ရန်မစသင့်သူများ စာရင်း

တစ်စုံတစ်ယောက်၏မျက်နှာအမူအယာ အလွန်အမင်း ပြောင်းလဲသွားပြီး ထိတ်လန့်တကြား ရေရွတ်လိုက်သည်။

"ဒီလောကမှာ ဒီလိုကောင်းကင်ကို ဆန့်ကျင်တဲ့ နည်းလမ်းမျိုး တကယ်ကြီး ရှိနေတာလား..."

တိုက်ပွဲတိုင်းတွင် ပိုင်လင်းသည် ပို၍သန်မာလာပြီး ကောင်းကင်နက်နဲသိမ်မွေ့နယ်ပယ်မှ ယန်သုံးပါးနယ်ပယ် တတိယအဆင့်သို့ ချိုးဖျက်ဝင်ရောက်သွားကာ ထိုကာလအတွင်း ကျင့်ကြံခြင်းတွင် မည်သည့်အတားအဆီးမျှ မရှိသည့်အလားပင်။

ပျံသန်းခြင်းအင်မော်တယ်ဂိုဏ်းအတွင်းတွင် ဆွေးနွေးသံများနှင့် ဆူညံပွက်လောရိုက်မှုများ ထွက်ပေါ်လာကာ ပြောဆိုနေကြ၏။

"ဒါက အစစ်အမှန်နတ်ဆိုးအမွေအနှစ်ရဲ့ အဓိက နက်နဲသိမ်မွေ့မှုများလား... ဘယ်လောက်တောင် ကြောက်ဖို့ကောင်းလိုက်လဲ..."

သူတို့ကိုယ်တိုင် မကြုံတွေ့ရဘဲ တွေးကြည့်ရုံမျှဖြင့်ပင် သူတို့ကိုယ်သူတို့ မြောက်ပိုင်းနတ်ဆိုးလှိုဏ်ဂူ၏နေရာတွင် အစားထိုး ကြည့်လိုက်၏။ ဤကဲ့သို့ ရန်သူမျိုး ရှိနေခြင်းကို တွေးမိရုံဖြင့် သူတို့၏ဦးရေပြားများ ထုံကျင်သွားသကဲ့သို့ ခံစားလိုက်ရသည်။

နောက်ပိုင်းတွင် ပိုင်လင်းက သူမ၏စွမ်းအားဖြင့် မြောက်ပိုင်း နတ်ဆိုးလှိုဏ်ဂူတစ်ခုလုံးကို ချေမှုန်းပစ်လိုက်သည်ကို မြင်ရချိန်တွင်မူ အံ့အားသင့်စရာကောင်းသည်မှာ သူတို့ထံ၌ ကြီးမားသော စိတ်ခံစားမှု အတက်အကျများ မရှိတော့ချေ။

သို့သော် လူများအားလုံးသည် ပြန်လည်၍ တွေးတောကြည့်ချိန်၌ ရုတ်တရက် ထိတ်လန့်ကြောက်ရွံ့မှုကို ခံစားမိပေ၏။

ဤသည်မှာ မြောက်ပိုင်းနတ်ဆိုးလှိုဏ်ဂူပင်။

ပျံသန်းခြင်းအင်မော်တယ်ဂိုဏ်းကဲ့သို့ပင် ထိပ်သီးအင်အားစုကြီးလေးစုအနက်မှ တစ်စု ဖြစ်သော မြောက်ပိုင်းနတ်ဆိုးလှိုဏ်ဂူဖြစ်ပေ၏။

ထိုသို့ဆိုသည့်တိုင် ယခုအချိန်၌ ဤအတိုင်း ချေမှုန်းခြင်း ခံလိုက်ရသလော....

မြောက်ပိုင်း နတ်ဆိုးလှိုဏ်ဂူကို သူမ၏စွမ်းအားဖြင့် ချေမှုန်းလိုက်ခြင်း...

ဤတိုက်ပွဲမှတ်တမ်းကို တွေးတောမိရုံမျှဖြင့် သူတို့၏ဦးရေပြားများကို ထုံကျင်သွားစေခဲ့သည်။

ဤသည်မှာ သမိုင်းတွင် မှတ်တမ်းတင်နိုင်သော တိုက်ပွဲတစ်ခု ဖြစ်ပြီး သူမကို နတ်ဘုရားမတစ်ပါးအဖြစ် သတ်မှတ်နိုင်သည့် တိုက်ပွဲတစ်ခုဟု ဆိုနိုင်ပေ၏။

သူတို့ကို ထိတ်လန့်သွားစေခဲ့သော နောက်တစ်ချက်မှာ ဤကိစ္စများအားလုံးတွင် ကောင်းကင်နတ်ဘုရားတောင် ပါဝင်နေခြင်းပင်။

ကောင်းကင်နတ်ဘုရားတောင်သည်လည်း မြောက်ပိုင်းဒေသ၏ ထိပ်သီးအင်အားစုကြီး လေးစုအနက်မှတစ်စု ဖြစ်ပေ၏။

ထို့ပြင် ထိပ်သီးအင်အားစုကြီးလေးစု၏ ခေါင်းဆောင်အဖြစ် သွယ်ဝိုက်သော နည်းလမ်းဖြင့် အသိအမှတ်ပြုခြင်း ခံထားရသူများ ဖြစ်သည်။

သို့သော် သူတို့သည် မည်သည့်အရာအား မြင်ခဲ့ရသနည်း။

ထိုကဲ့သို့ တည်ရှိမှုမျိုးက အမှန်တကယ်ကို နတ်ဆိုးနန်းတော်နှင့် ပူးပေါင်းသွားခဲ့ကာကောင်းကင်နတ်ဘုရားတောင်အဖွဲ့ ဖြစ်လာခဲ့သလော....

ကောင်းကင်နတ်ဘုရားတောင်အဖွဲ့...

ဤသည်မှာ အမှန်တကယ်ကို အဓိပ္ပာယ်မဲ့လွန်းလှသည်။

ဤမြင်ကွင်းက လူများအားလုံးအတွက် အလှည့်အပြောင်းများနှင့်အတူ ထိတ်လန့်မှု လှိုင်းတံပိုးတစ်ခုကို ယူဆောင်လာခဲ့ပေ၏။

ပုံရိပ်ယောင်မြင်ကွင်း ပြီးဆုံးခါနီးအချိန်တွင် ပျံသန်းခြင်းအင်မော်တယ်ဂိုဏ်းမှ လူများသည် နတ်ဘုရားဓားတောင်ထိပ်၏ တောင်သခင် ဟောက်ချန်ကို သတ်ဖြတ်သွားသော တရားခံအစစ်အား မြင်တွေ့လိုက်ရသည်။

ရုတ်ချည်းဆိုသလိုပင် ယခင်က လက်စားချေရန် အော်ဟစ်နေခဲ့ကြသော တပည့်များအားလုံး ပါးစပ်ပိတ်သွားကြတော့သည်။

သူတို့သည် မဆင်မခြင် လှုပ်ရှားဝံ့ခြင်း မရှိတော့ချေ။

လာနောက်နေတာလား...

ကောင်းကင်နတ်ဘုရားတောင်ပင်လျှင် နတ်ဆိုးနန်းတော်၏ရှေ့တွင် ဦးညွှတ်ခဲ့ရပြီး တောင်သခင်ဟောက်ချန်ကဲ့သို့ တည်ရှိမှုတစ်ခုမှာ လွယ်လင့်တကူ ရှုံးနိမ့်သွားခဲ့သည်။ သူတို့သည် ထိုကဲ့သို့သော တည်ရှိမှုမျိုးနှင့် မည်သည်ကြောင့် ရန်သူ ဖြစ်နိုင်မည်နည်း။

ပုံရိပ်ယောင်မြင်ကွင်းသည် နတ်ဆိုးနန်းတော် ထွက်ပေါ်လာမှုနှင့်အတူ အဆုံးသတ်သွားပေ၏။

ပုံရိပ်ယောင်မြင်ကွင်းတစ်ခုလုံးကို ကြည့်ရှုပြီးနောက် ပျံသန်းခြင်းအင်မော်တယ်ဂိုဏ်းမှ လူများအားလုံး တိတ်ဆိတ်သွားကြလေပြီ။

အကြီးအကဲတစ်ဦးက တည်ကြည်လေးနက်သော အမူအယာဖြင့် ပြောဆိုသည်။

"မြောက်ပိုင်းဒေသရဲ့ ထိပ်သီးအင်အားစုကြီး လေးစုထဲမှာနှစ်ခု ပျောက်ကွယ်သွားပြီ... အခြေအနေတွေက ပြောင်းလဲတော့မယ်..."

ထိုစကားကိုကြားချိန်၌ လူများအားလုံးသည် ကျောချမ်းသွားသကဲ့သို့ ခံစားမိပေ၏။

မြောက်ပိုင်းဒေသ၏ဖွဲ့စည်းပုံသည် ထိပ်သီးအင်အားစုကြီးလေးစု၏လွှမ်းမိုးမှုကို အမြဲတစေ ခံယူခဲ့ရသည်။

ထိပ်သီးအင်အားစုကြီးလေးစုသည် မြောက်ပိုင်းဒေသကို နှစ်ပေါင်းသောင်းနှင့်ချီ၍ အုပ်စိုးခဲ့ပြီး ယခုအချိန်၌ နှစ်စု ပျောက်ကွယ်သွားပြီ ဖြစ်ရာ အင်အားစုအသစ်များ ပေါ်ထွက်လာမည့် လှိုင်းတံပိုးတစ်ခု သေချာပေါက် ရှိလာပေလိမ့်မည်။

အမှန်တကယ်ကိုပင် အခြေအနေများ ပြောင်းလဲတော့ပေမည်။

သို့သော် ဂိုဏ်းချုပ်ယွဲ့နန်ထျန်းက လူများအားလုံး၏စိတ်နှလုံးသားများကို ပို၍နက်ရှိုင်းစွာ တုန်လှုပ်သွားစေမည့် စကားတစ်ခွန်းကို ပြောဆိုလိုက်သည်။

"ထိပ်သီးအင်အားစုကြီးလေးစုထဲက နှစ်စု ပျောက်ကွယ်သွားရုံတင် မကဘူး... ဖူဝမ်နန်းတော်လည်း ချေမှုန်းခံလိုက်ရပြီ... ဂိုဏ်းတစ်ဂိုဏ်းလုံး အမြစ်ပြတ်သုတ်သင်ခံလိုက်ရတာ... ကြက်တစ်ကောင် ခွေးတစ်ကောင်တောင် အသက်ရှင်မကျန်ခဲ့ဘူး... အခု ထိပ်သီးအင်အားစုကြီးလေးစုထဲမှာ ကောင်းကင်နတ်ဘုရားတောင်က လက်နက်ချပြီး နာမည်ပြောင်းသွားသလို ဖူဝမ်နန်းတော်နဲ့မြောက်ပိုင်း နတ်ဆိုးလှိုဏ်ဂူတို့ကလည်း အမြစ်ပြတ် ချေမှုန်းခံလိုက်ရပြီ... ထိပ်သီးအင်အားစုကြီးလို့ ခေါ်ဆိုနိုင်တဲ့ တစ်ခုတည်းသောအဖွဲ့က ငါတို့ ပျံသန်းခြင်းအင်မော်တယ်ဂိုဏ်းပဲ ကျန်တော့တယ်..."

လူများအားလုံးက အံ့အားတသင့် မေးမြန်းလိုက်ကြသည်။

"ဘာ... ဂိုဏ်းချုပ်... ဂိုဏ်းချုပ်... ဒီသတင်းကို ဘယ်က ရတာလဲ..."

ဆိုရိုးစကားတစ်ခုတွင် ပြောဆိုထားသည့်အတိုင်း ကျောက်ခဲတစ်လုံးက လှိုင်းလုံး တစ်ထောင်ကို ဖန်တီးနိုင်သည်။

ကောင်းကင်နတ်ဘုရားတောင် သိမ်းသွင်းခံရခြင်းနှင့် မြောက်ပိုင်းနတ်ဆိုးလှိုဏ်ဂူ ချေမှုန်းခံရခြင်းတို့မှာ လုံလောက်အောင် အံ့အားသင့်ဖွယ် ကောင်းနေပြီဟု လူများအားလုံး မူလက ထင်မှတ်ထားခဲ့ကြသည်။

သို့သော် မည်သူက တွေးထင်ထားမိမည်နည်း....

ဖူဝမ်နန်းတော်ပင်လျှင် ပျောက်ကွယ်သွားခဲ့လေပြီ။

ရုတ်ချည်းဆိုသလိုပင် လူများအားလုံးသည် သူတို့၏ ဂိုဏ်းချုပ်အား မယုံကြည်နိုင်စွာ ကြည့်လိုက်ကြ၏။

သူတို့သည် ဤသတင်းကြောင့် အလွန်အမင်း ထိတ်လန့်တုန်လှုပ်သွားပြီး သူတို့၏ဦးရေပြားများပင် ထုံကျင်သွားခဲ့သည်။

ဂိုဏ်းချုပ်ယွဲ့နန်ထျန်းသည် သူ၏ထိုင်ခုံပေါ်တွင် ထိုင်နေပြီး သူ၏အမူအယာ အလွန်ရှုပ်ထွေးနေခဲ့သည်။

အချိန်အတော်ကြာပြီးနောက် သူသည် နောက်ဆုံး၌ ဖြည်းညင်းစွာ သက်ပြင်းချလိုက်ပြီး ပြောဆိုလိုက်သည်။

"ဖူဝမ်နန်းတော် က အကြီးအကဲ တစ်ယောက်နဲ့ ငါက မိတ်ဆွေကောင်းတွေပဲ... လွန်ခဲ့တဲ့ နှစ်တွေက ရခဲ့တဲ့ ဒဏ်ရာဟောင်းတစ်ခုကြောင့် သူ့ရဲ့ ကျင့်ကြံမှုက အကြီးအကျယ် ကျဆင်းသွားခဲ့တယ်... ဒါကြောင့် သူက နတ်ဆိုးမြို့တော်ကို မသွားဘဲ ဂိုဏ်းကို စောင့်ရှောက်ဖို့ ကျန်နေခဲ့တာ... ဒါကြောင့်မလို့ သူက ဖူဝမ်နန်းတော်မှာ တစ်ဦးတည်းကျန်ခဲ့တဲ့ အကြီးအကဲ ဖြစ်လာခဲ့တယ်... သူက ငါ့ဆီကို သတင်းတစ်ခု ပို့ခဲ့ဖူးတယ်... နတ်ဆိုးမြို့တော်ကို သွားခဲ့တဲ့ ဂိုဏ်းချုပ်နဲ့ ရှေးဟောင်းဘိုးဘေးအပါအဝင် အဆင့်မြင့် အရာရှိတွေ အားလုံးရဲ့ အသက်ဝိညာဉ်တံဆိပ်ပြားတွေ ပြိုကွဲသွားပြီတဲ့... အခု အဲ့ဒီ အကြီးအကဲက ငါတို့ ပျံသန်းခြင်းအင်မော်တယ်ဂိုဏ်းမှာ ခိုလှုံချင်နေတယ်..."

ထိုစကားကိုကြားချိန်၌ လူများအားလုံး တပြိုင်နက်တည်း သက်ပြင်းချလိုက်ကြသည်။

လူအချို့က တွေဝေတွန့်ဆုတ်စွာဖြင့် သတိကြီးစွာထားပြီး ပြောဆိုလိုက်သည်။

"တကယ်လို့ အဲဒီအတိုင်းသာဆိုရင် ဒီတစ်ကြိမ် နတ်ဆိုးမြို့တော်ကို ဝင်ရောက်ခဲ့တဲ့ ထိပ်သီးအင်အားစုကြီးတွေထဲမှာ နတ်ဘုရားဓားတောင်ထိပ်က ငါတို့ ပျံသန်းခြင်းအင်မော်တယ်ဂိုဏ်းကို ကိုယ်စားပြုတယ်ဆိုရင်... ထိပ်သီးအင်အားစုကြီး လေးစုလုံး အမြစ်ပြတ် ချေမှုန်းခံလိုက်ရတာ မဟုတ်ဘူးလား..."

လူများအားလုံးသည် ထုံကျင်သွားသည်အထိ အကြိမ်ရေမည်မျှထိများများ ထိတ်လန့်တုန်လှုပ်ခဲ့ရသနည်း ဆိုသည်ကိုပင် မသိတော့ချေ။

ထိပ်သီးအင်အားစုကြီး လေးစု... အမြစ်ပြတ်ချေမှုန်းခံလိုက်ရသလော....

အကယ်၍ ဤအရာကို အခြားလူ တစ်ယောက်ယောက်က ပြောမည်ဆိုလျှင် ထိုလူရူးသွားပြီဟု သူတို့ သေချာပေါက် တွေးထင်မိပေမည်။

မြောက်ပိုင်းဒေသရှိ အစွမ်းထက်ဆုံး အင်အားစု လေးခုလုံးသည် တစ်ချိန်တည်းတွင် မည်သည်ကြောင့် ပျက်စီးသွားနိုင်မည်နည်း။

သို့သော် အထောက်အထားများကို သူတို့.ရှေ့တွင် ချပြလိုက်သောအခါ လူများအားလုံး၏ နှလုံးသားများ တုန်ရီသွားကာ ကူကယ်ရာမဲ့ဖြစ်သွားကြတော့သည်။

သူတို့ထံတွင် ထိုခံစားချက်များနှင့်အတူ နက်ရှိုင်းသော ကြောက်ရွံ့မှုများ ရောယှက်နေပေ၏။

အကယ်၍ သူတို့သာ နတ်ဘုရားဓားတောင်ထိပ် နှင့်အတူ နတ်ဆိုးမြို့တော်သို့ စောစီးစွာ သွားခဲ့မည်ဆိုပါက သူတို့လည်း သေဆုံးခြင်းနှင့် စိတ်ဝိညာဉ်ပျက်စီးခြင်းတို့ကဲ့သို့ အလားတူ ကံကြမ္မာမျိုးနှင့် ကြုံတွေ့ရဖွယ်ရှိသည်။

ရုတ်ချည်းဆိုသလိုပင် လူများအားလုံးသည် ယွဲ့ကျီအား ကျေးဇူးတင်မှုအပြည့်ပါသော မျက်လုံးများဖြင့် ကြည့်လိုက်ကြ၏။

သူမသည် ကောင်းကင်တာအို ကတိသစ္စာ ပြုစဉ်က ကိစ္စများကို ပုံကြီးချဲ့နေသည်ဟု ယခင်က သူတို့ ခံစားခဲ့ရသည်။ သို့ရာတွင် ယခု ကြည့်ရသည်မှာ သူမသည် သူတို့၏အသက်ကို ကယ်တင်ခဲ့ရုံသာမက ပျံသန်းခြင်းအင်မော်တယ်ဂိုဏ်း တစ်ခုလုံးကိုလည်း ကယ်တင်ခဲ့ခြင်းပင်။

ဤအချိန်အခိုက်အတန့်တွင် ကျိုးဝမ်တောင်ထိပ်၏တောင်သခင်က တည်ကြည်လေးနက်စွာ ပြောဆိုလိုက်၏။

"မဟာအကြီးအကဲ... ငါတို့ရဲ့ ကျေးဇူးတင်မှုကို ဘယ်စကားလုံးနဲ့မှ ဖော်ပြလို့ မရဘူး... ဒီနေ့ကစပြီး ငါ့ရဲ့ ကျိုးဝမ်တောင်ထိပ် က မဟာအကြီးအကဲအပေါ် ကြီးမားတဲ့ ကျေးဇူးဆပ်ဖို့ အကြွေးတင်သွားပါပြီ... အနာဂတ်မှာ မဟာအကြီးအကဲ တစ်ခုခု လိုအပ်လာခဲ့ရင် မဟာအကြီးအကဲရဲ့နှုတ်က ထွက်လိုက်တာနဲ့ ငါ့ရဲ့ ကျိုးဝမ်တောင်ထိပ်က သေချာပေါက် ပြန်ဆပ်ပါ့မယ်..."

ဤတောင်ထိပ်သည် ပျံသန်းခြင်းအင်မော်တယ်ဂိုဏ်းအတွင်း၌ပင် အနည်းငယ် ထူးခြားသည်။

သူတို့သည် ဂိုဏ်းချုပ်၏အမိန့်များကို အမြဲတစေ နားထောင်လေ့ ရှိသော်လည်း တခြားလူများကိုမူ ဂရုမစိုက်ကြချေ။

သို့သော် ယခုအချိန်၌ သူတို့သည် ယွဲ့ကျီကို ဤကဲ့သို့ကတိမျိုး ပေးလိုက်ခြင်း ဖြစ်ပေ၏။

ထိုအရာက ယွဲ့ကျီ အပေါ်ထားရှိသော သူတို့၏ စစ်မှန်သော ကျေးဇူးတင်မှုကို ပြသရန် လုံလောက်နေခဲ့သည်။

တခြားတောင်ထိပ်များကလည်း ကျေးဇူးတင်စကားများကို အလေးအနက်ထား၍ ပြောဆိုခဲ့ကြသည်။

လူတချို့က ကတိများ ပေးကြပြီး လူတချို့ကမူ ရှားပါးရတနာများကို တိုက်ရိုက်ပေးအပ်ခဲ့ကြသည်။

ကူညီမည်ဟူသော ကတိများဖြစ်စေ ပေးအပ်ခဲ့သော ရှားပါး ရတနာများဖြစ်စေ ထိုအရာများ၏ တန်ဖိုးမှာ မခန့်မှန်းနိုင်လောက်အောင် ဖြစ်ပေ၏။

ယွဲ့ကျီ၏စိတ်နှလုံးသား အနည်းငယ် လှုပ်ရှားသွားခဲ့သည်။

နတ်ဘုရားဓားတောင်ထိပ်မှလူများ သေဆုံးမှုအပေါ် သူမ များစွာမခံစားရချေ။

ယခင်က သူတို့အကြားရှိ ဆက်ဆံရေးသည်လွန်စွာ တင်းမာခဲ့ပြီး သွယ်ဝိုက်သောနည်းဖြင့်ပင် ရန်လိုနေခဲ့ကြသည်။

ထို့ပြင် သူမသည် ကြိုတင်၍ ပြင်းထန်သော သတိပေးချက်များ ပေးခဲ့သော်လည်း တစ်ဖက်လူက သူမ၏စကားများကို လျစ်လျူရှုခဲ့ခြင်းသာ ဖြစ်ပေ၏။

သူတို့ကိုယ်တိုင် သေတွင်းထဲသို့ ခုန်ချသူများအတွက် သူမထံ၌ ဝမ်းနည်းမှု မရှိခဲ့ချေ။

သူမကို အမှန်တကယ် စိတ်လှုပ်ရှားသွားစေခဲ့သည်မှာ ဤတစ်ကြိမ် နတ်ဆိုးမြို့တော် ခရီးစဉ်အတွင်း ပါဝင်နေသော အန္တရာယ်များမှာ သူမ ထင်မှတ်ထားသည်ထက် အဆပေါင်းများစွာ ပို၍ထိတ်လန့်ဖွယ် ကောင်းနေခြင်းပင်။

မည်သို့ပင်ဆိုစေကာမူ ထိပ်သီးအင်အားစုကြီး လေးစုမှ လူများ ဝင်ရောက်သွားပြီးနောက် ချေမှုန်းခံရမည် သို့မဟုတ် သိမ်းသွင်းခံရမည်ဟု သူမကိုယ်တိုင်ပင် ထင်မှတ်မထားခဲ့ချေ။

သူမ၏စိတ်ထဲမှ တစ်စုံတစ်ခုကို တွေးတောလိုက်သည်။

"ဒါက နင်ပဲလား..."

ကျုံးချင်သည် ဤပုံရိပ်ယောင်မြင်ကွင်းတွင် အစမှ အဆုံးတိုင်အောင် တစ်ကြိမ်မျှ ပေါ်မလာခဲ့သည့်အပြင် သူ၏ မည်သည့်လုပ်ရပ်များမျှ ပျံ့နှံ့မလာခဲ့သော်လည်း ထိုသားရဲအုပ်စုကို သူမ ရှင်းလင်းစွာ မှတ်မိနေခဲ့သည်။

ဆိုလိုရင်းကမူ နတ်ဆိုးနန်းတော်ဆိုသည်မှာ ဤသားရဲအုပ်စုက ဦးဆောင်နေခြင်း ဖြစ်ကြောင်း ပုံရိပ်ယောင်မြင်ကွင်းမှတဆင့် မြင်တွေ့နိုင်ရန် မခက်ခဲလှချေ။

သေချာသည်မှာ ယခုအချိန်သည် သူမ ဤအရာများကို စဉ်းစားရမည့် အချိန် မဟုတ်ပေ။

မြောက်ပိုင်းဒေသ၏ အခြေအနေမှာ ကြီးမားသော ပြောင်းလဲမှုများ သေချာပေါက် ကြုံတွေ့ရတော့မည်ကို ကြိုတင် မြင်တွေ့နေရသည်။

ထိပ်သီးအင်အားစုကြီးလေးစုအနက်မှ တစ်စုသာ ကျန်ရှိတော့ပေ၏။

ယခုအချိန်၌ ပျံသန်းခြင်းအင်မော်တယ်ဂိုဏ်း အတွက် အရေးကြီးဆုံးကိစ္စမှာ ဤဆူပူအုံကြွနေသော အခြေအနေကို မည်သို့ ဖြတ်သန်းသွားလာရမည်နည်းဆိုခြင်းပင်။

နတ်ဆိုးမြို့တော်ရှိ ဖြစ်ရပ်များက လောကကြီးတစ်ခုလုံးကို ဆူညံပွက်လောရိုက်သွားစေခဲ့ပြီး မရေမတွက်နိုင်သော အင်အားစုများကို တုန်လှုပ်သွားစေခဲ့သည်ဟု ဆိုနိုင်ပေ၏။

ထို့ပြင် ပျံသန်းခြင်းအင်မော်တယ်ဂိုဏ်း ရင်ဆိုင်နေရသော ပြဿနာမှာ သီးခြားကိစ္စရပ်တစ်ခု မဟုတ်ဘဲ မြောက်ပိုင်းဒေသရှိ အင်အားစု အားလုံးနီးပါး စဉ်းစားရမည့် မေးခွန်းတစ်ခု ဖြစ်နေခဲ့သည်။

လောကတခွင်လုံးကို တုန်လှုပ်သွားစေသော လှိုင်းတံပိုးကြီး အတွင်းတွင်...

တည်ရှိမှုနှစ်ခုကို အင်အားစုအားလုံးက ရန်မစသင့်သူများအဖြစ် သတ်မှတ်လိုက်ကြ၏။

ပထမတစ်ဦးမှာ ပိုင်လင်း ဖြစ်ပြီး...

ဒုတိယတစ်ခုမှာ နတ်ဆိုးနန်းတော်ပင်။