အခန်း (၃၄၃-၃၄၄)

အခန်း (၃၄၃) - ကြီးမားသော အခွင့်အရေးကြီး၊ ရိလင် လျှို့ဝှက်နယ်မြေ ပေါ်ထွက်လာခြင်း။

ဝုန်း…

ထိုအခိုက်အတန့်တွင် ကျန်းဖန်၏ ရင်ထဲ လှုပ်ခတ်သွားပြီး သူ၏ အခြေအနေပြ မျက်နှာပြင်ကို ချက်ချင်း ဖွင့်ကြည့်လိုက်၏။

[အမည်: ကျန်းဖန်]

[ကံကြမ္မာဇာတာ: ကောင်းကင်နှင့်အမျှ ကံကောင်းခြင်းများ၊ ကြီးမားသော ဘေးအန္တရာယ်မှ လွတ်မြောက်ခြင်းက အနာဂတ်တွင် ကံကောင်းခြင်းများကို သေချာပေါက် ဆောင်ကြဉ်းပေးမည်]

[သက်တမ်း: ၁,၂၀၀ နှစ်]

[ဝိညာဉ်အမြစ်: မြေကမ္ဘာ ဝိညာဉ်အမြစ်]

[ကံကောင်းခြင်းအမှတ်: ၉၀,၀၀၀ အမှတ်]

[ပိုင်ဆိုင်မှု: ဝိညာဉ်ကျောက်တုံး ၁,၂၀၀,၀၀၀]

[ကျင့်စဉ် (၁): မြွေပျံကျင့်စဉ်၊ အုတ်မြစ်တည်ဆောက်ခြင်း အခန်းကဏ္ဍ (အဆင့် ၂ အလယ်အလတ်)]

[ကျင့်စဉ် (၂): ဓာတ်ကြီးငါးပါး အင်းကျမ်း၊ ဒုတိယအဆင့်]

[သွေးသားတော်ဝင်စွမ်းရည်: ဧကရာဇ်အကြည့်၊ လက်ဝါးလေပြေ]

[အသက်သွေးကြောအင်းများ: ကြာညိုမြေကမ္ဘာမီးလျှံအင်း (အဆင့်မြင့်)၊ ယင်ယန်မန်ဒါရင်ဘဲ ရုပ်သေးအင်း (အဆင့်မြင့်)၊ နိမိတ်ဖတ်အင်း (အဆင့်မြင့်)၊ ဝိညာဉ်တုန်ဟိန်းအင်း (အဆင့်မြင့်)၊ ကောင်းကင်မိုးကြိုးအင်း (အထွတ်အထိပ် အောင်မြင်မှု)၊ စိတ်ညို့အင်း (အဆင့်မြင့်)၊ အာရုံခံအင်း (အဆင့်မြင့်)၊ မြေလျှိုးအင်း (အဆင့်မြင့်)၊ ရွှမ်လိပ်အင်း (အခြေခံ)၊ ရေခဲအင်း (အဆင့်မြင့်)]

[ကျင့်စဉ်အဆင့်: အုတ်မြစ်တည်ဆောက်ခြင်း ပဉ္စမအဆင့် (၇၀%)]

[အတတ်ပညာ: အဆင့် (၂) အလယ်အလတ်အဆင့် အင်းဆရာ (၆၀%)]

သံသယဖြစ်စရာမလိုပါ။ ဤကာလအတွင်း သူ၏ ကျင့်ကြံမှု တိုးတက်နှုန်းမှာ အလွန် မြန်ဆန်လှသည်ဟု ဆိုရပေမည်။

သွေးနီရောင် ဝိညာဉ်သစ်သီးကို ရရှိခဲ့ခြင်းကြောင့်၊ သူ၏ 'မိန်' အတွင်းရှိ မူလဝိညာဉ်စွမ်းအားများမှာ အရှိန်အဟုန်ဖြင့် တိုးပွားလာခဲ့၏။ ယခုအခါ တိုးတက်မှုမှာ ၇၀ ရာခိုင်နှုန်းအထိ ရောက်ရှိလာခဲ့ပြီ ဖြစ်သည်။

ကြည့်ရသည်မှာ အချိန်အတိုင်းအတာ တစ်ခုအရောက်တွင် အုတ်မြစ်တည်ဆောက်ခြင်း ပဉ္စမအဆင့်၏ အထွတ်အထိပ် သို့ သူ တက်လှမ်းနိုင်တော့မည် ဖြစ်၏။

ဤသည်က ကံတရားနှင့် အခွင့်အလမ်းများ၏ အရေးပါမှုကို သက်သေပြနေခြင်းပင်။

တစ်ခါတစ်ရံတွင် ဆေးလုံးအချို့ သို့မဟုတ် ဝိညာဉ်ဆေးဖက်ဝင် အပင်များ၏ အကူအညီက နှစ်ပေါင်းများစွာ ကြိုးစားပမ်းစား ကျင့်ကြံရမည့် အချိန်များကို သက်သာသွားစေနိုင်ပေသည်။

သေချာသည်မှာ သူ၏ ကျင့်စဉ် တိုးတက်မှုအပြင်၊ ကောင်းကင်မိုးကြိုးအင်းသည်လည်း 'အထွတ်အထိပ် အောင်မြင်မှုအဆင့်' သို့ တက်လှမ်းသွားခဲ့ပြီ ဖြစ်၏။

တစ်ချိန်တည်းမှာပင် အင်းဆရာ တစ်ဦးအနေဖြင့် သူ၏ အရည်အချင်းအဆင့်မှာလည်း မှန်မှန် တိုးတက်လာနေခဲ့သည်။

သို့သော် ဤအရာများက သူ၏ ကံကောင်းခြင်းအမှတ် အများအပြားကို စားသုံးသွားခဲ့ပြီး၊ လက်ရှိတွင် ကံကောင်းခြင်းအမှတ် ၉၀,၀၀၀ သာ ကျန်ရှိတော့သည်။

ရွှစ်…

ကျန်းဖန်သည် သူ၏ ထွက်သက်ဝင်သက်ကို တည်ငြိမ်အောင် ထိန်းလိုက်ပြီး စံအိမ်တော်အတွင်းသို့ ပြန်ဝင်လာခဲ့၏။

"လင်တော်မောင်... ကျင့်ကြံလို့ ပြီးသွားပြီလား ဟင်။"

ထိုအချိန်တွင် စုဝေဝေသည် အပြင်မှ ပြန်ရောက်လာကာစ ဖြစ်သည်။ သူမသည် စောစောက မီးကြေးနီမြို့လေးထဲသို့ ဈေးဝယ်ထွက်ခဲ့ပြီး၊ ပစ္စည်းကောင်း အများအပြားကို ဝယ်ယူလာခဲ့၏။

သူမ၏ မျက်နှာထက်တွင် စိတ်လှုပ်ရှား ပျော်ရွှင်မှုများ အပြည့်အဝ ဖုံးလွှမ်းနေခဲ့သည်။

မည်သို့ဖြစ်စေ မီးကြေးနီကျွန်းသည် ယခုအခါ အလွန် စည်ကားသက်ဝင်နေပြီး ကျင့်ကြံသူ အမြောက်အမြားကို ဆွဲဆောင်ထားနိုင်သည် မဟုတ်လော။ ဤသည်က ကူးသန်းရောင်းဝယ်ရေးကိုပါ ကြီးပွားတိုးတက်လာစေခဲ့သည်။

ပို၍ အရေးကြီးသည်မှာ၊ သူမသည် ယခုအခါ 'ချီ' ကျင့်ကြံခြင်း နဝမအဆင့် ကျင့်ကြံသူ တစ်ဦးဖြစ်နေပြီဖြစ်ရာ၊ မိမိကိုယ်ကို ကာကွယ်နိုင်စွမ်း ရှိနေပြီ ဖြစ်၏။

အုတ်မြစ်တည်ဆောက်ခြင်း ကျင့်ကြံသူများနှင့် ရင်ဆိုင်ရမှသာ သူမအတွက် အန္တရာယ် ရှိနိုင်ပေမည်။

သို့သော် မီးကြေးနီကျွန်း တစ်ကျွန်းလုံးမှာ ကျန်းဖန်၏ အာရုံခံနိုင်စွမ်း နယ်ပယ်အတွင်း၌ ရှိနေသည်။ ဤကျွန်းပေါ်သို့ ဝင်ရောက်လာသော မည်သည့် အုတ်မြစ်တည်ဆောက်ခြင်း ကျင့်ကြံသူမျှ သူ၏ အာရုံမှ လွတ်ကင်းနိုင်မည် မဟုတ်ချေ။

ထို့ကြောင့် စုဝေဝေအနေဖြင့် ဤကျွန်းပေါ်တွင် နေထိုင်ရသည်မှာ အလွန် ဘေးကင်းလုံခြုံလှပေသည်။

"အင်း... ခုလေးတင်ပဲ ပြီးတာ။"

"ဒီတစ်ခေါက် မီးကြေးနီမြို့လေးမှာ ဘာတွေများ ဝယ်လာခဲ့လဲ။"

ကျန်းဖန်သည် ရှေ့သို့ တိုးသွားကာ စုဝေဝေ၏ သွယ်လျသော ခါးလေးကို ဖက်ထားလိုက်ပြီး၊ သူမ၏ ဆွဲဆောင်မှုရှိသော ကိုယ်ခန္ဓာ အချိုးအစားကို ခံစားလိုက်၏။

ယခုအခါ စုဝေဝေမှာ ယခင်ကထက် ပို၍ပင် ကျက်သရေရှိလှပနေပြီး၊ သူ့ကိုယ်သူပင် ထိန်းချုပ်ရ ခက်ခဲလောက်အောင် ရင်ထဲတွင် မီးဟုန်းဟုန်း တောက်လောင်သွားစေခဲ့သည်။

"ပစ္စည်းတွေ အများကြီး ဝယ်လာတယ် လင်တော်မောင်။"

"အဆင့်မြင့် ပိုးသား အဝတ်အစား တချို့ရယ်၊ အဆင့် (၂) ဝိညာဉ်ဆန် တွေရယ်။"

"ပြီးတော့ လှပတဲ့ အဆင်တန်ဆာ တချို့လည်း ပါသေးတယ်။"

"စစ်ပွဲ ပြီးကတည်းက၊ ကုန်သည် အများအပြား မီးကြေးနီကျွန်းကို ရောက်လာကြတယ်လေ။"

"သူတို့က ကုန်ပစ္စည်းတွေလည်း အများကြီး သယ်လာကြတယ်။"

စုဝေဝေက ရတနာများကို ရေတွက်နေသကဲ့သို့ စိတ်လှုပ်ရှားစွာဖြင့် ပြောပြနေခဲ့၏။ သူမသည် ဤရက်ပိုင်းအတွင်း ကြုံတွေ့ခဲ့ရသော အသေးအဖွဲ ကိစ္စလေးများကို တတွတ်တွတ် ပြောပြနေခဲ့သည်။

ကျန်းဖန်ကလည်း ကြားထဲမှ ဝင်ရောက် မှတ်ချက်ပေးရင်း၊ ရင်ထဲတွင် နွေးထွေးမှုကို ခံစားနေရ၏။ အကယ်၍ ဘေးဒုက္ခများသာ ဤမျှ မများပြားလှပါက၊ ဤကဲ့သို့ အေးအေးချမ်းချမ်း ကျင့်ကြံနေရခြင်းမှာလည်း မဆိုးလှချေ။

…

နောက်ထပ် ရက်အနည်းငယ် ကုန်ဆုံးသွားခဲ့ပြန်သည်။

အစပိုင်းတွင် ကျန်းဖန်နှင့် စုဝေဝေတို့သည် တည်ငြိမ်အေးချမ်းသော ဘဝလေးကို ဖြတ်သန်းရင်း၊ တစ်ဦးနှင့်တစ်ဦး ခွဲမရအောင် ချစ်ခင်ကြင်နာစွာ နေထိုင်ခဲ့ကြ၏။ သို့သော် ရုတ်တရက်ဆိုသလိုပင် အလွန် တုန်လှုပ်စရာကောင်းသော သတင်းတစ်ခုကို သူ ရရှိခဲ့သည်။

၎င်းမှာ 'ရိလင် လျှို့ဝှက်နယ်မြေ' ပေါ်ထွက်လာခြင်းပင်။

ဤသတင်းက ရိလင် ကျွန်းစု တစ်ခုလုံးကို တုန်လှုပ်သွားစေခဲ့ပြီး၊ မရေမတွက်နိုင်သော ကျင့်ကြံသူများကို အံ့အားသင့်သွားစေခဲ့၏။

အထူးသဖြင့် ရွှေအမြုတေ အင်အားစုများနှင့် ရွှေအမြုတေ အရှင်သခင်များမှာ တစ်ဦးစီတိုင်း အလွန်အမင်း စိတ်လှုပ်ရှားနေခဲ့ကြသည်။

အဘယ်ကြောင့်ဆိုသော် သူတို့အတွက်မူ ဤအရာက လုံးဝကို ဧရာမ အခွင့်အရေးကြီး တစ်ခု ဖြစ်နေသောကြောင့်ပင်။

မီးကြေးနီကျွန်းပေါ်ရှိ 'ချီ' ကျင့်ကြံခြင်းအဆင့် ကျင့်ကြံသူ အများအပြားပင်လျှင် ဤကိစ္စကို သိရှိနေခဲ့ကြ၏။

"မဖြစ်နိုင်တာ၊ ရိလင် လျှို့ဝှက်နယ်မြေကြီး ပေါ်လာပြီ ဟုတ်လား။"

"နှစ်တစ်ရာလောက် စောင့်ပြီးတဲ့နောက်မှာ၊ နောက်ဆုံးတော့ ထပ်ပေါ်လာပြန်ပြီပေါ့။"

'ချီ' ကျင့်ကြံခြင်းအဆင့် ကျင့်ကြံသူ တစ်ဦးက စိတ်လှုပ်ရှားစွာဖြင့် ပြောလိုက်၏။

"ရိလင် လျှို့ဝှက်နယ်မြေ ဆိုတာ ဘာကြီးလဲ။ ဘာလို့ လူတိုင်းက အဲဒါ ပေါ်လာတာကို ဒီလောက်တောင် စိတ်လှုပ်ရှားနေကြတာလဲ။"

ရိလင် လျှို့ဝှက်နယ်မြေနှင့် ပတ်သက်၍ သိပ်မသိသော တစ်စုံတစ်ယောက်က လုံးဝ နားမလည်နိုင်စွာဖြင့် ဝင်မေးလိုက်၏။

"ရိလင် လျှို့ဝှက်နယ်မြေဆိုတာ ဒီပင်လယ်ပြင်မှာ နာမည်ကျော်ကြားတဲ့ လျှို့ဝှက်နယ်မြေ ကမ္ဘာကြီးတစ်ခုပဲ။"

"အဲဒါကို ရိလင် ဘိုးဘေးကြီး ထိန်းချုပ်ထားတဲ့ ရှေးဟောင်း လျှို့ဝှက်နယ်မြေ ကမ္ဘာတစ်ခုလို့ ပြောကြတယ်။"

"သူ့ရဲ့ ဧရိယာက အလွန်အမင်း ကျယ်ဝန်းပြီး၊ အခုအချိန်အထိ သူ့ရဲ့ အစစ်အမှန် အရွယ်အစားကို ဘယ်သူမှ မသိကြသေးဘူး။"

"ဒါပေမဲ့ သေချာတာတစ်ခုကတော့ ရိလင် လျှို့ဝှက်နယ်မြေထဲမှာ မရေမတွက်နိုင်တဲ့ ရတနာတွေ ရှိနေတာပဲ။"

"အရင်တုန်းက ရိလင် ဘိုးဘေးကြီးက ဒီလျှို့ဝှက်နယ်မြေထဲက အရင်းအမြစ်တွေကို အသုံးချပြီးတော့ သန္ဓေတည်ဝိညာဉ် အဆင့်ကို တက်လှမ်းနိုင်ခဲ့တာ။"

"ရိလင် လျှို့ဝှက်နယ်မြေကြီး ပေါ်လာတဲ့ အချိန်တိုင်း၊ ဒီပင်လယ်ပြင်မှာ အရင်က မကြုံဖူးလောက်အောင် ကြီးကျယ်ခမ်းနားတဲ့ မြင်ကွင်းကြီး တစ်ခု ဖြစ်လာတတ်တယ်။"

"ကံကောင်းခြင်း အနည်းငယ်လေး ရလိုက်ရင်တောင်မှ အရှိန်အဟုန်နဲ့ အောင်မြင်မှုတွေ ရလာနိုင်ပြီး၊ ကိုယ့်ရဲ့ ကံကြမ္မာကို လုံးဝ ပြောင်းလဲသွားစေနိုင်တယ်။"

ကျင့်ကြံသူ အမြောက်အမြားမှာ စိတ်လှုပ်ရှား တက်ကြွစွာ ဆွေးနွေးနေခဲ့ကြ၏။

မည်သို့ဆိုစေ ရိလင် လျှို့ဝှက်နယ်မြေကြီးက အနှစ်တစ်ရာမှာ တစ်ကြိမ်သာ ပေါ်ထွက်လာလေ့ ရှိသည် မဟုတ်လော။

သာမန်လူများ သို့မဟုတ် 'ချီ' ကျင့်ကြံခြင်းအဆင့် ကျင့်ကြံသူများအတွက်မူ ၎င်းမှာ တစ်သက်တွင် တစ်ကြိမ်သာ ရနိုင်သော အခွင့်အရေးမျိုး ဖြစ်ပေသည်။ အကယ်၍ ဤတစ်ကြိမ်သာ လွတ်သွားခဲ့မည်ဆိုပါက နောက်ထပ် အခွင့်အရေး ရှိတော့မည် မဟုတ်ချေ။

ဖြစ်နိုင်သည်မှာ အုတ်မြစ်တည်ဆောက်ခြင်း ကျင့်ကြံသူများ သို့မဟုတ် ရွှေအမြုတေ အရှင်သခင်များသာလျှင် ၎င်းကို နှစ်ကြိမ်၊ သုံးကြိမ် သို့မဟုတ် လေးကြိမ်အထိ ကြုံတွေ့နိုင်ခွင့် ရှိကြပေမည်။

သို့သော် ထိုသို့ဖြစ်လင့်ကစား ၎င်းမှာ ဤကျင့်ကြံသူများအတွက် အဖိုးမဖြတ်နိုင်သော အခွင့်အရေးတစ်ခု ဖြစ်နေဆဲပင်။ ထို့ကြောင့် ဤမျှ ကြီးမားလှသော အခွင့်အရေးကြီးကို မည်သူကမျှ လက်လွတ်ခံချင်ကြမည် မဟုတ်ချေ။

"ဒီလောက် မှန်းဆလို့မရနိုင်တဲ့ လျှို့ဝှက်နယ်မြေ ကမ္ဘာကြီးထဲကို၊ ငါတို့လို 'ချီ' ကျင့်ကြံခြင်းအဆင့် ကျင့်ကြံသူတွေ ဝင်ခွင့်ရပါ့မလား။"

"ဟုတ်တယ်လေ၊ ဒီလို လျှို့ဝှက်နယ်မြေ ကမ္ဘာမျိုးကို ရွှေအမြုတေ အင်အားစုတွေက ထိန်းချုပ်ထားတာ ကြာလောက်ပြီ။ ငါတို့က ဘယ်လိုလုပ် ဝင်နိုင်မှာလဲ။"

"တကယ်ပါပဲ၊ ငါတို့ကတော့ အဝေးကနေပဲ အားကျနေရုံ ရှိတော့တာပေါ့။"

လေလွင့် ကျင့်ကြံသူ အချို့က သရော်လိုက်ကြ၏။

အကယ်၍ ရိလင် လျှို့ဝှက်နယ်မြေသည် အမှန်တကယ်ပင် ထိုမျှလောက် အံ့မခန်း ကောင်းမွန်နေမည်ဆိုပါက၊ ၎င်းကို အဓိက ရွှေအမြုတေ အင်အားစုများက ထိန်းချုပ်ထားပြီးလောက်ပြီဟု သူတို့ ခံစားနေကြရသည်။

……

အခန်း (၃၄၄) - ကြီးမားသော အခွင့်အရေးကြီး၊ ရိလင် လျှို့ဝှက်နယ်မြေ ပေါ်ထွက်လာခြင်း။ (အပိုင်း ၂)

"လျှို့ဝှက်နယ်မြေ ကမ္ဘာထဲ ဝင်ဖို့က နေရာအရေအတွက်ကတောင် ကန့်သတ်ထားဦးမှာလေ။"

"သာမန် လေလွင့် ကျင့်ကြံသူတွေက ရတနာတွေ ရဖို့ ဝင်ခွင့် ဘယ်လိုလုပ် ရနိုင်မှာလဲ။"

"အဲဒါက စိတ်ကူးယဉ်သက်သက်ပါပဲကွာ။"

"ဒါပေမဲ့ ဒါကလည်း ကျင့်စဉ်လောကရဲ့ ရက်စက်တဲ့ အမှန်တရားပါပဲ။ ကောင်းမွန်တဲ့ အရင်းအမြစ်တွေ၊ ကောင်းမွန်တဲ့ လျှို့ဝှက်နယ်မြေ မှန်သမျှကို အဓိက အင်အားစုကြီးတွေက ထိန်းချုပ်ထားတာ ကြာပြီလေ။"

"သာမန် လေလွင့် ကျင့်ကြံသူတွေက အကောင်းဆုံး အနေအထားမှာတောင် သူတို့ စားကြွင်းစားကျန်လောက်ပဲ ရနိုင်တာ။"

"ဒါကြောင့် သာမန် လေလွင့် ကျင့်ကြံသူတွေအတွက် အထက်ကို တက်လှမ်းပြီး ကံကြမ္မာကို အံတုဖို့ဆိုတာ လုံးဝ မဖြစ်နိုင်သလောက်ပဲ။"

"မဟုတ်ဘူး မဟုတ်ဘူး၊ ရိလင် လျှို့ဝှက်နယ်မြေက မတူဘူးကွ။"

"ဒီလျှို့ဝှက်နယ်မြေ ကမ္ဘာက အရမ်းကို ထူးခြားတယ်။ ဘယ် ရွှေအမြုတေ အင်အားစုကမှ သူ့ကို မထိန်းချုပ်နိုင်ဘူး။"

"သူ့မှာ သီးသန့် ဝင်ပေါက်ဆိုတာတောင် မရှိဘူး။"

"ရိလင် လျှို့ဝှက်နယ်မြေရဲ့ မိုင်တစ်ရာ ပင်လယ်ပြင် ဧရိယာနားကို ချဉ်းကပ်သွားတာနဲ့၊ မင်းကို အထဲ တိုက်ရိုက် ပို့ဆောင်ပေးလိုက်မှာပဲ။"

"အပြင်ကို ပြန်ထွက်ဖို့ဆိုတာကလည်း အရမ်း လွယ်ပါတယ်။"

"ရိလင် လျှို့ဝှက်နယ်မြေက တစ်ခါပွင့်ရင် ခြောက်လကြာတယ်။ ခြောက်လ ပြည့်သွားတာနဲ့၊ လျှို့ဝှက်နယ်မြေ ကမ္ဘာရဲ့ စွမ်းအားက မင်းတို့ကို အပြင်ဘက်ကို ကျပန်း ပြန်ပို့ပေးလိမ့်မယ်။ ထွက်လာရမယ့် နေရာကလည်း ပုံသေ သတ်မှတ်ထားတာ မဟုတ်ဘူး။"

ရိလင် လျှို့ဝှက်နယ်မြေအ ကြောင်းကို ကောင်းကောင်းသိထားသော ကျင့်ကြံသူ တစ်ဦးက ဤကမ္ဘာ၏ အတိမ်အနက်ကို ရှင်းပြနေခြင်း ဖြစ်သည်။

ဤလျှို့ဝှက်နယ်မြေ ကမ္ဘာအကြောင်းသည် ဤပင်လယ်ပြင်တွင် လူသိရှင်ကြား သတင်းတစ်ခု ဖြစ်နေခဲ့သည်မှာ ကြာပြီ မဟုတ်လော။

အသက်နည်းနည်း ပိုရှည်ရှည် နေလာခဲ့သူတိုင်း ရိလင် လျှို့ဝှက်နယ်မြေ အကြောင်းကို သိရှိနိုင်ကြသည်။

ထို့ကြောင့် ရွှေအမြုတေ အင်အားစုများပင်လျှင် ဤရိလင် လျှို့ဝှက်နယ်မြေကို မထိန်းချုပ်နိုင်ကြခြင်း ဖြစ်၏။

"မဖြစ်နိုင်တာ၊ အကယ်၍ အဲဒီလိုသာဆိုရင် ငါတို့လို 'ချီ' ကျင့်ကြံခြင်းအဆင့် ကျင့်ကြံသူတွေတောင် ဝင်ခွင့်ရမှာပေါ့။ ပြီးတော့ အဲဒီ ရွှေအမြုတေ အင်အားစုတွေလည်း နေရာတွေကို လက်ဝါးကြီးအုပ်ထားလို့ မရတော့ဘူး။"

လေလွင့် ကျင့်ကြံသူ အများအပြား၏ မျက်လုံးများ ချက်ချင်း တောက်ပသွားပြီး အလွန်အမင်း စိတ်လှုပ်ရှားသွားကြ၏။

သူတို့ အကြောက်ဆုံးအရာမှာ ဤလျှို့ဝှက်နယ်မြေ ကမ္ဘာ၏ ဝင်ပေါက်ကို ရွှေအမြုတေ အင်အားစုများက ပိတ်ဆို့ထားမည်ကိုပင်။

အကယ်၍ ထိုသို့သာဆိုလျှင် သူတို့အနေဖြင့် ရိလင် လျှို့ဝှက်နယ်မြေထဲသို့ ဝင်ရောက်ရန် အခြေခံအားဖြင့် အခွင့်အရေး ရှိမည် မဟုတ်ချေ။

သို့သော် ယခုအခါတွင်မူ ရိလင် လျှို့ဝှက်နယ်မြေအနီးသို့ ချဉ်းကပ်သွားရုံဖြင့် အထဲသို့ တိုက်ရိုက် ပို့ဆောင်ပေးမည် ဖြစ်၏။

ထိုသို့ဆိုလျှင် ဤလေလွင့် ကျင့်ကြံသူများသည်လည်း လျှို့ဝှက်နယ်မြေ ကမ္ဘာထဲ ဝင်ရောက်နိုင်ပြီး အခွင့်အရေးများ ရယူနိုင်မည် ဖြစ်သည်။

ဤသည်က လေလွင့် ကျင့်ကြံသူ တိုင်းအတွက် သတင်းကောင်းကြီး တစ်ခုပင်။

"နေရာတွေကို လက်ဝါးကြီး အုပ်မရတာလောက်တင် မကဘူး။"

"အကယ်၍ ငါတို့ လျှို့ဝှက်နယ်မြေထဲမှာ ရတနာတွေ ရခဲ့ရင်တောင်မှ၊ အဲဒီ အဆင့်မြင့် ကျင့်ကြံသူတွေက ငါတို့ကို လိုက်လံ မသတ်ဖြတ်နိုင်တော့ဘူးလေ။"

"ဟုတ်တယ်မလား။ ငါတို့ အကြောက်ဆုံးက အထဲကနေ ရတနာတွေ ရလာပြီးတော့၊ ဝင်ပေါက်မှာ စောင့်နေတဲ့ ရွှေအမြုတေအဆင့် ကျင့်ကြံသူတွေရဲ့ ဖမ်းဆီးတာကို ခံရပြီး ရလာတာတွေ အကုန် ပေးလိုက်ရမှာကိုပဲ။ ဒါပေမဲ့ အခုတော့ ငါတို့ကို ကျပန်း ပြန်ပို့ပေးမှာဆိုတော့၊ အဲဒီ လူယုတ်မာ အဆင့်မြင့် ကျင့်ကြံသူတွေလည်း ငါတို့ကို အတင်းအကျပ် လုယူလို့ မရတော့ဘူးပေါ့။"

"တကယ်ပါပဲ၊ ဒါက ရိလင် ကျွန်းစုမှာ အကြီးမားဆုံး အခွင့်အရေးကြီးပဲ။ ရာစုနှစ် တစ်ခုမှာ တစ်ခါသာ ပေါ်လာတဲ့ ကြီးကျယ်ခမ်းနားတဲ့ အခမ်းအနားကြီးပဲ။"

လေလွင့် ကျင့်ကြံသူ အများအပြားမှာ စိတ်လှုပ်ရှားမှုများဖြင့် ပြည့်နှက်နေကြ၏။

သူတို့သည် အထဲရှိ ရတနာများကို လုယူရန်အတွက် ရိလင် လျှို့ဝှက်နယ်မြေထဲသို့ ချက်ချင်း ဝင်ရောက်ချင်စိတ်များဖြင့် လက်ယားနေကြပြီ ဖြစ်သည်။

"ဒါပေမဲ့ ရိလင် လျှို့ဝှက်နယ်မြေက အဲဒီလောက် နေချင်စရာကောင်းတဲ့ နေရာလို့ မထင်လိုက်နဲ့ဦး။"

"ငါတို့ လေလွင့် ကျင့်ကြံသူတွေ ဝင်လို့ရတယ် ဆိုပေမဲ့၊ ရတနာတွေ ရဖို့က သိပ်မလွယ်ကူဘူး။"

"ရိလင် လျှို့ဝှက်နယ်မြေထဲမှာ ပြိုင်ဘက်ကင်း မိစ္ဆာကြီး တစ်ကောင်ကို ချိတ်ပိတ်ထားတယ်လို့ ဆိုကြတယ်။ အဲဒီ မိစ္ဆာကြီးက ဒီနေ့အချိန်အထိ မသေသေးဘူးတဲ့။"

"ဒီမိစ္ဆာကြီးက ချိတ်ပိတ်မှုကို ဖောက်ထွက်ဖို့ ကြိုးစားရင်းနဲ့ မိစ္ဆာချီ အများအပြားကို မကြာခဏ ထုတ်လွှတ်လေ့ရှိတယ်။"

"ပြီးတော့ ဒီမိစ္ဆာချီတွေက သားရဲ အများအပြားကို စိမ့်ဝင်သွားပြီး မိစ္ဆာသားရဲတွေ အဖြစ် ပြောင်းလဲပစ်လိုက်တာပဲ။"

"ရိလင် လျှို့ဝှက်နယ်မြေက ရာစုနှစ် တစ်ခုမှာ တစ်ခါ ပေါ်လာရတဲ့ အကြောင်းရင်းက၊ ဒီမိစ္ဆာတွေကို သုတ်သင်ရှင်းလင်းဖို့အတွက် ကျင့်ကြံသူတွေရဲ့ စွမ်းအားကို ငှားရမ်း အသုံးပြုတာပဲ။"

"တစ်ချိန်တည်းမှာ မိစ္ဆာကြီးရဲ့ စွမ်းအားကို အားနည်းသွားစေပြီး ချိတ်ပိတ်မှုကို ဆက်ထိန်းသိမ်းထားဖို့ပေါ့။"

"ဒါကြောင့် ရိလင် လျှို့ဝှက်နယ်မြေထဲ တစ်ကြိမ် ဝင်သွားပြီဆိုတာနဲ့၊ မရေမတွက်နိုင်တဲ့ မိစ္ဆာတွေရဲ့ ခြိမ်းခြောက်မှုကို ရင်ဆိုင်ရလိမ့်မယ်။"

"အနည်းငယ်လေး ပေါ့ဆလိုက်တာနဲ့ လျှို့ဝှက်နယ်မြေထဲမှာပဲ သေလမ်းဆီ ရောက်သွားနိုင်တယ်။"

အသက်ကြီးကြီး လေလွင့် ကျင့်ကြံသူ တစ်ဦးက လေးနက်သော လေသံဖြင့် ပြောလိုက်၏။

သူက ရိလင် လျှို့ဝှက်နယ်မြေနှင့် ပတ်သက်သော ပိုမို နက်ရှိုင်းသည့် လျှို့ဝှက်ချက်များကို ဖော်ထုတ်ပြလိုက်ခြင်း ဖြစ်သည်။

ထင်ရှားသည်မှာ ရိလင် လျှို့ဝှက်နယ်မြေ၏ ထူးခြားသော သဘာဝကို မရေမတွက်နိုင်သော ကျင့်ကြံသူ အများအပြားက သိရှိထားပြီး ဖြစ်သည်။ သို့သော် ထိုသို့ဖြစ်လင့်ကစား အထဲတွင် ရတနာများ အမှန်တကယ် များပြားစွာ ရှိနေသဖြင့်၊ ကျင့်ကြံသူ အများအပြားသည် မရပ်မနား ဝင်ရောက်နေကြဆဲ ဖြစ်၏။

အကယ်၍ အောင်မြင်မည်ဆိုပါက 'ချီ' ကျင့်ကြံခြင်းအဆင့်၊ အုတ်မြစ်တည်ဆောက်ခြင်းအဆင့် သို့မဟုတ် ရွှေအမြုတေအဆင့် မည်သည့် ကျင့်ကြံသူဖြစ်စေ၊ သူတို့၏ အတားအဆီးများကို ကျော်လွှားနိုင်ရန် အကူအညီဖြစ်စေမည့် ကြွယ်ဝသော အကျိုးအမြတ်များကို ရရှိနိုင်ပေသည်။

တစ်ချိန်က မိစ္ဆာကျင့်ကြံသူများသည် ရိလင် လျှို့ဝှက်နယ်မြေ အတွင်းသို့ ဖောက်ထွင်းဝင်ရောက်ကာ မိစ္ဆာကြီးကို ကယ်တင်ရန် ကန့်သတ်ချက်များကို ဖျက်ဆီးရန် ကြိုးစားခဲ့ဖူး၏။

သို့သော် လျှို့ဝှက်နယ်မြေ ကမ္ဘာအတွင်းသို့ ဝင်ရောက်လိုက်သည်နှင့် အတွင်းရှိ ကန့်သတ်ချက် အစီရင်စုများ၏ ချေမှုန်းဖျက်ဆီးခြင်းကို ခံလိုက်ကြရသည်။

ထို့ကြောင့် ယခုအခါ မည်သည့် မိစ္ဆာကျင့်ကြံသူကမျှ ရိလင် လျှို့ဝှက်နယ်မြေထဲသို့ မဝင်ရဲကြတော့ချေ။

"အဲဒီလို ဆိုရင်တောင်မှ ရိလင် လျှို့ဝှက်နယ်မြေက စွန့်စားရကျိုး နပ်ပါတယ်။"

"အဲဒီထဲမှာ အုတ်မြစ်တည်ဆောက်ခြင်း ဝိညာဉ်ဆေးဖက်ဝင် အပင်တွေတင် မကဘူး၊ ရွှေအမြုတေ ဝိညာဉ်ဆေးဖက်ဝင် အပင် အများအပြားတောင် ရှိတယ်လို့ ကြားတယ်။"

"သန္ဓေတည်ဝိညာဉ် ဝိညာဉ်ဆေးဖက်ဝင် အပင်တွေတောင် ရှိသေးတယ်တဲ့။"

"ဒီတစ်ခေါက် ရိလင် လျှို့ဝှက်နယ်မြေ ပေါ်လာတဲ့အတွက် ရွှေအမြုတေ အင်အားစု အများအပြားကြားက စစ်ပွဲတွေတောင် ရပ်တန့်သွားခဲ့ပြီ။"

"ရွှေအမြုတေ အရှင်သခင် အများစုက အခွင့်အရေးတွေ ရှာဖို့အတွက် လျှို့ဝှက်နယ်မြေထဲကို ဝင်ရောက်ကြလိမ့်မယ်။"

လေလွင့် ကျင့်ကြံသူ အများအပြား၏ မျက်လုံးများတွင် ပြင်းပြသော စိတ်အားထက်သန်မှုများ ပြည့်နှက်နေခဲ့၏။

ရိလင် လျှို့ဝှက်နယ်မြေသည် ကြီးမားသော အန္တရာယ်များကို အမှန်တကယ် သယ်ဆောင်ထားသော်ငြား၊ အတွင်းရှိ အကျိုးအမြတ်များမှာလည်း အံ့မခန်း ဖြစ်ပေသည်။ ကံကြမ္မာကို အံတုနိုင်လောက်အောင် လုံလောက်လှ၏။

ရွှေအမြုတေ အရှင်သခင်များပင်လျှင် ဤကဲ့သို့သော သွေးဆောင်ဖြားယောင်းမှုကို မခံနိုင်ကြချေ။

"မဖြစ်နိုင်တာ၊ အကယ်၍ အုတ်မြစ်တည်ဆောက်ခြင်း ကျင့်ကြံသူတွေနဲ့ ရွှေအမြုတေ ကျင့်ကြံသူတွေပါ လျှို့ဝှက်နယ်မြေထဲ ဝင်လာမယ်ဆိုရင်၊ ငါတို့က သူတို့ကို ဘယ်လို ယှဉ်ပြိုင်နိုင်မှာလဲ။"

တစ်စုံတစ်ယောက်က မနေနိုင်ဘဲ တံတွေးမြိုချကာ မေးလိုက်၏။

"တကယ်တော့ စိုးရိမ်စရာ ဘာမှမရှိပါဘူး။"

"ရိလင် လျှို့ဝှက်နယ်မြေက အဆုံးအစမရှိအောင် ကျယ်ဝန်းတယ်။"

"အထဲကို ပို့ဆောင်ခံရတာနဲ့၊ စွမ်းရည်မတူညီတဲ့ ကျင့်ကြံသူတွေကို မတူညီတဲ့ ဧရိယာ အသီးသီးဆီ သတ်မှတ် ပို့ဆောင်ပေးလိမ့်မယ်။"

"အခြေခံအားဖြင့်၊ ငါတို့လို 'ချီ' ကျင့်ကြံခြင်းအဆင့် ကျင့်ကြံသူတွေက အုတ်မြစ်တည်ဆောက်ခြင်း ကျင့်ကြံသူတွေနဲ့ ဆုံတွေ့ရဖို့ ခဲယဉ်းပါတယ်။ ရွှေအမြုတေ ကျင့်ကြံသူတွေဆိုရင်တော့ ပြောနေစရာတောင် မလိုတော့ဘူးပေါ့။"

"သူတို့တွေက ပိုပြီး နက်ရှိုင်းတဲ့ ဧရိယာတွေဆီ ပို့ဆောင်ခံရတာလို့ ကြားတယ်။"

"ငါတို့က အပြင်ဘက်ပိုင်း ဧရိယာတွေမှာ သက်သက်ပဲ ရောက်နေမှာပါ။"

တစ်စုံတစ်ယောက်က ရှင်းပြလိုက်၏။

"အကယ်၍ အဲဒီလိုသာဆိုရင် စိုးရိမ်စရာ ဘာမှမရှိတော့ဘူးပေါ့။"

လေလွင့် ကျင့်ကြံသူ အများအပြားက ခေါင်းညိတ်လိုက်ကြပြီး များစွာ စိတ်သက်သာရာ ရသွားကြ၏။ ထင်ရှားသည်မှာ သူတို့သည် ရိလင် လျှို့ဝှက်နယ်မြေသို့ မည်သို့ သွားရမည်ကို ကြိုတင် စီစဉ်ထားပြီး ဖြစ်သည်။

ရာစုနှစ် တစ်ခုတွင် တစ်ကြိမ်သာ ရနိုင်သော အခွင့်အရေးဖြစ်ရာ၊ သူတို့ မည်သို့ပင် ဖြစ်စေ လုံးဝ လက်လွှတ်ခံမည် မဟုတ်ချေ။

…

တစ်ချိန်တည်းမှာပင်၊ ကျန်းဖန်သည် ရိလင် လျှို့ဝှက်နယ်မြေနှင့် ပတ်သက်၍ သတင်းအချက်အလက် အများအပြားကို သဘာဝကျကျပင် သိရှိခဲ့ရသည်။

ဝုန်း…

မျက်တောင်တစ်ခတ် အတွင်းမှာပင်၊ သူ၏ 'မိန်' နှင့် 'ချီပင်လယ်' နက်ရှိုင်းရာရှိ နိမိတ်ဖတ်အင်း စတင် တုန်ခါလာသည်ကို သူ အာရုံခံမိလိုက်၏။

သတင်းအချက်အလက် ရေစီးကြောင်းတစ်ခုက သူ၏ အသိစိတ်ပင်လယ် နက်ရှိုင်းရာသို့ စီးဝင်လာခဲ့သည်။

"အခွင့်အရေး ရောက်လာပြီ၊ ရဲရင့်စွာ ရှေ့ဆက်ပါ။ အခွင့်အရေးကို လက်လွတ်ခံပါက၊ နှစ်တစ်ရာတိုင် နောင်တရရလိမ့်မည်။"

"ရိလင် လျှို့ဝှက်နယ်မြေသို့ တစ်ကိုယ်တော် သွားရောက်ပါ။ ပင်လယ်ထဲမှ ငါးတစ်ကောင်အလား လွတ်လပ် ပေါ့ပါးမည်၊ မင်္ဂလာနိမိတ်။"

"အခြား အုတ်မြစ်တည်ဆောက်ခြင်း ကျင့်ကြံသူများနှင့် ပူးပေါင်း၍ ရိလင် လျှို့ဝှက်နယ်မြေသို့ ဝင်ရောက်ပါက၊ အနှောင့်အယှက်များ ကြုံတွေ့ရမည်၊ မင်္ဂလာမရှိ။"

"ရိလင် လျှို့ဝှက်နယ်မြေသို့ ဝင်ရောက်ရန် ငြင်းဆန်ပါက၊ အမြတ်လည်းမရှိ၊ အရှုံးလည်းမရှိ၊ သာမန်မျှသာ။"

ရုတ်တရက် သတင်းအချက်အလက် အများအပြား ထွက်ပေါ်လာပြီး၊ အားလုံးက အနာဂတ်ကို ကြိုတင် ဟောကိန်းထုတ်နေခြင်း ဖြစ်၏။

"ဒါဆိုရင် ဒီတစ်ခေါက် ရိလင် လျှို့ဝှက်နယ်မြေ ပေါ်လာတာက တကယ်ပဲ ငါ့အတွက် အခွင့်အရေး တစ်ခုပေါ့။"

"အကယ်၍ လွတ်သွားခဲ့ရင်၊ ငါ နှစ်တစ်ရာလောက် နောင်တရနေရမှာ သေချာတယ်။"

ကျန်းဖန်၏ မျက်လုံးများတွင် အလင်းတန်းတစ်ခု လက်ခနဲ ဖြစ်သွားခဲ့၏။

အမှန်တကယ်တွင် အခွင့်အရေးများ ရရှိရန်အတွက် အန္တရာယ်ကို ရင်ဆိုင်ရမည်သာ ဖြစ်သည်။

တစ်ခါတစ်ရံတွင် အခွင့်အရေးများ ရရှိရန် သင့်လျော်သော အန္တရာယ်များကို ရယူခြင်းက တန်ကြေးရှိလှ၏။

သို့သော် အန္တရာယ်က အခွင့်အရေးထက် ပိုများနေပါက၊ ၎င်းမှာ မတန်ချေ။ သို့သော် နိမိတ်ဖတ်အင်း ပေးသော သတင်းအချက်အလက်များအရ၊ ယခုအခါ အခွင့်အရေးက အန္တရာယ်ထက် ပိုများနေသည်မှာ ထင်ရှားလှပေသည်။

အကယ်၍ ရိလင် လျှို့ဝှက်နယ်မြေထဲ ဝင်သွားပါက၊ သူ သေချာပေါက် ကြီးမားသော အကျိုးအမြတ်များကို ရိတ်သိမ်းရရှိမည် ဖြစ်၏။

အကယ်၍ လွတ်သွားပါက ဤမျှ ကောင်းမွန်သော အခွင့်အရေးကို ထပ်စောင့်ရန်အတွက် နှစ်တစ်ရာခန့် အချိန်ယူရပေလိမ့်မည်။

ထို့ကြောင့် သူ သေချာပေါက် သွားရမည်။ သို့သော် ဘယ်လိုသွားရမလဲ ဆိုတာကိုတော့ သေချာ ဂရုတစိုက် စဉ်းစားရဦးမည် ဖြစ်သည်။

"တခြားသူတွေနဲ့ ပူးပေါင်းတာက အန္တရာယ် ပိုများတယ်ပေါ့။"

"တစ်ယောက်တည်း သွားရင် လွတ်လွတ်လပ်လပ်နဲ့ ဘေးအန္တရာယ် ကင်းရှင်းမယ် ဟုတ်လား။"

ကျန်းဖန်သည် ယခင်က သတင်းအချက်အလက် နှစ်ခုကို ကြည့်ကာ မေးစေ့ကို ပွတ်သပ်လိုက်၏။

ထင်ရှားသည်မှာ အကယ်၍ သူ အခြားသော အုတ်မြစ်တည်ဆောက်ခြင်း ကျင့်ကြံသူများနှင့် ပူးပေါင်းလိုက်ပါက အနှောင့်အယှက် ခံရနိုင်ချေ ရှိသည်။ ဘေးဒုက္ခက သူ့ကို တိုက်ရိုက် ပစ်မှတ်ထားခြင်း မဟုတ်ဘဲ၊ သူ၏ အသင်းဖော်များကို ပစ်မှတ်ထားခြင်း ဖြစ်ကောင်း ဖြစ်နိုင်၏။ သူကတော့ ဘေးကနေ အလကားနေရင်း ညပ်ပါသွားပြီး ဒုက္ခရောက်ရုံ သက်သက်သာ ဖြစ်လိမ့်မည်။

သူ ပူးပေါင်းနိုင်သော အုတ်မြစ်တည်ဆောက်ခြင်း ကျင့်ကြံသူများဆိုသည်မှာ ဝေလငါးနီကျွန်းမှ သူများသာ ရှိလေသည်။ ဝေလငါးနီကျွန်းမှ အုတ်မြစ်တည်ဆောက်ခြင်း ကျင့်ကြံသူများက ရိလင် ကျွန်းစုတွင် ဘေးဒုက္ခ တစ်ခုခုနှင့် ကြုံတွေ့ရမှာများလား။

ဤသည်က မဖြစ်နိုင်စရာ အကြောင်းမရှိချေ။

မည်သို့ဆိုစေ ဤဝေလငါးနီကျွန်းမှ အုတ်မြစ်တည်ဆောက်ခြင်း ကျင့်ကြံသူများသည် ဤပင်လယ်ပြင်တွင် နက်ရှိုင်းစွာ အမြစ်တွယ်နေပြီး သူတို့၏ ဆက်ဆံရေးများက ရှုပ်ထွေးလှသည်။

လူဘယ်နှစ်ယောက်၊ အင်အားစု ဘယ်နှစ်ခုကို သူတို့ ပြစ်မှားစော်ကားခဲ့ဖူးသလဲ ဆိုတာကို သူတို့ကိုယ်တိုင်ပင် မသိနိုင်တော့ချေ။

တစ်စုံတစ်ယောက်က လက်စားချေရန် ကြိုးစားခြင်းမှာ လုံးဝကို ပုံမှန်ကိစ္စ တစ်ခုပင်။

ဤရှုထောင့်မှ ကြည့်မည်ဆိုလျှင်၊ ရိလင် လျှို့ဝှက်နယ်မြေသို့ သွားရောက်မည့် ဤစူးစမ်းလေ့လာရေး ခရီးစဉ်မှာ တစ်ယောက်တည်း သွားခြင်းကသာ ပို၍ သင့်တော်လှပေသည်။

မီးကြေးနီကျွန်းပေါ်တွင် ဆက်နေပြီး ကျင့်ကြံနေရန် ဆိုသည်မှာလည်း မဖြစ်နိုင်ချေ။ ၎င်းမှာ အမှန်တကယ် ပြဿနာကင်းနိုင်သော်ငြား၊ အကျိုးအမြတ် ဘာမှ မရနိုင်ဆိုသည့် အဓိပ္ပာယ်ပင် ဖြစ်၏။

အခွင့်အရေးကြီးက သူ့ရှေ့မှ ဖြတ်သွားသည်ကို သူ ထိုင်ကြည့်မနေချင်ပေ။ သူ၏ ကျင့်စဉ်အဆင့်ကို လျင်မြန်စွာ မြှင့်တင်ရန်အတွက် သူသည် အခွင့်အရေး အမျိုးမျိုးကို ရယူရန် လိုအပ်လှသည်။

……..