အခန်း (၂၂၇၃-၂၂၇၄)

အပိုင်း(၂၂၇၃)

"တာအိုမိတ်ဆွေ စု... ခင်ဗျားရဲ့ အလှည့်ပါ"

စုရီမှာ ချက်ချင်းပင် ဆွံ့အသွားတော့သည်။ သူသည် အစောပိုင်းက လောင်းကြေးကို ကောင်းကင်သို့ ထိုးတက်သွားအောင် လုပ်ဆောင်ရန် ကြံစည်ခဲ့သော်လည်း၊ ယခု ဝေ့ဝူယင်၏ ဆေးပစ္စည်း ပမာဏကို မြင်လိုက်ရသောအခါ ဆက်လက် ကစားနေခြင်းမှာ မီးနှင့် ကစားနေခြင်းသာ ဖြစ်ကြောင်း ချက်ချင်း နားလည်သွားသည်။

သူက အသက်ကို ပြင်းပြင်းရှူကာ ဝေ့ဝူယင်၏ အမြဲတမ်း ပြုံးနေသော မျက်နှာကို စူးစိုက်ကြည့်ရင်း လေးနက်သော လေသံဖြင့် ပြောလိုက်၏။

"ကျွန်တော်လည်း ဒီကြေးအတိုင်းပဲ ဆက်သွားပါမယ်"

"ဪ... ခင်ဗျားကတော့ ပျော်စရာ မကောင်းလိုက်တာ... ကျွန်တော် အများကြီး မထုတ်ရသေးဘူးလေ... ကျန်တဲ့အလှည့်တွေကို အစွမ်းကုန် ကြေးမြှင့်ပြီး ဆက်သွားလို့ ရပါသေးတယ်"

ဝေ့ဝူယင်က တိုက်တွန်းလိုက်၏။

"ဒီလောက် ကြွယ်ဝမှုလေးက အလောင်းအစားအတွက် ပြောပလောက်တာ မဟုတ်ပါဘူး"

သူက ထိုသို့ ပြောဆိုခဲ့သော်လည်း လျှို့ဝှက်ကောင်းကင် အဆင့် အမတေ ကျောက်တုံး ၇၉၅ တုံး ဟူသော ပမာဏမှာ မည်သည့် အဖွဲ့အစည်းကိုမဆို အကြီးအကျယ် နာကျင်စေနိုင်သော ပမာဏ ဖြစ်ပေသည်။

သို့သော် စုရီက ဆုံးဖြတ်ပြီးသား ဖြစ်သဖြင့် တင်ဒါခေါ်ဆိုမှုမှာ ဤနေရာ၌ပင် ပြီးဆုံးသွားတော့သည်။

"ကျွန်တော်တို့ အနေနဲ့ ဆက်သွားမယ် လို့ ဆုံးဖြတ်ထားတဲ့ ကြေးတွေအတွက် ပိုင်ဆိုင်ကြောင်း သက်သေပြမှုကို စတင်ပါမယ်။ သတိပေးလိုတာကတော့... အကယ်၍ ခင်ဗျားတို့ လက်ဝယ်မှာရှိတဲ့ ပစ္စည်းတွေနဲ့ တန်ဖိုးကို မပြနိုင်ဘူးဆိုရင်တော့ ချက်ချင်း ရှုံးနိမ့်သူအဖြစ် သတ်မှတ်ပြီး ပွဲထုတ်ခံရမှာ ဖြစ်ပါတယ်... ဒါပေမဲ့ လက်ရှိ လောင်းကြေးတစ်ခုလုံးကိုတော့ ဒီနေရာမှာ အကုန်ပြစရာ မလိုပါဘူး... ရှုံးနိမ့်သွားခဲ့ရင် ခုနစ်ရက်အတွင်း ပေးချေဖို့ပဲ တာဝန်ရှိပါတယ်”

"အကယ်၍ ဒီကစားပွဲအတွင်းမှာ ဒါမှမဟုတ် ဒီကစားပွဲကြောင့် ခင်ဗျားတို့ သေဆုံးသွားခဲ့ရင်တောင်မှ၊ ဒီအကြွေးဟာ ခင်ဗျားတို့ရဲ့ မျိုးဆက်တွေ ဒါမှမဟုတ် သက်ဆိုင်ရာ အဖွဲ့အစည်းတွေဆီကို ဆက်ပါသွားမှာ ဖြစ်တယ်ဆိုတာကိုတော့ သတိရပေးပါ"

...

လျှို့ဝှက်ကစားပွဲတစ်ခု၏ အစောပိုင်း လုပ်ငန်းစဉ်များသည် ကစားပွဲကိုယ်တိုင်ကဲ့သို့ပင် အရေးကြီးလှသည်။ ၎င်းသည် စည်းမျဉ်းများ၊ အခြေအနေများနှင့် အလောင်းအစားများကို ဆုံးဖြတ်ပေးရခြင်း ဖြစ်၏။ ဤအဆင့်သည် မော်ကွန်းတင်လောက်သော အားပြိုင်မှုတစ်ခု၏ အစပျိုးခြင်းပင် ဖြစ်သည်။ ဤနေရာ၌ ကစားသမားတစ်ဦးသည် ကစားပွဲအတွင်း မည်သည့် လှုပ်ရှားမှုမျှ မလုပ်ဆောင်ရသေးခင်မှာပင် အနိုင်ရသွားနိုင်သလို၊ မိမိ၏ ဉာဏ်ပညာ၊ ဗျူဟာ သို့မဟုတ် ကျွမ်းကျင်မှုများကို မထုတ်ပြနိုင်မီမှာပင် အရေးနိမ့်သွားရသည့် ဖြစ်ရပ်များစွာလည်း ရှိခဲ့ဖူးသည်။

ယခုအခါ ပါဝင်သူ ခုနစ်ဦးစလုံးမှာ ချက်ချင်း ရှုံးနိမ့်သွားနိုင်သည့် အဆင့်ဖြစ်သော အလောင်းအစား ပစ္စည်းများအား စစ်ဆေးအတည်ပြုခြင်း အဆင့်သို့ ရောက်ရှိနေပြီ ဖြစ်သည်။

ရှန့်လျိုသည် အံ့သြမှင်သက်နေသော မျက်ဝန်းများဖြင့် အခန်းတွင်းကို ကြည့်လိုက်သည်။ သူ၏ မျက်ဝန်းအိမ်မှတစ်ဆင့် လောဘနှင့် တပ်မက်မှု အရှိန်အဝါများ ယိုစိမ့်ထွက်ပေါ်နေ၏။ ဂလက်ဆီတစ်ဖက်ခြမ်းမှ ရောက်ရှိလာသော ဤနယ်ခြားသားမှာ မယုံနိုင်လောက်အောင် ကြွယ်ဝလွန်းနေသည်ကို သိရှိသွားရသဖြင့် သူ ရင်ထဲ၌ ဝမ်းသာအားရ ဖြစ်နေမိသည်။

တစ်စုံတစ်ခုကို ကြားသိရခြင်းနှင့် ကိုယ်တိုင် မြင်တွေ့ရခြင်းမှာ လုံးဝ ကွဲပြားခြားနားလှပေသည်။ ယခုအခါ ရှန့်လျိုသည် အံသြဖွယ်ရာ သက်သေတစ်ဦးအဖြစ် ဝေ့ဝူယင်၏ ရှေ့မှောက်၌ ခင်းကျင်းထားသော၊ စုံလင်လှသည့် အဆင့်မြင့် လျှို့ဝှက်အဆင့် ထုတ်ကုန်များအားလုံးကို ကိုယ်တိုင်ကိုယ်ကျ မြင်တွေ့နေရပြီ ဖြစ်သည်။

မစ်ဆူလီနာသည် သူမ၏ နှုတ်ခမ်းများကို လျှာဖြင့် သပ်လိုက်မိသည်။ မတည်ငြိမ်သော အသက်ရှူသံများကြောင့် ခြောက်သွေ့နေသော သူမ၏ နှုတ်ခမ်းများမှာ ပြန်လည် စိုစွတ်သွားခဲ့၏။ လျှို့ဝှက်ကောင်းကင် အဆင့် အမတေ ကျောက်တုံး ၅၃ တုံး၏ တန်ဖိုးမှာပင် ထိပ်တန်း အဖွဲ့အစည်းတစ်ခု တည်ထောင်ရန် လုံလောက်နေပြီ ဖြစ်သည်။ ဂလက်ဆီတစ်ခုလုံးတွင် အဂ္ဂိရတ်နှင့် မသက်ဆိုင်ဘဲ ထိုကဲ့သို့ ကြွယ်ဝမှုမျိုး ပိုင်ဆိုင်ထားသည့် အဖွဲ့အစည်းမှာ အနည်းငယ်မျှသာ ရှိပေလိမ့်မည်။ သို့သော် ကျောက်တုံး ၇၄၅ တုံး ဟူသော ပမာဏမှာမူ ရူးသွပ်စရာ ကောင်းရုံတင်မကဘဲ လုံးဝ အဓိပ္ပာယ် မရှိလောက်အောင်ပင် မြင့်မားလွန်းနေသည်။

ပြဿနာမှာ ထိုတန်ဖိုးကို တင်ပြရုံတင် မဟုတ်ဘဲ၊ ဤနယ်ခြားသားသည် ထိုပိုင်ဆိုင်မှုများကို အဂ္ဂိရတ် ထုတ်ကုန် များအဖြစ် တစ်စုံတစ်ရာ ဖုံးကွယ်ခြင်း မရှိဘဲ ထုတ်ပြနေခြင်းပင် ဖြစ်သည်။ အစွမ်းကုန် သန့်စင်ခြင်း ဂလက်ဆီတွင် ဆေးပစ္စည်းများ၏ ဈေးကွက်တန်ဖိုးမှာ အဆမတန် မြင့်တက်နေလေ့ ရှိသည်မှာ လူတိုင်းသိသော အမှန်တရား ဖြစ်သည်။ သို့သော် ထိုအဂ္ဂိရတ် ထုတ်ကုန်များကို ဈေးကွက်ပေါက်ဈေးအတိုင်း ဝယ်ယူနိုင်ရန်မှာ သူတို့ကဲ့သို့သော အဆင့်မြင့် ပုဂ္ဂိုလ်များအတွက်ပင် ပြင်းထန်သော တိုက်ပွဲတစ်ခု ဆင်နွှဲရသကဲ့သို့ ခက်ခဲလှပေသည်။

ထို့ကြောင့်ပင် အဖွဲ့အစည်း အများစုသည် မိမိတို့ဘာသာ အဂ္ဂိရတ်ပညာရှင်များကို မွေးမြူရန် ရင်းနှီးမြှုပ်နှံကြခြင်း ဖြစ်သည်။ မိမိလိုအပ်သော ဆေးပစ္စည်းများကို အခြားသော လောဘသားများကြားတွင် အလုအယက် ရှာဖွေနေရခြင်းထက်၊ ကိုယ်ပိုင် အဂ္ဂိရတ်ပညာရှင်များကို ရန်ပုံငွေ ထောက်ပံ့၍ လိုအပ်သည့် ဆေးပစ္စည်းများ ထုတ်လုပ်ခိုင်းခြင်းက ပိုမို တွက်ခြေကိုက်သောကြောင့် ဖြစ်သည်။ သို့သော် အဂ္ဂိရတ်ပညာရှင်များကို လေ့ကျင့်ပေးရန်မှာ အလွန်တရာ ခက်ခဲလှပြီး ရလဒ်မှာလည်း ခန့်မှန်းရ ခက်ခဲလှသော စွန့်စားမှုတစ်ခု ဖြစ်ပေသည်။

စွန်းကျားကျန့်သည် သူ၏ တာဝန်များကို အောင်မြင်စွာ ထမ်းဆောင်ပြီးမှသာ သူ၏ နှလုံးခုန်သံမှာ မိုးကြိုးပစ်သကဲ့သို့ ပြင်းထန်နေသည်ကို ခံစားလိုက်မိသည်။ ဤသည်မှာ မည်မျှအထိ အဓိပ္ပာယ် မရှိသော ကြွယ်ဝမှုမျိုးပါနည်း။ သူသည် တိုက်ရိုက် ကြည့်ရှုနေကြသော ဘီလီယံနှင့်ချီသော ပရိသတ်ကြီးကို ပြသနေသည့် အစီအရင်မှန်ကို လှမ်းကြည့်လိုက်မိသည်။ သူတို့အားလုံးမှာလည်း အကြီးအကျယ် ထိတ်လန့်သွားကြတော့မည်မှာ အသေအချာပင်။

ဤနယ်ခြားသားသည် အချက်နှစ်ချက်အနက် တစ်ခုကို ထုတ်ဖော်ပြသလိုက်ခြင်း ဖြစ်သည်။

ပထမအချက် - သူ၏ နောက်ကွယ်တွင် မည်သည့် မျှော်စင်ကိုမဆို ယှဉ်ပြိုင်နိုင်စွမ်းရှိသော၊ ပါရမီရှင် လောကရှန့်ထို အဂ္ဂိရတ်ပညာရှင် များစွာရှိသည့် အင်အားကြီး အဖွဲ့အစည်းတစ်ခု ရှိနေခြင်း ဖြစ်နိုင်သည်။

ဒုတိယအချက် - သူကိုယ်တိုင်မှာပင် ကောင်းကင် အဂ္ဂိရတ်ရှန့်ထို အဆင့်သို့ နီးကပ်နေသူဖြစ်ကြောင်း ကြေညာချက်မှာ ငြင်းဆို၍မရသော အမှန်တရား ဖြစ်နေခြင်းပင်။

သူသည် အထွတ်အထိပ် သူတော်စင် များစွာကို မွေးထုတ်ပေးနိုင်လောက်သော သူ၏ ကြိုးပမ်းအားထုတ်မှု ရလဒ်များကို ဂုဏ်ယူစွာဖြင့် လူအများရှေ့တွင် ထုတ်ပြနေခြင်း ဖြစ်သည်။

ဤဖြစ်ရပ်သည် ဂလက်ဆီတစ်ခုလုံးအပေါ် မည်မျှအထိ သက်ရောက်မှု ကြီးမားမည်ကို ဖော်ပြရန်ပင် ခက်ခဲလှပေသည်။ ထို့ပြင် ဉာဏ်အနည်းငယ် ရှိသူများအတွက်မူ၊ နာမည်အသစ် ပေးထားသော ပြတ်သားသော ဆည်းဆာ ဂလက်ဆီ ၏ နတ်ဘုရား အစောင့်အရှောက်ကို အနိုင်ယူခဲ့ဖူးသော သူ၏ အတိတ်ကို သိထားကြသဖြင့်၊ ဤသည်မှာ မပြောဘဲ သိနေကြသည့် ခြိမ်းခြောက်မှု တစ်ခုပင် ဖြစ်၏။

ဤနယ်ခြားသားသည် အစွမ်းကုန် သန့်စင်ခြင်း ဂလက်ဆီ ကိုပါ သိမ်းပိုက်ရန် ကြံစည်နေခြင်းလော...။

သို့သော် စွန်းကျားကျန့်သည် ဝေ့ဝူယင်က သူတို့၏ ကြယ်တံတားကို အခြေခံမရှိဘဲ အသုံးပြုနိုင်ပြီး၊ သူတို့၏ အရှိန်အဝါများကိုပါ အတုယူနိုင်စွမ်းရှိကြောင်း ပြန်လည် သတိရလိုက်သောအခါ၊ စစ်ရေးနှင့် ထောက်ပို့ရေး ကိစ္စရပ်များတွင် စိတ်ကူးကြည့်၍မရနိုင်သော ဟာကွက်ကြီးတစ်ခု ဖြစ်ပေါ်နေသည်ကို သူ သဘောပေါက်လိုက်သည်။

ဤအချက်ကို စွန်းကျားကျန့် တစ်ဦးတည်းသာ သဘောပေါက်ခြင်း မဟုတ်ပေ။ မလှမ်းမကမ်းရှိ ထူးခြားသော ဟင်းလင်းပြင် လျှို့ဝှက်နယ်မြေတစ်ခုအတွင်း၌ အထွတ်အထိပ် သူတော်စင် များနှင့် ထိုအဆင့်နှင့် ညီမျှသော ပုဂ္ဂိုလ်ကြီးများ စုဝေးကာ ဤ လျှို့ဝှက်ကစားပွဲ ကို စောင့်ကြည့်နေကြသည်။

သူတို့အထဲတွင် တောက်ပသော ကြယ်နန်းတော်၏ နန်းတော်သခင်နှင့် မိုးကုပ်စက်ဝိုင်း ဖန်တီးမှု မျှော်စင်မှ စူးဟောင်ရန်တို့လည်း ပါဝင်သည်။ နန်းတော်သခင်မှာမူ ပြင်ပတွင် တည်ငြိမ်သော အမူအရာဖြင့် ပြုံးပြနေသော်လည်း၊ ဝေ့ဝူယင်၏ အံ့မခန်း ကြွယ်ဝမှုများကြောင့် ရင်ထဲတွင်မူ ချွေးစေးများ ပြန်နေတော့သည်။

ဤကြီးမားလှသော ဟာကွက်ကြီးအကြောင်းကို အခြားသူများအား အသိပေးလိုက်ပါက သူ၏ ဂုဏ်သိက္ခာနှင့် ယုံကြည်ကိုးစားမှုများအားလုံး ပျက်စီးသွားမည် ဖြစ်သောကြောင့် သူ အခက်တွေ့နေရသည်။ သို့သော် အသိမပေးဘဲ နေ၍လည်း မရပြန်ချေ။ စိတ်မအေးနိုင်သော နန်းတော်သခင်သည် နှစ်ပေါင်း နှစ်သိန်းတိုင်တိုင် အရှိန်မြှင့်ထားသော ဟင်းလင်းပြင်ဇုန်အတွင်း၌ အထူးသန့်စင်ထားသော လျှို့ဝှက်လောက အဆင့် ထိပ်တန်း အရည်အသွေးရှိသော ဝိုင်ကိုသာ ဆက်တိုက် သောက်နေမိတော့သည်။

စူးဟောင်ရန်၏ အကြည့်မှာမူ ထျန်းရှီယာ၏ မြင်ကွင်းမှ ဖယ်ခွာမသွားချေ။ တစ်ခါတစ်ရံတွင်မူ သူသည် အခြားသူများအား အာရုံခွဲကြည့်ပြီး ဝေ့ဝူယင်၏ မယုံနိုင်လောက်သော ကြွယ်ဝမှုများကို စောင့်ကြည့်နေသည်။ ဤသည်မှာ သူ၏ အစစ်အမှန် ခန္ဓာကိုယ် မဟုတ်ဘဲ ကိုယ်ပွား တစ်ခုသာ ဖြစ်သည်။ ၎င်းမှာ ကြီးမားသော စွမ်းအား မရှိဘဲ လျှို့ဝှက် အရှင်သခင် အဆင့်မျှသာ ရှိပြီး အလျင်အမြန် ဖန်တီးထားခြင်း ဖြစ်သည်။

သူ၏ အစစ်အမှန် ခန္ဓာကိုယ်မှာမူ အခြားသော ပုဂ္ဂိုလ်ကြီးများ၏ အစစ်အမှန် ခန္ဓာကိုယ်များနှင့်အတူ ဟင်းလင်းပြင်ထဲတွင် ပျောက်ဆုံးနေသော ကတိကဝတ် စာချုပ် ကို ရှာဖွေရန် ထွက်ခွာသွားပြီ ဖြစ်သည်။

စုရီသည် ဝေ့ဝူယင်က ဆေးပစ္စည်းများကို တစ်ခုချင်းစီ ပြန်လည် သိမ်းဆည်းနေသည်ကို စောင့်ကြည့်နေ၏။ သူသည် ဝေ့ဝူယင်၏ ပိုင်ဆိုင်မှုများကြောင့် အလွန်အမင်း တုန်လှုပ်ခြင်း မရှိပေ။ ဤနေရာရှိ ပစ္စည်းအချို့အပေါ် တပ်မက်မှု ရှိသော်လည်း မိမိကိုယ်ကိုယ် လက်လွှတ်ရလောက်သည်အထိ မဟုတ်ချေ။

သူ၏ လမ်းစဉ်မှာ မကြုံစဖူးသော အမြင့်သို့ ရောက်ရှိရန် ဖြစ်ပြီး၊ ဤဆေးပစ္စည်းများမှာ ထိုဖြစ်စဉ်ကို မြန်ဆန်စေရုံမျှသာ တတ်နိုင်ပေသည်။ ဤသည်မှာ သူ၏ မယိုင်လဲသော ယုံကြည်ချက်ဖြစ်ပြီး၊ အတိုင်းအဆမရှိသော မိမိကိုယ်ကိုယ် ယုံကြည်မှုများ ကိန်းဝပ်နေသည့် သူ၏ ကျင့်ကြံခြင်း နှလုံးသား ပင် ဖြစ်၏။

ကောင်းကင်ရှန့်ထို တစ်ဦးအနေဖြင့် စုရီသည် သာမန် သူတော်စင်များကို ယှဉ်ပြိုင် သတ်ဖြတ်နိုင်စွမ်း ရှိသည်။ သူသည် ဉာဏ်အလင်းရ သူတော်စင်များကိုပင် ကြောက်ရွံ့ခြင်း မရှိချေ။ ထိုသို့ စွမ်းဆောင်နိုင်ခြင်းမှာ သူ၏ ကျင့်ကြံခြင်း အဆင့် အပေါ်တွင်သာ အခြေခံထားခြင်း ဖြစ်သည်။ အကယ်၍ သူသာ လျှို့ဝှက် အရှင်သခင် သို့မဟုတ် သူတော်စင် တစ်ဦး ဖြစ်လာခဲ့လျှင်၊ ကြီးမားလှသော ဂလက်ဆီများမှ အုပ်ချုပ်သူများပင်လျှင် သူ့အား တန်းတူအဖြစ် ဆက်ဆံရမည်ဖြစ်ပြီး၊ သူကိုယ်တိုင်ကမူ ထိုသူများကို တန်းတူအဖြစ် သတ်မှတ်ချင်မှ သတ်မှတ်ပေလိမ့်မည်။

***

အပိုင်း(၂၂၇၄)

စွန်းကျားကျန့်၊ မစ်ဆူလီနာနှင့် ရှန့်လျိုတို့က အတည်ပြုခြင်း လုပ်ငန်းစဉ် စတင်ပြီဖြစ်ကြောင်း ကြေညာလိုက်ကြသည်။ ရှန့်လျိုသည် တရားသူကြီးတစ်ဦးအနေဖြင့် သူ၏ တာဝန်ဝတ္တရားများကို ကျေပွန်အောင် ထမ်းဆောင်လိုသဖြင့် စတင် စကားပြောဆိုလာသည်။ သူသည် စွန်းကျားကျန့်၏ တိကျပြတ်သားသော လုပ်ဆောင်မှုများအောက်တွင် မှေးမှိန်မသွားလိုသကဲ့သို့၊ ဝေ့ဝူယင်၏ မျက်စိထဲတွင်လည်း အလုပ်ကောင်းကောင်း လုပ်ပြလိုစိတ် ရှိနေသည်။ သူ၏ နောက်ဆုံးသော သမီးငယ်လေးအား သိမ်းပိုက်သွားသည့် ဤနယ်ခြားသားအပေါ်ထားသည့် သူ၏ စိတ်နေစိတ်ထားမှာလည်း သိသိသာသာ ပြောင်းလဲသွားခဲ့ပြီ ဖြစ်သည်။

ဤသို့ တွေးမိသည့်အခါတိုင်း၊ ဤအရာအားလုံးမှာ စုရီကြောင့် စတင်ခဲ့ခြင်းဖြစ်ကြောင်း ရှန့်လျို မမေ့လျော့ချေ။ ရှန့်ဝမ်ချင်းမှာလည်း သီးခြား အလောင်းအစားတစ်ခုအဖြစ် ပါဝင်နေရသည်။ ထိုလူငယ်ပါရမီရှင်သည် ဝေ့ဝူယင်ကို ရွေးချယ်ရန် ဆုံးဖြတ်ပြီးသား အမျိုးသမီးတစ်ဦးအတွက် အန္တရာယ်များသော ကစားပွဲတစ်ခုထဲသို့ နစ်ဝင်နေရခြင်းမှာ ကံဆိုးလှပေသည်။

အကယ်၍ အတိတ်က ရှန့်လျိုသာ ဖြစ်ပါက စုရီကဲ့သို့သော လူငယ်၏ ခွန်အားနှင့် အရည်အချင်းကို များစွာ နှစ်သက်မိပေလိမ့်မည်။ အထူးသဖြင့် ကောင်းကင်ရှန့်ထို အဆင့်ဖြင့် သူတော်စင် တစ်ဦးကို သတ်ဖြတ်ကာ ရှန့်ဝမ်ချင်းကို ကယ်တင်ခဲ့ပုံမှာ အလွန်ပင် လွှမ်းမိုးမှု ရှိလှသည်။ ထိုစဉ်ကဆိုလျှင် သူသည် မည်သည့် ကန့်ကွက်မှုမျှ ရှိမည်မဟုတ်သော်လည်း၊ ယခုမူ သူ၌ သဘောတူရန် အကြောင်းပြချက် မရှိတော့ချေ။

"ပထမဆုံး ထိုင်ခုံကနေ စတင်ပါမယ်"

ရှန့်လျိုက ကြေညာလိုက်သည်။ ဝေ့ဝူယင်အနေဖြင့် သူ၏ ပိုင်ဆိုင်မှုများကို ထပ်မံ အတည်ပြုရန် မလိုအပ်သလောက် ဖြစ်သော်လည်း ဤသည်မှာ လုပ်ထုံးလုပ်နည်းအရ ဆောင်ရွက်ရခြင်း ဖြစ်သည်။ ဝေ့ဝူယင်က သူ၏ ကြွယ်ဝမှုကို ထုတ်ပြကာ ဂလက်ဆီတစ်ခုလုံးကို ထပ်မံ တုန်လှုပ်စေမည့် အဂ္ဂိရတ် ပစ္စည်းအသစ်များကို ထုတ်ပြရန် ပြင်လိုက်စဉ်မှာပင် ကောင်းဟိန်က ကြားဖြတ် ပြောဆိုလာသည်။

စုရီ၏ အကြည့်မှာ အနည်းငယ် ပြောင်းလဲသွားသော်လည်း သူ ကြည့်နေသည်မှာ အဂ္ဂိရတ်ပညာရှင် ကောင်းဟိန်ကို မဟုတ်ဘဲ နှုတ်ခမ်းပါးများတွင် မသင်္ကာဖွယ်ရာ အပြုံးတစ်ခု ရှိနေသည့် မဟာပုရောဟိတ် အမှောင်လှိုင်းကို ဖြစ်သည်။

"တရားသူကြီးတွေကို တစ်ခု တောင်းဆိုချင်ပါတယ်... အတည်ပြုခြင်း လုပ်ငန်းစဉ်ကို ပြောင်းပြန်အတိုင်း၊ သတ္တမမြောက် ထိုင်ခုံကနေ စတင်ပေးဖို့ပါ"

ကောင်းဟိန်၏ အကြံပြုချက်ကြောင့် ကြည့်ရှုသူများမှာ ဇဝေဇဝါ ဖြစ်သွားကြရသည်။ ဤသည်မှာ... မလိုအပ်ဘဲ လုပ်နေခြင်းဟု ခံစားရသောကြောင့်ပင်။

ဝေ့ဝူယင်၏ ကြယ်တာရာမျက်ဝန်းများက ထိုစကားများသော ရုပ်သေးရုပ် ကောင်းဟိန်အပေါ်သို့ ကျရောက်သွားပြီးနောက်၊ သူက တောက်ပစွာ ပြုံးလိုက်သည်။ သူက လက်ကို စားပွဲပေါ်တွင် အသာအယာ ဝှေ့ယမ်းလိုက်ရာ ပြန့်ကားနေသော စားပွဲပေါ်မှ သူ၏ ပစ္စည်းများကို ပြန်လည် သိမ်းဆည်းလိုက်သကဲ့သို့ ရှိနေသည်။ ထိုစဉ်အတွင်း နဂါးဟင်းလင်းပြင် လျှို့ဝှက်စွမ်းအား လှိုင်းအချို့မှာ ခဏမျှ ခုန်လှုပ်သွားခဲ့သည်။

စုရီ၏ မျက်ခုံးများ တွန့်ချိုးသွားရ၏။ ယွီပေါင်ယွဲ့၏ မျက်နှာမှာ ခဏမျှ ဖြူဖျော့သွားသည်။ ချီရင်ရင်၏ သူငယ်အိမ်များမှာလည်း ကျဉ်းမြောင်းသွားပြီး သူမ၏ ဆွဲဆောင်မှုရှိသော မျက်ဝန်းများဖြင့် တရားသူကြီးများကို၊ အထူးသဖြင့် စွန်းကျားကျန့်ကို ကြည့်လိုက်မိသည်။ သူတို့ မည်သည့် အရာကိုမှ အာရုံ မခံမိသည်လား။ သူမကမူ လျှို့ဝှက်စွမ်းအင် လှုပ်ခတ်မှု အကြွင်းအကျန် အချို့ကို ခံစားလိုက်ရသည်။

ဝေ့ဝူယင်က သူမဘက်သို့ လှည့်၍ ပြုံးပြလိုက်၏။ ဤအမျိုးသမီးမှာ အာရုံခံစားမှု အလွန် ထက်မြက်လှပေသည်။

ကောင်းဟိန်က ဆက်လက် ရှင်းပြလိုက်သည်။

"လောကရှန့်ထို အာရုဏ်ဦး ရဲ့ အရည်အချင်းကိုတော့ ကျွန်တော်တို့ အားလုံး သိပြီးသားပါ... အစီအစဉ်ကို ပြောင်းပြန်လုပ်လိုက်တာကြောင့် ဘာမှ ထိခိုက်မှု ရှိလာမှာ မဟုတ်ပါဘူး"

မဟာပုရောဟိတ် အမှောင်လှိုင်းကလည်း ထောက်ခံလိုက်သည်။

"ကျွန်တော်လည်း သဘောတူပါတယ်"

တရားသူကြီးများမှာ ဤကဲ့သို့သော တောင်းဆိုမှုမျိုးကို မမျှော်လင့်ထားသော်လည်း၊ သူတို့၏ အကြည့်များမှာ အဖိုးတန် ဝတ်စုံများကို ဆင်မြန်းထားသည့် ယွီပေါင်ယွဲ့၏ သွယ်လျသော ကိုယ်လုံးလေးထံသို့ ရောက်ရှိသွားကြသည်။

"ဘယ်သူတွေ ကန့်ကွက်ချင်သေးလဲ"

ရှန့်လျိုက မေးလိုက်သည်။ ဤသည်မှာ သေးငယ်သော တောင်းဆိုမှု ဖြစ်သဖြင့် ပြဿနာရှိမည် မဟုတ်ဟု ယူဆကြသည်။ ထို့ပြင် သူမအနေဖြင့် လျှို့ဝှက်ကောင်းကင် အဆင့် အမတေ ကျောက်တုံး ၅၃ တုံး တန်ဖိုးရှိသည့် ပစ္စည်းများ ပိုင်ဆိုင်ကြောင်း သက်သေပြရုံသာ ဖြစ်သည်။ အကယ်၍ မပြနိုင်ပါက သူမမှာ ချက်ချင်း ရှုံးနိမ့်သူအဖြစ် သတ်မှတ်ခံရမည် ဖြစ်ပြီး သူမ၏ အခြေအနေမှာ အလွန် စိုးရိမ်စရာ ဖြစ်လာပေလိမ့်မည်။ သို့သော် ဤသည်မှာ ရှောင်လွှဲ၍မရသော အပိုင်းပင် ဖြစ်၏။

"..."

ပထမမှ ဆဋ္ဌမမြောက် ထိုင်ခုံအထိ မည်သူမျှ ကန့်ကွက်ခြင်း မရှိကြချေ။ စုရီပင်လျှင် ငြိမ်နေသည်။ သို့သော် ယွီပေါင်ယွဲ့မှာမူ မနေနိုင်တော့ဘဲ...

"ဒါက မလိုအပ်တဲ့ အပြောင်းအလဲပဲ..."

သူမ၏ စိတ်ထဲတွင် ဒေါသများ တဟုန်းဟုန်း တောက်လောင်နေသည်။ လူအများစုအတွက် ကျောက်တုံး ၅၃ တုံး၏ တန်ဖိုးကို နားလည်ရန် ခက်ခဲသော်လည်း၊ ၎င်းမှာ ကြယ်ကွင်းပြင် ထောင်နှင့်ချီ၍ ဝယ်ယူနိုင်သလို၊ ဂလက်ဆီ ဇုန်ကြီးများ၏ သိသာထင်ရှားသော အစိတ်အပိုင်းတစ်ခုနှင့် ကြယ်တာရာ နယ်မြေ သန်းပေါင်းများစွာကို ဝယ်ယူနိုင်သည့် တန်ဖိုး ဖြစ်သည်။

၎င်းမှာ အသေးအဖွဲ မဟုတ်ပေ။ ဤနေရာရှိ လူတိုင်းမှာ အံ့မခန်း ကြွယ်ဝမှုများနောက်တွင် ရှိနေကြသော်လည်း လူတိုင်းမှာ ဝေ့ဝူယင်ကဲ့သို့ မဟုတ်ကြချေ။ သူမမှာလည်း ထိုအထဲတွင် တစ်ဦးအပါအဝင် ဖြစ်သည်။ သူမသည် သူမအား ကူညီပေးရန် စုရီကိုသာ အားကိုးနေရခြင်း ဖြစ်၏။ သူမသည် မိမိကိုယ်ကိုယ် အလွန် နက်ရှိုင်းသော ချောက်ထဲသို့ တွန်းပို့မိခဲ့ပြီ ဖြစ်သည်။ အကယ်၍ စုရီ၏ တည်ငြိမ်သော အမူအရာနှင့် သူ နောက်ကွယ်မှ ရှိနေသည်ဟူသော ကတိစကားများသာ မရှိပါက၊ သူမသည် ဝေ့ဝူယင်၏ အစောပိုင်း ကြေးခေါ်ဆိုမှုမှာပင် ပြိုလဲသွားလောက်ပြီ ဖြစ်သည်။

မည်သို့ပင်ဆိုစေကာမူ အနိုင်ရသူမှာ တစ်ဦးတည်းသာ ရှိနိုင်သည်။ သို့သော် ကံကောင်းထောက်မစွာဖြင့် လျှို့ဝှက်ကစားပွဲ တွင် အနိုင်ရသူ မဟုတ်ခဲ့လျှင်ပင် မိမိ၏ ရွေးချယ်ခံ များကို ဆုံးရှုံးမှု မရှိစေရန် လုပ်ဆောင်နိုင်သည့် နည်းလမ်းများ ရှိနေသည်။ သူမသည် စုရီနှင့် မိမိကိုယ်ကိုယ် ယုံကြည်ကာ နည်းလမ်းရှာရန် ဆုံးဖြတ်ထားသည်။

"ရှင် ပြောတာ မှန်ပါတယ်... ဒါဟာ မလိုအပ်တဲ့ အပြောင်းအလဲတစ်ခု ဖြစ်ပြီး အခြေအနေကို ဘာမှ ပြောင်းလဲသွားမှာ မဟုတ်ပါဘူး... ဒါပေမဲ့ ဘာအကျိုးဆက်မှ မရှိနိုင်တဲ့ တောင်းဆိုမှုမျိုး ဖြစ်နေတဲ့အတွက်၊ မျှမျှတတပဲ ဖြည့်ဆည်းပေးပြီး လုပ်ငန်းစဉ်ကို ဆက်သွားတာက အကောင်းဆုံး ဖြစ်ပါလိမ့်မယ်... စီနီယာစွန်း၊ စီနီယာရှန့်... ဘယ်လို ထင်ကြလဲ"

မစ်ဆူလီနာက သူမ၏ သဘောထားကို ပြောလိုက်သည်။

စွန်းကျားကျန့်က ခေတ္တ စဉ်းစားလိုက်၏။

"ဒါဆို ပြောင်းပြန်အတိုင်း စတင်ပါမယ်"

သူက အဖြေပေးလိုက်သည်။ ရှန့်လျိုကလည်း သဘောတူလိုက်၏။

"လောကရှန့်ထို တောက်ပသောရတနာ... ကျေးဇူးပြုပြီး လျှို့ဝှက်ကောင်းကင် အဆင့် အမတေ ကျောက်တုံး ၅၃ တုံး ဒါမှမဟုတ် အဲဒီနဲ့ ညီမျှတဲ့ ပစ္စည်းတွေကို ထုတ်ပြပေးပါ... တကယ်လို့ ပမာဏ မပြည့်စုံဘူးဆိုရင်တော့ ခင်ဗျားကို ရှုံးနိမ့်သူအဖြစ် သတ်မှတ်ပါမယ်... ခင်ဗျားရဲ့ ပြစ်ဒဏ်ဟာ ကစားပွဲမှာ ရှုံးနိမ့်သွားတာနဲ့ ရွေးချယ်ခံ အားလုံးကို ဆုံးရှုံးရမှာနဲ့ တူညီပါလိမ့်မယ်... သတိပေးပြီးပါပြီ"

ယွီပေါင်ယွဲ့သည် လူအများရှေ့တွင် သူမ၏ ထိတ်လန့်မှုကို ထိန်းချုပ်ထားလိုက်သည်။ ထို့နောက် သူမ၏ ဝိညာဉ်အာရုံကို သူမ၏ အတွင်းပိုင်းလောကထဲသို့ ပို့လွှတ်လိုက်သည်။ သူမ၏ အမူအရာမှာ ချက်ချင်းပင် တောင့်တင်းသွားတော့၏။ ထို့နောက် သူမသည် သူမ၏ ရှန့်ထို လက်စွပ် ထဲသို့ အမှားအယွင်းတစ်ခု ဖြစ်နေမလားဟူသော မျှော်လင့်ချက်ဖြင့် ဝိညာဉ်အာရုံကို အသည်းအသန် ပို့လွှတ်ကြည့်ပြန်သည်။ သူမ၏ မျက်လုံးများမှာ ထိန်းမနိုင်သိမ်းမရ ပြူးကျယ်သွားရ၏။

စုရီက သူမကို တိတ်တဆိတ် ဆက်သွယ်လိုက်၏။

"ဒါကိုပဲ ထုတ်ပြလိုက်ပါ... အဲဒါဆို လုံလောက်သွားလိမ့်မယ်

သူသည် ဤအခြေအနေကို ကျော်လွှားနိုင်ရန် နည်းလမ်းများ ရှိထားပြီးသား ဖြစ်ပြီး၊ ယွီပေါင်ယွဲ့ထံသို့ ကျောက်တုံး ၅၃ တုံးထက် ပိုမို တန်ဖိုးရှိသော ပစ္စည်းတစ်ခုကိုလည်း ပေးထားခဲ့ပြီး ဖြစ်သည်။ သူသည် ဤကဲ့သို့သော ရလဒ်မျိုးကို ကြိုတင် မျှော်လင့်ထားခဲ့သည်။ အထွတ်အထိပ် သူတော်စင် တစ်ဦး၏ ကြမ်းတမ်းလှသော ကြေးခေါ်ဆိုမှုများကြားတွင် အနိုင်ရရန် ခက်ခဲလိမ့်မည်ကို သူ သိထားသည်။ ဝေ့ဝူယင်သည် ရန်လိုသော ကြေးခေါ်ဆိုမှုများဖြင့် သူတို့ထဲမှ အချို့ကို ဖယ်ရှားရန် ကြိုးစားမည်မှာ သူ၏ ခန့်မှန်းချက်အတွင်းမှာပင် ရှိနေသည်။

"ကျွန်မ..."

ယွီပေါင်ယွဲ့၏ မျက်လုံးများမှာ သိသိသာသာ တုန်ရီနေပြီး သူမ၏ တည်ငြိမ်မှုများမှာလည်း ပြိုလဲလုနီးပါး ဖြစ်နေပြီဖြစ်သည်။ သူမသည် စုရီကို အလွန်အမင်း ရှုပ်ထွေးကာ ထိတ်လန့်နေသော အကြည့်များဖြင့် ကြည့်လိုက်သည်။

သူမ၏ ကြောက်ရွံ့နေသော မျက်နှာကို မြင်လိုက်ရသောအခါ စုရီ၏ ရင်ထဲတွင် မကောင်းသော ခံစားချက်တစ်ခု ပေါ်လာသည်။ တစ်ခုခုတော့ မှားနေပြီ။

သူ ဝေ့ဝူယင်၏ အမြဲတမ်း ပြုံးနေသော မျက်နှာထံသို့ အကြည့်ကို အမြန် ပို့လိုက်သည်။ သူ့ ပိုင်ဆိုင်မှုများထဲမှ အချို့အဝက် ရှန့်ထိုလက်စွပ်ထဲမှ အခိုးခံခဲ့ရသည်ကို သူ သတိရသွားသည်။ သို့သော်... ထိုပစ္စည်းကို သူမ၏ အတွင်းကမ္ဘာ ထဲမှာသာ ထားရန် သူ အတိအလင်း မှာကြားထားခဲ့သည် မဟုတ်ပါလား။

မဟာပုရောဟိတ် အမှောင်လှိုင်း၏ မျက်ဝန်းများတွင် ယုတ်မာသော အလင်းတန်းများ တောက်ပနေပြီး၊ အောင်နိုင်သူ အပြုံးကိုလည်း လုံးဝ ဖုံးကွယ်ထားခြင်း မရှိချေ။ ကောင်းဟိန်ကလည်း ရယ်ချင်စိတ်ကို အနိုင်နိုင် ထိန်းထားရသည်။

သူတို့သည် ဤရလဒ်ကို ကြိုတင် မျှော်လင့်ထားကြပြီး၊ ကစားသမား တစ်ဦးအား ချက်ချင်း ဖယ်ရှားပစ်ရန် အစီအစဉ် ချထားခဲ့ကြခြင်း ဖြစ်သည်။ ကစားပွဲ၏ မရေရာမှုများကို လျှော့ချပစ်လိုက်ခြင်းပင်။

‘ဝက်မလေးရေ... ခုတော့ ဒုက္ခနဲ့ လှလှ တွေ့ပြီပေါ့... စိတ်မပူပါနဲ့၊ မင်းသာ အသက်ရှင်မယ်ဆိုရင် ငါ မင်းကို ရက်ရက်ရောရော စောင့်ရှောက်ပေးပါ့မယ်... နိမိတ်ဖတ်သူတွေရဲ့ အစီအစဉ်ထဲမှာ ကျရှုံးသွားတာကတော့ မင်းရဲ့ အမှားပဲ...’

စိန်ခေါ်မှုနှင့် ပွဲစတင်ခြင်းကြား သုံးရက်အတွင်းမှာပင် ယွီပေါင်ယွဲ့သည် ဟင်းလင်းပြင်ထဲ၌ လွင့်မြောနေသော ဂြိုဟ်ပျက်တစ်ခု၏ အပိုင်းအစကို တွေ့ရှိခဲ့သည်။ ၎င်းမှာ အေးစက်ပြီး မြေကြီးအရှိန်အဝါများ ထွက်ပေါ်နေကာ၊ လှပသော အရာများကို နှစ်သက်တတ်သည့် သူမ၏ ပင်ကိုယ်စိတ်ဖြင့် စစ်ဆေးကြည့်ရာ ရေခဲနှလုံးသား ပတ္တမြား ဟူသော ရှားပါးလှသည့် ကျောက်မျက်ရတနာ တစ်ခုကို တွေ့ရှိခဲ့သည်။

ဤသည်မှာ သူမ၏ ကျဆုံးခြင်း စတင်ရာပင် ဖြစ်၏။ ထောင်ချောက်မှာ ခိုင်မာစွာ ဆင်ထားပြီးသား ဖြစ်သဖြင့် သူမ မည်သည့် အကူအညီ ရသည်ဖြစ်စေ အရေးမပါတော့ချေ။ အဆုံးအဖြတ် အချိန်ရောက်လာသည်နှင့် သူမ၏ အဖိုးတန်ဆုံးသော ပိုင်ဆိုင်မှုများ ပျောက်ဆုံးနေသည်ကို သူမ တွေ့ရှိရမည်ဖြစ်ပြီး၊ သူမ ရှုံးနိမ့်သွားရပေလိမ့်မည်။

ထိုအရာက ငြင်းပယ်လို့မရသည့် အချက်ပင်။

***