ဟယ်ဟွမ်းဂိုဏ်းချုပ်၊ အရှေ့ပိုင်းကုန်းမြေတိုက်ကြီး၏ အလှဆုံးအမျိုးသမီး၊ ကြွေကျသွားသော ဟယ်ဟွမ်းဂိုဏ်း အမျိုးသမီးကျင့်ကြံသူများ(၄)။

“ထားလိုက်ပါတော့… အရှေ့ပိုင်းကုန်းမြေတိုက်ကြီးကလည်း ငါနဲ့ သိပ်မှ မဆိုင်တာ...”

“ဘာပဲဖြစ်ဖြစ် ဒီမှာ နတ်ဘုရားအသွင်ပြောင်းအဆင့် ဂိုဏ်းတွေ အများကြီးရှိနေပြီး သန်မာတဲ့သူတွေ အများကြီးပဲဟာ… ငါလာရှင်းဖို့ ဘယ်လိုမှ အလှည့်မရောက်နိုင်ပါဘူး...”

“အခု အရေးအကြီးဆုံးက နတ်ဆိုးချုပ်တောင်ကြားက ကိစ္စပဲ… နတ်ဘုရားအသွင်ပြောင်းအဆင့် နတ်ဆိုးကို လုံးဝ ထွက်ပြေးခွင့်ပေးလို့ မဖြစ်ဘူး...”

ကျိုးစွေ့၏ မျက်လုံးများ ကျဉ်းမြောင်းသွားပြီး တောက်ပသော အလင်းရောင်များ ထွက်ပေါ်လာလေသည်။

ဤတစ်ကြိမ် လှုပ်ရှားမှုအတွက် သူသည် ‘တည်နေရာရွှေ့ပြောင်းကူ’၊ ‘အိပ်မက်ဝိညာဉ်ကူ’၊ ‘မိုးကြိုးကပ်ဘေးကူ’၊ ‘အစီအရင်နှလုံးသားကူ’ အစရှိသည့် ကူပိုးကောင်များကို ယူဆောင်လာခဲ့သည်။

မည်သို့ပင်ဖြစ်စေ ဤသည်မှာ နတ်ဘုရားအသွင်ပြောင်းအဆင့် နတ်ဆိုးဖြစ်ရာ၊ မည်မျှပင် သတိထားစေကာမူ အလွန်အကျွံ ဖြစ်မည် မဟုတ်ချေ။

...

ရက်အနည်းငယ် ကြာပြီးနောက်…။

ဟယ်ဟွမ်းဂိုဏ်း၊ ပင်မတောင်ထွတ်ဖြစ်သော ဟယ်ဟွမ်းတောင်ထွတ်…။

ဤနေရာသည် ဟယ်ဟွမ်းဂိုဏ်းချုပ် ချိုးရူယွီ နေထိုင်သောနေရာ ဖြစ်လေ၏။

ဂူဗိမာန်တစ်ခုအတွင်း၌ အဖြူရောင်ဂါဝန်ရှည်ကို ဝတ်ဆင်ထားသော ပြိုင်ဘက်ကင်း အလှဘုရင်မတစ်ဦးသည် ဖျာကြမ်းပေါ်တွင် တင်ပျဉ်ခွေထိုင်နေလေသည်။

အဝေးမှ ကြည့်လိုက်လျှင် သူမသည် ကျောက်စိမ်းဖြူကဲ့သို့ လှပသော အမျိုးသမီးတစ်ဦးဖြစ်ပြီး၊ ညှို့ဓာတ်ပြင်းသော ဟန်ပန်၊ အလွန်လှပသော ရုပ်ရည်၊ သွယ်လျသော ခန္ဓာကိုယ်၊ ဖြူဝင်းသော အသားအရေ၊ ချယ်ရီသီးကဲ့သို့ နီမြန်းသောနှုတ်ခမ်း၊ မှင်ဖြင့် ဆွဲထားသကဲ့သို့ လှပသော မျက်ခုံး၊ ဆောင်းဦးရာသီမှ ရေကဲ့သို့ ကြည်လင်သော မျက်ဝန်းများ ရှိကာ ဖော်ပြ၍မရနိုင်သော နူးညံ့မှုနှင့် မွန်မြတ်မှုများ ရှိနေလေ၏။

ကရုဏာနတ်သမီးကဲ့သို့ပင် ဖြစ်ချေသည်။

ဖျာကြမ်းပေါ်တွင် တင်ပျဉ်ခွေထိုင်နေသည်မှာ ကောင်းကင်ဘုံမှ ဆင်းသက်လာသော နတ်သမီးတစ်ပါးကဲ့သို့ မွန်မြတ်လှပြီး ထိပါးစော်ကား၍ မရနိုင်ချေ။

အလွန်လှပသော မျက်နှာလေးမှာ ဆယ့်ခြောက်နှစ်အရွယ် မိန်းမပျိုလေးတစ်ဦးကဲ့သို့ ဖြူစင်နေပြီး လောကအကြောင်း ဘာမျှ မသိသေးသူနှင့် တူနေလေသည်။

သူမ၏ ခန္ဓာကိုယ်ကောက်ကြောင်းများမှာလည်း ထင်ရှားပေါ်လွင်လှပြီး မယုံနိုင်လောက်အောင် ပြီးပြည့်စုံကာ သေသေချာချာ ထုဆစ်ထားသကဲ့သို့ ဖြစ်နေချေ၏။

မည်သည့်နေရာမျှ မပြီးပြည့်စုံသော အပြစ်အနာအဆာဟူ၍ မရှိချေ။

ရိုးရိုးသားသားဆိုရလျှင် ပြင်ပလူများသာ ဤအမျိုးသမီးကို မြင်တွေ့ရပါက၊ ဟယ်ဟွမ်းဂိုဏ်းချုပ် ဖြစ်မည်ဟု လုံးဝ ယုံကြည်ကြမည် မဟုတ်ပေ။

ဂုဏ်သတင်း ကြီးမားသော သမာသမတ်ကျသည့် ဂိုဏ်းတစ်ခုခုမှ သူတော်စင်မတစ်ဦးဟုသာ ထင်မှတ်ကြမည် ဖြစ်ပေ၏။

ထို့ကြောင့် ဤကဲ့သို့သော အလှအပမျိုးကို အရှေ့ပိုင်းကုန်းမြေတိုက်ကြီး၏ နံပတ်တစ်အလှမယ်ဟု တင်စားခေါ်ဝေါ်ကြပြီး လိုက်လံပိုးပန်းသူများ မရေမတွက်နိုင်အောင် ရှိလေသည်။

“ကျောက်စိမ်းမိန်းမပျိုကျင့်စဉ်က တကယ်ပဲ အတားအဆီးကို ရောက်သွားပြီပဲ...”

“ကောင်းကင်နဲ့ မြေကြီးက ချို့ယွင်းနေပြီဆိုတော့… နတ်ဘုရားအသွင်ပြောင်း နှောင်းပိုင်းအဆင့်ကို ရောက်အောင် ကျင့်ကြံပြီး ဝိညာဉ်လောကကို တက်လှမ်းဖို့ဆိုတာ အရမ်းခက်ခဲသွားပြီ...”

ဤအခိုက်အတန့်တွင် ချိုးရူယွီသည် မျက်ဝန်းလှလှလေးများကို ဖွင့်လိုက်ရာ၊ မျက်လုံးသူငယ်အိမ်၏ အနက်ပိုင်းထဲတွင် မရေမတွက်နိုင်သော မှော်သင်္ကေတ လျှို့ဝှက်ချက်များ လှည့်ပတ်နေသကဲ့သို့ ရှိပြီး၊ သူမ၏ ဖြူဝင်းသော အသားအရေပေါ်တွင်လည်း သိပ်သည်းသော လျှို့ဝှက်ဆန်းကြယ်သည့် မှော်သင်္ကေတများ ပေါ်လာလေ၏။

သူမ၏ တစ်ကိုယ်လုံးသည် ကျောက်စိမ်းတုံးကဲ့သို့ ပြီးပြည့်စုံပြီး အပြစ်အနာအဆာကင်းကာ ကြည်လင်တောက်ပနေချေသည်။

ဤသည်မှာ သူမ ပိုင်ဆိုင်ထားသော ထူးခြားသည့် ခန္ဓာကိုယ်ဖြစ်သည့် ကျောက်စိမ်းဖြူခန္ဓာပင် ဖြစ်လေသည်။

ရိုးရိုးသားသားဆိုရလျှင် ဤခန္ဓာကိုယ်သည် အလွန်တရာ သန်မာပြီး ခန္ဓာကိုယ်အတွင်းရှိ အရှိန်အဝါအားလုံးကို အပြင်သို့ စိမ့်မထွက်အောင် ပိတ်လှောင်ထားနိုင်စွမ်း ရှိပေသည်။

ကျင့်ကြံလေလေ ခန္ဓာကိုယ်က ပိုမို သန်မာလာလေလေ ဖြစ်ပေ၏။

သူမ၏ ညှို့ဓာတ်ပြင်းပြီး အားနည်းကာ အနိုင်ကျင့်ရ လွယ်ကူသကဲ့သို့ ဖြစ်နေသော အသွင်အပြင်ကြောင့် အလှည့်စားမခံသင့်ပေ။

တကယ့် လက်တွေ့တွင် သူမသည် သန်မာသော ရုပ်ခန္ဓာကျင့်ကြံသူတစ်ဦးဖြစ်ပြီး၊ သေးငယ်သော လက်တစ်စုံသည် တောင်ထွတ်များကို အချိန်မရွေး ရိုက်ချိုးနိုင်ကာ ကမ္ဘာမြေကိုပင် ဆွဲဖြဲနိုင်စွမ်း ရှိပေ၏။

ယခင်က ကျင့်ကြံသူတစ်ဦးသည် သူမ၏ တိုက်ခိုက်ရေးစွမ်းရည်ကို အထင်သေးခဲ့သဖြင့်၊ သူမ၏ လက်ဝါးတစ်ချက်တည်းဖြင့် အသားကြိတ်စက်ထဲ ထည့်ခံရသကဲ့သို့ ဖြစ်သွားခဲ့သော်လည်း၊ သွေးများသည် သူမ၏ အရေပြားကိုပင် စွန်းထင်းနိုင်ခြင်း မရှိခဲ့ပေ။

ဤသည်မှာ ကျောက်စိမ်းဖြူခန္ဓာ၏ သန်မာမှုပင် ဖြစ်လေသည်။

အမှန်တကယ်တွင် ဤသည်မှာ ‘ကျောက်စိမ်းမိန်းမပျိုကျင့်စဉ်’၏ အကျိုးကျေးဇူးလည်း ဖြစ်ပေ၏။

ဤကျင့်စဉ်သည် ဝိညာဉ်လောကမှ လာသော အတုမဲ့ကျင့်စဉ်တစ်ခု ဖြစ်ပြီး အဆင့်အတန်း အလွန် မြင့်မားသည်ဟု ကောလာဟလများ ရှိလေသည်။

၎င်းသည် ခန္ဓာကိုယ်အတွင်းရှိ သန့်စင်ယင်ချီကို အသုံးပြု၍ ခန္ဓာကိုယ်ကို သန့်စင်နိုင်ပြီး၊ ကျင့်ကြံမှု မြင့်မားလေလေ ခန္ဓာကိုယ်က ပိုမို ကြောက်မက်ဖွယ် ကောင်းလေလေ ဖြစ်ပေသည်။

ချိုးရူယွီသည် ဟယ်ဟွမ်းဂိုဏ်း တည်ထောင်ခဲ့သည့် နှစ်သောင်းချီကာလအတွင်း၊ ‘ကျောက်စိမ်းမိန်းမပျိုကျင့်စဉ်’ကို နတ်ဘုရားအသွင်ပြောင်းအဆင့်အထိ ကျင့်ကြံနိုင်ခဲ့သော ပထမဆုံး အမျိုးသမီးကျင့်ကြံသူလည်း ဖြစ်ပေ၏။

မှန်ပေသည်၊ ဤအရာအားလုံးသည် သူမ၏ ကျောက်စိမ်းဖြူခန္ဓာကြောင့်ပင် ဖြစ်လေသည်။

ဤခန္ဓာကိုယ်သည် သူမအား သန့်စင်ယင်ချီ၏ လောင်ကျွမ်းမှုနှင့် နှိပ်စက်မှုကို ခံနိုင်ရည်ရှိစေပြီး၊ သန့်စင်ယင်ချီ၏ နှိပ်စက်မှုကြောင့် သတိလစ်ရူးသွပ်သွားခြင်းမျိုး မဖြစ်စေနိုင်ချေ။

ပြင်ပတွင် သူမအား မွေးရာပါ ကျောက်ရုပ်မိန်းမဟု ကောလာဟလလွှင့်သူ အများအပြား ရှိလေသည်။

(စကားချပ် - ကျောက်ရုပ်မိန်းမဆိုတာ ခံစားချက်မဲ့သူ လို့ ဆိုလိုတာပါ။)

ဤသည်မှာ အမှန်တကယ်ပင် ရယ်စရာ ကောင်းလှပေ၏။

မည်သို့ပင်ဖြစ်စေ သာမန် မွေးရာပါ ကျောက်ရုပ်မိန်းမများသာ အမှန်တကယ် ‘ကျောက်စိမ်းမိန်းမပျိုကျင့်စဉ်’ကို ကျင့်ကြံနိုင်မည်ဆိုပါက၊ လွန်ခဲ့သော နှစ်သောင်းချီကာလအတွင်း အမျိုးသမီးကျင့်ကြံသူ မည်မျှ အောင်မြင်ခဲ့မည်ကို သိနိုင်မည်မဟုတ်ချေ။

ယခုအချိန်အထိ သူမတစ်ဦးတည်းသာ အောင်မြင်လိမ့်မည် မဟုတ်ပေ။

ကျောက်စိမ်းဖြူခန္ဓာရှိမှသာ သန့်စင်ယင်ချီ၏ နှိပ်စက်မှုကို ခံနိုင်ရည် ရှိပေမည်။

ထို့အပြင် နှိပ်စက်ခံရလေလေ၊ သူမ၏ ကျောက်စိမ်းဖြူခန္ဓာက ပိုမို သန်မာလာလေလေ ဖြစ်ပြီး ခန္ဓာကိုယ်ပေါ်ရှိ အညစ်အကြေးများကို ပိုမို ဖယ်ရှားနိုင်လေလေ ဖြစ်ပေ၏။

ဤသည်မှာ အစစ်အမှန် ကျောက်စိမ်းဖြူနှင့် တူညီပြီး ပွတ်သပ်ကစားလေလေ ပိုမို ကြည်လင်တောက်ပလာလေလေ ဖြစ်ပေသည်။

မှန်ပေသည်၊ ပြင်ပမှလူများ ဤကဲ့သို့ ကောလာဟလ လွှင့်နေသည်ကို ချိုးရူယွီလည်း သဘောကျနေလေသည်။

ဤသို့ဆိုလျှင် မိမိ ခန္ဓာကိုယ်၏ လျှို့ဝှက်ချက်ကို ပိုမို ဖုံးကွယ်ထားနိုင်မည် မဟုတ်ပါလော။

ရန်သူများ မိမိ၏လျှို့ဝှက်ချက်ကို ရိပ်မိသွားမည်ကို ကာကွယ်နိုင်ခြင်းသည် အကျိုးကျေးဇူး အပြည့်ရှိပြီး ဆိုးကျိုး လုံးဝမရှိသော ကိစ္စပင် ဖြစ်လေ၏။

သို့သော် ယနေ့အချိန်အထိ ချိုးရူယွီသည် မိမိ၏ ကျင့်ကြံခြင်းမှာ ပိုမို ခက်ခဲလာကြောင်း တွေ့ရှိခဲ့ရလေသည်။

မည်သို့ပင်ဖြစ်စေ သူမသည် နတ်ဘုရားအသွင်ပြောင်းအဆင့်သို့ တက်လှမ်းသွားပြီဖြစ်ရာ၊ ခန္ဓာကိုယ်အတွင်းရှိ သန့်စင်ယင်ချီမှာ အဆပေါင်း ဆယ်ဂဏန်းမက ပိုမို ပြင်းထန်လာခဲ့လေသည်။

သူမ၏ ကျောက်စိမ်းဖြူခန္ဓာပင်လျှင် အနည်းငယ် မခံနိုင်သကဲ့သို့ ဖြစ်လာခဲ့လေ၏။

ထို့ကြောင့် သူမသည် ဂူဗိမာန်ထဲတွင် နေထိုင်ကာ အချိန်တိုင်း သန့်စင်ယင်ချီ၏ နှိပ်စက်မှုကို ခံနေရခြင်း ဖြစ်ပေသည်။

“သန့်စင်ယန်ချီကို ရှာပြီး ခြေဖျက်ဖို့ တကယ်ပဲ လိုအပ်နေတာလား...”

“ပြဿနာက ဘယ်ယောက်ျားက ငါ့ကိုယ်ပေါ်က သန့်စင်ယင်ချီကို ခံနိုင်ရည် ရှိမှာလဲ...”

“အနားကို ရောက်လာတာနဲ့ ခန္ဓာကိုယ်ထဲက ယန်ချီတွေကြောင့် စုပ်ယူခံရပြီး အရိုးစု ဖြစ်သွားလောက်တယ်...”

ချိုးရူယွီမှာ ဘာမှ မတတ်နိုင်သလို ဖြစ်နေရလေသည်။

အဘယ်ကြောင့်ဆိုသော် သူမသည် အမှန်တကယ်ပင် သန်မာလွန်းလှပြီး၊ အသက် (၁၆၀၀) အရွယ်ဖြင့် နတ်ဘုရားအသွင်ပြောင်း အစောပိုင်းအဆင့် ကျင့်ကြံသူ ဖြစ်နေသောကြောင့်ပင်။

ဤသည်မှာ သာမန် ကျင့်ကြံသူများနှင့် ဧကန်မုချ တစ်ဆင့်တည်း မဟုတ်သော ဖြစ်တည်မှုပင် ဖြစ်လေ၏။

သာမန် အမျိုးသားကျင့်ကြံသူများအနေဖြင့် သူမနှင့် တူနှစ်ကိုယ်ကျင့်ကြံရန် ကြိုးစားခြင်းမှာ ရိုးရှင်းစွာပင် စိတ်ကူးယဉ်နေခြင်းသာ ဖြစ်ချေသည်။

မိမိ၏ ခန္ဓာကိုယ်အနီးသို့ ရောက်လာရုံဖြင့် သန့်စင်ယင်ချီ၏ စားသုံးမှုကို ခံရမည်ဖြစ်ပြီး၊ ခန္ဓာကိုယ်အတွင်းရှိ ယန်ချီများကို ချက်ချင်း လုယူခံလိုက်ရမည် ဖြစ်ပေသည်။

မျက်စိတစ်မှိတ်အတွင်း အလောင်းခြောက်ကြီး တစ်ခုအဖြစ် ပြောင်းလဲသွားမည် ဖြစ်၏။

အဆင့်တူ နတ်ဘုရားအသွင်ပြောင်းအဆင့် ပုဂ္ဂိုလ်ကြီးမှသာလျှင် မိမိ ခန္ဓာကိုယ်အတွင်းရှိ သန့်စင်ယင်ချီကို ခံနိုင်ရည် ရှိပေမည်။

ဝမ်းနည်းစရာမှာ နတ်ဘုရားအသွင်ပြောင်းအဆင့် ပုဂ္ဂိုလ်ကြီးများ၏ အရေအတွက်မှာ နည်းပါးလွန်းလှပေသည်။

အရှေ့ပိုင်းကုန်းမြေတိုက်ကြီး တစ်ခုလုံးတွင် လေးငါးဦးခန့်သာ ရှိပြီး၊ ဤသည်မှာ သူမ အပါအဝင် ဖြစ်လေသည်။

ထို့အပြင် ထိုနတ်ဘုရားအသွင်ပြောင်းအဆင့် ပုဂ္ဂိုလ်ကြီးများသည် အခြေခံအားဖြင့် အသက်အရွယ် ကြီးရင့်ပြီး သွေားသားဆုတ်ယုတ်နေကြပြီဖြစ်ရာ ခန္ဓာကိုယ်တွင် ယန်ချီ များများစားစား မရှိကြတော့ချေ။

တစ်ဖက်လူကလည်း မိမိကိုယ်ကို စတေးပြီး သူမ၏တာအိုလမ်းစဉ် အောင်မြင်အောင် ကူညီပေးမည် မဟုတ်ပေ။

“ဝိညာဉ်လောကကို တက်လှမ်းနိုင်ရင် ကောင်းမှာပဲ… ဝိညာဉ်လောကမှာဆိုရင် ဖြေရှင်းနိုင်မယ့် နည်းလမ်းကို သေချာပေါက် ရှာတွေ့နိုင်မှာ...”

ချိုးရူယွီတစ်ယောက် သက်ပြင်းချကာ ရေရွတ်လိုက်မိသည်။

ဝမ်းနည်းစရာမှာ ဝိညာဉ်လောကသို့ တက်လှမ်းလိုခြင်းသည် အခြေခံအားဖြင့် မဖြစ်နိုင်သောကိစ္စပင် ဖြစ်၏။

ရှေးဟောင်းခေတ် စစ်ပွဲတွင် နတ်ဆိုးများ ကျူးကျော်ဝင်ရောက်လာချိန်မှစ၍ တက်လှမ်းခြင်းစင်မြင့်မှာ အပြီးတိုင် ဖျက်ဆီးခံလိုက်ရလေသည်။

ထိုအချိန်မှစ၍ မည်သည့် နတ်ဘုရားအသွင်ပြောင်းအဆင့် ပုဂ္ဂိုလ်ကြီးမျှ ဝိညာဉ်လောကသို့ တက်လှမ်းနိုင်ခြင်း မရှိတော့ချေ။

မှန်ပေသည်၊ အကယ်၍ ကျင့်ကြံမှုကို နတ်ဘုရားအသွင်ပြောင်း ပြီးပြည့်စုံခြင်းအဆင့်အထိ မြှင့်တင်နိုင်ပြီး၊ ကျင့်ကြံခြင်းလောကမှ လက်ခံနိုင်သော အမြင့်ဆုံးအကန့်အသတ်သို့ ရောက်ရှိပါက၊ ကျင့်ကြံခြင်းလောကတစ်ခုလုံးက သင့်ကို တွန်းထုတ်မည်ဖြစ်ပြီး ဝိညာဉ်လောကသို့ မဖြစ်မနေ တက်လှမ်းစေမည် ဖြစ်ပေသည်။

ပြဿနာမှာ ကျင့်ကြံခြင်းလောကတွင် ဤမျှများပြားသော အရင်းအမြစ်များ မရှိတော့ခြင်းပင် ဖြစ်၏။

နတ်ဘုရားအသွင်ပြောင်းအဆင့် ပုဂ္ဂိုလ်ကြီးသည် ကျင့်ကြံခြင်းလောက၏ အရှင်သခင် ဖြစ်လာပြီး၊ လိုချင်သော အရင်းအမြစ်အားလုံးကို စိတ်ကြိုက် ရယူနိုင်စွမ်းရှိကြပေသည်။ ထိုသို့ဖြစ်လင့်ကစား ယခုခေတ်နှင့် ရှေးဟောင်းခေတ်ကို နှိုင်းယှဉ်လျှင် အလှမ်းဝေးလွန်းနေဆဲ ဖြစ်လေသည်။

ကျင့်ကြံခြင်း အရင်းအမြစ်တစ်ခုတည်းကို ပြောရလျှင်ပင် အဆပေါင်း တစ်ထောင်မက ကွာခြားလှပေ၏။

ဤအချက်ကပင် ယခုခေတ်၏ နတ်ဘုရားအသွင်ပြောင်းအဆင့် ပုဂ္ဂိုလ်ကြီးများကို နတ်ဘုရားအသွင်ပြောင်း အလယ်အလတ်အဆင့်အထိ ကျင့်ကြံနိုင်ခြင်းမှာပင် အမြင့်ဆုံးအကန့်အသတ် ဖြစ်စေခဲ့လေသည်။

သက်တမ်းမကုန်ဆုံးမီ နတ်ဘုရားအသွင်ပြောင်း ပြီးပြည့်စုံခြင်းအဆင့်သို့ ကျင့်ကြံလိုခြင်းသည် ရိုးရှင်းစွာပင် စိတ်ကူးယဉ်နေခြင်း ဖြစ်ချေသည်။

သူမသည် ယခုမှ အသက် (၁၆၀၀)သာ ရှိသေးသည် ဆိုသော်ငြား၊ သူမသည်လည်း သက်တမ်းမကုန်ဆုံးမီ နတ်ဘုရားအသွင်ပြောင်း ပြီးပြည့်စုံခြင်းအဆင့်သို့ ရောက်အောင် ကျင့်ကြံနိုင်မည်ဟု ယုံကြည်မှု မရှိချေ။