အခန်း (၂၂၄၉-၂၂၅၀)

အပိုင်း(၂၂၄၉)

“ကျေးဇူးပြုပြီး ထိုင်ပါဦး”

ရှန့်လျိုက ကမ်းလှမ်းလိုက်သည်။ ဝေ့ဝူယင်က ငြင်းပယ်ခြင်း မရှိဘဲ အနေရခက်နေသော သခင်လေးရှန့်၏ ဘေးတွင် ဝင်ထိုင်လိုက်သည်။ ဝတ်စုံဖြူနှင့် လူငယ်လေးမှာ စိတ်လှုပ်ရှားမှုကို မထိန်းနိုင်ဘဲ ဝိုင်တစ်ခွက်ကို ခဏချင်းအတွင်း မော့ချလိုက်တော့သည်။

ထို့နောက်... သခင်လေးရှန့်မှာ တင်းမာမှုများ လျော့ကျသွားသည့်အလား သက်ပြင်းချလိုက်သည်။ ရှန့်ဝမ်ချင်းသည်လည်း ပြန်ထိုင်လိုက်ပြီးနောက် ဝေ့ဝူယင်ကိုသာ စူးစိုက်ကြည့်နေမိသည်။ ဤနယ်ခြားသားမှာ သူမ မျှော်လင့်ထားသည်ထက် ပိုမိုခန့်ညားနေပြီး သူ၏ အရှိန်အဝါမှာလည်း အလွန်ပင် လျှို့ဝှက်ဆန်းကြယ်လှသည်။ သူ၏ နက်နဲမှုကို တဖြည်းဖြည်းချင်း ဖော်ထုတ်ကြည့်လေလေ၊ မည်သည့်အခါမျှ စိတ်ပျက်ရခြင်း မရှိဘဲ ပို၍ စိတ်ဝင်စားလာရလေလေ ဖြစ်သည်။

ရှန့်လျိုမှာမူ ဘာမှမတတ်နိုင်တော့ပေ။ ရှန့်ဝမ်ချင်းအနေနှင့် ဝေ့ဝူယင်၏ ကိုယ်လုပ်တော်အဖြစ် ခံယူရန် အဘယ်ကြောင့် ဝန်မလေးသည်မှာ လျှို့ဝှက်ချက် မဟုတ်တော့ပေ။ ဝေ့ဝူယင်သည် အထွတ်အထိပ် သူတော်စင် တစ်ဦးဖြစ်သလို၊ တက်သစ်စ အင်ပါယာတစ်ခု၏ တည်ထောင်သူ ဧကရာဇ်လည်း ဖြစ်သည်။ ထို့အပြင် ကိုယ်ပိုင် အဂ္ဂိရတ် မျိုးဆက်၊ လောကရှန့်ထို အဆင့် အဂ္ဂိရတ်ပညာရှင်ဖြစ်ပြီး ကောင်းကင်ရှန့်ထို အဆင့်မှာလည်း မဝေးတော့ကြောင်း ကြေညာထားသူ မဟုတ်ပါလော။ ထို့အပြင် ခန့်ညားထည်ဝါပြီး တစ်ကမ္ဘာလုံးကို တုန်လှုပ်စေနိုင်သော အဆက်အသွယ်များ ရှိသူလည်း ဖြစ်သည်။

မကြာသေးမီက သတင်းဌာနများ၌ ပျံ့နှံ့နေသော သတင်းတစ်ခုအရ ခိုင်မာသော ပြတ်သားသော ဆည်းဆာ ဂလက်ဆီသည် အာရုဏ်ဦး အင်ပါယာ၏ လက်အောက်ခံ ဖြစ်သွားခဲ့ပြီ ဖြစ်သည်။

ဤအောင်မြင်မှု၏ ကြီးမားသော အဓိပ္ပာယ်ကို လူတိုင်း နားမလည်နိုင်သော်လည်း၊ ထိုဂလက်ဆီကို အလွန်အင်အားကြီးသော အထွတ်အထိပ် သူတော်စင် တစ်ဦးက ကာကွယ်ထားသဖြင့် အခြားသော အထွတ်အထိပ် သူတော်စင်များပင် ဝင်ရောက်နိုင်ခြင်း မရှိသည်ကို သိသူများအဖို့မူ၊ ဤ အာရုဏ်ဦး အာဏာရှင် ဧကရာဇ် သည် အခြားသူများ ထင်သလို သာမန်လူ မဟုတ်ကြောင်း သဘောပေါက်ကြပေလိမ့်မည်။

လတ်တလောတွင် မိုးကုပ်စက်ဝိုင်း မျှော်စင်ခုနစ်ခု ကို စိန်ခေါ်ခဲ့ခြင်းမှာ လူသိရှင်ကြား ဖြစ်ခဲ့သော်လည်း၊ မျှော်စင်ဘက်မှ မည်သည့် တုံ့ပြန်မှုမျှ မရှိခြင်းမှာလည်း အလွန် ထူးဆန်းနေသည်။ သို့သော်လည်း သူသည် ယခုအခါ မည်သူမဆို သိနိုင်သော နေရာတွင် အေးဆေးတည်ငြိမ်စွာ ရှိနေခဲ့ပြီ ဖြစ်သည်။

သို့သော် ရှန့်လျိုကမူ ရှန့်ဝမ်ချင်းကို အလှအပများကြားတွင် အာရုံစိုက်ခံရရန် ကြိုးပမ်းနေရသော ကိုယ်လုပ်တော်တစ်ဦး ဖြစ်မည့်အစား၊ တစ်ဦးတည်းသော ဇနီးအဖြစ်သာ ရှိစေချင်သည်။

သူ သိထားသလောက်… ဝေ့ဝူယင်တွင် မိန်းမလှလေးများစွာ ပါဝင်သော မောင်းမဆောင်ကြီး ရှိနေသည် မဟုတ်ပါလား။ သူတို့ထဲမှ အများစုမှာ သေဆုံး သို့မဟုတ် မေ့ပျောက်ခြင်း ခံရနိုင်ပြီး၊ သူ၏ အာရုံစိုက်မှုကို ရရန် တစ်ဦးနှင့်တစ်ဦး တိုက်ခိုက် သတ်ဖြတ်နေကြပေလိမ့်မည်။ သူသည် ဧကရာဇ် တစ်ဦး မဟုတ်သော်လည်း ဆက်ဆံရေးများမှာ အမြဲတမ်း ရှုပ်ထွေးလှသည်။

သူ၏ နောက်ဆုံးသမီးလေးမှာ ထိုကဲ့သို့သော ဒုက္ခပင်လယ်အတွင်း ရုန်းကန်ရမည်ကို စဉ်းစားမိတိုင်း သူ စိတ်မသက်မသာ ဖြစ်ရသည်။ သို့သော် သူ ဘာပြောနိုင်ပါဦးမည်နည်း။ သူတော်စင် သုံးဦးလုံး ရှုံးနိမ့်သွားပြီးနောက် ရှန့်ဝမ်ချင်းကို အတင်းအဓမ္မ ခေါ်ဆောင်မသွားနိုင်ရန် ဝေ့ဝူယင်ကို သူကိုယ်တိုင်ပင် ခွင့်ပြုချက် ပေးခဲ့ရသည် မဟုတ်ပါလား။

တစ်ခုတည်းသော အားကိုးရာမှာ ဤကဲ့သို့သော ဆက်ဆံရေးမျိုးမှာ ဟောကိန်းထုတ်ထားသော အခွင့်အရေး ဖြစ်နေနိုင်ခြင်းပင်။ ဝေ့ဝူယင်၏ အကူအညီဖြင့် သူသည်လည်း အစစ်အမှန် သူတော်စင် ဖြစ်လာရန် အခွင့်အရေး ရှိနေသည်။

ဝေ့ဝူယင်က လက်ဖက်ရည် တစ်ခွက် ငှဲ့ရန် ပြင်လိုက်စဉ် ရှန့်ဝမ်ချင်းက ထရပ်ကာ တားလိုက်၏။

“ကျွန်မကို လုပ်ပေးခွင့်ပြုပါ...”

သူမက သိက္ခာရှိစွာဖြင့် ပြုံးလျက် လက်ဖက်ရည် ငှဲ့ပေးလိုက်သည်။ ဝေ့ဝူယင်က လက်ဖက်ရည်ကို မြည်းစမ်းပြီးနောက် ချီးကျူးလိုက်ကာ ရှန့်လျိုဘက်သို့ လှည့်လိုက်သည်။

“ကျွန်တော်...”

သူ စကားမစမီမှာပင် သခင်လေးရှန့်က ကြားဖြတ် ပြောလိုက်သည်။

“ယောက်ဖ… ပြဿနာ တစ်ခု ရှိနေတယ်”

သခင်လေးရှန့်က စိုးရိမ်တကြီးဖြင့် အလျင်အမြန် ပြောလိုက်ခြင်း ဖြစ်၏။

ဝေ့ဝူယင်က သိချင်စိတ်ဖြင့် မျက်ခုံးပင့်လိုက်၏။

“ဘာပြဿနာလဲ”

ရှန့်ဝမ်ချင်း၏ ဝိညာဉ်အရှိန်အဝါ သုံးခုနှင့် ပတ်သက်နေသလားဟု သူ တွေးမိသော်လည်း၊ ထွက်ပေါ်လာသော စကားကြောင့် သူ စကားမပြောနိုင် ဖြစ်သွားရသည်။

“ရီအထက်လွှတ်တော်က သတ်မှတ်ထားတဲ့ စည်းမျဉ်းတစ်ခု ရှိတယ်… အဲဒါက ဘယ်သူမဆို ရှန့်မိသားစုရဲ့ တိုက်ရိုက် သွေးချင်းသားချင်း နှစ်ယောက်နဲ့ ချစ်သူရည်စား ဆက်ဆံရေး မရှိရဘူးဆိုတဲ့ စည်းမျဉ်းပဲ... ဘယ်သူမှ ရှန့်မိသားစုဝင် ဇနီးသည် နှစ်ယောက်… ကိုယ်လုပ်တော် နှစ်ယောက်… ဒါမှမဟုတ် ကောင်မလေး နှစ်ယောက် မထားရဘူး…”

“...”

ဝေ့ဝူယင်မှာ ခေတ္တမျှ မှင်တက်သွားတော့သည်။ ရှန့်လျိုသည်လည်း မျက်မှောင်ကြုတ်သွားသည်။

“စည်းမျဉ်းတွေဆိုတာ ဖောက်ဖျက်ဖို့ လုပ်ထားတာပဲ”

သို့သော် ဝေ့ဝူယင်က သခင်လေးရှန့် မျှော်လင့်ထားသည်နှင့် ဆန့်ကျင်ဘက် တုံ့ပြန်လိုက်ပြီး ထိုကဲ့သို့သော စည်းမျဉ်းကို အရေးမစိုက်ဟန်ဖြင့် ပယ်ချလိုက်သည်။

“ဒါပေမဲ့… ဒါက… သာမန် စည်းမျဉ်းတွေ မဟုတ်ဘူး…”

သခင်လေးရှန့်မှာမူ အလွန်အမင်း ထိတ်လန့်နေတော့သည်။

...

သခင်လေးရှန့်၏ တုန်လှုပ်ချောက်ချားမှုမှာ ဟန်ဆောင်နေခြင်း မဟုတ်ပေ။ သူ၏ စိတ်အခြေအနေမှာ ကမောက်ကမ ဖြစ်နေပြီး မျက်ဝန်းများထဲတွင်လည်း မတည်ငြိမ်သော ကြောက်ရွံ့မှုများ ဝေ့ဝဲနေသည်။ ဝေ့ဝူယင်သည် သူ့ထံမှ စီးထွက်လာသော ထူးခြားသည့် ခံစားချက်တစ်ခုကို အမိအရ ဖမ်းဆွဲလိုက်ပြီးနောက် မေးလိုက်သည်။

“မင်း ဘာကို ကြောက်နေတာလဲ”

ရှန့်လျို၏ မျက်ဝန်းနှင့် စိတ်နေစိတ်ထားမှာမူ အေးစက်တောင့်တင်းနေသည်။ တစ်ဖက်တွင် ရှန့်ဝမ်ချင်းမှာမူ ဇဝေဇဝါဖြစ်လျက် စူးစမ်းလိုစိတ်များ ပြည့်နှက်နေသည်။ အစောပိုင်းက ရှန်းမိသားစုဝင် သုံးဦး စကားပြောဖြစ်ကြစဉ် ရှန့်လျိုက ဤဝိုင်ကြိုက်သော ဝတ်စုံဖြူနှင့် လူငယ်လေးကို အဝေးမှ ဆွေမျိုးတော်စပ်သူ တစ်ဦးအဖြစ် မိတ်ဆက်ပေးခဲ့သည်။ ထိုသို့ မိတ်ဆက်စဉ်က လူငယ်လေး၏ မျက်နှာမှာ အနည်းငယ် အနေရခက်ပုံရသော်လည်း၊ ရှန့်လျိုက သူ၏ အကောင်းဆုံး ဝိုင်များကို ထုတ်ပေးလိုက်သောအခါတွင်မူ ထိုဘွဲ့နာမည်ကို အတိအလင်း ငြင်းပယ်ခြင်း မရှိတော့ပေ။

သခင်လေးရှန့်က အသက်ရှူနည်းစနစ်တစ်ခုဖြင့် စိတ်ကို ထိန်းချုပ်ရန် ကြိုးပမ်းသော်လည်း မအောင်မြင်ခဲ့ပေ။ နောက်ဆုံးတွင် သူ၏ စိတ်လှုပ်ရှားမှုမှာ ပိုမို ဆိုးရွားလာပြီး တုန်ရီသောအသံဖြင့် ပြောလိုက်သည်။

“ယီ အထက်လွှတ်တော်ဆိုတာ သာမန် မဟုတ်ဘူး... သူတို့က… ဟိုလေ… ငါတို့ရဲ့ အမေကလည်း ဒီအစီအစဉ်ကို ငြင်းပယ်မှာ သေချာတယ်... မင်း အနေနဲ့ လုံးဝ… ဒါကို ပေါ့ပေါ့တန်တန် သဘောထားလို့ မရဘူး... ယောက်ဖ...”

“...”

ဝေ့ဝူယင်မှာ မိမိကိုယ်ကိုယ် အလွန်အမင်း ယုံကြည်ချက်ရှိသူ ဖြစ်သည်။ သခင်လေးရှန့်သည် ဝေ့ဝူယင်၏ ထူးကဲသော အောင်မြင်မှုများ၊ ဂလက်ဆီ သုံးခုလုံးကို လက်အောက်ခံဖြစ်အောင် ပြုလုပ်နိုင်ခဲ့သည့် စွမ်းဆောင်ရည်များနှင့် အင်ပါယာ ဥပဒေသ အပေါ် သူ၏ နက်နဲသော သိမြင်မှုများကို သိရှိထားပါလျက်နှင့်၊ ယခုအခါ ဝေ့ဝူယင်၏ အသက်အန္တရာယ်အတွက် စိုးရိမ်နေခြင်းမှာ အံ့ဩစရာပင်။

ထိုစည်းမျဉ်းမှာ ကျော်လွှားရန် ဤမျှပင် မဖြစ်နိုင်လောက်အောင် ခက်ခဲနေသလော။

သခင်လေးရှန့်က ခေတ္တမျှ ရပ်နားကာ အလွန်လေးနက်သော ကိစ္စတစ်ခုကို စိတ်ထဲတွင် ဝေခွဲမရ ဖြစ်နေပုံရသည်။ သို့သော် ရှန့်လျိုမှာမူ ထိုမျှ အလေးအနက် မစဉ်းစားဘဲ တိုက်ရိုက်ပင် ပြောလိုက်သည်။

“အာရုဏ်ဦး လောကရှန့်ထိုက ကျုပ်တို့ ရှန့်မိသားစုရဲ့ တခြားအဖွဲ့ဝင် တစ်ယောက်ကိုပါ ကိုယ်လုပ်တော်အဖြစ် လက်ခံဖို့ အရင်ကတည်းက သဘောတူညီချက် ရှိထားတယ်ဆိုတာ မသိခဲ့ဘူး... ဒါပေမဲ့ ဒီဆုံးဖြတ်ချက်ဟာ သေလောက်အောင် အန္တရာယ်များတဲ့ ကိစ္စတစ်ခု ဖြစ်သွားစေမယ့် နောက်ကြောင်းရာဇဝင် ရှိတယ်...”

ဝေ့ဝူယင်သည် ထိုရာဇဝင်ကို စိတ်မဝင်စားပေ။ သူသည် ကောင်းချီးခံယီအင်ပါယာ၏ အင်အားကို မြှောက်ပင့်ပြောဆိုရင်း ကြောက်ရွံ့မှုများ သွေးထိုးပေးနေသည့် ရှန့်လျို၏ စကားကို အေးဆေးစွာပင် ဖြတ်ပြောလိုက်သည်။

“အဲ့တာတွေက ဘာမှ အရေးမကြီးပါဘူးလေ... မိန်းကလေးရှန့်ရဲ့ ဆုံးဖြတ်ချက်ပဲ အရေးကြီးတယ်... တကယ်လို့ သူက လက်ခံဖို့ ရွေးချယ်တယ်ဆိုရင်တော့ ဘယ်အရာကမှ တားဆီးနိုင်မှာ မဟုတ်ဘူး”

“...”

သခင်လေးရှန့်။

“...”

ရှန့်လျို။

***

အပိုင်း(၂၂၅၀)

ရှန့်ဝမ်ချင်း၏ မျက်ဝန်းများတွင်မူ အံ့ဩချီးကျူးမှုများနှင့်အတူ လှပသော အလင်းတန်းများ တောက်ပလာသည်။ ဤသည်မှာ အာဏာရှင်ဆန်လှပေသည်။ ဤသည်မှာ ရဲတင်းလွန်းလှပေသည်။ သူမ၏ နှလုံးသားမှာ ပြင်းထန်စွာ တုန်ခါနေပြီး၊ ဝတ်စုံအောက်မှ ရင်အစုံမှာလည်း လှိုင်းတံပိုးများပမာ မြင့်တက်လိုက် နိမ့်ဆင်းလိုက် ဖြစ်နေတော့သည်။

ရှန့်လျိုမှာမူ တိတ်ဆိတ်စွာပင် ခေါင်းခါယမ်းလိုက်ရုံမှတစ်ပါး အခြားမရှိတော့ပေ။ ဝေ့ဝူယင်၏ မှားယွင်းသော ဆုံးဖြတ်ချက်ကို ပြုပြင်ရန် သူ ထပ်မံ မကြိုးစားတော့ပေ။ အင်ပါယာ လမ်းစဉ်ကို လျှောက်လှမ်းသူများနှင့် ဆက်ဆံရသည်မှာ အလွန်ပင် ခေါင်းခဲစရာ ကောင်းလှကြောင်း စူးဟောင်ရန် သာဆိုလျှင် အကြိမ်ပေါင်း တစ်သောင်းမက ထောက်ခံပေလိမ့်မည်။

သခင်လေးရှန့်က သူ၏ခွက်ထဲသို့ ဝိုင်များ အပြည့်ဖြည့်ကာ တစ်ကျိုက်တည်း မော့ချလိုက်ပြီးနောက် ဝိုင်နံ့များနှင့်အတူ သက်ပြင်းချလိုက်သည်။ “

ကောင်းပြီလေ… နောက်မှ ငါ သတိမပေးဘူးလို့တော့ အပြစ်မတင်နဲ့တော့”

“မတင်ပါဘူး... ကောင်းကင်ကြီး ပြိုမကျလာခဲ့ရင်လည်း ငါ့ကို အပြစ်မတင်နဲ့ပေါ့...”

ဝေ့ဝူယင်က ပြုံးလျက် ဝေဝါးစွာ တုံ့ပြန်လိုက်သည်။ ရှန့်လျိုနှင့် စူးဟောင်ရန်တို့ မသိရှိလိုက်သည်က ဝေ့ဝူယင်သည် အင်ပါယာ ဥပဒေ သို့မဟုတ် မည်သည့် ဥပဒေ ၏ လွှမ်းမိုးမှုကိုမျှ ပြင်းထန်စွာ မခံရခြင်းပင်။ ထိုဥပဒေများမှာ သူ၏ ကြယ်တာရာ ဝိညာဉ်များက ကောင်းကင်ဘုံမှ ရယူထားသော ပြင်ပစွမ်းအား အရင်းအမြစ်များသာ ဖြစ်ပြီး၊ သူက ၎င်းတို့ကို ကျင့်ကြံရာတွင် ကူညီပေးရုံသာ ရှိသည်။

အကယ်၍ ဘုရင်သာ ဤနေရာတွင် ရှိနေပါက ဟမ့်ဟု တစ်ချက် မြည်တမ်းပြီးနောက် ကန့်ကွက်သူ အားလုံးကို အမှုန့်ဖြစ်သွားစေမည့် ဖျက်ဆီးခြင်း လှိုင်းလုံးများနှင့်အတူ ကောင်းကင်ခွဲ ဆေဘာချက်တစ်ချက်ဖြင့် အဆုံးသတ်လိုက်ပေလိမ့်မည်။

ဝေ့ဝူယင်ကမူ ထိုကောင်လေးထက် များစွာ၊ များစွာ ပို၍ ဆင်ခြင်တုံတရားရှိသူ ဖြစ်သည်။

ထိုကိစ္စ ပြီးဆုံးသွားပြီ ဖြစ်ရာ ကျန်ရှိသော ဆုံးဖြတ်ချက်မှာ ရှန့်ဝမ်ချင်း တစ်ဦးတည်းသာ ဖြစ်သည်။ သူမ၏ မျက်ဝန်းများထဲမှ ကြည်နူးမှုများကို ကြည့်ခြင်းဖြင့် ရှန့်လျိုမှာ ရလဒ်ကို ကြိုတင် သိရှိနေခဲ့ပြီ။ သူ စိတ်ဓာတ်ကျစွာဖြင့်သာ လက်ခံလိုက်ရတော့သည်။

ရှန့်ဝမ်ချင်းက နှစ်ပေါင်း ၂၀၀,၀၀၀ သက်တမ်းရှိသော သူမ၏ ဖခင်ကို ကြည့်လိုက်ပြီးနောက်၊ ပြတ်သားသော ဆုံးဖြတ်ချက်ဖြင့် ဝေ့ဝူယင်ဘက်သို့ လှည့်လိုက်၏။

“ကျွန်မမှာ ညှိနှိုင်းနိုင်တဲ့ အင်အား မရှိသလောက်ပဲဆိုတာ သိပါတယ်... ပြီးတော့ ကျွန်မရဲ့ ဘဝနဲ့ ခန္ဓာကိုယ်ကို ရှင့်ရဲ့ ကိုယ်လုပ်တော်အဖြစ် ပေးအပ်ဖို့ ဘာကန့်ကွက်ချက်မှ မရှိဘူးဆိုတာလည်း ရှင် သိမှာပါ... ဒါပေမဲ့… ကျွန်မ တောင်းဆိုချက်တစ်ခုလောက် ပြောခွင့်ပြုမလား”

ကျင့်ကြံခြင်း လောကတွင် ကိုယ်လုပ်တော် ဟူသော စကားလုံးမှာ မတူညီသော အဓိပ္ပာယ်နှင့် အရေးပါမှုများ ရှိသည်။ သေမျိုးနိုင်ငံများတွင် ကိုယ်လုပ်တော် သို့မဟုတ် လင်ငယ်များကို အဆင့်နိမ့်သော အိမ်ထောင်ဖက်များအဖြစ် သတ်မှတ်လေ့ရှိပြီး၊ သူတို့၏ သားသမီးများမှာလည်း မိသားစုအနွယ်ဝင်အဖြစ် တရားဝင် အသိအမှတ်ပြုခံရလေ့ မရှိပေ။ သူတို့၏ အဆင့်အတန်းမှာ အလွန်နိမ့်ကျပြီး ပြောရေးဆိုခွင့်လည်း မရှိသလောက်ပင်။

သူတို့မှာ လျှို့ဝှက်မယားများထက် အနည်းငယ်သာ အဆင့်မြင့်ပြီး၊ အင်အားကြီးသူများထံ လက်ဆောင်အဖြစ် ပေးအပ်ခြင်း ခံရသည့် ကုန်ပစ္စည်းများပမာ ဆက်ဆံခံရလေ့ရှိသည်။ သို့သော် ကျင့်ကြံခြင်း လောကတွင်မူ ရွှယ်ရီဖေး ကဲ့သို့သော အမျိုးသမီးများမှာ ကိုယ်လုပ်တော်အဖြစ် အမည်တပ်ခံရသော်လည်း အင်ပါယာတစ်ခုလုံး၏ ရိုသေလေးစားမှုနှင့် အာဏာကို ရရှိထားကြသည်။

ရှန့်ဝမ်ချင်းကဲ့သို့ သူတော်စင်များပင် သတ်ဖြတ်လုယူလိုကြသော ချွင်ဆွေဟွကျိ ခန္ဓာကိုယ် ပိုင်ရှင် အမျိုးသမီးတစ်ဦးက အဘယ်ကြောင့် မိမိကိုယ်ကိုယ် ကိုယ်လုပ်တော်အဖြစ် ပေးအပ်လိုသနည်းဆိုသည်မှာ ဝေ့ဝူယင်အတွက်ပင် အစပိုင်း၌ အံ့ဩစရာ ဖြစ်ခဲ့သည်။ သူမအတွက် သင့်တော်သော ကြင်ဖော်ကို ရှာဖွေရန် ပြိုင်ပွဲတစ်ခုပင် ကျင်းပနေခဲ့သည် မဟုတ်ပါလော။

ကိုယ်လုပ်တော်များအတွက် ခမ်းနားသော မင်္ဂလာပွဲများ ကျင်းပပေးလေ့ မရှိသလို၊ သူတို့၏ တည်ရှိမှုမှာလည်း အခြားသော ကိစ္စရပ်များ၏ နောက်ကွယ်တွင်သာ ရှိနေတတ်သည်။ ဤသည်မှာ သေမျိုးကမ္ဘာတွင် ဖြစ်စေ၊ ကျင့်ကြံခြင်း လောကတွင် ဖြစ်စေ လူ့အဖွဲ့အစည်းအလိုက် ကွဲပြားမှုများ ရှိသော်လည်း အခြေခံအားဖြင့် တူညီနေဆဲပင် ဖြစ်သည်။

ကိုယ်လုပ်တော် သို့မဟုတ် မယားငယ် ဟူသည်မှာ အမည်နာမပင် မှတ်မိခြင်း မခံရဘဲ ကျင့်ကြံခြင်း လောက၌လည်း အမြောက်အမြား ထားရှိလေ့ရှိရာ နှစ်စဉ်နှင့်အမျှ သေဆုံးသွားသူများရှိသလို အသစ်လဲလှယ်ခြင်း ခံရသူများလည်း ရှိကြသည်။ အချို့အတွက်မူ ဤဘွဲ့ထူးနှင့် အဆင့်အတန်းမှာ စိတ်ဓာတ်ကျဆင်းဖွယ်ရာ ဂုဏ်ပုဒ်တစ်ခုသာ ဖြစ်ပေသည်။

သို့သော် ခြွင်းချက်အနေနှင့် အင်ပါယာများ၏ အဆောင်တော်ရှိ နန်းတွင်းကိုယ်လုပ်တော် များမှာမူ အင်ပါယာတစ်ခုလုံး၏ အသိအမှတ်ပြုမှုကို ရရှိကြပြီး သမိုင်းတွင်လည်း ကမ္ဗည်းတင်ကျန်ရစ်လေ့ ရှိသည်။ သူတို့၏ သားသမီးများသည်လည်း နောင်တစ်ချိန်တွင် ဧကရာဇ် သို့မဟုတ် မိဖုရားခေါင်ကြီး ဖြစ်လာရန် ယှဉ်ပြိုင်နိုင်သည့် မွေးရာပါ အခွင့်အရေးရှိကြပြီး ဧကရာဇ် သွေးမျိုးဆက်များ ဖြစ်ကြသည်။ ထျန်းရီဝူ မှာ ထိုအချက်အတွက် ထင်ရှားသော သာဓကတစ်ခုပင်။

ရှန့်ဝမ်ချင်း၏ စကားများကြောင့် ရှန့်လျို၏ မျက်နှာရိပ်မျက်ကဲမှာ ပြောင်းလဲသွားပြီး သူမအား တားဆီးရန် စိတ်စောနေမိသော်လည်း အားတင်း၍ ထိန်းထားလိုက်ရသည်။

“ဒါပေါ့… ရတာပေါ့”

ဝေ့ဝူယင်က အေးဆေးစွာပင် ပြန်လည် ဖြေကြားလိုက်သည်။

ရှန့်ဝမ်ချင်းက သူမ၏ သတ္တိအားလုံးကို စုစည်းလိုက်သည်။ သတင်းများအရ ဝေ့ဝူယင်သည် မဟာ လောကရှန့်ထို အဂ္ဂိရတ်ပညာရှင် တစ်ဦးဖြစ်ပြီး၊ သူမ၏ ဖခင်နှင့် ဝေ့ဝူယင်တို့အကြား ပဋိပက္ခ ဖြစ်ပွားခဲ့ပြီးနောက် သူ၏ဖခင်ကို သူတော်စင် နိုးထခြင်း ဆေးရည် ပေးအပ်ရန် ငြင်းဆန်ခဲ့သည်ဟု အစေခံများထံမှ ကြားသိထားခဲ့သည်။

“ကျွန်မ တောင်းဆိုချင်တာက… ကျွန်မရဲ့ ဖခင်ကို သူတော်စင်အဆင့် တက်လှမ်းနိုင်အောင် ကူညီပေးပါ”

“...”

ရှန့်လျိုမှာ စိတ်မလှုပ်ရှားဘဲ မနေနိုင်တော့ပေ။ သူသည် ဤသမီးလေးအပေါ် အချည်းနှီး အလိုလိုက်ခဲ့ခြင်း မဟုတ်ပေ။ သို့သော် တစ်ချိန်တည်းမှာပင် မိမိအတွက်နှင့် သမီးဖြစ်သူက ရွယ်တူချင်း ကျင့်ကြံဖော်တစ်ဦး ရှာဖွေနိုင်သည့် သူမ၏ အနာဂတ် ပျော်ရွှင်မှုများကို စတေးနေရသည်ကို တွေးမိကာ ရင်ထဲတွင် မချိတင်ကဲ ဖြစ်နေရသည်။

ဝေ့ဝူယင်က ပြုံးလျက်ပင် ရှိနေဆဲ ဖြစ်၏။

“တကယ်ကို မိဘအပေါ် သိတတ်တဲ့ သမီးပဲ... ဒါပေမဲ့ ငါ တစ်ခု မေးပါရစေ… မင်း ငါ့ရဲ့ ကိုယ်လုပ်တော် ဖြစ်ချင်တာဟာ ဒီမျှော်လင့်ချက် တစ်ခုတည်းအတွက်ပဲလား... မင်းအဖေရဲ့ ဘဝအလင်းတိုင် မငြိမ်းခင်မှာ သူဖြစ်ချင်တဲ့ အိပ်မက်တွေ ပြည့်ဝအောင် ငါ့ရဲ့ နည်းလမ်းတွေနဲ့ ကူညီပေးဖို့အတွက်ပဲလား”

“...”

ရှန့်ဝမ်ချင်းမှာ တိတ်ဆိတ်သွားပြီး မျက်နှာကို အောက်သို့ ငုံ့ချလိုက်ကာ လက်သီးလေးနှစ်ဖက်ကို တင်းတင်းဆုပ်ထားမိသည်။

မိဘအတွက် မိမိ၏ ဘဝနှင့် အနာဂတ်ကို စတေးခြင်းမှာ ရဲရင့်သော လုပ်ရပ်ဖြစ်သော်လည်း ဝေ့ဝူယင်၏ အမြင်တွင်မူ ဤသည်မှာ မလိုအပ်သော ကိစ္စတစ်ခုပင်။ သူက လက်ဖက်ရည်ကို တစ်ငုံ သောက်လိုက်၏။

“ဒီလိုဆိုရင်ကော ဘယ်လိုလဲ… မင်း ငါ့ရဲ့ ကိုယ်လုပ်တော် ဖြစ်လာဖို့ သဘောတူသည်ဖြစ်စေ၊ မတူသည်ဖြစ်စေ မင်းအဖေ သူတော်စင်အဆင့်ကို တက်လှမ်းနိုင်ဖို့ ငါ့ရဲ့ အစွမ်းအစ၊ နည်းလမ်းအားလုံးနဲ့ ကူညီပေးမယ်လို့ ငါ ကတိပေးတယ်... သူကိုယ်တိုင် အရှုံးပေးတာမျိုး မဟုတ်ရင်တော့ သူဖြစ်ချင်တဲ့ အိပ်မက်ကို မအောင်မြင်စရာ အကြောင်း မရှိသလောက်ပါပဲ”

ဝေ့ဝူယင်၏ အကြည့်မှာ မှင်တက်နေသော ရှန့်ဝမ်ချင်းနှင့် ရှန့်လျိုတို့ထံသို့ ရောက်သွားသည်။ သူက ဆက်လက် ရှင်းပြလိုက်၏။

“သူတော်စင် နိုးထခြင်း ဆေးရည်လား... ငါ သူ့ကို အထွတ်အထိပ် အရည်အသွေး ရှိတဲ့ဟာ ပေးမယ်... ပြီးတော့ သူ ကျရှုံးခဲ့ရင်တောင် အသက်အန္တရာယ် မရှိအောင် သန့်စင်ထားတဲ့ လျှို့ဝှက်မူလမြေစေး ကိုလည်း ထည့်ပေးမယ်... နောက်ပြီး…”

ဝေ့ဝူယင်သည် ကျင့်ကြံသူတစ်ဦး သူတော်စင်အဆင့်သို့ ရောက်ရှိရန် အထောက်အကူပြုမည့် ကောင်းကင်နှင့် မြေကြီးမှ အကောင်းဆုံးသော အဂ္ဂိရတ် ထုတ်ကုန်များနှင့် ပစ္စည်းများစာရင်းကို အသေးစိတ် ရွတ်ပြလိုက်သည်။ ၁၀၀ ရာခိုင်နှုန်း အာမခံချက် မရှိသော်လည်း ထိုမျှအဆင့်နှင့်ဆိုလျှင် မည်သူမဆို ကျရှုံးရန် ခက်ခဲပေလိမ့်မည်။

“ငါ့ရဲ့ စကားဟာ ဧကရာဇ် တစ်ပါးရဲ့ အမိန့်တော်လိုပဲ ခိုင်မာတယ်... မဖောက်ဖျက်နိုင်တဲ့ ကတိပဲ... ကဲ… မိန်းကလေးရှန့်... မင်း ဘယ်လို ဆုံးဖြတ်မလဲ... မင်း ငါ့ရဲ့ ကိုယ်လုပ်တော် ဖြစ်ချင်သေးလား၊ ဒါမှမဟုတ် တခြား တစ်နေရာရာမှာ မင်းကို ပျော်ရွှင်အောင် ထားနိုင်မယ့် ကျင့်ကြံဖော်တစ်ယောက်ကို ရှာမလား... မိဘအပေါ် သိတတ်မှုကို မင်းရဲ့ ရွေးချယ်မှုအတွက် အကြောင်းပြချက်အဖြစ် သုံးစရာ မလိုတော့ဘူး”

“စတေးမှုဆိုတဲ့ အခြေခံအုတ်မြစ် မရှိတော့ဘူး... မင်းရဲ့ ဆုံးဖြတ်ချက်ပဲ ကျန်တော့တယ်... တကယ်လို့ မင်း ငြင်းပယ်ခဲ့ရင် အန္တရာယ်ရှိမလားလို့ စိုးရိမ်နေရင်လည်း မစိုးရိမ်ပါနဲ့... မင်းကို ဖြစ်ဖြစ်၊ မင်းနဲ့ ပတ်သက်သူတွေကို ဖြစ်ဖြစ် ရန်ပြုဖို့ ငါ့မှာ အကြောင်းပြချက် မရှိဘူး... ငါ့မှာ လူသိများတဲ့ ချွင်ဆွေဟွကျိ ခန္ဓာကိုယ် ပိုင်ရှင် နှစ်ယောက်တောင် ရှိနေတာပဲ... ထပ်ပြောရရင် မင်းသာ ငြင်းပယ်မယ်ဆိုရင် မင်းနဲ့ ငါ့အကြားမှာ ပတ်သက်မှု ရှိနေတယ်ဆိုတဲ့ ကောလာဟလတွေ မထွက်အောင် ငါ့ရဲ့ အဂ္ဂိရတ် သူရဲကောင်း တစ်ယောက် ဖြစ်တဲ့ သူတော်စင် ပါခက်ဆီမှာ တပည့်အဖြစ် လက်ခံဖို့ ပြောပေးမယ်”

ဝေ့ဝူယင်သည် အရာအားလုံးကို ရှင်းလင်းအောင် ပြုလုပ်ပေးလိုက်ခြင်း ဖြစ်သည်။ သခင်လေးရှန့်ပင်လျှင် မယုံနိုင်လောက်အောင် မျက်လုံးအဝိုင်းသား ဖြစ်သွားရသည်။ ဝေ့ဝူယင်သည် ရှန့်ဝမ်ချင်း၏ ဆုံးဖြတ်ချက်အပေါ် မည်သည့် သွေးဆောင်မှု သို့မဟုတ် မိသားစု ဝတ္တရားများမှ လွှမ်းမိုးမှု မရှိစေရန် အကုန်လုံးကို ဖယ်ရှားပေးလိုက်ခြင်း မဟုတ်ပါလော။

ဤသည်မှာ… အလွန်ပင် ပါးနပ်ပြီး ပြတ်သားလှသော လုပ်ရပ်ပင်

သခင်လေးရှန့်သည် ဤကဲ့သို့သော အခြေအနေမျိုးကို အမြဲ မြင်တွေ့ဖူးသော်လည်း၊ ဝေ့ဝူယင်၏ နေရာတွင် ရှိနေသူတိုင်းမှာ ထုတ်ကုန် လဲလှယ်သကဲ့သို့ ကိုယ်လုပ်တော်ကို ဝယ်ယူသည့် ပုံစံမျိုးဖြင့်သာ သဘောတူလေ့ရှိကြသည်။ အချို့သော အခြေအနေများတွင် အမျိုးသား၊ အမျိုးသမီးများသည် မိသားစု သို့မဟုတ် ယခင် ချစ်သူဟောင်းများကို ကူညီရန်အတွက် ကိုယ်လုပ်တော်အဖြစ် အတင်းအဓမ္မ ခံယူကြသည်။

“...”

ရှန့်လျိုမှာမူ အံ့ဩလွန်း၍ ပါးစပ်အဟောင်းသား ဖြစ်နေတော့သည်။ ဤသည်မှာ မည်ကဲ့သို့ ထူးဆန်းသည့် ဖြစ်ရပ်နည်း။