အွန်လိုင်းဂိမ်းကစားနေကြသော အင်မော်တယ်ဧကရာဇ်များ

ဒီ "ထာဝရ စင်မြင့်" စမ်းသပ်ပွဲကို ထန်ထျန်း တော်တော်လေး စိတ်ဝင်စားနေမိသည်။

အဓိကကတော့ ဒါက အသစ်အဆန်းဖြစ်နေလို့ပင်။ ဒီလိုမျိုး ယှဉ်ပြိုင်တဲ့နည်းလမ်းကို သူ ပထမဆုံးအကြိမ် ကြားဖူးခြင်း ဖြစ်သည်။

သမိုင်းတစ်လျှောက် တကယ်ရှိခဲ့တဲ့ အဲဒီပါရမီရှင်တွေက ဘယ်လိုမျိုး ပြိုင်ဘက်ကင်းတဲ့ အော်ရာ တွေ ရှိမလဲဆိုတာကိုလည်း သူ တော်တော်လေး သိချင်နေမိသည်။

အထူးသဖြင့် နောက်ဆုံးတစ်ယောက်ဖြစ်တဲ့ "ထာဝရ ပြိုင်ဘက်ကင်း" ဆိုတဲ့ ဘွဲ့ထူးကို ရဖို့အတွက် ဘယ်သူကများ အရည်အချင်း ပြည့်မီမှာလဲ

ထန်ထျန်းက သူနဲ့ တွေ့ဆုံရမှာကို အလွန် မျှော်လင့်နေသည်။

ရှင်းဟယ် အင်မော်တယ်ဧကရာဇ်နဲ့ စာပို့ ပြီးနောက် နောက်ဆုံးမှာတော့ နတ်ဘုရားသားတော် စမ်းသပ်ပွဲ ကျင်းပမယ့်နေရာကို ထန်ထျန်းကို ပြောပြခဲ့သည်။

အဲဒါကတော့ တားမြစ် ရုပ်တု ရဲ့ အတွင်းထဲမှာပဲ ဖြစ်သည်။

မြင့်မြတ်သားတော်တွေ အထဲကို ဝင်သွားပြီးတာနဲ့ တစ်ယောက်ချင်းစီဟာ သီးခြားစီဖြစ်တဲ့ ထာဝရ စင်မြင့်တစ်ခုစီထဲကို ရောက်သွားကြမှာဖြစ်ပြီး သမိုင်းဝင် ပါရမီရှင်တွေနဲ့ ငါးပွဲ တိုက်ခိုက်ရမှာ ဖြစ်သည်။

နောက်ဆုံး ဗိုလ်လုပွဲကျမှသာ တစ်ယောက်နဲ့တစ်ယောက် တရားဝင် ဆုံတွေ့ကြမှာ ဖြစ်သည်။

ဒါကြောင့် ဒီစမ်းသပ်ပွဲမှာ မြင့်မြတ်သားတော်တွေအချင်းချင်း တိုက်ရိုက် ထိပ်တိုက်တွေ့တာမျိုး သိပ်မရှိလှပေ။

ဒါပေမဲ့ ကြည့်ရတာတော့ တော်တော်လေး စိတ်ဝင်စားဖို့ကောင်းတယ်လို့ ရှင်းဟယ် အင်မော်တယ်ဧကရာဇ်က ထန်ထျန်းကို ပြုံးလျက် ပြောပြခဲ့သည်။ အဘယ်ကြောင့်ဆိုသော် လူတိုင်းက ထာဝရ စင်မြင့်ကို သဘောကျကြသည်။ အကြောင်းမှာ သမိုင်းဝင် ပါရမီရှင်များစွာ ပေါ်ထွက်လာတာကို မြင်တွေ့ရနိုင်သလို သူတို့ရဲ့ မြင့်မြတ်သားတော်တွေနဲ့ အဲဒီလူတွေကြားက ကွာဟချက်ကိုလည်း အတိုင်းသား မြင်တွေ့နိုင်သောကြောင့် ဖြစ်သည်။

နတ်ဘုရားသားတော် နေရာကို အဆုံးအဖြတ်ပေးပြီးတာနဲ့ ကောင်းကင်ထိပ်ဆုံးရဲ့ တံခါးတွေက သူ့အတွက် ပွင့်လာမှာဖြစ်ပြီး အချိန်မရွေး ပျံတက်သွားနိုင်ပြီ ဖြစ်သည်။

ထို့နောက် ရှင်းဟယ် အင်မော်တယ်ဧကရာဇ်က အခြားသော အသေးစိတ် အချက်အလက်များကို ပြောကြားပြီးနောက် စာပို့ခြင်း ကို အဆုံးသတ်လိုက်သည်။

ထန်ထျန်းသည် ချင်းရွှီခြံဝင်းထဲတွင် ထိုင်ရင်း အသက်ကို ပြင်းပြင်းတစ်ချက် ရှူလိုက်သည်။

သူ့ရဲ့ ခန့်မှန်းချက်တွေကို သက်သေပြရမယ့် အချိန်က မကြာခင် ရောက်တော့မည်။

သူနဲ့ ကြောင်လေးရဲ့ ဆုံးဖြတ်ချက်က မှန်ကန်ပါစေလို့ သူ မျှော်လင့်မိသည်။

........

နောက်တစ်နေ့ နေထွက်လာတဲ့အခါမှာတော့ ထန်ထျန်းက တောင် အနောက်ဘက် တားမြစ်နယ်မြေရှိရာ အရပ်ဆီသို့ ပျံသန်းသွားခဲ့သည်။

ခြေဖဝါးအောက်က တိမ်တိုက်ထျန်းဖူနန်းတော် တစ်ခုလုံးမှာ ပျော်ရွှင် သံတွေနဲ့ ပြည့်နှက်နေသည်။ တစ်ကမ္ဘာလုံးကို စုစည်းနိုင်တဲ့ အောင်ပွဲခံပွဲက နန်းတော် အဆင့်မြင့် အကြီးအကဲ တွေအတွက်တင် မဟုတ်ဘဲ လူတိုင်းအတွက် ပျော်ပွဲရွှင်ပွဲ အချိန်အခါ ဖြစ်သည်။

ပြန်လည် တည်ဆောက်ပြီးစီးသွားတဲ့ ကျင့်ကြံခြင်း ကွင်းပြင် လေးခုကို ဖြတ်ကျော်ပြီးနောက် ထန်ထျန်း တောင် အနောက်ဘက်သို့ ရောက်ရှိလာခဲ့သည်။

ထို့နောက် သူက ကောင်းကင်ယံမှ ဆင်းသက်ကာ လမ်းလျှောက် ဝင်သွားခဲ့သည်။

ဒီတစ်နှစ်ခွဲအတွင်းမှာ သူ ဒီနေရာကို လာခဲ့တာ မနည်းတော့တဲ့အတွက် လမ်းကို ကျွမ်းကျင်နေပြီ ဖြစ်သည်။

မကြာခင်မှာပဲ သူက ရေတိမ်တောင်ကြားလေးတစ်ခုထဲသို့ ရောက်လာခဲ့သည်။

ဒီနေရာမှာ ပန်းမာန်တွေ အနှံ့အပြား ပွင့်လန်းနေပြီး ရေပေါ်အဆောင်တွေ၊ အနားယူရာ နေရာတွေနဲ့ ပြည့်နှက်နေကာ တကယ့်ကို လောကပြင်ပ အေးချမ်းတဲ့ နေရာလေးတစ်ခု ပင် ဖြစ်သည်။

ဒီနေရာရဲ့ အမည်က "နေဝင်တောင်ကြား" ဖြစ်ပြီး တိမ်တိုက်ထျန်းဖူနန်းတော် ကနေ အနားယူသွားကြတဲ့ အကြီးအကဲဟောင်းတွေ အေးအေးဆေးဆေး နေထိုင်အပန်းဖြေကြတဲ့ နေရာဖြစ်သည်။

ထန်ထျန်း ဝင်သွားလိုက်တာနဲ့ အသံတစ်ခု ထွက်ပေါ်လာသည်။

"ဟိုး... သခင်လေးထန် လာပြီဟေ့"

"မြန်မြန်... အထဲကို ကြွပါ ကြွပါ"

ဒါကတော့ ဆံပင်နဲ့ မုတ်ဆိတ်ဖြူဖွေးနေတဲ့ အင်မော်တယ်ဧကရာဇ် အိုကြီးတစ်ယောက် ဖြစ်သည်။

ထန်ထျန်းက သူနဲ့ အကြိမ်အနည်းငယ် ဆုံဖူးသည်။ ဒီအင်မော်တယ်ဧကရာဇ်သည် ငယ်စဉ်အခါက တိမ်တိုက်ထျန်းဖူနန်းတော် မှာ အရေးပါတဲ့ ရာထူးကို တာဝန်ယူခဲ့ဖူးသလို ရှေးဟောင်းစစ်မြေပြင် မှာ တိုက်ပွဲဝင်ခဲ့တဲ့ အဓိက ပုဂ္ဂိုလ် တစ်ဦးလည်း ဖြစ်သည်။ နောက်ပိုင်းမှာ ဒဏ်ရာတွေကြောင့်သာ စောစောစီးစီး အနားယူခဲ့ရခြင်း ဖြစ်သည်။

သူ့ရဲ့ စရိုက်က အလွန် ပွင့်လင်းလွန်းလှပြီး အကြိမ်အနည်းငယ် စကားပြောပြီးတာနဲ့ ထန်ထျန်းရဲ့ ပခုံးကို ဖက်ကာ ညီအစ်ကိုတွေလို ပေါင်းနေတော့သည်။

"ယောင်ယွီ အင်မော်တယ်ဧကရာဇ်... ကျန်းမာရဲ့လား"

ထန်ထျန်းက ပြုံးလျက် လက်သီးဆုပ် နှုတ်ဆက်လိုက်သည်။

ယောင်ယွီ အင်မော်တယ်ဧကရာဇ်က ဟားတိုက်ရယ်မောကာ "စိတ်ချပါ၊ မသေသေးပါဘူး"

"ငါက အခု မြေကြီးထဲ ခြေတစ်ဖက် ဝင်နေပြီလို့ မင်း ထင်နေမှာပေါ့။ ဒါပေမဲ့ ' အင်မော်တယ် ရှာဖွေခြင်း ' ဂိမ်းထဲမှာတော့ ငါတို့ တိုက်ခိုက်ရေးအဖွဲ့ က ဒုတိယ အကြီးဆုံး ဖြစ်နေပြီ။ 'ကျန့်ဟွမ်း တောင်' က ကောင်စုတ်တွေနောက်မှာပဲ ရှိတော့တာ"

"နေဦး... မကြာခင် ငါ သူတို့ကို အပြတ်ရှင်းပြီး ပထမနေရာကို လုယူပြမယ်"

သူက မျက်နှာမှာ သွေးရောင်တွေ လွှမ်းနေပြီး လက်ဟန်ခြေဟန်နဲ့ တက်ကြွစွာ ပြောနေတော့သည်။

ထန်ထျန်း : ...

" အင်မော်တယ် ရှာဖွေခြင်း " ဆိုတာက သူ ဟင်းလင်းပြင်နယ်မြေထဲမှာ ရှောင်ကျိ ကို တည်ဆောက်ခိုင်းထားတဲ့ အကြီးစား ပုံရိပ်ယောင် ဂိမ်းတစ်ခု ဖြစ်သည်။

လက်တွေ့လောကကို တစ်ပုံစံတည်း ပြန်လည် တည်ဆောက်ထားပြီး အစစ်အမှန် ခံစားချက်က ၁၀၀ ရာခိုင်နှုန်း ရှိသည်။ ပါဝင်တဲ့ အကြောင်းအရာတွေက အလွန်စုံလင်ပြီး မွန်းစတား အမျိုးအစားတွေကလည်း အဆုံးမရှိပေ...

ဒီဂိမ်းကို စတင် တည်ဆောက်တုန်းက ထန်ထျန်းကလည်း စိတ်ကူးပေါက်လို့ ခဏတဖြုတ် လုပ်လိုက်တာပင်။

ဒါပေမဲ့ ဒီဂိမ်းက လူတွေရဲ့ အကြီးအကျယ် စိတ်အားထက်သန်မှုကို ရလိမ့်မယ်လို့ သူ မထင်ခဲ့မိပေ ။

အထူးသဖြင့် အရင်က တိုက်ပွဲဝင်ခဲ့တဲ့ ဂုဏ်သိက္ခာတွေကို တမ်းတနေတတ်တဲ့ ယောင်ယွီ အင်မော်တယ်ဧကရာဇ်လို စစ်တိုက်ဝါသနာပါသူတွေအတွက်တော့ ဒီဂိမ်းက တကယ့်ကို စွဲလန်းစရာကြီး ဖြစ်နေတော့သည်။

နေ့မအိပ် ညမအိပ် ဂိမ်းထဲမှာပဲ အချိန်ကုန်ပြီး အပြတ်အသတ် သတ်ဖြတ်နေကြသည်။

မြေအောက်ခန်း ၊ အဆင့် တက်အောင်လုပ်တာ၊ တိုက်ခိုက်ရေးအဖွဲ့ ဖွဲ့တာ၊ နယ်မြေလုတာ... ဘယ်နေရာမဆို ရှေ့ဆုံးက ပါနေကြသည်။

ယခု ယောင်ယွီ အင်မော်တယ်ဧကရာဇ်ကို ကြည့်ရင်း ထန်ထျန်းရဲ့ စိတ်ထဲမှာ ဆံပင်ဖရိုဖရဲနဲ့ အင်တာနက်ဆိုင်မှာထိုင်ပြီး ခေါက်ဆွဲခြောက်သောက်နေတဲ့ ပုံရိပ်တစ်ခု ပေါ်လာမိသည်။ ဒါက တကယ်ကို မလိုက်ဖက်လှပေ။

ဒါပေမဲ့လည်း သူတို့အနေနဲ့ ဟင်းလင်းပြင်နယ်မြေထဲမှာ သူတို့ရဲ့ "ဒုတိယ နွေဦး" ကို ပိုင်ဆိုင်ခွင့်ရတာဟာ ကောင်းတဲ့ကိစ္စတစ်ခုပါပင်။

"သွားကြစို့၊ ထိုက်ယန် နဲ့ တခြားလူတွေက မင်းကို စောင့်နေကြပြီ။"

ယောင်ယွီ အင်မော်တယ်ဧကရာဇ်က ပြောလိုက်သည်။

ထို့နောက် ယောင်ယွီ အင်မော်တယ်ဧကရာဇ်ရဲ့ ဦးဆောင်မှုနဲ့ ထန်ထျန်းက အဆောင်တစ်ခုဆီသို့ ရောက်လာခဲ့သည်။

လူကို မမြင်ရသေးခင်မှာတင် အထဲက ဆူညံနေတဲ့ ဆွေးနွေးသံတွေကို သူ ကြားလိုက်ရသည်။

သေချာ နားထောင်ကြည့်လိုက်တော့ သူတို့ ပြောနေတာတွေက " အင်မော်တယ် ရှာဖွေခြင်း " ဂိမ်းအကြောင်းတွေ ဖြစ်နေသည်။

အထဲကို ဝင်သွားလိုက်တော့ ဆံပင်ဖြူ အဘိုးအို တစ်ဒါဇင်ခန့်က စုဝေးပြီး လက်ဟန်ခြေဟန်နဲ့ အားပါးတရ ဆွေးနွေးနေကြသည်။

လူချစ်လူခင်ပေါများတဲ့ ထိုက်ယန် အင်မော်တယ်ဧကရာဇ်ကတော့ ဘေးနားမှာ ဆောင့်ကြောင့်ထိုင်ပြီး တခြားလူတွေ ရှင်းပြနေတာကို ငယ်ငယ်တုန်းက အကြီးအကဲတွေ တာအို ဟောတာကို နားထောင်နေသလိုမျိုး အသေအချာ နားထောင်နေသည်။

"ထိုက်ယန်ကလည်း ငါတို့ တိုက်ခိုက်ရေးအဖွဲ့ထဲ ဝင်ချင်နေတာလေ။ ဒါပေမဲ့ သူက အခုမှ စ ကစားတာဆိုတော့ ငနု ပဲ ရှိသေးတယ်"

"ငါတို့ အဖွဲ့က ထူးချွန်တဲ့သူတွေကိုပဲ လက်ခံတာ၊ ဘယ်သူမဆို ဝင်လို့ရတာ မဟုတ်ဘူး။ သူ ကြိုးစားဦးမှ ရမယ်"

ယောင်ယွီ အင်မော်တယ်ဧကရာဇ်က ရယ်မောရင်း ပြောလိုက်သည်။

ထန်ထျန်းမှာ ဘာပြောရမှန်း မသိတော့ပေ။

တစ်ချိန်က နန်းတော်သခင်ဟောင်းကြီးက အခုတော့ ဂိမ်းထဲမှာ ငနု လေး ဖြစ်နေရတယ်တဲ့...

ဒါပေမဲ့ ထိုက်ယန် အင်မော်တယ်ဧကရာဇ်ကတော့ တော်တော်လေး ပျော်နေပုံရသည်။ တခြားလူတွေရဲ့ လှောင်ပြောင်မှုကို ခံနေရပေမဲ့လည်း နှိမ့်ချပြီး နည်းနာတွေ မေးမြန်းနေသည်။

"မဆူကြနဲ့တော့၊ ထန်ထျန်း လာပြီဟေ့"

ယောင်ယွီ အင်မော်တယ်ဧကရာဇ်က အသံကျယ်ကြီးနဲ့ အော်လိုက်သည်။

အားလုံးက လှည့်ကြည့်လိုက်ပြီး ထိုက်ယန် အင်မော်တယ်ဧကရာဇ်ကို ပစ်ထားခဲ့ကာ ထန်ထျန်းဆီကို ဝိုင်းအုံလာကြသည်။

ထို့နောက် သူတို့က အလွန် ခက်ခဲနက်နဲတဲ့ မေးခွန်းတွေကို အလုအယက် မေးကြတော့သည်။

"ထန်ထျန်း... အဲဒီ 'ကောင်းကင် နန်းတော်ဝင်္ကပါ' မြေအောက်ခန်း ကို ဘယ်လိုကြီး ဒီဇိုင်းဆွဲထားတာလဲကွာ၊ ငါတို့ အကြိမ်ပေါင်း ရာနဲ့ချီ စမ်းကြည့်တာတောင် ထွက်ပေါက် မတွေ့ဘူး"

"ထန်ထျန်း... 'နတ်ဘုရားဘုံ အရှင်သခင်' ရဲ့ အားနည်းချက်က တကယ်တော့ ဘာလဲဟ ငါတို့ အဖွဲ့လိုက် အသတ်ခံရတာ အကြိမ်ပေါင်း ဆယ်ဂဏန်းမကတော့ဘူး"

"ထန်ထျန်း... 'မြောင်ယင် ' ကို အခု နတ်ဘုရားကျောင်းက ဖမ်းသွားပြီ၊ ငါ ကယ်နေတုန်းပဲ။ မင်း သူ့ကို တစ်ခုခု အစော်ကားခံရအောင် မလုပ်နဲ့နော်၊ မဟုတ်ရင် ငါ မင်းကို တကယ် စိတ်ဆိုးမှာ"

"ထန်ထျန်း..."

မေးခွန်းတွေကို ကြားနေရတဲ့ ထန်ထျန်းမှာ ခေါင်းကွဲ မတတ်ပါပင်။

ရိုသေလေးစားအပ်တဲ့ ဒီအင်မော်တယ်ဧကရာဇ် အိုကြီးတွေဟာ အခုလို ဂိမ်းစွဲနေတဲ့သူတွေ ဖြစ်သွားလိမ့်မယ်လို့ သူ မထင်ခဲ့မိပေ။

ဒါပေမဲ့ သူတို့ကို လမ်းညွှန်ချက် ပေးဖို့ဆိုတာတော့ မဖြစ်နိုင်ပေ ။

ကိုယ်တိုင် ပဟေဠိတွေကို ဖြေရှင်းတာ၊ လူကယ်တာ၊ ခက်ခဲတဲ့ ဘော့စ် တွေကို သတ်တာကမှ တကယ့် အဓိပ္ပာယ်ရှိတဲ့ အရာတွေ မဟုတ်လား။

တကယ်တော့ ထန်ထျန်း ကိုယ်တိုင်လည်း သူတို့ ပြောနေတာတွေက ဘာလဲဆိုတာ သေချာ မသိပေ ။ ဘာလို့လဲဆိုတော့ သူက " အင်မော်တယ် ရှာဖွေခြင်း " ရဲ့ တည်ဆောက်ရေးပိုင်းကိုပဲ အဓိက ကိုင်တွယ်ခဲ့တာ ဖြစ်ပြီး ကိုယ်တိုင် တစ်ခါမှ မကစားဖူးတာကြောင့် သူတို့ ပြောတဲ့အရာတွေကို ဘယ်သူက သိမှာလဲ...

ခဏမျှ ဆူညံသွားပြီးနောက် ရှင်းဟယ် အင်မော်တယ်ဧကရာဇ် ရုတ်တရက် ရောက်လာမှသာ ထန်ထျန်းက လွတ်မြောက်သွားတော့သည်။

ထန်ထျန်းက သက်ပြင်းအရှည်ကြီး ချလိုက်ပြီး "တော်သေးတာပေါ့ မင်း ရောက်လာလို့။"

"ဒီ အင်မော်တယ်ဧကရာဇ် အိုကြီးတွေက တကယ်ကို ကြောက်ဖို့ကောင်းတာပဲ။ သူတို့ ငယ်ငယ်တုန်းကလည်း ဒီလောက်အထိ ရူးသွပ်ခဲ့ကြတာလား"

ရှင်းဟယ် အင်မော်တယ်ဧကရာဇ်က ပြုံးလျက် "ဒါက ကောင်းတဲ့ ကိစ္စပဲ မဟုတ်လား"

"ငါ သူတို့ကို သိလာတဲ့ အချိန်ကစပြီး တစ်ခုခုကို ဒီလောက်အထိ တက်တက်ကြွကြွ လုပ်နေကြတာ ဒါ ပထမဆုံး မြင်ဖူးတာပဲ"

"ပထမဆုံး တွေ့တုန်းက ငါလည်း တော်တော်လေး အံ့သြသွားမိတယ်"

"ဒါပေမဲ့ ပိုပြီး အံ့သြဖို့ကောင်းတာက မင်းက ဒီလို ဆန်းကြယ်တဲ့အရာမျိုးကို ဘယ်လိုများ လုပ်နိုင်ခဲ့တာလဲ ဆိုတာပဲ"

ထန်ထျန်းက လက်ခါပြလိုက်သည်။

အရင်ကအတိုင်းပါပဲ... သူ့ရဲ့ ဇာတိမြေက လူတိုင်း ဒါကို လုပ်တတ်ကြသည်။

"သူတို့ကို ထားလိုက်ပါတော့၊ အရင်ဆုံး ငါနဲ့အတူ အခမ်းအနား ကျင်းပမယ့်နေရာကို သွားရအောင်"

"နတ်ဘုရားသားတော် စမ်းသပ်ပွဲမှာ ပါဝင်မယ့် မြင့်မြတ်သားတော် ၁၂ ယောက်စလုံး ရောက်နေကြပြီ"

ရှင်းဟယ် အင်မော်တယ်ဧကရာဇ်က ပြော၏။

ထန်ထျန်း ခေါင်းညိတ်ပြလိုက်သည်။

ထို့နောက် သူက ရှင်းဟယ် အင်မော်တယ်ဧကရာဇ်နဲ့အတူ နေဝင်တောင်ကြားရဲ့ အတွင်းပိုင်းဆီသို့ ပျံသန်းသွားခဲ့သည်။