂုဏ်သတ္တိများကို နားလည်နိုင်မှသာလျှင် စိတ်ချလက်ချ အဆင့်တက်နိုင်မည် ဖြစ်သည်။

နန်းတော်သခင်ရှန့်လျို အပါအဝင် မရေမတွက်နိုင်သော လျှို့ဝှက်အရှင် များသည် အဆင့်နိမ့် အရည်အသွေးရှိသော သူတော်စင်၏ သက်ရှူသံ တစ်စကိုပင် ပေါင်းစပ်နိုင်ရန် ကျရှုံးခဲ့ကြရသည်။ ဤသည်မှာ တကယ်ကို ခက်ခဲလွန်းလှသည် မဟုတ်ပါလော။

အီမန်တက်သည် လော့နင်၏ စကားကို ကြားသောအခါ မျက်လုံးများ တောက်ပသွား၏။ သူတို့၏ ထူးခြားသော ကျင့်စဉ်များက သူတို့ကို သူတော်စင်၏ အစစ်အမှန်သက်ရှူသံ တစ်ခုကို ပူးပေါင်း ဖန်တီးနိုင်ရန် အထောက်အကူပြုသော်လည်း၊ ၎င်းမှာ အကြိမ်ကြိမ် ကျရှုံးခဲ့ရသော အလွန်အန္တရာယ်များသည့် ကြိုးပမ်းမှု ဖြစ်ခဲ့ရသည်။ တစ်ချိန်တည်းမှာပင် နတ်ပရီသည် နက်ပစ်ကို သူမ၏ ကိုယ်ပိုင်သက်ရှူသံ ပေါင်းစပ်နိုင်ရန် ကူညီပေးခဲ့စဉ်က သူ၏ အခြေခံအုတ်မြစ်ကို ကာလရှည်ကြာ ထိခိုက်စေခဲ့သည့် သံဝါသ ကျင့်စဉ်များကို အသုံးပြုခဲ့ရသည်။

ဤသည်မှာ လိုအပ်ချက်များထဲမှ တစ်ခုသာ ဖြစ်သော်လည်း အခက်ခဲဆုံးသော အရာပင် ဖြစ်သည်။

မသန့်စင်ခြင်း အရည်အသွေးရှိသော သူတော်စင် နိုးထခြင်းဆေးရည် တစ်ခုတည်း၏ တန်ဖိုးမှာပင် လျှို့ဝှက်လောက အမတေကျောက်တုံး ၁.၈ သန်းခန့် ရှိသည်။ ၎င်းသည် အထွတ်အထိပ် လျှို့ဝှက်လောကအဆင့် ပစ္စည်းဖြစ်ပြီး ထင်ရှားသော လောကရှန့်ထို အဂ္ဂိရတ်ပညာရှင် များပင်လျှင် ဤဆေးရည်၏ အသုံးဝင်သော အစိတ်အပိုင်းတစ်ခုကို ဖော်စပ်ရန် ခက်ခဲလှရာ၊ အဆင့်နိမ့် အရည်အသွေးသို့ ရောက်ရန်မှာ ပို၍ပင် မဖြစ်နိုင်ပေ။ ဤဆေးလုံးသည် အစစ်အမှန် သူတော်စင် တစ်ဦးကို ဖန်တီးပေးနိုင်စွမ်း ရှိပေသည်။

၎င်းမှာ နာမည် အတိုင်းပင် သူတော်စင် တစ်ဦးကို မွေးဖွားပေးနိုင်စွမ်း ရှိပေသည်။

***