အခန်း (၂၂၅၁-၂၂၅၂)

အပိုင်း(၂၂၅၁)

ရှန့်လျိုပင် ဤမျှ ဖြစ်နေလျှင် ရှန့်ဝမ်ချင်းမှာမူ ပို၍ပင် တုန်လှုပ်နေပေလိမ့်မည်။ အမှန်စင်စစ် သူမသည် သူမ၏ ဖခင်အတွက်ကြောင့်သာ ပဲ့တင်ထပ် ဝိညာဉ်နယ်ပယ် ကျွမ်းကျင်သူ သို့မဟုတ် မဟာ လောကရှန့်ထို ၏ ကိုယ်လုပ်တော်အဖြစ် ခံယူရန် အသည်းအသန် ကြိုးပမ်းခဲ့ခြင်း ဖြစ်သည်။ သူမတွင် လူတိုင်း လိုချင်တပ်မက်သော ခန္ဓာကိုယ်ရှိသဖြင့် သူမကိုယ်သူမ တန်ဖိုးရှိသည်ဟု ခံစားခဲ့ရသည်။

သို့သော် ယခုအခါ ဝေ့ဝူယင်က သူမ၏ နှလုံးသားထဲမှ အစီအစဉ်များကို အကုန်ပြောင်းလဲပစ်လိုက်ပြီ ဖြစ်ရာ သူမအနေနှင့် အလွန်ပင် အနေရခက်သော အခြေအနေသို့ ရောက်ရှိသွားတော့သည်။

ဝေ့ဝူယင်ကတော့ ပျားရည်စက်များ ထည့်ထားသော လက်ဖက်ရည်ကို အရသာခံ၍ ဆက်လက် သောက်နေမိသည်။ ခန်းမအတွင်းရှိ တိတ်ဆိတ်မှုမှာလည်း သိသာလှသည်။

၁၅ မိနစ်ခန့် ကြာပြီးနောက် ရှန့်ဝမ်ချင်း၏ မျက်ဝန်းများသည် ပြင်းပြသော စိတ်အားထက်သန်မှုများနှင့်အတူ ဝေ့ဝူယင်ထံသို့ စူးစိုက်သွားတော့သည်။

“ကျွန်မ ရှင့်ရဲ့ ကိုယ်လုပ်တော် ဖြစ်ချင်ပါတယ်...”

သူမက အလွန် ရိုသေစွာဖြင့် ဦးညွှတ်လိုက်ရာ၊ ဤသည်မှာ မည်သည့် ဖိအားမျှ မပါဘဲ သူမ၏ စစ်မှန်သော ဆန္ဒအရ ပြုလုပ်ခြင်းဖြစ်ကြောင်း ထင်ရှားလှပေတော့သည်။

ဤသည်က သခင်လေးရှန့်နှင့် ရှန့်လျိုတို့ နှစ်ဦးလုံးကို အံ့အားသင့်သွားစေသည်။ အကယ်၍ သူမသာ ငြင်းပယ်လိုက်ပါက ဝေ့ဝူယင်၏ အကူအညီဖြင့် အေးဆေးတည်ငြိမ်သော ဘဝကို ပိုင်ဆိုင်နိုင်မည် မဟုတ်ပါလား။ အထူးသဖြင့် ဝေ့ဝူယင်တွင် ယွဲ့စွန်းလီနှင့် ရှီနင် တို့ ရှိနေသဖြင့် သူမကို အထူးအဆန်းအဖြစ် ကြည့်နေမည် မဟုတ်သည်မှာ သေချာလှသည်။

ဝေ့ဝူယင်သည် ထွက်သက်ဝင်သက်၊ အပြုံးနှင့် လှုပ်ရှားမှုတိုင်းတွင် အမျိုးသားတို့၏ တပ်မက်မှုကို နှိုးဆွပေးနိုင်သည့် ဆွဲဆောင်မှုအရှိန်အဝါများ ထွက်ပေါ်နေသော၊ အလွန်တရာ လှပလွန်းသည့် ဤမိန်းကလေးကို စိုက်ကြည့်နေမိသည်။ အစပိုင်းတွင် ရှန့်ဝမ်ချင်းသည် ရီအထက်လွှတ်တော် ဆိုသည့် အမည်ကိုသုံး၍ သူ့ကို ငြင်းပယ်ရန် ကြိုးပမ်းလိမ့်မည်ဟု သူ ထင်မှတ်ခဲ့သော်လည်း၊ သူမ၏ စိတ်အာရုံ လှုပ်ခတ်မှုများမှာ စစ်မှန်နေပြီး မည်သည့် လှည့်စားမှုမျှ မရှိသည်ကို သူ မြင်နေရသည်။

ဝေ့ဝူယင်က သဘောတူသည့်အနေဖြင့် ခေါင်းညိတ်လိုက်ပြီး လက်ဖက်ရည်ခွက်ကို ချလိုက်သည်။

“ဒါဆိုရင်တော့… မင်း ရှန့်ဝမ်ချင်းရဲ့ ဆန္ဒရှိနေသရွေ့နဲ့ မင်း တည်ရှိနေသရွေ့၊ မင်းဟာ ငါ… အာရုဏ်ဦး အင်ပါယာရဲ့ အာဏာရှင် ဧကရာဇ် ရဲ့ ကိုယ်လုပ်တော် ဖြစ်လာစေရမယ်”

သူတို့နှစ်ဦးအကြားတွင် ဟိန်းဟောက်တုန်ခါနေသော ဧကရာဇ်ဥပဒေ လှိုင်းလုံးကြီးတစ်ခု ထွက်ပေါ်လာရာ ရှန့်လျိုနှင့် သခင်လေးရှန့်တို့၏ မျက်နှာများမှာ သိသိသာသာ ပြောင်းလဲသွားကြတော့သည်။

ဤသည်မှာ ဥပဒေအရ ချည်နှောင်ခြင်း ပင်...။

စစ်ပွဲဥပဒေအရ ရရှိသော စစ်သုံ့ပန်းများကို ပိုင်စိုးခွင့်ရသကဲ့သို့ပင်၊ ယခုဖြစ်ရပ်မှာ ကောင်းကင်ဘုံဥပဒေ ကိန်းဝပ်နေသော ဧကရာဇ် အမိန့်တော် ဖြစ်ရာ မည်သူမျှ ဖောက်ဖျက်၍ မရပေ။

သို့သော် ဝေ့ဝူယင်၏ မျက်ခုံးများမှာ ရုတ်တရက် တွန့်ချိုးသွား၏။ ချည်နှောင်မှုမှာ အသက်ဝင်သွားပြီ ဖြစ်သော်လည်း သူမ၏ ဝိညာဉ်သုံးခုအနက် တစ်ခုတည်းကိုသာ သက်ရောက်မှု ရှိနေသည်။ သူမ၏ ဝိညာဉ်များကို အရောင်ဖြင့် ကိုယ်စားပြုရလျှင် အနက်၊ အဖြူနှင့် ရွှေရောင်တို့ ဖြစ်ကြပြီး သူမ၏ ဆံပင်အရောင်များနှင့် ထပ်တူကျနေသည်။

အင်ပါယာ ဥပဒေ နှင့် ရစ်ပတ်သွားသော ဝိညာဉ်မှာ အနက်ရောင်ဝိညာဉ် ဖြစ်သည်။

ဤဥပဒေကို အသက်သွင်းလိုက်ခြင်းမှာ ဝေ့ဝူယင်အတွက် စမ်းသပ်မှုတစ်ခုလည်း ဖြစ်ရာ၊ သူ၏ ယူဆချက်အချို့မှာ မှန်ကန်ကြောင်း သက်သေပြလိုက်ခြင်းပင်။ ရှန့်လျို၏ သမီးဖြစ်သူ ရှန့်ဝမ်ချင်းတွင် မတူညီသော ဝိညာဉ်သုံးခု ရှိနေသည်။ ထို့ထက်မက အခြားသော ဝိညာဉ်နှစ်ခုမှာ ကိန်းအောင်းနေဆဲ ဖြစ်၏။

ကံကောင်းထောက်မစွာဖြင့် ဝေ့ဝူယင်မှာ ကြောက်ရွံ့တတ်သူ မဟုတ်ပေ။ ရှန့်ဝမ်ချင်းမှာမူ သူမ၏ ဝိညာဉ်ထဲသို့ အင်ပါယာ ဥပဒေ ၏ နွေးထွေးမှု ဝင်ရောက်လာသည်ကို ခံစားလိုက်ရပြီးနောက် စိတ်သက်သာရာ ရသွားပုံရသည်။ ထို့အပြင် ဤချည်နှောင်မှုမှာ သူမ၏ ဆန္ဒအပေါ်၌သာ အခြေခံထားပြီး၊ သူမ စိတ်ပြောင်းလဲသွားပါကလည်း မည်သည့် အပြစ်ဒဏ်မျှ ခံရမည် မဟုတ်ကြောင်း သူမ သိရှိလိုက်သည်။

သူမ၏ ဆွဲဆောင်မှုရှိသော မျက်ဝန်းများမှာ ဝေ့ဝူယင်ကို ကြည့်ရင်း နူးညံ့သွားတော့သည်။ ချစ်ခြင်းမေတ္တာ၏ အစေ့အနှစ်လေးများမှာ သူမ၏ နှလုံးသားထဲတွင် စတင် ပေါက်ဖွားလာခဲ့ပြီ ဖြစ်၏။

ဝေ့ဝူယင်၏ အစောပိုင်းက ပြုမူပုံများမှာ သူမ၏ အထင်ကြီးမှုကို ရရှိစေရုံသာမက၊ လေးစားမှုကိုလည်း ရရှိစေခဲ့သည်။ ဝေ့ဝူယင်သည် အခြားသော အမျိုးသားများနှင့် ခြားနားစွာပင် သူမ၏ ချွင်ဆွေဟွကျိ ခန္ဓာကိုယ် တစ်ခုတည်းကိုသာ မက်မောသူ မဟုတ်ကြောင်း သူမ သဘောပေါက်သွားခဲ့သည်။ သူမအနေနှင့် အလွယ်တကူ ပြောင်းလဲနိုင်သော အသုံးချခံ ပစ္စည်းတစ်ခုအဖြစ် အကြည့်ခံရမည့်အစား သူမ၏ အလှအပနှင့် ဟန်ပန်ကြောင့် တပ်မက်ခံရသည်ကို ပို၍ နှစ်သက်သည်။

ဝေ့ဝူယင်တွင် အခြားသော ချွင်ဆွေဟွကျိ ခန္ဓာကိုယ် ပိုင်ရှင် နှစ်ဦးရှိနေသဖြင့် သူမ၏ ခန္ဓာကိုယ် ဂုဏ်သတ္တိများကို စိတ်ဝင်စားလိမ့်မည် မဟုတ်ပေ။ သူမသည် ဝေ့ဝူယင်က သူမကို အဘယ်ကြောင့် နှစ်သက်ရသလဲဆိုသည်ကို မည်သို့ စူးစမ်းရမည်လဲဟုပင် စတင် တွေးတောနေမိပြီ ဖြစ်သည်။

ဝေ့ဝူယင်က သူမ၏ အတွေးများကို အထူးတလှယ် ဂရုမစိုက်ပဲ ရှန့်လျိုကို တိုက်ရိုက်ပင် မေးလိုက်သည်။

“ဒါနဲ့… ဆရာကြီးရှန့်... ဝမ်ချင်းရဲ့ ကိုယ်ထဲမှာ ဘာလို့ တခြားဝိညာဉ် နှစ်ခု ရှိနေရတာလဲ”

“...”

ရှန့်လျိုမှာ အစပိုင်းတွင် ဇဝေဇဝါ ဖြစ်သွားသော်လည်း၊ အထွတ်အထိပ် သူတော်စင် များ၏ ဝိညာဉ်အမြင်ကို သတိရသွားသောအခါ သူ၏ မျက်ဝန်းများမှာ ထိတ်လန့်မှုကြောင့် ပြူးကျယ်သွားတော့သည်။

“ဟမ်...”

ရှန့်ဝမ်ချင်းမှာလည်း ဘာကိုဆိုလိုမှန်း မသိသဖြင့် မျက်တောင်တဖျတ်ဖျတ် ခတ်နေမိသည်။ ထိုစဉ် လျှို့ဝှက်ဆန်းကြယ်သော စွမ်းအားတစ်ခုက လှုံ့ဆော်လိုက်သကဲ့သို့ သူမ၏ စိမ်းပြာရောင် မျက်ဝန်းများမှာ မမျှော်လင့်ဘဲ တောက်ပလာတော့သည်။ ဝေ့ဝူယင်၏ စကားများမှာ သူမ ကာလရှည်ကြာစွာ ဖိနှိပ်ထားခဲ့သော အတွေးများနှင့် သူမ၏ နှလုံးသားထဲတွင် အမြဲရှိနေခဲ့သည့် သံသယများကို ပွင့်ထွက်သွားစေသကဲ့သို့ပင်။

သခင်လေးရှန့်မှာမူ ဤမျှ စိတ်ဝင်စားစရာကောင်းသော နောက်ကွယ်မှ အကြောင်းအရာများကို ကြားရလိမ့်မည်ဟု မမျှော်လင့်ဘဲ ဝိုင်ကို အရသာခံ သောက်နေမိသည်။

“ပွင့်ပွင့်လင်းလင်း ပြောလို့ရပါတယ်... ရှန့်ဝမ်ချင်းမှာလည်း ဒါကို သိပိုင်ခွင့်ရှိတယ်”

ဝေ့ဝူယင်က ရှန့်လျိုကို ကြည့်ကာ ထပ်မံ၍ စကားလမ်းကြောင်း ပေးလိုက်သည်။ ရှန့်လျိုအနေနှင့် ရှန့်ဝမ်ချင်း၏ ဘဝအကြောင်းအချို့ကို ထုတ်ဖော်ရန် တုံ့ဆိုင်းနေသည်ကို ခံစားရသည်။ သူသည် မလိုအပ်ဘဲ လျှို့ဝှက်ထားတတ်သူ မဟုတ်ပေ။

အဖြေမှာ ဝေ့ဝူယင် မျှော်လင့်ထားသည်ထက် များစွာ ရိုးရှင်းပါသည်။

ရှန့်ဝမ်ချင်း၏ မွေးဖွားမှုမှာ အလွန်ပင် ရှုပ်ထွေးခဲ့သည်။

သူမ မွေးဖွားစဉ်က ခန္ဓာကိုယ်ကို ဝါးမြိုပြီး ဝိညာဉ်အထိပါ ပျက်စီးစေနိုင်သည့် အလွန်ရှားပါးသော ရောဂါဆိုးတစ်ခု ပါလာခဲ့သည်။ ထိုရောဂါမှာ သူမ၏ မိခင်ထံမှ ကူးစက်ခဲ့ခြင်းဖြစ်ပြီး သူမ၏ မိခင်မှာလည်း မွေးဖွားစဉ်မှာပင် ကွယ်လွန်ခဲ့ရသည်။

ရှန့်လျိုသည် နည်းလမ်းမျိုးစုံ ရှာဖွေခဲ့သော်လည်း နတ်ဆရာများ သို့မဟုတ် ဆေးဘက်ဆိုင်ရာ ပညာရှင်များပင် ဤရောဂါမှာ ဘာလဲဆိုသည်ကို မသိရှိကြပေ။

ရှန့်လျို အသည်းအသန် ဖြစ်နေစဉ် ဂလက်ဆီတစ်ခွင်တွင် ကျော်ကြားသော အဆင့်မြင့် နတ်ဆရာ သေမျိုးဖုန်မှုန့် ထံမှ အဖြေတစ်ခု ရရှိခဲ့သည်။ ထိုအဖြေမှာ ကြောက်မက်ဖွယ် ကောင်းလှသည်။ နတ်ဆရာ၏ အဆိုအရ ကောင်းကင်ဘုံ နယ်မြေသုံးထောင် ထဲမှ တစ်ခုဖြစ်သော ဆွေးမြေ့ခြင်း နယ်မြေ၏ အပိုင်းအစတစ်ခုမှာ သူမ၏ ဝိညာဉ်ထဲသို့ ကပ်ငြိသွားခဲ့ခြင်း ဖြစ်သည်။ ၎င်းမှာ သံသရာကို ဖြတ်သန်းစဉ် သန့်စင်ခြင်း ခံရခြင်းမှ လွတ်မြောက်ခဲ့ခြင်းပင်။

သူမ၏ အတိတ်ဘဝတွင် ဆွေးမြေ့ခြင်း အာဏာ ပိုင်ဆိုင်သူ တစ်ဦး၏ တိုက်ခိုက်ခြင်းကို ခံခဲ့ရခြင်း ဖြစ်နိုင်ပေသည်။

၎င်းမှာ ရှန့်လျို နားလည်ရန် အလွန်ပင် နက်နဲလွန်းလှသော်လည်း၊ ဖြေရှင်းနည်းမှာလည်း အလွန် ခက်ခဲသည်။ ပထမဦးစွာ သူမ၏ ဝိညာဉ်အတွင်းသို့ အခြေတည် ဆွေးမြေ့ခြင်း ဝိညာဉ် တစ်ခုကို ထည့်သွင်းရမည် ဖြစ်ပြီး ထိုသို့မှသာ သူမအနေနှင့် ၎င်း၏ ဒဏ်ကို ခံနိုင်ရည် ရှိမည် ဖြစ်သည်။

ဒုတိယအချက်မှာ သူမ၏ ခန္ဓာကိုယ်သည် ဥပဒေ တစ်ခု၏ ဒဏ်ကို ခံနိုင်ရည်ရှိရမည် ဖြစ်ရာ ချွင်ဆွေဟွကျိ ခန္ဓာကိုယ် မျိုး လိုအပ်သည်။ နောက်ဆုံးအနေနှင့် ဤအရာအားလုံးကို သူမ အသက် (၁) နှစ် မပြည့်မီတွင် အပြီးသတ် လုပ်ဆောင်ရမည် ဖြစ်သည်။

ရှန့်လျိုသည် ဤသို့သော မွေးရာပါ ပြဿနာများကို ကြားဖူးသော်လည်း၊ ထိုကဲ့သို့သော ရောဂါဆိုးများမှာ မိခင်သာမက ကလေးကိုပါ သေဆုံးစေတတ်သည်။ ရှန့်ဝမ်ချင်းသည် သူ၏ ဘဝတွင် နောက်ဆုံးကျန်ရစ်သော သမီးလေး ဖြစ်သဖြင့် သူမကို ကယ်တင်ရန် သူ ကျိန်ဆိုခဲ့သည်။

ရှန့်လျိုသည် အသည်းအသန် ကြိုးစားရင်း လျှို့ဝှက် အပေးအယူတစ်ခုဖြင့် အခြေတည် ဆွေးမြေ့ခြင်း ဝိညာဉ် တစ်ခုကို ရှာဖွေနိုင်ခဲ့သည်။ အချိန်ကုန်ခါနီးတွင် သူ၏ သမီးလေး ခန္ဓာကိုယ်မှာ လုံးဝ ပျက်စီးလုနီးပါး ဖြစ်နေသည်ကို ကြည့်ရင်း သူ၏ စိတ်ဝိညာဉ်မှာ ကြေကွဲနေရသည်။ ထိုစဉ် ကောင်းကင်ဘုံ၏ အလိုတော်အရလား မသိ၊ အနီးအနားရှိ ကြယ်ကွင်းပြင်တစ်ခုတွင် ချွင်ဆွေဟွကျိ ခန္ဓာကိုယ် ပါသော မွေးကင်းစ ကလေးတစ်ဦး ရှိကြောင်း သတင်းကို သူ ရရှိခဲ့သည်။

ထူးခြားသည်က ထိုကလေးမှာ သူ၏ သမီးလေးနှင့် အသက်ချင်းတူ၊ မိန်းကလေး အချင်းချင်း ဖြစ်နေခြင်းပင်။ အမှန်တကယ် နှိုင်းယှဉ်ကြည့်လျှင် ထိုကလေးမှာ သူ၏ သမီးလေး ကျန်းမာနေစဉ်ကနှင့် အမြွာများအလား ဆင်တူနေသည်။ ထိုကလေးမှာလည်း ရှန့်မိသားစု သွေးမျိုးဆက် ဖြစ်နေသဖြင့် ဝိညာဉ်နှင့် ခန္ဓာကိုယ်မှာ အလွန်ပင် လိုက်ဖက်ညီလှသည်။ ဤသည်မှာ ကံကြမ္မာပင် ဖြစ်ပေလိမ့်မည်။

နောက်ဆက်တွဲ ဖြစ်ရပ်များမှာ ခန့်မှန်းရ လွယ်ကူပါသည်။ ရှန့်လျိုသည် အခြေတည် ဆွေးမြေ့ခြင်း ဝိညာဉ် ကို သမီးလေး၏ ဝိညာဉ်နှင့် ပေါင်းစပ်လိုက်ပြီးနောက်၊ ထိုမွေးကင်းစကလေး၏ ဝိညာဉ်ကို နာကျင်မှုမရှိစေသော မှော်ဂါထာဖြင့် ဖျက်ဆီးလိုက်ကာ သူ၏ သမီးလေး ဝိညာဉ်ဖြင့် အစားထိုးလိုက်ခြင်းပင် ဖြစ်သည်။

အနည်းဆုံးတော့... သူက ထိုကလေး၏ ဝိညာဉ်ကို ဖျက်ဆီးလိုက်နိုင်ပြီဟု ထင်မှတ်ခဲ့ခြင်း ဖြစ်သည်။

ရှန့်ဝမ်ချင်းမှာ ဤဇာတ်လမ်းကို ကြားရသောအခါ မျက်နှာ တစ်ခုလုံး ပြာနှမ်းသွားပြီး အလွန်အမင်း စိတ်ထိခိုက်သွားရကာ သူမ၏ လက်ဖဝါးများကိုသာ စိုက်ကြည့်နေမိတော့သည်။

ဝေ့ဝူယင်မှာမူ ဤကိစ္စကို အလေးအနက် စဉ်းစားနေမိသည်။

ဤနေရာတွင် လျှို့ဝှက်ချက် တစ်ခု ကျန်နေသေးသည်။

အကယ်၍ ဝိညာဉ်တစ်ခုမှာ ရှန့်ဝမ်ချင်း၏ မူလဝိညာဉ်ဖြစ်ပြီး၊ နောက်တစ်ခုမှာ ဖျက်ဆီးမခံလိုက်ရသော ထိုကလေး၏ ဝိညာဉ်ဖြစ်ပါက… တတိယ ဝိညာဉ်မှာ မည်သူ့ဆီကနည်း။

***

အပိုင်း(၂၂၅၂)

သူရဲကောင်းတာအို ကပ်ဘေး...

သူရဲကောင်းတာအို ကပ်ဘေး ဟူသော ခေါင်းစဉ်မှာ ကြယ်တာရာများတစ်ခွင်တွင် အကျယ်တပြန့် ဆွေးနွေးစရာ ခေါင်းစဉ်တစ်ခု ဖြစ်လာခဲ့သည်။ ကောင်းချီးခံ စောင့်ကြည့်ရေ၊ စောင့်ကြည့်ဆဲ မှတ်တမ်းနှင့် ကံကြမ္မာ ဂေဇက် တို့ကဲ့သို့သော သတင်းဌာနများမှာ အဆက်မပြတ် သတင်းတင်ဆက်နေရပြီး အဆင့်မြင့် စာရင်းသွင်းသူ အရေအတွက်မှာလည်း မကြုံစဖူး တိုးတက်လာခဲ့သည်။

သူတော်စင် သုံးဦး ဒဏ်ရာပြင်းထန်စွာ ရရှိခဲ့ခြင်း၊ နာမည်ကျော် သူတော်စင် လုပ်ကြံသတ်ဖြတ်သူ တစ်ဦး အသတ်ခံရခြင်းနှင့် သူတော်စင် သုံးဦး ပျောက်ဆုံးနေခြင်းတို့ကြောင့် ဤဖြစ်ရပ်ကို သူရဲကောင်းတာအို ကပ်ဘေး ဟု အမည်ပေးခဲ့ကြသည်။

ပျောက်ဆုံးနေသူများထဲတွင် သူတော်စင် ကောင်းကင် ထိတွေ့ခြင်းလည်း ပါဝင်ပြီး သူမ၏ နောက်ဆုံး တည်နေရာကို စုံစမ်းသော်လည်း မည်သည့် သဲလွန်စမျှ မရရှိခဲ့ပေ။ သို့သော် သတင်းဌာနများ၏ အသည်းအသန် ကြိုးပမ်းမှုကြောင့် နောက်ဆုံးတွင် ကောင်းကင် ထိတွေ့ခြင်းနှင့် ပတ်သက်သည့် တုန်လှုပ်ဖွယ်ရာ သတင်းတစ်ခု ထွက်ပေါ်လာခဲ့သည်။

အမှန်စင်စစ်... သူမသည် လွန်ခဲ့သော နှစ်ပေါင်း သုံးသောင်းကတည်းက လူသူမသိအောင် အောင်းအောင်းနေခဲ့ခြင်း ဖြစ်သည်။ သူမသည် ကျင့်ကြံခြင်းလမ်းစဉ်တွင် သူတော်စင်၏ အစစ်အမှန် အသက်ရှူခြင်းကို ဖော်ထုတ်ရန် ကြိုးပမ်းစဉ် ပြင်းထန်သော တန်ပြန်ဒဏ်ရာကို ခံစားခဲ့ရသည်။ သူမ၏ ကျင့်ကြံခြင်းမှာ ဖောက်ပြန်သွားခဲ့ပြီး အဆင့်အတန်းမှာလည်း တဖြည်းဖြည်း နိမ့်ကျဆုတ်ယုတ်သွားခဲ့ရသည်။

ကံကြမ္မာ ဂေဇက် ၏ ခန့်မှန်းချက်အရဆိုလျှင် သူမ၌ သူတော်စင် အစွမ်းအစများ မရှိတော့ပေ။ သူမ၏ အစွမ်းမှာ လောကအင်ပါယာ တစ်ဦးနှင့် ယှဉ်နိုင်ရုံမျှသာ ရှိတော့သည်။

ဤတွေ့ရှိချက်မှာ ကြယ်တာရာများကြားတွင် ငလျင်လှုပ်သကဲ့သို့ ဂယက်ထသွားစေသည်။ အကယ်၍ ကောင်းကင် ထိတွေ့ခြင်းသာ ဒဏ်ရာပြင်းထန်နေပြီး သူတော်စင်အဆင့် အစွမ်း မရှိတော့ဘူးဆိုလျှင်… ထိုနေ့က သူရဲကောင်းတာအို နန်းတော် တွင် ရှိနေခဲ့သည့် အစွမ်းထက်သော ပုဂ္ဂိုလ်မှာ အဘယ်သူနည်း။

သို့သော် အံ့ဩစရာအကောင်းဆုံး သတင်းကား ပြင်ပ ဖန်တီးရှင် ဘုရင်များ အဆင့်သတ်မှတ်ချက်တွင် နယ်ခြားသားသစ်၊ အာရုဏ်ဦး အဂ္ဂိရတ်ရှန့်ထို သို့မဟုတ် ဝေ့ဝူယင် ၏ အဆင့်မှာ ရုတ်တရက် ခုန်တက်သွားခြင်းပင်။ သူသည် အဆင့် ၇၃ မှ စတင်ခဲ့သော်လည်း အဆင့် ၂၆ သို့ ရောက်ရှိကာ၊ ထိုမှတစ်ဆင့် အဆင့် ၃ သို့ လျင်မြန်စွာ ရောက်ရှိလာခဲ့သည်။

ဤမျှ မြန်ဆန်သော အဆင့်တက်လှမ်းမှုမှာ ယခင်က မရှိခဲ့ဖူးသော်လည်း၊ ယနေ့တွင်မူ သူသည် အဆင့် ၃ မှ အဆင့် ၂ သို့ ထပ်မံ တက်လှမ်းသွားခဲ့ပြန်သည်။ အဆင့် ၃ မှ ၂ သို့ တက်လှမ်းခြင်းမှာ အဆင့် ၇၃ မှ ၃ သို့ တက်လှမ်းခြင်းထက်ပင် များစွာ ပိုမို ခက်ခဲလှပေသည်။

ဤသို့ အဆင့်တက်လှမ်းမှုကို အားလုံးက တညီတညွတ်တည်း ထောက်ခံကြသည်။ အဘယ်ကြောင့်ဆိုသော် ဝေ့ဝူယင်နှင့် မိုးကုပ်စက်ဝိုင်း မျှော်စင်ခုနစ်ခု မှ မိုးကုပ်စက်ဝိုင်း ဖန်တီးခြင်း မျှော်စင် ၏ တာအို အစောင့်အရှောက် (အစစ်အမှန် အထွတ်အထိပ် သူတော်စင် တစ်ဦး) တို့အကြား ဖြစ်ပွားခဲ့သော ထိပ်တိုက်ရင်ဆိုင်မှုမှာ ဒဏ္ဍာရီဆန်လွန်းသောကြောင့် ဖြစ်သည်။

“လစ်လိုက်တော့”

“စမ်းကြည့်လေ...”

ထိုစကားလုံးများ ပျံ့နှံ့သွားပြီး နာရီပိုင်းအတွင်းမှာပင် လူငယ်ကျင့်ကြံသူများမှာ ဝေ့ဝူယင်၏ ရဲတင်းလှသော အပြုအမူကို အတုယူနေကြတော့သည်။ ဝေ့ဝူယင်သည် ဟန်ဆောင်နေခြင်း မရှိဘဲ အမှောင် ဟင်းလင်းပြင် ထက်တွင် ပြတ်သားစွာ ပြောဆိုခဲ့သည်။ လူအများမှာ ဝိညာဉ်ကျောက်မျက်များဖြင့် ရှန့်ဝမ်ချင်းကို ကယ်တင်ခဲ့သော ဝေ့ဝူယင်၏ ပုံရိပ်များကိုသာမက သူ၏ အမိန့်ပေးသံနှင့် အာဏာရှင်ဆန်သော အရှိန်အဝါကိုပါ မှတ်တမ်းတင်နိုင်ခဲ့ကြသည်။

အရှက်ရစရာအကောင်းဆုံးမှာ မိုးကုပ်စက်ဝိုင်း ဖန်တီးခြင်း မျှော်စင် ဘက်မှ မည်သည့် တုံ့ပြန်မှုမျှ မပြုလုပ်နိုင်ခြင်းပင်။ ဤသည်မှာ မိုးကုပ်စက်ဝိုင်း မျှော်စင်ခုနစ်ခု တစ်ခုလုံးအတွက် မျက်နှာပျက်စရာ ကိစ္စပင် ဖြစ်သည်။ သို့သော် ဂလက်ဆီတစ်ခုလုံးက ဤနယ်ခြားသားကို ဆန့်ကျင်တိုက်ခိုက်လိမ့်မည်ဟူသော မျှော်လင့်ချက်မှာလည်း ပျောက်ကွယ်သွားခဲ့သည်။ အဘယ်ကြောင့်ဆိုသော် လူအများစုမှာ ဝေ့ဝူယင်၏ လုပ်ရပ်ကို ချီးကျူးနေကြပြီး စိတ်အားထက်သန်စွာ အတုယူနေကြသောကြောင့် ဖြစ်သည်။

သတင်းဌာနများမှာလည်း ဤသတင်းများကြောင့် စီးပွားဖြစ်နေကြသည်။

သို့သော် သူရဲကောင်းတာအို ကပ်ဘေးမှာ မပြီးဆုံးသေးပေ။ အာရုဏ်ဦး အဂ္ဂိရတ်ရှန့်ထိုသည် သူကိုယ်တိုင် စီစဉ်ထားသော လျှို့ဝှက်ကစားပွဲ တစ်ခုအတွက် အိတ်ဖွင့်ဖိတ်ခေါ်စာကို ထုတ်ပြန်လိုက်သည်။ ထိုစကားပွဲတွင် သူတော်စင် တစ်ဦးကို သေလုနီးပါး ဒဏ်ရာပေးခဲ့သည့် သို့မဟုတ် သတ်ဖြတ်ခဲ့သည့် လျှို့ဝှက်ဆန်းကြယ်သူ တစ်ဦးလည်း ပါဝင်မည်ဟု ဆိုသည်။ ထိုသူ၏ ကျင့်ကြံခြင်းမှာ ကောင်းကင်ရှန့်ထို အဆင့်သာ ရှိသေးသည်ဟု ကောလာဟလများ ထွက်ပေါ်နေရာ ၎င်းမှာ မယုံနိုင်စရာပင်။

ဤကစားပွဲ၏ အခြေခံ ရည်ရွယ်ချက်တစ်ခုမှာ သူတော်စင်များစွာ လိုချင်တပ်မက်နေကြသော သူရဲကောင်းတာအို နန်းတော် ၏ တန်ဖိုးအရှိဆုံး ရတနာ ရှန့်ဝမ်ချင်း ၏ ကံကြမ္မာပင် ဖြစ်သည်။ ပညာရှင်များစွာက သူရဲကောင်းတာအို ကပ်ဘေး ဖြစ်ပွားရခြင်းမှာ အကြောင်းရင်း သုံးခုရှိသည်ဟု ဆိုကြသည်။

ပထမ တစ်ချက် ရှန့်ဝမ်ချင်း၏ ချွင်ဆွေဟွကျိ ခန္ဓာကိုယ်...

ဒုတိယ တစ်ချက် ပထမ သူရဲကောင်း တိုက်ကြီး၏ မပြည့်စုံသော လောကဝိညာဉ်...

တတိယ တစ်ချက် သူတော်စင်များအကြား ရှုပ်ထွေးသော ဆက်ဆံရေးများပင် ဖြစ်သည်။

အကယ်၍ ဝေ့ဝူယင်သာ ဟောကိန်းကို ဆန့်ကျင်ပြီး ဝင်ရောက် မစွက်ဖက်ခဲ့ပါက၊ အထွတ်အမြတ်ထားရာ နေ့ရက်တွင်ပင် သူရဲကောင်းတာအို နန်းတော် မှာ ပျက်စီးခြင်းသို့ ရောက်ရှိသွားပေလိမ့်မည်။

သို့သော် ဤနယ်ခြားသားမှာ အထွတ်အထိပ် မျှော်စင်ခုနစ်ခု ၏ အဂ္ဂိရတ် အမိန့်တော် ကိုပင် ဂရုမစိုက်သူ ဖြစ်ရာ ဟောကိန်းများကို ပယ်ချခြင်းမှာ အံ့ဩစရာ မဟုတ်ပေ။

ဤသည်မှာ အထွတ်အထိပ် သူတော်စင် တစ်ဦး၏ အစွမ်းလော။ သူတို့က လောက၏ ကံကြမ္မာနှင့် ဖြစ်စဉ်များကိုပါ လျစ်လျူရှုနိုင်ကြသလော။

ကစားပွဲတွင် ပါဝင်မည့်သူ မူလ လူသုံးဦးမှာ လျှို့ဝှက်ကျင့်ကြံသူ စုရီ ၊ တောက်ပသော ကျောက်မျက် အဂ္ဂိရတ်ရှန့်ထို နှင့် အာရုဏ်ဦး အဂ္ဂိရတ်ရှန့်ထို တို့ ဖြစ်ကြသည်။ တောက်ပသော ကျောက်မျက် အဂ္ဂိရတ်ရှန့်ထို ပါဝင်လာခြင်းမှာ မထင်မှတ်ထားသော အချက်ဖြစ်သော်လည်း သူမကိုယ်တိုင်က စိန်ခေါ်မှုကို လက်ခံခဲ့ခြင်း ဖြစ်သည်။

ကစားပွဲ၏ စည်းကမ်းချက်များနှင့် လောင်းကြေးများကို ရှင်းလင်းစွာ မကြေညာသေးသော်လည်း နောက်ထပ် ပါဝင်မည့်သူများ၏ အမည်စာရင်းမှာ ပိုမို တုန်လှုပ်စရာ ကောင်းလှသည်။

၁။ မဟာ ပုရောဟိတ် အမှောင်လှိုင်း

၂။ မက်မွန် အဂ္ဂိရတ်ရှန့်ထို ထျန်းရှီယာ

၃။ အဂ္ဂိရတ်ရှန့်ထို ကောင်းဟိန် နှင့်

၄။ အရိပ်ကွယ် အဖွဲ့အစည်းမှ သူတော်စင် တစ်ဦးပင်...။

အစွမ်းကုန် သန့်စင်ခြင်း ဂလက်ဆီ၏ စည်းမျဉ်းအရ ဤကဲ့သို့သော ကစားပွဲများတွင် ကန့်သတ်ချက်မှာ ကစားသမား ခုနစ်ဦးသာ ဖြစ်ရာ၊ နာမည်ဆိုးဖြင့် ကျော်ကြားသော လုပ်ကြံသတ်ဖြတ်သူ အဖွဲ့အစည်းမှ သူတော်စင်မှာ နောက်ဆုံးနေရာကို မရယူမီ လူသိရှင်ကြား ကြေညာခဲ့ခြင်း ဖြစ်သည်။

ဤကစားပွဲသည် ပြင်ပလူများအတွက် အလွန်ပင် စိတ်လှုပ်ရှားဖွယ် ကောင်းနေပြီး၊ ယခင်က ရှုံးနိမ့်ခဲ့သော ကစားပွဲ၏ နောက်ဆက်တွဲများမှာ ယခု ကစားပွဲအသစ်အတွင်းသို့ စီးဝင်လာတော့မည် ဖြစ်သည်။

အာရုဏ်ဦး အဂ္ဂိရတ်ရှန့်ထို သို့မဟုတ် အထွတ်အထိပ် သူတော်စင် ဟု ကျော်ကြားနေသော ဝေ့ဝူယင်… အနှိုင်းမဲ့ အာဏာရှင်ဆန်သည့် နယ်ခြားသား

မကြုံစဖူး တိုက်ခိုက်ရေးစွမ်းရည်ရှိသည့် လျှို့ဝှက်ကျင့်ကြံသူ စုရီ... သူက အထွတ်အထိပ် သူတော်စင်တစ်ဦးနှင့် ခိုင်မာသော ဆက်နွယ်မှုရှိသည်ဟု ကောလာဟလများ ထွက်ပေါ်နေသည်။

တတိယမြောက် တစ်ယောက် ဖြစ်သည့် တောက်ပသော ကျောက်မျက် အဂ္ဂိရတ်ရှန့်ထို မှာမူ ကြီးထွားခြင်းဇုန်မှ မဟာ လောကအဂ္ဂိရတ်ရှန့်ထို တစ်ဦး ဖြစ်သည်။ သူမသည် အထွတ်အထိပ် မျှော်စင်ခုနစ်ခု နှင့် ကင်းလွတ်သော သီးခြားအဂ္ဂိရတ်ပညာရှင် ဖြစ်ရုံသာမက တက်သစ်စ ကောင်းကင်ဘုံခုနစ်ပါး အဂ္ဂိရတ်အဆင့်သတ်မှတ်ချက်တွင် အဆင့် (၇) ရှိသူလည်း ဖြစ်သည်။

မဟာ ပုရောဟိတ် အမှောင်လှိုင်းမှာမူ ညဦးယံ နိမိတ်ဖတ်သူများ အဖွဲ့မှ ဖြစ်သည်။ မဟာ ပုရောဟိတ် ဟူသော ဘွဲ့ထူးတစ်ခုတည်းနှင့်တင် သူ၏ ထူးကဲသော အဆင့်အတန်းနှင့် စွမ်းအားကို သိရှိရန် လုံလောက်လှပေသည်။

မက်မွန် အဂ္ဂိရတ်ရှန့်ထို ထျန်းရှီယာမှာမူ တက်သစ်စ ကောင်းကင်ဘုံခုနစ်ပါး သတ်မှတ်ချက်တွင် အဆင့် (၃) ရှိသူဖြစ်ပြီး မိုးကုပ်စက်ဝိုင်း ဖန်တီးခြင်း မျှော်စင် ၏ တတိယထပ် မျှော်စင်သခင်မလည်း ဖြစ်သည်။

သူမ ဤပွဲတွင် ပါဝင်လာရခြင်းမှာ ဝေ့ဝူယင်၏ ပြတ်သားသော စကားလုံးနှစ်ခွန်းကြောင့် မျက်နှာပျက်ခဲ့ရသည့် မိုးကုပ်စက်ဝိုင်း ဖန်တီးခြင်း မျှော်စင် ၏ သိက္ခာကို ပြန်လည်ဆယ်တင်ရန် ဖြစ်ကြောင်း ထင်ရှားလှသည်။

ပြောင်းပြန်အဆိပ် အဂ္ဂိရတ်ရှန့်ထို ကောင်းဟိန် မှာ အဆင့် (၅) ရှိသူဖြစ်ပြီး မိုးကုပ်စက်ဝိုင်း သန့်စင်ခြင်း မျှော်စင် ၏ စတုတ္ထထပ် မျှော်စင်သခင် ဖြစ်သည်။

ထို့အပြင် အရိပ်ကွယ်မှ လျှို့ဝှက်ဆန်းကြယ်သော သူတော်စင် တစ်ဦးလည်း ပါဝင်နေသည်။

မဟာ လောကအဂ္ဂိရတ်ရှန့်ထို လေးဦး၊ သူတော်စင်အဆင့် တိုက်ခိုက်ရေးသမား နှစ်ဦးနှင့် နာမည်ကျော် မဟာ ပုရောဟိတ် တစ်ဦးတို့ ပါဝင်နေသည့် ဤ နက်နဲသော ကစားပွဲ မှာ ဂလက်ဆီတစ်ခုလုံး၏ အာရုံစိုက်မှုကို ချက်ချင်းရရှိသွားတော့သည်။ ပါဝင်သူများ၏ ရှုပ်ထွေးသော ဆက်နွယ်မှုများကို သိရှိသူများအဖို့မူ ပို၍ပင် စိတ်ဝင်စားစရာ ကောင်းနေတော့သည်။

လူတိုင်း၏ ပါးစပ်ဖျားတွင် မေးခွန်းတစ်ခုသာ ရှိနေတော့သည်။ ဤမျှ ကြီးကျယ်သော ကစားပွဲအတွက် လောင်းကြေးမှာ ဘာဖြစ်မည်နည်း။ ဝေ့ဝူယင်နှင့် စုရီတို့အကြားတွင် ရှန့်ဝမ်ချင်း၏ ကံကြမ္မာကို ဆုံးဖြတ်ခွင့်ဟူသော ထူးဆန်းသည့် လောင်းကြေး ရှိနေသော်လည်း၊ လူအများ၏ အမြင်တွင်မူ ဤသည်မှာ စုရီနှင့် ဝေ့ဝူယင်တို့က သူမကို ပိုင်ဆိုင်ရန် တိုက်ခိုက်နေကြခြင်းသာ ဖြစ်သည်။

လူငယ်များအကြားတွင်လည်း ပုံပြင်အမျိုးမျိုး ပျံ့နှံ့နေသည်။ အချို့က စုရီကို ယုတ်မာသော ရည်ရွယ်ချက်ရှိသည့် နယ်ခြားသားလက်မှ ရှန့်ဝမ်ချင်းကို ကယ်တင်ရန် ကြိုးပမ်းနေသည့် လေလွင့်သူရဲကောင်းအဖြစ် တင်စားကြသလို၊ အချို့ကလည်း ဝေ့ဝူယင်ကို သူ၏ ချစ်သူအား ဘေးဒုက္ခမှ ကာကွယ်ရန် ကံကြမ္မာကို အံတုပြီး ကျင့်ကြံခြင်း အခြေခံကိုပင် စတေးခဲ့သည့် သူရဲကောင်းအဖြစ် ဖော်ပြကြသည်။

သို့သော် လူတိုင်း သိထားသည့် အချက်တစ်ခုမှာ ဤအဆင့်ရှိ ကစားပွဲတစ်ခုတွင် ရှုံးနိမ့်သူမှာ မိမိ၏ အသားစိုင်များကို အင်တိုက်အားတိုက် စတေးသွားရမည် ဖြစ်ပြီး အနိုင်ရသူကမူ အားရပါးရ ခံစားသွားရမည် ဖြစ်ခြင်းပင်။