ဆမ်ဆောင်းနဲ့ ပူးပေါင်းမည့်အစီအစဥ်

​မွန်းလွဲ ၂ နာရီ၊ နေ့လယ်စာ စားသောက်ပြီးနောက် လင်းဖန်သည် ပေကျင်းရှိ လုံထန်ဘဏ်ခွဲသို့ တိုက်ရိုက်မောင်းနှင်လာခဲ့သည်။

​မြို့တော်သည် နိုင်ငံ၏ နိုင်ငံရေးနှင့် ယဉ်ကျေးမှုဗဟိုချက်ဖြစ်သလို စီးပွားရေးအရလည်း နောက်ကျကျန်ရစ်ခြင်းမရှိပေ။ လုံထန်အုပ်စုအနေဖြင့် မြောက်ပိုင်းဒေသတစ်ခုလုံးကို လွှမ်းမိုးလိုပါက မြို့တော်သည် မရှိမဖြစ် အရေးပါသောနေရာတစ်ခု ဖြစ်သည်။ ထိုနေ့ မွန်းလွဲပိုင်းတွင် စာမေးပွဲမရှိသဖြင့် သူကိုယ်တိုင် လာရောက်ကြည့်ရှုခြင်း ဖြစ်သည်။

​"သူဌေး!

​သူ ဥက္ကဋ္ဌရုံးခန်းထဲသို့ ဝင်လိုက်သည်နှင့် မိုရှင်းယာက ရှေ့သို့ကြိုဆိုကာ ပြောလိုက်သည်။

"သူဌေး အမိန့်ပေးထားတဲ့ အချက်အလက်တွေကို စားပွဲပေါ်မှာ တင်ထားပေးပါတယ် ပြီးတော့ ကိုရီးယားက ဆမ်ဆောင်း (Four Star) အုပ်စုက လူလွှတ်ပြီး ကျွန်မတို့ကို တွေ့ဆုံမေးမြန်းဖို့ ကမ်းလှမ်းထားပါတယ်"

​လင်းဖန် မျက်မှောင်ကြုတ်သွားပြီး

"ဆမ်ဆောင်းက ဘာလိုချင်လို့လဲ"

ဟု မေးလိုက်သည်။

​အကြောင်းမရှိဘဲ အဝေးကြီးကနေ ကိုရီးယားလူမျိုးတွေ လာရောက်တာဟာ တစ်ခုခုတော့ လက်သိပ်ထိုး ကြံစည်ထားတာ ရှိရမည်ဟု သူ တွေးလိုက်မိသည်။

​"အဲ့ဒါက... တကယ်တော့ ကျွန်မတို့ရဲ့ နီဗားနာ ဖုန်းကို တရားဝင် ထုတ်ပြန်ပြီးကတည်းက..."

မိုရှင်းယာက ပြုံးလျက် ဆက်ပြောသည်။

"ကျွန်မတို့ရဲ့ နီဗားနားစနစ်ကို သူတို့လည်း အသုံးပြုချင်ပုံရပါတယ်"

​"ဘာလဲ... သူတို့က တန်ရွမ်စနစ်ကို တပ်ဆင်ချင်တာလား"

လင်းဖန် အနည်းငယ် အံ့သြသွားသည်။

​အာရှတစ်ခုလုံးတွင် ဆမ်ဆောင်းသည် အန်းဒရွိုက်၏ အကြီးဆုံးမိတ်ဖက် ဖြစ်သည်မှာ လူတိုင်းသိထားသည့်အတိုင်း ဖြစ်သည်။ ကိုရီးယားလူမျိုးများ၏ အားပေးမှုကြောင့်လည်း အန်းဒရွိုက်၏ လက်ရှိ ဈေးကွက်ဝေစုမှာ အက်ပဲလ် (Apple) ထက်ပင် သာလွန်နေခြင်းဖြစ်သည်။

ဆမ်ဆောင်းသာမရှိလျှင် အန်းဒရွိုက်မှာ ယခုကဲ့သို့ အခြေအနေမျိုး ရောက်ရှိလာစရာ အကြောင်းမရှိပေ။

​ထို့ကြောင့် အမြဲတမ်း အန်းဒရွိုက်နှင့် လက်တွဲလာခဲ့သော ဆမ်ဆောင်းက ယခုကဲ့သို့ လမ်းခွဲသစ်ထွင်ကာ တရုတ်ဖြစ် စမတ်ဖုန်းစနစ်ကို ပြောင်းလဲအသုံးပြုချင်သည်မှာ စဉ်းစားရခက်လှသည်။

​"ဟုတ်ကဲ့... ဆမ်ဆောင်းက တန်ရွမ်စနစ်ရဲ့ ရင်းမြစ်ကုဒ်တွေနဲ့ နီဗားနားအိတ်စ်ရဲ့ မူပိုင်ခွင့် နည်းပညာအမျိုးမျိုးကို ခွင့်ပြုပေးဖို့ တောင်းဆိုထားပါတယ်"

ဟု မိုရှင်းယာက ခေါင်းငုံ့လျက် တုန့်ပြန်သည်။

​"ဟက် ကိုရီးယားလူမျိုးတွေကတော့ တကယ့်ကို အကွက်ကျကျ စီစဉ်ထားတာပဲ"

လင်းဖန်က လှောင်ပြုံးဖြင့် ရယ်မောလိုက်သည်။

"ရင်းမြစ်ကုဒ်ကို ဖွင့်ပေးလိုက်တာဟာ တန်ရွမ်စနစ်ကို တခြားလူလက်ထဲ အပ်လိုက်တာနဲ့ အတူတူပဲ ကျွန်တော်တို့ရဲ့ မရေမတွက်နိုင်တဲ့ ကြိုးစားအားထုတ်မှုတွေနဲ့ သုတေသနရလဒ်တွေကို သူတို့က စကားလုံးအနည်းငယ်နဲ့ လဲလှယ်ချင်နေတာပေါ့လေ"

​"ဒါ့အပြင် နီဗားနား အိတ်စ်ကိုလည်း သူတို့အပိုင် သိမ်းထားချင်ကြသေးတယ် ဒီလောကမှာ အဲဒီလောက်အထိ ကောင်းတဲ့အရာ ဘယ်ရှိပါ့မလဲ"

​ကမ္ဘာ့မိုဘိုင်းလ်ဖုန်းဈေးကွက်တွင် ဟွာဝေး (Warwick)၊ ရှောင်မီ (Rice) နှင့် ချိုင်းနားစတား (China Star) တို့ ထွန်းကားလာသောအခါ ဆမ်ဆောင်း၏ ဈေးကွက်ဝေစုမှာ ၁၀ ရာခိုင်နှုန်းအောက်သို့ ကျဆင်းသွားခဲ့သည်။ သူတို့သာ လုံထန်နှင့် ပူးပေါင်းသွားပါက အန်းဒရွိုက်အတွက် ကြီးမားသော ထိုးနှက်ချက် ဖြစ်လာပေလိမ့်မည်။ သို့သော် လုံထန်အတွက်မူ မည်သည့်အကျိုးကျေးဇူးမှ ရှိမည်မဟုတ်ပေ။

​ကိုရီးယားသည် ရိုးရာစက်မှုလုပ်ငန်းများမှသည် ခေတ်သစ်စက်မှုလုပ်ငန်းများအထိ နည်းပညာပိုင်းတွင် အောင်မြင်မှုများ ရရှိပြီး ကမ္ဘာ့ဖွံ့ဖြိုးပြီးနိုင်ငံတစ်ခုအဖြစ် ရပ်တည်ရန် အမြဲကြိုးပမ်းနေသူ ဖြစ်သည်။ ၁၉၅၀ ပြည့်နှစ်များကတည်းက အမေရိကန်၏ အကူအညီဖြင့် မော်တော်ကား၊ လေကြောင်းနှင့် သင်္ဘောကျင်းလုပ်ငန်းများတွင် ကြီးမားသော အောင်မြင်မှုများ ရရှိခဲ့သည်။

​ဆမ်ဆောင်းသည် ထိုနောက်ခံအခြေအနေများအောက်တွင် ကြီးထွားလာသော အင်အားကြီး ကုမ္ပဏီစုကြီး ဖြစ်သည်။ မိုဘိုင်းလ်ဖုန်းလုပ်ငန်းတွင်ပင် ထိပ်တန်းသို့ ရောက်ခဲ့သော်လည်း ဆော့ဖ်ဝဲလ်ပိုင်းတွင်မူ ဥရောပ၊ အမေရိကန်နှင့် တရုတ်တို့ကိုပင် မှီနိုင်စွမ်း မရှိသေးသည်မှာ သူတို့အတွက် တစ်ခုတည်းသော နောင်တပင် ဖြစ်သည်။

​3G ခေတ်သို့ ရောက်ရှိလာကတည်းက တရုတ်၏ အင်တာနက်နည်းပညာမှာ ထူးခြားလာခဲ့ပြီး ဥရောပနှင့် အမေရိကန်တို့ကိုပင် ကျော်လွန်သွားသယောင် ရှိခဲ့သည်။ နယ်ပယ်အသီးသီးတွင် ခေတ်ရှေ့ပြေးနေခဲ့သည်။ ယခုအခါ တစ်ခုတည်းသော လိုအပ်ချက်ဖြစ်သည့် ဆော့ဖ်ဝဲလ်စနစ်ကိုပါ ဖြည့်ဆည်းနိုင်ခဲ့ပြီ ဖြစ်သဖြင့် အပြစ်ပြောစရာ မရှိတော့ပေ။

​ထို့ကြောင့်ပင် ကိုရီးယားသည် လုံထန်အုပ်စုအပေါ် အာရုံကျလာခြင်း ဖြစ်သည်။ နီဗားနား အိတ်စ်၏ ထုတ်လုပ်မှု လုပ်ငန်းစဉ်နှင့် တန်ရွမ်စနစ်ကိုသာ ရရှိလိုက်ပါက ခေတ်သစ်တွင် အရင်းအမြစ်မှစ၍ ဦးဆောင်နိုင်မည် ဖြစ်သဖြင့် မည်သူက လက်လွှတ်လိုပါမည်နည်း။

​"သူဌေး... ဆမ်ဆောင်းရဲ့ အကူအညီသာ ရမယ်ဆိုရင် လုံထန်က ကမ္ဘာ့ဈေးကွက်ကို ပိုပြီး မြန်မြန်ဆန်ဆန် ထိုးဖောက်နိုင်မှာပါ"

​မိုရှင်းယာက လုပ်ငန်းဖွံ့ဖြိုးတိုးတက်ရေး ရှုထောင့်မှနေ၍ အကျိုးအပြစ်များကို စဉ်းစားကာ လင်းဖန်ကို နားချရန် ကြိုးစားလိုက်သည်။

​"ဟုတ်တယ် ဆမ်ဆောင်းက လုံထန်ကို ကမ္ဘာ့ဈေးကွက်ထဲ အချိန်တိုအတွင်း ရောက်အောင် လုပ်ပေးနိုင်တာ အမှန်ပဲ"

​လင်းဖန်၏ မျက်ဝန်းများ လက်ခနဲ ဖြစ်သွားကာ လေးနက်သောလေသံဖြင့် ဆက်ပြောသည်။

"ဒါပေမဲ့ မင်းစဉ်းစားဖူးလား ဒီလို အချိန်တိုလေးအတွက်နဲ့ တန်ရွမ်စနစ်အပေါ်မှာ ရှိတဲ့ ကျွန်တော်တို့ရဲ့ ထိန်းချုပ်ခွင့်ကို လက်လွှတ်လိုက်ပြီး ဆမ်ဆောင်းနဲ့ ဈေးကွက်ဝေစု ခွဲဝေယူရမှာလား"

​"လုံထန်က ဆော့ဖ်ဝဲလ်ရောင်းတဲ့ ကုမ္ပဏီသက်သက် မဟုတ်ဘူး ကျွန်တော်တို့ရဲ့ တကယ့်ရည်ရွယ်ချက်က မိုဘိုင်းလ်ဖုန်းတွေ ထုတ်လုပ်ရောင်းချဖို့ပဲ ဒီစနစ်က အဓိက သော့ချက်ပဲလေ ဒီအားသာချက်ကိုသာ ဖယ်ထုတ်လိုက်ရင် ဆမ်ဆောင်းကို ဘယ်လိုနည်းနဲ့ အနိုင်ယူနိုင်တော့မှာလဲ"

​ကာလတိုအတွင်းမှာတော့ ဆမ်ဆောင်း၏ အကူအညီဖြင့် ပြိုင်ဘက်များကို ဖယ်ရှားပြီး ကမ္ဘာ့ဈေးကွက်ကို ခိုင်ခိုင်မာမာ ဆုပ်ကိုင်ထားနိုင်မည် ဖြစ်သည်။ သို့သော် ရေရှည်ရှုထောင့်က ကြည့်လျှင်မူ မိမိကိုယ်တိုင်အတွက် ပိုမိုအစွမ်းထက်သော ပြိုင်ဘက်ကြီးတစ်ခုကို မွေးမြူပေးလိုက်သလို ဖြစ်ပေလိမ့်မည်။

​"ကျွန်တော်တို့ ဘယ်သူ့အကူအညီမှ မလိုဘူး ကိုယ့်ဘာသာကိုယ်ပဲ ကမ္ဘာ့ထိပ်တန်းကို ရောက်အောင် သွားနိုင်တယ် တန်ရွမ်စနစ်က ထူးခြားကောင်းမွန်တဲ့ လက်ရာတစ်ခုဖြစ်သလို၊ နီဗားနားအိတ်စ်ဟာလည်း ပြည့်စုံတဲ့ ထုတ်ကုန်တစ်ခုပဲ ဒီနှစ်ခုပေါင်းစပ်လိုက်ရင် အက်ပဲလ်တောင်မှ လုံထန်ရဲ့ ရှုံးနိမ့်သူ ဖြစ်လာမှာပါ"

​"ဟုတ်ကဲ့၊ ကျွန်မ နားလည်ပါပြီ"

​မိုရှင်းယာမှာ ပညာအရည်အချင်း မြင့်မားသော်လည်း စီးပွားရေးလောကတွင်မူ စာတွေ့သာ ရှိသေးသူ ဖြစ်သဖြင့် အရာရာကို ဘက်စုံမတွေးနိုင်ခဲ့သောကြောင့် ထိုအကြံဉာဏ်ကို ပေးမိခြင်း ဖြစ်သည်။ သို့သော် လင်းဖန်၏ ရှင်းပြချက်ကို ကြားလိုက်ရသောအခါ သူမ၏ မူလအသိဉာဏ်များနှင့် ပေါင်းစပ်သွားကာ အတွေးအခေါ်သစ်များ ပွင့်လင်းသွားသလို ခံစားလိုက်ရသည်။

​"ကျန်းဖန်ကို အကြောင်းကြားလိုက်ပါ၊ ဆမ်ဆောင်းကလူတွေနဲ့ ဆက်သွယ်ဖို့ပေါ့ CPU လိုမျိုး ကျွန်တော်တို့ ပူးပေါင်းဆောင်ရွက်လို့ရမယ့် တခြားနယ်ပယ်တွေတော့ ရှိပါတယ်"

​သေသေချာချာ စဉ်းစားပြီးနောက် လင်းဖန်က ကြားနေနည်းလမ်းတစ်ခုကို ရွေးချယ်လိုက်သည်။ အရေးမကြီးသော အရာအချို့ကို ပေးကာ ဆမ်ဆောင်း၏ ကိုရီးယားဈေးကွက် လမ်းကြောင်းများကို ရယူပြီး ဆမ်ဆောင်း၏ ပြည်တွင်းဈေးကွက်ကိုပါ သိမ်းပိုက်ရန် သူ ဆုံးဖြတ်လိုက်သည်။

​"သူဌေး... ဒါကတော့ ကိုင်တွယ်ရ နည်းနည်းခက်လိမ့်မယ် ထင်တယ်"

မိုရှင်းယာက မျက်မှောင်ကြုတ်ကာ ပြောသည်။

​ဆမ်ဆောင်းသည် ဖုန်းထုတ်လုပ်သူသက်သက် မဟုတ်ဘဲ ကိုရီးယားရှိ တစ်ခုတည်းသော ကုမ္ပဏီစုကြီး ဖြစ်သည်။ ကိုရီးယား၏ အင်အား ၅၀ ရာခိုင်နှုန်းကို သူတို့က ချုပ်ကိုင်ထားသည်။ ဤကဲ့သို့ ဧရာမလုပ်ငန်းကြီးနှင့် ဆွေးနွေးရာတွင် အသားကိုလည်း စား၊ အရိုးကိုလည်း ထုတ်ယူဖို့ဆိုသည်မှာ အလွန်ပင် ခက်ခဲလှသည်။

​"အင်း... ကျန်းဖန်ကိုပဲ တတ်နိုင်သမျှ ကြိုးစားခိုင်းလိုက်ပါ"

​လင်းဖန်လည်း ထိုအချက်ကို နားလည်သဖြင့် ထပ်လောင်းမှာကြားလိုက်သည်။

​ထိုစဉ် မိုရှင်းယာက တစ်ခုခုကို သတိရသွားကာ အမြန်ပြောလိုက်သည်။

"နောက်တစ်ခုကတော့ တရုတ်ပြည်သူ့လုံခြုံရေးဝန်ကြီးဌာနက လူတွေလည်း သူဌေးကို တွေ့ချင်တယ်လို့ ပြောထားပါတယ် ဒါက အမှန်ပဲလားဆိုတာ ကျွန်မ သေချာမသိလို့ပါ"

​ပြည်သူ့လုံခြုံရေးဝန်ကြီးဌာနသည် တရုတ်နိုင်ငံ၏ ထူးခြားသော အဖွဲ့အစည်းတစ်ခု ဖြစ်ပြီး တစ်နိုင်ငံလုံးရှိ ရဲတပ်ဖွဲ့ကို ကွပ်ကဲရသူများ ဖြစ်သည်။ စစ်တပ်နှင့် နှိုင်းယှဉ်လျှင် ပို၍ နူးညံ့သည်ဟု ထင်ရသော်လည်း သူတို့သည်လည်း အာဏာစက်ကြီးမားသော အဖွဲ့အစည်းပင် ဖြစ်သည်။ ထိုသို့သော အချိန်တွင် သူတို့ဘက်မှ စတင်၍ တံခါးလာခေါက်သည်မှာ မည်သူမဆို ယုံရခက်မည်ပင်။

​"သူတို့ကို ပြန်ပြောလိုက်ပါ၊ တွေ့လို့ရပါတယ် မွန်းလွဲပိုင်းလောက်မှာ အချိန်ပေးမယ်လို့"

​လင်းဖန် ခဏမျှ စဉ်းစားပြီးနောက် အမိန့်ပေးလိုက်သည်။ စစ်တပ်က လုံထန်အုပ်စုထံမှ နီဗားနား အိတ်စ်ဖုန်းများကို ဝယ်ယူနေခြင်းကို ပြည်သူ့လုံခြုံရေးဝန်ကြီးဌာနက မသိဘဲ မနေပေ။ ထို့ကြောင့် သူတို့ လာရောက်ရခြင်း၏ တစ်ခုတည်းသော အကြောင်းရင်းမှာ နီဗားနားအိတ်စ်ဖုန်းများကို ဝယ်ယူရန်ပင် ဖြစ်ပေလိမ့်မည်။

...........................................................