အခန်း (၅၅-၅၇)

အခန်း ၅၅ - ကျားဖြူဒြပ်စင်ဓားသိုင်း

“ပြိုင်ပွဲတစ်ခုမှာ ဒဏ်ရာရတာကတော့ ရှောင်လွှဲလို့မရတဲ့ ကိစ္စပဲလေ... တကယ်လို့ ရှင်က ရှင့်သားကို ဒဏ်ရာမရစေချင်ဘူးဆိုရင် သူ့ကို ပြိုင်ပွဲမှာ မပါဝင်ခိုင်းသင့်ဘူး...”

စုဝမ်ယီသည် တင်းကြပ်စွာ မျက်မှောင်ကြုတ်လိုက်ပြီး သူ၏ ကျော့ရှင်းသော ကိုယ်ဟန်ကို မတ်မတ်ထားလျက် သိုင်းပြိုင်ပွဲစင်မြင့်ပေါ်တွင် ရပ်နေခဲ့၏။ သူ၏ ဓားဦးမှာ တုန်းဖန်းမင်ဘက်သို့ ချိန်ရွယ်ထားသည်။

အနားမှာ ရှိနေသော မြောင်လေးက လေးနက်သည့် လေသံနှင့် ပြောလိုက်၏။

“သခင်မလေး... တကယ်လို့ ဒီအဘိုးကြီးကသာ လှုပ်ရှားဖို့ ကြိုးစားမယ်ဆိုရင် ကျွန်တော် သူတို့ တစ်မိသားစုလုံးကို အမှုန့်ကြိတ်ပစ်မယ်...”

စုဝမ်ယီ၏ မျက်ဝန်းများမှာ ကျုံ့သွားခဲ့ရ၏။ ဤ စီနီယာကြောင်ကြီးမှာ... တကယ်ကို စိတ်မရှည်တတ်သော စရိုက်ရှိသူ ဖြစ်ပေသည်။

တုန်းဖန်းမင်သည် သတ်ဖြတ်လိုသော အငွေ့အသက်များနှင့်အတူ ရှေ့သို့ တက်လှမ်းလာခဲ့သော်လည်း ရုတ်တရက် ရှောင်ရင်းဟောင်၏ အသံမှာ သူ၏နားထဲသို့ ရောက်ရှိလာခဲ့သည်။ သူ၏ အမူအရာမှာ ချက်ချင်းပင် ပြောင်းလဲသွားခဲ့ပြီး တုန်းဖန်းကျောက်အား ပွေ့ချီကာ ထွက်ခွာသွားတော့၏။

မည်သို့ပင်ဆိုစေကာမူ ဤသည်မှာ မိသားစုသုံးခုသိုင်းပြိုင်ပွဲ ဖြစ်ပေသည်။ ထို့ပြင် ချီထျန်းဓားဂိုဏ်းမှ အကြီးအကဲလော့ ကိုယ်တိုင်လည်း ရှိနေ၏။ အကယ်၍ သူသာ စုဝမ်ယီကို တိုက်ခိုက်လိုက်မည်ဆိုပါက ချီထျန်းဓားဂိုဏ်း၏ အကြီးအကဲလော့ထံမှ ထွက်ပေါ်လာမည့် ကြီးမားသော ဒေါသတရားကို သူ ခံနိုင်ရည်ရှိလိမ့်မည် မဟုတ်ပေ။ အကြီးအကဲလော့က ဤမိန်းကလေးအပေါ် စိတ်ဝင်စားနေသည်ဟု ရှောင်ရင်းဟောင်က သူ့အား ဝိညာဉ်အာရုံမှတစ်ဆင့် ပြောပြခဲ့ခြင်း ဖြစ်၏။ အကယ်၍ ထိုမိန်းကလေးသာ နောင်အနာဂတ်တွင် ချီထျန်းဓားဂိုဏ်း၏ အတွင်းစည်းတပည့် ဖြစ်လာခဲ့လျှင် သူ၏ တုန်းဖန်းမိသားစုမှာ မည်သည့်အကြောင်းနှင့်မျှ သူ့ကို ရန်စဝံ့လိမ့်မည် မဟုတ်ပေ။

တုန်းဖန်းမင် ရုတ်တရက် ထွက်ခွာသွားသည်ကို မြင်လိုက်ရသည့်အခါမှ စုဝမ်ယီသည် သက်ပြင်းတစ်ချက်ကို ချလိုက်ရတော့၏။ သူသည် သိုင်းပြိုင်ပွဲစင်မြင့်ပေါ်မှ ခုန်ဆင်းလိုက်ပြီး ပွဲကြည့်စင်မြင့်ဆီသို့ ပြန်လည်ရောက်ရှိလာခဲ့သည်။

အခြားသူများသည် စုဝမ်ယီအား အလွန်ပင် ရှုပ်ထွေးသော အမူအရာများနှင့် ကြည့်နေကြ၏။ တုန်းဖန်းကျောက်ထက် ခွန်အားနည်းသူများ၏ မျက်ဝန်းများအတွင်း၌ ကြောက်ရွံ့မှုများ ရှိနေသော်လည်း တုန်းဖန်းကျောက်ထက် သန်မာသော အိုယန်ရှို့နှင့် ရှောင်ချူမော့တို့၏ မျက်ဝန်းများအတွင်း၌မူ တောက်လောင်နေသော တိုက်ခိုက်လိုစိတ်များ ဖြစ်ပေါ်လာခဲ့သည်။

“အိုယန်ရှို့... မင်းရဲ့ ခွန်အားနဲ့ဆိုရင် သူ့ကို အနိုင်ယူနိုင်မယ်လို့ မင်း ထင်လား...”

ရှောင်ချူမော့က တိုးညင်းစွာ မေးမြန်းလိုက်သည်။

အိုယန်ရှို့သည် စုဝမ်ယီ၏ ရင်သပ်ရှုမောဖွယ် ဓားချက်ကို ပြန်လည်တွေးတောရင်း တည်ငြိမ်စွာ ပြောလိုက်၏။

“ပြောဖို့တော့ ခက်တယ်... ဒါပေမဲ့ တိုက်ကြည့်မှပဲ သိမှာပေါ့...”

ရှောင်ချူမော့က အသာအယာ ခေါင်းညိတ်လိုက်သည်။ သူ၏ အမြင်တွင်မူ စုဝမ်ယီ၏ ခွန်အားမှာ အိုယန်ရှို့နှင့် အဆင့်တူလောက် ဖြစ်နိုင်သော်လည်း သူ၏ အဆင့်နှင့်ဆိုလျှင်မူ ကွာခြားချက် အများကြီး ရှိနေသေးသည်ဟု ထင်မြင်နေခဲ့၏။ သူသည် အခြားသူများကို ဂရုမစိုက်ပေ။ သူ၏ ကောင်းကင်အဆင့်နေရာသာ အတည်ဖြစ်နေမည်ဆိုလျှင် လုံလောက်လေသည်။ မည်သို့ပင်ဆိုစေကာမူ ဤနေရာရှိ လူအားလုံးထဲတွင် သူ၏ ကျင့်ကြံမှုမှာ အမြင့်ဆုံး ဖြစ်ပေသည်။ သူ၏ ဖခင်မှာလည်း ငွေလမင်းမြို့တော်၏ မြို့စားမင်း ဖြစ်သဖြင့် သူသည် မည်သည့်အကြောင်းနှင့်မျှ ရှုံးနိမ့်၍ မဖြစ်နိုင်ပေ။

မြို့စားအိမ်တော်၏ အပြင်ဘက်တွင် အနက်ရောင် ရထားလုံးတစ်စီးမှာ ရပ်တန့်နေဆဲ ဖြစ်၏။ လူအများမှာ အသွားအလာ ရှိနေကြသော်လည်း မည်သူမျှ ၎င်းကို သတိမထားမိကြသကဲ့သို့ ရှိနေသည်။

မြင်းနက်ကြီးက သူ၏ခေါင်းကို လှည့်လိုက်ပြီး မထီမဲ့မြင်အပြုံးနှင့် ပြောလိုက်၏။

“သခင်ကြီး... ဒီမိသားစုသုံးခုသိုင်းပြိုင်ပွဲမှာ ပါဝင်တဲ့သူတွေက တအားကို အားနည်းလွန်းပါတယ်... ကျွန်တော့်အထင်တော့ ရှောင်ရင်းဟောင်ရဲ့ သားကပဲ သခင်မလေးကို အနည်းငယ် ဖိအားပေးနိုင်လိမ့်မယ် ထင်တယ်...”

“စိတ်ရှည်ရှည် ထားစမ်းပါ...”

ရီယွင်က အသာအယာ ပြုံးလျက် ပြောလိုက်၏။ မိသားစုသုံးခုသိုင်းပြိုင်ပွဲဆိုသည်မှာ အစပြုခြင်းသာ ရှိသေး၏။

လော့လီနှင့် ကျွင်းမော့ရှောင်တို့သည် လက်ရှိတွင် နဂါးဘိုးဘေး အနှစ်သာရသွေးကို သုံး၍ သူတို့၏ နဂါးနတ်ဘုရား သွေးဗီဇကို သန့်စင်နေကြချိန် ဖြစ်သဖြင့် ဤကာလအတွင်း စုဝမ်ယီသည် သူ၏ အတွေ့အကြုံများကို တစ်ကိုယ်တည်း ရှာဖွေရပေမည်။ ရီယွင်သည် ဤမိန်းကလေးအပေါ် မျှော်လင့်ချက်များစွာ ထားရှိထား၏။ သူသည် စုဝမ်ယီအတွက် အားကောင်းသော ပြိုင်ဘက်များကို အဆင့်ဆင့် စီစဉ်ပေးရန် ရည်ရွယ်ထားပြီး မူလပင်လယ်နယ်ပယ် အဆင့် ၁ မှ စတင်ကာ ခိုင်မာသော အခြေခံကို တည်ဆောက်နိုင်ရန် ပြင်ဆင်နေခြင်း ဖြစ်သည်။

‘နဂါးနတ်ဘုရားဂိုဏ်းမှာ တပည့် သုံးယောက်ပဲ ရှိတာ...’

ရီယွင်က တွေးတောလိုက်မိ၏။ သူတို့၏ ဘိုးဘေးတစ်ဦးအနေဖြင့် သူသည် ဤတပည့် သုံးဦးစလုံးကို မည်သည့်စိန်ခေါ်မှုကိုမဆို ရင်ဆိုင်နိုင်သည့် ဓားတာအို၏ ထိပ်သီးသန်မာသူများ ဖြစ်လာအောင် လေ့ကျင့်ပေးရန် ရည်ရွယ်ထားသည်။ ဤသည်မှာ သူ၏ အတိတ်က ပုံစံတူ ကိုယ်ပွား သုံးယောက်ကို ဖန်တီးလိုက်ခြင်းနှင့် အလားတူပေသည်။ ထိုသို့ဆိုလျှင် သူ တစ်နေ့နေ့တွင် ချန်းနန်ကုန်းမြေကြီးမှ ထွက်ခွာသွားခဲ့လျှင်ပင် နဂါးနတ်ဘုရားဂိုဏ်းမှာ ဆက်ခံသူများ ရှိနေပေလိမ့်မည်။

ညနေခင်း ရောက်ရှိလာသည်နှင့်အမျှ အမှောင်ထုမှာ တဖြည်းဖြည်းချင်း ဖုံးလွှမ်းလာခဲ့၏။ မြို့စားအိမ်တော်အတွင်း၌ မီးရောင်စုံများ လင်းထိန်နေခဲ့ပြီး မိသားစုသုံးခုသိုင်းပြိုင်ပွဲမှာလည်း အရှိန်အဟုန်ပြင်းစွာ ကျင်းပနေဆဲ ဖြစ်သည်။

စုဝမ်ယီသည် ငါးပွဲဆက်တိုက် အနိုင်ရရှိထားပြီး ယခုနှစ် ပြိုင်ပွဲ၏ အကြီးမားဆုံးသော နာမည်ကျော်ပြိုင်ပွဲဝင်တစ်ဦးအဖြစ် သတ်မှတ်ခြင်း ခံထားရ၏။ သို့သော်လည်း သူသည် အိုယန်ရှို့ သို့မဟုတ် ရှောင်ချူမော့တို့နှင့် မဆုံတွေ့ရသေးပေ။ အိုယန်ရှို့မှာမူ ရှောင်ချူမော့ကို ရှုံးနိမ့်ခဲ့သည်မှလွဲ၍ အခြားမည်သည့်ပွဲတွင်မျှ ရှုံးနိမ့်ခြင်း မရှိသေးပေ။ လက်ရှိတွင် သူ၏ အမှတ်မှာ တတိယနေရာ၌ ရှိနေ၏။ အကယ်၍ သူသာ ဒုတိယနေရာကို ရယူလိုလျှင် စုဝမ်ယီကို သေချာပေါက် အနိုင်ယူရပေမည်။

“နောက်ထပ် ပွဲစဉ်ကတော့... နံပါတ် ၂ အိုယန်ရှို့နဲ့ နံပါတ် ၁၀ စုဝမ်ယီ...”

ဒိုင်၏ အသံမှာ ထွက်ပေါ်လာခဲ့၏။

ပတ်ဝန်းကျင်ရှိ ပရိသတ်များထံမှ မိုးခြိမ်းသံကဲ့သို့ ကျယ်လောင်လှသော လက်ခုပ်သံများနှင့် အားပေးသံများမှာ ပေါက်ကွဲထွက်ပေါ်လာခဲ့သည်။ ကျောတွင် သွေးနီရောင်ဓားကို လွယ်ထားပြီး ရွှေရောင်ဝတ်စုံကို ဝတ်ဆင်ထားသော ဤလှပလှသည့် အမျိုးသမီးမှာ သူ၏ ပြိုင်ဘက်ကင်းသော ခန့်ညားမှုများဖြင့် ကြည့်ရှုသူအားလုံးကို ဖမ်းစားထားနိုင်ခဲ့လေသည်။

စုဝမ်ယီသည် ပြိုင်ဘက်ကင်းသော အလှတရားနှင့် ထူးကဲသော အရှိန်အဝါများကို ပိုင်ဆိုင်ထားပြီး သာလွန်ထူးကဲသော ဓားသိုင်းပညာရပ်များကိုလည်း တတ်မြောက်ထားသူ ဖြစ်သည်။ သူသည် ခုနစ်ပွဲဆက်တိုက် အနိုင်ရရှိထား၏။ လက်ရှိတွင် သူ၏ အဆင့်မှာ အနည်းဆုံး လူသားအဆင့်နေရာကို ရရှိထားပြီး ဖြစ်သည်။ အကယ်၍ သူသာ အိုယန်ရှို့ကို အနိုင်ယူနိုင်ခဲ့မည်ဆိုပါက ထိပ်သီးအဆင့် နှစ်ခုအတွင်းသို့ ဝင်ရောက်နိုင်မည် ဖြစ်၏။ နောက်ဆုံးတွင် သူသည် ယခုနှစ်၏ အသန်မာဆုံးဟု သတ်မှတ်ထားသည့် မြို့စားမင်း၏သားနှင့် နောက်ဆုံးဗိုလ်လုပွဲတွင် ရင်ဆိုင်ရပေလိမ့်မည်။

သိုင်းပြိုင်ပွဲစင်မြင့်ပေါ်တွင် ရပ်နေရင်း စုဝမ်ယီသည် သူ၏ နက်ရှိုင်းသောခုနစ်စဉ်ကြယ်ဓားကို ဆွဲထုတ်လိုက်ရာ သူ၏နောက်ကျောတွင် နဂါးနတ်ဘုရား ပုံရိပ်ယောင်တစ်ခု ထွက်ပေါ်လာခဲ့၏။ သူသည် အိုယန်ရှို့အပေါ် မည်သည့် အထင်သေးမှုမျိုးမျှ မရှိပေ။ နှစ်ပေါင်းများစွာ လှည့်လည်သွားလာရင်း ထွက်ပြေးခဲ့ရသော ဘဝအတွေ့အကြုံများက စုဝမ်ယီအား မည်သည့်ပြိုင်ဘက်ကိုမျှ အထင်မသေးတတ်ရန် သင်ကြားပေးခဲ့ပြီး ဖြစ်သည်။ ခုနစ်ပွဲဆက်တိုက် အောင်မြင်ခဲ့သော်လည်း စုဝမ်ယီမှာ အလွန်ပင် တည်ငြိမ်အေးဆေးနေဆဲ ဖြစ်၏။

သူသည် ဘိုးဘေးကြီး၏ ဆန္ဒအတိုင်း ဤမိသားစုသုံးခုသိုင်းပြိုင်ပွဲတွင် ပါဝင်နေခြင်း ဖြစ်ပေသည်။ ဘိုးဘေးကြီးမှာ သူ အတွေ့အကြုံများ ရရှိစေရန် ရည်ရွယ်ထားခြင်း ဖြစ်၏။ ဤအတွေ့အကြုံဆိုသည်မှာ မိမိ၏ ဓားနှလုံးသားကို ကြံ့ခိုင်အောင် ပြုလုပ်ခြင်းသာမက အင်အားကြီးသော ရန်သူများနှင့် ရင်ဆိုင်ရသည့်အခါ မိမိထက် အဆင့်မြင့်သောသူများကိုပါ ယှဉ်ပြိုင်နိုင်ရန် ရည်ရွယ်ခြင်း ဖြစ်သည်။ လက်ရှိအချိန်အထိ အိုယန်ရှို့သာလျှင် အင်အားကြီးသော ရန်သူတစ်ဦးအဖြစ် သတ်မှတ်နိုင်ပေသည်။

စုဝမ်ယီသည် သူ၏ ဂျူနီယာမောင်လေးနှင့် ညီမလေးတို့ကဲ့သို့ပင် ပြင်းထန်သော တိုက်ပွဲဖိအားများအောက်တွင် သူ၏ ကျင့်ကြံမှုအဆင့်ကို ကျော်ဖြတ်နိုင်ရန် မျှော်လင့်နေခဲ့၏။ မည်သို့ပင်ဆိုစေကာမူ သူသည်လည်း ကျားနဂါးဆေးလုံးကို သောက်သုံးထားခဲ့သည် မဟုတ်ပါလား။ ၎င်းမှာ ဘိုးဘေးကြီး ပေးသနားခဲ့သော နတ်ဘုရားအဆင့် ဆေးလုံးတစ်လုံး ဖြစ်ပေသည်။ ၎င်း၏ ဆေးစွမ်းအင် အများစုမှာ သူ၏ ခန္ဓာကိုယ်အတွင်း၌ ကိန်းအောင်းနေဆဲဖြစ်ပြီး ဖိအားများနှင့် ကြုံတွေ့ရသည့်အခါ တစ်ခါတည်း ကျော်ဖြတ်နိုင်ရန်အတွက် တိတ်ဆိတ်စွာ စောင့်ဆိုင်းနေခြင်း ဖြစ်ပေသည်။

အနက်ရောင် ရထားလုံးအတွင်း၌ ရီယွင်သည် စုဝမ်ယီ၏ ထူးကဲနဂါးနတ်ဘုရား အရှိန်အဝါများမှာ ပိုမိုအားကောင်းလာသည်ကို ခံစားမိလိုက်သဖြင့် သူ၏ မျက်နှာမှာ တည်ငြိမ်နေသော်လည်း မျက်ဝန်းအတွင်း၌မူ ချီးကျူးရိပ်အချို့ ရှိနေခဲ့၏။

စီနီယာအစ်မကြီးဖြစ်သော စုဝမ်ယီမှာ လော့လီနှင့် ကျွင်းမော့ရှောင်တို့ထက် အသက်အနည်းငယ် ပိုကြီးသဖြင့် သူ၏ စရိုက်မှာ ပိုမိုရင့်ကျက်ပေသည်။ ရီယွင်သည် သူ၏ ဤအချက်ကို အလွန်ပင် သဘောကျလှပေ၏။ ဂိုဏ်းမှာ အခက်အခဲများနှင့် ကြုံတွေ့ရသည့်အခါ စုဝမ်ယီသည် လိုက်လံဖမ်းဆီးသူများကို လှည့်ဖြားရန်အတွက် ရှေ့ဆုံးမှနေ၍ ရဲဝံ့စွာ တက်လှမ်းခဲ့သူ ဖြစ်သည်။ အခြားသူများကို ကာကွယ်ရန်အတွက် မိမိကိုယ်ကို စတေးလိုသော စိတ်ဓာတ်မျိုးမှာ တကယ်ကို ချီးကျူးစရာ ကောင်းလှပေသည်။

နဂါးနတ်ဘုရားဂိုဏ်း၏ ၁၃ ဆက်မြောက် ဂိုဏ်းချုပ်အဖြစ် ရီယွင်သည်လည်း အတိတ်တွင် တပည့်အချို့ကို လေ့ကျင့်ပေးခဲ့ဖူး၏။ သို့သော်လည်း ထိုအချိန်မှာ နဂါးနတ်ဘုရားဂိုဏ်း အထွန်းတောက်ဆုံး အချိန်ဖြစ်ပြီး ကမ္ဘာပေါ်တွင် မည်သူမျှ ရန်မစဝံ့သော အချိန်လည်း ဖြစ်ပေသည်။

ရီယွင် အတိတ်ကို ပြန်လည်တွေးတောနေစဉ်မှာပင် စုဝမ်ယီနှင့် အိုယန်ရှို့တို့၏ တိုက်ပွဲမှာ စတင်နေခဲ့ပြီ ဖြစ်၏။

အိုယန်ရှို့၏ ကျင့်ကြံမှုအဆင့်မှာ စုဝမ်ယီထက် အဆင့်ငါးခုစာ သာလွန်နေသော်လည်း သူသည် ထူးခြားသော သွေးဗီဇကို ပိုင်ဆိုင်ထားသူ မဟုတ်ပေ။ ထို့ကြောင့် သူသည် အကြွင်းမဲ့ သာလွန်သော အနေအထားတွင် မရှိပေ။ သို့သော်လည်း အိုယန်ရှို့၏ တိုက်ခိုက်ရေးစွမ်းရည်မှာ အမှန်ပင် ကြောက်မက်ဖွယ်ကောင်းလှပေသည်။

အိုယန်မိသားစု၏ ကျားဖြူဒြပ်စင်ဓားသိုင်းမှာ သတ္တုဓာတ်ကို အခြေခံထားသော သုတ်သင်ခြင်း အတတ်ပညာများတွင် ထူးချွန်ပြီး သူ၏ ဓားအလင်းတန်းတိုင်းမှာ အံ့ဩဖွယ်ကောင်းလှသလို ထက်မြက်သော ဖြတ်တောက်နိုင်စွမ်းများကိုလည်း ပိုင်ဆိုင်ထား၏။ အကယ်၍ စင်မြင့်ပေါ်တွင် အစွမ်းထက်သော အစီအရင်များဖြင့် ကာကွယ်မထားခဲ့လျှင် ၎င်းမှာ လွန်ခဲ့သော အချိန်ကတည်းက ပျက်စီးသွားခဲ့လေသည်။

စုဝမ်ယီ၏နောက်တွင် နဂါးနတ်ဘုရား ပုံရိပ်ယောင် ရှိနေသကဲ့သို့ပင် အိုယန်ရှို့၏ နောက်တွင်လည်း ကျားဖြူကြီးတစ်ကောင်၏ ပုံရိပ်ယောင်တစ်ခု ထွက်ပေါ်လာခဲ့၏။ ထိုပုံရိပ်မှာ အလွန်ပင် ထင်ရှားလှပြီး ကြီးမားသောအရွယ်အစားနှင့်အတူ ဟင်းလင်းပြင်အတွင်း၌ ခန့်ညားစွာ ထိုင်နေကာ ထည်ဝါသော အရှိန်အဝါများကို ထုတ်လွှတ်နေခဲ့သည်။

တောက်ပသော ရွှေရောင်အလင်းတန်းများ ထွက်ပေါ်နေသည့် ဓားအလင်းတန်းများသည် နဂါးနတ်ဘုရား ဓားအလင်းတန်းနှင့် ထိတွေ့သွားကြပြီး ဆက်တိုက်ဆိုသလို ကျယ်လောင်သော ပေါက်ကွဲသံကြီးများ ထွက်ပေါ်လာခဲ့၏။

တိုက်ရိုက် ထိပ်တိုက်ရင်ဆိုင်မှုများစွာ ပြုလုပ်ပြီးနောက် စုဝမ်ယီမှာ အနည်းငယ် အားနည်းသော အနေအထားသို့ ရောက်ရှိသွားခဲ့ပြီး အိုယန်ရှို့၏ ဓားသိုင်းအောက်တွင် ဖိနှိပ်ခြင်းကို ခံလိုက်ရသည်။ ကံကောင်းသည်မှာ သူ၏ နဂါးနတ်ဘုရား အသွင်တစ်ရာ ပုံရိပ်ယောင်နဂါးခြေလှမ်းသိုင်းကြောင့် ဓားအလင်းတန်းများ၏ တိုက်ခိုက်မှုများကို ကံသီစွာဖြင့် ရှောင်တိမ်းနိုင်ခဲ့သည်။ ကောင်းကင်ယံတစ်ခုလုံးမှာ နဂါးနတ်ဘုရား ပုံရိပ်ယောင်များဖြင့် ပြည့်နှက်သွားခဲ့ပြီး တစ်ခုချင်းစီမှာ စုဝမ်ယီ၏ ပုံရိပ်နှင့် အလွန်ပင် တူညီနေခဲ့၏။ ထို့ကြောင့် အိုယန်ရှို့၏ ဓားသိုင်းမှာ ပြင်းထန်ပြီး နဂါးနတ်ဘုရား ပုံရိပ်ယောင်များကို အဆက်မပြတ် ရိုက်ခွဲနေသော်လည်း စုဝမ်ယီ၏ စစ်မှန်သော နေရာကိုမူ သူ မည်သို့မျှ ရှာမတွေ့နိုင်ခဲ့ပေ။

“ဒီမိန်းကလေးက တကယ်ကို ထူးချွန်တာပဲ...”

ချီထျန်းဓားဂိုဏ်းမှ အကြီးအကဲလော့က သူ၏ မျက်လုံးများကို အနည်းငယ် ကျဉ်းလိုက်ပြီး ချီးကျူးသော အမူအရာနှင့် ပြောလိုက်၏။

စင်မြင့်ပေါ်က တိုက်ပွဲမှာ အလွန်ပင် ပြင်းထန်နေခဲ့သည်။ မျက်စိတစ်မှိတ်အတွင်းမှာပင် နှစ်နာရီခန့် ကုန်ဆုံးသွားခဲ့လေသည်။

အိုယန်ရှို့သည် ငွေလမင်းမြို့တော်၏ လူငယ်မျိုးဆက်များအကြား ဒုတိယအသန်မာဆုံးဟု သတ်မှတ်ထားသည့်အတိုင်းပင် သူ၏ ပြင်းထန်သော တိုက်စစ်များကို အဆက်မပြတ် ထိန်းသိမ်းထားနိုင်ခဲ့၏။ သို့သော်လည်း စုဝမ်ယီထံမှ မောပန်းနွမ်းနယ်သော အမူအရာမျိုး မတွေ့ရသည့်အခါ သူသည် အလွန်ပင် အံ့အားသင့်သွားခဲ့ရသည်။ သူ၏ ပြင်းထန်သော တိုက်ခိုက်မှုများအောက်တွင် အကြီးအကျယ် ဖိနှိပ်ခံထားရသော်လည်း သူမသည် တန်ပြန်တိုက်ခိုက်နိုင်စွမ်းကို လုံးဝ လက်မလွှတ်ခဲ့ပေ။

တဖြည်းဖြည်းနှင့် ညဉ့်နက်လာခဲ့လေသည်။ နက်မှောင်သော ညကောင်းကင်ယံတွင် ကြယ်အချို့မှာ မှိန်ဖျော့စွာ လင်းလက်နေကြ၏။ ရွှေရောင်အဝိုင်းကြီးသဖွယ် လပြည့်ဝန်းကြီးမှာလည်း အရှေ့ဘက် ကောင်းကင်ယံမှနေ၍ တဖြည်းဖြည်း မြင့်တက်လာခဲ့သည်။

အနက်ရောင် ရထားလုံးအတွင်း၌ ရီယွင်သည် ငွေလမင်းမြို့တော်၏ မြေအောက်အနက်ပိုင်းဆီသို့ လှမ်းကြည့်လိုက်ရင်း သူ၏ အကြည့်များမှာ ရုတ်တရက် ဝင်းလက်သွားလေ၏။

အခန်း ၅၅ ပြီးပါပြီ။

အခန်း ၅၆ - ငွေလမင်းမြို့တော်၏ မြေအောက်လျှို့ဝှက်ချက်များ

“သခင်ကြီး... တစ်ခုခုကို ရှာဖွေတွေ့ရှိလိုက်တာလား...”

မြင်းနက်ကြီးသည်လည်း မြေအောက်ဘက်ဆီသို့ လှမ်းကြည့်လိုက်သည်။ သို့သော်လည်း မည်သည့်အရာကိုမျှ သတိမပြုမိပေ။

ရီယွင်သည် ညကောင်းကင်ယံမှ လပြည့်ဝန်းကြီးကို တစ်ချက်ကြည့်လိုက်ပြီး တိုးညင်းစွာ ရယ်မောလိုက်၏။

“မကြာခင်မှာပဲ မင်း သိရပါလိမ့်မယ်... ဒီလောက်အထိ စိတ်လှုပ်ရှားဖို့ကောင်းတဲ့ ပြပွဲကြီးတစ်ခု ရှိနေလိမ့်မယ်လို့ ဘယ်သူက ထင်ထားပါ့မလဲ...”

“ကောင်းပါပြီ သခင်ကြီး...”

မြင်းနက်ကြီးသည် မြေအောက်က လျှို့ဝှက်ချက်ကို သိလိုစိတ် ပြင်းပြနေသော်လည်း သူ၏သခင်က ထုတ်ဖော်မပြောသဖြင့် သူ ထပ်မံ၍ မမေးမြန်းရဲတော့ဘဲ သူ၏ စပ်စုချင်စိတ်ကိုသာ မျိုသိပ်ထားလိုက်ရတော့သည်။

သိုင်းပြိုင်ပွဲစင်မြင့်ထက်၌ အိုယန်ရှို့နှင့် စုဝမ်ယီတို့၏ တိုက်ပွဲမှာ ပို၍ပင် ရင်ခုန်စိတ်လှုပ်ရှားဖွယ် ကောင်းလာခဲ့လေသည်။ တိုက်ပွဲတစ်ခုလုံးတွင် စုဝမ်ယီမှာ အိုယန်ရှို့၏ ဖိနှိပ်ခြင်းကို ခံထားရပြီး တန်ပြန်တိုက်ခိုက်ရန် အခွင့်အရေး အလွန်နည်းပါးနေ၏။ မည်သို့ပင်ဆိုစေကာမူ သူတို့ကြားတွင် ကျင့်ကြံမှုအဆင့် ငါးဆင့်စာမျှ ကွာခြားချက် ရှိနေပေသည်။ လူတိုင်း၏ အမြင်တွင်မူ စုဝမ်ယီသည် ရှုံးနိမ့်မသွားဘဲ ဤမျှအထိ တောင့်ခံထားနိုင်ခြင်းမှာ အံ့ဖွယ်တစ်ခုပင် ဖြစ်ပေသည်။

“လုံးဝကို မထင်ထားရဘူး... ဒီမိန်းကလေးက တကယ်ကို ဇွဲကောင်းတာပဲ... အခုထိလည်း အရှုံးပေးမယ့် အရိပ်အယောင်တောင် မတွေ့ရသေးဘူး...”

အကြီးအကဲလော့က သူ၏ မုတ်ဆိတ်မွှေးကို သပ်ရင်း ကျေနပ်စွာ ရယ်မောလိုက်၏။ သူသည် စုဝမ်ယီ၏ ခိုင်မာသော စိတ်ဓာတ်နှင့် ထူးချွန်သော ပါရမီကို ပို၍ပို၍ သဘောကျလာခဲ့သည်။ အကယ်၍ ကောင်းကောင်း လေ့ကျင့်ပေးမည်ဆိုပါက သူမသည် သေချာပေါက် အံ့ဩဖွယ်ကောင်းသော ပါရမီရှင်တစ်ဦး ဖြစ်လာပေလိမ့်မည်။

ရှောင်ရင်းဟောင်သည်လည်း ခေါင်းညိတ်ပြုံးလိုက်၏။ သူသည် စုဝမ်ယီအပေါ် မည်သည့် ထူးခြားသော အတွေးမျိုးမျှ မရှိပေ။ မည်သို့ပင်ဆိုစေကာမူ စုဝမ်ယီသည် အိုယန်ရှို့ကိုပင် ခက်ခက်ခဲခဲ ရင်ဆိုင်နေရသည်ကို သူ မြင်တွေ့နေရသဖြင့် သူ၏သားဖြစ်သူ ရှောင်ချူမော့၏ ပြိုင်ဘက် မဖြစ်နိုင်ဟု သူ တွေးတောနေခြင်း ဖြစ်၏။ ထို့ကြောင့် သူ စိုးရိမ်စရာ မရှိပေ။ ကောင်းကင်အဆင့်နေရာမှာ သူ၏သားအတွက်သာ ဖြစ်ရပေမည်။

တိုက်ပွဲမှာ နောက်ထပ် တစ်နာရီခန့်အထိ ဆက်လက် ဖြစ်ပွားနေခဲ့သည်။

စုဝမ်ယီမှာ မောပန်းနွမ်းနယ်သော အမူအရာမျိုး မတွေ့ရသေးပေ။ အိုယန်ရှို့မှာမူ သူ၏ နဖူးပေါ်တွင် ချွေးစက်များ စတင်ထွက်ပေါ်လာပြီဖြစ်သည်။

‘ဒီနုနယ်လှပတဲ့ အလှလေးက ငါ့ဘဝမှာ တွေ့ရခဲတဲ့ ကြံ့ခိုင်မှုမျိုးကို ပိုင်ဆိုင်ထားတာပဲ...’

သူသည် စိတ်ထဲမှနေ၍ ညည်းတွားလိုက်မိ၏။ အကယ်၍ ဤတိုက်ပွဲသာ ဆက်လက် ဖြစ်ပွားနေမည်ဆိုပါက သူ၏ ချီစွမ်းအင်များနှင့် ခွန်အားများ ကုန်ဆုံးသွားမည်ဖြစ်ပြီး သူ၏ ဓားသိုင်းအစွမ်းမှာလည်း သိသိသာသာ လျော့နည်းသွားပေလိမ့်မည်။

အိုယန်ကျန့်ထျန်းသည်လည်း ဤသည်ကို သတိပြုမိလိုက်၏။ သူသည် သူ၏ လက်ဖက်ရည်ကို အေးအေးဆေးဆေး သောက်လိုက်ရင်း အရေးမစိုက်သော လေသံနှင့် ပြောလိုက်သည်။

“မိန်းကလေးငယ်... မင်းက ငါ့သားရဲ့ ပြိုင်ဘက် မဟုတ်ပါဘူး... ဘာလို့ အတင်းအကျပ် ရုန်းကန်နေရတာလဲ... အရှုံးပေးလိုက်တာက ပိုပြီးတော့ အဆင်ပြေမှာပါ...”

‘အရှုံးပေးရမယ် ဟုတ်လား... မဖြစ်နိုင်ဘူး...’

စုဝမ်ယီမှာ စကားပြောရန် အချိန်မရှိသော်လည်း စိတ်ထဲမှနေ၍ လှောင်ပြုံး ပြုံးလိုက်မိ၏။

‘ငါ့မှာ နဂါးဘိုးဘေး သွေးဗီဇ ရှိတယ်... ငါ့ရဲ့ ရုပ်ပိုင်းဆိုင်ရာ ခန္ဓာကိုယ်က အခုဆိုရင် အလွန်ကို သန်မာနေပြီ... ငါ ဒီလောက်ကြာအောင် တိုက်ခိုက်နေတာတောင် မောတယ်လို့ တစ်ချက်ကလေးမှ မခံစားရဘူး... နောက်ထပ် ဆယ်နာရီလောက် တိုက်ရမယ်ဆိုရင်တောင် ငါ့အတွက် ပြဿနာ မရှိဘူး... အိုယန်ရှို့ရဲ့ အဆက်မပြတ် ဖိနှိပ်ခံရတာက ငါ့အတွက် အကျိုးကျေးဇူးတွေတောင် ရှိသေးတယ်... ငါ့ရဲ့ ကျင့်ကြံမှုအဆင့်က ကျော်ဖြတ်နိုင်တော့မယ့် အနေအထားကို ငါ ခံစားနေရပြီ...’

“ဟွန့်...”

အိုယန်ကျန့်ထျန်းသည် သူ၏စကားမှာ မည်သည့်အကျိုးသက်ရောက်မှုမျှ မရှိသည်ကို မြင်လိုက်ရသည့်အခါ နှာခေါင်းရှုံ့လိုက်၏။ ဤ ခေါင်းမာသော မိန်းကလေးငယ်သည် သူ၏နှုတ်ခမ်းကို တင်းကြပ်စွာ စေ့ထားရင်း သူ၏သား အိုယန်ရှို့နှင့် ပြင်းပြင်းထန်ထန် ဆက်လက် တိုက်ခိုက်နေဆဲ ဖြစ်ပေသည်။ သူသည် မကျေမနပ်နှင့် အသံပြုလိုက်မိသော်လည်း ချီထျန်းဓားဂိုဏ်းမှ အကြီးအကဲလော့၏ ရှေ့တွင်မူ ပို၍ပြင်းထန်သော စကားမျိုး မပြောဝံ့ပေ။

မျက်စိတစ်မှိတ်အတွင်းမှာပင် အမွှေးတိုင်တစ်တိုင်စာခန့် ကုန်ဆုံးသွားခဲ့လေသည်။

အိုယန်ရှို့၏ ခွန်အားများမှာ စတင်ယိုင်နဲ့လာခဲ့ပြီး သူ၏ ချီစွမ်းအင်များမှာလည်း လျော့နည်းလာခဲ့သည်။ သူ၏ ဓားအလင်းတန်းများအတွင်း၌ ဟာကွက်အချို့ ပေါ်လာခဲ့၏။

‘အခွင့်ကောင်းပဲ...’

စုဝမ်ယီ၏ မျက်ဝန်းအတွင်း၌ အေးစက်သော အလင်းတန်းတစ်ခု ဝင်းလက်သွားသလို တစ်ပြိုင်နက်တည်းမှာပင် သူသည် အိုယန်ရှို့၏ ဓားသိုင်းအတွင်းက ဟာကွက်ကို အသုံးချ၍ သူ၏ဓားနှင့် ပိုင်းဖြတ်လိုက်လေသည်။

အိုယန်ရှို့မှာ အလွန်ပင် ထိတ်လန့်သွားခဲ့ရ၏။ သူသည် အလျင်အမြန်ပင် ရှောင်တိမ်းလိုက်သော်လည်း စုဝမ်ယီ၏ ဓားအလင်းတန်းမှာ အရိပ်တစ်ခုကဲ့သို့ သူ့နောက်သို့ လိုက်ပါလာခဲ့သည်။ အိုယန်ရှို့သည် မတတ်သာဘဲ အလျင်အမြန်ပင် ကာကွယ်လိုက်ရတော့၏။

“ဘုန်း...”

ဓားမှာ သူ၏ ပုခုံးကို တည့်တည့် ထိမှန်သွားခဲ့သည်။ အိုယန်ရှို့၏ ပုခုံးထံမှနေ၍ လတ်ဆတ်သော သွေးအချို့ ပန်းထွက်လာခဲ့၏။ သူသည် အော်ဟစ်လိုက်ရင်း မြေပြင်ပေါ်သို့ လဲကျသွားတော့သည်။ မောပန်းနွမ်းနယ်နေမှုနှင့်အတူ ပုခုံးတွင် ဒဏ်ရာရရှိသွားခြင်းကြောင့် သူ၏ စိတ်ဓာတ်မှာ ပြိုလဲသွားခဲ့ရ၏။ သူသည် တကယ်ကို ဆက်လက် တောင့်မခံနိုင်တော့ပေ။

“ငါ အရှုံးပေးပါတယ်...”

အိုယန်ရှို့သည် သူ၏ခေါင်းကို မြှောက်လိုက်ပြီး ပြတ်သားစွာ ပြောလိုက်၏။

“ကောင်းပြီလေ...”

စုဝမ်ယီသည် သူ၏ နက်ရှိုင်းသောခုနစ်စဉ်ကြယ်ဓားကို ဓားအိမ်အတွင်းသို့ ပြန်ထည့်လိုက်ပြီး တိုက်ခိုက်ရေးစင်မြင့်ပေါ်မှ ပျံသန်းဆင်းသက်လိုက်လေသည်။

“တကယ်ကို အံ့ဩဖို့ကောင်းတာပဲ...”

ပတ်ဝန်းကျင်ရှိ ကြည့်ရှုသူများထံမှ စိတ်အားထက်သန်သော လက်ခုပ်သံများ ထွက်ပေါ်လာခဲ့သည်။

“ဝါး... အစ်မစုက တကယ်ပဲ ထပ်နိုင်ပြန်ပြီ... သူ့ထက် အဆင့်ငါးဆင့်စာ သာလွန်တဲ့ အိုယန်ရှို့ကိုတောင် အနိုင်ယူလိုက်တာပဲ... အခုဆိုရင် သူ့ရဲ့ မြေကမ္ဘာအဆင့်နေရာကတော့ အတည်ဖြစ်သွားပြီပေါ့...”

ချန်လုတျဲက လက်ခုပ်တီးလျက် အော်ဟစ်အားပေးနေ၏။

အိုယန်ကျန့်ထျန်းသည် သူ၏သားက စုဝမ်ယီကို ရှုံးနိမ့်သွားသည်ကို မြင်လိုက်ရသည့်အခါ ဒေါသကြောင့် တုန်လှုပ်နေသည်။ သူ၏သားမှာ တိုက်ပွဲတစ်ခုလုံးတွင် စုဝမ်ယီကို ဖိနှိပ်ထားခဲ့သည်မှာ ထင်ရှားသော်လည်း ဤမိန်းကလေးက နောက်ဆုံးတွင် မမျှော်လင့်ဘဲ အနိုင်ရရှိသွားခြင်း ဖြစ်ပေသည်။ စုဝမ်ယီမှာ တားမြစ်ချက် တစ်ခုခုကို လိမ်လည်အသုံးပြုခဲ့သည်ဟု သူ သံသယဝင်လာခဲ့၏။ ဤမျှ နုနယ်သောအမျိုးသမီးတစ်ဦးက ဤမျှအထိ တာရှည်ခံသော တိုက်ခိုက်ရေးစွမ်းရည်မျိုးကို မည်သို့ ပိုင်ဆိုင်ထားနိုင်ပါမည်နည်း။ သူသည် ထရပ်၍ မေးခွန်းထုတ်ရန် ပြင်ဆင်လိုက်သော်လည်း ချီထျန်းဓားဂိုဏ်းမှ အကြီးအကဲလော့၏ မျက်နှာပေါ်က ချီးကျူးသော အပြုံးကို မြင်လိုက်ရသည့်အခါ သူ၏ ဒေါသကို အတင်းအကျပ် မျိုသိပ်လိုက်ရတော့သည်။

‘ဒီမိန်းကလေးက ရှောင်ချူမော့လိုပဲ နောင်အနာဂတ်မှာ ချီထျန်းဓားဂိုဏ်းရဲ့ အတွင်းစည်းတပည့် ဖြစ်လာတော့မှာပဲ... ငါ သူ့ကို ရန်မစဝံ့ဘူး...’

စုဝမ်ယီ ပွဲကြည့်စင်မြင့်ဆီသို့ ပြန်လည်ရောက်ရှိလာသည့်အခါ ရှောင်ချူမော့ တစ်ဦးတည်းသာ ကျန်ရှိတော့ပေသည်။

“မင်းက အစွမ်းထက်တဲ့ ပြိုင်ဘက်တစ်ယောက် ဖြစ်တယ်ဆိုတာ ငါ ဝန်ခံပါတယ်...”

ရှောင်ချူမော့က စုဝမ်ယီကို စိုက်ကြည့်ရင်း အလေးအနက် ပြောလိုက်၏။

“တကယ်လို့ ငါတို့နှစ်ယောက်လုံးက မူလပင်လယ်နယ်ပယ် အဆင့် ၇ မှာသာ ရှိနေမယ်ဆိုရင် ငါ မင်းရဲ့ ပြိုင်ဘက် ဖြစ်မှာ မဟုတ်ဘူး...”

“ဘာကို ဆိုလိုချင်တာလဲ...”

စုဝမ်ယီက အရေးမစိုက်သော လေသံနှင့် မေးလိုက်သည်။

“မင်း တိုက်ခိုက်နေတာ တော်တော်ကြာပြီပဲ... တကယ်လို့ မင်း ငါနဲ့ ဆက်တိုက်မယ်ဆိုရင် မင်း သေချာပေါက် ရှုံးလိမ့်မယ်... ဒါကြောင့် ငါတို့ ကြိုတင်ပြီး သဘောတူညီမှုတစ်ခု လုပ်ထားကြရင် မကောင်းဘူးလား... တိုက်ခိုက်ရေးစင်မြင့်ပေါ် ရောက်တဲ့အခါကျရင် မင်း အသာတကြည်ပဲ အရှုံးပေးလိုက်ပါ...”

ရှောင်ချူမော့က ယုံကြည်မှုအပြည့်နှင့် ပြောလိုက်၏။

“အဲ့ဒါကတော့ မသေချာဘူးလေ... တိုက်ခိုက်ရေးစင်မြင့်ပေါ် ရောက်တဲ့အခါမှပဲ ကြည့်ကြသေးတာပေါ့...”

စုဝမ်ယီက အေးစက်စွာ ပြန်လည်တုံ့ပြန်လိုက်ပြီး လှည့်ထွက်သွားတော့သည်။

ရှောင်ချူမော့၏ အမူအရာမှာ တောင့်ခဲသွားခဲ့ရ၏။ ဤမိန်းကလေးငယ်မှာ တကယ်ကို ခေါင်းမာလွန်းလှပေသည်။

‘တိုက်ခိုက်ရေးစင်မြင့်ပေါ် ရောက်တဲ့အခါကျရင်တော့ ငါ ညှာလို့ မဖြစ်ဘူး... ငါ့ရဲ့ အစွမ်းအထက်ဆုံး ဓားသိုင်းကို သုံးပြီးတော့ သူ့ကို အမြန်ဆုံး အနိုင်ယူရမယ်...’

ခေတ္တမျှ ကြာပြီးနောက်...

ဒိုင်က နောက်ဆုံးဗိုလ်လုပွဲ စတင်ကြောင်း ကြေညာလိုက်သည်။

စုဝမ်ယီနှင့် ရှောင်ချူမော့တို့သည် သိုင်းပြိုင်ပွဲစင်မြင့်ပေါ်သို့ ကိုယ်စီ တက်လှမ်းလိုက်ကြ၏။

ကြည့်ရှုသူအားလုံးက စိတ်အားထက်သန်စွာ လက်ခုပ်လက်ဝါး တီးလိုက်ကြသည်။ စိတ်လှုပ်ရှားဖွယ်ကောင်းသော နဂါးနှင့် ဖီးနစ်တို့၏ တိုက်ပွဲကြီးမှာ စတင်တော့မည် ဖြစ်ပေသည်။

ဤမိသားစုသုံးခုသိုင်းပြိုင်ပွဲ၏ အကြီးမားဆုံးသော နာမည်ကျော်ပြိုင်ပွဲဝင်အဖြစ် လူများစွာက စုဝမ်ယီအပေါ် မျှော်လင့်ချက်များ ထားရှိနေကြ၏။ မည်သို့ပင်ဆိုစေကာမူ သူသည် မူလပင်လယ်နယ်ပယ် အဆင့် ၁ သာ ရှိသေးသော်လည်း အင်အားကြီးသော ပြိုင်ဘက်များကို အဆင့်ဆင့် အနိုင်ယူကာ နောက်ဆုံးဗိုလ်လုပွဲသို့ ရောက်ရှိလာခြင်း ဖြစ်ပေသည်။ လူအုပ်ကြီးက သူ့ကို ပိုမို၍ သဘောကျနေကြတော့သည်။

သူတို့နှစ်ဦး တိုက်ခိုက်ရန် ပြင်ဆင်လိုက်စဉ်မှာပင် စုဝမ်ယီ၏ ပုခုံးပေါ်က မြောင်လေးမှာ ရုတ်တရက် မျက်မှောင်ကြုတ်လိုက်၏။ ၎င်းသည် ပတ်ဝန်းကျင်ရှိ လေထုအတွင်း၌ ဖော်ပြမရနိုင်သော ထူးဆန်းသည့် အရှိန်အဝါတစ်ခုကို ခံစားမိလိုက်ခြင်း ဖြစ်ပေသည်။ ၎င်းသည် ညကောင်းကင်ယံရှိ လပြည့်ဝန်းကြီးကို မော့ကြည့်လိုက်၏။ ရုတ်တရက် ၎င်း၏ ကြောင်မျက်လုံးလေးများမှာ အနည်းငယ် ပြူးကျယ်သွားခဲ့ရသည်။ လမင်း၏ ပတ်ပတ်လည်တွင် မှိန်ဖျော့သော အနီရောင် အလင်းဝိုင်းတစ်ခု ပေါ်ပေါက်နေသည်ကို ၎င်း သတိပြုမိလိုက်ခြင်း ဖြစ်၏။ မြောင်လေးသည် အလွန်ပင် သက်တမ်းရှည်ကြာစွာ နေထိုင်ခဲ့သူဖြစ်ပြီး အတွေ့အကြုံများစွာ ရှိသူ ဖြစ်ပေသည်။ ထိုခဏမှာပင် ဖြစ်နိုင်ခြေတစ်ခုမှာ ၎င်း၏ စိတ်ထဲသို့ ရောက်ရှိလာခဲ့၏။

‘ငွေလမင်းမြို့တော်... ဒါက အရင်တုန်းက ငွေလမင်းဝံပုလွေမျိုးနွယ်တွေရဲ့ တော်ဝင်မြို့တော်လို့ ပြောကြတယ်... ဒါပေမဲ့ လွန်ခဲ့တဲ့ နှစ်ပေါင်း တစ်သောင်းက ငွေလမင်းဝံပုလွေမျိုးနွယ်တွေ ရှုံးနိမ့်သွားပြီး ငွေလမင်းမြို့တော်ကို လူသားမျိုးနွယ်တွေဆီ လွှဲပြောင်းပေးခဲ့ရတာပဲ...’

မြောင်လေးမှာ သူ့ကိုယ်သူ တိုးညင်းစွာ ရေရွတ်နေမိသည်။ ၎င်းသည် အနည်းငယ် စိတ်မသက်မသာ ဖြစ်နေသော်လည်း သူ၏သခင်နှင့်အတူ အလွန်ပင် ရင်းနှီးသော ဦးလေးမြင်းတို့ အနားမှာ ရှိနေသည်ကို တွေးတောမိလိုက်သည့်အခါမှ စိတ်ပြန်လည် ကြည်လင်သွားခဲ့၏။

ယခု သိုင်းပြိုင်ပွဲစင်မြင့်ထက်၌ ရှောင်ချူမော့သည် သူ၏ အစွမ်းအထက်ဆုံးဖြစ်သော နဝမအရှင်သခင်ဓားသိုင်းကို ချက်ချင်းပင် ထုတ်ဖော်လိုက်ပြီး စုဝမ်ယီအား အမြန်ဆုံး အနိုင်ယူနိုင်ရန်အတွက် ပြင်းထန်သော တိုက်စစ်များကို စတင်လိုက်လေသည်။

ဓားအလင်းတန်းများမှာ လှိုင်းတံပိုးများကဲ့သို့ပင် တိုးဝင်လာခဲ့ပြီး တစ်ခုထက်တစ်ခု ပိုမို အားကောင်းလာခဲ့၏။ စုဝမ်ယီမှာမူ ထိုပြင်းထန်လှသော လှိုင်းတံပိုးများအကြားတွင် မြောပါမသွားစေရန် ခက်ခက်ခဲခဲ ကြိုးစားနေရသော လှေငယ်တစ်စင်းကဲ့သို့ ဖြစ်နေခဲ့သည်။

“ဘုန်း...”

ထိုစဉ် သူ၏ ခန္ဓာကိုယ်အတွင်းက အတားအဆီးတစ်ခု ပျက်စီးသွားသကဲ့သို့ ခံစားလိုက်ရ၏။ စုဝမ်ယီ၏ ခန္ဓာကိုယ်မှာ အနည်းငယ် တုန်ခါသွားခဲ့သည်။ ထိုအခိုက်အတန့်တွင် သူသည် မူလပင်လယ်နယ်ပယ် အဆင့် ၂ သို့ ကျော်ဖြတ်နိုင်ခဲ့ပြီပင်။

သူ၏ ချီစွမ်းအင်များ တိုးပွားလာပြီး တိုက်ခိုက်ရေးစွမ်းရည်မှာလည်း သိသိသာသာ မြင့်တက်လာသည်ကို ခံစားလိုက်ရသည့်အခါ စုဝမ်ယီ၏ စိတ်ဓာတ်မှာ ပိုမို တက်ကြွလာခဲ့သည်။ သူသည် နဂါးနတ်ဘုရားတစ်ပါးကဲ့သို့ပင် ကျယ်လောင်စွာ ဟစ်ကြွေးလိုက်ပြီး မြောက်များစွာသော ဓားအလင်းတန်းများနှင့်အတူ ရှောင်ချူမော့အား တန်ပြန်တိုက်စစ်ကို စတင်လိုက်လေတော့သည်။

အခန်း ၅၆ ပြီးပါပြီ။

အခန်း ၅၇ - ချီထျန်းဓားဂိုဏ်းကို ငြင်းပယ်ခြင်း

‘ဘာ... သူက တကယ်ပဲ ကျော်ဖြတ်သွားတာလား...’

ရှောင်ချူမော့မှာ အလွန်ပင် အံ့အားသင့်သွားခဲ့ရ၏။

စုဝမ်ယီသည် တိုက်ပွဲအတွင်းမှာပင် မူလပင်လယ်နယ်ပယ် အဆင့် ၂ သို့ ကျော်ဖြတ်နိုင်လိမ့်မည်ဟု သူ အိပ်မက်ပင် မမက်ဖူးပေ။ ကျင့်ကြံမှုအဆင့် ကျော်ဖြတ်ပြီးနောက်တွင် စုဝမ်ယီမှာ တောင်ပေါ်မှ ဆင်းလာသော ကျားတစ်ကောင်ကဲ့သို့ပင် မည်သူမျှ တားဆီး၍မရတော့ပေ။ သူ၏ တိုက်ခိုက်ရေးစွမ်းရည်မှာ အနည်းဆုံး ဆယ်ဆခန့် မြင့်တက်လာခဲ့၏။

‘ဒါက ဘယ်လိုလုပ် ဖြစ်နိုင်မှာလဲ...’

ရှောင်ချူမော့သည် သူ၏စိတ်ထဲမှနေ၍ ဒေါသတကြီး ဟစ်ကြွေးနေမိသည်။

သူ၏ မူလက သာလွန်မှုများမှာ ခဏချင်းမှာပင် ပျောက်ကွယ်သွားခဲ့၏။ ပတ်ဝန်းကျင်ရှိ ကြည့်ရှုသူများမှာလည်း မှင်တက်မိနေကြတော့သည်။

စုဝမ်ယီသည် တိုက်ပွဲအလယ်တွင် ကျင့်ကြံမှုအဆင့် ကျော်ဖြတ်သွားပြီး ဦးဆောင်မှုကို ရယူကာ ရှောင်ချူမော့နှင့် အကြိတ်အနယ် ပြန်လည်တိုက်ခိုက်နိုင်လိမ့်မည်ဟု သူတို့ ထင်မထားခဲ့ကြပေ။

“အစ်မစု... အစွမ်းကုန် ကြိုးစားပါ...”

လူအုပ်ကြီးအတွင်းမှ ချန်လုတျဲမှာ ပထမဆုံး သတိဝင်လာသူဖြစ်ပြီး သူ၏ လက်ကလေးများကို တီးလျက် အဆက်မပြတ် အော်ဟစ်အားပေးနေတော့သည်။

ပွဲကြည့်စင်မြင့်အတွင်း၌ ပြုံးရွှင်နေသော ချီထျန်းဓားဂိုဏ်းမှ အကြီးအကဲလော့မှလွဲ၍ ကျန်ရှိသောသူများအားလုံးမှာ ညိုမည်းသော မျက်နှာထားများ ရှိနေကြ၏။ အထူးသဖြင့် ရှောင်ရင်းဟောင်ပင် ဖြစ်သည်။

ဤ ငွေလမင်းမြို့တော်၏ မြို့စားမင်းသည် ကောင်းကင်အဆင့်နေရာကို သူ၏သားအတွက် ကြိုတင်သတ်မှတ်ထားရန် ရည်ရွယ်ထားသော်လည်း စုဝမ်ယီ ရုတ်တရက် ပေါ်လာမှုကြောင့် သူ၏ နောက်ဆက်တွဲ အစီအစဉ်များအားလုံး ပျက်စီးသွားခဲ့ရသည်။ သူ၏ အကြီးမားဆုံးသော မျှော်လင့်ချက်မှာ စုဝမ်ယီသည် တာရှည်တိုက်ပွဲများကြောင့် ခွန်အားကုန်ဆုံးသွားပြီး နောက်ဆုံးတွင် သူ၏သားကို ရှုံးနိမ့်သွားရန်သာ ဖြစ်ပေသည်။

“တကယ့်ကို အံ့ဩဖို့ကောင်းတာပဲ... ဒီမိန်းကလေးက တိုက်ပွဲအလယ်မှာတောင် ကျင့်ကြံမှုအဆင့်ကို ကျော်ဖြတ်နိုင်တာပဲ...”

အကြီးအကဲလော့မှာ သူ၏မျက်ဝန်းအတွင်း၌ ချီးကျူးရိပ်များဖြင့် ပြည့်နှက်နေပြီး ပြုံးလျက် ရှိနေသည်။ သူသည် ကောင်းကင်အဆင့်နေရာကို ဂရုမစိုက်ပေ။ သူသည် ချီထျန်းဓားဂိုဏ်းအတွက် ပိုမိုသန်မာသော ပါရမီရှင်များကိုသာ စုဆောင်းလိုခြင်း ဖြစ်၏။

သိုင်းပြိုင်ပွဲစင်မြင့်ထက်၌ စုဝမ်ယီသည်လည်း အံ့အားသင့်နေခဲ့၏။ ဘိုးဘေးကြီး ပေးသနားခဲ့သော နတ်ဘုရားအဆင့် ကျားနဂါးဆေးလုံး၏ ဆေးစွမ်းမှာ အမှန်ပင် ကြောက်မက်ဖွယ်ကောင်းလှပေသည်။ နယ်ပယ်ကြီးတစ်ခုကို ချိပ်ပိတ်ထားပြီးနောက်တွင် သူသည် ရုတ်တရက် ကျော်ဖြတ်နိုင်ခဲ့ခြင်းဖြစ်ပြီး သူ၏ တိုက်ခိုက်ရေးစွမ်းရည်မှာလည်း အနည်းဆုံး ဆယ်ဆခန့် မြင့်တက်လာခဲ့၏။ ယခုအခါ သူသည် ရှောင်ချူမော့နှင့် လက်ရည်တူ ယှဉ်ပြိုင်နိုင်လေသည်။ ရှောင်ချူမော့၏ ဓားသိုင်းမှာ မည်မျှပင် ကြမ်းတမ်းပါစေ သူ၏ နဂါးနတ်ဘုရားဓားသိုင်းက သူ့အား ခိုင်မာစွာ ဖိနှိပ်ထားနိုင်ပေသည်။

ရှောင်ချူမော့မှာ စိုးရိမ်စိတ်များ မြင့်တက်လာခဲ့ပြီး သူ၏ ဓားအရှိန်အဟုန်မှာ ရုတ်တရက် ပြောင်းလဲသွားခဲ့၏။ ထူထပ်လှသော ဓားပုံရိပ်များ ထွက်ပေါ်လာခဲ့သည်။ တစ်ခုပြီးတစ်ခုသော ဓားအလင်းတန်းများမှာ ဟင်းလင်းပြင်အတွင်း၌ စုစည်းလာခဲ့ကြ၏။ မြောက်များစွာသော ဓားအလင်းတန်းများသည် တစ်နေရာတည်းသို့ စုစည်းသွားကြသည်။ ကောင်းကင်နှင့် မြေကမ္ဘာအကြားရှိ အရာအားလုံးမှာ ဓားအလင်းတန်းများ၏ ဖုံးလွှမ်းခြင်းကို ခံလိုက်ရ၏။ အဆုံးမရှိသော ဓားဆန္ဒများမှာ ဤနေရာတွင် စုစည်းသွားကြသည်။ ကောင်းကင်နှင့် မြေကမ္ဘာမှာ မှောင်မိုက်သွားခဲ့ပြီး ဤနေရာတစ်ခုတည်းသာ တောက်ပသော ဓားအလင်းတန်းများဖြင့် လင်းထိန်နေခဲ့၏။

ရွှေရောင်အလင်းတန်းတစ်ခုမှာ ညကောင်းကင်ယံကို ဖြတ်သန်းသွားသော ကြယ်တံခွန်တစ်ခုကဲ့သို့ပင် ဝင်းလက်သွားခဲ့ပြီး ပြိုင်ဘက်ကင်းသော တောက်ပမှုများကို ချန်ရစ်ထားခဲ့သည်။ ထို ရွှေရောင် တောက်ပမှုများအတွင်း၌ အဆုံးမရှိသော အရှိန်အဝါနှင့် အာဏာစက်များ ကိန်းအောင်းနေသကဲ့သို့ပင် စုဝမ်ယီထံသို့ တိုးဝင်လာ၏။

ရှောင်ချူမော့သည် နဝမအရှင်သခင်ဓားသိုင်း၏ အစွမ်းအထက်ဆုံး တိုက်ကွက်ဖြစ်သော "ဓားသောင်းချီ ပေါင်းစည်းခြင်း"ကို ထုတ်ဖော်လိုက်ခြင်း ဖြစ်သည်။

ဤ ပြင်းထန်လှသော တိုက်ခိုက်မှုကို မြင်လိုက်ရသည့်အခါ စုဝမ်ယီမှာ မပေါ့ဆရဲတော့ပေ။ ထိုအခိုက်အတန့်တွင် သူသည် သူ၏ ချီစွမ်းအင်များအားလုံးကို ထုတ်ဖော်လိုက်ပြီး အံ့ဩဖွယ်ကောင်းသော ဓားချက်တစ်ချက်ကို ပိုင်းဖြတ်လိုက်လေသည်။

ဤတိုက်ကွက်မှာလည်း နဂါးနတ်ဘုရားဓားသိုင်း၏ အဆုံးစွန်သော သုတ်သင်ခြင်းတိုက်ကွက် ကိုးခုထဲမှ တစ်ခု ဖြစ်ပေသည်။ ဤသည်မှာလည်း ဘိုးဘေးကြီးက သူ့အား လက်ဆင့်ကမ်းပေးထားခဲ့ခြင်း ဖြစ်၏။ သူ၏ဆရာ သင်ကြားပေးခဲ့သော နဂါးနတ်ဘုရားဓားသိုင်းအတွင်း၌မူ ဤတိုက်ကွက်ကို မှတ်တမ်းတင်ထားခြင်း မရှိပေ။

ဤတိုက်ကွက်ကို "ထိတ်လန့်ဖွယ် နဂါးသုတ်သင်ခြင်း" ဟု ခေါ်ဆိုပေသည်။

နဂါးနတ်ဘုရားတစ်ပါးမှာ ဟိန်းဟောက်သံနှင့်အတူ ထွက်ပေါ်လာခဲ့ပြီး ၎င်း၏ မေးရိုးများအကြား၌ သွေးနီရောင် ဓားရှည်တစ်လက်ကို ကိုက်ခဲထား၏။ ထိုဓားရှည်မှာ တစ်ခုလုံး သွေးကဲ့သို့ နီရဲနေပြီး ပြင်းထန်သော သတ်ဖြတ်လိုသည့် ဆန္ဒများကို ထုတ်လွှတ်နေခဲ့သည်။ ထိုခဏချင်းမှာပင် ဟင်းလင်းပြင်အတွင်း၌ သွေးညှီနံ့များ ဖုံးလွှမ်းသွားခဲ့ရ၏။

“ဂီး...”

နဂါး၏ ဟိန်းဟောက်သံမှာ ကောင်းကင်နှင့် မြေပြင်အကြား ပဲ့တင်ထပ်သွားခဲ့သည်။ နဂါးနတ်ဘုရားမှာ ဒေါသတကြီး ဟိန်းဟောက်လိုက်ပြီး ၎င်း၏ပါးစပ်ထဲမှ သွေးနီရောင်ဓားရှည်မှာ ရှောင်ချူမော့၏ ရွှေရောင်အလင်းတန်းဆီသို့ ထိုးစိုက်သွားလေတော့သည်။

“ဒါက ဘယ်လို ဓားသိုင်းမျိုးလဲ...”

“တကယ်ကို အစွမ်းထက်လွန်းတာပဲ...”

ဤသည်ကို မြင်လိုက်ရသည့်အခါ ချီထျန်းဓားဂိုဏ်းမှ အကြီးအကဲလော့မှာ ထိုင်နေရာမှ ဝုန်းခနဲ ထရပ်လိုက်ပြီး သူ၏မျက်လုံးများမှာ အံ့ဩလွန်းသဖြင့် ပြူးကျယ်နေခဲ့၏။ ဤတိုက်ကွက်မှာ အလွန်ပင် အစွမ်းထက်လွန်းလှပေသည်။ ဤသည်မှာ သူ၏ဘဝသက်တမ်းတစ်လျှောက်တွင် တွေ့ရခဲသော မြင်ကွင်းမျိုး ဖြစ်၏။

ရှောင်ရင်းဟောင်သည်လည်း စိုးရိမ်တကြီးနှင့် ထရပ်လိုက်ပြီး သူ၏ခန္ဓာကိုယ်တစ်ခုလုံးမှာ အနည်းငယ် တုန်လှုပ်နေခဲ့သည်။ သူ၏သားဖြစ်သူ ဤတိုက်ကွက်ကို တောင့်ခံနိုင်ပါ့မလားဆိုသည်ကို သူ မသိပေ။

“ဂျိမ်း...”

နဂါးနတ်ဘုရား၏ ပါးစပ်အတွင်း ကိုက်ခဲထားသော သွေးနီရောင်ဓားရှည်သည် မည်သူမျှ မယှဉ်နိုင်သော ဓားအလင်းတန်းနှင့် ထိတွေ့သွားပြီး ကမ္ဘာပျက်မတတ် ပေါက်ကွဲသံကြီး ထွက်ပေါ်လာခဲ့၏။ ဟင်းလင်းပြင်မှာ အက်ကွဲသွားခဲ့ပြီး ၎င်း၏လမ်းကြောင်းပေါ်ရှိသမျှ အရာအားလုံးမှာ ခြေမှုန်းခြင်း ခံလိုက်ရသည်။ ဧရာမ ပေါက်ကွဲမှုကြီးမှာ ငွေလမင်းမြို့တော်တစ်ခုလုံးကို ပဲ့တင်ထပ်သွားစေခဲ့၏။ ထိုအခိုက်အတန့်တွင် ပတ်ဝန်းကျင်ရှိ စင်မြင့်များပေါ်၌ အက်ကြောင်းများ ပေါ်လာခဲ့ပြီး ထိတ်လန့်တကြားဖြစ်နေသော ကြည့်ရှုသူ မြောက်များစွာမှာ အရပ်ရပ်သို့ ထွက်ပြေးကြတော့သည်။

“ဂီး...”

နဂါးနတ်ဘုရားမှာ ကောင်းကင်ယံသို့ မော့ကြည့်လျက် ဟောက်လိုက်ပြီး ၎င်း၏ နဂါးကိုယ်ဟန်မှာ ဝင်းလက်သွားကာ ထိတ်လန့်နေသော ရှောင်ချူမော့ထံသို့ ရုတ်တရက် ခုန်အုပ်လိုက်လေသည်။

သွေးဓားနှင့် ရွှေရောင်အလင်းတန်းများမှာ ပျောက်ကွယ်သွားခဲ့လေသည်။ နဂါးနတ်ဘုရား ပုံရိပ်ယောင်မှာ ရှောင်ချူမော့အား ရိုက်ခတ်မိသွားသည့်အခါ မယုံကြည်နိုင်လောက်အောင် ကြီးမားသော အင်အားတစ်ခုက သူ့အား လွင့်စင်သွားစေခဲ့၏။

သူသည် လေထဲမှာ ရှိနေစဉ်မှာပင် သွေးတစ်လုပ်ကို အန်ထုတ်လိုက်ရသည်။

ထိုစဉ်ပုံရိပ်တစ်ခုမှာ လေထဲသို့ လျင်မြန်စွာ ပျံတက်သွားခဲ့ပြီး ရှောင်ချူမော့အား ဘေးကင်းစွာ ဖမ်းယူလိုက်၏။

ထို့နောက် ရှောင်ရင်းဟောင်သည် သူ၏ပါးစပ်အတွင်းသို့ ကုသရေးဆေးလုံးတစ်လုံးကို အလျင်အမြန် ထည့်ပေးလိုက်သည်။ သူသည် တိုက်ခိုက်ရေးစင်မြင့်ပေါ်က လှပသော အမျိုးသမီးငယ်အား ဒေါသတကြီး စိုက်ကြည့်လိုက်သော်လည်း သူ၏ဒေါသကို ထုတ်ဖော်မပြောဝံ့ပေ။

စုဝမ်ယီသည် ထိုအံ့ဩဖွယ်ကောင်းသော အဆုံးစွန်သော တိုက်ကွက်ကို အသုံးပြု၍ သူ၏သားကို အနိုင်ယူခဲ့ခြင်း ဖြစ်သည်။ ယခုအခါ သူမသည် ချီထျန်းဓားဂိုဏ်းမှ အကြီးအကဲလော့၏ မျက်စိထဲတွင် မျက်နှာသာပေးခံရသူ ဖြစ်သွားခဲ့လေသည်။ ချီထျန်းဓားဂိုဏ်းအတွင်း သူမ၏ အနာဂတ်မှာ အကန့်အသတ်မရှိ တောက်ပနေတော့မည် ဖြစ်၏။ သူမသည် မကြာမီမှာပင် အတွင်းစည်းတပည့်အဆင့်မှနေ၍ ကောင်းကင်ဘုံဂုဏ်ဆောင်တပည့်များထဲမှ တစ်ဦး ဖြစ်လာပေလိမ့်မည်။

ထိုအချိန်ကျလျှင် သူ၏သား ရှောင်ချူမော့သည် စုဝမ်ယီ၏ အကာအကွယ်ကိုပင် တောင်းခံရပေလိမ့်မည်။ ရှောင်ရင်းဟောင်သည် မြေပြင်ပေါ်သို့ ပြန်လည်ဆင်းသက်လိုက်ပြီး သူ၏နှလုံးသားမှာ မဖော်ပြနိုင်သော ဝမ်းနည်းမှုနှင့် မကျေနပ်မှုများဖြင့် ပြည့်နှက်နေခဲ့၏။ သူသည် တည်ငြိမ်သော အမူအရာကိုသာ အတင်းအကျပ် ဟန်ဆောင်ထားလိုက်ရတော့သည်။

ဖြူဖျော့နေသော ရှောင်ချူမော့မှာ ဆေးလုံးသောက်ပြီးနောက် တဖြည်းဖြည်း သက်သာလာခဲ့၏။ နဂါးနတ်ဘုရား ပုံရိပ်ယောင်မှာ သူ့အား ရိုက်ခတ်မိသွားသော်လည်း ၎င်း၏ အင်အားမှာ ကုန်ဆုံးနေပြီဖြစ်သဖြင့် သာမန်ဒဏ်ရာအချို့သာ ရရှိခဲ့ခြင်း ဖြစ်သည်။ မည်သို့ပင်ဆိုစေကာမူ နဂါးနတ်ဘုရား ပုံရိပ်ယောင်၏ အပြင်းထန်ဆုံးသော တိုက်ခိုက်မှုမှာ ၎င်း၏ ပါးစပ်ထဲက သွေးနီရောင် ဓားအလင်းတန်းအတွင်း၌သာ စုစည်းနေခြင်း ဖြစ်ပေသည်။

စုဝမ်ယီသည် လေကို အသာအယာ ရှူထုတ်လိုက်ပြီး သူ၏ နက်ရှိုင်းသောခုနစ်စဉ်ကြယ်ဓားကို ဓားအိမ်အတွင်းသို့ ပြန်ထည့်လိုက်၏။

ယခု မိသားစုသုံးခုသိုင်းပြိုင်ပွဲ၏ နောက်ဆုံးအောင်နိုင်သူမှာ သူပင်ဖြစ်သည်ကို သံသယဖြစ်စရာ မလိုတော့ပေ။ ကောင်းကင်အဆင့်နေရာမှာ သူ့အတွက်သာ ဖြစ်ရပေမည်။

သူသည် ထိတ်လန့်ဖွယ် နဂါးသုတ်သင်ခြင်းကို အပြည့်အဝ ထုတ်ဖော်နိုင်ခြင်း မရှိသေးပေ။ သူသည် ဘိုးဘေးကြီး၏ စံနှုန်းနှင့် ပြည့်မီရန် အဝေးကြီး လိုပါသေးသည်။ လက်ရှိတွင် သူသည် ဤတိုက်ကွက်ကို ထုတ်ဖော်နိုင်ရန်အတွက် နက်ရှိုင်းသောခုနစ်စဉ်ကြယ်ဓားအပေါ်တွင်သာ လုံးလုံးလျားလျား အမှီပြုနေရခြင်း ဖြစ်၏။ အကယ်၍ အခြား သာမန်ဓားတစ်လက် ဖြစ်နေခဲ့မည်ဆိုပါက သူသည် ဤမျှအထိ ကမ္ဘာပျက်မတတ် ပြင်းထန်သော တိုက်ကွက်မျိုးကို ထုတ်ဖော်နိုင်လိမ့်မည် မဟုတ်ပေ။

အနက်ရောင်ရထားလုံးအတွင်း၌ ရီယွင်သည် အသာအယာ ပြုံးလိုက်၏။ စုဝမ်ယီမှာ နောက်ဆုံးတွင် ကျင့်ကြံမှုအဆင့် ကျော်ဖြတ်နိုင်ခဲ့သော်လည်း သူ၏ ထိတ်လန့်ဖွယ် နဂါးသုတ်သင်ခြင်းမှာမူ လိုအပ်ချက်များ ရှိနေသေးပေသည်။ အနိမ့်ဆုံး စံနှုန်းအရဆိုလျှင် ထိတ်လန့်ဖွယ်နဂါးသုတ်သင်ခြင်းတွင် နဂါးနတ်ဘုရား ကိုးပါးမှာ တစ်ပြိုင်နက်တည်း ထွက်ပေါ်လာရမည်ဖြစ်ပြီး အားလုံးမှာ သွေးနီရောင် ဓားအလင်းတန်း ကိုးခုကို ထုတ်ဖော်မှသာ ခံ့ညားသည်ဟု ဆိုနိုင်ပေလိမ့်မည်။

လက်ရှိ စုဝမ်ယီမှာမူ နဂါးနတ်ဘုရား ပုံရိပ်ယောင် တစ်ခုကိုပင် ခက်ခက်ခဲခဲ ခေါ်ယူနေရခြင်း ဖြစ်၏။ သူသည် ရီယွင်၏ မျှော်မှန်းချက်နှင့် ပြည့်မီရန် အဝေးကြီး လိုသေးသည်။ သို့သော်လည်း ရီယွင်မှာ စိတ်မလောပေ။ ဤတပည့် သုံးဦးမှာ စိတ်ဓာတ်နှင့် အကျင့်စာရိတ္တ ကောင်းမွန်ကြသူများ ဖြစ်ပေသည်။ သူတို့၏ ပါရမီမှာ အနည်းငယ် လိုအပ်ချက် ရှိနေလျှင်ပင် သူက ဖြေရှင်းပေးနိုင်သည့် နည်းလမ်းများ ရှိပေသည်။

မည်သို့ပင်ဆိုစေကာမူ နဂါးနတ်ဘုရားဂိုဏ်း၏ ဓားသိုင်းများအားလုံးမှာ ခန္ဓာကိုယ်အတွင်းရှိ သွေးဗီဇ၏ သိပ်သည်းမှုအပေါ်တွင်သာ အခြေခံနေခြင်း ဖြစ်၏။ အချိန်ကြာလာသည်နှင့်အမျှ ဤလူငယ် သုံးဦး၏ ခန္ဓာကိုယ်အတွင်းက နဂါးဘိုးဘေး အနှစ်သာရသွေး သိပ်သည်းမှုမှာ မြင့်တက်လာမည်ဖြစ်ပြီး သူတို့၏ နဂါးနတ်ဘုရားဓားသိုင်း အစွမ်းမှာလည်း သဘာဝအတိုင်း ပိုမို အားကောင်းလာပေလိမ့်မည်။ တစ်နေ့နေ့တွင် သူတို့သည် စစ်မှန်သော နဂါးနတ်ဘုရား ခန္ဓာကိုယ်များအဖြစ် ပြောင်းလဲသွားကြမည်ဖြစ်ပြီး သူတို့၏ ပါးစပ်အတွင်း ဓားတစ်လက်ကို ကိုက်ခဲလျက် ကောင်းကင်နှင့် မြေကမ္ဘာကို ဖျက်ဆီးနိုင်လောက်အောင် ပြင်းထန်သော တိုက်ကွက်များကို ထုတ်ဖော်နိုင်ကြပေလိမ့်မည်။

“စုဝမ်ယီ အနိုင်ရရှိပါတယ်...”

တိုက်ခိုက်ရေးစင်မြင့်ဘေးက ဒိုင်မှာ ခေတ္တမျှ မှင်တက်မိနေခဲ့ပြီးနောက်မှ ပြိုင်ပွဲ၏ ရလဒ်ကို နောက်ဆုံးတွင် ကြေညာလိုက်တော့သည်။

ပတ်ဝန်းကျင်ရှိ လူအုပ်ကြီးမှာ လက်များကို မြှောက်လျက် ကျယ်လောင်စွာ အော်ဟစ်အားပေးကြ၏။ ဤ နာမည်ကျော်ပြိုင်ပွဲဝင် စုဝမ်ယီအပေါ် မျှော်လင့်ချက် ထားရှိခဲ့ကြသောသူများမှာ သူတို့၏ လက်ဖဝါးများ နီရဲလာသည်အထိ အားပါပါ လက်ခုပ်တီးနေကြတော့သည်။

စုဝမ်ယီမှာ တိုက်ခိုက်ရေးစင်မြင့်ပေါ်တွင် တည်ငြိမ်စွာ ရပ်နေခဲ့၏။ သူသည် နောက်ဆုံးအောင်ပွဲကို ရရှိခဲ့သော်လည်း အလွန်အမင်း ပျော်ရွှင်မြူးထူးခြင်းမျိုး မရှိပေ။

ထိုစဉ် ချီထျန်းဓားဂိုဏ်းမှ အကြီးအကဲလော့မှာ ရုတ်တရက် ထရပ်လိုက်ပြီး သူ၏မျက်နှာပေါ်က အပြုံးနှင့်အတူ မေးမြန်းလိုက်သည်။

“စုဝမ်ယီ... မင်း ငါ့ရဲ့ ချီထျန်းဓားဂိုဏ်းကို ဝင်ချင်လား...”

အကြီးအကဲလော့က ဤစကားကို ပြောလိုက်သည့်အခါ ပတ်ဝန်းကျင်ရှိ ကျင့်ကြံသူများအားလုံးမှာ မနာလိုမှုများ၊ ငြူစူမှုများနှင့် ပြည့်နှက်နေသော အမူအရာများ ထွက်ပေါ်လာခဲ့ကြ၏။

ရှန်ဖုန်းမင်းဆက်တွင် အဓိကအင်အားစုကြီး သုံးခု ရှိပေသည်။ ၎င်းတို့မှာ ချီထျန်းဓားဂိုဏ်း၊ ရှန်ဟိန်းဂိုဏ်းနှင့် ယွီမော့ဂိုဏ်းတို့ ဖြစ်ကြ၏။ ဤအင်အားစု သုံးခုစလုံးမှာ ထိပ်သီးဂိုဏ်းကြီးများအဖြစ် သတ်မှတ်ခြင်း ခံထားရသည်။ ထိုသို့သော ဂိုဏ်းကြီးများတွင် ကောင်းကင်တံတားနယ်ပယ်ရှိ သန်မာသူများမှာ မြစ်ကို ဖြတ်ကျော်နေသော ငါးများကဲ့သို့ပင် မြောက်များစွာ ရှိနေကြပြီး သူတို့ထံတွင် ပြန်လည်မွေးဖွားခြင်းနယ်ပယ်ရှိ အနှိုင်းမဲ့ သန်မာသူများပင် ကြီးကြပ်ပေးနေကြခြင်း ဖြစ်၏။ သူတို့၏ အင်အားမှာ မယုံကြည်နိုင်လောက်အောင်ပင် ဖြစ်ပေသည်။

“ကျွန်မက နဂါးနတ်ဘုရားဂိုဏ်းရဲ့ တပည့်တစ်ယောက်ပါ... ကျွန်မ တခြားဘယ်ဂိုဏ်းကိုမှ မဝင်ချင်ပါဘူး...”

စုဝမ်ယီက သူ၏ခေါင်းကို ငုံ့လျက် တိုးညင်းစွာ ပြောလိုက်၏။

ပတ်ဝန်းကျင်တစ်ခုလုံးမှာ ဆူညံသွားခဲ့ရသည်။ ဤ အလွန်လှပသော အမျိုးသမီးငယ်က ချီထျန်းဓားဂိုဏ်းမှ အကြီးအကဲလော့၏ ဖိတ်ခေါ်မှုကို တကယ်ပင် ငြင်းပယ်လိမ့်မည်ဟု မည်သူမျှ ထင်မထားခဲ့ကြပေ။

အခန်း ၅၇ ပြီးပါပြီ။