တာအိုလက်နက်နှင့် ကြောက်မက်ဖွယ် ရန်သူ

“ပေါင့်ရူရွမ်း... ရှင်က ဂိုဏ်းတူအချင်းချင်းကို သတ်ရဲတယ်ပေါ့လေ”

ကျယ်ဝမ်ယွဲ့၏ ပါးစပ်မှ သွေးများစီးကျနေပြီး သူမသည် မျှော်လင့်ချက်မဲ့နေသော အမူအရာဖြင့် အပြေးအလွှား ထွက်ပြေးနေလေသည်။

လျှို့ဝှက်နယ်မြေထဲသို့ ဝင်ရောက်ပြီးနောက် ကျယ်ဝမ်ယွဲ့သည် လူသူကင်းမဲ့သော တောအုပ်တစ်ခုဆီသို့ ရောက်ရှိသွားခဲ့သည်။

ကျယ်ဝမ်ယွဲ့သည် အန္တရာယ်များလှသော အခြေအနေများနှင့် အကြိမ်ကြိမ် ကြုံတွေ့ခဲ့ရသည်။

ထိုအန္တရာယ်များမှ အသက်ရှင်လွတ်မြောက်လာပြီးနောက် သူမသည် စွမ်းအားကြီးမားသော သိုင်းပညာရှင်တစ်ဦး၏ ရုပ်ကြွင်းကို ရှာဖွေတွေ့ရှိခဲ့လေသည်။

ထိုနေရာ၌ ကျယ်ဝမ်ယွဲ့သည် အဆင့်မြင့်လေးရှည်တစ်လက်ကို ရရှိခဲ့သည်။ ထိုလေးရှည်၏ သတ္တုသားမှာ အထူးပြုလုပ်ထားခြင်းဖြစ်ပြီး မိုးကြိုးစွမ်းအင်ပိုင်ရှင် သိုင်းပညာရှင်တစ်ဦး အသုံးပြုပါက မိမိ၏ မူလအဆင့်ထက်ပင် သာလွန်သော စွမ်းအားများကို ထုတ်ဖော်ပြသနိုင်ပေလိမ့်မည်။

ကံကောင်းထောက်မစွာပင် ဤစွမ်းရည်သည် ကျယ်ဝမ်ယွဲ့၏ သိုင်းပညာစွမ်းအင်နှင့် ထပ်တူကျနေပေသည်။

သို့သော် စွမ်းအားရှင်၏ ရုပ်ကြွင်းရှိရာ နေရာမှ ထွက်လာချိန်တွင် ပေါင့်ရူရွမ်းနှင့် ဆုံတွေ့ခဲ့ရလေသည်။

ကျယ်ဝမ်ယွဲ့မှာ သတိဝင်သွားကာ ပေါင့်ရူရွမ်းမှ သူမအား လျှို့ဝှက်တိုက်ခိုက်မည်စိုးသဖြင့် သူ့အနားမှ ခပ်ခွာခွာ နေချင်ခဲ့သည်။

သို့သော် တကယ့်လက်တွေ့တွင်တော့ ပေါင့်ရူရွမ်းမှာ သူမထင်ထားသည်ထက် ပို၍ မောက်မာနေခဲ့လေသည်။

ကျယ်ဝမ်ယွဲ့ ရတနာတစ်ခု ရရှိထားကြောင်း သူသိသွားသောအခါ လောဘကို လုံးဝဖုံးကွယ်မထားတော့ဘဲ ဂိုဏ်းတူအချင်းချင်းကိုပင် လိုက်လံတိုက်ခိုက်တော့သည်။

“ကျယ်ဝမ်ယွဲ့... မင်း လက်ထဲက လေးရှည်ကို ချထားလိုက်ရင် မင်းကို အသက်ရှင်ခွင့် ပေးမယ်”

ပေါင့်ရူရွမ်းသည် ဓားရှည်ကိုကိုင်လျက် လိုက်လံချဉ်းကပ်လာရာ သူတို့နှစ်ဦးကြား အကွာအဝေးမှာ ပို၍ နီးကပ်လာချေပြီ။

ကျယ်ဝမ်ယွဲ့က ပေါင့်ရူရွမ်းကို လုံးဝ မယုံကြည်ပေ။

အမှန်တကယ်တော့ ပေါင့်ရူရွမ်း စတင်တိုက်ခိုက်ကတည်းက ကျယ်ဝမ်ယွဲ့ကို အသက်ရှင်လျက် လွှတ်ပေးမည်မဟုတ်ကြောင်း သေချာနေခဲ့သည်။

အဘယ်ကြောင့်ဆိုသော် လျှို့ဝှက်နယ်မြေထဲမှ ထွက်သွားသည်နှင့် သူက ဂိုဏ်းတူတပည့်အား တိုက်ခိုက်ခဲ့သည်ဆိုသောအချက်ကို မည်သို့မျှ ဖုံးကွယ်ထားနိုင်မည် မဟုတ်သောကြောင့်ပေ။

အကြီးအကဲကူကျွမ့်က သူ့ကို ကာကွယ်ပေးလျှင်တောင်မှ ပေါင့်ရူရွမ်းသည် စည်းကမ်းထိန်းသိမ်းရေးခန်းမသို့ အပို့ခံရပြီး သေဒဏ်ပေးခံရမည်မှာ မြေကြီးလက်ခတ်မလွဲပင် ဖြစ်သည်။

“ရှင် အဲဒီမှာ ရပ်နေ... ကျွန်မ လုံခြုံတဲ့ အကွာအဝေးကို ရောက်သွားမှ လေးရှည်ကို ချထားခဲ့မယ်”

ကျယ်ဝမ်ယွဲ့သည် ကြီးမားလှသော အကျပ်အတည်းတစ်ခုထဲ ကျရောက်နေကြောင်း ခံစားမိနေသည်။

ယခင်က ပေါင့်ရူရွမ်း၏ တိုက်ခိုက်မှုကြောင့် ရရှိထားသော ဒဏ်ရာများမှာ ယခုတိုင် လုံးဝ မပျောက်ကင်းသေးချေ။

အကယ်၍သာ ဖမ်းမိသွားပါက ပေါင့်ရူရွမ်းကို ပြန်လည်ခုခံနိုင်မည့် အခွင့်အရေး လုံးဝမရှိတော့ပေ။

ကျယ်ဝမ်ယွဲ့၏စကားကို ကြားသောအခါ ပေါင့်ရူရွမ်းက ပြုံးရုံသာပြုံးလိုက်ပြီး ဘာမှထပ်မပြောတော့ချေ။

သို့သော် သူ၏အရှိန်ကိုမူ ထပ်မံမြှင့်တင်လိုက်လေသည်။ ယခုအခါ ကျယ်ဝမ်ယွဲ့ကို သတ်ဖြတ်လိုသော သူ၏ဆန္ဒမှာ ပိုမိုကြီးမားလာလေပြီ။

“မင်း ထွက်ပြေးစရာ လမ်းမရှိတော့ပါဘူးကွာ”

ပေါင့်ရူရွမ်းက လက်ထဲရှိ ဓားရှည်ကို ဝှေ့ယမ်းလိုက်သည်။

မီတာဝက်ခန့် ကျယ်ဝန်းသော လေဓားသွားတစ်ခုမှာ လေထုကို ခွင်းလျက် ထွက်ပေါ်လာသည်။

“ဒုက္ခပဲ”

သူမဆီသို့ ပြေးဝင်လာသော လေဓားသွားကို မြင်လိုက်ရချိန်တွင် ကျယ်ဝမ်ယွဲ့၏ လက်ဖဝါး၌ မိုးကြိုးလျှပ်စီးများ တောက်ပသွားလေသည်။

သူမသည် လေးရှည်ကို ကိုင်ထားပြီး လက်တစ်ဖက်က လေးကြိုးပေါ်တွင် ရှိနေသည်။

လက်ဖဝါးပေါ်ရှိ မိုးကြိုးလျှပ်စီးများသည် လေးကြိုးထဲသို့ ချက်ချင်း စိမ့်ဝင်သွားပြီး မိုးကြိုးမြားတစ်စင်းအဖြစ် ပုံပေါ်လာသည်။

ရွှစ်...

လေထုကို ခွင်းလျက် မြားတစ်စင်း ပျံသန်းသွားလေသည်။

မိုးကြိုးမြားနှင့် လေဓားသွားတို့ ပြင်းထန်စွာ ရိုက်ခတ်သွားကြသည်။

ဘုန်း...

ကျယ်လောင်လှသော ပေါက်ကွဲသံကြီးတစ်ခု ထွက်ပေါ်လာလေသည်။

ထို့နောက် ချက်ချင်းဆိုသလို လေဓားသွားမှာ တစ်စစီ ပျက်စီးသွားသော်လည်း မိုးကြိုးမြားမှာမူ စွမ်းအင်များ ကျန်ရှိနေသေးသဖြင့် ပေါင့်ရူရွမ်းထံသို့ ဆက်လက်ပစ်လွှတ်သွားလေသည်။

“ဟင်”

ပေါင့်ရူရွမ်းမှာ အံ့အားသင့်သွားပုံရသည်။

သူသည် အားပျော့သွားသော မိုးကြိုးမြားကို အလွယ်တကူ ရှောင်တိမ်းလိုက်နိုင်သည်။

သို့သော် မိုးကြိုးလေးရှည်၏ စွမ်းအားက ပေါင့်ရူရွမ်းကို မနာလိုဖြစ်သွားစေဆဲပင်။

‘ဒီမိုးကြိုးလေးရှည်က တာအိုအမှတ်အသားတွေ ထွင်းထုထားတဲ့ တာအိုလက်နက်ဖြစ်တာ သေချာတယ်’

ပေါင့်ရူရွမ်း ချက်ချင်း သဘောပေါက်သွားလေသည်။ “တာအိုလက်နက်မှသာ ဒီလောက်စွမ်းအားမျိုး ရှိနိုင်မှာ”

‘ဒီမိုးကြိုးလေးရှည်ကို ငါရအောင် ယူရမယ်’

ပေါင့်ရူရွမ်းသည် ကျယ်ဝမ်ယွဲ့ကို လိုက်ဖမ်းရန် ပို၍ ဆုံးဖြတ်ချက် ခိုင်မာသွားတော့သည်။

မိုးကြိုးလေးရှည်သည် သူ၏ သိုင်းပညာစွမ်းအင်နှင့် မကိုက်ညီသော်လည်း ၎င်းကို ရရှိပြီးနောက် တန်ဖိုးကြီးမားသော အရင်းအမြစ်များနှင့် အလွယ်တကူ လဲလှယ်နိုင်သည်၊ သို့မဟုတ် သူနှင့် ကိုက်ညီသော တာအိုလက်နက်တစ်ခုနှင့်ပင် လဲလှယ်နိုင်ပေသည်။

တာအိုလက်နက်တစ်ခု ပါရှိပါက မိမိအဆင့်ထက် ပိုမိုမြင့်မားသော ရန်သူများကိုပင် သတ်ဖြတ်နိုင်စွမ်း ရှိလာပေလိမ့်မည်။

ယွဲ့လန်ဂိုဏ်းတွင် မီရှင်းယယ်၊ အကြီးအကဲကူကျွမ့်နှင့် အကြီးအကဲယွမ်ချန်တို့မှလွဲ၍ မည်သူမျှ တာအိုလက်နက် မပိုင်ဆိုင်ထားကြချေ။

ဟယ့်မင်ယဲ့နှင့် ဖန်းကျဲ့တို့ပင် မပိုင်ဆိုင်ကြပေ။

အကယ်၍ သူသာ ရရှိခဲ့ပါက အနာဂတ်တွင် အဆင့်မြင့် တပည့်ရင်းတစ်ဦး ဖြစ်လာမည်မှာ သေချာလှပေသည်။

ပေါင့်ရူရွမ်း၏ ရည်မှန်းချက်များ ကြီးထွားလာတော့သည်။

‘ကျယ်ဝမ်ယွဲ့ရဲ့ ဒဏ်ရာတွေ မသက်သာသေးသလို ဒီတာအိုလက်နက်ကိုလည်း မကျွမ်းကျင်သေးတာ ကံကောင်းတယ်... မဟုတ်ရင် ငါ အန္တရာယ်များနေလောက်ပြီ’

ပေါင့်ရူရွမ်းမှာ ဝမ်းသာသွားမိသည်။

တစ်ချိန်တည်းမှာပင် သူသည် ခေါင်းငုံ့ကာ လက်ထဲရှိ ပုံဆောင်ခဲအပြားလေးကို ကြည့်လိုက်သည်။

“အစ်ကိုကြီးချန် မကြာခင် ရောက်လာတော့မယ်။ ငါတို့နှစ်ယောက် ဆုံတော့မှာဆိုတော့ သူ မရောက်ခင် ဒီမိုးကြိုးလေးရှည်ကို ငါအရယူထားမှ ဖြစ်မယ်။ မဟုတ်ရင် သူရောက်လာပြီး ငါ့ကို ကူညီမယ်ဆိုရင် အလွန်ဆုံး အဲဒီတာအိုလက်နက်တန်ဖိုးရဲ့ တစ်ဝက်လောက်ပဲ ငါရတော့မှာ”

ပေါင့်ရူရွမ်း၏ ခန္ဓာကိုယ်အတွင်းမှ လေစွမ်းအင်ချီများ ထကြွလာပြီး သူ၏အရှိန်ကို နောက်တစ်ကြိမ် မြှင့်တင်လိုက်ပြန်သည်။

လေစွမ်းအင်ပိုင်ရှင် ဟင်းလင်းပြင်နယ်ပယ် သိုင်းပညာရှင်များသည် ရွယ်တူများထဲတွင် အမြန်ဆုံး ဖြစ်ကြလေသည်။

‘သူ လက်မလျှော့သေးဘူးပဲ’

ယခုလေးတင် ပစ်လွှတ်လိုက်သော မြားကြောင့် ကျယ်ဝမ်ယွဲ့သည် သူမလက်ထဲရှိ မိုးကြိုးလေးရှည်၏ တန်ဖိုးကို သိရှိသွားသော်လည်း သူမအတွက် ပျက်စီးကိန်းက ဆိုက်ရောက်လာနေဆဲပင်။

တာအိုလက်နက်သည် အစွမ်းထက်လှသည်မှာ မှန်သော်လည်း ခွန်အားနှင့် စစ်မှန်သောချီများကို အလွန်အကျွံ ကုန်ဆုံးစေလေသည်။

ထို့ကြောင့် အသုံးပြုပြီးနောက်တွင် ကျယ်ဝမ်ယွဲ့၏ အမြန်နှုန်းမှာ လျော့ကျသွားတော့သည်။

ပေါင့်ရူရွမ်းလည်း ဤအချက်ကို သတိထားမိလေသည်။ အကွာအဝေးကို ထပ်မံကျဉ်းမြောင်းလိုက်ပြီးနောက် သူ၏ လေဓားသွားများကို ပိုက်ကွန်တစ်ခုသဖွယ် ပစ်လွှတ်လိုက်လေသည်။

ကျယ်ဝမ်ယွဲ့မှာ ရှောင်တိမ်းရင်း မြားပစ်ရန်သာ တတ်နိုင်တော့သည်။

သို့သော် အခြေအနေကို ပြောင်းလဲရန် ခက်ခဲလှပေသည်။ ပေါင့်ရူရွမ်းသည် ကျယ်ဝမ်ယွဲ့ကို မီသွားချေပြီ။

“ပြီးသွားပြီ”

ပေါင့်ရူရွမ်း၏ မျက်နှာတွင် စိတ်လှုပ်ရှားမှုများ ပြည့်နှက်နေသည်။

သူသည် ခန္ဓာကိုယ်ထဲရှိ စစ်မှန်သောချီများကို စုစည်းလိုက်သည်။ လေစွမ်းအင်ချီများ လှိုင်းထန်လာသည်နှင့်အမျှ ဓားကို ခုတ်ပိုင်းလိုက်လေသည်။

လေဓားသွားမှာ တစ်မီတာခန့် ကျယ်ဝန်းလှသည်။

ပိုမိုကြီးမားရုံသာမက ပို၍မြန်ဆန်ပြင်းထန်ကာ ကျယ်ဝမ်ယွဲ့ထံသို့ ပိုင်းဖြတ်သွားတော့သည်။

ကျယ်ဝမ်ယွဲ့မှာ လုံးဝ အင်အားကုန်ခန်းနေပြီ ဖြစ်သည်။ သူမသည် မြားတစ်စင်းမျှပင် ထပ်မပစ်နိုင်တော့ချေ။

‘ငါ့ရဲ့ သိုင်းပညာလမ်းစဉ်က ဒီမှာတင် အဆုံးသတ်သွားပြီလား’

ကျယ်ဝမ်ယွဲ့မှာ အထီးကျန်ဆန်မှုကို ခံစားလိုက်ရသည်။

သို့သော် သူတို့နှစ်ဦးလုံး၏ အခြေအနေကို ပြောင်းလဲ၍ မရနိုင်တော့ဟု ထင်မှတ်နေချိန်၌…

ကျယ်ဝမ်ယွဲ့အား ခုတ်ပိုင်းတော့မည့် ဧရာမလေဓားသွားကြီးမှာ ရုတ်တရက် မီးတောက်များ ထတောက်လာလေသည်။

ဝုန်း...

လေဓားသွားသည် ကျယ်ဝမ်ယွဲ့၏ နှာခေါင်းထိပ်သို့ ရောက်လုနီးပါးအချိန်တွင် မီးတောက်များက ၎င်းကို လုံးဝ ဝါးမြိုသွားလေတော့သည်။

လေဓားသွား ဖျက်ဆီးခံလိုက်ရလေပြီ။

ဖြာထွက်မီးလျှံဓားသိုင်းကပင် ၎င်းကို အပိုင်းပိုင်းအစစ ဖြစ်သွားစေခဲ့သည်။

“ပေါင့်ရူရွမ်း... မင်းက အကြီးအကဲယွမ်ချန်ရဲ့ သတိပေးချက်ကို တကယ်ပဲ အလေးအနက် မထားတာကိုး”

ရွှီနင်၏ အရပ်ရှည်ရှည်ပုံရိပ်သည် ကျယ်ဝမ်ယွဲ့ရှေ့တွင် တောင်တန်းကြီးတစ်ခုသဖွယ် ပေါ်လာပြီး ပေါင့်ရူရွမ်းကို လုံးဝ ကာဆီးထားလိုက်လေသည်။

“ရွှီ... ရွှီနင်”

ရွှီနင်ကို မြင်လိုက်ရသောအခါ ကျယ်ဝမ်ယွဲ့၏ မျက်လုံးများတွင် မျှော်လင့်ချက်ရောင်ခြည်များ တောက်ပလာတော့သည်။

“ရွှီနင်”

ပေါင့်ရူရွမ်းသည် ရွှီနင်ကို မြင်လိုက်သောအခါ သူ၏ ကြမ်းတမ်းသော မျက်လုံးများ တုန်လှုပ်သွားရသည်။

လွန်ခဲ့သောတစ်ကြိမ် တပည့်ရင်းများ၏ ရင်ပြင်တွင်လည်း ရွှီနင်က ရုတ်တရက် ပေါ်လာပြီး ကျယ်ဝမ်ယွဲ့ကို ကယ်တင်ခဲ့ဖူးလေသည်။

ထို့ကြောင့် ယနေ့အဖြစ်အပျက်များသည် ထိုနေ့က အဖြစ်အပျက်ကို ပြန်လည်ပြသနေသကဲ့သို့ပင်။

“ပေါင့်ရူရွမ်း... ဂိုဏ်းတူအချင်းချင်းကို သတ်ဖြတ်တာက သေဒဏ်ထိုက်တဲ့ ပြစ်မှုပဲ။ ပြီးခဲ့တဲ့တစ်ခေါက်တုန်းကတောင် မင်းက သိုင်းယှဉ်ပြိုင်တယ်ဆိုတဲ့ အကြောင်းပြချက်နဲ့ လွတ်လမ်းရှာလို့ရသေးတယ်။ ဒါပေမဲ့ အခုတော့ ဂိုဏ်းတူအချင်းချင်းကို လိုက်သတ်နေတာပဲ။ အကြီးအကဲကူကျွမ့်က မင်းကို ကာကွယ်ပေးရင်တောင် မင်း သေဒဏ်ပေးခံရမှာပဲ”

ရွှီနင်နှင့် ပေါင့်ရူရွမ်း၏ မိသားစုကြားရှိ အငြိုးအတေးများအပြင် သူတို့နှစ်ဦးကြားတွင်လည်း မုန်းတီးမှုများ ရှိနေကြသည်။

ယခု ပေါင့်ရူရွမ်းကို တိုက်ခိုက်ရန် ခိုင်လုံသော အကြောင်းပြချက် ရရှိပြီဖြစ်ရာ ရွှီနင် လုံးဝ တုံ့ဆိုင်းမနေတော့ပေ။

ပေါင့်ရူရွမ်းက ကျယ်ဝမ်ယွဲ့ကို သတ်ချင်နေပြီး ရွှီနင်ကလည်း သူ့ကို သတ်ချင်နေသည်။

‘ရွှီနင်က အရင်ကထက် အများကြီး ပိုသန်မာလာသလိုပဲ’

ပေါင့်ရူရွမ်းသည် ရွှီနင်ကို ရင်ဆိုင်ရင်း ခေါင်းထဲ၌ အတွေးများ ခြာခြာလည်နေလေသည်။

သူ၏ လေဓားသွားသည် အစွမ်းထက်ဆုံး တိုက်ခိုက်မှုနီးပါး ဖြစ်သော်လည်း ရွှီနင်၏ တိုက်ခိုက်မှုက ၎င်းကို လုံးဝ ဝါးမြိုသွားခဲ့သည်။

‘စွမ်းအင်ရုပ်လုံးဖော်နိုင်တာပဲ... ရွှီနင်က ရုပ်လုံးပေါ်ခြင်းနယ်ပယ်ကို ရောက်သွားခဲ့ပြီ’

ရွှီနင်နှင့် ကျယ်ဝမ်ယွဲ့တို့ကို ရင်ဆိုင်ရာတွင် သူတစ်ယောက်တည်းဖြင့် တာအိုလက်နက်ကို လုယူရန် အခွင့်အရေး မရှိတော့ကြောင်း ပေါင့်ရူရွမ်း သိလိုက်သည်။

ယခုအခါ သူသည် ချန်ရှောင်းယိ ရောက်လာပြီး ပူးပေါင်းရန်သာ စောင့်ဆိုင်းနိုင်တော့သည်။

“ညီလေးရွှီ”

ပေါင့်ရူရွမ်းက ရွှီနင်ကို အချိန်ဆွဲကာ ချန်ရှောင်းယိ ရောက်လာမည့်အချိန်ကို စောင့်ရန် ပြင်လိုက်သည်။ “ကျယ်ဝမ်ယွဲ့ ကိုင်ထားတာ ဘာလဲဆိုတာ မင်း သိရဲ့လား”

“အဲဒါ တာအိုလက်နက်ကွ”

ရွှီနင် ပြန်မဖြေခင်မှာပင် ပေါင့်ရူရွမ်းက ဦးစွာ ပြောလိုက်သည်။ “အဲဒါ တာအိုနယ်ပယ်သခင်တစ်ယောက်က တာအိုအမှတ်အသားတွေ ထွင်းထုထားတဲ့ တာအိုလက်နက်လေ။ တာအိုလက်နက်တစ်ခု ပါရင် မင်းအဆင့်ထက် ပိုမြင့်တဲ့ ရန်သူတွေကိုတောင် သတ်နိုင်စွမ်း ရှိသွားမယ်။ ဒီတာအိုလက်နက်က ထိပ်တန်းရတနာပဲကွ”

“တာအိုလက်နက်”

ရွှီနင် ဤအကြောင်းကို သိပ်မသိပေ။

သို့သော် ပေါင့်ရူရွမ်း၏ ရှင်းပြချက်ကို ကြားပြီးနောက် တာအိုလက်နက်တစ်ခု မည်မျှအစွမ်းထက်ကြောင်း သူ သိလိုက်ရသည်။

“ကျယ်ဝမ်ယွဲ့က သူမကိုယ်သူမ တာအိုလက်နက်ကို ထိန်းချုပ်နိုင်မယ်လို့ ဘာလို့ ထင်နေရတာလဲ”

ပေါင့်ရူရွမ်းက မြှူဆွယ်သည့် လေသံဖြင့် ပြောလိုက်သည်။ “မင်းနဲ့ငါ ပူးပေါင်းပြီး သူမကို သတ်ပြီးတော့ တာအိုလက်နက်ကို ယူလိုက်ရင်ကော ဘယ်လိုလဲ။ ငါတို့ အပြင်ရောက်သွားရင် ဒီတာအိုလက်နက်ကို တခြားအရင်းအမြစ်တွေနဲ့ လဲလှယ်ပြီး တစ်ယောက်တစ်ဝက် ခွဲကြတာပေါ့။ မဟုတ်ဘူး... မင်း ၇၀ ငါ ၃၀ ယူမယ်လေ။ ဘယ်လိုလဲ”

ပေါင့်ရူရွမ်း၏ စကားများမှာ အမှန်တကယ်ပြောနေခြင်း မဟုတ်သည်မှာ သေချာလှသည်။ သူက ချန်ရှောင်းယိ ရောက်လာရန် အချိန်ရစေဖို့ ရွှီနင်ကို ခေတ္တမျှ အချိန်ဆွဲထားချင်ရုံသာ ဖြစ်ပြီး ထို့နောက် သူတို့နှစ်ယောက်လုံးကို သတ်ပစ်ရန် ရည်ရွယ်ထားသည်။

ပေါင့်ရူရွမ်းသည် ရွှီနင်ကို အရင်ကတည်းက သဘောမကျခဲ့ပေ။ ယခု ရွှီနင်က သူ၏ အားနည်းချက်ကို သိသွားပြီဖြစ်ရာ ပေါင့်ရူရွမ်းသည် ရွှီနင်ကိုပါ ဖယ်ရှားပစ်ချင်နေလေသည်။

“‌မောင်လေးရွှီ...”

ကျယ်ဝမ်ယွဲ့၏ မျက်နှာထား ပြောင်းလဲသွားသည်။

ရွှီနင် ကယ်တင်ခဲ့မှုအတွက် ကျေးဇူးတင်နေသော်လည်း ပေါင့်ရူရွမ်း၏ စကားများက အလွန်မြူဆွယ်နိုင်စွမ်း ရှိနေသည်။

ရွှီနင် စိတ်ပြောင်းသွားပြီး သူမကို ပြန်လည်တိုက်ခိုက်လာမည်ကို သူမ ကြောက်ရွံ့သွားမိသည်။

မည်သို့ပင်ဆိုစေ သူတို့နှစ်ဦး သိကျွမ်းခဲ့သည်မှာ မကြာသေးသလို နက်ရှိုင်းသော ဆက်ဆံရေးမျိုးလည်း မရှိခဲ့ကြပေ။

“မောင်လေးရွှီ... ဒီတာအိုလက်နက်ကို ငါ နင့်ကို ပေးပါ့မယ်”

ကျယ်ဝမ်ယွဲ့ ပြတ်ပြတ်သားသားပင် ဆုံးဖြတ်လိုက်သည်။

ကျယ်ဝမ်ယွဲ့ ဤမျှ ပြတ်သားလိမ့်မည်ဟု ရွှီနင် ထင်မှတ်မထားခဲ့ချေ။

သို့သော် ရွှီနင်က တာအိုလက်နက်၏ မြူဆွယ်မှုနောက်သို့ မပါသွားခဲ့ပေ။

“အစ်မကျယ်... ဒီတာအိုလက်နက်က အစ်မဟာပါ။ ကျွန်တော့်ကို ပေးစရာ မလိုပါဘူး”

ရွှီနင် လုံးဝ တုန်လှုပ်ခြင်း မရှိခဲ့ချေ။ ထို့အစား လက်ထဲရှိ ဓားနှစ်လက်ကိုသာ ကျစ်ကျစ်ပါအောင် ဆုပ်ကိုင်လိုက်သည်။

“ပေါင့်ရူရွမ်း... တကယ်တော့ ငါက အဲဒီလက်နက်ထက် မင်းရဲ့ ခေါင်းကို ပိုစိတ်ဝင်စားတယ်ကွ”

ရွှီနင် ရှေ့သို့ တစ်လှမ်း တိုးလိုက်သည်။ “ငါက ဂိုဏ်းကိုယ်စား စည်းကမ်းဖောက်ဖျက်တဲ့ တပည့်ကို အပြစ်ပေးရမှာဆိုတော့ ဒါလည်း ကုသိုလ်တစ်ခု ဖြစ်သင့်တယ်မလား။ အစ်မကျယ်... ငါတို့ ဒီလျှို့ဝှက်နယ်မြေကနေ ထွက်သွားတဲ့အခါ ကျွန်တော့်အတွက် သက်သေထွက်ဆိုပေးဖို့ မမေ့နဲ့နော်”

ရွှစ်...

ရွှီနင် ဓားကို ဝှေ့ယမ်းလိုက်သည်။

ရေစီးပမာဓားသိုင်း၊ ရေလှိုင်းဖြတ်တောက်ခြင်း။

‘ကြောက်စရာကောင်းလိုက်တဲ့ ဓားချီပါလား’

ပေါင့်ရူရွမ်း ကြက်သီးမွေးညင်းများပင် ထသွားရသည်။

ရွှီနင်သည် သူ၏ စစ်မှန်သောချီများကို မျဉ်းတစ်ကြောင်းအဖြစ် စုစည်းလိုက်ပြီး ရေစွမ်းအင်အဖြစ် ရုပ်လုံးဖော်လိုက်သည်။ အရာအားလုံး အသင့်ဖြစ်နေသဖြင့် သူ၏ ဓားချက်မှာ အလွန်ပြင်းထန်ကာ မည်သူမျှ မတားဆီးနိုင်သည့်ဟန်ဖြင့် ထွက်ပေါ်လာလေသည်။

ပေါင့်ရူရွမ်းသည် သူ၏ဓားကို အမြန်ဝှေ့ယမ်းလိုက်ပြီး လေဓားသွားတစ်ခုကို ပစ်လွှတ်လိုက်သည်။

သို့သော် လေဓားသွားမှာ ချက်ချင်း ပျောက်ကွယ်သွားပြီး ရေလှိုင်းဓားချက်က ပေါင့်ရူရွမ်း၏ ပခုံးကို ဖြတ်ပိုင်းသွားလေသည်။

ဖတ်...

ပေါင့်ရူရွမ်း၏ ပခုံးပေါ်မှ အသားတစ်တုံး ပြတ်ထွက်သွားပြီး အရိုးများပင် ပေါ်လာလေသည်။

‘ဒါက ရုပ်လုံးပေါ်ခြင်းနယ်ပယ်ရဲ့ အစောပိုင်းအဆင့် မဟုတ်ဘဲ အမြင့်ဆုံးအဆင့် မဟုတ်လား။ သူက လျှို့ဝှက်ကျင့်စဉ်နှစ်ခုကို ကျင့်ကြံထားတယ်ဆိုရင်တောင် ဒီလောက်ထိ မသန်မာသင့်ဘူးလေ’

ပေါင့်ရူရွမ်းမှာ မှင်သက်သွားရသည်။

ဖြာထွက်မီးလျှံဓားသိုင်းက မီးလုံးတစ်လုံးနှင့်အတူ ရောက်ရှိလာသည်။

ပေါင့်ရူရွမ်းသည် ၎င်းကိုရင်ဆိုင်ရန် ဓားကို မြှောက်လိုက်သော်လည်း ဒဏ်ရာရနေသော လက်မောင်းမှ စူးရှသော နာကျင်မှုကို ရုတ်တရက် ခံစားလိုက်ရသည်။

စောစောက ရွှီနင်၏ တိုက်ခိုက်မှုသည် ဖြတ်တောက်ခြင်းသဘာဝသာမက ထိုးဖောက်ခြင်းသဘာဝပါ ပေါင်းစပ်ပါဝင်နေသည်။

ရွှီနင်သည် သူ၏ စွမ်းအင်သဘာဝများကို အသုံးပြုနိုင်ရုံသာမက ၎င်းတို့ကို ပေါင်းစပ်နိုင်စွမ်းလည်း ရှိနေပြီ ဖြစ်သည်။ ဤသည်မှာ ဟင်းလင်းပြင်နယ်ပယ် ပဉ္စမအဆင့်သို့ တက်လှမ်းပြီးနောက် နောက်ထပ်ပြောင်းလဲမှုတစ်ခုပင် ဖြစ်ပေသည်။

ရွှမ်း...

ဖြာထွက်မီးလျှံဓားသိုင်း၏ တမြေ့မြေ့ဖျက်ဆီး‌တတ်သော သဘာဝက ပေါင့်ရူရွမ်း၏ ဓားနှင့် အသားစများကို လောင်ကျွမ်းနေပြီ ဖြစ်သည်။

“ရွေးချယ်စရာ မရှိတော့ဘူး”

ပေါင့်ရူရွမ်းက အံကြိတ်ကာ ကျန်လက်တစ်ဖက်ဖြင့် သူ၏ ခါးကို ရိုက်ချလိုက်သည်။

ထို့နောက် ချက်ချင်းပင် အလွှာပါးတစ်ခုက ပေါင့်ရူရွမ်း၏ ခန္ဓာကိုယ်ကို ဖုံးလွှမ်းသွားလေသည်။

ထိုအခါ ပေါင့်ရူရွမ်း၏ ခန္ဓာကိုယ်ပေါ်ရှိ မီးတောက်များ ပျောက်ကွယ်သွားသလို နာကျင်မှုများလည်း ပျောက်ကွယ်သွားတော့သည်။

ဤသည်မှာ အကြီးအကဲကူကျွမ့်က ပေါင့်ရူရွမ်းကို ပေးထားသော အသက်ကယ်ပစ္စည်းတစ်ခု ဖြစ်သည်။ ပေါင့်ရူရွမ်းသည် ၎င်းကို မသုံးရက်ခဲ့သော်လည်း ယခု အခြေအနေသည် အရေးကြီးနေပြီဖြစ်ရာ မသုံး၍ မရတော့ပေ။

အကယ်၍ နှမြောနေပါက ချန်ရှောင်းယိ ရောက်လာသည်အထိ အချိန်ဆွဲထားနိုင်မည် မဟုတ်ချေ။

“ပြေးမှပဲ”

‘ရွှီနင်က ငါနဲ့အဆင့်တူတာ သေချာပေမဲ့ ငါ့ကို လုံးဝ ဖိနှိပ်ထားနိုင်တယ်။ သူ့ရဲ့ ပါရမီက ဟယ့်မင်ယဲ့ထက်တောင် ပိုမြင့်နိုင်တယ်’

‘သူက သာမန်လက်နက်ကို ကိုင်ထားတာ သေချာပေမဲ့ တာအိုလက်နက်ကို ကိုင်ထားသလိုမျိုး ဖြစ်နေတယ်’

ပေါင့်ရူရွမ်းသည် ရွှီနင်ကို မယှဉ်နိုင်မှန်း သိလိုက်သဖြင့် ချန်ရှောင်းယိ ရှိရာဘက်သို့ ထွက်ပြေးလေတော့သည်။

“အသက်ကယ်ရတနာလား”

ပေါင့်ရူရွမ်း၏ ခန္ဓာကိုယ်ပေါ်တွင် အလွှာပါး ပေါ်လာသောအခါ ရွှီနင်လည်း သတိထားမိလိုက်သည်။

မီရှင်းယယ်က သူ့ကို အသက်ကယ်ရတနာ ပေးနိုင်သကဲ့သို့ အကြီးအကဲကူကျွမ့်ကလည်း သူ၏ အချစ်တော်တပည့်ကို အသက်ကယ်ရတနာ ပေးထားနိုင်သည်ပင်။

ယခုမူ ရွှီနင်သည် ပေါင့်ရူရွမ်းကို သတ်နိုင်မည်၊ မသတ်နိုင်မည်ကို မသေချာတော့ပေ။

သို့သော် သူ ကြိုးစားကြည့်ချင်သေးသည်။

“အစ်မကျယ်... ဒီမှာ အရင်နားနေလိုက်။ ကျွန်တော် သူ့နောက်ကို လိုက်သွားလိုက်ဦးမယ်”

ရွှီနင်က ခေါင်းလှည့်ကာ ပြောလိုက်သည်။

“ကောင်းပြီ”

ကျယ်ဝမ်ယွဲ့က အလျင်အမြန် ပြန်ဖြေလိုက်သည်။

ရွှီနင်သည် ပေါင့်ရူရွမ်းနောက်သို့ လိုက်ကာ တိုက်ခိုက်လေတော့သည်။

ပေါင့်ရူရွမ်းသည် တိုက်ခိုက်မှုကို ရင်ဆိုင်ရန် ဖိအားပေးခံရသည်။ သူသည် ခုခံရန် အင်အားမရှိသော်လည်း ကာကွယ်ရေးအလွှာပါး၏ အကူအညီကြောင့် ရွှီနင် သူ့ကို အနာတရဖြစ်အောင် မလုပ်နိုင်ခဲ့ပေ။

ဒေါင်... ဒေါင်... ဒေါင်...

ရွှီနင်က ပေါင့်ရူရွမ်း၏ ကာကွယ်ရေးအလွှာကို ဆက်တိုက်ခုတ်ပိုင်းလိုက်သည်။

“အလုပ်ဖြစ်တယ်ဟ”

အလွှာပါးကို ဆက်လက်ခုတ်ပိုင်းလိုက်သည်နှင့်အမျှ ပေါင့်ရူရွမ်း၏ ကာကွယ်ရေးအလွှာမှာ တဖြည်းဖြည်း ပါးလွှာလာကြောင်း ရွှီနင် သတိပြုမိလိုက်သည်။

“အစ်ကိုကြီးချန် ရောက်လာတော့မယ်။ ငါ တောင့်ခံထားမှ ဖြစ်မယ်”

ပေါင့်ရူရွမ်းက ပြန်လည်ခုခံကာ ဆက်တိုက် ဝင်ရောက်လာသော တိုက်ခိုက်မှုများကို တောင့်ခံထားလေသည်။

‘နောက်ထပ် အချက်တစ်ရာလောက်ဆိုရင် ပေါင့်ရူရွမ်းရဲ့ ခံစစ်ကို ငါ သေချာပေါက် ချိုးဖျက်နိုင်ပြီ’

ရွှီနင် ယုံကြည်မှု အပြည့်ရှိနေသည်။

သို့သော် ရွှီနင် ဆက်လက်တိုက်ခိုက်ရန် ပြင်လိုက်စဉ် ပေါင့်ရူရွမ်း၏ မျက်နှာပေါ်၌ ထူးဆန်းသော အပြုံးတစ်ခု ရှိနေသည်ကို ရုတ်တရက် သတိပြုမိလိုက်သည်။

မကြာမီမှာပင် ကြောက်မက်ဖွယ်ကောင်းသော စွမ်းအင်တစ်ခုက ရွှီနင်ကို လွှမ်းမိုးသွားလေသည်။

ရွှီနင် ရုတ်တရက် အသက်ရှူကျပ်သွားသလို ခံစားလိုက်ရသည်။

“သေစမ်း”

မိုးခြိမ်းသံကဲ့သို့ ဟိန်းဟောက်သံကြီး ထွက်ပေါ်လာလေသည်။

ရွှေရောင်သရဖူကိုဆောင်းကာ ယပ်တောင်ကို ကိုင်ဆောင်ထားသော ချန်ရှောင်းယိကို သူ မြင်လိုက်ရသည်။

သူက ရွှီနင်ကို လက်သီးဖြင့် ထိုးချလိုက်သည်။

မြေစွမ်းအင်များသည် သူ၏ လက်သီးပတ်လည်တွင် ချက်ချင်း စုစည်းသွားပြီး ကြီးမားသော ဖိအားကြီးတစ်ခု ကျရောက်လာလေသည်။

မရေမတွက်နိုင်သော ရှုပ်ထွေးသည့် မျဉ်းကြောင်းများပါဝင်သည့် မြေစွမ်းအင်လက်သီးကြီးတစ်ခု ပုံပေါ်လာပြီး အဝါရင့်ရောင် အလင်းတန်းများ ထွက်ပေါ်နေသည်။

ထိုလက်သီးကြီးသည် ရွှီနင်အား အသားစဉ်းကောအဖြစ် ပြောင်းလဲပစ်တော့မည့်အလား ကြမ်းတမ်းသော အရှိန်အဟုန်ဖြင့် ပြေးဝင်လာတော့သည်။

“ဒါက... တံဆိပ်တော်နယ်ပယ်ပါလား”

ရွှီနင်သည် အန္တရာယ်ကို ချက်ချင်း အာရုံခံမိလိုက်သည်။

ပေါင့်ရူရွမ်း၏ အကူအညီဖြစ်သော ချန်ရှောင်းယိသည် တံဆိပ်တော်နယ်ပယ်သို့ တက်လှမ်းသွားခဲ့ပြီ ဖြစ်သည်။

ဤတစ်ကြိမ်တွင်တော့ ရွှီနင် ထွက်ပြေးချင်သွားသည်။

သို့သော် မရေမတွက်နိုင်သော မျဉ်းကြောင်းများ ထွင်းထုထားသည့် ဧရာမလက်သီးကြီးမှာ အလွန်မြန်ဆန်ပြီး ကြောက်မက်ဖွယ်ကောင်းလွန်းလှသည်။

ရွှီနင် လုံးဝ ရှောင်တိမ်း၍ မရနိုင်တော့ပေ။ သူသည် လက်သီးချက်ကို ချက်ချင်း ထိမှန်သွားတော့သည်။

ရွှီနင်တစ်ယောက် အသားစဉ်းကောအဖြစ် ပြောင်းလဲသွားတော့မည်ဟု ခံစားလိုက်ရချိန်မှာပင် သူ၏ ရင်ဘတ်ပေါ်ရှိ အဝိုင်းရောင်ပုံဆောင်ခဲလေးမှာ ရုတ်တရက် လင်းလက်လာလေသည်။

စက်လုံးပုံသဏ္ဌာန် အလွှာပါးတစ်ခု ချက်ချင်းပေါ်လာပြီး ရွှီနင်၏ ခန္ဓာကိုယ်ကို ကာကွယ်ပေးလိုက်သည်။

အဝါရောင်လက်သီးကြီးသည် ရွှီနင်ကို မထိဘဲ စက်လုံးပုံအလွှာပါးနှင့်သာ ရိုက်ခတ်သွားလေသည်။

ဘုန်း...

ခွပ်...

လက်သီးချက် ကျရောက်သွားသည်။

မြေစွမ်းအင်လက်သီးကြီး ပျောက်ကွယ်သွားသလို ရွှီနင်ကို ကာကွယ်ထားသော စက်လုံးပုံအလွှာပါးသည်လည်း တစ်စစီ ကွဲကြေသွားတော့သည်။