ပေကျင်းလူကုံထံ အသိုင်းအဝိုင်း

နောက်တစ်နေ့ မွန်းလွဲ ၄ နာရီခွဲတွင် လင်းဖန်သည် ထိုနေ့အတွက် စာမေးပွဲဖြေဆိုမှုကို အပြီးသတ်ခဲ့သည်။

​ထိုစဉ် ဝမ်ချောင်ထံမှ ဖုန်းဝင်လာသည်။

"ညီအစ်ကိုလင်းရာ... မင်း ပေကျင်းကို ရောက်နေတာကို ငါ့ကိုတောင် အကြောင်းမကြားဘူး၊ တကယ်ပဲ"

​နားထဲတွင် တစီစီနှင့် မြည်ဟီးနေသည့် အသံကို နားထောင်ရင်း လင်းဖန် အနည်းငယ် ဇဝေဇဝါ ဖြစ်သွားသည်။ သူသည် ခေါင်းကို မတတ်သာသလို ခါယမ်းလိုက်ပြီး ပြုံးလျက် ပြန်ပြောလိုက်သည်။

"မင်းက ရုတ်တရက်ကြီး ဖုန်းဆက်လာတာ ဆိုတော့ စကားပြောချင်ရုံ သက်သက်ပဲ မဟုတ်လောက်ဘူးနော်"

​ဝမ်ချောင်က

"ဟားဟား ဒါကိုတောင် ရိပ်မိတာလား တကယ်တော့ ဒီညလုပ်မယ့် ဧည့်ခံပွဲလေးကို မင်းကို ဖိတ်ချင်လို့ပါ"

ဟု ဆိုသည်။

​"ကောင်းပြီလေ၊ လိပ်စာပို့ထားလိုက်ဦး၊ ညကျရင် ငါလာခဲ့မယ်"

ဟု လင်းဖန်က တုံ့ဆိုင်းခြင်းမရှိဘဲ ပြောလိုက်သည်။ သူသည်လည်း လူငယ်တစ်ဦးဖြစ်သည့်အလျောက် ယခုကဲ့သို့ စည်ကားသော ပွဲလမ်းသဘင်များကို ငြင်းပယ်လေ့မရှိပေ။

​"ဒါဆို ငါ စောင့်နေမယ်နော်"

ဟု ဝမ်ချောင်က ဆိုကာ လိပ်စာပို့ပြီး ဖုန်းချသွားတော့သည်။

​ညနေ ၆ နာရီ၊ ပေကျင်းရှိ ဗီလာအတွင်း၌

​"သူဌေး... ဒီည 'မင်းသားလေး' တို့ရဲ့ ပါတီကို ဒီလိုပဲ ဝတ်ပြီး သွားမလို့လား"

အားကစားဝတ်စုံ အပေါ့စားလေး ဝတ်ထားသော လင်းဖန်ကို ကြည့်ရင်း မိုရှင်းယာက ကြောင်တောင်တောင်ဖြင့် မေးလိုက်သည်။

​"ဟင်... ဒါက ဘာဖြစ်လို့လဲ"

လင်းဖန်က အံ့သြသွားပြီး မိုရှင်းယာကို နားမလည်နိုင်သလို ကြည့်လိုက်သည်။

​အမှန်အတိုင်း ပြောရလျှင် လင်းဖန်သည် ယခုကဲ့သို့ တရားဝင် ဧည့်ခံပွဲမျိုးတွင် မပါဝင်ဖူးသေးပေ။ ကျင်းလင် အမှတ် (၁) အထက်တန်းကျောင်းက လုပ်ခဲ့သော ဘွဲ့နှင်းသဘင် ပါတီတွင်ပင် အားလုံးက ပေါ့ပေါ့ပါးပါးသာ ဝတ်ဆင်ခဲ့ကြသည်။ သူတို့အားလုံးက အသက် ၁၈၊ ၁၉ အရွယ် လူငယ်လေးများသာ ဖြစ်သဖြင့် မည်သူက လူကြီးတွေလို ခမ်းခမ်းနားနား ပြင်ဆင်တတ်ပါမည်နည်း။

​"သူဌေး... နေ့စဉ်ဝတ်နေကျ ဝတ်စုံက အဆင်ပြေပေမဲ့ ဒီညပါတီက တရားဝင် လူမှုရေးပွဲတစ်ခုလို ဖြစ်နေပြီး လာမယ့်သူတွေကလည်း သူဌေးသားတွေချည်းပဲလေ"

ဟု မိုရှင်းယာက ပါးစပ်ကလေးပိတ်ကာ ရယ်မောရင်း ပြောသည်။

​လင်းဖန်လည်း သူမ ပြောလိုသည်ကို နားလည်သွားသည်။ ချမ်းသာသော ဒုတိယမျိုးဆက် လူငယ်များမှာ ဟန်ပန်အပြင်အဆင်ကို အလွန် အလေးထားကြသူများ ဖြစ်သည်။ အကယ်၍ သူသာ ယခုကဲ့သို့ ဝတ်သွားလျှင် လူမြင်ကွင်းတွင် ရယ်စရာ ဖြစ်နေပေလိမ့်မည်။

​"ဒါဆိုရင် မင်းပဲ ငါ့အတွက် သင့်တော်မယ့် ဝတ်စုံလေး ရွေးပေးပါဦး"

​"ကောင်းပါပြီရှင်"

​ပေကျင်းသို့ ခဏခဏ မလာဖြစ်သော်လည်း လင်းဖန်အတွက် ပေါ့ပေါ့ပါးပါး ဝတ်စုံမှအစ အားကစားဝတ်စုံအထိ အစုံအလင် ပြင်ဆင်ထားပြီးသား ဖြစ်သည်။ ခဏအကြာတွင် ခန့်ညားထည်ဝါသော လူငယ်လေးတစ်ဦး ဗီလာခန်းမအတွင်းသို့ ထွက်လာသည်။

​"ဒီလောက်ဆို အဆင်ပြေပြီလား"

လင်းဖန်က သူ၏ ကော်လာကို အသာသပ်ရင်း ပြုံးကာ မေးလိုက်သည်။

​"အင်းဟင်း"

မိုရှင်းယာက ကြက်ပေါက်လေး စပါးစေ့ကောက်သလို ခေါင်းကို အဆက်မပြတ် ငြိမ့်ပြလိုက်သည်။

​လန်ဒန်မြို့၊ Savile Row မှ အထူးမှာယူထားသော နီပြာရောင် ဝတ်စုံသည် လင်းဖန်၏ ခန့်ညားပြီး အရပ်ရှည်သော ကိုယ်ဟန်ကို ပေါ်လွင်စေသည်။ လက်တွင် Patek Philippe ၏ ၂၀၁၈ လီမိတက် အော်ဒါ နာရီကို ပတ်ထားပြီး Louis Vuitton မှ အထူးချုပ်လုပ်ထားသော သားရေဖိနပ်ကို ဝတ်ဆင်ထားသည်။ အတွင်းပိုင်းတွင် ကြွယ်ဝမှုကို ထိန်းချုပ်ထားပြီး အပြင်ပိုင်းတွင် ခန့်ညားမှုကို ပေါ်လွင်စေခြင်းမှာ "ကျောက်စိမ်းကဲ့သို့ အေးမြသော်လည်း တုနှိုင်းမဲ့သော မင်းသားတစ်ပါး" အလားပင်။

​"ကဲ... သွားကြစို့"

​အဝတ်အစား လဲလှယ်ပြီးနောက် လင်းဖန်သည် Aston Martin One-77 ပြိုင်ကားကြီးကို ကိုယ်တိုင်မောင်းနှင်ကာ သက်တော်စောင့်အဖွဲ့နှင့်အတူ ဝမ်ချောင်၏ စံအိမ်တော်ဆီသို့ ဦးတည်ထွက်ခွာခဲ့သည်။ ည ၇ နာရီခွဲခန့်တွင် ပေကျင်းမြို့ပြင်ရှိ စံအိမ်ကြီးသို့ ရောက်ရှိသွားတော့သည်။

​"သူဌေး... ကျွန်တော်တို့ အပြင်မှာပဲ စောင့်နေပါ့မယ် တစ်ခုခု လိုအပ်ရင် တိုက်ရိုက်ခေါ်လိုက်ပါ"

ဟု သက်တော်စောင့်ခေါင်းဆောင် လီဖန်က ရိုသေစွာ ပြောလာသည်။

​"ကောင်းပြီ"

လင်းဖန်က ခေါင်းညိတ်ပြလျက် စံအိမ်ထဲသို့ ကားမောင်းဝင်သွားသည်။ ဤသည်မှာ ဝမ်ချောင်၏ ပါတီဖြစ်သဖြင့် လက်နက်အပြည့်အစုံနှင့် သက်တော်စောင့်များကို ခေါ်သွားပါက အထင်အမြင်လွဲမှားမှုများ ဖြစ်နိုင်သဖြင့် အပြင်မှာ စောင့်ခိုင်းခြင်းကသာ ပို၍ သင့်တော်ပေသည်။

​စံအိမ်ထဲသို့ ရောက်သည်နှင့် ဝမ်ချောင်က လူအချို့နှင့်အတူ ကြိုဆိုနေသည်ကို တွေ့လိုက်ရသည်။ သူ့ဘေးတွင် ရှိနေသူမှာ ချင်လင်မှလွဲ၍ အခြားသူ မဖြစ်နိုင်ပေ။

​"ဟားဟားဟား ညီအစ်ကိုလင်း... နောက်ဆုံးတော့ မင်းကို စောင့်ရတာ အောင်မြင်ပြီ"

ဝမ်ချောင်က ပြုံးရွှင်စွာ ဆီးကြိုသည်။

​"မင်းတို့ နှစ်ယောက်ကတော့ တကယ့်ကို လူစွမ်းကောင်းတွေပဲ မြေဈေး အင်မတန်ကြီးတဲ့ ပေကျင်းမြို့မှာ ဒီလောက်ကြီးတဲ့ စံအိမ်ကြီးကို တည်ဆောက်ထားနိုင်တာ တကယ်ကို အံ့သြဖို့ကောင်းတယ်"

လင်းဖန်က နောက်ပြောင်လိုက်သည်။

​"ဟား... မင်းကလည်း ငါ့ကို လာစနောက်နေပြန်ပြီ ကဲ... ဒီနေ့ ရောက်လာပြီဆိုမှတော့ ဝဝလင်လင် စားသောက်ပြီး ပျော်ပျော်ပါးပါး နေသွားဦး အစ်ကိုချင်... မင်းပဲ အစ်ကိုလင်းကို အဖော်လုပ်ပေးလိုက်ပါဦး၊ ငါကတော့ တခြားဧည့်သည်တွေကို သွားကြိုလိုက်ဦးမယ်"

ဝမ်ချောင်က ဆိုကာ တံခါးဝသို့ ပြန်သွားသည်။

​ထိုစဉ် ချင်လင်းက လင်းဖန်ကို ခန်းမအတွင်းသို့ ခေါ်ဆောင်သွားသည်။ ပါတီကို ခန်းမထဲတွင် ကျင်းပနေခြင်းဖြစ်ပြီး လူများစွာ ရောက်ရှိနေကြပြီဖြစ်သည်။ လှပတောက်ပစွာ ဝတ်ဆင်ထားသော လူငယ်မောင်မယ်များမှာ ဇိမ်ခံပစ္စည်းများကိုယ်စီနှင့် ဖြစ်သဖြင့် လင်းဖန်ပင်လျှင် မျက်စိပွင့်သွားရသည်။ တကယ့်ကို အထက်တန်းလွှာ လူကုံထံများ စုဝေးရာပွဲပင်။

​လူများစွာကလည်း လင်းဖန်အပေါ် အာရုံကျနေကြသည်။ ဝမ်ချောင်နှင့် ချင်လင်းတို့ ကိုယ်တိုင် အပြင်ထွက်ကြိုရသော ဧည့်သည်ဖြစ်သဖြင့် ဤလူငယ်မှာ အဆင့်အတန်း မြင့်မားသူတစ်ဦး ဖြစ်ရမည်ဟု အားလုံးက ရိပ်မိကြသည်။

​"ဒါ ဘယ်သူလဲ"

"ဟေး... ဒီလူက အတော်လေး ချောတာပဲ"

"သူ့လက်က နာရီကို ကြည့်ဦး၊ အဲဒါ Patek Philippe က မနှစ်က ထုတ်တဲ့ Limited Edition လေ၊ ကမ္ဘာပေါ်မှာ ၅ လုံးပဲ ရှိပြီး ဒေါ်လာ ၃ သန်းလောက် တန်တာ၊ နောက်ခံ အတော်တောင့်မယ့်ပုံပဲ"

​လူစုလူဝေးကြားတွင် လင်းဖန်အကြောင်း တီးတိုး ပြောဆိုနေကြသဖြင့် စပ်စုချင်စိတ်များမှာ ပို၍ မြင့်တက်လာတော့သည်။

​"အစ်ကိုလင်း... ဟိုဘက်က မိန်းကလေးတွေနဲ့ သွားပြီး မိတ်ဖွဲ့ဦးမလား"

ချင်လင်းက ပတ်ဝန်းကျင်ကို ဝေ့ကြည့်ကာ ပြုံးလျက် မေးလိုက်သည်။

​"မင်းတို့ နှစ်ယောက်က ငါ့ကို ဒီအတိုင်း ပျော်ဖို့သက်သက်ပဲ ခေါ်တာတော့ မဟုတ်ဘူး မဟုတ်လား ကဲ... ပင်မအစီအစဉ်ကိုပဲ သွားရအောင်၊ မိန်းကလေးတွေနဲ့ကတော့ ဘယ်အချိန်ဖြစ်ဖြစ် ပျော်လို့ရတာပဲ"

လင်းဖန်က ပုခုံးတွန့်ကာ တိုက်ရိုက်ပင် မေးလိုက်သည်။

​အခြားသူများ မသိသော်လည်း ဝမ်ချောင်နှင့် ချင်လင်းတို့မှာ လင်းဖန်၏ စရိုက်ကို ကောင်းစွာ သိကြသည်။ လင်းဖန်သည် ပျော်ပွဲရွှင်ပွဲများကို မငြင်းသော်လည်း ထိုမျှအထိ အစွဲအလမ်းကြီးသူ မဟုတ်ပေ။

​"ဟားဟားဟား! ဝမ်ချောင် ပြောတာ မှန်တယ်၊ မင်းကတော့ တကယ့် မြေခွေးအိုကြီးပဲ"

ချင်လင်းက မတတ်သာသလို ရယ်မောရင်း လင်းဖန်ကို ဒုတိယထပ်သို့ ခေါ်သွားသည်။ စံအိမ်၏ ဒုတိယထပ်မှာ ဟိုတယ်ကြယ်ငါးပွင့်အဆင့်ရှိသော အလွန်ကျယ်ဝန်းပြီး ခမ်းနားသော ဧည့်ခန်းကြီး ဖြစ်သည်။ ထို့ပြင် သီးသန့် စားသောက်ဆိုင်၊ ဘား (Bar)၊ ဗီဒီယိုဂိမ်းခန်းနှင့် ဘိလိယက်ခုံများလည်း ရှိနေသည်။

​ဘားပေါ်ရှိ အရက်ပုလင်းများကို ကြည့်ရင်း လင်းဖန် ပြုံးလျက် ခေါင်းခါလိုက်မိသည်။ တကယ့်ကို ထိပ်တန်း သူဌေးသားများပွဲပင်။ ကမ္ဘာ့အကောင်းဆုံး အရက်အမျိုးအစားများဖြစ်သည့် Bacardi၊ Smirnoff၊ Johnnie Walker၊ Moët & Chandon မှအစ Remy Martin Brandy အထိ အစုံအလင် ရှိနေသည်။ ဝမ်ချောင်ကိုယ်တိုင်ပင် ဤအရက်အားလုံးကို သောက်နိုင်မည် မဟုတ်ဘဲ အလှပြထားခြင်းသာ ဖြစ်ပေလိမ့်မည်။

​..............................................................