အခန်း (၂၂၃၉-၂၂၄၀)

အပိုင်း(၂၂၃၉)

ဝေ့ဝူယင်က ကုတင်အစွန်းသို့ တိုးထိုင်လိုက်သည်။ ပဲ့တင်ထပ် ချီနှင့် ပတ်သက်၍ အပြင်းအထန် စိတ်ပိုင်းဆိုင်ရာ ကျင့်ကြံထားရသဖြင့် သူ၏ မျက်ဝန်းများမှာ အနည်းငယ် ပင်ပန်းနွမ်းနယ်နေပုံ ပေါ်သည်။ သူ၏ အတွေးများမှာ ရိုးရှင်းလှသည်ဟု ထင်ရသော်လည်း၊ အမှန်စစ်စစ်တွင်မူ အင်မတန် ရှုပ်ထွေးနက်နဲလှသည်။

ဝေ့ရှောင်ထျန်းသည် ကောင်းကင်ဘုံ၏ အစိတ်အပိုင်းတစ်ခု ဖြစ်သလို၊ ကောင်းကင်ဘုံ၏ ပင်ကိုယ်အသိများ၊ လောကအမြင်များနှင့် မဟာတာအိုများအပေါ် နားလည်မှုများကို သိမ်းဆည်းထားသော ပန်းသီး တစ်လုံးလည်း ဖြစ်သည်။ ပုံမှန်အားဖြင့်ဆိုလျှင် ဝေ့ဝူယင်သည် ကျင့်ကြံခြင်း လောက၌ ကောင်းကင်ဘုံကို ဖီဆန်နိုင်သော ကြီးမားသော အားသာချက်များကို ရရှိထားပြီး ဖြစ်ရမည်။

သို့သော်လည်း...

သူမ၏ ကျင့်ကြံခြင်းမှာ နိမ့်ပါးလွန်းနေသေးသည်။

ဝေ့ရှောင်ထျန်းသည် သူ၏ စိတ်ကို ဖတ်နိုင်ပုံရပြီး သူမ၏ မျက်ဝန်းများမှာ အနည်းငယ် မှေးမှိန်သွားသည်။ သူမ၏ အပြုံးများမှာ တဖြည်းဖြည်း ပျောက်ကွယ်သွားပြီး၊ ဝေ့ဝူယင်၏ ဘေးတွင် လာထိုင်သည်။ ရှေ့သို့ စိုက်ကြည့်နေသော မျက်ဝန်းများနှင့်အတူ မွေးကင်းစကလေးငယ် တစ်ဦး၏ ပထမဆုံး အသက်ရှူသံကဲ့သို့ သဘာဝကျလှသော ကောင်းကင်ရနံ့များမှာ လေထုထဲတွင် ပျံ့လွင့်နေသည်။ သူမက တည်ငြိမ်စွာဖြင့် မေးလိုက်၏။

"ရှင်... အဲဒီလို လုပ်ချင်လို့လား"

“တော်ပါကွာ...”

ဝေ့ဝူယင်က မျက်လုံးများကို မှိတ်လိုက်၏။

"..."

ဝေ့ရှောင်ထျန်းက ကုတင်ပေါ်တွင် လဲလျောင်းလိုက်ကာ မျက်နှာကျက်ကို စိုက်ကြည့်နေမိသည်။ အခန်းထဲရှိ လေထုမှာ အနည်းငယ် မှိုင်းညို့သွားသည်။ အကယ်၍ ဝေ့ဝူယင်သာ ဆုံးဖြတ်လိုက်ပါက သူမ၏ ပင်ကိုယ်စွမ်းရည် အများစုကို သူ ရယူနိုင်သည်။ ၎င်းမှာ အင်မတန် လွယ်ကူလှသည်။ သူ လုပ်ရမည်မှာ သူမကို ကုတင်ပေါ်တွင် ဖိနှိပ်ကာ၊ အဝတ်အစားများကို ဖယ်ရှားပြီး သူမ၏ ပြည့်စုံလှသော ခန္ဓာကိုယ်ကို စိတ်တိုင်းကျ သိမ်းပိုက်လိုက်ရုံသာ ဖြစ်သည်။ ဤသည်မှာ အားစိုက်စရာပင် မလိုသော ကိစ္စဖြစ်သည်။

ဝေ့ဝူယင် တစ်ယောက် စိတ်ဆန္ဒ အလိုသို့ လိုက်ပါခြင်း မရှိသည်ကို မြင်လိုက်ရသောအခါ၊ သူမ၏ လှပသော နှုတ်ခမ်းအစုံတွင် အပြုံးငယ်လေး တစ်ခု ပေါ်လာသည်။ သူမသည် ဘေးစောင်းလဲလျောင်းကာ၊ သူမ၏ အသိဉာဏ် နယ်ပယ်ထက် ကျော်လွန်နေသော ဤကောင်းကင်ဖီဆန်သည့် အမျိုးသား၏ ဘေးတိုက်ပုံရိပ်ကို ငေးကြည့်နေမိသည်။ သူမတွင် လောကနှင့် ကောင်းကင်ဘုံဆိုင်ရာ အသိအမြင်များ ရှိကောင်းရှိနိုင်သော်လည်း၊ သူမ၏ ရှေ့မှ ဤအမျိုးသားနှင့် ပတ်သက်လာလျှင်မူ မည်သို့မျှ ခန့်မှန်း၍ မရနိုင်လောက်အောင်ပင် ဖြစ်သည်။

သူသည် ထူးခြားလွန်းလှသည်။

သူမအနေဖြင့် သူ့ကို ကူညီနိုင်မည်ဟု ထင်ရသော်လည်း၊ သူ၏ လမ်းစဉ်မှာ သတ်မှတ်ထားသော လမ်းကြောင်းမှန်သမျှမှ သိသိသာသာ သွေဖည်နေသည်။ သူမအနေဖြင့် အချို့သော ကိစ္စရပ်များတွင်သာ အနည်းငယ် ကူညီပေးနိုင်သည်။ အထူးသဖြင့် သူမသည် သက်ရှိထင်ရှား သတ္တဝါတစ်ဦးအဖြစ် ကျင့်ကြံနေခြင်းကြောင့်လည်း ဖြစ်သည်။ ဤသည်မှာ ဝေ့ဝူယင်က ကြီးမားသော အကျိုးအမြတ်များကို စွန့်လွှတ်ကာ သူမကို ပေးသနားခဲ့သော အသက် ဖြစ်သည်။ ထိုကဲ့သို့သော ရွေးချယ်မှုကို လုပ်မည့်သူမှာ အင်မတန် ရှားပါးလှသည်။

သူမ ယခု ပိုင်ဆိုင်ထားသော အသိဉာဏ်အရ... မွေးဖွားပြီးခါစ အချိန်... သူမ၏ အသက်ရှင်သန်မှုအတွက် လူငယ်၏ အသက်ဓာတ်ကို စုပ်ယူရန် ကြိုးပမ်းခဲ့သော သူမ၏ ယခင်အစီအစဉ်များမှာ မလွဲမသွေ ကျရှုံးသွားမည်ကို သိရှိထားသည်။

သူမ သေဆုံးသွားပေလိမ့်မည်။

သူမသည် လုယက်ဖျက်ဆီးခြင်း ခံရပေလိမ့်မည်။

ဝေ့ဝူယင်ကလည်း ထိုအချက်ကို သိထားပြီး ဖြစ်သည်။

"ကျွန်မ ဘာများ ကူညီပေးရမလဲ..."

သူမ၏ အသံမှာ ထောပတ်ကဲ့သို့ ချောမွေ့နူးညံ့နေပြီး အင်မတန် စိတ်အားထက်သန်နေပုံရသည်။ သူမသည် သူ့ကို အမှန်တကယ် ကူညီချင်နေသော်လည်း၊ ဝေ့ဝူယင်ကမူ သူမအား အတင်းအဓမ္မ ရယူရန် ငြင်းဆန်ခဲ့သည်။ အကောင်းဆုံး အခြေအနေတွင် သူမအား သာမန်အမျိုးသမီးတစ်ဦး ဖြစ်လာစေရန်သာ သူ ရည်ရွယ်ခဲ့သည်။ အဆိုးဆုံး အခြေအနေမှာမူ သူမအား ထာဝရ ဖျက်ဆီးပစ်လိုက်ခြင်းပင် ဖြစ်ပေလိမ့်မည်။

"..."

ဝေ့ဝူယင်မှာ အတော်ကြာအောင် တိတ်ဆိတ်နေပြီးမှ သက်ပြင်းတစ်ချက်ကို ဝဝလင်လင် ချလိုက်သည်။ ထို့နောက် မျက်လုံးများကို ဖွင့်လိုက်ရာ သူ၏ မျက်ဝန်းများတွင် ကြယ်တာရာ အလင်းတန်းများအစား ပုံမှန် ငွေရောင်အဆင်းများသာ လွှမ်းခြုံနေတော့သည်။

"မင်းရဲ့ ကျင့်ကြံခြင်းရော ဘယ်လိုလဲ... မင်းရဲ့ ခရီးစဉ်တွေမှာ စိတ်ဝင်စားစရာ ဘာတွေ တွေ့ခဲ့သေးလဲ"

ဝေ့ရှောင်ထျန်း၏ မျက်ဝန်းများမှာ ချက်ချင်းဆိုသလို တောက်ပသွားသည်။ သူမက စိတ်လှုပ်ရှားစွာဖြင့် မကြာသေးမီက စွန့်စားခန်းများအကြောင်းကို တတွတ်တွတ် ပြောပြလေတော့သည်။ အထူးသဖြင့် တိုးတက်လာသော ကျင့်ကြံခြင်း အတွေ့အကြုံများနှင့် ထိုခံစားချက်မှာ ထပ်ခါတလဲလဲ ပြန်လည်မွေးဖွားလာရသကဲ့သို့ မည်မျှအထိ စွဲလမ်းစရာကောင်းကြောင်းကို ဖောက်သည်ချနေတော့သည်။

သူမသည် သူတစ်ပါး၏ ပေးကမ်းမှုကို အလကားမယူဘဲ မိမိဘာသာ ရုန်းကန်သည့် မာနရှိသော သူတောင်းစားတစ်ဦးအကြောင်းကို ပြောပြသည်။ ထိုသူတောင်းစားသည် သူ၏ နောက်ဆုံးသော ဒင်္ဂါးပြားလေးကိုပင် ကလေးငယ်တစ်ဦးအား ကူညီရန်အတွက် ရက်ရက်ရောရော ပေးလှူခဲ့သူ ဖြစ်သည်။

ထို့နောက် အမျိုးသားနှစ်ဦးကို တစ်ဦးနှင့်တစ်ဦး သတ်ဖြတ်စေရန် မြှောက်ပင့်ပေးခဲ့သော ဖောက်ပြန်သည့် အမျိုးသမီးငယ်တစ်ဦးအကြောင်းကိုလည်း ပြောပြသည်။ နောက်ဆုံးတွင် အမျိုးသားနှစ်ဦးက သူမ၏ ကောက်ကျစ်မှုကို သိရှိသွားကြပြီး နှိပ်စက်ခဲ့သဖြင့် သူမမှာ ငိုယိုတောင်းပန်ရင်း အသည်းယားဖွယ် သေဆုံးသွားခဲ့ရသည်။

ထို့ပြင် မိသားစု၏ လျစ်လျူရှုခြင်းကို ခံခဲ့ရသော ပါရမီရှင် လူငယ်တစ်ဦးအကြောင်းကိုလည်း ပြောပြသေးသည်။ ထိုလူငယ်၏ ငယ်ချစ်ဦးမှာ ပိုမိုကောင်းမွန်သော အနာဂတ်အတွက် စေ့စပ်မှုကို ဖျက်သိမ်းသွားခဲ့သည်။ ကံကောင်းသော တွေ့ဆုံမှုတစ်ခုနှင့် ကြုံရပြီးနောက်တွင်မူ သူ၏ စိတ်ဓာတ်များမှာ လုံးဝ ပြောင်းလဲ သွားခဲ့သည်။

သူသည် စွမ်းအားအတွက်ဆိုလျှင် သွေးချောင်းစီး သတ်ဖြတ်မှုများကိုပင် လုပ်ဆောင်ရန် ဝန်မလေးတော့ချေ။ သို့သော်လည်း... ထိုလူငယ်မှာ နောက်ဆုံးတွင် အနီးအနား၌ ငါးမျှားနေသော လူကြီးတစ်ဦး၏ သတ်ဖြတ်ခြင်းကို ခံလိုက်ရသည်။ သူ သေဆုံးချိန်တွင် မျက်ဝန်းများ၌ မကျေနပ်မှုများ ပြည့်နှက်နေပြီး ကောင်းကင်ဘုံမှာ မျက်နှာလိုက်သည်ဟု ကျိန်ဆဲရင်း ရင်နင့်ဖွယ် သေဆုံးသွားခဲ့ရသည်။

ထိုလူငယ်သည် အမှန်စစ်စစ်တွင် ကောင်းကင်တာအို၏ စောင့်ရှောက်မှုကို ရရှိထားသူ ဖြစ်သော်လည်း သူ၏ ရှေ့မှ အခွင့်အရေးများကို အရယူရန် ပျက်ကွက်ခဲ့ခြင်း ဖြစ်ကြောင်းကိုမူ သူမ တစ်ဦးတည်းသာ သိရှိထားသည်။

ဤဖြစ်ရပ်အားလုံးမှာ ကမ္ဘာအသီးသီးတွင် ဖြစ်ပျက်နေခြင်း ဖြစ်သည်။ အချို့မှာ အစွမ်းထက်သော အင်အားစုများက ရည်ရွယ်ချက်ရှိရှိ အရှိန်မြှင့်တင်ပေးထားခြင်း ဖြစ်ပြီး၊ လျှို့ဝှက်အရှင်များ၏ ကစားပွဲများအတွက် ကပြနေရသော စင်မြင့်များသဖွယ် ဖြစ်နေသည်။ ဝေ့ရှောင်ထျန်းမှာမူ ဝေ့ဝူယင် ပေးထားသော ကိရိယာများကို အသုံးပြု၍ ထိုနေရာများသို့ စိမ့်ဝင်ခဲ့ခြင်း ဖြစ်သည်။

ဝေ့ဝူယင်သည် နားထောင်ရုံသာ နားထောင်နေသည်မဟုတ်ဘဲ သူ၏ မကြာသေးမီက စွန့်စားခန်းများကိုလည်း ပြန်လည်ပြောပြခဲ့သည်။ အထွတ်အထိပ် ပုဂ္ဂိုလ်ကြီးများနှင့် ရင်ဆိုင်ခဲ့ရပုံများနှင့် သူ၏ ရှေ့မှောက်တွင် သူတော်စင်များ အသက်လုတိုက်ပွဲဝင်ခဲ့ကြပုံများကို နားထောင်ရင်း သူမမှာ အတိုင်းထက်အလွန် စိတ်လှုပ်ရှားနေလေသည်။

"အဲဒါ ဘာကြောင့်လဲဆိုတာကိုရော ရှင် သိပြီလား..."

သူမ၏ စိတ်ဝင်စားမှုမှာ ဆယ်ဆမက မြင့်တက်လာသည်။

"သိတော့မှာပါ..."

ဝေ့ဝူယင်က နောက်ပြောင်သလို ပြုံးလိုက်သည်။ ဤသည်မှာ သူမ၏ သိချင်စိတ်ကို ပိုမိုလှုံ့ဆော်ပေးလိုက်သကဲ့သို့ ဖြစ်သွားသည်။ သူတော်စင် လတက်သည် အဘယ်ကြောင့် လုပ်ကြံခံရသနည်း။ ထိုပဲ့တင်ထပ် ချီအဆောင်မှာ မည်သည့်နေရာမှ ရောက်လာသနည်း။ ဤပရိယာယ်များနောက်ကွယ်တွင် မည်သူတွေ ပါဝင်နေသနည်း။ မူလတရားသူကြီး အဆင့်ဖြင့် သူတော်စင်များကို သတ်နိုင်သော ထိုဝတ်စုံဖြူဝတ် ဓားသမားမှာ မည်သူနည်း။ ရှန်းဝမ်ချင်းက ဝေ့ဝူယင်၏ မယားငယ်ဖြစ်ချင်သည်မှာ အမှန်တရားလော၊ သို့မဟုတ် မျှော်လင့်ချက်မဲ့နေသော ရှန့်လျိုက လုပ်ကြံဖန်တီးထားခြင်းလော။ သူမနှင့် ထိုဝတ်စုံဖြူဝတ် ဓားသမား၏ ပတ်သက်မှုက အဘယ်နည်း။ ခန္ဓာကိုယ်တစ်ခုတည်းတွင် ဝိညာဉ်အော်ရာ သုံးမျိုး ဖြစ်ပေါ်နေခြင်းမှာရော ဘာကြောင့်နည်း။

ဝေ့ရှောင်ထျန်းတွင် သူမကိုယ်ပိုင် ခန့်မှန်းချက်များ ရှိသော်လည်း ထူးဆန်းသော ဖြစ်ရပ်များကြားမှ အမှန်တရားကို ရှာဖွေနိုင်ရန်အတွက် သေချာစွာ စစ်ဆေးကြည့်ဖို့ လိုအပ်နေသေးသည်။

"အဲဒါကြောင့်ပဲ ရှင့်ဆီကို ကျွန်မကို ခေါ်လိုက်တာပေါ့... ကျွန်မကတော့ ဒီနေ့ဟာ အပျိုစင်ဘဝရဲ့ နောက်ဆုံးနေ့ ဖြစ်တော့မယ်လို့ ထင်နေတာ"

ဝေ့ဝူယင်က ရယ်မောရင်း ခေါင်းခါလိုက်သည်။ သူသည်လည်း ထိုသို့ လုပ်ဆောင်ရန် စိတ်မကစားခဲ့သည်တော့ မဟုတ်ပေ။

"မလုပ်သေးဘူးလား..."

ဝေ့ရှောင်ထျန်းက ဆွဲဆောင်မှုရှိသော အပြုံးဖြင့် ကျီစယ်လိုက်ပြန်သည်။ သာမန်အမျိုးသားတစ်ဦးဆိုလျှင် ထိုညို့ယူဖမ်းစားနိုင်သော အပြုံးရှေ့တွင် ချက်ချင်းပင် စိတ်ရိုင်းများ ဝင်လာနိုင်သော်လည်း၊ ဝေ့ဝူယင်ကမူ သူ၏ ကာမစိတ်ကို အပြည့်အဝ ထိန်းချုပ်ထားနိုင်သည်။ သူသည် မိမိ၏ ကတိကို မည်သည့်အခါမျှ ဖောက်ဖျက်မည်မဟုတ်ပေ။ ဤသည်မှာ သူ၏ မာနနှင့် ဆိုင်သော ကိစ္စဖြစ်သည်။

သို့သော် သူသည် တစ်ဖက်သတ် အစခံရသည်ကို ငြိမ်ခံမနေပါချေ။

"အခုတော့ မဟုတ်သေးဘူး... ဘယ်အချိန်လဲဆိုတာ ငါ မင်းကို သေချာပေါက် ပြောပြမှာပါ"

ဝေ့ရှောင်ထျန်း၏ မျက်နှာလေးမှာ ရှက်သွေးဖြာသွားသည်။

"ချွင်ဆွေဟွကျိ ခန္ဓာကိုယ် သုံးခုကို ပိုင်ဆိုင်ထားတဲ့သူကများ ပြောနေရသေးတယ်... သူတို့နဲ့တင် ရှင် အလုပ်ရှုပ်နေမှာပါ... အထူးသဖြင့် သူတို့ ပိုင်ထားတဲ့ တောင်တန်းကြီးတွေနဲ့ပေါ့... ချွင်ဆွေဟွကျိ ခန္ဓာကိုယ်တွေရဲ့ ထူးခြားချက်တွေကတော့ အင်မတန် ထင်ရှားတာပဲ"

ဝေ့ဝူယင်သည် အားရပါးရ ရယ်မောလိုက်သည်။

ချွင်ဆွေဟွကျိ ခန္ဓာကိုယ်...

သူ၏ မျက်ဝန်းများမှာ ထူးဆန်းသော အလင်းတန်းများဖြင့် တောက်ပနေပြီး ထူးကဲသော အရာတစ်ခုကို ရရှိလုနီးနီး ဖြစ်နေပုံရသည်။ သို့သော် ဝေ့ရှောင်ထျန်းကမူ သူ့ကို အလျင်စလို တိုက်တွန်းနေတော့သည်။

"ကဲ... ကြည့်ကြရအောင်... ကျွန်မ အရင်ဆုံး အဲဒီလုပ်ကြံမှု အကြောင်းကို သိချင်တယ်"

"အေးပါ... အေးပါ..."

ဝေ့ဝူယင်မှာ အခွင့်အရေးကောင်းတစ်ခုကို လက်လွတ်လိုက်ရသည်ဟု မခံစားရပေ။ ဝေ့ရှောင်ထျန်းက သူ့ကို အခြားသူများ လျှောက်လှမ်းခဲ့သော မှားယွင်းသည့် လမ်းကြောင်းမှ တစ်ဆင့်စကားဖြင့် မသိမသာ တွန်းထုတ်ပေးခဲ့ခြင်း ဖြစ်သည်။ ထို့ပြင် သူမ၏ နှုတ်ခမ်းဖျားရှိ စိတ်အေးသွားဟန် အပြုံးမှာလည်း ထိုသိမ်မွေ့သော အချက်ကို သူမကိုယ်တိုင် သိရှိနားလည်နေကြောင်း ပြသနေသည်။

"ကဲ... အဲဒီလုပ်ကြံမှုကြီးအကြောင်းကို စပြီး ရှာဖွေကြတာပေါ့"

***

အပိုင်း(၂၂၄၀)

"တကယ့်ကို သေးသိမ်တဲ့သူပဲ... ရက်စက်တဲ့ လူတွေကလည်း အဲဒါကို အခွင့်ကောင်းယူပြီး အသုံးချသွားကြတာ"

ဝေ့ရှောင်ထျန်းက နှုတ်ခမ်းဆူကာ ဟန့်ခနဲ ဆိုလိုက်သည်။ သူမ၏ မကျေနပ်မှုမှာ အတိုင်းသား ပေါ်လွင်နေပြီး ထိုသို့ဖြစ်ရန်လည်း အကြောင်းရင်း ခိုင်လုံလှသည်။ မိုးကုပ်စက်ဝိုင်း သန့်စင်ခြင်း မျှော်စင်၏ စတုတ္ထထပ် မျှော်စင်သခင်၊ မဟာ လောကရှန့်ထို ပြောင်းပြန်အဆိပ် ဟု လူသိများသော ကောင်းဟိန်သည် ငြင်းပယ်ခံလိုက်ရသော ဖိတ်ကြားချက် တစ်ခုအတွက်ကြောင့်နှင့် ယခုကဲ့သို့ ကောက်ကျစ်သော အစီအစဉ်များကို ကျောခိုင်းလုပ်ဆောင်ခဲ့ခြင်း ဖြစ်သည်။

ဝေ့ဝူယင်က ခေါင်းခါလိုက်မိသည်။ ဩဇာအာဏာရှိသော ကျင့်ကြံသူများ၊ ဂလက်ဆီတစ်ခုလုံး၏ ဖြစ်ရပ်များကို လှုပ်ခတ်နိုင်သည့် အဆင့်အတန်းရှိသူများ၏ မာနနှင့် သိက္ခာမှာ အင်မတန်မှပင် ကျိုးပဲ့လွယ်လှသည်။ ကောင်းဟိန်သည် အဘယ်ကြောင့် အခွင့်ကောင်းယူကာ စွေ့ယွမ်အား တမလွန်သို့ ပို့ရန် ကြိုးစားခဲ့သည်ကို သူ အပြည့်အဝ နားလည်သည်။ ထေ့ငေါ့စရာ ကောင်းသည်က ထိုလုပ်ရပ်ကို သူမ၏ ဆရာသခင်ကြီး မွေးနေ့တွင်မှ လုပ်ဆောင်ခဲ့ခြင်းပင် ဖြစ်သည်။

"စွေ့ယွမ်ကလည်း သူ့အပေါ် မလေးမစား လုပ်ခဲ့တာကိုး..."

ဝေ့ရှောင်ထျန်းသည် အခြေအနေ အရပ်ရပ်ကို မမြင်နိုင်လောက်သည် အထိ အသိဉာဏ် မနည်းပါသော်လည်း တွေးမိလေတိုင်း စိတ်ပျက်မိဆဲ ဖြစ်သည်။ အကယ်၍ ထိုသူက သူမအား ချစ်ရေးဆိုရာတွင် အဖန်ဖန် အငြင်းခံရပြီး အစွဲအလမ်းကြီးကာ ဖျက်ဆီးခဲ့ခြင်းမျိုးဆိုလျှင်မူ နားထောင်ရသည်မှာ ပို၍ပင် စိတ်ဝင်စားစရာ ကောင်းသော ပုံပြင်တစ်ပုဒ် ဖြစ်ပေလိမ့်မည်။

ဝေ့ရှောင်ထျန်း၏ အတွေးပုံစံကြောင့် ဝေ့ဝူယင်မှာ ရယ်ရမလို ငိုရမလိုပင် ဖြစ်သွားသည်။ သူတို့နှစ်ဦး၏ ရှေ့၊ ကုတင်ခြေရင်းတွင်မူ စစ်ဝိညာဉ် ပုံစံဖြင့် ဒူးထောက်နေသော လေးသမား လုပ်ကြံသူ ရှိနေသည်။ အသွင်ကူးပြောင်းခြင်းနှင့် ပြောင်းလဲခြင်း ဖြစ်စဉ်များကြောင့် သူ၏ ကျင့်ကြံခြင်း အဆင့်မှာ နိမ့်ကျသွားသော်လည်း၊ သူသည် ဆက်စပ်မှု စစ်အဆောင် အတွင်းရှိ စစ်ဥပဒေသ များဖြင့် အားဖြည့်ထားသော သူတော်စင် တစ်ပါး၏ ပင်ကိုယ်အသိများကိုမူ ပိုင်ဆိုင်ထားဆဲ ဖြစ်သည်။

ထိုလေးသမား လုပ်ကြံသူမှာ အင်မတန် နာခံမှုရှိပြီး သူတို့ သိလိုသမျှကို အကုန်အစင် ပြောပြလေသည်။ သူတော်စင်အဆင့် လုပ်ကြံသူတစ်ဦး ဖြစ်သည့်အားလျော်စွာ သူသည် အောက်ခြေအဆင့် မဟုတ်သလို၊ ဤလုပ်ကြံမှု၏ နောက်ကွယ်မှ အကြောင်းရင်းများကိုလည်း မသိနားမလည်သူ မဟုတ်ပေ။ သူသည် ပစ်မှတ်နှင့် ပတ်သက်သော အသေးစိတ် အချက်အလက်မှန်သမျှကို သိရှိထားသည်။ စွေ့ယွမ်မှာ မလေးမစား လုပ်တတ်သည့် စုန်းမငယ်လေးအဖြစ် နာမည်ကျော်ကြားသူ ဖြစ်ပြီး၊ သူမ၏ ထောင်လွှားသော အမူအရာကြောင့် ကောင်းဟိန် တစ်ဦးတည်းကိုသာမက အခြားသူများစွာကိုလည်း စော်ကားခဲ့ဖူးသည်။ သူမသည် မိမိအောက်ရှိသူ မှန်သမျှကို နှာခေါင်းရှုံ့ကာ ကောင်းကင်ကိုသာ မော့ကြည့်နေတတ်သူ မျိုးဖြစ်သည်။

စွေ့ယမ်မှာ မျိုးနွယ်စု ခေါင်းဆောင်များနှင့် အဂ္ဂိရတ် ပညာရှင်များစွာကို မလေးမစား ပြုမူခဲ့သည်မှာ အံ့ဩစရာပင်။ ဖြစ်နိုင်သည်မှာ လောကရှန့်ထို မြူပြာအား အားကိုးနေခြင်းကြောင့်လည်း ဖြစ်နိုင်သော်လည်း၊ ဤသည်မှာ အောင်မြင်မှုအတွက် ကောင်းသော လမ်းစဉ်မဟုတ်ပေ။ မည်သို့ပင်ဆိုစေကာမူ သူမ၏ အမူအရာကြောင့်ပင် ရန်သူများ တိတ်တဆိတ် စုစည်းမိသွားကြပြီး သူမ၏ ခေါင်းကို ဖြတ်ရန် အမိန့်ထုတ်ခဲ့ကြခြင်း ဖြစ်သည်။

ထိုသူတော်စင် လေးသမားသည် အရိပ်ကွယ် ဟုခေါ်သော လုပ်ကြံရေး အဖွဲ့အစည်းမှ အဖွဲ့ဝင်တစ်ဦး ဖြစ်သည်။ အစွမ်းကုန် သန့်စင်ခြင်း ဂလက်ဆီ အတွင်း၌ ဂလက်ဆီအဆင့် အတိုင်းအတာဖြင့် လည်ပတ်နေသော မှောင်ခိုအဖွဲ့အစည်း သုံးခုရှိသည်။ ၎င်းတို့မှာ အရိပ်ကွယ်၊ ပင့်ကူများ နှင့် ညဉ့်ဦး၏ နိမိတ်ဖတ်သူများ တို့ ဖြစ်ကြသည်။

အရိပ်ကွယ် အဖွဲ့သည် လုပ်ကြံခြင်းနှင့် တိတ်တဆိတ် အကာအကွယ်ပေးခြင်းများကို လုပ်ဆောင်ပြီး၊ အထူးသဖြင့် ဆက်ကြေးတောင်းသည့် လုပ်ငန်းများကြောင့် နာမည်ကျော်ကြားသည်။ သူတို့၏ မတိုက်ခိုက်ရစာရင်း ထဲတွင် ပါဝင်ရန်အတွက် အဖွဲ့အစည်းများထံမှ အရှက်မရှိ ငွေညှစ်ကာ နှစ်စဉ် အကျိုးအမြတ် ရှာဖွေတတ်ကြသည်။

ပင့်ကူများ အဖွဲ့မှာမူ ထူးခြားသော ကျင့်ကြံသူများဖြင့် ဖွဲ့စည်းထားသည့် ထောက်လှမ်းရေး အဖွဲ့အစည်း ဖြစ်သည်။ နိမိတ်ဖတ်သူများ၊ ပုရောဟိတ်များနှင့် ဗေဒင်ဆရာများ မသိနိုင်သော သို့မဟုတ် ကျင့်ကြံခြင်း အဆင့် မြင့်မားလွန်းသဖြင့် ရှာဖွေရန် ခက်ခဲသော သတင်းအချက်အလက်များကို ရယူနိုင်စွမ်းရှိခြင်းကြောင့် ကျော်ကြားသည်။ မည်သည့် နိမိတ်ဖတ်သူမျှ မူလတရားသူကြီး တစ်ဦး၏ သတင်းအချက်အလက်ကို ပေါ့ပေါ့တန်တန် ရှာဖွေဝံ့မည်မဟုတ်ပေ၊ အကြောင်းမှာ သူတို့သည် ကောင်းကင်ဘုံ တံခါး နှင့် ဆက်နွယ်နေပြီး ကောင်းကင်ရောင်ခြည်များမှတစ်ဆင့် နိမိတ်ဖတ်ခြင်းများကို ခံစားနိုင်ခြင်း သို့မဟုတ် ပိတ်ဆို့နိုင်ခြင်းတို့ကြောင့် ဖြစ်သည်။

ညဉ့်ဦး၏ နိမိတ်ဖတ်သူများ အဖွဲ့မှာမူ အဖြစ်အပျက်များကို နောက်ကွယ်မှ ခြိုးခြံမောင်းနှင်တတ်သော ကောက်ကျစ်သည့် နိမိတ်ဖတ်သူ အုပ်စု ဖြစ်သည်။ သူတို့သည် ယုတ်မာသော လုပ်ငန်းများကို ကူညီပေးလေ့ရှိပြီး အခွင့်အရေးများကို လုယူခြင်း သို့မဟုတ် အခြားသူများအား အခွင့်အရေး မရအောင် တားဆီးခြင်းများကို လုပ်ဆောင်တတ်ကြသည်။

သူတို့မှာ ကောင်းချီးခံ စောင့်ကြည့်ရေး ကဲ့သို့ ကြားနေအဖွဲ့အစည်း မဟုတ်ဘဲ အရင်းအမြစ်များအတွက် ဗြောင်ကျကျ တိုက်ခိုက်တတ်ကြသည်။ သူတို့သည် သူတစ်ပါး၏ အသက်ဓာတ်နှင့် ဝိညာဉ်စွမ်းအင်များကို အသုံးပြု၍ နိမိတ်ဖတ်ခြင်း သို့မဟုတ် တန်ပြန်ထိခိုက်မှုများကို ကာကွယ်ခြင်းစသည့် အမှောင်ကျင့်စဉ်များကိုလည်း ဖုံးကွယ်ထားခြင်း မရှိကြချေ။

အရိပ်ကွယ် အဖွဲ့သည် ပုံမှန်အားဖြင့်ဆိုလျှင် ဝေ့ဝူယင်ကို ပစ်မှတ်ထားပေလိမ့်မည်။ သို့သော် သူတို့မှာ အားကြီးသူကို ကြောက်ပြီး အားနည်းသူကို နှိပ်စက်တတ်သော အဖွဲ့မျိုးသာ ဖြစ်သည်။ လုပ်ကြံသူ၏ အဆိုအရ ဝေ့ဝူယင်အား ရန်စရသည်မှာ လောလောဆယ်တွင် မထိုက်တန်သေးဟု ဆိုသည်။

ပါဝင်ပတ်သက်သူများ၏ အသေးစိတ် အချက်အလက်များနှင့် ပတ်သက်၍မူ ထိုလုပ်ကြံသူသည် ပုံမှန်အားဖြင့် ကောင်းကင်ချည်နှောင် လျှို့ဝှက် ကျိန်စာ အောက်တွင် ရှိနေရမည် ဖြစ်သော်လည်း၊ သူ၏ အသွင်ပြောင်းလဲသွားပြီးနောက်တွင်မူ ထိုကတိသစ္စာမှာ အသက်မဝင်တော့ပေ။ ဤသည်မှာ ဆက်စပ်မှု စစ်အလံ၏ ဖုံးကွယ်ထားသော စွမ်းရည်တစ်ခုဖြစ်ပြီး၊ အထွတ်အထိပ် ကောင်းကင်ဘုံ ရတနာကို ကြားခံအဖြစ် အသုံးပြုမှသာ ကတိသစ္စာမျိုးစေ့ ပျက်စီးသွားခြင်းကို တားဆီးနိုင်မည် ဖြစ်သည်။

သို့သော် အထွတ်အထိပ် ကောင်းကင်ဘုံ ရတနာများမှာ အလွန်ပင် ရှားပါးလှသည်။ ဝေ့ဝူယင်သည် သူတော်စင်များစွာနှင့် တိုက်ခိုက်ခဲ့သော်လည်း၊ ကိုယ်ပိုင်အရိုးများကို အသုံးပြု၍ ကောင်းကင်ဘုံ ရတနာကို သွန်းလုပ်ခဲ့သော ပါခက်ပင်လျှင် အထွတ်အထိပ် ကောင်းကင်ဘုံ ရတနာကို ဖန်တီးနိုင်ခြင်း မရှိခဲ့ချေ။

လေးသမားသည် အရာအားလုံးကို အကုန်အစင် ထုတ်ဖော်ပြောပြလေတော့သည်။ ဝေ့ဝူယင်နှင့် ဝေ့ရှောင်ထျန်းတို့မှာ အဖြေမရှိခဲ့သော အတိတ်က လုပ်ကြံမှုများကဲ့သို့ ထိတ်လန့်ဖွယ်ရာ လျှို့ဝှက်ချက်များကို သိရှိခဲ့ရသည်။ စွေ့ယွမ်၏ အခြေအနေမှာ အမှန်တကယ်ပင် သွေးပျက်စရာ ကောင်းလှသည်။ အစွမ်းကုန် သန့်စင်ခြင်း ဂလက်ဆီ တစ်ခုလုံးရှိ အနည်းဆုံး သူတော်စင် ခြောက်ပါး၊ လျှို့ဝှက်အရှင် သုံးပါး၊ မူလတရားသူကြီး ခုနစ်ပါးနှင့် အဆင့်အမျိုးမျိုးရှိသော လောကရှန့်ထို အဂ္ဂိရတ် ပညာရှင် ၁၁ ဦးတို့သည် သူမ၏ သေဆုံးမှုအတွက် ရင်းနှီးမြှုပ်နှံထားကြခြင်း ဖြစ်သည်။ အချို့မှာ မိမိတို့၏ မျိုးနွယ်စု သို့မဟုတ် အဖွဲ့အစည်း ရန်ပုံငွေများထဲမှပင် ထုတ်ယူပေးချေခဲ့ကြသည်။ သူမမှာ အမုန်းခံရရုံတင်မကဘဲ တစ်လောကလုံး၏ ရန်သူ ဖြစ်နေခဲ့ခြင်းပင်။

ကောင်းဟိန်မှာမူ ဤလူသတ်မှု အစီအစဉ်ကြီးကို စတင်ခဲ့သော အဓိက တွန်းအားပေးသူ ဖြစ်သဖြင့် အဓိကကျနေခြင်းသာ ဖြစ်သည်။ ထို့ပြင် ပေးချေရသော ကုန်ကျစရိတ်မှာလည်း မယုံနိုင်လောက်အောင်ပင် မြင့်မားလှသည်။

"တကယ်ကြီးလား... အဲဒီလောက်တောင် များတာလား"

ဝေ့ရှောင်ထျန်းမှာ မျက်လုံးလေးများ ပြူးကျယ်ကာ အံ့အားသင့်သွားရသည်။ ဝေ့ဝူယင်ပင်လျှင် စွေ့ယွမ်အတွက် ချွေးပြန်သွားမိသည်။ သူမ၏ ခေါင်းအတွက် စုစုပေါင်း ကုန်ကျစရိတ်မှာ လျှို့ဝှက်လောက အမတေကျောက်တုံး သန်း ၈၀ ကျော်မျှ ရှိပြီး၊ ၎င်းမှာ သူမအား တန်ပြန်တိုက်ခိုက်ရန် အထူးသွန်းလုပ်ထားသော ကောင်းကင်ဘုံ ရတနာများ၏ တန်ဖိုးကို မတွက်ချက်ရသေးသော ပမာဏ ဖြစ်သည်။ ပထမ သူရဲကောင်း တိုက်ကြီးအတွက် အမြင့်ဆုံး ကမ်းလှမ်းမှုမှာ သုံးသန်းမျှသာ ရှိသည် မဟုတ်ပါလား။

"အဲဒီပမာဏက အထွတ်အထိပ် အဆင့် အရည်အသွေးရှိတဲ့ အထွတ်အထိပ် သူတော်စင် ဖန်တီးခြင်းဆေးရည်ရဲ့ တန်ဖိုး တစ်ဝက်လောက် ရှိတာပဲ... အဲဒီဆေးတစ်လုံးရဲ့ တန်ဖိုးက အကြမ်းဖျင်း လျှို့ဝှက်လောက အမတေကျောက် သန်း ၁၈၀ လောက် ရှိတာ... အဲဒီရတနာတွေကိုပါ ထည့်တွက်မယ်ဆိုရင်တော့ အဲဒီဆေးရဲ့ တန်ဖိုးနဲ့ ညီမျှသွားနိုင်တယ်"

ဝေ့ဝူယင်က တွေးတောလိုက်မိသည်။ အဂ္ဂိရတ် ထုတ်ကုန်များ၏ တန်ဖိုးမှာ ရှားပါးမှုနှင့် ဝယ်လိုအားကြောင့် အဆမတန် မြင့်တက်နေလေ့ရှိရာ၊ အထူးသဖြင့် လျှို့ဝှက်အရှင်များနှင့် အစစ်အမှန် သူတော်စင်များ တိုက်ပွဲဝင် လုယူမည့် သူတော်စင် ဖန်တီးခြင်း ဆေးရည် ကဲ့သို့သော အရာများမှာ ပို၍ပင် တန်ဖိုးကြီးလှသည်။

ပြန်တွေးကြည့်လျှင် ဝေ့ဝူယင်သည် တိတ်တဆိတ် ဆေးဖော်စပ်မှုများအပြီးတွင် အတော်ပင် ချမ်းသာကြွယ်ဝနေခဲ့ပြီ ဖြစ်သည်။ ပထမ သူရဲကောင်း တိုက်ကြီးကို အဆင့်နိမ့် အရည်အသွေးရှိသော အဆင့်မြင့် လျှို့ဝှက်လောက ပစ္စည်းအချို့နှင့် ဝယ်ယူခဲ့ခြင်းမှာ အင်မတန် တန်ဖိုးကြီးသည်ဟု ထင်ရသော်လည်း၊ ဝေ့ဝူယင်အတွက်မူ မည်သို့မျှ ထိခိုက်မှု မရှိခဲ့ချေ။

ထို့ပြင် စွေ့ယွမ်အား လုပ်ကြံရန် ကြိုးပမ်းမှုအတွက် ကုန်ကျစရိတ်မှာ ဤမျှတင် မကသေးချေ။ ဤပုဂ္ဂိုလ်ကြီးများသည် မိုးကုပ်စက်ဝိုင်း ကြီးထွားခြင်း မျှော်စင် အား သူတော်စင်အဆင့် တိုက်ပွဲများတွင် ဝင်ရောက်မစွက်ဖက်ရန် သို့မဟုတ် တုံ့ပြန်မှု နှေးကွေးစေရန်အတွက် လာဘ်ထိုးခဲ့ကြရသလို၊ သတင်းများကို ပိတ်ဆို့ရန်အတွက်လည်း မှောင်ခိုနှင့် ကြားနေ သူတော်စင်များကို အသီးသီး ငွေပေးကာ နှုတ်ပိတ်ခဲ့ကြရသည်။ သူတို့ ပေးဆောင်ခဲ့ရသော တကယ့်တန်ဖိုးကို အတိအကျ တိုင်းတာရန်ပင် ခက်ခဲလှပေတော့သည်။

"ဒါတောင် သူတို့ ကျရှုံးသွားကြတာပဲ..."

ဝေ့ရှောင်ထျန်းက ခေါင်းခါရင်း ဆိုလိုက်သည်။ ထို့နောက် သူမသည် ဝေ့ဝူယင်ကို ကြည့်ကာ သူသည်လည်း လူပေါင်းများစွာကို ရန်သူတော်ကြီးများအဖြစ် ဖန်တီးမိထားပြီဖြစ်ကြောင်း အသေအချာ သိလိုက်တော့သည်။

ဝေ့ဝူယင်က ကျန်းကျဲကျဲ ဟု အမည်တွင်သော သူတော်စင်အဆင့် လေးသမား လုပ်ကြံသူအား ဆက်စပ်မှု စစ်အလံအတွင်းသို့ ပြန်လည်စေလွှတ်လိုက်ပြီး ဝိညာဉ်အလင်းများကို သွတ်သွင်းကာ သူ၏ မူလကျင့်ကြံခြင်းအဆင့်ကို တဖြည်းဖြည်း ပြန်လည် မြှင့်တင်ပေးလိုက်သည်။ ဤသို့လုပ်ဆောင်ရန်အတွက် လျှို့ဝှက်လောက အမတေကျောက်များနှင့် အခြားသော အဖိုးတန်ပစ္စည်းများ လိုအပ်သည်။ အထူးသဖြင့် လျှို့ဝှက်တာအို၏ အထွတ်အထိပ်ဖြစ်ပြီး ဝိညာဉ်နှင့် ကောင်းကင်ဘုံကို ဆက်သွယ်ပေးနိုင်သော ကောင်းကင်ဘုံတံခါး နှင့် ပတ်သက်သည့် လောကနှင့် ကောင်းကင်ဘုံဆိုင်ရာ ရတနာများ လိုအပ်ခြင်းဖြစ်သည်။

ဝေ့ဝူယင်တွင် ထိုပစ္စည်းများလည်း မရှားပါးသလို ကျင့်ကြံခြင်းအတွက် လောင်စာဖြစ်စေမည့် ဝိညာဉ်အလင်းလည်း အလျှံပယ်ရှိသည်။ ဗိုလ်ချုပ်ကြီး ကျန်းကျန့်၏ ကျင့်ကြံခြင်းအဆင့်မှာ အံ့မခန်း တိုးတက်နေခဲ့ပြီ ဖြစ်သည်။ သူသည် ရှေ့ကနှစ်ဦးကဲ့သို့ အသက်ဓာတ်နှင့် အစစ်အမှန် ဝိညာဉ်ကို မပိုင်ဆိုင်သေးသော်လည်း၊ ဝေ့ဝူယင် လက်ဝယ်ရှိ စစ်ဝိညာဉ်အားလုံးတွင် အင်အားအကြီးဆုံးအဖြစ် ဆက်လက် တည်ရှိနေဆဲပင်။

ဝေ့ဝူယင်ကမူ စုရီ နှင့်အတူ ပါလာသော ဝိညာဉ်များ၏ အဆင့်ကို ကောင်းကင်စစ်ဝိညာဉ် သာလျှင် မှီနိုင်လိမ့်မည်ဟု တွေးတောမိသည်။ အထူးသဖြင့် သူမသည် လျှို့ဝှက်အာဏာရှင်အဆင့်၏ အထွတ်အထိပ်ဟု သတ်မှတ်ခံရသော အစစ်အမှန် ဝိညာဉ်အဆင့် ကျင့်ကြံသူ တစ်းကို အခြေခံ၍ အသွင်ပြောင်းလဲနေခြင်းကြောင့် ဖြစ်သည်။

နောက်ထပ် ဧည့်သည်မှာမူ တောင်တန်းကြီးများကို ပစ်ပေါက်ခဲ့သော တောင်ပစ်သူတော်စင် ဖြစ်သည်။ သူမသည် စစ်ဝိညာဉ် မဟုတ်ပေ။ သူမ၏ ဝိညာဉ်မှာ ပြင်းထန်စွာ ဒဏ်ရာရထားပြီး ဝိညာဉ်အကာအကွယ်မှာလည်း ဓားရည်ရွယ်ချက် နှင့် ဓားစွမ်းအား တို့ကြောင့် ပျက်စီးနေပြီ ဖြစ်သည်။ သူမ၏ ယခုကဲ့သို့ ဖြူဖျော့နေသော အခြေအနေမျိုးတွင် မူလတရားသူကြီး တစ်ဦးပင်လျှင် သူမကို အလွယ်တကူ သတ်ပစ်နိုင်ပေသည်။

ဝေ့ဝူယင်သည် သူမကို မသတ်ရန် ဆုံးဖြတ်လိုက်သည်။ အကြောင်းရင်း နှစ်ချက်ရှိသည်။ ပထမအချက်မှာ သူမသည် တာအို လက်တွဲဖော် ရှိသည့် အရိပ်အယောင်မတွေ့ရသော သူတော်စင် တစ်ဦးဖြစ်ခြင်းကြောင့်ဖြစ်ပြီး၊ ဒုတိယအချက်မှာ သူမ၏ ပြည့်စုံသော နှုတ်ခမ်းအစုံ၊ နက်မှောင်သော ဆံကေသာနှင့် မာနအရိပ်အယောင်များ ပါဝင်နေသော ဖီးနစ်မျက်ဝန်းတို့က သူနှစ်သက်သော အမျိုးသမီး ပုံစံမျိုး ဖြစ်နေခြင်းကြောင့်ပင်။

မှန်ပေည်။ ဝေ့ဝူယင်သည် သာမန် ရမ္မက်စိတ်သက်သက်ဖြင့်သာ သူမကို ကယ်တင်ခဲ့ခြင်း ဖြစ်သည်။ ဤအချက်ကို ဝန်ခံရန်လည်း သူ မကြောက်ပေ။ သူမအား သူ၏အစေအပါးအဖြစ် အဓမ္မ စေခိုင်းမည်မဟုတ်သလို၊ သူမ၏ လုပ်ဆောင်ချက်များနှင့် ပတ်သက်သော သတင်းအချက်အလက်အချို့ ပေးမည်ဆိုလျှင်ပင် ဒဏ်ရာပြင်းထန်နေသော သူမအား မည်သည့်အကူအညီမျှ ထပ်မံမပေးဘဲ လွှတ်ပေးမည်ဟု ဆုံးဖြတ်ထားပြီး ဖြစ်သည်။ ဤသည်မှာ သူမ၏ အသက်ကို ကယ်တင်ပေးခဲ့ခြင်းအတွက် အလဲအလှယ်ပင် ဖြစ်သည်။

နောက်ထပ် အသေးစိတ်အချက်တစ်ခုမှာ သူမ၏ လျှို့ဝှက်ဝိညာဉ်တွင် ကောင်းကင်ချည်နှောင် လျှို့ဝှက် ကတိသစ္စာ ချည်နှောင်ထားမှု မရှိခြင်းပင်။

ဝေ့ရှောင်ထျန်းက ဝေ့ဝူယင်ကို စောင်းကြည့်လိုက်၏။ သူသည် လုပ်ကြံသူကိုတော့ သတ်ပစ်ပြီး ဤဆံပင်နက် လှပျိုဖြူကိုမူ ချန်ထားသည် မဟုတ်ပါလား။ သူ၏ ရည်ရွယ်ချက်ကို သူမ ရှင်းရှင်းကြီး မြင်နေရသည်။ ကံကောင်းထောက်မစွာဖြင့် သူမသည် လေးသည်တော် လုပ်ကြံသူ ဖောက်သည်ချလိုက်သော လျှို့ဝှက်ချက်များ အပေါ် စိတ်ဝင်တစား ဖြစ်နေသဖြင့် ဤမိန်းမလိုက်စားသူအား ကျီစယ်ရန် အင်အားမရှိတော့ပေ။

***