နတ်ဆိုးတစ်သောင်းခန်းမ၏အမည် စတင်ထွက်ပေါ်လာခြင်း

ဟုန်ကျယ်အနောက်ပိုင်း ရေပြင်အထက်တွင်၊ ကြီးမားလှသော ပုံရိပ်အချို့သည် ပြင်းထန်သော ငြင်းခုံမှုတစ်ခု ဖြစ်ပွားနေကြလေသည်။

"ကျုပ် မပြန်ဘူး"

"နဂါးနန်းတော်ရဲ့ အာဏာက ဘယ်လောက်ပဲ ကြီးမားပါစေ၊ ကုန်းပေါ်က ကျုပ်ရဲ့ကိစ္စတွေအထိ လက်တံဆန့်နိုင်လို့လား"

နှင်းကျားမျိုးနွယ်စု၏ ပါရမီရှင် လူငယ်တစ်ဦးဖြစ်သူ အန်းထူရှောင်သည် ဒေါသတကြီးဖြင့် နောက်သို့ လှည့်ကြည့်ကာ အော်ဟစ်လိုက်၏။ ဟုန်ကျယ်အနောက်ပိုင်းရှိ အင်အားစုများစွာ၏ ရှေ့မှောက်တွင် သူသည် အရှက်တကွဲဖြစ်ခဲ့ရပြီးပြီ၊ သူ မည်သို့လျှင် ခေါင်းမော့နိုင်တော့မည်နည်း။

"နဂါးကြင်ယာတော်ရဲ့မျက်နှာကို ထောက်ထားတဲ့အနေနဲ့ပဲ သဘောထားလိုက်ပါ၊ သူ့ကို ဒီတစ်ကြိမ်တော့ ချမ်းသာပေးလိုက်ပါဦး။"

သူ၏မျိုးနွယ်စုမှ အကြီးအကဲ နတ်ဆိုးအချို့က ကလေးတစ်ယောက်ကို ချော့မော့နေသည့်အလား လမ်းကြောင်းတစ်ခု ပေးနေကြလေ၏။

"သူ့ရဲ့ နောက်ခံက နက်နဲပြီးခန့်မှန်းရခက်လွန်းလို့ ခင်ဗျားတို့ ကြောက်နေကြတယ်ဆိုတာ ကျုပ်သိပါတယ်... ဒါပေမဲ့ ကျုပ်တို့နောက်ခံတောင့်တင်းတဲ့ ကျင့်ကြံသူတွေကို အရင်ကလည်း သတ်ခဲ့ဖူးတာပဲ အထူးသဖြင့် လျှို့ဝှက်ဆန်းကြယ်ဟန်ဆောင်ပြီး တခြားသူတွေထက် သာလွန်တယ်လို့ ထင်နေတဲ့သူတွေ၊ သူတို့ရဲ့မည်သူမည်ဝါဖြစ်ကြောင်းကို ဖုံးကွယ်ထားရတာကို သဘောကျတဲ့သူတွေပေါ့။"

အန်းထူရှောင်သည် အသက်ပြင်းပြင်းရှူကာ မိမိကိုယ်ကို အတင်းအကျပ်တည်ငြိမ်အောင် ပြုလုပ်လိုက်သည်။

"ပါးစပ်ပိတ်စမ်း" အကြီးအကဲ နတ်ဆိုးများ၏ မျက်နှာများတွန့်ရှုံ့သွားပြီး ပတ်ဝန်းကျင်ကို စိုးရိမ်တကြီး ကြည့်လိုက်ကြ၏။

ဤကျိန်စာသင့်သတ္တဝါလေးသည် စိတ်လိုက်မာန်ပါဖြစ်လာလျှင် ဘာမဆို ပြောဝံ့သူဖြစ်သည်။ ကုန်းနေနတ်ဆိုးများ ဖြစ်ကြသည့်အတိုင်း သူတို့သည် အရင်းအမြစ်များအတွက် နဂါးနန်းတော်နှင့် ယှဉ်ပြိုင်ရန် ခက်ခဲလှသဖြင့် သူတို့၏နယ်မြေများကို ရေပြင်နှင့် ဝေးရာတွင်သာ ထားရှိရန် ကြိုးစားကြရသည်။

အကယ်၍ သူတို့က မိုးမြေရတနာအချို့ကိုမရယူနိုင်ခဲ့ပါက၊ သူတို့၏ နတ်ဆိုးခန္ဓာကိုယ်များကို ထိန်းသိမ်းရန် မည်သို့အရင်းအမြစ်လုံလောက်ပါမည်နည်း။

အင်အားကြီးအဖွဲ့အစည်းများမှ ထွက်လာကြသော လူငယ်ထူးချွန်သူများမှာ လမ်းလျှောက်နေသော ရတနာများသဖွယ်ဖြစ်ပြီး သူတို့မျိုးနွယ်စု၏ မျက်စိထဲတွင်တော့ အကောင်းဆုံးသော စားဖွယ်တစ်နပ်ပင် ဖြစ်သည်။

သို့သော် ဤတစ်ကြိမ်တွင် အခြေအနေမှာ သိသိသာသာ ကွဲပြားနေ၏။

ထိုအနက်ရောင်ဝတ်စုံနှင့် လူငယ်၏ နောက်ခံမှာ သူတို့ကိုင်တွယ်နိုင်သည့် အဆင့်ထက် ကျော်လွန်နေပြီ ဖြစ်သည်။

ထိုသူကို ထပ်မံ၍ ရန်စရန် ကြိုးစားခြင်းမှာ အလွန်တရာ မိုက်မဲရာ ရောက်ပေလိမ့်မည်။

"မိုက်မဲလိုက်တာ"

အန်းထူရှောင်က တိုးညှင်းသော အသံဖြင့် ဆက်လက် ဟိန်းဟောက်နေသည်။ "အဲဒီလူငယ်က နောက်ဆုံးမှာ ဘာလို့မလုပ်ရှားခဲ့တာလဲဆိုတာ ခင်ဗျားတို့ စဉ်းစားမိကြလား။ သူက စိတ်နှလုံး ကောင်းလွန်းလို့လို့ ထင်နေတာလား။ ကျွန်တော် ပြောပြမယ်၊သူက ကျွန်တော့်ခေါင်းကို ရိုက်ခွဲပစ်ချင်နေတာ၊ ဒါပေမဲ့ နောက်ဆုံးမိနစ်မှာ သူ တုံ့ဆိုင်းသွားခဲ့တာ သူ ကြောက်သွားတာ၊ ခင်ဗျားတို့ နားလည်လား"

"အကယ်၍ သူသာ အနန္တတာအိုအင်ပါယာဂိုဏ်းလိုမျိုး ထိပ်တန်းအင်အားစုကသာ ဆိုရင်၊ သူက ကရုဏာထားပါဦးမလား။ နဂါးကြင်ယာတော်ကိုရော အလေးထားပါ့မလား။ သူက ကျွန်တော်တို့ကို ဒီနေရာမှာတင် သတ်ပစ်မှာပေါ့။ သူက ဟုန်ကျယ်အနောက်ပိုင်းကနေ ပြန်ထွက်မသွားနိုင်မှာကို စိုးရိမ်လို့သာ ကျွန်တော့်ကို ခြောက်လှန့်ဖို့ အဲဒီလို ဟန်ဆောင်ခဲ့တာ။"

"ဒါပေမဲ့ တစ်ခုတော့ သေချာတယ်။"

အန်းထူရှောင်သည် သူ၏ အသက်ရှူနှုန်းကို ထိန်းညှိရန် ကြိုးစားနေပြီး၊ သူ၏ အကြည့်များက သူ၏ မျိုးနွယ်စုမှ အကြီးအကဲ သုံးဦးထံသို့ ရောက်ရှိသွားသည်။

"သူ့မှာ ဆက်နွှယ်မှုအချို့တော့ အမှန်တကယ် ရှိပါတယ်။ အကယ်၍ သူ့ကိုသာ အမှန်တကယ် ပြန်လွှတ်ပေးလိုက်မယ်ဆိုရင်၊ အဲဒါက ကျားကို တောင်ပေါ် ပြန်လွှတ်လိုက်သလို ဖြစ်သွားလိမ့်မယ်၊ နားလည်လား"

အကြီးအကဲ နတ်ဆိုး သုံးဦးသည် တိတ်ဆိတ်စွာ နားထောင်နေကြပြီး၊ သူတို့ကိုယ်တိုင်လည်း သံသယအချို့ စတင်ဝင်လာကြ၏။

မည်သို့ပင်ဖြစ်စေ၊ ထိုအနက်ရောင်ဝတ်စုံနှင့် လူငယ်က မတ်တပ်ရပ်၍ အန်းထူရှောင်ကို ချမ်းသာပေးလိုက်ပုံမှာ အနည်းငယ် ရုတ်တရက်ဆန်လှပြီး၊ ထိပ်တန်းတပည့်များ၏ ပုံမှန် မောက်မာသောအမူအရာနှင့် ကိုက်ညီမှု မရှိသလို ဖြစ်နေပေသည်။

ထို့အပြင်၊ ထိုလူငယ်၏ ပုံစံမှာ နူးညံ့သိမ်မွေ့သော ပုဂ္ဂိုလ်တစ်ဦး မဟုတ်ပေ။

၎င်းအပြင် သူက အစိမ်းရောင် ဖီးနစ်ငှက်မျိုးနွယ်စုအကြောင်းကိုပါ ထည့်ပြောခဲ့သေးရာ၊ ကိစ္စကို ထိုအတိုင်း လွှတ်ထားမည့်ပုံ မပေါ်ချေ။

ထပ်မံ စဉ်းစားကြည့်သောအခါ၊ ၎င်းမှာ အမှန်တကယ်ပင် ထူးဆန်းနေပေသည်။

အစောပိုင်းက အခြေအနေမှာ တင်းမာလွန်းလှသဖြင့် ခဏတာ သတိမထားမိသွားခဲ့ခြင်းသာ ဖြစ်သည်။

သူက အနာဂတ်လက်စားချေရန်အတွက် ရည်ရွယ်ချက် ထားရှိနေခဲ့ခြင်းများလော။

"ဂူသင်္ချိုင်းအစောင့်အရှောက်နဲ့ အသေးစိတ် ပြန်တိုင်ပင်ကြည့်လိုက်ဦး။"

သူတို့၏ အကြည့်များမှာ လွှဲဖယ်သွားကြပြီး၊ သူတို့၏ စိတ်နှလုံးထဲတွင် မသက်မသာဖြစ်မှုများ တိုးပွားလာလေသည်။

အကယ်၍ သူတို့က ထိပ်တန်းအင်အားစုမှ ထူးချွန်သူတစ်ဦးကို လှုပ်ရှားမည်ဆိုပါက၊ ဗြောင်ကျကျ လုပ်ဆောင်မည်မဟုတ်ဘဲ ခရီးလမ်းတွင် ချုံခိုတိုက်ခိုက်ရန်သာ ရွေးချယ်ကြပေလိမ့်မည်။

သို့သော် သူတို့ သုံးလေးဦးတည်းနှင့်တော့ ဤအလုပ်အတွက် လုံလောက်မည် မဟုတ်သည်မှာ ထင်ရှားလှသည်။

အန်းထူရှောင်က လက်စားချေရန် စိတ်ကူးနေသေးသည့် အကြောင်းရင်းမှာ သူတို့က နဂါးကြင်ယာတော်ထံမှ ဆေးဝါးများကိုရယူလိုနေသည်မှာ တကယ်ဖြစ်သော်လည်း၊ အခြားတစ်ဖက်ထံမှလည်း ယူ‌နိုင်သည့်နေရာရှိသေးသည်။

အကယ်၍ ထိုနှစ်ဦးသာ လှုပ်ရှားရန် ဆန္ဒရှိပါက၊ ဤကိစ္စကို ဖြေရှင်းရန် နည်းလမ်းရှိကောင်းရှိနိုင်ပေသည်။

အန်းထူရှောင် တစ်ဦးတည်းသာ ခန်းမထဲတွင် အဖိနှိပ်ခံခဲ့ရသည် မဟုတ်ဘဲ၊ ထိုဒေါသမီးမှာ သူတို့ သုံးဦး၏စိတ်နှလုံးထဲတွင်လည်း တောက်လောင်နေသည်ကို မမေ့ထားသင့်ပေ။

ထို့အပြင်၊ယခုကဲ့သို့ နောက်ခံရှိသော ကျင့်ကြံသူတစ်ဦးထံတွင် တန်ဖိုးရှိသော ပစ္စည်းများစွာ ရှိနေမည်မှာ အသေအချာပင်။

"စိတ်ချပါ၊ ကျွန်တော့်မှာ အစီအစဉ် ရှိပါတယ်။"

အန်းထူရှောင်သည် နောက်ဆုံးတွင် သူ၏ မျိုးနွယ်စုဝင်များကို စည်းရုံးနိုင်ခဲ့ရာ၊ သူ၏ မျက်နှာပေါ်တွင်အပြုံးတစ်ခု ပြန်လည်ရောက်ရှိလာကာ သူ၏ ကျားမျက်လုံးကြီးများမှာ ပြင်းထန်စွာတောက်ပနေလေ၏။

သူသည် မျှော်လင့်ချက်အပြည့်ဖြင့် ကောင်းကင်ယံသို့ မော့ကြည့်လိုက်၏။

လျှို့ဝှက်ဆန်းကြယ်ဟန်ဆောင်နေသော ထိုလူငယ်ကို၊ ဒေသခံမြွေက နဂါးကြီးကို မည်သို့နှိမ်နင်းနိုင်သည်ကို သူ ပြသရပေမည်။

စိမ်းကားသောနေရာတစ်ခုတွင် နယ်ကျွံလာခြင်းအတွက် ပေးဆပ်ရမည့် တန်ဖိုးမှာ မည်မျှကြီးမားကြောင်း သူ သိစေရမည်။

မကြာမီ၊ နတ်ဆိုးအချို့ထံမှ သတင်းကို လက်ခံရရှိပြီးနောက်၊ ဖြူဖွေးသော အလင်းတန်းနှစ်ခုမှာ ခေါင်းပေါ်မှ လျင်မြန်စွာ ဖြတ်သန်းလာခဲ့၏။ သူတို့၏ ပုံသဏ္ဌာန်များကို ထုတ်ဖော်ပြသလိုက်သောအခါ၊၎င်းတို့မှာ ကျားနတ်ဆိုး အဖိုးအိုနှစ်ဦး ဖြစ်နေပြီး၊ သူတို့၏ ခန္ဓာကိုယ်တွင် စုတ်ပြတ်နေသောအဝတ်အစားများကို ဝတ်ဆင်ထားကာ သူတို့၏ အမွှေးအမျှင်များမှာလည်း ရှုပ်ထွေးညစ်ပတ်နေလေသည်။

သို့သော်လည်း သူတို့၏ မျက်ဝန်းများမှာ မှုန်ဝါးကာ လွတ်ဖြစ်နေသယောင်ရှိသော်ငြားလည်း၊ သူတို့ထံမှ ထူးကဲစွာ ကြောက်မက်ဖွယ်ကောင်းသော အငွေ့အသက်များ ထွက်ပေါ်နေလေသည်။

ဤကျားနတ်ဆိုးများကို ဂူသင်္ချိုင်းအစောင့်အရှောက်များဟု ခေါ်ဆိုကြပြီး၊ ၎င်းတို့မှာ နှင်းကျားမျိုးနွယ်စုတွင် အသက်အကြီးဆုံးပုဂ္ဂိုလ်များဖြစ်ကြကာ သူတို့၏ မျိုးနွယ်စု ခေါင်းဆောင်မှ အထူးတလည် ပြင်ဆင်ထားသော ဂူသင်္ချိုင်းကြီးကို စောင့်ကြပ်ရင်း၊ ယွီဟွာအနှစ်သာရများကို စုပ်ယူထားသည့်သူများဖြစ်ကြသည်။

သူတို့၏ ဝိညာဉ်များ ပျက်စီးနေသည်မှအပ၊ သူတို့၏ အင်အားမှာ ပြည့်စုံလွန်းလှပေ၏။

နတ်ဆိုးများနှင့် ကျင့်ကြံသူများကြား ကွာခြားချက်မှာ နတ်ဆိုးများသည် တာအိုပေါင်းစည်းခြင်းရတနာနယ်မြေများကို အမွေမဆက်ခံနိုင်သော်လည်း၊ အားသာချက်မှာ သူတို့သည် ကပ်ဘေးဒုက္ခဖြတ်ကျော်ခြင်းအတားအဆီးများနှင့် မရင်ဆိုင်ရခြင်း ဖြစ်သည်။

မိုးမြေရတနာလုံလုံလောက်လောက် ရှိပြီး သူတို့၏ သွေးမျိုးဆက်မှာ အင်အားကောင်းနေသရွေ့၊ ကျင့်ကြံသူများအတွက် ကျော်လွှားရန် ခက်ခဲလှသောစတုတ္ထနယ်ပယ်မှာ သူတို့အတွက် အိပ်စက်ရုံမျှဖြင့်တူညီသော အင်အားကို ပိုင်ဆိုင်နိုင်စေပေသည်။

"စီနီယာတို့၊ ကျွန်တော့်မှာ တင်ပြစရာ အရေးကြီးတဲ့ ကိစ္စတစ်ခု..."

အန်းထူရှောင်က သူတို့ကို နှုတ်ဆက်ရန် ချဉ်းကပ်လိုက်စဉ်မှာပင်၊ သူတို့၏ ခြောက်ကပ်ကပ် အသံများက ကြားဖြတ်နှောင့်ယှက်လိုက်၏။

"ငါ့ကို ပေးစမ်း။"

သင်္ချိုင်းအစောင့်အရှောက် ကျားနတ်ဆိုးတစ်ဦးသည် သူ၏လက်သည်းများကို ဖြည်းညင်းစွာ ဆန့်ထုတ်လိုက်သည်။ သူ၏ တစ်ကိုယ်လုံးမှာ အလွန်တရာ တောင့်တင်းနေပုံရပေ၏။

"စီနီယာ ခဏစောင့်ပါဦး၊ ကျွန်တော်" အန်းထူရှောင်က ထပ်မံ၍ စကားပြောရန် ကြိုးစားလိုက်သော်လည်း၊ နောက်တစ်ခဏတွင် သူသည် ရုတ်တရက် အထက်သို့ဆွဲတင်ခံလိုက်ရသဖြင့် သူ၏ မျက်နှာမှာ နာကျင်မှုကြောင့် တွန့်ရှုံ့သွားလေသည်။

တောင့်တင်းနေပုံရသော ထိုလက်သည်းကြီးမှာ သူ တုံ့ပြန်ရန်ပင်မတတ်နိုင်သော အရှိန်အဟုန်ဖြင့် လှုပ်ရှားသွားကာ၊ သူ၏ လည်ပင်းကို ရစ်ပတ်ဖမ်းဆွဲလိုက်ပြီး လျင်မြန်စွာညှစ်ပစ်လိုက်လေတော့သည်။