ဝမ်ရှန်းစံအိမ်တော်သို့ ဦးတည်ခြင်း ၂

လောလောဆယ်တွင် ခေတ္တမျှငြိမ်သက်နေခြင်းက ပညာရှိရာရောက်ပေလိမ့်မည်။

ပဉ္စမမြောက် ဘေးဒုက္ခကို ကျော်လွှားရန် လိုအပ်သော ကောင်းကင်ဂုဏ်ဆောင် မဟာနတ်ဆိုးကြီးများ၏သတင်းမှာ ယခုအချိန်အထိ မရရှိသေးပေ။

ရှန်းယီသည် ယခင်က ဝူကျွင်း တင်ပြခဲ့သောကိစ္စရပ်ကိုပြန်လည်စဉ်းစားကာ ခေတ္တမျှတွေးတောလိုက်သည်။ အင်အားကြီးမားသော အဖွဲ့အစည်းတစ်ခု ကျူးကျော်ဝင်ရောက်လာပြီဖြစ်သောကြောင့်၊ အနောက်ပိုင်းဟုန်သည် တဖြည်းဖြည်းနှင့် ဖရိုဖရဲအခြေအနေသို့ ရောက်ရှိသွားမည်မှာ မလွဲဧကန်ပင်။

စိမ်းရောင် ဖီးနစ်ငှက် နှင့် မဟာနတ်ဆိုးမျိုးနွယ်စုကြီးမှ နှင်းကျားတို့သည် သေချာပေါက် တုံ့ပြန်ကြလိမ့်မည်။ အကယ်၍ သတင်းအချို့ကို စုံစမ်းသိရှိနိုင်ပြီး သူတို့ကို ပိုမိုဖယ်ရှားနိုင်မည်ဆိုပါက၊ အနာဂတ်တွင် သူဘေးနား၌ ကူညီပေးရန် တာအိုပေါင်းစည်းခြင်းအဆင့် နတ်ဆိုးကျောက်တိုင်နှစ်ခု ရှိနေခြင်းက သူ၏ ကြိုးပမ်းအားထုတ်မှုများကို များစွာ အထောက်အကူပြုစေလိမ့်မည်။

ပထမဦးစွာ သတင်းအချက်အလက် စုဆောင်းရန်အတွက် လူစည်ကားသော နေရာတစ်ခုကို ရှာဖွေရမည်။

ထိုသို့ စဉ်းစားပြီးနောက်၊ ရှန်းယီသည် မတ်တပ်ရပ်လိုက်ပြီး ခရမ်းဖြူရောင်သက်တံရှည်ကြီးတစ်ခုအဖြစ် ပြောင်းလဲကာ ထိုနေရာမှ ပျောက်ကွယ်သွားလေ၏။

...

အနောက်ပိုင်းဟုန်ရှိ၊ ထန်ယွင်

ပုံမှန်အားဖြင့် စည်ကားနေတတ်သော စားသောက်ဆိုင်လေးမှာ ယခုအခါအနည်းငယ် ဟာလာဟင်းလင်းဖြစ်နေသည်။ စားသောက်ဆိုင်ပိုင်ရှင်သည် ကောင်တာကို မှီနေပြီး၊ သူ၏ အပြုံးမှာဖော်ရွေဟန်ရှိသော်လည်း ဖွင့်မပြောရဲသော ဒေါသများ ရောယှက်နေလေ၏။

အပြင်ဘက်တွင် လူပင်လယ်ကြီးကဲ့သို့ စည်ကားနေသော်လည်း၊ ဆိုင်အတွင်း၌မူ စားပွဲတစ်လုံးတည်းသာ လူရှိနေလေသည်။

တစ်စုံတစ်ယောက်က ထိုနေရာရှိ လူများကို ရှင်းထုတ်ထားကြောင်း သိသာထင်ရှားလှ၏။

တုနှိုင်းမဲ့ဂိုဏ်း၏ တာအိုကလေးငယ် နှင့် လင်းယွဲ့ဂိုဏ်း၏ တာအိုကလေးငယ်တို့သည် အနည်းငယ် သက်တောင့်သက်သာမရှိ ဖြစ်နေပုံရသည်။

သူတို့ ဂိုဏ်းမှ ထွက်ခွာလာစဉ်က၊ ဝေ့ယွမ်ကျိုးက သတိထား၍ လှုပ်ရှားရန် မှာကြားခဲ့သော်လည်း၊ ယခု သူတို့၏ ထင်ပေါ်ကျော်ကြားသော အပြုအမူများမှာ သိသာထင်ရှားလွန်းနေပေသည်။

သို့သော် မည်သူကမျှ ကန့်ကွက်စကား မဆိုခဲ့ကြချေ။

မည်သို့ပင်ဆိုစေကာမူ သူတို့သည် အနောက်ပိုင်းဟုန်တွင် ရောက်ရှိနေသည်မှာ အတန်ကြာပြီဖြစ်ပြီး၊ ယခု ပေးပို့သော သတင်းစကားမှာ ပထမဆုံးအကြိမ် မဟုတ်သော်လည်း ဤမျှယဉ်ကျေးပျူငှာသောတုံ့ပြန်မှုကို ရရှိခြင်းမှာ ပထမဆုံးအကြိမ်ပင် ဖြစ်သည်။

ဝမ်ရှန်းစံအိမ်တော်ကို အသစ်ထွက်ပေါ်လာသော ကျင့်ကြံသူအင်အားစုများထဲမှ တစ်ခုအဖြစ် သတ်မှတ်ထားကြ၏။ အလွန်တရာ အင်အားမကြီးမားသော်လည်း၊ မကြာသေးမီကမှ တာအိုပေါင်းစည်းခြင်းအဆင့်သို့ ချိုးဖျက်ဝင်ရောက်ခဲ့သော ဂိုဏ်းချုပ်တစ်ဦးတည်းဖြင့်ပင် မသေမျိုးဂိုဏ်းစာရင်းသို့ ဝင်ရောက်နိုင်ခဲ့ပြီး သတင်းအချက်အလက်ကြွယ်ဝမှုကြောင့် နာမည်ကြီးလေသည်။

တောင်ပိုင်းဟုန်၏ သားတော်ခုနစ်ပါးအား ကူညီရန် ဆန္ဒရှိကြောင်း ပြသသည့် ပထမဆုံးသောအင်အားစုမှာ ယခင်က သူတို့ သိပ်မမျှော်လင့်ထားခဲ့သော ဤအဖွဲ့အစည်းဖြစ်မည်ဟု တာအိုကလေစငယ်နှစ်ဦးစလုံး မထင်မှတ်ထားခဲ့ကြပေ။

ဤလူများမှာ ယဉ်ကျေးပျူငှာသည်ဟု သူတို့ ဆိုရခြင်း၏ အကြောင်းရင်းမှာ ထိုသို့တုံ့ပြန်ရုံသာမက၊ဈေးအနီးသို့ အမှတ်မထင်ရောက်ရှိနေသော သူတို့၏ကိုယ်ပိုင် တာအိုကလေးငယ်ကိုပါ လူကိုယ်တိုင်လာရောက်နှုတ်ဆက်ရန် စေလွှတ်လိုက်သောကြောင့် ဖြစ်သည်။

"ကောင်းကင်ကနေ ပိုင်မုန့်တွေ ကျလာနိုင်တယ်ဆိုတာ မင်း ယုံလား" ဟု တုနှိုင်းမဲ့ဂိုဏ်း၏ တာအိုကလေးငယ်က မျက်နှာချင်းဆိုင်ရှိ လူအချို့ကို ကြည့်ကာပြုံးစိစိဖြင့် သူ၏ ဂိုဏ်းတူညီအစ်ကိုများထံသို့ သတင်းစကား ပါးလိုက်သည်။

"ငါမယုံဘူး" ဟု လင်းယွဲ့ဂိုဏ်း၏ တာအိုကလေးငယ်က ယဉ်ကျေးစွာဖြင့် သူ၏ခွက်ကို မြှောက်ပြရင်းတိုးညှင်းစွာ ပြန်လည်ဖြေကြားလိုက်သည်။

ယခင်က ဖြစ်ရပ်သည် အနောက်ပိုင်းဟုန်၏ အခြေအနေကို သက်ရောက်မှုရှိမည်ဆိုလျှင်ပင်၊ ဤကဲ့သို့သော ဂိုဏ်းတစ်ခုမှ ဤမျှလျင်မြန်သော တုံ့ပြန်မှုနှင့် စိတ်အားထက်သန်သော ကြိုဆိုမှုကို ရရှိမည်ဟု မထင်မှတ်ထားခဲ့ပေ။

"ဒါဆို... ငါတို့ ဆုတ်ခွာဖို့ ဆင်ခြေတစ်ခုခု ရှာရမလား" တုနှိုင်းမဲ့ဂိုဏ်း၏ တာအိုကလေးငယ်သည် မျက်လွှာကို အနည်းငယ် ချလိုက်သည်။

သူ၏ အဖော်ထံမှ တိုက်ရိုက်ငြင်းပယ်ခံရမည်ဟု မမျှော်လင့်ထားသဖြင့် အနည်းငယ် အံ့အားသင့်သွား၏။ လင်းယွဲ့ဂိုဏ်းမှ လာသော ထိုအစ်ကိုကြီးသည် ဝေ့ယွမ်ကျိုးထက်ပင် ပို၍ သတိထားတတ်သူဖြစ်ရာ၊ ဤအပြုအမူမှာ သူ၏ စရိုက်နှင့် သိပ်မကိုက်ညီလှပေ။

"ငါတို့ မထွက်သွားဘူး" ဟု လင်းယွဲ့ဂိုဏ်း၏ တာအိုကလေးငယ်က မျက်နှာအမူအရာမပြောင်းလဲဘဲ သတင်းစကားမှတစ်ဆင့် ရှင်းပြလိုက်သည်။

"ငါတို့မှာ အချိန်သိပ်မရှိတော့ဘူး။ သေချာတာပေါ့၊ သူတို့က တကယ်လက်ကမ်းကူညီမှာတော့ မဟုတ်ဘူး။ ဘာပဲဖြစ်ဖြစ် ဒီသတင်းအချက်အလက် ရောင်းဝယ်ရေးသမားတွေက ဖြောင့်မတ်မှန်ကန်မှုအကြောင်း ပြောလေ့မရှိဘူးလေ။ ဒါပေမဲ့ သတင်းအချက်အလက်အတွက် ပစ္စည်းအချို့နဲ့ လဲလှယ်တာကတော့ ပြဿနာ မရှိနိုင်ပါဘူး။"

ဤအကူအညီတောင်းခံမှုသည် အလွန်ခက်ခဲရခြင်း၏ အကြောင်းရင်းမှာ တောင်ပိုင်းဟုန်၏ သားတော်ခုနစ်ပါးသည် အနောက်ပိုင်းဟုန်နှင့် ပတ်သက်၍ သိရှိမှုအလွန်နည်းပါးပြီး၊ ခေါင်းပြတ်နေသော ယင်ကောင်များကဲ့သို့ ယောင်လည်လည် ဖြစ်နေသောကြောင့်ပင်။

"ဒီလိုဆိုရင်လည်း ယဉ်ကျေးတဲ့ စကားတွေပြောပြီး အချိန်မဖြုန်းဘဲလိုရင်းကိုပဲ သွားကြတာပေါ့" ဟု တုနှိုင်းမဲ့ဂိုဏ်း၏ တာအိုကလေးငယ်က ပြောလိုက်သည်။

"ခဏလောက် ထပ်စောင့်ကြည့်ရအောင်။ ဂိုဏ်းချုပ်ကျိက ဒီမှာမရှိဘူးဆိုတော့ ပြဿနာတစ်ခုခုတက်လာမှာကို ငါ စိုးရိမ်တယ်။ ယွမ်ကျိုးနဲ့ တခြားသူတွေဆီကို ငါ သတင်းပို့ပြီးပြီ။ဆုံးဖြတ်ချက်တစ်ခုခုချဖို့ လိုလာရင် အားလုံးတိုင်ပင်ပြီးမှလုပ်တာက ပိုအဆင်ပြေလိမ့်မယ်" ဟု လင်းယွဲ့ဂိုဏ်း၏ တာအိုကလေးငယ်က ဆိုသည်။

"သူတို့ဘက်က အခြေအနေ ဘယ်လိုရှိလဲ" ဟု တုနှိုင်းမဲ့ဂိုဏ်း၏ တာအိုကလေးငယ်က မေးလိုက်သည်။

"ယွမ်ကျိုး ပြောတာကတော့... ပန်ရှန်းဂိုဏ်းက တောင်ပိုင်းဟုန် သားတော်ခုနစ်ပါးကို အပြည့်အဝ ထောက်ခံကူညီဖို့ သဘောတူထားပြီးပြီတဲ့၊ ဒါ့အပြင် အဲဒါက ဂိုဏ်းချုပ်ကိုယ်တိုင်ရဲ့ အမိန့်တဲ့" ဟု လင်းယွဲ့ဂိုဏ်း၏ တာအိုကလေးငယ်က ဖြေကြားလိုက်သည်။

ဤစကားကို ကြားလိုက်ရသောအခါ တုနှိုင်းမဲ့ဂိုဏ်း၏ တာအိုကလေးငယ်မှာ တည်ငြိမ်မှုကိုပင် ဆုံးရှုံးလုနီးပါး ဖြစ်သွားပြီး ဝိုင်ဖိတ်ကျသွားသကဲ့သို့ ဟန်ဆောင်ကာ သူ၏ အဝတ်အစားများကို ပုတ်ခတ်လိုက်ရ၏။

သူတို့သည် ဤမျှအခက်အခဲ တွေ့နေရချိန်တွင် ဟိုဘက်တွင်မူ အရာအားလုံး အဆင်ပြေချောမွေ့နေခြင်းက လူတစ်ယောက်ကို စိတ်မသက်မသာ ဖြစ်စေရန် လုံလောက်ပေသည်။

ဂိုဏ်းချုပ်၏ အမိန့်ဆိုသည်မှာ... လိုအပ်လာပါက ပန်ရှန်းဂိုဏ်းချုပ် ကိုယ်တိုင်ပင် ဝင်ရောက်စွက်ဖက်မည်ဟု အဓိပ္ပာယ်ရလေသည်။

နှစ်ဖက်စလုံးသည် ခိုင်မာစွာ မဟာမိတ်ဖွဲ့ပြီးဖြစ်လေပြီ။

တောင်ပိုင်းဟုန်အတွက် တာအိုပေါင်းစည်းခြင်းအဆင့် စွမ်းအားရှင်နှစ်ဦး၏ အကူအညီကို ရုတ်တရက် ရရှိလိုက်သကဲ့သို့ပင်။

"..."

စားပွဲတစ်ဖက်တွင်၊ သိမ်မွေ့၍ အေးဆေးတည်ငြိမ်သောအသွင်အပြင်ရှိသည့် မီးခိုးရောင်ဝတ်ရုံ အမျိုးသားသည် တာအိုကလေးငယ်နှစ်ဦး၏ မျက်နှာအမူအရာ အပြောင်းအလဲများကို မမြင်ဟန်ဆောင်ကာ ပေါ့ပေါ့ပါးပါးစကားစမြည် ဆက်ပြောနေပြီး ခွက်ကို မြှောက်ကာ ပြုံးလျက် ပြောလိုက်၏။

"တာအိုညီအစ်ကိုနှစ်ယောက် ဘယ်တော့လောက် ခရီးထွက်ဖြစ်မလဲတော့ မသိဘူး၊ ဂိုဏ်းကို ကြိုပြီး အကြောင်းကြားထားဖို့က လုအတွက် ပိုကောင်းလိမ့်မယ်။"

"ကျွန်တော်တို့ကို ခွင့်လွှတ်ပါ တာအိုကလေးငယ်လု၊ အရင်က စီစဉ်ထားတဲ့အတိုင်း ကျွန်တော်တို့ရဲ့ ဂိုဏ်းတူအစ်ကိုတွေ အစ်မတွေ ရောက်လာတာကို စောင့်ရဦးမယ်" ဟု လင်းယွဲ့ဂိုဏ်း၏ တာအိုကလေးငယ်က ပြုံးလျက် ခေါင်းခါကာ ပြောလိုက်သည်။

"ဘာမှ အခက်အခဲ မရှိပါဘူး။ ခင်ဗျားတို့အားလုံးက ရင်းနှီးကျွမ်းဝင်မှုမရှိတဲ့နယ်မြေမှာ ရောက်နေတာဆိုတော့ အတူတူခရီးသွားတာက ပိုပြီး လုံခြုံစိတ်ချရတာ အမှန်ပါပဲ။ ဒါဆိုလည်း ဈေးမှာ နောက်ထပ် ရက်အနည်းငယ်လောက် နေကြတာပေါ့" ဟု လုမင်ချွမ်း က တုံ့ပြန်လိုက်သည်။

မကျေနပ်သည့် အရိပ်အယောင်မျှ မပြသည့်အပြင်၊ ထောက်ထားညှာတာစွာဖြင့်ပင် စိတ်သက်သာရာရစေရန် ပြောဆိုလိုက်လေ၏။

သို့သော် သူ စကားမဆုံးမီတွင်ပင်၊ သူသည် ခေါင်းကို အနည်းငယ်မော့ကာ အပြင်ဘက်သို့ အံ့သြနေသောအမူအရာဖြင့် လှမ်းကြည့်လိုက်သည်။

အရပ်မြင့်မြင့်နှင့် သွယ်လျသော ပုံရိပ်တစ်ခုသည် စားသောက်ဆိုင်အတွင်းသို့ တိတ်ဆိတ်စွာ ဝင်ရောက်လာပြီး၊ သူ၏ဘေးတွင် နူးညံ့သိမ်မွေ့သော ရုပ်ရည်ရှိသည့် မိန်းကလေးငယ်တစ်ဦးသာ ပါလာလေသည်။

သူသည် ဆိုင်ရှင်၏ သတိပေးချက်ကို သတိမပြုမိသကဲ့သို့ပင်၊ တောင်ပိုင်းဟုန်မှ တာအိုကလေးငယ် နှစ်ဦးရှိရာ စားပွဲဆီသို့ တိုက်ရိုက် လျှောက်သွားကာ သူတို့ဘေးတွင် ဝင်ထိုင်လိုက်လေ၏။

လုမင်ချွမ်း၏ နှုတ်ခမ်းများ အနည်းငယ် တွန့်ကွေးသွားသော်လည်း၊ သူသည် အလျင်စလို ဒေါသမထွက်ဘဲယဉ်ကျေးစွာ မေးလိုက်သည်။

"ဒီနှစ်ယောက်က တာအိုညီကိုတို့ရဲ့ မိတ်ဆွေဟောင်းတွေများလား"

တောင်ပိုင်းဟုန် တာအိုကလေးငယ် နှစ်ဦးသည်လည်း အသစ်ရောက်လာသူ၏ မျက်နှာကို မှတ်မိသွားကြ၏။ တုနှိုင်းမဲါဂိုဏ်းမှ တာအိုကလေးငယ်၏ သူငယ်အိမ်မှာ သိသိသာသာ ကျုံ့သွားပြီး မသိစိတ်၏ စေ့ဆော်မှုအရ မတ်တပ်ရပ်၍ အရိုအသေပေးရန်ပြင်လိုက်သော်လည်း လင်းယွဲ့ဂိုဏ်းမှ တာအိုကလေးငယ်က တိတ်တဆိတ် ဆွဲထားလိုက်လေသည်။

"ဟုတ်ပါတယ်။"

ရိုးရိုးသားသားပြောရလျှင် လင်းယွဲ့ဂိုဏ်း၏ တာအိုကလေးငယ်သည်လည်း အတော်လေး အံ့အားသင့်နေမိသည်။ သူသည် ယွမ်ကျိုးနှင့် အခြားသူများထံသို့ ယခုလေးတင်မှ သတင်းပို့ထားခြင်း ဖြစ်သော်လည်း၊ ဂိုဏ်းချုပ်ရှန်းမှာ ရောက်ရှိနေပြီ ဖြစ်သည်။

သို့သော် သူ၏ ပေါ့ပေါ့ပါးပါး အမူအရာကို ကြည့်ခြင်းအားဖြင့် ဂိုဏ်းချုပ်ရှန်းသည် သူ၏ မည်သူမည်ဝါဖြစ်ကြောင်းကို ထုတ်ဖော်လိုပုံမရဟု ယူဆလိုက်၏။

ဂိုဏ်းချုပ်တစ်ဦး ရှိနေပြီဖြစ်သောကြောင့် နောက်ထပ်ဆူပူလှုပ်ရှားမှုများ ပြုလုပ်ရန် မလိုအပ်တော့ချေ။ မည်သို့ပင်ဆိုစေကာမူ သားတော်ခုနစ်ပါး ညီလာခံတွင် ပါဝင်ခဲ့သူတိုင်းသည် ဂိုဏ်းချုပ်ရှန်း၏ စွမ်းအားကို ကောင်းစွာ သိရှိထားသင့်ပေသည်။

အနည်းဆုံးတော့ စုဟုန်ရှို့ထက် မလျော့နည်းဘဲ၊ ပို၍ပင် ကြီးမားနိုင်ပေသည်။

ထို့အပြင် သူ၏ လေးစားခံရသော အဆင့်အတန်းအရ တောင်ပိုင်းဟုန်၏ သားတော်ခုနစ်ပါးကိုယ်စားဆုံးဖြတ်ချက်အများစုကို ချမှတ်နိုင်စွမ်းရှိလေသည်။

"တုနှိုင်းမဲ့ဂိုဏ်းက တိုက်ကျင်းရှု ပါ၊ ဂိုဏ်းချုပ်ရှန်းကို ဂါရဝပြုပါတယ်။"

"လင်းယွဲ့ဂိုဏ်းက ကျုံးရှို့ ပါ၊ ဂိုဏ်းချုပ်ရှန်းကို ဂါရဝပြုပါတယ်။"

သူတို့နှစ်ဦးစလုံးသည် စိတ်ချင်းဆက်သွယ်မှုဖြင့် နှုတ်ခွန်းဆက်စကား ဆိုလိုက်ကြပြီး လက်ရှိအခြေအနေကို အကျဉ်းချုံးရှင်းပြကာ၊ ရှန်းယီ၏ နောက်ကွယ်ရှိ မိန်းကလေးငယ်ကို စပ်စုသော အကြည့်ဖြင့် ကြည့်ရန် အခွင့်အရေး ယူလိုက်ကြ၏။

"ဝမ်ရှန်းစံအိမ်က လုမင်ချွမ်းပါ၊ လူကြီးမင်းရဲ့ အမည်နာမကို သိခွင့်ပြုပါ"

လုမင်ချွမ်းသည် မတ်တပ်ရပ်ကာ အလေးအနက် အရိုအသေပေးလိုက်၏။ ဤလူကို မြင်တွေ့လိုက်ရချိန်တွင် တိုက်ကျင်းရှု၏ မျက်နှာအမူအရာ အပြောင်းအလဲကို သူ ထက်မြက်စွာ ဖမ်းယူနိုင်ခဲ့ပြီး၊ သူ၏ အထင်မမှားပါက ဤလူသည်လည်း တောင်ပိုင်းဟုန် တာအိုကလေးငယ်များထဲမှ တစ်ဦးဖြစ်ပြီး၊ သေချာပေါက် အဆင့်အတန်း အမြင့်ဆုံးသူ ဖြစ်ရပေမည်။

"အခမ်းအနားတွေ လုပ်နေစရာ မလိုပါဘူး၊ ရှန်းပါ။"

ရှန်းယီ အနည်းငယ် ခေါင်းညိတ်လိုက်၏။ သူသည်လည်း ဤမျှကံကောင်းသော တိုက်ဆိုင်မှုမျိုးကို မမျှော်လင့်ထားခဲ့ချေ။

သတင်းအချက်အလက်အချို့ စုဆောင်းရန်အတွက်သာလာရောက်ရန် စီစဉ်ထားသော်လည်း အသိမိတ်ဆွေများနှင့် တွေ့ဆုံရမည်ဟု မထင်မှတ်ထားခဲ့ပေ။

သူသည် မကြာသေးမီက ရရှိခဲ့သော အကျိုးအမြတ်များကြောင့် အလွန်အလုပ်များနေသဖြင့် နန်ယန်၏ ဂိုဏ်းချုပ်ဟူသော သူ၏ ကိုယ်ပိုင်အမှတ်လက္ခဏာကိုပင် မေ့လုနီးပါး ဖြစ်နေခဲ့၏။

သူတို့၏ ရည်မှန်းချက်များ တူညီနေသောကြောင့် အတူတူခရီးသွားခြင်းက အဆင်ပြေပေသည်။

ကျုံးရှို့၏ စိုးရိမ်ပူပန်မှုများနှင့် ပတ်သက်၍မူ အကယ်၍ ဝမ်ရှန်းစံအိမ်တွင် အခြားသော ရည်ရွယ်ချက်များ အမှန်တကယ် ရှိနေပါက၊ ငွေဖြင့် ဝယ်ယူခြင်းအပြင်အခြားသော နည်းလမ်းများဖြင့် သတင်းအချက်အလက် ရယူရန်အတွက် ရှန်းယီ စိတ်မရှိချေ။

"တာအိုညီကိုရှန်း ရောက်လာပြီဆိုတော့၊ ကျန်တဲ့သူတွေကရော" လုမင်ချွမ်းက ပတ်ဝန်းကျင်ကို ဝေ့ကြည့်လိုက်သည်။

"သူတို့ လမ်းမှာ ပြဿနာတချို့ကြုံရလို့ ဖြစ်နိုင်ပါတယ်၊ သူတို့ကို မစောင့်ကြနဲ့တော့လေ" ဟု တိုက်ကျင်းရှုက ပြောလိုက်သည်။

ဂိုဏ်းချုပ်ရှန်း တစ်ယောက်တည်း ရောက်လာသည်ကို မြင်သောအခါ၊ ကျန်တာအိုကလေးငယ် သုံးဦးအကြောင်းကိုမပြောဘဲ သူတို့သည် အခြားကိစ္စများဖြင့် အလုပ်များနေနိုင်သည်ဟု ယူဆကာ ပြတ်သားစွာ မတ်တပ်ရပ်လိုက်သည်။

"အို့"

ဤစကားကို ကြားသောအခါ လုမင်ချွမ်း၏ မျက်လုံးများတွင် မသိမသာစိတ်ပျက်သွားသည့် အရိပ်အယောင်တစ်ခု ဖြတ်သန်းသွားသော်လည်း ချက်ချင်းပင် ပြန်လည်ဖုံးကွယ်လိုက်သည်။

သူတို့သည် လူနှစ်ဦး လျော့နည်းနေသော်လည်း၊ အနည်းဆုံးတော့ အရေးကြီးသော ပုဂ္ဂိုလ်တစ်ဦးကို ဖိတ်ခေါ်နိုင်ခဲ့၏။

မဟာမိတ်ဖွဲ့ခြင်း၏ ပြယုတ်တစ်ခုအနေဖြင့် ၎င်းသည် လုံလောက်သင့်ပေပြီ။

"ဒါဆို... ငါတို့ ထွက်ကြမလား"

လုမင်ချွမ်းသည် ပြုံးလျက် မတ်တပ်ရပ်လိုက်ရာ၊ ဝမ်ရှန်းစံအိမ်မှ ကျင့်ကြံသူများသည်လည်း အလျင်အမြန်လိုက်ပါ မတ်တပ်ရပ်လိုက်ကြသည်။

"ဟင် အဲဒီစကားက သိပ်ကျက်သရေရှိပုံ မပေါ်ဘူးနော်" ဟု တိုက်ကျင်းရှုက မျက်စောင်းထိုးကာ နောက်ပြောင်လိုက်သည်။

"တောင်းပန်ပါတယ်၊ တောင်းပန်ပါတယ်" လုမင်ချွမ်းက သူ့ကိုယ်သူ ရယ်မောဟန်ဖြင့် လက်ယမ်းကာ ပြောလိုက်၏။

"လုက စကားပြော မတတ်လို့ပါ၊ ကျေးဇူးပြုပြီး အပြစ်မယူပါနဲ့"

တိုက်ကျင်းရှု ရယ်မောလိုက်ပြီး သူ၏ အကြည့်ကို ရုပ်သိမ်းလိုက်ကာ သိပ်အလေးအနက် မထားတော့ချေ။

ယခင်က သူ အတော်လေး သတိထားနေခဲ့ရလျှင် ယခုအခါများစွာ စိတ်အေးသက်သာ ဖြစ်သွားပြီဖြစ်သည်။

ဤသည်မှာ မောက်မာခြင်းမဟုတ်ဘဲ လက်တွေ့ကျခြင်းပင်။ ဂိုဏ်းချုပ်ရှန်း သူ၏ဘေးတွင် ရှိနေသဖြင့် ဂိုဏ်းချုပ်တစ်ဦးအပေါ် အရေးယူဆောင်ရွက်ခြင်းသည် ဂိုဏ်းတစ်ခုလုံးကို ဖျက်ဆီးရန်လုံလောက်သော ရန်ငြိုးတစ်ခုကို ကြေညာခြင်းနှင့် တူညီကြောင်း သာမန်အသိရှိသူတိုင်း သိရှိထားသင့်ပြီး၊ သားတော်ခုနစ်ပါးအား တောင်ပိုင်းဟုန်ကို ဘေးဖယ်ထားကာ အနောက်ပိုင်းဟုန်တွင် စုပေါင်း၍ လက်စားချေရန် လှုံ့ဆော်မှု ဖြစ်လာစေနိုင်သည်။

ဝမ်ရှန်းစံအိမ်ကဲ့သို့သော မည်သည့်ဂိုဏ်းမဆိုသာမက၊ အနောက်ပိုင်းဟုန် တစ်ခုလုံးတွင်ပင် အနောက်ပိုင်းနဂါးနန်းတော်သာလျှင် ဤကဲ့သို့သော ဧရာမအင်အားစုကြီး၏ အမျက်ဒေါသကို ခံနိုင်ရည်ရှိပေလိမ့်မည်။

မည်သည့်အခြေအနေမျိုးတွင်မဆို သူတို့၏ မည်သူမည်ဝါဖြစ်ကြောင်း ထုတ်ဖော်လိုက်ရုံဖြင့် တစ်ဖက်လူအား အကျိုးဆက်များကို ဂရုတစိုက် စဉ်းစားရန် ဖိအားပေးနိုင်ပေသည်။

ဝမ်ရှန်းစံအိမ်သည် သတင်းအချက်အလက်ကို အရောင်းအဝယ်လုပ်ခြင်းဖြစ်ပြီး အခြားသူများအတွက် သူတို့၏ အသက်ကို စတေးရန် မဟုတ်ချေ။

ထိုသို့သော မိုက်မဲမှုမျိုးသည် သူတို့ကို သတ္တိဆယ်ဆ ပေးထားလျှင်တောင်မှ လုံလောက်မည် မဟုတ်ပေ။