ဖောင်းပွနေသော ဝမ်းဗိုက်

ကျုံးချင်သည် ပြန်ရန်ဆုံးဖြတ်ပြီးနောက် နောက်တစ်နေ့တွင် ထွက်ခွာရန် ရွေးချယ်ခဲ့သည်။

မူလက သူသည် တိတ်တဆိတ် ပြန်သွားရန် ရည်ရွယ်ခဲ့သော်လည်း နတ်ဆိုးစစ်သူကြီးဆယ့်နှစ်ဦးမှာ လွန်စွာ ကြွားဝါတတ်သော အုပ်စု တစ်ခု ဖြစ်နေပေ၏။

ကျုံးချင်သည် မြောက်ပိုင်းဒေသမှ ထွက်ခွာမည်ဖြစ်ပြီး အချိန်အတော်ကြာ ပြန်လာမည် မဟုတ်ကြောင်း ကြက်ပေါက်စတစ် သိရှိသွားချိန်၌ သူက လက်ဝှေ့ယမ်းလိုက်ပြီး နတ်ဆိုးနန်းတော်မှ လူတိုင်းကို လိုက်လံပို့ဆောင်ရန် စုစည်းလိုက်သည်။

နတ်ဆိုးမြို့တော်၏ အဝင်ဝတွင်...

ကျုံးချင်သည် မြေပြင်ပေါ်တွင် မတ်တတ်ရပ်နေပေ၏။

သူ၏နံဘေးတွင် ပိုင်လင်းက လိုက်ပါလာပြီး စာခြောက်ရုပ်ကမူ ခပ်လှမ်းလှမ်း တစ်နေရာတွင် မတ်တတ်ရပ်နေခဲ့သည်။

နတ်ဆိုးစစ်သူကြီးဆယ့်နှစ်ဦးသည် ဂုဏ်ယူဝင့်ကြွားစွာဖြင့် သူ၏အနောက်မှ လိုက်ပါလာကြ၏။

မိုးပြာနဂါးမြင်းနှင့် မြေကမ္ဘာနွားနတ်ဆိုးတို့လည်း ရှိနေခဲ့သည်။

"ဆရာကို ရိုသေလေးစားစွာ နှုတ်ဆက်လိုက်ပါတယ်..."

သောင်းနှင့်ချီသော နတ်ဆိုးနန်းတော်အဖွဲ့ဝင်များက တပြိုင်နက်တည်း ဒူးထောက်ကာ ပြောဆိုလိုက်ကြသည်။

သူတို့၏အသံများသည် မိုးခြိမ်းသံအလား ကောင်းကင်နှင့်မြေပြင်ကို တုန်ခါသွားစေသည်။

ဤသည်က နတ်ဆိုးမြို့တော်နှင့် မလှမ်းမကမ်းတွင် ရှိနေသော ကြယ်လဂိုဏ်းကို ထိတ်လန့်သွားစေခဲ့သည်။

မူလက ကြယ်လဂိုဏ်းသည် ပတ်ဝန်းကျင် ဒေသများတွင် လူသိများသော အသေးစား အုပ်စိုးသူတစ်စုပင်။

သို့သော် သူတို့ဂိုဏ်း၏ မျက်နှာချင်းဆိုင်တွင် နတ်ဆိုးမြို့တော် ပေါ်လာကတည်းက သူတို့၏ နေ့စဉ်ဘဝများမှာ ငရဲခန်းတစ်ခု ဖြစ်လာခဲ့ပေ၏။

မည်သို့ပင်ဆိုစေကာမူ ဤတစ်ကြိမ် အစစ်အမှန်နတ်ဆိုးအမွေအနှစ်ကို ယှဉ်ပြိုင်လုယူရန် မည်သူတွေ ရောက်လာခဲ့ကြသနည်း...

ပထမတန်းစား အင်အားစုများ ထိပ်တန်း အင်အားစုများ ထိပ်သီးအင်အားစုကြီးများနှင့် စွမ်းအားကြီးမားသော လေလွင့်ကျင့်ကြံသူ တချို့ပင် ပါဝင်နေခဲ့သည်။

သူတို့ကို အလွယ်တကူ ခြေမွှဖျက်ဆီးနိုင်စွမ်းရှိသော တည်ရှိမှုများမှာ များပြားလွန်းသည်ဟု ဆိုနိုင်သည်။

သို့သော် ယခုအချိန်၌ နတ်ဆိုးမြို့တော်သို့ လာရောက်ခဲ့ကြသော ထိပ်သီးအင်အားစုကြီး လေးစုမှာ ချေမှုန်းခံရခြင်း သို့မဟုတ် သိမ်းသွင်းခံရခြင်းများ ဖြစ်သွားခဲ့သည်။ တစ်ခုတည်းသော ဒေသခံ အင်အားစု ဖြစ်သော ကြယ်လဂိုဏ်း၏ ဂိုဏ်းချုပ်မှာ ယင်သုံးပါးနယ်ပယ် ကျင့်ကြံမှုသာ ရှိသော်လည်း ဂိုဏ်းတစ်ခုလုံးမှာ ဤဆူပူအုံကြွမှုနှင့် လှိုင်းလုံးကြီးများ ကြားတွင် အထိအခိုက်မရှိ ကျန်ရစ်နိုင်ခဲ့သည်။

ဤအရာမှာ အမှန်တကယ်ကို အံ့အားသင့်ဖွယ် ကိစ္စတစ်ရပ်ဖြစ်သည်ဟု ဆိုရပေမည်။

နတ်ဆိုးမြို့တော်၏ အဝင်ဝတွင်...

ကျုံးချင်သည် သောင်းနှင့်ချီသော နတ်ဆိုးနန်းတော် အဖွဲ့ဝင်များကို ကြည့်လိုက်၏။

ကြက်ပေါက်စတစ်နှင့် တခြားသူများ၏ အားကောင်းသော အကောင်အထည်ဖော်နိုင်စွမ်းကို သူ မအံ့ဩဘဲ မနေနိုင်ခဲ့ချေ။

အစပိုင်းက သူသည် နတ်ဆိုးစစ်သူကြီးဆယ့်နှစ်ဦးကို ပိုင်လင်းအား ကာကွယ်ပေးရန်သာ လိုလားခဲ့သော်လည်း သူတို့က ဤမျှ စွမ်းအားကြီးမားသော အင်အားစုတစ်စုကို ဖန်တီးလိမ့်မည်ဟု သူ လုံးဝထင်မှတ်မထားခဲ့ပေ။

ထို့ပြင် ဤအင်အားစု၏ စည်းလုံးညီညွတ်မှုမှာ အလွန် မြင့်မားပြီး စည်းကမ်းမဲ့သော လူအုပ်စု တစ်ခုနှင့် နှိုင်းယှဉ်၍ မရနိုင်ကြောင်း သူ မြင်တွေ့နိုင်ခဲ့သည်။

သူတို့ကို သူ၏လက်အောက်သို့ ခေါ်ဆောင်ခြင်းက အမှန်တကယ်ကို အကူအညီတစ်ခု ဖြစ်လာနိုင်သည်။

ထိုသို့တွေးတောလိုက်ပြီးနောက် သူက ကြက်ပေါက်စတစ်အား ခေါ်လိုက်၏။

ကြက်ပေါက်စတစ်က ကျုံးချင်အား အရိုအသေပေးကာ ရိုသေလေးစားစွာဖြင့် မေးမြန်းလိုက်သည်။

"အရှင်... ဘာများ အမိန့်ပေးစရာ ရှိပါသလဲ..."

ကျုံးချင်က လက်နှစ်ဖက်ကို နောက်ပစ်ကာ မတ်တတ်ရပ်နေပြီး ပေါ့ပေါ့ပါးပါး ပြောဆိုလိုက်၏။

"ဒီနတ်ဆိုးနန်းတော်ကို မင်းတို့ ဖန်တီးခဲ့တာဆိုတော့ သူတို့အတွက် မင်းတို့ဆီမှာ ဘာအစီအစဉ်တွေ ရှိလဲ..."

ထိုစကားကို ကြားချိန်၌ ကြက်ပေါက်စတစ်က အချိန်တခဏမျှ စဉ်းစားပြီးနောက် ပြောဆိုသည်။

"ဆရာ... နတ်ဆိုးမြို့တော်က နတ်ဆိုးနန်းတော်ရဲ့ အခြေစိုက်စခန်း ဖြစ်နိုင်တယ်လို့ ကျွန်တော် ထင်တယ်..."

"နတ်ဆိုးစစ်သူကြီးဆယ့်နှစ်ဦးက အခုကစပြီး ဆရာ့ရဲ့ ဘေးမှာပဲ ရှိနေမှာဆိုတော့ သူတို့ကို စီမံခန့်ခွဲဖို့ အချိန်မရှိဘူးလေ... ကျွန်တော်တို့အနေနဲ့ နတ်ဆိုးနန်းတော်ကို ယာယီအုပ်ချုပ်ဖို့ လက်ထောက်နန်းတော်သခင်နှစ်ယောက်ကို ရွေးချယ်လို့ရတယ်..."

ကျုံးချင်က စဉ်းစားကြည့်ရာ ပြဿနာ တစ်စုံတစ်ရာ မတွေ့ရသဖြင့် ချက်ချင်းပင် ခေါင်းညိတ်ကာ ပြောဆိုလိုက်သည်။

"ဒါဆိုရင်လည်း မင်း သွားပြီး စီစဉ်လိုက်ပါ...စီစဉ်ပြီးတာနဲ့ ငါတို့ ထွက်ခွာသင့်ပြီ..."

"သခင်ရဲ့အမိန့်အတိုင်းပါ..."

ကြက်ပေါက်စတစ်သည် လက်တွေ့ လုပ်ဆောင်တတ်သူတစ်ဦးပင်။

ကျုံးချင် အမိန့်ပေးလိုက်သည်နှင့် တပြိုင်နက် သူက ချက်ချင်းပင် စတင်လှုပ်ရှားတော့သည်။

"ဘယ်သူလဲ..."

"ပြီးတော့ ဟိုတစ်ယောက်က ဘယ်သူလဲ..."

"မင်းတို့ နှစ်ယောက်... ရှေ့ကို ထွက်ခဲ့..."

သူက တောင်ပံဖြင့်ညွှန်ပြကာ လူနှစ်ယောက်ကို ကျပန်းရွေးချယ်လိုက်၏။

ထိုလူများမှာ တခြားလူများမဟုတ်ဘဲ ရာသီလေးပါးဂိုဏ်း၏ ဂိုဏ်းချုပ်ကျီးဝူချန် နှင့် ဓားတစ်သောင်းဂိုဏ်း၏ ဂိုဏ်းချုပ်ပိုင်ဝူရှားတို့ပင်။

သူတို့နှစ်ယောက်က ဦးညွှတ်ကာ ရှေ့သို့ထွက်လာပြီး ကြက်ပေါက်စတစ်၏ ဘေးသို့ ရောက်လာကာ မေးမြန်းလေသည်။

"ကြက်သခင်ကြီး... ဘာများ အမိန့်ပေးစရာ ရှိပါသလဲ..."

"အခုကစပြီး မင်းတို့ နှစ်ယောက်က နတ်ဆိုးနန်းတော်ရဲ့ လက်ထောက်နန်းတော်သခင်တွေပဲ...အခု ငါတို့ နန်းတော်သခင် ဆယ့်နှစ်ယောက်က သခင်နဲ့အတူ ခရီးဝေး သွားတော့မယ်...နတ်ဆိုးနန်းတော်ကို မင်းတို့ နှစ်ယောက် စီမံခန့်ခွဲဖို့ လွှဲပေးခဲ့မယ်...မင်းတို့ သေချာစီမံခန့်ခွဲနိုင်မလား..."

ထိုစကားကိုကြားချိန်၌ ကျီးဝူချန်နှင့် ပိုင်ဝူရှားတို့သည် လွန်စွာဝမ်းသာသွားကြ၏။

ဤကဲ့သို့ ကြီးမားသောအခွင့်အရေး မျိုး သူတို့အပေါ် ကျရောက်လာလိမ့်မည်ဟု သူတို့ လုံးဝထင်မှတ်မထားခဲ့ကြချေ။

လက်ရှိ နတ်ဆိုးနန်းတော်မှာ ယခင်ကကဲ့သို့ မဟုတ်တော့ကြောင်း လူများအားလုံး သိထားကြသည်။

ဤသည်မှာ မြောက်ပိုင်းဒေသရှိ အစွမ်းအထက်ဆုံးအင်အားစု ဖြစ်သည်ဟု ဆိုလျှင် ပုံကြီးချဲ့ရာ မရောက်ချေ။

နတ်ဆိုးနန်းတော်၏ လက်အောက်တွင် တစ်ချိန်က မြောက်ပိုင်းဒေသကို လွှမ်းမိုးခဲ့သော ထိပ်သီးအင်အားစုကြီးတစ်ခုဖြစ်သည့် ကောင်းကင်နတ်ဘုရားတောင်ပင် ရှိနေသည်။

ထိုသို့ဆိုသည့်တိုင် ကြက်သခင်ကြီးက သူတို့ကို နတ်ဆိုးနန်းတော်အား ယာယီအုပ်ချုပ်ခွင့် ပေးအပ်ခဲ့ပေ၏။

ဤသည်မှာ မည်မျှထိ ကြီးမားသော ဂုဏ်ယူစရာ ဖြစ်သနည်း..

ကြက်ပေါက်စတစ်၏ ခန့်အပ်မှုနှင့်အတူ သူတို့၏အဆင့်အတန်းမှာ မျက်စိတစ်မှိတ်အတွင်း အမြင့်သစ်တစ်ခုသို့ မြင့်တက်သွားခဲ့သည်ဟု ဆိုနိုင်သည်။

သူတို့သည် သူတို့ဘဝ၏ အထွတ်အထိပ်သို့ ချက်ချင်း ရောက်ရှိသွားခဲ့လေပြီ။

ပိုင်ဝူရှားနှင့်ကျီးဝူချန်တို့က အကြိမ်ကြိမ် ဦးညွှတ်ကာ ကျေးဇူးတင်စကား ပြောဆိုလိုက်ကြသည်။

"ကြက်သခင်ကြီးက ယုံကြည်တဲ့အတွက် ကျေးဇူးတင်ပါတယ်... ကျွန်တော်တို့ သခင်ကို သေချာပေါက် စိတ်ပျက်အောင် မလုပ်ပါဘူး..."

သူတို့၏မျက်နှာများပေါ်တွင် ထိန်းချုပ်မရသော ဝမ်းသာပျော်ရွှင်မှုများ ပြည့်နှက်နေပေ၏။

ကြက်ပေါက်စတစ်နှင့် စတင်တွေ့ဆုံခဲ့ရသည့် ဖြစ်စဉ်ကို ယခု ပြန်လည်တွေးတောကြည့်ချိန်၌ သူတို့နှစ်ဦးလုံးက ဘဝဆိုသည်မှာ အမှန်တကယ်ပင် အိပ်မက်တစ်ခုအလား ဖမ်းဆုပ်၍ မရနိုင်ကြောင်း ခံစားမိကြသည်။

အစပိုင်းက ရေဘေး သို့မဟုတ် ကပ်ရောဂါဘေး ကဲ့သို့ ရှုမြင်ခဲ့သော ကြက်ပေါက်စတစ်က သူတို့ထံသို့ ကြီးမားသော အခွင့်အရေးများနှင့် ကောင်းချီးများကို တစ်ခုပြီးတစ်ခု ယူဆောင်လာပေးလိမ့်မည်ဟု မည်သူက ထင်ထားမည်နည်း။

သူတို့၏ကိုယ်ပိုင်စွမ်းအားများကို အကြီးအကျယ် တိုးတက်စေခဲ့ရုံသာမက ယခင်ကထက် အဆပေါင်းရာချီ၍ ပိုအစွမ်းထက်သော အင်အားစုကိုလည်း စီမံခန့်ခွဲခွင့် ပေးခဲ့သည်။

ဤခန့်အပ်မှုက တခြားနတ်ဆိုးနန်းတော် အဖွဲ့ဝင်များကို မနာလိုအားကျ ဖြစ်သွားစေခဲ့သည်။

သို့သော် မည်သူမျှ မကျေနပ်သည့် အရိပ်အယောင် အနည်းငယ်မျှပင် မပြရဲကြချေ။

ပိုင်ဝူရှားနှင့်ကျီးဝူချန်တို့သည် နန်းတော်သခင် ဆယ့်နှစ်ယောက်၏ ပထမဆုံး သိမ်းသွင်းခံရသော အင်အားစုများ ဖြစ်လာခဲ့ပြီး ကြက်သခင်ကြီး၏ ယုံကြည်ရဆုံး လူယုံများ ဖြစ်လာခဲ့ကြသည့် သူတို့၏ ကောင်းမွန်သော ကံကြမ္မာကိုသာ ညည်းတွားနိုင်ကြတော့သည်။

ကံကြမ္မာက သူတို့ကို လှောင်ပြောင်ခဲ့သည်ဟုသာ သူတို့ နောင်တရနေမိကြသည်။

မည်သည်ကြောင့် သူတို့၏အင်အားစုသည် ကြက်သခင်ကြီး၏ ပထမဆုံး သိမ်းသွင်းခံရသော အင်အားစု မဖြစ်ခဲ့ရသနည်း...

ထိုသို့သာ ဖြစ်ခဲ့လျှင် ယနေ့၌ ဤကြီးမားသော အခွင့်အရေးနှင့် ကောင်းချီးများမှာ သူတို့အပေါ် ကျရောက်လာနိုင်သည်။

ကြက်ပေါက်စတစ်၏ ခန့်အပ်မှုမှာ အလွန်ကျပန်းဆန်သည်ဟု ဆိုရပေမည်။

သူသည် မျက်နှာလိုက်မှုကို အပြည့်အဝ ပြသခဲ့ခြင်းပင်။

သာမန် အင်အားစုများတွင် ဤလုပ်ရပ်မှာ ရှောင်ကြဉ်ရဆုံးအရာဖြစ်သည်။

ဤသည်က အနည်းငယ် ဂရုမစိုက်မိပါက လူများကြားတွင် မကျေနပ်မှုများနှင့် စည်းလုံးညီညွတ်မှု ကင်းမဲ့ခြင်းများကို ဖြစ်ပေါ်စေနိုင်ကာ နောက်ဆုံးတွင် အင်အားစု ပြိုကွဲသွားသည်အထိပင် ဖြစ်သွားနိုင်သည်။

သို့သော် နတ်ဆိုးနန်းတော်တွင်မူ ဤကဲ့သို့ လျှို့ဝှက်အန္တရာယ်များ မရှိခဲ့ချေ။

စွမ်းအားသည် အတိုင်းအတာတစ်ခုအထိ ရောက်ရှိသွားချိန်၌ လူတစ်ယောက်သည် သူ လိုချင်သမျှကို လုပ်နိုင်သည်ဟုသာ ဆိုနိုင်ပေ၏။

ကျီးဝူချန်နှင့်ပိုင်ဝူရှားတို့သည် နတ်ဆိုးနန်းတော်တွင် အစွမ်းထက်ဆုံး မဟုတ်နိုင်ချေ။

သို့သော် သူတို့သည် ကြက်ပေါက်စတစ်၏ ယုံကြည်မှုကို အများဆုံး ရရှိထားသူများ ဖြစ်သည်မှာ သေချာလှ၏။

အကြောင်းအရင်းမှာ သူတို့ကို ကြက်ပေါက်စတစ်က ခန့်အပ်ထားခြင်းကြောင့်ပင်။

ထို့ကြောင့် သူတို့၏အရည်အချင်းများသည် အထူးတလည် မထူးချွန်သော်လည်း နတ်ဆိုးနန်းတော်ရှိ မည်သူကမျှ သူတို့ကို အာမခံရဲကြချေ။

တခြား အကြောင်းပြချက် မရှိပေ...

ထိုလူနှစ်ယောက်ကို အာခံခြင်းသည် ကြက်ပေါက်စတစ်၏ အမိန့်ကို အာခံခြင်းသာ ဖြစ်နေသောကြောင့်ပင်။

နန်းတော်သခင်၏အမိန့်ကို အာခံခြင်း...

ဤသည်မှာ ပုန်ကန်ရန်နှင့် သေတွင်းထဲ ခုန်ဆင်းရန် ကြိုးစားခြင်း မဟုတ်လော....

ကြက်ပေါက်စတစ်သည် လက်ထောက်နန်းတော်သခင်များကို စီစဉ်ပြီးနောက် ကျုံးချင်ထံသို့ ချက်ချင်းလာရောက်၍ သတင်းပို့သည်။

"သခင်... စီစဉ်ဖို့နဲ့ ရှင်းပြဖို့ လိုအပ်တာတွေ အားလုံး ပြီးပါပြီ..."

ကျုံးချင်က ခေါင်းညိတ်လိုက်၏။ သူသည် နတ်ဆိုးမြို့တော်ကို ဇဝေဇဝါဖြစ်နေသော အကြည့်များဖြင့် ကြည့်လိုက်သည်။

ဤတစ်ကြိမ် နတ်ဆိုးမြို့တော် ခရီးစဉ်မှ သူ ရရှိခဲ့သော အကျိုးအမြတ်များမှာ အမှန်တကယ်ကို ကြီးမားလှ၏။

သူသည် ယန်သုံးပါးနယ်ပယ် ပထမအဆင့်မှ ဓမ္မသောင်းချီနယ်ပယ် ဆဋ္ဌမအဆင့်အထိ တစ်ဟုန်ထိုး မြင့်တက်သွားခဲ့လေပြီ။

သူ၏စွမ်းအားသည် အရည်အသွေးပိုင်းအရ မြင့်တက်သွားခဲ့သည်။

ဤသည်မှာ သူ့အတွက် ဝမ်းသာစရာကိစ္စတစ်ရပ်ပင်။

သို့သော် သူ့ထံတွင် စိတ်အနှောင့်အယှက် ဖြစ်စရာ ကိစ္စများလည်း ရှိနေခဲ့ပေ၏။

ဤလောကတွင် သူ၏ပထမဆုံးအကြိမ်မှာ ဤသို့ ဆုံးရှုံးသွားလိမ့်မည်ဟု သူ လုံးဝထင်မှတ်မထားခဲ့ချေ။

ထို့ပြင် အမျိုးသမီးတစ်ယောက်၏ အဓမ္မကျင့်ခြင်းကို ခံလိုက်ရခြင်း ဖြစ်ပေ၏။

ထို့ပြင် ဤသည်မှာ စိတ်ထင်ယောင်ထင်မှား ဖြစ်ခြင်း ဟုတ် မဟုတ် သူ မသိသော်လည်း....

မကြာသေးမီက သူ၏ဝမ်းဗိုက် အနည်းငယ် ဖောင်းပွလာသည်ဟု သူ အမြဲတစေ ခံစားနေရသည်။

ရှိနေသလိုလို မရှိသလိုလိုဖြင့် အထဲတွင် အသက်ရှူသံတစ်ခု ဖြစ်တည်နေပုံ ရပေ၏။

"သောက်ကျိုးနည်း... ငါ ကိုယ်ဝန်ရနေတာလား..."

ကျုံးချင်သည် ဤအရာမှာ လွန်စွာ အဓိပ္ပာယ်မဲ့ပြီး ယုတ္တိမတန်ဟု ခံစားရသည်။

အမျိုးသားတစ်ဦး ကိုယ်ဝန်ဆောင်ခြင်းမှာ ခေတ်အဆက်ဆက် အံ့ဖွယ်ကိစ္စတစ်ခုအဖြစ် သတ်မှတ်နိုင်သည်။

နောက်ဆုံးတွင် သူသည် အတွေးလွန်နေခြင်းသာ ဖြစ်ရမည်ဟု ဖြေသိမ့်တွေးတောလိုက်ရသည်။

သူ၏ အတိတ်ဘဝတွင်ဖြစ်စေ လက်ရှိဘဝတွင်ဖြစ်စေ အမျိုးသားကိုယ်ဝန်ဆောင်သည်ဆိုသော ဤကဲ့သို့ ယုတ္တိမတန်သည့် အရာမျိုးကို သူ တစ်ကြိမ်တစ်ခါမျှ မကြားဖူးခဲ့ချေ။

တစ်ချိန်တည်းမှာပင် ဤအရာက သူ့ကို ဟော်လင်းအာအပေါ် အူလှိုက်သည်းလှိုက် မုန်းတီးသွားစေခဲ့သည်။

ဒီကျိန်စာသင့်မယ့် မိန်းမ... သူက ငါ့ကို အဓမ္မကျင့်ခဲ့ရုံတင် မကဘူး...

ကိစ္စပြီးတာနဲ့ သူက ဘောင်းဘီပြန်ဝတ်ပြီး ပျောက်ကွယ်သွားခဲ့တယ်...

သူ့ကို ဒေါသများ ပြည့်နှက်နေသော ဝမ်းဗိုက်ကြီး တစ်ခုနှင့် ထားရစ်ခဲ့ပြီး ဒေါသပေါက်ကွဲစရာ နေရာပင် မရှိတော့ချေ။

"မင်း တစ်သက်လုံး ပုန်းနေနိုင်ဖို့ မျှော်လင့်ပါတယ်... မင်း ဘယ်မှာရှိလဲဆိုတာ ငါ သိရတဲ့ တစ်နေ့ မင်းကို သေချာပေါက်ပေးဆပ်ခိုင်းမယ်..."

ကျုံးချင်သည် ဒေါသထွက်နေပြီး ဟော်လင်းအာကို တွေးမိတိုင်း သူ၏စိတ်အခြေအနေမှာ အလွန်အမင်း ဒေါသထွက်လွယ်လာခဲ့သည်။

သူ၏စိတ်သည် တစ်ချိန်က ပြိုလဲလုနီးပါး အခြေအနေအထိ ပျက်စီးသွားခဲ့ဖူးသည်။