ရွှီနင်၏ အစီအစဉ်
Vol. 16 Ch. 155
ပေါင့်ဝေကျင်းသည် ပေါင့်မိသားစု အစောင့်အရှောက်၏ အမှတ်အသားဖြစ်သော တံဆိပ်ပြားလေးကို စိုက်ကြည့်နေမိသည်။
‘မိသားစုထဲက တစ်ယောက်ယောက်က ငါ့ကို သတ်ချင်နေတာလား။’
‘ငါက အခုလို ဆိုးရွားတဲ့ အခြေအနေမှာ ရှိနေတာတောင် ဘာလို့ တစ်ယောက်ယောက်က ငါ့ကို ပစ်မှတ်ထားနေရတာလဲ။’
သူသည် မည်သူ့အပေါ်တွင်မှ ခြိမ်းခြောက်မှု မဖြစ်နိုင်ပါလျက်နှင့် အဘယ်ကြောင့် ဤသို့ ဖြစ်ရသနည်းဆိုသည်ကို ပေါင့်ဝေကျင်း စဉ်းစား၍ မရနိုင်တော့ချေ။
ရွှီနင်က စိတ်ဝင်တစား ရှိနေလေသည်။
“မင်းက ပေါင့်မိသားစုမှာ နေရတာ တော်တော်လေး စိတ်ကုန်နေပုံပဲနော်”
ရွှီနင်က ပေါ့ပေါ့ပါးပါး မေးလိုက်သည်။
“ဟုတ်ပါတယ်...” ပေါင့်ဝေကျင်း၏ အကြည့်များမှာ အထီးကျန်မှုများဖြင့် ပြည့်နှက်နေသည်။
သူ့မျက်လုံးထဲတွင် မုန်းတီးမှု အရိပ်အယောင်များ ဖြတ်ပြေးသွားသည်။ မိခင်ဖြစ်သူ ကွယ်လွန်ပြီးနောက်တွင် သူသည် ပေါင့်မိသားစုကို စတင်မုန်းတီးခဲ့ခြင်း ဖြစ်သည်။
မတရားမှုကို ခံစားရခြင်းနှင့် လျစ်လျူရှုခံရခြင်းများကြောင့် ပေါင့်မိသားစုမှ ထွက်ခွာရန် သူ အကြိမ်ကြိမ် ကြိုးစားခဲ့ဖူးသည်။ သို့သော် ဖခင်ဖြစ်သူ ပေါင့်ရှင်းရှန်ထံ ခွင့်တောင်းတိုင်း အငြင်းခံခဲ့ရသည်။
ပေါင့်ရှင်းရှန်သည် ဤသားအပေါ် ဂရုမစိုက်သော်လည်း သားဖြစ်သူက မိသားစုမှ ထွက်ခွာသွားပါက ပြင်ပလူများက ပေါင့်မိသားစုသည် ကြင်နာမှုမရှိဟု ထင်မြင်သွားမည်ကို စိုးရိမ်သောကြောင့် ဖြစ်သည်။
ထို့ကြောင့်လည်း ပေါင့်ဝေကျင်းမှာ ဤပတ်ဝန်းကျင်ဆိုးထဲ၌သာ ကြီးပြင်းလာခဲ့ရလေသည်။
မိမိကိုယ်ကိုယ် သိုင်းပညာကို ကြိုးစားလေ့ကျင့်ပြီး မိသားစုထဲတွင် အဆင့်အတန်း မြင့်မားလာကာ ဘဝကို ပိုမိုကောင်းမွန်အောင် ပြုလုပ်နိုင်မည်ဟု သူ ထင်မြင်ခဲ့ဖူးသည်။
ယခင်ကမူ သူ့တွင် ထိုကဲ့သို့သော အိပ်မက်မျိုး ရှိခဲ့သည်။
သို့သော် ယခုအခါတွင်မူ ပေါင့်မိသားစုဝင်တစ်ဦးက သူ့ကို သတ်ရန် ကြိုးစားနေခြင်းကြောင့် သူ့တွင် ရှိသမျှ မျှော်လင့်ချက်များအားလုံး ပျက်စီးသွားရချေပြီ။
“စီနီယာ... ကျွန်တော့်ရဲ့ အခြေအနေကို နားလည်လားဟင်”
ပေါင့်ဝေကျင်းက ရွှီနင်ကို မေးလိုက်သည်။
သူသည် ရွှီနင်ကို မည်သူမှန်း မသိသော်လည်း ဤပုဂ္ဂိုလ်က သူ့အသက်ကို ကယ်တင်ပေးခဲ့သဖြင့် ကျေးဇူးတင် လေးစားမှုများစွာ ရှိနေမိသည်။
“နည်းနည်းတော့ နားလည်ပါတယ်”
ရွှီနင်က ပြန်ဖြေလိုက်သည်။
ပေါင့်ဝေကျင်းသည် အနည်းငယ် တွေဝေသွားဟန်ဖြင့် အံကြိတ်ကာ တောင်းဆိုလိုက်လေသည်။
“ဒီလိုဆိုရင် စီနီယာ... ကျွန်တော် မိသားစုထဲမှာ ဘယ်လောက်တောင် ရုန်းကန်နေရတယ်ဆိုတာ စီနီယာ သိမှာပါ။ မိသားစုကနေ ထွက်ခွာပြီးနောက်ပိုင်း ကျွန်တော့်ကို စီနီယာ့နောက် လိုက်ခွင့်ပြုပါလား။ စီနီယာ့ရဲ့ တပည့်အဖြစ် မဟုတ်ဘဲ အစေခံအဖြစ်နဲ့ပဲ ဖြစ်ဖြစ် ဘယ်နေရာမဆို လိုက်ပါပါ့မယ်။”
ပေါင့်ဝေကျင်း၏ လေသံမှာ အလွန်ပင် လေးနက်နေသည်။
“မဖြစ်ဘူး”
ရွှီနင်က ပေါင့်ဝေကျင်း၏ တောင်းဆိုမှုကို ငြင်းပယ်လိုက်လေသည်။
ပေါင့်ဝေကျင်း၏ မျက်လုံးထဲမှ မျှော်လင့်ချက်များမှာ စိတ်ပျက်မှုအဖြစ် ချက်ချင်း ပြောင်းလဲသွားတော့သည်။ သို့သော် ဤသည်မှာ မထူးဆန်းလှပေ။
တစ်ဖက်လူမှာ ဟင်းလင်းပြင်နယ်ပယ် သိုင်းပညာရှင်တစ်ဦး ဖြစ်ရာ သူ၏ စွမ်းအားနှင့်ဆိုလျှင် မိသားစုတစ်ခု၏ အကြီးအကဲ သို့မဟုတ် ခေါင်းဆောင်အဆင့်ရှိသော ပုဂ္ဂိုလ်ကြီး ဖြစ်ပေသည်။
ဤမျှ အဆင့်အတန်း မြင့်မားသူတစ်ဦးမှာ သူ့လို သာမန်လူတစ်ဦးကို အစေခံအဖြစ် မည်သို့ အလိုရှိမည်နည်း။
“မင်း ပေါင့်မိသားစုကို မုန်းသလား”
ရွှီနင်က ရုတ်တရက် မေးလိုက်သည်။
“မုန်းပါတယ်”
ပေါင့်ဝေကျင်းက တုံ့ဆိုင်းခြင်းမရှိဘဲ ပြန်ဖြေလိုက်သည်။
သူသည် မိသားစုထဲတွင် ဆင်းရဲဒုက္ခများစွာကို ခံစားခဲ့ရဖူးသည်။
“ဒါဆိုရင် မင်း ဆုံးရှုံးခဲ့တာတွေကို ဘာလို့ ပြန်မယူဘဲ ခံစားခဲ့ရတာတွေကို ဘာလို့ ပြန်မပေးဆပ်တာလဲ။”
ရွှီနင်၏ စကားကြောင့် ပေါင့်ဝေကျင်း မှင်သက်သွားပြီးနောက် နဖူးမှ ချွေးများ စီးကျလာသည်။
သူက ထစ်ထစ်ငေါ့ငေါ့ဖြင့် “ကျွန်တော်... ကျွန်တော် လုပ်ချင်ပေမဲ့ မလုပ်နိုင်လို့ပါ...”
“ငါ ကူညီပေးမယ်ဆိုရင်ကော”
ပေါင့်ဝေကျင်း အံ့အားသင့်သွားရသည်။
“ဒါ... ဒါပေမဲ့ စီနီယာက ဘာလို့ ကျွန်တော့်ကို ကူညီတာလဲဟင်”
ပေါင့်ဝေကျင်းက သတိထား၍ မေးလိုက်သည်။
ရွှီနင်က ဖုံးကွယ်မထားဘဲ ပြောလိုက်သည်။ “ငါက မင်းတို့မိသားစုက အကြီးအကဲတချို့နဲ့ ရန်ငြိုးရှိလို့ပဲ”
ဤသည်မှာ အမှန်တရားပင် ဖြစ်သည်။ ရွှီနင်သည် မူလက ပေါင့်မိသားစုကို တိုက်ရိုက် ကိုင်တွယ်လိုသော်လည်း ယွဲ့လန်ဂိုဏ်း၏ လက်အောက်ခံဖြစ်နေသော ပေါင့်မိသားစု၏ အထူးအဆင့်အတန်းကြောင့် ဗြောင်ကျကျ မလှုပ်ရှားနိုင်ခြင်း ဖြစ်သည်။
သူ့ကို ပြန်ပေးဆွဲခဲ့သော လူနှစ်ဦးကို လျှို့ဝှက်စွာ လက်စားချေရန် ကြိုးစားလျှင်ပင် ပေါင့်မိသားစု၌ မည်သို့သော အစီအစဉ်များ ရှိနေသည်ကို သူ မသိရှိသေးပေ။ အပေါ်ယံတွင်မူ ပေါင့်ရူရွမ်း တစ်ဦးတည်းသာ ဂိုဏ်းထဲ၌ ရှိနေသည်ဟု သိထားရသည်။
ထို့ကြောင့် ပေါင့်ဝေကျင်း၏ အမှတ်အသားကို အသုံးပြု၍ ပေါင့်မိသားစုအတွင်းသို့ ဦးစွာ ဝင်ရောက်ရန် ဆုံးဖြတ်လိုက်ခြင်း ဖြစ်သည်။ အခြေအနေကို သေချာ နားလည်ပြီးမှသာ ထိုလူနှစ်ဦးကို ရှင်းလင်းပြီး ဝေ့မိသားစုဝင်များကို ကယ်ထုတ်မည် ဖြစ်သည်။
ဤနည်းလမ်းမှာ အန္တရာယ်အကင်းဆုံးဖြစ်ပြီး အောင်မြင်ပါက ပိုမိုကောင်းမွန်သော ရလဒ်များ ရရှိနိုင်ပေသည်။
အကယ်၍ ပေါင့်ဝေကျင်းသာ ပေါင့်မိသားစုတွင် အရှိန်အဝါရှိသော ပုဂ္ဂိုလ်တစ်ဦး ဖြစ်လာခဲ့လျှင် ရွှီနင်သည် ကျိဖုန်းစီရင်စု တောင်ပိုင်းရှိ လူသားအင်အားစုတချို့ကိုပါ ထိန်းချုပ်နိုင်မည် ဖြစ်သည်။
“စီနီယာက ပေါင့်မိသားစုကို ပစ်မှတ်ထားနေတာလား”
ပေါင့်ဝေကျင်း အံ့သြသွားသော်လည်း သူ ဂရုမစိုက်ပေ။ အဘယ်ကြောင့်ဆိုသော် မိသားစုမှာ သူ့ကို လုံးဝ စိတ်နာစေခဲ့ပြီ ဖြစ်သောကြောင့်ပင်။
“ဟုတ်တယ်”
ရွှီနင်က ပြောလိုက်သည်။
“မင်း ဆန္ဒရှိမယ်ဆိုရင် ပေါင့်မိသားစုထဲမှာ မင်း ခိုင်ခိုင်မာမာ ရပ်တည်နိုင်အောင် ငါ ကူညီပေးမယ်။”
ရွှီနင်သည် သူ့စွမ်းအားဖြင့် ပေါင့်ဝေကျင်းကို သာမန်လူသားနယ်ပယ်၏ အထွတ်အထိပ်ဆီသို့ အလွယ်တကူ ပို့ဆောင်ပေးနိုင်မည်ဟု ယုံကြည်လျက်ရှိနေသည်။
အကယ်၍ ပေါင့်ဝေ့ကျင်းသာ ပါရမီရှိလျှင် ဆေးပြားများကို အသုံးပြု၍ ဟင်းလင်းပြင်နယ်ပယ်သို့ပင် မြှင့်တင်ပေးနိုင်သေးသည်။
ပေါင့်မိသားစုတွင် ဟင်းလင်းပြင်နယ်ပယ် သိုင်းပညာရှင်များစွာ ရှိသော်လည်း အများစုမှာ လောကီရေးရာများကို ဂရုမစိုက်ဘဲ ကျင့်ကြံခြင်းကိုသာ အာရုံစိုက်ကြသူများ ဖြစ်ပေသည်။
“ကျွန်တော် သဘောတူပါတယ်” ပေါင့်ဝေကျင်း နောက်ထပ် မတွေဝေတော့ပေ။
ဤအခွင့်အရေးကို လက်လွတ်ခံလိုက်ပါက သူသည် မိသားစုထံ ပြန်သွားပြီး အသေခံရမည် သို့မဟုတ် နှင်ထုတ်ခံရမည် ဖြစ်သည်။
ဤဟင်းလင်းပြင်နယ်ပယ် သိုင်းပညာရှင်သည် သူ့ကို အသုံးချလိုခြင်း ဖြစ်သည်ကို ပေါင့်ဝေကျင်း သိသော်လည်း ဤအရာမှ သူ အကျိုးကျေးဇူး ရရှိနေသရွေ့ အားလုံးက ထိုက်တန်ပေသည်။
“ဒါပေမဲ့ စီနီယာ...” ပေါင့်ဝေကျင်းက သတိပေးလိုက်သည်။
“ပေါင့်မိသားစုရဲ့ နောက်ကွယ်မှာ ကျိဖုန်းစီရင်စုရဲ့ အရှင်သခင်တစ်ပါးဖြစ်တဲ့ ယွဲ့လန်ဂိုဏ်း ရှိနေပါတယ်။ ယွဲ့လန်ဂိုဏ်းက တကယ်ကို ကြောက်စရာကောင်းပြီး ပညာရှင်တွေ အများကြီး ရှိတာပါ။ ပေါင့်မိသားစုရဲ့ အတော်ဆုံးတပည့်ဖြစ်တဲ့ ပေါင့်ရူရွမ်းဟာ ယွဲ့လန်ဂိုဏ်းရဲ့ တပည့်ရင်းတစ်ဦး ဖြစ်ပါတယ်”
ပေါင့်ရူရွမ်း၏ အမည်ကို ကြားလိုက်ရသောအခါ ရွှီနင်၏ မျက်နှာတွင် ထူးဆန်းသော အပြုံးတစ်ခု ပေါ်လာသည်။
‘ပေါင့်ရူရွမ်း သေဆုံးသွားတဲ့ သတင်းက ပေါင့်မိသားစုဆီ မရောက်သေးဘူးပဲ’
ရွှီနင် စိတ်ထဲမှ တွေးလိုက်မိသည်။
သို့သော် အပြင်ပန်းတွင်မူ ရွှီနင်က တည်ငြိမ်စွာပင် ပြောလိုက်သည်။
“ဘာမှမဖြစ်ဘူး”
ဤယုံကြည်မှုက ပေါင့်ဝေကျင်း၏ စိတ်ကို ဆွဲဆောင်သွားခဲ့သည်။ ဤစီနီယာမှာ ယွဲ့လန်ဂိုဏ်းကိုပင် မကြောက်လောက်အောင် စွမ်းအားကြီးနေသလော။ သူသည် ဟင်းလင်းပြင်နယ်ပယ် စတုတ္ထအဆင့်ထက်ပင် သာလွန်နေသလော။
“လာ... မင်းရဲ့ ကျင့်ကြံမှုကို မြှင့်တင်ဖို့ နေရာတစ်ခု ရှာရအောင်။”
ရွှီနင်သည် ပေါင့်ဝေကျင်း၏ အဖြေကို မစောင့်ဘဲ သူ့ကော်လာကို ဆွဲကာ တောင်ပေါ်သို့ လျင်မြန်စွာ တက်သွားလေသည်။
ပေါင့်ဝေကျင်းသည် သူ သယ်ဆောင်လာသော ကုန်ပစ္စည်းများအတွက် စိုးရိမ်နေသော်လည်း စကားတစ်ခွန်းမှ မဟတော့ပေ။
ယခုအချိန်တွင် သူ့အတွက် ထိုပစ္စည်းများမှာ ဘာမှမဟုတ်တော့ချေ။
ရွှီနင်က ပေါင့်ဝေကျင်းကို တောင်ပေါ်ရှိ ဂူတစ်ခုအတွင်းသို့ ခေါ်ဆောင်သွားလိုက်သည်။
“ရော့...”
ရွှီနင်သည် ရင်းမြစ်သန့်စင်ဆေးပြား တစ်လုံးကို ထုတ်ပေးလိုက်သည်။ ဤရင်းမြစ်သန့်စင်ဆေးပြားမှာ ရွှီနင်ကိုယ်တိုင် ဖော်စပ်ထားသော အဆင့်မြင့်ဆေးပြားပင် ဖြစ်သည်။
“ဆေးပြားတွေပါလား”
ဆေးပြားများကို မြင်လိုက်ရသောအခါ ပေါင့်ဝေကျင်း မျက်လုံးများ အရောင်တောက်သွားသည်။
သူသည် ယခင်က ဆေးပြားများကို တစ်ခါမျှ မသောက်ဖူးပေ။
သူသည် ခန္ဓာကိုယ်အားဖြည့်ရန်အတွက်ပင် ဈေးပေါသော ဆေးပင်များကိုသာ ကိုယ်တိုင် ပြုတ်သောက်ခဲ့ရသူ ဖြစ်သည်။ ဆေးပြားများမှာ အလွန်ဈေးကြီးပြီး မိသားစုရှိ အတော်ဆုံးသူများသာ ရရှိကြလေသည်။
‘ဒီဆေးပြားက သာမန်မဟုတ်ဘူး’
ပေါင့်ဝေကျင်းသည် ဆေးပြားကို တစ်ခဏမျှ စိုက်ကြည့်နေပြီးနောက် မျိုချလိုက်လေသည်။
ဆေးပြားမှာ သူ့ဝမ်းဗိုက်အတွင်းသို့ ရောက်သွားသည်နှင့်တစ်ပြိုင်နက် နွေးထွေးကာ သက်သောင့်သက်သာရှိသော စွမ်းအင်များ ခန္ဓာကိုယ်အနှံ့ ပျံ့နှံ့သွားသည်ကို ခံစားလိုက်ရသည်။
ထို့နောက်တွင် ပေါင့်ဝေကျင်းသည် သူ၏ ကျင့်ကြံမှုအဆင့်မှာ သာမန်လူသားနယ်ပယ် ပဥ္စမအဆင့်မှ ဆဋ္ဌမအဆင့် အတွင်းပိုင်းချီနယ်ပယ်သို့ တိုက်ရိုက် တိုးတက်သွားသည်ကို တွေ့ရှိလိုက်ရသဖြင့် အံ့သြသွားတော့သည်။
‘ဒီပေါင့်ဝေကျင်းက အခြေခံ တော်တော်ကောင်းတာပဲ’
ရွှီနင်သည် ပေါင့်ဝေကျင်း၏ ပါရမီကို အတော်လေး သဘောကျသွားသည်။
ရင်းမြစ်သန့်စင်ဆေးပြားမှာ အဆင့်တက်ရန် အသုံးပြုသော ဆေးမျိုး မဟုတ်သော်လည်း ပေါင့်ဝေကျင်းမှာ ယခင်က အာဟာရနှင့် စွမ်းအင် ချို့တဲ့နေသဖြင့် အဆင့်မတက်နိုင်ဘဲ ဖြစ်နေခြင်း ဖြစ်သည်။
ယခု အဆင့်မြင့်ဆေးပြား၏ အာနိသင်ကြောင့် ခန္ဓာကိုယ်မှာ ပြည့်စုံသွားပြီး သဘာဝအတိုင်း အဆင့်တက်သွားခြင်း ဖြစ်လေသည်။
‘စိတ်အာရုံနယ်ပယ်ကို ရောက်ဖို့ နည်းနည်းပဲ လိုတော့တာပဲ’
ပေါင့်ဝေကျင်း အနည်းငယ် နှမြောသွားသည်။ ဆေးစွမ်းများမှာ လေလွင့်နေသလို ခံစားနေရသောကြောင့် ဖြစ်သည်။
သို့သော် ရွှီနင်က သူ၏ လက်ချောင်းများဖြင့် ပေါင့်ဝေကျင်း၏ ရင်ဘတ်ကို ထိလိုက်ရာ ပျံ့လွင့်တော့မည့် ဆေးစွမ်းများမှာ ခန္ဓာကိုယ်အတွင်း ပြန်လည် စုစည်းသွားပြီး ခန္ဓာကိုယ်ကို ဆက်လက် အားဖြည့်ပေးနေတော့သည်။
“မင်းမှာ အခြေခံကောင်းရှိတယ်... ဆက်ပြီး ကျင့်ကြံနေရင် မကြာခင်မှာ စိတ်အာရုံနယ်ပယ်ကို ရောက်သွားလိမ့်မယ်”
ရွှီနင်က ပြောလိုက်သည်။
“ကျေးဇူးတင်ပါတယ် စီနီယာ”
ပေါင့်ဝေကျင်းသည် ဒူးထောက်ကာ ရွှီနင်ကို ဦးညွှတ်လိုက်လေသည်။ သူ၏ အနာဂတ်အတွက် ပထမဆုံးအကြိမ် မျှော်လင့်ချက်များ ပြည့်နှက်နေချေပြီ။
“ဒူးထောက်စရာ မလိုဘူး”
ရွှီနင်က သူ၏ အစစ်အမှန်ချီစွမ်းအားဖြင့် ပေါင့်ဝေကျင်းကို မလိုက်သည်။ ထို့နောက် ရွှီနင်သည် ရင်းမြစ်သန့်စင်ဆေးပြားများ ပါဝင်သော သစ်သားသေတ္တာတစ်လုံးနှင့် အဆိပ်မှုန့်အိတ်တစ်အိတ်ကို ပေးလိုက်လေသည်။
“မင်း စိတ်အာရုံနယ်ပယ်ကို ရောက်သွားရင် နောက်တစ်လုံး ထပ်သောက်လို့ရတယ်။ ဒီအိတ်ထဲမှာတော့ အဆိပ်မှုန့်တွေ ပါတယ်... သာမန်လူသားနယ်ပယ် သိုင်းသမားတွေအတွက် အသက်အန္တရာယ်ရှိသလို ဟင်းလင်းပြင်နယ်ပယ် သိုင်းသမားတွေတောင် သတိမထားရင် ဒုက္ခရောက်နိုင်တယ်။ ဒါကို မင်းရဲ့ အသက်ကယ်လက်နက်အဖြစ် ထားလိုက်ပါ”
ပေါင့်မိသားစုက သူ့ကို သတ်ရန် ကြိုးစားနေသဖြင့် ရွှီနင်က သူ့ကို အသက်ဘေးမှ လွတ်မြောက်နိုင်မည့် နည်းလမ်းအချို့ ပေးထားခြင်း ဖြစ်သည်။
“ကျေးဇူးတင်ပါတယ် စီနီယာ”
ပေါင့်ဝေကျင်းမှာ ရွှီနင်အပေါ် ကျေးဇူးတင် လေးစားမှုများဖြင့်သာ ပြည့်နှက်နေတော့သည်။