အခန်း (၅၆၉-၅၇၀)

အပိုင်း ၅၆၉ - မုန်တိုင်းပမာ တိုက်ခိုက်ခြင်း

စစ်သူကြီးချောင်သည် ခဏတာရပ်တန့်သွားပြီး အကြည့်က ဘေးနားရှိ အပြာရောင်ဝတ်စုံနှင့် ကူစုဝမ်ထံ ရောက်ရှိသွားသည်။

"ငါ သူ့ကို ပေးခဲ့တာပါ"

ကူစုဝမ်က ဤသို့ ပြောသောအခါ လူအုပ်ကြီးသည် ထူးဆန်းသော အကြည့်များ ဖလှယ်လိုက်ကြပြီး တစ်ဖက်လူမှာ အဆင့်အတန်းမြင့်လာချိန်တွင် ကြွားဝါချင်စိတ် ပြင်းပြနေသည်ဟု စဉ်းစားကာ ဤစိတ်သဘောထားမျိုးက အင်မော်တယ် လောကတွင် ချီးကျူးစရာ မဟုတ်ပေ။

မိုးကြိုးတမန်တော် မိုသည် မျက်နှာပေါ်တွင် နှိမ့်ချဟန်ပြနေသော်လည်း စိတ်ထဲတွင်မူ ရယ်မောလျက် ရှိ၏။

"မဟာစစ်သူကြီးက ချောင်ရှန်းရဲ့ နေရာကို အမြန်မြှင့်တင်ပေးချင်နေတယ်။ ဒါပေမယ့် အရမ်းတွန်းအားပေးရင် မိုးကြိုးကိုးသွယ် ဧကရာဇ်ကို ဒေါသထွက်စေလိမ့်မယ်။ အဲဒီအခါကျရင် သူရော ချောင်ရှန်းပါ အကျိုးဆက်တွေကို ခံစားရလိမ့်မယ်"

လုယောင်ဆိုသည်က မြည်းတစ်ကောင်လား မြင်းတစ်ကောင်လား ဆိုသည်မှာ မသေချာသေးဘဲ တုန်းဖန်းယုံကို အနိုင်ယူလိုက်ခြင်းသည် အဓိပ္ပာယ်မရှိပေ။ သူက မိုးကြိုးဌာန၏ အဓိက ပါရမီရှင်များနှင့် ယှဉ်ပြိုင်ရဦးမည်ဖြစ်ကာ မိုရော့ယွိသည် အကောင်းဆုံးပြိုင်ဘက်ပင်။ ထိုသို့တွေးရင်း လျှပ်စီးသခင် ပိုဟုန်သည် သူနှင့် အကြည့်ချင်းဆုံကာ ရယ်မောလိုက်ကြသည်။

"ပွဲက အခုမှ စပြီ"

ယနေ့ညတွင် မဟာစစ်သူကြီးသည် ပျော်ရွှင်နေပုံရပြီး မိုးကြိုးကိုးသွယ် ရင်ပြင်တစ်ခုလုံး၏ အာရုံစိုက်မှုက တိမ်တိုက်အမှတ် ၁၀၃ သို့ ပြောင်းလဲသွားကာ အကြည့်အားလုံး စီရင်သူ သံချပ်ကာကို ဝတ်ဆင်ထားသည့် ယွမ်ရှောင်ထံ ကျရောက်နေသည်။ ရွှေရောင်တောက်ပနေသော အဖြူရောင်ဝတ်စုံကို မိုရော့ယွိက ဝတ်ဆင်ထားပြီး ချည်တိုင်းကို ကောင်းကင်လက်နက်များ ဖန်တီးရာတွင် အသုံးပြုသည့် တန်ဖိုးကြီးသတ္တုများဖြင့် ရက်လုပ်ထားကာ အံ့မခန်းစွမ်းရည်ရှိသော သံချပ်ကာအဖြစ် ဖန်တီးထားခြင်းဖြစ်သည်။ ၎င်းနှင့်ယှဉ်လျှင် အဆင့် ၉ စီရင်သူ သံချပ်ကာသည် ရဲရင့်သောအသွင်ရှိသော်လည်း အရည်အသွေးပိုင်းတွင် အလွန်နိမ့်ကျနေသဖြင့် တိုက်ပွဲတွင် မည်သည့်အကာအကွယ်မှ ပေးစွမ်းနိုင်မည်မဟုတ်ပေ။ မိုရော့ယွိသည် အဆင့် ၇ ကောင်းကင်ကာကွယ်သူ ဖြစ်နေ၍ လျူမူနှင့် ကျင့်ကြံဆင့်တူညီပြီး အသက် ၃၀ မပြည့်တပြည့်သာ ရှိသေးသည်။ သို့သော်လည်း ရုပ်ရည်သွင်ပြင်ပိုင်းတွင်မူ မိုးကြိုးဌာန၏ ကျော်ကြားလှသော ပါရမီရှင်က အောက်စည်းသို့ ရောက်သွားပြီး ဘယ်ကမှန်းမသိ ထွက်လာသော ကြွက်တစ်ကောင်မှာ သူ့ထက်ပို၍ ချောမောနေသည်ကို ကသိကအောက်ဖြစ်နေ၏။

မိုရော့ယွိသည် မျက်ခုံး အနည်းငယ်ပင့်ပြီး ယွမ်ရှောင်၏ခါးရှိ ကျောက်စိမ်းအဆောင်များကို တစ်ချက်ကြည့်ကာ ပြောလိုက်သည်။

"ဂုဏ်ပြုပါတယ် လုယောင်။ မျက်နှာသာပေးမှုတွေကို တစ်ကမ္ဘာလုံးကို ပြောပြဖို့ မစောင့်နိုင်တော့ဘူး ထင်တယ်"

ယွမ်ရှောင်ကမူ ရိုးရှင်းစွာ ပြန်ဖြေလိုက်သည်။

"စကြရအောင်"

" မလောပါနဲ့။ ငါ့ကိုယ်ငါ အရင်မိတ်ဆက်ပါရစေ။ မိုရော့ယွိပါ၊ စစ်ဘက်ဆိုင်ရာ မိုးကြိုးတမန်တော် မိုယွမ်ရဲ့ သားဖြစ်ပြီး ခင်ဗျားမွေးစားအဖေရဲ့ တိုက်ရိုက် လက်အောက်ငယ်သား တစ်ယောက်ပါ"

"ကိုယ့်လူတွေ အချင်းချင်းပေါ့"

"ဟုတ်ပါတယ်။ ဒါကြောင့် ကျေးဇူးပြုပြီး သက်ညှာပေးလို့ ဂုဏ်သိက္ခာလေး နည်းနည်းတော့ ချန်ထားပေးပါ"

"ကောင်းပြီလေ"

ယွမ်ရှောင်က ခေါင်းညိတ်လိုက်သည်။

မိုရော့ယွိသည် သူ၏ နောက်ပြောင်မှုကို တစ်ဖက်လူ အတည်ယူလိမ့်မည်ဟု မမျှော်လင့်ထားပေ။

" ငါက လောလောဆယ် မဟာကောင်းကင် ကျောင်းတော်မှာ ပညာသင်ကြားနေပါတယ်"

"မင်းက ပါရမီရှင်ဖြစ်ရမယ်" ယွမ်ရှောင်၏ နှုတ်ခမ်းများ အနည်းငယ် တွန့်ကွေးသွားသည်။

" သာမန်ပါပဲ၊ ထည့်ပြောစရာတောင် မလိုပါဘူး"

ယွမ်ရှောင်ကို ကြည့်နေရင်း သူ၏အပြုံးက ထူးဆန်းသွားကာ ရုတ်တရက် မှတ်ချက်ချလိုက်သည်။

"မင်းက ကောင်းကင်ပျံသန်းခြင်းမြို့ကနေ လာတယ်လို့ ကြားတယ်။ အဆင့် ၉ စီရင်သူ အစ်ကိုတစ်ယောက်လည်း ရှိပြီး မင်းတို့နှစ်ယောက်က အားနည်းတဲ့ မိခင်ကို စောင့်ရှောက်နေကြတယ်လို့ ကြားတယ်။ တစ်နေ့ကျရင် သူမဆီ သွားပြီး ဂါရဝပြုချင်ပါသေးတယ်"

" သာမန် တိုက်ပွဲလေးတစ်ခုအတွက်နဲ့ ငါ့ရဲ့ ဆွေမျိုးတွေအထိ လိုက်တူးဆွထားတာလား"

မိုရော့ယွိက ခေါင်းခါလျက် ရယ်မောလိုက်သည်။

"အထင်မလွဲပါနဲ့။ မိုးကြိုးဌာနမှာ လူတိုင်းရဲ့ နောက်ခံနဲ့ အတွေ့အကြုံတွေကို ဘာမှ စုံစမ်းနေစရာ မလိုပါဘူး၊ လူတိုင်းသိပါတယ်။ မင်းအမေ ငိုတဲ့အခါ မျက်ရည်တွေက အနက်ရောင်တွေလို့ ကြားတယ်။ ဒါက တော်တော်လေး စိတ်ဝင်စားစရာကောင်းတယ်"

ယွမ်ရှောင်၏ မျက်နှာပေါ်မှ အပြုံးက တဖြည်းဖြည်း ပျောက်ကွယ်သွားကာ တစ်ဖက်လူ လေကြောရှည်နေသဖြင့် ပျင်းစရာကောင်းလာပြီဟု ခံစားလိုက်ရသည်။

" စိတ်မဆိုးပါနဲ့၊ မင်းကို ခြိမ်းခြောက်ဖို့ ရည်ရွယ်တာ မဟုတ်ပါဘူး။ ပြောချင်တာက ကြွက်တစ်ကောင်ဟာ ရွှံ့ထဲကနေ အဆောင် ဘယ်လောက်များများကို ဆွဲထုတ်လာပါစေ၊ ကပ်နေတဲ့ ရွှံ့အနံ့ကိုတော့ ဆေးကြောလို့ မရဘူးဆိုတာပါပဲ"

"မင်းက လျှာစောင်းထက်တဲ့နေရာမှာတော့ တော်တော်လေး အရည်အချင်းရှိတယ်"

သူ၏ တည်ငြိမ်မှုက အံ့မခန်းဖြစ်ကာ မည်မျှ လှောင်ပြောင်ရန်စပါစေ၊ ဒေါသမထွက်သောကြောင့် မိုရော့ယွိအတွက် ပျော်စရာမကောင်းတော့ပေ။

"ချောင်လင်မယား အသက်ရှင်လာတာ အတော်လေး သက်တောင့်သက်သာ ရှိပုံပဲ။ မွေးစားသားအနေနဲ့ ငါက နည်းနည်းလောက် လှုပ်ခတ်ပစ်သင့်တယ် မထင်ဘူးလား"

"ဒါနဲ့ သူတို့အတွက် မင်းက ဘယ်လို ပြဿနာမျိုး ဖန်တီးပေးချင်လို့လဲ"

မိုရော့ယွိက အနည်းငယ် မင်သက်သွားပြီး မေးနေစဉ် ယွမ်ရှောင်သည် ရုတ်တရက် လေထဲသို့ ထိုးတက်သွားကာ ခန္ဓာကိုယ်တစ်ခုလုံး ခရမ်းရောင် နဂါးရုန်းများ လျင်မြန်စွာ လည်ပတ်သွား၍ မျက်နှာနှင့် လည်ပင်းတွင် နဂါးကြေးခွံများအဖြစ် စုစည်းသွားသော ခဏမှာပင် မုန်တိုင်းများ စုဝေးလာရင်း မိုးကြိုးများ ဖြတ်သန်းသွားသည်။

"နှလုံးကြေကွဲသံစဉ်"

ယွမ်ရှောင်၏ရွတ်ဆိုသံက လေထဲတွင် ပဲ့တင်ထပ်သွားပြီး နက်မှောင်သော ဆံပင်ရှည်များ ဝေ့ဝဲသွားကာ ခန္ဓာကိုယ်၌ မရေမတွက်နိုင်သည့် အပြာရောင်နှင့် ခရမ်းရောင် လျှပ်စီးကြောင်းများ မိုးကြိုးနဂါးများကဲ့သို့ ဖုံးလွှမ်းသွားသည်။

ဘုန်း

ခရမ်းရောင် လျှပ်စီးများသည် ဘက်ပေါင်းစုံသို့ ပျံ့နှံ့သွားကာ တိမ်တိုက် ၁၀၃ ၏ အထက်တွင် လက်သီးဆုပ်အရွယ်ရှိ အပြာရောင်နှင့် ခရမ်းရောင် လျှပ်စီးလုံးပေါင်းများစွာ မျက်စိတစ်မှိတ်အတွင်း စုစည်းလာသည်။ တစ်ခုစီသည် နဂါးဟိန်းသံဖြင့် တုန်ခါနေပြီး လျှပ်စီးမုန်တိုင်းအတွင်း ယွမ်ရှောင်၏ လက်များသည် လျှပ်စီးလုံး အားလုံးကို ထိန်းချုပ်နေသည်။

"ဒါက ဆန်းကြယ်စွာပြန်လည်မွေးဖွားခြင်း၊ နှလုံးကြေကွဲသံစဉ်လား"

ထိုကောင်းကင်ကျင့်စဉ်၏ အမည်ကို မိုးကြိုးဌာန၏ အရာရှိများက အံ့အားသင့်စွာ အော်ဟစ်လိုက်ကြပြီး ကျောက်စိမ်းအဆောင်နှစ်ခုကို ဝတ်ဆင်ထား၍ လှောင်ပြောင်ခံခဲ့ရသော ယွမ်ရှောင်သည် ၎င်းတို့ကို ရရှိပြီးနောက် တစ်နာရီပင် မပြည့်သေးခင်မှာပင် အသုံးပြုပြနေသည်။

" ဘာတွေဖြစ်ကုန်တာလဲ"

မိုရော့ယွိ ကြောင်တောင်တောင်ဖြစ်သွားကာ အေးစက်ပြီး နတ်ဘုရားတစ်ပါးကဲ့သို့သော မိုးကြိုးမျက်လုံးများနှင့် တွေ့ဆုံသွားသည်။ နဂါးတစ်ကောင်၏ ဟိန်းသံနှင့်အတူ မိုးကြိုးမုန်တိုင်းသည် သူ့အပေါ်သို့ ၎င်း၏ဒေါသကို လွှတ်ချလာသောအခါ မိုးကြိုးပစ်ချလိုက်သည်နှင့် မခြားပေ။

ဘုန်း ဘုန်း ဘုန်း

မိုရော့ယွိကို လျှပ်စီးလုံးများက မျက်စိတစ်မှိတ်အတွင်း ဝါးမြိုသွားသောအခါ ထိတ်လန့်တကြား အော်ဟစ်ပြီး အသက်ကယ်ကျင့်စဉ် အားလုံးကို အသည်းအသန် ထုတ်သုံးလိုက်သော်လည်း ဖျက်ဆီးအားပြင်းသော မိုးကြိုးမုန်တိုင်းအောက်တွင် ထိုကြိုးစားမှုများသည် သေးသိမ်ပြီး အရာမရောက်ခဲ့ပေ။

"အား"

လေးစားသမှုခံရသော အဆင့် ၄ မိုးကြိုးတမန်တော်၏ သား၊ မဟာကောင်းကင်ကျောင်း၏ ပါရမီရှင်သည် အမှုန့်ဖြစ်သွားကာ အညှာအတာကင်းမဲ့သော မိုးကြိုးအောက်တွင် မျှော်လင့်ချက်ကင်းမဲ့စွာဖြင့် အကျည်းတန်သော နိဂုံးကို လက်ခံလိုက်ရ၏။ ခန္ဓာကိုယ်ရော ဝိညာဉ်ပါ ဖျက်ဆီးခံလိုက်ရသဖြင့် တိမ်တိုက်ပေါ်တွင် မီးလောင်ကျွမ်းထားသော အရာတစ်ခုမှလွဲ၍ မည်သည်မှ မကျန်ရစ်ခဲ့ပေ။ သို့သော် သူ ရပ်နေခဲ့သော နေရာကို လျှပ်စီးမိုးကြိုးများ ဆက်လက်တိုက်ခိုက်နေ၍ တိမ်တိုက်၏ အောက်ဘက်တွင် အပေါက်ကြီးတစ်ခု ဖြစ်သွားကာ ချုပ်တည်းထားသော ဒေါသများကို တစ်ချက်တည်း ဖောက်ခွဲလိုက်သည့်အလားပင်။ ယွမ်ရှောင်၏ ပတ်ဝန်းကျင်ရှိ မိုးကြိုးစွမ်းအားများသည် နောက်ဆုံးတွင် ငြိမ်သက်သွားကာ ဆံပင်ရှည်များ ပခုံးပေါ်သို့ ပြန်လည် ကျဆင်းပြီး မျက်လုံးများ ကြည်လင်သွားသည်။ သို့သော် မိုးကြိုးကိုးသွယ်ရင်ပြင် တစ်ခုလုံးသည် အလွန်တိတ်ဆိတ်သွားပြီး ပြိုင်ပွဲဝင်အများအပြား ကြောင်တောင်တောင် မျက်နှာထားဖြင့် နေရာတွင် အေးခဲနေကြသည်။

သူက အသက်ပြင်းပြင်း ရှူပြီး ဖြည်းညှင်းစွာ တစ်လုံးချင်း ပြောလိုက်လေသည်။

"လူတိုင်း ကြားလိုက်တယ်မလားတော့။ ခုနလေးတင် ဒီလူက ငါ့ကို ကြွက်တစ်ကောင်ဆိုပြီး လှောင်ပြောင်ခဲ့တယ်၊ ဆွေမျိုးနောက်ခံကို နှိမ့်ချခဲ့တယ်၊ အမေကို ခြိမ်းခြောက်ခဲ့တယ်၊ ဂုဏ်သိက္ခာကို နင်းချေချင်ခဲ့တယ်။ ဟုတ်ပါတယ်၊ ငါက သာမန် ဆင်းရဲသားဘဝကနေ လာတာမို့ ကိုယ့်ကိုကိုယ်ကလွဲပြီး အားကိုးစရာ ဘာမှမရှိဘူး။ ဒီအထိ ကိုယ့်ခြေထောက်ပေါ် ကိုယ်ရပ်ပြီး ရောက်လာခဲ့တာပါ။ အခု စစ်သူကြီးချောင်နဲ့ ဇနီးရဲ့ ရက်ရောတဲ့ မေတ္တာကြောင့် ငါက အိပ်မက်အတွက် တိုက်ပွဲဝင်ဖို့ ဒီစင်မြင့်ပေါ်ကို တက်လှမ်းခွင့် ရခဲ့တယ်။ သူတို့ကို အလွန် ကျေးဇူးတင်ပြီး တကယ် လေးစားပါတယ်"

"ငါတို့ရဲ့ ဇစ်မြစ်ကို ရွေးချယ်လို့ မရပေမယ့် ဘယ်လိုလူမျိုး ဖြစ်ချင်လဲဆိုတာကိုတော့ ဆုံးဖြတ်နိုင်ပါတယ်။ ပါရမီနဲ့ နောက်ခံကို ကျော်လွန်ပြီး အလိုချင်ဆုံးအရာက တရားမျှတမှုကို ကာကွယ်စောင့်ရှောက်တဲ့ စီရင်သူ တစ်ယောက် ဖြစ်ဖို့ပါပဲ။ တရားမျှတမှုနဲ့ ဖြောင့်မတ်မှုအတွက် ကြိုးပမ်းပြီး ဥပဒေကို ထိန်းသိမ်းဖို့ပါ။ ငါက အဲဒီလို ဖြောင့်မတ်တဲ့ စီရင်သူမျိုး ဖြစ်ချင်တာပဲ။ အထက်စီးမှာ နေထိုင်ပြီး အခွင့်ထူးခံရင်း တခြားလူတွေကို နှိမ့်ချတာမျိုး၊ ခြိမ်းခြောက်တာမျိုး၊ အောက်တန်းကျကျ နင်းချေတာမျိုး လုပ်ချင်တဲ့ လူစားမျိုး မဟုတ်ဘူး။ အဲဒီလို လူမျိုးတွေကို ငါ တကယ်ရွံမုန်းပြီး သူတို့နဲ့ ဘယ်တော့မှ ပတ်သက်မှာ မဟုတ်ပါဘူး။ နောက်ဆုံးအနေနဲ့ ပြောရရင် ငါ့နာမည်က လုယောင်ဖြစ်ပြီး မှားယွင်းနေတာတွေ အားလုံးကို မှန်ကန်အောင်လုပ်ဖို့ မိုးကြိုးဌာနကို လာခဲ့တာပဲ"

အပိုင်း ၅၇၀ - လူ့အဖွဲ့အစည်းကို စိန်ခေါ်ခြင်း

ယွမ်ရှောင်၏ အသံသည် မိုးကြိုး မဟာအစီအရင်မှ တဖျပ်ဖျပ်မြည်နေသော လျှပ်စီးကြောင်းများနှင့်အတူ မိုးကြိုးကိုးသွယ် ရင်ပြင် တစ်ခွင်လုံး ပဲ့တင်ထပ်သွားသည်။ အစပိုင်း စကားလုံးများက စီရင်သူ တစ်ယောက်၏ စစ်မှန်သော စိတ်ဓာတ်ကို ဖော်ပြနေသော်လည်း မှားယွင်းမှုအားလုံးကို မှန်ကန်အောင်လုပ်မည်ဆိုသည့် နောက်ဆုံး ကြေညာချက်ကမူ မာနကြီးပြီး ကြမ်းတမ်းသော သဘာဝကို ဖော်ထုတ်ပြသလိုက်ခြင်း ဖြစ်သည်။ ဤစိတ်နေသဘောထားသည် သူ၏ လွတ်လပ်ပေါ့ပါးသော အသွင်အပြင်နှင့် လုံးဝကို ဆန့်ကျင်ဘက်ဖြစ်နေကာ မျက်စိကျိန်းလောက်သော လျှပ်စီးတန်းများအကြား ပုံပန်းသဏ္ဌာန်နှင့် စိတ်ဝိညာဉ်က ပြည့်စုံစွာ ပေါင်းစပ်သွား၏။ မောက်မာသော စကားလုံးများက လူတိုင်းကို အံ့အားသင့်သွားစေခဲ့ပြီး ရင်ပြင်ထက်တွင် ပဲ့တင်ထပ်နေဆဲဖြစ်ကာ လူအများ၏ နှလုံးသားတွင် စွဲထင်သွားစေသည်။ အစတွင် ကြည့်ရှုသူပေါင်းများစွာသည် တိတ်ဆိတ်သွားကြပြီးနောက် တုံ့ပြန်မှုများ ကွဲပြားသွား၍ အချို့က တိတ်ဆိတ်စွာ နေကြပြီး အချို့က ခေါင်းခါကာ အချို့ကမူ သက်ပြင်းချကြသည်။ မိုးကြိုးဌာနတွင် ဤသို့ရဲတင်းမှုမျိုးကို ဉာဏ်ကောင်းသည်ဟု မမြင်ကြဘဲ ရန်များစေသည့် မိုက်မဲ ကလေးဆန်သော လုပ်ရပ်တစ်ခုအဖြစ်သာ မြင်ကြသည်မှာ ရှင်းလင်းလှသည်။

ကောင်းကင်ရုံးတော် ဆိုသည်မှာ ကွန်ရက်အသွင် လူ့အဖွဲ့အစည်း တစ်ခုဖြစ်ကာ ရန်များခြင်းသည် နားလည်မှုနှင့် ယုံကြည်မှုကို ဆုံးရှုံးခြင်း ဖြစ်၍ ယွမ်ရှောင်နှင့် မိတ်ဆွေဖွဲ့ရန် စဉ်းစားနေသူ မည်သူမဆို သူနှင့် ပတ်သက်မိလျှင် လူမည်မျှ ဒေါသထွက်မည် ဆိုသည်ကို တွက်ဆရတော့မည့် အနေအထားအထိပင်။ အတိုချုံးပြောရလျှင် ဤစည်းမျဉ်းကို ဆန့်ကျင်ခြင်းသည် မည်သူမဆို ဘဝတွင် အကြီးမားဆုံး အမှားတစ်ခုပင်ဖြစ်သည်။ ထိုအချိန်တွင် မိုးကြိုး စင်မြင့်ပေါ်မှ မိုးခြိမ်းသံကဲ့သို့သော ရယ်သံကြီးတစ်ခု ရုတ်တရက် ထွက်ပေါ်လာကာ မိုးကြိုးဌာန၏ သေမျိုးကိစ္စရပ်များကို တာဝန်ယူရသည့် အကြီးအကဲဖြစ်သော မဟာစစ်သူကြီး ဖြစ်နေ၏။

"ပြောတာ ကောင်းတယ်။ ဒီစကားတွေက မင်းကို အသရေဖျက်ပြီး သံသယဝင်နေတဲ့လူတွေကို ရှက်သွားစေလိမ့်မယ်"

၎င်းကိုကြားသောအခါ လူအုပ်ကြီးသည် ထပ်မံ၍ တိတ်ဆိတ်သွားပြန်ပြီး အကြည့်ချင်းဖလှယ်လိုက်ကြ၍ မျက်နှာအမူအရာများမှာ ပို၍ပင် ထူးဆန်းလာကြသည်။

"ကဲ၊ စင်ပေါ်က ဆင်းတော့"

မဟာစစ်သူကြီးက ရယ်မောလျက် လက်ကာပြလိုက်သည်။

"ကျေးဇူးတင်ပါတယ်"

ယွမ်ရှောင်က ရိုသေစွာ ဦးညွှတ်ပြီးနောက် ထူးဆန်းသော မျက်နှာထားများ ရှိသော လူပေါင်းများစွာ၏ အကြည့်အောက်တွင် ဆင်းသက်လာခဲ့သောအခါ လူအများအပြားသည် မိုးကြိုးတမန်တော် မိုယွမ် ကို တိတ်တဆိတ် လှမ်းကြည့်လိုက်မိကြသည်။

" အရေးကိစ္စတွေကို စီမံခန့်ခွဲဖို့ အိမ်ပြန်ရမှာမို့ ခွင့်ပြုပါဦး"

မိုယွမ်က တည်ငြိမ်သော မျက်နှာထားဖြင့် ပြောလိုက်ပြီး စကားပြန်မည်ကိုပင် မစောင့်တော့ဘဲ လှည့်ထွက်သွားကာ စစ်သူကြီးချောင်နှင့် ကူစုဝမ်တို့ကို တစ်ချက်ပင် မကြည့်ခဲ့ပေ။

" ကျောင်းတော်က အရေးပေါ်ကိစ္စနဲ့ ခေါ်နေလို့ ခွင့်ပြုပါဦး"

လျှပ်စီးသခင် ပိုဟုန်ကလည်း ချက်ချင်း မတ်တတ်ရပ်လိုက်သည်။

"သွားချင်ရင် သွားနိုင်ပါတယ်။ တရားဝင် လုပ်ထုံးလုပ်နည်းတွေ မလိုပါဘူး"

မဟာစစ်သူကြီးက ခွင့်ပြုသည့်အနေဖြင့် လက်ကာပြလိုက်သည်။

"ဟုတ်ကဲ့"

သူက ခေါင်းညိတ်ပြီးနောက် အရောင်သုံးမျိုး လျှပ်စီးတန်းတစ်ခုအဖြစ် ပြောင်းလဲကာ ပျောက်ကွယ်သွားသကဲ့သို့ မိုးကြိုးဌာနမှ အဆင့်မြင့် အရာရှိများစွာ လိုက်ပါသွားကြပြီး ကျန်ရစ်နေသူများမှာလည်း အနေရခက်ကုန်၏။

"ငါလည်း သွားတော့မယ်"

မဟာစစ်သူကြီးက ထိုင်ခုံမှ ထလာရင်း ပြောလိုက်သည်။

"နှုတ်ဆက်ပါတယ် မဟာစစ်သူကြီး"

ကောင်းကင် မိုးကြိုး စင်မြင့်ပေါ်ရှိ အဆင့်မြင့် အရာရှိများက မတ်တတ်ရပ်ကာ တစ်ပြိုင်နက်တည်း ပြောကာ သူ ထွက်ခွာသွားပြီးနောက် ပတ်ဝန်းကျင်လေထု လုံးဝကို အေးစက်သွားတော့သည်။

အချို့သော အရာရှိများက ထွက်ခွာသွားရင်း တီးတိုးပြောဆိုနေကြပြီး မျက်နှာပေါ်တွင် ခနဲ့သော အပြုံးများ ရှိနေကြသည်။

"ကြောက်စရာပဲ"

"သူက အဆင့် ၂ တောင် မရောက်သေးဘူး။ မှားယွင်းနေတာတွေကို အမှန်ပြင်မယ် ဟုတ်လား။ သူက ဘယ်အမှားတွေကို ပြင်ချင်တာလဲ။ မိုးကြိုးကိုးသွယ် ဧကရာဇ်ရဲ့ အမှားတွေကိုလား"

"ဟား ဟား"

စစ်သူကြီးချောင်ထံ ကြည့်လိုက်သော အကြည့်များက သူတို့၏ အထင်သေးမှုကို ရှင်းလင်းစွာ ပြသနေကာ ခဏအတွင်း အရာရှိ သုံးဆယ်ကျော်သာ ကျန်ရစ်၍ ဟိုတစ်စု ဒီတစ်စု ထိုင်လျက် မိုးကြိုးဌာန ရွေးချယ်ပွဲ ဆက်လက်ကျင်းပနေသည်ကို တိတ်တဆိတ် စောင့်ကြည့်နေကြသည်။ စစ်သူကြီးချောင်သည် ထိုင်ခုံလက်ရန်းကို တင်းကြပ်စွာ ဆုပ်ကိုင်ထားပြီး လည်ပင်းရှိ သွေးကြောများပင် ဖောင်းကား၍ ထွက်ခွာသွားသော ယွမ်ရှောင်ကိုသာ ကြည့်နေသည်။

"ချစ်ကြည်ရေး ပြိုင်ပွဲမှာ သတ်ဖြတ်ခြိမ်းခြောက်ပြီး ရန်ငြှိုးတစ်ခုကို ဖန်တီးတယ်။ သူက ငါ့ကို တမင်တကာ ရန်စနေတာလား ဒါမှမဟုတ် လူငယ်သဘာဝ မိုက်မဲတာ+သက်သက်ပဲလား"

ကူစုဝမ်၏ မျက်လုံးများသည်လည်း ဒေါသဖြင့် အေးစက်စက် တောက်ပနေသည်။

"ပထမအချက်က သူ့ရဲ့ အဓိက ရည်ရွယ်ချက်ပဲ"

"သူက ကျေးဇူးကန်းတဲ့ ကောင်လေး တစ်ယောက်တည်းတင် မဟုတ်ဘဲ မြွေဆိုးတစ်ကောင် ဖြစ်လာပြီ"

အနည်းဆုံး ကျေးဇူးကန်းသော လူတစ်ယောက်ဆိုလျှင် ပြုစုပျိုးထောင်ပေးပြီးမှ ပြန်ကိုက်မည် ဖြစ်သော်လည်း မြွေတစ်ကောင်ကို ကယ်တင်ခဲ့ပြီးနောက် ချက်ချင်း အကိုက်ခံလိုက်ရသည်။

"ငါ နားမလည်နိုင်ဘူး။ ငါတို့ သူ့အပေါ် ကောင်းခဲ့တာပဲ။ ဘာလို့ ဟန်မဆောင်ခဲ့တာလဲ။ တစ်ခုခုတော့ ရနိုင်ခဲ့တာပဲလေ"

ကူစုဝမ်က နားမလည်နိုင်စွာ မျက်မှောင်ကြုတ်လိုက်သည်။

စစ်သူကြီးချောင်၏ အသံက နက်ရှိုင်းလာပြီး လေသံ အေးစက်နေသည်။

"တော်လိုက်တော့။ ဒီကပ်ဆိုး ငါ့ဆီ ရောက်လာကတည်းက ဘာအကျိုးအမြတ်မှ မရခဲ့ဘူး။ လူတော်တော်များများနဲ့ ဆန့်ကျင်ဘက်ဖြစ်အောင် တွန်းပို့ခံခဲ့ရတာပဲ ရှိတယ်။ သူက ပြဿနာကောင်ဆိုရင်တော့ နောက်ကျမှ ရှင်းမယ့်အစား စောစောစီးစီး သတ်ပစ်လိုက်ကြစို့။ ပြီးရင် သူ့ဝိညာဉ်ကို မိုယွမ်ရဲ့ အိမ်တော်ဆီကို ပို့ခိုင်းလိုက်"

"ငါတို့ မြန်မြန်လုပ်မှ ဖြစ်မယ်"

ကူစုဝမ်က တုံ့ပြန်သည်။

"အစီအစဉ်တွေ စလိုက်တော့"

စစ်သူကြီးချောင်က မိုယွမ်ကို ကြောက်နေခြင်း မဟုတ်ဘဲ မိုးကြိုးဌာနမှ အဆင့်မြင့် အရာရှိ ၆၀ ကျော် ထွက်ခွာသွားခြင်း၏ နောက်ဆက်တွဲ ဆိုးကျိုးများကိုသာ ကြောက်ရွံ့နေခြင်း ဖြစ်သည်။

"မဟာစစ်သူကြီး မတိုင်ခင် ထွက်သွားတဲ့သူတွေက ငါ့ကို ဆန့်ကျင့်ပြီး ပြင်းပြင်းထန်ထန် သတိပေးလိုက်တာပဲ။ သူ့နောက်မှ ထွက်သွားတဲ့သူတွေကလည်း ငါတို့အပေါ် စိတ်ပျက်သွားကြပြီ"

စစ်သူကြီးချောင်၏ မျက်လုံးများထဲတွင် လူသတ်လိုစိတ်တစ်ခု ဖြစ်ပေါ်လာသည်။ ရွေးချယ်မှုအတွင်း သာမန် လူတစ်ယောက်ကို သတ်ဖြတ်လိုက်လျှင် ပြဿနာ မကြီးသော်လည်း မိုးကြိုးဌာန၏ အရာရှိ ၁၀၀ အနက် တစ်ဦး၏ သားကို ပေါ်ပေါ်ထင်ထင် သတ်ဖြတ်ခြင်းသည် အတွင်းရေးပဋိပက္ခများကို တားမြစ်ထားသည့် ပြောစရာမလိုသော သဘောတူညီချက်ကို ချိုးဖောက်လိုက်ခြင်းပင်ဖြစ်၏။ အထူးသဖြင့် အရာရှိ အချင်းချင်း၏ သားသမီးများကို အန္တရာယ်ပြုသည့် လုပ်ရပ်မျိုးကို မည်သူမျှ မလုပ်ကြပေ။ ထိုသို့လုပ်မိလျှင် သူသေကိုယ်သေ ရန်ငြိုးတစ်ခုကို ဖြစ်ပေါ်စေပြီး မိုးကြိုးကိုးသွယ် ဧကရာဇ်သည်ပင် ဤအရာကို အကြီးမားဆုံး တားမြစ်ချက်အဖြစ် သတ်မှတ်ထားသည်။ ထို့ကြောင့် ဤ ပြဿနာမျိုးကို ဖန်တီးသူမှာ သွေးသားရင်းချာ ဖြစ်နေလျှင်ပင် စစ်သူကြီးချောင်သည် ဆွေမျိုးများထက် အရာရှိဆက်ဆံရေးကို ဦးစားပေးရန် စဉ်းစားပေလိမ့်မည်။ တိတ်တဆိတ် ဆန္ဒပြနေသော လူများက ယွမ်ရှောင်ကို ပစ်မှတ်ထားနေခြင်း မဟုတ်ဘဲ သူ့ကို အမှားများ ပြင်ဆင်ပြီး နောင်တရစေရန် ရည်ရွယ်ကာ ဤနည်းအတိုင်း ဆက်သွားနေမည်ဆိုပါက တန်ဖိုးတစ်ခု ပေးဆပ်ရပေလိမ့်မည်။

မြို့စားကျန်းက လက်ရှိတွင် ချွေးများ ရွှဲရွှဲစိုနေကာ ယွမ်ရှောင်၏ အနောက်မှ တည်းခိုဆောင်သို့ လိုက်သွားခဲ့သည်။

"လုယောင်၊ ငါတို့ စကားပြောဖို့ လိုတယ်"

"မြို့စားကျန်း၊ ဘာကိစ္စရှိလို့လဲ"

မြို့စားကျန်းသည် အနီးသို့ လျှောက်လာကာ သူ၏လက်ကို ဆုပ်ကိုင်လျက် စကားလုံးတိုင်းကို အလေးအနက်ထားကာ ဖြည်းညှင်းစွာ ပြောလိုက်သည်။

"မင်းရဲ့ လုပ်ရပ်က ဘယ်လောက်တောင် မိုက်မဲတယ်ဆိုတာ တကယ် မသိတာလား"

ယွမ်ရှောင်က ရယ်မောလိုက်သည်။

"ခင်ဗျားက ချဲ့ကားနေတာပါ။ စိတ်ချပါ၊ ဘာမှမဖြစ်ပါဘူး"

သူသည် ဂရုမစိုက်ဟန်ပြနေသော ယွမ်ရှောင်ကို ကြည့်ပြီး လည်ချောင်းထဲတွင် ကျောက်တုံးကြီး တစ်တုံး ပိတ်ဆို့နေသကဲ့သို့ ခံစားလိုက်ရကာ စကားတစ်ခွန်းမျှပင် မဟနိုင်တော့ပေ။ ပြင်းပြင်းထန်ထန် ပြောဆိုငေါက်ငမ်းချင်ခဲ့သော်လည်း သမီးဖြစ်သူထံမှ ကြားခဲ့ရသော စိတ်အနှောင့်အယှက်ဖြစ်ဖွယ် သတင်းကို မှတ်မိသွားသော စိတ်ပျက်မှုများကြောင့် ရူးချင်သလိုလိုပင် ဖြစ်သွား၏။ သူနှင့် ယွမ်ရှောင်သည် ခွဲခြား၍မရအောင် ဆက်စပ်နေပြီဖြစ်ကာ အကယ်၍ စစ်သူကြီးချောင်က ဤကိစ္စကို ဒေါသထွက်သွားလျှင် မြို့စားကျန်းမှာ ပထမဆုံး ကျဆုံးရပေလိမ့်မည်။

"အဆင့် ၄ နဲ့ အထက် မိုးကြိုးဌာန အရာရှိတိုင်းရဲ့ နောက်ကွယ်မှာ မျိုးဆက်ပေါင်းများစွာ ကျောထောက်နောက်ခံ ရှိတယ်။ တစ်ယောက်ချင်းစီရဲ့ နောက်ကွယ်မှာ အဆက်အသွယ်တွေက မင်းစဉ်းစားနိုင်တာထက် အများကြီး ပိုကျယ်ပြန့်တယ်။ ကောင်းကင်ရုံးတော် ဆိုတာ တစ်ဦးချင်းစီ သက်သက် မဟုတ်ဘူး၊ အဲဒါက ဧရာမ အာဏာကွန်ရက်ကြီးတစ်ခုဖြစ်ပြီး စည်းမျဉ်းတွေကို ချိုးဖောက်၊ သတ်ဖြတ်ပြီးတော့ မိုးကြိုးဌာနတစ်ခုလုံးကို ရဲရဲတင်းတင်း ခြိမ်းခြောက်လိုက်တဲ့အတွက် မင်းကိုယ်မင်း အန္တရာယ်ဖြစ်စေရုံတင် မကဘူး။ မင်းနဲ့ ပတ်သက်နေတဲ့လူတိုင်းကိုပါ အန္တရာယ်ဖြစ်စေလိမ့်မယ်။ မင်းအမေ၊ လျူမူမူ၊ မင်းအစ်ကိုနဲ့ ကောင်းကင်ပျံသန်းခြင်းမြို့ တော်က လူအားလုံး ပါဝင်တယ်"

ယွမ်ရှောင်က တောင်းပန်သည့် မျက်နှာဖြင့် မေးလိုက်သည်။

" အဲဒီလောက်တောင် ဆိုးရွားသွားတာလား။ တောင်းပန်ပါတယ်၊ အဲဒီအချိန်က ဒေါသထွက်နေတာနဲ့ ဒါတွေအားလုံးကို မစဉ်းစားမိလိုက်ဘူး"

ထိုစကားကိုကြားသောအခါ မြို့စားကျန်းသည် မိုးကြိုးပစ်ချခံလိုက်ရသကဲ့သို့ ယွမ်ရှောင်အား ကြည့်ပြီး မင်သက်သွားခဲ့သည်။

"ဒါပေမယ့် ခင်ဗျားက ကျုပ်ကို ခြောက်လှန့်နေတာ မဟုတ်လား။ မိုးကြိုးဌာန တစ်ခုလုံးကို ဘယ်မှာ စိန်ခေါ်ခဲ့လို့လဲ။ ဖြောင့်မတ်ပြီး တရားမျှတတဲ့ စီရင်သူ တစ်ယောက် ဖြစ်ဖို့ ရည်ရွယ်တယ်လို့ပဲ ပြောခဲ့တာလေ။ အဲဒါက မိုးကြိုးဌာန တစ်ခုလုံးကို စိန်ခေါ်ရာ ရောက်သွားလို့လား"

"..."

မြို့စားကျန်း ဘာပြောရမှန်းမသိအောင် ဖြစ်သွား၏။

ယွမ်ရှောင်က သူ၏ပခုံးကို ပုတ်ကာ ရယ်မောလိုက်သည်။

"စိတ်အေးအေးထားပါ။ မွေးစားအဖေက နွေရာသီ မိုးကြိုး မြို့စား။ အဲဒီကောင်ကို သတ်လိုက်တာက ကြက်တစ်ကောင်ကို သတ်လိုက်သလိုပါပဲ။ ခင်ဗျားက အရမ်းကို စိတ်ပူလွန်းနေပြီ။ မွေးစားအဖေက သာမန် အဆင့် ၄ ကောင်းကင်အရာရှိ တစ်ယောက်ကို ကြောက်မှာလား။ ခင်ဗျားလည်း အဆင့် ၄ ပဲလေ။ ပြောချင်တာက ခင်ဗျားရဲ့သမီးကို သတ်လိုက်ရင်တောင် ပြဿနာကြီးကြီးမားမား မဖြစ်ဘူး မလား"

"တော်ပြီ၊ ထပ်မပြောနဲ့တော့"

မြို့စားကျန်းက သက်ပြင်းချကာ သူနှင့် ချောင်ရှန်းတို့ ပြဿနာကြီးကြီးမားမား တက်နေကြောင်း သဘောပေါက်သွားသည်။

"နေပါဦး"

ယွမ်ရှောင်က ရုတ်တရက် လှမ်းခေါ်လိုက်သည်။

"ဘာကိစ္စလဲ"

ထွက်သွားရန် ပြင်နေသော ကျန်းထိုက်ပင်းက နောက်လှည့်ကြည့်ကာ ခပ်ပြတ်ပြတ် မေးလိုက်သည်။

"ခင်ဗျားရဲ့ သမီးတွေကို ကျုပ်အခန်းဆီ လွှတ်လိုက်"

မိုးကြိုးကိုးသွယ် ရင်ပြင်တွင် ဒုတိယအဆင့် ရွေးချယ်ပွဲကို ဆက်လက် ဆောင်ရွက်နေကာ ယှဉ်ပြိုင်သူ အရေအတွက် နည်းပါးလာပြီး လုပ်ငန်းစဉ် အရှိန်အဟုန် မြန်ဆန်လာ၏။ ယွမ်ရှောင်နှင့် မဟာစစ်သူကြီး ထွက်ခွာသွားပြီးနောက် မိုးကြိုးဌာန၏ အဆင့်မြင့် အရာရှိ ၁၀၀ အနက် အနည်းငယ်သာ ကျန်ရစ်သော်လည်း အချင်းချင်း တီးတိုးပြောဆိုနေကြလေသည်။

"ဒီတစ်ခေါက် စစ်သူကြီးချောင်ကို လူတော်တော်များများ မကျေနပ်ကြောင်း ပြခဲ့တယ်လို့ ကြားတယ်"

"ဘယ်လောက်ပဲ ပါရမီရှိရှိ၊ ဉာဏ်မကောင်းရင်လည်း အဲဒါက ဆိုးတာပဲ"