နတ်ဘုရားအသွင်ပြောင်းအဆင့် တာအိုလက်တွဲဖော်၊ ချန်လန်ပင်လယ်ဒေသ၏ နံပတ်တစ်ဂိုဏ်း။

ဤတစ်ကြိမ် ရှစ်ဆင့်မြောက် မိုးကြိုးကပ်ဘေးသည် ခုနစ်ရက်နှင့် ခုနစ်ညတိုင်တိုင် ကြာမြင့်ခဲ့၏။ ထိုအတောအတွင်း မရေမတွက်နိုင်သော ခရမ်းရောင်ကပ်ဘေးမိုးကြိုးများ အဆက်မပြတ် ကျဆင်းခဲ့လေသည်။

ယဲ့ဖေးရိုသည် မိမိကိုယ်ကိုယ် သေဆုံးတော့မည်ဟု အကြိမ်ကြိမ် ထင်မှတ်ခဲ့ရပြီး ဤမိုးကြိုးကပ်ဘေးအောက်တွင် သေချာပေါက် ပြာကျသွားတော့မည်ဟု ခံစားခဲ့ရသည်။ သို့သော် လျှို့ဝှက်ဆန်းကြယ်သော ပုံရိပ်ယောင်တစ်ခုက ထွက်ပေါ်လာပြီး၊ သူမအတွက် ကျဆင်းလာသော ကပ်ဘေးမိုးကြိုးများကို တားဆီးပေးရုံသာမက ပတ်ဝန်းကျင်ရှိ မိုးကြိုးစွမ်းအင်များကိုပါ ဝါးမြိုပစ်လိုက်လေသည်။

မည်သည့်ကပ်ဘေးမိုးကြိုးမျှ သူမ၏ခန္ဓာကိုယ်အနီးသို့ တစ်လှမ်းပင် မတိုးနိုင်ခဲ့ချေ။ ထို့ကြောင့် သူမသည် ဤရှစ်ဆင့်မြောက် မိုးကြိုးကပ်ဘေးကို အခက်အခဲမရှိ အောင်မြင်စွာ ကျော်ဖြတ်နိုင်ခဲ့ခြင်း ဖြစ်ပေသည်။

“အောင်မြင်သွားပြီ...”

နောက်ဆုံးသော ကပ်ဘေးမိုးကြိုး ပျောက်ကွယ်သွားချိန်တွင် ယဲ့ဖေးရို အလွန်ဝမ်းသာသွားရသည်။ မိုင်သောင်းချီ ဖုံးလွှမ်းထားသော ကပ်ဘေးတိမ်တိုက်များ ပျောက်ကွယ်သွားပြီး နေရောင်ခြည် ပြန်လည်တောက်ပကာ လေထုမှာလည်း ကြည်လင်လတ်ဆတ်သွားသည်ကို သူမ မြင်တွေ့လိုက်ရသည်။

သူမသည် ယခုအခါ နတ်ဘုရားအသွင်ပြောင်း မိုးကြိုးကပ်ဘေးကို အပြီးတိုင် ကျော်ဖြတ်နိုင်ခဲ့ပြီဖြစ်ကြောင်း သိလိုက်ရလေသည်။ ယခုအချိန်မှစ၍ သူမသည် ဟင်းလင်းပြင်ကျယ်ကြီးထဲတွင် လွတ်လပ်စွာ ပျံသန်းနိုင်သော စစ်မှန်သည့် နတ်ဘုရားအသွင်ပြောင်းအဆင့် အရှင်သခင်တစ်ဦး ဖြစ်လာခဲ့ပြီ ဖြစ်၏။

ချန်လန်ပင်လယ်ဒေသတစ်ခုလုံးတွင် သူမသည် နံပါတ်တစ်ကျင့်ကြံသူ ဖြစ်လာခဲ့ပြီဟု ဆိုနိုင်ပေသည်။

မှန်ပေသည်၊ ကျင့်ကြံခြင်းလောက၏ အခြားသောအရပ်ဒေသများတွင်လည်း နတ်ဘုရားအသွင်ပြောင်းအဆင့် အရှင်သခင်များ ရှိနေဆဲဖြစ်ရာ၊ သူမသည် ကျင့်ကြံခြင်းလောကတစ်ခုလုံးတွင်တော့ နံပါတ်တစ်ကျင့်ကြံသူ မဟုတ်သေးချေ။

ဝုန်း...

ချက်ချင်းပင် ဟင်းလင်းပြင်ထဲမှ ကြီးမားသော ဖန်ဆင်းခြင်းချီအစုအဝေးများ ကျဆင်းလာလေသည်။ ဤသည်မှာ ကောင်းကင်နှင့်မြေကြီး၏ ဆုလာဘ်ပင် ဖြစ်၏။

မိုးကြိုးကပ်ဘေးကို ကျော်ဖြတ်ပြီးနောက် ကောင်းကင်ဘုံက ပေးသနားသော ဖန်ဆင်းခြင်းချီကို ရရှိခြင်းမှာ မည်သည့်ကျင့်ကြံသူအတွက်မဆို ကြီးမားသော ကံကောင်းခြင်း ဖြစ်ပေသည်။

“ဒါက...”

ယဲ့ဖေးရို အလွန်စိတ်လှုပ်ရှားနေပြီး ထိုဖန်ဆင်းခြင်းချီများကို အငမ်းမရ စုပ်ယူလိုက်တော့သည်။ မိုးကြိုးကပ်ဘေးကြောင့် ထိခိုက်ခဲ့သော သူမ၏ခန္ဓာကိုယ်ပေါ်ရှိ ဒဏ်ရာများနှင့် အမာရွတ်များအားလုံး ချက်ချင်းပင် ပြန်လည်ကုစားသွားပြီး ပျောက်ကွယ်သွားကြတော့သည်။

ခန္ဓာကိုယ်ထဲတွင် ကျန်ရှိနေသော မိုးကြိုးစွမ်းအင်အကြွင်းအကျန်များကိုလည်း လျင်မြန်စွာ မောင်းထုတ်လိုက်နိုင်လေသည်။ သူမ၏ နတ်ဘုရားဝိညာဉ်စွမ်းအားသည်လည်း ဆတိုးကိန်းဖြင့် တိုးတက်လာသည်ကို ခံစားလိုက်ရ၏။ ရှစ်ဆင့်မြောက် မိုးကြိုးကပ်ဘေးမှာ ကြောက်မက်ဖွယ်ကောင်းသော်လည်း ကျော်ဖြတ်နိုင်ပြီးပါက ရရှိလာမည့် အကျိုးကျေးဇူးမှာလည်း အံ့မခန်းပင် ဖြစ်ချေသည်။

ဤအချိန်တွင် မက်မွန်ပွင့်သခင်မနှင့် အခြားသူများသည်လည်း ကပ်ဘေးတိမ်တိုက်များ ပျောက်ကွယ်သွားသည်ကို မြင်တွေ့လိုက်ရသဖြင့် အတိုင်းအဆမရှိ ဝမ်းမြောက်နေကြတော့သည်။

ယဲ့ဖေးရိုသည် နတ်ဘုရားအသွင်ပြောင်း မိုးကြိုးကပ်ဘေးကို အောင်မြင်စွာ ကျော်ဖြတ်နိုင်ခဲ့ပြီဖြစ်ကာ စစ်မှန်သော နတ်ဘုရားအသွင်ပြောင်းအဆင့် အရှင်သခင်တစ်ဦး ဖြစ်လာပြီဖြစ်ကြောင်း၊ ထို့အပြင် လက်ရှိ ချန်လန်ပင်လယ်ဒေသ၏ တစ်ဦးတည်းသော နတ်ဘုရားအသွင်ပြောင်းအဆင့် အရှင်သခင် ဖြစ်လာပြီဖြစ်ကြောင်း သူမတို့ သိလိုက်ကြလေသည်။

“မမယဲ့ နတ်ဘုရားအသွင်ပြောင်းအဆင့် အရှင်သခင် ဖြစ်လာတာကို ဂုဏ်ပြုပါတယ်ရှင်...”

မက်မွန်ပွင့်သခင်မနှင့် အခြားသူများသည် ယဲ့ဖေးရိုကို စိတ်လှုပ်ရှားစွာ ကြည့်လိုက်ကြတော့သည်။

“အတူတူ ဝမ်းသာရတာပေါ့... မင်းတို့လည်း စိုးရိမ်စရာမလိုပါဘူး၊ မင်းတို့လည်း အနှေးနဲ့အမြန် ဒီအဆင့်ကို တက်လှမ်းနိုင်မှာပါ... နောက်ဆိုရင် ငါတို့ ရွှမ်ဟွမ်ဂိုဏ်းမှာ နတ်ဘုရားအသွင်ပြောင်းအဆင့် အရှင်သခင် ဆယ်ဂဏန်းလောက် ပေါ်ထွက်လာလိမ့်မယ်...”

ယဲ့ဖေးရိုက ပြုံးလျက် ဝမ်းသာအားရ ပြောလိုက်လေသည်။ သူမသည် အားပေးစကား ပြောနေခြင်း မဟုတ်ဘဲ လက်တွေ့အရှိတရားကို ပြောဆိုနေခြင်း ဖြစ်၏။

အဘယ်ကြောင့်ဆိုသော် သူမ၏ယောက်ျားသည် နတ်ဘုရားလောကမှ ဆင်းသက်လာသော နတ်သားတစ်ပါး သို့မဟုတ် အင်မော်တယ်တစ်ပါး ပြန်လည်ဝင်စားလာသူ ဖြစ်နိုင်သည်ဟု သူမ ယုံကြည်ထားသောကြောင့် ဖြစ်သည်။ သို့မဟုတ်ပါက ဤမျှ တတ်စွမ်းနိုင်စရာ အကြောင်းမရှိပေ။

အမှန်အတိုင်း ပြောရလျှင် သူမသည် ယခုတစ်ကြိမ် ကပ်ဘေးကို ကျော်ဖြတ်နိုင်မည် မဟုတ်ဟု ထင်မြင်ခဲ့သော်လည်း သူမ၏ယောက်ျားက အရေးကြီးသော အချိန်တွင် လှုပ်ရှားပြီး သူမကို သေဘေးမှ ကယ်တင်ပေးခဲ့ခြင်း ဖြစ်ပေသည်။

ထို့ကြောင့် သူမ၏ယောက်ျားသာ ကူညီမည်ဆိုပါက သူမ၏ ညီမများ နတ်ဘုရားအသွင်ပြောင်းအဆင့် ဖြစ်လာရန်မှာ ထင်သလောက် မခက်ခဲနိုင်ကြောင်း သူမ ခံစားမိနေခြင်း ဖြစ်ပေသည်။

“ကဲ... စကားတွေ အများကြီး ပြောမနေကြနဲ့ဦး… အခု ပတ်ဝန်းကျင်မှာ ဖန်ဆင်းခြင်းချီတွေ ပြည့်နေတာ… ဒါက ကြီးမားတဲ့ အခွင့်အရေးပဲ… ဒီဖန်ဆင်းခြင်းချီတွေကို စုပ်ယူနိုင်ရင် နှစ်ပေါင်းတစ်ရာ ကြိုးစားကျင့်ကြံရတဲ့ အကျိုးကျေးဇူးကို ရနိုင်တယ်… ဒီအခွင့်အရေးကို အလဟဿ အဖြစ်မခံကြနဲ့...”

ကျိုးစွေ့က သတိပေးလိုက်လေသည်။

“ဟုတ်ကဲ့ပါ၊ သိပါပြီ...”

ဤစကားကို ကြားသောအခါ အမျိုးသမီးများအားလုံး ခေါင်းညိတ်လိုက်ကြပြီး မြေပြင်ပေါ်တွင် တင်ပျဉ်ခွေထိုင်ကာ ကျင့်စဉ်များကို လည်ပတ်လိုက်ကြတော့သည်။ ဖန်ဆင်းခြင်းချီများ မပျောက်ကွယ်သွားမီ တစ်မျှင်ချင်းစီကို ဖမ်းယူစုပ်ယူရန် ကြိုးစားနေကြလေတော့သည်။

ယခုတစ်ကြိမ် ရှစ်ဆင့်မြောက် မိုးကြိုးကပ်ဘေးမှ ရရှိသော ဖန်ဆင်းခြင်းချီမှာ အလွန်တရာ များပြားလွန်းလှသဖြင့် ယခင် ဝိညာဉ်သန္ဓေသား မိုးကြိုးကပ်ဘေးနှင့် လုံးဝ နှိုင်းယှဉ်၍ မရနိုင်တော့ပေ။ အဆပေါင်း ရာချီ ကွာခြားလှပေသည်။

............

မကြာမီအချိန်အတွင်း ရွှမ်ဟွမ်ကျွန်း၏ ပိတ်ဆို့မှု ဖွင့်လှစ်လိုက်သည့်သတင်းသည် ရွှမ်ဟွမ်ဂိုဏ်းတစ်ခုလုံးသို့ လျင်မြန်စွာ ပျံ့နှံ့သွားလေရာ ကျင့်ကြံသူ အများအပြား သိရှိသွားကြတော့သည်။ သူတို့သည်လည်း အရူးများ မဟုတ်ကြသဖြင့် ဤသတင်းက ဘာကို ဆိုလိုကြောင်း ကောင်းစွာ သဘောပေါက်ကြလေသည်။

“အောင်မြင်သွားပြီ… မမယဲ့က နတ်ဘုရားအသွင်ပြောင်း မိုးကြိုးကပ်ဘေးကို အောင်မြင်စွာ ကျော်ဖြတ်ပြီး နတ်ဘုရားအသွင်ပြောင်းအဆင့်ကို တက်လှမ်းနိုင်ခဲ့ပြီ...”

မြူနှင်းတောင်ထွတ်မှ ဝိညာဉ်သန္ဓေသားအဆင့် အမျိုးသမီးကျင့်ကြံသူတစ်ဦးက စိတ်လှုပ်ရှားစွာ အော်ဟစ်လိုက်လေသည်။

ဝိညာဉ်သန္ဓေသားအဆင့် ကျင့်ကြံသူတစ်ဦးအနေဖြင့် တည်ငြိမ်မှု ရှိရမည်ဖြစ်သော်လည်း ယခုအချိန်တွင်မူ စိတ်လှုပ်ရှားမှုကို မထိန်းချုပ်နိုင်တော့ပေ။ အဘယ်ကြောင့်ဆိုသော် ဤကိစ္စသည် အလွန်တရာ ကြီးကျယ်လှသောကြောင့် ဖြစ်၏။

ဤသတင်းသည် ရွှမ်ဟွမ်ဂိုဏ်းကိုသာမက ချန်လန်ပင်လယ်ဒေသတစ်ခုလုံးကိုပါ တုန်လှုပ်သွားစေမည်မှာ သေချာလှပေသည်။ ဤသည်မှာ ချန်လန်ပင်လယ်ဒေသတွင် နှစ်ပေါင်းသောင်းချီအတွင်း ပထမဆုံး ပေါ်ထွက်လာသော နတ်ဘုရားအသွင်ပြောင်းအဆင့် အရှင်သခင်ပင် ဖြစ်ချေသည်။

ဤအချက်၏ အရေးပါမှုမှာ စိတ်ကူးယဉ်နိုင်စွမ်းထက် ကျော်လွန်နေလေသည်။ အကယ်၍ ယဲ့ဘိုးဘေးသာ ဆန္ဒရှိပါက ချန်လန်ပင်လယ်ဒေသတစ်ခုလုံးကို ချက်ချင်း သိမ်းပိုက်ပြီး တစ်ခုတည်းသော အရှင်သခင်အဖြစ် စိုးမိုးနိုင်ပေသည်။

“ဟားဟား… ငါ သိတာပေါ့… ယဲ့ဘိုးဘေးက သေချာပေါက် နတ်ဘုရားအသွင်ပြောင်းအဆင့်ကို အောင်မြင်မှာပဲလို့...”

“ဒီကိစ္စက တကယ့်ကို ရုတ်တရက်ကြီးပဲဟေ… တခြား ဝိညာဉ်သန္ဓေသားဂိုဏ်းတွေသာ ဒီသတင်းကို သိသွားရင် ဘယ်လိုတွေ ဖြစ်ကုန်ကြမလဲ မသိဘူး...”

“ဒီနေ့ကစပြီး ငါတို့ ရွှမ်ဟွမ်ဂိုဏ်းက နတ်ဘုရားအသွင်ပြောင်းအဆင့်ဂိုဏ်း ဖြစ်သွားပြီ...”

ကျင့်ကြံသူအများအပြားသည် စိတ်လှုပ်ရှားစွာ ဆွေးနွေးနေကြတော့သည်။ ယခုအချိန်မှစ၍ သူတို့သည် နတ်ဘုရားအသွင်ပြောင်းအဆင့်ဂိုဏ်း၏ တပည့်များ ဖြစ်လာပြီဖြစ်ကြောင်း တွေးမိတိုင်း ဝမ်းသာမဆုံး ဖြစ်နေကြ၏။

ပုံမှန်အားဖြင့် ဝိညာဉ်သန္ဓေသားအဆင့်ဂိုဏ်းနှင့် နတ်ဘုရားအသွင်ပြောင်းအဆင့်ဂိုဏ်းသို့ ဝင်ရောက်နိုင်ရန် ခက်ခဲမှုမှာ လုံးဝ ကွာခြားလှပေသည်။ သူတို့ခမျာ ဘာမှ ကြိုးစားစရာမလိုလိုက်ဘဲ ဂိုဏ်းကသာ ကြိုးစားလိုက်သဖြင့် နတ်ဘုရားအသွင်ပြောင်းအဆင့်ဂိုဏ်းသားများ ဖြစ်လာခဲ့ကြရခြင်းမှာ တကယ့်ကို ကံကောင်းလှသည်ဟု ဆိုရပေမည်။

“ဒါကလည်း ဂိုဏ်းချုပ်ကျိုးရဲ့ စေတနာကြောင့်ပါပဲ… ဂိုဏ်းချုပ်ကျိုးသာ နတ်ဘုရားအသွင်ပြောင်းဆေးလုံးကို ဖော်စပ်ပေးပြီး အင်မော်တယ်မူလချီကို ထုတ်ယူမပေးခဲ့ရင်… မမယဲ့လည်း နတ်ဘုရားအသွင်ပြောင်းအဆင့်ကို တက်လှမ်းနိုင်ဖို့ အခွင့်အရေး ရှိမှာမဟုတ်ဘူး...”

မြူနှင်းတောင်ထွတ်မှ ဝိညာဉ်သန္ဓေသားအဆင့် ကျင့်ကြံသူတစ်ဦးက သက်ပြင်းချလျက် ပြောလိုက်လေသည်။ အမှန်အတိုင်း ပြောရလျှင် ရွှမ်ဟွမ်ဘိုးဘေးသည် တကယ့်ကို စိတ်ထားကြီးမြတ်လှသည်ဟု သူမ ခံစားရ၏။

မိမိ၏ တက်လှမ်းနိုင်မည့် အခွင့်အရေးကို စတေးပြီး မိမိ၏ တာအိုလက်တွဲဖော်ကို အရင် တက်လှမ်းခွင့်ပေးခြင်းမှာ မည်မျှအထိ မြင့်မြတ်သောလုပ်ရပ် ဖြစ်ပါသနည်း။

“ကျုပ် သိတာပေါ့… စီနီယာကျိုးက အချစ်ကြီးတဲ့ ယောက်ျားကောင်းတစ်ယောက်ပဲ...”

“လူတွေက စီနီယာကျိုးကို မိန်းမရှုပ်တယ်လို့ ပြောကြပေမယ့် တကယ့်တော့ သူ့ဘေးနားကလူတွေပဲ သူ ဘယ်လောက် စိတ်ရင်းကောင်းတယ်ဆိုတာ သိကြတာ… စီနီယာကျိုးက သူ့ရဲ့ တာအိုလက်တွဲဖော် တစ်ယောက်ချင်းစီအပေါ်မှာ အသည်းနှလုံးပုံပေးပြီး ချစ်တာလေ...”

“ဟုတ်တာပေါ့… တခြား ဘယ်ဝိညာဉ်သန္ဓေသားကျင့်ကြံသူကများ နတ်ဘုရားအသွင်ပြောင်းဆေးလုံးနဲ့ အင်မော်တယ်မူလချီကို ကိုယ့်အတွက်ကိုယ် အသုံးမပြုဘဲ သူ့မိန်းမကို ပေးသုံးရဲမှာလဲ… စီနီယာကျိုးကလွဲလို့ တခြား ဘယ်ယောက်ျားမှ ရှိမှာမဟုတ်ဘူး...”

“အချစ်ဆိုတာ လုပ်ရပ်နဲ့ သက်သေပြရတာလေ၊ စကားတွေ အများကြီး ပြောနေလို့ မရဘူး… အရေးကြီးတဲ့ အချိန်ကျမှ လူတစ်ယောက်ရဲ့ စရိုက်က ပေါ်လာတာ...”

“ဂိုဏ်းချုပ်ဘေးနားက တာအိုလက်တွဲဖော်တွေ တစ်ယောက်မှ ထွက်မသွားကြတာကို ကြည့်ရင် ဂိုဏ်းချုပ်ရဲ့ စရိုက်ကို သိနိုင်တယ်… တကယ်လို့ သူသာ ယောက်ျားဆိုးတစ်ယောက်ဆိုရင် ဘယ်သူက သူ့ဘေးမှာ ဒီလောက်ကြာကြာ နေမှာလဲ...”

“နှမြောစရာကောင်းတာက ဂိုဏ်းချုပ်က ကျွန်မလို အလှအပကို မျက်စိထဲ မထည့်တာပဲ… မဟုတ်ရင် ကျွန်မလည်း ဂိုဏ်းချုပ်ရဲ့ ကိုယ်လုပ်တော်အဖြစ်နေပြီး သားသမီးတွေ မွေးပေးချင်သေးတယ်...”

“အမလေးဟယ်… အိပ်မက်တွေလာမက်နေတယ်… ဂိုဏ်းချုပ်ရှေ့မှာ လာပြီး ဟန်ဆောင်ပြနေတဲ့ အမျိုးသမီးကျင့်ကြံသူတွေ မနည်းဘူး၊ ဒါပေမဲ့ ဂိုဏ်းချုပ်က အဖက်တောင်မလုပ်ဘူး… ဂိုဏ်းချုပ် စိတ်ဝင်စားဖို့ဆိုရင် ယဲ့ဘိုးဘေးလိုမျိုး နတ်သမီးရှုံးတဲ့ အလှမျိုးမှ ဖြစ်မှာ...”

ရွှမ်ဟွမ်ဂိုဏ်းမှ အမျိုးသမီးကျင့်ကြံသူ အများအပြား ဆွေးနွေးနေကြတော့သည်။

......

မကြာမီအချိန်အတွင်း ယဲ့ဖေးရို နတ်ဘုရားအသွင်ပြောင်းအဆင့်သို့ တက်လှမ်းနိုင်သည့် သတင်းသည် ချန်လန်ပင်လယ်ဒေသတစ်ခုလုံးသို့ လေပြင်းမုန်တိုင်းကဲ့သို့ ပျံ့နှံ့သွားလေသည်။

ဝူကျိမဟာမိတ်အဖွဲ့၊ ကောင်းကင်ဓားဂိုဏ်း၊ ရွှမ်ပေါင်မျှော်စင်၊ ဆည်းဆာဂိုဏ်း၊ ကောင်းကင်မိစ္ဆာဂိုဏ်း၊ ဟေးရှားနန်းတော်နှင့် ရွှမ်ယင်ဂိုဏ်း အစရှိသော အင်အားစုများအားလုံး ချက်ချင်း သိရှိသွားကြတော့သည်။

ဤသတင်းသည် ဝိညာဉ်သန္ဓေသားအဆင့် အင်အားစုများအားလုံးကို အကြီးအကျယ် တုန်လှုပ်သွားစေခဲ့လေ၏။ ချန်လန်ပင်လယ်ဒေသတွင် ဤမျှလျင်မြန်စွာ နတ်ဘုရားအသွင်ပြောင်းအဆင့် အရှင်သခင်တစ်ဦး ပေါ်ထွက်လာလိမ့်မည်ဟု မည်သူမျှ ထင်မှတ်မထားခဲ့ကြပေ။