ငါးများ အလွန်အကျွံရရှိခြင်းနှင့် ဇိမ်ခံနံနက်စာ

မည်သို့ပင်ဖြစ်စေ လောလောဆယ်တွင် နေ့ဘက်၌ အလုပ် သိပ်မပင်ပန်းလှသဖြင့် ဤအစားအစာမှာ လုံလောက်သင့်ပေသည်။

“ဝုတ် ဝုတ်။”

ဝမ်ချိုင်၏ ဟောင်သံက အပြင်ဘက်မှ ထွက်ပေါ်လာခဲ့၏။ သူလေသံမှာ တစ်ခုခု အခက်တွေ့နေပုံရသည်။ ရှောင်းယီ မီးဖိုထဲမှ မီးကိုလျှော့ကာ အပြင်သို့ ထွက်ခဲ့လိုက်သည်။

ဝမ်ချိုင်ရှိရာသို့ သူရောက်သွားသောအခါ မြင်လိုက်ရသည့် မြင်ကွင်းက သူ့ကို အကူအညီမဲ့သလို ခံစားရစေခဲ့သည်။

ပင်လယ်ငါးများ သိုလှောင်ရန် သူအထူးတူးထားသည့် နက်ရှိုင်းသောကျင်းကြီးသည် ငါးများဖြင့် ပြည့်လျှံနေပြီး ဝမ်ချိုင်၏ ခြေဖဝါးအောက်တွင်လည်း ငါးနှစ်ကောင်ကို နင်းထားရသေးသည်။

ကျင်းထဲရှိ ငါးများသည် အပြင်သို့ အဆက်မပြတ် ခုန်ထွက်နေကြ၏။ ဝမ်ချိုင်မှာ ခြေဖဝါးအောက်မှ ငါးများကို ကျင်းထဲသို့ ပြန်တွန်းထည့်လိုက်၊ နောက်တစ်ဖက်သို့ ပြေးသွားကာ ခုန်ထွက်လာသော ငါးများကို ပြန်ဖိလိုက်နှင့် အလုပ်ရှုပ်နေရရှာသည်။

ရှောင်းယီ ချဉ်းကပ်လာသည်ကို မြင်သောအခါ ဝမ်ချိုင်က သူ့ကို ဟောင်လိုက်၏။

“ဝုတ် ဝုတ်”

ရှောင်းယီလည်း အကူအညီမဲ့သလို ခံစားလိုက်ရသည်။ အခြားသူများမှာ ငါးတစ်ကောင်မိရန်ပင် ခဲယဉ်းနေချိန်၌ သူကတော့ ငါးများ များလွန်း၍ ထားစရာနေရာ မရှိဖြစ်နေရလေသည်။

အခြားသူများ ငါးမဖမ်းနိုင်ခြင်းမှာ သူတို့၏ ကျွန်းများက သေးငယ်ခြင်း၊ ပင်လယ်သယံဇာတ ရှားပါးခြင်းတို့အပြင် ပိုက်ကွန်ပစ်သည့် နည်းစနစ်နှင့် လူတို့၏ ပင်ပန်းနွမ်းနယ်မှု ပြဿနာများကြောင့် သူတို့၏ ဖမ်းဆီးရမိမှုမှာ မပြောပလောက်ပေ။

ရှောင်းယီတွင်မူ အလိုအလျောက် ငါးဖမ်းပိုက် ရှိသောကြောင့် ပိုက်ကွန်ပစ်ရန် စိုးရိမ်စရာမလိုသလို သူ၏ကျွန်းဧရိယာမှာလည်း အလွန်ကျယ်ဝန်းလှသဖြင့် ပင်လယ်ငါးများ အပိုအလျှံ ရရှိနေခြင်းဖြစ်သည်။

“အခြေအနေက ဒီလိုတွေ ဖြစ်လာပြီဆိုမှတော့လည်း ငါးတွေကို ပစ္စည်းတွေနဲ့ လဲလှယ်ဖို့ ဈေးလျှော့ရောင်းလိုက်ပါ့မယ်လေ။ ဒီလောက်များတဲ့ငါးတွေကို အလဟဿတော့ အဖြစ်မခံနိုင်ဘူး။”

ရှောင်းယီ ဆုံးဖြတ်လိုက်သည်။

“ဒါကို တခြားအသက်ရှင်ကျန်ရစ်သူတွေအတွက် အကျိုးခံစားခွင့်တစ်ခုလို့ပဲ သဘောထားလိုက်တာပေါ့။ သူတို့သာ ပစ္စည်းတွေ စုဆောင်းနိုင်မယ်ဆိုရင် ငတ်သေမှာကို စိုးရိမ်စရာ မလိုတော့ဘူး။ ငါလေးက တကယ့်ကို ကြင်နာတတ်လွန်းတယ်။”

ထို့နောက် ရှောင်းယီသည် သူ၏တိုက်ခန်းသို့ ပြန်သွားပြီး ကျွန်းအထိမ်းအမှတ်ကျောက်တိုင် ရှိရာသို့သွားကာ ဈေးကွက်ခန်းမသို့ ပြောင်းလိုက်သည်။

[ပင်လယ်ငါး] ၁ ကီလိုဂရမ် ↔ [အုတ်မြစ်ကျောက်] ၁

[ပင်လယ်ငါး] ၅၀၀ ဂရမ် ↔ [သတ္တုအပိုင်းအစ] ၁

[ပင်လယ်ငါး] ၂၀၀ ဂရမ် ↔ [သံလိုက်] ၁ (သို့မဟုတ်) [ပလတ်စတစ်] ၂ (သို့မဟုတ်) [မှန်] ၂ (သို့မဟုတ်) [လီနင်] ၂ (သို့မဟုတ်) [အုတ်] ၂...

[မှတ်ချက် - အခြားရှားပါးပစ္စည်းများအတွက် ကျေးဇူးပြု၍ လဲလှယ်နှုန်းကို အတည်ပြုရန် စာပို့ပါ။]

ထိုအရောင်းအဝယ်များကို တင်သွင်းပြီးနောက် ရှောင်းယီသည် သူ၏အိုးထဲတွင် ပြုတ်ထားသော ကြက်ဥနှင့် ပြောင်းဖူးများကို သွားစစ်ဆေးလိုက်၏။

ထိုအချိန်တွင် အများသုံးချန်နယ်ရှိ လူတိုင်းမှာ စိတ်လှုပ်ရှားနေကြပြီဖြစ်သည်။

“သူဌေးက အရောင်းအဝယ်ကြီး တစ်ခု ထပ်လုပ်ပြန်ပြီဟေ့။”

“ဒီတစ်ခါ ဘာရောင်းတာလဲ။”

“ပင်လယ်ငါးပဲ။ ဒါပေမဲ့ အရင်ကထက် အများကြီး ဈေးသက်သာတယ်။ အလွယ်ပြောရရင် အရင်က ပစ္စည်းတစ်ခုနဲ့ ငါး ၁၀၀ ဂရမ်ပဲ ရရင်၊ အခု ၂၀၀ ဂရမ် ရနေပြီ။”

“ဒါက ဈေးနှုန်းကို နှစ်ဆလျှော့ပေးလိုက်တာပဲ။ ဘာစောင့်နေကြတာလဲ။ မြန်မြန်သွားလဲကြလေ။”

“ဟုတ်တယ်။ ဒီသူဌေးကြီးက အားအကိုးရဆုံးပဲ။”

“ဒီလို သူဌေးမျိုးရှိနေလို့ တော်သေးတာပေါ့။ မဟုတ်ရင် ငါတော့ အငတ်ဘေးဆိုက်နေလောက်ပြီ။ ပြီးခဲ့တဲ့ နှစ်ရက်လုံး ထောက်ပံ့ရေးသေတ္တာ တစ်လုံးပဲ ဆယ်နိုင်ခဲ့တယ်။ အဲဒီထဲမှာ ဘာအစားအသောက်မှမပါဘူး။ သူဌေးရဲ့ ပင်လယ်ငါးကိုပဲ အားကိုးနေရတာ။”

“ဟုတ်တယ်။ နောက်ထပ် သူဌေးကြီးတစ်ယောက်ကလည်း ရေကျက်အေးတွေ အမြဲရောင်းပေးနေလို့ပေါ့။ မဟုတ်ရင် ငါ ရေငတ်ပြီး သေနေလောက်ပြီ။”

“သူတို့လို သူဌေးကြီးတွေ နောက်ထပ် အများကြီး ပေါ်လာရင် ကောင်းမှာပဲ။”

တိလင်းထျန်းရှားသည် ‌ဈေးကွက်ရှိ ပင်လယ်ငါးများကို ကြည့်ကာ မျက်မှောင်ကျုံ့လိုက်မိသည်။

“ဒီလူက ဘယ်လိုလုပ် ဒီလောက်များတဲ့ ပင်လယ်ငါးတွေကို ရနေတာလဲ။”

သူကိုယ်တိုင်လည်း ငါးဖမ်းပိုက် ပစ်ခဲ့၏။ သို့သော်လည်း တစ်နေ့ကုန်မှ ငါးသုံးကောင်သာ ရခဲ့ပြီး ခါးများမှာလည်း နာကျင်လှပြီဖြစ်သည်။ တစ်ဖက်လူက မည်သို့သောနည်းဖြင့် ငါးများစွာ ရနေသည်ကို သူ တကယ်ပင် စဉ်းစားမရပေ။

“ပင်လယ်ထဲ ထွက်နေတာများလား။”

တစ်ဖက်လူတွင် လှေရှိပါက ပင်လယ်ထဲအထိသွား၍ ပိုက်ကွန်ပစ်နိုင်မည်ဖြစ်ကြောင်း သူ ရုတ်တရက် သဘောပေါက်သွားခဲ့သည်။ ဤသည်မှာ ငါးများစွာ ရရှိခြင်းအတွက် တစ်ခုတည်းသော အဖြေပင်ဖြစ်သည်။

“ပင်လယ်ရေကြောင်း လုပ်ငန်းစီမံကိန်းကို အရှိန်မြှင့်ဖို့ လိုနေပြီပဲ။”

သူက တိုးတိုးလေး ရေရွတ်လိုက်မိသည်။

နံနက်စာ အဆင်သင့်ဖြစ်သောအခါ ရှောင်းယီသည် ဆုဝမ်နှင့် အခြားနှစ်ဦးထံသို့ ပို့ပေးလိုက်သည်။

[ပြောင်းဖူး] (S အဆင့်) ၂၀၀ ဂရမ်၊ [ကြက်ဥ] (A အဆင့်) ၅၀ ဂရမ်၊ [နို့] (S အဆင့်) ၁၀၀ မီလီလီတာ၊ [ပန်းသီး] (A အဆင့်) ၂၀၀ ဂရမ် ↔ အခမဲ့။

“ဒါက ဒီနေ့အတွက် နံနက်စာပဲ။ ငါးတော့ မပါတော့ဘူး။ ဗိုက်မဝသေးဘူးဆိုရင် ပြောပါ။ ငါးတွေ ထပ်ကင်ပေးမယ်။”

ရှောင်းယီက သူတို့ထံ စာပို့လိုက်သည်။

“ဒီဟာတွေနဲ့တင် တော်တော်များနေပါပြီ။ မနေ့ညက စားထားတဲ့ ငါးနှစ်ကောင်တောင် အစာမကြေသေးဘူး။ ငါတော့ ပြန်ဝလာတော့မယ်ထင်တယ်။”

ဆုဝမ်က ရယ်မောကာ ပြန်ဖြေလိုက်သည်။

“မင်းရဲ့ နံနက်စာက အရမ်းကို ဇိမ်ကျလွန်းတယ်။ အားလုံးက A အဆင့်နဲ့ အထက်တွေချည်းပဲ။ ဒါတွေက သိပ်ကို တန်ဖိုးရှိတယ်။”

ယွမ်နွန်က ပြောလိုက်သည်။

“ပစ္စည်းတွေက အရမ်းများနေတော့ ကျုပ်တစ်ယောက်တည်း စားလို့မကုန်နိုင်ဘူး‌လေ။”

ရှောင်းယီက ပြန်ပြောလိုက်၏။

“တခြားသူတွေသာ မင်းပြောတာကို ကြားရင် မင်းကို ဝိုင်းရိုက်ကြလိမ့်မယ်။”

ယွမ်နွန်က ရယ်မောရင်း ပြောလိုက်သည်။

“ကျုပ် အမှန်အတိုင်း ပြောတာပါ။”

ရှောင်းယီက ဆိုသည်။

“အားလုံးပဲ မြန်မြန်စားကြတော့။ ဒီမနက် နေသိပ်မပူခင် တစ်ခုခု ရိတ်သိမ်းနိုင်မလားလို့ ကြည့်ကြည့်ကြဦး။”

“အင်း။”

ထို့နောက် ရှောင်းယီသည် ကျန်းယွင်ထျန်းထံသို့ နံနက်စာ နှစ်ဆ ပို့ပေးလိုက်ပြီး မှာလိုက်သည်။

“မင်းလည်း စားရမယ်နော်။ ကလေးအတွက်ချည်းပဲ ချန်မထားနဲ့။ ငါတို့မှာ အစားအသောက်တွေ အများကြီးရှိတယ်။ သူလည်း ဗိုက်မဆာစေရပါဘူး။”

“အင်း ကျေးဇူးတင်ပါတယ်။”

ကျန်းယွင်ထျန်းက ပြန်ဖြေလိုက်သည်။

ကျန်းယွင်ထျန်းသည် S အဆင့်နို့ကို သောက်ဖူးကတည်းက ဤကဲ့သို့သော အဆင့်မြင့်အစားအစာများသည် အစစ်အမှန် နတ်သုဒ္ဓါများကဲ့သို့ဖြစ်ကြောင်း သူသိထားပြီးဖြစ်၏။ ထို့ကြောင့် သူသည် ၎င်းတို့ကို ကလေးအတွက်သာ အဓိကထား၍ ချန်ပေးထားခဲ့ခြင်းဖြစ်သည်။

ကလေးငယ်မှာ တစ်နေ့ထက်တစ်နေ့ သန်မာလာသည်ကို ကြည့်ပြီး ရှောင်းယီကို သူ အမှန်တကယ် ကျေးဇူးတင်နေမိသည်။

“သူသာ မရှိရင် ကျွင်းကျွင်းလည်း သေနေလောက်ပြီ။ ငါလည်း အသက်ရှင်နေမှာ မဟုတ်ဘူး။”

ကျန်းယွင်ထျန်း တွေးလိုက်မိ၏။

ထို့နောက် သူသည် ကြက်ဥနှင့် နွားနို့ကို ကျွင်းကျွင်းဘေးတွင် ထားပေးလိုက်ပြီး သူကိုယ်တိုင်မှာမူ ပြောင်းဖူးနှင့် ပန်းသီးကိုသာ စားသုံးလိုက်သည်။

“ဖေဖေ နို့သောက်ဦး။”

ကျွင်းကျွင်းက ဘေးရှိနို့ခွက်ကို ကိုင်ပြီး သူ့ဖခင်ကို ပြောလိုက်သည်။

“ဖေဖေ ဗိုက်မဆာဘူး။ ကျွင်းကျွင်းပဲ သောက်လိုက်ပါ။”

ကျန်းယွင်ထျန်းက ပြုံးကာ ပြောလိုက်သည်။

“မရဘူး။ ဖေဖေ သောက်ရမယ်။ မသောက်ရင် သား ဦးဦးကို တိုင်ပြောမှာနော်။”

ကျွင်းကျွင်းက လူကြီးလေးတစ်ယောက်လို ပြောလိုက်၏။

မိမိကို ပြန်လည်ဂရုစိုက်တတ်လာသော သားငယ်လေးကြောင့် ကျန်းယွင်ထျန်း စိတ်လှုပ်ရှားသွားခဲ့ရသည်။

“ကောင်းပါပြီ။ ဖေဖေ သောက်မယ်နော်။”

ကျန်းယွင်ထျန်းသည် နို့ ၁၀၀ မီလီလီတာလုံးကို ကုန်အောင်သောက်ပြီးသည်အထိ ကျွင်းကျွင်းက စောင့်ကြည့်နေခဲ့သည်။

နို့သောက်ပြီးနောက် ကျန်းယွင်ထျန်းသည် သူ၏ခန္ဓာကိုယ်ထဲ၌ နွေးထွေးသော စီးဆင်းမှုတစ်ခုကို ခံစားလိုက်ရပြီး ကျွန်းပေါ်၌ ကိုယ်ခံပညာ လေ့ကျင့်ခန်းများ ပြုလုပ်လိုက်လေသည်။ ကျွင်းကျွင်းသည်လည်း ဘေးမှကြည့်ကာ လိုက်လုပ်နေခဲ့ပြီး ချစ်စဖွယ်အသံလေးများဖြင့် အော်ဟစ်နေသည်မှာ အနာဂတ်၏ ကိုယ်ခံပညာရှင်လေးတစ်ဦး ပေါ်ထွက်လာသကဲ့သို့ပင်။

ရှောင်းယီသည် နံနက်စာစားပြီးနောက် S အဆင့်စိုက်ခင်းထဲရှိ မြက်ပင်များကို ထပ်မံရှင်းလင်းကာ ပြောင်းဖူးများကို ထပ်မံမျိုးစေ့ချပြီး A အဆင့် ရေသန့်ဖြင့် ရေလောင်းလိုက်လေသည်။

ပြောင်းဖူးပင်များ မပေါက်ခင်အထိ မြက်ပင်များကို အမြဲစောင့်ကြည့်ပြီး မြေကြီးပေါ် ပေါ်လာသည်နှင့် ချက်ချင်း နှုတ်ပစ်ရမည်ဖြစ်သည်။ ပြောင်းဖူးပင်များ အမြင့်ကြီးဖြစ်လာမှသာ မြက်ပင်ရန်ကို စိုးရိမ်စရာ မလိုတော့မည်ဖြစ်သည်။

ပြောင်းပင်များကို စိုက်ပျိုးပြီးနောက် ရှောင်းယီသည် ရေချိုးခန်းသို့ ပြန်သွားကာ ရေချိုးပြီး သန့်ရှင်းသော ဝတ်ရုံကို လဲလှယ်ဝတ်ဆင်လိုက်၏။ ထို့နောက် တည်ကြည်သော မျက်နှာထားဖြင့် ပြောလိုက်သည်။

“စနစ် လက်မှတ်ထိုးဝင်မယ်။”

“လက်မှတ်ထိုးဝင်ခြင်း အောင်မြင်ပါသည်။ ရရှိသော ပစ္စည်း - အလိုအလျောက် စမတ်ရေသွင်းကိရိယာ (SSS အဆင့်)။”

“မိုက်လှချည်လားဟ။”

ရှောင်းယီက ပျော်ရွှင်စွာ ပြောလိုက်မိသည်။

“ရေချိုး၊ အဝတ်အစားလဲပြီးမှ လုပ်တာက တကယ် ထိရောက်တာပဲ။ SSS အဆင့်ပစ္စည်း နောက်တစ်ခု ထပ်ရပြန်ပြီ။”

[အလိုအလျောက် စမတ်ရေသွင်းကိရိယာ (SSS-အဆင့်) : အလိုအလျောက်နှင့် ဉာဏ်ရည်တုစနစ် ပါဝင်သည်။ အပင်များ၏ အခြေအနေကို ခွဲခြားသိရှိနိုင်ပြီး အပင်များ၏ ကြီးထွားမှုအဆင့်နှင့် အခြေအနေအလိုက် သင့်တော်သော အချိန်တွင် သင့်တော်သော ရေပမာဏကို ရေသွင်းပေးနိုင်သည်။]

“နောက်ဆုံးတော့ မင်းကို ရလိုက်ပြီပဲ။”

ရှောင်းယီသည် စနစ်၏ အသိပေးချက်ကို ကြည့်ကာ သူသည် နောက်ထပ် အလုပ်တစ်ခုမှ ကင်းဝေးသွားပြီဖြစ်ကြောင်း သိလိုက်တော့လေသည်။

ယခုမှစ၍ ရေလောင်းရမည့်ကိစ္စအတွက် သူ စိတ်ပူစရာ မလိုတော့ပေ။

ထို့နောက် သူသည် ထိုထိပ်တန်းS သုံးလုံးပစ္စည်း၏ ပုံပန်းသဏ္ဌာန်ကို ကြည့်ရှုရန် ထုတ်ယူလိုက်တော့သည်။